TIRANË, 29 korrik /ATSH/- E vendosur në cepin juglindor të Evropës, Shqipëria ofron një ndërthurje të bukurisë natyrore magjepsëse, kulturës së pasur lokale dhe çmimeve të përballueshme – që kohët e fundit ka filluar të tërheqë vëmendjen e turistëve – në kërkim të përvojave autentike evropiane, sipas “Travel and Tour World” (TTW).

Me një vijë bregdetare që shtrihet përgjatë deteve Adriatik dhe Jon, rajoni jugor i Shqipërisë, i njohur si Riviera Shqiptare, është një parajsë.

Këtu, turistët do të gjejnë ujëra të kristalta, plazhe të pastra dhe një atmosferë të qetë – pa turma vizitorësh apo çmime të larta si në destinacionet e tjera të njohura mesdhetare.

Vend i përballueshëm dhe i arritshëm

Një nga aspektet më joshëse të vizitës në Shqipëri është përballueshmëria e saj.

Ndryshe nga vendet e tjera mesdhetare si Bregu i Amalfit ose Santorini, Shqipëria ofron çmime  shumë më të ulëta për akomodim, ngrënie dhe aktivitete të tjera.

Një natë në një shtëpi mysafirësh ose në një hotel të vogël – zakonisht kushton midis 20-30 euro.

Të ngrënit jashtë është po aq lirë. Një vakt tipik në një restorant lokal, duke përfshirë ushqime të freskëta deti, sallatë dhe një pije, mund kushtojë rreth 10–15 euro.

Edhe një birrë freskuese pranë plazhit kushton rreth 1–1,50 euro.

Zhvillimi i infrastrukturës

Infrastruktura e Shqipërisë është përmirësuar, vitet e fundit për të mbështetur numrin në rritje të turistëve që vizitojnë vendin.

Qeveria ka investuar në projekte transporti për ta bërë më të lehtë për vizitorët të eksplorojnë vijën bregdetare të mrekullueshme të vendit dhe zonat në brendësi.

Një shembull i dukshëm është Tuneli i Llogarasë i ndërtuar rishtazi, i cili ka ulur ndjeshëm kohën e udhëtimit midis qytetit bregdetar të Vlorës dhe Rivierës Shqiptare.

Ky itinerar i ri e shkurton udhëtimin nga 30 minuta në vetëm 7, duke e bërë atë më të përshtatshëm, efikas dhe të shpejtë – për të aksesuar plazhet e virgjëra të Shqipërisë jugore.

Për më tepër, hapja e Aeroportit Ndërkombëtar të Vlorës ka rritur aksesin në Shqipëri, duke ofruar fluturime direkte nga qytetet kryesore evropiane.

Ky zgjerim po ndihmon në pozicionimin e Shqipërisë si një nga destinacionet më të spikatura në hartë për turistët nga vende të tilla si Britania e Madhe, Gjermania dhe më gjerë.

Kulturë e pasur dhe bukuri natyrore

Shqipëria është një vend i pasur me trashëgimi kulturore dhe bukuri natyrore.

Qytetet e Beratit dhe Gjirokastrës, të listuara nga UNESCO, të njohura për arkitekturën e tyre osmane, ofrojnë një pamje magjepsëse të së kaluarës së vendit.

Adhuruesit e historisë mund të vizitojnë rrënojat e lashta të Butrintit dhe Apollonisë – ku shfaqen mbetjet e Greqisë së Lashtë, Romës dhe Perandorisë Bizantine.

Përveç vendeve të saj historike, Shqipëria është shtëpia e një shumëllojshmërie mrekullish natyrore.

Alpet Shqiptare, Parku Kombëtar i Lumit Vjosa dhe Liqeni i Shkodrës ofrojnë hapësirë të bollshme për aventura në natyrë, të tilla si ecje në natyrë, rafting dhe vëzhgim i jetës së egër.

Peizazhet e larmishme të Shqipërisë – nga malet dhe lumenjtë te plazhet dhe pyjet – ofrojnë gjithçka për çdo vizitorë.

Ndikimi ekonomik i turizmit: Industria në rritje e Shqipërisë

Turizmi është një sektor thelbësor i ekonomisë së Shqipërisë, duke kontribuar mbi 20% në PBB-në e vendit.

Në vitet e fundit, qeveria shqiptare ka njohur vlerën e turizmit dhe vazhdon të investojë në tërheqjen e vizitorëve ndërkombëtarë.

Bordi i turizmit i vendit ka nisur fushata ndërkombëtare që synojnë turistë nga Britania e Madhe, Gjermania dhe vende të tjera evropiane.

Këto përpjekje synojnë ta pozicionojnë Shqipërinë si një destinacion kryesor për vizitorët që kërkojnë një arratisje unike dhe të përballueshme në Mesdhe.

Qëndrueshmëria sipas planit të strategjisë së turizmit të Shqipërisë

Shqipëria po bën hapa përpara në promovimin e praktikave të turizmit të qëndrueshëm.

Një nga arritjet më të rëndësishme mjedisore të vendit është përcaktimi i lumit Vjosa si park kombëtar, duke siguruar ruajtjen e njërit prej lumenjve të fundit të egër të Evropës.

Ky angazhim për mbrojtjen e burimeve natyrore të Shqipërisë është pjesë e një përpjekjeje më të gjerë për të balancuar rritjen e turizmit me ruajtjen e mjedisit.

Qeveria po punon ngushtë me organizatat mjedisore për të siguruar që zhvillimi i ardhshëm të jetë në përputhje me praktikat e qëndrueshme.

Pse Shqipëria është sekreti i Mesdheut?

Shqipëria shquhet si një nga perlat e fundit të pazbuluara të Evropës.

Me plazhet e saj të pastra, historinë e pasur dhe çmimet miqësore, ajo ofron një përvojë udhëtimi autentike dhe të shëndetshme – që është gjithnjë e më e rrallë në destinacionet turistike të komercializuara.

Banorët miqësorë dhe mikpritës të vendit, aksesueshmëria e lehtë, përballueshmëria dhe atraksionet e larmishme e bëjnë atë zgjedhjen për një arratisje nga vendet e mbipopulluara.

Pavarësisht nëse jeni duke pushuar në plazhet e pastra të Ksamilit, duke bërë ecje në Alpet Shqiptare apo duke shijuar ushqime të freskëta deti në një restorant lokal, Shqipëria ofron një përvojë të paharrueshme me një kosto shumë më të ulët se destinacionet e njohura.

