Lidhja Demokratike e Kosovës (LDK) ka bërë të ditur se nesër, më 16 korrik, do të dorëzojë në Prokurorinë Speciale të Kosovës vendimin e sotëm të Gjykatës Supreme lidhur me çështjen e arkave fiskale.

“Nesër (e mërkurë), në orën 11:30, Lidhja Demokratike e Kosovës dorëzon në Prokurorinë Speciale, vendimin e sotëm të Gjykatës Supreme. E dorëzojmë këtë vendim si dëshmi në 17 kallëzimet penale që i kemi ngritur paraprakisht më datën 8 maj 2025,” thuhet në njoftimin e partisë.

Ky vendim i Gjykatës Supreme vjen pasi ka shfuqizuar udhëzimin administrativ të lëshuar nga ministri në detyrë i Financave, Hekuran Murati, me të cilin ishin pezulluar për 60 ditë shitjet dhe abonimet e arkave fiskale.

Udhëzimi administrativ për shfrytëzimin e pajisjeve elektronike fiskale, sistemeve fiskale dhe softuerëve elektronike fiskalë, ishte publikuar në gazetën zyrtare më 16 prill, një ditë pasi ishte miratuar nga ministri në detyrë, i cili është gjithashtu i betuar si deputet i legjislaturës së re pas zgjedhjeve të shkurtit.

“Qeveria në dorëheqje është e autorizuar të kryejë vetëm aktivitetet e domosdoshme dhe të planifikuara në Planin vjetor të punës së Qeverisë dhe në ligjin vjetor për buxhetin, duke përjashtuar miratimin e akteve nënligjore normative të reja”, tha Supremja.

Ajo tha se për të ishte “i pakontestueshëm fakti” se nga certifikimi zyrtar i rezultateve të zgjedhjeve më 27 mars, ministri Murati figuron si deputet i Kuvendit të Kosovës.

“Sipas nenit 71 të Kushtetutës, ushtrimi i funksioneve të deputetit dhe të ministrit në të njëjtën kohë është i ndaluar. Për pasojë, nxjerrja e Udhëzimit Administrativ nga një person që ushtron njëkohësisht detyrën e deputetit dhe të ministrit është e kundërligjshme dhe shkel dispozitat kushtetuese”, thuhet në vendim.

The post LDK do të dorëzojë në Prokurorinë Speciale vendimin e Gjykatës Supreme appeared first on Telegrafi.

Eksperti i kriminalistikës, Ervin Karamuço, ka deklaruar se zbërthimi i komunikimeve të aplikacionit të koduar Matrix pritet të ndihmojë ndjeshëm në zbardhjen e një sërë ngjarjesh kriminale të pazgjidhura në Shqipëri, përfshirë edhe rastin e zhdukjes së bujshme të Ervis Martinajt.

I ftuar në Euronews Albania, Karamuço tha se përdorimi i këtij aplikacioni është identifikuar te persona të dyshuar për përfshirje në krime të rënda, përfshirë individë të afërt me Martinajn.

“Jam i bindur se zbardhja e komunikimeve në Matrix do të ndihmojë për të zbuluar fatin e Ervis Martinajt, sepse përdorues të afërt me të, ose të atyre grupeve që policia dyshon se mund të jenë përfshirë në arratisjen apo ekzekutimin e tij të mundshëm, kanë përdorur Matrix” – tha Karamuço.

Ai përmendi gjithashtu edhe emra të tjerë që mund të përfshihen në këtë hetim të thelluar si Talo Çela, për të cilin ekzistojnë dyshime se ka ndarë një fat të ngjashëm me Martinajn.

Sipas Karamuços, aplikacioni Matrix është përdorur gjerësisht nga rrjete kriminale që operonin në fshehtësi të plotë. Ai theksoi se:

“Matrix ishte i koduar, i kriptuar, pa identifikim të përdoruesit dhe me 40 serverë të shpërndarë në shtete të ndryshme. Janë kapur 2.3 milionë mesazhe në 33 gjuhë, përfshirë edhe gjuhën shqipe.”

Eksperti vuri në dukje se kjo platformë ka qenë aktive pas periudhës së Sky dhe EncroChat, dy aplikacione të tjera të zbërthyera më herët nga autoritetet evropiane, që ofruan prova kyçe për ndjekjen penale të shumë grupeve kriminale. Matrix, sipas tij, mbulon komunikime nga viti 2024 e këtej, duke hapur një perspektivë të re hetimore.

“Kemi pasur shumë ngjarje që nuk janë zbardhur dot, përveç ndonjë dëshmitari të penduar. Tani kemi prova të shkruara, të mirëfillta. Është një fat i madh nëse këto mesazhe kanë lënë gjurmë nëpër servera,” u shpreh Karamuço.

Ai përmendi edhe një tjetër rast të një shtetasi nga jugu i vendit, i zhdukur në rrethana misterioze në Tiranë, për të cilin gjithashtu po hetohet dhe besohet se mund të jetë i ndërlidhur me komunikime të kapura në Matrix.

Zbardhja e kësaj platforme pritet të hapë një kapitull të ri në luftën kundër krimit të organizuar, duke i dhënë autoriteteve shqiptare dhe atyre ndërkombëtare mjete të reja për të hetuar ngjarjet që kanë tronditur opinionin publik gjatë viteve të fundit.

The post Karamuço: Zbardhja e komunikimeve në Matrix mund të çojë në zbulimin e fatit të Ervis Martinajt appeared first on Telegrafi.

Qeveria e Republikës së Kosovës ka shprehur shqetësim dhe kundërshtim të fortë ndaj vendimit të fundit të Gjykatës Supreme të Kosovës, e cila ka shfuqizuar Udhëzimin Administrativ Nr. 01/2025 për shfrytëzimin e pajisjeve elektronike fiskale, sistemeve fiskale dhe softuerëve elektronikë fiskalë.

