Ministria e Punëve të Brendshme ka krijuar një platformë të re digjitale për publikimin dhe shkëmbimin e të dhënave për dokumentet e humbura ose të vjedhura që shpallen në Gazetën Zyrtare.

Qëllimi është të përshpejtohet komunikimi mes institucioneve dhe t’u ofrohen qytetarëve shërbime më të shpejta dhe më efikase, duke kursyer kohë. Me këtë sistem të ri, shkëmbimi i të dhënave nuk do të bëhet më me email, por përmes platformës kombëtare për ndërveprueshmëri.

Gazeta Zyrtare do t’i marrë çdo ditë automatikisht dokumentet e raportuara si të humbura ose të vjedhura dhe do t’i publikojë si të pavlefshme. Pas publikimit, MPB do t’i marrë po ashtu automatikisht këto të dhëna dhe do t’i përditësojë në sistemin e saj të brendshëm, në mënyrë që qytetarët të mund të marrin më shpejt dokumente të reja.

The post MPB digjitalizon shërbimin për shpalljen e dokumenteve të humbura dhe të vjedhura appeared first on Telegrafi.

Shoqata e Gazetarëve të Maqedonisë (SHGM) shpreh shqetësim serioz për mënyrën se si vazhdon të zbatohet reklamimi politik i paguar (RPP) në mediat online.

Në prag të zgjedhjeve lokale, SHGM rikujton mungesën e kritereve dhe rregullimit në këtë segment, gjë që u mundëson portaleve “të dyshimta” pa transparencë të marrin mjete të konsiderueshme nga buxheti.

Kjo krijon hapësirë për keqpërdorime – një pjesë e portaleve të raportuara janë faqe interneti me pronar të panjohur ose pa impresum, shpesh të krijuara pak para zgjedhjeve me qëllimin e vetëm që paratë shtetërore të kalojnë në fushata partiake. Kjo dukuri e dëmton skenën mediatike dhe paraqet potencial për korrupsion partiako-medial, në dëm të mediave profesionale dhe interesit publik.

SHGM përshëndet iniciativën për krijimin e një regjistri të portaleve pranë ASHMAAV, por kërkon hapa urgjentë për harmonizimin e rregullativës zgjedhore me qëllim parandalimin e korrupsionit në sferën mediatike dhe sigurimin e kushteve të barabarta për të gjitha mediat.

Komisioni Shtetëror i Zgjedhjeve (KSHZ) njoftoi se nga gjithsej 333 media që kanë dorëzuar aplikim për reklamim politik të paguar për zgjedhjet lokale të caktuara më 19 tetor 2025, plot 257 janë portale interneti.

Për krahasim, në zgjedhjet parlamentare dhe presidenciale të vitit të kaluar u shënua interes rekord – 251 portale u paraqitën për RPP në vitin 2024. Ky numër ishte dukshëm më i lartë edhe nga zgjedhjet lokale të vitit 2021, ku morën pjesë 176 portale, si dhe nga zgjedhjet parlamentare të vitit 2020 me 235 portale. Është e qartë se trendi i paraqitjes së mediave online për fushata reklamuese të paguara nga shteti po rritet në çdo cikël.

SHGM paralajmëron se Ligji aktual Zgjedhor nuk vendos kritere të qarta për atë se cilat media online mund të marrin mjete për reklamim politik të paguar. Edhe pse mediat formalisht duhet të regjistrohen në KSHZ me një çmimore, nuk ka rregulla konkrete për kushtet që duhet të plotësojnë portalet për këtë qëllim.

Kjo krijon hapësirë për keqpërdorime – një pjesë e “portaleve” të paraqitura janë faqe interneti me pronar të panjohur ose pa impresum, shpesh të krijuara pak para zgjedhjeve vetëm për të kanalizuar para shtetërore në fushata partiake. Ky fenomen dëmton skenën mediatike dhe përbën potencial për korrupsion partiako-medial, në dëm të mediave profesionale dhe interesit publik.

Edhe vëzhguesit ndërkombëtarë ndajnë të njëjtin mendim. Misioni vëzhgues i OSBE/ODIHR për zgjedhjet e vitit 2024, në raportin e tij, theksoi se “nuk ka rregulla specifike për portalet online” dhe se shumë portale krijohen menjëherë para zgjedhjeve pikërisht për të marrë para shtetërore. ODIHR rekomandoi që, nëse ky model vazhdon të zbatohet, të vendosen menjëherë “kriteret e qarta dhe objektive për përshtatshmërinë e portaleve online për rimbursim shtetëror të reklamave politike të paguara”.

Në të njëjtën linjë është edhe Enti Shtetëror i Revizionit, në raportin për zgjedhjet e vitit 2024, theksoi nevojën për të përcaktuar më saktë Kodin Zgjedhor – duke definuar kriteret që duhet të plotësojnë mediat elektronike për të marrë pjesë në reklamim politik, rregullat për shpërndarjen e mjeteve buxhetore dhe përcaktimin e organit kompetent për mbikëqyrjen e prezantimit të portaleve gjatë fushatës.

Krijimi i Regjistrit të botuesve të mediave online pranë ASHMAAV përfaqëson një hap pozitiv drejt rritjes së transparencës dhe profesionalizimit. Me nismën e Ministrisë së Transformimit Digjital, me ndryshimet e fundit të Ligjit për Media, portalet interneti për herë të parë njihen si media me të drejta dhe detyrime përkatëse.

Për t’u regjistruar zyrtarisht, portalet tani duhet të plotësojnë kushte konkrete, përfshirë:

të jenë person juridik i regjistruar në Regjistrin Qendror me veprimtari mediatike;
të kenë seli dhe redaksi në Maqedoninë e Veriut;
të kenë domen kombëtar interneti (.mk ose .мкд);
të kenë të paktën dy të punësuar me kohë të plotë (ose një të punësuar dhe një të angazhuar me kontratë).
Megjithatë, asnjë nga këto kushte nuk kërkohet për aplikimin në KSHZ për reklamim politik të paguar – çdo portal, madje edhe pa redaksi apo të punësuar, mund të paraqitet për të marrë para shtetërore për reklama.

Interesi i deritanishëm për regjistrin zyrtar të ASHMAAV është i kufizuar – vetëm 49 media online janë regjistruar deri më tani, që përbën rreth 20% të numrit të portaleve që vitin e kaluar morën financim shtetëror për reklama zgjedhore.

SHGM rikujton se vetërregullimi në hapësirën online është po aq i rëndësishëm sa edhe rregullimi ligjor. Që nga viti 2019, SHGM në bashkëpunim me Këshillin për Etikë në Media (KEMM) ka krijuar Regjistrin e parë të mediave profesionale online – Promedia.mk, për të dalluar portalet kredibile nga faqet propagandistike.

