Zjarr në një banesë në zonën e quajtur “Rruga e Ersekës” në qytetin e Korçës.
Mësohet se i zoti i shtëpisë ka mbetur i lënduar lehtë ndërsa zjarri ka nisur në ambientet e brendshme të banesës.
Zjarrfikësja ndodhet në vendngjarje për fikjen e zjarrit ndërsa ka mbërritur dhe policia për zbardhjen e rrethanave. I lënduari u mor nga ambulanca për tu çuar drejt spitalit të Korçës./abcnews.al
Një vatër e madhe zjarri u shfaq pak orë më parë në pyjet e fshatit Mëmëz të Kukësit. Era po favorizon përhapjen e saj ndërkohë që retë e tymit kanë mbërritur mbi qytetin e Kukësit.
Në vendngjarje janë angazhuar grupe pune me punonjës të shërbimit zjarrfikës, pyjeve, banorë të zonës etj.
Terreni nuk lejon futjen e mjeteve zjarrfikëse ndaj dhe përpjekjet për izolimin dhe shuarjen e saj po bëhen me pompa shpinë dhe mjete rrethanore.
Ende nuk ka informacion për shkakun, por deri tani zjarri ka përshkuar disa hektarë me pyje dushku./abcnews.al
Në emisionin “Real Story” në ABC News, analisti Skënder Minxhozi ka shprehur shqetësimin për mënyrën se si po zhvillohet drejtësia në Shqipëri, duke e cilësuar atë si një “lojë statistikash” dhe një sistem të ngadalshëm dhe burokratik.
Minxhozi u shpreh se, në rastin e akuzave ndaj kryebashkiakut të Tiranës, Erion Veliaj, dhe ish-presidentit Ilir Meta, drejtësia duket se po bëhet gjithnjë e më personale dhe ka humbur fokusin nga akuza e saktë.
Ai ka kritikuar gjithashtu mungesën e përparimit në hetimet për ngjarjen e 21 Janarit, duke theksuar se është turp që, pas gjashtë vitesh nga krijimi i SPAK, kjo çështje ende nuk ka marrë drejtimin e duhur në gjykatë. Minxhozi e ka cilësuar sistemin aktual të drejtësisë si burokratik dhe të papërshtatshëm për të adresuar çështjet e rëndësishme për shoqërinë.
“Kam përshtypjen se drejtësia po i drejtohet një loje statistikash me Veliajn dhe Metën të marrë peng pa akuza. Se si mund ta burgosësh tjetrin që në shkurt e ta komunikosh akuzën në mbarim. Rasti i Veliajt është një qëndrim krejt mbi rreshtat dhe duket se ka kaluar në një gjë personale. Unë nuk mendoj se këto raste do t’i bënte më të mira ose jo Amerika, thjesht shtyn përpara proceset. Drejtësia e re më të madhe historike dhe një obligim moral edhe ndaj shqiptarëve do të kishte dosjet e përgjakura, të cilat ende vijon të mos i prekë. Është turp që pas 6 vitesh SPAK, ne nuk kemi asnjë pikë në horizont për 21 Janarin dhe nuk kemi asnjë shenjë se kur kjo çështje do të shkojë për gjykim. Nuk e dimë se kur do të thirren dëshmitarët dhe kur do të shkojë për gjykim. Është një drejtësi burokratike,” tha analisti Minxhozi./acbnews.al
Irani nuk ka ndërmend të ndalë programin e tij bërthamor, përfshirë pasurimin e uraniumit, tha ministri i Jashtëm iranian, Abbas Araghchi.
Në një intervistë për mediat e huaja theksoi se pasurimi i uraniumit është momentalisht i pezulluar për shkak të dëmeve të rëndësishme që ka shkaktuar, por shtoi se Irani është i gatshëm të angazhohet në bisedime për një zgjidhje të favorshme për të dyja palët.
“Nëse palët janë të gatshme të kërkojnë një marrëveshje që është në interes të të dyja palëve, unë jam gati të angazhohem me to,” u shpreh Araghchi. Ai shtoi se Irani është i hapur të marrë të gjitha masat e nevojshme për të dëshmuar se programi bërthamor është tërësisht paqësor.
Në këmbim të angazhimeve të tilla, ministri iranian kërkoi që sanksionet ndaj Iranit të hiqen.
“Irani nuk ka asnjë qëllim për të zhvilluar armë bërthamore dhe presim që në këmbim të këtij angazhimi, ata të heqin sanksionet,” tha Araghchi, duke shtuar se një marrëveshje e tillë do të ishte e dobishme për të dyja palët.
Këto komente erdhën teksa Irani është gati të rifillojë bisedimet për programin e tij bërthamor me Gjermaninë, Francën dhe Mbretërinë e Bashkuar në Stamboll./abcnews.al
Kina ka filluar ndërtimin e një prej projekteve më të mëdha energjetike në historinë e saj: një hidrocentral monumental në lumin Yarlung Tsangpo, i cili kalon përmes territorit tibetian. Ky projekt është cilësuar nga kryeministri Li Qiang si “projekti i shekullit” dhe pritet të ketë një ndikim të jashtëzakonshëm në furnizimin me energji të vendit.
Lajmi u bë i njohur gjatë një ceremonie zyrtare të zhvilluar të shtunën në rajon, duke nxitur një rritje të tregjeve kineze për shkak të pritshmërive të larta që shoqërojnë këtë megaprojekt. Ai është pjesë e Planit të 14-të Pesëvjeçar të Kinës, i cili u paraqit për herë të parë në vitin 2020.
