Departamenti i Garave në FSHF bën me dije se ndeshja Teuta – Dinamo City, e vlefshme për javën e parë të kampionatit “Abissnet Superiore”, nuk do të zhvillohet ditën e diel, më 24 gusht, por më 5 shtator, në orën 17:00, në stadiumin “Niko Dovana”.

Kjo shtyrje vjen pas kërkesës së klubit Dinamo City, për shkak të angazhimit në fazën play-off të UEFA Conference League, ndërsa dakordësimi është arritur edhe me klubin e Teutës, i cili ka shprehur mirëkuptim për situatën dhe ka pranuar që ndeshja të luhet në një datë tjetër.

Dinamo City do të zhvillojë ndeshjen e parë në play-off të Conference League ndaj Jagiellonia më 21 gusht.

Lëvizja Vetëvendosje propozoi sërish Albuelna Haxhiun për kryetare të Kuvendit. Propozimi u bë nga deputeti Glauk Konjufca.

Pas propozimit kryesuesi i seancës e hedhin në votim.

57 vota ishin pro, 56 kundër dhe 3 abstenime.

Kryesuesi i seancës Avndi Dehari konstatoi se kandidatja Haxhiu nuk arriti të marrë votat e duhura.

 

 

Mëpas Glauk Konjufca propozoi Donika Gërvallën për kryeparlamentare, por as ajo nuk mori votat e duhura. Gërvalla mori 57 vota pro, 56 kundër dhe 3 abstenuan.

Kryeministri polak, Donald Tusk, ka deklaruar se nuk e mbështet idenë e mbajtjes së bisedimeve të ardhshme për paqen në Ukrainë në Hungari.

Presidenti i SHBA-së, Donald Trump, sugjeroi Budapestin si vend për një takim midis Vladimir Putin dhe Volodymyr Zelenskyy me kryeministrin hungarez Viktor Orban dje, sipas një zyrtari të Shtëpisë së Bardhë.

Por Tusk sugjeron që mbajtja e bisedimeve në kryeqytetin e Hungarisë  i njëjti vend ku u nënshkrua Memorandumi i Budapestit i vitit 1994  do të përfaqësonte një ironi historike.

Ukraina hoqi dorë nga arsenali i saj bërthamor në këmbim të garancive të sigurisë si pjesë e memorandumit, një marrëveshje që më vonë u shkel nga aneksimi i Krimesë nga Rusia në vitin 2014 dhe pushtimi i saj në vitin 2022.

“Ndoshta jam supersticioz, por këtë herë do të përpiqesha të gjeja një vend tjetër”, tha Tusk.

Vjena dhe Doha janë ndër vendet e tjera që thuhet se po merren në konsideratë, ndërsa Vladimir Putin ka sugjeruar takimin me Volodymyr Zelenskyy në Moskë, sipas raportimeve të tjera.

Izraeli ka thënë se do t’u japë përgjigjen e tij ndërmjetësve ndërkombëtarë deri të premten lidhur me një plan të ri armëpushimi në Gaza të pranuar nga Hamasi, mes presionit në rritje për një armëpushim në një luftë që ka marrë jetën e më shumë se 62,000 palestinezëve.

Pas protestave masive në Izrael që kërkonin një marrëveshje për të siguruar lirimin e 20 pengjeve të mbetura izraelite që mbaheshin gjallë në Gaza, u duk se Hamasi kishte ulur kërkesat e tij në lidhje me një shkëmbim të burgosurish me pengje, si dhe në lidhje me fushëveprimin e një “zone tampon sigurie” të kërkuar nga Izraeli.

Sipas detajeve të raportuara të planit të propozuar, rreth gjysma e pengjeve të mbetura gjallë, si dhe trupate pajetë, do të liroheshin në një marrëveshje me faza në këmbim të rreth 150 palestinezëve që mbahen në burgjet izraelite, disa prej të cilëve vuajnë dënime me burgim të përjetshëm, gjatë një armëpushimi të parashikuar 60-ditor.

Ndërsa Izraeli ka thënë se nuk është më i interesuar për një marrëveshje të pjesshme, duke kërcënuar në vend të kësaj me një ofensivë të re në shkallë të gjerë për të pushtuar Qytetin e Gazës , detajet e propozimit të ri për armëpushim e sjellin atë shumë afër skicës së një marrëveshjeje të sugjeruar fillimisht nga i dërguari special i Donald Trump, Steve Witkoff.

 

 

Zyrtarët izraelitë kanë informuar se Benjamin Netanyahu do të thërrasë bisedime mbi propozimin në ditët në vijim. Një zyrtar i lartë izraelit i tha AFP-së se qëndrimi i qeverisë nuk kishte ndryshuar dhe kërkoi lirimin e të gjithë pengjeve në çdo marrëveshje.

Zëdhënësi i ministrisë së jashtme të Katarit tha të martën se propozimi i fundit për armëpushim në Gaza, i rënë dakord nga Hamasi, ishte “pothuajse identik” me një plan të mëparshëm të paraqitur nga Witkoff. Hamasi kishte dhënë një “përgjigje shumë pozitive dhe me të vërtetë ishte pothuajse identike me atë që pala izraelite kishte rënë dakord më parë”, tha zëdhënësi.

Egjipti tha të hënën se ai dhe Katari ia kishin dërguar propozimin e ri Izraelit dhe “topi tani është në fushën e tij”.

Një autobus me pasagjerë nga Kosova, që ishte nisur drejt Mynihut, është përfshirë në një aksident të rëndë gjatë natës në autostradën gjermane, ku si pasojë 30 persona janë lënduar, dy prej tyre në gjendje të rëndë.

Sipas mediave gjermane, aksidenti ndodhi rreth orës 00:30 në afërsi të qytetit Rosenheim, në jug të Gjermanisë. Në autobus ndodheshin rreth 50 pasagjerë, shumica shqiptarë nga Kosova.

Autobusi, që i përkiste kompanisë “Dubova Reisen”, u përplas me pjesën e pasme të një kamioni që transportonte perime, i drejtuar nga një shtetas polak 46-vjeçar. Goditja ka qenë e fortë, duke shkaktuar dëme të mëdha në pjesën e përparme të autobusit dhe dëmtime serioze edhe në rimorkion e kamionit.

Policia gjermane ka konfirmuar se 30 persona kanë pësuar lëndime, ndërsa dy pasagjerë janë në gjendje të rëndë dhe janë dërguar menjëherë në spital. Katër të tjerë janë transferuar në klinika për vlerësim të mëtejshëm.

Për shkak të aksidentit, autostrada në drejtim të Mynihut u mbyll plotësisht për rreth dy orë, duke shkaktuar trafik të rënduar.

Kompania “Dubova Reisen”, që operon linja të rregullta Kosovë–Gjermani, ka konfirmuar incidentin për Radion Evropa e Lirë dhe ka dhënë një version më të zbutur të ngjarjes.
“Fatmirësisht, pasagjerët janë mirë. Vetëm tre prej tyre kanë lëndime të lehta për shkak të thyerjes së xhamave. Aksidenti ndodhi rreth orës 00:30 kur një makinë, që vinte nga e majta, ia preu rrugën autobusit dhe i humbi drejtimin shoferit tonë,” – thuhet në deklaratën e kompanisë.

