“LSDM-ja dhe Zaevi, nëpërmjet Dimovës dhe Erasmus +, ndanë një shumë të pabesueshme prej 83 mijë eurosh për trajnimin e gomarëve”, kështu kanë reaguar nga partia në pushtet ndaj opozitares LSDM, me akuza se dikur fondet arsimore janë keqpërdorur.

“LSD-ja dhe Zaevi, nëpërmjet Dimovës dhe Erasmus +, ndanë një shumë të pabesueshme prej 83 mijë eurosh për trajnimin e gomarëve. Përveç trajnimit të gomarëve, ata ndanë edhe 125 mijë euro shtesë nga Agjencia Erasmus +, pikërisht vëllait të deputetit Dime Velkovski për projektin “Zgjidh të djathin”. Zaevi dhe LSD-ja nëpërmjet Dimovës, po argëtoheshin dhe po shteronin buxhetin e Agjencisë Erasmus +. Projektet iu ndanë njerëzve të afërt me ta, gjyqtarëve, profesorëve, vëllezërve të deputetëve.”, – deklaroi Valentin Manasievski nga OBRM-PDUKM.

Nga LSDM kundërpërgjigjen se pse ka heshtur Qeveria pas publikimit të skandalit me milionat e përvetësimeve në Erasmus+.

Opozita pyeti se përse nuk është shkarkuar drejtoresha në detyrë kur është konfirmuar se ajo ishte pjesë e një hetimi nga OLAF – Zyra Evropiane kundër mashtrimit.

The post OBRM-PDUKM: LSDM dhe Zaevi kanë keqpërdorur fondet e Erasmus + appeared first on Telegrafi.

Ministria e Punëve të Brendshme njofton se nga data 01.04.2025 deri më 18.08.2025 janë ndaluar gjithsej 39 persona, ndërsa pas marrjes së masave janë paraqitur 25 kallëzime penale, për zjarrvënie të qëllimshme.

“Është konstatuar se shumica e zjarreve të ndodhura janë shkaktuar nga faktori njeri, për motive të ndryshme, dhe po ndërmerren masa dhe aktivitete për zbardhjen e rasteve dhe zbulimin e ndonjë ndërlidhjeje eventuale mes tyre”, thonë nga MPB.

Nga MPB informojnë se nga data 01.07.2025, kur është vendosur ndalesa për lëvizje në pyje, deri më 30.07.2025, pa leje të shkruar për lëvizje në pyje janë kapur 22 persona.

Kundër tyre do të parashtrohen procedurat përkatëse sipas Ligjit për Pyje.

“Në drejtim të parandalimit të hershëm të zjarreve, shërbimet policore po përdorin dronë për të monitoruar brezat pyjorë në territorin e shtetit. Me zbatimin e këtyre masave operative është rritur efikasiteti në paralajmërimin e hershëm dhe lokalizimin e zjarreve të mundshme, si dhe në detektimin e shkaqeve apo shkaktarëve të tyre”, thonë nga MPB.

The post MPB: Janë privuar nga liria 39 persona, nën dyshimin për zjarrvënie të qëllimshme appeared first on Telegrafi.

Zëvendëskryeministri Izet Mexhiti ka inspektuar sot në Haraçinë  punimet për kanalin e Haraçinës.

Për mediat Mexhiti tha se Fronti Evropian tashmë Aleanca Kombëtare për Integrim, ka probleme me identitetin.

Sipas tij VLEN është koalicioni i cili mbetet unik, krahasuar me bllokun tjetër politik shqiptar.

“Të tjerët i ndrrojnë emrat. Herë…nuk po i mbaj mend… Fronti Evropian, Fronti Kombëtar, tash AKI… nuk di… ata kanë problem me identitetin. Po bashkohen disa forca politike që në të kaluarën janë përplas keq dhe ju e shihni që është evidente që dikush po largohet nga aty. U largu partia turke e cila ka qenë parti serioze me diku 20 mijë banorë, u largu Menduh Thaçi, të shohim ditëve në vijim. VLEN asnjëherë nuk ka qenë më unik, asnjëherë s’ka qenë më i bashkuar dhe këtë e dëshmojmë edhe me kandidaturat”, deklaroi mes tjerash Mexhiti.

The post Mexhiti: Fronti Evropian tashmë AKI kanë probleme me indentitetin, VLEN mbetet me të njejtin emër dhe të bashkuar appeared first on Telegrafi.

Nën ndikimin e një mase ajri të lagësht dhe të paqëndrueshme, moti nesër do të jetë i ndryshueshëm me vranësira, më i freskët dhe i paqëndrueshëm me shira të rrëmbyeshëm lokalë dhe bubullima.

Siç raportohet nga Departamenti Meteorologjik, proceset do të jenë më intensive me shira më të bollshëm, mbi 15 litra për metër katror. Do të ketë edhe kushte për stuhi me erëra të forta dhe breshër të izoluar.

Nga e marta do të mbizotërojë mot kryesisht i qëndrueshëm me rritje graduale të temperaturave të ditës.

The post DPHM: Nesër pritet të mbajë mot jostabil, me shi dhe breshër appeared first on Telegrafi.

