NATO ka filluar koordinimin e dërgesave të rregullta të armëve në Ukrainë, pasi Holanda tha se do të ofrojë pajisje të mbrojtjes ajrore, municione dhe ndihmë tjetër ushtarake me vlerë 500 milionë euro.

Suedia njoftoi gjithashtu të martën se do të kontribuojë me 275 milionë dollarë në një përpjekje të përbashkët së bashku me fqinjët e saj nordikë, Danimarkën dhe Norvegjinë për të siguruar mbrojtje ajrore, armë antitank, municione dhe pjesë këmbimi me vlerë 500 milionë dollarë.

Dy dërgesa pajisjesh, shumica e të cilave të blera në Shtetet e Bashkuara, priten këtë muaj, megjithëse paketa nordike pritet të mbërrijë në shtator. Pajisjet furnizohen bazuar në nevojat prioritare të Ukrainës në fushën e betejës. Aleatët e NATO-s më pas i gjejnë armët dhe municionet dhe i dërgojnë ato.

“Paketat do të përgatiten me shpejtësi dhe do të lëshohen rregullisht”, tha NATO të hënën.

Sistemet e mbrojtjes ajrore kanë nevojë më të madhe. Kombet e Bashkuara kanë thënë se bombardimet e pamëshirshme të Rusisë në zonat urbane pas vijës së frontit kanë vrarë më shumë se 12,000 civilë ukrainas.

Ushtria e Rusisë po bën gjithashtu përparim të ngadaltë, por të kushtueshëm përgjatë vijës së frontit prej 1,000 kilometrash (620 milje). Aktualisht, ajo po zhvillon një operacion për të marrë qytetin lindor të Pokrovskut, një qendër logjistike, rënia e së cilës mund t’i lejojë asaj të depërtojë më thellë në Ukrainë.

Sakaq, të paktën dy persona u vranë në një sulm me bombë ruse në një kamp pushimi në jug të Ukrainës. Dymbëdhjetë persona të tjerë u plagosën në sulmin pranë qytetit të Zaporizhias, njoftoi guvernatori Ivan Fedorov në Telegram. Ai nuk e specifikoi vendndodhjen e saktë. Ndër ndërtesa të tjera, u dëmtuan nëntë vila të vogla pushimi.

Sipas burimeve ukrainase, sulmet me dronë dhe artileri ruse gjatë natës dëmtuan gjithashtu biznese dhe një shtëpi në rajonin fqinj të Dnipropetrovskit. Sulmet synuan gjithashtu qytete në jug të Ukrainës përgjatë Danubit. Sipas raporteve të medias, një zjarr i madh u vu re edhe nga qyteti rumun i Tulceas në deltën e Danubit.

The post NATO miraton dërgimin e armëve, Rusia bombardon kampin turistik ukrainas appeared first on Albeu.com.

Përtej raportimeve mbi Holandën që bëhet kontribuesja e parë në mekanizmin e ri të financimit të NATO-s për armët ukrainase, tani Suedia, Norvegjia dhe Danimarka gjithashtu do të kontribuojnë.

Të tre vendet së bashku do të kontribuojnë rreth 486.1 milionë dollarë në iniciativën e udhëhequr nga NATO për të furnizuar Ukrainën me armë amerikane, njoftoi qeveria norvegjeze, shkruan skynews.

Çfarë duhet të dini?

Në korrik, Donald Trump u zotua të vërë në dispozicion armë të reja për Ukrainën.

Sipas një marrëveshjeje të re, SHBA do t’u shesë armë anëtarëve të NATO-s të cilët më pas do t’ia furnizojnë ato Kievit.

Dje, ministri holandez i mbrojtjes, Ruben Brekelmans, tha se Holanda do të kontribuojë 500 milionë paund për të blerë pajisje ushtarake amerikane për Ukrainën si pjesë e skemës së Listës së Kërkesave Prioritare të Ukrainës (PURL). /Telegrafi/

The post Katër vende evropiane i bashkohen projektit të NATO-s për të dërguar armë amerikane në Ukrainë appeared first on Telegrafi.

Ministria e Mbrojtjes holandeze njoftoi të hënën se vendi do të dhurojë 500 milionë euro në kuadër të këtij mekanizmi të ri, të quajtur “Lista e Prioriteteve të Kërkesave të Ukrainës” (PURL).

Holanda do të jetë vendi i parë që kontribuon financiarisht në mekanizmin e ri të NATO-s për blerjen e armëve nga SHBA-të dhe dërgimin e tyre në Ukrainë, një përpjekje për të ndihmuar Kievin në mbrojtjen nga sulmet e intensifikuara ruse.

