TIRANË, 28 gusht /ATSH/ Ambasada e Shteteve të Bashkuara të Amerikës falënderoi sot Policinë e Shtetit për shërbimin në sigurinë e Ambasadës.

E Ngarkuara me Punë, Nancy VanHorn dhe Zyra Rajonale e Sigurisë i nderuan sot në një ceremoni vlerësimi për shërbimin e tyre, disa prej tyre për më shumë se 15 vjet.

Ambasada e Shteteve të Bashkuara e vlerëson thellësisht partneritetin me forcat e rendit në Shqipëri për të penguar kërcënimet dhe për të mbrojtur qytetarët tanë.

“Një falënderim për Policinë e Shtetit që e bën ambasadën tonë më të sigurt çdo ditë! Sot, e Ngarkuara me Punë Nancy VanHorn dhe Zyra Rajonale e Sigurisë i nderuan në një ceremoni vlerësimi për shërbimin e tyre – disa prej tyre për më shumë se 15 vjet! Ambasada e Shteteve të Bashkuara e vlerëson thellësisht partneritetin tonë me forcat e rendit në Shqipëri për të penguar kërcënimet dhe për të mbrojtur qytetarët tanë”, shkruan Ambasada amerikane në një postim në rrjetet sociale.

1 nga 5

/gj.m//a.f//r.e/

The post Ambasada e SHBA, ceremoni vlerësimi për shërbimin e Policisë së Shtetit appeared first on Agjencia Telegrafike Shqiptare.

TIRANË, 27 gusht /ATSH/ Kryeministri Edi Rama deklaroi sot se, “qëndresa e njerëzve tanë ka ndaluar atë që mund të kishte qenë një asgjësim masiv mjedisor, ekonomik, moral dhe largqoftë një asgjësim njerëzor me përmasa dramatike”.

Në fjalën e tij në ceremoninë e Mirënjohjes Kombëtare të dhënies së medaljeve dhe shpërblimeve për të gjithë forcat e angazhuara në operacionet e shpëtimit ndaj zjarreve, Rama u shpreh se, “edhe pse përballë një sfide të jashtëzakonshme në Delvinë, në Finiq, në Gramsh dhe në Poliçan, në Kaninë, Borsh, Piqeras, në Fushë-Arrëz dhe në Dibër dhe deri në orët e fundit në Skrapar dhe në Vlorë, qëndresa e njerëzve tanë ka ndaluar atë që mund të kishte qenë një asgjësim masiv mjedisor, ekonomik, moral dhe largqoftë një asgjësim njerëzor me përmasa dramatike”.

“Qindra mjete zjarrfikëse, helikopterë dhe edhe avionë. Pothuajse 100 misione nga ajri, qindra ndërhyrje në tokë dhe ky shtet i sfiduar si asnjë vit më parë nga zjarret nuk u thye, përkundrazi tregoi se Mekanizmi i mbrojtjes Civile nga fshati më i largët deri tek qendra e Tiranës ose anasjelltas, mundi dhe diti të jepte më të mirën edhe pse shumë ka ende për të bërë”, tha Rama.

“Sigurisht që nuk munguan edhe ekspertët online të fikjes së zjarrit, as zjarrvënësit e zakonshëm të mexhelisit tonë publik dhe dixhital, por Shqipërinë nuk e mbrojtën ata, Shqipërinë e mbrojti djersa, guximi dhe sakrifica e atyre 10 mijë e kusur njerëzve në vijën e zjarrit, pjesë e të cilëve përfaqësuese jeni edhe ju këtu”, theksoi Rama.

Kjo, shtoi ai, “është e vërteta e thjeshtë dhe e vërteta e vetme që ia vlen të thuhet me zë të lartë, ndërkohë që nga Spanja tek Franca, nga Turqia tek Portugalia, Italia e Greqia, i gjithë Mesdheu ishte në flakë si asnjëherë më parë këtë verë”.

Ram solli edhe bilancin tragjik të kësaj vere në shtetet e Mesdheut.

“Në Spanjë u zhbën totalisht afro 400 mijë hektarë. Në Portugali mbi 235 mijë hektarë, pesëfish më shumë sesa mesatarja e viteve të fundit. Në Itali afro 60 mijë hektarë. Ndërkohë që Turqia numëroi edhe 17 viktima dhe dhjetëra mijëra njerëz të evakuuar, përveçse humbi qindra mijëra hektarë tokë të mbjellë, të gjelbëruar. Ndërsa Greqia nga Kreta në Patra pa përsëri tmerr me sy. Parafytyroni që BE del nga kjo verë me mbi 1 milionë hektarë tokë të bërë shkrumb e hi”, tha Rama.

Ndaj, shtoi kreu i qeverisë, “kur dëgjojmë zëra që shajnë Shqipërinë pse nuk ka avionë zjarrfikës në pronësi duhet ta mbajmë parasysh një të vërtetë shumë të thjeshtë. Avionët nuk janë magjistarë. Ata janë ndihmës të fuqishëm, të cilët nuk na kanë munguar falë Mekanizmit Evropian të Mbrojtjes Civile, pjesë e të cilit jemi ne Shqipëria me të drejta të barabarta, por nuk janë asesi të plotfuqishëm”.

“22 avionë të gjeneratës së fundit, nuk e penguan dot përbindëshin e flakëve ta digjte dhe ta përcëllonte gjerësisht zonën e Izmirit duke hapur një plagë të dhimbshme mbi tokën e Turqisë mike dhe duke bërë të evakuohen dhjetëra mijëra njerëz”, u shpreh Rama.

“Ashtu sikundër forca më e madhe ajrore e planetit nuk mundi dot ta shmangte shkrumbimin tragjik të një vendbanimi të madh sa Tirana, në Los Angelos”, nënvizoi Rama.

Rama theksoi se, “avionët janë një krah i fuqishëm në betejë padyshim. Edhe ne do të kemi së shpejti flotën e avionëve tanë e cila do të nisë të ndërtohet me dy avionë zjarrfikës, por magjia, nëse mund ta quajmë kështu, është bashkërendimi dhe sakrifica në tokë. Sot ne jemi këtu pikërisht për sakrificën në tokë dhe patjetër po përgatitemi për çfarë duhet dhe padyshim mund të bëjmë më shumë dhe mund të bëjmë më mirë. Parandalim më të mençur, pastrim pyjesh, krijim korridoresh natyrore, futje në përdorim të më shumë dronëve për monitorim me kamera termike dhe futjen në përdorim gjerësisht të dronëve për mbjelljet e reja në sipërfaqet e djegura. Teknologji dhe inteligjencë me sisteme alarmi të hershëm dhe një funksionim më i mirë, falë edhe investimeve që do të bëjmë më tej, i qendrave të integruara të kontrollit për të pasur një reagim më të shpejtë me mjete tokësore”.