Drejtori i Drejtorisë për Mbrojtje dhe Shpëtim (DMSH), Stojançe Angellov tha se gjatë ditës së sotme ka 10 zjarre në hapësirë të hapur.

“Ende është aktiv zjarri në vendin e gjuetisë “Jasen”. Dy zjarre aktive ka në territorin e Komunës së Likovës, në fshatrat Llojan dhe Sllupçan, ku veprojnë zjarrfikësit e Kumanovës. Ka një zjarr aktiv në komunën e Llozovës, ku ndërhyjnë zjarrfikësit e Velesit”, tha Angellov.

“Gjatë natës, nuk lejuam që zjarri në “Jasen” të kalojë një rrugë pyjore, gjë që do ta rrezikonte më tej fshatin Breznicë në anën e Shkupit. Falë ndërhyrjes së anëtarëve të Njësisë për Zbatim të Shpejtë (NJZSH), si dhe disa zjarrfikësve nga Makedonski Brodi dhe punonjësve të “Jasen”-it, kjo vijë zjarri u ndalua, duke vendosur kështu kontroll të plotë mbi njërën nga tre pjesët e këtij zjarri”, tha Angellovi nga terreni.

Angellovi u bëri thirrje qytetarëve, bujqve dhe blegtorëve të jenë shumë të kujdesshëm në periudhën e ardhshme.

The post Angellov: Zjarri në “Jasen” i vështirë për tu shuar appeared first on Telegrafi.

Bashkimi Demokratik për Integrim ka reaguar ndaj premtimeve të koalicionit VLEN, për 2500 punësime.

Sipas BDI-së, VLEN kontribuoj vetëm që shqiptarët të largohen nga puna dhe të jenë zero në përfaqësim institucional.

Reagimi i plotë:

VLEN mashtroi kur premtoi 2.500 punësime. Realiteti është krejt tjetër: me qindra shqiptarë u larguan nga puna, ndërsa punësimet e reja mund të numërohen në gishta për ndonjë familjar të ndonjërit nga krerët e VLEN-it. Premtimet e tyre u bënë objekt talljeje, aq sa edhe ministri Minçev, e quajti këtë premtim të Izet Mexhitit “Liza në botën e çudirave”, duke i nxjerrë zbuluar në çdo gënjeshtër dhe duke i turpëruar publikisht. Para kësaj, Minçev publikisht pranoi se shqiptarët i kanë zvogëluar në përllogaritje, nga 29,5% në vetëm 24,3%, madje më pak se në vitin 2002 kur ishin 25,17%. Dhe pas këtij manipulimi, OBRM-PDUKM realizoi premtimin parazgjedhor: shfuqizimin e balancuesit. Ata e instrumentalizuan Gjykatën Kushtetuese dhe e hoqën këtë mekanizëm, duke shkelur Kushtetutën, Amendamentin VI që garanton përfaqësimin e drejtë dhe adekuat si vlerë kushtetuese. Pa balancues, vijon më tej reagimi, shqiptarët u shndërruan në zero në institucionet shtetërore. Shumë institucione shpallën si të padëshiruar shqiptarët. Nuk ka asnjë mekanizëm kontrolli. Premtimet për motrat medicinale në Tetovë u zhdukën pa gjurmë, ligji nuk shihet askund dhe Mickoski ua mbyll gojën publikisht partnerëve të tij shqiptarë sa herë që duan të flasin për punësime. Dhe ata heshtin. Vazhdojnë të heshtin. BDI denoncon mashtrimet e VLEN-it dhe kërkon llogari për çdo vend pune të premtuar dhe të humbur, duke shkelur Kushtetutën. Shqiptarët meritojnë punësim, përfaqësim dhe dinjitet, jo manipulime dhe fshirje nga institucionet. Shtetin mund ta ndërtojmë vetëm bashkë, pa trajtim diferencial ndaj asnjë komuniteti”, thonë nga BDI.

The post BDI: Premtimet e VLEN-it për 2.500 punësime u kthyen në objekt talljeje, shqiptarët meritojnë përfaqësim dinjitoz dhe jo manipulime appeared first on Telegrafi.

Partia Demokratike Shqiptare nuk do të marrë pjesë në zgjedhjet lokale, teksa këto zgjedhje i pari i partisë, Menduh Thaçi i ka quajtur maskenball.

Vendimi është marrë në Kuvendin qendror dhe është kumtuar për mediat.

“Kuvendi qendror merr vendim që Partia Demokratike Shqiptare të refuzoj të marrë pjesë në këtë maskendball politik të quajtur zgjedhje dhe ne nuk do të kemi kandidat në këtë zgjedhje. Mungesën një dëshire për një dialog substancial të avancimit të drejtave të shqiptarëve e keni kuptuar se PDSH refuzon pjesëmarrjen në këtë qeveri aktuale. Z.Ahmeti me vetëdije është futur dhe i ka marr si aleat dy armiq të përbetuar të PDSH-së që nuk kanë kursyer asgjë që ta dëmtojnë këtë parti dhe kuvendi konstaton se bashkëpunimi me Ahmetin dhe BDI-në është tërësisht i pamundur”, deklaroi kryetari i PDSH-së, Menduh Thaçi.

Kujtojmë se Thaçi deklaroi ditë më parë se me Ali Ahmetin më nuk kanë raporte politike dhe se bashkëpunimi politik mes tyre nuk vazhdon.

