BUKURESHT, 5 gusht /ATSH-AGERPRES/ – Ish-presidenti rumun Ion Iliescu, i cili udhëhoqi tranzcionin kaotik të vendit nga komunizmi në demokraci, vdiq sot në moshën 95-vjeçare.

Iliescu ishte diagnostikuar me kancer në mushkëri dhe ishte shtruar në spital në fillim të qershorit në kryeqytetin e Rumanisë, Bukuresht.

“Me keqardhje të thellë qeveria njofton ndarjen nga jeta të ish-presidentit të Rumanisë, Ion Iliescu”, thuhet në një deklaratë qeveritare.

Iliescu ishte presidenti i parë i dalë fitues në zgjedhjet e lira në Rumani dhe shërbeu dy herë, midis viteve 1990-1996 dhe 2000-2004.

Ai u akuzua për krime kundër njerëzimit gjatë revoltës së dhunshme që rrëzoi regjimin komunist të Rumanisë në vitin 1989, por gjithmonë i mohoi akuzat.

I lindur në vitin 1930, në qytetin jugor të Oltenitës, Iliescu studioi inxhinieri në Rusi dhe më vonë u kthye në Rumani, ku u bashkua me Partinë Komuniste.

Pas zgjedhjes së tij si president në vitin 1990 me Partinë Social Demokrate, ai u rizgjodh për një mandat katërvjeçar, por pësoi humbje në vitin 1996.

Iliescu u rikthye në pushtet në vitin 2000 për një mandat të tretë dhe të fundit, gjatë të cilit Rumania iu bashkua NATO-s dhe nisi përpjekjen e saj për anëtarësim në BE. /Ad.Ab./

The post RUMANI – Vdes ish-presidenti, Ion Iliescu që udhëhoqi tranzicionin e tregut të lirë appeared first on Agjencia Telegrafike Shqiptare.

MALMOE, 5 gusht /ATSH-DPA/ – Vendet skandinave të NATO-s, Suedia, Danimarka dhe Norvegjia, po ofrojnë gjithsej më shumë se 500 milionë dollarë për një iniciativë për të përshpejtuar dërgesat e armëve nga Shtetet e Bashkuara të Amerikës në Ukrainë.

Suedia po kontribuon me 275 milionë dollarë në iniciativën e “Listës së Kërkesave me Prioritet për Ukrainën” (PURL) të koordinuar nga NATO, me Danimarkën që premton 580 milionë krona daneze (90 milionë dollarë) dhe Norvegjinë 1.5 miliardë krona norvegjeze (146 milionë dollarë), njoftuan sot qeveritë e tre vendeve.

Si pjesë e iniciativës, vendet pjesëmarrëse do të blejnë pajisje mbrojtëse nga Shtetet e Bashkuara dhe më pas do t’i vënë ato në dispozicion të Ukrainës në mënyrë që ajo të mund të mbrohet kundër pushtimit të vazhdueshëm rus.

“Paketa skandinave përfshin raketa për sistemet e mbrojtjes ajrore Patriot”, tha ministri suedez i Mbrojtjes, Pal Jonson, në një konferencë për shtyp në Stokholm.

Sekretari i Përgjithshëm i NATO-s, Mark Rutte, falënderoi tre vendet për kontributin e tyre.

Financimi siguron dërgimin e pajisjeve shpëtimtare dhe mallrave thelbësore në vijën e parë të frontit, duke forcuar pozicionin e Ukrainës dhe duke e ndihmuar atë të mbrohet nga agresioni, ndërkohë që përpiqet për paqe të qëndrueshme, tha Rutte në një postim në X.

Vendet skandinave kanë qenë ndër donatorët më të mëdhenj për Ukrainën që nga shpërthimi i luftës ruse në Ukrainë pothuajse tre vjet e gjysmë më parë.

Holanda njoftoi dje lëvrimin e një paketë të ngjashme me vlerë rreth 500 milionë euro si pjesë e “PURL” it. /Ad.Ab./

The post SUEDI – Vendet anëtare skandinave të NATO-s i ofrojnë Ukrainës 500 milionë dollarë appeared first on Agjencia Telegrafike Shqiptare.

TEL AVIV/GAZA, 5 gusht /ATSH- DPA/ – Kryeministri izraelit Benjamin Netanyahu ka zhvilluar bisedime me shefin e ushtrisë Eyal Zamir rreth hapave të mëtejshëm në luftën e Gazës, mes raportimeve se qeveria është gati të urdhërojë pushtimin e plotë të territorit bregdetar.

Zyra e Netanyahut tha se Zamir i paraqiti atij opsione të mundshme për vazhdimin e luftës, e cila ka vazhduar për gati 22 muaj. Hollësirat e planit  nuk janë bërë ende të të ditura.

Takimi erdhi pasi disa media izraelite raportuan unanimisht dje se Netanyahu po nxiste pushtimin e plotë të Rripit të Gazës pavarësisht kundërshtimeve nga udhëheqja ushtarake.

Megjithatë i duhet kabinetit izraelit të Sigurisë të miratojë një plan të tillë.

Kanali televiziv  “N12” ka raportuar  se kabineti i Sigurisë do të mblidhet të enjten për konsultime. /Ad.Ab./

The post IZRAEL – Shefi i ushtrisë paraqet opsionet për pushtimin e Gazës appeared first on Agjencia Telegrafike Shqiptare.

