Gjithçka filloi në vitin 1972, kur mjekët gjatë analizimit të gjakut të një gruaje shtatzëne zbuluan diçka të pazakontë – qelizës së saj të kuqe të gjakut i mungonte një molekulë në sipërfaqe që ishte e pranishme tek pothuajse të gjithë njerëzit e tjerë.

Gjysmë shekulli më vonë, kjo enigmë molekulare misterioze u zgjidh përfundimisht. Studiues nga Mbretëria e Bashkuar dhe Izraeli arritën të përshkruajnë një sistem të ri plotësisht të grupeve të gjakut, dhe rezultatet e tyre i botuan në një studim në vitin 2024.

Louise Tilley, hematologe nga Shërbimi Kombëtar Shëndetësor i Britanisë, e cila ka kaluar pothuajse dy dekada duke studiuar këtë veçanti të gjakut, deklaroi se “kjo përbën një arritje të madhe dhe kulmim të një pune të gjatë ekipore për të krijuar këtë sistem të ri të grupeve të gjakut dhe për t’u ofruar kujdes më të mirë pacientëve të rrallë, por të rëndësishëm”.

Megjithëse shumica e njerëzve njohin vetëm sistemin ABO dhe faktorët Rh (pozitiv ose negativ), gjaku njerëzor është shumë më kompleks. Ekzistojnë shumë sisteme të ndryshme të grupeve të gjakut bazuar në një gamë të gjerë proteinash dhe sheqernash në sipërfaqen e qelizave tona të kuqe, transmeton Telegrafi.

Këto molekula, të njohura si antigjene, shërbejnë si marka identifikimi që ndihmojnë trupin të dallojë qelizat e veta nga ato të huaja që mund të jenë të dëmshme, raporton sciencealert.

Prandaj, përputhshmëria është thelbësore në transfuzionin e gjakut. Nëse këto marka nuk përputhen, transfuzioni që duhet të shpëtojë jetën mund të shkaktojë reaksione të rrezikshme, madje edhe vdekje.

Grupet kryesore të gjakut u zbuluan në fillim të shekullit të XX-të. Megjithatë, që atëherë janë identifikuar edhe shumë grupe të rralla, si sistemi Er i përshkruar në vitin 2022, që prekin vetëm një pjesë të vogël të popullsisë. Kjo është edhe rasti me grupin e ri të zbuluar.

“Puna ka qenë e vështirë sepse rastet gjenetike janë shumë të rralla”, shpjegoi Tilley.

Hulumtimet treguan se mbi 99.9 për qind e njerëzve kanë antigjenin AnWj, atë që mungonte tek pacientja e vitit 1972. Duke qenë se ky antigjen ndodhet në një proteinë të njohur si MAL (proteina myelin dhe limfocitare), studiuesit e quajtën sistemin e ri “grupi i gjakut MAL”.

Tim Satchwell, biolog qelizor nga Universiteti West of England, sqaroi kompleksitetin e kërkimit “MAL është një proteinë shumë e vogël me disa veti interesante, që e bën të vështirë identifikimin dhe na detyroi të ndjekim linja të shumta kërkimi për të mbledhur provat e nevojshme për të krijuar këtë sistem të ri të grupeve të gjakut”.

Si konfirmim përfundimtar të zbulimit të tyre, pas dekadash pune, ekipi kreu një eksperiment kyç: në qelizat e kuqe negative për AnWj, ata futën gjenin normal MAL, duke krijuar me sukses antigjenin e munguar AnWj në sipërfaqen e tyre.

Identifikimi i treguesve gjenetikë pas mutacionit MAL mundëson testimin e pacientëve për të përcaktuar nëse grupi i tyre i rrallë i gjakut është trashëguar apo është pasojë e ndonjë gjendjeje tjetër mjekësore. Ky zbulim mund të ketë rëndësi jetike, pasi këto veçori të rralla të gjakut mund të shkaktojnë pasoja serioze, dhe kuptimi më i mirë mund të shpëtojë jetë. /Telegrafi/

The post Zgjidhet misteri 50-vjeçar – shkencëtarët zbulojnë një grup të ri gjaku appeared first on Telegrafi.

Kur flitet për telefonat për video-lojëra, shumë njerëz menjëherë mendojnë për telefonat Redmagic.

Ky brend ka ndërtuar reputacionin e tij duke prezantuar vazhdimisht telefona me performanca të larta, të dedikuar posaçërisht për lojtarët. Përjashtim nuk është as telefoni më i ri Redmagic 10s Pro me ekran AMOLED 6.85 inç dhe frekuencë rifreskimi 144 Hz.

Ashtu si modeli i mëparshëm, REDMAGIC 10S Pro përdor Android 15 si bazë për sistemin e përshtatur operativ REDMAGIC OS 10.5. Ai drejtohet nga çipi Snapdragon 8 Elite, por me një ndryshim kyç: REDMAGIC ka overclock çipin, duke rritur frekuencën nga 4.32 GHz në 4.47 GHz. Edhe pse duket si ndryshim i vogël, kjo premton për përdoruesit performanca dukshëm më të mira të procesorit dhe grafikes, shpjegon HypeBeast.

Me modelin 10 Pro, Redmagic prezantoi sistemin e ftohjes ICE-X, i cili është përmirësuar më tej në këtë telefon të ri dhe quhet ICE‑X v2.0.

Çipat më të fuqishëm prodhojnë më shumë nxehtësi, dhe ky sistem, i frymëzuar nga konzolat portable, përdor atë që quhet metal i lëngshëm, një dhomë më të madhe për ftohje dhe ventilatorë më të shpejtë për ta mbajtur pajisjen të ftohtë gjatë video-lojës.

Përveç që është i mirë për video-lojë, 10s Pro është i përshtatshëm edhe për përdorim të përditshëm. Ka dy slot për kartela SIM, mbështetje për 5G dhe Wi-Fi 6E, si dhe NFC. Ka certifikatë IP54 për rezistencë ndaj pluhurit dhe spërkatjeve, dhe ka sensor të gjurmës së gishtit të integruar poshtë ekranit.

Telefoni është në dispozicion në tre ngjyra: Nightfall, Moonlight dhe Dusk, dhe vjen në variante me 12 GB, 16 GB dhe 24 GB RAM, si dhe deri në 1 TB memorie të brendshme. Çmimi fillestar i pajisjes është 649 euro. Më shumë mund të mësoni këtu. /Telegrafi/

The post Ky telefon është ndryshe nga të tjerët appeared first on Telegrafi.

Britania e Madhe njoftoi të martën se është e gatshme të njohë një shtet palestinez në muajin shtator, përveç nëse qeveria izraelite ndërmerr hapa të rëndësishëm për t’i dhënë fund “situatës së tmerrshme” në Gaza dhe të përmbush disa kushte.

Vendimi i kryeministrit britanik, Keir Starmer, vjen pas shembullit të Francës, ku presidenti Emmanuel Macron konfirmoi synimin e vendit të tij për ta njohur shtetin palestinez dhe, në këtë mënyrë, të inkurajojë edhe partnerët e tjerë që të veprojnë njësoj.

Reuters ka analizuar njoftimin e Starmerit, i nxitur nga zemërimi në rritje shkaku i urisë dhe shkatërrimit të Gazës gjatë luftës së Izraelit kundër militantëve të Hamasit, si dhe pozicionet e vendeve të tjera mbi njohjen e shtetit palestinez.

