Futbollisti i Barcelonës, Marcus Rashford, foli hapur për motivimin pas transferimit të tij në formë huazimi nga Manchester United në një intervistë për faqen e parë të gazetës spanjolle Sport.

Pasi u largua nga Man United muajin e kaluar për t’u bashkuar me klubin katalanas, Rashford tani përballet me detyrën e vështirë me të cilën përballen të gjithë lojtarët që nuk flasin spanjisht, e cila është të mësuarit e gjuhës.

Gatishmëria për të mësuar spanjisht është shpesh çelësi për të fituar mbështetjen e tifozëve, gjë që mund ta ndihmojë klubin të vendosë të aktivizojë opsionin e tij të lirimit prej 26 milionë eurosh përpara Kupës së Botës verën e ardhshme në SHBA, dhe lojtari tashmë ka fituar një nofkë të çuditshme dhe komike nga shokët e tij të ekipit.

“Kur argëtohen mes tyre, më quajnë ‘chuche’ (e dashur). Nuk e di çfarë do të thotë, por është qesharake kur më drejtohen në atë mënyrë”, deklaroi Rashford.

Anglezi theksoi se mësimi i gjuhëve është një përparësi, por se atij i pëlqen të zotërojë spanjishten.

Lexo po ashtu "Barcelona është gati për të fituar Ligën e Kampionëve këtë sezon" - Rashford ndan përshtypjet e para si lojtar i katalanasve

“Katalanishtja është e vështirë. Mendoj se do të mësoj pak ndërsa jam këtu dhe shpresoj se do të më ndihmojë ta kuptoj më mirë kulturën katalane”, tha ai.

Rashford më vonë pranoi se iku nga “Old Trafford” për të qenë i lumtur pasi Amorim e largoi nga skuadra në dhjetor për shkak të përplasjeve të personaliteteve.

Pas një periudhe gjashtëmujore huazimi te Aston Villa, Rashford ka pranuar hapur se tani “ndihet rehat” te kampionët aktualë të La Ligës dhe shpreson të rikthehet në formën e tij më të mirë. /Telegrafi/ 

The post Shokët e ekipit në Barcelonë i dhanë Rashfordit një nofkë të çuditshme, ai ende nuk është i sigurt se çfarë do të thotë appeared first on Telegrafi.

Ish-presidentit të Republikës Serbe, Milorad Dodik, i hiqet pasaporta diplomatike.

Sipas një dokumenti që e posedon portali klix.ba, Dodik ka 15 ditë kohë që pasaportën ta kthejë në Ministrinë e Punëve të Jashtme të Bosnjë dhe Hercegovinës.

Në rast se Dodik nuk respekton këtë afat, Ministria e Punëve të Jashtme do të njoftojë Policinë Kufitare dhe rrjetin diplomatik-konzullor të vendit për faktin se pasaporta e tij është anuluar.

Lexo po ashtu Zyrtare: Dodik nuk është më President i Republika Srpska, Gjykata e BeH e hodhi poshtë ankesën e tij

Të kujtojmë se Dodikut i është hequr mandati me vendim të Komisionit Qendror Zgjedhor (CIK) të Bosnjës dhe Hercegovinës, vendim që është konfirmuar nga Këshilli Apelues i Gjykatës së Bosnjës dhe Hercegovinës.

Mandati i tij i është hequr për shkak të një dënimi përfundimtar për moszbatim të vendimeve të përfaqësuesit të lartë në Bosnjë dhe Hercegovinë, që është marrë në muajin korrik.

Dodik është dënuar me një vit burg, të cilin e ka blerë me pagesë prej 36,500 KM (18600 euro), dhe gjashtë vjet ndalim veprimtarie politike.

Sipas pjesës së dytë të vendimit, i është hequr mandati dhe nga data 18 gusht ai ka humbur pozitën e presidentit të Republikës Serbe. /Telegrafi/

The post Dodikut i hiqet pasaporta diplomatike appeared first on Telegrafi.

Ylli i Real Madridit, Vinicius Junior, ka hedhur poshtë propozimin më të fundit të klubit për zgjatjen e kontratës, duke lënë të hapura dyshime serioze mbi të ardhmen e tij afatgjatë në “Santiago Bernabéu”.

Sulmuesi brazilian, një nga lojtarët më të rëndësishëm të ekipit, raportohet se nuk është i kënaqur me kushtet financiare që i janë ofruar.

Burime pranë lojtarit theksojnë se paga e propozuar nuk pasqyron në mënyrë të drejtë vlerën dhe kontributin e tij në fushë.

Vinicius është aktualisht nën kontratë deri në vitin 2027, me një përfitim vjetor prej rreth 17 milionë eurosh.

Real Madrid synon ta mbajë atë në kryeqytetin spanjoll edhe tre vite të tjera, deri në vitin 2030, duke i ofruar një rritje të lehtë të pagës.

Megjithatë, përfaqësuesit e brazilianit po kërkojnë një marrëveshje më ambicioze: 20 milionë euro në sezon si pagë fikse, plus bonuse të lidhura me performancën që mund ta çojnë shifrën në 30 milionë euro.

Lexo po ashtu Idetë e reja të Alonsos për Mbappen mund të mos i pëlqejnë Viniciusit – zbulohet se çfarë i lejohet francezit të bëjë

Oferta e klubit – një shumë fikse prej 20 milionë eurosh pa stimuj shtesë – është cilësuar nga kampi i tij si “shumë e ulët” për një angazhim afatgjatë.

