Ish-Drejtori Juridik në bashkinë e Tiranës Alban Dokushi, një ditë më parë i është përgjigjur thirrjes së prokurorëve të posaçëm duke u paraqitur në SPAK.

Mësohet se për disa minuta ai ka ka qëndruar në zyrat e Byrosë Kombëtare të Hetimit.

“Ora News” u interesua pranë zyrës së tij ku pohuan se është paraqitur për të marrë disa akte hetimore duke qenë pjesë e ekipit mbrojtës të Erjon Veliajt.

Por nuk përjashtohet mundësia që ai të jëtë marrë në pyetje mbi hetimet që po kryhen.

Në muajin mars Dokushi u paraqit në SPAK për të dëshmuar mbi hetimet e dosjes pasi ishte personi që ka takuar Erjon Veliaj në qeli.

Lidhur me këtë ngjarje ai u shpreh në atë kohë se: “Unë e kam takuar kryebashkiakun Erion Veliaj me autorizim të prokurorisë”.

The post Takoi Erion Veliajn në qeli, ish-drejtori Juridik në Bashkinë e Tiranës, Alban Dokushi, rikthehet në SPAK appeared first on Albeu.com.

Policia e Sarandës, ka zbardhur konfliktin me armë në Sarandë të një dite më parë, ku mbetën të plagosur dy të rinj nga Kamza.

Sipas informacioneve policore, në kërkim janë shpallur 4 persona si të përfshirë.

Gjithashtu, në pranga është vënë edhe njëri prej të plagosurve, pasi iu gjet një armë.

Njoftimi i Policisë Sarandë:

Zbardhet dhe dokumentohet ngjarja e ndodhur ditën e djeshme, në Sarandë, ku dy shtetas mbetën të plagosur me armë zjarri.

Shpallen në kërkim 4 shtetas të përfshirë në këtë ngjarje, njëri prej të cilëve tentoi të vriste me armë zjarri dy shtetasit.

Vihet në pranga edhe një prej të plagosurve, pasi gjatë kontrollit iu gjet dhe iu sekuestrua një armë zjarri pistoletë.

Në vijim të hetimeve për zbardhjen dhe dokumentimin e ngjarjes së ndodhur më datë 17.07.2025, rreth orës 15:00, në një lokal, në lagjen nr. 3, Sarandë, specialistët për Hetimin e Krimeve të Rënda në DVP Vlorë, në bashkëpunim me specialistët për Hetimin e Krimeve në Komisariatin e Policisë Sarandë, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Sarandë, kryen të gjitha veprimet hetimore dhe procedurale të nevojshme për dokumentimin e plotë ligjor të ngjarjes, ku si rezultat u shpallën në kërkim katër shtetas:

Erjon Canaj, Artan Murtaj, Klaus Jaçaj dhe Ramadan Zoto. 

Ramadan Zoto., 43-vjeç, banues në Sarandë, për veprën penale “Vrasja në rrethana të tjera cilësuese”, e mbetur në tentativë.

Eejon Canaj., 36-vjeç, Artan Murtaj., 43-vjeç, dhe Klaus Jaçaj., 31-vjeç, të tre banues në Sarandë, për veprën penale “Përkrahja e autorit të krimit”.

Nga veprimet hetimore ka rezultuar se për motive të dobëta, këta shtetas janë konfliktuar fizikisht me shtetasit G. H., 33-vjeç, dhe E. L., 25-vjeç, të dy banues në Tiranë dhe gjatë këtij konfliktit, shtetasi R. Z. dyshohet se ka qëlluar drejt tyre me armë zjarri, duke i plagosur rëndë të dy. Shtetasit G. H, dhe E. L, ndodhen në Spitalin e Traumës, Tiranë, nën kujdesin e mjekëve.

Gjatë hetimeve dhe kontrolleve të ushtruara në kuadër të zbardhjes së kësaj ngjarjeje, shtetasit G. H. iu gjet dhe iu sekuestrua një armë zjarri pistoletë. Në vijim të veprimeve u bë arrestimi në flagrancë i tij, për veprën penale “Mbajtja pa leje dhe prodhimi i armëve, armëve shpërthyese dhe i municionit”.

Në vendngjarje u sekuestruan, në cilësinë e provës materiale, 4 gëzhoja arme zjarri, një armë zjarri pistoletë tip “Beretta” dhe një krehër me 9 fishekë.

Vijon puna për kapjen e personave të shpallur në kërkim dhe vënien e tyre përpara përgjegjësisë ligjore.

Materialet procedurale iu referuan Prokurorisë për veprime të mëtejshme.

The post Të shtënat me armë zjarri në Sarandë/ Policia zbardh ngjarjen, shpallen në kërkim 4 persona (EMRAT) appeared first on Albeu.com.

“Avioni është në duart e tua”. Me këto fjalë, komandanti Sumeet Sabharwal, i besoi zëvendëskomandantit Clive Kunder drejtimin e ngritjes së fluturimit Air India 171 nga Ahmedabad drejt Londrës Gatwick.