Por, shtoi kryeministri, “të gjitha këto nuk na çojnë larg pa edukimin dhe ndërgjegjësimin, gjë që kërkon që çdo shkollë dhe çdo institucion, por duke filluar nga shkolla të bëhet pjesë e vëmendjes, e mbrojtjes dhe e ripërtëritjes kombëtare për pyjet, ku nxënësit jo vetëm mësojnë, por marrin pjesë në mbjellje, në përkujdesje dhe një solidaritet akoma më të madh ndërkombëtar”.

Rama falënderoi përfaqësuesit e BE-së dhe të vendeve mike, pasi theksoi ai, “falë rrjetit të solidariteti dhe falë integrimit të Shqipërisë në Mekanizmin e Mbrojtjes Civile Evropiane ne ia kemi dalë më së miri të evitojmë më të keqen. Dhe Kroacia, Greqia, Hungaria, Çekia, Sllovakia, Suedia dhe si gjithmonë Italia, meritojnë një falënderim të posaçëm sepse në zinxhirin e Mekanizimit dërguan në vazhdimësi mjete ajrore për fikjen e zjarreve”.

/gj.m/j.p/

The post Rama: Së shpejti do të kemi flotën e avionëve tanë zjarrfikës appeared first on Agjencia Telegrafike Shqiptare.

TIRANË, 27 gusht/ATSH/ Kryeministri Edi Rama u shpreh sot se, në përballje me flakët e zjarrit dhe temperaturat e “ferrit” të verës, vendi ynë ka një potencial njerëzor që dëshmoi se nuk e lë kurrë Shqipërinë në baltë.

Nga ceremonia e Mirënjohjes Kombëtare të dhënies së medaljeve dhe shpërblimeve për të gjithë forcat e angazhuara në operacionet e shpëtimit ndaj zjarreve, Rama tha se avionët nga jashtë i marrin edhe vendet e tjera, sepse i tillë është Mekanizmi Evropian i Mbrojtjes.

“Vendet në pamundësi për të përballuar këtë lloj emergjence, marrin ndihmë edhe nga të tjerët. Reciprokisht këmbejnë mjetet”, tha Rama.

Kreu i Ekzekutivit shprehu një falënderim të veçantë për Emiratet e Bashkuara që u gjenden me shumë shpejtësi duke dërguar helikopterë dhe avionë.

Rama tha se “duke nderuar 24 ushtarë, policë, zjarrfikës me medalje ne duam të nderojmë Shqipërinë që tregoi se “po” kemi të meta, kemi ende shumë për të investuar në mjete dhe sisteme inteligjente, por nuk mund të dilnim nga kjo verë ferri për nga temperaturat pa plagë. Por, kemi mbi të gjitha një kapital njerëzor që nuk e lë më kurrë Shqipërinë në baltë”.

“Mirënjohje të veçantë dhe ky kapitull i ndezur jo vetëm nga flakët e pyjeve, por dhe të fjalëve, sot merr një mesazh të vetëm si epilog, se edhe përballë flakëve më të egra Shqipëria tregon forcë të madhe proporcionale. Sa më e madhe sfida, aq më i madh solidariteti, aq më e fortë ndjenja e përkushtimit dhe aq më të angazhuar dhe të motivuar profesionalisht njerëzit me uniformë”, pohoi Rama.

Kryeministri u ndal edhe te nevoja për përmirësimin më tej të sistemit, duke përfshirë teknologjinë dhe duke punuar për parandalimin.

“Duke menduar për zjarret e ardhme kur temperaturat janë të ulëta dhe duke u përgatitur si për një  ndeshje të radhës me një përbindësh që do të bëhet edhe më i egër. Le të mbështesim më fuqimisht edhe kapitalin njerëzor, duke bërë gjithçka për të rritur edhe mbështetjen financiare”, vijoi Rama.

Rama cilësoi se i është përgjigjur “pozitivisht dhe me përulësi propozimeve të bëra nga ministritë për të bërë dekorimet dhe për të shpërndarë disa medalje, si një shenjë simbolike mirënjohjeje dhe një mesazh për të gjithë këtë trupë, e cila meriton nderimin më të posaçëm”.

/e.i/j.p/

The post Mirënjohja për zjarrfikësit, Rama: Kemi kapital njerëzor që nuk e lë më kurrë Shqipërinë në baltë appeared first on Agjencia Telegrafike Shqiptare.

1 nga 7

/e.xh//a.f/

The post Kroacia kujton Ditën e Fitores dhe të Veteranëve, FA në paradën Zagrebit appeared first on Agjencia Telegrafike Shqiptare.

TIRANË, 31 korrik/ATSH/ Në ambientet e Akademisë së Sigurisë u zhvillua sot ceremonia përkujtimore për ish-drejtuesin e lartë të Policisë së Shtetit, Arben Zylyftari, i cili humbi jetën 25 vjet më parë, në krye të detyrës.

Në ceremoni morën pjesë zëvendësdrejtori i Përgjithshëm i Policisë së Shtetit, Sokol Bizhga, drejtues të lartë të Policisë së Shtetit, drejtori i Akademisë së Sigurisë Ilirjan Mandro, familjarë dhe të afërm të Dëshmorit të Atdheut.

Gjatë fjalëve të tyre, drejtuesit Bizhga dhe Mandro vlerësuan veprën e ish-drejtuesit të lartë të Policisë së Shtetit Arben Zylyftari, i cili humbi jetën gjatë përballjes me elementin kriminal.

Ata u shprehën se kujtimi i tij do të vlerësohet ndër breza dhe se emri i tij do të jetë gjithmonë pjesë e Policisë së Shtetit.

Bashkëshortja dhe djali i Dëshmorit të Atdheut, gjatë fjalëve të tyre, kujtuan me mall familjarin e tyre dhe shprehën mirënjohje për drejtuesit e Policisë së Shtetit, që kujtojnë ndër vite punonjësit që sakrifikuan jetën e tyre, për të mirën e të gjithëve.