Sipas agjencisë shtetërore Xinhua, hidrocentrali do të ndërtohet në pjesën e poshtme të lumit dhe do të përfshijë pesë stacione kaskadë, duke prodhuar rreth 300 milionë megavat orë energji elektrike çdo vit. Ky projekt ka një kosto të përllogaritur prej 1.2 trilionë juanësh (afërsisht 124 miliardë paund), dhe është shumë më i madh se diga e “Tri Grykave”, që kushtoi 254 miliardë juanë dhe prodhon 88 milionë MWh në vit.
Pavarësisht rëndësisë dhe përmasave të projektit, ende nuk janë dhënë informacione të detajuara mbi afatet apo fazat e ndërtimit, ndërsa shifrat e fundit tejkalojnë ato që u parashikuan në vitin 2020.
Megjithatë, ky projekt ka sjellë edhe shqetësime ndërkombëtare. India, Bangladeshi, grupe tibetiane dhe organizata mjedisore kanë ngritur alarmin për pasojat e mundshme. Lumi Yarlung Tsangpo, që në Indi njihet si Brahmaputra dhe në Bangladesh si Jamuna, është një burim jetik për miliona njerëz në rajon. Shtetet e prekura shprehin shqetësimin se diga mund të ndikojë në rrjedhën e ujit dhe në sasinë e tij, duke rrezikuar furnizimin me ujë për një popullsi të madhe.
Në një intervistë për BBC, Neeraj Singh Manhas, një këshilltar për Azinë Jugore, paralajmëroi se Kina mund ta përdorë këtë ujë si një mjet presioni, duke e bllokuar ose devijuar sipas interesave të veta. India ka shprehur zyrtarisht shqetësimet e saj që prej dhjetorit, dhe i ka ribërë ato gjatë takimeve të ndryshme dypalëshe.
Përveç shqetësimeve ndërkombëtare, grupet tibetiane kanë theksuar mungesën e transparencës për sa i përket zhvendosjes së mundshme të popullsisë dhe ndikimit që mund të ketë ky projekt në zonat e shenjta të budizmit në rajon. Protestat kundër ndërtimit të hidrocentraleve në këtë zonë janë bërë gjithashtu të shpeshta, me arrestimin e qindra protestuesve në vitin 2023 për një projekt të ngjashëm në lumën Yangtze.
Po ashtu, mjedisoreve u shqetëson ndikimi i mundshëm në biodiversitet dhe rreziqet gjeologjike të zonës, si rrëshqitjet e dheut dhe aktivitetet sizmike. Autoritetet kineze kanë mbrojtur projektin, duke theksuar se ai do të krijojë vende pune, do të nxisë zhvillimin e energjisë së rinovueshme dhe do të sigurojë një furnizim të qëndrueshëm me energji për të ardhmen. Kryeministri Li Qiang deklaroi gjatë ceremonisë se është e domosdoshme të mbahet parasysh ruajtja e ekosistemit për të shmangur dëmtimet mjedisore.
Me ndërtimin e kësaj megadige, Kina do të forcojë pozitat e saj si prodhuesja më e madhe e energjisë hidroelektrike në botë, me një projekt që pritet të jetë më i madh se çdo hidrocentral tjetër deri tani. Ai do të shfrytëzojë një rënie prej 2 kilometrash të lumit brenda një segmenti 50-kilometërsh, duke kaluar nëpër një kanion të thellë./abcnews.al
Analisti Ergys Mërtiri ka bërë një koment të drejtpërdrejtë dhe kritik lidhur me situatën e brendshme në Partinë Demokratike dhe figurën e liderit historik të saj, Sali Berisha. Në një intervistë për “Tirana Live” në ABC News, Mërtiri analizoi zhvillimet e fundit politike në PD, duke theksuar se Berisha ka qenë gjithmonë në qendër të vendimmarrjes, edhe kur formalisht nuk ka qenë në krye të partisë.
Sipas tij, Berisha ka ndërtuar një model të qëndrueshëm kontrolli personal mbi strukturat e PD-së dhe nuk ka treguar asnjë shenjë vullneti për t’u tërhequr nga skena politike, madje edhe në kushtet kur, sipas statutit të vetë partisë, ai konsiderohet i shkarkuar.
“Berisha ka qenë dhe do që të jetë i përjetshëm edhe kur vendosi Bashën kryetar ka qenë gjithmonë pas perdes. Berisha po tregohet qartë që është një lider që nuk pranon që të ikë nga politika në asnjë mënyrë, ai pranon të jetë edhe kur shkatërron partinë e vet. Nuk mund të ketë nen statuti që e largon, kur nuk e largojnë kushtet reale, nuk ka nen që e largon.”
Mërtiri solli në vëmendje edhe paradokset në qëndrimet e Berishës, të cilat sipas tij ndryshojnë në varësi të rrethanave politike, si dhe mungesën e reformës dhe modernizimit në parti për gati katër dekada. Ai theksoi se Partia Demokratike sot ndodhet në një krizë të thellë identiteti dhe funksionaliteti, pikërisht për shkak të qëndrimit të gjatë të një lideri të vetëm në krye.
“Statuti u fut në vitin 2021 kur futi Lulzim Bashën, dhe këtë gjë e tha me idenë që lideri i ardhshëm të mos ankohej për vjedhjen e zgjedhjeve, kurse tani që është vetë thotë që Bashës nuk ia vodhën dhe mua mi vodhën. Berisha nuk largohet edhe sikur zgjedhjet të ishin më të mirat që janë bërë ndonjëherë. Këto janë thjeshte sebepe, sepse statuti e thotë qartë. Praktikisht sot Berisha është i shkarkuar sipas statutit. Berisha në 35 vite ka thënë që do e modernizojë partinë dhe këtë gjë nuk e ka bërë në 35 vite. Kjo është sindroma e një lideri që nuk ndryshon, ndërkohë që gjërat dhe koha ka ndryshuar. Këtu tregon që kjo parti ka një problem të madh reformimi, dhe sigurisht që nuk mund të reformohet kur mban për 35 vite të njëjtin lider. Kjo parti është zhytur në një pikë ku pikësëpari ka humbur arsyen.”