The post PDSH nuk do të marrë pjesë në zgjedhjet lokale appeared first on Telegrafi.

“Pas skandaleve të rënda dhe dështimeve të turpshme që kanë tronditur opinionin publik dhe kanë shkatërruar besimin në institucionet kulturore shqiptare, Sekretariati për Kulturë kërkon dorëheqjen e menjëhershme, pa asnjë kusht dhe të parevokueshme të këtyre drejtuesve të paaftë dhe të komprometuar: drejtorit të Teatrit të Gostivarit, drejtorit të Teatrit të Tetovës, si dhe drejtorit të Ansamblit të Këngëve dhe Valleve Shqipe”, kështu reaguan sot nga Bashkimi Demokratik për Integrim.

Nga BDI thonë se të tre drejtorët kanë dështuar në menaxhimin e mirëfilltë të institucioneve ku janë emëruar.

Reagimi i plotë:

“Shkaqet janë të pamohueshme dhe përbëjnë turp kombëtar:

1. Drejtori i Teatrit të Gostivarit, është kapur publikisht duke punësuar djalin e tij me kontratë për përkthime në instituionin që ai udhëheq. Ky veprim është abuzim flagrant me funksionin publik dhe shkelje e hapur e ligjit. Një drejtues i tillë nuk meriton as edhe një ditë të qëndrojë në krye të institucionit.

2. Drejtori i Teatrit të Tetovës, duke qenë pjesë e Vlenit, në asnjë mënyrë nuk ka kontribuar në ndërtimin e objektit të teatrit dhe bibliotekës re, përkundrazi është ulur buxheti për ndërtimin e objektit për 500%, nga 300 milionë denar në 13 milionë, duke dëshmuar një urretje patologjike ndaj kulturës shqiptare dhe paaftësi totale për të menaxhuar një institucion me përmasa të këtij lloji. Dështim total në realizimin e programit artisitk, asnjë punësim dhe asnjë veprimtari skenike që do sillte rezultate dhe mirënjohje kombëtare dhe ndërkombëtare të Teatrit të Tetovës. Ndërsa postin e tij e ka shëndëruar në bufon politik. Me veprimet dhe mosveprimet e tij, e ka dënuar qytetin e Tetovës me një boshllëk kulturor të papranueshëm. Kjo është tradhti ndaj publikut dhe ndaj artistëve që presin kushte elementare për punë.

3. Drejtori i Ansamblit të Këngëve dhe Valleve Shqipe, ka shkatërruar funksionalitetin e këtij institucioni kombëtar, duke mos arritur të kompletojë ekipën e ansamblit dhe trupën e valltarëve, si dhe nuk ka realizuar programin vjetor të miratuar. Keqpërdorim dhe politizim të skajshëm të institucionit, presione dhe mobing ndaj të punësuarve. Ky mosfunksionim institucional është fyerje e drejtpërdrejtë ndaj trashëgimisë sonë artistike dhe ndaj identitetit kulturor shqiptar.

Qëndrimi ynë i prerë: Këta drejtues kanë kapitulluar përballë përgjegjësive, kanë treguar paaftësi të thellë dhe kanë tradhtuar misionin e institucioneve që udhëheqin. Ata përfaqësojnë një model degradimi, nepotizmi dhe dështimi që nuk ka vend në kulturën shqiptare.

Kërkojmë dorëheqjen e tyre të menjëhershme. Çdo ditë që ata mbeten në poste është një ditë turpi, një ditë më shumë shkatërrim për artin dhe kulturën shqiptare”, thuhet në reagimin e BDI-së.

The post BDI kërkon shkarkimin e tre drejtorëve të VLEN-it: Shkatërruan artin dhe kulturën shqiptare appeared first on Telegrafi.

Gjithsej 27 zjarre në hapësirë të hapur janë regjistruar nga ora 08:00 e mëngjesit. Prej të cilëve: 2 zjarre janë aktive, 1 nën kontroll dhe 24 të shuara.

Siç informon Qendra për Menaxhim me Kriza (QMK), aktive janë zjarret në zonën “Jasen” komuna e Makedonski Brodit, ku është përfshirë pylli i përzier, si dhe në fshatrat Lojanë dhe Tabanoc, Komuna e Kumanovës dhe Likovës, ku digjet vegjetacioni i ulët dhe pylli i përzier.

Nën kontroll është zjarri mes fshatrave Rogaçevë, Jazhincë, Oreshje e Poshtme, Komuna e Jegunovcës, ku janë përfshirë kullota dhe pylli i përzier.

