DUBLIN, 21 gusht /ATSH/- Kryeministri dhe zëvendëskryeministri i Irlandës kanë mirëpritur sot marrëveshjen tregtare BE-SHBA, sipas “Pa Media”.

Kryeministri Taoiseach Micheal Martin tha se marrëveshja tregtare përfaqësonte një fitore të rëndësishme për BE-në, ndërsa zëvendëskryeministri Simon Harris tha se ajo ofronte një mburojë të rëndësishme për eksportuesit irlandezë.

BE-ja arriti një marrëveshje tregtare me SHBA-në më 27 korrik, pesë ditë para se Trump të njoftonte tarifën prej 30% – e cila do të hynte në fuqi për bllokun.

Marrëveshja parashikon tarifa prej 15% për shumicën e mallrave të BE-së, duke përfshirë makinat, gjysmëpërçuesit dhe produktet farmaceutike që hyjnë në SHBA.

Gjithashtu parashikohen tarifa “zero për zero” për një numër produktesh, duke përfshirë avionë dhe pjesët e avionëve, disa mallra bujqësore dhe kimikate të caktuara – si dhe blerjen e energjisë amerikane – me vlerë 750 miliardë dollarë gjatë tre viteve, nga BE-ja.

Pas marrëveshjes, nuk ishte e qartë nëse tarifa prej 15% do të mbetej norma për sektorin farmaceutik apo do të rritej.

SHBA do të aplikojë një normë maksimale tarifore prej 15% për produktet farmaceutike gjenerike, përbërësit e tyre dhe pararendësit kimikë.

SHBA synon të sigurojë menjëherë që norma tarifore, e përbërë nga tarifa MFN (Kombi Më i Favorizuar) dhe tarifa e vendosur sipas Seksionit 232 të Aktit të Zgjerimit të Tregtisë të vitit 1962, e aplikuar për mallrat me origjinë nga Bashkimi Evropian – që i nënshtrohen veprimeve të Seksionit 232 mbi produktet farmaceutike, gjysmëpërçuesit dhe drurin, të mos kalojë 15%.

Harris, zëvendëskryeministri i Irlandës dhe ministri i Punëve të Jashtme dhe Tregtisë, mirëpriti garancitë për sektorët farmaceutikë dhe gjysmëpërçuesit.

“Kjo ofron një mburojë të rëndësishme për eksportuesit irlandezë që mund të ishin nënshtruar tarifave shumë më të larta”, tha Harris.

“Kjo ofroi një “hap të parë” drejt një marrëveshjeje më gjithëpërfshirëse dhe formale me SHBA-në në të ardhmen”, shtoi ai.

“Qëllimi ynë tani është të shohim se çfarë përjashtimesh të tjera mund të bëhen në fushat me interes për eksportuesit irlandezë”, tha ai.

Kryeministri irlandez Michael Martin tha se deklarata solli qartësi dhe siguri më të madhe në atë që marrëveshja BE-SHBA do të nënkuptonte në praktikë.

“Kjo është veçanërisht e rëndësishme për ndërmarrjet që importojnë nga ose eksportojnë në SHBA”, tha ai. //a.i/

 

The post DUBLIN – Irlanda mirëpret marrëveshjen tregtare BE-SHBA dhe kufirin e tarifave farmaceutike prej 15% appeared first on Agjencia Telegrafike Shqiptare.

MOSKË, 21 gusht /ATSH/- Presidenti rus, Vladimir Putin po kërkon që Ukraina të heqë dorë nga i gjithë rajoni lindor i Donbasit, të heqë dorë nga ambiciet për t’u bashkuar me NATO-n, të mbetet neutrale dhe të mbajë trupat perëndimore jashtë vendit, thanë sot për “Reuters” tre burime të Kremlinit.

Putin u takua të premten me presidentin e SHBA-së, Donald Trump, në Alaskë për samitin e parë Rusi-SHBA.

Takimi me dyer të mbyllura zgjati tre orë dhe të dy udhëheqësit diskutuan mënyrat për të arritur një kompromis për paqen në Ukrainë.

“Shpresojmë që takimi do të hapë rrugën për paqe në Ukrainë”, tha Putin në një konferencë për shtyp pas takimit me Trump.

Asnjëri prej tyre nuk dha detaje specifike rreth asaj që diskutuan.

Sipas burimeve ruse, Putini ka bërë kompromis mbi kërkesat territoriale që paraqiti në qershor 2024, të cilat kërkonin që Kievi të lëshonte të katra provincat që Moska i pretendon si pjesë të Rusisë: Donteskun dhe Luhanskun në Ukrainën lindore – të cilat përbëjnë Donbasin – dhe Khersonin dhe Zaporizhian në jug.

Kievi i ka hedhur poshtë këto kushte si të barasvlershme me dorëzimin e Ukrainës.

“Në propozimin e tij të ri, presidenti rus i është përmbajtur kërkesës së tij që Ukraina të tërhiqet plotësisht nga pjesët e Donbasit që ende kontrollon”, sipas tre burimeve ruse.

Në këmbim, Moska do të ndalonte luftimet në vijat aktuale të frontit në Zaporizhia dhe Kherson.

Rusia kontrollon rreth 88% të Donbasit dhe 73% të Zaporizhias dhe Khersonit, sipas vlerësimeve të SHBA-së dhe të dhënave nga burime të hapura.

“Moska është gjithashtu e gatshme të dorëzojë pjesët e vogla të rajoneve, Kharkiv, Sumy dhe Dnipropetrovsk të Ukrainës që kontrollon si pjesë e një marrëveshjeje të mundshme”, thanë burimet.

“Putini po i përmbahet gjithashtu kërkesave të tij të mëparshme që Ukraina të heqë dorë nga ambiciet e saj për anëtarësim në NATO – dhe një premtim ligjërisht të detyrueshëm nga aleanca ushtarake e udhëhequr nga SHBA-ja – se nuk do të zgjerohet më tej në lindje – si dhe vendosja e kufizimeve në ushtrinë ukrainase dhe një marrëveshje që asnjë trupë perëndimore nuk do të dislokohet në terren në Ukrainë – si pjesë e forcave paqeruajtëse”, thanë burimet.

Megjithatë, të dy palët mbeten larg njëra-tjetrës, më shumë se tre vjet pasi Putini urdhëroi aktivizimin e mijëra trupave ruse në Ukrainë – në një pushtim në shkallë të plotë që pasoi aneksimin e gadishullit të Krimesë në vitin 2014 dhe luftimet e zgjatura në lindje të vendit midis separatistëve të mbështetur nga Rusia dhe trupave ukrainase.

Ministria e jashtme e Ukrainës nuk dha asnjë koment të menjëhershëm mbi propozimet.

Presidenti ukrainas, Volodymyr Zelensky ka hedhur poshtë vazhdimisht idenë e tërheqjes nga toka ukrainase e njohur ndërkombëtarisht si pjesë e një marrëveshjeje dhe ka thënë se rajoni industrial i Donbasit shërben si një fortesë që pengon avancimin e forcave ruse në Ukrainë.