Presidenti amerikan Donald Trump kishte deklaruar muajin e kaluar se SHBA do të furnizojë me armë Ukrainën, por me kushtin që ato të paguhen nga vendet evropiane, pa dhënë detaje mbi mënyrën e funksionimit të kësaj skeme.

Sipas Reuters, NATO, SHBA dhe Ukraina janë në proces zhvillimi të këtij mekanizmi financiar të ri për të mbështetur ushtrinë ukrainase.

Sekretari i Përgjithshëm i NATO-s, Mark Rutte, përshëndeti vendimin e Holandës, duke theksuar:

“Është e mrekullueshme të shohësh Holandën të marrë iniciativën dhe të financojë paketën e parë të pajisjeve ushtarake amerikane për Ukrainën, në kuadër të kësaj nisme të NATO-s.”

Rutte shtoi gjithashtu se ka dërguar letra zyrtare për të gjitha shtetet anëtare të NATO-s, duke i ftuar të bashkohen në këtë nismë.

“Pres shumë shpejt njoftime të tjera të rëndësishme nga aleatë të tjerë,” tha ai.

Edhe ambasadori amerikan në NATO, Matthew Whitaker, përshëndeti kontributin holandez, duke e quajtur atë si një hap të parë mes shumë të tjerëve që do të ndjekin. Ai shtoi se në javët në vijim priten zhvillime të rëndësishme në këtë drejtim.

The post Mekanizmi i ri i NATO-s për armët drejt Ukrainës, ja vendi i parë që financon appeared first on Albeu.com.

PRISHTINË, 2 gusht/ATSH/ Presidentja Vjosa Osmani gjatë një takimi sot me zëvendësndihmëssekretarin amerikan të Mbrojtjes David A. Baker ka kërkuar mbështetjen e SHBA-së për anëtarësimin e Kosovës në Aleancën-Veriatlantike.

Osmani ka thënë se kur SHBA qëndron përkrah nesh, Kosova është më e fortë, më e sigurt dhe më e zhvilluar.

“Kosova mbetet e përkushtuar për thellimin e bashkëpunimit me SHBA në fushën e mbrojtjes, përfshirë industrinë e mbrojtjes, si një mundësi me përfitime të ndërsjella për të dyja shtetet. Anëtarësimi i Kosovës në NATO është një objektiv strategjik dhe mbështetja e SHBA-së në këtë proces është jetike”, tha Osmani. /KosovaPress/

The post Osmani kërkon mbështetjen e SHBA-së për anëtarësimin e Kosovës në NATO appeared first on Agjencia Telegrafike Shqiptare.

UASHINGTON, 1 gusht /ATSH/- Shtetet e Bashkuara të Amerikës dhe NATO po punojnë për një qasje të re për të furnizuar Ukrainën me armë – duke përdorur fonde nga vendet e NATO-s – për të paguar blerjen ose transferimin e armëve amerikane, sipas tre burimeve, raportoi “Reuters”.

Bashkëpunimi i ripërtërirë transatlantik për Ukrainën vjen ndërsa presidenti i SHBA-së Donald Trump ka shprehur zhgënjim nga sulmet e vazhdueshme të Moskës ndaj fqinjit të saj.

Trump, i cili fillimisht mbajti një ton më pajtues ndaj Rusisë ndërsa përpiqej t’i jepte fund luftës trevjeçare në Ukrainë, ka kërcënuar se do të vendosë tarifa dhe masa të tjera nëse Moska nuk tregon progres drejt përfundimit të konfliktit deri më 8 gusht.

Presidenti tha muajin e kaluar se SHBA-ja do të furnizonte Ukrainën me armë – të paguara nga aleatët evropianë, por nuk tregoi se si do të kryhej ky proces.

“Vendet e NATO-s, Ukraina dhe SHBA-ja po ndërtojnë një mekanizëm të ri – që do të përqendrohet në dërgimin e armëve amerikane në Ukrainë – nga Lista e Kërkesave Prioritare të Ukrainës, e njohur nën akronimin PURL”, thanë burimet.

Ukraina do t’i japë përparësi armëve që i nevojiten – në këste prej rreth 500 milionë dollarë – dhe aleatët e NATO-s – të koordinuar nga sekretari i përgjithshëm i NATO-s Mark Rutte – do të negociojnë se kush prej tyre do të dhurojë ose paguajë për artikujt në listë.

“Përmes kësaj qasjeje, aleatët e NATO-s shpresojnë të sigurojnë 10 miliardë dollarë për armët që do t’i dërgohen Ukrainës”, tha një zyrtar evropian, duke folur në kushte anonimiteti.