Në fund të ceremonisë, të panishmit vendosën kurora me lule në bustin e Dëshmorit të Atdheut Arben Zylyftari.

1 nga 12

/m.m/j.p/

The post 25 vjet nga rënia në krye të detyrës, përkujtohet Dëshmori i Atdheut Arben Zylyftari appeared first on Agjencia Telegrafike Shqiptare.

BIRMINGHAM, 30 korrik /ATSH/- Mijëra fansa mbushën sot rrugët e Birminghamit për t’i dhënë lamtumirën e fundit dhe për të nderuar Ozzy Osbourne, vokalistin legjendar të “Black Sabbath”, sipas “The Guardian”.

Familja Osbourne, Sharon, Kelly, Jack dhe Aimee bënë homazhet e tyre në funeral përpara se të shkonin në një ceremoni private.

E veja e Ozzy Osbourne, Sharon Osbourne, ishte në lot ndërsa iu bashkua fëmijëve të saj për t’i dhënë lamtumirën e fundit legjendës së muzikës, në Birmingham.

Ylli i heavy metal, i cili vdiq në moshën 76-vjeçare, u përkujtua me një ceremoni të veçantë në Black Sabbath Bridge, në Birmingham, qyteti ku ai u lind.

Dhjetëra mijëra fansa ishin atje për t’i dhënë lamturmirën e fundit, Ozzy Osbourne.

E gjithë familja ishte e veshur me të zeza ndërsa i bënin nderimet e tyre, bashkëshortit dhe babait të tyre të ndjerë, Ozzy Osbourne.

Familja Osbourne, përfshirë fëmijët Jack, Kelly dhe Aimee vendosen lule në Urën Black Sabbath.

Djali i Ozzy nga martesa e tij e parë me Thelma Riley, Louis, iu bashkua gjithashtu familjes.

Makina e varrimit të Ozzy ishte zbukuruar me lule vjollcë ku shkruhej emri i tij.

Kortezhi funeral përbëhej nga makina funerale “Jaguar” dhe gjashtë makina funerale “Mercedes”, të shoqëruara nga një motoçikletë dhe makinë policie.

Makina e varrimit të Osbourne u nis përgjatë Broad Street në qendër të qytetit në orën 13:00, duke u drejtuar drejt Urës së Black Sabbath.

Ishte vendi ku shumë fansa të “Black Sabbath” i bënë homazhe muzikantit me lule dhe fotografi të legjendës.

Fansat – shumë prej tyre të veshur me bluza të Ozzy Osbourne – mbërritën më herët, pranë stolit të Urës Black Sabbath në Broad Street në Birmingham, për t’i bërë homazhe këngëtarit.

Gjithashtu u ngritën postera në kujtim të muzikantit. U luajt muzika e “Black Sabbath” dhe njerëzit që mbushën rrugët thërrisnin, “Ozzy Ozzy Ozzy”.

Ozzy Osbourne vdiq tre javë pas koncertit të tij të lamtumirës, “Back to the Beginning”, në Villa Park në Birmingham – së bashku me shokët e tij të grupit Tony Iommi, Bill Ward dhe Geezer Butler.

Ai vdiq në moshën 76-vjeçare në shtëpinë e tij në Buckinghamshire, i rrethuar nga familja e tij.

Osbourne ishte babai i gjashtë fëmijëve dhe gjysh i 10 fëmijëve.

Ai kishte tre fëmijë nga martesa e tij e parë me Thelma Riley – Jessica, Louis dhe Elliot (ai adoptoi Elliot, djalin e Thelmës nga një marrëdhënie e mëparshme) – dhe tre të tjerë me bashkëshorten e tij Sharon: Aimee, Kelly dhe Jack.

Ceremonia e varrimit ishte një festë e jetës së Osbourne. Muzikantët vendas Bostin’ Brass performuan për t’i dhënë atij lamtumirën e fundit.  Eventi u zhvillua përpara një funerali privat.

Në Muzeun dhe Galerinë e Artit të Birminghamit është hapur një libër ngushëllimesh, ku ndodhet ekspozita “Heroi i Klasës Punëtore” e Ozzy Osbourne. //a.i/

The post Mijëra fansa i japin lamtumirën e fundit Ozzy Osbourne në rrugët e Birminghamit appeared first on Agjencia Telegrafike Shqiptare.

TIRANË, 29 korrik/ATSH/ Në Tiranë u zhvillua sot ceremonia e diplomimit të 90 studentëve të Akademisë së Forcave të Armatosura, 5 prej të cilëve nga Republika e Kosovës.

Në ceremoninë e diplomimit ishte i pranishëm ministri i Mbrojtjes, Pirro Vengu, si dhe ministri në detyrë i Mbrojtjes i Kosovës, Ejup Maqedonci,.

Ministri Vengu e cilësoi diplomimin e kadetëve të rinj, një moment krenarie për të diplomuarit dhe familjet e tyre, që nisin një kapitull të ri në shërbim të atdheut.

“Diploma që ju do të mbani në duart tuaja nuk është një pikë mbërritjeje, por një pikënisje. Është një rrugë që shpesh është e vetmuar, por gjithmonë e drejtë. Nuk ofron lehtësi, por ofron kuptim. Aty ku disiplina bëhet virtyt dhe sakrifica merr domethënie. Në një botë që relativizon çdo gjë, profesioni juaj mbetet i pakontestueshëm në vlerat e tij. Ju nuk përfaqësoni thjesht shtetin, por i jepni atij formë, drejtim dhe qëndrueshmëri”, u shpreh ministri Vengu

Komandanti i Shkollës së Bashkuar, Bardhyl Nuredinaj tha se betimi ushtarak para flamurit kombëtar nuk është thjeshtë një tekst por një angazhim moral, ligjor e atdhetar, një zotim për të qenë gjithmonë në shërbim të kombit, ruajtur e mbrojtur integritetin e sovranitetin e vendit, rendin kushtetues dhe për të kontribuar në paqen e sigurinë kolektive. /j.p/

The post Diplomohen 90 kadetë, Vengu: Profesion ku sakrifica merr domethënie appeared first on Agjencia Telegrafike Shqiptare.

TIRANË, 11 korrik/ATSH/ Ministri për Evropën dhe Punët e Jashtme të Shqipërisë, Igli Hasani, mori pjesë sot në ceremoninë përkujtimore të 30-vjetorit të gjenocidit të Srebrenicës.

Në ceremoni morën pjesë krerë shtetesh, ministra të jashtëm dhe përfaqësues të lartë nga e gjithë bota.