Ndërkohë, anëtarësimi në NATO është një objektiv strategjik i sanksionuar në kushtetutën e vendit dhe një objektiv që Kievi e sheh si garancinë e tij më të besueshme të sigurisë.

Zelensky tha se nuk i takon Rusisë të vendosë për anëtarësimin në aleancë.

Shtëpia e Bardhë dhe NATO nuk iu përgjigjën menjëherë kërkesave për komente mbi propozimet ruse. //a.i/

 

The post KOMENT – Kërkesa e Putinit për Ukrainën: Hiqni dorë nga Donbasi dhe anëtarësimi në NATO, asnjë forcë perëndimore appeared first on Agjencia Telegrafike Shqiptare.

BUDAPEST, 21 gusht /ATSH/- Hungaria është ofruar dy herë per të organizuar bisedimet e paqes midis Rusisë dhe Ukrainës dhe oferta është ende në fuqi, tha sot ministri i Jashtëm hungarez, Peter Szijjarto, sipas “Reuters”.

Szijjarto reagoi ndaj raportimeve se Shtëpia e Bardhë po e shqyrtonte kryeqytetin hungarez, Budapestin si një vend për një takim të mundshëm tripalësh midis presidentit të SHBA-së Donald Trump, Vladimir Putin të Rusisë dhe Volodymyr Zelensky të Ukrainës.

“Ne jemi të gatshëm të ofrojmë kushte të përshtatshme, të drejta dhe të sigurta për negociata të tilla paqeje. Jemi gati të kontribuojmë në suksesin e përpjekjeve për paqe”, tha Szijjarto.

Megjithatë, ministri i Jashtëm hodhi poshtë raportet e medias se presidenti i SHBA-së Donald Trump kishte telefonuar kryeministrin hungarez Viktor Orban – për të folur për pranimin e Ukrainës në Bashkimin Evropian pas samitit të së hënës me presidentin e Ukrainës dhe udhëheqësit evropianë.

“Dua ta bëj të qartë se nuk është zhvilluar një telefonatë të tillë”, tha Szijjarto.

Një zyrtar i Shtëpisë së Bardhë tha se Trump dhe Orban kishin biseduar të hënën në telefon – në lidhje me bisedimet e Ukrainës me Bashkimin Evropian për t’u bashkuar me bllokun dhe gjithashtu kishin diskutuar mundësinë që Budapesti të shërbente si vendi mikpritës për bisedimet midis Putinit dhe Zelensky. //a.i/

The post BUDAPEST – Hungaria e gatshme të presë bisedimet e paqes Rusi-Ukrainë appeared first on Agjencia Telegrafike Shqiptare.

PEKIN, 21 gusht /ATSH/- Zyrtarët e qeverisë kineze njoftuan muajin e kaluar ndërtimin e fermës më të madhe diellore në botë, për të përmbushur objektivat për uljen e emetimeve të karbonit, sipas AP.

Ajo do të mbulojë një sipërfaqe prej 610 kilometrash katrorë – që është madhësia e Çikagos.

Kina ka instaluar panele diellore shumë më shpejt se çdo vend tjetër në botë dhe investimi po fillon të japë fryte.

Një studim i publikuar sot zbuloi se emetimet e karbonit të vendit ranë me 1% në gjashtë muajt e parë të vitit 2025 krahasuar me një vit më parë.

Lajmi i mirë është se emetimet e karbonit në Kinë mund të kenë arritur kulmin shumë përpara objektivit të qeverisë për vitin 2030.

Kina, emetuesja më e madhe e gazrave serrë në botë, do të duhet t’i ulë emetimet e karbonit shumë më ndjeshëm – për të luajtur rolin e saj në ngadalësimin e ndryshimeve globale klimatike.

Në mënyrë që Kina të arrijë qëllimin e saj të deklaruar për neutralitet të karbonit deri në vitin 2060, emetimet do të duhet të bien mesatarisht me 3% gjatë 35 viteve të ardhshme.

Kina instaloi një kapacitet diellor prej 212 gigavatësh në gjashtë muajt e parë të vitit, më shumë se i gjithë kapaciteti i Amerikës prej 178 gigavatësh deri në fund të vitit 2024.

Energjia elektrike nga dielli e ka tejkaluar energjinë hidroelektrike në Kinë – dhe është gati të tejkalojë edhe energjinë e erës këtë vit – për t’u bërë burimi më i madh i energjisë së pastër në vend.

Rreth 51 gigavat energji nga era u shtua nga janari deri në qershor.

Një hapësirë ​​e pafundme panelesh diellore shtrihet drejt horizontit në pllajën tibetiane.

Ndërtesa të bardha dykatëshe ngrihen mbi to në intervale të rregullta.

Panelet diellore janë instaluar në rreth dy të tretat e tokës, me energji që tashmë rrjedh nga fazat e përfunduara.

Kur të përfundojë plotësisht, projekti do të ketë më shumë se shtatë milionë panele dhe do të jetë i aftë të gjenerojë energji të mjaftueshme për pesë milionë familje.//a.i/

 

 

 

 

The post FOKUS – Kina ndërton fermën më të madhe diellore në botë appeared first on Agjencia Telegrafike Shqiptare.

TEL AVIV, 21 gusht /ATSH/- Kundërshtimi i gjerë nga brenda Izraelit dhe unioni ndërkombëtar nuk e kanë penguar kryeministrin Benjamin Netanyahu nga plani i tij për të zgjeruar operacionin e ushtrisë izraelite në Qytetin e Gazës, sipas AP.

Ushtria izraelite telefonoi sot zyrtarët mjekësorë dhe organizatat ndërkombëtare në Rripin verior të Gazës – për t’i nxitur ata të evakuonin zonën përpara operacionit të zgjeruar.

Kjo vjen një ditë pasi ushtria njoftoi aktivizimin e 60,000 rezervistëve dhe zgjerimin me 20,000 rezervistëve që aktualisht shërbejnë për të mbështetur operacionin.

Netanyahu pritet të japë miratimin e tij përfundimtar për operacionin gjatë një takimi të Kabinetit të Sigurisë sot në mbrëmje.

Miratimi vjen pas vrasjes së të paktën 36 palestinezëve në sulmet në Rripin qendror dhe jugor të Gazës.

Operacioni në Qytetin e Gazës mund të fillojë brenda pak ditësh

Edhe pse Izraeli ka synuar dhe vrarë shumë nga lidershipi i lartë i Hamasit, pjesë të Hamasit po riorganizohen në mënyrë aktive dhe po kryejnë sulme, duke përfshirë edhe lëshimin e raketave drejt Izraelit.

Trupat izraelite tashmë po veprojnë në lagjen Zeitoun të qytetit dhe në Jabaliya, një kamp refugjatësh në Rripin verior të Gazës, për të përgatitur terrenin për operacionin e zgjeruar, i cili mund të fillojë brenda pak ditësh.

Ofensiva e planifikuar, e njoftuar këtë muaj, vjen mes kritikave ndërkombëtare ndaj Iztraelit – për kufizimin e aksesit të ushqimeve dhe ilaçeve në Gazë dhe frikës se shumë palestinezë do të detyrohen të largohen.