Ndërsa turizmi në Shqipëri vazhdon të rritet, është e qartë se kjo parajsë mesdhetare është në rrugën e saj për t’u bërë një destinacion që duhet vizituar me patjetër – për një pushim autentik dhe me buxhet të përballueshëm. //a.i/

https://www.travelandtourworld.com/news/article/albania-europes-hidden-mediterranean-gem-for-affordable-travel/

The post “Travel and Tour World”: Pse Shqipëria është sekreti i Mesdheut? appeared first on Agjencia Telegrafike Shqiptare.

LONDËR, 30 korrik /ATSH/- Jeni duke kërkuar një vend për pushime me buxhet të ulët? Ne ju rekomandojme pese destinacionet më të mira në vitin 2025 – nga Spanja në Shqipëri – për pushime të përballueshme, shkruan Sarah Marshall në një artikull të botuar në të përditshmen britanike “Independent”.

Shumica e turistëve britanikë do të donin të eksploronin destinacione të reja dhe në zhvillim, në vend të destinacioneve të njohura, të mbipopulluara dhe të shtrenjta për pushime.

Për fat të mirë, ka mjaft mundësi për të zgjedhur nëse doni të kurseni para pa bërë kompromis me diellin apo cilësinë e përvojave.

Shqipëria: Vendi më i mirë për aventura

Qoftë duke shëtitur nëpër rrugët me kalldrëm, duke zbuluar majat e maleve apo duke notuar në ujërat e kaltra të shndritshme, Shqipëria ka një ngjashmëri të madhe me fqinjën e saj elegante përtej detit Adriatik.

Por krahasuar me Italinë, plazhet janë më të qeta, vendet e fshehura janë më të shumta dhe çmimet janë dukshëm më të lira.

I specializuar në udhëtime për turistë 18-35 vjeç, “Contiki” është operatori i parë turistik për të rinj që ofron udhëtime në të gjithë vendin ballkanik.

Mësoni rreth të kaluarës përmes arkitekturës osmane, fashiste dhe sovjetike të kryeqytetit, Tiranës, ecni në shtigjet që të çojne në Parkun Kombëtar të Valbonës dhe relaksohuni në plazhet e arta të Rivierës Shqiptare.

Udhëtimi tetëditor kushton 1,025 euro për person, duke përjashtuar fluturimet.

“Independent” rendit vendet më të mira për t’u vizituar në vitin 2025 – për pushime të përballueshme:

1. Vendi më i mirë për aventura: Shqipëria
2. Vendi më i mirë për plazhet: El Gouna, Egjipt
3. Vendi më i mirë për familjet: Galicia, Spanjë
4. Vendi më i mirë për ski: Voss, Norvegji
5. Vendi më i mirë për natyrën: Bosnjë-Hercegovina

//a.i/

https://www.independent.co.uk/travel/news-and-advice/best-cheap-holidays-spain-albania-flights-b2797926.html

The post “Independent”: Shqipëria mes destinacioneve më të mira për pushime në vitin 2025 appeared first on Agjencia Telegrafike Shqiptare.

KIEV, 29 korrik /ATSH-DPA/- Presidenti ukrainas Volodymyr Zelensky tha sot se vendi i tij ishte afër arritjes së një marrëveshjeje financimi me Holandën për prodhimin e dronëve në Ukrainë.

Në fjalimin e tij të mbrëmjes drejtuar kombit, Zelensky tha se priste që marrëveshja të përfundonte këtë javë.

“Do të sigurohen 400 milionë euro shtesë për kompanitë tona ukrainase, për prodhuesit e dronëve – në një marrëveshje financimi me Holandën këtë javë”, tha ai.

Ukraina, aktualisht po zgjeron prodhimin e saj të dronëve me ndihmën financiare perëndimore në mënyrë që të forcojë mbrojtjen e saj kundër Rusisë.

Zelensky kujtoi disa sulme vdekjeprurëse ruse që kishin ndodhur gjatë ditës, më i rëndi prej të cilëve ishte ndaj një burgu pranë qytetit të Zaporizhias.

“Të paktën 17 të burgosur u vranë në sulmin ajror dhe 42 të tjerë u plagosën”, tha guvernatori rajonal i Zaporizhias, Ivan Fedorov, në Telegram. //a.i/

The post KIEV – Zelensky: Ukraina shumë pranë marrëveshjes me Holandën për prodhimin e dronëve appeared first on Agjencia Telegrafike Shqiptare.

NJU JORK, 29 korrik /ATSH/-  Aktori i “The Dark Knight Rises”, Alon Aboutboul ka vdekur sot në moshën 60-vjeçare, sipas “New York post”.

Aboutboul vdiq sot në mëngjes – pasi humbi ndjenjat në plazhin HaBonim, në Tel Aviv.

Kalimtarët pretenduan se aktori izraelit po notonte në ujë dhe kur doli, u tha njerëzve se nuk ndihej mirë përpara se të rrëzohej dhe të humbiste ndjenja.

Paramedikët nxituan në vendngjarje dhe kaluan një orë duke u përpjekur ta ringjallnin Aboutboul, por nuk patën sukses.

Shkaku i vdekjes aktualisht mbetet i panjohur.

Aktori i ndjerë thuhet se ka lënë pas bashkëshorten e tij, Shir Bilia, dhe katër fëmijët e tyre.

Aboutboul luajti rolin e fizikantit bërthamor rus, Dr. Leonid Pavel, në filmin “The Dark Knight Rises” të vitit 2012, filmi i tretë dhe i fundit në trilogjinë “Batman” të Christopher Nolan.

I lindur më 28 maj 1965, në Kiryat Ata, Izrael, Aboutboul pati rolin e tij të famshëm në filmin “Two Fingers from Sidon” në vitin 1986.

Dy vjet më vonë, ai u shfaq në filmin “Rambo III” përkrah Sylvester Stallone.

Aboutboul vazhdoi të luante në filmin thriller aksion të Ridley Scott në vitin 2008 “Body of Lies” dhe në filmin thriller politik të vitit 2016 “London Has Fallen”.

Ai luajti gjithashtu në filmin dramatik “Septembers of Shiraz” me protagonistë Adrien Brody dhe Salma Hayek, premiera e të cilit u shfaq në Festivalin e Filmit në Toronto në vitin 2015.