Në Srebrenicë mbi 8,000 burra dhe djem boshnjakë u vranë nga forcat serbe në korrik 1995, në një zonë të shpallur të sigurt nga Kombet e Bashkuara.

Në maj 2024, Asambleja e Përgjithshme e Kombeve të Bashkuara miratoi një rezolutë që shpall 11 Korrikun si Ditën Ndërkombëtare të Përkujtimit të Viktimave të Gjenocidit në Srebrenicë.

Në kuadër të vizitës një ditore në Bosnjë dhe Hercegovinë, ministri Hasani zhvilloi takime me homologun e tij,  Elmedin Konaković, Ministër i Punëve të Jashtme të Bosnjë dhe Hercegovinës, si dhe me Amer Kapetanović, Sekretar i Përgjithshëm i Këshillit të Bashkëpunimit Rajonal.

Bisedimet u përqendruan në zhvillimet më të fundit në rajon dhe në avancimin e agjendës evropiane të Ballkanit Perëndimor.

1 nga 12

/k.s//a.f/

The post Hasani në Srebrenicë për përkujtimin e 30-vjetorit të gjenocidit appeared first on Agjencia Telegrafike Shqiptare.

Ditën e nesërme 8 Korrik 2025, besimtarët bektashinj kremtojnë Ditën e Ashures, një nga ditët më të shenjta dhe domethënëse për komunitetin e tyre.

Në Selinë e Shenjtë të Kryegjyshatës Botërore Bektashiane në Tiranë, nga ora 10:00 deri në 11:30, nën drejtimin e Kryegjyshit Botëror, Haxhi Dede Baba Edmond Brahimaj, do të zhvillohet ceremonia përkujtimore e Ashures.

Në këtë ditë të shenjtë, Kryegjyshi ndan një mesazh të fuqishëm për unitetin dhe bashkimin e besimtarëve.

Kryegjyshata fton të gjithë besimtarët dhe dashamirësit, të bashkohen në këtë moment reflektues dhe shpirtëror.

The post Besimtarët Bektashinj festojnë Ditën e Ashures me ceremoni të veçantë në Kryegjyshatën Botërore në Tiranë appeared first on Albeu.com.

TIRANË, 25 qershor/ATSH/ Në ceremoninë solemne të organizuar me rastin e 25-vjetorit të themelimit të institucionit të Avokatit të Popullit, Kryetarja e Gjykatës Kushtetuese, Holta Zaçaj, mbajti një fjalë përshëndetëse ku theksoi rolin thelbësor që ka ky institucion në mbrojtjen e të drejtave dhe lirive të individit.

Në këtë aktivitet jubilar, ku ishin të pranishëm ambasadorë, drejtues të institucioneve të pavarura, përfaqësues të shoqërisë civile dhe partnerë ndërkombëtarë, Zaçaj u shpreh se ndihej e nderuar që ishte pjesë e një momenti kaq të rëndësishëm për demokracinë shqiptare.

“Gjykata Kushtetuese dhe Avokati i Popullit, ndonëse me kompetenca të ndryshme, ndajnë një mision të përbashkët: mbrojtjen e qytetarit nga arbitrariteti dhe abuzimi i pushtetit shtetëror”, tha Zaçaj në fjalën e saj.

Duke vënë theksin te bashkëpunimi ndërinstitucional, Kreu i Kushtetueses nënvizoi se kërkimi i opinioneve këshillimore nga Avokati i Popullit është bërë tashmë një praktikë e konsoliduar, pasi ky institucion shihet si “mik i Gjykatës” në procesin e mbrojtjes së të drejtave kushtetuese.

Zaçaj nënvizoi se “Gjykata Kushtetuese mbron Kushtetutën, kontratën mes popullit dhe pushtetit”. “Por ndërsa ne gjykojmë kushtetutshmërinë e ligjeve dhe ankimet e individëve për mbrojtjen e të drejtave të tyre kushtetuese, Avokati i Popullit na kujton atë që ligji dhe drejtësia nuk duhet të harrojë kurrë: Njeriun pas parimit”, shtoi Zaçaj.

Duke iu drejtuar të gjithë funksionarëve publikë, Zaçaj theksoi se “shëndeti i demokracisë sonë nuk matet me madhështinë e institucioneve apo me arkitekturën e komplikuar të ligjeve, por me mënyrën sesi trajtojmë më të dobëtit ndër ne”.

“Dhe nëse Avokati i Popullit ndonjëherë ose shumë herë është i papëlqyer për pushtetin, kjo do të thotë se po e kryen misionin e tij siç duhet. Për këtë arsye, institucionet tona duhet të punojnë në bashkëpunim, jo në garë. Një demokraci e maturuar nuk ndërtohet mbi institucione që mbrojnë vetveten – por mbi institucione që mbrojnë ligjin, të drejtën dhe Kushtetutën, në mënyrë që së bashku të mbrojnë qytetarin. Mos kini frikë nga zëri i Avokatit të Popullit. Kini frikë heshtjen që do të ekzistonte pa të. Mos e shihni si kritik, por si busull që orienton institucionet drejt mbrojtjes së të drejtave dhe forcimit të demokracisë”, shtoi ajo.

/m.m//a.f/

The post Zaçaj: Mos kini frikë nga zëri i Avokatit të Popullit, kini frikë heshtjen që do të ekzistonte pa të appeared first on Agjencia Telegrafike Shqiptare.

TIRANË, 24 qershor/ATSH/ Kryetarja e Kuvendit, Elisa Spiropali, në ceremoninë e 25-vjetorit të krijimit të Avokatit të Popullit, mbajtur në Pallatin e Brigadave, theksoi rëndësinë e këtij institucioni në mbrojtjen e të drejtave të qytetarëve dhe forcimin e mekanizmave demokratikë të kontrollit.

Spiropali bëri të ditur se ky institucion është ndërtuar mbi një mandat të qartë kushtetues për të mbrojtur të drejtat dhe liritë themelore të çdo qytetari dhe për të përforcuar mekanizmat e kontrollit demokratik.

Spiropali theksoi se duke qenë një institucion i ri në një shtet që vinte nga një përvojë e gjatë e shpërfilljes dhe shtypjes së të drejtave të njeriut, Avokati i Popullit ka qenë për 25 vite jo vetëm mbrojtës i këtyre të drejtave, por edhe edukues në mënyrën e operimit të institucioneve shtetërore, duke synuar një qasje më humane, më të ndërgjegjshme dhe respektuese ndaj të drejtave të qytetarit.