Në vijim, analisti trajtoi edhe tendencën e Berishës për të etiketuar si “armiq” apo “të shitur” çdo figurë që del jashtë rrethit të tij të ngushtë, përfshirë edhe persona apo institucione që në të kaluarën kanë qenë në favor të Partisë Demokratike. Si shembull, Mërtiri përmendi kryetarin e KQZ-së, Ilirjan Celibashi, për të cilin tha se ka marrë disa vendime që kanë përmbushur kërkesat e PD-së, por që gjithsesi është bërë objekt sulmesh nga Berisha.
“Berisha bën atë që ka bërë gjithmonë, akuzon këdo që i del përpara, këdo që nuk është në oborrin e tij dhe e konsideron të shitur. Në fakt Celibashi më shumë ka qenë në krah të PD, në çdo vendim që ka marrë. Celibashi hoqi votimin elektronik vetëm se e kërkoi PD. Po, Berisha këtë gjë ka bërë gjithmonë, ka sulmuar gjithmonë ata që i kanë shërbyer.”/abcnews.al
Në nder të ditëlindjes së 12-të të Princit George, Pallati Kensington ka publikuar një fotografi të re të tij, ku ai shfaqet me një buzëqeshje të ngrohtë.
Portreti, i realizuar më herët gjatë vitit nga fotografi Josh Shinner, është shpërndarë në rrjetet sociale, i shoqëruar me një urim të shkurtër dhe të ëmbël nga prindërit e tij, Princi dhe Princesha e Uellsit: “Gëzuar 12-vjetorin princ George!”
Si djali i madh i çiftit mbretëror dhe i dyti në linjën e trashëgimisë për fronin britanik, George vazhdon të jetë në qendër të vëmendjes publike që në fëmijërinë e hershme.
Së fundmi janë shtuar spekulimet për të ardhmen e tij arsimore, sidomos lidhur me mundësinë që ai të ndjekë gjurmët e të atit duke u regjistruar në Eton College, një shkollë private prestigjioze ku pranimet zakonisht bëhen në moshën 13-vjeçare.
Princi William dhe Princesha Catherine kanë qenë gjithnjë të kujdesshëm për t’i ofruar fëmijëve të tyre, përfshirë George-in, një jetë sa më të zakonshme në shtëpinë familjare në Adelaide Cottage. Megjithatë, roli i tij në familjen mbretërore ka qenë i pranishëm që në moshë të vogël.
George është shfaqur rregullisht në ngjarje publike, përfshirë kampionatin e tenisit në Wimbledon dhe paradën tradicionale Trooping the Colour. Gjatë festimeve të 80-vjetorit të Ditës së Fitores në Evropë, ai pati mundësinë të takonte veteranë lufte në një festë çaji, duke dëgjuar personalisht rrëfimet e tyre.
Ndërkohë, pasioni i tij për futbollin mbetet i qartë, pasi shpesh është parë duke ndjekur ndeshjet e ekipit të Aston Villa përkrah babait të tij./abcnews.al
ChatGPT merr 2.5 miliardë kërkesa nga përdoruesit globalë çdo ditë, tha OpenAI.
Rreth 330 milionë prej tyre vijnë nga përdorues në SHBA, shkruajnë mediat e huaja, përcjell Telegrafi. Këto shifra tregojnë se sa i kudondodhur po bëhet produkti kryesor i OpenAI.
Kompania mëmë e Google, Alphabet, nuk publikon të dhëna të përditshme kërkimi, por kohët e fundit zbuloi se Google merr 5 trilionë kërkesa në vit, që mesatarisht është pak më pak se 14 miliardë kërkime ditore.
Hulumtuesit e pavarur kanë gjetur trende të ngjashme.
Neil Patel i NP Digital vlerëson se Google merr 13.7 miliardë kërkime çdo ditë, ndërsa hulumtimi nga SparkToro dhe Datos – dy kompani të marketingut dixhital – vlerëson se shifra është rreth 16.4 miliardë në ditë.
Megjithatë, ChatGPT ka treguar një rritje mbresëlënëse të shpejtë. Në dhjetor, CEO i OpenAI, Sam Altman, tha se përdoruesit dërgojnë mbi 1 miliard kërkesa në ChatGPT çdo ditë.
Sipas fjalëve të Altman, vëllimi i kërkimit të kompanisë është më shumë se dyfishuar në rreth tetë muaj.
Coca-Cola konfirmoi të martën se do të lansojë një Coca-Cola të re të bërë me sheqer kallami, shkruan CNN.
Njoftimi vjen pas një postimi në mediat sociale nga presidenti Donald Trump javën e kaluar, në të cilin ai pretendoi se e bindi kompaninë të zëvendësonte shurupin e misrit me fruktozë të lartë, transmeton Telegrafi.
Kompania zbuloi në raportin e saj të të ardhurave se, si “pjesë e agjendës së saj të vazhdueshme të inovacionit”, do të lansojë në vjeshtë një “ofertë të bërë me sheqer kallami amerikan” si pjesë të gamës së produkteve të saj.
Disa versione të Coca-Cola-s tashmë përdorin sheqer kallami, përfshirë Coca-Cola-n e shitur në Meksikë.
“Kjo shtesë është projektuar për të plotësuar portofolin e fortë kryesor të kompanisë dhe për të ofruar më shumë zgjedhje në raste dhe preferenca”, tha Coca-Cola në një deklaratë.
Kompania mund të zbulojë më shumë detaje mbi takimin e saj të të ardhurave me analistët e Wall Street më vonë këtë mëngjes.
Javën e kaluar, Trump tha se Coca-Cola kishte “rënë dakord” të përdorte sheqer kallami në pijet e saj.