Në këtë fazë, pala e lojtarit ka vendosur të mos nxitojë për një marrëveshje. Strategjia e tyre është të presin dhe të shohin ecurinë e sezonit nën drejtimin e trajnerit të ri, Xabi Alonso, përpara se të rikthehen në tryezën e negociatave.

Çështja e rinovimit të Vinicius tashmë shihet si një nga temat më të nxehta brenda klubit.

Për Realin, mbajtja e një prej yjeve të tij kryesorë është thelbësore, ndërsa për brazilianin dhe kampin e tij mbetet çështje prestigji dhe vlerësimi financiar. /Telegrafi/

The post Vinicius refuzon ofertën e Real Madridit për zgjatje të kontratës – zbulohet shuma që kanë ofruar Los Blancos appeared first on Telegrafi.

Sekretari i Ministrisë së Kulturës, Rinisë dhe Sportit, Bislim Bislimi, ka mbajtur një konferencë për media lidhur me aktakuzën e ngritur për keqpërdorim të pozitës zyrtare ndaj dy zyrtarëve të Drejtorisë së Urbanizmit në Prizren.

Bislimi tha se të akuzuarit kanë lejuar rrënimin e një objekti i cili është në mbrojtje.

“Sikurse është njoftuar opinioni publik, dje Prokuroria Themelore në Prizren ka ngritur aktakuzë ndaj dy personave në cilësinë zyrtare të zyrtarëve publik të Komunës së Prizrenit për shkak të lejimit të rrënimit të objekteve me status ligjor të mbrojtjes së përhershme si asete të trashëgimisë kulturore arkitekturore, gjegjësisht rrënimi i ish-kompleksit Sarajet e Vjetra në Prizren.”, tha Bislimi.

Ai shtoi gjithashtu se nuk është hera e parë që një gjë e tillë po ndodh, por ministria ka marrë masa që të zvogëlojë shkatërrimin e objekteve që janë në mbrojtje dhe ata që lejojnë të ndodhë diçka e tillë, nuk do të mbesin pa u ndëshkuar.

“Vite me radhë, institucionet kompetente profesionale të trashëgimisë kulturore janë ballafaquar me raste të shumta të dëmtimit të qëllimshëm, shkatërrimit apo tjetërsimit të objekteve që gëzojnë status ligjor të mbrojtjes, të cilat dëme janë bërë në emër të përfitimit privat, duke shpërfillur kufizimet ligjore që ekzistojnë mbi këto objekte, sipas Kushtetutës së Republikës së Kosovës, Ligjit për Trashëgimi Kulturore, Ligjit për Qendrën Historike të Prizrenit dhe ligje e akte tjera juridike në fuqi… MKRS përtej programit masiv të konzervimit dhe restaurimit që po e zbaton aktualisht, vitet e fundit është angazhuar shumë që përmes instrumentit të funksioneve ekzekutive administruese të institucioneve të saj me theks të veçantë Inspektoratit për Trashëgimi Kulturore, ka rritur ndjeshëm aktivitetin në drejtim të parandalimit të dukurive të kundërligjshme të shkatërrimit dhe humbjes së të mirave kulturore dhe historike që mbrohen me Kushtetutë dhe me ligj.”, tha ai.

Lidhur me hapat e mëtejmë institucional, Bislimi theksoi se i bëjnë thirrje Prokurorisë në Prizren që të merret me rastin dhe të ndëshkojnë zyrtarët përgjegjës dhe se ju bën thirrje edhe të akuzuarve që të japin dorëheqje nga pozita zyrtare dhe tregoi se për rikonstruktimin e objektit të rrënuar duhet ndarë 15 milion euro, një shumë e konsiderueshme nga buxheti i shtetit.

“MKRS rikujton edhe me këtë rast se koordinimi mes MKRS-së, Policisë, Prokurorisë dhe gjyqësorit do të thellohet edhe më tej dhe se çdo rast ku konstatohen veprime të paligjshme në asete apo zona mbrojtëse, do të procedohen penalisht, qoftë kjo për zyrtarë publikë të nivelit qendror apo lokal, qoftë për palët tjera që përfshihen në shkatërrimin apo humbjen e vlerave që mbrohen me Kushtetutë dhe me ligj. Për shkak se vërejmë një angazhim negativ gjithnjë në rritje të zyrtarëve të pushtetit lokal që shkon në drejtim të cenimit të Ligjit për Trashëgimi Kulturore dhe në favor të interesave të paligjshme private apo grupore, i ftojmë ata të heqin dorë nga kjo praktikë, të koordinohen maksimalisht me institucionet kompetente të trashëgimisë kulturore dhe të sigurojnë zbatimin e legjislacionit sektorial në këtë fushë të interesit publik, siç detyrohemi të gjithë ne që ushtrojmë autoritet publik.”, tha ai.

Për rikonstruktimin e objektit të rrënuar duhet ndarë afro 16 milionë euro, një shumë e konsiderueshme nga buxheti i shtetit.

The post ​MKRS: Zyrtarët që lejojnë rrënimin e objekteve të mbrojtura do të ndiqen penalisht appeared first on Telegrafi.

