KISHINEV, 30 korrik /ATSH/- Presidentja moldave, Maia Sandu tha sot se korrupsioni zgjedhor dhe financimi i paligjshëm i jashtëm nga Rusia ishin kërcënimet më të mëdha për zgjedhjet parlamentare më 28 shtator, akuza që Moska i ka mohuar, sipas “Reuters”.

Votimi mund ta bëjë Partinë e Veprimit dhe Solidaritetit të Sandu, të humbasë shumicën në asamblenë e ish-shtetit sovjetik, i cili shtrihet midis Ukrainës dhe Rumanisë.

“Federata Ruse dëshiron të kontrollojë Republikën e Moldavisë nga vjeshta e tutje dhe po përgatitet për ndërhyrje të paprecedentë në zgjedhjet e shtatorit”, tha Sandu në një konferencë për shtyp, në Kishinev.

Sandu tha se Kremlini po planifikon fushata për manipulimin e informacionit dhe sulme kibernetike, dhe protesta “të dhunshme”, ndërsa kërkon gjithashtu të shfrytëzojë strukturat tradicionale fetare.

Ajo akuzoi dy forcat kryesore të opozitës se po përfitonin nga planet e Moskës për të privuar Partinë e saj të Qendrës së Djathtë për Veprim dhe Solidaritet (PAS) nga shumica e saj parlamentare.

Sandu iu referua Ilan Shor,  politikani pro-rus në arrati, i cili sipas saj po drejton një “grup kriminal” që synon të destabilizojë vendin me anë të protestave dhe “krijimit të rrjeteve të blerjes së votave”. //a.i/

The post MOLDAVI – Sandu paralajmëron për rrezikun e ndërhyrjes ruse përpara zgjedhjeve appeared first on Agjencia Telegrafike Shqiptare.

TEL AVIV, 30 korrik /ATSH-DPA/- Izraeli mund të kërcënojë të aneksojë pjesërisht Rripin e Gazës me qëllim që të rrisë presionin mbi grupin militant palestinez Hamas gjatë negociatave për armëpushim, tha sot Zeev Elkin, anëtar i Kabinetit të Sigurisë së Izraelit.

Elkin vuri në dukje se Hamasi po i vononte negociatat.

“Gjëja më e dhimbshme për armiqtë tanë është humbja e tokës”, shtoi ai, duke theksuar mundësinë e dhënies së një ultimatumi Hamasit me qëllim arritjen e një marrëveshjeje.

Një ultimatum i tillë do të ishte një mjet i rëndësishëm për të ushtruar presion.

Disa ditë më parë, media izraelite raportoi se qeveria po diskutonte aneksimin gradual të Rripit të Gazës me qëllim që të rriste presionin mbi Hamasin.

Kohët e fundit, ministrat e ekstremit të djathtë në qeverinë e kryeministrit Benjamin Netanyahu shprehën pakënaqësinë e tyre për rifillimin e dërgesave më të mëdha të ndihmës në Rripin e Gazës.

Netanyahu gjithashtu dëshiron të qetësojë partnerët e tij të koalicionit ultra të djathtë me planet.

Negociatat indirekte midis Izraelit dhe Hamasit thuhet se kanë ngecur.

Propozimi i fundit në tryezën e negociatave ishte për një armëpushim 60-ditor.

Gjatë kësaj kohe, Hamasi do të lironte 10 nga 20 pengjet që ishin ende gjallë në Rripin e Gazës.

Stacioni televiziv N12 dhe gazetari izraelit, Barak Ravid raportuan se Izraeli u kishte dhënë dje ndërmjetësve një përgjigje për kërkesat e fundit të Hamasit. //a.i/

The post TEL AVIV – Ministri izraelit propozon aneksimin e zonave në Gazë për të ushtruar presion mbi Hamasin appeared first on Agjencia Telegrafike Shqiptare.

UASHINGTON, 30 korrik /ATSH/- Presidenti i SHBA-së, Donald Trump nënshkroi një urdhër ekzekutiv që zbaton një tarifë shtesë prej 40% ndaj Brazilit, duke e çuar shumën totale të tarifës në 50%, tha sot Shtëpia e Bardhë, sipas CNN.

Shtëpia e Bardhë përmendi politikat e fundit të Brazilit si arsye për rritjen e tarifave, duke deklaruar se administrata Trump nuk ishte dakord me to.

Trump paralajmëroi më herët se do të vendoste tarifën prej 50% ndaj Brazilit që do të hynte në fuqi më 1 gusht – në një letër që i dërgoi këtë muaj presidentit të vendit, Luiz Inacio Lula da Silva.

Në atë letër, Trump paralajmëroi se do të vendoste një tarifë të lartë nëse Brazili nuk do të përfundonte gjyqin e tij kundër ish-presidentit të krahut të djathtë, Jair Bolsonaro.

Urdhri që Trump nënshkroi sot, i cili rrit tarifën e Brazilit me 40%, akuzon qeverinë braziliane për “shkelje serioze të të drejtave të njeriut që kanë minuar shtetin e së drejtës në Brazil”.

“Në një deklaratë të veçantë presidenciale, Trump vendosi tarifa universale prej 50% ndaj importeve të produkteve gjysmë të gatshme të bakrit dhe produkteve derivate me përmbajtje intensive bakri”, tha Shtëpia e Bardhë.

Ajo e karakterizoi këtë veprim si kritik për sigurinë kombëtare të SHBA-së, duke thënë se Trump po i barazonte kushtet e lojës bizneseve amerikane për të mbështetur një industri të fortë vendase të bakrit.

Këto tarifa të reja do të hyjnë në fuqi më 1 gusht dhe përfshijnë përjashtime për produktet e bakrit që tashmë i nënshtrohen tarifave të presidentit për automjetet. //a.i/

The post SHBA – Trump nënshkruan urdhrin për zbatimin e tarifës shtesë prej 40% ndaj Brazilit appeared first on Agjencia Telegrafike Shqiptare.

PARIS, 30 korrik /ATSH/- Presidenti francez, Emmanuel Macron kritikoi sot marrëveshjen kornizë të arritur të dielën midis Bashkimit Evropian dhe Shteteve të Bashkuara të Amerikës, duke thënë se kjo tregonte se blloku nuk kishte arritur të “frikësohej” nga presidenti i SHBA-së, Donald Trump, sipas “Reuters”.