Aktualisht, në këtë regjistër vullnetar janë 105 media online me pronësi transparente dhe të angazhuara për respektimin e standardeve profesionale të gazetarisë. Ky numër pritet të rritet me bashkimin e mediave të reja që plotësojnë kriteret, ndërsa ato që i shkelin parimet mund të përjashtohen.

SHGM beson se qytetarët, institucionet dhe sidomos subjektet politike duhet ta përdorin këtë burim për të bërë dallimin midis mediave përgjegjëse dhe atyre që shpërndajnë dezinformata ose shërbejnë si zëdhënës partiakë.

Për të shmangur nxitjen e mëtejshme të korrupsionit në sferën mediatike, SHGM apelon që partitë politike pjesëmarrëse në zgjedhjet lokale, kur vendosin për shpërndarjen e parave publike për reklama partiake, të marrin parasysh regjistrin e ASHMAAV ose atë të Promedia.mk për të mbështetur gazetarinë kredibile në interes të qytetarëve.

Në mungesë të një mekanizmi mbikëqyrës mbi portalet gjatë fushatës, vullneti politik dhe zgjedhja etike e partive janë kyçe për ruajtjen e një ambienti të shëndetshëm mediatik.

Fatkeqësisht, këto zgjedhje lokale po mbahen sërish me rregullat e vjetra, pa u miratuar ndryshimet e propozuara për më shumë transparencë në hapësirën online. SHGM rikujton se organizatat mediatike dhe gazetareske kanë kërkuar disa herë ndryshime në Kodin Zgjedhor, por ato nuk u miratuan për këto zgjedhje.

Kështu, mbeten të njëjtat zgjidhje problematike që krijojnë kushte të pabarabarta në treg – mediat profesionale janë në pozitë të pasigurt përballë fluksit të portaleve të financuara nga partitë.

Për më tepër, për mediat online nuk ka detyrim për përfaqësim të balancuar zgjedhor si për radiodifuzerët, që do të thotë se partitë mund të financojnë pa kufizim portale të caktuara pa ofruar përmbajtje që garanton pluralizëm. Kjo boshllëkësi mund të ndikojë afatgjatë mbi pluralizmin politik dhe të drejtën e qytetarëve për informacione të larmishme.

The post 333 media kanë aplikuar për reklamim politik, SHGM: Financimi i qindra portaleve krijon hapësirë për korrupsion appeared first on Telegrafi.

Numri i lejeve të dhëna për ndërtim në qershor të vitit 2025 është rritur për 15.1% krahasuar me muajin e njëjtë të vitit paraprak, bën të ditur Enti Shtetëror për Statistikë (ESHS).

Gjatë muajit qershor të vitit 2025 janë dhënë 213 leje ndërtimi, që është për 15.1 % më shumë krahasuar më muajin e njëjtë të vitit paraprak. Sipas lejeve të dhëna për ndërtim, vlera e paraparë e objekteve është 4 857 279 mijë denarë, që është për 47.1% më shumë krahasuar me muajin e njejtë të vitit paraprak.

Nga numri i përgjithshëm i lejeve të dhëna për ndërtim 120 (56.3 %) janë të dedikuara për objektet e ndërtimit të lartë, 37 (17.4 %) për objektet e ndërtimit të ulët dhe 56 (26.3 %) për objektet për rikonstruim.

Nga gjithsej 213 të objekteve, tek 110 ( 51.6 %) si investitorë na paraqiten persona fizik, ndërsa tek 103 ( 48.4 %) të objekteve si investitorë janë subjektet afariste.

Në periudhën raportuese është paraparë ndërtimi i 260 banesave, me sipërfaqe të përgjithshme prej 25 680 m2.

The post ESHS: Në muajin qershor janë dhënë 213 leje ndërtimi appeared first on Telegrafi.

Kandidati për kryetar të Komunës së Çairit, Bujar Osmani, para sportistëve dhe punëtorëve të sportit në Çair prezantoi programin e tij gjithëpërfshirës për zhvillimin e sportit.

Ky program siç tha ai është hartuar mbi bazën e analizave të detajuara dhe rekomandimeve nga ekspertë vendorë dhe ndërkombëtarë.

“Analiza zbuloi mangësi serioze në sportin në Çair – mungesë të një strategjie zhvillimore, salla dhe fusha sportive jofunksionale, shfrytëzim jotransparent të infrastrukturës ekzistuese, qasje të kufizuar për grupet e margjinalizuara, gratë dhe të moshuarit, si dhe pothuajse mungesë të plotë të garave dhe aktiviteteve të organizuara për të rinjtë”, thuhet në komunikatën e BDI-së.

Osmani tha se prioritet në dy vitet e para do të jetë revitalizimi i plotë i objekteve ekzistuese sportive.

“Sallat sportive “Enver Idrizi” në Serovë, “Vasil Glavinov” në Xhon Kenedi, “Imri Elezi” në Dizhon dhe “Liria” në Gazi Babë do të rinovohen plotësisht – nga çatitë dhe ndriçimi, deri te zhveshtoret dhe hapësirat sanitare. Do të legalizohen dhe rikonstruktohen sallat “Shaban Tërstena” dhe “Partizani”, ku “Partizani” do të shndërrohet në një qendër moderne sportive multifunksionale që do të mbajë emrin e kampionit olimpik legjendar Shaban Sejdiu. Gjithashtu, do të ndërtohet një sallë e re sportive në një shkollë që deri tani nuk ka pasur një objekt të tillë, dhe ajo do të mbajë emrin e boksierit të njohur Aziz Saliu. Programi parashikon gjithashtu krijimin e fushave të reja të hapura sportive në Gazi Babë, Serovë dhe Topanë, si dhe rregullimin e parqeve dhe oborreve të shkollave fillore me përmbajtje sportive-rekreative. Do të sigurohen programe dhe infrastrukturë e qasshme për personat me aftësi të kufizuara, si dhe aktivitete të përshtatura për gratë dhe të moshuarit. Sportistët e rinj me talent nga Çairi do të përfitojnë bursa dhe mbështetje financiare për përgatitje dhe pjesëmarrje në gara ndërkombëtare, ndërsa klubet sportive do të kenë mundësi të aplikojnë për mjete komunale dhe ndihmë teknike për aplikim në fondet evropiane. Osmani gjithashtu paralajmëroi themelimin e një klubi gjimnastikor, atletik dhe xhudo – sporte që deri tani mungojnë në Çair. Në arsim, shkollat do të specializohen sipas sporteve – për shembull, “Liria” për mundje, “Shaban Tërstena” për basketboll “7 Marsi” për hendboll, “ Ismail Qemali-Volejboll; “Imri Elezi – Karate, pa përjashtuar disiplinat e tjera. Nxënësit do të kenë 3 orë edukatë fizike në javë, plus 2 orë aktivitete jashtë mësimit, me mësues të subvencionuar nga komuna. Do të organizohen “Java e Sportit”, liga sportive shkollore, turne dhe një olimpiadë e vogël komunale për të nxitur frymën garuese. Osmani parashikon edhe themelimin e një Qendër për kërkime në sport, që integron shkencën,edukimin fizik dhe shëndetin për të ndikuar pozitivisht në zhvillimin social përmes sportit. Brenda programit janë përfshirë edhe trajnime për të rinjtë në alpinizëm, kamping dhe aktivitete në natyrë”, ka deklaruar Osmani.