Autoritetet gjermane po hetojnë shkaktarët e saktë të aksidentit. Ende nuk është bërë e qartë nëse fajtor konsiderohet autobusi, kamioni apo ndonjë tjetër mjet që mund të ketë ndikuar në incident.

Procesi i kompensimit të pronarëve, tokat e të cilëve janë zënë nga ndërtimet informale, po vijon me ritme të qëndrueshme.

Agjencia e Trajtimit të Pronave (ATP) njofton se gjatë muajit korrik 2025 janë ekzekutuar vendimet për 161 dosje, me një vlerë totale prej 136.9 milionë lekësh, që përkthehet në rreth 1.4 milionë euro. Këto pagesa u shpërndanë për pronarët, të cilët kanë përfituar të drejtën e dëmshpërblimit pas shqyrtimit të dokumentacionit dhe miratimit të vendimeve përfundimtare. Paralelisht gjatë të njëjtës periudhë janë regjistruar 71 dosje të reja për shqyrtim, çka tregon se interesi për të përfituar nga skema e kompensimit mbetet i lartë.

KOMPENSIM NË PARA DHE TOKË

Një pjesë e pronarëve kanë përfituar kompensim financiar të drejtpërdrejtë. Është realizuar kompensimi financiar i vendimeve përfundimtare që kanë njohur të drejtën e kompensimet për 1 dosje deri në vlerën 1.5 milionë lekë, ku vlera e ekzekutuar është 1.45 milionë lekë. Janë trajtuar 4 dosje me kërkesë të veçantë, ku llogaritet se përfitimi total i subjektit në bazë të përqindjes së aplikuar me kërkese të veçantë është 102.8 milionë lekë, ndërsa kësti që i kalon subjektit është 20.5 milionë lekë. Përveç kompensimit financiar, ATP ka realizuar edhe shpërndarjen e kompensimit fizik. Në muajin korrik, pronarëve u janë dhënë 80.664 metra katrorë tokë, duke ofruar kështu një alternativë reale për zëvendësimin e pasurive të humbura. Agjencia thekson se kompensimi i pronarëve është një proces i vazhdueshëm, i cili do të vazhdojë të zbatohet deri në përfundimin e shqyrtimit të të gjitha kërkesave dhe dosjeve të depozituara. Për këtë arsye, buxheti i shtetit garanton çdo vit një fond financiar jo më të vogël se 50 miliardë lekë, i cili do të vihet në dispozicion të ATPsë deri në vitin 2028. Aktualisht, mbi 7 mijë dosje mbeten ende pa vendim, ndërsa qeveria ka miratuar shtyrjen e afatit me tri vite, deri në fund të vitit 2027, për shqyrtimin e tyre.

Paralelisht, institucionet shtetërore kanë detyrimin të kryejnë kompensimin për mbi 25 mijë vendime të arkivuara ndër vite, të cilat presin zbatim. Edhe pse procesi ka qenë i ngadaltë ndër vite, përfitimet e muajve të fundit tregojnë një lëvizje pozitive për pronarët, të cilët prej kohësh kanë kërkuar kompensimin e pronave të zëna nga ndërtimet informale. Nëse ritmi i ekzekutimit të dosjeve mbahet i qëndrueshëm dhe fondet buxhetore garantohen sipas planit, mijëra qytetarë pritet të marrin dëmshpërblimin e merituar deri në përfundim të afatit të ri ligjor.

STATISTIKAT

Edhe pse rruga drejt përfundimit të procesit mbetet e gjatë, shifrat e korrikut tregojnë një dinamikë më të gjallë dhe japin sinjale pozitive për mijëra pronarë që presin dëmshpërblimin. Me fondin e garantuar dhe me një ritëm më të lartë të ekzekutimit të dosjeve, qeveria synon të mbyllë një nga çështjet më të ndjeshme të trashëguara në pronësi, duke i dhënë pronarëve jo vetëm kompensimin e munguar, por edhe një ndjesi më të fortë drejtësie.

ATP sqaron se çdo kërkesë për kompensim trajtohet vetëm pasi të ketë përfunduar shqyrtimi administrativ dhe verifikimi i plotë i dokumentacionit, për të shmangur abuzimet dhe për të garantuar shpërndarjen e drejtë të fondeve. Ky është edhe një nga arsyet pse procesi ka zgjatur për dekada dhe pse ende mbeten pa vendim mbi 7 mijë dosje. Qeveria ka shtyrë afatin deri në fund të vitit 2027 për shqyrtimin e tyre, duke synuar që të mos mbetet asnjë rast i hapur. Paralelisht, institucionet kanë detyrimin të kryejnë kompensimin për mbi 25 mijë vendime të arkivuara prej vitesh, që ende nuk janë ekzekutuar.

Ish-ministri i Shëndetësisë, Ilir Beqaj, i cili po gjykohet për çështjen e koncesionit të sterilizimit, ka lënë pas nje muaji ambientet e QSUT-së pas një periudhe trajtimi mjekësor.

Burime zyrtare bëjnë me dije se gjendja shëndetësore e Beqajt është përmirësuar dhe ai tashmë është rikthyer në ambientet e paraburgimit të Durrësit, ku ndodhet në pritje të vijimit të procesit gjyqësor.

Kujtojme qe Beqaj u shtrua ne spital me 15 korrik me temperaturë të lartë dhe infeksion të rëndë në lëkurë.

Ilir Beqaj mbahet prej 1 viti në paraburgimin e Durrësit. Ish-ministri u arrestua me urdhër të Prokurorisë së Posaçme më 4 korrik 2024.

Ai është marrë i pandehur për dosjen e “SASPAC”, ku akuzohet për abuzim me donacionet e huaja, ndërsa po gjykohet me procedurë të zakonshme edhe për dosjen e “Sterilizimit”.

Ilir Beqaj ka kërkuar disa herë lirinë në shkallë të ndryshme të gjyqësorit, por është rrëzuar nga togat e zeza.

Ish-ministri, i cili ka mohuar akuzat e SPAK, madje dy ditë pas vendosjes në pranga ofroi edhe garanci pasurore prej 50 mijë euro, por propozimi i tij nuk është pranuar.

DOSJA E STERILIZIMIT, AKUZAT E SPAK

SPAK e akuzon Ilir Beqaj për shpërdorim detyre për lidhur me koncesionin e sterilizimit të pajisjeve kirurgjikale, kontrata koncesionare 10-vjeçare afro 100 milionë dollarëshe, e cila u firmos në dhjetor 2015 dhe ende vijon.

Ish-ministri i Shëndetësisë do të hetohet për “shpërdorim detyre e kryer në bashkëpunim” në procedurat e koncesionit nën masën e sigurisë “detyrim me paraqitje” dhe “ndalim të udhëtimit jashtë”. Ndërsa u vendos në pranga lidhur me abuzimet në SASPAC, gjatë kohës që ai ishte në krye të saj.