“Nëse ka një vijë demarkacioni ku ndahet një shtet demokratik nga një autokraci brutale, ajo është qasja e superstrukturës së shtetit ndaj qytetarit të vet. Shteti në vetvete është një instrument force, por kur një shtet kujdeset të ndërtojë dhe mirëmbajë mjete që frenojnë vetë shtetin nga tejkalimi i procesit, manifestimi i arbitraritetit dhe diktati i pashpirt i dhunës mbi frymën, atëherë mund të jemi të sigurt se po jetojmë në demokraci. Kur virtyti dobësohet, republika rrëshqet drejt tiranisë. Virtyti është ai pa të cilin rrotat brutale të makinerisë shtetërore shfrenohet,” tha Spiropali.

Në këtë 25-vjetor, Spiropali falënderoi Avokatin e Popullit për punën e vazhdueshme në mbajtjen e institucioneve të virtytshme dhe për forcimin e republikës demokratike.

Avokati i Popullit, tha ajo, ka zhvilluar një gamë të gjerë iniciativash, duke përfshirë shqyrtimin e ankesave dhe rekomandimeve ligjore që kanë ndihmuar në zbulimin e dobësive në administratë dhe forcimin e transparencës.

Përmes bashkëpunimit me Kuvendin, shtoi Spiropali, ky institucion ka kontribuar në korrigjimin e çështjeve të drejtësisë sociale, përmirësimin e shërbimeve publike dhe ngritjen e standardeve të trajtimit të grupeve më vulnerabël.

Sipas Spiropalit, Kuvendi ka pranuar dhe trajtuar me seriozitet shumicën e rekomandimeve që vijnë nga Avokati i Popullit.

“Kjo sinergji ka sjellë përmirësime të rëndësishme, si rishikimi i procedurave të mbrojtjes së fëmijëve në sistemin social, përforcimi i mbikëqyrjes së institucioneve të vuajtjes së dënimit, dhe ndërhyrjet në reformën e shërbimeve shëndetësore te pacientët kronikë“, deklaroi kryetarja e Kuvendit.

Ndërkohë, tha ajo, përpara procesit të anëtarësimit të Shqipërisë në Bashkimin Evropian, roli i Avokatit të Popullit merr më shumë rëndësi.

Sipas saj, integrimi në familjen tonë natyrale evropiane kërkon përputhje të plotë me standardet e të drejtave të njeriut dhe mekanizmat e pavarur të mbikëqyrjes.

Europa dhe institucionet e saj, mbi të gjitha, theksoi Spiropali, janë të ndërtuara mbi vlerat, ku në qendër qëndron njeriu, të drejtat dhe dinjiteti i tij.

“Eksperienca dhe ekspertiza që Avokati i Popullit ka ndërtuar gjatë 25 viteve bëhet një burim i vyer për këshillimin e reformave legjislative dhe administrative”, tha ajo.

Spiropali theksoi se sfidat e së ardhmes kërkojnë një përkushtim të përbashkët, zbatim rigoroz të rekomandimeve tuaja, bashkëpunim në ngritjen e legjislacionit bashkëkohor dhe shkëmbim të të dhënave mbi praktikat më të mira ndërkombëtare, që janë elementë thelbësorë për të forcuar besimin e qytetarëve te institucionet.

“Kuvendi do të përmirësojë procedurat e konsultimit me ju dhe do t’i dedikojë vëmendje të veçantë monitorimit të zbatimit të rekomandimeve. Së bashku mund të garantojmë që secili raport të mos mbetet vetëm një përmbledhje e situatës, por një bazë për veprime konkrete legjislative dhe administrative”, theksoi Spiropali.

Spiropali po ashtu theksoi rëndësinë e mbajtjes së takimeve të rregullta dialogu mes Kuvendit dhe Avokatit të Popullit.

1 nga 10

/j.p/

The post Spiropali: Ekspertiza e Avokatit të Popullit, burim i vyer për këshillimin e reformave legjislative dhe administrative appeared first on Agjencia Telegrafike Shqiptare.

TIRANË, 9 qershor/ATSH/ Stërvitja shumëkombëshe “Defender Europe ’25” u përmbyll me një ceremoni të veçantë, të organizuar në Ditën e Vizitorëve të Shquar.

Në këtë aktivitet morën pjesë personalitete të larta nga Shqipëria dhe partnerët ndërkombëtarë, mes të cilëve shefi i Shtabit të Përgjithshëm të Forcave të Armatosura, gjenerallejtënant Arben Kingji, e Ngarkuara me Punë e SHBA, Nancy Van Horn, Zv.ministri i Mbrojtjes Enkelejdi Joti, komandanti i Forcës së Sigurisë së Kosovës, gjenerallejtënant Bashkim Jashari, gjeneral LaPoint, gjeneral McKinney si dhe komandantë të forcave e anëtarë të komisionit Parlamentar të Sigurisë Kombëtare.

Të ftuarit ndoqën disa nga demonstrimet e trupave në kuadër të kësaj stërvitjeje, që është një ndër operacionet më të rëndësishme për forcimin e sigurisë kolektive në rajonin euroatlantik.

Në fjalën e tij përshëndetëse, gjenerallejtënant Arben Kingji vlerësoi lart angazhimin e Forcave të Armatosura të Shqipërisë dhe kontributin e aleatëve në realizimin me sukses të objektivave të përbashkëta.

Ai theksoi se pjesëmarrja aktive e FA-ve, me trupa, mjete dhe infrastrukturë, përbën një tregues të qartë të profesionalizmit dhe gatishmërisë së tyre për të përballuar sfidat e mjedisit të sigurisë bashkëkohore.

“Ky bashkëpunim i vazhdueshëm është një dëshmi e qartë e partneritetit strategjik dhe e përkushtimit të ndërsjellë për forcimin e sigurisë rajonale dhe euroatlantike. Stërvitja testoi në kohë reale gatishmërinë, ndërveprueshmërinë dhe kapacitetet reaguese të forcave pjesëmarrëse, si dhe tregoi aftësinë tonë për të mbështetur operacione të përbashkëta në një mjedis kompleks e shumëdimensional”, u shpreh Gjenerallejtënant Kingji.