“Për të qenë i lirë, duhet të të frikësojnë. Nuk na frikësuan mjaftueshëm”, tha Macron.

“Edhe pse marrëveshja tregtare e Bashkimit Evropian me SHBA-në u jep bizneseve franceze vizibilitetin e nevojshëm për të investuar, ky ishte vetëm hapi i parë dhe se do të vazhdojmë të negociojmë”, tha presidenti francez.

“Tani më shumë se kurrë, është e rëndësishme të përshpejtohet axhenda evropiane e sovranitetit dhe konkurrencës”, tha Macron.

“SHBA-ja dhe BE-ja arritën një marrëveshje tregtare me tarifa prej 15%, duke i dhënë fund pasigurisë disamujore”, njoftoi presidenti i SHBA-së Donald Trump pas një takimi me presidenten e Komisionit Evropian, Ursula von der Leyen, në Skoci.

Më herët, Uashingtoni kishte kërcënuar me një normë tarifore prej 30%.

Si pjesë e marrëveshjes, BE-ja do të investojë 600 miliardë dollarë në SHBA, ndërsa blloku do të blejë energji dhe pajisje ushtarake amerikane me vlerë 750 miliardë dollarë. //a.i/

The post FRANCË – Macron kritikon marrëveshjen tregtare BE-SHBA appeared first on Agjencia Telegrafike Shqiptare.

TEL AVIV, 30 korrik /ATSH-DPA/- Më shumë se 100 persona janë vrarë në Gazë për shkak të sulmeve izraelite gjatë 24 orëve të fundit, tha të mërkurën autoriteti shëndetësor i territorit.

Ministria, e kontrolluar nga grupi militant palestinez Hamas, raportoi 104 të vdekur dhe 399 të plagosur gjatë 24 orëve të fundit.

Ministria nuk bën dallim midis luftëtarëve dhe civilëve, dhe numri i viktimave nuk mund të verifikohet.

Sipas shifrave palestineze, më shumë se 60 100 persona janë vrarë në Gazë – që nga fillimi i luftës, ndërsa mbi 146 200 janë raportuar të plagosur.

Lufta u shkaktua nga sulmet e Hamasit dhe grupeve të tjera islamike, më 7 tetor 2023 – në të cilat u vranë rreth 1,200 njerëz dhe më shumë se 250 të tjerë u morën peng në Rripin e Gazës.

Që atëherë, ushtria izraelite ka luftuar kundër Hamasit – me qëllimin e deklaruar për shkatërrimin e organizatës dhe lirimin e pengjeve që mbahen ende nga ekstremistët. //a.i/

The post GAZË – Mbi 100 të vdekur në sulmet izraelite gjatë 24 orëve të fundit appeared first on Agjencia Telegrafike Shqiptare.

ROMË, 30 korrik /ATSH-DPA/- Italia kritikoi sot një listë të Ministrisë së Jashtme ruse që akuzon politikanët perëndimorë për retorikë anti-ruse, duke e quajtur atë një marifet “propagandues”.

Lista, e publikuar javën e kaluar në faqen e internetit të ministrisë, përmban ato që ajo i quan shembuj të “gjuhës së urrejtjes” dhe “deklaratave rusofobe” të bëra që nga viti 2014 – viti kur Rusia sfidoi ligjin ndërkombëtar dhe aneksoi Gadishullin e Krimesë të Ukrainës.

Lista përfshin zyrtarë të lartë italianë, si presidenti Sergio Mattarella dhe ministri i Jashtëm Antonio Tajani.

Tajani thirri sot ambasadorin rus për të kundërshtuar zyrtarisht përfshirjen e Mattarella dhe zyrtarëve të tjerë të lartë.

“Roma këmbëngul në respekt të ndërsjellë në marrëdhëniet dypalëshe dhe thekson se dënimi i agresionit të papranueshëm rus kundër Ukrainës nga Italia nuk ishte drejtuar kurrë kundër popullit rus”, tha në një deklaratë Ministria e Jashtme italiane.

Kryeministrja italiane, Giorgia Meloni tha se lista e deklaratave nga udhëheqës të vendeve të ndryshme perëndimore, të publikuar nga Ministria e Jashtme ruse, nuk ishte asgjë më shumë se një fushatë tjetër propagandistike.

Sipas Meloni, qëllimi i listës ruse është të largojë vëmendjen nga lufta e Moskës në Ukrainë – një vepër penale, e njohur nga unioni ndërkombëtar dhe e dënuar që nga fillimi.

Tensionet midis Romës dhe Moskës kanë mbetur të larta që kur presidenti rus, Vladimir Putin nisi pushtimin e plotë të Ukrainës në shkurt 2022.

Lista ruse përmbante gjithashtu deklarata që u atribuohen udhëheqësve perëndimorë, përfshirë kancelarin gjerman, Friedrich Merz, presidentin francez, Emmanuel Macron dhe shefen e politikës së jashtme të BE-së, Kaja Kallas. //a.i/

The post ROMË – Italia dënon listën ruse të “propagandës” që synon liderët perëndimorë appeared first on Agjencia Telegrafike Shqiptare.

BIRMINGHAM, 30 korrik /ATSH/- Mijëra fansa mbushën sot rrugët e Birminghamit për t’i dhënë lamtumirën e fundit dhe për të nderuar Ozzy Osbourne, vokalistin legjendar të “Black Sabbath”, sipas “The Guardian”.

Familja Osbourne, Sharon, Kelly, Jack dhe Aimee bënë homazhet e tyre në funeral përpara se të shkonin në një ceremoni private.

E veja e Ozzy Osbourne, Sharon Osbourne, ishte në lot ndërsa iu bashkua fëmijëve të saj për t’i dhënë lamtumirën e fundit legjendës së muzikës, në Birmingham.

Ylli i heavy metal, i cili vdiq në moshën 76-vjeçare, u përkujtua me një ceremoni të veçantë në Black Sabbath Bridge, në Birmingham, qyteti ku ai u lind.

Dhjetëra mijëra fansa ishin atje për t’i dhënë lamturmirën e fundit, Ozzy Osbourne.