Në televizion, Aboutboul u shfaq në episodet e “Snowfall”, “Homeland”, “Fringe”, “NCIS”, “The Mentalist”, “Castle”, “The Leftovers”, “Twin Peaks”, “Madam Secretary” dhe “Hawaii Five-0”.

Sipas IMDb-së së tij, Aboutboul do të luante në filmin e ardhshëm “Jacob’s Dream”, i cili është në fazën e para-prodhimit.

Gjatë karrierës së tij, ai fitoi çmimin si Aktori më o Mirë në filmin “Out of the Blue” në Festivalin e Filmit në Jerusalem dhe çmimin si Aktori më i Mirë Mbështetës në Çmimet e Akademisë Izraelite të Filmit (Çmimet Ophir) në vitin 2003. //a.i/

The post Aktori i “The Dark Knight Rises” Alon Aboutboul vdes në moshën 60-vjeçare appeared first on Agjencia Telegrafike Shqiptare.

ROMË, 29 korrik /ATSH-ANSA/- Ylli i muzikës italiane dhe ndërkombëtare, Livio Macchia, kitaristi i grupit “I Camaleonti”, vdiq sot në moshën 83-vjeçare.

Pavarësisht sëmundjes me të cilën luftonte prej disa vitesh, më 30 qershor në Roca Nuova, ai arriti të performonte në një koncert madhështor – si pjesë e “BluFestival”, eventit veror të organizuar nga Bashkia e Melendugno-s – me rastin e 60-vjetorit të grupit muzikor “I Camaleonti”.

Livio Macchia lindi më 9 nëntor të vitit 1941, në Acquaviva delle Fonti, në provincën e Barit.

Duke u rritur midis Pulias dhe Lombardisë, ai zbuloi pasionin për basin dhe vokalin që në fëmijëri, duke filluar performancat e tij të para në fillim të viteve 1960.

Më pas ai u transferua në Milano, ku themeloi grupin muzikor te Pop-it “I Camaleonti” me Paolo De Ceglie dhe Riki Maiocchi.

Grupi regjistroi hite të famshme si “L’ora dell’amore”, “Applausi”, “Eternità”, “Viso d’angelo” dhe “Perché ti amo”.

“I Camaleonti” u formuan në vitin 1963, në Milano.

Grupi përfshinte Livio Macchia (kitarë), Antonino Cripezzi (tastierë), Paolo de Ceglie (bateri) dhe Gerardo Manzoli (bas).

Në vitin 1965, grupi u plotësua me ardhjen e Riki Maiocchi në vokal dhe kitarë.

Hiti i parë i grupit ishte “Sha-La-La-La (La-La-La-La)”.

Në vitin 1966, vokalisti dhe kitaristi Riki Maiocchi u largua nga grupi për të ndjekur një karrierë solo dhe u zëvendësua nga Mario Lavezzi.

Me ardhjen e Lavezzi, grupi filloi gradualisht të kalonte në një tingull më melodik Pop, duke arritur sukses me “Portami tante rose” në vitin 1935 – e kompozuar nga Cesare Andrea Bixio dhe Michele Galdieri.

Midis viteve 1968 dhe 1973, “I Camaleonti” patën katër këngë që kryesuan në top listat italiane, duke përfshirë “Applausi”, “Io per lei” dhe “L’ora dell’amore”.

Midis viteve 1970 dhe 1993, ata morën pjesë në Festivalin e Muzikës Sanremo pesë herë (herën e fundit së bashku me Dik Dik dhe këngëtarin kryesor të “Equipe 84”, Maurizio Vandelli), duke u renditur të tretët në vitin 1979 me “Quell’attimo in più”.

Pavarësisht ndryshimeve të shumta në formacion, grupi është ende aktiv deri më sot. //a.i/

The post Ylli i muzikës italiane dhe ndërkombëtare Livio Macchia vdes në moshën 83-vjeçare appeared first on Agjencia Telegrafike Shqiptare.

UASHINGTON, 29 korrik /ATSH/- Presidenti i SHBA-së, Donald Trump tha sot se ai dhe kryeministri britanik Keir Starmer nuk kishin diskutuar rreth planit të Londrës për të njohur shtetin palestinez, në rast se Izraeli nuk ndërmerrte një numër hapash për të përmirësuar jetën e palestinezëve, sipas “Reuters”.

Starmer tha sot se Britania e Madhe ishte e përgatitur të njihte shtetin palestinez në shtator, në Asamblenë e Përgjithshme të Kombeve të Bashkuara, në përgjigje të zemërimit në rritje të publikut për krizën e urisë në Gazë.

“Ne nuk e diskutuam kurrë këtë”, u tha Trump gazetarëve në bordin e “Air Force One”, ndërsa udhëtonte për në SHBA, pasi u takua me Starmer në Skoci.

“Njohja e shtetit palestinez do të shpërblente grupin militant palestinez, Hamas”, tha Trump.

“Ju do të shpërbleni Hamasin nëse e bëni këtë. Nuk mendoj se ata duhet të shpërblehen”, tha ai.

“SHBA-ja ka dërguar para për ndihmat ushqimore për palestinezët në Gazë. Dua të sigurohemi që paratë të shpenzohen me mençuri dhe me gjykim të drejtë, dhe që ushqimi të shpërndahet në mënyrën e duhur”, tha Trump. //a.i/

The post SHBA – Trump: Njohja e Palestinës shpërblen Hamasin appeared first on Agjencia Telegrafike Shqiptare.

STOKHOLM, 29 korrik /ATSH/- Negociatorët tregtarë kinezë dhe amerikanë përfunduan sot takimin e tyre dyditor në Stokholm – pa një rezolutë për të parandaluar rritjen e tarifave në nivele ultra të larta që formuan një bllokadë efektive në tregtinë midis dy ekonomive më të mëdha në botë, sipas CNN.

Por këshilltarët tregtarë të Trump dhe homologët e tyre kinezë shprehën një notë optimiste.

Pa një marrëveshje, SHBA-ja dhe Kina janë gati të vendosin sërish tarifa historike ndaj importeve të njëra-tjetrës duke filluar nga 12 gushti.