Çfarë tha Starmer?

Kryeministri britanik përsëriti se “nuk ka barazi midis Izraelit dhe Hamasit dhe se kërkesat tona ndaj Hamasit mbeten të njëta: duhet të lirohen të gjitha pengjet, të pranojnë një armëpushim, të pranojnë se nuk do të kenë rol në qeverisjen e Gazës dhe të çarmatosen”.

Starmer tha se Britania do të bëjë hapin përkatës në Asamblenë e Përgjithshme të Kombeve të Bashkuara, përveç nëse Izraeli ndërmerr hapa të dukshëm për të lejuar më shumë ndihma humanitare në Gaza, deklaron qartë se nuk do të aneksojë Bregun Perëndimor dhe angazhohet për një proces paqeje afatgjatë që synon një “zgjidhje me dy shtete” – një shtet palestinez që bashkëjeton në paqe përkrah Izraelit.

Ai tha se qeveria e tij do të bëjë një vlerësim në muajin shtator mbi “sa larg kanë shkuar palët në përmbushjen e këtyre hapave”, por shtoi se askush nuk do të ketë të drejtë vetoje mbi këtë vendim.

Pse e ndërmori këtë hap Starmer?

Qeveritë e njëpasnjëshme britanike kanë deklaruar se do ta njohin zyrtarisht një shtet palestinez kur të vijë momenti i duhur, por asnjëherë nuk kanë vendosur një afat kohor apo nuk kanë përcaktuar qartë kushtet e nevojshme.

Starmer tha se vendimi është marrë në një kohë kur situata në terren në Gaza është shumë e rëndë dhe kur perspektiva për një zgjidhje me dy shtete është në rrezik të madh, transmeton Telegrafi.

Një numër gjithnjë e më i madh deputetësh nga Partia Laburiste e Starmerit kanë kërkuar prej tij që të njohë shtetin palestinez për të ushtruar presion mbi Izraelin.

Si mund të ndikojë kjo në marrëdhëniet SHBA-Britani e Madhe?

Starmer ka qenë në përpjekje për të ndërtuar marrëdhënie të ngrohta me presidentin amerikan, Donald Trump, dhe Britania rrallëherë ka devijuar nga qëndrimi i SHBA-së në çështjet e politikës së jashtme. Dy liderët u takuan të hënën në Skoci, por Trump tha se nuk kishin diskutuar planin britanik gjatë atij takimi.

I pyetur të hënën nëse ishte dakord me pozicionin e mëhershëm të Starmerit për shtetësinë palestineze si një hap konkret drejt paqes së qëndrueshme, Trump tha se “nuk kam problem që ai merr një qëndrim. Unë tani dua që njerëzit të kenë ushqim – ky është prioriteti numër një. Ka shumë njerëz që po vuajnë shkaku i urisë”.

Pas njoftimit të Francës, Sekretari amerikan i Shtetit, Marco Rubio, e hodhi poshtë plotësisht planin, duke e quajtur “një vendim të pamatur që i shërben vetëm Hamasit”.

Si reagoi Franca ndaj vendimit të Britanisë?

Ministri i Jashtëm francez, Jean-Noel Barrot, shkroi në platformën X se Britania po “i bashkohet vrullit të nisur nga Franca për njohjen e shtetit të Palestinës”.

Le Royaume-Uni se joint aujourd’hui à l’élan créé par la France pour la reconnaissance de l’Etat de Palestine.

Ensemble, par cette décision capitale et nos efforts conjugués, nous enrayons le cycle infini de la violence et rouvrons la perspective de la paix dans la région.

Une…

— Jean-Noël Barrot (@jnbarrot) July 29, 2025

Së bashku, përmes këtij vendimi vendimtar dhe përpjekjeve tona të përbashkëta, po i japim fund ciklit të pafund të dhunës dhe po rihapim perspektivën për paqe në rajon,” tha Barrot. “Asgjë nuk mund ta pengojë një ide të drejtë dhe të qartë,” shtoi ai.

Cili ka qenë qëndrimi i Britanisë ndaj Izraelit që nga 7 tetori?

Në fillim të luftës në Gaza në tetor të vitit 2023, kur Starmer ishte ende në opozitë, ai e mbështeti plotësisht të drejtën e Izraelit për t’u vetëmbrojtur.

Por, qëndrimi i tij ka ndryshuar gjatë viteve, duke u bërë më i ashpër ndaj Izraelit, veçanërisht që nga zgjedhja si kryeministër pak më shumë se një vit më parë.

Qeveria e tij hoqi dorë nga kundërshtimi i administratës së mëparshme ndaj urdhrave të arrestit të lëshuara nga Gjykata Penale Ndërkombëtare për kryeministrin izraelit, Benjamin Netanyahu dhe pezulloi shitjen e disa armëve për Izraelin.

Muajin e kaluar, Britania vendosi sanksione ndaj dy ministrave të ekstremit të djathtë në qeverinë izraelite, Itamar Ben-Gvir dhe Bezalel Smotrich, duke i akuzuar për nxitje të vazhdueshme të dhunës kundër palestinezëve.

Kush tjetër e ka njohur shtetin e Palestinës?

Vitin e kaluar, Irlanda, Norvegjia dhe Spanja e njohën një shtet palestinez me kufijtë që ishin para luftës së Lindjes së Mesme në vitin 1967, kur Izraeli pushtoi Bregun Perëndimor, Gazën dhe Jerusalemin Lindor.

Megjithatë, ato gjithashtu e pranuan se këta kufij mund të ndryshojnë në një marrëveshje përfundimtare, dhe se vendimet e tyre nuk e cenojnë bindjen se Izraeli ka të drejtë themelore për të ekzistuar në paqe dhe siguri.

Rreth 144 nga 193 shtetet anëtare të Kombeve të Bashkuara e njohin Palestinën si shtet, përfshirë Rusinë, Kinën dhe Indinë.

Por, vetëm një numër i vogël nga 27 vendet anëtare të Bashkimit Evropian e kanë bërë këtë – kryesisht shtete ish-komuniste, si dhe Suedia dhe Qiproja.

Asambleja e Përgjithshme e OKB-së miratoi njohjen de facto të shtetit sovran të Palestinës në muajin nëntor të vitit 2012, duke e ngritur statusin e saj nga “entitet” në “shtet jo-anëtar”.

Kush mund të jetë në radhë?

Vendimi i Starmerit mund të ushtrojë presion mbi vende të tjera të mëdha si Gjermania, Australia, Kanadaja dhe Japonia që të ndjekin të njëjtën rrugë.

Gjermania tha të premten se nuk planifikon ta njohë shtetin palestinez në një afat të shkurtër, duke theksuar se prioritet është arritja e “përparimit të vonuar prej kohësh” drejt zgjidhjes me dy shtete – Izraeli dhe një shtet palestinez që bashkëjetojnë në paqe.

Ministri i Jashtëm i Italisë tha se njohja duhet të ndodhë njëkohësisht me njohjen e Izraelit nga një shtet i ri palestinez.

“Një shtet palestinez që nuk e njeh Izraelin do të thotë se problemi nuk do të zgjidhet,” tha Antonio Tajani në një takim në Romë. /Telegrafi/

The post Pse Britania po e njeh një shtet palestinez? appeared first on Telegrafi.