Por njoftimi i së martës zbulon se receta kryesore e Coca-Cola-s nuk po ndryshon dhe do të vazhdojë të përdorë shurup misri me fruktozë të lartë.
Në vend të kësaj, kompania do të krijojë një produkt të veçantë Coca-Cola që përfshin sheqer kallami.
Coca-Cola e prodhuar në Amerikë është bërë me shurup misri me fruktozë të lartë, një përbërës kundër të cilit sekretari i Shëndetit dhe Shërbimeve Njerëzore i Trump, Robert F. Kennedy Jr, ka mbrojtur me forcë.
Kennedy, i cili ka udhëhequr nismën për të hequr shumë përbërës artificialë dhe shumë të përpunuar nga ushqimet amerikane, e ka quajtur shurupin e misrit me fruktozë të lartë një “formulë për t’ju bërë obezë dhe diabetikë” në një episod të shtatorit të podkastit të mjeku Jordan Peterson.
Shurupi i misrit është një ëmbëlsues i zakonshëm dhe i lirë, prandaj Coca-Cola bëri ndërrimin shumë vite më parë. Por pija e mbushur me sheqer nuk është e shëndetshme, thonë ekspertët e shëndetit edhe nëse është bërë me sheqer kallami në vend të shurupit të misrit.
Prokuroria e Posaçme ka dërguar për gjykim 29 të pandehur mes të cilëve, pedagogë, staf akademik dhe biznesmenë, qe akuzohen si te përfshirë në abuzime me tenderat në Universitetin Bujqësor të Tiranës.
Gjatë një hetimi të zgjeruar, janë evidentuar shkelje të rënda ligjore nga disa përfaqësues të stafit akademik dhe drejtues të Universitetit Bujqësor të Tiranës (UBT). Të pandehurit Romina Koto dhe Ilir Kapaj, në detyrën e zëvendës/rektorit, si dhe Bejo Bizhga, përgjegjës i Departamentit të Moduleve Paraklinike, dyshohen për përfshirje në ideimin fiktiv të projekteve dhe sigurimin e fondeve publike pranë Agjencisë Kombëtare për Kërkimin Shkencor dhe Inovacionin (AKKSHI).
Në këtë skemë është përfshirë edhe administratori i UBT-së, Edmond Tërthorja, i cili, sipas hetimit, ka bashkëpunuar në mënyrë të paligjshme me personat e sipërpërmendur për të favorizuar operatorë ekonomikë përmes përgatitjes së specifikimeve të personalizuara për tenderat, të hartuara nga vetë subjektet fituese.
Pas sigurimit të fondeve nga AKKSHI, janë konstatuar veprime të paligjshme në procedurat e prokurimit, ku komisionet përkatëse për përllogaritjen e fondit limit, përgatitjen e specifikimeve teknike dhe vlerësimin e ofertave kanë bashkëpunuar ngushtësisht dhe jashtë çdo kuadri ligjor me njësinë e prokurimit, duke deformuar garën dhe transparencën e proceseve.
Prokuroria e Posaçme kundër Korrupsionit dhe Krimit të Organizuar paraqiti sot (22.07.2025) kërkesën për gjykim të procedimit penal nr.13/1 të vitit 2022 (i ndarë nga procedimi penal nr.13 të vitit 2022), në ngarkim të 27 personave, zyrtarë të Univeristetit Bujqësor të Tiranës (UBT) dhe dy personave, përfaqësues të operatorit ekonomik “Krijon” sh.p.k.
Në kuadër të këtij procedimi penal janë hetuar 9 (nëntë) procedura prokurimi të zhvilluara në vitin 2022, me një vlerë të fondit limit 90.000.000 (nëntëdhjetë milionë) lekë.
Hetimet proaktive janë zhvilluar me metoda speciale, të cilat përfshijnë përgjimin e bisedave telefonike të zyrtarëve të UBT, vëzhgime dhe administrimin e dokumentacionit të procedurave të prokurimit me autoritet kontraktor, UBT.
Gjatë Hetimit janë evidentuar shkelje ligjore të personave përgjegjës të stafit akademik në UBT, të pandehurit: Romina Koto dhe Ilir Kapaj në detyrën e zëvendës/rektorit, Bejo Bizhga, me detyrë Përgjegjës i Departamentit të Moduleve Paraklinike, që konsistojnë në ideimin e projekteve dhe sigurimin e fondeve pranë Agjencisë Kombëtare për Kërkimin Shkencor dhe Inovacionin (AKKSHI), si edhe veprime të kundraligjshme të kryera në bashkëpunim me titullarin e autoritetit kontraktor, të pandehurin Edmond Tërthorja, me detyrë Administrator i UBT-së.
Këta persona kanë përgatitur të dhëna fiktive të projekteve, me specifikime të përgatitura nga vetë operatorët ekonomik konkurrues dhe fitues në këto procedura prokurimi. Pas sigurimit të fondeve nga AKKSHI, kanë vijuar veprimet e kundraligjshme të autoritetit kontraktor, në fazën e përgatitjes dhe kryerjes së procedurave të prokurimit. Komisioni që përllogariti fondin limit dhe përgatiti specifikimet teknike ka bashkëpunuar në mënyrë të vazhdueshme dhe të paligjshme me njësinë e prokurimit dhe komisionin e vlerësimit të ofertave.