Vendimi i Gjykatës u mor me arsyetimin se ky udhëzim është miratuar nga një qeveri dhe një ministër në detyrë, të cilëve u mungojnë kompetencat për nxjerrjen e akteve nënligjore.

Por, Qeveria e Kosovës vlerëson këtë arsyetim si të pabazuar ligjërisht dhe si një interpretim të njëanshëm dhe arbitrar të dispozitave ligjore.

Në deklaratë theksohet se neni 31 i Ligjit për Qeverinë nuk ndalon nxjerrjen e akteve nënligjore nga qeveritë në detyrë apo ministrat në detyrë.

Ky nen kufizon veprimtarinë e qeverisë në detyrë vetëm në çështje madhore, si marrëveshje ndërkombëtare, amendamente kushtetuese, projektligje të reja apo strategji, por jo në nxjerrjen e akteve zbatuese si ky Udhëzim Administrativ.

Po ashtu, procedura për hartimin e këtij Udhëzimi kishte nisur më 20 nëntor 2024, kur Qeveria kishte mandat të plotë kushtetues dhe ligjor, duke i dhënë këtij akti legjitimitet të plotë.

Qeveria thekson se vendimi i Gjykatës Supreme është i dobët edhe në aspektin logjik dhe kushtetues, pasi njoh funksionimin e Qeverisë në detyrë, por njëkohësisht i mohon asaj kompetenca që ligji nuk i ndalon, duke krijuar kontradikta dhe duke cenuar sigurinë juridike dhe funksionimin e pandërprerë të institucioneve ekzekutive.

Në lidhje me pretendimin për konflikt funksional mes ministrit në detyrë dhe deputetit, Qeveria kujton Aktgjykimin e Gjykatës Kushtetuese KO124/25, sipas të cilit Kuvendi i Kosovës nuk është funksionalizuar ende për shkak të moszgjedhjes së Kryetarit dhe Nënkryetarëve, prandaj nuk ekziston konflikt funksional mes këtyre pozitave.

Qeveria e Kosovës thekson përkushtimin e saj ndaj respektimit të rendit kushtetues dhe ligjor, si dhe funksionimit të pandërprerë të institucioneve shtetërore.

Ajo kërkon që vendimet e institucioneve të drejtësisë të jenë të bazuara në standarde të qarta juridike dhe jo në interpretime njëanshme apo motivime politike.

Në fund, Qeveria njofton se do të përdorë të gjitha mjetet juridike në dispozicion për të rivendosur ligjshmërinë dhe standardet demokratike.

The post Qeveria kundërshton vendimin e Gjykatës Supreme për shfuqizimin e Udhëzimit Administrativ appeared first on Telegrafi.

Qeveria e Kosovës është shprehur e gatshme të respektojë vendimin e Gjykatës Themelore në Prishtinë, e cila ka obliguar këtë institucion për të bërë riverifikimin e 19,500 veteranëve që pretendohet se nuk plotësuan kriteret për statusin e tyre.

Megjithatë, puna për riverifikim do të nisë vetëm pasi Qeveria të pranojë vendimin e plotë të Gjykatës në rastin e njohur si “Veteranët”.

Ndërsa e konsiderojnë vendimin si të motivuar politikisht, edhe organizatat e dala nga lufta kanë shprehur gatishmëri për të ndihmuar në këtë proces.

Në vendimin e saj, Gjykata ka dënuar 10 nga 12 të akuzuar për keqpërdorim të statusit të veteranit dhe ka obliguar Qeverinë që përmes komisioneve përkatëse të bëjë rishqyrtimin e listës së veteranëve.

Këshilltari i Kryeministrit për Çështje të Kategorive të Dala nga Lufta e Ushtrisë Çlirimtare të Kosovës, Aziz Bici, tha përmes telefonit se janë duke pritur aktgjykimin e plotë për të parë më pas mënyrën e veprimit.

Edhe në Organizatën e Veteranëve të UÇK-së janë shprehur të gatshëm për ndihmë, megjithëse kanë vlerësuar vendimin e Gjykatës si të ndikuar politikisht.

“Organizata e veteranëve është e gatshme të ndihmojë jo vetëm Qeverinë, por edhe institucionet e sigurisë për të zbardhur të vërtetën. Megjithatë, jam skeptik nëse Qeveria në detyrë ka kompetenca për të themeluar një komision të ri, duke pasur parasysh se nuk ka organ tjetër që mund të bëjë riverifikimin përveç komandantëve”, tha Gazmend Syla nga OVL e UÇK-së.

Në Institutin e Kosovës për Drejtësi thonë se duhet pritur që vendimi të bëhet i plotfuqishëm, dhe se pastaj do të jetë shumë më e lehtë të pastrohen listat e veteranëve.

“Komisioni i zyrës së Kryeministrit, kurdo që formohet, duhet të kryejë detyrat e tij në bazë të ligjit për të siguruar integritetin e këtij procesi dhe për t’u njohur kontributi veteranëve të vërtetë të UÇK-së,” tha Ehat Miftaraj nga IKD.

Në rigjykim, Gjykata Themelore në Prishtinë ka shpallur fajtor dhe ka dënuar me nga një vit burgim ish-kryeministrin Agim Çeku dhe 9 të tjerë të akuzuar në rastin “Veteranët”: Rrustem Berisha, Shkumbin Demalijaj, Sadik Halitjaha, Qelë Gashi, Shukri Buja, Ahmet Daku, Faik Fazliu, Fadil Shurdhaj dhe Xhavit Jashari.

Nga akuzat u liruan Nuredin Lushtaku dhe Smajl Elezaj.