Gazetarë nga disa media britanike raportuan se Izraeli ua ka ndaluar të filmojnë Gazan nga ajri në aeroplanët që po dërgonin ndihma ajrore për popullsinë që vuan nga uria.

Duhet theksuar se ndihma nga ajri është e pamjaftueshme dhe më shumë duket si një fushatë marketingu sesa një përpjekje reale për ndihmë.

Gazetarja e Sky News, Sally Lockwood, e cila ishte në një prej fluturimeve të Forcave Ajrore Mbretërore të Jordanisë, përshkroi se si pa milje e milje rrënojash.

Israel is banning journalists flying over Gaza with airdrop operations from filming anything from above, after blocking them for 22 months from entering Gaza on the ground

Israel threatened to halt all airdrops if any journalist films from the flights’ windows! pic.twitter.com/uxsujFIMBW

— Muhammad Shehada (@muhammadshehad2) July 29, 2025

“Na u tha se pala izraelite ka paralajmëruar se çdo filmim i Gazës nga ajri mund të çojë në anulimin e këtyre fluturimeve të ndihmës. Megjithatë, kontrolli i fortë izraelit nuk i ndaloi fotografitë nga Gaza që të përhapen, duke tmerruar njerëzit në mbarë botën. Tani mbetet pyetja se çfarë do të bëjë bashkësia ndërkombëtare për këtë çështje,” shkroi Lockwood.

Të njëjtën informacion e përcolli edhe Jeremy Bowen i BBC-së, i cili gjithashtu ishte në një prej fluturimeve.

“Izraelitë nuk duan që ne të filmojmë shkatërrimin e Gazës nga dritaret e aeroplanit, por unë shikoja me sytë e mi për 10 minuta dhe mund të them se komunitetet në veri të Gazës, që i njoh mirë, ku jetonin dhjetëra mijëra njerëz, me jetë të vështirë, por me shpirt të fortë, janë shkatërruar plotësisht. Asgjë nuk ka mbetur prej tyre,” tha Bowen.

Ai kujtoi se Izraeli nuk lejon gazetarët të hyjnë në Gaza për të sjellë raportime dhe nuk dëshiron që Gaza të shihet dhe filmohet as nga ajri. /Telegrafi/

The post Izraeli ndalon filmimin ajror të Gazës appeared first on Telegrafi.

Ministri i Financave të Izraelit, Bezalel Smotrich, një nga anëtarët më radikalë të qeverisë së këtij vendi, ka deklaruar se Gaza është “pjesë integrale” e shtetit të Izraelit.

Duke folur në një konferencë në qendrën Gush Katif Heritage, Smotrich tha se pret “një rikthim masiv të izraelitëve në Gaza” dhe se ky rikthim duhet të jetë “më i madh se më parë.”

Ai shtoi se rikthimi i izraelitëve dikur ishte “një dëshirë e zbrazët”, por tani është “një mundësi realiste.”

Gjithashtu, Smotrich theksoi se “Izraeli nuk ka bërë një sakrificë kaq të madhe që Gaza t’u dorëzohet sërish arabëve.”

Fjalimi i tij u mbajt në përvjetorin e tërheqjes së kolonëve izraelitë nga Rripi i Gazës, që ndodhi në vitin 2005. Konferenca u mbajt në një vend të emërtuar sipas njërit prej vendbanimeve në Gaza ku dikur jetonin izraelitët.

Mediat izraelite raportojnë gjithashtu se Smotrich iu referua kundërshtimeve nga partitë radikale lidhur me vendimin e qeverisë së Benjamin Netanyahut për të lejuar “pauza humanitare” në mënyrë që ushqimi të hyjë në Gaza.

“Askush në botë nuk do të na lejojë të zhvillojmë luftë dhe të shkatërrojmë Hamasin dhe kërcënimin që paraqet Gaza, nëse i lëmë të uritur dy milionë civilë,” deklaroi Smotrich në këtë konferencë.

Këtë javë, ministri i Financave u ka dërguar një mesazh deputetëve të partisë së tij, duke e paraqitur rritjen e ndihmës humanitare si një manovër taktike përpara një fushate më të gjerë ushtarake kundër Hamasit. /Telegrafi/

The post Ministri radikal izraelit dëshiron aneksimin e Gazës: Është pjesë integrale e Izraelit appeared first on Telegrafi.

Punonjësit e një kompanie argëtimi për të rritur kanë një mundësi të pazakontë – një pushim të paguar prej gjysmë ore për masturbim. Pronarja e kompanisë, Erika Lust, thotë se kjo praktikë ka rritur ndjeshëm produktivitetin e ekipit të saj, sipas një raporti të Unilad.

Edhe pse rutinat e punës ndryshojnë, ekspertët thonë se disa individë përdorin pushimet midis takimeve për masturbim të shpejtë, shpesh në tualetet e zyrës. Nëse kjo ide nuk ju duket krejtësisht e çuditshme, nuk jeni të vetmit.

Sipas një studimi të realizuar nga Time Out New York, deri në 39 për qind të njerëzve kanë pranuar se kanë masturbuar gjatë orarit të punës. Siç thotë Psychology Today, disa e bëjnë këtë sepse duan të “paguajnë” për këtë, ndërsa të tjerë e shohin si një “moment qetësie në një mjedis pune shpesh të bezdisshëm”.

Pushimi që ndryshon gjithçka

 

View this post on Instagram

 

A post shared by ERIKALUST (@erikalust)

Regjisore dhe skenariste suedeze, Erika Lust (48), beson se masturbimi mund të përmirësojë edhe produktivitetin në punë. Kompania e saj për argëtim për të rritur, me seli në Barcelonë, ofron për çdo punonjës një “pushim masturbimi” prej 30 minutash.

Ideja është e thjeshtë: gjatë ditës së punës, mund të marrësh gjysmë ore, të shkosh në një nga hapësirat e dedikuara në zyrë dhe të “shpërthesh”. Pas kësaj, kthehesh në detyrat e tua, dhe askush nuk bën pyetje të panevojshme.

Duke shpjeguar pse e ka futur këtë masë, Lust tha se “e vërteta është se masturbimi mund të ndihmojë njerëzit të menaxhojnë stresin, të rregullojnë gjumin dhe të lidhen me trupin dhe dëshirat e tyre seksuale, ndër të tjera.”

Nga eksperiment në rregullore

 

View this post on Instagram

 

A post shared by ERIKALUST (@erikalust)

Politika e masturbimit filloi si një projekt provë gjatë karantinës, dhe dy vjet më vonë u bë pjesë zyrtare e rregullores së kompanisë.

“Me pandeminë dhe ndryshimin e madh në mënyrën si jetojmë, fillova të vërej se punonjësit e mi ishin bërë disi të shqetësuar dhe punonin me më pak energji se më parë. Prandaj, duke ditur se ka vetëm një gjë që do t’i ndihmojë të gjithë të ndihen mirë, u vendosa t’u krijoj një stacion privat për masturbim ku mund të shijojnë. I respektoj punonjësit e mi dhe e di se kur ata ndihen mirë, ne bëjmë një punë të mirë, tha ajo.”