Gjatë hetimit janë evidentuar shkelje ligjore të anëtarëve të njësisë së prokurimit dhe komisionit të vlerësimit të ofertave nga të pandehurit: Amarildo Lleshi, Mehmet Qoshja, Altin Murto, Enkeleida Sallaku, Klara Jahollari, Agim Sefa, Arjan Buliqi, Serafin Skënderi, Ilir Kusi, Dritan Laçi, Azem Parllaku, Artur Koleci, Radion Dhromi, Blenard Spaho, Tedi Proda, Erjola Kopali, Klea Lekoçaj, Etleva Shore, Mimoza Shehu, Elvira Shtogu, Tone Vukaj, në bashkëpunim me titullarin e autoritetit kontraktor, të pandehurin, Edmond Tërthorja, të cilët kanë krijuar kushte dhe favorizuar shpalljen fitues të operatorëve ekonomikë “Krijon”sh.p.k, “Zero Group” sh.p.k, “Malvina Visoka PF”.
Gjatë hetimit rezultoi se të dhënat e përgatitjes së fondit limit, specifikimet teknike, termat e referencës, si dhe hartimi i dokumenteve standarde të tenderit, janë bërë nga zyrtarët përgjegjës të autoritetit kontraktor, në bashkëpunim me operatorët ekonomikë fitues “Krijon”sh.p.k, “Zero Group”sh.p.k, dhe “Malvina Visoka PF”.
Në të gjitha procedurat e prokurimit të mësipërm, operatorët ekonomikë fitues, “Krijon”sh.p.k, “Zero Group”sh.p.k, dhe “Malvina Visoka PF”, kanë siguruar oferta ekonomike të falsifikuara, në emër të shoqërive tregtare të tjera, që janë përdorur nga autoriteti kontraktor dhe kanë ndikuar në fryrjen e fondit limit, pa kryer asnjë studim tregu.
Janë evidentuar raste të kryerjes së procedurës së prokurimit me operator eknomik të paracaktuar fitues, për pajisje me mallra të tjera, të vëna në dispozicion të autoritetit kontraktor disa muaj para shpalljes së procedurave të prokurimit, (procedura prokurimi të zhvilluara pas administrimit më parë të këtyre paisjeve, për të cilat më pas, janë kryer procedurat fiktive të prokurimit dhe marrje e tyre në dorëzim).
Prokuroria e Posaçme kundër Korrupsionit dhe Krimit të Organizuar po kryen hetime të në kuadër të procedimit penal nr.13 të vitit 2022, për të evidentuar çdo fakt tjetër penal, përgjegjësinë e çdo personi tjetër, që ka vepruar me dokumentacionin e këtyre procedurave të prokurimit, si dhe fakte të tjera penale në kuadër të këtij procedimi penal.
Qeveria britanike ka njoftuar të hënën një marrëveshje strategjike me OpenAI – kompania që qëndron pas ChatGPT – për të përforcuar bashkëpunimin në kërkimin mbi sigurinë e inteligjencës artificiale (AI) dhe për të eksploruar mundësi investimi në infrastrukturën teknologjike të Mbretërisë së Bashkuar, përfshirë qendrat e të dhënave.
“Inteligjenca artificiale do të jetë vendimtare për transformimet që synojmë në të gjithë vendin – qoftë në shëndetësi, në krijimin e mundësive të reja apo në nxitjen e rritjes ekonomike,” deklaroi Sekretari i Shtetit për Teknologjinë, Peter Kyle. Ai shtoi se roli i kompanive si OpenAI është thelbësor për ta bërë këtë realitet, dhe se ky partneritet do të krijojë më shumë hapësira për zhvillimin e punës kërkimore të OpenAI në Britani.
Marrëveshja vjen në një moment kur Britania synon të zërë një vend qendror në fushën e AI-së, përballë konkurrencës në rritje nga SHBA, Kina dhe India – vende që po udhëheqin zhvillimin teknologjik dhe po rrisin presionin ndaj vendeve evropiane për të mos mbetur prapa.
Qeveria britanike ka premtuar një investim prej 1 miliard funte për të përmirësuar kapacitetet kompjuterike në shërbim të zhvillimit të inteligjencës artificiale. Objektivi është që, brenda pesë viteve të ardhshme, kapaciteti publik për përpunimin e të dhënave të rritet 20 herë.
Partneriteti me OpenAI, e cila bashkëpunon ngushtë me Microsoft – një lidhje që më parë ka tërhequr vëmendjen e autoritetit britanik të konkurrencës – pritet të përfshijë zgjerimin e pranisë së saj në Londër dhe angazhimin në fusha të ndjeshme si drejtësia, mbrojtja, siguria kombëtare dhe arsimi.
Drejtuesi i OpenAI, Sam Altman, në të njëjtën deklaratë vlerësoi qeverinë britanike për qasjen e saj proaktive, duke theksuar se ishte ndër të parat që njohu rëndësinë strategjike të AI-së përmes “Planit të Veprimit për Mundësitë e AI-së” – një iniciativë e promovuar nga Kryeministri Keir Starmer me synimin për ta kthyer Britaninë në një superfuqi të AI-së.
Teknologjia, sipas qeverisë laburiste, përfaqëson një mjet kyç për të rritur produktivitetin ekonomik në një periudhë ku ekonomia nuk ka arritur ende stabilitetin e dëshiruar. Sipas vlerësimeve zyrtare, AI mund të rrisë produktivitetin me 1.5% çdo vit – një përmirësim që përkthehet në 47 miliardë paund shtesë për ekonominë britanike çdo vit gjatë një dekade./abcnews.al
Izraeli ka intensifikuar sulmet në Rripin e Gazës, duke ndërmarrë një ofensivë të re ajrore dhe tokësore që përfshin qytetin Deir al-Balah – një nga zonat e fundit të mbetura si qendër e ndihmës humanitare për popullsinë palestineze në krizë të thellë.
Sipas The Guardian, ky sulm vjen menjëherë pas një prej ditëve më vdekjeprurëse të luftës 21-mujore, gjatë së cilës të paktën 85 palestinezë u vranë të dielën teksa përpiqeshin të siguronin ushqim. Incidenti është përshkruar si një tjetër episod tragjik në një konflikt që po shndërrohet në një kasaphanë të përditshme.