Biseda është ndër të parat e regjistruara nga një prej “kutive të zeza” në orën 12:39 të datës 12 qershor, tregojnë për Corriere della Sera dy burime perëndimore të njohura me përmbajtjen.

Nuk është një procedurë e pazakontë, sqarojnë ato; kjo vendoset rast pas rasti. Por mund të jetë bërë qëllimisht nga veterani Sabharwal.

Me 330 kilometra në orë

Në orën 13:38 e 42 sekonda, tre sekonda pasi avioni ishte shkëputur nga pista me një shpejtësi prej 330 kilometrash në orë, komandanti ngriti dorën e djathtë, e çoi drejt dy levave të konsolës qendrore të Boeing 787 dhe ndërpreu, me radhë dhe me shpejtësi, rrjedhën e karburantit për motorin e majtë e më pas për atë të djathtë, duke ndjekur atë që pilotët e quajnë “memorie muskulore”.

Misteri i motiveve

Pse Sabharwal, i vlerësuar dhe pa asnjë njollë në karrierën e tij, vendosi të përplasë një avion me 241 persona të tjerë në bord, mbetet i vetmi mister i një tragjedie që i kushtoi jetën 260 personave (përfshirë 19 që ndodheshin në një ndërtesë të shkatërruar nga përplasja). Mund të duhen muaj e vite për ta kuptuar. Një gjë është e sigurt: sipas tre pilotëve të pyetur, ai zgjodhi të vetmen hapësirë kohore për të vepruar “pa u penguar”.

Befasia

Raporti paraprak ka konstatuar — pa shpjeguar si — që ndërprerësit janë zhvendosur nga “Run” në “Cutoff”. Siç ka zbuluar kjo gazetë, ishte një nga pilotët që e bëri këtë, me atë që dy burimet perëndimore e kanë cilësuar si “gjest i qëllimshëm”. Ishte komandanti Sabharwal ai që i lëvizi, ka konfirmuar Wall Street Journal. Zëvendëskomandanti Kunder, fillimisht i befasuar, u kap nga paniku dhe e pyeti disa herë e me ngulm eprorin e tij për arsyen e këtij veprimi, ndërsa komandanti e mohoi dhe më pas heshti.

Ngritja

Zyra për Hetimin e Aksidenteve Ajrore të Indisë, autoriteti që po drejton hetimin, ka bërë thirrje që “të mos nxirren përfundime të nxituara mbi atë që ndodhi”, duke theksuar se raporti përfundimtar do të përfshijë shkaqet kryesore dhe rekomandimet. Por për palët perëndimore nuk ka dyshim mbi dinamikën. Ditët e fundit, një pilot indian ka zbuluar për gazetat se komandanti vuante prej kohësh nga depresioni. Hetimi do të tregojë nëse kjo ka pasur një rol kyç në tragjedi.

Pyetja

Por çfarë ndodhi me fluturimin? Ja përmbledhja më e detajuar deri më tani. Në orën 13:38 e 39 sekonda, avioni shkëputet nga pista, siç konfirmon raporti paraprak. Por në orën 13:38 e 42 sekonda motorët privohen nga karburanti, kur avioni po udhëtonte me 180 nyje (333 kilometra në orë). Në orën 13:38 e 44 sekonda — tregojnë burimet — mikrofoni i lidhur me sediljen e zëvendëskomandantit regjistron Kunder duke pyetur, me shumë habi: “Pse i fiket motorët?”. Një sekondë më vonë, mikrofoni tjetër, ai i vendosur në pozicionin e komandantit, regjistron një “nuk isha unë”. Kunder nuk bindet dhe e pyet disa herë të tjera, për gjashtë sekonda të tjera.

Zhurma e levave

Zëvendëskomandanti po drejtonte avionin, ndërsa eprori i tij ishte në rol mbikëqyrës dhe ndihmës. Duart e Kunder ishin të zëna me komandën e timonit dhe përqendrimi i tij ishte në mbajtjen e parametrave të shpejtësisë, drejtimit dhe ekuilibrit. Nëse nuk e pa, zëvendëskomandanti me siguri e ndjeu që komandanti kishte lëvizur ndërprerësit: “tingulli i krijuar nga lëvizja prej sipër poshtë është i padiskutueshëm”, konfirmojnë pilotët e pyetur.

Ndihma e mikrofonëve

Jo vetëm kaq. Burimet perëndimore kujtojnë se mikrofonët e shumtë të instaluar në kabinë mundësojnë jo vetëm identifikimin e zërave dhe tingujve të ndryshëm — përfshirë ato të ndërprerësve të karburantit — por edhe mundësinë për të përcaktuar me “siguri të arsyeshme” se kush ka kryer manovrën. Edhe ky kombinim i regjistrimeve audio ka çuar në identifikimin e përgjegjësisë.

Ekranet e fikur

Ndërkohë, kutia tjetër e zezë, “Regjistruesi i të Dhënave të Fluturimit”, regjistron fikjen e monitorëve në pjesën e zëvendëskomandantit. Kjo sepse — tregojnë pilotët — për të ulur konsumin e energjisë në emergjencë, lihet i ndezur vetëm ekrani i komandantit (i furnizuar me bateri). Në orën 13:38 e 47 sekonda, në pjesën e pasme të avionit aktivizohet “Turbina Ajrore Ram” (Rat), një pajisje emergjence që ndizet automatikisht në rast të humbjes së energjisë elektrike dhe/ose presionit hidraulik të shkaktuar nga ndërprerja e motorëve.