Në një njoftim zyrtar, Prokuroria e Posaçme bën me dije se ishministri ka konsumuar veprën penale të shpërdorimit të detyrës në lidhje me procedurat e ndjekura për koncesionin e sterilizimit të pajisjeve kirurgjikale me vlerë 100 milionë euro. Kështu, sipas hetimeve të zhvilluara deri në këtë fazë, ish-ministri akuzohet për shkelje të barazisë në tendera apo ankande publike.

Krahas masës së sigurisë, ndaj ishministrit është caktuar dhe masa e ndalimit për të dalë jashtë vendit. Sipas SPAK, ish-ministri i Shëndetësisë, Ilir Beqaj, duhet të anulonte kontratën koncesionare të sterilizimit, pasi kompania fituese dha një ofertë më të lartë se sa vlera e përcaktuar nga autoriteti kontraktor.

Ai nuk mori asnjë masë për vënien në punë të qendrës së sterilizimit, çka do të ishte më e favorshme ekonomikisht, por kaloi direkt të procedura e dhënies me koncesion të shërbimit për sterilizimin e pajisjeve mjekësore. Nuk parandaloi konfliktin e interesit mes biznesmenit Ilir Rrapaj dhe ish- zv.ministrit Klodian Rjepaj, si dhe kreu veprime që favorizuan kompaninë fituese.

Në dosjen penale ndër të tjera arsyetohet se Ilir Beqaj, ndonëse ishte në dijeni të qendrës moderne të sterilizimit, të ngritur në QSUT, nuk mori asnjë masë për vënien e saj në funksion. Ai nuk bëri asnjë studim paraprak, për të vlerësuar nëse vënia në funksion e qendrës së sterilizimit do të ishte më e favorshme ekonomikisht.

Gjithasut analizohen edhe udhëtimet që Ilir Beqaj ka bërë me biznesmenin Ilir Rrapaj, i cili zotëron 40 për qind të kontratës koncesionare dhe që aktualisht ndodhet në burg për të njëjtën çështje.

Njoftimi i plotë i SPAK:

Në datë 13.01.2020, Prokuroria e Posaçme Kundër Korrupsionit dhe Krimit të Organizuar, ka regjistruar procedimin penal nr.13 të vitit 2020 që bën fjalë për veprat penale  të “Shpërdorimi i detyrës” në bashkëpunim, parashikuar nga neni 248-25 i Kodit Penal, “Shkelja e barazisë së pjesëmarrëve në tendera apo ankande publike” kryer në bashkëpunim, parashikuar nga neni 258-25 i Kodit Penal, “Korrupsioni pasiv i funksionarëve të lartë shtetëror ose i të zgjedhurve vendorë” parashikuar nga neni 260 i Kodit Penal, në lidhje me procedurën e dhënies me koncension “Për shërbime të integruara për ofrimin e setit të personalizuar të instrumenteve kirurgjikalë, furnizimin me material mjeksor steril njëpërdorimësh në sallat kirurgjikale si dhe trajtimin e mbetjeve biologjike dhe dezinfektimin e sallave kirurgjikale”, nga Ministria e Shëndetësisë.

Në vazhdim të hetimeve për këtë procedim penal, me kërkesën të Prokurorisë së Posaçme, Gjykata e Posaçme e Shkallës së Parë për Korrupsion dhe Krimin e Organizuar, me vendimin nr.119 akti datë 16.11.2023 ka vendosur si më poshtë vijon:

• Caktimin ndaj personit nën hetim I.B. me detyrë ish-Ministër i Shëndetësisë, të masës së sigurimit “Detyrim për paraqitje në Policisë gjyqësore” dhe “Ndalim i i daljes jashtë shtetit”, parashikuar nga nenet 234 dhe 233 të K.Pr.Penale, si i dyshuar për veprën penale të “Shpërdorimit të detyrës” e kryer në bashkëpunim, të parashikuara nga nenet 248 dhe 25 të Kodit Penal.

• Urdhërohet personin nën hetim I. B. që të paraqitet para policisë gjyqësore të Byrosë Kombëtare të Hetimit, një herë në javë, ditë të premte, ora 15.30.

• Urdhërohet personin nën hetim I.B. të mos largohet nga territori i Republikës së Shqipërisë pa autorizimin e gjykatës.

• Ndalohet përdorimi i pasaportës dhe mjeteve të tjera identifikuese të vlefshme për daljen jashtë shtetit, për personin nën hetim I.B..

Vendimi për caktimin e masës së sigurimit personal është ekzekutuar nga Byroja Kombëtare e Hetimit dhe Drejtoria e Përgjithshme e Policisë së Shtetit (në datën 17.11.2023).

Hetimet vazhdojnë në drejtim të evidentimit të përgjegjësisë penale të personave të tjerë të cilët gjatë kësaj procedure kanë kryer veprime në kundërshtim me ligjin dhe përmbushjen e rregullt të detyrës.

******

Abuzimet me fondet e SASPAC 

Ilir Beqaj është nën hetim pasuror nga SPAK lidhur me abuzimet me fondet e SASPAC (Agjencia Shtetërore të Programimit Strategjik dhe Koordinimit të Ndihmës), e cila drejtohej nga Beqja deri në momentin që ky i fundit u detyrua të japë dorëheqje pasi GJKKO caktoi dy masa sigurie ndaj tij: detyrim paraqitje dhe ndalim të udhëtimeve jashtë vendit.

DOSJA

Pasi ish-ministri i Shëndetësisë u emërua në krye të Agjencisë që monitoron milionat e ndihmës nga Bashkimi Evropian, prokurorët dyshojnë se ai dhe vartësit e tij ngritën një skemë korrupsioni dhe pastrimi parash me fatura fiktive.

Gzona është një restorant i vendosur në rrugicën pedonale brenda sarajeve të familjes Toptani në qendër të Tiranës – e rijetëzuar si një hapësirë tregtare për zejet e artizanatit dhe kulinarisë.

I drejtuar nga një shef kuzhine që mori famë prej shfaqjes së tij në emisionin ‘Masterchef’, restoranti premton një evolucion të traditës, me pjata të tilla si byreku me qepë-domate, tru viçi me lulelakër në qymyr si dhe njoki panxhari me djathë mishavinë.

Prokurorët shqiptarë dyshojnë se pas listës së shquar të klientëve dhe artit të kuzhinës, restoranti fsheh një skemë korruptive me fatura fiktive për të keqpërdorur fondet e programeve të ndihmës së Bashkimit Evropian.

Në qendër të kësaj skeme dyshohet se qëndron Ilir Beqaj, ish-ministri i Shëndetësisë që drejtonte deri në dhjetor Agjencinë Shtetërore të Programimit Strategjik dhe Koordinimit të Ndihmës, SASPAC, dhe Ermal Kurtulaj, koordinator i programit ‘USAIR Facility Point’ të financuar nga Bashkimi Evropian.

Si pjesë të hetimit, Byroja Kombëtare e Hetimit, BKH, ndërmorri më 27 dhjetor një seri bastisjesh të banesave, bizneseve, automjeteve, si dhe kontrollin personal për tetë të dyshuar, përfshirë ish-ministrin Ilir Beqaj dhe shoferin e tij, Arben Dani.