Agjencia Botërore e Ushqimit (WFP), një organ i OKB-së, bëri të ditur se shumica e viktimave ishin të mbledhur pranë gardhit kufitar me Izraelin, ku prisnin shpërndarjen e miellit nga një autokolonë humanitare. Ata u qëlluan nga tanket dhe snajperët izraelitë, sipas raportimeve nga terreni.
Përgjigja ndërkombëtare ndaj këtyre ngjarjeve ka qenë e ashpër. Të hënën, Britania dhe 24 shtete të tjera publikuan një letër të përbashkët, duke dënuar vrasjen e qindra civilëve që kërkonin ndihmë dhe duke kërkuar ndalimin e menjëhershëm të konfliktit.
“Është tronditëse që mbi 800 palestinezë janë vrarë gjatë përpjekjeve për të marrë ndihma humanitare. Refuzimi i ndihmës thelbësore nga qeveria izraelite për popullsinë civile është i papranueshëm. Izraeli duhet të respektojë detyrimet që i imponon e drejta ndërkombëtare humanitare,” thuhet në deklaratë.
Dëshmitarë në Gaza kanë raportuar për bombardime të mëdha ajrore gjatë natës në Deir al-Balah – një qytet që deri tani kishte shpëtuar nga përplasjet më të ashpra të luftës dhe që ishte kthyer në strehë për mijëra palestinezë të zhvendosur.
Sipas The Guardian, ushtria izraelite më parë kishte shmangur ndërhyrjen tokësore në këtë zonë për shkak të dyshimeve se grupi Hamas mund të mbajë atje disa nga pengjet izraelite. Vlerësohet se rreth 20 nga afërsisht 50 pengjet ende të mbetura në Gaza janë gjallë.
Përkundër këtyre shqetësimeve dhe raporteve të mediave izraelite që sugjeronin se Hamasi mund të ishte pranë një marrëveshjeje armëpushimi, ofensiva e re u nis. Ajo u shoqërua me urdhra për evakuimin e detyruar të 50 deri në 80 mijë njerëzve nga Deir al-Balah, duke lënë rreth 88% të territorit të Gazës nën urdhra largimi./abcnews.al
Një gabim i vetëm, një fjalëkalim i pambrojtur, dyshohet se është bërë shkaku i shkatërrimit të një kompanie britanike me një histori prej 158 vitesh, duke lënë pas 700 punonjës të papunë.
Sipas një raportimi nga BBC, kompania e transportit KNP, me qendër në Northamptonshire, është një prej mijëra bizneseve në Mbretërinë e Bashkuar që kanë rënë pre e sulmeve gjithnjë e më të shpeshta kibernetike.
Në muajt e fundit, edhe emra të mëdhenj si M&S, Co-op dhe Harrods janë bërë objekt i këtyre sulmeve. Madje, drejtuesi i Co-op ka pranuar publikisht se të dhënat personale të 6.5 milionë anëtarëve të kompanisë janë komprometuar.
Në rastin e KNP-së, mendohet se hakerët kanë hyrë në sistemin informatik përmes një fjalëkalimi të thjeshtë që i përkiste një punonjësi. Pasi siguruan qasjen, ata kriptuan të dhënat dhe paralizuan gjithë funksionimin e brendshëm të kompanisë.
Drejtori i KNP-së, Paul Abbott, ka treguar se nuk i ka zbuluar punonjësit faktin që fjalëkalimi i tij mund të ketë sjellë fundin e kompanisë. “A do të doje ta dije nëse ishe ti ai shkaktar?”, pyet ai retorikisht.
Richard Horne, drejtori i Qendrës Kombëtare për Siguri Kibernetike në Britani, thekson nevojën urgjente që organizatat të marrin masa serioze për të mbrojtur sistemet e tyre, duke theksuar se sulmet ransomware janë bërë një rrezik i përditshëm.
Në vitin 2023, KNP operonte me rreth 500 mjete transporti, shumica nën markën Knights of Old. Kompania pretendon se kishte sisteme IT të përshtatura me standardet e industrisë, si dhe sigurim kundër sulmeve kibernetike. Por edhe kjo nuk mjaftoi.
Grupi i njohur kriminal “Akira” arriti të depërtonte në sistem. Pas sulmit, punonjësit humbën qasjen në të gjitha të dhënat kritike për funksionimin ditor. Hakerët kërkuan një pagesë për rikthimin e informacionit, megjithëse nuk dhanë një shumë të saktë. Një kompani ndërmjetëse që merret me negociata të këtij lloji, vlerësoi se kërkesa mund të arrinte deri në 5 milionë paund.
KNP nuk kishte mundësinë ta përballonte këtë shumë. Për pasojë, të dhënat nuk u rikthyen dhe kompania shpalli falimentimin.
Rasti i KNP-së është një shembull tronditës se si një neglizhencë e vogël në sigurinë digjitale mund të ketë pasoja shkatërruese. Ekspertët britanikë paralajmërojnë se vetëm masa të rrepta sigurie dhe edukim i vazhdueshëm i punonjësve mund të ndalojnë përhapjen e kësaj vale sulmesh që po godet rëndë bizneset dhe qytetarët në të gjithë vendin./abcnews.al
Koalicioni qeverisës në Japoni ka humbur shumicën në Dhomën e Lartë të Parlamentit, por kryeministri Shigeru Ishiba ka bërë të qartë se nuk ka ndërmend të dorëhiqet nga detyra, pavarësisht rezultatit të pafavorshëm.
Zgjedhjet e zhvilluara të dielën u mbajtën në një klimë të shtuar pakënaqësie publike, të nxitur nga rritja e kostos së jetesës dhe tensionet në rritje në marrëdhëniet tregtare me Shtetet e Bashkuara.