E gjithë familja ishte e veshur me të zeza ndërsa i bënin nderimet e tyre, bashkëshortit dhe babait të tyre të ndjerë, Ozzy Osbourne.

Familja Osbourne, përfshirë fëmijët Jack, Kelly dhe Aimee vendosen lule në Urën Black Sabbath.

Djali i Ozzy nga martesa e tij e parë me Thelma Riley, Louis, iu bashkua gjithashtu familjes.

Makina e varrimit të Ozzy ishte zbukuruar me lule vjollcë ku shkruhej emri i tij.

Kortezhi funeral përbëhej nga makina funerale “Jaguar” dhe gjashtë makina funerale “Mercedes”, të shoqëruara nga një motoçikletë dhe makinë policie.

Makina e varrimit të Osbourne u nis përgjatë Broad Street në qendër të qytetit në orën 13:00, duke u drejtuar drejt Urës së Black Sabbath.

Ishte vendi ku shumë fansa të “Black Sabbath” i bënë homazhe muzikantit me lule dhe fotografi të legjendës.

Fansat – shumë prej tyre të veshur me bluza të Ozzy Osbourne – mbërritën më herët, pranë stolit të Urës Black Sabbath në Broad Street në Birmingham, për t’i bërë homazhe këngëtarit.

Gjithashtu u ngritën postera në kujtim të muzikantit. U luajt muzika e “Black Sabbath” dhe njerëzit që mbushën rrugët thërrisnin, “Ozzy Ozzy Ozzy”.

Ozzy Osbourne vdiq tre javë pas koncertit të tij të lamtumirës, “Back to the Beginning”, në Villa Park në Birmingham – së bashku me shokët e tij të grupit Tony Iommi, Bill Ward dhe Geezer Butler.

Ai vdiq në moshën 76-vjeçare në shtëpinë e tij në Buckinghamshire, i rrethuar nga familja e tij.

Osbourne ishte babai i gjashtë fëmijëve dhe gjysh i 10 fëmijëve.

Ai kishte tre fëmijë nga martesa e tij e parë me Thelma Riley – Jessica, Louis dhe Elliot (ai adoptoi Elliot, djalin e Thelmës nga një marrëdhënie e mëparshme) – dhe tre të tjerë me bashkëshorten e tij Sharon: Aimee, Kelly dhe Jack.

Ceremonia e varrimit ishte një festë e jetës së Osbourne. Muzikantët vendas Bostin’ Brass performuan për t’i dhënë atij lamtumirën e fundit.  Eventi u zhvillua përpara një funerali privat.

Në Muzeun dhe Galerinë e Artit të Birminghamit është hapur një libër ngushëllimesh, ku ndodhet ekspozita “Heroi i Klasës Punëtore” e Ozzy Osbourne. //a.i/

The post Mijëra fansa i japin lamtumirën e fundit Ozzy Osbourne në rrugët e Birminghamit appeared first on Agjencia Telegrafike Shqiptare.

BRUKSEL, 30 korrik /ATSH-DPA/-  Vizitorët ndërkombëtarë që mbërrijnë në 29 vende evropiane do të përpunojnë të dhënat e tyre në një bazë të dhënash në të gjithë zonën Shengen nga 12 tetori, njoftoi sot Komisioni Evropian.

I ashtuquajturi, Sistemi i Hyrjes/Daljes (EES) do të regjistrojë të gjitha hyrjet dhe daljet e shtetasve nga vendet jo-anëtare të BE-së, si dhe informacionin e udhëtimit, dhe do të regjistrojë të dhënat biometrike, si gjurmët e gishtërinjve dhe imazhet e fytyrës.

Qëllim i EES-së është të zëvendësojë gradualisht përdorimin aktual të vulave të pasaportave.

“Sistemi i ri do të përmirësojë sigurinë duke ofruar të dhëna të besueshme mbi kalimet kufitare, qytetarët që qëndrojnë më gjatë se viza e tyre dhe rastet e mashtrimit me dokumente dhe identitet”, tha komisioneri i BE-së për Emigracionin, Magnus Brunner.

“Vendet e Shengenit kanë gjashtë muaj kohë për të vendosur plotësisht sistemin EES – në të gjitha pikat e kalimit kufitar”, tha komisioni.

Shengeni i referohet zonës së udhëtimit pa pasaporta të Evropës, e cila përbëhet nga 25 vende të BE-së, duke përfshirë Islandën, Lihtenshtajnin, Norvegjinë dhe Zvicrën.

Irlanda dhe Qiproja janë anëtare të BE-së, por nuk marrin pjesë në Shengen. //a.i/

The post BRUKSEL – BE zëvendëson vulat e pasaportave me një bazë të dhënash digjitale appeared first on Agjencia Telegrafike Shqiptare.

TEL AVIV, 30 korrik /ATSH-DPA/- Ndihma humanitare ka hyrë në Rripin e Gazës për të katërtën ditë radhazi, ndërsa autoritetet izraelite përballen me presion në rritje për të lehtësuar kushtet katastrofike për palestinezët.

Organizata ushtarake izraelite COGAT tha se 220 kamionë me ndihma kaluan sot në brezin bregdetar dhe po prisnin shpërndarjen.

Më shumë se 200 kamionë me ndihma hynë dje në Gazë, të cilat iu dorëzuan punonjësve të Kombeve të Bashkuara dhe organizatave të tjera për shpërndarje.

Të dielën, Izraeli lejoi shpërndarjen e ndihmave në shkallë të gjerë – për herë të parë pas disa muajsh.

Që atëherë, rreth 200 kamionë në ditë kanë hyrë në Gazë – një rritje e konsiderueshme, por jo aq sa është e nevojshme.

Sipas OKB-së, vëllimi aktual i ndihmës përmbush më pak se gjysmën e nevojave të një popullsie që ekspertët ndërkombëtarë paralajmërojnë se po përballet me krizën e urisë.

Përpara se Izraeli të shtrëngonte bllokadën e tij në mars, rreth 500 kamionë hynin në Gazë çdo ditë.