DYSELDORF, 5 gusht /ATSH-DPA/ – Frank Mill, i cili ishte pjesë e skuadrës fituese të Kupës së Botës në futboll në vitin 1990 të Gjermanisë Perëndimore e që ka fituar dhe një medalje bronzi olimpike në vitin 1988, ka vdekur në moshën 67 vjeç, njoftoi sot ish-klubi i tij Rot-Weiss Essen, duke cituar familjarë të tij.

Essen konfirmoi një raport nga gazeta “Bild”, i cili tha se Mill nuk u shërua kurrë nga një goditje në tru që pësoi në muajin maj në Itali.

Sulmuesi Mill e filloi karrierën e tij profesioniste në vitin 1976 në qytetin e tij të lindjes, Essen, në Rot-Weiss. Me pas kaloi pesë vjet te “Borussia Mönchengladbach” në vitet 1981-1986, më pas  tetë vjet te “Borussia Dortmund” deri në vitin 1994 përpara se ta përfundonte karrierën e tij me dy sezone te “Fortuna Dusseldorf”.

Mill shënoi 41 gola në divizionin e dytë në sezonin e tij të fundit në Essen dhe 123 gola në 387 ndeshje të Bundesligës.

Ai fitoi Kupën e Gjermanisë me Dortmundin në vitin 1989.

“Frank nuk ishte vetëm një nga futbollistët më të mëdhenj që Rot-Weiss Essen ka nxjerrë ndonjëherë, ai ishte gjithashtu një person i shkëlqyer, i thjeshtë, autentik dhe plot energji pozitive”, tha anëtari i bordit të Essen, Alexander Rang.

Ai shtoi se Mill “jo vetëm që karakterizoi klubin tonë dhe zonën e Ruhr-it me sjelljen e tij, por ai ishte gjithashtu një ambasador për futbollin në të gjithë Gjermaninë”. /Ad.Ab./

The post SPORT – Ish – kampioni i Botës, Frank Mill, vdes në moshën 67 vjeç appeared first on Agjencia Telegrafike Shqiptare.

UASHINGTON, 5 gusht /ATSH-DPA/ – Presidenti amerikan Donald Trump e ka quajtur investimin prej 600 miliardë dollarësh, si pjesë e marrëveshjes për tarifat me Bashkimin Evropian, si një “dhuratë”.

“Ata na dhanë 600 miliardë dollarë që mund t’i investojmë ku të duam”, tha Trump në një intervistë për “CNBC”, duke iu referuar një pjese kyçe të marrëveshjes tregtare të shpallur në fund të korrikut.

Trump e përshkroi shumën si “një dhuratë” që nuk është hua dhe për rrjedhojë nuk ka nevojë të kthehet pas tre vitesh.

Kjo bie ndesh me deklaratat e mëparshme të Komisionit Evropian, sipas të cilit kompanitë nga BE-ja kanë shprehur interes për të investuar 600 miliardë dollarë në Shtetet e Bashkuara gjatë viteve të ardhshme.

Sipas Komisionit, deri tani bëhet fjalë vetëm për shprehje interesi nga ana e kompanive, pa ndonjë angazhim konkret.

I pyetur se çfarë do të ndodhte nëse BE-ja nuk e përmbush këtë premtim investimi, Trump kërcënoi se do të vendosë tarifa 35%. Megjithatë, mbeti e paqartë se kur do të konsiderohej shkelje e marrëveshjes, pasi investimet janë planifikuar të ndodhin për një periudhë disa-vjeçare.

Një zyrtar i Komisionit Evropian sqaroi së fundmi se investimet janë në dorën e kompanive private dhe se Komisioni, si institucion publik, nuk mund t’i garantojë ato.

Marrëveshja mes Trump dhe presidentes së Komisionit Evropian, Ursula von der Leyen, parashikon një tarifë prej 15% për shumicën e importeve nga BE-ja në SHBA. Data e re e hyrjes në fuqi është 7 gusht.

Përveç shumës prej 600 miliardë dollarësh, BE-ja i ka premtuar Trump-it se deri në fund të mandatit të tij do të blejë energji amerikane në vlerë prej 750 miliardë dollarësh. /Ad.Ab./

The post SHBA – Trump e quan “dhuratë” investimin prej 600 miliardë dollarësh nga BE-ja appeared first on Agjencia Telegrafike Shqiptare.

BERLIN, 5 gusht /ATSH- DPA/ – Një anëtare e lartë e Partisë Socialdemokrate të Gjermanisë (SPD) u bashkua sot me thirrjet që Berlini të strehojë përkohësisht fëmijë të plagosur nga Rripi i Gazës.

“Po shohim që disa nga vendet partnere evropiane kanë ndërmarrë nisma për të evakuuar fëmijë dhe për t’u kujdesur për ata që janë të plagosur rëndë”,  tha sekretarja e SPD-së, Derya Türk-Nachbaur, për transmetuesin “RTL/ntv”.

Ajo përmendi Norvegjinë dhe Italinë si shembuj. “Ka edhe shumë vende të tjera që i janë bashkuar kësaj nisme”, shtoi ajo, duke i bërë thirrje qeverisë gjermane të veprojë në të njëjtën mënyrë dhe të pranojë fëmijë nga Gaza.