Osmani premtoi dhe ndihmë për klubet sportive në aplikimin për fonde europiane.

The post Bujar Osmani prezantoi programin për zhvillimin e sportit në Çair appeared first on Telegrafi.

Enti Shtetëror i Revizionit kreu revizionin e raporteve financiare së bashku me revizionin e pajtueshmërisë të Ndërmarrjes Publike për menaxhimin me pyjet shtetërore.

Në raport janë konstatuar gjendje, parregullsi dhe mos-harmonizim në punën e ndërmarrjes publike dhe për shkak të rëndësisë së tyre është shprehur opinion i pavolitshëm për realitetin dhe objektivitetin e raporteve financiare për vitin 2023 dhe për pajtueshmërinë me rregullativën ligjore, udhëzimet dhe politikat e vendosura.

Mjetet biologjike nuk vlerësohen sipas vlerës së tyre objektive, përkatësisht nuk zvogëlohen ose zhvlerësohen për sipërfaqet që ndodhen brenda kufijve të Parkut Nacional të Sharrit dhe janë të rregulluara me plane të veçanta ekonomike pyjore, si dhe sipërfaqet e prekura nga zjarret pyjore në të cilat fondi pyjor është shkatërruar plotësisht.

Në fund të vitit 2023, Ndërmarrja publike ka deklaruar detyrime ndaj Buxhetit të Shtetit për riprodhim të zgjeruar në shumën prej 450.844 mijë denarë përkatësisht 7.307.000 euro, ndërsa për riprodhim të thjeshtë nuk është hapur llogari e veçantë dhe nuk janë paguar mjete në shumën prej 250.186 mijë denarë, përkatësisht 4.055.000 euro. Njëkohësisht ndërmarrja kërkon 164.275 mijë denarë, përkatësiht 2.662.000 euro nga shteti bazuar në pjesëmarrjen në aksionin “Dita e Drurit”.

“Nga revizioni i kryer kemi konstatuar se 95% ose 37.672 mijë denarë nga kërkesat ndaj të punësuarve, rrjedhin nga periudha para vitit 2018 dhe kanë të bëjnë me: mungesa të drurit teknik dhe drurit për ngrohje, avanse të pakthyera, qarkullim ditor të papaguar nga shitjet, shfrytëzimi i shërbimeve katering dhe të tjera. Për shkak të mosmarrjes së masave për arkëtimin e tyre dhe afatit të përgjithshëm të parashkrimit, ekziston pasiguri e madhe që shuma prej 36.460 mijë denarësh përkatësisht 590.920 euro (deri në 5 dhe mbi 5 vite) të mos arkëtohet”, thuhet në raport.

The post Revizioni konstaton shkelje tek N.P Pyjet Shtetërore appeared first on Telegrafi.

Kryetari i Komunës së Tetovës, Bilall Kasami tha se mbi 70 milionë euro do të investohen në ndërtimin e një Qendre Klinike moderne në qytetin e Tetovës.

Ai në takimin me ministrin e Shëndetësisë, Azir Aliu, dhe drejtorin e institucionit, Erzen Elezi, tha se u hodh hap i parë për modernizimin e plotë të këtij kompleksi shëndetësor, që pritet të sjellë një epokë të re për qytetarët e Tetovës dhe rajonit.

Kasami shtoi se Komuna e Tetovës do të sigurojë mbështetje të plotë për realizimin e këtij projekti madhor, duke nënvizuar kalimin nga “errësira e dështimeve të së kaluarës drejt një të ardhmeje që vlen për qytetin.”

Ky investim i rëndësishëm pritet të përmirësojë ndjeshëm cilësinë e shërbimeve shëndetësore dhe infrastrukturën e vendit, duke u shndërruar në një pikë kyçe për shëndetin publik në Tetovë dhe zonat përreth.

The post Kasami: Do të investohen mbi 70 milionë euro në ndërtimin e një Qendre Klinike moderne në Tetovë appeared first on Telegrafi.

Pajisjet shkollore do të shiten më lirë për një muaj, kjo pasi qeveria vendosi masën “shporta shkollore”.

Duke filluar nga nesër e deri më 15 shtator, pajisjet shkollore do të shiten për së paku 15% më lirë.

Qeveria vendosi masë “shportë shkollore” me çka nxënësit pajisjet e tyre shkollore do të mund t’i furnizojnë më lirë.

Për familjet me një fëmijë kursimi pritet të jetë deri në 2000 denarë ndërsa me dy fëmijë rreth 3000 denarë. Produktet që do të përfshihen me masën do të jenë të shënuara me mbishkrimin: “Më pak harxhime, më shumë për ty”.

“Çmimet ku janë bërë lirimet janë marrë nga 1 qershori. Lirimet në tregtinë me shumicë do të jenë për 10% derisa në tregtinë me pakicë, respektivisht nëpër librari, shitore, markete dhe vende tjera ku ka pajisje shkollore do të ulen çmimet krahasuar nga 1 qershori për 15% minimumi. Pra mund ti ulin më tepër sepse ndonjëherë ka edhe çmime në aksion në disa produkte të cilat japin lirime më të mëdha”, tha Marjan Risteski, zëvendësministër i Ekonomisë.

The post Qeveria vendosi masën “Shporta shkollore”, pajisjet shkollore deri më 15 shtator do të shiten për 15 për qind më lirë appeared first on Telegrafi.

Inspektorët doganorë në Sektorin për Kontroll dhe Hetime, gjatë kontrollit të 21 importeve të mishit, kanë zbuluar mashtrim doganor në vlerë prej shtatë milionë denarë.

Nga Drejtoria Doganore shtojnë se kontrolli plotësues i dokumenteve të dorëzuara doganore, si dhe analizat laboratorike, kanë treguar se mishi është deklaruar nën kodin tarifor të gabuar me normë doganore më të ulët, në vend se në kodin tatimor adekuar me normë më të lartë.

Ndaj autorëve është ngritur padi penale për mashtrim doganor, ndërsa janë miratuar vendime për pagesë shtesë të shmangies së detyrave në vlerë prej shtatë milionë denarë.

Nga Drejtoria Doganore informojnë se do të vazhdojnë me masat për mbrojtjen e interesave financiare të shtetit dhe sigurimin e konkurencës korrekte të tregut.

The post Importi i mishit në RMV, Drejtoria e Doganave zbulon mashtrim doganor në vlerë prej shtatë milionë denarë appeared first on Telegrafi.

Ministria e Shëndetësisë ka sqaruar se punonjësit aktual shëndetësor në spitalin e Tetovës kanë kontrata valide deri në fund të vitit 2025 dhe se është marrë pëlqim pozitiv për punësimin e tyre me vendime.