Autoriteti kryesor ndërkombëtar për krizat ushqimore paralajmëroi dje se në Rripin e Gazës, aktualisht po zhvillohej skenari më i keq i urisë. //a.i/

The post FOKUS – Kamionët me ndihma humanitare hyjnë në Gazë për të katërtën ditë radhazi appeared first on Agjencia Telegrafike Shqiptare.

TIRANË, 29 korrik /ATSH/- E vendosur në cepin juglindor të Evropës, Shqipëria ofron një ndërthurje të bukurisë natyrore magjepsëse, kulturës së pasur lokale dhe çmimeve të përballueshme – që kohët e fundit ka filluar të tërheqë vëmendjen e turistëve – në kërkim të përvojave autentike evropiane, sipas “Travel and Tour World” (TTW).

Me një vijë bregdetare që shtrihet përgjatë deteve Adriatik dhe Jon, rajoni jugor i Shqipërisë, i njohur si Riviera Shqiptare, është një parajsë.

Këtu, turistët do të gjejnë ujëra të kristalta, plazhe të pastra dhe një atmosferë të qetë – pa turma vizitorësh apo çmime të larta si në destinacionet e tjera të njohura mesdhetare.

Vend i përballueshëm dhe i arritshëm

Një nga aspektet më joshëse të vizitës në Shqipëri është përballueshmëria e saj.

Ndryshe nga vendet e tjera mesdhetare si Bregu i Amalfit ose Santorini, Shqipëria ofron çmime  shumë më të ulëta për akomodim, ngrënie dhe aktivitete të tjera.

Një natë në një shtëpi mysafirësh ose në një hotel të vogël – zakonisht kushton midis 20-30 euro.

Të ngrënit jashtë është po aq lirë. Një vakt tipik në një restorant lokal, duke përfshirë ushqime të freskëta deti, sallatë dhe një pije, mund kushtojë rreth 10–15 euro.

Edhe një birrë freskuese pranë plazhit kushton rreth 1–1,50 euro.

Zhvillimi i infrastrukturës

Infrastruktura e Shqipërisë është përmirësuar, vitet e fundit për të mbështetur numrin në rritje të turistëve që vizitojnë vendin.

Qeveria ka investuar në projekte transporti për ta bërë më të lehtë për vizitorët të eksplorojnë vijën bregdetare të mrekullueshme të vendit dhe zonat në brendësi.

Një shembull i dukshëm është Tuneli i Llogarasë i ndërtuar rishtazi, i cili ka ulur ndjeshëm kohën e udhëtimit midis qytetit bregdetar të Vlorës dhe Rivierës Shqiptare.

Ky itinerar i ri e shkurton udhëtimin nga 30 minuta në vetëm 7, duke e bërë atë më të përshtatshëm, efikas dhe të shpejtë – për të aksesuar plazhet e virgjëra të Shqipërisë jugore.

Për më tepër, hapja e Aeroportit Ndërkombëtar të Vlorës ka rritur aksesin në Shqipëri, duke ofruar fluturime direkte nga qytetet kryesore evropiane.

Ky zgjerim po ndihmon në pozicionimin e Shqipërisë si një nga destinacionet më të spikatura në hartë për turistët nga vende të tilla si Britania e Madhe, Gjermania dhe më gjerë.

Kulturë e pasur dhe bukuri natyrore

Shqipëria është një vend i pasur me trashëgimi kulturore dhe bukuri natyrore.

Qytetet e Beratit dhe Gjirokastrës, të listuara nga UNESCO, të njohura për arkitekturën e tyre osmane, ofrojnë një pamje magjepsëse të së kaluarës së vendit.

Adhuruesit e historisë mund të vizitojnë rrënojat e lashta të Butrintit dhe Apollonisë – ku shfaqen mbetjet e Greqisë së Lashtë, Romës dhe Perandorisë Bizantine.

Përveç vendeve të saj historike, Shqipëria është shtëpia e një shumëllojshmërie mrekullish natyrore.

Alpet Shqiptare, Parku Kombëtar i Lumit Vjosa dhe Liqeni i Shkodrës ofrojnë hapësirë të bollshme për aventura në natyrë, të tilla si ecje në natyrë, rafting dhe vëzhgim i jetës së egër.

Peizazhet e larmishme të Shqipërisë – nga malet dhe lumenjtë te plazhet dhe pyjet – ofrojnë gjithçka për çdo vizitorë.

Ndikimi ekonomik i turizmit: Industria në rritje e Shqipërisë

Turizmi është një sektor thelbësor i ekonomisë së Shqipërisë, duke kontribuar mbi 20% në PBB-në e vendit.

Në vitet e fundit, qeveria shqiptare ka njohur vlerën e turizmit dhe vazhdon të investojë në tërheqjen e vizitorëve ndërkombëtarë.

Bordi i turizmit i vendit ka nisur fushata ndërkombëtare që synojnë turistë nga Britania e Madhe, Gjermania dhe vende të tjera evropiane.

Këto përpjekje synojnë ta pozicionojnë Shqipërinë si një destinacion kryesor për vizitorët që kërkojnë një arratisje unike dhe të përballueshme në Mesdhe.

Qëndrueshmëria sipas planit të strategjisë së turizmit të Shqipërisë

Shqipëria po bën hapa përpara në promovimin e praktikave të turizmit të qëndrueshëm.

Një nga arritjet më të rëndësishme mjedisore të vendit është përcaktimi i lumit Vjosa si park kombëtar, duke siguruar ruajtjen e njërit prej lumenjve të fundit të egër të Evropës.

Ky angazhim për mbrojtjen e burimeve natyrore të Shqipërisë është pjesë e një përpjekjeje më të gjerë për të balancuar rritjen e turizmit me ruajtjen e mjedisit.

Qeveria po punon ngushtë me organizatat mjedisore për të siguruar që zhvillimi i ardhshëm të jetë në përputhje me praktikat e qëndrueshme.

Pse Shqipëria është sekreti i Mesdheut?

Shqipëria shquhet si një nga perlat e fundit të pazbuluara të Evropës.

Me plazhet e saj të pastra, historinë e pasur dhe çmimet miqësore, ajo ofron një përvojë udhëtimi autentike dhe të shëndetshme – që është gjithnjë e më e rrallë në destinacionet turistike të komercializuara.