Pas përfundimit të procesit të votimit, kryeministri Ishiba pranoi se rezultati ishte “i ashpër” dhe “i rëndë”, por nënvizoi se qeveria e tij do të vijojë punën për përmirësimin e kushteve ekonomike dhe avancimin e negociatave tregtare.
Koalicioni i përbërë nga Partia Liberale Demokratike (LDP) dhe partnerja e saj, Komeito, kishte nevojë për të paktën 50 mandate për të ruajtur shumicën në dhomën me 248 vende. Në fund të procesit zgjedhor, arriti të siguronte vetëm 47 vende.
Ndërkohë, Partia Demokratike Kushtetuese, opozita kryesore, fitoi 22 mandate, duke u renditur si forca e dytë më e madhe politike në këto zgjedhje.
Në këtë proces u votua për gjysmën e vendeve në Dhomën e Lartë, anëtarët e së cilës zgjidhen për mandate gjashtëvjeçare. Humbja e fundit për koalicionin qeverisës vjen pas një tjetër disfate të rëndësishme në vitin e kaluar, kur humbi kontrollin edhe në Dhomën e Ulët, gjë që pritet të ndikojë ndjeshëm në axhendën legjislative të qeverisë./abcnews.al
Izraeli e ka lansuar një ofensivë të re ushtarake në Rripin e Gazës, duke synuar t’i lirojë pengjet e mbajtura në qytetin Deir al-Balah. Si pasojë e përshkallëzimit të luftës, të paktën 130 palestinezë mbeten të vdekur gjatë 24 orëve të fundit, ndërsa gjendja humanitare lë shumë për të dëshiruar.
Ushtria izraelite ka ndërmarrë sulme të mëdha ajrore dhe një operacion tokësor në Rripin e Gazës, duke i shënjestruar lagjet në qytetin Deir al-Balah, qendra kryesore e përpjekjeve humanitare në territorin e shkatërruar palestinez, mes paralajmërimeve në rritje për krizën e urisë.
Tanket hynë për herë të parë në zonat jugore dhe lindore të qytetit, një pjesë ku burimet izraelite kanë pretenduar se mund të ndodhen disa nga pengjet e mbajtura. Operacionet më të fundit po ndodhin një ditë pas numrit më të lartë të viktimave në 21 muajt e luftës, ku të paktën 85 palestinezë që po prisnin për ndihmat ushqimore, u vranë të dielën nga Ushtria Izraelite.
Dëshmitari okular, Ehab Al-Zein, e ka përshkruar tmerrin e ditës së djeshme, duke pretenduar se popullata civile ishte e rrethuar nga tanket për më shumë se një orë.
“Po prisnim për miell, sepse ishim të uritur. Donim të hanim e të pinim. Papritur dolën tanket, na rrethuan. Filluan të qëllonin mbi ne dhe nuk mundëm të lëviznim. Nuk arritëm ta marrim miellin dhe mbetëm të rrethuar për rreth një orë e gjysmë, deri në dy orë. Disa arritën të shpëtonin, disa u vranë dhe të tjerë u plagosën. Siç mund ta shihni, kjo është gjendja jonë”, ka deklaruar Al-Zein.
E Rachael Cummings, drejtoreshë humanitare në Gazë, nga radhët e Organizatës “Save the Children”, e ka vlerësuar situatën në enklavën palestineze si jashtëzakonisht të rëndë. Ajo ka theksuar se palestinezët nuk kanë zgjidhje tjetër, përpos se t’i rrezikojnë jetët e tyre, në mënyrë që t’i marrin pakot ushqimore.
“Situata këtu është jashtëzakonisht e rëndë. Ekipi im më tha sot se situata në Gazë nuk ka qenë kurrë kaq e keqe. Ata janë në krizë të urisë. Fëmijët qajnë vazhdimisht për ushqim. Pra, situata është absolutisht e tmerrshme dhe njerëzit po bëjnë zgjedhje të pamundura, duke e rrezikuar jetën për të provuar të gjejnë ushqim”, është shprehur Rachael Cummings
Ministria e Shëndetësisë, e kontrolluar nga Hamasi, ka njoftuar se vetëm në 24 orët e fundit kanë mbetur të vdekur të paktën 130 persona. Sipas shifrave të kësaj ministrie në Gazë, bilanci total i palestinezëve të vdekur që kur lufta nisi më 7 tetor të vitit 2023, ka shkuar në mbi 59 mijë.
Mes tjerash, negociatat midis Izraelit dhe grupit militant Hamas në Katar rreth armëpushimit të ri në Rripin e Gazës dhe një marrëveshjeje për lirimin e pengjeve, kanë ngecur pas disa javësh bisedime indirekte. Izraeli dëshiron me patjetër t’i kthejë të gjitha pengjet që mbahen në Gazë nga Hamasi, që prej fillimit të luftës.
50 pengje janë ende në robëri, prej të cilëve deri në 20 besohet se janë ende gjallë.
Pas publikimit të lajmit për vizitën e modeles nga Kosova, Ziza Pajaziti, në qelinë e të dënuarit me burgim të përjetshëm Laert Haxhiu në burgun e Drenovës, ka reaguar në emisionin “Real Story” në ABC News zëvendësdrejtori i Përgjithshëm i Burgjeve, Femi Sufaj.
Ai konfirmoi se ka pasur shkelje të rregullave të brendshme të takimeve me të burgosurit, çka ka sjellë pezullimin e gjashtë oficerëve të sigurisë dhe lirimin nga detyra të drejtorit të institucionit.
Sipas Sufajt, ky është një rast i izoluar, por ka nxitur një inspektim të gjerë në të gjitha burgjet e vendit për të parandaluar përsëritjen e ngjarjeve të ngjashme. Ai theksoi se ngjarja nuk përfaqëson realitetin e përgjithshëm të sistemit të burgjeve në Shqipëri.