Punonjësit kohët e fundit kanë raportuar se kjo iniciativë e pazakontë ka rritur efikasitetin e tyre dhe ka ulur nivelin e agresivitetit. Megjithatë, qëllimi i Lust nuk është vetëm rritja e produktivitetit, por edhe normalizimi i masturbimit.

“Mirëqenia seksuale është thellësisht e lidhur me shëndetin tuaj të përgjithshëm mendor dhe fizik dhe duhet trajtuar me të njëjtin respekt dhe burime,” tha ajo.

Çfarë thonë ekspertët?

 

View this post on Instagram

 

A post shared by ERIKALUST (@erikalust)

Pikëpamjet e saj ndahen edhe nga Dominnique Karetsos, bashkëthemeluese dhe drejtoreshë ekzekutive e Healthy Pleasure Group (HPG), e cila “kënaqësinë e shëndetshme e definon si vetë-realizimin seksual”.

“Kuptimi që masturbimi seksual është i lidhur si me shëndetin seksual ashtu edhe me mirëqenien seksuale – dhe prandaj pjesë thelbësore e shëndetit tonë fizik dhe emocional – është jashtëzakonisht i rëndësishëm,” theksoi ajo.

Nga ana tjetër, psikoterapisti Ian Kerner vëren se është e rëndësishme “të respektohen strukturat e vendit të punës” dhe “të krijohen kufij”.

“Shpesh, sipas përvojës sime, kur burrat masturbohen në vendin e punës, është sepse masturbimi ka bërë një mekanizëm të rëndësishëm për përballimin,” shpjegoi ai për Psychology Today. “Ata ndihen shumë të stresuar dhe janë në një gjendje të aktivizuar, stresuese, ankthi, dhe nuk mendojnë plotësisht, dhe gjëja e ardhshme, janë në tualet dhe masturbohen.” /Telegrafi/

The post Kurrë nuk keni dëgjuar për kësi pauze në punë appeared first on Telegrafi.

Kanë dalë informacione mbi madhësinë e ekranit për iPhone e palosshëm, dhe pajisja do të jetë e ndryshme nga modelet ekzistuese në treg.

Sipas gjithçkaje, Apple ka një ide tjetër në krahasim me konkurrencën, kur bëhet fjalë për telefonat e palosshëm, konkretisht iPhone e ardhshëm me ekran fleksibël.

Informacionet më të fundit të rrjedhura, të ardhura nga burimi mjaft i besueshëm Digital Chat Station, sugjerojnë madhësinë e mundshme të ekranit të iPhone të palosshëm. Sipas thashethemeve, iPhone Fold (kështu quhet aktualisht kjo pajisje) pritet të ketë ekran të brendshëm me madhësi 7.7 inç, dhe ekran të jashtëm 5.5 inç.

Pritet që këto dimensione të jenë edhe pjesë e fushatës kryesore marketingu të pajisjes së re, dhe Apple pritet të promovojë iPhone Fold si një telefon shumë kompakt i palosshëm, që mund të përdoret edhe me një dorë.

Është konfirmuar edhe se iPhone i palosshëm pritet të dalë në treg gjatë vitit 2026, ndërsa aktualisht ekziston një prototip funksional në fazë testimi.

Më parë u mësua se Samsung Display do të jetë përgjegjës për krijimin e ekranit të këtij telefoni, dhe theksohet se është gjetur zgjidhja për problemin e madh që kanë këto pajisje, atë të krijimit të rrudhave në pjesën ku ekrani paloset. Detaje të tjera priten deri në fund të këtij viti. /Telegrafi/

The post Apple ka një vizion tjetër për iPhone e palosshëm appeared first on Telegrafi.

Nëse e ndjekim qarkullimin e ajrit në veturë, një degë shkon drejt motorit dhe cilësinë e tij e kontrollon filtri i ajrit, ndërsa dega tjetër shkon drejt kabinës dhe cilësinë e saj e mbikëqyr filtri i kabinës.

Filtri i kabinës përbëhet nga letër dhe pambuk, dhe mund të përmbajë edhe qymyr aktiv (në versionet më të shtrenjta). Funksioni i tij është të parandalojë hyrjen e papastërtive më të imëta në kabinë – deri në 0.1 mikron – dhe kështu të ndalojë që shoferi dhe pasagjerët të thithin ndotës të rrezikshëm nga trafiku dhe mjedisi.

Filtri zakonisht ndodhet pas kutisë së pasagjerit ose nën xhamin e përparmë, dhe mund ta zëvendësoni edhe vetë.

Duhet të ndërrohet çdo 25 mijë deri 50 mijë kilometra. Ndërrimet duhet të jenë më të shpeshta nëse kryesisht vozitni në kushte të trafikut të dendur në qytet, madje përmenden edhe ndërrime dy herë në vit, para pranverës dhe dimrit.

Si mund ta ndikoni vetë në funksionalitetin e tij?

Nëse ndizni shpesh cigare në makinë, llogarisni që do t’i ulni efikasitetin, sepse në rrjetën e filtrit ngjiten depozita yndyrore të tymit.

Koha për ta zëvendësuar filtrin është nëse ndjeni erëra nga jashtë edhe kur keni aktivizuar opsionin e recirkulimit të ajrit në klimatizim, nëse ndjeni erëra të pakëndshme që nuk lidhen me erërat nga jashtë, nëse hyn tym në kabinë, nëse rrjedhja e ajrit është ngadalësuar, apo nëse ventilatori i sistemit të ajrit punon më shumë dhe nuk ka efekt.

Të gjitha këto janë arsye për të shkuar tek servisi dhe për të zëvendësuar filtrin. Kostoja financiare do të jetë e vogël, por përfitimi (shëndetësor) do të jetë shumë më i madh. /Telegrafi/

The post Si ta dalloni kur është koha për ta zëvendësuar filtrin e kabinës së veturës? appeared first on Telegrafi.

Izraeli ka kritikuar planet e Mbretërisë së Bashkuar për të njohur shtetin palestinez në Asamblenë e Përgjithshme të OKB-së në muajin shtator.

Ministria e Jashtme thotë se ky vendim është një “shpërblim për Hamasin” dhe dëmton përpjekjet për të arritur një armëpushim në Gaza.

“Ndryshimi i qëndrimit të qeverisë britanike në këtë kohë, pas veprimit francez dhe presioneve të brendshme politike, përbën një shpërblim për Hamasin dhe dëmton përpjekjet për të arritur një armëpushim në Gaza dhe një kornizë për lirimin e pengjeve”, thuhet në deklaratë.

Theksojmë se kryeministri britanik, Keir Starmer ka deklaruar se Izraeli duhet të plotësojë katër kushte, që mos të ndodhë njohja e Palestinës, raporton skynews.

Starmer ka deklaruar se Izraeli duhet të ndërmerr hapa thelbësorë për t’i dhënë fund situatës së tmerrshme në Gaza, arrin një armëpushim, bën të qartë se nuk do të ketë aneksim të Bregut Perëndimor dhe angazhohet për një proces paqeje afatgjatë që ofron një zgjidhje me dy shtete.
Kujtojmë se Starmer po përballet me presion në rritje brenda Partisë së tij Laburiste për të marrë një qëndrim më të ashpër ndaj Izraelit, që u theksua edhe më shumë pas njoftimit të fundit të presidentit francez, Emmanuel Macron, i cili njoftoi se Franca do të njohë një shtet palestinez në shtator.