Kontrollin në banesë e konfirmoi për gazetarët vetë Beqaj, i cili u paraqit në SPAK në të njëjtën ditë për shkak të masës së sigurimit “detyrim paraqitje” të vendosur ndaj tij sa i përket hetimeve për aferën e sterilizimit të pajisjeve mjekësore – një çështje paralele ku ish-ministri dyshohet për shpërdorim detyre.

“Unë prej vitesh përballem me këto çështje. U bë një kontroll në banesën time, nuk ishte nevoja të thërrisja avokatin sepse ato çfarë ka një familje normale si sende gjenden aty,” tha Beqaj për gazetarët jashtë dyerve të SPAK.

Avokati i Beqajt, Ermal Yzeiraj po ashtu konfirmoi kontrollin për mediat dhe shtoi se ishin sekuestruar dokumente, kompjuterë dhe telefonat celularë dhe konfirmoi se veprimet hetimore lidheshin me rolin e ish-ministrit si drejtues i SASPAC.

Beqaj ka qenë deputet i Partisë Socialiste për disa legjislatura dhe ishte ministër i Shëndetësisë nga viti 2013 deri në vitin 2017. Në vitin 2021, ai u emërua në krye të SASPAC nga kryeministri Edi Rama, edhe pse ndaj tij po zhvilloheshin hetime për kontratat koncesionare në shëndetësi. Pas vendimit të Gjykatës së Posaçme për t’i caktuar atij masën e sigurimit “detyrim paraqitje” në lidhje me akuzat mbi aferën e sterilizimit, Beqaj dha dorëheqjen nga SASPAC dhe pozicioni i tij si negociator mes Shqipërisë dhe Bashkimit Europian.

Kurtulaj nuk ishte i arritshëm për koment.

Interesa pasurore të fshehura

Restoranti Gzona është në pronësi të kompanisë “Albanian Food and Hospitality Lab”, e themeluar në janar të vitit 2019 nga bashkëshortja e ish-ministrit të Shëndetësisë, Adriana Beqaj dhe Arti Malaj.

Në mars 2019, Adriana Beqaj i fali 35% të aksioneve ortakut të saj Malaj dhe në janar 2020 i shiti atij edhe 15% të aksioneve të mbetura.  Në vitin 2022, kompania u shit tek Eduard Curraj, administrator i një distributori të madh farmaceutik, Delta Pharma.

Megjithëse Adriana Beqaj i dhuroi dhe i shiti aksionet e saj në kompaninë “Albanian Food and Hospitality Lab” në janar 2020, bazuar në përgjimet telefonike të realizuara nga Prokuroria në dhjetor 2023, ngrihen dyshime se ish-ministri Beqaj vazhdon të ketë interesa pasurore në restorantin Gzona. Në këto përgjigjime, Beqaj përdor telefonin e shoferit të tij, Arben Dani për te komunikuar me vartësin e tij, Ermal Kurtulaj në mënyrë që të lidhet me administratorin e restorantit, Gazmend Prenga.

Ermal Kurtulaj ka njohje të hershme me Ilir Beqajn që datojnë në kohën kur ish-ministri ka qenë ortak i shoqërisë Intech+, duke vazhduar më pas në vitin 2015 në FSDKSH, ku drejtues i Këshillit Mbikeqyrës ka qenë vetë shtetasi Ilir Beqaj dhe më pas me krijimin e agjencisë SASPAC, si i punësuar në projektin Eusair Facility Point.

Po ashtu, rezulton se shtetasi Ilir Beqaj përdor në mënyrë të vazhdueshme një automjet luksoz të modelit Audi A8, si brenda ashtu dhe jashtë vendit, i cili rezulton të jetë në pronësi të shtetasit Ermal Kurtulaj, duke u ngritur dyshime se mjeti mund të jetë pasuri e fshehur e ish-ministrit të Shëndetësisë.

Nga këqyrja në sistemin E-Gjoba, prokuroria vëren se ky mjet ka marrë 3 gjoba ku i pranishëm ka qenë Arben Dani, nga të cilat e fundit rezulton të jetë marrë me 12 dhjetor në momentin kur mjetin e ka patur në përdorim Ilir Beqaj dhe është parkuar përpara SPAK. Ish-ministri paraqitet çdo javë në Prokurori për shak të masës detyrim paraqitje si pjesë e hetimit të sterilizimit.

I pyetur për Ermal Kurtualajn, ish- ministri deklaroi të premten se e njeh prej shumë vitesh dhe prej punës në SASPAC.

“Ermal Kurtulajn e njoh prej 15 vitesh,” tha ai.  “Që nga maji i 2022 ka punuar në një projekt që ndiqej edhe nga SASPAC-u,” shtoi Beqaj.

Nga përgjimi i komunikimeve të kryera nga Prokuroria ka rezultuar se Ermal Kurtulaj rezulton i përfshirë në punët e restorantit Gzona. Ai interesohet vazhdimisht për mbarëvajtjen e këtij restoranti, duke vepruar si epror ndaj administratorit të restorantit, Gazmend Prenga dhe në ditët e fundit të dhjetorit, ka disa komunikime ndërmjet tyre në lidhje me rakordimet ndërmjet investimeve të kryera mbi këtë restorant përgjatë vitit dhe me faturat e lëshuara për atë.

“Nga komunikimet e kryera dyshohet se personi nën hetim, Ermal Kurtulaj vepron në këtë restorant për llogari të shtetasit Ilir Beqaj, dyshime të cilat ngrihen nga mënyra se si komunikohet dhe veprohet nga ana e këtyre subjekteve, duke shmangur çdo përfshirje të këtij shtetasi (Ilir Beqaj) si me administratorin ashtu me ortakët dhe duke i mbajtur komunikimet dhe rakordimet e takimeve nëpërmjet shtetasit Ermal Kurtalaj,” shprehet prokurorja Elida Kaçkini në kërkesën “Për lejimin e kontrollit personal dhe të vendeve” drejtuar Gjykatës së Posaçme.

Në dalje nga SPAK të premten, Ilir Beqaj mohoi të kishte akoma interesa financiare mbi restorantin.

“Lokali Gzona nga shkurti i vitit 2020 nuk ka asnjë lidhje financiare me familjen time,” tha ai. “Bashkëshortja ime është larguar para 4 vitesh dhe nga e gjithë puna, ka marrë 1.5 milionë lekë të vjetra,” shtoi Beqaj.

Gzona me fondet e BE-së

Agjencia Shtetërore e Programimit Strategjik dhe Koordinimit të Ndihmës, SASPAC, u themelua nga Këshilli i Ministrave në tetor të vitit 2021, ndërsa kryeministri Edi Rama emëroi në krye të Agjencisë ish-ministrin e Shëndetësisë, Ilir Beqaj.