Banorët miqësorë dhe mikpritës të vendit, aksesueshmëria e lehtë, përballueshmëria dhe atraksionet e larmishme e bëjnë atë zgjedhjen për një arratisje nga vendet e mbipopulluara.

Pavarësisht nëse jeni duke pushuar në plazhet e pastra të Ksamilit, duke bërë ecje në Alpet Shqiptare apo duke shijuar ushqime të freskëta deti në një restorant lokal, Shqipëria ofron një përvojë të paharrueshme me një kosto shumë më të ulët se destinacionet e njohura.

Ndërsa turizmi në Shqipëri vazhdon të rritet, është e qartë se kjo parajsë mesdhetare është në rrugën e saj për t’u bërë një destinacion që duhet vizituar me patjetër – për një pushim autentik dhe me buxhet të përballueshëm. //a.i/

https://www.travelandtourworld.com/news/article/albania-europes-hidden-mediterranean-gem-for-affordable-travel/

The post “Travel and Tour World”: Pse Shqipëria është sekreti i Mesdheut? appeared first on Agjencia Telegrafike Shqiptare.

LONDËR, 30 korrik /ATSH/- Jeni duke kërkuar një vend për pushime me buxhet të ulët? Ne ju rekomandojme pese destinacionet më të mira në vitin 2025 – nga Spanja në Shqipëri – për pushime të përballueshme, shkruan Sarah Marshall në një artikull të botuar në të përditshmen britanike “Independent”.

Shumica e turistëve britanikë do të donin të eksploronin destinacione të reja dhe në zhvillim, në vend të destinacioneve të njohura, të mbipopulluara dhe të shtrenjta për pushime.

Për fat të mirë, ka mjaft mundësi për të zgjedhur nëse doni të kurseni para pa bërë kompromis me diellin apo cilësinë e përvojave.

Shqipëria: Vendi më i mirë për aventura

Qoftë duke shëtitur nëpër rrugët me kalldrëm, duke zbuluar majat e maleve apo duke notuar në ujërat e kaltra të shndritshme, Shqipëria ka një ngjashmëri të madhe me fqinjën e saj elegante përtej detit Adriatik.

Por krahasuar me Italinë, plazhet janë më të qeta, vendet e fshehura janë më të shumta dhe çmimet janë dukshëm më të lira.

I specializuar në udhëtime për turistë 18-35 vjeç, “Contiki” është operatori i parë turistik për të rinj që ofron udhëtime në të gjithë vendin ballkanik.

Mësoni rreth të kaluarës përmes arkitekturës osmane, fashiste dhe sovjetike të kryeqytetit, Tiranës, ecni në shtigjet që të çojne në Parkun Kombëtar të Valbonës dhe relaksohuni në plazhet e arta të Rivierës Shqiptare.

Udhëtimi tetëditor kushton 1,025 euro për person, duke përjashtuar fluturimet.

“Independent” rendit vendet më të mira për t’u vizituar në vitin 2025 – për pushime të përballueshme:

1. Vendi më i mirë për aventura: Shqipëria
2. Vendi më i mirë për plazhet: El Gouna, Egjipt
3. Vendi më i mirë për familjet: Galicia, Spanjë
4. Vendi më i mirë për ski: Voss, Norvegji
5. Vendi më i mirë për natyrën: Bosnjë-Hercegovina

//a.i/

https://www.independent.co.uk/travel/news-and-advice/best-cheap-holidays-spain-albania-flights-b2797926.html

The post “Independent”: Shqipëria mes destinacioneve më të mira për pushime në vitin 2025 appeared first on Agjencia Telegrafike Shqiptare.

KIEV, 29 korrik /ATSH-DPA/- Presidenti ukrainas Volodymyr Zelensky tha sot se vendi i tij ishte afër arritjes së një marrëveshjeje financimi me Holandën për prodhimin e dronëve në Ukrainë.

Në fjalimin e tij të mbrëmjes drejtuar kombit, Zelensky tha se priste që marrëveshja të përfundonte këtë javë.

“Do të sigurohen 400 milionë euro shtesë për kompanitë tona ukrainase, për prodhuesit e dronëve – në një marrëveshje financimi me Holandën këtë javë”, tha ai.

Ukraina, aktualisht po zgjeron prodhimin e saj të dronëve me ndihmën financiare perëndimore në mënyrë që të forcojë mbrojtjen e saj kundër Rusisë.

Zelensky kujtoi disa sulme vdekjeprurëse ruse që kishin ndodhur gjatë ditës, më i rëndi prej të cilëve ishte ndaj një burgu pranë qytetit të Zaporizhias.

“Të paktën 17 të burgosur u vranë në sulmin ajror dhe 42 të tjerë u plagosën”, tha guvernatori rajonal i Zaporizhias, Ivan Fedorov, në Telegram. //a.i/

The post KIEV – Zelensky: Ukraina shumë pranë marrëveshjes me Holandën për prodhimin e dronëve appeared first on Agjencia Telegrafike Shqiptare.

NJU JORK, 29 korrik /ATSH/-  Aktori i “The Dark Knight Rises”, Alon Aboutboul ka vdekur sot në moshën 60-vjeçare, sipas “New York post”.

Aboutboul vdiq sot në mëngjes – pasi humbi ndjenjat në plazhin HaBonim, në Tel Aviv.

Kalimtarët pretenduan se aktori izraelit po notonte në ujë dhe kur doli, u tha njerëzve se nuk ndihej mirë përpara se të rrëzohej dhe të humbiste ndjenja.

Paramedikët nxituan në vendngjarje dhe kaluan një orë duke u përpjekur ta ringjallnin Aboutboul, por nuk patën sukses.

Shkaku i vdekjes aktualisht mbetet i panjohur.

Aktori i ndjerë thuhet se ka lënë pas bashkëshorten e tij, Shir Bilia, dhe katër fëmijët e tyre.

Aboutboul luajti rolin e fizikantit bërthamor rus, Dr. Leonid Pavel, në filmin “The Dark Knight Rises” të vitit 2012, filmi i tretë dhe i fundit në trilogjinë “Batman” të Christopher Nolan.

I lindur më 28 maj 1965, në Kiryat Ata, Izrael, Aboutboul pati rolin e tij të famshëm në filmin “Two Fingers from Sidon” në vitin 1986.