I dënuari Shukri Buja ka reaguar gjatë ditës, duke e quajtur vendimin “qesharak” dhe të ndikuar politikisht, raporton RTVDukagjini.

The post Listat e veteranëve: Qeveria do të nis ‘pastrimin’ pasi të pranojë vendimin e gjykatës appeared first on Telegrafi.

UBT ka hapur një ekspozitë të veçantë kushtuar jetës dhe veprës së inxhinierit të njohur të shekullit XIX, Karl Gega, një prej figurave më të rëndësishme në historinë evropiane të inxhinierisë dhe ndërlidhjes ndërkulturore.

Ekspozita u hap në ambientet e Parkut Shkencor, Inovativ dhe Teknologjik të UBT-së në Lipjan, duke shënuar një moment të rëndësishëm kulturor dhe shkencor për Kosovën dhe rajonin më gjerë.

Në bashkëpunim me Fondacionin Musei Civici di Venezia, kjo ekspozitë sjell në vëmendje trashëgiminë inxhinierike dhe kulturore të Karl Gegës, i njohur për projektet e tij që ndërlidhën komunitete dhe kultura nëpër Evropë.

Rektori dhe Presidenti i UBT-së, Prof. Dr. Edmond Hajrizi, tha se ekspozita është rezultat i një bashkëpunimi të suksesshëm ndërinstitucional dhe dëshmi e përkushtimit të UBT-së për të promovuar dijen, kulturën dhe trashëgiminë përmes një qasjeje akademike dhe inovative.

“Me këtë ekspozitë, ne jo vetëm që përkujtojmë një figurë historike të rëndësishme, por gjithashtu e lidhim të kaluarën me të ardhmen përmes dijes, teknologjisë dhe kreativitetit,” theksoi Hajrizi.

Kontribut të veçantë në realizimin e ekspozitës dhanë studentët dhe stafi akademik nga Fakultetet e Artit dhe Medias Digjitale, Arkitekturës dhe Planifikimit Hapësinor, si dhe Dizajnit të Integruar të UBT-së.

Ekspozita përmban dokumente arkivore, plane inxhinierike, vizatime origjinale, si dhe materiale multimediale, duke e kthyer në një përvojë gjithëpërfshirëse që bashkon shkencën me artin dhe trashëgiminë me inovacionin.

Përmes kësaj ngjarjeje, UBT rikonfirmon rolin e tij si institucion lider në ndërlidhjen e shkencës me kulturën, si dhe përkushtimin për të sjellë në Kosovë aktivitete me përmbajtje dhe vlerë ndërkombëtare në arsim dhe kulturë.

The post UBT hap ekspozitën kushtuar inxhinierit të shquar Karl Gega appeared first on Telegrafi.

Gjykata Supreme e Kosovës ka konstatuar se disa ministra të Qeverisë në detyrë kanë shkelur Kushtetutën dhe ligjin, pasi edhe pse janë certifikuar si deputetë nga Komisioni Qendror i Zgjedhjeve, kanë vazhduar të ushtrojnë funksione ekzekutive.

Ky vendim është mirëpritur nga Lidhja Demokratike e Kosovës (LDK), e cila kishte ngritur kallëzime penale pikërisht për këtë çështje.

Sipas LDK-së, vendimi i Gjykatës është një konfirmim i qartë i shkeljeve që ata kanë denoncuar më herët.

“Në emër të interesit publik dhe rendit demokratik kushtetues, Lidhja Demokratike e Kosovës deri më tani ka ushtruar 17 kallëzime penale kundër ish-ministrave që kanë vazhduar të marrin vendime si ministra në detyrë, ndonëse ishin certifikuar si deputetë, duke ndërmarrë të gjitha veprimet ligjore për të mbrojtur rendin kushtetues dhe integritetin institucional të Republikës,” thuhet në reagimin e partisë.

LDK njoftoi se të martën do ta deponojë vendimin e Gjykatës Supreme në Prokurori si provë mbështetëse për kallëzimet penale të dorëzuara më parë.

Partia opozitare i ka bërë thirrje Prokurorisë së Shtetit që të trajtojë me prioritet këtë rast, duke kërkuar veprim të menjëhershëm kundër, siç thotë, veprimeve të paligjshme dhe uzurpimit të institucioneve për interesa politike.

“Zbatimi i ligjit nuk është opsional, por detyrim i panegociueshëm për çdo zyrtar publik. Kosova nuk mund të lejojë më që institucionet e saj të uzurpohen dhe të keqpërdoren për interesa politike të një partie,” përfundon deklarata e LDK-së.

The post LDK mirëpret vendimin e Supremes: Deri më tani kemi paraqitur 17 kallëzime penale kundër ish-ministrave appeared first on Telegrafi.

Gjykata Supreme e Kosovës ka vlerësuar të martën se nxjerrja e akteve nënligjore nga një person që ushtron njëkohësisht detyrën e deputetit dhe të ministrit është e kundërligjshme dhe shkel dispozitat kushtetuese.

Ky konstatim ka ardhur në lidhje me Udhëzimin Administrativ nr. 01/2025 për arkat fiskale digjitale, të nënshkruar nga ministri në detyrë i Financave, Hekuran Murati. Supremja argumenton se, sipas nenit 28 dhe 29 të Ligjit Nr. 08/L-117 për Qeverinë e Republikës së Kosovës, mandati i anëtarëve të Qeverisë përfundon me zgjedhjen si deputetë, ndërsa mandati katërvjeçar i Qeverisë përfundon me mbylljen e legjislaturës së Kuvendit.