“Mayday” dhe përplasja

“Rat”-i fillon të furnizojë me pak energji disa sisteme kritike. Në orën 13:38 e 52 sekonda, zëvendëskomandanti kthen levën e karburantit të motorit 1 (ai i majti) nga “Cutoff” në “Run”, i cili më pas fillon të riaktivizohet, por jo në mënyrë të mjaftueshme. Në orën 13:38 e 56, Kunder rikthen në “Run” edhe motorin 2. Por situata është e pashpresë. Dhe në orën 13:39 e 5 sekonda lëshohet sinjali “Mayday”. Në orën 13:39 e 11 sekonda kutitë e zeza ndalojnë regjistrimin. Boeing 787 ishte përplasur me disa ndërtesa./Corriere della sera

The post Tragjedia ajrore në Indi, kapiteni Sumeet Sabharwal i ngriti një kurth kolegut: Avioni është në duart tuaja appeared first on Albeu.com.

Marrëdhënia mes Ardon Jasharit dhe Milanit nuk është mbyllur ende. Pavarësisht mungesës së zhvillimeve të fundit konkrete në negociatat mes klubit italian dhe Klub Bryzhit, shpresat në kampin kuqezi janë ende të gjalla.

Sinjalet vijnë drejtpërdrejt nga vetë lojtari, mesfushori zviceran nuk ka pozuar për fotografinë zyrtare të ekipit belg, një detaj që, për shumëkënd, është tregues i qartë i dëshirës së tij për t’u transferuar në Milano.

OBJEKTIVI- I lindur në vitin 2002, Jashari është bërë tashmë një objektiv i deklaruar i Milanit. Mesfushori, sipas burimeve të afërta me klubin, ka arritur një marrëveshje parimore me klubin italian. Por problemi qëndron te kërkesat e Bryzhit. Klubi belg nuk heq dorë nga shifra prej 40 milionë eurosh pa bonuse, ndërsa oferta e Milanit ndalet në 32.5 milionë plus bonuse, që do ta çonin shumën totale në rreth 35-36 milionë euro.

NGËRÇI- Përplasja financiare ka sjellë një ngërç që, sipas portalit belg “HLN”, mund ta afrojë Jasharin më shumë me një qëndrim të mundshëm në Belgjikë. “Gjasat që Jashari të qëndrojë te Bryzhi janë rritur pak”, shkruan portali, duke shtuar se Milani për momentin e ka vendosur mesfushorin në pritje.

DËSHIRA- Megjithatë, dëshira e Jasharit mbetet e qartë dhe mungesa e tij në ndeshjen miqësore kundër Lokomotiv Zagrebit, duket më shumë si një mesazh për drejtuesit kuqezinj, Tare dhe Furlani, sesa një masë ndëshkuese nga klubi belg.

IRONIA- Në një kthesë ironike të fatit, zgjidhja për këtë çështje mund të vijë… nga rivali historik, Interi. Nëse zikaltrit arrijnë të mbyllin transferimin përfundimtar të Aleksandër Stankoviç, mesfushori që konsiderohet si pasuesi i Jasharit te Bryzhi, atëherë hapet rruga për kalimin e zviceranit te Milani. Interi kërkon një klauzolë riblerjeje maksimale prej 25 milionë eurosh për Stankoviç, ndërsa Bryzhi këmbëngul për 30 milionë. Diferenca prej 5 milionësh po negociohet, me synimin për të arritur marrëveshjen përfundimtare. Nëse palët bien dakord, atëherë ëndrra e Jasharit për të veshur fanellën kuqezi mund të bëhet realitet. Për momentin, topi është ende në fushën e negociatave.

The post Ardon Jashari ndan rrugët me Bryzh, Igli Tare nuk e ndryshon ofertën për shqiptarin appeared first on Albeu.com.

Në orët e para të mëngjesit të sotëm, një shpërthim me lëndë plasëse është regjistruar në Rrugën e Durrësit në Tiranë.

Pronari i lokalit, Arbër Sinani, ka deklaruar në polici se nuk e ka idenë se kush mund të jenë autorët që i kanë vendosur sasinë e tritolit në lokalin e tij.

Sipas tij, ai nuk ka konflikte me persona të tjerë. A2 CNN, raporton se në Shqipëri ai nuk figuron me precedentë penalë.

Sinani prej disa kohësh ka jetuar në Gjermani, ku dyshohet se mund të ketë qenë i përfshirë në paligjshmëri dhe përplasjet me persona të tjerë për drogën, mund të jetë motivi për vendosjen e eksplozivit.

Dy kamera që ka lokali, nuk kanë DVR ç`ka e bën të vështirë punën për hetuesit për identifikimin e aktorëve të dyshuar.

Ndërkohë, janë sekuestruar kamerat e bizneseve të tjera për t’i ndihmuar grupin hetimor.