Türk-Nachbaur kujtoi se Gjermania ka pranuar fëmijë ukrainas gjatë pushtimit të vazhdueshëm nga Rusia, duke argumentuar se vendi është tashmë i përgatitur për të ofruar kujdes mjekësor.

Thirrjet ndaj Berlinit për veprim më vendimtar janë shtuar në mes të zemërimit ndërkombëtar për situatën humanitare në Rripin e Gazës, që sipas ekspertëve ndodhet në prag të urisë pas gati 22 muajsh të fushatës ushtarake izraelite, e nisur pas sulmeve të 7 tetorit 2023.

Tre qytete gjermane, Hanoveri, Dyseldorfi dhe Boni,  njoftuan se planifikojnë të strehojnënë fëmijë nga Gaza dhe Izraeli që janë veçanërisht të traumatizuar apo të pambrojtur.

Por, Turk-Nachbaur pranoi se disa çështje duhet të zgjidhen me Izraelin përpara se të bëhet evakuimi i fëmijëve nga Gaza.

“Na duhen korridore të sigurta, duhet të organizojmë transportin me autoambulanca dhe na nevojitet fillimisht miratimi nga pala izraelite”, theksoi ajo. /Ad.Ab./

The post GJERMANI – SPD kërkon strehimin e fëmijëve nga Gaza appeared first on Agjencia Telegrafike Shqiptare.

LONDËR, 5 gusht /ATSH– DPA/ – Sekretarja e Brendshme britanike Yvette Cooper ka thënë se marrëveshja e arritur me Francën për kthimin e emigrantëve nga kanali i Lamanshit  nuk do t’i ndalojë vetë kalimet, pasi ajo refuzoi të konfirmonte se sa emigrantë do të ktheheshin sipas skemës së organizuar.

Cooper tha se marrëveshja, e cila filloi sot, kishte të bënte me parimin dhe jo me vetë numrin. Ajo vuri në dukje një marrëveshje të ngjashme midis Greqisë dhe Turqisë në vitin 2016, e cila tha se uli numrin e emigrantëve në Greqi.

Emigrantët për shkëmbim do të fillojnë të ndalohen që nga dita e nesërme, u tha ajo kanaleve televizivë.

Duke folur për BBC-në, Cooper tha se “ne nuk pretenduam kurrë se ka një zgjidhje të vetme për këtë çështje. Pra, kjo shkon paralelisht me rritjen prej 28% të kthimeve të azilkërkuesve të refuzuar që kemi sjellë”.

“Kjo shkon paralelisht me ndryshimin e rregullave detare franceze që përmenda, që do të thotë se Franca po ndërmerr veprime në ujërat franceze për të parandaluar kalimet me anije që në fillim dhe zbatimin shumë më të fortë të ligjit që njoftuam më parë këtë javë me hetuesit dhe policinë shtesë të Agjencisë Kombëtare të Krimit për të qenë në gjendje të ndjekin bandat kriminale. Ne duhet t’i bëjmë të gjitha këto gjëra”,  përfundoi ajo. /Ad.Ab,/

The post BM -Traktati për kthimin e emigrantëve nga kanali i Lamanshit  nuk është një zgjidhje e lehtë  appeared first on Agjencia Telegrafike Shqiptare.

VARSHAVË, 4 gusht /ATSH-DPA/ – Forcat ajrore gjermane do të vendosin pesë avionë luftarakë “Eurofighter” në Poloni për për një periudhë disa javore.

Që nga dita e nesërme, avionët do të veprojnë nga baza ushtarake Minsk Mazowiecki, në lindje të Varshavës, konfirmoi një zëdhënës i forcave ajrore.

Rreth 150 ushtarë nga Bundeswehr (ushtria gjermane) janë tashmë në terren.

Polonia është një mbështetëse kyçe, politike dhe ushtarake e Ukrainës që prej fillimit të agresionit rus më shumë se tre vite më parë. Ajo gjithashtu luan rol qendror si nyje logjistike për ndihmën ushtarake të perëndimit ndaj Kievit.

Polonia  e konsideron veten të kërcënuar nga Rusia dhe po zhvillon aktualisht një program të gjerë riarmatimi.

Që nga prilli, forcat ajrore gjermane kanë ndihmuar ushtrinë polake në monitorimin e hapësirës ajrore të Polonisë.

Ministri gjerman i Mbrojtjes, Boris Pistorius, e kishte paralajmëruar këtë vendim që në janar.

Komanda e lartë e ushtrisë polake njoftoi në platformën X se avionët do të mbështesin mbrojtjen e hapësirës ajrore në krahun lindor të NATO-s.

“Ky është një tjetër shembull i bashkëpunimit mes aleatëve dhe i përkushtimit të tyre të vërtetë ndaj sigurisë së Evropës Qendrore dhe Lindore”, thuhet në deklaratë. /Ad.Ab./

The post Gjermani – Pesë avionë luftarakë “Eurofighter” në Poloni për një periudhë disa javore appeared first on Agjencia Telegrafike Shqiptare.

MOSKË, 4 gusht /ATSH-DPA/ – Rusia deklaroi sot se nuk do të respektojë më një traktat kyç për çarmatimin bërthamor, disa vite pasi Shtetet e Bashkuara të Amerikës u tërhoqën nga marrëveshja.