Lexo po ashtu ASH: Azir Aliu po manipulon me punonjësit shëndetësor të spitalit të Tetovës, nuk ka vendime sepse aktualisht e ndalon Ligji për Zgjedhje

Reagimi vjen pasi nga Aleanca për Shqiptarët thanë se premtimet e ministrit Azir Aliu për punësimin e punonjësve shëndetësor është vetëm shantazh dhe premtim, pasi me ligj tani ndalohen punësimet shkaku i zgjedhjeve lokale.

Sipas Ministrisë, të gjithë punonjësit aktualë kanë kontrata të vlefshme pune me kohë të caktuar deri më 31 dhjetor 2025. Po ashtu, është siguruar pëlqimi nga Ministria e Financave për punësimet në këtë institucion, ndërsa si dëshmi është paraqitur edhe dokumentacion përkatës, i cili hedh poshtë pretendimet se Fondi për Sigurim Shëndetësor ka dhënë përgjigje negative.

“Konkurset për punësim janë shpallur, dhe testimet e kandidatëve janë zhvilluar më 7 gusht 2025, e jo “para 10 ditësh” siç është raportuar në disa media. Procedura e punësimeve është aktualisht e pezulluar për shkak të shpalljes së zgjedhjeve lokale, por Ministria thekson se menjëherë pas përfundimit të tyre procesi do të vazhdojë deri në përfundim dhe të gjithë kandidatët do të marrin vendimet përkatëse. Përhapja e njoftimeve të pabazuara dhe përdorimi i informacionit të rremë po dëmton Ministrinë e Shëndetësisë si institucion dhe po krijon panik të panevojshëm te punonjësit e Spitalit Klinik të Tetovës, të cilët çdo ditë kujdesen për shëndetin e bashkëqytetarëve tanë”,  thuhet në reagimin e Ministrisë.

The post MSH: Procedura e punësimit të punonjësve shëndetësor është pezulluar për shkak të shpalljes së zgjedhjeve, kandidatët do t’i marrin vendimet pas zgjedhjeve appeared first on Telegrafi.

“Qeveria e OBRM-PDUKM-së është kapur në një skandal të madh. Një person nën hetim aktiv nga OLAF, Zyra Evropiane për Luftën kundër Mashtrimeve, është emëruar nga Qeveria si personi i parë në krye të Agjencisë Kombëtare që menaxhon paratë nga Erasmus+. Kjo është një humbje e madhe edhe për sistemin arsimor, sepse e rrënon plotësisht besimin e të rinjve në institucione. Dhe në vend që të kërkojë përgjegjësi, ministrja Janevska thotë se “misioni do të vazhdojë”. Cili mision? I interesave partiake dhe biznesore? OBRM-PDUKM u përpoq ta fshehë të vërtetën, por vetëm e thelloi edhe më shumë krizën e Qeverisë”, kështu reagua nga opozitarja LSDM-së lidhur me emërimin e Ana Mihajlova në krye të agjencisë për fondet europiane – Erasmus+.

Nga LSDM thonë se edhe BE ka qenë kundër emërimit të Mihajllov në krye të Erasmusit.

“A ka dhënë Bashkimi Evropian pëlqimin që Ana Mihajlov të zgjidhet ushtruese detyre drejtoreshë? Sipas sinjalizuesve që na dërguan informacionet, përgjigjja është JO. Përkundrazi, burimet tona thonë se nga Brukseli është komunikuar qartë se konkursi publik i shpallur është i paligjshëm dhe se duhet të përsëritet menjëherë për të pasur kandidatë të rinj. Sinjalizuesit informojnë se një nga arsyet kryesore për këtë është pikërisht kandidatura e Ana Mihajlov – personi më i kontestuar në të gjithë procedurën. Në vend që pushteti të respektojë procedurat dhe të kërkojë mendim nga BE për një person të pranueshëm, në mënyrë të paskrupullt dhe pas shpinës së publikut e emëron të njëjtën person si ushtruese detyre. Pse? Nga viti 2014 deri më 2017, kur Mihajlov (atëherë Mitrovska) ka qenë përgjegjëse për vlerësuesit në Agjencinë Kombëtare, së bashku me kumbaren e saj Dorina Gjorgjeva Mitrovska, janë ndarë mbi 8 milionë euro. A janë ndarë këto 8 milionë euro në mënyrë të ligjshme apo janë pjesë e një hetimi për përvetësim të fondeve evropiane? Cila është roli i Bozhko Nelkoski – drejtori i parë i agjencisë dhe mentori i drejtoreshës së re ushtruese detyre? A është pikërisht Nelkoski i përmendur në raportin e OLAF si nismëtar i përvetësimit të organizuar dhe i ndarjes së paligjshme të fondeve? Cila është lidhja me firmat ‘Silver Lion Services’ dhe ‘Agronomia Organika’? A janë këto kompani pjesë e të njëjtit rrjet tenderësh të dyshimtë dhe abuzimesh të identifikuara nga OLAF? Në xhepat e kujt kanë përfunduar 8 milionë euro para evropiane?”, pyesin nga LSDM.

Ata kanë kërkuar shkarkimin e Mihajllov dhe poashtu kanë kërkuar që Prokuroria të veprojë sipas gjetjeve të OLAF dhe të gjithë të përfshirët në këtë skandal të përgjigjen.

The post LSDM: Emërimi i Ana Mihajllov në krye të “Erasmus” është humbje e madhe për sistemin arsimor, ka abuzuar me fonde evropiane appeared first on Telegrafi.

Ministri i Transformimit Digjital, Stefan Andonovski sot inspektoi rindërtimin dhe rinovimin e Qendrës së re të shërbimeve në Dellçevë.

Andonovski tha se mbetet i përkushtuar për t’i sjellë shërbimet elektronike më afër çdo qytetari, veçanërisht te ata që nuk kanë aftësi digjitale ose qasje në kompjuterë dhe internet.

“Qëllimi ynë është që çdo qytetar të ketë mundësi të ketë qasje lehtësisht në shërbimet e Portalit të Ministrisë së Transformimit Digjital. Qendra në Dellçevë do të jetë vend ku qytetarët do të marrin mbështetje dhe njohuri se si t’u qasen shërbimeve të nevojshme”, ka thënë Andonovski.

Në Qendrën e re në Dellçevë do të ketë në dispozicion më shumë se 300 shërbime, duke përfshirë certifikatën e shtetësie, listën pronësore, certifikatat e stazhit nga Fondi pensional, shërbime nga Agjencia e punësimit dhe shërbime të tjera elektronike të institucioneve shtetërore.

“Për momentin në Portal janë të kapshëm 200 shërbime që paraqet rritje të konsiderueshme në krahasim me shërbimet e mëparshme. Qytetarët tregojnë interes të madh për digjitalizimin e shërbimeve, gjë që është inkurajuese për ne”, shtoi ministri.