Sipas QMK-së, janë shuar zjarret në Komunën Dollnen – f. Debreshtë (vegjetacion i ulët dhe mbetje arash), Komunën e Tetovës – te stacioni hekurudhor (vegjetacion i ulët), Komunën Vrapçisht – f. Vranovc (vegjetacion i ulët dhe livadhe), Komunën Gostivar – f. Tumçevishte (vegjetacion i ulët) Komunën Likovë – f. Mateç (vegjetacion i ulët dhe mbetje arash), Komunën e Kumanovës 1 – f. Lopatë (vegjetacion i ulët dhe mbetje arash) Komunën e Kumanovës 2 – f. Orashc (vegjetacion i ulët dhe mbetje arash), Komunën e Kumanovës 3 – f. Çerkezë (mbetje arash), Komunën Shtip – nyja “Tre Çezma” (mbetje arash), Komunën Strugë – afër qytetit (plantacione lajthish), Komunën Kërçovë 1 – f. Oslomej (mbetje arash), Komunën Kërçovë 2 – f. Bërzhdan (mbetje arash), Komunën Krushevë – f. Norovë (deponi), Komunën Kisella Vodë – rr. Sasa (vegjetacion i ulët), Komunën Shuto Orizarë – rr. Jordan Pop Jordanov (vegjetacion i ulët), Komunën Ilinden – f. Ilinden (deponi), Komunën Bogovinë – f. Bogovinë (vegjetacion i ulët), Komunën Ohër – f. Lubanishtë (vegjetacion i ulët), Komunën Staro Nagoriçanë 1 – f. Mlado Nagoriçanë (vegjetacion i ulët), Komunën Staro Nagoriçanë 2 – f. Rugjinc (pyll me shkurre të ulëta dhe vegjetacion i ulët), Komunën Kriva Pallankë – lagjja “Edinstvo” (mbeturina), Komunën Butel 1 – f. Lubanc (vegjetacion i ulët dhe shkurre), Komunën Butel 2 – rruga e Lubotenit (vegjetacion i ulët dhe shkurre), Komunën Karposh – rr. Skupi bb (mbeturina).

The post QMK: 27 zjarre në hapësirë të hapur, 2 zjarre janë aktive, 1 nën kontroll appeared first on Telegrafi.

Me rastin e 18 Gushtit, Ditës së Armatës, sonte nga ora 19:00 në kazermën “Ilinden” do të bëhet qitje nderi artilerie me shkrepje të 10 togave nga 6 topa të batalionit të artilerisë së Armatës.

Siç informon Armata, më parë, në orën 18:00, do të kryhet një provë artilerie e qitjes me një breshëri të vetme.

Qitja nderi e artilerisë do të kryhet nga një njësi e batalionit të artilerisë së Armatës.

“Qitja e artilerisë si pjesë e detyrimeve protokollare të Armatës për shënimin e festave është pjesë e aktiviteteve të zhvilluara me rastin e 18 gushtit, Ditës së Armatës”, deklaron Armata.

The post Armata e Maqedonisë sot shënon ditën e saj appeared first on Telegrafi.

Koalicioni VLEN përmes një komunikate për media thonë se Bujar Osmanit nuk i intereson  Çairi pasi për 20 vite ka ndërtuar vetëm karrierën e tij politike.

“Për 20 vite me radhë, Bujar Osmani ndërtonte karrierë politike, por nuk ndërtoi asnjë projekt për Çairin. Sot, ai bën sikur i intereson Çairi. Për dy dekada, Osmani ka qenë në funksionet më të larta shtetërore, por asnjë qytetar i Çairit nuk ka ndjerë mbështetje apo ndihmë nga ai. Sot shohim vetëm lojëra dhe fjalë boshe. Programe dhe plane shpall një njeri që për dy dekada nuk ka lënë asnjë gjurmë në Çair. Libër i zbrazët”, thonë nga VLEN.

Nga VLEN thonë se Bujar Osmani nuk është kandidat i Çairit, ai është kandidat për karrierën e tij.

“Ai kërkon mbështetje nga Çairi, jo për Çairin, por që të kthehet përsëri në pushtet. Nëse dëshiron të mësojë çfarë është Çairi, le të ecë nëpër rrugët e tij dhe të shohë gjendjen e vërtetë. Qytetarët e Çairit nuk duan më politikanë me fjalë boshe, karrieristë, por duan përkushtim, punë të vërtetë dhe rezultate konkrete. Jo vetëm që nuk solli projekte për Çairin, por Osmani as nuk shuan dot egon e tij personale. Përjashton edhe atë rini të pakët që ka mbetur në BDI, duke e përdorur si shtizë për flamuj partiakë e jo si potencial për ndryshim. Sot, ajo rini është larguar prej tij dhe është rreshtuar fuqishëm pas Izet Mexhitit dhe VLEN-it, sepse aty gjen vizion, perspektivë dhe respekt. Çairi ka nevojë për punë dhe zhvillim, jo për një politikan që për 20 vite e ka parë këtë komunë vetëm si shkallë për karrierë personale.” theksohet në komunikatën e VLEN-it.

The post VLEN: Bujar Osmani nuk ndërtoi asnjë projekt për Çairin, ai dëshiron vetëm kthimin në pushtet appeared first on Telegrafi.

Në gjysmën e parë të vitit 2025, numri i turistëve në Maqedoni është rritur për 13,5 për qind krahasuar me të njëjtën periudhë të vitit 2024. Numri i turistëve të huaj është rritur për 19,7 për qind në vitin 2025 në krahasim me të njëjtën periudhë të vitit 2024. Numri i turistëve vendas është ulur për 2,5 për qind krahasuar me të njëjtën periudhë të vitit 2024, njoftoi kryeministri Hristijan Mickoski në profilin e tij në Fejsbuk.