Ministria e Jashtme ruse njoftoi se Moska po i jep fund moratoriumit me të cilin kishte respektuar Traktatin për Forcat Bërthamore me Rreze të Mesme (INF) që kur SHBA-ja doli nga traktati në vitin 2019.

Presidenti rus Vladimir Putin ka kërcënuar me një përgjigje “simetrike” ndaj vendimit të SHBA-së për të vendosur raketa në Gjermani duke filluar nga viti 2026.

Sipas Kremlinit, armët për këtë përgjigje ruse kanë qenë gati për përfundim që një vit më parë.

Traktati INF, i nënshkruar në vitin 1987 nga udhëheqësi sovjetik Mikhail Gorbachev dhe presidenti amerikan Ronald Reagan, parashikonte eliminimin e të gjitha raketave balistike dhe raketave lundruese tokësore me rreze të shkurtër (500–1,000 km) dhe rreze të mesme (1,000–5,500 km).

SHBA u tërhoq nga traktati në 2019, duke akuzuar Rusinë për shkelje të marrëveshjes.

Sipas ushtrisë gjermane, vendosja e armëve bërthamore amerikane në Gjermani ka për qëllim të shërbejë si mjet frenimi ndaj vendosjes nga Rusia të raketave Iskander me mbushje bërthamore në Kaliningrad, enklavë ruse që ndodhet afër kufirit me Poloninë dhe ka rreze të mjaftueshme për të goditur qytete gjermane. /Ad.Ab./

The post MOSKË – Rusia tërhiqet nga traktati për çarmatimin bërthamor appeared first on Agjencia Telegrafike Shqiptare.

UASHINGTON, 4 gusht /ATSH-DPA/ – Zëvendëskancelari gjerman Lars Klingbeil bëri sot thirrje që qeveria e tij të ndjekë një qasje të ekuilibruar ndaj konfliktit në Gaza, ndërsa presioni ndërkombëtar rritet mbi Izraelin për shkak të situatës së rëndë humanitare në territorin palestinez.

“Është e qartë se presioni duhet të rritet nga të dyja palët”, tha Klingbeil, i cili është edhe si ministër i financave, për transmetuesin gjerman “Welt TV” gjatë një vizite në Uashington.

“Ne kemi nevojë për zgjidhje humanitare. Duhet të sigurohemi që dërgesat e ushqimit të arrijnë, që situata mjekësore të përmirësohet. Dhe duhet të sigurohemi që më në fund të arrihet një armëpushim”.

Klingbeil theksoi se ishte e rëndësishme që Berlini të deklaronte qartë se grupi ekstremist palestinez Hamas është përgjegjës për përshkallëzimin e konfliktit në Gaza, duke vënë në dukje se debati aktual po jepte përshtypjen se duhej vendosur “nëse do të vuash me palën palestineze apo me palën izraelite”.

“Megjithatë, ishte gjithashtu e rëndësishme të theksohej se Izraeli mban një nivel tepër të lartë përgjegjësie në dritën e situatës”, shtoi ai.

“Ata nuk po i japin drejtësi kësaj në shumë vende”, tha Klingbeil në lidhje me përgjegjësinë e Izraelit. “Veprimet e Hamasit duhet të shihen veçmas nga gjendja e vështirë e popullsisë civile palestineze”, theksoi Klinbeil

Ai  përsëriti se Partia e tij Social Demokrate, partneri i vogël në qeverinë e koalicionit të kancelarit konservator Friedrich Merz, nuk ishte në favor të njohjes së shpejtë të një shteti palestinez. Në vend të kësaj, ai tha se “është e rëndësishme të përqendrohemi së pari në një armëpushim dhe të ndihmojmë popullsinë”. /Ad.Ab./

The post SHBA – Zëvendëskancelari gjerman: Duhet rritur presioni ndaj Izraelit dhe Hamasit appeared first on Agjencia Telegrafike Shqiptare.

AMSTERDAM, 4 gusht /ATSH/ – Holanda do të jetë kontribuesi i parë në mekanizmin e ri të financimit të NATO-s për armatimin e Ukrainës, të quajtur “Lista e kërkesave prioritare të Ukrainës” (PURL), me një pagesë prej 500 milionë eurosh (rreth 578 milionë dollarë), njoftoi sot ministria holandeze e Mbrojtjes, sipas Reuters.

Ukraina ka nevojë për më shumë mbrojtje ajrore dhe municione tani. Si aleati i parë i NATO-s, Holanda do të dërgojë një paketë armësh amerikane me vlerë 500 milionë euro (përfshirë pjesë dhe raketa të sistemit Patriot), deklaroi ministri holandez i Mbrojtjes, Ruben Brekelmans, në një postim në X.

“Kjo ndihmon Ukrainën të mbrohet vetë dhe pjesën tjetër të Evropës nga agresioni rus”, shtoi ai.

Në një deklaratë të publikuar në faqen zyrtare të Ministrisë së Mbrojtjes të Holandës, thuhet se edhe shtete të tjera kanë premtuar financime sipas këtij mekanizmi të ri.

Presidenti amerikan Donald Trump deklaroi muajin e kaluar se SHBA-ja do të furnizojë me armë Ukrainën, por këto do të paguhen nga aleatët evropianë. Megjithatë, ai nuk dha detaje se si do të funksionojë kjo skemë.  /Ad.Ab./

The post AMSTERDAM – Holanda e para në financimin e armëve për Ukrainën përmes NATO-s appeared first on Agjencia Telegrafike Shqiptare.