Shefi i Kombeve të Bashkuara, Antonio Guterres, bëri thirrje sërish për një armëpushim të menjëhershëm në Gazë, ndërsa Izraeli përgatitet për sulmin e tij të ri në Qytetin e Gazës dhe zona të tjera të populluara.

“Duhet të përsëris se është jetike të arrihet menjëherë një armëpushim në Gazë dhe se lirimi pa kushte i të gjithë pengjeve për të shmangur vdekjen dhe shkatërrimin masiv që një operacion ushtarak kundër Qytetit të Gazës do të shkaktonte në mënyrë të pashmangshme”, tha Guterres në një konferencë për shtyp në Konferencën e 9-të Ndërkombëtare të Tokios për Zhvillimin Afrikan, të organizuar nga Japonia. //a.i/

The post IZRAEL – Netanyahu vazhdon me zgjerimin e ofensivës në Qytetin e Gazës, pavarësisht kundërshtimeve appeared first on Agjencia Telegrafike Shqiptare.

ATHINË, 21 gusht /ATSH-DPA/- Greqia ka regjistruar vdekjet e para të vitit nga virusi i Nilit Perëndimor, një sëmundje e transmetuar nga mushkonjat që e ka origjinën në Afrikë.

Raporti javor nga autoriteti shëndetësor EODY, i publikuar sot, zbuloi se dy pacientët ishin mbi 78 vjeç dhe kishin një infeksion të sistemit nervor qendror të shkaktuar nga virusi.

Autoriteti shëndetësor tha se deri më 20 gusht të këtij viti ishin konfirmuar gjithsej 47 raste të etheve të Nilit Perëndimor.

Njëmbëdhjetë pacientë ishin trajtuar në spital, dy prej të cilëve ishin në kujdesin intensiv.

Numri i rasteve të pa raportuara ka të ngjarë të jetë dukshëm më i lartë, pasi shumë njerëz të infektuar nuk zhvillojnë asnjë simptomë ose përjetojnë vetëm simptoma të lehta si dhimbje koke dhe dhimbje gjymtyrësh.

Rastet e rënda, që përfshijnë temperaturë të lartë, ndodhin kryesisht tek të moshuarit ose te personat me probleme shëndetësore.

Shumica e rasteve aktuale janë raportuar në zonat rurale përreth Athinës dhe në Greqinë qendrore.

Patogjenët viralë transmetohen nga disa mushkonja. Mjekët këshillojnë përdorimin e medikamenteve kundër mushkonjave. //a.i/

The post GREQI – Raportohen dy vdekje nga ethet e Nilit Perëndimor appeared first on Agjencia Telegrafike Shqiptare.

BRUKSEL, 21 gusht /ATSH/- Zyrtarët amerikanë dhe të Bashkimit Evropian publikuan sot një përshkrim të thjeshtë të marrëveshjes së tyre tregtare që vendos një taksë importi prej 15% për 70% të mallrave evropiane të eksportuara në SHBA, sipas AP.

Por, fushat kyçe si vera, pijet alkoolike, si dhe çeliku, nuk janë shqyrtuar ende.

SHBA dhe BE deklaruan se do të vazhdonin bisedimet për këto fusha dhe një sërë sektorësh të tjerë të rëndësishëm.

Të dyja palët thanë se dokumenti ishte hapi i parë në një proces që mund të zgjerohet më tej – për të mbuluar fusha të tjera.

SHBA dhe BE po merren me gamën e gjerë të mallrave të tregtuara midis dy ekonomive në atë që është marrëdhënia më e madhe tregtare dypalëshe në botë, që përfshin 2 trilionë dollarë në biznesin vjetor transatlantik.

Dokumenti prej tre faqesh e gjysmë përfaqëson një angazhim politik dhe nuk është ligjërisht i detyrueshëm.

Ai bie ndesh me formatin tipik për marrëveshjet tregtare, të cilat mund të jenë qindra faqe të gjata dhe të kenë fuqi ligjore.

Dispozitat kryesore janë tarifa prej 15% për shumicën e mallrave të BE-së, një normë zero për automjetet amerikane dhe mallrat e tjera industriale – të eksportuara në BE-në me 27 anëtarë, dhe një sërë përjashtimesh nga norma prej 15% për avionët dhe pjesët e avionëve, produktet farmaceutike gjenerike dhe përbërësit farmaceutikë, me sektorë të tjerë që do të shtohen për mallrat thelbësore për ekonomitë e të dy palëve.

Këto mallra do të përballen me tarifa më të ulëta nga ato që ishin përpara “sulmit” të tarifave të presidentit Donald Trump.

“BE-ja ka rënë dakord të hapë tregun e saj prej 20 trilionë dollarësh”, tha sekretari i Tregtisë i Trump, Howard Lutnick, në X.

“I dyti më i madh në botë pas SHBA-së së madhe”, shtoi ai.

Ai tha se marrëveshja ishte një fitore e madhe për punonjësit amerikanë, industritë amerikane dhe sigurinë tonë kombëtare.

Zyrtarët evropianë kanë pasur nevojë ta mbrojnë marrëveshjen nga zhgënjimi i bizneseve dhe qeverive anëtare për tarifat më të larta dhe kritikat se BE-ja i dha shumë.

Presidentja e Komisionit Evropian, Ursula von der Leyen, e paraqiti marrëveshjen si një lehtësim të shpejtë nga tarifa edhe më e lartë e SHBA-së për automjetet e BE-së prej 27,5% dhe si hapje të rrugës për negociata të mëtejshme që mund të përjashtojnë më shumë mallra nga tarifat prej 15%.

Marrëveshja parashikon që tarifa më e ulët për automjetet do të zbatohet në mënyrë retroaktive nga 1 gushti nëse BE-ja mund të paraqesë legjislacion për të zbatuar pjesën e saj të marrëveshjes deri atëherë, gjë që zyrtarët e BE-së thonë se do ta bëjnë.

“Të përballur me një situatë sfiduese, ne kemi dhënë rezultate për shtetet anëtare dhe industrinë tonë dhe kemi rivendosur qartësinë dhe koherencën në tregtinë transatlantike”, tha Von der Leyen. “Ky nuk është fundi i procesit”, shtoi ajo.

“Alternativa ishte një luftë tregtare me tarifa shumë të larta… ajo ndërton besim. Ajo sjell stabilitet”, tha negociatori kryesor i tregtisë i BE-së, Maros Sefcovic.

Ekonomistët thonë se tarifat më të larta ngadalësojnë rritjen ekonomike dhe do të reflektohen në çmime më të larta të konsumit.

Një kategori mallrash që nuk përjashtohen nga tarifat për mallrat e BE-së ishte vera dhe pijet alkoolike – të cilat kishin gëzuar zero tarifa në të dyja palët – që nga një marrëveshje tregtare e vitit 1997.

Sefcovic tha se zyrtarët e BE-së nuk kishin fituar një përjashtim “ende”, por shpresonin ta bënin në bisedimet e ardhshme dhe se dyert nuk ishin mbyllur përgjithmonë për këtë çështje.