Ai shkruan se në të njëjtën periudhë të vitit 2025, ka për 8,5 për qind më shumë bijtje të realizuara krahasuar me gjysmën e parë të vitit 2024

“Maqedonia jonë është e bukur, nëse numri i turistëve të huaj rritet me nivel prej 20 për qind në vit dhe gjejnë një arsye për të vizituar qytetet dhe fshatrat e Maqedonisë, liqenet dhe malet e Maqedonisë, për të shijuar kuzhinën dhe verërat e mrekullueshme tradicionale të Maqedonisë, atëherë kjo është arsye e mjaftueshme që të gjithë së bashku të shijojmë bukuritë e Maqedonisë”, shkruan kryeministri Mickoski në Fejsbuk.

The post Mickoski: Në gjysëm e parë të vitit 2025, turizmi në Maqedoni ka regjistruar rritje prej 13,5 për qind appeared first on Telegrafi.

Pas seancës parlamentare në të cilën nuk kaluan ndryshimet dhe plotësimet në Kodin Zgjedhor, me të cilat duhej të rregullohet se çfarë përqindjeje të nënshkrimeve nga numri i përgjithshëm i votuesve të regjistruar në Listën Zgjedhore të Njësisë Zgjedhore (NjZ) duhet të mbledhin kandidatët e pavarur për të marrë pjesë në zgjedhjet lokale, reaguan nga Aleanca për Shqiptarët.

Kjo parti informoi se për ndryshimet dhe plotësimet “për” votuan vetëm 11 deputetë nga komunitetet jo shumicë, ndërsa 18 votuan kundër.

Siç thekson ASh, u konfirmua se kjo qeveri nuk ka shumicë të Badinterit.

“Sot në Kuvend, institucionin më të lartë ligjvënës në vend që ndryshe njihet si “shtëpia e qytetarëve”, u konfirmua edhe zyrtarisht ajo që ne e themi tani e një vit. Kjo Qeveri nuk ka legjitimitet etnik, nuk i përfaqëson të gjithë qytetarët dhe të gjitha bashkësitë etnike, por është një Qeveri monoetnike qe tenton të shkel dhe diskriminojë të tjerët e veçanërisht shqiptarët. Gjatë votimit të ndryshimeve të Kodit Zgjedhor propozimi i kësaj Qeverie mori vetëm 11 vota nga deputetët e bashkësive jo shumicë, ndërsa 18 votuan kundër. Ky është edhe një konfirmim zyrtar se kjo Qeveri nuk ka shumicën e Badinterit dhe se dëshiron të funksionojë pa njërën nga shtyllat kryesore të Marrëveshjes së Ohrit dhe Kushtetutës në fuqi. Ju bëjmë thirje partive shqiptare në Qeveri që të largohen nga ky vasalitet, të lexojnë drejtë vullnetin e shqiptarëve dhe të pranojnë faktin se nuk kanë legjitimitetin e duhur për të qëndruar aty ku janë, të nënshtruar e turpëruar për çdo ditë”, shkruan Aleanca për Shqiptarët.

The post Ndryshimet në Kodin Zgjedhor nuk kaluan, ASH-Sela: U konfirmua që kjo qeveri nuk e ka shumicën e Badinterit appeared first on Telegrafi.

Ministri i Bujqësisë, Pylltarisë dhe Ekonomisë së Ujërave Cvetan Tripunovski bëri të ditur se sot është shpallur thirrje për blerjen e grurit vendas për rezervat shtetërore.

Ministri Tripunovski përmes profilit të tij në Fejsbuk, për herë të parë në Maqedoni, do të blihet gruri i Maqedonisë për rezerva e mallrave.

“Sot është shpallur konkursi për blerjen me grurë për rezervat shtetërore. Për herë të parë në Maqedoni, do të blihet gruri i Maqedonisë për rezerva shtetërore – 9.000 tonë grurë merkantil nga prodhimi i vitit 2025, me çmim prej 13 denarë për kilogram (pa TVSH). Vazhdojmë të punojmë për mbështetje edhe më të madhe të bujqësisë”, thekson ministri.

The post Tripunovski: Shpallet thirrja për blerjen e grurit vendas për rezervat shtetërore appeared first on Telegrafi.

Koalicioni VLEN përmes një komunikate për media thonë se Fronti Evropian i BDI-së po shpërbëhet.

“BDI po përjeton erozionin më të madh politik që nga formimi i ashtuquajturit “Front Europian”. Dy nga partitë më të rëndësishme që në zgjedhjet parlamentare ishin pjesë e këtij koalicioni, Partia Demokratike e Turqëve (PDT) dhe Partia Demokratike e Shqiptarëve (PDSH) tashmë nuk janë më me BDI-në”, thonë nga VLEN.