“Kjo është pika e fillimit dhe është një objektiv ambicioz drejt të cilit ne po punojmë. Aktualisht, jemi në këtë trajektore”, tha zyrtari evropian.

Forcat ruse po avancojnë gradualisht në Ukrainë dhe kontrollojnë një të pestën e territorit të vendit. //a.i/

The post UASHINGTON – SHBA-NATO mekanizëm të ri financimi për transferimin e armëve në Ukrainë appeared first on Agjencia Telegrafike Shqiptare.

Shtetet e Bashkuara të Amerikës dhe NATO po punojnë për një qasje të re për të furnizuar Ukrainën me armë, duke përdorur fonde nga vendet e NATO-s për të paguar blerjen ose transferimin e armëve amerikane, shkruajnë mediat ndërkombëtare.

Bashkëpunimi i ripërtërirë transatlantik për Ukrainën vjen ndërsa presidenti i SHBA-së Donald Trump ka shprehur zhgënjim nga sulmet e vazhdueshme të Moskës ndaj fqinjit të saj.

Trump, i cili fillimisht mbajti një ton më pajtues ndaj Rusisë ndërsa përpiqej t’i jepte fund luftës trevjeçare në Ukrainë, ka kërcënuar se do të vendosë tarifa dhe masa të tjera nëse Moska nuk tregon progres drejt përfundimit të konfliktit deri më 8 gusht.

Presidenti tha muajin e kaluar se SHBA-ja do të furnizonte Ukrainën me armë  të paguara nga aleatët evropianë, por nuk tregoi se si do të kryhej ky proces.

“Vendet e NATO-s, Ukraina dhe SHBA-ja po ndërtojnë një mekanizëm të ri që do të përqendrohet në dërgimin e armëve amerikane në Ukrainë nga Lista e Kërkesave Prioritare të Ukrainës, e njohur nën akronimin PURL”, thanë burimet.

Ukraina do t’i japë përparësi armëve që i nevojiten në këste prej rreth 500 milionë dollarë dhe aleatët e NATO-s  të koordinuar nga sekretari i përgjithshëm i NATO-s Mark Rutte do të negociojnë se kush prej tyre do të dhurojë ose paguajë për artikujt në listë.

“Përmes kësaj qasjeje, aleatët e NATO-s shpresojnë të sigurojnë 10 miliardë dollarë për armët që do t’i dërgohen Ukrainës”, tha një zyrtar evropian, duke folur në kushte anonimiteti.

“Kjo është pika e fillimit dhe është një objektiv ambicioz drejt të cilit ne po punojmë. Aktualisht, jemi në këtë trajektore”, tha zyrtari evropian.

BRUKSEL, 29 korrik /ATSH/ – Rusia tani “po prodhon tre herë më shumë municion brenda tre muajsh sesa e gjithë NATO-ja gjatë një viti”, deklaroi së fundi sekretari i Përgjithshëm i NATO-s, Mark Rutte, për New York Times.

”Conflict Intelligence Team” (CIT), analizoi prodhimin e armëve ruse dhe perëndimore për të vlerësuar nëse Rusia vërtet ka një epërsi kaq të madhe të prodhimit ndaj Shteteve të Bashkuara dhe aleatëve të tij – dhe në cilat kategori armësh – artileri, municion, tanke, aeroplanë, raketa, dronë dhe mbrojtje ajrore – secila palë ka epërsi.

Fakt apo ekzagjerim? Prodhimi i municioneve për artileri të NATO-s dhe Rusisë

Nuk është hera e parë që Rutte pretendon se Rusia po e tejkalon NATO-n sa i përket prodhimit të artilerisë. Në prill, gjatë një interviste për CBS, ai tha se Rusia “po prodhon katër herë më shumë municion sesa e gjithë NATO-ja prodhon për një vit”.

Zyrtarët ukrainas dhe perëndimorë vlerësojnë se Rusia kishte prodhuar rreth 2-2.3 milionë municione për artileri më 2024, një rritje krahasuar me rreth 1.25 milionë të prodhuara më 2022, teksa Moska po investon shumë në zgjerimin e kapaciteteve të saj prodhuese.

Ndërkaq, SHBA-ja planifikon të rrisë prodhimin e predhave 155-milimetërshe në 1.2 milion në vit deri në fund të vitit 2025, teksa Evropa prodhon pothuajse të njëjtin numër – vetëm në fabrikën Rheinmetall në Gjermani planifikohen të prodhohen deri në 700.000 në vit – sipas vlerësimeve konservatore.