Në pjesën e vendimit, theksohet gjithashtu se neni 31 i Ligjit për Qeverinë kufizon veprimet e Qeverisë në dorëheqje vetëm në aktivitetet e domosdoshme dhe të planifikuara në Planin Vjetor të Punës dhe Ligjin e Buxhetit, duke përjashtuar “miratimin e akteve nënligjore normative të reja”.

Gjykata citon faktin se, që nga 27 marsi 2025, kur u certifikuan zyrtarisht rezultatet e zgjedhjeve, Hekuran Murati figuron si deputet, gjë që, sipas nenit 71 të Kushtetutës, e bën të paligjshëm ushtrimin e funksioneve të dyfishta si deputet dhe ministër.

“Prandaj, përderisa akti i kontestuar është nxjerrë nga një autoritet i paautorizuar dhe në mungesë të kompetencës ligjore, si dhe është në kundërshtim me parimet e ndarjes dhe kontrollit të pushteteve, Gjykata vlerëson se akti i kontestuar duhet të shfuqizohet si i kundërligjshëm dhe në shkelje të dispozitave kushtetuese,” përfundon vendimi.

Me këtë vendim, Udhëzimi për arkat fiskale digjitale është hedhur poshtë, duke rikthyer në vëmendje nevojën për të respektuar ndarjen e pushteteve dhe kufizimet ligjore të mandatit qeverisës.

The post Vendimi i Supremes: Nxjerrja e akteve nënligjore nga ministrat që janë deputetë përbën shkelje kushtetuese appeared first on Telegrafi.

Inspektorati Kombëtar i Mbrojtjes së Territorit (IKMT) ka shembur këtë të martë me shpërthim të kontrolluar një ndërtesë trekatëshe në fshatin tursitik të Thethit.

Kjo ndërhyrje vjen në përmbyllje të aksionit disa ditor të IKMT-së për heqjen e objekteve të ndërtuara pa leje në këtë zonë.

Prej orësh, forcat xheniere kishin montuar kallëpet e eksplozivit në strukturë, ndërsa shpërthimi i komanduar u realizua me sukses dhe pa incidente.

Aksioni u zhvillua pas deklaratave të kryeministrit Edi Rama, i cili akuzoi se një person i dyshuar për probleme kriminale kishte ndërtuar një mini-fshati turistik me objekte pa leje në qendër të Thethit.

The post Momenti kur shëmbet me shpërthim të kontrolluar ndërtesa 3-katëshe në Theth appeared first on Telegrafi.

Policia e Kosovës ka njoftuar se përgjatë gjashtë muajve të parë në Prishtinë janë shqituar 104 mijë e 324 gjoba trafiku.

Gjobat janë vendosur në kuadër të planit “Siguria në Trafik”, për të parandaluar aksidentet dhe për të rritur sigurinë në rrugë, transmeton KosovaPress.

Kundërvajtësit kanë pranuar gjoba për shkelje të trafikut si: tejkalim shpejtësie, vozitje nën ndikimin e alkoolit, mos vendosje të rripit të sigurisë, përdorim telefoni gjatë vozitjes, mungesë dokumentacioni ose helmete etj.

Policia ka njoftuar se do të vazhdohet edhe më tutje me kontrolle për ruajtjen e sigurisë në trafik, teksa ka apeluar qytetarët për të ndjekur rregullat e komunikacionit.

The post Brenda 6 muajve, policia shqipton mbi 100 mijë gjoba trafiku në Prishtinë appeared first on Telegrafi.

Në muajin maj të këtij viti janë regjistruar dymijë e treqind e gjashtëdhjetë e katër (2 mijë e 364) lindje brenda dhe jashtë Kosovës.

Prej këtyre lindjeve të regjistruara janë njëmijë e dyqind e gjashtëdhjetë e një (1 mijë e 261) lindje janë meshkuj dhe njëmijë e njëqind e tre (1 mijë e 103) lindje janë femra.

Kështu bënë të ditur Agjencia e Statistikave të Kosovës.

Ndërsa, sipas ASK-së janë regjistruar gjithsej 897 raste të vdekjeve (brenda dhe jashtë Kosovës). Prej vdekjeve të regjistruara, 489 janë meshkuj dhe 408 janë femra.

Ndërkaq, në muajin maj 2025 janë regjistruar gjithsej 1 mijë 174 kurorëzime (brenda dhe jashtë Kosovës), kurse shkurorëzime të ndodhura në Kosovë janë regjistruar 113 raste.

ASK-ja thekson se do të vazhdojë me grumbullimin e të dhënave përmes pyetësorëve të veçantë statistikorë, për Lindjet DEM-1, Vdekjet DEM-2, Kurorëzimet DEM-3, dhe Shkurorëzimet SHK-1, sikurse deri më tani.

Sipas ASK-së grumbullimi i të dhënave vazhdon të bëhet çdo muaj dhe do të shërbejë për krijimin e bazës së të dhënave, si dhe krahasimin me të dhënat administrative.

ASK thotë se këto të dhëna publikohen duke u bazuar në të dhëna administrative dhe burimi i të dhënave të këtij publikimi është Agjencia e Regjistrit Civil të Kosovës (ARC).

The post Mbi 2,300 lindje dhe afro 900 vdekje të regjistruara në maj 2025 appeared first on Telegrafi.

Prokuroria Themelore në Ferizaj, Departamenti për të Mitur, ka paraqitur propozim për shqiptimin e dënimit me burgim për të mitur ndaj të miturit të dyshuar për vrasjen e zyrtarit policor M.L., ngjarje kjo e ndodhur më 1 prill 2025 në Kaçanik.

Sipas njoftimit të Prokurorisë, rreth orës 23:00 të asaj nate, në rrugën “Idriz Seferi”, i mituri në bashkëkryerje me të pandehur të tjerë, me qëllim të përgatitur paraprakisht, ka privuar nga jeta zyrtarin policor.