The post Tritoli në qendër të Tiranës/ Dyshimet e para të policisë, flet pronari: Nuk kam konflikte appeared first on Albeu.com.

Në orët e para të mëngjesit të sotëm, një shpërthim me lëndë plasëse është regjistruar në Rrugën e Durrësit në Tiranë.

Sipas informacioneve paraprake nga policia, rreth orës 03:45, dyshohet se një sasi e vogël eksplozivi është vendosur pranë derës hyrëse të një lokali në pronësi të shtetasit A. S.

Fatmirësisht, shpërthimi nuk ka shkaktuar të lënduar, por janë regjistruar dëme materiale në ambientet e lokalit.

Në vendngjarje ndodhet grupi hetimor, i cili po punon për identifikimin dhe kapjen e autorëve, si dhe për zbardhjen e plotë të rrethanave të ngjarjes.

Policia po analizon kamerat e sigurisë dhe po merr dëshmitë përkatëse.

Njoftimi i policisë:

Rreth orës 03:45, në Rrugën e Durrësit, në lokalin në pronësi të shtetasit A. S., dyshohet se ka plasur një sasi e vogël lënde plasëse, e vendosur pranë derës hyrëse të lokalit.

Si pasojë janë shkaktuar vetëm dëme materiale. Nuk ka persona të lënduar.

Grupi hetimor po vijon punën për identifikimin dhe kapjen e autorit/autorëve, si dhe për zbardhjen e plotë të rrethanave të ngjarjes.

The post Shpërthim me lëndë plasëse në një lokal në Tiranë appeared first on Albeu.com.

Deputeti i zgjedhur demokrat, Belind Këlliçi, ka lëshuar akuza të ashpra ndaj ish-kreut të Partisë Demokratike, Lulzim Basha, duke e cilësuar atë një ministër shtetit për opozitën të kabinetit Rama.

I ftuar në Debat, Këlliçi insiston se faktet kanë treguar se Rama ka vjedhur dhe zgjedhjet e 2021, por se Basha nuk reaguar.

Në lidhje me zgjedhjet e 11 majit, demokrati Këlliçi shton se Rama ende nuk ka marrë një përshëndetje zyrtare nga Shtetet e Bashkuara.

Këlliçi: Të njëjtin mendim kam dhe për zgjedhjet e vitit 2021, të cilat mendoj se janë vjedhur nga kryeministri në detyrë. Atë tren që nuk e morëm në 2021 për denoncimin e zgjedhjeve, këtë herë nuk e lemë të na shkojë. Ne kemi për detyrë që para qytetarëve, institucioneve ndërkombëtare dhe para raportit të OSBE, duhet të bëjmë punën për të treguar që këtu ka pasur farsë. DASH refuzon të japë një përshëndetje për zgjedhje në Shqipëri.

Në 2021 kishim një tjetër performancë, ku përpara se vetë kryeministri të shpallte fitoren ka dalë ish ambasadorja Kim dhe e ka uruar dhe ka komplimentuar ministrin e shtetit për opozitën, zotin Basha për performancën e tij në zgjedhje dhe për heshtjen që pasoi më pas. Pasi foli guvernatorja, ministri për opozitën nuk pati asnjë reagim.

The post Belind Këlliçi: Basha në 2021-n, ministër i Ramës për opozitën, 11 maji ishte farsë appeared first on Albeu.com.

Prej disa ditësh, tatimorët kanë nisur aksionin për kontrollin e tregtimit të produkteve bujqësore me qëllim gjurmueshmërinë e mallrave për forcimin e sigurisë ushqimore.

Ndërmarrja e aksionit parashikohet të zbatohet nëpërmjet disa fazave sipas Drejtorisë së Përgjithshme të Tatimeve (DPT), ku përveç subjekteve në Tiranë aksioni do të zhvendoset drejt rretheve dhe më pas te pikat e grumbullimit dhe përpunimit.

Gjatë këtyre ditëve, aksioni i tatimorëve është fokusuar në tregjet e mëdha të tregtimit të mallrave bujqësore dhe blegtorale, baxhot dhe thertoret në Tiranë.

Në Tiranë në 3 ditët e para të aksionit, janë kontrolluar 87 subjekte dhe janë sekuestruar 20 ton mallra blegtorale që kanë rezultuar se tregtoheshin pa faturë.

“Fokusi i aksionit për tregtimin e mallrave me faturë do të jenë tregjet e mëdha, thertoret, baxhot, më pas grumbulluesit dhe përpunuesit të cilat kanë volum tregtar të lartë që më pas tregtohen në të gjithë vendin. Nga kontrollet e kryesore deri tani më problematik për tregtim të mallit pa faturë rezultojnë tregjet e mëdha të mallrave bujqësore dhe blegtorale dhe thertoret”, pohon administrata tatimore.

Në fazën e dytë, sipas drejtorisë së Përgjithshme të Tatimeve përveç Tiranës dhe zonave përreth saj, aksioni do të shtrihet edhe në rrethe, ku fokusi do të jenë tregjet e mëdha, baxhot e grumbullit të qumështit dhe thertoret e kafshëve.

