TIRANË, 7 gusht /ATSH/ Kryetari i Partisë Demokratike Sali Berisha në një deklaratë për mediat denoncoi sërish atë që e cilëson si “farsën elektorale të zgjedhjeve parlamentare të 11 majit”.

Berisha tha se qeveria përdori gjysmë miliardi euro për aktivitete që të ndikonte tek qytetarët.

“Njëri nga aspektet më kriminale të farsës elektorale 11 maj 2025, ishte përdorimi i ngjarjeve, prokurimeve të cilat tejkalojnë mbi gjysmë miliardi euro për qëllime elektorale për të ndikuar votën e qytetarëve shqiptarë.

“Në periudhën janar gjer në 11 Maj, periudhë në të cilën ligji elektoral, neni 91/3 i tij ndalon prokurimet, ndalon ngjarjet, aktivitetet, organizimin e tyre, aktivitetet që mund të kenë ndikim në zgjedhje dhe sipas raportit të OSBE-ODIHR, pikërisht në këtë periudhë u organizuan 4500 veprimtari kombëtarë dhe ndërkombëtare, përfshirë ‘Giro d’Italia’, 7 milionë euro një organizate private ditën e votimit dhe një ditë para zgjedhjeve”, tha Berisha.

Berisha tha më tej se bashkitë e vendit kanë prokuroruar tërësisht për qëllime elektorale në total 57 milionë euro.

Sipas Berishës nga këto “rreth 14 milionë para xhepi të themi, blerje të përqendruara. 32 milionë bashkitë të ndryshme dhe Fondi shqiptar i grabitjes apo plaçkitjes, apo i zhvillimit siç quhet, ka përdorur për qëllime elektorale 10 milionë  euro”.

Kreu i PD-së akuzoi edhe drejtuesin e Prokurorisë së Posaçme, Altin Dumanin si “bashkëfajtor në farsën elektorale”.

“Këtu kemi më poshtë tenderat e bashkive të vendit, të cilat nuk kanë respektuar asnjë ligj, as kushtetutën, por kanë bërë gjithçka që të ndikojnë në elektoratin e tyre në veprimtari kriminale antiligjore dhe për këtë njeriu i dytë më përgjegjës për farsën elektorale Altin Dumani, thotë se nuk kemi të dhëna, fakte dhe prova, sepse për Dumanin ligji është letër e vdekur, dokumentet zyrtare janë letra pa vlerë, mbasi ai është një fanatik i verbër, një avokat i verbër i krimit elektoral të qeverisë dhe bashkëfajtor në farsën elektorale”, tha Berisha.

Berisha gjithashtu publikoi sipas tij rastet e abuzimit me fondet publike si dhe të promovimeve nga qeveria, për përfitime elektorale.

Sipas Berishës u bënë promovime dhe inaugurime në shkelje flagrante të kodit dhe parimeve ndërkombëtare.

/m.q//a.f/

The post Zgjedhjet e 11 majit, Berisha: Qeveria, promovime dhe inaugurime në shkelje flagrante të Kodit appeared first on Agjencia Telegrafike Shqiptare.

TIRANË, 7 gusht /ATSH/ Kryetari i bashkisë së Himarës, Vangjel Tavo bëri të ditur se po përballen me një problem në rritje, për zaptimin e çadrave publike nga qytetarët.

Nëpërmjet një postimi në rrjetet sociale Tavo thekson se pushuesit nuk mund të privatizojnë çadrën, teksa e cilësoi situatën si ta paprecdentë.

“Zgjeruam plazhet publike këtë vit. Për të rritur cilësinë e shërbimit, vendosëm edhe shumë çadra me logon e bashkisë, për të qenë të qartë, se ato mund të përdoren nga kushdo. Shërbim më i mirë, por edhe një mjedis më estetik.

“Por përballemi me një problem në rritje! Pushuesit kërkojnë të kenë çadrat e tyre të sigurta. Kërkojnë të kenë të njëjtën çadër për të gjitha ditët e qëndrimit në plazh. Dhe për këtë gjejnë çdo mënyrë për ta “privatizuar” çadrën”, shkruan Tavo.

Tavo nënvizoi se pasi pushuesit “mbarojnë plazhin, lënë të lidhur në çadra peshqirë, rroba, çanta, qese e sende të tjera. Por jo vetëm kaq. Ata që nuk kanë shumë besim te rrobat, i lidhin shezllongët me çadrën me zinxhirë dhe i kyçin Njësoj siç lidhin biçikletat nëpër pemë”.

“Veprime të paprecedenta këto, të pahasura më parë”, thekson Tavo.

Tavo iu bën thirrje qytetarëve se “çadrat e vendosura nga bashkia janë publike, janë për t’u përdorur nga gjithkush që ka nevojë!”.

“Hapësira publike është e lirë – gjithkush mund të vendosë karrigen apo edhe çadrën e tij”, tha Tavo.

Tavo nënvizoi se po punojmë “për të liruar: plazhet e zëna pa leje, trotuaret dhe hapësirat e tjera publike të zëna pa leje, por nuk do të tolerojmë as “çadrat e zëna””.

/m.q//a.f/

The post Tavo-qytetarëve: Çadrat janë publike, jo pronë private appeared first on Agjencia Telegrafike Shqiptare.

TIRANË, 7 gusht /ATSH/ Inspektorati i Lartë i Drejtësisë (ILD) që nga nisja e funksionimit të tij ka kryer gjithsej 21 inspektime tematike dhe institucionale në gjykata dhe prokurori, përfshirë dhe Strukturën e Posaçme kundër Korrupsionit dhe Krimit të Organizuar (SPAK).

Sipas ILD-së 12 prej inspektimeve kanë përfunduar dhe raportet përkatëse me 118 rekomandime në total.

Gjatë vitit 2024, Zyra e Inspektorit të Lartë të Drejtësisë njoftoi se ka finalizuar 6 inspektime tematike me 54 rekomandime të lëna, konkretisht 9 rekomandime lidhen me marrjen e masave për miratim/nxjerrje aktesh, 29 rekomandime për ndërmarrjen e veprimeve administrative dhe 15 rekomandime për Inspektorin e Lartë të Drejtësisë.