UASHINGTON, 4  gusht/ATSH-DPA/  – Ministri gjerman i Financave, Lars Klingbeil, shpreson të negociojë një përjashtim për eksportet e çelikut gjatë vizitës së tij në Uashington, ku zhvilloi sot bisedime  me sekretarin amerikan të Thesarit, Scott Bessent, vetëm disa ditë para se të hyjnë në fuqi tarifat e reja të SHBA-së ndaj importeve nga Bashkimi Evropian.

Klingbeil tha se planifikon të diskutojë një rregullore kuotash për eksportet e çelikut, e cila mund të lejojë që sasi të caktuara të këtij metali të tregtohen mes të dyja palëve me një tarifë më të ulët, ose edhe pa tarifë fare.

“Do të ishte shumë e rëndësishme për industrinë gjermane të çelikut, për shumë vende pune në Gjermani”, u tha ai gazetarëve në Uashington.

Bashkimi Evropian dhe Shtetet e Bashkuara të Amerikës arritën një marrëveshje tregtare në fund të muajit të kaluar për t’i dhënë fund një mosmarrëveshjeje të gjatë për tarifat, e cila u nxit nga presidenti Donald Trump.

Sipas marrëveshjes së ndërmjetësuar nga Trump dhe presidentja e Komisionit Evropian, Ursula von der Leyen, shumica e importeve nga BE-ja drejt SHBA-së do të përballen me një tarifë prej 15% duke filluar nga data 7 gusht. Ndërkohë, tarifat mbi mallra të caktuara si alumini dhe çeliku do të mbeten në nivelin 50%.

Klingbeil shprehu zhgënjim lidhur me negociatat që çuan në marrëveshjen e shpallur më 27 korrik.

“Mendoj se ishim shumë të dobët. Nuk mund të jemi të kënaqur me rezultatin që u arrit,” tha ministri, i cili është gjithashtu edhe  zëvendëskancelar i Gjermanisë. /Ad.Ab./

The post SHBA – Ministri gjerman i Financave kërkon tarifë më të ulët për çelikun appeared first on Agjencia Telegrafike Shqiptare.

VILNUS, 4 gusht /ATSH / – Presidenti i Lituanisë, Gitanas Nausėda, pranoi sot dorëheqjen e kryeministrit Gintautas Paluckas dhe të gjithë qeverisë së tij, duke emëruar ministrin e Financave, Rimantas Sadzius, si drejtues të qeverisë së përkohshme, sipas “Euronews”

Presidenti ka deri në 15 ditë për të propozuar një kandidat të ri për postin e kryeministrit për miratim nga parlamenti (Seimas). Deri atëherë, Sadzius do të udhëheqë qeverinë teknike.

Paluckas njoftoi dorëheqjen të enjten e kaluar, pas hapjes së dy hetimeve paraprake nga autoritetet ligjzbatuese mbi aktivitetet e tij të biznesit, që shkaktuan shqetësime publike në rritje. Ai e konfirmoi  sot vendimin gjatë një mbledhjeje të jashtëzakonshme të qeverisë .

Kandidati i ri për kryeministër do të propozohet nga Partia Socialdemokrate, grupi më i madh në parlament.  Kandidati  kryesor është ish-kryetari i bashkisë së Jonavës dhe ish-ministri i Ekonomisë, Mindaugas Sinkevicius, pavarësisht se në maj 2024 u dënua me gjobë dhe ndalim 3-vjeçar për ushtrim detyre për shkak të një skandali abuzimi me detyrën, dënim që u konfirmua edhe në apel në shtator.

Kandidatët e tjerë të mundshëm janë ish-eurodeputeti dhe ish-ministri i Mbrojtjes Kombëtare Juozas Olekas, ministrja e Sigurisë Sociale dhe Punës Inga Ruginiene, si dhe kryetari i qarkut të Vilnusit, Robert Duchnevic. /Ad.Ab./

The post LITUANI – Ministri i Financave emërohet të drejtojë qeverinë teknike appeared first on Agjencia Telegrafike Shqiptare.

LONDËR, 4 gusht /ATSH-DPA/ – Zyra e kryeministrit britanik Keir Starmer nuk pranoi të thotë nëse Britania e Madhe do të njohë shtetin palestinez përderisa Hamasi mbetet në pushtet, pasi kjo organizatë militante raportohet të ketë përshkruar shtetësinë si “një nga frytet e 7 tetorit”.

Po ashtu, qeveria nuk u shpreh qartë nëse lirimi i të gjithë pengjeve izraelite është kusht për njohje, por këmbënguli se ato duhet të lirohen “pa kushte dhe menjëherë”.

Shqetësime janë ngritur mbi planet e Britanisë së Madhe  për të njohur shtetin palestinez, pas deklaratës së anëtarit të Hamasit, Ghazi Hamad, i cili tha se “frytet e 7 tetorit” kishin bërë që bota të “hapte sytë ndaj çështjes palestineze”.

I pyetur sot nëse një vendim i tillë pa një armëpushim do të motivonte Hamasin të mbajë pengjet izraelite, zëdhënësi zyrtar i Starmerit tha se qeveria do të vlerësojë situatën në shtator.