Në fazën e tretë, administrata tatimore parashikon që aksioni të shtrihet te pikat e grumbullimit dhe përpunimit të mallrave blegtorale.

Administrata Tatimore, thekson sërish se fokusi i aksionit është forcimi i kontrollit në terren mbi lëshimin e autofaturës për tregtimin e produkteve blegtorale, te tregjet e mëdha të tregtimit të mallrave bujqësore, thertoret, baxhot dhe më pas grumbulluesit dhe përpunuesit e mëdhenj.

Tatimet pohojnë se, tregtarët e vegjël dhe ambulantët nuk janë në fokus të aksionit. Ndërsa numri i supermarketeve të kontrolluara deri tani mbetet i ulët.

Aksioni i ndërmarrë nga aksioni tatimet synojnë të rrisin të ardhurat, dhe të forcojnë sistemin për gjurmueshmërinë e mallit.

Në mbyllje të aksionit nëpërmjet të cili synohet të rritet autofaturime për mallrat e tregtuara nga fermeri, qeveria parashikon të nisë zbatimin e skemës së rimbursimit të TVSH-së në masën 10% për fermerin.

Projektligji për kthimin e skemës së kompensimit të TVSh-së, pritet të shqyrtohet për miratim vitin e ardhshëm, ku dhe do të nisë zbatimin.

Pas ndryshimeve që u bënë në vitin 2019 në skemën e rimbursimit të TVSH-së ku nga 20% u ul në 6%, prej 2022 TVSH-ja e kreditueshme për blerjet e mallrave nga fermerët u shfuqizua. / Monitor

The post Nga tregjet bujqësore te thertoret dhe përpunuesit, aksioni për faturimin do shtrihet në 3 faza appeared first on Albeu.com.

Sot, më 18 korrik 2025, dollari amerikan, blihet me 83.4 lekë dhe shitet me 84.5 lekë.

Euro,  blihet me 97.1 lekë dhe shitet 97.9 lekë.

Franga zvicerane, këmbehet në blerje me 103.4 lekë, ndërsa në shitje me 104.8 lekë.

Paundi britanik, blihet me 111.7 lekë dhe shitet me 113 lekë.

Dollari kanadez, sot në blerje këmbehet me 60.6 lekë, ndërsa në shitje me 62.1 lekë.

Më poshtë, po sjellim të dhënat e këmbimin valutor, për të gjitha monedhat e huaja:

The post Këmbimi valutor/ Çfarë po ndodh me monedhat e huaja? Me sa po blihen dhe shiten dollari dhe euro appeared first on Albeu.com.

Këtë të premte, në Shqipëri vijon depërtimi i masave ajrore të nxehta nga Afrika drejt rajonit të Ballkanit, duke sjellë edhe në vendin tonë mot të kthjellët dhe temperatura të larta.

Herë pas here, priten vranësira të lehta dhe kalimtare në zonat Verilindore dhe Juglindore të Shqipërisë.

Parashikohet që pasditja dhe nata, të mbeten të kthjellëta dhe të nxehta në të gjithë territorin e vendit.

Temperaturat e ajrit do të rriten në të dy vlerta ekstremale ditore, duke u luhatur nga 9°C vlera më e ulët në Verilindje të vendit, deri në 39°C pritet vlera maksimale në qarkun e Elbasanit.

Era do të fryjë e lehtë dhe mesatare me shpejtësi maksimale mbi 35 km/h nga drejtimi kryesisht verior, duke krijuar në brigjet detare dallgëzim 2 ballë.

The post Parashikimi i motit 18 Korrik 2025/ Si do variojnë temperaturat gjatë ditës appeared first on Albeu.com.

Këtë të enjte, në një intervistë të dhënë  në Euronews Albania, gazetari i njohur investigativ Artan Hoxha, ka hedhur dritë mbi mënyrat e ndryshme që disa individë, përfshirë figura të njohura të shoëbizit, përdoren për të hyrë në burgje.

Hoxha bëri disa deklarata të forta, ku tregoi për rastet konkrete dhe mënyrën si funksionon.

“Para disa vitesh ka qenë një mënyrë tjetër, hynin dhe si psikologe ose si trajnuese brenda. Hyjmë te problemi tjetër që pastaj duheshin ndërruar psikologët se kishin probleme. Ata që janë brenda përdorin 1 mijë forma sidomos ata që kanë para. Një personazh i njohur i showbizit nuk shkon aty se ka dashuri për atë. Nuk përbën ndonjë çudi, se në fund të fundit ata kanë krijuar dhe kanë bërë fëmijë në burg”,-tha Hoxha.

Sipas tij, ka një proces që duhet ndjekur për miratimin e vizitave të tilla, por edhe ky proces mund të devijohet.

“Është dhe dikush që e jep miratimin edhe në fakt duhet ndjekur kjo gjëja se kush e jep nga institucioni. Të dënuarit kanë të drejta të kenë takime të tilla. Të paraburgosurit jo”,-tha Hoxha.