“Inspektimet kanë verifikuar aspekte të punës së gjykatave, administratës gjyqësore, zyrave të prokurorive dhe administratës së prokurorisë, bazuar në planin vjetor të inspektimeve, por edhe në kërkesën e motivuar me shkrim të Këshillit të Lartë Gjyqësor, të Këshillit të Lartë të Prokurorisë, të Ministrit të Drejtësisë dhe të Prokurorit të Përgjithshëm”, njoftoi ILD.

ILD bëri të ditur se “inspektimet e përfunduara kanë pasur për objekt trajtimin e ankesave me objekt “lirimin me kusht”, nga disa gjykata dhe prokurori pranë tyre në 15 gjykata të shkallës së parë në vend dhe 5 ish-gjykata të Apelit, përpara hartës së re gjyqësore, si dhe prokuroritë pranë tyre. Nuk kanë munguar edhe inspektimet mbi respektimin e kushteve dhe kritereve për caktimin e masave të sigurimit personal për veprën penale të “Mbajtjes pa leje dhe prodhimit të armëve, armëve shpërthyese dhe municionit”, i kryer në Prokurorinë pranë Gjykatës së Rrethit Gjyqësor Fier, Shkodër dhe Vlorë, mbi marrjen e masave administrative dhe procedurale të Prokurorit të Përgjithshëm mbi rregullimin e marrëdhënieve mes prokurorëve dhe drejtuesve të prokurorisë, i kryer në prokuroritë pranë gjykatave të shkallës së parë në Durrës, Elbasan, Fier, Korçë, Shkodër, Tiranë, Vlorë dhe të Apelit Durrës, Gjirokastër, Korçë, Shkodër”.

Një tjetër inspektim, ku ka pasur edhe ankesa të qytetarëve, që i janë drejtuar Inspektorit të Lartë të Drejtësisë ka qenë ai për ndarjen e çështjeve me short, si dhe kontrolli i raporteve të sistemit elektronik në gjykata. Ky inspektim njoftoi ILD është kryer në Gjykatën e Lartë dhe në dy shkallët e gjyqësorit për Korrupsionin dhe Krimin e Organizuar, pa përjashtuar edhe disa gjykata të tjera.

“Dy inspektime të tjera të kryera nga Inspektori i Lartë i Drejtësisë kanë pasur për objekt praktikat për shkaqet e zëvendësimit të prokurorëve dhe caktimin e çështjeve në prokurori, inspektime që janë kryer në Elbasan, Shkodër, Tiranë dhe Vlorë. Për caktimin e çështjeve në prokurori, inspektimi përfshiu SPAK, si dhe disa gjykata të vendit. Inspektimet e tjera për të cilat ka raporte përfundimtare kanë qenë mbi procedurën e shpalljes dhe arsyetimit të vendimeve gjyqësore të Gjykatës së Rrethit Gjyqësor Tiranë, Dhomës Civile dhe Gjykatës Administrative të Shkallës së Parë Tiranë, ndarjen e çështjeve me short, si dhe kontrolli i raporteve të sistemit elektronik në gjykata, mbi praktikën dhe shkaqet e zëvendësimit të prokurorëve dhe dokumentimi nga gjyqtarët i informimit të palëve rreth mundësisë për zgjidhjen e çështjes me ndërmjetësim, të cilat janë kryer në disa gjykata dhe prokurori të vendit përfshirë edhe SPAK dhe Gjykatën e Posaçme”, njoftoi ILD.

ILD bëri të ditur se tema të caktuara inspektimesh, si ndarja e çështjeve me short, praktika e caktimit të çështjeve, shkaqeve dhe zëvendësimi i prokurorëve, kohëzgjatja e çështjeve gjyqësore, procedura e shpalljes dhe arsyetimit të vendimeve etj., rimerren edhe në vitet pasardhëse, për të bërë një skanim sa më të mirë të këtyre fenomeneve në sistem.

Inspektimet tematike dhe institucionale janë mekanizmi që bën fotografimin e situatës mbi një tematikë të caktuar e një periudhë të caktuar nëpër gjykata e zyrat e prokurorive.

/m.q//a.f/

The post ILD, 21 inspektime në gjykata e prokurori, përfshirë edhe SPAK appeared first on Agjencia Telegrafike Shqiptare.

TIRANË, 6 gusht /ATSH/ Këngëtarja shqiptare me famë botërore, Dua Lipa, ka zgjedhur jugun e Shqipërisë për të kaluar disa ditë pushimi, pas performancës në festivalin Sunny Hill, që u mbajt në Prishtinë dhe mblodhi yje dhe adhurues të muzikës nga e gjithë bota.

Lajmin e ka bërë të ditur vetë këngëtarja përmes një postimi në llogarinë e saj në Instagram, ku ndau me miliona ndjekës një fotografi mahnitëse të bregdetit shqiptar.

“Arrita në shtëpi me kohë për këtë perëndim të mrekullueshëm të diellit”, shkroi Dua mbi foto duke e quajtur Shqipërinë “shtëpi”.

Në foto shfaqej një peizazh i mrekullueshëm i bregdetit të jugut me ujëra të kristalta dhe një perëndim dielli magjepsës.

Vitet e fundit Dua Lipa ka vizituar shpesh bregdetin e jugut, e shoqëruar edhe nga familjarët e saj, duke promovuar në të gjithë botën, natyrën e mrekullueshme shqiptare.

/m.q//a.f/

The post Pas ‘Sunny Hill’, Dua Lipa shijon pushimet në Shqipëri appeared first on Agjencia Telegrafike Shqiptare.

TIRANË, 6 gusht /ATSH/ Kryetari i Partisë Demokratike Sali Berisha gjatë një konference me gazetarët denoncoi sërish sot atë që e cilëson si “farsën elektorale të zgjedhjeve parlamentare të 11 majit”.

Sipas Berishës qeveria përdori “përdori dhuratën 100 euro për pensionistë, për 760 mijë pensionistë, për të ndikuar për votën e tyre”.

Berisha gjithashtu tha se qeveria bleu vota “duke përdorur pagesat për personat me aftësi ndryshe”.