“Kjo do të thotë që distiluesit amerikanë përballen me zero tarifa në Evropë në planin afatshkurtër, por edhe me mundësinë e hakmarrjes së BE-së në të ardhmen”, tha Chris Swonger, president dhe CEO i Këshillit të Pijeve të Distiluara të Shteteve të Bashkuara të Amerikës.

“Pa një kthim të përhershëm në tarifat zero-për-zero për pijet alkoolike, distilerët amerikanë nuk kanë sigurinë për të planifikuar eksportin e ardhshëm dhe rritjen e vendeve të punës pa frikën e kthimit të tarifave hakmarrëse”, tha Swonger në një deklaratë.

BE-ja ka pezulluar tarifat hakmarrëse për mallrat amerikane, përfshirë verën dhe pijet alkoolike, deri më 5 shkurt 2026.

Propozimet për të përjashtuar një sasi të caktuar të importeve të çelikut të BE-së, të njohura si kuotë tarifore, janë lënë të pazgjidhura në pritje të bisedimeve të mëtejshme.

Tarifa prej 15% është shumë më e lartë se nivelet e tarifave në të dyja palët – përpara se Trump të fillonte të vendoste tarifat e tij, kur ato mesatarisht ishin në shifra të ulëta njëshifrore.

Tarifat paguhen nga ana e SHBA-së, ose të absorbuara nga bizneset amerikane që importojnë mallrat, duke ulur fitimet e tyre, ose kalohen te konsumatorët amerikanë në formën e çmimeve më të larta në arkë.

Marrëveshja përfshin gjithashtu angazhime jo-detyruese të BE-së për të blerë 750 miliardë dollarë energji amerikane dhe që kompanitë e BE-së të investojnë 600 miliardë dollarë në SHBA.

Në të dyja rastet, paratë do të vijnë nga kompani private dhe bazohen në vlerësimin e Komisionit Evropian mbi atë që kompanitë planifikonin të shpenzonin. //a.i/

The post ANALIZË – SHBA-ja dhe BE-ja zbulojnë detaje të reja rreth marrëveshjes tregtare appeared first on Agjencia Telegrafike Shqiptare.

MOSKË, 21 gusht /ATSH/- Rusia lëshoi ​​574 dronë dhe 40 raketa balistike dhe kruiz gjatë natës, në një nga sulmet e saj më të mëdha ajrore ndaj Ukrainës të vitit, thane sot Forcat Ajrore Ukrainase, ndërsa një përpjekje e kohëve të fundit diplomatike për të ndaluar luftën 3-vjeçare po përpiqet të fitojë vrull, sipas AP.

Sulmi, kryesisht kishte në shënjestër rajonet perëndimore të vendit – ku besohet se është dorëzuar dhe ruajtur pjesa më e madhe e ndihmës ushtarake të ofruar nga aleatët perëndimorë të Ukrainës.

“Sulmet vranë të paktën një person dhe plagosën 15 të tjerë”, sipas zyrtarëve.

“Ky ishte sulmi i tretë më i madh ajror i Rusisë këtë vit – për sa i përket numrit të dronëve të lëshuar dhe i teti më i madhi për sa i përket raketave”, sipas shifrave zyrtare ukrainase.

Shumica e sulmeve të tilla ruse kanë goditur zonat civile.

Sulmet ndodhën gjatë një përpjekjeje të ripërtërirë të udhëhequr nga SHBA-ja – për të arritur një zgjidhje paqeje pas pushtimit të fqinjit të saj nga Rusia në shkurt 2022.

Presidenti i SHBA-së, Donald Trump, diskutoi luftën me presidentin rus Vladimir Putin në Alaskë, javën e kaluar dhe në fillim të kësaj jave priti presidentin ukrainas Volodymyr Zelensky dhe udhëheqësit evropianë në Shtëpinë e Bardhë.

Rusia ka sulmuar me gati 1,000 dronë dhe raketa me rreze të gjatë veprimi drejt Ukrainës që nga bisedimet në Shtëpinë e Bardhë.

Rubio do të presë bisedimet e sigurisë së Ukrainës me Evropën

“Sekretari amerikan i Shtetit, Marco Rubio, do të drejtojë sot një konferencë telefonike me këshilltarët e sigurisë kombëtare të vendeve evropiane që pritet të luajnë një rol në garancitë e ardhshme të sigurisë për Ukrainën”, tha një zyrtar i lartë amerikan.

Një nga kushtet e Kievit për nënshkrimin e çdo marrëveshjeje paqeje është marrja e garancive ushtarake të mbështetura nga Perëndimi – për të penguar Rusinë të kryejë një pushtim tjetër në vitet e ardhshme.

Ministri i Jashtëm, rus Sergey Lavrov tha dje se bërja e marrëveshjeve të sigurisë për Ukrainën pa përfshirjen e Moskës ishte e pakuptimtë.

Nuk ishte menjëherë e qartë se cilat vende do të përfaqësoheshin në telefonatën me Rubio.

Zelensky bën thirrje për më shumë presion mbi Moskën

Ukraina dhe udhëheqësit evropianë e kanë akuzuar Putinin për zvarritje të përpjekjeve të vazhdueshme për paqe, duke përfshirë propozimin e Ukrainës për një armëpushim dhe ofertën e Zelensky për t’u takuar me udhëheqësin rus.

Kremlini ka reaguar ftohtësisht ndaj këtyre mundësive.

Lavrov, diplomati më i lartë i Moskës, tha sot se Putin është gati të takohet me Zelensky – por vetëm pasi çështjet kryesore të jenë përpunuar më parë nga zyrtarët e lartë – në atë që mund të jetë një proces i gjatë negociues.

Ministria e Mbrojtjes e Rusisë tha se sulmet kishin në shënjestër ndërmarrjet e kompleksit ushtarako-industrial ukrainas.

Ajo pretendoi se sulmi goditi fabrikat e dronëve, depot e magazinimit dhe vendet e lëshimit të raketave, si dhe zonat ku ishin mbledhur trupat ukrainase.

Rusia ka mohuar vazhdimisht se sulmet e saj kanë synuar zonat civile të Ukrainës.

“Moska nuk ka treguar shenja të ndjekjes së negociatave kuptimplote për t’i dhënë fund luftës”, tha Zelensky.

Ai i kërkoi unionit ndërkombëtar të përgjigjej me presion më të fortë ndaj Moskës, duke përfshirë sanksione dhe tarifa më të ashpra.

Ndërkohë, Ukraina ka vazhduar sulmet e saj me dronë me rreze të gjatë veprimi të prodhuar në vend ndaj infrastrukturës së Rusisë – që mbështet përpjekjet e luftës së Moskës.

Ndër objektiva të tjerë, ajo ka goditur rafineritë e naftës, dhe çmimet me shumicë të benzinës ruse kanë arritur nivele rekord në ditët e fundit.

Goditje në fabrikën e elektronikës amerikane

Pothuajse të gjitha raketat e lëshuara gjatë natës u lëshuan nga brenda Rusisë.

Ato arritën thellë në Ukrainën perëndimore, pranë kufirit me Hungarinë.