Viktima, pasi kishte përfunduar orarin e punës, ishte ndjekur deri te hyrja e banesës së tij nga i mituri dhe të pandehurit.

Sapo ishte futur brenda ndërtesës dhe po ngjitej shkallëve, i mituri kishte hyrë pas tij dhe kishte shtënë katër herë me armë zjarri të kalibrit 9.19 mm.

Brenda një periudhe prej rreth 47 sekondash nga akti i të shtënave, i mituri është larguar me vrap në drejtim të lokalit “Dukagjini”, ku është bashkuar me të pandehurin R.M., i cili e kishte pritur jashtë. Gjatë arratisjes, dëgjohet R.M. duke thënë “Bravo, ik”, thuhet në dosjen e Prokurorisë.

Si pasojë e plagëve të marra nga të shtënat, viktima M.L. ka ndërruar jetë, çka është konfirmuar edhe në raportin e autopsisë.

Prokuroria konsideron se i mituri ka kryer veprën penale të “Vrasjes së rëndë” në bashkëkryerje, sipas nenit 173, paragrafi 1, nënparagrafi 1.9 lidhur me nenin 31 të Kodit Penal të Republikës së Kosovës.

I mituri ndodhet nën masën e paraburgimit që nga 21 prilli 2025.

The post Prokuroria kërkon dënimin me burgim për të miturin e dyshuar për vrasjen e policit në Kaçanik appeared first on Telegrafi.

Prokuroria Themelore në Prishtinë ka njoftuar për arrestimin e një zyrtari publik të Qendrës së Regjistrimit Civil, i cili dyshohet për marrje ryshfeti.

Në njoftimin zyrtar thuhet se arrestimi është kryer nga Departamenti i Krimeve të Rënda, në bashkëpunim me Policinë e Kosovës – Njësinë për Hetimin e Krimeve Ekonomike dhe Korrupsionit.

“I dyshuari, zyrtar në Qendrën e Regjistrimit Civil, dyshohet se ka kërkuar dhe pranuar përfitim pasuror në këmbim të një shërbimi zyrtar,” thuhet në komunikatën e Prokurorisë.

Me vendim të Prokurorit të Shtetit, i dyshuari është ndaluar për 48 orë, ndërsa hetimet ndaj tij janë duke vazhduar.

Prokuroria ka theksuar përkushtimin e saj në fuqizimin e sundimit të ligjit dhe luftimin e korrupsionit, duke siguruar mbrojtjen e interesit publik.

The post Prokuroria e Prishtinës jep sqarim për arrestimin e zyrtarit të Regjistrimit Civil për marrje ryshfeti appeared first on Telegrafi.

Gjykata e Sarandës ka caktuar masën e sigurisë “arrest me burg” për tre të rinj nga Kamza, të ndaluar të premten mbrëma në qytetin bregdetar teksa lëviznin me një automjet luksoz “Porsche Panamera”.

Me kërkesë të prokurores Hava Memko, gjyqtari Fatmir Ndreu vendosi sot ndalimin me burg për Endrit Doku (27 vjeç), Ervis Cukali (27 vjeç) dhe Imer Gega (21 vjeç).

Gjatë ndalimit nga forcat “Shqiponja” të Komisariatit të Policisë Sarandë, në rrugën “Butrinti”, njëri prej të ndaluarve, Endrit Doku, tentoi t’i shpëtonte policisë duke u hedhur në det bashkë me një çantë.

Ai u kap nga një mjet i policisë kufitare, ndërsa një polumbar arriti të gjejë në thellësi çantën që përmbante një armë zjarri (pistoletë).

Ndaj Dokut rëndojnë akuzat për “mbajtje pa leje të armëve të zjarrit” dhe “kundërshtim të punonjësit të rendit publik”. Ndërsa dy personat e tjerë, Cukali dhe Gega, u arrestuan për “moskallëzim të krimit” dhe “veprime që pengojnë zbulimin e së vërtetës”.

Nga verifikimet rezultoi se Ervis Cukali ishte në kërkim prej dy vitesh për akuzat “sigurim i kushteve dhe mjeteve materiale për të kryer vrasje” dhe “mbajtje pa leje dhe prodhim të armëve luftarake”, lidhur me një ngjarje në Fier ku u zbuluan 21 kilogramë tritol, raporton tch.

The post Arratisja si nëpër filma në Sarandë, u hodh në det me çantën misterioze appeared first on Telegrafi.

Lul Raka, mikrobologu, ka njoftuar se është duke qëndruar Ukrainë në një mision të organizuar nga “Columbia University” i New York-ut, për të ndihmuar sistemin shëndetësor.

Raka ka thënë se ky mision ka për qëllim forcimin e kapaciteteve të sistemit të shëndetit publik në Ukrainë, veçanërisht në fushat kritike si kontrolli i infeksioneve.

“Me ftesë të Universitetit Columbia të Nju Jorkut, jam në një mision të shkurtër në Ukrainë, në kuadër të një projekti të mbështetur nga Centers for Disease Control (CDC) të ShBA-së”, tha ai për Kanal10.

“Ky projekt ka për qëllim forcimin e kapaciteteve të sistemit të shëndetit publik në Ukrainë”, ka thënë Raka.

The post Lul Raka në Ukrainë për të ndihmuar sistemin shëndetësor appeared first on Telegrafi.

Gjykata Themelore në Prishtinë ka shpallur fajtorë dhjetë nga të akuzuarit në rastin e njohur si “Veteranët”, ndërsa ka liruar nga aktakuza Nuredin Lushtakun dhe Smajl Elezajn, pasi sipas trupit gjykues ata nuk kanë pasur cilësinë e personit zyrtar.