“Janë përdorur pagesat për personat me aftësi ndryshe në kulmin e fushatës elektorale për të blerë vota. Ka shpërndarë për 164 mijë persona me aftësi ndryshe, dhe për mijëra e mijëra kujdestarë të tyre që në total shkojnë rreth 200 mijë, ka shpërndarë si shpërblim 4 mijë lekë apo 40 euro”, tha Berisha.

Berisha shtoi se në vend që “të ishte ndjekur politika e rritjes së pensioneve, e vendosjes së minimumit jetik, ndiqet praktika e shpërblimit për votë si për pensionistët, ashtu edhe për 200 mijë persona me aftësi të kufizuar dhe kujdestarët e tyre”.

“Dënoj dhe njëherë me forcën më të madhe këtë farsë të shëmtuar zgjedhore dhe deklaroj se PD kurrë nuk do të njohë, nuk do ta pranojë”, tha Berisha.

Berisha u shpreh se “PD do bëjë çdo gjë për të mobilizuar shqiptarët të qëndrojnë për votën e tyre, jo vetëm në Shqipëri, por në të gjithë diasporën”.

“Kemi të bëjmë me një diktaturë autokratike, e cila ka si forcë lëvizëse drogën, krimin dhe vjedhjen e shqiptarëve. Qëndresa e përgjithshme e qytetarëve shqiptarë është rrugëdalja e vetme nga kjo situatë”, tha Berisha.

/m.q//a.f/

The post 11 maji, Berisha: Qeveria bleu vota duke përdorur pagesat për personat me aftësi ndryshe appeared first on Agjencia Telegrafike Shqiptare.

TIRANË, 6 gusht /ATSH/ Policia e Durrësit njoftoi sot se ka finalizuar operacionin “Storm 5”, për goditjen e veprimtarive të kundraligjshme të shfrytëzimit për prostitucion. Në kuadër të këtij operacioni u arrestuan 3 persona si dhe u vunë nën hetim 7 të tjerë.

Policia bëri të ditur se “në lagjen nr. 13, Durrës, u arrestuan shtetaset kineze D. Sh., 54 vjeçe dhe S. Y., 40 vjeçe. Gjithashtu, u arrestua shtetasi S. M., 39 vjeç, banues në lagjen nr. 13, pasi kishte dhënë apartamentet me qira, pa kontrata, dhe i kishte përshtatur ato për shfrytëzim të prostitucionit”.

“Më tej, në kuadër të operacionit, u proceduan në gjendje të lirë, për veprën penale “Prostitucioni”, 2 shtetase kineze dhe 5 shtetas shqiptarë”, njoftoi policia.

Sipas policisë në cilësinë e provës materiale, u sekuestruan pasaporta të shtetaseve kineze, shuma parash, celularë, karta krediti, etj.

“Nga veprimet hetimore të kryera në kuadër të këtij procedimi, rezultoi se dy shtetaset kineze të arrestuara kishin marrë me qira, pa kontrata, 2 apartamente në lagjen nr. 13, të cilat i kishin përshtatur për shfrytëzim të prostitucionit”, njoftoi policia.

Në bashkëpunim me Prokurorinë, njoftoi policia po vijojnë hetimet, pasi dyshohet se ka shtetas të tjerë të përfshirë në këtë veprimtari, e cila dyshohet se e ka qendrën jashtë vendit, pasi rezultoi se telefonatat kryheshin nëpërmjet call center-it.

Materialet procedurale iu referuan Prokurorisë së Durrësit, për veprime të mëtejshme.

/m.q//a.f/

The post Operacioni “Storm 5” në Durrës, tre të arrestuar, 7 nën hetim appeared first on Agjencia Telegrafike Shqiptare.

TIRANË, 6 gusht /ATSH/ Deputetja e Partisë Demokratike, Jorida Tabaku, akuzoi qeverinë në lidhje me mbështetjen për bujqësinë, duke theksuar se politika aktuale e TVSH-së po i penalizon fermerët shqiptarë. Sipas saj importuesit e mëdhenj po blejnë jashtë vendit, duke lënë pas dore produktet vendase.

“Duke pasur një diferencë të TVSH në hyrje dhe në dalje pra të fermerit të vogël dhe të importuesit të madh e gjithë kjo diferencë TVSH-je kthehet në një supertaksë për fermerin. Pra diferenca 0%, 10%, 20% konsiderohet si një taksë dhe të gjithë importuesit e mëdhenj preferojnë më mirë që të marrin jashtë, sesa të blejnë nga fermeri shqiptar”, tha Tabaku.

Deputetja demokrate theksoi nëpermjet një video të publikuar në rrjetet sociale se opozita ka propozuar që TVSH-ja në bujqësi të unifikohet në 6%, si në hyrje ashtu edhe në dalje, për të ndihmuar formalizimin e sektorit.

“Për këtë arsye kemi propozuar me ligje që taksa në bujqësi, TVSH-ja në bujqësi të jetë e njëjtë në hyrje dhe në dalje dhe të jetë në vlerën 6% në mënyrë që të formalizohet i gjithë sektori”, u shpreh Tabaku.

Tabaku tha më tej se “dëgjon ministrat e qeverisë që kanë dalë dhe po nxisin fermerët që të marrin kredi për investime në bujqësi. Pse duhet të marrë fermeri kredi në bujqësi kur kishte fondet e IPARD dhe u dogjën!! Çfarë vlere ka kredia në bujqësi, kur sot ka rënë prodhimi në bujqësi, kur pjesa më e madhe e produkteve janë duke u importuar nga jashtë, për çfarë i duhet një fermeri në mes të sezonit të verës, kur janë duke i përfunduar të gjithë të vjelurat e stinës të marrë një kredi”.

Sipas saj, bujqësia ndodhet në krizë të thellë për shkak të politikave të qeverisë.

“Bujqësia sot ndodhet në një situatë të vështirë edhe për shkak të këtyre politikave, politikës së taksës, politikës së mbështetjes së bujqësisë dhe politikës së shpërndarjes së fondeve”, tha Tabaku.

/m.q//a.f/

The post Tabaku: TVSH-ja në bujqësi të jetë e njëjtë në hyrje dhe në dalje në nivelin 6% appeared first on Agjencia Telegrafike Shqiptare.