Roli i kësaj agjencie është që të koordinojë veprimtarinë dhe programet kombëtare dhe rajonale të asistencës financiare të Bashkimit Evropian, si dhe të monitorojë zbatimin e tyre. Një ndër programet që SASPAC menaxhon dhe monitoron është programi ‘USAIR Facility Point’, i cili është një projekt strategjik i 9 (nëntë) partnerëve në tetë vende, me qëllim mbështetjen e proceseve të zbatuara në kuadër të bashkëpunimit makro -rajonal të rajonit Adriatiko-Jonian.

Koordinator i këtij projekti është emëruar shtetasi Ermal Kurtulaj, i cili konsiderohet si lehtësues që mbështet Koordinatorin Shtetëror të SASPAC, Ilir Beqaj në përmbushjen e detyrave të tij.

Sipas SPAK, rreth orës 4 pasdreke më 16 gusht 2023, shoqëria tregtare ‘Landways International’ ka lëshuar një faturë me përshkrimin ; kontratë shërbimi’ dhe vlerë 149,809.21 euro kundrejt programit EUSAIR të drejtuar nga Kurtulaj. Disa minuta përpara, restoranti Gzona i ka lëshuar kësaj kompani një faturë me vlerë 4,18 milionë lekë dhe përshkrim shërbime kateringu.

Fakti që faturat janë lëshuar pak minuta pas njëra-tjetrës, krijon dyshimin e arsyeshëm “që paraprakisht palët kanë biseduar me njëri-tjetrin dhe që shuma përbën përfitim material, korrupsion që shoqëria tregtare Landëays ka paguar ndaj Gzonës, për shërbimin që ajo ka përfituar për të kryer nga Eussair-i.”

Prokuroria ngre pikëpyetje se një rast i ngjashëm i restorantit është regjistruar me shoqatën ‘Foreign Investors Association of Albania’ (FIAA). Sipas faturave rezulton projekti Eusair ka lëshuar faturë shitje ndaj FIAA me 17 gusht 2023, ora 15:40:55, në vlerën 22,000 Euro dhe kjo shoqatë ka lëshuar 25 minuta më vonë, faturën me vlerë 350,000 lekë kundrejt restorantit “Gzona”.

Për të transferuar fondet e projektit USAIR drejt restorantit ‘Gzona’ duke humbur gjurmët janë përdorur dhe fatura të lëshura nga biznese të tjera kulinare. Nisur nga komunikimi i përgjuar me 11 nëntor midis Ermal Kurtulajt dhe administratorit të restorantit Me’NAM diskutohet transferimin i një vlere prej 325 mijë lekësh nëpërmjet faturave fiktive.

“Këto fatura… i përkasin restorantit “Gzona” dhe këto veprime janë kryer për qëllime që të fshihet lidhja me Gzonës dhe shtetasit Ilir Beqaj, që është dhe vetë drejtori i SASPAC-ut që monitoron këto projekte,” thekson prokuroria.

Fatura fiktive dhe konflikt interesi

Sipas Prokurorisë së Posaçme, koordinatori i ‘USAIR Facility Point’, Ermal Kurtulaj dyshohet si personi kyç në skemën korruptive për keqpërdorimin e fondeve të BE-së nëpërmjet faturave fiktive. Sipas SPAK, ai është përfshirë në veprime korruptive nëpërmjet kërkimit dhe pranimit të lëshimit të faturave fiktive nga subjekte të ndryshme tregtare dhe OJF, duke vendosur vlera fiktive në faturime me qëllim përftimin personal.

Nga përgjimet telefonike, Prokuroria shprehet se Kurtalaj ka kërkuar dhe siguruar dy fatura fiktive me vlerë 51,800 euro edhe nga shoqëria “Nine Services Int”, që ka si objekt të aktivitetit të saj “Shërbime dhe konsulencë në aktivitete sportive” – në veçanti në sportin e futbollit.

Kurtulaj është përgjuar duke kërkuar dhe siguruar fatura fiktive nga disa shoqëri tregtare në fushën e kulinarisë dhe hotelerisë si dhe fatura konsulence nga persona fizikë me vlerë dhjetra mijëra euro. Në një rast, Kurtulaj është vëzhguar nga prokuroria duke marrë atë që në dukje kuptohet si ryshfet nga administratorja e një prej bizneseve që lëshonte fatura fiktive.

Sipas Prokurorisë, nga të dhënat e administruara deri në këtë fazë të procedimit, shtetasi Ermal Kurtulaj rezulton se përfshihet edhe veprime të tjera më punonjës të Agjencisë, konkretisht me shtetasen Mira Topçiu, nëpunëse financiare pranë SASPAC, të cilët në bashkëpunim me njëri tjetrin kryejnë po ashtu veprime me të njëjtën natyrë, ku në të paktën një rast rezulton dukshëm marrja e përfitimit për një shërbim të prokuruar si qira salle dhe shërbim kateringu.

Përveç këtij fakti, rezulton se të dy këta persona kanë të regjistruar në emër të tyre OJF dhe person fizik, të cilat kryejnë veprime me njëri-tjetrin po në funksion të veprimtarisë së tyre shtetërore, duke qenë kështu edhe në konflikt interesi.

Një ngjarje e rëndë ka ndodhur pas mesnate në lagjen nr. 15 të qytetit të Durrësit, ku një 20-vjeçar ka mbetur i plagosur rëndë pasi u godit me gur në kokë, gjatë një konflikti për motive të dobëta.

Si rezultat i reagimit të menjëhershëm të Policisë, është bërë e mundur identifikimi dhe arrestimi i autorit të dyshuar. Specialistët për Hetimin e Krimeve në Komisariatin e Policisë Durrës arrestuan në flagrancë shtetasin Jurgen Bushi, 29 vjeç, banues në Durrës, i dyshuar për veprën penale “Plagosja e rëndë me dashje”.

Sipas informacioneve zyrtare, Bushi dyshohet se gjatë konfliktit ka goditur me gur në kokë shtetasin H. K., 20 vjeç, i cili po trajtohet në Spitalin e Traumës në Tiranë. Mjekët bëjnë me dije se ai ndodhet nën kujdesin e specializuar dhe është jashtë rrezikut për jetën.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme hetimore dhe ligjore.

Një ngjarje e rëndë ka ndodhur mbrëmjen e djeshme në qytetin e Laçit, ku një 50-vjeçar u plagos me thikë pas një konflikti për motive të dobëta. Ngjarja ndodhi rreth orës 20:00, dhe autori i dyshuar u kap dhe u vu në pranga brenda një kohe të shkurtër.

Sipas njoftimit të Policisë, i arrestuari është shtetasi Eraldo Dibra alias Eraldo Basha, 33 vjeç, banues në Laç. Ai dyshohet se ka plagosur me mjet prerës në krah shtetasin A. H., 50 vjeç, banues në fshatin Gjormë.

I plagosuri është transportuar menjëherë në Spitalin e Traumës në Tiranë, ku po merr ndihmën mjekësore të nevojshme dhe ndodhet jashtë rrezikut për jetën.

Policia ka nisur hetimet për zbardhjen e plotë të rrethanave të ngjarjes, ndërsa autori pritet të përballet me akuzën për plagosje të rëndë me dashje.