Gjithashtu, gazetari vuri në dukje edhe ndikimin e fuqisë financiare dhe lidhjeve jashtë qelisë, për të mundësuar këto kontakte

“Këta që kanë hyrë tani, këta që janë bosët duhet thënë se këta kanë një buxhet të madh. Duke pasur sasi të madhe parash dhe duke qenë se kanë infrastrukturën e tyre jashtë, ata i kanë kontaktet dhe ata i thonë shko atje dhe ato shkojnë. Ato nuk kanë tarifa fikse, varet kush të thërret dhe ku shkon”,-u shpreh Hoxha.

The post Siguria në burgje/ Flet Artan Hoxha: Vajzat punësohen si psikologe për të bërë eskortën appeared first on Albeu.com.

Gjykata e Posaçme, i lë sërish detyra prokurorit Elvin Gokaj për dosjen “Buka”, që të saktësojë kush janë viktimat shteti apo privati ndërkohë që i kërkoi t’i vërë në dispozicion të gjitha aktet e integruara të hetimit, përfshirë edhe deklarimet e të gjithë personave që janë marrë në pyetje lidhur me këtë çështje.

Prokuroria e Posaçme, ka ndarë çështjen për biznesmenin Lirim Fezolli dhe për disa persona të tjerë, përfaqësues të Ministrisë së Financave, dhe ka sjellë në gjyq vetëm ish-zëvendëskryeministrin Arben Ahmetaj.

Për procedimin e ndarë, është nisur letër porosi në Austri për transfertat e parave dhe pritet përgjigje.

SPAK e ka marrë të pandehur ish-numrin dy të qeverisë për veprën penale “Shpërdorim detyre”, pasi dyshohet se i ka shkaktuar shtetit shqiptar dëm ekonomik në vlerën 7 miliardë lekë.

The post Dosja “Buka” në ngarkim të Ahmetajt, zbardhet porosia e gjykatëses për prokurorin e SPAK appeared first on Albeu.com.

Zjarri në zonën e Drenovës në Mallakastër, vijon të jetë një sfidë e madhe për shërbimet zjarrfikëse, ndërsa situata po përkeqësohet nga tymi i dendur që po pengon punën në terren.

Forcat zjarrfikëse po hasin vështirësi në qasjen dhe shuarjen e flakëve, pasi tymi i rënduar ndikon në dukshmëri dhe sigurinë e punonjësve.

Situata bëhet edhe më shqetësuese, pasi flakët janë afruar shumë pranë puseve të naftës, duke rritur rrezikun për një katastrofë më të madhe.

Pritet ndërhyrja e menjëhershme nga ajri me mjete të specializuara për të vendosur nën kontroll këtë vatër kritike, e për të parandaluar përhapjen e mëtejshme të zjarrit në zona të ndjeshme industriale dhe të banuara.

The post Drenovë/ Flakët u afrohen puseve të naftës, tymi i dendur vështirëson punën e zjarrfikësve appeared first on Albeu.com.

Një tentativë për vjedhje në një dyqan ushqimor në Mamurras është parandaluar falë ndërhyrjes së shpejtë të shërbimeve të Policisë së Kurbinit.

Ngjarja ndodhi gjatë natës, kur një 36-vjeçar, i identifikuar si A. M., banues në Mamurras, hyri i maskuar dhe me kapuç në një dyqan, pasi kishte thyer me çekiç xhamin e derës. Menjëherë pas njoftimit, shërbimet e Komisariatit të Policisë Kurbin u nisën në drejtim të adresës dhe arritën ta kapin autorin në flagrancë, ende brenda në dyqan, me mjetin e krimit në dorë.

Gjatë kontrollit, policia sekuestroi çekiçin, maskën dhe kapuçin që u përdorën në tentativën për vjedhje. 36-vjeçari u arrestua në vendngjarje dhe ndaj tij janë ngritur akuzat për “Vjedhje”, mbetur në tentativë, “Sigurimi i mjeteve për vjedhje” dhe “Shkatërrimi i pronës”.

Materialet procedurale i janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme.

The post Kapet në flagrancë duke vjedhur dyqanin në Mamurras, policia arreston 36-vjeçarin appeared first on Albeu.com.

Erion Veliaj edhe para pak ditësh ka shfaqur probleme shëndetësore. Për shkak të gjendjes shëndetësore, ai nuk arriti të merrte pjesë në seancën gjyqësore për padinë e bërë ndaj emisionit “Piranja” dhe gazetarit Bledian Koka.

Kryebashkiaku i Tiranës, Erion Veliaj, ditën e sotme është dërguar në spitalin e Durrësit. Veliaj ka shkuar në spital për të kryer disa analiza për shëndetin, pasi ka shfaqur probleme shëndetësore.

Raportohet se kryebashkiaku, është shoqëruar nga 30 policë për në spital. Gjithashtu, mësohet se pacientet e tjerë janë nxjerrë nga dhomat, për arsye sigurie.

Veliaj edhe para pak ditësh ka shfaqur probleme shëndetësore. Për shkak të gjendjes shëndetësore ai nuk arriti të merrte pjesë në seancën gjyqësore për padinë e bërë ndaj emisionit “Piranja” dhe gazetarit Bledian Koka.