TIRANË, 5 gusht /ATSH/ Shqipëria U-19 luajti pasditen e sotme takimin e parë miqësor kundër Italisë U-19. Në takimin e zhvilluar në Novarello Sporting Center, ekipi i drejtuar nga trajneri Julian Ahmataj u mund me rezultatin 4-1.

Tekniku kuqezi e nisi sfidën me këtë formacion: Taho (GK), Avdullari, Sina, Gecaj, Shpuza, Gashi, Huqi, L. Krasniqi, B. Krasniqi, Arifi (C), Malaj.

Kuqezinjtë kaluan të parët në avantazh falë golit të realizuar nga Besalet Krasniqi në minutën e 8-të. Por axurrët barazuan shifrat pas tri minutash me Cama-n, ndërsa pëmbysën rezultatin në minutën e 17-të me Federico Coletta-n. Vendasit shënuan edhe golin e tretë në minutën e 41-të me Artesanin. Trajneri Ahmataj bëri dy zëvendësime pak para përfundimit të pjesës së parë, duke hedhur në fushë El Malem dhe Sylejmanin. Fraksioni i parë mbyllet me shifrat 3-1 për Italinë.

Pjesa e dytë nis mirë për italianët, të cilët realizojnë golin e katërt me Atzenin. Trajneri shqiptar ndërhyri në fushë edhe në këtë fraksion duke hedhur forca të freskëta si Duka, Hoxha e Lataj. Gjithsesi deri në fund rezultati nuk ndryshon më, pavarësisht përpjekjeve të skuadrës sonë.

Ekipi kuqezi do të luajë të enjten sfidën e dytë miqësore të programuar ndaj Italisë në ora 11:00. Këto dy takime janë të rëndësishme në kuadër të përgatitjeve të kualifikueseve të Europianit për këtë grup-moshë.

/r.e/

The post U-19, Shqipëria luan miqësoren e parë me Italinë appeared first on Agjencia Telegrafike Shqiptare.

TIRANË, 5 gusht /ATSH/ Mbrojtja e personave që largohen nga diskriminimi, përndjekja dhe konfliktet është detyrim ligjor dhe angazhim ndërkombëtar.

Në kuadër të projektit EU4Migration, u zhvillua sot një takim në Drejtorinë Vendore të Kufirit dhe Migracionit në Gjirokastër, me pjesëmarrjen e drejtoreshës për Politikat e Migracionit, Azil dhe Antitrafikut në Ministrinë e Brendshme Alma Bime, përfaqësuesve të departamentit për Kufirin dhe Migracionin, të Drejtorisë Vendore për Kufirin dhe Migracionin Gjirokastër, UNHCR, dhe International Police Organization – IPO.

Sipas Policisë së Shtetit, takimi u fokusua në forcimin e bashkëpunimit institucional në fushën e azilit, menaxhimit të kufijve dhe identifikimit të rasteve të trafikimit të qenieve njerëzore.

“Shqipëria nuk do të shërbejë si rrugë kalimi apo strehë e sigurt për rrjetet e trafikimit të qenieve njerëzore. Ky është një shembull i vendosmërisë së institucioneve ligjzbatuese për të mbrojtur jetën dhe dinjitetin njerëzor, si dhe për të goditur çdo formë të krimit të organizuar”, njoftoi Policia.

/m.q/r.e/

The post Lufta kundër trafikimit të qenieve njerëzore, Policia e Shtetit: Shqipëria, jo strehë për rrjetet kriminale appeared first on Agjencia Telegrafike Shqiptare.

TIRANË, 5 gusht /ATSH/ Në Tiranë vijon aksioni për të siguruar qarkullim të lirë dhe të sigurt të makinave në rrugët e kryeqytetit.

Policia bashkiake e Tiranës njoftoi sot se në bashkëpunim me Policinë e Shtetit vijoi aksionin për rregullimin e trafikut, lirimin e korsive të autobusit dhe largimin e mjeteve të parkuara në mënyrë të paligjshme.

Ky është një operacion i ndërmarrë nga Policia e Shtetit dhe Policia Bashkiake për të siguruar qarkullim të lirë dhe të sigurt.

“Shkeljet e rregullave të qarkullimit rrugor do të ndëshkohen sipas ligjit”, theksoi Policia Bashkiake.

/m.q//r.e/

The post Rregullimi i trafikut në Tiranë, vijon aksioni nga Policia e Shtetit dhe ajo bashkiake appeared first on Agjencia Telegrafike Shqiptare.

TIRANË, 4 gusht /ATSH/ Prokuroria e Posaçme Kundër Korrupsionit dhe Krimit të Organizuar i ka komunikuar sot akuzat ish-presidentit Ilir Meta sa i përket dosjes CEZ/DIA dhe lobimit në SHBA.

Meta akuzohet nga SPAK për “Pastrim të produkteve të veprës penale ose veprimtarisë kriminale”, “Korrupsion pasiv të funksionarëve të lartë shtetërorë ose të zgjedhurve vendorë”, “Refuzim për deklarim, mosdeklarim, fshehje dhe deklarim i rremë i pasurive, interesave private të personave të zgjedhur dhe nëpunësve publikë”.

Avokati i presidentit të Partisë së Lirisë, Kujtim Cakrani tha në një prononcim për mediet se nga hetimet nuk kishte asgjë të re. Sipas Cakranit, ata kërkuan të dinë se kush i ka bërë pagesat për lobimin në SHBA, teksa shtoi se nga ana e SPAK nuk kanë asnjë informacion në lidhje me këtë.

“Edhe pas 6 vitesh hetime për sa i përket CEZ-DIA-s nuk ka asgjë të re edhe për sa i përket lobimit nuk ka asgjë të re. Meta ka dhënë shpjegimet e tij dhe i ka kërkuar organit të prokurorisë se për se nuk kanë bërë hetime të thelluara se kush i ka bërë pagesat për lobimin. Prokuroria nuk ka asnjë informacion se kush i ka bërë këto pagesa. Meta ka shpjeguar me detaje 3 akuzat. Ne duam të dimë kush i ka bërë pagesat dhe kush i ka marrë faturat e këtyre pagesave”, tha Cakrani.

Avokati theksoi se “nuk ka asnjë provë konkrete ku të vërtetohet se mbi zotin Meta rëndojnë këto akuza. Nuk ka fakt penal”.