“Më 14 gusht 2025, Partia Demokratike e Turqëve zyrtarisht njoftoi se po largohet nga koalicioni “Fronti Europian” dhe se në zgjedhjet lokale të 19 tetorit nuk do të garojë bashkë me BDI-në. Kjo vendim do të thotë se komuniteti turk, i cili në mars 2024 ishte futur në frontin e Ali Ahmetit, tani distancohet dhe zgjedh rrugën e vet. Vetëm një ditë më vonë, më 15 gusht 2025, PDSH publikisht bëri të ditur se negociatat me Ali Ahmetin kanë dështuar dhe se PDSH nuk do të garojë së bashku me BDI-në, as nuk do të jetë pjesë e ndonjë marrëveshjeje të përbashkët. Me këtë, edhe një nga partitë më të vjetra shqiptare vendosi të largohet nga skena politike e BDI-së. Këto janë fakte që tregojnë se BDI po humb mbështetjen e partive që e mbajtën në zgjedhjet parlamentare. Tashmë është e qartë se BDI as nuk mund të bashkojë, as nuk mund të fitojë. Nga BDI po largohen të gjithë ata që nuk janë të shantazhuar nga Ali Ahmeti, ata që nuk duan të jenë në shoqërinë e politikanëve të korruptuar dhe ata që nuk duan të jenë pjesë e një politike të gabuar. BDI prej kohësh e ka humbur besueshmërinë tek qytetarët, ndërsa tani po e humb edhe tek partnerët e vet. “Fronti Europian”, i cili shitej si një forcë unifikuese, sot është simbol i shpërbërjes, mosbesimit dhe dobësisë politike. VLEN edhe një herë konfirmon se e ardhmja është në politikën e ndershme, hapje dhe punë për qytetarët, e jo në shantazhe, korrupsion dhe interesa personale”, thuhet në reagimin e VLEN-it.

The post VLEN: PDT dhe PDSH nuk janë më pjesë e Frontit Evropian, kjo dëshmon se ai koalicion po shpërbëhet appeared first on Telegrafi.

Aeroporti Ndërkombëtar i Shkupit ndaloi punën për pak kohë, pas një alarmi për bombë.

Sipas informacioneve nga MPB, sot (16.08.2025) në orën 02:41 në numrin e urgjencës 112 është marrë një lajmërim për një bombë të vendosur në një avion që duhej të nisej drejt Turqisë.

Menjëherë pas marrjes së njoftimit, njësitë speciale të policisë dhe ekipi antiterrorist kryen kontrolle të hollësishme. Pas verifikimeve është konstatuar se bëhej fjalë për një alarm të rremë, ndërsa nuk është gjetur asnjë pajisje shpërthyese.

Rreth orës 06:00, aeroporti rifilloi punën e rregullt dhe fluturimet vazhduan pa pengesa.

The post Alarmi i rremë për bombë ndërpreu funksionimin e Aeroportit të Shkupit appeared first on Telegrafi.

Në pikën kufitare “Tabanoc” këtë mëngjes, koha e pritjes për të dalë nga vendi është rreth 30 minuta, ndërsa në pikën kufitare “Bogorodicë” koha e pritjes është rreth 40 minuta, njoftoi Lidhja Auto-Moto e Maqedonisë.

Në pikat e tjera kufitare në anën e Maqedonisë, nuk ka vonesa më të gjata për hyrje ose dalje nga vendi.

Nga LAMM informojnë se për shkak të një zjarri në Parkun Nacional Jasen, rruga rajonale R1106 Makedonski Brod – Shkup është e mbyllur për të gjitha llojet e automjeteve.

Intensiteti i komunikacionit në rrugët jashtë zonave urbane është rritur.

LAMM rekomandon shpejtësi të adaptuar të lëvizjes, respektimin e sinjaleve të vendosura të komunikacionit e veçanërisht drejtim të kujdesshëm të automjetit, posaçërisht në rrugët nëpër gryka malore dhe lugina të lumenjve ku ekziston mundësia e rrëshqitjes së dheut. Kjo vlen veçanërisht për akset rrugore Katllanovë – Veles, Mavrovë – Dibër – Strugë, Vinicë – Berovë dhe Koçan – Dellçevë.

The post LAMM: Prej 30 deri në 40 minuta pritje në vendkalimet kufitare për hyrje dhe dalje nga vendi appeared first on Telegrafi.

Kuvendi sot ka caktuar seancë në të cilën pika e vetme në rend të ditës janë ndryshimet në Kodin Zgjedhor me procedurë të shkurtuar, të cilat, mes tjerash, rregullojnë pjesëmarrjen e kandidatëve të pavarur në zgjedhjet e ardhshme lokale.

Në vend të një për qind, me ndryshimet janë parashikuar – kur dorëzuesit e listës së kandidatëve për deputetë janë grup i votuesve, është e nevojshme të mblidhen të paktën 0,95 për qind të nënshkrimeve nga votuesit e regjistruar në çertifikatën e Listës së votuesve të njësisë zgjedhore (NJZ).

Me ndryshimet janë parashikuar dhe kur dorëzuesi i listës së kandidatëve për deputetë është grup i votuesve nga njësia zgjedhore për votim jashtë vendit, të mbledhë të paktën 1.000 nënshkrime nga votuesit e regjistruar në çertifikatën e Listës së votuesve për ato njësi zgjedhore para personave zyrtarëve të PDK, gjegjësisht zyrat konsullore në një formular të përshkruar nga Komisioni Shtetëror i Zgjedhjeve.

Me zgjidhjet e porpozuara ligjore, janë definuar edhe portalet e internetit në përputhje me Ligjin për mediat, ndërsa është kryer dhe harmonizimi me Ligjin për organizimin dhe punën e organeve të administratës shtetërore, si dhe për deputetët me nënshkrime të mbledhura.