Prodhimi aktual në SHBA i predhave është 40.000 në muaj, apo pak më pak se gjysmë milioni në vit, që do të thotë se në total, SHBA-ja dhe BE-ja kanë prodhuar rreth 1.7 milion predha këtë vit.

Për të prodhuar tri herë më shumë brenda tre muajve, ashtu siç tha Rutte, fabrikat e Rusisë do të duhej të prodhonin një sasi masive prej 20.5 milionë predhash këtë vit.

Sipas analizës së CIT-it, zgjerimet e fabrikave në Bijsk, Kazan dhe vende të tjera mund t’i lejojnë Rusisë të prodhojë rreth 4 milionë predha 152-milimetrëshe dhe 122-milimetrëshe në vit.

Predhat kanë nevojë për armë

Rusia vazhdon të mbështetet shumë në rezervat e saj të sistemeve të artilerisë të epokës sovjetike për predhat që prodhon, ndërsa numri i obusëve që ka prodhuar ka rënë nga rreth 12.000 më 2022 në mbi 6.000 në mesin e vitit 2024. Sipas analistëve të CIT-it, Rusia prodhon më pak se 100 obusë vetëlëvizës në vit të llojeve Msta-S, Giatsint-K dhe Malva.

NATO ka epërsi të qartë në këtë aspekt: Franca planifikon të prodhojë 144 sisteme të artilerisë CAESAR në vitin 2025, ndërsa Polonia do të dyfishojë prodhimin e AHS Krab në 100 njësi në vit. Sllovakia pritet të prodhojë 40 obusë Zuzana, ndërsa SHBA-ja prodhon çdo vit 216 tuba topash për armët M777.

Prodhimi vjetor i sistemeve të artilerisë

Armët e rënda

Një aspekt ku Rusia me gjasë ka epërsi janë tanket.

Sikurse artileria, shumica e prodhimit të saj të tankeve vjen nga riparimi dhe modernizimi i tankeve sovjetike që ka në stoqe. Kjo përbën shumicën e rreth 1.500 tankeve që, sipas Christopher Cavoli, ish-komandant i lartë i NATO-s për Evropën, pritet që Rusia t’ia japë ushtrisë së saj më 2025.

Megjithatë, Rusia ka rritur ndjeshëm prodhimin “nga e para” të tankut të saj modern T-90M, duke prodhuar rreth 280 në vit.

Shumica e shteteve në Evropë, ndërkaq, prodhojnë shumë pak tanke. Franca nuk ka prodhuar asnjë tank Leclerc që më shumë se një dekadë, ndërsa Britania ka porositur 148 tanke të reja Challenger 3, që pritet t’i dorëzohen deri në vitin 2030. Gjermania bën përjashtim, pasi prodhon 50 tanke Leopard 2A8 në vit.

SHBA-ja 109 tanke M1A2 Abrams në vit – ushtria thotë se kjo shifër mund të rritet deri në 420 nëse është e nevojshme – dhe po ashtu modernizon deri në 200 modele më të vjetra.

Prodhimi vjetor i tankeve

Epërsia ajrore

Përderisa Rusia prodhon më shumë tanke, SHBA-ja dhe BE-ja ia kalojnë të paktën për katër herë Moskës sa i përket prodhimit të aeroplanëve luftarakë. Rusia vlerësohet se mund të prodhojë 50-60 aeroplanë luftarakë në vit, përfshirë aeroplanë që mund të përdoren për qëllime të ndryshme sikurse Su-57 dhe bombardues strategjikë sikurse Tu-160M2. Pavarësisht sanksioneve, shteti po prodhon më shumë aeroplanë se para se të niste pushtimin e Ukrainës – në vitin 2018, ushtria ruse kishte pranuar vetëm 36 aeroplanë të rinj luftarakë.

Megjithatë, prodhimi i NATO-s është shumë më i lartë. Kompania amerikane Lockheed Martin do të dorëzojë mbi 170 aeroplanë luftarakë F-35 këtë vit, përveç dhjetëra aeroplanëve Rafale (Franca), Eurofighter Typhoon (konsorciumi evropian) dhe Gripen (Suedia) që prodhohen nga vendet e BE-së dhe aleatët e tjerë të NATO-s.

Lufta e dronëve

Sipas Ukrainës, Rusia prodhon çdo muaj afër 5.000 dronë me rreze të gjatë veprimi të llojeve të ndryshme, apo 60.000 në vit. Këtu përfshihen dronët sulmues Geran-2 (versioni rus i dronëve Shahed të Iranit) dhe Gerbera, një dron që nuk ka municion dhe përdoret si dron mashtrues me qëllim që të mbingarkojë sistemet ukrainase të mbrojtjes ajrore.