Megjithatë, duke folur me gazetarët nga Stokholmi, sekretari amerikan i Thesarit, Scott Bessent dhe ambasadori amerikan i Tregtisë, Jamieson Greer thanë se takimi dyditor ishte “konstruktiv” dhe sugjeruan se një marrëveshje për të zgjatur pauzën 90-ditore te tarifave të arritur në mesin e majit, ishte e mundshme.

“Vetëm për të zbutur retorikën, takimet ishin shumë produktive”, tha Bessent.

Ata thanë se ende nuk është marrë një vendim nëse do të zgjatet pauza e tarifave të jashtëzakonshme të secilit vend, sepse presidenti Donald Trump duhet ta marrë këtë vendim.

“Lidhur me një pauzë të mundshme, ne do të kthehemi në Uashington, do të flasim me presidentin Trump, nëse kjo është diçka që ai dëshiron të bëjë”, tha Greer.

“Sigurisht, që është në diskutim e sipër”, shtoi ai.

“Sapo zhvillova një bisedë telefonike me Scott Bessent. Ai pati një takim shumë të mirë me negociatorët e Kinës”, tha sot Trump duke folur me gazetarët.

“Dhe duket se ata do të më informojnë nesër, dhe ne ose do ta miratojmë ose jo, por ai u ndje shumë mirë në takim”, shtoi Trump.

Ai tha gjithashtu se planifikon të takohet me presidentin kinez, Xi Jinping deri në fund të këtij viti.

Li Chenggang, përfaqësuesi i Tregtisë Ndërkombëtare për Ministrinë Kineze të Tregtisë, u tha sot gazetarëve pas përfundimit të bisedimeve – se të dyja palët do të vazhdonin përpjekjet për zgjatjen e pauzës tarifore.

Bessent tha se deklarata e Li nuk duhet të merret si një konfirmin i një marrëveshjeje për zgjatjen e tarifave.

“Zëvendësministri kinez tha se ne kishim rënë dakord për një pauzë. Nuk kemi rënë dakord. Asgjë nuk është rënë dakord derisa të flasim me presidentin Trump”, tha Bessent, duke iu përgjigjur një pyetjeje nëse kishte një marrëveshje për të zgjatur afatin e 12 gushtit.

“Presidenti ka diskrecionin për të ndryshuar normën në varësi të rrethanave që kemi”, tha Greer.

Në maj, Kina ra dakord të ulë tarifat për mallrat amerikane nga 125% në 10%, ndërsa SHBA-ja ra dakord të ulë tarifat për mallrat kineze nga 145% në 30%.

Greer tha se tarifat ndaj mallrave kineze të dërguara në SHBA mund të rriten me rreth 34% shtesë – nëse nuk arrihet një marrëveshje deri më 12 gusht – nën nivelin maksimal prej 145%.

“Vetëm pse takimi përfundoi pa një marrëveshje, nuk do të thoshte se nuk do të arrihet një marrëveshje para afatit të 12 gushtit”, theksoi Bessent. //a.i/

00000000000000

Zyrtarët amerikanë dhe kinezë përfunduan sot bisedimet dyditore në Stokholm – që synonin trajtimin e mosmarrëveshjeve ekonomike afatgjata dhe tërheqjen nga një luftë tregtare në përshkallëzim midis dy ekonomive më të mëdha në botë, sipas “Reuters”.

Ndërsa nuk u njoftoi ndonjë progres, negociatori kryesor tregtar i Kinës, Li Chenggang tha se të dy palët ranë dakord për një marrëveshje për të zgjatur pauzën e tarifave – një pezullim 90-ditor të tarifave – të arritur në mesin e majit, pa specifikuar se kur dhe për sa kohë mund të hyjë në fuqi një zgjatje e tillë.

Zëvendësministri kinez i Tregtisë, Li Chenggang tha se vendi i tij dëshiron që marrëveshja e vazhdueshme e tarifave midis dy palëve, e cila parashikon tarifa prej 30% për mallrat e dërguara nga Kina në SHBA, të vazhdojë. //a.i/

The post STOKHOLM – SHBA-ja dhe Kina përfundojnë bisedimet dyditore, pauza e tarifave mbetet në fuqi appeared first on Agjencia Telegrafike Shqiptare.

MADRID, 29 korrik /ATSH-DPA/- Një zjarr masiv që po digjet në Spanjën qendrore ka shkatërruar më shumë se 500 hektarë pyje dhe shkurre, sipas të dhënave zyrtare.

“Situata nuk është inkurajuese”, tha Angel Iglesias, drejtor teknik i zjarrfikjes në qytetin, Mombeltran, rreth 95 kilometra në perëndim të Madridit.

Zjarrfikësit kanë luftuar me flakët, të cilat shpërthyen dje në mbrëmje, me avionë dhe helikopterë, ndërsa ekipet në terren po punojnë për të krijuar breza zjarri për të parandaluar përhapjen e mëtejshme të flakëve.

“Megjithatë, erërat e forta vazhduan të përhapnin flakët, disa prej të cilave ishin disa metra të larta”, tha Iglesias, duke vënë në dukje se kishte shumë bimësi të përfshirë nga zjarri në terrenin malor.

Shërbimi i Mbrojtjes Civile njoftoi në X se një zjarrfikës kishte vdekur gjatë rrugës për në vendngjarje kur automjeti e tij doli nga rruga.

Zona sapo ishte rikuperuar nga një zjarr shkatërrues pyjor në vitin 2009.

Ekspertët kanë paralajmëruar se shumë nga pyjet e Spanjës nuk po mirëmbahen në mënyrë të mjaftueshme dhe se reshjet e tepërta të shiut në fillim të vitit kanë çuar në një grumbullim të bimësisë, e cila është tharë nga moti i nxehtë i javëve të fundit.

“Gjatë 50 viteve të fundit, sipërfaqja pyjore është rritur me rreth 20% pasi vendet bujqësore janë braktisur”, tha eksperti i pyjeve, Rosendo Castello. //a.i/

The post SPANJË – Zjarri masiv djeg 500 hektarë pyje appeared first on Agjencia Telegrafike Shqiptare.

LONDËR, 29 korrik /ATSH-DPA/- Britania e Madhe do ta njohë shtetin e Palestinës në shtator para Asamblesë së Përgjithshme të OKB-së, nëse Izraeli nuk e lehtëson krizën në Gazë, tha sot kryeministri britanik, Keir Starmer në takimin e kabinetit qeveritar.