“Kryeministri ka qenë absolutisht i qartë se, më 7 tetor, Hamasi kreu masakrën më të rëndë në historinë e Izraelit”, tha ai. “Çdo ditë që nga ajo ditë, ai tmerr vazhdon… siç tha ministri i Jashtëm (David Lammy) këtë fundjavë.  Hamasi me të drejtë konsiderohet grup i përjashtuar që nuk mund të ketë rol në të ardhmen e Gazës”.

Kur u pyet nëse shteti palestinez mund të njihet ndërkohë që Hamasi mban ende pengje, zëdhënësi tha: se “do të bëjmë një vlerësim përpara Asamblesë së Përgjithshme të OKB-së, për të parë sa janë përmbushur hapat që kemi parashtruar”.

“Kemi qenë shumë të qartë që Hamasi nuk mund të ketë asnjë rol në qeverisjen e ardhshme të Gazës … gjithashtu, duhet të çarmatoset dhe të lirojë të gjitha pengjet.”

Lidhur me faktin nëse ky hap mund të ndërmerret ndërsa Hamasi mbetet në pushtet, zyrtari tha se qeveria ishte e qartë se “Hamasi nuk është populli palestinez”.

 “Është një e drejtë e patjetërsueshme e popullit palestinez të ketë njohje, sipas kushteve dhe hapave që kemi parashtruar më herët.” “Gjithashtu kemi qenë të qartë se nuk mund të jetë një grup terrorist si Hamasi që të ketë të drejtën të vendosë veton mbi njohjen e Palestinës”. /Ad.Ab./

The post BM – Londra nuk do ta njohë Palestinën ndërkohë që Hamasi është ende në pushtet appeared first on Agjencia Telegrafike Shqiptare.

LONDËR, 2 gusht /ATSH-DPA/ – Ministri i Jashtëm britanik, David Lammy deklaroi se nuk i pranon pretendimet e Iranit se vendi po pasuron uranium për qëllime akademike.

Përfaqësues nga Britania e Madhe, Gjermania dhe Franca zhvilluan javën e kaluar bisedime me Iranin për të thyer ngërçin lidhur me programin bërthamor të këtij vendi.

Teherani pohon se mbetet i hapur ndaj diplomacisë, megjithëse së fundmi ka pezulluar bashkëpunimin me Agjencinë Ndërkombëtare për Energjinë Atomike (IAEA).

Një shqetësim thelbësor për fuqitë perëndimore u theksua kur IAEA-ja raportoi në maj se rezervat e uraniumit të pasuruar deri në 60% të Iranit, shumë afër nivelit të nevojshëm për armë

“Liderët e tyre nuk mund të më shpjegojnë, dhe kam pasur shumë bisedimeme ta, pse u duhet uranium i pasuruar në nivelin 60%.“,  tha Lami në një intervistë për gazetën “The Guardian”.

“Nëse shkoj në Sellafield apo Urenco në Cheshire, nuk ka më shumë se 6% uranium. Irani thotë se është për përdorim akademik, por unë nuk e pranoj këtë”, shtoi ai.

Lammy paralajmëroi se zhvillimi i armëve bërthamore nga Irani mund të çojë në përshkallëzim të tensioneve në Lindjen e Mesme.

Izraeli dhe Shtetet e Bashkuara të Amerikës ndërmorën sulme kundër impianteve bërthamore iraniane në qershor./  /Ad.Ab./

The post BM – Lammy: Të papranueshme pretendimet e Iranit për uraniumin appeared first on Agjencia Telegrafike Shqiptare.

NJU JORK, 2 gusht /ATSH-DPA/ – Katër astronautë kanë mbërritur në Stacionin Ndërkombëtar Hapësinor (ISS) pas një udhëtimi 15-orësh në një kapsulë SpaceX, njoftoi sot NASA.

Misioni komandohet nga astronautja amerikane Zena Cardman. Anëtarët e tjerë të ekuipazhit janë Michael Fincke i SHBA-së, astronautja japoneze Kimiya Yui dhe kozmonauti rus Oleg Platonov.

Ata u nisën një ditë më parë në bordin e një rakete Falcon 9 të operuar nga kompania hapësinore SpaceX e miliarderit të teknologjisë Elon Musk, nga porti hapësinor Cape Canaveral në Florida.

Ky është misioni i 11-të i rregullt me ekuipazh i SpaceX në ISS.

Ekuipazhi do të qëndrojë në bordin e postit orbital, të vendosur afërsisht 400 kilometra mbi Tokë, për disa muaj, duke kryer një sërë eksperimentesh shkencore.

Aktualisht në stacion ndodhen 11 astronautë.

Por të sapoardhurit ndërrohen me katër astronautë të tjerë që kanë qenë atje që nga marsi.

Ata janë planifikuar të kthehen në Tokë në ditët e ardhshme. /Ad.Ab./

The post HAPËSIRË – NASA: Katër astronautë ulen në ISS appeared first on Agjencia Telegrafike Shqiptare.

LONDËR, 2 gusht /ATSH/ – ”And Just Like That”, vazhdimi i serialit të viteve ’90 dhe fillimit të viteve 2000 ”Sex and the City”, do të mbyllet pas sezonit të tretë, njoftoi HBO, sipas BBC.