NATO-ja aktualisht nuk prodhon asnjë dron të krahasueshëm me këta dronë të lirë kamikazë, ndërkaq SHBA-ja ka zgjedhur që të përdorë fluturake pa pilot shumë më të kushtueshëm, sikurse Reaper dhe Global Hawk.

Rusia po ashtu prodhon mbi 200 raketa lundruese dhe balistike në muaj, sipas agjencisë së inteligjencës ushtarake të Ukrainës, duke bërë që prodhimi vjetor të arrijë nga 2.400 deri në 3.000 raketa. SHBA-ja, ndërkaq, vlerësohet se prodhon 700 raketa lundruese të llojit JASSM dhe 500 raketa balistike ATACMS në vit, shkruan REL.  /os/

The post KOMENT – NYT: A po prodhon Rusia më shumë armë se NATO? appeared first on Agjencia Telegrafike Shqiptare.

Në një moment që ngjante me një vëllazëri të konsoliduar, presidenti turk Recep Tayyip Erdoğan dhe ai amerikan Donald Trump u takuan muajin e kaluar në samitin e NATO-s në Hagë, ku nuk munguan buzëqeshjet, shtrëngimet e duarve dhe përqafimet para kamerave. Marrëdhënia e tyre e përshkruar si “e jashtëzakonshme” ka sjellë fitime të ndërsjella: […]

The post Trump-Erdogan/ Miqësia që po testohet nga Izraeli dhe marrëveshja e F-35 appeared first on BoldNews.al.

Rusia tani “po prodhon tre herë më shumë municion brenda tre muajsh sesa e gjithë NATO-ja gjatë një viti”, deklaroi së fundi sekretari i Përgjithshëm i NATO-s, Mark Rutte, për New York Times. Radio Evropa e Lirë (REL) dhe Conflict Intelligence Team (CIT), analizuan prodhimin e armëve ruse dhe perëndimore për të vlerësuar nëse Rusia […]

The post REL: A po prodhon Rusia më shumë armë se NATO-ja? appeared first on BoldNews.al.

Rritja e shpenzimeve për mbrojtje nuk mjafton. Aleanca ka nevojë për një strategji me pesë pika për ta ndalur Rusinë.

Nga: Rebekah Koffler, ish-analiste e inteligjencës ushtarake strategjike pranë Agjencisë së Inteligjencës së Mbrojtjes të ShBA-së dhe autore e librit Manuali i Putinit [Putin’s Playbook, Regnery 2021] / The Daily Telegraph (titulli: Putin is preparing for another invasion while Nato is fatally distracted)
Përkthimi: Telegrafi.com

Në samitin më të fundit të NATO-s në Hagë, aleanca njoftoi se vendet anëtare kanë vendosur një objektiv të ri për të shpenzuar pesë për qind të PBB-së për mbrojtje dhe siguri deri në vitin 2035. Pjesërisht, kjo ka të ngjarë të jetë nxitur nga ndërgjegjësimi se diplomacia lëvizëse e të dërguarit të Trumpit, Steve Witkoff, dhe denoncimet e Evropës ndaj Vladimir Putinit, nuk do të jenë të mjaftueshme për t’i dhënë fund luftës në Ukrainë. Megjithatë, kryesorja është se vendet anëtare po vetëdijesohen për nevojën për të frenuar Rusinë nga një sulm ndaj një vendi të NATO-s – gjë që, sipas sekretarit të përgjithshëm të aleancës, Mark Rutte, Rusia mund të jetë e gatshme ta bëjë brenda pesë vjetëve.

Si analiste e inteligjencës ushtarake, e specializuar në mënyrën e të menduarit të Putinit dhe në strategjinë ushtarake ruse, pajtohem me vlerësimin e Ruttes për gatishmërinë e Rusisë për një fushatë tjetër ofensive ushtarake brenda pak vitesh. Jam më pak e bindur se një vend i NATO-s do të jetë objektivi i radhës i Kremlinit, përveçse nëse aleanca ndërhyn drejtpërdrejt në Ukrainë duke vendosur trupat në fushëbetejë. Megjithatë, ajo që NATO bën ose nuk bën në vitet e ardhshme, mund të jetë vendimtare për të përcaktuar nëse Putini do të përcaktohet të sulmojë një tjetër shtet post-sovjetik – si Moldavinë.