Pjesët perëndimore të Ukrainës janë larg vijës së frontit të fushëbetejës në lindje dhe jug të vendit, ku një luftë e ashpër rraskapitëse ka vrarë dhjetëra mijëra ushtarë nga të dyja palët.

“Në qytetin perëndimor të Lvivit, një person u vra dhe tre të tjerë u plagosën ndërsa sulmi dëmtoi 26 ndërtesa banimi, një kopsht fëmijësh dhe ndërtesa administrative”, shkroi kreu rajonal Maksym Kozytskyi në Telegram.

Zyra e Prokurorit Rajonal tha se tre raketa ruse me municione thërrmuese kishin goditur qytetin. //a.i/

 

The post KOMENT – Rusia sulm masiv me dronë dhe raketa ndaj Ukrainës, ndërsa përpjekjet për paqe vazhdojnë appeared first on Agjencia Telegrafike Shqiptare.

STOKHOLM, 20 gusht /ATSH-DPA/-  Suedia është e përgatitur të ndihmojë në sigurimin e paqes në Ukrainë përmes monitorimit të hapësirës ajrore dhe operacioneve detare, tha sot kryeministri suedez, Ulf Kristersson.

Shefat e Mbrojtjes të NATO-s zhvilluan sot diskutime rreth garancive të sigurisë që mund t’i ofrojnë Kievit – për të ndihmuar në krijimin e një marrëveshjeje paqeje – që do t’i japë fund luftës 3-vjeçare të Rusisë kundër Ukrainës.

“Qëllimi nuk është të dislokohet një numër i madh trupash nga vendet e tjera në Ukrainë, por, për të siguruar që Kievi të marrë në mënyrë të besueshme përgjegjësinë për vendin e tij – dhe garantuar që Rusia nuk do të përpiqet të sulmojë sërish”, tha Kristersson.

“Kontributi i Suedisë – në rast të një marrëveshjeje paqeje midis Ukrainës dhe Rusisë – duhet të kryhet në një mënyrë të sigurt, duke ofruar qartësi në lidhje me atë për të cilën do të angazhohet vendi”, theksoi kryeministri suedez.

Ukraina dhe Rusia janë të dyja në Detin e Zi. Suedia, e cila iu bashkua NATO-s në mars 2024, është anëtarja më e re e aleancës.//a.i/

 

The post STOKHOLM – Suedia e gatshme të ndihmojë në sigurimin e paqes në Ukrainë përmes monitorimit të hapësirës ajrore dhe operacioneve detare appeared first on Agjencia Telegrafike Shqiptare.

BRUKSEL, 20 gusht /ATSH/- Shefat e mbrojtjes të NATO-s zhvilluan sot diskutime rreth garancive të sigurisë që mund t’i ofrojnë Kievit – për të ndihmuar në krijimin e një marrëveshjeje paqeje – që do t’i japë fund luftës 3-vjeçare të Rusisë kundër Ukrainës, tha një zyrtar i lartë i aleancës, sipas AP.

Admirali italian, Giuseppe Cavo Dragone, kryetar i Komitetit Ushtarak të NATO-s, tha se 32 shefa të mbrojtjes nga e gjithë aleanca zhvilluan një videokonferencë mes një nxitjeje diplomatike të udhëhequr nga SHBA-ja – për t’i dhënë fund luftimeve.

“Pati një diskutim të shkëlqyer dhe të sinqertë. I falënderova të gjithë për pjesëmarrjen e tyre gjithmonë pro aktive në këto takime. Ne jemi të bashkuar dhe ky unitet ishte vërtet i prekshëm sot, si gjithmonë”, shkroi ai në  X, pa dhënë detaje të mëtejshme.

Garancitë për të shmangur pushtimin e Ukrainës në të ardhmen – janë thelbësore për ta bindur Ukrainën të nënshkruajë një marrëveshje paqeje me Rusinë.

Kievi kërkon ndihmën perëndimore për të forcuar ushtrinë e saj, duke përfshirë armët dhe trajnimin e personelit, dhe zyrtarët evropianë po përpiqen të kuptojnë se çfarë angazhimesh mund të ofrojnë.

Ministri i Jashtëm rus, Sergej Lavrov, kritikoi përpjekjet për të punuar mbi marrëveshjet e sigurisë në Ukrainë pa përfshirjen e Moskës.

“Nuk mund të pajtohemi me faktin se tani propozohet të zgjidhen çështjet e sigurisë kolektive pa Federatën Ruse. Kjo nuk do të funksionojë”, tha sot Lavrov.

“Rusia do të sigurojë interesat e saj legjitime në mënyrë të vendosur dhe të rreptë”, shtoi Lavrov në një konferencë shtypi në Moskë me ministrin e Jashtëm jordanez, Ayman al-Safadi. //a.i/

The post BRUKSEL – Shefat e Mbrojtjes të NATO-s diskutojnë garancitë e sigurisë për Ukrainën appeared first on Agjencia Telegrafike Shqiptare.

GAZË, 20 gusht /ATSH-DPA/- Më shumë se 15 palestinezë të armatosur sulmuan sot një pozicion ushtarak në jug të Rripit të Gazës, njoftoi ushtria izraelite.

“Sulmuesit qëlluan ndaj ushtarëve izraelitë dhe përdorën raketa antitank në zonën e Khan Younis”, tha një zyrtar ushtarak.

Trupat u përgjigjën me zjarr, të mbështetur nga sulmet ajrore, dhe vranë dhjetë nga sulmuesit, të cilët kishin dalë nga tunelet nëntokësore.

Media izraelite raportoi se sulmuesit kishin ndërmend të rrëmbenin ushtarët.

“Tre ushtarë u plagosën, njëri prej tyre ndodhet në gjendje të rëndë”, tha ushtria.

Incidenti ishte ende duke vazhduar, ndërsa ushtria deklaroi se trupat po vepronin për të gjetur dhe eliminuar terroristët.

Krahu ushtarak i Hamasit mori përgjegjësinë për sulmin.

“Brigadat al-Qassam thanë se operacione të tilla do të vazhdojnë derisa të përfundojë pushtimi dhe populli të fitojë lirinë”, tha Hamasi në një deklaratë të mëtejshme. //a.i/

The post FOKUS – Palestinezët e armatosur sulmojnë ushtarët izraelitë në Rripin e Gazës appeared first on Agjencia Telegrafike Shqiptare.

MOSKË, 20 gusht /ATSH-DPA/- Rusia tha sot se po vazhdon të furnizojë me naftë Indinë, pavarësisht tarifave ndëshkuese të SHBA-së të vendosura ndaj Nju Delhit.

“Ne vazhdojmë të furnizojmë me karburant, duke përfshirë naftë bruto dhe produkte të naftës, qymyr termik dhe metalurgjik”, tha zëvendëskryeministri i parë i Rusisë, Denis Manturov.

Në një takim të Komisionit Qeveritar ruso-indian, Manturov tha se ai gjithashtu shihte një potencial të madh për zgjerimin e eksporteve të gazit natyror të lëngshëm (LNG).

“Për të forcuar partneritetin e tyre energjetik, të dy vendet synojnë të zhvillojnë së bashku Kalimin Verilindor”, shtoi Manturov.