“Ky hap do të ndërmerret nga Britania e Madhe – vetëm nëse qeveria izraelite nuk arrin një armëpushim në Gazë; nuk e bën të qartë se nuk do të ketë një aneksim të Bregut Perëndimor dhe nuk angazhohet në një proces afatgjatë paqeje që ofron një zgjidhje me dy shtete”, sipas një njoftimi nga mbledhja e Kabinetit.

“Ne presim që të paktën 500 kamionë të hyjnë në Gaza çdo ditë – por e vetmja mënyrë për t’i dhënë fund kësaj krize humanitare është përmes një zgjidhjeje afatgjatë”, tha Starmer duke folur nga “Downing Street”.

“Ne po mbështesim përpjekjet e SHBA-së, Egjiptit dhe Katarit për të siguruar një armëpushim jetësor’, shtoi ai.

“Ky armëpushim duhet të jetë i qëndrueshëm dhe duhet të çojë në një plan më të gjerë paqeje, të cilin po e zhvillojmë me partnerët tanë ndërkombëtarë”, tha Starmer.

Kryeministri britanik tha se do të bënte një vlerësim se sa shumë i kanë përmbushur palët këto hapa përpara se të merrte një vendim përfundimtar për një zgjidhje me dy shtete.//a.i/

The post LONDËR – Starmer: BM do të njohë shtetin palestinez nëse Izraeli nuk e lehtëson krizën në Gaza appeared first on Agjencia Telegrafike Shqiptare.

ROMË, 29 korrik /ATSH/- Popullsia në moshë pune e Italisë pritet të tkurret me më shumë se një të pestën gjatë 25 viteve të ardhshme, tha sot agjencia kombëtare e statistikave “Istat”, duke theksuar sfidat e rënda demografike të vendit, sipas “Reuters”.

Italia po përballet me një rënie të nivelit të lindjeve dhe një popullsi në tkurrje.

Vitin e kaluar lindjet e reja ranë në një nivel rekord prej rreth 370 000 – ndërsa popullsia ra me 37 000 (në 58,93 milionë), duke ndjekur një trend 10-vjeçar.

Në parashikimin e fundit demografik, “Istat” raportoi se numri i banorëve në grupmoshën 15-64 vjeç do të binte nga 37,4 milionë në vitin 2024 në 29,7 milionë në vitin 2050 – ndërsa në popullsinë totale rezidente do të kishte një rënie në 54,3% nga 63,5%.

Në të njëjtën periudhë, përqindja e banorëve mbi moshën 65 vjeç parashikohet të rritet në 34,6% të totalit krahasuar me 24,3% që është aktualisht – dhe përqindja e fëmijëve deri në moshën 14 vjeç do të binte në 11,2% nga 12,2%.

Shkalla e lindjeve në Itali, e cila është në rënie të vazhdueshme, konsiderohet një emergjencë kombëtare.

Por, pavarësisht premtimeve të kryeministres Giorgia Meloni dhe paraardhësve të saj për të trajtuar problemet, askush deri më tani nuk ka qenë në gjendje ta ndalë rënien.

“Istat” vlerësoi se popullsia rezidente e Italisë do të binte në 54,7 milionë deri në vitin 2050.

Në një raport të vitit të kaluar, “Scope Ratings” tha se demografia e Italisë ishte “më e keqja” në Evropë për sa i përket potencialit të rritjes ekonomike midis viteve 2023 dhe 2040, me një popullsi që po plaket me shpejtësi dhe që përbën një kërcënim për financat publike të tendosura. //a.i/

The post ITALI – Popullsia në moshë pune pritet të tkurret me një të pestën appeared first on Agjencia Telegrafike Shqiptare.

TEL AVIV, 29 korrik /ATSH-DPA/- Avionët nga Jordania dhe Emiratet e Bashkuara Arabe kanë hedhur edhe 52 paleta të tjera me ushqim mbi Rripin e Gazës, tha sot ushtria izraelite.

“Avionët egjiptianë gjithashtu ndihmuan në hedhjen nga ajri të ushqimeve – për herë të parë që nga e diela – kur Izraeli lejoi aksesin e ndihmave në territorin e izoluar palestinez pas disa muajsh kufizimesh”, tha ushtria izraelite (IDF).

Ushtria izraelite njoftoi dje se po zbaton pauza “humanitare” të përditshme për të lejuar që ndihma të shpërndahet në mënyrë të sigurt në Rripin e sulmuar – mes paralajmërimeve ndërkombëtare për krizën e urisë.

IDF tha se Egjipti, Jordania dhe Emiratet e Bashkuara Arabe koordinuan hedhjet nga ajri të ndihmave së bashku me Izraelin.

Organizatat e ndihmës, përfshirë Mjekët pa Kufij, e kanë kritikuar metodën e ofrimit të ndihmave – si joefektive dhe të kushtueshme krahasuar me shpërndarjen e ndihmës me kamionë.

Ata gjithashtu kanë theksuar rrezikun që u paraqitet civilëve në pritje nga hedhja e paletave, të cilat janë të bashkangjitura në parashuta.

Kancelari gjerman, Friedrich Merz tha sot se dy avionë ushtarakë ishin duke udhëtuar drejt Jordanisë, nga ku do të fillonin gjithashtu hedhjet e ndihmave nga ajri në Gazë. //a.i/

The post GAZË – Mbi 50 paleta me ushqime të hedhura nga ajri nga shtetet arabe appeared first on Agjencia Telegrafike Shqiptare.

TIRANË, 29 korrik /ATSH/- Macet flenë midis 12 dhe 16 orë në ditë, dhe një studim i ri sugjeron se shumica e tyre preferojnë të shtrihen në anën e majtë, sipas “Science Alert”.

Dihet tashmë që macet preferojnë një pozicion të ngritur kur flenë, si në majë të një peme, ose diku në grumbullin e valixheve në dollapin tuaj, larg grabitqarëve të tokës dhe pronarëve të etur për përqafime.

Kjo sjellje u lejon atyre të shohin çdo kërcënim që vjen nga larg.

Autorët e studimit arsyetuan se pozicionet e gjumit të maceve – pavarësisht nëse shtrihen në anën e majtë apo të djathtë – mund të shërbejnë për funksione të ngjashme.

“Asimetritë në sjellje mund të kenë përparësi sepse të dy hemisferat e trurit specializohen në detyra të ndryshme”, tha neuroshkencëtari i sjelljes, Onur Gunturkun, nga Universiteti “Ruhr Bochum”, në Gjermani.