Problemi qëndron në faktin se nuk kryejnë punë vetëm rritja e shpenzimeve për mbrojtje dhe fushat e lidhura me sigurinë. Paratë dhe teknologjia – shtyllat e stilit perëndimor të luftës – nuk i parandalojnë dhe nuk i fitojnë vetë luftërat. Strategjia është ajo që e bën këtë. Dhe, një strategji e suksesshme duhet të bazohet në një njohje të thellë të mënyrës së luftës së kundërshtarit, duke adresuar elementët kryesore të planifikimit të tij ushtarak.

Në shtator të vitit 2013, pak muaj para pushtimit të Krimesë nga Putini, i informova shkurtimisht anëtarët e NATO-s për strategjinë luftarake të Rusisë. Për fat të keq, nuk u zhvillua asnjë kundër-strategji nga Pentagoni dhe homologët e tij në NATO. Prandaj, ndodhën pushtimet e Putinit.

E zhvilluar nga Shtabi i Përgjithshëm i Ushtrisë Ruse dhe shpesh e quajtur “luftë asimetrike”, strategjia e Rusisë huazon shumëçka nga veprat klasike të strategut britanik Sir Basil Liddell Hart. Ai mbështeste metodat e tërthorta për të luftuar kundërshtarin – në vend të aplikimit të drejtpërdrejtë të forcës. Pika kyçe e kësaj qasjeje është shmangia e zonave të forta të armikut dhe përqendrimi në shfrytëzimin e dobësive dhe pikave të cenueshme të tij.

Natyrisht, lufta në Ukrainë është shndërruar pikërisht në atë lloj konflikti që Rusia po përpiqet të shmangë. Por, kjo nuk do të thotë se Kremlini e ka ndryshuar rrënjësisht qasjen ndaj konfliktit – veçanërisht kur përballet me kundërshtarë të rinj.

Meqenëse ushtritë e NATO-s janë superiore në aspektin teknologjik, ndaj forcave ruse, Moska e di se duhet të mbështetet në ndërmarrjen e nismës strategjike gjatë periudhës fillestare të çdo lufte të ardhshme. Ajo nuk do të kërkojë përsëritje të asaj që ka ndodhur në Ukrainë.

Për rrjedhojë, planifikuesit rusë parashikojnë të minojnë qasjen e NATO-s të bazuar në rrjete për zhvillimin e luftës duke ndërprerë “zinxhirin e vrasjes” të forcave të saj – procesin që mundëson vendimmarrjen ushtarake për të zbuluar, shënjestruar dhe shkatërruar kundërshtarët. Kjo mund të arrihet duke goditur, ndoshta paraprakisht, sistemet C4ISR (komanda, kontrolli, komunikimi, kompjuterët, inteligjenca, vëzhgimi dhe zbulimi) dhe sistemet hapësinore nga të cilat varen forcat e NATO-s.

Prandaj, vendet anëtare të NATO-s duhet të bëjnë më shumë sesa të shpenzojnë para. Ato duhet të kuptojnë se cilat janë, sipas rusëve, dobësitë e aleancës dhe të ndërmarrin veprime për t’ia hequr Kremlinit shtysën për t’i shfrytëzuar ato.

Ekzistojnë pesë fusha kryesore që kërkojnë veprim:

1. Sigurimi i infrastrukturës hapësinore
Rusia ka një arsenal të fuqishëm armësh kundër hapësirës, të dizajnuara për të degraduar ose shkatërruar satelitët amerikanë dhe të aleatëve. Ky arsenal përfshin sistemet që bllokojnë sinjalin GPS, laserët, interceptorët orbitalë dhe raketat kundër-satelitore. Zyra e Drejtorit të Inteligjencës Kombëtare të ShBA-së paralajmëroi – në Vlerësimin Vjetor të Kërcënimeve për vitin 2025 – se Rusia po trajnon forcat e saj hapësinore, po vendos armë të reja kundër-satelitore dhe tashmë po përdor luftën elektronike për të ndikuar ndaj burimeve perëndimore. Moska po zhvillon gjithashtu një satelit të ri që pritet të mbajë një armë bërthamore si një kapacitet kundër-satelitor.

2. Fortifikimi i infrastrukturës kritike ndaj sulmeve kibernetike
Rusia ka një nga arsenalet më shkatërrimtarëve të armëve kibernetike në botë, një doktrinë të sofistikuar dhe me ekspertizë të avancuar. Vlerësimi i Kërcënimeve për vitin 2025 paralajmëroi për suksesin e përsëritur të Rusisë në komprometimin e objektivave të ndjeshme, për qëllime të mbledhjes së inteligjencës. Ka shumë të ngjarë që Moska të ketë tashmë qasje në infrastrukturën kritike në ShBA dhe në Evropë. Ajo ka përvojë të veçantë dhe të dëshmuar në integrimin e sulmeve kibernetike me operacione ushtarake në kohë lufte.