Cakrani shtoi se “tek çështja CEZ-DIA që ka prej 2018 nën hetim gjithë ajo farë akuze që është ndërtuar është përmbledhur vetëm në 30 faqe”.

“Ish-presidenti, ish-kryeministri, ish-kryetari i Kuvendit ka 0 korrupsion dhe 0 pasuri të vendosur nga korrupsioni, sepse na i ka vërtetuar organi i procedurës me 122 fashikuj që ai disponon”, tha Cakrani.

Cakrani tha se nuk do të kërkojnë gjykim të shkurtuar por gjykim normal.

Meta ndodhet në burg prej tetorit të vitit të shkuar.

Më herët, po për të njëjtën dosje penale, iu komunikua mbyllja e hetimeve ish-bashkëshortes së tij, Monika Kryemadhi si dhe nënës së saj Fatime Kryemadhit.

Të pandehur në këtë dosje janë edhe Ema Çoku, e cila akuzohet për pastrim parash dhe Piro Xhixho, për korrupsion pasiv.

/m.q/j.p/

The post SPAK i komunikon akuzat Metës, avokati: Nuk ka fakt penal appeared first on Agjencia Telegrafike Shqiptare.

TIRANË, 4 gusht /ATSH/ Kryetari i Partisë Demokartike Sali Berisha deklaroi sot së vëzhguesit ndërkombëtar të OSBE-ODIHR u kërcënuan që të ndryshonin raportin paraprak për zgjedhjet parlamentare të 11 majit.

Në një deklaratë për mediet nga selia blu, Berisha bëri publike një letër e cila sipas tij mban datën 12 maj dhe është shkruar nga ministri i Jashtëm Igli Hasani e cila iu është dërguar vëzhguesve ndërkombëtarë me qëllim që ata të ndryshojnë raportin.

“Këtu para jush kam sjellë sot letrën kërcënuese që ministri i jashtëm i narkoshtetit, Igli Hasani, iu drejton me datën 12 maj, sapo lexohet raporti, zonjës Farah Karimi, koordinatore speciale dhe lider i misionit afatshkurtër të OSBE-së; Ambasadorit Lamberto Zannier, kryetar i misionit të vëzhguesve të ODIHR-it; zotit Bjorn Soder, kryetar i delegacionit të asamblesë parlamentare të OSBE; zotit Simone Billi, kryetar i delegacionit të asamblesë parlamentare të Këshillit të Europës dhe zotit Michael Gahler, kryetar i delegacionit të Parlamentit Europian”, tha Berisha.

Sipas Berishës, ministri i Jashtëm thotë në letrën e tij se “nuk janë përdorur burimet e administratës”.

Berisha tha më tej se Hasani mashtroi hapur ndërkombëtarët duke shpikur arrestime nga SPAK.

“Asnjë arrest nuk është bërë. Në një kohë që vetëm këtu janë paraqitur pothuajse çdo ditë me qindra dhe fakte. Pra, gënjen komunitetin ndërkombëtar, thotë janë arrestuar. Janë bërë disa arreste, çka tregon qartë, thotë, përkushtimin e institucioneve shqiptare për të mbrojtur integritetin e zgjedhjeve dhe për të siguruar përgjegjshmërinë”, tha Berisha.

Berisha shtoi se Hasani “sulmon raportin për t’u thënë delegacioneve ndërkombëtare se ju keni mashtruar, në një kohë kur vetë mashtron në çdo paragraf”.

Berisha tha se “ka besim tek integriteti i misioneve ndërkombëtare, të cilat nuk mund të pajtohen kurrë”, ndërsa shtoi se “do nxjerrim të dhëna të tjera për farsën e 11 majit”.

/m.q/j.p/

The post Berisha: Vëzhguesit ndërkombëtarë u kërcënuan të ndryshonin raportin për zgjedhjet appeared first on Agjencia Telegrafike Shqiptare.

TIRANË, 4 gusht /ATSH/ Një 72-vjeçar është proceduar penalisht nga policia e Peqinit pasi dogji një sipërfaqe toke dhe disa pemë ulliri në fshatin Fatishë.

Policia njoftoi sot se “si rezultat i veprimeve hetimore për dokumentimin e autorësisë së rasteve të zjarrvënieve, specialistët për Hetimin e Krimeve të Komisariatit të Policisë Peqin referuan materialet në Prokurori, ku nisi procedimi penal për shtetasin P. H., 72 vjeç, banues në fshatin Fatishë”.

“Nga hetimet dyshohet se ky shtetas ka ndezur zjarr në fshatin ku banonte, për të djegur mbeturina dhe si pasojë e përhapjes së flakëve, janë djegur një sipërfaqe toke me barishte dhe disa pemë ulliri”, njoftoi policia.

Materialet procedurale iu referuan Prokurorisë pranë Gjykatës së Shkallës së Parë e Juridiksionit të Përgjithshëm Elbasan, për veprime të mëtejshme.

/m.q/j.p/

The post Dogji një sipërfaqe toke dhe pemë ulliri në fshatin Fatishë, nën hetim 72-vjeçari appeared first on Agjencia Telegrafike Shqiptare.

TIRANË, 4 gusht /ATSH/ Drejtori i Policisë së Vlorës Elidon Çela informoi sot mbi zbardhjen e disa ngjarjeve kriminale të ndodhura më parë, në Vlorë, si dhe identifikimin, kapjen dhe arrestimin e autorëve të këtyre ngjarjeve, të cilët përbëjnë një rrezik serioz për rendin dhe sigurinë publike.

Çela tha se pasditen e djeshme, gjatë një operacioni të mirorganizuar dhe të një niveli të lartë rrezikshmërie për punonjësit e Policisë, u bë e mundur vënia në pranga e një shtetasi në kërkim, i cili në momentin e kapjes ishte i armatosur me armë zjarri, me fishek në fole gati për qitje.

Operacioni u zhvillua në ambientet e një hoteli në Orikum, ku u bë lokalizimi dhe arrestimi i shtetasit: Flodian Plaku alias Florjan Serjani (Mamo), 42 vjeç, banues në Vlorë, person me rrezikshmëri të lartë shoqërore, i dyshuar për disa ngjarje kriminale të ndodhura në Vlorë dhe jashtë saj”.