Në dekadën e fundit, Tirana ka njohur një zhvillim të shpejtë dhe të gjithanshëm, duke u shndërruar në një qendër urbane moderne, dinamike dhe plot gjallëri. Hapësirat e reja, komplekset rezidenciale dhe projektet që ndërthurin jetesën me biznesin po krijojnë mundësi të reja për investime. Në këtë kontekst, Univers City është duke tërhequr gjithnjë e më shumë vëmendjen e blerësve për shkak të qasjes së integruar, që kombinon jetesën e rehatshme me akses të drejtpërdrejtë në shërbime të përditshme, siguri, gjelbërim dhe facilitete.

Brenda një ambienti të tillë të strukturuar, investimi në një biznes nuk është vetëm një zgjedhje e zgjuar, por edhe një mundësi strategjike për sukses afatgjatë, duke u mbështetur në disa pika kryesore:

Klientelë e garantuar që nga dita e parë
Univers City është projektuar për të mirëpritur 16 000 banorë. Kjo krijon një bazë të qëndrueshme klientësh që jetojnë dhe zhvillojnë përditshmërinë e tyre pikërisht aty ku ndodhet edhe biznesi juaj. Kjo do të thotë më pak investim në fushata të shtrenjta marketingu dhe më shumë fokus te shërbimi.

Komoditeti si prioritet
Banorët e Univers City vlerësojnë komoditetin. Njësitë komerciale të vendosura pranë banesave u ofrojnë atyre akses të menjëhershëm në shërbime të ndryshme, duke u kursyer kohë dhe mundim në përditshmërinë e tyre një vlerë shumë e rëndësishme, sidomos për familjet.

Marketing me kosto minimale dhe ndikim maksimal
Brenda komuniteteve si Univers City, përhapja e fjalës dhe prezenca vizuale funksionojnë shumë më fuqishëm sesa reklamat tradicionale. Në një mjedis ku banorët janë të lidhur me njëri-tjetrin, një shërbim i mirë përhapet shpejt dhe ndërton reputacion të qëndrueshëm.

Afërsi me nevojat reale të komunitetit
Të operosh në Univers City do të thotë të jesh pranë banorëve dhe të kuptosh drejtpërdrejt nevojat e tyre. Kjo të lejon të përshtatësh shërbimet apo produktet që ofron dhe të krijosh vlera që të diferencojnë nga konkurrenca jashtë kompleksit.

Orar fleksibël dhe i orientuar drejt klientit
Një tjetër avantazh i njësive brenda Univers City është mundësia për të përshtatur orarin e operimit me ritmin e jetës së komunitetit, për shembull, duke qenë aktivë në mbrëmje apo fundjavë, kur kërkesat për shërbime rriten.

Ndërtimi i një klientele besnike
Të jesh pjesë e të njëjtit komunitet me klientët e tu rrit besimin dhe krijon më shumë afrimitet. Banorët kanë tendencën të përkrahin bizneset që ndihen si pjesë e jetës së përditshme dhe që i njohin nga afër.

Përmirësim i vazhdueshëm përmes feedback-ut të drejtpërdrejtë
Ndërveprimi i vazhdueshëm me klientët brenda kompleksit të jep feedback të menjëhershëm. Kjo është një mundësi për të përmirësuar produktet apo shërbimet dhe për t’u zhvilluar sipas pritshmërive reale të tregut.

Në Spitalin Rajonal të Vlorës u realizua me sukses një ndërhyrje delikate tek një pacient 59-vjeçar, i cili kishte humbur shikimin nga komplikacionet e diabetit.

Ministrja e Shëndetësisë dhe Mbrojtjes Sociale, Albana Koçiu ndau sot rastin e ndërhyrjes së suksesshme, ndërsa e konsideroi Spitalin Rajonal të Vlorës një qendër ekselence rajonale për shërbimet e okulistikës. Pas trajtimit, pacienti 59-vjeçar rifitoi ndjeshëm pamjen dhe shpresën për një jetë më të pavarur.

“Ky rezultat behet me domethënës falë investimeve në kabinetin e ri të okulistikës, të pajisur me teknologji moderne dhe paketat e rimbursuara të vitrektomisë, që garantojnë trajtime falas, pa nevojë për referim në spitale të tjera”, u shpreh Koçiu, ndërsa shprehu mirënjohjen për ekipin mjekësor: Dr. Kemal Ylsek, Dr. Edmond Isufaj, Dr. Dilaver Haskaj, Dr. Ëngjëll Lazaj, Dr. Odela Risilia dhe infermiere Kleoniqi Mustafaraj.

Spitali Rajonal i Vlorës, me një ekip të përkushtuar mjekësh dhe infermierësh, ofron shërbim dhe kujdes mjekësor jo vetëm për qytetarët vlonjatë, por edhe për pushuesit vendas dhe turistët e huaj që zgjedhin këtë qytet për të kaluar pushimet verore.

Gjashtë koka të prera janë gjetur në një rrugë në Meksikën qendrore, në një zonë që normalisht nuk lidhet me dhunën e karteleve. Autoritetet lokale e bënë zbulimin herët të martën në mëngjes në një rrugë që lidh shtetet e Puebla dhe Tlaxcala.

Policia nuk ka dhënë një motiv për vrasjet dhe as nuk ka thënë se cilat nga grupet kriminale që veprojnë në Meksikë mund t’i kenë kryer ato.

Mediat lokale kanë raportuar se në vendngjarje është lënë një batanije me një mesazh që paralajmëron bandat rivale dhe me sa duket është nënshkruar nga një grup i quajtur “La Barredora”, që do të thotë fshesa.

Është i njëjti emër si një grup kriminal pak i njohur që vepron në shtetin perëndimor të Guerreros, por nuk është e qartë nëse ata ishin pas sulmit apo pse.

Përveç trafikut të drogës, në rajon ekziston një problem me kontrabandën e karburantit, të njohur si “huachicolea”, e cila gjeneron miliarda dollarë në vit për grupet që fshihen pas këtij aktiviteti të paligjshëm. Deri më tani, autoritetet federale nuk kanë komentuar për vrasjet.

Të paktën 73 persona, përfshirë 17 fëmijë, humbën jetën në një aksident tragjik trafiku në Afganistanin perëndimor, shumica prej të cilëve ishin emigrantë afganë të deportuar nga Irani. Lajmin e konfirmoi për BBC Pashto një zyrtar i talebanëve, Ahmadullah Mottaqi, drejtor i informacionit dhe kulturës në provincën Herat.

Sipas autoriteteve, autobusi që transportonte emigrantët u përplas të martën në mbrëmje me një kamion dhe një motoçikletë në provincën Herat, duke marrë flakë menjëherë pas përplasjes. Të gjithë pasagjerët në autobus humbën jetën në vend, ndërsa viktima pati edhe nga automjetet e tjera të përfshira në aksident.

“Autobusi ishte nisur drejt Kabulit dhe të gjithë personat në bord ishin emigrantë që ishin hipur në automjet në Islam Qala, pranë kufirit me Iranin,” tha Mohammad Yousuf Saeedi, zëdhënës i guvernatorit të provincës për AFP.