Seanca e mbyllur gjyqësore ndaj të akuzuaritpër krime lufte në Kosovë, Sinisha Spasiq, ka përfunduar pa praninë e mediave.

I akuzuari është larguan nga policia. Ndërkohë, Ljubomir Pantoviq, avokat i të akuzuarit Spasiq, tha se kërkesa që Prokuroria Speciale e ka dorëzuar sot, nuk i plotëson kushtet themelore që të pranohet dhe që mbi bazën e saj të caktohet paraburgimi.

Pantoviq tha se hetimi për krime lufte në komunën e Vushtrrisë, ka filluar që në vitin 1999 nga hetuesit e Tribunalit të Hagës, UNMIK-ut dhe Prokuroria e Kosovës, e sipas tij, askund nuk është përmendur Spasiq si i dyshuar për krime lufte.

Sipas tij, “kujtesa” e një dëshmitari pas 26 vitesh se Spasiq ka marrë pjesë në këto krime lufte është e çuditshme.

“Hetimi për atë krim që i vihet në barrë zotit Spasiq ka filluar që në verën e vitit 1999, pra para 26 vitesh. Dhe atë hetim e kanë zhvilluar hetuesit e Tribunalit të Hagës, pastaj hetuesit e Prokurorisë së UNMIK-ut, të EULEX-it dhe hetuesit kosovarë. Dhe në kuadër të atij hetimi janë marrë në pyetje me siguri dhjetëra dëshmitarë. Gjatë atyre 26 viteve askush, asnjëherë, në asnjë kontekst që ka të bëjë me atë krim, nuk e ka përmendur Sinisha Spasiq. Deri para një muaji e gjysmë, kur një dëshmitar u kujtua se Sinisha kishte marrë pjesë në atë krim, por e kishte harruar ta thoshte për plot 26 vite. Pas kësaj iu “rifreskua”, që të them kështu, kujtesa edhe disa dëshmitarëve të tjerë, dhe edhe ata deklaruan se Sinisha kishte qenë pjesëmarrës në atë, siç e quajnë tani, krim lufte”, tha ai.

Pantoviq tha se do të paraqesë ankesë, pasi siç tha kërkesa e Prokurorisë Speciale nuk i plotëson kushtet themelore që të pranohet dhe të caktohet masa e paraburgimit.

“Thjesht jemi në një situatë të tillë ku njerëzit po arrestohen, po ndiqen penalisht pa asnjë provë. Kjo kërkesë që Prokuroria Speciale e ka dorëzuar sot, unë po ju them, nuk i plotëson kushtet themelore që të pranohet dhe që mbi bazën e saj të caktohet paraburgimi, sepse absolutisht nuk është paraqitur, nuk është dëshmuar dyshimi i bazuar se zoti Spasiq ka marrë pjesë në atë ngjarje, e ky është kushti themelor që ndaj një personi të caktohet masa e paraburgimit. Do të paraqes ankesë”, tha Pantoviq.

Spasiq u arrestua të dielën në pikën kufitare të Merdarës, si i dyshuar për krime lufte kundër popullatës civile gjatë luftës në Kosovë. Sipas njoftimeve nga Prokuroria Speciale dhe Policia e Kosovës, ai dyshohet për përfshirje në krime të kryera më 6 prill 1999 në komunën e Vushtrrisë, në rajonin e Mitrovicës.

Sipas kërkesës së Prokurorisë Speciale, S.S. dyshohet se në bashkëpunim me pjesëtarë të tjerë të uniformuar duke vepruar në grup si zyrtarë të mobilizuar rezervistë aktiv me njësi të përbëra nga Ministria e Punëve të Brendshme e Serbisë.

Ndër të tjera, S.S. dyshohet se më 06.04.1999 në bashkëkryerje, gjatë një aksioni ka plaçkitur, djegur shtëpi, si dhe ka ushtruar dhunë fizike dhe seksuale ndaj civilëve të paarmatosur.

Gjatë fazës së hetimeve janë siguruar prova materiale, përfshirë edhe dëshmi të dëshmitarëve.

The post ​Avokati i të akuzuarit për krime lufte mundohet të arsyetohet për klientin e tij appeared first on Telegrafi.

Këngëtarja shqiptare me famë botërore, Bebe Rexha, ka paralajmëruar projektin e saj më të ri muzikor, këtë herë në bashkëpunim me muzikantin e njohur belg, Netsky.

Kënga mban titullin “Light That Leads Me”, dhe ka qenë e prezantuar në disa festivale ndërkombëtare gjatë verës, por tani do të publikohet zyrtarisht për publikun më të premten.

Vetë Bebe ka ndarë lajmin me ndjekësit e saj në rrjetet sociale, ku ka shfaqur entuziazmin për këtë bashkëpunim.

“Jam shumë e lumtur që jam pjesë e këtij projekti të mrekullueshëm drum and bass me të jashtëzakonshmin @netskyofficial. Shpresoj ta pëlqeni po aq sa e dua unë. Del këtë të premte!”, ka shkruar ajo në InstaStory.

Në dëgjimin e parë, “Light That Leads Me” duket të jetë një projekt mjaft premtues për t’u shndërruar në hit, duke qenë se i përket zhanreve electro house dhe drum & bass, ku energjia e stilit të Netsky ndërthuret me vokalin karakteristik të Bebe Rexhës.