Ndryshe, SHBA-ja, Italia dhe Gjermania nuk do të lëvizin drejt njohjes së një shteti palestinez. /Telegrafi/

The post Britania paralajmëron njohjen e shtetit palestinez, reagon ashpër Izraeli appeared first on Telegrafi.

Kryeministri i Polonisë, Donald Tusk, ka njoftuar se gjithsej 32 persona janë arrestuar në vend për dyshim bashkëpunimi me shërbimet e inteligjencës ruse.

Deklarata u bë gjatë një mbledhjeje të qeverisë, ku kreu i qeverisë theksoi rrezikun në rritje që paraqet ndikimi rus në sigurinë kombëtare të Polonisë dhe në stabilitetin e rajonit.

Sipas autoriteteve polake, të arrestuarit dyshohen se kanë marrë pjesë në aktivitete të ndryshme që përfshijnë mbledhjen dhe transmetimin e informacioneve të ndjeshme, sabotim të infrastrukturës dhe propagandë pro-ruse.

Policia dhe shërbimet e sigurisë kanë kryer bastisje të shumta në qytete të ndryshme të vendit, duke sekuestruar pajisje komunikimi, dokumente, si dhe materiale të tjera që mund të provojnë bashkëpunimin me shërbimet sekrete të Rusisë.

Një rast që ka tërhequr vëmendje të veçantë është ai i një shtetasi kolumbian, i cili dyshohet se është rekrutuar nga Moska për të organizuar dhe kryer sulme zjarrvënieje në disa qendra tregtare në Poloni.

Ky individ, sipas hetimeve paraprake, mund të ketë qenë pjesë e një rrjeti më të gjerë të koordinuar nga inteligjenca ruse për të destabilizuar vendin dhe për të krijuar panik në publik.

Kryeministri Tusk ka theksuar se qeveria e tij do të vazhdojë me vendosmëri luftën kundër ndërhyrjeve të huaja dhe aktiviteteve të spiunazhit, duke forcuar bashkëpunimin me partnerët ndërkombëtarë dhe duke rritur sigurinë e brendshme.

Ai gjithashtu i ka bërë thirrje qytetarëve të qëndrojnë vigjilentë dhe të raportojnë çdo aktivitet të dyshimtë që mund të rrezikojë interesat kombëtare të Polonisë. /Telegrafi/

The post Arreston 32 persona në Poloni – spiunuan në favor të Rusisë appeared first on Telegrafi.

Tajlanda ka vlerësuar koston fillestare të evakuimit dhe dëmeve materiale në mbi 10 miliardë baht (rreth 266 milionë euro), pas një konflikti pesëditor në kufi me Kamboxhian. Pritet që ndikimi përfundimtar ekonomik të jetë edhe më i madh.

Qeveria po përgatit një buxhet fillestar prej 25 miliardë baht (668 milionë euro) për të zbutur pasojat, ka deklaruar ministri i Financave i Tajlandës, Pichai Chunhavajira.

“Duhet të mbledh fonde për këtë, sepse kjo gjithashtu do të stimulojë ekonominë, duke pasur parasysh ndërtimet, riparimet e shtëpive dhe shumë të tjera. Ndoshta nuk do të mjaftojë dhe mund të na duhet të kërkojmë fonde shtesë”, ka shtuar ai, duke theksuar se vlerësimi fillestar i dëmeve ende nuk përfshin ndërprerjet në tregti.

Në një deklaratë të ndarë, Pichai tha se ministria e financave ka shpallur disa masa ndihme për të mbështetur qytetarët dhe bizneset e prekura nga konflikti në kufi.

Bankat shtetërore ofrojnë masa si shtyrje të pagesës së kredive, kredi me norma të ulëta interesi, rifinancim dhe përjashtim nga tarifat për të ndihmuar rimëkëmbjen, ka shtuar ai.

Masat fiskale përfshijnë zgjatjen e afatit për dorëzimin e deklaratave tatimore dhe pagesën e taksave deri në muajin shtator, si dhe lehtësime tatimore për shpenzimet e riparimeve – deri në 100 mijë baht për shtëpitë dhe 30 mijë baht për automjetet.

Qeveria gjithashtu ka ndarë nga 100 milionë baht për secilën nga provincat e prekura për nevojat lokale, me mundësinë e rritjes së shumës nëse do të jetë e nevojshme. /Telegrafi/

The post Kostoja e luftës pesëditore – Tajlanda vlerëson dëmin në më shumë se 266 milionë euro appeared first on Telegrafi.

Versioni më i fundit i softuerit iOS 26 po testohet nga inxhinierët e Apple dhe së shpejti do të jetë i disponueshëm për përdoruesit.

Kompania Apple ka publikuar versionin e katërt për zhvilluesit të sistemit të saj të ri operativ iOS 26, i cili sjell ndryshime në dizajn si dhe njoftime të përmbledhura për lajme, të ndihmuara nga inteligjenca artificiale.

Sipas portalit Tech Crunch, versioni i ri do të jetë së shpejti i disponueshëm për testim publik beta, i cili është paralajmëruar për ditët në vijim.

Sistemi operativ iOS 26 beta prezanton një ekran të ri mirëseardhjeje dhe paraqitje hyrëse për funksione kryesore, si opsionet e përmirësuara të Sirit dhe kamerës.

Apple vazhdon të përpunojë dizajnin e quajtur “Liquid Glass”, duke shtuar më shumë transparencë në disa aplikacione, si dhe një sfond të ri dinamik që ndryshon ngjyrat.

Gjithashtu, së bashku me iOS 26, janë publikuar edhe versionet beta për iPadOS, macOS, watchOS, tvOS, visionOS dhe Xcode. /Telegrafi/

The post Apple teston versionin e ri iOS 26 – çfarë ka të re te iPhone appeared first on Telegrafi.

Në një zhvillim të fundit që ka ngjallur shqetësime rajonale, Rusia po shton në mënyrë të konsiderueshme praninë ushtarake në Armeni.

Sipas burimeve të gazetës armene Graparak, gjatë javëve të fundit në bazën ushtarake ruse në qytetin Gyumri janë dërguar në masë armë, municione dhe pajisje të tjera ushtarake. Raportohet se aeroplanë transportues ushtarak kanë zbarkuar çdo ditë në këtë bazë, duke sjellë ngarkesa të konsiderueshme të pajisjeve luftarake.

Autoritetet armene deri më tani nuk kanë bërë ndonjë koment zyrtar në lidhje me këtë zhvillim. Po ashtu, edhe autoritetet ruse nuk kanë dhënë ndonjë deklaratë publike, duke mbajtur një qasje të heshtur në një kohë kur tensionet në rajon janë në rritje.

Ky zhvillim vjen në një moment të ndjeshëm për marrëdhëniet ruso-armene, të cilat janë përkeqësuar kohët e fundit për shkak të afrimit gjithnjë e më të madh të Armenisë me Perëndimin, si dhe tensioneve të vazhdueshme me Azerbajxhanin. Për më tepër, Rusia ndodhet në një konflikt të ashpër diplomatik me Azerbajxhanin, i cili akuzon Kremlinin për mbështetje të heshtur ndaj interesave armene në rajon.