Sipas policisë lokale, shkaku i aksidentit ishte “shpejtësia e tepërt dhe neglizhenca” e shoferit të autobusit.

Aksidentet rrugore në Afganistan janë të shpeshta për shkak të infrastrukturës së dëmtuar nga dekada konfliktesh, mungesës së sinjalistikës dhe zbatimit të dobët të rregullave të qarkullimit.

Ngjarja ndodhi në një kohë kur Irani ka rritur ndjeshëm deportimin e afganëve pa dokumente, që kanë ikur nga lufta, varfëria dhe pasiguria në vendin e tyre. Miliona afganë kanë ikur në Iran dhe Pakistan që nga vitet 1970, me valë të mëdha gjatë pushtimit sovjetik dhe pas marrjes së pushtetit nga talebanët në vitin 2021.

Irani kishte vendosur një afat deri në korrik për largimin vullnetar të afganëve pa dokumente. Por pas tensioneve me Izraelin në qershor, autoritetet iraniane filluan kthimin me forcë të qindra mijëra emigrantëve afganë, duke përmendur shqetësime për sigurinë kombëtare. Kritikët thonë se ky veprim mund të jetë një përpjekje për të zhvendosur vëmendjen nga dështimet e brendshme të sigurisë.

Agjencia e OKB-së për Refugjatët njoftoi se mbi 1.5 milion afganë janë larguar nga Irani që nga janari i këtij viti. Shumë prej tyre kishin jetuar në Iran për breza të tërë.

Ekspertët paralajmërojnë se Afganistani, nën drejtimin e talebanëve, nuk ka kapacitetin për të përballuar kthimin masiv të qytetarëve të tij. Shteti po përjeton gjithashtu një fluks të madh të të kthyerve nga Pakistani, i cili ka ndërmarrë politika të ngjashme dëbimi.

“Kthimi i kaq shumë njerëzve po krijon një barrë të madhe mbi burimet tashmë të kufizuara të vendit, dhe kjo ndodh në një kohë kur ndihmat ndërkombëtare po shkurtohen në mënyrë dramatike,” deklaroi Arshad Malik, drejtor i organizatës Save the Children në Afganistan. Tragjedia në Herat është një tjetër pasojë tragjike e krizës së thellë humanitare dhe migratore që po përjeton Afganistani.

Deputetët e legjislaturës së nëntë sot do të mblidhen sërish në tentativën e radhës për konstituim të Kuvendit të Kosovës. Pas aktgjykimit të Gjykatës Kushtetuese, i cili u publikua të hënën i plotë, vazhdimi i seancës konstituive është thirrur sot, në ora 11:00.

Aktgjykimi i Gjykatës Kushtetuese thotë se deputetët duhet të zgjedhin me votim të hapur kryeparlamentarin, si dhe një kandidat për kryeparlamentar, që mund të votohet vetëm deri në tre herë.

Konstituimi i Kuvendit të Kosovës po konsiderohet si urgjencë shtetërore edhe nga presidenca e cila përmes një përgjigjje për KosovaPress tha se Kosova duhet të ketë sa më parë institucionet në periudhën sfiduese globale dhe rajonale.

“Presidenca e konsideron urgjencë shtetërore konstituimin sa më të shpejtë të institucioneve të dala nga vullneti i popullit. Në këtë periudhë të zhvillimeve dinamike në kontinent dhe sfidave globale që e prekin edhe rajonin tonë, krijimi sa më i shpejtë i institucioneve të reja në përputhje me procedurat e parapara në aktgjykimin e Gjykatës Kushtetuese është jetik për stabilitetin, përfaqësimin demokratik dhe për adresimin e interesave të qytetarëve”, kanë thënë nga Presidenca për KosovaPress.

Kujtojmë që deri para aktgjykimit të fundit të Gjykatës Kushtetuese, Kuvendi i Kosovës dështoi konstituimin në 54 tentativa.

Seanca e fundit konstituive ishte e datës 26 korrik datë kjo që shënoi edhe fundin e rrjedhjes së afatit të konstituimit nga Kushtetuesja. Pas kësaj Gjykata Kushtetuese caktoi masë të përkohshme me të cilën nga datat 27 korrik deri 8 gusht deputetëve iu pamundësua thirrja e një seance tjetër në Kuvendin e Kosovës.

Gjykata Kushtetuese e publikoi vendimin me 8 gusht, ndërsa si të plotë e publikoi të hënën e 18 gushtit. Ndryshe, partitë politike deri tani nuk kanë shfaqur shenja të përafrimit të konsensusit për zgjedhjen e kryeparlamentarit dhe konstituimin e Kuvendit të Kosovës.

Një ngjarje e rëndë kriminale ka ndodhur sot në zonën e Divjakës.

Mësohet sesi pasojë e një konflikti, ka humbur jetën një 30-vjeçar.

Autori i vrasjes Xhesion Toromeni u arratis menjëherë nga vendngjarja, por më vonë u kap nga policia.

Viktimë në ngjarje mbeti 30-vjeçari Besmir Kumria. Nga hetimet paraprake dyshohet se shtetasi Xhesion Toromeni e ka vrarë shtetasin Besmir Kumria, pasi familjet e tyre kanë pasur konflikte të vazhdueshme për një kanal vaditës në fshat.

Kryeministri Edi Rama njoftoi sot se Çertifikata e Aftësimit Profesional (CAP) do të integrohet automatikisht në lejen e drejtimit, duke u pasqyruar me Kodin 95. Sipas tij, kjo risi shmang nevojën për kartonin e veçantë të CAP-it, duke thjeshtuar procedurat dhe duke ulur shpenzimet për qytetarët.

“Një tjetër hap drejt modernizimit e thjeshtimit të shërbimeve. CAP tani është pjesë e lejes së drejtimit si Kodi 95”, – u shpreh Rama. Ndërkohë, Drejtoria e Përgjithshme e Shërbimit të Transportit Rrugor (DPSHTRR) njoftoi se nga data 19 gusht 2025 ka hyrë në fuqi aplikimi i kësaj risie të rëndësishme për të gjithë drejtuesit e mjeteve që zotërojnë CAP.

“Në zbatim të standardeve më të mira europiane, CAP nuk do të lëshohet më si një karton më vete, por do të përfshihet automatikisht në lejen e drejtimit, duke u pasqyruar si Kodi 95 në të njëjtin dokument”, – thuhet në njoftimin e DPSHTRR.

Konkretisht, qytetarët nuk do të pajisen më me një karton të veçantë për CAP, pasi të gjitha të dhënat do të pasqyrohen në lejen e drejtimit. Aplikimi dhe rinovimi do të kryhen sipas procedurave ekzistuese, ndërsa shënimi i Kodit 95 do të pasqyrohet në dokumentin e vetëm të lejes së drejtimit.

Ky ndryshim sjell kursim kohe dhe shpenzimesh për qytetarët, duke shmangur aplikimet e përsëritura, pagesat shtesë dhe ecejaket e panevojshme. Me një procedurë të thjeshtuar, drejtuesit e mjeteve do të kenë tashmë vetëm një dokument të unifikuar, duke e bërë përdorimin më praktik dhe më të sigurt.