3. Vendosja e protokolleve më të forta për mbrojtjen e kabllove të komunikimit nën det
Drejtoria Kryesore e Shtabit të Përgjithshëm të Rusisë ka një program shumë sekret kërkimesh në thellësi detare, i njohur si GUGI. Ka shumë të ngjarë që Moska ta ketë vënë këtë ekspertizë në praktikë, me disa operacione të dyshuara sabotimi të kabllove nënujore në Detin Baltik – që nga fillimi i luftës në Ukrainë. Një rrezik i ngjashëm vlen edhe për tubacionet e energjisë. Në tetor të vitit 2022, Ministria e Mbrojtjes e Mbretërisë së Bashkuar pranoi se një fregatë e Marinës Mbretërore ishte vendosur në Detin e Veriut për të ndihmuar forcat norvegjeze në mbrojtjen e tubacioneve të gazit – pas shpërthimit të Nord Stream-it në Baltik.

4. Mbrojtja ndaj spiunazhit rus
Nuk ka shumë nevojë të thuhet se Rusia fut rregullisht spiunët e vet në mbarë Evropën dhe se rekruton vendasit për të vjedhur sekretet ushtarake, politike dhe ekonomike. Por, Moska gjithashtu ka arritur të fusë operativë të inteligjencës për të kryer operacione destabilizuese, duke shënjestruar infrastrukturën kritike. Disa vlerësime sugjerojnë se këto operacione sabotimi janë katërfishuar në periudhën 2023-2024. Janë kryer shumë arrestime, përfshirë në Gjermani, në Poloni dhe në Mbretërinë e Bashkuar. Por, aleanca duhet të ketë një qasje më proaktive – duke neutralizuar dhe ndërprerë operacionet e spiunazhit rus përpara se ato të shkaktojnë dëm.

5. Të sigurohet epërsia në potencialin total luftarak
Duke kaluar në një gjendje përgatitjeje lufte – disa vite para pushtimit të Ukrainës – Rusia tani prodhon më shumë municion në tre muaj sesa Evropa në një vit të tërë. Rritja e prodhimit të sistemeve të mbrojtjes ajrore, tankeve, dronëve dhe municioneve është jetike për NATO-n, në mënyrë që të arrijë Rusinë dhe të rimbushë arsenalet e saj të shteruara.

Megjithatë, armët nuk qëllojnë vetë. Aleanca duhet të rekrutojë, trajnojë dhe të pajisë një forcë luftarake të mjaftueshme për të ndryshuar përllogaritjen e Putinit për vendimmarrje. Moska ka mobilizuar në mënyrë të hapur dhe të fshehtë gjatë të gjithë luftës në Ukrainë. Dhe, të martën, në Dumën shtetërore u paraqit një projektligj që parashikon shërbimin ushtarak me rekrutim të përhershëm gjatë gjithë vitit. Nëse miratohet dhe nënshkruhet nga Putini, ligji do të hyjë në fuqi më 1 janar 2026.

Në Evropë, vetëm disa vende kanë shërbim të detyrueshëm ushtarak, dhe deri tani shumica e të tjerëve nuk e kanë në plan ta rikthejnë këtë. Por, në një luftë konsumimi, si ajo që Rusia po zhvillon në Ukrainë, pala që ka më shumë burime njerëzore është në pozicion më të favorshëm për të fituar.

Lajmi i mirë është se aleanca ka ende kohë për t’u organizuar dhe për të parandaluar një pushtim tjetër. Do të ishte tragjike nëse NATO dështon të ndërmarrë veprime tani – veçanërisht duke pasur parasysh çmimin kolosal që Ukraina po paguan për t’u mbrojtur kundër rusëve. NATO ia ka një borxh të madh të gjithë ukrainasve të vrarë dhe familjeve të tyre – të zhvillojë një kundër-strategji të qëndrueshme ndaj manualit të Putinit. /Telegrafi/

The post Putini po përgatitet për një tjetër pushtim appeared first on Telegrafi.

Kompania turke Aselsan prezantoi teknologji të reja në panairin ndërkombëtar të mbrojtjes IDEF 2025 në Stamboll, të zhvilluara për sistemin shumë-shtresor të mbrojtjes ajrore “Steel Dome”.

Drejtori i përgjithshëm Ahmet Akyol njoftoi prezantimin e sistemit “Ejderha”, që neutralizon dronët me valë elektromagnetike në distancë deri një kilometër. Ai theksoi gjithashtu versionin e përmirësuar të sistemit elektronik “Koral”, i cili bllokon radarët armiqësorë me efikasitet dyfish më të lartë.