Gunturkun dhe ekipi i tij analizuan pozicionet e gjumit të maceve në 408 video të zgjedhura me kujdes në “YouTube” – të cilat zbuluan statistikisht, një prirje për të fjetur në anen e majtë.

Dy të tretat e maceve zgjodhën të shtriheshin në anën e majtë, një pozicion që nuk e pengon fushën vizuale (të majtë) nga trupi i tyre.

Fusha vizuale e majtë ushqehet me anën e djathtë të trurit, e cila shoqërohet me ndërgjegjësimin hapësinor, identifikimin e kërcënimit dhe koordinimin e arratisjes së shpejtë.

Pra, ky pozicion gjumi mund t’i japë maces një kohë reagimi më të shpejtë kur zgjohet nga një grabitqar.

“Gjumi është një nga gjendjet më të prekshme për një kafshë, pasi vigjilenca kundër grabitqarëve zvogëlohet në mënyrë drastike, veçanërisht në fazat e gjumit të thellë”, sipas studimit.

“Ne jemi të prirur të besojmë se pozicioni i gjumit në anën e majtë tek macet mund të jetë nxitur në mënyrë evolucionare – nga asimetritë hemisferike të përpunimit të kërcënimit, por nuk mund të përjashtohen edhe faktorë të tjerë”, thuhet në studim. //a.i/

The post Pse macet preferojnë të flenë në anën e majtë – dhe si mund t’i ndihmojë kjo për të mbijetuar? appeared first on Agjencia Telegrafike Shqiptare.

EDINBURG, 28 korrik /ATSH-DPA/- Presidenti i SHBA-së Donald Trump ka lënë të kuptohet se afati i ri për presidentin rus, Vladimir Putin që të ulet në tryezën e negociatave për të miratuar armëpushimin në Ukrainë do të jetë midis 10 dhe 12 ditëve.

Presidenti i SHBA-së njoftoi më herët gjatë një takimi me kryeministrin britanik, Keir Starmer në Skoci – se do të shkurtonte afatin 50-ditor për Rusinë – për të rënë dakord për një armëpushim me Ukrainën.

I pyetur nga gazetarët se sa kohë do të caktohej afati i ri, Trump tha: “Do të vendos një afat të ri prej rreth 10 ose 12 ditësh nga sot”.

“Nuk ka arsye për të pritur”, theksoi ai.

Përpjekjet për të siguruar një armëpushim në Ukrainë pritet të jenë në fokus të takimit Trump-Starmer , duke përfshirë situatën në Gazë dhe progresin në zbatimin e marrëveshjes tregtare BM-SHBA. //a.i/

The post SKOCI – Trump: Putin ka afat deri në 12 ditë për të negociuar armëpushimin në Ukrainë appeared first on Agjencia Telegrafike Shqiptare.

BERLIN, 28 korrik /ATSH-DPA/- Qeveria gjermane shpreson për një lehtësim të tarifave prej 50% ndaj çelikut dhe aluminit – pas kompromisit në mosmarrëveshjen doganore midis Bashkimit Evropian dhe Shteteve të Bashkuara të Amerikës.

“Ende ka nevojë për negociata të mëtejshme në këtë fushë”, tha zëvendëszëdhënësi i qeverisë, Sebastian Hille në Berlin.

“Kjo është një nga fushat të cilave do t’i kushtojmë vëmendje të veçantë”, shtoi ai.

“Qeveria gjermane e mirëpriti marrëveshjen në parim – të arritur dje mes SHBA-së dhe BE-së”, tha Hille.

“Kjo marrëveshje shmangu një përshkallëzim të panevojshëm të tarifave dhe një konflikt tregtar. Nga një përshkallëzim i tillë nuk do të përfitonte as ekonomitë dhe as publiku”, tha ai.

“Është e padiskutueshme që një lehtësim i mëtejshëm do të kishte qenë i dëshirueshëm. Por ajo që është e dëshirueshme dhe ajo që është e arritshme janë dy gjëra të ndryshme. Politika vepron brenda sferës së asaj që është e arritshme”, theksoi Hille.

“Hapi tjetër është të përpunohen detajet e marrëveshjes bazë”, tha zëdhënësi.

“Komisioni i BE-së ka mbështetjen e plotë të qeverisë gjermane në këtë proces”, theksoi ai.

BE-ja dhe SHBA-ja kanë rënë dakord për një tarifë prej 15% për shumicën e importeve nga blloku.

Kjo do të zbatohet edhe për automjetet, gjysmëpërçuesit dhe produktet farmaceutike.

Sipas raporteve, BE ka rënë dakord për të lejuar importet e automjeteve amerikane në bllok pa taksa, megjithëse eksportet e BE-së në SHBA do të përballen me një tarifë prej 15%. //a.i/

The post BERLIN – Gjermania shpreson për uljen e tarifave amerikane prej 50% ndaj çelikut dhe aluminit appeared first on Agjencia Telegrafike Shqiptare.

PARIS, 28 korrik /ATSH/- Ministrat e qeverisë franceze thanë se marrëveshja tregtare kornizë midis Shteteve të Bashkuara të Amerikës dhe Bashkimit Evropian kishte disa përparësi – ku përfshihen përjashtimet për disa sektorë kyç të biznesit francez, siç janë pijet alkoolike – por megjithatë ajo ishte e pabalancuar, sipas “Reuters”.

“Marrëveshja tregtare e negociuar nga Komisioni Evropian me Shtetet e Bashkuara të Amerikës do të sjellë stabilitet të përkohshëm për aktorët ekonomikë të kërcënuar nga përshkallëzimi i tarifave amerikane, por kjo është e pabalancuar”, shkroi ministri francez i Çështjeve Evropiane, Benjamin Haddad në X.

Ky qëndrim u mbështet nga ministri francez i Industrisë, Marc Ferracci, i cili tha se do të nevojiteshin më shumë bisedime – të cilat mund të zgjasin me javë ose muaj – përpara se marrëveshja të përfundohej zyrtarisht.

Ferracci tha se duhej bërë më shumë në lidhje me ribalancimin e marrëdhënieve tregtare mes BE-së dhe SHBA-së.

“Ky nuk është fundi i historisë”, tha Ferracci për RTL.