Për këtë shtetas, njoftoi Çela, Gjykata e Shkallës së Parë të Juridiksionit të Përgjithshëm Tiranë, ka caktuar masën e sigurisë “Arrest në burg”, për veprat penale “Vrasja me paramendim”, e kryer në bashkëpunim dhe “Prodhimi dhe mbajtja pa leje e armëve dhe municionit”.

Sipas Çelës “ky shtetas akuzohet për vrasjen e shtetasit Gentjan Bejtja, më datë 15.03.2024, i cili u qëllua me armë zjarri brenda rrethimit të banesës së tij. Nga veprimet hetimore ka rezultuar se autorët janë afruar te banesa e viktimës, me një automjet tip “Land Rover” dhe pas kryerjes së vrasjes, janë larguar në fshatin Hasan, ku kanë djegur automjetin”.

“Gjatë kontrollit fizik ndaj shtetasit Flodian Plaku, si dhe në ambientet ku qëndronte, u gjetën dhe u sekuestruan: Një armë zjarri pistoletë, me një krehër dhe 17 fishekë; 25 000 euro cash, për të cilat po hetohet burimi i dyshuar kriminal; 7 celularë”, tha drejtori i policisë Vlorë.

Gjatë ndërhyrjes policore në hotelin ku fshihej, sipas policisë së bashku me shtetasin Flodian Plaku, u kap edhe shtetasi Julian Aliaj alias Julian Pashaj, 43 vjeç, i cili gjatë operacionit u kap me një armë zjarri pistoletë me një krehër me fishekë.

Gjatë hetimeve të thelluara mbi këtë rast, u evidentua se shtetasit A. L, 36 vjeç, banues ne Vlorë, A. D, 31 vjeç banues ne Vlore dhe L. D, 57 vjeç, banues në Tiranë, kanë ndihmuar në strehimin, komunikimin dhe lëvizjen e shtetasit në kërkim Flodian Plaku. “Ata u arrestuan ne flagrancë për veprën  penale “Përkrahja e autorit të krimit””, tha Çela.

Ndërkohë, vetëm tre ditë më parë strukturat e DVP Vlorë, në bashkëpunim me Drejtorinë e Forcës së Posaçme Operacionale të Policisë së Shtetit, në drejtimin e Prokurorisë pranë Gjykatës së Shkallës së Parë Vlorë, finalizuan operacionin policor të koduar “Në Gjurmë”, me objekt kapjen e shtetasit Kleanth Bylyku alias Armando Gega, 42 vjeç, banues në Vlorë, në kërkim për veprën penale “Vrasja me paramendim”, e kryer në bashkëpunim”.

“Ndaj tij ishte lëshuar urdhër ekzekutimi i vendimit penal nga Gjykata e Vlorës, për caktimin e masës së sigurisë “Arrest në burg”, për vrasjen e shtetasit Renato Hoxhaj, ndodhur më 27.04.2025, rreth orës 06:20, në lagjen “Hajro Çakërri”, pranë Poliklinikës së qytetit të Vlorës. Viktima u qëllua me armë zjarri, me katër plumba në trup dhe kokë, duke humbur jetën në vend”, njoftoi Çela.

Lidhur me këtë ngjarje, Çela tha se falë hetimeve të thelluara dhe analizës së provave të gjetura në vendngjarje, u dokumentua se vrasja ishte e planifikuar dhe e kryer në bashkëpunim me disa persona të tjerë.

“Si rezultat, janë ndërmarrë këto masa: në muajin prill, u ndalua me iniciativë shtetasi E. M., 37 vjeç, banues në Tiranë, për veprën penale “Sigurimi i kushteve dhe i mjeteve materiale për të kryer vrasje”;

“U shpallën në kërkim shtetasi i huaj, me kombësi rumune, D. C., 53 vjeç, me precedent të theksuar kriminal në fushën e krimeve kundër personit. Për këtë shtetas është lëshuar urdhër arrestit ndërkombëtar për veprat penale “Vrasja me paramendim”, e kryer në bashkëpunim dhe “Prodhimi dhe mbajtja pa leje e armëve, armëve shpërthyese dhe municionit”

“Në hetim për këtë vrasje është edhe një shtetas tjetër, me inicialet I. S., 26 vjeç, i vënë në pranga më parë për veprën penale “Prodhimi dhe shitja e narkotikëve”, për të cilën vijon puna për të përcaktuar rolin e tij në këtë ngjarje kriminale”, tha Çela.

Ndërkohë, njoftoi drejtori i policisë janë duke vazhduar me intensitet hetimet për zbardhjen dhe dokumentimin e plotë të kësaj ngjarjeje, si dhe identifikimin dhe arrestimin e personave të tjerë të përfshirë në ngjarje kriminale në Vlorë dhe në Sarandë.

“Të dy operacionet “Eterna” dhe “Në Gjurmë” janë dëshmi e qartë e vendosmërisë së strukturave tona për të zbardhur dhe dokumentuar në mënyrë të plotë krimet më të rënda që cenojnë jetën dhe sigurinë e qytetarëve”, përfundoi Çela.

/m.q/j.p/

The post Në kërkim për vrasjen e Gentian Bejtjas, arrestohet në Orikum 42-vjeçari appeared first on Agjencia Telegrafike Shqiptare.

TIRANË, 4 gusht /ATSH/ Kryetari i Partisë Demokratike, Sali Berisha u paraqit sot në Prokurorinë e Posaçme Kundër Korrupsionit dhe Krimit të Organizuar (SPAK) në zbatim të masës së sigurisë “Detyrim paraqitje” të caktuar ndaj tij nga Apeli i GJKKO-së.

Berisha u paraqit në dyert e SPAK rreth orës 10:00, ndërsa jashtë ambienteve të Prokurorisë së Posaçme dha edhe një prononcim për mediet ku u shpreh se drejtuesi i SPAK, Altin Dumani është “mashtrues publik i rangut të lartë”.