Regjisori dhe skenaristi i njohur amerikan, Michael Patrick King shpjegoi në Instagram se ndërsa po shkruante episodin e fundit, ”u bë e qartë se ky mund të ishte një moment i mrekullueshëm për ta mbyllur”.

I emërtuar sipas frazës së famshme të personazhit kryesor Carrie Bradshaw, seriali komedi-dramë ndjek romancat e tre prej katër personazheve origjinale, teksa jetojnë të 50-at e tyre në Nju Jork.

Finalja me dy pjesë nuk është transmetuar ende.

Sarah Jessica Parker, që luan Carrie-n, ndau një montazh fotosh nga të dy sezonet dhe tha se personazhi ”ka dominuar jetën time profesionale për 27 vjet”, por tani ”ky kapitull është i mbyllur”.

Ajo shtoi se ”And just like that” ishte ”gëzim, aventurë dhe puna më e bukur, krahas talenteve më të jashtëzakonshme”.

”Do të më duhet shumë kohë për ta harruar”, shkroi Parker.

”Shpresoj që këto dy episode të fundit t’ju pëlqejnë po aq sa na pëlqyen neve”, shtoi ajo.

Kristin Davis (Charlotte York në serial) tha se “jam thellësisht e trishtuar”.

Fansat shpresonin për një tjetër serial apo spin-off, por King deklaroi se ”rrëfimi në vazhdim i universit të ‘Sex and the City’ po përfundon”.

Shikueshmëria ka rënë gjatë tre sezoneve.

”Episodi i parë u ndoq nga 1,1 milionë familje amerikane, ndërsa të fundit kishin më pak se gjysmën e këtij numri”, sipas Samba TV.

Seriali gjithashtu është kritikuar, veçanërisht për përpjekjet për të diversifikuar kastin.

Revista ”Elle” tha se kjo përpjekje “dështoi”, ndërsa ”The Guardian” e cilësoi si “mbikompensim i rëndë” që tentonte të shlyente mungesën e ndjeshmërisë racore në origjinalin.

Në sezonin e fundit, personazhi Che Diaz – i quajtur “personazhi më i keq në televizion” nga ”The Daily Beast”, u zëvendësua nga një tjetër që punon në BBC./ /Ad.Ab./

The post KINEMA – ”And Just Like That”, sezoni i tretë i rikthimit të ”Sex and the City”, do të jetë i fundit appeared first on Agjencia Telegrafike Shqiptare.

BRUKSEL, 2 gusht  /ATSH-DPA/ – Rregullat e reja të transparencës për modelet e inteligjencës artificiale  (IA) me përdorim të përgjithshëm, si ChatGPT dhe Gemini, hynë sot në fuqi në të gjithë Bashkimin Evropian, si pjesë e Aktit për Inteligjencën Artificiale të miratuar vitin e kaluar.

Sipas këtyre rregullave, zhvilluesit duhet të bëjnë publike se si funksionojnë modelet e tyre dhe çfarë të dhënash janë përdorur për trajnimin e tyre.

Modelet veçanërisht të avancuara, të cilat konsiderohen me rrezik të mundshëm për publikun, duhet gjithashtu të dokumentojnë masat e sigurisë.

Inteligjenca artificiale me përdorim të përgjithshëm i referohet sistemeve që mund të përdoren për një gamë të gjerë funksionesh, si gjenerimi i tekstit, analizimi i gjuhës apo programimi.

Qëllimi i ligjit është edhe forcimi i mbrojtjes së të drejtave të autorit. Zhvilluesit duhet të raportojnë burimet e të dhënave që kanë përdorur për trajnim dhe nëse kanë përdorur metoda automatike për të mbledhur të dhëna nga interneti.

Ata janë gjithashtu të detyruar të paraqesin masat e marra për të mbrojtur pronën intelektuale dhe të caktojnë pika kontakti për mbajtësit e të drejtave.

Megjithatë, disa shoqata që përfaqësojnë autorë, artistë dhe botues e kanë kritikuar ligjin duke thënë se nuk shkon mjaftueshëm larg.

Në një deklaratë të përbashkët, nisma gjermane “Initiative Urheberrecht”, një grup avokues për të drejtat e autorit, theksoi se rregullat janë të pafuqishme pa një kërkesë për të emëruar grupet specifike të të dhënave ose domenet.

Ndërsa individët mund të padisin ofruesit e AI sipas ligjit të ri, zbatimi nga Zyra Evropiane e AI-së do të nisë më vonë. Kjo zyrë do të mbikëqyrë modelet e reja nga gushti i vitit 2026 dhe modelet e lëshuara para datës 2 gusht 2025 duke filluar nga gushti i vitit 2027.

Shkeljet mund të rezultojnë në gjoba deri në 15 milionë euro (17,1 milionë dollarë) ose 3% të xhiros vjetore globale.

Për të lehtësuar përputhshmërinë, Komisioni Evropian ka publikuar gjithashtu udhëzime vullnetare dhe një kod sjelljeje.

Google, zhvilluesi i modelit Gemini, ka deklaruar se ka ndërmend ta nënshkruajë këtë kod, por ka paralajmëruar se rregullorja mund të pengojë inovacionin. /Ad.Ab./

The post BRUKSEL – Hyjnë në fuqi regullat e reja të transparencës për modelet e IA-së appeared first on Agjencia Telegrafike Shqiptare.