Donald Trump njoftoi dje marrëveshjen me BE-në, e cila parashikon tarifa prej 15% për shumicën e mallrave që hyjnë në SHBA nga Evropa dhe kërkon që blloku të bëjë investime të mëdha në produktet energjetike amerikane – duke shmangur luftën tregtare midis dy ekonomive më të mëdha në botë. //a.i/

The post PARIS – Ministrat francezë: Marrëveshja tregtare BE-SHBA ka merita, por është e pabalancuar appeared first on Agjencia Telegrafike Shqiptare.

STOKHOLM, 28 korrik /ATSH-DPA/- Sekretari amerikan i Thesarit, Scott Bessent dhe përfaqësuesit e lartë kinezë kanë planifikuar të takohen sot dhe nesër në Stokholm për bisedime të mëtejshme mbi mosmarrëveshjen e tyre për tarifat.

Ata Kanë vendosur, kryesisht të negociojnë një zgjatje të pauzës aktuale të tarifave, e cila është ende në fuqi deri më 12 gusht.

Pala kineze pritet të udhëhiqet nga zëvendëskryeministri, He Lifeng.

Që nga prilli, SHBA-ja ka rritur tarifat e importit për mallrat kineze në disa faza deri në 145%.

Kina u përgjigj me kundërtarifa deri në 125% dhe ushtroi presion me kufizime të eksportit për materiale të caktuara.

Në maj, të dyja palët ranë dakord në Gjenevë për një pezullim 90-ditor të tarifave. Bisedime të mëtejshme pasuan në qershor në Londër.

Të dyja palët janë të tendosura ekonomikisht përtej tarifave.

Kina kritikon kufizimet e eksportit të Uashingtonit për gjysmëpërçuesit e avancuar dhe çipat e inteligjencës artificiale (IA) – të cilët ata thonë se pengojnë aksesin e kompanive kineze në teknologjinë e avancuar.

SHBA-ja, nga ana tjetër, akuzon Pekinin për kufizimin e eksportit të lëndëve të para te rëndësishme. //a.i/

The post STOKHOLM – Kina dhe SHBA-ja rifillojnë negociatat mbi mosmarrëveshjen për tarifat appeared first on Agjencia Telegrafike Shqiptare.

VARSHAVË, 26 korrik /ATSH-DPA/ – Evropa dhe Polonia duhet të jenë të përgatitura për një konflikt të mundshëm të madh me Rusinë deri në vitin 2027, tha sot kryeministri polak Donald Tusk.

Tusk tha se qeveria e tij do të shfrytëzonte maksimalisht dy vitet e ardhshme për të stabilizuar situatën në Poloni dhe për të garantuar sigurinë.

Kryeministri iu referua një vlerësimi të ngjashëm nga Komandanti i ri Suprem i NATO-s Alexus Grynkewich me të cilin kishte folur pak më parë.

Sipas këtij vlerësimi, Rusia dhe Kina mund të bëhen mjaftueshëm të forta deri në vitin 2027 për të kërkuar një përballje të koordinuar me NATO-n dhe SHBA-në.

Duke pasur parasysh luftën e Rusisë kundër Ukrainës, një sërë skenarësh të mundshëm po qarkullojnë midis ekspertëve ushtarakë perëndimorë rreth asaj se kur shtetet e tjera evropiane mund të përballen me agresion.

Viti 2027 është vlerësimi më i hershëm i përmendur deri më tani. Ministri gjerman i Mbrojtjes Boris Pistorius ka thënë se mund të jetë viti 2029.

Shtetet e BE-së po riarmatosen dhe synojnë të jenë në gjendje të zmbrapsin sulmin rus deri në vitin 2030.

Rusia gjithashtu po zgjeron forcat e saj të armatosura. Megjithatë, udhëheqja e Moskës i ka hedhur poshtë pretendimet për sulme ndaj territorit të NATO-s – duke i quajtur ato një absurditet.

Gazeta ruse “Komsomolskaya Pravda”, kohët e fundit e përmbysi narrativën, duke pretenduar se NATO po planifikon të sulmojë Rusinë në vitin 2027.

Rusia vazhdon të sulmojë Ukrainën çdo ditë, në kuadër të pushtimit në shkallë të plotë të nisur nga Kremlini në vitin 2022. //a.i/

The post POLONI – Tusk paralajmëron për konflikt me Rusinë deri në vitin 2027 appeared first on Agjencia Telegrafike Shqiptare.

HELSINKI, 26 korrik /ATSH/- Finlanda ka regjistruar 14 ditë radhazi temperatura që tejkalojnë 30 gradë Celsius, duke vendosur një rekord të ri kombëtar për motin dhe duke tejkaluar rekordin e mëparshëm të vitit 1972, raportoi Instituti Meteorologjik Finlandez, sipas “Helsinki Times”.

Pragu u kalua sërish dje në Parikala, ku temperaturat arritën në 30,3 gradë Celsius.

Rekordi i mëparshëm për 13 ditë radhazi – mbi 30 gradë Celsius – u regjistrua në vitin 1972.

Kjo është vala më intensive dhe e qëndrueshme e të nxehtit në historinë e Finlandës, e cila daton që nga viti 1961.

Periudha e gjatë pa shi e ka lënë pjesën më të madhe të tokës së Finlandës jashtëzakonisht të thatë.

Instituti Meteorologjik ka lëshuar paralajmërime për shkak të të nxehtit dhe zjarreve në pyje – në pjesë të mëdha të vendit.

Nxehtësia pritet të vazhdojë deri në fundjavë. Sipas parashikimeve, në disa pjesë të Laplandës dhe Finlandës lindore ka të ngjarë të ketë reshje shiu.

Deri të dielën, moti i paqëndrueshëm mund të përfshijë zona më të gjera, duke përfshirë bregdetin perëndimor dhe Finlandën qendrore.

Sipas meteorologut Ville Siiskonen, temperaturat arritën kulmin në juglindje dhe në disa pjesë të Ostrobothnia Veriore. //a.i/

The post METEO – Finlanda thyen rekordin e nxehtësisë me 14 ditë radhazi mbi 30°C appeared first on Agjencia Telegrafike Shqiptare.

LONDËR, 26 korrik /ATSH/- Negociatat intensive kanë vazhduar sot midis BE-së dhe SHBA-së – përpara një takimi të rëndësishëm në Skoci midis Donald Trump dhe presidentes së Komisionit Evropian, Ursula von der Leyen – për të shmangur një luftë tregtare të kushtueshme, sipas “Guardian”.