Agim Çeku, Sadik Halitjaha, Shkumbin Demaliaj, Qelë Gashi, Shukri Buja, Ahmet Daku, Rrustem Berisha, Faik Fazliu, Fadil Shurdhaj dhe Xhavit Jashari u shpallën fajtorë për veprime në kundërshtim me ligjin dhe me rregullat e përcaktuara nga Komisioni Qeveritar për Njohjen dhe Verifikimin e Statusit të Veteranëve të UÇK-së, duke ua mundësuar personave të tjerë të përfitojnë në mënyrë të kundërligjshme statusin e veteranit.

Ata u dënuan me nga një vit burgim, i cili duhet të ekzekutohet brenda 15 ditësh nga shpallja e vendimit.

Trupi gjykues përbëhej nga Gazmend Bahtiri (kryetar) dhe anëtarët Ngadhnjim Arrni e Kushtrim Shyti, ndërsa aktakuza përfaqësohej nga prokurori Valdet Gashi.

Kryetari i trupit gjykues, Gazmend Bahtiri tha se Qeveria e Kosovës obligohet që brenda një viti të krijojë komisione të reja për të rishqyrtuar listën e personave aplikues për statusin veteran-luftëtarë, listë kjo me 19,500 persona.

“Të akuzuarit Agim çeku, Sadik Halitjaha, Shkumbim Demalia, Qelë Gashi, Shuklri Buja, Ahmet Daku, Rrustem Berisha,Faik Fazliu, Fadil Shurdhaj dhe Xhavit Jashari janë fajtorë për veprën penale keqpërdorim i detyrës apo autoritetit zyrtar nga neni 422 paragrafi 1 lidhur me nenin 31 të kodit penal të Republikës së Kosovës dhe gjykata në bazë të dispozitave të kodit të procedurës penale të kodit penal të Republikës së Kosovës të akuzuarit i gjykon me dënim me burgim secilin veç e veç me kohëzgjatje prej 1 viti. Obligohet Qeveria e Republikës së Kosovës që të formojë komisione përkatëse që në procedurë administrative të bëj rishqyrtimin e listës prej 19,500 personave aplikues veteran luftëtarë si në shtojcën e aktakuzës së prokurorisë speciale në afat prej 1 viti pasi aktgjykimi të marrë formën e prerë”, tha ai.

Ai po ashtu theksoi arsyet se pse dy nga të akuzuarit u shpallën të pafajshëm.

“Të akuzuarit Nuredin Lushtaku dhe Smajl Elezaj, me shënime personale si në shkresa të lëndës, në kuptim të nenit 363 paragrafi 1 pika 1.3 lirohen nga akuza për shkak se nuk është provuar se të akuzuarit kanë kryer veprën penale keqpërdorim i pozitës apo autoritetit zyrtar nga neni 422 paragrafi 1 lidhur me nenin 31 të Kodit Penal të Republikës së Kosovës, për arsye se të njëjtit nuk e kanë pasur asnjëherë cilësinë e personit zyrtar”, tha ai.

Trupi gjykues deklaroi se qeveria pas përfundimit të rishqyrtimit të aplikimeve për statusin veteran- luftëtar, duhet të shpallë vlefshmërinë e statusit.

The post Gjykata i kërkoi Qeverisë të formoi komisione për rishikimin e listës së veteranëve appeared first on Telegrafi.

Agjencia e Kosovës për Akreditim (AKA) është pranuar si anëtare me të drejta të plota në Regjistrin Evropian për Sigurimin e Cilësisë në Arsimin e Lartë (EQAR), pas një vlerësimi të suksesshëm nga ekipi i pavarur i Asociacionit Evropian për Sigurimin e Cilësisë (ENQA).

Në një letër zyrtare të datës 8 korrik 2024, Presidenti i EQAR-it, Stéphane Lauwick, njoftoi Drejtorin e Përgjithshëm të AKA-së, Naim Gashi, për miratimin e aplikimit të ripërfshirjes së Kosovës në këtë mekanizëm evropian.

“Aplikimi juaj është aprovuar dhe përfshirja juaj do të jetë e vlefshme deri më 31 dhjetor 2029. Ju lutem pranoni urimet e mia për aplikimin tuaj të suksesshëm dhe përgëzimet e mia të përzemërta për punën tuaj në emër të të gjithë anëtarëve të Komitetit të Regjistrit”, thuhet në letrën e EQAR-it.

EQAR përfaqëson autoritetin më të lartë evropian që regjistron agjenci të sigurimit të cilësisë që veprojnë në përputhje me standardet evropiane për arsimin e lartë (ESG).

Anëtarësimi në këtë regjistër konfirmon përmbushjen e standardeve më të larta evropiane nga ana e AKA-së dhe rrit ndjeshëm kredibilitetin dhe besueshmërinë e arsimit të lartë në Kosovë.

Ky zhvillim do të ndikojë drejtpërdrejt në njohjen ndërkombëtare të diplomave të studentëve kosovarë, të cilat tashmë do të konsiderohen si të barasvlershme me diplomat e vendeve të BE-së. Kjo ka rëndësi jetike si në aspektin akademik, ashtu edhe profesional, duke u garantuar studentëve dhe punëdhënësve cilësi dhe standard ndërkombëtar.

Përveç përfitimeve për studentët, anëtarësimi në EQAR u hap dyer të reja edhe institucioneve të arsimit të lartë në Kosovë për pjesëmarrje të plotë në programet evropiane për edukim, përfshirë mundësitë për partneritete, projekte të përbashkëta, financim dhe ndërkombëtarizim.

Kryetarja e Këshillit Shtetëror të Cilësisë, prof. Hasnije Ilazi, theksoi rëndësinë e këtij momenti duke e quajtur “një sukses nacional dhe një arritje kolosale për studentët dhe të diplomuarit kosovarë”.