Dy vjet më vonë, ai u shfaq në filmin “Rambo III” përkrah Sylvester Stallone.

Aboutboul vazhdoi të luante në filmin thriller aksion të Ridley Scott në vitin 2008 “Body of Lies” dhe në filmin thriller politik të vitit 2016 “London Has Fallen”.

Ai luajti gjithashtu në filmin dramatik “Septembers of Shiraz” me protagonistë Adrien Brody dhe Salma Hayek, premiera e të cilit u shfaq në Festivalin e Filmit në Toronto në vitin 2015.

Në televizion, Aboutboul u shfaq në episodet e “Snowfall”, “Homeland”, “Fringe”, “NCIS”, “The Mentalist”, “Castle”, “The Leftovers”, “Twin Peaks”, “Madam Secretary” dhe “Hawaii Five-0”.

Sipas IMDb-së së tij, Aboutboul do të luante në filmin e ardhshëm “Jacob’s Dream”, i cili është në fazën e para-prodhimit.

Gjatë karrierës së tij, ai fitoi çmimin si Aktori më o Mirë në filmin “Out of the Blue” në Festivalin e Filmit në Jerusalem dhe çmimin si Aktori më i Mirë Mbështetës në Çmimet e Akademisë Izraelite të Filmit (Çmimet Ophir) në vitin 2003. //a.i/

The post Aktori i “The Dark Knight Rises” Alon Aboutboul vdes në moshën 60-vjeçare appeared first on Agjencia Telegrafike Shqiptare.

ROMË, 29 korrik /ATSH-ANSA/- Ylli i muzikës italiane dhe ndërkombëtare, Livio Macchia, kitaristi i grupit “I Camaleonti”, vdiq sot në moshën 83-vjeçare.

Pavarësisht sëmundjes me të cilën luftonte prej disa vitesh, më 30 qershor në Roca Nuova, ai arriti të performonte në një koncert madhështor – si pjesë e “BluFestival”, eventit veror të organizuar nga Bashkia e Melendugno-s – me rastin e 60-vjetorit të grupit muzikor “I Camaleonti”.

Livio Macchia lindi më 9 nëntor të vitit 1941, në Acquaviva delle Fonti, në provincën e Barit.

Duke u rritur midis Pulias dhe Lombardisë, ai zbuloi pasionin për basin dhe vokalin që në fëmijëri, duke filluar performancat e tij të para në fillim të viteve 1960.

Më pas ai u transferua në Milano, ku themeloi grupin muzikor te Pop-it “I Camaleonti” me Paolo De Ceglie dhe Riki Maiocchi.

Grupi regjistroi hite të famshme si “L’ora dell’amore”, “Applausi”, “Eternità”, “Viso d’angelo” dhe “Perché ti amo”.

“I Camaleonti” u formuan në vitin 1963, në Milano.

Grupi përfshinte Livio Macchia (kitarë), Antonino Cripezzi (tastierë), Paolo de Ceglie (bateri) dhe Gerardo Manzoli (bas).

Në vitin 1965, grupi u plotësua me ardhjen e Riki Maiocchi në vokal dhe kitarë.

Hiti i parë i grupit ishte “Sha-La-La-La (La-La-La-La)”.

Në vitin 1966, vokalisti dhe kitaristi Riki Maiocchi u largua nga grupi për të ndjekur një karrierë solo dhe u zëvendësua nga Mario Lavezzi.

Me ardhjen e Lavezzi, grupi filloi gradualisht të kalonte në një tingull më melodik Pop, duke arritur sukses me “Portami tante rose” në vitin 1935 – e kompozuar nga Cesare Andrea Bixio dhe Michele Galdieri.

Midis viteve 1968 dhe 1973, “I Camaleonti” patën katër këngë që kryesuan në top listat italiane, duke përfshirë “Applausi”, “Io per lei” dhe “L’ora dell’amore”.

Midis viteve 1970 dhe 1993, ata morën pjesë në Festivalin e Muzikës Sanremo pesë herë (herën e fundit së bashku me Dik Dik dhe këngëtarin kryesor të “Equipe 84”, Maurizio Vandelli), duke u renditur të tretët në vitin 1979 me “Quell’attimo in più”.

Pavarësisht ndryshimeve të shumta në formacion, grupi është ende aktiv deri më sot. //a.i/

The post Ylli i muzikës italiane dhe ndërkombëtare Livio Macchia vdes në moshën 83-vjeçare appeared first on Agjencia Telegrafike Shqiptare.

UASHINGTON, 29 korrik /ATSH/- Presidenti i SHBA-së, Donald Trump tha sot se ai dhe kryeministri britanik Keir Starmer nuk kishin diskutuar rreth planit të Londrës për të njohur shtetin palestinez, në rast se Izraeli nuk ndërmerrte një numër hapash për të përmirësuar jetën e palestinezëve, sipas “Reuters”.

Starmer tha sot se Britania e Madhe ishte e përgatitur të njihte shtetin palestinez në shtator, në Asamblenë e Përgjithshme të Kombeve të Bashkuara, në përgjigje të zemërimit në rritje të publikut për krizën e urisë në Gazë.

“Ne nuk e diskutuam kurrë këtë”, u tha Trump gazetarëve në bordin e “Air Force One”, ndërsa udhëtonte për në SHBA, pasi u takua me Starmer në Skoci.

“Njohja e shtetit palestinez do të shpërblente grupin militant palestinez, Hamas”, tha Trump.

“Ju do të shpërbleni Hamasin nëse e bëni këtë. Nuk mendoj se ata duhet të shpërblehen”, tha ai.

“SHBA-ja ka dërguar para për ndihmat ushqimore për palestinezët në Gazë. Dua të sigurohemi që paratë të shpenzohen me mençuri dhe me gjykim të drejtë, dhe që ushqimi të shpërndahet në mënyrën e duhur”, tha Trump. //a.i/

The post SHBA – Trump: Njohja e Palestinës shpërblen Hamasin appeared first on Agjencia Telegrafike Shqiptare.