Ai theksoi se interesi për përdorimin e Portalit është rritur ndjeshëm – nga 1.000 përdorues në muaj, numri tani arrin në 7.400 që paraqet rritje prej shtatë herë e gjysmë.

The post Andonovski: Në portalet elektronike janë të qasshme 200 shërbime për qytetarët appeared first on Telegrafi.

Nga Bashkimi Demokratik për Integrim përmes një komunikate për media thonë se qytetarët e Çairit nuk do të votojnë më për Visar Ganiun apo Izet Mexhitin, sepse sipas tyre kanë keqpërdorur besimin e votuesve.

“Qytetarët e Çairit e dinë mirë se kush është Izet Mexhiti dhe vartësi i tij, Visar Ganiu. Ata e dinë se gjatë mandateve të tyre, komuna u bë sinonim i krimit, korrupsionit dhe kaosit të plotë. Ata e dinë se ai në vend që të jetojë në mesin e njerëzve për të cilët bën sikur kujdeset, jeton rehat në Butel ndërkaq Çairin e sheh vetëm si fushë për biznese privat dhe për pasurim të shpejtë. Dhe se a planifikon me ato para të tenton të jep ryshfet për zgjedhjet, gjë që gjithsesi nuk do ta shpëtojë. Mexhiti në këto zgjedhje nuk lufton për Çairin dhe banorët, por për interesin e biznesit të tij privat. Nëse do të interesohej për banorët gjatë këtyre 20 viteve, do të kishte bërë diçka”, thonë në BDI.

Në reagimin e BDI-së thuhet se nga ndërtimet pa leje dhe legalizimet e dyshimta u vodhën në mënyrë kriminele 225 milionë euro.

“Asnjë projekt i madh infrastrukturor, asnjë zgjidhje e qëndrueshme për problemet e banorëve vetëm ndërtesa, biznese dhe marrëveshje për rrjetin e tij të njerëzve. Prandaj, Mexhiti e di që nuk e ka mbështetjen e shqiptarëve dhe se i duhet me përulje ta kërkojë mbështetjen e Hristijan Mickoskit dhe OBRM-PDUKM-së. I ulur në prehrin e Mickoskit, shpreson se me propagandën e paguar të portaleve të OBRM-PDUKM-së do të shpëtojë nga humbja. Por Çairi nuk harron, dhe çairasit nuk do të lejojnë që me paratë e fituara nga krimi, Izeti të fshijë votën e tyre. E as me milionat e vjedhura nuk do të mund ta fshijë të vërtetën e 20 viteve të shkatërrimit të komunës nga ana e tij. Qytetarët e Çairit meritojnë të jetojnë në një komunë pa kaos, pa korrupsion dhe pa njerëz që e shohin komunën vetëm si bankomat për interesat personale. Më 19 tetor, është koha për t’i dhënë fund epokës së ndërtimeve pa leje, krimit dhe shantazheve”, thuhet në reagimin e BDI-së.

The post BDI: Mexhiti dhe Ganiu e bënë Çairin sinonim të krimit dhe korrupsionit, shqiptarët nuk do t’i mbështesin në zgjedhjet lokale appeared first on Telegrafi.

Opozitarja LSDM e ka quajtur emërimin e ushtrueses së detyrës drejtore e re e Agjencisë nacionale për programet Evropiane për arsim dhe lëvizshmëri, Ana Mihajllov si të dyshimtë.

Lexo po ashtu MASH: Ana Mihajllov do të udhëheq me Agjencinë Kombëtare për Programe Arsimore Evropiane "Erasmus"

Siç thonë nga LSDM, Mihajllov ka qenë në qendër të skandalit për keqpërdorimin e fondeve që kanë të bëjnë me programet arsimore, gjegjësisht të dy milion eurove në vitin 2016.

LSDM-ja akuzon qeverinë se po ushtron presion mbi prokurorinë që të mos veprojë mbi këto dyshime edhe pse institucioni hetues i BE-së, OLAF, ka dorëzuar të dokumentuara keqpërdorimet.

“Prokuroria Publike ende nuk ka përpunuar një aktakuzë për këtë rast të dokumentuar plotësisht, të paraqitur në Prokurorinë Publike në vitin 2023 dhe të përditësuar në vitin 2024. Nga informatorët brenda Agjencisë, LSDM mëson se qeveria po ushtron presion të fortë për të parandaluar hetimin e Prokurorisë Publike. A bëhet kjo sepse çon pikërisht te Ana Mihajllov dhe familja dhe miqtë e saj më të ngushtë, vlerësues të angazhuar nga OBRM-PDUKM? A është kjo arsyeja që konkursi i mëparshëm për drejtor u anulua? Sipas cilave kritere u emërua Ana Mihajllov dhe pse tani?”, deklaroi Jovica Jankoviq nga LSDM.

Emërimi i Mihajllovës vjen pasi muaj më parë në krye të Agjencisë nacionale për programet arsimore Evropiane ishte emëruar Petar Bogojeski. Ai u largua nga posti për shkak të shfaqjes së gjuhës së urrejtjes ndaj shqiptarëve.

The post LSDM: Mihajllov do të udhëheqë me “Erasmus”, e njejta ka skandal për keqpërdorim të fondeve arsimore appeared first on Telegrafi.

Një delegacion nga koalicioni VLEN sot ka vizituar fshatin Luboten të Shkupit, ndërsa kanë përkujtuar masakrën e 12 gushtit të vitit 2001, kur forcat e policisë dhe ushtrisë së Maqedonisë vranë pamëshirshëm 9 burra dhe një fëmijë 6-vjeçar.

Nga VLEN thonë se ai operacion i forcave policore-ushtarake është i pajustifikueshëm.

“Sot, në fshatin Luboten, së bashku me familjarët e dëshmorëve, ish-ushtarët e UÇK-së dhe banorët e kësaj ane, përkujtuam 12 gushtin 2001, një nga ditët më të dhimbshme për lubotenasit dhe të gjithë shqiptarët. Në mëngjesin e asaj dite, forcat policore-ushtarake të shtetit ndërmorën një operacion të egër dhe të pajustifikuar, duke vrarë dhjetë civilë shqiptarë, mes tyre edhe 6-vjeçarin Erxhan Aliu, simbol i pafajësisë së shuar padrejtësisht. Emrat e Dalip Muratit, Muharrem Ramadanit, Memet Memetit, Rami Jusufit, Xhelal Bajramit, Kadri Jasharit, Bajram Jasharit, Sulejman Bajramit dhe Atulla Qailit janë gdhendur përjetësisht në kujtesën tonë kolektive, si dëshmi e një krimi që nuk do të harrohet kurrë. Masakra e Lubotenit, është rasti i vetëm i luftës së vitit 2001 që u gjykua nga Tribunali Ndërkombëtar i Hagës, me dënim të plotfuqishëm si krim lufte. Sigurisht, ky ishte një hap drejt drejtësisë, por jo mjaftueshëm për të shëruar këtë plagë. Të mos harrojmë kurrë që të mos përsëritet kurrë. Lavdi dhe nderim i përjetshëm për dëshmorët!”, tha Arben Fetai nga VLEN.