Sipas Graparak, kjo lëvizje e Moskës mund të jetë një përpjekje për të ruajtur ndikimin strategjik në Kaukazin Jugor, në një kohë kur Armenia ka sinjalizuar se mund të largohet nga Organizata e Traktatit të Sigurisë Kolektive (CSTO) dhe Bashkimi Ekonomik Euroaziatik – dy struktura të dominuara nga Rusia, raportojnë mediat.

Disa analistë vlerësojnë se Kremlini po përgatitet për një realitet të ri gjeopolitik në të cilin Armenia nuk do të jetë më pjesë e aleancave tradicionale me Rusinë.

Për momentin, nuk dihet saktësisht qëllimi i dërgesave ushtarake, por prania në rritje e trupave dhe armatimeve në Gyumri mund të përbëjë një përpjekje për të forcuar pozitat ruse në rajon dhe për të dërguar një mesazh të qartë si për autoritetet armene, ashtu edhe për rivalët gjeopolitikë të Rusisë.

Zhvillimet e mëtejshme priten me shqetësim nga aktorët ndërkombëtarë, të cilët e shohin Kaukazin si një zonë me potencial të lartë për përplasje të reja ushtarake dhe ndërlikime gjeopolitike. /Telegrafi/

The post Rusia gati të hap një front të ri të luftës – dërgon ushtrinë në kufi me Armeninë appeared first on Telegrafi.

Shkuarja në zgjedhje të reja me urdhër të Gjykatës Kushtetuese si pasojë e ngërçit në Kuvend do ta komprometonte rëndë këtë institucion, thotë ish-kryetari i Gjykatës Kushtetuese, Enver Hasani.

Ai, në një intervistë me shkrim për KosovaPress, thotë se pa konstituim të Kuvendit nuk mund të ketë zgjedhje të jashtëzakonshme, ani pse tejkalohet afati tridhjetë ditorë i Gjykatës Kushtetuese, ku ka obliguar deputetët që deri më 26 korrik të konstituojnë legjislaturën e nëntë.

Në ditën e fundit të këtij afati, deputetët e Kuvendit të Kosovës dështuan sot të zgjedhin trupat e legjislativit edhe në përpjekjen e 53-të, derisa pritet të mblidhen edhe një herë të shtunën në orën 22:00.

Gjykata Kushtetuese më 24 korrik ka nxjerrë masë të përkohshme për seancën konstituive, ku ua ndalon deputetëve të marrin vendime nga 27 korriku deri më 8 gusht.

Përkitazi me këtë, Hasani thotë se Kushtetuesja, në aktgjykimin final pas tejkalimit të masës së përkohshme më 8 gusht, do të konstatojë se deri në ndërrimin e rendit të ditës nga kryesuesi i seancës, Avni Dehari, gjithçka ka qenë në përputhje me Kushtetutën, mirëpo prej 1 majit, kur është propozuar votimi i fshehtë për kryeparlamentarin, ka nisur gjendja jo-kushtetuese, që tani duhet të adresohet nga Kushtetuesja.

Sipas tij, Gjykata duhet të sqarojë vetëm edhe një çështje – sa herë mund të propozohet i njëjti kandidat brenda afatit tridhjetëditor, duke llogaritur nga dita kur ka nisur jo-kushtetutshmëria për shkak të veprimit të Avni Deharit.

“Shkuarja në zgjedhje me urdhër të Gjykatës Kushtetuese do ta komprometonte rëndë këtë institucion aq thelbësor për Kosovën dhe për rrugën e saj euroatlantike. Kjo për dy arsye të pakontestueshme. Së pari, pa konstituim të Kuvendit nuk mund të shkohet në zgjedhje, sepse një Kuvend që nuk është konstituaur thjesht nuk ekziston në rendin kushtetues. Kjo është çështje elementare e logjikës juridike dhe e teorisë së shtetit. Një veprim i tillë do të ishte një anomali e paimagjinueshme në ndonjë sistem serioz kushtetues: do të futeshim realisht në Librin e Ginisit për absurditete juridiko-kushtetuese. Më tej, një precedent i tillë do të hapte rrugën që pas çdo cikli zgjedhor, subjektet humbëse të instrumentalizonin kryesuesin e përkohshëm për të bllokuar qëllimisht konstituimin e Kuvendit, duke e shndërruar rendin parlamentar në një krizë ciklike dhe duke instaluar anarki institucionale të qëndrueshme. Në zgjedhjet tjera, beteja do të ishte për gjetjen e një kandidati sa më të moshuar për deputet”, thekson ai.

Sipas tij, edhe nëse do të pranohej, për hir të diskutimit teorik, se Kuvendi është formalisht i konstituuar, Gjykata Kushtetuese nuk do të mund dhe nuk do të duhej të jepte një urdhër për shpërndarje të Kuvendit apo për organizim zgjedhjesh.

“Një akt i tillë do të përbënte një ndërhyrje të papranueshme në fushën e vullnetit sovran të qytetarëve, si dhe një shkelje të parimit të vetëpërmbajtjes institucionale, që është një shtyllë themelore e doktrinës kushtetuese në të gjitha demokracitë evropiane. Gjykata Kushtetuese është garant i rendit kushtetues, jo aktor politik. Roli i saj është rregullator dhe i arbitrit, jo zëvendësues i vullnetit të përfaqësuesve të zgjedhur. Ky qëndrim nuk ka të bëjë vetëm me parimet e demokracisë formale, por me ekuilibrin e ndërsjellë dhe respektin institucional mes Kuvendit dhe Gjykatës Kushtetuese – dy pushtete që interpretojnë dhe mishërojnë vullnetin kushtetues të popullit, të shprehur në Kushtetutën e Republikës së Kosovës, si akti më i lartë juridik dhe politik i shoqërisë sonë”, shton ai.

Ai thekson se dekretimi për shkuarje në zgjedhje, në rast krize, mund të ndodhë vetëm si sanksion kushtetues, përmes procesit të decertifikimit të të zgjedhurve të parë të popullit.

“Vetëm në këtë formë ruhet legjitimiteti i votës dhe i rendit demokratik. Edhe ky sanksion, sidoqoftë, nuk mund të jetë ndëshkim kolektiv, por duhet të jetë proporcional dhe individual, për dy arsye themelore: E para, sepse shumica e deputetëve aktualisht po i përgjigjen detyrimit të tyre kushtetues. Mandati i deputetit në sistemin tonë kushtetues – ashtu si në shumicën e vendeve evropiane – nuk është mandat imperativ, pra nuk është i detyrueshëm në kuptimin e bindjes ndaj urdhrave të një autoriteti të jashtëm politik. E dyta, një pjesë e deputetëve që nuk po marrin pjesë në votim nuk po shkelin detyrimin kushtetues, por po e refuzojnë një proces të deformuar dhe jo-kushtetues, të imponuar nga Avni Dehari. Kjo përbën shprehje të ndërgjegjes parlamentare dhe të autonomisë së mandatit të deputetit, e cila është e paprekshme dhe e mbrojtur me normë të drejtpërdrejtë kushtetuese”, deklaron Hasani.

Duke komentuar aktgjykimin e mundshëm të Kushtetueses, pas tejkalimit të masës së përkohshme më 8 gusht, Hasani thotë se Gjykata Kushtetuese ka për të konstatuar që deri në ndërrimin e rendit të ditës nga kryesuesi Avni Dehari, gjithçka ka qenë në përputhje me Kushtetutën, mirëpo sipas tij pas asaj dite ka nisur një gjendje jo-kushtetuese, e cila tani duhet të adresohet nga vetë Gjykata.