Sipas propozuesve (grup deputetësh), me zgjidhjet e porpozuara ligjore do të sigurojë një proces zgjedhor të qartë, transparent dhe gjithëpërfshirës dhe do të tejkalojë mospërputhjet e perceptuara përmes përforcimit të kuadrit ligjor.

Më herët KSHZ-ja, në seancën e së shtunës miratoi një vendim për të nxjerrë jashtë fuqie Udhëzimet e KSHZ-së të vitit 2024 që rregullojnë procedurën për mbledhjen e nënshkrimeve dhe mënyrën e emërimit të noterëve në përputhje me Kodin zgjedhor. Siç tha kryetari i KSHZ-së, Boris Kondarko, ky udhëzim për rregullimin e procedurës për mbledhjen e nënshkrimeve po shfuqizohet për shkak të vendimit të Gjykatës Kushtetuese me të cilin shfuqizon nenet 61 dhe 62 të Kodit zgjedhor që përcaktonin numrin/përqindjen e nënshkrimeve për propozimin e listave të grupit të votuesve.

The post Sot Kuvendi do të vendosë për kandidatët e pavarur në zgjedhjet lokale appeared first on Telegrafi.

Ministria e Punëve të Brendshme ka krijuar një platformë të re digjitale për publikimin dhe shkëmbimin e të dhënave për dokumentet e humbura ose të vjedhura që shpallen në Gazetën Zyrtare.

Qëllimi është të përshpejtohet komunikimi mes institucioneve dhe t’u ofrohen qytetarëve shërbime më të shpejta dhe më efikase, duke kursyer kohë. Me këtë sistem të ri, shkëmbimi i të dhënave nuk do të bëhet më me email, por përmes platformës kombëtare për ndërveprueshmëri.

Gazeta Zyrtare do t’i marrë çdo ditë automatikisht dokumentet e raportuara si të humbura ose të vjedhura dhe do t’i publikojë si të pavlefshme. Pas publikimit, MPB do t’i marrë po ashtu automatikisht këto të dhëna dhe do t’i përditësojë në sistemin e saj të brendshëm, në mënyrë që qytetarët të mund të marrin më shpejt dokumente të reja.

The post MPB digjitalizon shërbimin për shpalljen e dokumenteve të humbura dhe të vjedhura appeared first on Telegrafi.

Shoqata e Gazetarëve të Maqedonisë (SHGM) shpreh shqetësim serioz për mënyrën se si vazhdon të zbatohet reklamimi politik i paguar (RPP) në mediat online.

Në prag të zgjedhjeve lokale, SHGM rikujton mungesën e kritereve dhe rregullimit në këtë segment, gjë që u mundëson portaleve “të dyshimta” pa transparencë të marrin mjete të konsiderueshme nga buxheti.

Kjo krijon hapësirë për keqpërdorime – një pjesë e portaleve të raportuara janë faqe interneti me pronar të panjohur ose pa impresum, shpesh të krijuara pak para zgjedhjeve me qëllimin e vetëm që paratë shtetërore të kalojnë në fushata partiake. Kjo dukuri e dëmton skenën mediatike dhe paraqet potencial për korrupsion partiako-medial, në dëm të mediave profesionale dhe interesit publik.

SHGM përshëndet iniciativën për krijimin e një regjistri të portaleve pranë ASHMAAV, por kërkon hapa urgjentë për harmonizimin e rregullativës zgjedhore me qëllim parandalimin e korrupsionit në sferën mediatike dhe sigurimin e kushteve të barabarta për të gjitha mediat.

Komisioni Shtetëror i Zgjedhjeve (KSHZ) njoftoi se nga gjithsej 333 media që kanë dorëzuar aplikim për reklamim politik të paguar për zgjedhjet lokale të caktuara më 19 tetor 2025, plot 257 janë portale interneti.

Për krahasim, në zgjedhjet parlamentare dhe presidenciale të vitit të kaluar u shënua interes rekord – 251 portale u paraqitën për RPP në vitin 2024. Ky numër ishte dukshëm më i lartë edhe nga zgjedhjet lokale të vitit 2021, ku morën pjesë 176 portale, si dhe nga zgjedhjet parlamentare të vitit 2020 me 235 portale. Është e qartë se trendi i paraqitjes së mediave online për fushata reklamuese të paguara nga shteti po rritet në çdo cikël.

SHGM paralajmëron se Ligji aktual Zgjedhor nuk vendos kritere të qarta për atë se cilat media online mund të marrin mjete për reklamim politik të paguar. Edhe pse mediat formalisht duhet të regjistrohen në KSHZ me një çmimore, nuk ka rregulla konkrete për kushtet që duhet të plotësojnë portalet për këtë qëllim.

Kjo krijon hapësirë për keqpërdorime – një pjesë e “portaleve” të paraqitura janë faqe interneti me pronar të panjohur ose pa impresum, shpesh të krijuara pak para zgjedhjeve vetëm për të kanalizuar para shtetërore në fushata partiake. Ky fenomen dëmton skenën mediatike dhe përbën potencial për korrupsion partiako-medial, në dëm të mediave profesionale dhe interesit publik.