Trump kaloi natën në resortin e tij të golfit “Turnberry”, në pronësi të familjes, në një vizitë private, por gjeti kohë për të kritikuar udhëheqësit evropianë për turbinat me erë dhe emigracionin, duke pretenduar se nuk do të ketë një Evropë nëse ata “nuk marrin masa”.

“Unë i them dy gjëra Evropës. Ndaloni mullinjtë e erës. Po i shkatërroni vendet tuaja. E them me të vërtetë, është shumë e trishtueshme. Këto mullinj me erë janë kudo, duke shkatërruar fushat dhe luginat tuaja të bukura dhe duke vrarë zogjtë tuaj”, tha ai.

“Për emigracionin, më mirë merrni masa. Nuk do ta keni më Evropën”, tha Trump.

Sot në mëngjes, ai braktisi një takim të planifikuar me shtypin, i cili udhëtoi me të në “Air Force One”, për një raund golfi në fushën e tij bregdetare – nën tingujt e muzikës.

Sky News, i stacionuar pranë fushës, raportoi se këngët përfshinin “Uptown Girl” të Billy Joel, “Memory” të Elaine Paige dhe “Bridge over Troubled Water” të Simon and Garfunkel.

E cilësuar si një vizitë katërditore familjare në Skoci, Trump pritet të takojë udhëheqësit evropianë dhe kryeministrin britanik, Keir Starmer, duke rritur shpresat për marrëveshje të reja dhe të rafinuara tregtare me BE-në dhe Britaninë e Madhe.

Lidhur me perspektivat e një marrëveshjeje tregtare me BE-në, presidenti amerikan tha se kishte “20 pika ngërçi”.

Kur u pyet se cilat ishin ato, ai tha: “Epo, nuk dua t’ju them se cilat janë pikat e ngërçit”.

Ai e përshkroi Von der Leyen si një “grua shumë të respektuar” dhe tha se takimi i planifikuar nesër me shefen e BE-së do të shkonte ” mirë”, duke vlerësuar shanset 50 me 50 për një marrëveshje.

Von der Leyen do te shoqerohet nga komisioneri evropian për Tregtinë, Maros Sefcovic.

Marrëveshja pritet të përqendrohet në një pakt të përgjithshëm në parim mbi tarifat prej 15% për eksportet, përfshirë automjetet – por me një tarifë prej 50% që do të vazhdojë ndaj çelikut.

Mund të ketë gjithashtu një marrëveshje të rëndësishme për produktet farmaceutike, duke vendosur një tarifë prej 15% për eksportet.

Edhe pse kjo do të shkelte një marrëveshje të gjatë të Organizatës Botërore të Tregtisë që barnat vlerësohen me një tarifë zero, do të ishte shumë larg tarifës prej 200% që Trump kërcënoi të vendoste për produktet farmaceutike, në fillim të këtij muaji.

Kjo do të kishte shkaktuar një luftë tregtare shumë të dëmshme jo vetëm me Irlandën, ku janë të vendosura shumë kompani shumëkombëshe amerikane, por edhe me Gjermaninë, Danimarkën, Belgjikën, Francën dhe Spanjën. //a.i/

The post SKOCI – Trump: Evropa të marrë masa për emigracionin përpara bisedimeve tregtare SHBA-BE appeared first on Agjencia Telegrafike Shqiptare.

BUDAPEST, 26 korrik /ATSH/- Qeveria e Hungarisë nuk do ta mbështesë buxhetin e ri 7-vjeçar të BE-së nëse Brukseli nuk i zhbllokon të gjitha fondet e pezulluara, tha sot kryeministri Viktor Orban, sipas “Reuters”.

Në 15 vitet e fundit, udhëheqësi nacionalist është përplasur me Brukselin për politikat e tij mbi migracionin dhe atë që kritikët e shohin si “shkatërrim” të demokracisë në Hungari. BE-ja ka pezulluar miliarda euro fonde të caktuara për Hungarinë, ndërsa një mosmarrëveshje për shtetin e së drejtës vazhdon.

“Miratimi i buxhetit të ri 7-vjeçar kërkon unanimitet dhe derisa të marrim fondet e mbetura (të ngrira), nuk do të ketë as një buxhet të ri të BE-së”, tha Orban në një fjalim në një universitet veror, në qytetin rumun, Baile Tusnad.

Ai gjithashtu kritikoi BE-në për mbështetjen e Ukrainës dhe akuzoi Brukselin se po planifikon të instalojë një “qeveri pro-Ukrainës dhe pro-Brukselit” në Hungari në votimin kombëtar të vitit të ardhshëm.

Ai tha gjithashtu se udhëheqja aktuale e BE-së e ka futur bllokun në një rrugë që do të çonte në një luftë tregtare që Evropa “nuk mund ta fitonte”.

“Udhëheqja aktuale e BE-së do të jetë gjithmonë e fundit që nënshkruan marrëveshje me SHBA-në dhe gjithmonë marrëveshjet më të këqija”, shtoi Orban, duke kërkuar një ndryshim në udhëheqjen e bllokut.

Presidentja e Komisionit Evropian, Ursula von der Leyen, do të takohet nesër me presidentin e SHBA-së, Donald Trump, në Skoci – ndërsa zyrtarët dhe diplomatët e BE-së thanë se prisnin të arrinin një marrëveshje tregtare kornizë këtë fundjavë.

Këtë muaj, Komisioni Evropian propozoi një buxhet të BE-së prej 2 trilionë eurosh për vitin 2028 deri në vitin 2034, me fokus në konkurrencën ekonomike dhe mbrojtjen.

Debatet për buxhetin janë ndër më të vështirat në politikën e BE-së, duke nxjerrë në pah mosmarrëveshjet politike dhe ekonomike midis vendeve anëtare.

Orban, i cili fitoi katër zgjedhjet e fundit, do të përballet me një rival të ri të ashpër të opozitës në vitin 2026, partia “Tisza” e të cilit ka një epërsi të fortë ndaj partisë në pushtet “Fidesz” në shumicën e sondazheve, në një kohë kur ekonomia ka ngecur. //a.i/

The post HUNGARI – Orban: Nuk do ta mbështes buxhetin e BE-së nëse nuk i zhbllokon të gjitha fondet e pezulluara appeared first on Agjencia Telegrafike Shqiptare.