“Këtë e bazoj në faktin se në vendimin për masën e përkohshme, Gjykata ka treguar se ka kërkuar procesverbalet e seancave konstituive të Kuvendit që nga viti 2008 e tutje. Kjo do të thotë se ajo synon të thotë që deputetët duhet të ndjekin të njëjtën praktikë: votim të hapur dhe me vetëm një kandidat. Në këtë rast, Gjykata duhet të sqarojë vetëm edhe një çështje: sa herë mund të propozohet i njëjti kandidat brenda afatit tridhjetë ditorë, duke llogaritur nga dita kur ka nisur jo-kushtetutshmëria për shkak të veprimit të Avni Deharit. Nuk ka rrugë tjetër që Gjykata mund ta justifikojë këtë situatë. Nëse vepron ndryshe, komprometohet”, përfundon ai.

The post Hasani: Zgjedhjet me urdhër të Kushtetueses do ta komprometonin rëndë rendin kushtetues appeared first on Telegrafi.

Një zjarr i fuqishëm ka përfshirë fshatin Lubizhdë të Prizrenit.

Flakët kanë përfshirë një shtallë të kafshëve gjersa raportohet se disa prej lopëve kanë ngordhur në incident.

Fejzulla Berisha nga Brigada e Zjarrfikësve të Prizrenit ka konfirmuar se zjarri ka përfshirë një shtallë dhe është përhapur me shpejtësi, duke rrezikuar edhe banesat përreth, raporton rtvbesa.

“Po bëjmë çmos për ta vënë zjarrin nën kontroll. Fatmirësisht deri tani nuk raportohet për të lënduar, por dëmet materiale janë të konsiderueshme,” tha Berisha.

Sipas informacioneve nga vendi i ngjarjes, zjarrfikësit janë përballur me vështirësi të mëdha për shkak të terrenit dhe erërave që kanë favorizuar përhapjen e flakëve.

Autoritetet u kanë bërë thirrje banorëve të zonës të jenë të kujdesshëm dhe të bashkëpunojnë me shërbimet emergjente. /Telegrafi/

The post Zjarret përfshijnë shtallë me lopë, rrezikohen edhe shtëpitë në Lubizhdë të Prizrenit appeared first on Telegrafi.

Aplikacioni Snapchat tani mund t’i njoftojë miqtë e përdoruesit nëse ai ka arritur i sigurt në shtëpi dhe kjo pa qenë nevoja që ai vetë të dërgojë ndonjë mesazh.

Snapchat ka prezantuar një funksion të ri të quajtur Home Safe, i cili dërgon njoftime kontakteve të përzgjedhura.

Këto njoftime mund t’u dërgohen vetëm personave me të cilët përdoruesi tashmë ndan vendndodhjen, dhe për shkak se kjo veçori është e çaktivizuar nga parazgjedhja, duhet të aktivizohet në Snap Map, qoftë për të gjithë miqtë ose vetëm për disa prej tyre. Miqtë e përdoruesit do të marrin njoftimin vetëm një herë, pas së cilës ai do të çaktivizohet automatikisht.

Home Safe tingëllon veçanërisht e dobishme nëse përdoruesi dhe miqtë e tij tashmë kanë zakonin të kontrollojnë njëri-tjetrin pas daljeve ose të njoftojnë prindërit që kanë arritur në shtëpi.

Për të aktivizuar këtë veçori, duhet të preket Bitmoji në Snap Map dhe më pas opsioni “My Home” për të vendosur vendndodhjen e shtëpisë. Pas kësaj, sa herë që përdoruesi dëshiron të njoftojë dikë që ka arritur në shtëpi, mjafton të hapë bisedën (chat), të prekë ikonën Map, dhe pastaj butonin Home Safe.

Snapchat prej kohësh ofron opsionin e ndarjes së vendndodhjes, dhe ndër vite ka përmirësuar veçoritë e sigurisë. Ndarja e vendndodhjes në kohë reale, që lejon përdoruesit të ndajnë vendndodhjen e tyre të saktë me miqtë, u prezantua në vitin 2022.

Vitin e kaluar, u shtuan funksione të reja të ndjekjes së vendndodhjes në Family Center, që u mundëson prindërve të marrin njoftime nëse fëmija e tyre largohet nga shtëpia ose shkolla. /Telegrafi/

The post Snapchat mund të njoftojë automatikisht miqtë se përdoruesi ka arritur në shtëpi ‘shëndoshë e mirë’ appeared first on Telegrafi.

Adoleshentja kineze gati vdes pasi konsumoi vetëm perime dhe laksativë për dy javë për të humbur peshë.

Një vajzë 16‑vjeçare nga provinca Hunan në Kinë pothuajse humbi jetën, pasi ndoqi një dietë ekstreme për dy javë.

E identifikuar si Mei, ajo konsumoi vetëm sasi të vogla perimesh dhe përdori laksativë në përpjekje për t’u përshtatur në një fustan të ditëlindjes.

Gjendja e saj u rëndua papritur: filloi të humbiste forcë në ekstremitete dhe ndjeu vështirësi në frymëmarrje. Mjekët e çuan urgjent në spital dhe bënë një ndërhyrje emergjente që zgjati 12 orë për t’i shpëtuar jetën.

Analizat zbuluan një rënie drastike të nivelit të kaliumit në gjak (hipokalemi serioze), që çoi në dobësi muskulore dhe probleme të frymëmarrjes. Mjeku Peng Min nga Spitali Popullor i Hunanit njoftoi se kjo gjendje mund të shkaktojë dështim respirator dhe arrest të papritur kardiak. Një mjek tjetër, me mbiemrin Li, shtoi se dieta e balancuar dhe dehidratimi mund të ulin ndjeshëm nivelin e kaliumit.

Dr. Peng rekomandoi konsumin e patateve, bananeve dhe pulës, si dhe pirjen e ujit për të ruajtur nivele adekuate të kaliumit në trup.

Mei është shëruar plotësisht dhe është ndaluar nga spitali. Ajo premtoi se kurrë më nuk do të përdorë metoda ekstreme për humbje peshe.

Ky rast është vetëm një nga disa në Kinë që lidhen me dieta ekstreme dhe dëmton serioz trupin. Vitin e kaluar, një burrë 26‑vjeçar u hospitalizua për hipokalemi pasi përdori agjërim të alternuar dhe ushtrime të rënda, duke ngrënë vetëm gjatë një dritareje 8‑orëshe çdo ditë.

Një grua 38‑vjeçare gjithashtu përfundoi në spital për helmim me ujë pasi konsumoi 4 litra ujë të kripur menjëherë sipas udhëzimeve online. /Telegrafi/

The post Adoleshentja gati sa nuk vdiq pasi hëngri vetëm perime dhe laksativë për dy javë për të humbur peshë appeared first on Telegrafi.

Adoleshenti Kenny Laynez-Ambrosio (18), shtetas amerikan, po udhëtonte me nënën dhe dy miq në North Palm Beach, kur u ndaluan nga policia rrugore e Floridës.