“Nuk është sekret se është bërë publike, sepse ka pasur shkelje të rregullave të takimit të të burgosurve. Nuk është kjo panorama e burgjeve. Ka pasur shkeljeve të rregullave që kanë çuar në pezullimin e gjashtë oficerëve. Ky incident, që është kapur nga strukturat tona si shkelje dhe është informuar edhe publiku. Ka pasur një shkelje të rregullave të vizitave. Është bërë një inspektim zinxhir në të gjithë republikën, nëse mund të ishte një rast i përsëritur. Nuk është një incident me pasoja. Në këtë rast duhet të ishin bërë vizita të planifikuara. Drejtori që u lirua, vetëm për shkak të mungesës së planifikimit”, tha zëvendësdrejtori i Përgjithshëm i Burgjeve, Femi Sufaj./abcnews.al
Kryeministri Edi Rama ka paralajmëruar masa të reja ligjore për mbrojtjen e hapësirave të përbashkëta në qytetet shqiptare, duke theksuar se prona private nuk mund të cënojë interesin kolektiv.
Gjatë fjalës së tij me deputetët dhe drejtuesit e bashkive, Rama tha se do të prapakthehen të gjitha dokumentet që legalizojnë ndërhyrje në mjediset e përbashkëta, duke i cilësuar ato si abuzime që cenojnë të drejtën e komunitetit.
Ai theksoi se ndonëse prona ka karakter individual, në zonat urbane ajo merr edhe një funksion shoqëror, dhe çdo shkelje në këtë drejtim do të përballet me forcën më të ashpër të ligjit. Kryeministri shtoi se nuk synohet dëmtimi i biznesit, por vendosja e një rendi të ri komunitar që garanton të drejtën e qytetarëve për hapësira të lira dhe të përbashkëta.
“Çdo mjedis i përbashkët është një mjedis i përbashkët i të gjithëve dhe në këtë pikë lind nevoja që të marrim një masë ligjore për të prapakthyer të gjitha dokumentet që rezultojnë në shkelje të këtij parimi dhe në shkelje të të gjithë këtyre komuniteteve. Nuk mundet dot dikush me një dokument të prodhuar më parë dhe të thotë që e kam këtë lokalin bashkë me këtë çatinë ndërkohë që atje është në fakt në një pronë nga e cila e ka humbur të drejtën, sepse ka marrë të drejta të tjera nga pallati që është ndërtuar.
Prona ka karakter individual, por ka dhe karakter social kur është fjala në një hapësirë ku jetojnë shoqëria, për këtë arsye e gjithë përpjekja jonë do të jetë që të ndërtojmë një frymë të re dhe një rend të ri komunitar në të gjitha qytetet tona. Të gjithë ata që do i bien ndesh jo qeverisë, as bashkisë, ne jemi më të dobëtit në këtë anë, por do i bien desh të drejtës së fortë dhe të patundshme të komunitetit dhe të familjeve që kanë vendosur që të jetojnë në një pellg komunitar së bashku do të përballen me forcën më të ashpër të mundshme të ligjit dhe të shtetit.
E vërteta është që një pjesë jo e vogël e ka kuptuar dhe është përfshirë vetë në çmontimin e këtyre ngrehinave dhe i falënderoj. Patjetër që ne nuk jemi këtu për të fshirë nga dheu biznesin, nuk jemi këtu për të dëmtuar askënd, nuk jemi këtu për ta kthyer Tiranën në Teheran. Ky është kryeqyteti i Mesdheut, është vend mesdhetar, qëndrimi i njerëzve jashtëm, tavolinat, karriget e shumë të tjera janë gjëja më normale, por jo kur zënë vendin ku kalojnë njerëzit”, tha kryeministri Rama./abcnews.al
Kryeministri Edi Rama ka paralajmëruar masa të reja të forta në sektorin e ndërtimit dhe të sigurimeve, gjatë një mbledhjeje me deputetët e Tiranës dhe drejtues të bashkisë.
Ai tha se pas tërmetit janë bërë ndërhyrje të arsyeshme, por ka pasur devijime serioze, përfshirë edhe nga noterët.
Rama njoftoi se do të ndërmerren masa për rregullimin e sistemit të sigurimeve, përfshirë dhe garantimin bankar për lejet e ndërtimit, si dhe konfiskimin e objekteve të braktisura apo ndërtimeve problematike që datojnë që nga vitet ’90.
Ai paralajmëroi gjithashtu se çdo tejkalim mbi 2% të lejes së ndërtimit do të çojë në sekuestrim të menjëhershëm të objektit.
“Ne kemi bërë disa ndërhyrje të arsyeshme pas tërmetit, por gjithsesi ka pasur shumë devijime në disa kategori, përfshirë edhe noterët. Për këtë arsye do e adresojmë edhe problematikën e sigurimeve jo vetëm për tërmetet. Dhe bashkë me sigurimin jemi duke siguruar edhe një garanci bankare për të gjithë ata që marrin një leje drejtimi. Nga ana tjetër do të marrim një tjetër masë për të konfiskuar në interes të publikut të gjitha ndërtimet e braktisura dhe ndërtimet që nga vitet ‘90 që qëndrojnë si karakatina dhe që kanë problematika të natyrës mjedisore dhe të shëndetit të njerëzve. Kur vjen puna për shkeljen e lejes së ndërtimit mbi 2% mbi lejen e ndërtimit, atëherë kjo do të prodhojë sekuestrim të menjëherë të të gjithë ndërtimit. Paligjshmëria është e plotë, nuk është e pjesshme, bëhen me muaj dhe me vite nga njëherë janë me vetëdije të plotë ndaj ligjit”, tha kryeministri Rama./abcnews.al
Login