Erion Veliaj, u arrestua në zyrën e Bashkisë më 10 shkurt si i dyshuar për kryerjen e veprës penale të “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”. Bashkëshortja e kryebashkiakut, Ajola Xoxa është lënë në masë sigurimi “detyrim paraqitje”.

Sipas SPAK, nga të dhënat konkrete të mbledhura deri në këtë fazë të hetimit paraprak, në mënyrë të përmbledhur rezulton se, nga personat nën hetim, specifikisht Veliaj edhe bashkëshortja e tij është ideuar, krijuar dhe vënë në funksionim një mekanizëm që ka synuar dhe ka bërë të mundur, në praktikë, marrjen e përfitimeve të parregullta, të cilat burojnë nga fondet publike që administrohen nga Bashkia Tiranë, përmes titullarit të saj, me qëllim pasurimin personal të këtij të fundit dhe familjes së tij, përmes veprimeve të kamufluara dhe të kundërligjshme.

The post Veliaj përfundon në spital, 30 policë për ta shoqëruar, pacientët e tjerë nxirren nga dhomat për… appeared first on Albeu.com.

Interi është seriozisht pas sulmuesit të Atalantës, Ademola Lukman. Dhe për transferimin e bujshëm mund të përfshihet edhe Kristjan Asllani.

Mediat në Itali, tregojnë se kalimi i Asllanit tek Atalanta do të dërgonte në 25 milionë euro, shifrën e kërkuar nga bergamaskët për Lukman.

Sulmuesi i Nigerisë, është kthyer tashmë në dëshirë kryesore për zikaltrit, që janë të gatshëm të sakrifikojnë.

Asllani do të shkonte ndërkohë në një klub pretendent, që vitin tjetër luan në Champions. Kroati Ivan Juriç është trajneri i bergamaskëve, i cili bashkë me Gjimshitin do ta prisnin lojtarin e Kombëtares.

Fiorentina po ashtu është interesuar për mesfushorin shqiptar. Asllani ndërkohë ka vendosur veton për të qëndruar në Seria A dhe pse ofertat nga jashtë nuk kanë munguar.

The post Interi përfshin Asllanin në transferimin e bujshëm, synohet sulmuesi i rivalëve të Seria A me çdo kusht appeared first on Albeu.com.

Këngëtarja e grupit “Pretty Little Baby”, Connie Francis, ka ndërruar jetë pas një sëmundjeje të shkurtër.

Vdekja e saj u njoftua nga miku i saj i hershëm, Ron Roberts, i cili tha:

“Me zemër të thyer dhe trishtim të thellë ju njoftoj për ndarjen nga jeta të mikeshës sime të dashur Connie Francis mbrëmë. E di që Connie do ta miratonte faktin që fansat e saj janë ndër të parët që mësojnë për këtë lajm të trishtueshëm”.

Më herët këtë muaj, Connie u shtrua në spital dhe u vendos në kujdes intensiv, duke bërë që ajo të tërhiqej nga një shfaqje për Ditën e Pavarësisë (4 korrik).

Gjithashtu, ishte raportuar se 87-vjeçarja vuante nga “dhimbje ekstreme” në zonën e legenit dhe përdorte një karrige me rrota.

Megjithatë, pavarësisht problemeve shëndetësore, këngëtarja e famshme u dha fansave të saj një përditësim mbi gjendjen e saj shëndetësore, duke i falënderuar për mbështetjen e tyre.

“Sot ndihem shumë më mirë pas një nate të mirë dhe doja të shfrytëzoja këtë mundësi për t’ju uruar të gjithëve një 4 Korrik të lumtur”, tha ajo.

Kohët e fundit, Connie u rikthye në qendër të vëmendjes pasi hiti i saj ikonik u bë viral në “TikTok”. Ajo e krijoi këngën në vitin 1962 dhe, për shkak të popullaritetit të saj të fundit, deri më tani është dëgjuar mbi 74 milionë herë në “Spotify”.

Connie foli për “People” rreth ringjalljes së këngës së saj, duke thënë se e kishte harruar: “Të them të vërtetën, as nuk e mbaja mend këngën. Më duhej ta dëgjoja për ta mbajtur mend. Të mendosh që një këngë që kam regjistruar 63 vjet më parë po prek zemrat e miliona njerëzve është vërtet e mrekullueshme. Është një ndjenjë e mrekullueshme”.

The post E trishtë/ Ndahet nga jeta këngëtarja e njohur (EMRI+FOTO) appeared first on Albeu.com.

Ditën e sotme, kryebashkiaku i Tiranës, Erion Veliaj, është dërguar në spitalin e Durrësit, ku mësohet se ka kryer disa analiza mjekesore.

Erion Veliaj, u dërgua në spital pasi ka shfaqur probleme shëndetësore.

Raportohet se kryebashkiaku i Tiranës,  gjatë 6 muajve të qëndrimit në paraburgimin e Durrësit ka humbur rreth 10 kg nga pesha trupore.