“Deklaroi se paditë e sjella në SPAK, me dhjetëra e dhjetëra padi për krim elektoral, pati amoralitetin e plotë të mashtrojë shqiptarët se këto padi nuk kishin prova. E garantoj se do të përgjigjet para shqiptarëve për këtë mashtrim publik dhe se parlamenti, opozita do të nisë punën pikërisht me zbërthimin e këtij mashtrimi publik”, tha Berisha.

Sipas Berishës “me këtë mashtrim publik, Dumani është edhe avokati kryesor i krimit të shëmtuar elektoral, garancia më madhore e dhunimit të çdo ligji, norme dhe standardi për votimin e lirë të shqiptarëve”.

Berisha tha se Dumani mashtroi edhe për rastin e ish-drejtorit të RTSH-së Thoma Gëllçit.

Sa i takon çështjes në SPAK ndaj presidentit të Partisë së Lirisë Ilir Metës, Berisha tha se nuk ka asnjë fakt penal në dosje.

Gjykata e Posaçme Kundër Korrupsionit dhe Krimit të Organizuar (GJKKO) ka kaluar për gjykim dosjen e ish-kompleksit sportiv “Partizani”, në të cilën ish-kryeministri Sali Berisha, akuzohet për “Korrupsion pasiv i funksionarëve të lartë shtetërorë ose i të zgjedhurve vendorë”.

Ndërkohë, dhëndri i tij Jamarbër Malltezi akuzohet për kryerjen e veprave “Korrupsioni pasiv i funksionarëve të lartë shtetërorë ose i të zgjedhurve vendorë”, si dhe “Pastrimi i produkteve të veprës penale ose veprimtarisë kriminale”.

SPAK e akuzon Berishën se, gjatë kohës që ishte kryeministër, ka përdorur funksionin e tij për të favorizuar dhëndrin Jamarbër Malltezi, në procesin e privatizimit të ish-kompleksit “Partizani”. Sipas SPAK, ky privatizim është bërë në mënyrë të parregullt dhe me ndikim të paligjshëm nga Berisha, duke sjellë përfitime të padrejta për Malltezin dhe dëm ekonomik për shtetin. Berisha i ka cilësuar akuzat si politike.

/m.q/j.p/

The post Berisha paraqitet në SPAK: Dumani, avokat i krimit elektoral appeared first on Agjencia Telegrafike Shqiptare.

TIRANË, 2 gusht /ATSH/ Tunelet nëntokësorë të Kukësit fshehin një pjesë të harruar të historisë së qytetit, që po merr më shumë vëmendje falë mbështetjes së Bashkimit Evropian.

Delegacioni i BE-së njoftoi nëpërmjet një postimi në rrjetet sociale se “përmes projektit EMOUnderground, i financuar nga programi INTERREG ADRION, këto hapësira po përgatiten të pajisen me projeksione në realitet virtual, të cilat do të jenë së shpejti të aksesueshme për publikun”.

“Vizita jonë me “Reel the Site” na çoi pikërisht në këtë tunel, një vend që ruan kujtime të forta dhe potencial për t’u kthyer në pikë referimi të turizmit kulturor në Kukës”, njoftoi delegacioni i BE-së.

Nën rrugët e qytetit verior të Kukësit gjendet një labirinth tunelesh, të ndërtuara gjatë regjimit komunist, për të strehuar banorët në rast lufte.

Për ndërtimin e Kukësit nëntokësor është punuar gati 20 vite e shpenzuar miliarda. Ndërtime të pabesueshme. Një spital për 300 shtretër, fabrika e prodhimit të bukës, hapësirat e tjera për vendkomanda e shumë zyra për administratën. Pra e përllogaritur për 20 apo 30 mijë banorë në një periudhë kohore për të paktën 4 deri gjashtë muaj.

Tunelet në trajtë labirinti lidhin çdo hapësirë e përshtatur për funksione të ndryshme. Kurse hyrja realizohej në pesë vende të ndryshme të qytetit. Një pjesë ë pallateve e ndërtuar në atë periudhë, i kanë në çdo shkallë portat e blinduara dhe tunelet hyrëse për në qytetin e nëndheshëm. Porta ka edhe për konviktet e institucionet arsimore.

/m.q/j.p/

The post Projeksione virtuale në tunelet nëntokësore të Kukësit, së shpejti të hapura për publikun appeared first on Agjencia Telegrafike Shqiptare.

TIRANË, 2 gusht /ATSH/ Flamingot, zogjtë lozonjarë me qafën e hollë dhe me ngjyrë mjaft interesante, kanë populluar lagunën e Nartës. Kryeministri Edi Rama ndau sot një video nga flamingot në lagunën e Nartës, teksa qëndrojnë në grup në ujërat e cekëta të lagunës.

Flamingot jetojnë gjithmonë në grupe, që nga grupet e vogla deri në qindra-mijëra. Zogjtë ngrihen në ajër në grup dhe fluturojnë me qindra kilometra gjatë periudhës së shtegtimit. Në vendin tonë habitati i këtij lloji është laguna e Nartës, Karavastasë, por edhe liqeni i Pogradecit.

Laguna e Nartës, renditet e dyta më e madhe nga rëndësia për shpendët e ujit. Në këtë lagunë janë rreth 20,000 shpendë dimërorë të rreth 40 llojeve, duke u kthyer në një habitat shumë të pasur, gjithashtu vendushqimi për pelikanin dhe ku takohen rregullisht flamingot.

Laguna e Nartës ndodhet në veri-perëndim të qytetit të Vlorës, rreth 14 km larg saj dhe ka një sipërfaqe prej rreth 42 km 2. Ndahet nga deti Adriatik nga një rrip i ngushtë toke ranore, që përbëhet nga duna rëre dhe plazhe të vegjël pa bimësi të dendur.

/m.q/j.p/

The post Rama ndan pamje nga flamingot në lagunën e Nartës appeared first on Agjencia Telegrafike Shqiptare.

TIRANË, 2 gusht /ATSH/ Pas pandemisë së koronavirusit, në draftin e propozuar për Kodin e ri Penal një kapitull i është kushtuar edhe mbrojtjes së shëndetit publik, ku parashikohen masa të ashpra ndëshkuese për një sërë veprash penale që cenojnë drejtpërdrejt shëndetin publik.