Stërvitja u zhvillua në disa vende të rajonit, përfshirë Shqipërinë, Kosovën, Kroacinë, Maqedoninë e Veriut dhe Malin e Zi. Në fokus të veçantë ishte zhvillimi i aftësive për operacione të spektrit të plotë, duke përfshirë dislokimin e forcave, mbrojtjen nga sulme konvencionale dhe jo-konvencionale, mbrojtjen e infrastrukturës kritike dhe realizimin e operacioneve të përbashkëta në mjedise shumëdimensionale.

Forcat shqiptare luajtën një rol kyç në drejtimin dhe zbatimin e skenarëve stërvitorë nga rajoni i Zall-Herrit, në bashkëpunim të ngushtë me Shtabin e Brigadës Shumëkombëshe dhe oficerë nga SHBA, Kosova dhe Kroacia.

Gjenerallejtënant Kingji falënderoi në mënyrë të veçantë Komandën e Forcave Amerikane për Evropën dhe Afrikën për zgjedhjen për të tretin vit radhazi të rajonit tonë si vend mikpritës të kësaj stërvitjeje madhore, duke e cilësuar atë si dëshmi të partneritetit strategjik mes Shqipërisë dhe SHBA-së.

“‘Defender Europe ’25 konfirmoi edhe një herë angazhimin e palëkundur të Shteteve të Bashkuara si aleat strategjik në forcimin e sigurisë rajonale dhe euroatlantike,” nënvizoi ai, duke shtuar se “përballë kërcënimeve hibride dhe tensioneve rajonale në rritje, përgjigjja jonë është e qartë: stërvitje të përbashkëta, ndërveprim operacional dhe partneritet afatgjatë”, theksoi shefi i Shtabit të Përgjithshëm të FA-së”.

1 nga 3

/m.m/ j.p/

The post Përmbyllet stërvitja shumëkombëshe “Defender Europe ’25”, Kingji: Dëshmi e partneritetit strategjik appeared first on Agjencia Telegrafike Shqiptare.

TIRANË, 9 qershor /ATSH/ Ministri i Shtetit, Taulant Balla, zhvilloi një vizitë zyrtare në bazën ushtarake të NATO-s në Ādaži, Letoni, ku ndodhen të dislokuara edhe trupa nga Forcat e Armatosura të Shqipërisë.

Balla mori pjesë në ceremoninë e nderimit të dy dëshmorëve të atdheut Major Klodian Tanushi dhe Nëntetar Zarife Hasanaj të rënë në krye të detyrës në një mision ndërkombëtar më 6 Maj 2019.

“Sakrifica e tyre është simbol i guximit dhe devotshmërisë së ushtarakëve shqiptarë, që shërbejnë me nder brenda dhe jashtë vendit. Ata do të mbeten gjithmonë të paharruar për sakrificën e tyre. Edhe një herë, respekt dhe mirënjohje për secilin prej jush dhe për familjet tuaja, të cilat e ndjejnë më shumë sesa kushdo tjetër vështirësinë dhe sakrificën e detyrës ushtarake”, u tha Balla pjesëtarëve të misionit shqiptar.

Gjatë kësaj vizite të Ballës në cilësinë e Ministrit të Shtetit i cili është edhe pika kombëtare e kontaktit të NATO-s për Qëndrueshmërinë, shprehu krenarinë dhe mirënjohjen e thellë për kontributin e ushtarakëve shqiptarë në këtë mision të rëndësishëm të Aleancës.

“Ju sjell përqafimin nga Shqipëria dhe mirënjohjen e qeverisë shqiptare dhe të popullit shqiptar për kontributin tuaj këtu. Ju na nderoni me praninë tuaj në një mision të përbashkët të NATO-s, në një vend aleat si Letonia, me një pozicion tepër të rëndësishëm gjeostrategjik, sidomos në kushtet e reja të sigurisë pas agresionit rus në Ukrainë”, u shpreh ministri Balla gjatë fjalës së tij para trupave shqiptare në Ādaži.

Gjatë vizitës në bazë, ministri u takua me Shefin e Shtabit të Brigadës “MNBDE LVA”, Brigada Shumëkombëshe në Letoni, Lejtenant Kolonel Philippe Tremblay, i cili i shprehu Ballës “vlerësimet më të larta për ushtarakët tanë dhe rolin e tyre profesional në këtë mision.”

“Shqipëria mbetet e përkushtuar në zbatimin e vendimeve të Aleancës për përshtatjen e Aleancës me realitetin e ri të sigurisë, duke përfshirë miratimin e planeve të detajuara për fuqizimin e mbrojtjes, si dhe zotimin e ri të investimeve në këtë fushë”, tha Balla.

Baza ushtarake Ādaži, një nga pikat kyçe të mbrojtjes së NATO-s në Balltik, strehon Brigadën Shumëkombëshe të Forcave të Përparuara të NATO-s (EFP), një strukturë e krijuar si përgjigje ndaj kërcënimeve të sigurisë nga Rusia. Kjo brigadë përfshin trupa nga vende të ndryshme anëtare të NATO-s si Kanadaja, Danimarka, Spanja, Italia, Polonia, Sllovakia, Çekia, Shqipëria dhe të tjerë.

Toga Shqiptare e EOD-së në Letoni ka një rol të specializuar në asgjësimin e municioneve të pashpërthyera, minave dhe pajisjeve të improvizuara shpërthyese, duke kontribuar në sigurinë e përgjithshme të trupave dhe komunitetit përreth.

Vendosja e trupave shqiptare në një nga zonat më kritike të sigurisë në Evropë thekson rëndësinë e bashkëpunimit ndërkombëtar dhe besnikërinë ndaj vlerave të përbashkëta të Aleancës.

1 nga 4

/a.f/

The post Balla në bazën e NATO-s në Letoni: Mirënjohje për kontributin e ushtarakëve shqiptarë në një mision strategjik appeared first on Agjencia Telegrafike Shqiptare.

PRISHTINË, 7 qershor/ATSH/ I ngarkuari me punë në Ambasadën e Shteteve të Bashkuara në Prishtinë, Ralan Hill, mori pjesë të premten në ceremoninë e transferimit të autoritetit të Task Forcës së Aviacionit të KFOR-it, e mbajtur në kuadër të rotacionit të rregullt të njësive ushtarake.

Gjatë ceremonisë, Hill falënderoi komandantin në largim, nënkolonel Reid, dhe njësinë Task Force Sawtooth për kontributin e tyre të çmuar në garantimin e sigurisë dhe stabilitetit në Kosovë. Ai theksoi rëndësinë e bashkëpunimit të vazhdueshëm mes partnerëve ndërkombëtarë dhe institucioneve vendore për ruajtjen e paqes në rajon.