Gjithashtu, kjo risi përputhet me standardet e Bashkimit Evropian, ku Kodi 95 pasqyrohet në lejen e drejtimit, siç aplikohet në disa vende të BE-së.

Përfitime sjellin si për aplikantët e rinj, të cilët nuk do të paguajnë më për kartonin CAP, ashtu edhe për drejtuesit që rinovojnë, të cilët do të kenë gjithçka të përmbledhur në një dokument të vetëm. Po ashtu, edhe institucionet përfitojnë nga një administrim më i thjeshtë e i digjitalizuar. Me këtë hap, DPSHTRR thekson angazhimin për të ofruar shërbime më të shpejta, më të lehta, më të lira dhe në përputhje me standardet evropiane për çdo qytetar.

Detaje të reja mësohen në lidhje me vrasjen e ndodhur në fshatin kryekuq të Divjakës.

Mësohet se 30-vjeçari i cili ka humbur jetën pas një goditje me thikë është Besmir Kumria.

“Mollë sherri” mes tij dhe viktimës duket se ka qenë një konflikt për një kanal vaditës në fshat.

Një ngjarje e rëndë është shënuar mbrëmjen e djeshme në fshatin kryekuq të Divjakës.

Xh.K. 30 vjeç është goditur me thikë nga një person ende në arrati. 30 vjeçari ka humbur jetën nga plagët ndërsa policia në kërkim të autorit.

Zyra e OSBE-së për Institucione Demokratike dhe të Drejta të Njeriut, ODIHR, ka thënë të martën se Serbia e ka për detyrë të mundësojë tubime paqësore pa përdorim të paarsyeshëm ose të tepruar të forcës policore.

Në një reagim në X, ajo tha Serbia është gjithashtu e detyruar ta “parandalojë dhunën, në përputhje me detyrimet e saj për të drejtat e njeriut”.

“Promovimi i dialogut dhe përgjegjësisë është mënyra më e mirë për t’i ulur tensionet e tanishme”, thuhet në reagim.

Një valë protestash, që filloi në Serbi në nëntor të vitit 2024, ka hyrë në një fazë të re tani.

Ka pasur përleshje të përditshme midis demonstruesve dhe policisë që nga 12 gushti, kur dhuna shpërtheu në qytetet veriore, Vërbas dhe Baçka Pallanka.

Këto incidente ndezën protesta në dhjetëra qytete në vend, përfshirë kryeqytetin Beograd, ndërsa akuzat për brutalitet policor u përhapën në gjithë vendin.

Ditët e fundit, disa organizata joqeveritare kanë bërë kallëzime penale kundër oficerëve të policisë për dhunë policore kundër protestuesve.

Ministri i Brendshëm i Serbisë, Ivica Daçiq, tha të martën se policia nuk po fshihte asgjë në lidhje me veprimet e saj në protesta dhe se, nëse do të kishte ndonjë tejkalim të autoritetit, të gjithë ata që e bënë këtë do të mbanin përgjegjësi.

Që nga nëntori, në Serbi po zhvillohen protesta masive pas shembjes së strehës së betonit në stacionin hekurudhor të Novi Sadit, ku humbën jetën 16 njerëz.

Studentët dhe protestuesit kërkojnë përgjegjësi penale e politike, si dhe shpalljen e zgjedhjeve të parakohshme parlamentare.

“Pas valës së protestave antiqeveritare në  Serbi, presidenti serb Aleksandar Vuçiç ka njoftuar se do të ketë një goditje të ashpër ndaj protestuesve, duke i quajtur ata ‘terroristë’”, raportoi transmetuesi publik gjerman ZDF, duke cituar fjalët e Vuçiqit nga një konferencë të dielën. “Ne do të bëjmë gjithçka që është në fuqinë tonë për të rivendosur ligjin, paqen dhe rendin”, tha ai.

Vuçiç përshkruhet në raport si një “politikan i krahut të djathtë” dhe citohet të ketë thënë se qeverisë së tij i duhen disa ditë për të përgatitur një “kornizë ligjore dhe formale” për përgjigjen e shtetit.

“Do të jetë krejtësisht ndryshe nga ajo që keni parë deri më tani”, shtoi ai, pa dhënë detaje të mëtejshme. “Megjithatë, shpallja e gjendjes së jashtëzakonshme nuk po merret në konsideratë”, njoftojnë mediat.

Në Beograd dhe qytete të tjera, përleshjet e dhunshme midis forcave të sigurisë dhe protestuesve kanë ndodhur për disa netë me radhë, raportoi revista Stern, duke shtuar se “Serbia ka përjetuar protesta të rregullta dhe të dhunshme kundër qeverisë dhe korrupsionit që është i përhapur në vend për muaj të tërë.”

“Shkaku ishte shembja e tendës së stacionit hekurudhor në Novi Sad më 1 nëntor 2024, e cila vrau 16 persona”, thuhet në raport, duke shpjeguar se “protestat fillimisht u përqendruan në shkaqet e shembjes”, por më vonë “tubimet e udhëhequra kryesisht nga studentët, u kthyen kundër qeverisë dhe korrupsionit të përhapur në vend”.

Revista Der Spiegel raporton në faqen e saj të internetit se kundërshtarët e qeverisë demonstruan gjithashtu të dielën në mbrëmje në një numër qytetesh serbe.

“Përleshjet me policinë ndodhën edhe në Beograd. Policia ndaloi demonstruesit që po përpiqeshin të marshonin drejt selisë së Partisë Përparimtare Serbe (SNS) në pushtet. Përleshje u raportuan edhe në qytetin e dytë më të madh të vendit, në Novi Sad.”

Gazeta gjermane pohon se Ministri i Brendshëm Ivica Daçiq tha pak para mesnatës se ka një polic të plagosur si dhe 18 demonstrues të arrestuar. Në netët e mëparshme ka pasur edhe më shumë të lënduar dhe arrestuar.

Autoritetet serbe nuk dhanë detaje mbi numrin e protestuesve të plagosur, shkruan Der Spiegel.

Raporti kujton se protestat deri të mërkurën e kaluar kishin qenë kryesisht jo të dhunshme. “Megjithatë, që nga fillimi, këto tubime iu nënshtruan vazhdimisht sulmeve fizike nga mbështetës të organizuar dhe ndonjëherë të maskuar të qeverisë Vuçiq. Këto sulme rrallë u ndëshkuan.”

Gazeta gjermane raporton se mediat e pavarura në Serbi, “ia atribuojnë dinamikën e re të trazirave të dhunshme, disa prej të cilave u iniciuan nga protestuesit, frustrimit të qytetarëve me mosveprimin e autoriteteve përkatëse përballë dhunës nga mbështetësit e qeverisë.”

Der Spiegel e përfundon raportin e saj me një deklaratë nga Michael O’Flaherty, Komisioneri i Këshillit të Evropës për të Drejtat e Njeriut, i cili të premten shprehu shqetësim për “përdorimin joproporcional të policisë” në Serbi dhe u bëri thirrje autoriteteve të “ndalojnë arrestimet arbitrare dhe të çtensionojnë situatën”. DW