Ajo vuri në pah faktin se Kosova është vendi i parë në Ballkanin Perëndimor që arrin këtë status prestigjioz.

Ndërkaq, drejtori i përgjithshëm i AKA-së, Naim Gashi, deklaroi se ky sukses është rezultat i një procesi të gjatë dhe të planifikuar.

“Në vitin 2020 hartuam planin për përmbushjen e 14 standardeve. Pas pranimit si affiliate në ENQA në shtator 2022 dhe aplikimit në EQAR në dhjetor 2023, më 1 korrik 2024 një ekip prej pesë ekspertësh ndërkombëtarë vizitoi Kosovën dhe dha vlerësim pozitiv”, sqaroi Gashi.

Të dy zyrtarët falënderuan Bordin e AKA-së, stafin profesional, Ministren e Arsimit Arbërie Nagavci, si dhe institucionet shtetërore, shoqërinë civile, donatorët dhe agjencitë partnere ndërkombëtare, me theks të veçantë për mbështetjen nga agjencitë homologe të Kroacisë, Austrisë dhe Gjermanisë.

Ky pranim e vendos Kosovën në një pozitë të barabartë me vendet evropiane në fushën e sigurimit të cilësisë në arsim, dhe e përforcon rolin e AKA-së si një institucion kredibil dhe i besueshëm, jo vetëm në nivel kombëtar, por edhe ndërkombëtar.

The post Kosova pranohet anëtare me të drejta të plota në EQAR appeared first on Telegrafi.

Ish-presidenti i Shqipërisë, Alfred Moisiu, në moshën 95-vjeçare, ka folur hapur për krizën e vazhdueshme politike dhe institucionale në vend.

Moisiu tha se edhe pas më shumë se një shekulli shtet, Shqipëria ende nuk ka arritur të ndërtojë institucione solide.

“Kemi 113 vjet shtet dhe ende nuk mund të themi që kemi bërë shtet,” deklaroi ai, duke theksuar se pengesat më të mëdha janë mentaliteti i bajraktarizmit dhe mungesa e një administrate të qëndrueshme.

Sipas Moisiut, krizat e përsëritura politike vijnë nga fakti që njerëzit e gabuar kanë marrë drejtimin e vendit.

“Populli jonë gjithmonë ka dashur demokracinë, por për fat të keq, na kanë dalë në krye ata që nuk duhet të dilnin,” u shpreh ai.

Ai kritikoi edhe mënyrën se si zhvillohen zgjedhjet në vend.

“Kemi 35 vjet demokraci dhe ende nuk dimë të bëjmë zgjedhje. Ata që i kërkojnë elektronike, nuk i duan. Si shpjegohet kjo punë? Një dreq e di,” tha Moisiu.

Duke kujtuar përvojën e tij si ministër i Mbrojtjes në zgjedhjet e para pluraliste, Moisiu tregoi sesi atëherë kishin funksionuar strukturat për të garantuar raportimin e rezultateve, ndonëse mungonte infrastruktura moderne. “Sot nuk merret vesh. Ndodhin këto gjëra apo sajohen?” pyeti ai.

Në lidhje me krizën e alternativave politike, Moisiu tha se zhgënjimi në popull është i thellë.

“Në vend që të përmirësojmë shtetin, ne e kemi dobësuar. Ne nuk besojmë më te administrata publike sepse sa herë ndërrohet qeveria, gjithçka fillon nga e para.”

Ai kujtoi se gjatë mandatit të tij presidencial kishte ruajtur të paprekur administratën e zyrtarëve teknikë.

“Kur jam zgjedhur president, thirra sekretarët e përgjithshëm dhe i thashë: nuk prek asnjërin.”

Në fund, Moisiu kritikoi edhe mënyrën sesi pushteti ekzekutiv ndërron strukturat shtetërore.

“Çohet kryeministri dhe bën batërdinë, i ndërron të gjithë drejtorët. Ka një arsye, se kot nuk reagon. Por ndonjëherë, këto masa janë të ekzagjeruara.”

Deklaratat e Moisiut vijnë në një moment të debatit të fortë për krizën politike dhe mungesën e besimit në institucionet shqiptare.

Në fund ai apelon për një marrëveshje ndërpartiake që të mbrojë shtetin nga abuzimi dhe fragmentimi institucional./A2CNN.

The post Moisiu: Kemi 113 vjet shtet dhe ende s’kemi bërë shtet, bajraktarizmi na ka penguar appeared first on Telegrafi.

Më 2 korrik 1990, mbi 5 mijë shqiptarë sfiduan një nga regjimet më të egra të Europës Lindore, duke hyrë në ambasadat perëndimore në Tiranë në kërkim të lirisë.

Rreth 3.199 prej tyre u strehuan në ambasadën e Gjermanisë, e cila u kthye në simbol të shpresës dhe rebelimit ndaj frikës.

Në qendër të asaj ngjarjeje që hyri në histori, ishte ambasadori gjerman Werner Daum, një diplomat që zgjodhi të veprojë ndryshe nga udhëzimet zyrtare.

Në një intervistë të gjatë dhe të ndjerë, ambasadori kujton se si mori vendimin të linte derën e ambasadës gjermane pak të hapur, pasi ndjente se populli shqiptar ishte në prag të shpërthimit kundër një regjimi të kalbur dhe mizor.

Ai pa me sytë e tij ndryshimin që po ndodhte në mendjet dhe zemrat e njerëzve, sidomos të rinjve.

Pa autorizim nga Berlini, Daum mbrojti të strehuarit në ambasadë dhe organizoi transportin e tyre drejt Gjermanisë, duke sfiduar njëherësh një shtet që ende përpiqej të ruante kontrollin me dhunë.