Kontolla rutinore u kthye në një arrestim të dhunshëm, të cilin ai e regjistroi fshehurazi me celular. Pasi policia kërkoi dokumentet e të gjithëve dhe thirri përforcime, mbërritën agjentë të patrullës kufitare që përdorën elektroshok dhe kapje mbytëse ndaj pasagjerëve – dy prej të cilëve pa dokumente.

Kenny thotë se nuk planifikonte të filmonte, por filloi kur pa që situata po përkeqësohej. Njëri nga oficerët hapi derën dhe kapi për fyti mikun e tij, që nuk fliste anglisht dhe nuk kundërshtoi. Ai vetë nuk kishte frikë për veten, por për shokët.

Pavarësisht se u tha oficerëve që është shtetas amerikan, edhe ai u shtrirë në tokë dhe u kërcënua me elektroshok. U arrestua dhe mbajtur për 6 orë. Një nga agjentët i tha se “këtu nuk ke asnjë të drejtë. Ti je ‘migo’.” Në video dëgjohen oficerët duke bërë shaka me arrestimin dhe duke përmendur një bonus prej 30 mijë dollarësh.

Teenage US citizen, Kenny Laynez-Ambrosio, told “You’ve got no rights”. pic.twitter.com/20HdjyrHYh

— SharonBC,Canada (@SharonBurnabyBC) July 26, 2025

Laynez-Ambrosio u akuzua për pengim pa dhunë dhe u dënua me punë vullnetare e kurs zemërimi. Ai pretendon se në paraburgim e kërcënuan që të fshinte videon, por nuk pranoi.

Dy miqtë e tij u dërguan në një qendër emigracioni dhe tani presin gjyqin. Sipas një prifti që ndihmon familjen, incidenti ka thelluar mosbesimin mes komunitetit emigrant dhe policisë.

Kenny shpreson që videoja e tij do të ndihmojë në ngritjen e ndërgjegjësimit për trajtimin e emigrantëve.

“Nuk duhej të ndodhte kështu. Ata janë njerëz të mirë që thjesht kërkojnë të punojnë ndershmërisht,” tha ai. /Telegrafi/

The post Adoleshenti filmoi fshehurazi arrestimin brutal të tij nga policia amerikane appeared first on Telegrafi.

Ish-ushtari elitar i Forcave Speciale të Ushtrisë Amerikane (i njohur si Green Beret), Anthony Aguilar, ka deklaruar se ka qenë dëshmitar i drejtpërdrejtë i veprimeve të dhunshme dhe çnjerëzore të ushtrisë izraelite (IDF) ndaj civilëve palestinezë në Gaza.

Sipas tij, forcat izraelite kanë qëlluar në mënyrë të përsëritur me topa tanku dhe dhe mortaja mbi turmat e mëdha të palestinezëve të paarmatosur dhe të uritur, të cilët ishin mbledhur pranë pikave të ndarjes së ndihmave humanitare të organizatës GHF (Global Humanitarian Foundation).

Aguilar, i cili po punon si kontraktor sigurie për GHF në Gaza, i ka dhënë një intervistë rrëqethëse transmetuesit britanik BBC, ku i ka përshkruar sulmet si “të pa përzgjedhura” dhe “të përbindshme”.

NEW: Former U.S. Green Beret Anthony Aguilar claims he repeatedly saw Israeli forces (IDF) firing tank and mortar rounds into crowds of unarmed, starving Palestinians at GHF aid sites in Gaza.

“I witnessed war crimes,” the GHF security contractor told the BBC, calling the… pic.twitter.com/JauxDbLAb7

— Clash Report (@clashreport) July 26, 2025

Ai thekson se nuk kishte parë kurrë më parë një nivel të tillë dhune dhe mizorie, madje as gjatë shërbimit të tij në zonat më të rrezikshme të luftës.

“Kam qenë dëshmitar i krimeve të luftës. Ato që pashë ishin akte brutale dhe të qëllimshme kundër njerëzve të pafajshëm – burra, gra dhe fëmijë – që po përpiqeshin të siguronin ushqim për të mbijetuar. Sulmet ishin pa paralajmërim dhe pa dallim – thjesht një sulm i drejtpërdrejtë mbi njerëz të uritur dhe të pambrojtur”, pohoi ai.

Deklaratat e tij kanë shkaktuar tronditje dhe janë bërë pjesë e diskutimeve ndërkombëtare mbi situatën humanitare në Gaza dhe respektimin e ligjit ndërkombëtar të luftës.

Aguilar kërkoi që komuniteti ndërkombëtar të ndërhyjë për të hetuar këto veprime dhe për të garantuar mbrojtjen e civilëve në zonat e konfliktit. /Telegrafi/

The post Dëshmia tronditëse e ish-ushtarakut amerikan: Izraelitët qëllojnë me mortaja mbi palestinezët që presin për ndihma appeared first on Telegrafi.

Ghislaine Maxwell, personi i vetëm që është dënuar për skandalin që lidhet me pedofilin Jeffrey Epstein, ka ofruar të zbulojë “të gjitha sekretet e tij” në këmbim të një faljeje nga presidenti amerikan, Donald Trump.

Sipas avokatëve të saj, Maxwell shpreson që Trump do të vendosë ta falë, gjë që do t’i mundësonte asaj të dalë nga burgu 17 vite para përfundimit të dënimit.

Kjo deklaratë vjen në një kohë kur zyrtarë të Departamentit amerikan të Drejtësisë janë duke u takuar me Maxwell dhe duke biseduar për çështjen Epstein.

Maxwell është personi i vetëm që është dënuar në lidhje me rastin Epstein, i cili u hap pas arrestimit të ish-financierit, raporton cnn.

Epstein ishte akuzuar për trafikim njerëzor, pedofili dhe abuzim seksual, por kreu vetëvrasje në qelinë e paraburgimit përpara se të fillonte gjyqi.

Rasti i tij është rikthyer në qendër të vëmendjes pasi disa media amerikane kanë raportuar se në listën e “klientëve” të tij, pra personave që kanë vizituar ishullin e tij ku janë kryer shumë krime, figuron edhe Donald Trump, si dhe persona të tjerë me ndikim.

Trump i ka mohuar këto pretendime, por kohët e fundit janë shfaqur shumë prova të reja që e lidhin atë me Epsteinin.

Ndër to janë edhe foto të reja nga dasma e Trumpit, si dhe një letër që presidenti amerikan i kishte dërguar Epsteinit për ditëlindjen e tij të 50-të.

Gjithashtu, “Wall Street Journal” ka raportuar kohët e fundit se Trump është informuar se emri i tij ndodhet në dokumentet që lidhen me rastin Epstein.

Gjatë fushatës zgjedhore, Trump kishte premtuar se do t’i publikonte të gjitha dokumentet, por më pas hoqi dorë nga ky premtim, duke deklaruar se gjithçka është “një mashtrim i organizuar nga Partia Demokratike.”

Ndaj tij po ushtrohet presion që të bëjë publike dokumentet, por ndihmohet nga liderët e Partisë Republikane në të dyja dhomat e Kongresit amerikan, të cilët po refuzojnë që të hapin diskutime për këtë çështje. /Telegrafi/

The post Bashkëpunëtorja do t’ia zbulon të gjitha sekretet pedofilit të ndjerë Epstein, kërkon që të falet nga Trumpi appeared first on Telegrafi.