Fetai në Luboten ka qenë i shoqëruar nga zëvendëskryeministri i parë, Izet Mexhiti, kryetari i Tetovës, Bilall Kasami dhe kryetari i Alternativës, Zeqirija Ibrahimi.

The post VLEN përkujton masakrën e Lubotenit, Fetai: Të mos e harrojmë kurrë që të mos përsëritet appeared first on Telegrafi.

Izet Mexhiti për të mbuluar aferat e shkatërrimit urbanistik në Çair, po shpërndan informacione të pasakta për ndërtimet pa leje në Gostivar, kështu reagojnë nga Aleanca për Shqiptarët e Arben Taravarit.

“Deklarata e tij mbi numrin e ndërtimeve pa leje në Gostivar është e pavërtetë dhe e pasaktë. Shifra e përmendur nuk i referohet ndërtimeve pa leje, por objekteve të legalizuara sipas Ligjit për legalizim para vitit 2011. Kjo përzierje është ose joprofesionalizëm, ose keqinformim i qëllimshëm. Sipas të dhënave zyrtare të Inspektoratit të Ndërtimit të Komunës së Gostivarit, nga viti 2018 deri në vitin 2025 janë evidentuar dhe është vepruar ndaj gjithsej 112 objekteve pa leje, prej tyre: 58 shtëpi të ndërtuara pa leje, 25 mbindërtime apo shtojca, dhe 29 mure oborri”, thuhet në reagimin e ASH-Taravari.

Nga ASH thonë se Mexhiti tenton të largojë vëmendjen nga krimet urbanistike në Çair.

“Ai ngatërron qëllimisht aplikimet për legalizim të para vitit 2011 me ndërtime të paligjshme të bëra sot, duke harruar se pikërisht gjatë drejtimit të tij janë keqpërdorur këto procedura për pasurim personal dhe të rrjetit të tij. Gostivari është një ndër komunat me numrin më të madh të lejeve për ndërtim të lëshuara – dëshmi e transparencës dhe funksionimit sipas ligjit. Për projektet madhore si masterplani i Çairit nevojiten vite pune, konsultim me publikun dhe angazhimi i ekspertëve vendas, jo shfaqje mediatike dhe ‘ekspertë’ të importuar për interesa politike. Jo, Izet! Krimet tuaja janë bërë tani, pikërisht duke keqpërdorur aplikimet e qytetarëve. Nëse këto kategori elementare nuk i di, atëherë na vjen keq – sepse kjo tregon se nga drejtimi i komunës nuk paske mësuar asgjë, përveç kriminalizimit të pasurisë publike dhe dëmtimit të qytetarëve. Raportimet tronditëse për përfitime të paligjshme që kapin shifrën mbi 225 milionë euro nga ndërtimet e egra dhe marrëveshjet e pista me oligarkët e industrisë së bixhozit e lidhin drejtpërdrejt Izet Mexhitin dhe dinastinë e tij me afera të rënda kriminale. Qytetarët e Çairit dhe Gostivarit e dinë mirë dallimin mes transparencës dhe korrupsionit, mes vizionit për zhvillim dhe betonizimit kriminal”, thuhet në reagimin e ASH-së.

The post ASH-Taravari: Izet Mexhiti ka kryer krim urbanistik në Çair, po shpërndan informacione të pasakta për ndërtimet pa leje në Gostivar appeared first on Telegrafi.

Ministrja e Arsimit dhe Shkencës, Vesna Janevska informoi se mësim në një ndërrim tashmë ka në 150 shkolla në të cilat nuk ka pasur ose ka pasur shumë pak ndërhyrje ndërtimore që të mund të fillohet. Ajo pret që ky proces të vazhdojë në 25 shkolla në të cilat, tha, do të ketë nevojë për ndërhyrje ndërtimore gjegjësisht shtim të klasave që të mund t’i përfshijnë të gjithë nxënësit në një ndërrim.

“Sigurisht po fillojmë në pesë, po fillojmë në komunat Gjorçe Petrov dhe Karposh, ndërsa pastaj do të vazhdojmë edhe në të tjera. Këtë vit pres të fillojmë punën në 25 shkolla, të cilat, gjithsesi, do të jenë më afatgjata dhe do të vazhdojnë edhe vitin e ardhshëm”, deklaroi Janevska.

Shtoi se vendosja e mësimit në një ndërrim ka lidhje me optimizimin e rrjetit shkollor që, tha, “nuk është proces i lehtë.

“Ai ka filluar, po shkon mirë dhe do të vazhdojë edhe më tutje. Besoj se do të arrijmë ta përfundojmë pjesën më të madhe të saj në një mandat, por besoj se ata që vijnë pas nesh do ta vazhdojnë sepse është jashtëzakonisht e rëndësishme për cilësinë e arsimit dhe në të mirë të nxënësve”, theksoi Janevska.

The post Janevska: Mësim në një ndërrim ka në 150 shkolla, do të zbatohet edhe në 25 shkolla të tjera appeared first on Telegrafi.

Aleanca për Shqiptarët, krahu i Ziadin Selës ka reaguar ndaj dekleratës së kryeministrit Mickoski në lidhje me Ushtrinë Çlirimtare Kombëtare.

Aleanca për Shqiptarët janë shprehur se këto deklarata të kryeministrit Mickoski janë skandaloze dhe provokim i hapur ndaj ndjenjave kombëtare, ndërsa më shqetësuese është heshtja e shqiptarëve në qeveri.

Reagimi i plotë nga ASH-Sela:

Deklaratat e kryeministrit Hristian Mickoski për Ushtrinë Çlirimtare Kombëtare janë skandaloze dhe provokim i hapur ndaj ndjenjave kombëtare te shqiptarëve në përgjithësi.

Pas zhbërjes së shumë të drejtave dhe të arriturave të deritanishme, Mickoski tani tenton edhe ta mohojë dhe ndalojë një pjesë të lavdishme të historisë tonë. Ne e kemi pritur dhe paralajmëruar rrezikun se kjo Qeveri antishqiptare do të arrijë deri këtu dhe të gjitha veprimet tona kanë qenë pikërisht në frymën e parandalimit me kohë të një momenti si ky. Por ajo që edhe më shumë na shqetëson është heshtja e shqiptarëve në Qeveri të cilët siç duket edhe këtë duan ta kalojnë me relativizime dhe ndoshta edhe me sulme ndaj shqiptarëve siç kanë bërë deri më tani.

Deklaratat e kryeministrit Mickoski janë sa ofenduese për shqiptarët aq edhe të rrezikshme për stabilitetin e vendit, kohezionin ndëretnik, tensionimin e marëdhënieve mes bashkësive dhe të ardhmen europiane të vendit.