“E dija se ishim në rrezik të madh. Ushtria shqiptare donte të sulmonte ambasadat. Por e ndjeja gjithashtu që kishte ardhur momenti – dhe ajo derë e hapur ishte shkëndija”, tha ai.

Në rrëfimin e tij, ish-ambasadori e përshkruan Shqipërinë e asaj kohe si një teatër absurd ku populli luante nën trysninë e frikës. Ai pranon se ndihma që ofroi nuk ishte vetëm humanitare, por edhe politike – një akt që besonte se do të ndihmonte në rënien e një regjimi që i ngjante më shumë një burgu gjigant.

Werner Daum shprehet se është krenar që ishte pjesë e atij momenti historik.

Ai mbetet një emër i respektuar në kujtesën kolektive të shqiptarëve – një mik që nuk harrohet.

Sot, Shqipëria ecën drejt Bashkimit Europian dhe, sipas tij, ëndrra e atyre mijëra njerëzve që hynë në ambasadë nuk ka qenë e kotë.

“Shqipëria është tashmë pjesë e botës së lirë. Dhe e ardhmja është në duart e brezit të ri”, u shpreh ai në Top Channel.

The post Rrëfimi i fundit i ish ambasadorit gjerman për para se të ndërronte jetë: Ushtria shqiptare donte të sulmonte ambasadat appeared first on Telegrafi.

Një aksident në det është regjistruar pasditen e sotme në Golem, ku janë përplasur dy motorë uji, duke lënë të lënduar një 31-vjeçar nga Kosova.

Ngjarja ka ndodhur rreth orës 17:36, në zonën detare të quajtur “Manhatan”, rreth 800 metra larg perimetrit të sigurisë, që nuk është zonë e dedikuar për plazhin, por për lundrim.

Sipas informacioneve zyrtare, shtetasi S. D., 25 vjeç, lindur në Çorovodë, duke drejtuar një motor uji, është përplasur me një tjetër motor uji që drejtohej nga shtetasi P. B., 31 vjeç, lindur në Kosovë.

Si pasojë e përplasjes, P. B., ka pësuar lëndime dhe është transportuar menjëherë në spital nga Policia Kufitare që po monitoronte zonën detare.

Fatmirësisht, ai ndodhet jashtë rrezikut për jetën.

Ndërkohë, drejtuesi tjetër, S. D., është shoqëruar në Komisariatin e Policisë për veprime të mëtejshme procedurale.

Sipas verifikimeve paraprake, rezulton se të dy po lundronin së bashku dhe ishin të pajisur me jelekë shpëtimi.

Grupi hetimor ndodhet në vendngjarje dhe po punon për zbardhjen e plotë të rrethanave të aksidentit detar.

The post Përplasen dy motorë uji në Golem, lëndohet një 31-vjeçar nga Kosova appeared first on Telegrafi.

Karriera e shkëlqyer e një shqiptari në Londër si analist i tregjeve financiare është ndërprerë, pasi ai dhe e motra u dënuan për përdorim të informacioneve të brendshme për përfitime monetare.

Sipas agjencisë Reuters, të cilës i referohet Top Channel, Redinel Korfuzi, 38 vjeç i lindur në Tiranë, drejtoi skemën dhe i dha informacione motrës së tij Oerta Korfuzi, 36 vjeçe e lindur në Dibër, duke përfituar nga tregtimi aksioneve 1 milion stërlina.

Redinel Korfuzi, një ish-analist kërkimi me një pagë vjetore prej 500,000 paund në vit, u dënua me 6 vite burg. Motra e tij Oerta u dënua me pesë vjet burg.

Gjatë procesit gjyqësor ata mohuan akuzat por u shpallën fajtorë nga një juri për komplot për të kryer tregti të brendshme dhe pastrim parash, pas një gjyqi tre mujor në Gjykatën Southark të Londrës.

Autoriteti i Sjelljes Financiare (FCA), që e ndoqi çështjen penalisht, tha se dyshja kishte përdorur aksesin e Korfuzit në informacione të brendshme për të “manipuluar sistemin dhe kënaqur lakminë e tyre”.

Ata përfituan nga informacione konfidenciale të 13 kompanive duke blerë e shitur aksione tek këto kompani dhe marrë një fitim pothuajse 1 milion paund. Redinel Korfuzi merrte informacione të brendshme rreth planeve të kompanive për të ngritur kapital ose për të shitur blloqe të mëdha aksionesh të zotëruara nga aksionerë ekzistues.

Ai tregtonte aksionet përmes disa llogarive, përfshirë ato të motrës së tij – për të cilën gjykata dëgjoi se ishte e vetëdijshme për mashtrimin.

Tek sa lexoi masën e dënimit Gjykatësi Alexander Milne i tha se: “Kjo ishte lakmi dhe arrogancë. Gjithçka për të cilën keni punuar, tani ka marrë fund. Asnjëherë më nuk do t’ju besohet të tregtoni.Të dy menduat se ishit shumë të zgjuar për t’u kapur.”

“Nuk ka dyshim tha gjykatësi se ishit të suksesshëm në rolin tuaj, dhe shefi juaj i mëparshëm foli për ju me admirim. Gjykatësi u tha të dyve se “nuk ju shkoi mendja” se tregtia nga llogari të ndryshme duke përdorur të njëjtën adresë IP kompjuteri, do të linte “gjurmë digjitale”.

Gjatë dy viteve, të dy kishin fituar shuma të mëdha parash që nuk mund të justifikoheshin.

The post Dënohen shqiptarët vëlla e motër në Britani me 5 dhe 6 vite burg: “Spiunazh” me informacione nga bursa appeared first on Telegrafi.