Kalimi Verilindor është një rrugë detare në Oqeanin Arktik përgjatë bregdetit rus.

Depozitat e pasura të lëndëve të para mund të transportohen nëpërmjet kësaj rruge, e cila aktualisht ngrin në dimër.

Këtë muaj, Trump rriti tarifat për importet nga India nga 25% në 50%, duke përmendur lidhjet tregtare me Rusinë – si justifikim.

Sipas raporteve të medias, Nju Delhi është përgjigjur duke kufizuar importin e naftës nga Rusia. //a.i/

The post MOSKË – Rusia vazhdon t’i shesë naftë Indisë pavarësisht tarifave të Trump appeared first on Agjencia Telegrafike Shqiptare.

BRUKSEL 20 gusht /ATSH-DPA/- NATO ngriti në ajër dy avionë luftarakë gjermanë “Eurofighter” në përgjigje të sulmeve ajrore ruse pranë kufirit të Ukrainës me Rumaninë gjatë natës.

Avionët luftarakë u aktivizuan pasi sistemet e armëve ruse iu afruan hapësirës ajrore rumune.

Në fund, ata nuk kaluan në atë që është gjithashtu hapësira ajrore e NATO-s.

Avionët luftarakë, të cilët u ngritën nga baza ajrore ushtarake rumune “Mihail Kogalniceanu” pranë Konstancës, u kthyen pa incidente. Kjo shënoi alarmin e parë të një misioni të ri atje.

Forcat Ajrore Gjermane po marrin pjesë në fluturime patrullimi të armatosura për të siguruar krahun juglindor të aleancës së NATO-s.

Operacioni përfshin pesë avionë “Eurofighter” dhe afërsisht 170 ushtarë, duke siguruar pajisje ushtarake që Rumania nuk i zotëron mjaftueshëm vetë.

Avionët luftarakë gjermanë janë pjesë e një njësie alarmi për reagim të shpejtë të stacionuar në vend, gati për t’u dislokuar 24 orë në ditë.

Disa shtete anëtare të NATO-s e ofrojnë me radhë këtë mbështetje. Misioni gjerman filloi këtë muaj dhe është planifikuar të vazhdojë deri në mars. //a.i/

The post RUMANI – NATO dërgon dy “Eurofighter” në përgjigje të sulmeve ajrore ruse appeared first on Agjencia Telegrafike Shqiptare.

KOPENHAGË, 20 gusht /ATSH-DPA/- Sëmundjet virale të transmetuara nga mushkonjat po bëhen gjithnjë e më të zakonshme në BE, sipas Qendrës Evropiane për Parandalimin dhe Kontrollin e Sëmundjeve (ECDC).

“Infeksionet me patogjenë të tillë si virusi i Nilit Perëndimor ose virusi “chikungunya” mund të bëhen realiteti i ri në Evropë”, paralajmëroi sot agjencia e Bashkimit Evropian.

Virusi “chikungunya”, i transmetuar nga mushkonja tigër aziatike, ka vendosur një rekord të ri për kontinentin këtë vit, me 27 shpërthime të raportuara deri më tani.

Një rast i etheve “chikungunya” të kontraktuara në nivel lokal – u regjistrua në fillim të korrikut në rajonin francez të Alsasës.

Sipas agjencisë së BE-së, kjo është e pazakontë për gjerësinë gjeografike dhe thekson faktin se rreziku i transmetimit po përhapet më tej në veri.

“Deri në mesin e gushtit, 335 raste të virusit të Nilit Perëndimor të transmetuar në nivel lokal dhe 19 vdekje u raportuan në tetë vende evropiane”, sipas raportit të ECDC.

Italia është vendi më i prekur me 247 raste, e ndjekur nga Greqia me 35 raste.

ECDC pret që numri i infeksioneve të vazhdojë të rritet, me transmetimet që do të arrijnë kulmin në gusht ose shtator.

ECDC ia atribuon përhapjen në rritje të këtyre sëmundjeve në Evropë kushteve klimatike që lejojnë mushkonjat të zhvillohen.

Mushkonja tigër aziatike është tani e pranishme në 16 vende evropiane.

Agjencia me seli në Suedi këshillon banorët dhe vizitorët në zonat e prekura – veçanërisht të moshuarit, fëmijët dhe ata me sistem imunitar të dobët – të mbrohen nga pickimet e mushkonjave. //a.i/

 

The post FOKUS – Rekord i ri në BE, rriten sëmundjet virale nga mushkonjat appeared first on Agjencia Telegrafike Shqiptare.

VARSHAVË, 20 gusht /ATSH-DPA/- Droni që u rrëzua në një fushë misri në Poloni është me origjinë ruse, tha sot ministri i Mbrojtjes Władysław Kosiniak-Kamysz, duke e quajtur incidentin një provokim.

“Rusia po provokon sërish shtetet e NATO-s”, tha Kosiniak-Kamysz.

“Kjo po ndodh në një kohë kur përpjekje për paqe në Ukrainëpo rriten, e cila është nën sulm nga Rusia”, shtoi ai.

“Të gjithë aleatët e NATO-s janë informuar për incidentin”, shtoi Kosiniak-Kamysz.

Droni ra në një fushë pranë fshatit Osiny, rreth 100 kilometra në juglindje të Varshavës, herët në mëngjes.

Oficerët e policisë të thirrur nga banorët gjetën mbeturina të djegura prej plastike dhe metali në vendin e rrëzimit.

Vendi i rrëzimit është rreth 120 kilometra nga kufiri i Polonisë me Ukrainën dhe rreth 100 kilometra nga kufiri me Bjellorusinë.

Polonia, një shtet anëtar i BE-së dhe NATO-s, është një nga mbështetëset më të rëndësishme politike dhe ushtarake të Ukrainës.

Ajo gjithashtu e sheh veten të kërcënuar nga Rusia dhe po riarmatoset masivisht.

Që në nëntor të vitit 2022, një raketë goditi fshatin lindor polak, Przewodow, duke vrarë dy persona. Për aq sa dihet, ishte një raketë anti-ajrore ukrainase e humbur. //a.i/

The post VARSHAVË – Ministria e Mbrojtjes: Droni që u rrëzua në Poloni e kishte origjinën nga Rusia appeared first on Agjencia Telegrafike Shqiptare.

XHAKARTA, 20 gusht /ATSH-DPA/- Ministri i Jashtëm gjerman Johann Wadephul kritikoi sot Izraelin për miratimin e ndërtimit të vendbanimeve në Bregun Perëndimor.

“Plane të tilla, nëse zbatohen, do të ishin në kundërshtim me ligjin ndërkombëtar dhe do ta bënin të pamundur një zgjidhje me dy shtete”, u tha Wadephul gazetarëve, përpara vizitës së tij në Xhakarta.

Një zgjidhje me dy shtete i referohet një shteti të pavarur palestinez që ekziston në mënyrë paqësore përkrah Izraelit.

Kryeministri izraelit Benjamin Netanyahu e ka refuzuar një zgjidhje me dy shtete – ashtu si edhe organizata islamiste palestineze “Hamas” në Rripin e Gazës.

“Gjermania favorizon një zgjidhje me dy shtete”, tha Wadephul.