Ky bashkëpunim pritet të jetë një tjetër sukses ndërkombëtar në karrierën e artistes shqiptare, e cila vazhdon të mbetet një nga emrat më të spikatur të skenës muzikore botërore. /Telegrafi/

@beberexha

♬ Light That Leads Me – Netsky & Bebe Rexha

The post Bebe Rexha paralajmëron bashkëpunimin e ri me Netsky – kënga publikohet këtë të premte appeared first on Telegrafi.

Në episodin më të ri të “Përballje Podcast”, mysafir ishte Hamdi Malushaj, themelues dhe drejtor i “evroTarget” dhe “KiKxxl”, dy kompani që operojnë në sektorin energjetik dhe teknologjik në Kosovë.

Malushaj foli për sfidat me të cilat përballen bizneset vendore, përfshirë vështirësitë në hyrjen në tregun e lirë të energjisë elektrike, si dhe ndau përvojën e tij si sipërmarrës në vend.

Ai theksoi se shkyçja nga rrjeti i energjisë ka sjellë pasoja të rënda për funksionimin e kompanive dhe mirëqenien e punonjësve.

Malushaj deklaroi se nga liberalizimi i tregut të energjisë elektrike, buxheti i Kosovës do të humb miliona euro.

“Trembëdhjetë milionë euro do t’i humb buxheti i Kosovës nga tatim në fitim. Unë tash fitimet i kam ma të vogla, dhjetë për qind është tatimfitimi. Nëse njëqind e tridhjetë milionë euro i kemi fitimet më të vogla si biznese, duhet me i heq faturat, me thanë lirona, prejt tatimit. Pasi, tash fitim, nuk mundemi me të dhënë, sikur të kem dhënë përpara”, potencoi ai.

Gjatë bisedës, ai u shpreh se brenda dy-tre muajsh, askush nuk do të mundet t’i bëjë konkurrencë KESCO, duke shtuar se “Përveçse ajo mundet t’i bëjë edhe disa kompani me emra të ndryshme edhe ajo me lut me oferta, përndryshe këta që s’e kanë lidhje le ta harrojnë që munden me shit”.

Malushaj deklaroi se në secilin shtet bizneset e kanë energjinë elektrike, duke përmendur kështu edhe disa vende të rajonit.

Lexo po ashtu A po bëhet energjia “plaçkë” në Kosovë? Malushaj: Bizneset do të paguajnë mijëra euro më shumë

Ai nënvizoi se në Kosovë nuk është bërë liberalizimi i tregut të lirë energjetik, por monopolizim me ligj.

“Nuk është liberalizim, por është monopolizim me ligj. Domethënë, ligji e mbështet monopolin edhe i dhunon bizneset në drejtim të s’ka konkurrencë treg”, pohoi mes tjerash ai.
Në podcast, ai tha se liberalizimi i energjisë elektrike përfshinë 60 përqind të ekonomisë kosovare.

“Është bërë jo profesionalisht, është bërë qysh nuk ka ndodhë kurrkund në botë, me njëfarë vendimi arbitrar, domethënë vendim pa e përgatitë, me zero përgatitje. Janë katër, pesë vetë që e kanë bërë këtë punë edhe nuk e kanë bërë duke mbrojtur konsumatorin”, deklaroi ai. /Telegrafi/

The post “Miliona euro humbje për buxhetin e shtetit”, sipërmarrësi Malushaj flet për daljen e biznesve në tregun e lirë energjetik appeared first on Telegrafi.

Në kërkim të ekselencës dhe përkushtimit akademik, Horizon School ofron mbështetje të veçantë, për nxënësit me rezultate të shkëlqyera dhe të disiplinuar, për Nivelin e Mesëm të Lartë.

Shkolla ofron mundësi të veçanta regjistrimi për këta nxënës, duke i inkurajuar të zhvillohen në një ambient ku cilësia dhe standardet ndërkombëtare janë prioritet.

E akredituar si një Cambridge International School, Horizon School ofron mundësinë e pajisjes me diplomë të njohur ndërkombëtarisht, e cila u hap dyert nxënësve drejt universiteteve më të mira në botë dhe një karriere akademike të suksesshme.

Shkolla është e pajisur me laboratorë modernë, kabinete të avancuara dhe bibliotekë të pasur, të gjitha të menduar hollësisht për të krijuar një ambient dinamik dhe me standarde të larta të arsimit bashkëkohor.

Regjistrimet për vitin e ri shkollor janë të hapura, dhe për nxënësit e kualifikuar ofrohet mbështetje financiare, me qëllim që talenti dhe përkushtimi të shpërblehen.

Për prindërit dhe nxënësit që janë në kërkim të një arsimi cilësor, me vlerësim global dhe me fokus të theksuar në zhvillimin personal e profesional, Horizon School është zgjedhja e duhur.

Për më shumë informacion, kontaktoni në: 048 153 153

E ardhmja nis me ne!

The post Horizon School mbështet nxënësit shembullor në Nivelin e Mesëm të Lartë appeared first on Telegrafi.

Juventusi është në prag të disa vendimeve të rëndësishme strategjike për afatin kalimtar të verës. Për të siguruar fonde për përforcime të bujshme, drejtuesit bardhezi po përgatisin largimin e dy prej lojtarëve me peshë në skuadër.