STOKHOLM, 29 korrik /ATSH/- Negociatorët tregtarë kinezë dhe amerikanë përfunduan sot takimin e tyre dyditor në Stokholm – pa një rezolutë për të parandaluar rritjen e tarifave në nivele ultra të larta që formuan një bllokadë efektive në tregtinë midis dy ekonomive më të mëdha në botë, sipas CNN.

Por këshilltarët tregtarë të Trump dhe homologët e tyre kinezë shprehën një notë optimiste.

Pa një marrëveshje, SHBA-ja dhe Kina janë gati të vendosin sërish tarifa historike ndaj importeve të njëra-tjetrës duke filluar nga 12 gushti.

Megjithatë, duke folur me gazetarët nga Stokholmi, sekretari amerikan i Thesarit, Scott Bessent dhe ambasadori amerikan i Tregtisë, Jamieson Greer thanë se takimi dyditor ishte “konstruktiv” dhe sugjeruan se një marrëveshje për të zgjatur pauzën 90-ditore te tarifave të arritur në mesin e majit, ishte e mundshme.

“Vetëm për të zbutur retorikën, takimet ishin shumë produktive”, tha Bessent.

Ata thanë se ende nuk është marrë një vendim nëse do të zgjatet pauza e tarifave të jashtëzakonshme të secilit vend, sepse presidenti Donald Trump duhet ta marrë këtë vendim.

“Lidhur me një pauzë të mundshme, ne do të kthehemi në Uashington, do të flasim me presidentin Trump, nëse kjo është diçka që ai dëshiron të bëjë”, tha Greer.

“Sigurisht, që është në diskutim e sipër”, shtoi ai.

“Sapo zhvillova një bisedë telefonike me Scott Bessent. Ai pati një takim shumë të mirë me negociatorët e Kinës”, tha sot Trump duke folur me gazetarët.

“Dhe duket se ata do të më informojnë nesër, dhe ne ose do ta miratojmë ose jo, por ai u ndje shumë mirë në takim”, shtoi Trump.

Ai tha gjithashtu se planifikon të takohet me presidentin kinez, Xi Jinping deri në fund të këtij viti.

Li Chenggang, përfaqësuesi i Tregtisë Ndërkombëtare për Ministrinë Kineze të Tregtisë, u tha sot gazetarëve pas përfundimit të bisedimeve – se të dyja palët do të vazhdonin përpjekjet për zgjatjen e pauzës tarifore.

Bessent tha se deklarata e Li nuk duhet të merret si një konfirmin i një marrëveshjeje për zgjatjen e tarifave.

“Zëvendësministri kinez tha se ne kishim rënë dakord për një pauzë. Nuk kemi rënë dakord. Asgjë nuk është rënë dakord derisa të flasim me presidentin Trump”, tha Bessent, duke iu përgjigjur një pyetjeje nëse kishte një marrëveshje për të zgjatur afatin e 12 gushtit.

“Presidenti ka diskrecionin për të ndryshuar normën në varësi të rrethanave që kemi”, tha Greer.

Në maj, Kina ra dakord të ulë tarifat për mallrat amerikane nga 125% në 10%, ndërsa SHBA-ja ra dakord të ulë tarifat për mallrat kineze nga 145% në 30%.

Greer tha se tarifat ndaj mallrave kineze të dërguara në SHBA mund të rriten me rreth 34% shtesë – nëse nuk arrihet një marrëveshje deri më 12 gusht – nën nivelin maksimal prej 145%.

“Vetëm pse takimi përfundoi pa një marrëveshje, nuk do të thoshte se nuk do të arrihet një marrëveshje para afatit të 12 gushtit”, theksoi Bessent. //a.i/

00000000000000

Zyrtarët amerikanë dhe kinezë përfunduan sot bisedimet dyditore në Stokholm – që synonin trajtimin e mosmarrëveshjeve ekonomike afatgjata dhe tërheqjen nga një luftë tregtare në përshkallëzim midis dy ekonomive më të mëdha në botë, sipas “Reuters”.

Ndërsa nuk u njoftoi ndonjë progres, negociatori kryesor tregtar i Kinës, Li Chenggang tha se të dy palët ranë dakord për një marrëveshje për të zgjatur pauzën e tarifave – një pezullim 90-ditor të tarifave – të arritur në mesin e majit, pa specifikuar se kur dhe për sa kohë mund të hyjë në fuqi një zgjatje e tillë.

Zëvendësministri kinez i Tregtisë, Li Chenggang tha se vendi i tij dëshiron që marrëveshja e vazhdueshme e tarifave midis dy palëve, e cila parashikon tarifa prej 30% për mallrat e dërguara nga Kina në SHBA, të vazhdojë. //a.i/

The post STOKHOLM – SHBA-ja dhe Kina përfundojnë bisedimet dyditore, pauza e tarifave mbetet në fuqi appeared first on Agjencia Telegrafike Shqiptare.

MADRID, 29 korrik /ATSH-DPA/- Një zjarr masiv që po digjet në Spanjën qendrore ka shkatërruar më shumë se 500 hektarë pyje dhe shkurre, sipas të dhënave zyrtare.

“Situata nuk është inkurajuese”, tha Angel Iglesias, drejtor teknik i zjarrfikjes në qytetin, Mombeltran, rreth 95 kilometra në perëndim të Madridit.

Zjarrfikësit kanë luftuar me flakët, të cilat shpërthyen dje në mbrëmje, me avionë dhe helikopterë, ndërsa ekipet në terren po punojnë për të krijuar breza zjarri për të parandaluar përhapjen e mëtejshme të flakëve.

“Megjithatë, erërat e forta vazhduan të përhapnin flakët, disa prej të cilave ishin disa metra të larta”, tha Iglesias, duke vënë në dukje se kishte shumë bimësi të përfshirë nga zjarri në terrenin malor.

Shërbimi i Mbrojtjes Civile njoftoi në X se një zjarrfikës kishte vdekur gjatë rrugës për në vendngjarje kur automjeti e tij doli nga rruga.

Zona sapo ishte rikuperuar nga një zjarr shkatërrues pyjor në vitin 2009.

Ekspertët kanë paralajmëruar se shumë nga pyjet e Spanjës nuk po mirëmbahen në mënyrë të mjaftueshme dhe se reshjet e tepërta të shiut në fillim të vitit kanë çuar në një grumbullim të bimësisë, e cila është tharë nga moti i nxehtë i javëve të fundit.