Neni 441 i Kodit të ri Penal parashikon që shkaktimi i një epidemie nëpërmjet shpërndarjes së baktereve ose viruseve patogjenë, dënohet me burgim jo më pak se sa njëzetë e pesë vjet ose me burgim të përjetshëm. Kur kjo vepër është kryer nga pakujdesia, dënohet me burgim nga dhjetë deri në njëzet vjet.

Për sa u përket përhapjes së sëmundjeve infektive, sipas Kodit të ri Penal, në nenin 442 parashikohet që përhapja me dashje e sëmundjes infektive me rrezikshmëri të lartë për shëndetin, nëpërmjet kryerjes së veprimeve ose mosveprimeve nga personi që është diagnostikuar si mbartës i sëmundjes apo nga personi që ka për qëllim përhapjen e saj, dënohet me burgim nga dy deri në pesë vjet. Po kjo vepër, kur ka shkaktuar pasoja të rënda për shëndetin ose rrezik për jetën e njerëzve, dënohet me burgim nga tre deri në tetë vjet.

Ndërkohë, mosraportimi i shenjave të sëmundjeve infektive apo pandemike prej zyrtarëve publikë të ngarkuar me administrimin apo trajtimin e sëmundjeve infektive apo pandemike, sipas detyrimeve që ligji u ka ngarkuar për të plotësuar, përbën kundërvajtje penale dhe dënohet me gjobë.

Në draftin e Kodit të ri Penal parashikohen masa edhe për individët apo subjektet që shkelin rregullat ligjore të vendosura për parandalimin e sëmundjeve ngjitëse, apo që nuk i binden masave gjatë gjendjeve të jashtëzakonshme.

Sipas nenit 445 mosrespektimi i rregullave me të cilat organi kompetent shtetëror urdhëron ekzaminime, dezinfektime, karantinë ose masa të tjera për parandalimin ose ndalimin e përhapjes së një sëmundje ngjitëse që paraqet rrezik për jetën e shëndetin e njerëzve dhe kafshëve, dënohet me gjobë ose me burgim deri në tre vjet.

Në draftin e ri janë parashikuar masa të forta edhe për kontrollin e tregut farmaceutik. Tregtimi i barnave të falsifikuara ose të rrezikshme për jetën dhe shëndetin, përfshirë çdo formë importimi, shpërndarjeje apo ndërmjetësimi, dënohet me 4 deri në 8 vjet burgim.

Mashtrimi në përmbajtjen, përbërjen apo dokumentacionin e barnave, si dhe çdo veprim që cenon sigurinë, efikasitetin apo cilësinë e produkteve mjekësore, do të ndëshkohet me dënime që variojnë nga 2 deri në 8 vjet burgim.

/m.q/j.p/

The post Drafti i Kodit të ri Penal, burg përjetë kujt shkakton epidemi me dashje appeared first on Agjencia Telegrafike Shqiptare.

TIRANË, 2 gusht /ATSH/ Në kuadër të aksionit kombëtar për formalizimin e tregut bujqësor dhe blegtoral, janë bllokuar 94 tonë produkte gjatë kontrolleve të kryera në terren.

Lajmi u bë i ditur nga ministrja e Bujqësisë dhe Zhvillimit Rural, Anila Denaj, e cila theksoi se aksioni vijon për të garantuar që çdo mall të jetë i gjurmueshëm dhe i deklaruar dhe që askush të mos tregtojë në shkelje të legjislacionit tatimor.

“94 tonë produkte bujqësore dhe blegtorale të bllokuara, gjatë kontrollit në terren, në kuadër të aksionit kombëtar për formalizimin dhe sigurimin e gjurmueshmërisë së produkteve nga grumbulluesit, përpunuesit dhe tregjet me shumicë”, u shpreh Denaj.

“Aksioni vijon për të garantuar që çdo mall të jetë i gjurmueshëm dhe i deklaruar dhe që askush të mos tregtojë në shkelje të legjislacionit tatimor dhe në kurriz të prodhuesve të ndershëm dhe shëndetit të konsumatorëve”, shtoi ajo.

Aksioni për formalizimin dhe përmirësimin e sigurisë ushqimore në tregun e produkteve bujqësore dhe blegtorale, nga strukturat e Administratës Tatimore dhe Ministrisë së Bujqësisë nisi më 14 korrik në qytetin e Tiranës, dhe më pas u shtri edhe në qarqe të tjera të vendit.

Kontrolle u kryen me bazë risku për përmirësimin e gjurmueshmërisë së produkteve bujqësore dhe blegtorale dhe rritjen e sigurisë ushqimore.

/m.q/j.p/

The post Sigurimi i gjurmueshmërisë, Denaj: 94 tonë produkte bujqësore dhe blegtorale të bllokuara appeared first on Agjencia Telegrafike Shqiptare.

TIRANË, 2 gusht /ATSH/ Apolonia është ndër parqet arkeologjike më të mëdha në vend dhe pret një numër relativisht të lartë vizitorësh të kombësive të ndryshme.

Kryeministri Edi Rama ndau në rrjetet sociale foto të turistëve të shumtë të cilët kanë zgjedhur që të vizitojnë qytetin antik të Apolonisë për trashëgiminë e tij të pasur historike dhe kulturore.

Parku Arkeologjik i Apolonisë ndodhet në jugperëndim të Fierit. Vizitorët e këtij parku, përveç qytetit antik të Apolonisë dhe monumenteve të tij, mund të shohin edhe objekte të tjera të vendosura në muzeun brenda parkut. Ky muze Arkeologjik është ndër më të pasurit e vendit, me objekte unike jo vetëm për Shqipërinë, por edhe përtej saj.

Apolonia e Fierit është një nga sitet më të mëdhenj në vend, por edhe një nga qytetet më të mëdhenj në botën antike. Si një nga 27 Apolonitë e pellgut të Mesdheut, ajo është një nga vlerat e perlat e trashëgimisë sonë arkeologjike.

Arkeologët e quajnë Apoloninë “Pompei i Shqipërisë”, pasi vetëm 10% e territorit të qytetit të dikurshëm është zbuluar deri më sot.

/m.q/j.p/

The post Fluks turistësh në Apoloni, Rama ndan pamjet appeared first on Agjencia Telegrafike Shqiptare.