Sipas La Gazzetta dello Sport, klubi ka dhënë dritën jeshile për shitjen e Douglas Luiz. Mesfushori brazilian pritet t’i bashkohet Nottingham Forest, me marrëveshjen që mund të mbyllet për pak mbi 30 milionë euro – më pak nga shuma 40 milionë euro që Juventusi shpresonte fillimisht të arkëtonte.

Në të njëjtën kohë, edhe sulmuesi argjentinas Nico Gonzalez është në listën e largimeve. Shitja e tij do t’i sillte arkës së klubit edhe rreth 30 milionë euro të tjera.

Në total, vetëm nga këto dy operacione, Juventusi synon të grumbullojë 60–70 milionë euro, një shumë e konsiderueshme që do të përdoret menjëherë për afrime të reja.

Në krye të listës së dëshirave të klubit është rikthimi i Randal Kolo Muanit nga PSG, i cili shihet si sulmuesi i duhur për të shtuar forcën ofensive. Francezi mund të vijë fillimisht në formë huazimi me të drejtë blerjeje.

Krahas tij, Juventusi po punon edhe për transferimin e mbrojtësit argjentinas Nahuel Molina nga Atletico Madrid, një investim prej rreth 25 milionë euro.

Emri tjetër që ka fituar prioritet është ai i Edon Zhegrovës. Anësori i Lilles është në vitin e fundit të kontratës dhe vlerësohet me një shumë të ngjashme si Molina.

Klubi italian beson se kosovari mund të sjellë kreativitet dhe rrezikshmëri në krahët e sulmit, duke qenë një profil që i mungon aktualisht Allegrit.

Në këtë mënyrë, Juventusi synon të përfitojë nga shitjet për të ndërtuar një skuadër më të balancuar dhe konkurruese. /Telegrafi/ 

The post Dy shitje të rëndësishme për tri blerje të mëdha – Juventusi në garë me kohën për ta kompletuar planin appeared first on Telegrafi.

Drejtoria e Doganave sekuestroi 78 kg duhan për nargjile me vlerë tregu prej 810.698 denarë. Ndaj një personi është ngritur kallëzim penal në Prokurorinë Publike Themelore kompetente për shkak të dyshimit të bazuar për kryerjen e veprës penale kontrabandë dhe pengim të personit zyrtar në kryerjen e një veprimi zyrtar.

Sipas Drejtorisë së Doganave, rasti u zbulua në hyrje të vendit, në pikën kufitare Bllacë, gjatë kontrollit të një makine të drejtuar nga një shtetas i Maqedonisë së Veriut.

“Personi, me qëllim që t’i shmangej ilegalisht kontrollit doganor, refuzoi ta ndalonte automjetin para doganierit dhe u drejtua me shpejtësi të shtuar drejt rampës, duke e penguar kështu të kryente veprimin e tij zyrtar”, thonë nga Doganat.

Sipas Doganës, kur automjeti u ndalua, ai u përzgjodh për një kontroll të detajuar, gjatë të cilit u gjetën 13 kuti me 312 kanoçe me gjithsej 78 kilogramë duhan për nargjile. Kjo parandaloi një përpjekje për të liruar mallra akcize për të cilat nuk ishin paguar detyrime në vlerë prej 508.048 denarë.

The post Në “Bllacë” janë sekuestruar 78 kg duhan për nargjile appeared first on Telegrafi.

Zv. kryeministri dhe Ministri i Transportit, Aleksandar Nikolloski njoftoi sot se shteti e ka fituar rastin “Kazandol” në të gjitha 11 pikat e aktakuzës.

“Dua t’ju informoj për vendimin në procedurën e arbitrazhit “Kazandol” ku shteti u padit nga disa investitorë.

Kërkesa e tyre ishte 115 milionë euro dëmshpërblim, por me krenari mund të them se e fituam këtë rast, të 11 bazat mbi të cilat shteti u padit u refuzuan dhe u kursyen 115 milionë euro.

Vendimi është plotësisht në favorin tonë, dhe rasti nuk ishte aspak i lehtë”, tha Nikolloski./Telegrafi/

The post Nikolloski: Shteti e fitoi rastin “Kazandol”, u kursyen 115 milionë euro appeared first on Telegrafi.

Prokuroria Themelore në Pejë, Departamenti i Krimeve të Rënda, ka ngritur aktakuzë kundër katër të pandehurve L.B., L.M. F.M. dhe Sh.Gj, për shkak të veprës penale “Grabitja” dhe kundër të pandehurit L.M. për shkak të veprës penale “Mbajtja në pronësi, kontroll ose posedim të paautorizuar të armëve” Kodi Penal i Republikës së Kosovës.

Sipas aktakuzës, të pandehurit më datën 21.05.2025, rreth orës 23:35 min në Pejë, duke vepruar si anëtar të grupit, me armë dhe me përdorimin e forcës dhe kanosjes serioze, grabisin pompën e derivateve DHF në Pejë.

“Të pandehurit më datën 21.05.2025, rreth orës 23:35 min në Pejë, duke vepruar si anëtar të grupit, me armë dhe me përdorimin e forcës dhe kanosjes serioze, grabisin pompën e derivateve DHF në Pejë, ashtu që të njëjtit fillimisht sigurojnë një armë të gjatë, pastaj me veturën e njërit prej të pandehurve, shkojnë në vendin e ngjarjes, i vendosin maskat në kokë, dalin nga vetura me armë, futen brenda në marketin e pompës dhe nën kërcënimin e armës dhe kanosjes serioze, punëtorit të kësaj kompanie i marrin shumën prej 905€, pastaj kthehen në veturë dhe largohen nga vendi i ngjarjes, ndërsa parat i ndajnë përgjysmë”, thuhet në njoftim.