Kujtojmë që Erion Veliaj, ndodhet në qeli prej datës 10 Shkurt dhe ndaj tij rëndojnë akuzat për korrupsion, pastrim parash dhe fshehje pasurie.

Kreu i Bashkisë kishte bërë rekurs në Gjykatën e Lartë për lirim nga qelia, por togat e zeza me një vendim të datës 8 Korrik e rrëzuan.

Gjithashtu, edhe kërkesat e tjera të Veliajt në shkallë të ndryshme të gjyqësorit për lirim nga burgu janë rrëzuar.

Në dosjen e SPAK ka të akuzuar dhe nën hetim edhe familjarë të Veliajt dhe disa biznesmenë, përfshirë sipërmarrësin Elman Abule, i cili ndodhet nën masën e sigurisë “arrest shtëpie” dhe akuzohet për pastrim parash në dosjen e kryebashkiakut.

The post Erion Veliaj dërgohet në spitalin e Durrësit, zbulohet arsyeja appeared first on Albeu.com.

Këtë të enjte, Presidenti i Republikës, Bajram Begaj, priti në një takim zyrtar Admiralin Pierre Vandier, Komandantin e Komandës Supreme të NATO-s për Transformimin.

Gjatë takimit, Presidenti e përgëzoi Admiralin Vandier për lidershipin, vizionin dhe profesionalizmin në drejtimin e një prej strukturave më të rëndësishme të Aleancës.

Takimi vjen pak më shumë se një muaj pas Samitit të NATO-s në Hagë, të cilin kreu i shtetit e vlerësoi si historik për të ardhmen e Aleancës dhe si një garanci për forcimin e unitetit dhe kohezionit ndërmjet vendeve anëtare.

Presidenti Begaj, rikonfirmoi angazhimin e Shqipërisë për rritjen e buxhetit të mbrojtjes dhe sigurisë deri në vitin 2035, si dhe përkushtimin për t’i ofruar NATO-s kapacitetet e nevojshme që i nevojiten në përballjen me sfidat e kohës.

Në këtë kuadër, ai vlerësoi edhe rolin e pazëvendësueshëm të misioneve të NATO-s në Kosovë dhe në Bosnjë e Hercegovinë, duke theksuar se prania e Aleancës në rajon, është një garanci për paqen dhe stabilitetin në Ballkanin Perëndimor dhe në Evropë.

Në përfundim të takimit, Presidenti nënvizoi rëndësinë e Komandës për Transformimin si një strukturë kyçe për modernizimin e NATO-s, duke theksuar nevojën për një Aleancë të përgatitur për të përballuar kërcënimet e reja dhe sfidat strategjike të së ardhmes.

The post Presidenti Begaj pret Admiralin e Komandës së Transformimit të NATO-s, thekson angazhimin e Shqipërisë për sigurinë dhe modernizimin e Aleancës appeared first on Albeu.com.

Ditën e sotme, lideri demokrat Sali Berisha, duke folur për shembjen e ndërtimeve në Theth, u shpreh se Edi Rama e shkatërroi zonën si hakmarrje politike primitive ndaj banorëve të zonës, që në zgjedhjet e fundit nuk i dhanë votën Partisë Socialiste.

Gjithashtu, Berisha u shpreh se pak para zgjedhjeve, qeveria krenohej me zhvillimin turistik të Thethit dhe faktin që fshati kishte arritur në 2 mijë shtretër për turistët, një arritje e jashtëzakonshme duke marrë parasysh vështirësitë logjistike të zonës.

Berisha: Ky është rezultati i qendrës së votimit ku ju patë atë krim të shëmtuar.
PD në këtë qendër ka marrë 95 vota dhe PS 82 vota.

Pra, nuk kanë votuar PS-në, kanë votuar PD-në dhe kjo është hakmarrja primitive, kriminale e Edi Ramës ndaj tyre.

Dëgjojeni këtë.

Para zgjedhjeve mburreshin me ato ndërtime, mburreshin se Thethi kishte arritur të ketë 2 mijë shtretër.
Vërtet arritje shumë e madhe, po të kemi parasysh se një shtrat në Theth ka një kosto të paktën tre herë më të lartë se një shtrat në Tiranë apo bregdet, për shkak të infrastrukturës, distancës, etj.

Por ja ku janë 2 mijë shtretërit e Thethit, se si Edi Rama për shkak të disfatës elektorale, u hakmor në mënyrën më primitive, më çnjerëzore ndaj tyre.

Unë u bëj thirrje banorëve të Thethit, Shkodrës dhe mbarë Shqipërisë, të ngrihemi për t’u ndarë në mënyrë përfundimtare nga kjo e keqe e madhe që po rrënon çdo ditë shqiptarët dhe qenien e tyre.

Nga ky armik i egër i veriut të Shqipërisë në mënyrë të posaçme, por edhe shqiptarëve në tërësi, i cili rrezaton çdo ditë armiqësi, urrejtje, negativitet ndaj tyre.
Pra, ky është Thethi i 2 mijë shtretërve sot.

The post Ish-kryeministri Berisha: Edi Rama e shkatërroi Thethin sepse votuan PD-në në zgjedhje appeared first on Albeu.com.