Ambasada e SHBA-së mirëpriti gjithashtu komandantin e ri, nënkolonel Snook, dhe njësinë Task Force Griffin, të cilët do të marrin përgjegjësinë për mbështetjen e operacioneve ajrore të KFOR-it në Kosovë dhe më gjerë.

Kjo ceremoni simbolizon vazhdimësinë e përkushtimit të NATO-s dhe të Shteteve të Bashkuara për paqen, sigurinë dhe stabilitetin në Kosovë dhe rajon. /KosovaPress/

The post Hill: Bashkëpunim i vazhdueshmëm ndërkombëtar për ruajtjen e paqes në rajon appeared first on Agjencia Telegrafike Shqiptare.

TIRANË, 3 qershor /ATSH/ Ambasada e Italisë në Tiranë organizoi sot një pritje me rastin e Festës së Republikës.

Të pranishëm për të festuar ishin politikanë, artistë, përfaqësues të medias, trupit diplomatik etj.

“Gëzuar Festën e Republikës, Itali! Në mirëpritjen elegante të Ambasadorit Marco Alberti”, shkroi Kryetarja e Kuvendit, Elisa Spiropali në një postim në rrjetet sociale.

Ditën e Republikës e uroi edhe ministri i Drejtësisë, Ulsi Manja, i cili në rrjetet sociale u shpreh, “Gëzuar Ditën e Republikës, Itali! Një festë e rëndësishme për një vend mik e partner të çmuar të Shqipërisë.  Urime popullit italian dhe të gjithë miqve tanë në Itali”.

/a.f/

The post Ambasada e Italisë ceremoni me rastin e Festës së Republikës appeared first on Agjencia Telegrafike Shqiptare.

TIRANË, 23 maj/ATSH/ Teatri Kombëtar, institucioni që prej dekadash mbart dhe përcjell vlerat më të mira të artit skenik shqiptar, shënoi 80-vjetorin e themelimit.

Ky teatër u përurua si i pari teatër profesionist shqiptar në 17 maj të vitit 1945, ku me regjinë e Sokrat Mios u shfaq komedia “Topazi”, që u quajt si “shfaqja themeluese e Teatrit Kombëtar”.

Mbrëmjen e djeshme në një ceremoni të organizuar në ambientet e ArTurbinës në praninë e trupës së Teatrit Kombëtar dhe artistëve të shumtë, u kujtuan qindra artistët që i dhanë jetë këtij institucioni të rëndësishëm të artit e kulturës.

Në ceremoni ishte i pranishëm edhe ministri i Ekonomisë, Kulturës dhe Inovacionit, Blendi Gonxhja, i cili theksoi se duhet të garantojmë statusin e artistit.

“Në dinamikën që ka jeta e një artisti, në rëndësinë që ka liria e tij, dhe ne duhet të garantojmë që kjo të ndodhë dhe kjo nuk bëhet pa një ombrellë speciale që do të ishte ajo e statusit të artistit. Kjo është një nga themelet për të cilën duhet të punojmë”, tha Gonxhja.

Drejtori në detyrë i Teatrit Kombëtar, Indrit Çobani u shpreh se “Teatri mbetet ndoshta hapësira e vetme ku njerëzit mund t’i ndajnë idetë e tyre duke u parë, duke e dëgjuar njëri tjetrin live. Sot aktorët kanë sfidë me kohën të cilës i përkasin, në një zhurmë informative, ata duhet të gjejmë rrugë të reja se si të depërtojnë tek audienca”.

Aktorja Luzia Xhuvani solli për të pranishmit kujtime nga nisja e punës në Teatrin Kombëtar.

“Dita e parë e punës në Teatrin Popullor ishte impresionuese për mua. Ishte mbledhja e trupës artistike, pashë të hynin në atë studio figura si Piro Mani, Kadri Roshi, Violeta Manushi, Margarita Xhepa, Robert Ndrenika, Agim Qirjaqi, Roza Anagnosti, emra që konfirmojnë kombëtaren në teatër. U ndjeva e privilegjuar dhe kjo ndjesi më shoqëroi gjatë gjithë rrugëtimit tim profesional”, tha Xhuvani.

Ndërsa aktorja Yllka Muja tha se “Teatri është mision, është frymë, është ndërveprim, është ndërgjegjësim. Është vetëdije. Në teatër ke mundësi të njohësh të gjithë botën, por mbi të gjitha ke mundësi të njohësh vetveten”.

Aktori Ndriçim Xhepa e vuri theksin në fjalën e tij te përgatitja universitare e regjisorëve të rinj.

“Duhet t’i rikthehet vëmendja shtetit me elementin kryesor regjisurën, se pa regjisurë nuk ka teatër. Me regjisorë të mirë, avancojnë dhe aktorë të mirë. Ata që dalin nga 3-vjeçari i regjisurës, duhet patjetër 2-vjeçarin tjetër ta bëjnë në shkolla të nivelit të parë europian apo edhe në Lindje. Kjo do ta rrisë nivelin e Teatrit në vepra më të mëdha që duhet të kërkohen për t’u vënë në skenë“, tha Xhepa.

Për të pranishmit u vunë në skenë disa copëza të komedisë “Topazi” të sjella për publikun në skenën e ArTurbinës me aktorë të trupës së sotme të Teatrit Kombëtar, pikërisht në 80-vjetorin e themelimit.

Teatri Kombëtar është krijuar si i pari teatër profesionist shqiptar më 17 maj 1945. Nën regjinë e Sokrat Mios u shfaq komedia “Topazi”, e cila u quajt si “shfaqja themeluese e Teatrit”. Shteti shqiptar në periudhën para viteve ‘90 u përpoq ta orientonte Teatrin (i cili quhej në atë kohë Teatri Popullor) në sigurimin e një repertori me drama të “realizmit socialist” me autorë të vendeve të Lindjes, por përveç tyre janë vënë në skenë edhe premiera nga dramaturgjia botërore: “Revizori” nga Gogoli, “Otello” nga Shekspiri, “Shërbëtori i dy zotërinjve” nga K. Goldon.