The post ASH-Sela: Deklarata e Mickoskit për UÇK-në është provokim ndaj ndjenjave kombëtare, shqiptarët në qeveri po heshtin appeared first on Telegrafi.

“E pamë vizionin e BDI-së për Maqedoninë – vëllazërim me shërbëtorët e vet nga LSDM-ja, shitje e identitetit maqedonas, rrënim i institucioneve dhe plaçkitje e pasurisë shtetërore. Ky është vizioni”, kështu deklaruan nga partia në pushtet OBRM-PDUKM.

“Nëse bëhet një analizë e karakterit tajkun të funksionarëve të BDI-së, të cilët nga bariu u bënë milionerë, dhe e vendosim gjithë këtë në një kontekst vizionar të Ahmetit, do ta kuptojmë se kanë të drejtë maqedonasit dhe shqiptarët e vjetër që thonë: ‘Nuk ka gjë më të keqe se njeriu i pangopur’. Por, për këtë nuk është fajtore BDI-ja, por LSDM-ja. LSDM-ja janë ata që lejuan BDI-në të metastazojë në shoqëri, duke ngrënë qelizat e të gjithë qytetarëve në këtë shtet, pa dallim përkatësie etnike”, thonë nga OBRM-PDUKM.

Nga OBRM-PDUKM thonë se qeverisja e kaluar vidhnin shtetin dhe taksat e qytetarëve.

“Ky është buxhet nga taksat që i paguajnë të gjithë qytetarët. Dhe BDI-ja e bënte këtë sepse në LSDM kishte politikanë të korruptueshëm, të korruptuar, të cilët gjithashtu donin të vidhnin dhe, për shkak të pasioneve të tyre, ishin ulur në prehërin e BDI-së dhe bashkë me ta vepronin dhe heshtnin. E gjithë opinioni duhet të jetë i vetëdijshëm se ky është vizioni i Ahmetit: plaçkitje e Maqedonisë, krijim i tajkunëve dhe mafiozëve nga barinj dhe rrugaçë analfabetë, dhe dhënie e një petku ideologjik vizionar gjithë kësaj nën petkun e luftës për demokraci, të drejta apo të ardhme evropiane”, thuhet në njoftimin e OBRM-PDUKM-së.

The post OBRM-PDUKM: Faj ka LSDM që i mundësoi BDI-së të metastazojë në shoqëri appeared first on Telegrafi.

Bazuar në ligjet në fuqi, Komisioni Shtetëror për Parandalimin e Korrupsionit me qëllim që të informojë në kohë dhe në mënyrë transparente të gjitha institucionet shtetërore, partitë politike, pjesëmarrësit në procesin zgjedhor, ka dhënë udhëzimet e detajuara se çfarë nuk lelohet të bëhet nga të gjitha pjesmarrësit e zgjedhjeve lokale.

Ky komision tregon udhëzimet për sjelljen e subjeketve që konkurrojnë në zgjedhjet lokale si para dhe gjatë fushatës parazgjedhore.

Gjatë kësaj periudhe, ka ndalesë për investime të reja dhe pagesa të jashtëzakonshme, përkatësisht, siç theksohet në kumtesën nuk mund të fillojë ndërtimi me mjete të Buxhetit ose nga fonde publike ose me mjete të ndërmarrjeve publike ose persona të tjerë juridik që disponojnë kapital shtetëror të objekteve të reja në infrastrukturë, si rrugë, ujësjellës, largpërçues, kanalizim dhe objekte tjera ose objekte për veprimtari shoqërore – shkolla, kopshte të fëmijëve dhe objekte tjera, përveç nëse për atë qëllim paraprakisht janë siguruar mjete nga buxheti, përkatësisht bëhet fjalë për realizimin e një programi të miratuar në bazë të një ligji në vitin aktual.

Nuk mund të bëhen pagesa të pagave, pensioneve, ndihmës sociale ose pagesave të tjera dhe kompensime materiale nga mjete buxhetore ose nga mjete të fondeve publike që nuk janë pagesa të rregullta mujore, gjegjësisht të gjitha transferat dhe pegesat njëvjetore ose transferat e njëhershme nga mjetet buxhetore ose nga nga mjetet e fondeve publike, as nuk mund të tjetërsohet kapital shtetëror, as të nënshkruhet marrëveshje kolektive, ndërsa nuk mund të fillohet as procedurë për punësimin e personave të rinj ose procedurë për ndërprerjen e marrëdhënies së punës në institucionet shtetërore ose publike, ndërsa procedurat e filluara vihen në pritje, përveç në rastet e çështjeve urgjente.

Nga KSHPK-ja udhëzojnë edhe për ndalesën e përdorimit të burimeve të paligjshme dhe anonime të financimit gjatë zgjedhjeve.

“Partia politike ose kandidati në zgjedhjet nuk mund të mbledhin ose të përdorin mjete në mënyrë të paligjshme ose nga burime anonime”, theksohet në kumtesën.

Gjithashtu, nuk mundet prona në pronësi të: Republikës së Maqedonisë së Veriut ose njësive të vetëqeverisjes lokale ose mjetet buxhetore ose mjetet nga fondet publike, ndërmarrje publike, institucione publike ose persona të tjerë juridikë që kanë kapital shtetëror, përmes punimeve investuese ose në një mënyrë tjetër, të përdoren për fushatë zgjedhore ose për financimin e aktiviteteve të tjera politike.

Nga Antikorrupsioni theksojnë gjithashtu se nuk guxon të kryhet ryshfet gjatë zgjedhjeve dhe votimit, dhënia ose premtimi i një dhurate ose përfitimi tjetër për veten ose për një tjerët, ndaj një votuesi gjatë zgjedhjeve, që të votojë ose të mos votojë për një kandidat të caktuar.

Në periudhën prej 20 ditëve para fillimit të fushatës zgjedhore deri në përfundimin e zgjedhjeve për zgjedhjen e kryetarit të komunës ose anëtarëve të këshillit, gjegjësisht deri në konstituimin e këshillit të komunave dhe qytetit të Shkupit, nuk mund të mbahen ngjarje publike me rastin e fillimit të ndërtimit ose lëshimit në përdorim të objekteve me mjete të Buxhetit ose nga fonde publike, ose me mjete të ndërmarrjeve publike ose persona të tjerë juridikë që disponojnë kapital shtetëror në infrastrukturë si rrugë, ujësjellës, largpërçues, kanalizim, fusha sporti dhe objekte të tjera ose objekte për veprimtari shoqërore shkolla, kopshte të fëmijëve dhe objekte të tjera.

Nën ndalesë për mbajtjen e ngjarjeve publike nuk nënkuptohet veçanërisht dhënie e deklaratës publike të bartësit të funksionit publik ose kandidat për bartës të funksionit publik në tubim, intervistë në media, debat për media ose përgjigje të pyetjeve të gazetarëve.