Prokurori i rastit në aktakuzë, përpos që ka kërkuar dënimin e të pandehurve, ka propozuar edhe konfiskimin e veturës Golf II, konfiskimin e parave të gjetura tek të pandehurit në shumën prej 575€, konfiskimin e armës dhe lëshimin e urdhrit për kompensimin e humbjes apo dëmit, të shkaktuar të dëmtuarit si rezultat i veprës penale. /Telegrafi/

The post Me armë dhe përdorimin e forcës grabitën pompën e benzinës, aktakuzë ndaj katër personave në Pejë appeared first on Telegrafi.

Presidenti amerikan Donald Trump ka folur për Fox News duke thënë se shpreson që Vladimir Putin “do të jetë mirë”.

“Nëse nuk është, do të jetë një situatë e vështirë”, tha ai, transmeton Telegrafi.

Presidenti amerikan shtoi se mendon që Volodymyr Zelensky dhe Putin po shkojnë mirë.

I pyetur për perspektivën e garancive të sigurisë, Trump thotë se kombet evropiane “do ta ngarkojnë atë paraprakisht”.

“Ata duan të kenë trupa në terren”, shtoi ai, duke iu referuar Francës, Gjermanisë dhe Mbretërisë së Bashkuar.

“Nuk mendoj se do të jetë problem”, theksoi presidenti amerikan.

Kur u pyet nëse mund të japë garanci se nuk do të ketë trupa amerikane në terren, Trump thotë “keni garancinë time dhe unë jam president”.

“Unë thjesht po përpiqem të ndaloj vrasjen e njerëzve”, shtoi ai.

Gjatë intervistës telefonike, Trump sugjeroi se mbështetja e SHBA-së për sigurinë e Ukrainës mund të vijë në formën e fuqisë ajrore.

Presidenti amerikan thotë gjithashtu se gjithmonë mendon se Ukraina ishte një zonë e ndërmjetme midis Rusisë dhe Evropës.

Trump theksoi se pati një “bisedë shumë të mirë” me Putinin pas takimit të tij me Zelenskyn dhe udhëheqësit evropianë dje.

“Nuk e bëra para tyre, mendova se do të kishte qenë mungesë respekti ndaj presidentit Putin. Ai nuk do të fliste me njerëzit nga Evropa “, tha Trump. /Telegrafi/

The post Trump thotë Britania, Franca e Gjermania duan të dërgojnë trupa në terren për të siguruar paqen – përjashton mundësinë që trupat amerikane t’u bashkohen atyre appeared first on Telegrafi.

Gjykata Themelore në Prishtinë, Departamenti Special ka aprovuar kërkesën e Prokurorisë Speciale të Republikës së Kosovës dhe përmes Aktvendimit ka caktuar masën e paraburgimit në kohëzgjatje prej një (1) muaji ndaj të pandehurit, Sinisha Spasiqit, për shkak të dyshimit të bazuar se ka kryer veprën penale Krime lufte kundër popullatës civile.

Gjyqtari i procedurës paraprake, pas seancës dëgjimore vlerësoj se janë përmbushur kushtet ligjore për caktimin e masës së paraburgimit për të pandehurin S.S., pasi ekziston dyshimi i bazuar se i njëjti në bashkëkryerje ka kryer veprën penale Krime lufte kundër popullatës civile.

“Ekziston dyshimi i bazuar se me datë 06.04.1999, gjatë periudhës së luftës në Kosovë, i pandehuri S.S. me pjesëtarë të tjerë të uniformuar, me uniforma të policisë dhe ushtrisë së Serbisë në fshatin Reznik të Vushtrrisë gjatë një aksioni mirë të organizuar kishin plaçkitur e djegur shtëpi dhe kishin vrarë civil të paarmatosur dhe atë I.U., M.U. me bashkëshortet, po ashtu B.U., F.U., S.U. dhe F.U., gjatë ditës kritike ishin vrarë edhe T.U. me bashkëshorten H.U., ndërsa pas plaçkitjes së parave, e kishin marr me dhunë viktimën B. e kishin dërguar në katin e dytë të shtëpisë, ku fillimisht e kishin rrahur, maltretuar dhe dhunuar seksualisht njëri pas tjetrit, me ç’rast i kishin shkaktuar të njëjtës lëndime të rënda trupore”, thuhet mes tjerash në njoftimin e bërë nga Gjykata Themelore e Prishtinës.

Gjykata vlerësoj se pesha e veprës penale është e natyrës së rëndë dhe komplekse, andaj caktimi i masës së paraburgimit është masë e domosdoshme në këtë rast penal dhe se çdo masë tjetër do të ishte e pamjaftueshme, për zbatimin e suksesshëm të procedurës penale.

Gjykata konstatoj se ekziston dyshimi i bazuar se i pandehuri S.S. nëse gjendet në liri, mund të arratiset duke pasur parasysh faktin se është shtetas i Serbisë, andaj ka gjasa reale se mund të arratiset dhe i njëjti mund të jetë i pa arritshëm për fazat tjera të procedurës penale.

Kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë. /Telegrafi/

The post Një muaj paraburgim për Sinisha Spasiq, dyshohet për vrasje dhe dhunim seksual të civilëve gjatë luftës në Vushtrri appeared first on Telegrafi.

Klubi bullgar, CSKA Sofia FC ka njoftuar ndarjen e rrugëve me sulmuesin anësor të Kosovës, Zymer Bytyqi.

Bytyqi nuk do të jetë më pjesë e klubit të Superligës së Bullgarisë, pasi kanë vendosur të ndahen pas një marrëveshje të dyanshme.

Njoftimi ka ardhur nga vet klubi bullgar ma anë të faqeve të tyre zyrtare.

“Futbollisti ofensiv Zymer Bytyqi nuk është më pjesë e skuadrës së CSKA-së”.

“Sot, klubi dhe lojtari i dhanë fund marrëdhënies së tyre kontraktuale me marrëveshje të ndërsjellë”.

“Me fanellën e kuqe, Bytyqi luajti 20 ndeshje në të cilat shënoi 5 gola. CSKA i uron Zymer Bytyqit suksese në sfidat e ardhshme”, thuhet në njoftim. /Telegrafi/

The post CSKA Sofia njofton ndarjen me Zymer Bytyqin appeared first on Telegrafi.

Forcat ukrainase kanë shkatërruar trenin rus që transportonte derivate për tanket në rajonin e pushtuar të Zaporizhzhia, duke shkaktuar anulimet dhe ndërprerje të udhëtimeve që janë tejet të rëndësishme për furnizim për ushtrinë ruse.

Sipas aktivistit Petro Andriushchenko, sulmi ka ndodhur mes Urozhayne dhe Tokmak, ku fillimisht treni kishte tentuar të shmang sulmin duke ndërruar drejtim, por e kotë dhe u godit direkt, transmeton Telegrafi.

Pamjet e publikuara dhe filmuara nga ajri me dron, tregojnë momentin duke lëvizur derisa në një moment goditet nga droni i mbushur me lëndë shpërthyese.

Si pasojë e këtij sulmi ka ndodhur një shpërthim i fuqishëm, pasi treni ishte i mbushur me derivate të destinuara për tanket e ushtrisë së Putinit.

Kjo hekurudhë është e vetmja rrugë që lidhë Rusinë me Gadishullin e Krimesë dhe ajo nuk do të hapet deri në riparim, duke i kushtuar shtrenjtë logjistikës ruse. /Telegrafi/

The moment of the attack on another Russian fuel train on the Zaporizhia route pic.twitter.com/06kXTu3U9C

— MilitaryNewsUA (@front_ukrainian) August 19, 2025

Ataques a trenes rusos.
– “Ronin”de la 65ª Brigada atacando un tren ruso en la zona de Molochansk-Tokmak (https://t.co/I6qRQmcV1l)
– En otro canal (https://t.co/iIf4FkWlKF) hay unas fotos (2,3) de un tren ardiendo en Zaporiyia, pero no es el mismo, el segundo tiene cisternas de… pic.twitter.com/1Jpb7j9guI

— Manu (@PuenteUribarri) August 19, 2025

The post Transportonte derivate për tanket e ushtrisë së Putinit, dronët ukrainas e shkatërrojnë – pamje nga aksioni appeared first on Telegrafi.

Mesfushori i Barcelonës, Marc Casado, është shfaqur si objektiv i disa klubeve të Ligës Premier, përfshirë West Ham United dhe Wolverhampton Wanderers.

Sipas gazetari Matteo Moretto, dy klubet po e monitorojnë nga afër situatën e tij, me një ofertë të mundshme prej 30 milionë eurosh që pritet para mbylljes së afatit kalimtar.

Pavarësisht interesit në rritje, Casado mbetet i përkushtuar ndaj Barcelonës. 21-vjeçari vazhdon të stërvitet me ekipin e parë nën drejtimin e Hansi Flick dhe nuk ka treguar asnjë dëshirë për t’u larguar nga klubi.

Burime pranë lojtarit thonë se ai e ka përparësi zhvillimin e tij te Barcelona dhe është i përqendruar në vendosjen e tij në skuadrën e parë.

Barcelona thuhet se është e hapur për të shqyrtuar oferta në rangun e 30 milionë eurove, megjithëse çdo lëvizje e mundshme do të varet nga gatishmëria e Casados për t’u larguar dhe vlerësimi i klubit për propozimin.

Me konkurrencën për pozicionet në mesfushë dhe rikthimin e lojtarëve të tjerë nga lëndimet, klubi mund të vlerësojë nëse shitja e Casados përputhet me planet e tyre financiare dhe të skuadrës. /Telegrafi/

The post Klubet e Ligës Premier monitorojnë yllin e Barcelonës appeared first on Telegrafi.

Ed Sheeran po xhiron një videoklip të ri muzikor në Hvar.

Një foto e muzikantit të famshëm britanik u publikua nga Bordi Turistik i Qytetit Hvar.

“Ditë xhirimi”, shkruan ata përkrah këngës së Edit, “Shape of You”.

Vecernji List raporton se Ed solli në Hvar edhe aktoren Phoebe Dynevor, yllin e serialit të famshëm të Netflix, “Bridgerton”, e cila do të shfaqet gjithashtu në videoklip.