Nga viti 1989 mban emrin Teatri Kombëtar.
Pas viteve ’90 kemi një prani më të gjerë të repertorit të huaj me vepra të autorëve të njohur si: “Dy zotërinjtë nga Verona” nga Shekspir; “Fernando Krafti më ka shkruar një letër” nga T. Dorst, “Tiranozauri” nga K. Trebeshina; “Don Zhuani” nga Molier; “Apologjia e vërtetë e Sokratit”, “Quo Vadis”; “Kopshti me dallëndyshe” nga B. Cikliropulos; “Ëndrra e një nate dimri” nga I. Kadare; “Njeriu, virtyti, kafsha” nga L. Pirandelo; “Armiku i Popullit” nga H. Ibsen, etj.

Teatri Kombëtar është vendosur në ambientet e ndërtesës ArTurbina në pritje të ndërtimit të godinës së re.

1 nga 20

/k.s/r.e/

The post 80-vjetori i krijimit të Teatrit Kombëtar, Gonxhja: Të garantojmë statusin e artistit appeared first on Agjencia Telegrafike Shqiptare.

Ditën e sotme, Presidenti i Republikës, Bajram Begaj, kryesoi delegacionin shqiptar që mori pjesë në Vatikan në ceremoninë e inaugurimit të Papa Leoni XIV, ku merrnin pjesë personalitete të rëndësishme nga vende të ndryshme të botës.

Kreu i Shtetit, pati edhe një takim me Papa Leoni XIV, të cilit i shprehu urimet më të përzemërta me rastin e zgjedhjes At i Shenjtë dhe Peshkop i Kishës Katolike Romake.

Gjithashtu, Presidenti i Republikës përgëzoi Atin e Shenjtë, për misionin e tij në ruajtjen e paqes dhe ndërtimin e urave të dialogut në një botë të mbushur me sfida dhe pasiguri.

Presidenti Begaj, theksoi se udhëheqja e tij shpirtërore përfaqëson një zë që jep shpresë, dhembshuri dhe unitet ndërmjet njerëzve.

Shqipëria është model i bashkëjetesës fetare, ku toleranca, respekti dhe harmonia midis feve të ndryshme janë vlera të rrënjosura thellë dhe trashëgimi e çmuar ndër breza.

Në këtë ceremoni Presidenti u shoqërua nga Ministri për Evropën dhe Punët e Jashtme, Igli Hasani dhe Ambasadorja e Shqipërisë pranë Selisë së Shenjtë, Majlinda Frangaj.

The post Presidenti Begaj takon në Vatikan Papa Leoni XIV pas ceremonisë së inagurimit appeared first on Albeu.com.

Në fjalën e tij para besimtarëve në sheshin Shën Pjetri, Papa u ndal tek humbja e madhe e botës së krishterë me ndarjen nga jeta të Papa Franceskut. Më tej Papa Leoni ka bërë thirrje në themelimin e një kishe të bazuar në dashuri.

Papa Leoni XIV: Përshëndes të pranishmit. Në ditët e fundit kemi përjetuar ndjesi intensive, vdekja e Papa Franceskut na solli trishtim në zemër.Kemi marrë në ditën e Pashkës bekimet e tij të fundit. Zoti nuk e braktis kurrë popullin e tij.

Vij para jush si një vëlla që do t’ju shërbejë në besimin dhe lumturinë tuaj. Duke ecur me ju në rrugën e dashurisë së Zotit që na do të bashkuar. Dashuria është unitet. Këto janë dy misionet e dhëna nga Jezusi për Pjetrin. Vëllezër dhe motra kjo është ora e dashurisë. Të krijojmë një kishë misionare që i hap krahët botës dhe është e bazuar në dashuri.

The post “Vij para jush si një vëlla”/ Ceremonia e Përurimit, Papa Leoni: Do t’ju shërbejë në besimin dhe lumturinë tuaj appeared first on Sot News | Lajme.

Siç është bërë traditë, Papa nuk ka ngurruar të bekojë besimtarët që ishin të pranishëm. Disa momente pas mbërritjes, Papa Leoni XIV u pa duke ngritur një foshnje në duar dhe duke e bekuar, ndërsa vendosi dorën mbi kokën e një tjetër fëmije, një veprim i zakonshëm i tij për të dhënë bekime e dashuri.

Papa Leoni XIV ka mbërritur në Sheshin e Shën Pjetrit për ceremoninë e inagurimit, ku ka përshëndetur turmat e mbështetësve. Në vitin 1978, Pali I e ndërpreu këtë praktikë, duke preferuar një ceremoni më të thjeshtë për inaugurimin e tij. Precedenti i tij është ndjekur nga të gjithë papët e mëpasshëm, duke përfshirë dhe Papa Leoni XIV, i cili ka zgjedhur një inagurim pa pompozitetin e kurorës papale.

Në ceremoninë e inaugurimit, ndryshe nga praktikat e mëparshme, nuk u përdor korona tradicionale papale. Në të kaluarën, papa coronoheshin me triregnum, një tiarë me tri kurora që simbolizonin autoritetin e papës mbi çështje shpirtërore dhe të përkohshme. Kjo traditë nisi që në vitin 858, me papën Nikollë I, dhe është përdorur për herë të fundit nga Papa Pali VI në vitin 1963, vetëm në fillim të papnisë së tij.

The post Papa Leoni XIV mbërrin në Vatikan/ Ceremonia e inagurimit (Foto) appeared first on Sot News | Lajme.

Prefektura e Shtëpisë papnore, publikoi angazhimet e Atit të Shenjtë për muajin maj. Në orën 10:00, në Sheshin e Shën Pjetrit, Papa Leoni XIV do të kryesojë sot meshën për fillimin e papnisë.

Të martën, më 20 datë maj, Papa Leoni do të marrë në zotërim Bazilikën Papnore të Shën Palit Jashtë Mureve. Të nesërmen do të mbahet audienca e parë e përgjithshme e së mërkurës. Papa do të thotë lutjen mariane Regina Caeli nga Lozha Qendrore e Bazilikës.

E shtunë, 24 maj, një takim i ri do të ndodhë, këtë herë me Kurien Romake dhe punonjësit e Shtet-Qytetit të Vatikanit. E diela, 25 maj, do të jetë plot me ngjarje, me Lutjen e Mbretëreshës Qiellore e më pas, marrjen në zotërim të bazilikave papnore të Shën Gjonit në Lateran dhe të Shën Marisë së Madhe.

The post Mbahet sot ceremonia e përurimit të Papa Leones XIV/ Çfarë pritet nga axhenda…? appeared first on Sot News | Lajme.