Nga dita e vendimit për shpalljen e zgjedhjeve deri në përfundimin e tyre në përputhje me rezultatet e zgjedhjeve, Ministria e Financave është e detyruar të publikojë të gjitha pagesat buxhetore, përveç pagave të rregullta, pensioneve dhe shpenzimeve të shërbimeve, publikisht në ueb faqe në një bazë të dhënash të veçantë për shpenzimet buxhetore gjatë periudhës zgjedhore dhe Ministria e Financave duhet të paraqesë një raport financiar parazgjedhor dy javë pas shpalljes së zgjedhjeve, i cili do të përfshijë një pasqyrë të përgjithshme të të gjitha të ardhurave dhe shpenzimeve të planifikuara dhe të realizuara nga Buxheti sipas zërave në periudhën nga fillimi i vitit fiskal deri në ditën e dorëzimit të raportit, i cili publikohet në ueb faqen e internetit të Ministrisë së Financave.

Ndalohet shfrytëzimi i hapësirës së zyrave, pajisje të zyrave dhe vetura zyrtare të organeve shtetërore, përveç personat për të cilët kanë të bëjnë rregullat e veçanta për mbrojtje të personalitetit.

Në afat prej dhjetë ditëve nga dita e marrjes së vendimit për shpalljen e zgjedhjeve, fondet publike, ndërmarrjet publike dhe të gjithë personat e tjerë juridikë që kanë në dispozicion kapital shtetëror, janë të detyruar në KSHPK të dorëzojnë të dhëna për numrin, llojin, targat e regjistrimit, në formë elektronike në formular të shënuar nga Komisioni Shtetëror për Parandalimin e Korrupsionit, të publikuar në ueb-faqen e KSHPK-së.

Ndalohet kryerje dhe përpjekje për kryerjen e presionit dhe frikësimit të votuesve ose anëtarëve të familjeve të tyre ose persona të afërt të tyre.

KSHPK, siç theksohet, do ta ndjekë të gjithë procesin zgjedhor dhe në rastet e dyshimeve për shkeljen e dispozitave nga Ligji për Parandalimin e Korrupsionit dhe Konflikti i Interesave dhe Kodi Zgjedhor. KSHPK do t’i vlerësojë si përgjegjësi të personave përgjegjës të organeve shtetërore dhe subjekte të tjera, do të ndërmarrë masa për përcaktimin e dyshimeve të tilla, do t’i njoftojë organet kompetente dhe do të kërkojë ndërmarrjen e aktiviteteve në kuadër të veprimit të tyre adekuat.

Gjatë periudhës së zbatimit të aktiviteteve që lidhen me Zgjedhjet Lokale në Republikën e Maqedonisë së Veriut 2025, përkatësisht zgjedhjet për zgjedhjen e anëtarëve të këshillave komunale dhe Këshillit të Qytetit të Shkupit dhe për zgjedhjen e kryetarit të komunës dhe kryetarit të Qytetit të Shkupit, KSHPK, në përputhje me dispozitat e Ligjit për Parandalimin e Korrupsionit dhe Konfliktit të Interesave, nuk ka kompetencë dhe nuk jep mendime mbi kërkesat e paraqitura për mendime që lidhen me mënyrën e veprimit të organeve shtetërore dhe të vetëqeverisjes dhe organeve të tjera shtetërore të themeluara në përputhje me Kushtetutën dhe ligjin, fondeve, agjencive, drejtorive, ndërmarrjeve publike, organeve rregullatore, shoqërive tregtare të themeluara nga shteti dhe institucioneve të tjera të themeluara nga shteti.

KSHPK, siç bëhet e ditur, në funksion të ndjekjes dhe kontrollit të ligjshmërisë së financimit të fushatës zgjedhore dhe të gjithë procesit zgjedhor do të realizojë bashkëpunim me mediat, shoqatat civile dhe me qytetarët dhe për këtë qëllim e inkurajon të gjithë publikun që me kohë të raportojë raste të shkeljes së ndalesave të përcaktuara në Ligin për Parandalimin e Korrupsionit dhe Konfliktit të Interesave dhe në Kodin Zgjedhor.

The post Zgjedhjet lokale 2025, KSHPK urdhëron që të respektohen ndalesat për financimin e jashtëligjshëm, anonim dhe të ryshfetit gjatë zgjedhjeve appeared first on Telegrafi.

“Partia e “Botës Serbe” – BDI, është parti në mandatin e së cilës kufijtë me Serbinë u hapën gjerësisht, u vendosën korsi të shpejta dhe lehtësim i qarkullimit, ndërsa me Kosovën, fqinjin tonë më të afërt, mbetën të mbyllur për bashkëpunim të vërtetë ekonomik dhe politik”, kështu reaguan nga koalicioni VLEN.

Ky reagim nga VLEN erdhi pasi nga BDI paralajmëruan për hapje të bankës serbe “Alta Bank” dhe investimeve prej 50 milionë euro të Telekomit të Serbisë në Maqedoni në qeverisjen aktuale.

“Në vitet kur BDI ishte pjesë e të gjitha qeverive, u vendosën dhe u mirëmbajtën linja të drejtpërdrejta të përditshme me Beogradin – ekonomike, politike, madje edhe të sigurisë. Ndërkohë, me Kosovën, me të cilën ndajmë bashkësi, gjuhë, kulturë dhe një të ardhme të përbashkët në integrimet euroatlantike, lidhjet u neglizhuan, mbetën formale dhe pa mbështetje strategjike. BDI e ktheu Beogradin në adresën e parë për bisedime dhe marrëveshje, ndërsa Prishtinën e la në margjinat e politikës”, thuhet në përgjigjen e VLEN-it.

“Në vend që të hapnin korridoret ekonomike drejt Kosovës, ata i hapën drejt Serbisë; në vend që të intensifikonin shkëmbimin tregtar dhe afarist me Kosovën, ata lejuan që kapitali serb dhe bizneset e dyshimta të dominonin në tregun tek ne. Të rregullta ishin drekat dhe darkat ku Ali Ahmeti dhe Bujar Osmani priteshin mirë nga presidenti serb Vuçiç. Është e qartë për të gjithë se kjo politikë nuk është e rastësishme. Ajo është rezultat i vendimeve dhe zgjedhjeve të ndërgjegjshme të Ali Ahmetit, Bujar Osmanit dhe BDI-së, të cilët në vazhdimësi e kanë forcuar “botën serbe” në Maqedoni, duke e lënë pas dore bashkëpunimin natyror dhe të domosdoshëm me Kosovën. “Ballkani i Hapur” ishte nisma më e rëndësishme e tyre në politikën e jashtme. Qytetarët meritojnë një politikë të jashtme që do ta ndërtojë Maqedoninë si urë drejt miqve të saj, e jo si portë për interesat e qendrave të dyshimta të pushtetit”, thuhet në reagimin e VLEN-it.

The post VLEN: BDI në vazhdimësi ka forcuar “botën serbe”, Kosovën e lanë pa mbështetje strategjike appeared first on Telegrafi.