“Kjo është arsyeja pse ne këshillojmë fuqimisht që mos të ndiqet kjo rrugë”, shtoi ai.

Komiteti izraelit i Planifikimi miratoi sot planin për të ndërtuar rreth 3,400 njësi banimi në të ashtuquajturën zona E1 – një shtrirje toke midis Jerusalemit Lindor dhe vendbanimit Maale Adumim.

Një zëdhënës i Ministrisë së Jashtme Gjermane tha se plani do të ndante de facto pjesën veriore të Bregut Perëndimor nga pjesa jugore.

Lëvizshmëria e palestinezëve në Bregun Perëndimor dhe palestinezëve në Jerusalemin Lindor do të kufizohej ndjeshëm.

Kritikët kanë paralajmëruar prej kohësh kundër këtij veprimi të kontestuar, duke thënë se ai mund të dëmtojë rëndë perspektivat për një shtet të ardhshëm palestinez. //a.i/

The post XHAKARTA – Wadephul kritikon projektin e Izraelit për vendbanime në Bregun Perëndimor appeared first on Agjencia Telegrafike Shqiptare.

PARIS, 20 gusht /ATSH-DPA/- Presidenti francez Emmanuel Macron paralajmëroi sot për rrezikun e një lufte të përhershme – mes operacionit të planifikuar ushtarak të Izraelit në Qytetin e Gazës.

“Ofensiva ushtarake në Gazë – që Izraeli po përgatit – mund të çojë vetëm në një katastrofë për të dy popujt dhe rrezikon të zhytë të gjithë rajonin në një cikël lufte të përhershme”, shkroi Macron në X – pas bisedimeve me Mbretin Abdullah II të Jordanisë dhe presidentin egjiptian, Abdel-Fattah al-Sissi.

Macron përsëriti thirrjen e tij për një armëpushim të përhershëm në Rripin e Gazës.

Ai gjithashtu përmendi lirimin e të gjithë pengjeve, ndihmën humanitare në shkallë të gjerë për njerëzit në Gazë, si dhe çarmatimin e organizatës militante palestineze “Hamas” dhe forcimin e Autoritetit Palestinez – si parakushte për t’i dhënë fund luftës.

Ministri izraelit i Mbrojtjes, Israel Katz, ka miratuar planin për mobilizimin e 60 000 rezervistëve për të pushtuar Qytetin e Gazës.

Autorizimi u miratua pavarësisht se grupi militant palestinez “Hamas” tha se kishte njoftuar një “përgjigje pozitive” ndaj propozimit të ri për një armëpushim në Rripin e Gazës.

Macron ka rritur kritikat e tij ndaj Izraelit në muajt e fundit për sjelljen e tij në Gazë.

Gjithashtu, ai është zotuar të njohë shtetin palestinez, një veprim i kritikuar ashpër nga qeveria e kryeministrit izraelit Benjamin Netanyahu. //a.i/

The post PARIS – Macron paralajmëron për rrezikun e një lufte të përhershme mes ofensivës së re izraelite në Gazë appeared first on Agjencia Telegrafike Shqiptare.

MOSKË, 20 gusht /ATSH-DPA/- Presidenti rus Vladimir Putin dhe homologu i tij turk Recep Tayyip Erdogan zhvilluan sot një bisedë telefonike rreth zhvillimeve në luftën në Ukrainë.

Kremlini dhe zyra presidenciale në Ankara thanë sot se Putini informoi presidentin turk rreth samitit me presidentin e SHBA-së, Donald Trump javën e kaluar, në Alaskë.

Trump po përpiqet t’i japë fund luftës në Ukrainë, duke kërkuar të organizojë një takim midis Putinit dhe presidentit ukrainas Volodymyr Zelensky.

Një samit i mundshëm tripalësh me Trump, Putinin dhe Zelensky është gjithashtu në plan.

“Putini, gjithashtu falënderoi Turqinë për mbështetjen e saj gjatë bisedimeve midis Rusisë dhe Ukrainës në Stamboll”, sipas deklaratës.

Ukraina dhe Rusia kanë negociuar tre herë në Stamboll që nga maji, por pa asnjë rezultat përveç disa shkëmbimeve të të burgosurve.

Këto ishin bisedimet e para të drejtpërdrejta midis palëve ndërluftuese që nga viti 2022, që do të thotë se Turqia mund të merret në konsideratë edhe për takime të mëtejshme.

Gjithashtu, Putini zhvilloi dje një bisede telefonike me Princin e Kurorës Saudite, Mohammed bin Salman.

Rusia, SHBA-ja dhe Ukraina kanë përdorur gjithashtu Arabinë Saudite si një pikë takimi në muajt e fundit. //a.i/

The post MOSKË – Putini informon Erdoganin për zhvillimet e luftës në Ukrainë appeared first on Agjencia Telegrafike Shqiptare.

XHAKARTA, 20 gusht /ATSH-DPA/- Ministri i Jashtëm gjerman Johann Wadephul vlerësoi sot marrëveshjen e tregtisë së lirë të BE-së me Indonezinë, ndërsa ndodhet në vizitën e tij të parë në Azi.

“Në një botë krizash dhe konfliktesh, kufizimesh dhe barrierash tregtare është jetike të krijohet një rrjet partneritetesh të forta globale”, tha Wadephul në një takim me homologun e tij indonezian Sugiono, në Xhakartë.

Marrëveshja Gjithëpërfshirëse e Partneritetit Ekonomik (CEPA) e BE-së me Indonezinë, e arritur në korrik, pritet të finalizohet në shtator.

“Marrëveshja mund të shërbejë si një model për tregtinë evropiane me rajone të tjera”, tha Wadephul.

“Për kompanitë gjermane dhe indoneziane, ajo ofron një mundësi të madhe për bashkëpunim, për shembull në energjitë e rinovueshme”, shtoi ai.

Demokracia e tretë më e madhe në botë dhe vendi me popullsinë më të madhe myslimane në botë, Indonezia është shfaqur si një lojtare globale gjithnjë e më e rëndësishme vitet e fundit.

Ashtu si Gjermania, kombi i Azisë Juglindore është anëtar i grupit G20 të ekonomive kryesore.

Indonezia është gjithashtu pjesë e aleancës BRICS që përfshin Brazilin, Rusinë, Indinë, Kinën dhe Afrikën e Jugut.

Partnerët më të rëndësishëm tregtarë të vendit përfshijnë Kinën, Japoninë, Indinë, Shtetet e Bashkuara të Amerikës dhe Bashkimin Evropian, si dhe tregun e Azisë Juglindore.

Sugiono, i cili si shumë indonezianë përdor një emër të vetëm – tha se Indonezia dhe Gjermania ishin partnerë strategjikë dhe se ishte i bindur se ky partneritet do të bëhej më i fortë në vitet e ardhshme.

“Vendi është i hapur për më shumë investime gjermane në fusha kyçe si energjia e rinovueshme, inteligjenca artificiale, infrastruktura dhe siguria ushqimore”, tha ministri i Jashtëm indonezian.