Edhe vëzhguesit ndërkombëtarë ndajnë të njëjtin mendim. Misioni vëzhgues i OSBE/ODIHR për zgjedhjet e vitit 2024, në raportin e tij, theksoi se “nuk ka rregulla specifike për portalet online” dhe se shumë portale krijohen menjëherë para zgjedhjeve pikërisht për të marrë para shtetërore. ODIHR rekomandoi që, nëse ky model vazhdon të zbatohet, të vendosen menjëherë “kriteret e qarta dhe objektive për përshtatshmërinë e portaleve online për rimbursim shtetëror të reklamave politike të paguara”.

Në të njëjtën linjë është edhe Enti Shtetëror i Revizionit, në raportin për zgjedhjet e vitit 2024, theksoi nevojën për të përcaktuar më saktë Kodin Zgjedhor – duke definuar kriteret që duhet të plotësojnë mediat elektronike për të marrë pjesë në reklamim politik, rregullat për shpërndarjen e mjeteve buxhetore dhe përcaktimin e organit kompetent për mbikëqyrjen e prezantimit të portaleve gjatë fushatës.

Krijimi i Regjistrit të botuesve të mediave online pranë ASHMAAV përfaqëson një hap pozitiv drejt rritjes së transparencës dhe profesionalizimit. Me nismën e Ministrisë së Transformimit Digjital, me ndryshimet e fundit të Ligjit për Media, portalet interneti për herë të parë njihen si media me të drejta dhe detyrime përkatëse.

Për t’u regjistruar zyrtarisht, portalet tani duhet të plotësojnë kushte konkrete, përfshirë:

të jenë person juridik i regjistruar në Regjistrin Qendror me veprimtari mediatike;
të kenë seli dhe redaksi në Maqedoninë e Veriut;
të kenë domen kombëtar interneti (.mk ose .мкд);
të kenë të paktën dy të punësuar me kohë të plotë (ose një të punësuar dhe një të angazhuar me kontratë).
Megjithatë, asnjë nga këto kushte nuk kërkohet për aplikimin në KSHZ për reklamim politik të paguar – çdo portal, madje edhe pa redaksi apo të punësuar, mund të paraqitet për të marrë para shtetërore për reklama.

Interesi i deritanishëm për regjistrin zyrtar të ASHMAAV është i kufizuar – vetëm 49 media online janë regjistruar deri më tani, që përbën rreth 20% të numrit të portaleve që vitin e kaluar morën financim shtetëror për reklama zgjedhore.

SHGM rikujton se vetërregullimi në hapësirën online është po aq i rëndësishëm sa edhe rregullimi ligjor. Që nga viti 2019, SHGM në bashkëpunim me Këshillin për Etikë në Media (KEMM) ka krijuar Regjistrin e parë të mediave profesionale online – Promedia.mk, për të dalluar portalet kredibile nga faqet propagandistike.

Aktualisht, në këtë regjistër vullnetar janë 105 media online me pronësi transparente dhe të angazhuara për respektimin e standardeve profesionale të gazetarisë. Ky numër pritet të rritet me bashkimin e mediave të reja që plotësojnë kriteret, ndërsa ato që i shkelin parimet mund të përjashtohen.

SHGM beson se qytetarët, institucionet dhe sidomos subjektet politike duhet ta përdorin këtë burim për të bërë dallimin midis mediave përgjegjëse dhe atyre që shpërndajnë dezinformata ose shërbejnë si zëdhënës partiakë.

Për të shmangur nxitjen e mëtejshme të korrupsionit në sferën mediatike, SHGM apelon që partitë politike pjesëmarrëse në zgjedhjet lokale, kur vendosin për shpërndarjen e parave publike për reklama partiake, të marrin parasysh regjistrin e ASHMAAV ose atë të Promedia.mk për të mbështetur gazetarinë kredibile në interes të qytetarëve.

Në mungesë të një mekanizmi mbikëqyrës mbi portalet gjatë fushatës, vullneti politik dhe zgjedhja etike e partive janë kyçe për ruajtjen e një ambienti të shëndetshëm mediatik.

Fatkeqësisht, këto zgjedhje lokale po mbahen sërish me rregullat e vjetra, pa u miratuar ndryshimet e propozuara për më shumë transparencë në hapësirën online. SHGM rikujton se organizatat mediatike dhe gazetareske kanë kërkuar disa herë ndryshime në Kodin Zgjedhor, por ato nuk u miratuan për këto zgjedhje.

Kështu, mbeten të njëjtat zgjidhje problematike që krijojnë kushte të pabarabarta në treg – mediat profesionale janë në pozitë të pasigurt përballë fluksit të portaleve të financuara nga partitë.

Për më tepër, për mediat online nuk ka detyrim për përfaqësim të balancuar zgjedhor si për radiodifuzerët, që do të thotë se partitë mund të financojnë pa kufizim portale të caktuara pa ofruar përmbajtje që garanton pluralizëm. Kjo boshllëkësi mund të ndikojë afatgjatë mbi pluralizmin politik dhe të drejtën e qytetarëve për informacione të larmishme.

The post 333 media kanë aplikuar për reklamim politik, SHGM: Financimi i qindra portaleve krijon hapësirë për korrupsion appeared first on Telegrafi.