“Gjatë 50 viteve të fundit, sipërfaqja pyjore është rritur me rreth 20% pasi vendet bujqësore janë braktisur”, tha eksperti i pyjeve, Rosendo Castello. //a.i/

The post SPANJË – Zjarri masiv djeg 500 hektarë pyje appeared first on Agjencia Telegrafike Shqiptare.

LONDËR, 29 korrik /ATSH-DPA/- Britania e Madhe do ta njohë shtetin e Palestinës në shtator para Asamblesë së Përgjithshme të OKB-së, nëse Izraeli nuk e lehtëson krizën në Gazë, tha sot kryeministri britanik, Keir Starmer në takimin e kabinetit qeveritar.

“Ky hap do të ndërmerret nga Britania e Madhe – vetëm nëse qeveria izraelite nuk arrin një armëpushim në Gazë; nuk e bën të qartë se nuk do të ketë një aneksim të Bregut Perëndimor dhe nuk angazhohet në një proces afatgjatë paqeje që ofron një zgjidhje me dy shtete”, sipas një njoftimi nga mbledhja e Kabinetit.

“Ne presim që të paktën 500 kamionë të hyjnë në Gaza çdo ditë – por e vetmja mënyrë për t’i dhënë fund kësaj krize humanitare është përmes një zgjidhjeje afatgjatë”, tha Starmer duke folur nga “Downing Street”.

“Ne po mbështesim përpjekjet e SHBA-së, Egjiptit dhe Katarit për të siguruar një armëpushim jetësor’, shtoi ai.

“Ky armëpushim duhet të jetë i qëndrueshëm dhe duhet të çojë në një plan më të gjerë paqeje, të cilin po e zhvillojmë me partnerët tanë ndërkombëtarë”, tha Starmer.

Kryeministri britanik tha se do të bënte një vlerësim se sa shumë i kanë përmbushur palët këto hapa përpara se të merrte një vendim përfundimtar për një zgjidhje me dy shtete.//a.i/

The post LONDËR – Starmer: BM do të njohë shtetin palestinez nëse Izraeli nuk e lehtëson krizën në Gaza appeared first on Agjencia Telegrafike Shqiptare.

ROMË, 29 korrik /ATSH/- Popullsia në moshë pune e Italisë pritet të tkurret me më shumë se një të pestën gjatë 25 viteve të ardhshme, tha sot agjencia kombëtare e statistikave “Istat”, duke theksuar sfidat e rënda demografike të vendit, sipas “Reuters”.

Italia po përballet me një rënie të nivelit të lindjeve dhe një popullsi në tkurrje.

Vitin e kaluar lindjet e reja ranë në një nivel rekord prej rreth 370 000 – ndërsa popullsia ra me 37 000 (në 58,93 milionë), duke ndjekur një trend 10-vjeçar.

Në parashikimin e fundit demografik, “Istat” raportoi se numri i banorëve në grupmoshën 15-64 vjeç do të binte nga 37,4 milionë në vitin 2024 në 29,7 milionë në vitin 2050 – ndërsa në popullsinë totale rezidente do të kishte një rënie në 54,3% nga 63,5%.

Në të njëjtën periudhë, përqindja e banorëve mbi moshën 65 vjeç parashikohet të rritet në 34,6% të totalit krahasuar me 24,3% që është aktualisht – dhe përqindja e fëmijëve deri në moshën 14 vjeç do të binte në 11,2% nga 12,2%.

Shkalla e lindjeve në Itali, e cila është në rënie të vazhdueshme, konsiderohet një emergjencë kombëtare.

Por, pavarësisht premtimeve të kryeministres Giorgia Meloni dhe paraardhësve të saj për të trajtuar problemet, askush deri më tani nuk ka qenë në gjendje ta ndalë rënien.

“Istat” vlerësoi se popullsia rezidente e Italisë do të binte në 54,7 milionë deri në vitin 2050.

Në një raport të vitit të kaluar, “Scope Ratings” tha se demografia e Italisë ishte “më e keqja” në Evropë për sa i përket potencialit të rritjes ekonomike midis viteve 2023 dhe 2040, me një popullsi që po plaket me shpejtësi dhe që përbën një kërcënim për financat publike të tendosura. //a.i/

The post ITALI – Popullsia në moshë pune pritet të tkurret me një të pestën appeared first on Agjencia Telegrafike Shqiptare.

TEL AVIV, 29 korrik /ATSH-DPA/- Avionët nga Jordania dhe Emiratet e Bashkuara Arabe kanë hedhur edhe 52 paleta të tjera me ushqim mbi Rripin e Gazës, tha sot ushtria izraelite.

“Avionët egjiptianë gjithashtu ndihmuan në hedhjen nga ajri të ushqimeve – për herë të parë që nga e diela – kur Izraeli lejoi aksesin e ndihmave në territorin e izoluar palestinez pas disa muajsh kufizimesh”, tha ushtria izraelite (IDF).

Ushtria izraelite njoftoi dje se po zbaton pauza “humanitare” të përditshme për të lejuar që ndihma të shpërndahet në mënyrë të sigurt në Rripin e sulmuar – mes paralajmërimeve ndërkombëtare për krizën e urisë.

IDF tha se Egjipti, Jordania dhe Emiratet e Bashkuara Arabe koordinuan hedhjet nga ajri të ndihmave së bashku me Izraelin.

Organizatat e ndihmës, përfshirë Mjekët pa Kufij, e kanë kritikuar metodën e ofrimit të ndihmave – si joefektive dhe të kushtueshme krahasuar me shpërndarjen e ndihmës me kamionë.

Ata gjithashtu kanë theksuar rrezikun që u paraqitet civilëve në pritje nga hedhja e paletave, të cilat janë të bashkangjitura në parashuta.

Kancelari gjerman, Friedrich Merz tha sot se dy avionë ushtarakë ishin duke udhëtuar drejt Jordanisë, nga ku do të fillonin gjithashtu hedhjet e ndihmave nga ajri në Gazë. //a.i/

The post GAZË – Mbi 50 paleta me ushqime të hedhura nga ajri nga shtetet arabe appeared first on Agjencia Telegrafike Shqiptare.