Duke pasur parasysh mungesën e punonjësve të kualifikuar në Gjermani, të dy ministrat theksuan potencialin për bashkëpunim në tregun e punës.

Sugiono e përshkroi vizitën e ardhshme shtetërore të presidentit indonezian Prabowo Subianto, në Gjermani – me ftesë të presidentit gjerman Frank-Walter Steinmeier – si një formë të veçantë njohjeje që pasqyron rëndësinë e partneritetit të të dy vendeve. //a.i/

The post XHAKARTA – Wadephul vlerëson marrëveshjen tregtare të BE-së me Indonezinë appeared first on Agjencia Telegrafike Shqiptare.

ROMË, 20 gusht /ATSH/-  Zbuloni plazhet më të mira të Shqipërisë, ku ju presin peizazhe mahnitëse bregdetare, sipas një artikulli të botuar në revistën italiane të udhëtimeve “Skyscanner”.

Shqipëria po përjeton një bum turistik. Riviera Shqiptare është e mbushur me plazhe marramendëse për një përvojë luksoze të përballueshme.

Zbuloni parajsën bregdetare në plazhet më të bukura të Shqipërisë, vetëm pak orë larg Italisë.

Pse të zgjidhni Shqipërinë për pushimet tuaja të ardhshme në plazh? Bukuri e virgjër dhe aventura në Adriatik.

Vizitoni këtë perlë në brigjet e Adriatikut dhe Jonit – me plazhe mahnitëse, histori të pasur dhe kuzhinë të shijshme.

Eksploroni rrënojat e lashta, qytetet e gjalla dhe peizazhet spektakolare malore përpara se të relaksoheni në një nga plazhet e virgjëra.

Më poshtë do të gjeni disa nga plazhet më të mira të Shqipërisë, për pushime në bregdet:

Tetë plazhet më të mira në Shqipëri

Qoftë në Rivierën Shqiptare apo në veri të vendit, bregdeti i Shqipërisë ofron një shumëllojshmëri plazhesh për të gjitha shijet.

Do të gjeni bare plazhi të gjalla dhe muzikë të fuqishme në Sarandë dhe Shëngjin, qetësi dhe vende të izoluara – të rrethuara nga natyra në Gjipe, ose ujëra miqësore për familjet në Velipojë.

Zbuloni perlat e fshehura, eksploroni shkëmbinjtë spektakolarë dhe shijoni diellin mesdhetar në këto plazhe mahnitëse shqiptare – në disa nga vendpushimet më të mira bregdetare të Shqipërisë.

1. Saranda
Vendpushimi më i mirë i plazhit në Shqipëri

Qyteti bregdetar i Sarandës konsiderohet kryeqyteti jozyrtar i Rivierës Shqiptare dhe një nga vendpushimet më të mira të Shqipërisë.

Ekziston një përzgjedhje e gjerë plazhesh, më i famshmi prej të cilëve është plazhi kryesor i qytetit.

Do të gjeni një shëtitore të gjallë që ofron një ndërthurje të relaksit dhe argëtimit.

Këto ujëra të kristalta janë njësoj si ato që keni parë në mediet sociale.

Gjithashtu mund të shijoni sporte ujore ose të relaksoheni në një nga baret e njohura të plazhit.

2. Ksamili
Perla e detit Jon

Ky plazh mahnitës dhe piktoresk është një nga destinacionet më të mira të plazhit në Shqipëri.

Ejani për vendndodhjen mahnitëse – një gji me tre ishuj të vegjël të arritshëm me varkë ose me not, nëse jeni mjaftueshëm në formë – dhe qëndroni për të shijuar diellin dhe për t’u zhytur në ujërat mahnitëse bruz. Mos harroni, gushti është muaji më i ngarkuar.

3. Spille
Një shtrirje rëre prej 8 kilometrash

Qershor deri në shtator
Në jug të qytetit portual të Durrësit, do të gjeni shumë hapësirë në këtë shtrirje rëre prej 8 kilometrash.

Në pjesën e plazhit më të afërt me qendrën e fshatit Spille, mund të merrni me qira shezlongje dhe çadra.

Nëse vendosni të endeni më larg, turmat pakësohen, por prapë do të gjeni shumë restorante dhe bare gjatë rrugës.

4. Velipoja
E përshtatshme për familjet

Plazhi më verior i Shqipërisë, pranë kufirit me Malin e Zi, Velipoja ofron rërë të artë, qasje të lehtë në ujë dhe lehtësira të shumta.

Shezlongjet dhe çadrat janë në dispozicion me qira, por zona mund të mbushet me pushues në pikun e sezonit.

Nëse jeni duke kërkuar qetësi, një shëtitje pesë minutëshe do t’ju largojë nga zhurma e argëtimit.

5. Shëngjin
Plot argëtim

Ky plazh i mrekullueshëm ndodhet në bregdetin e famshëm verior të Shqipërisë.

Shtrirja prej 3 kilometrash e plazhit është e mbushur me hotele në njërën anë dhe ujëra të kaltra në anën tjetër.

Rëra e hollë e artë zbret butësisht në detin e cekët dhe të trazuar, duke e bërë atë një destinacion ideal për familjet.

Për më tepër, të gjitha lehtësitë që ju nevojiten për një ditë në plazh janë në dispozicion, nga sportet ujore te shezlongjet dhe një atmosferë festash.

Periudha midis fundit të majit dhe fillimit të qershorit është perfekte për të shmangur turmat.

6. Gjipe
Bukuri natyrore

E mbrojtur nga malet, Gjipeja është një vend paqeje dhe qetësie.

Nëse jeni duke kërkuar një natyrë më të egër përgjatë bregdetit shqiptar, ky është vendi ideal për ju.

Për të arritur në plazh nga rruga, bëni një ecje 30-minutëshe përmes një peizazhi natyror mahnitës.

Gjatë ecjes në këmbë, do të shijoni pamjet magjepsëse të plazhit, përpara se të arrini në breg.

7. Dhërmiu
Vendi ideal i verës

Dërmiu, pranë Drimadhes, është një nga plazhet më të famshme të Shqipërisë.

Dhe gjithçka ka të bëjë me bukurinë e tij të jashtëzakonshme natyrore.

Ecni mbi hapësirën e guralecëve të zbehtë, shijoni ujërat bruz dhe mjedisin përreth.

Bëni një shëtitje të shkurtër përgjatë plazhit dhe do të gjeni një copëz parajse, edhe në muajt e verës.

8. Borshi
Plazh i qetë

Plazhi më i madh i Shqipërisë shtrihet përgjatë një sipërfaqeje prej 7 kilometrash – me guralecë të bardhë të pastër në Rivierën Shqiptare.

Pavarësisht bukurisë së tij, Borshi është një nga plazhet më pak të mbushura me pushues në zonë.

Vendet kryesore që ia vlen të vizitohen larg bregdetit përfshijnë Kështjellën e Borshit dhe Ujëvarat e Borshit aty pranë. //a.i/

https://www.skyscanner.it/notizie/le-piu-belle-spiagge-dellalbania

 

 

The post “Skyscanner”: Cilat janë plazhet më të bukura në Shqipëri? appeared first on Agjencia Telegrafike Shqiptare.