MOSKË, 2 gusht /ATSH-DPA/ – Ukraina ka ndërmarrë sërish gjatë natës sulme me dronë në rajone të ndryshme të Rusisë, duke shkaktuar shpërthime në impiante të përpunimit të naftës, sipas raporteve në rrjetet sociale.

Autoritetet në rajonet e prekura të Samarës, Penzës dhe Ryazanit konfirmuan sulmet me dronë dhe thanë se mbetje nga drone të rrëzuar kishin goditur zona industriale, megjithëse nuk u raportuan dëme ose të lënduar zyrtarisht.

Një video e publikuar në rrjetet sociale pretendohet të tregojë një shpërthim masiv në një impiant nafte pranë qytetit të Samarës, i cili ndodhet buzë lumit Vollga.

Për shkak të kërcënimit nga dronët, autoritetet në rajonin e Samarës pezulluan përkohësisht operacionet fluturuese në aeroportin lokal.

Në Ryazan, një tjetër impiant nafte raportohet se është goditur.

Guvernatori Pavel Malkov konfirmoi një sulm, por nuk dha më shumë detaje, duke u bërë thirrje qytetarëve të mos ndajnë imazhe që mund të ndihmojnë armikun.

Në rajonin e Penzës, thuhet se është goditur një fabrikë që prodhon komponentë për sistemet drejtuese të raketave.

Nuk pati konfirmim zyrtar nga autoritetet për këtë sulm.

Në Moskë, Ministria e Mbrojtjes e Rusisë njoftoi sot  se më shumë se 100 dronë ukrainas ishin rrëzuar.

Si zakonisht, deklarata e ministrisë nuk përmendi viktima apo dëme materiale në rajonet e prekura.

Gjatë më shumë se tre vjetëve të pushtimit rus, zyrtarët ukrainas kanë deklaruar se sulmet e tyre me dronë synojnë të prishin logjistikën ushtarake të Rusisë pas vijës së frontit duke goditur depot e karburantit, magazinat e municioneve dhe infrastrukturën transportuese. /Ad.Ab./

The post MOSKË – Ukraina godet infrastrukturën ruse në një valë të re sulmesh me dronë appeared first on Agjencia Telegrafike Shqiptare.

FLORIDA, 2 gusht /ATSH/ – Kafshët shtëpiake po braktisen dhe po dorëzohen në vende për strehimin e tyre, ndërsa pronarët po përballen me goditjen e presidentit amerikan, Donald Trump kundër imigracionit, sipas “Independent”.

Daymi Blain, e cila drejton misionin e shpëtimit “Adopto dhe shpëto një jetë”, në jug të Floridës, thotë se “kjo është e gjitha që po marrim tani: kafshë shtëpiake me pronarë të deportuar dhe të ndaluar. Askush nuk kërkon asgjë tjetër”, tha ajo për “The Washington Post”.

“Nuk e di se çfarë do të ndodhë me të gjitha këto, por mund t’ju them se kafshët janë ato që paguajnë çmimin”, shtoi ajo.

Strehëzat e kafshëve po mbipopullohen ndërsa kafshët shtëpiake humbasin shtëpitë e tyre me pronarët e tyre të ndaluar ose të deportuar.

Grupet e mirërritjes së kafshëve në të gjithë SHBA-në thonë se po merren me një rritje të thirrjeve për të strehuar kafshë shtëpiake, me pronarë të ndaluar nga autoritetet e imigracionit ose që janë larguar nga vendi me dëshirën e tyre.

Nevoja në rritje për hapësirë vjen ndërsa strehimoret e kafshëve janë përhapur gjithnjë e më pak pas pandemisë, pasi ato përballen me mungesën e stafit dhe uljen e adoptimeve.

Disa kafshë mund të eutanazohen sepse nuk ka vend për to.

“Të gjitha shpëtuesit si ne mendojmë dhe katastrofat”, tha Jean Harrison në “Big Fluffy Dog Rescue” në Nashville për “The Post”.

“Unë planifikoj përmbytjet. Unë planifikoj sezonin e tornadove dhe uraganeve që po vijnë. Nuk më shkoi ndërmend se duhej të isha e përgatitur për një ardhje të madhe kafshësh shtëpiake të zhvendosura nga emigrantët e deportuar”, thekson ajo.

Departamenti i Sigurisë Kombëtare i tha “The Post” se zbatimi imigracionit dhe doganave të SHBA-së “nuk  sekuestron pronën”, por nuk sqaroi hollësira të mëtejshme.

Lucero, një qen i ri, u braktis pranë një stacioni benzine pasi pronari i saj, një shofer kamioni, u arrestua.

Një çift qensh pastorë gjermanë, Lolita dhe Bruno, me gjashtë këlyshë, u dorëzuan të gjithë nga një burrë që ishte gati të deportohej, pas një çerek shekulli në SHBA.

Mbetet e paqartë se sa kafshë kanë humbur shtëpitë e tyre pasi asnjë agjenci qeveritare nuk mban përgjegjësi./ /Ad.Ab./

The post FOKUS – Dëbimi nga SHBA-ja i emigrantëve çon në braktisjen e kafshëve të pafajshme appeared first on Agjencia Telegrafike Shqiptare.