Phoebe njihet nga shikuesit si personazhi kryesor në sezonin e parë të serialit, duke luajtur Daphnen, motrën më të madhe të Bridgerton.

Lexo po ashtu Të gjitha lajmet nga Ed Sheeran

Vendasit zbuluan se disa nga pamjet janë xhiruar në kafenenë Kiwa dhe disa në plazhin Dubovica.

Edhe videoklipi supozohet të jetë xhiruar në Split. Ende nuk dihet se për cilën këngë bëhet fjalë.

 

View this post on Instagram

 

A post shared by PD (@phoebedynevor)

Si pjesë e turneut të tij botëror “+−=÷× Tour” (Mathematics Tour), Ed Sheeran performoi në Kroaci vitin e kaluar, në Hipodromin e Zagrebit.

I ftuari special ishte këngëtari britanik Calum Scott. Koncerti mblodhi rreth 70 mijë njerëz.

 

View this post on Instagram

 

A post shared by Ed Sheeran (@teddysphotos)

Më pas, Ed prezantoi këngë nga të pesë albumet në studio me simbolet “+ − = ÷ ×”, duke përfshirë hite të tilla si “Castle on the Hill”, “Shivers”, “The A Team”, “Perfect”, “Bad Habits” etj. /Telegrafi/

The post Ed Sheeran xhiron videoklipin e ri në Kroaci appeared first on Telegrafi.

MPB ka dhënë detaje të reja për aksidentin tragjik që ndodhi në rrugën Resnjë-Manastir ku humbën jetën dy persona.

“Më 18.08.2025 rreth orës 12:50, në Stacionin Policor -Resnjë është pranuar informacion se në rrugën magjistrale Resnjë-Manastir, në vendin e quajtur “Sleçishte”, ka ndodhur aksident trafiku ndërmjet një automjeti pasagjerësh “Opel Astra” me targa të Ohrit, i drejtuar nga P.N. (20) nga Ohri dhe një automjeti pasagjerësh “Mercedes” me targa kombëtare gjermane, i drejtuar nga P.K. (52) nga Republika Federale e Gjermanisë.

Nga lëndimet e pësuara, në vendngjarje ndërroi jetë vozitësi P.K., ndërsa mjeku i Ndihmës urgjente mjekësore konstatoi vdekjen. Vozitësi P.N. dhe bashkudhëtari i tij D.S. (19) nga f. Leskoec, rrethi i Ohrit, u transportuan në Spitalin Klinik të Manastirit, ku tek P.N., mjeku konstatoi vdekjen, ndërsa tek D.S. u konstatuan lëndime të rënda trupore”, thonë nga MPB.

Nga atje shtojnë se në vendin e ngjarjes është kryer ekspertizë nga prokurori publik dhe ekipi hetimor i NJPB Resnjë./Telegrafi/

The post Policia jep detaje për aksidentin tragjik në rrugën Resnjë-Manastir, humbin jetën dy persona appeared first on Telegrafi.

Shefi i Shtabit të Forcave Ajrore, Gjenerali David Allvin, tha të hënën se planifikon të dalë në pension në vjeshtë, një lëvizje surprizë vetëm në gjysmën e mandatit të tij katërvjeçar në krye të shërbimit ushtarak.

Allvin e bëri njoftimin në një deklaratë dhe nuk dha një arsye specifike për largimin.

Ai tha se ndërsa planifikon të dalë në pension në nëntor, ai do të shërbejë derisa të konfirmohet një zëvendësim, shkruajnë mediat e huaja, përcjell Telegrafi.

Allvin është shefi i katërt i shërbimit ushtarak amerikan që largohet që kur presidenti Donald Trump mori detyrën.

Në janar, Trump urdhëroi shkarkimin e Komandantit të Rojës Bregdetare, Admirales Linda Fagan, dhe në shkurt, ai shkarkoi Gjeneralin C.Q. Brown nga posti i kryetarit të shefave të përbashkët të shtabit dhe shkarkoi Shefen e Operacioneve Detare, Admirales Lisa Franchetti.

Në prill, ai shkarkoi shefin e Komandës Kibernetike, Gjeneral Timothy Haugh.

Në një deklaratë, Sekretari i Forcave Ajrore, Troy Meink, tha se ishte “përgjithmonë mirënjohës” për partneritetin e tij me Allvin.

Allvin ishte shfaqur si një mbështetës i zëshëm i reformave që Trump dhe Sekretari i Mbrojtjes, Pete Hegseth, kanë premtuar për ushtrinë, të përqendruara në modernizimin e armëve dhe pajisjeve dhe shkurtimin e fuqisë njerëzore.

Një oficer i lartë i Forcave Ajrore shprehu habi për njoftimin, duke thënë se nuk kishte shenja ose thashetheme për dorëheqjen e tij kaq herët.

Dalja në pension e Allvin do të shënojë mandatin më të shkurtër të një shefi të Forcave Ajrore në më shumë se tre dekada.

Gjenerali Michael Dugan u shkarkua në vitin 1990 pas vetëm dy vitesh në detyrë për shkak se foli shumë lirshëm për “synimin e zyrtarëve të qeverisë irakiane dhe civilëve” në prag të Luftës së Gjirit të vitit 1991. /Telegrafi/

The post Shefi i Forcave Ajrore të SHBA-së lë postin e tij para kohe appeared first on Telegrafi.