Sistemi “Turan”, i bazuar në inteligjencë artificiale, do të lidhë dhe menaxhojë të gjitha komponentët e “Steel Dome” përmes një rrjeti të vetëm. Ndërkohë, “Gurz”, një automjet autonom tokësor, do të ofrojë mbrojtje kundër raketave dhe sulmeve ajrore.

Akyol prezantoi edhe sistemin “Goktan”, që kombinon raketa dhe municion të drejtueshëm nga toka, i qëndrueshëm ndaj ndërhyrjeve GNSS dhe i aftë për goditje të sakta nga çdo drejtim. Ai tha se Aselsan po kontribuon edhe në arkitekturën e mbrojtjes ajrore të NATO-s.

IDEF 2025, në edicionin e 17-të, do të zgjasë gjashtë ditë dhe organizohet nga KFA Fairs me mbështetjen e Sekretariatit të Industrisë së Mbrojtjes së Turqisë dhe Fondacionit të Forcave të Armatosura Turke. Partner global i komunikimit është agjencia Anadolu./abcnews.al

TIRANË, 24 korrik /ATSH/ Autoriteti i Aviacionit Civil i Shqipërisë është njohur nga NATO për vlefshmërinë ajrore.

Lajmin e bëri të ditur Kryeministri Edi Rama, i cili u shpreh se Autoriteti i Aviacionit Civil përmbush plotësisht standardet e përcaktuara nga Aleanca e Atlantikut.

Rama e cilësoi një lajm të mirë për vendin dhe një dëshmi të përparimit të Shqipërisë në përmbushjen e kritereve ndërkombëtare në sektorin e aviacionit.

“Autoriteti i Aviacionit Civil i Shqipërisë është njohur nga NATO për Vlefshmërinë Ajrore, duke përmbushur plotësisht standardet e përcaktuara nga Aleanca e Atlantikut”, shkroi Rama në rrjetet sociale.

“NATO arrin në përfundimin se Autoriteti i Aviacionit Civil i Shqipërisë është plotësisht në përputhje me kërkesat për t’u bërë një autoritet i vlefshmërisë ajrore i njohur nga NATO, siç përcaktohet nga NAWP dhe sipas procesit të njohjes së NATO-s (NRP)”, thuhet në videon e ndarë nga kryeministri Rama.

/gj.m/j.p/

The post Rama: Autoriteti i Aviacionit Civil njihet nga NATO, përmbush plotësisht standardet appeared first on Agjencia Telegrafike Shqiptare.

Më 12 qershor të këtij viti, Ministria e Brendshme e Serbisë miratoi tranzitin e 132 paletave mallrash nga Bosnja dhe Hercegovina, duke u dhënë atyre leje për të hyrë përmes një pike të vogël kufitare në fshatin Sremska Raca, pranë lumit Sava. Sipas dokumenteve zyrtare të siguruara nga BIRN, paletat do të përmbanin predha artilerie […]

The post Destinacioni Ukraina? Duke rrezikuar zemërimin e Rusisë, Serbia miraton tranzitin e municioneve boshnjake appeared first on Reporter.al.

Agjencia e Sigurisë dhe Inteligjencës e Kroacisë (SOA) vlerëson se marrëdhëniet ndërmjet Kosovës dhe Serbisë mbeten të paqëndrueshme dhe se, në këto rrethana, përshkallëzimi i tensioneve në Kosovë paraqet një rrezik të vazhdueshëm.

Në raportin e saj vjetor, SOA hedh dritë jo vetëm mbi situatën e sigurisë në Kroaci, por edhe mbi zhvillimet në Ballkanin Perëndimor – një rajon që, sipas saj, vazhdon të përballet me sfida të thella politike dhe të sigurisë, të lidhura ngushtë me çështjet e pazgjidhura ndërshtetërore.

Edhe pse BE-ja dhe SHBA-ja mbeten të përfshira në përpjekjet për stabilizim, raporti nënvizon se zgjidhja e këtyre çështjeve vazhdon të jetë e vështirë.

Kjo klimë pasigurie, sipas SOA-s, ndikon drejtpërdrejt edhe në procesin e integrimit evropian të rajonit, i cili po ec me ritme të ngadalta.

Kroacia sheh kërcënime të vazhdueshme në veri

Në vlerësimin e saj për Kosovën, SOA thekson ekzistencën e grupeve që synojnë destabilizimin e situatës në veri të vendit, ku shumica e popullsisë është serbe.

Si shembull për këtë, raporti përmend sulmin e armatosur të formacioneve serbe ndaj Policisë së Kosovës në fshatin Banjskë, më 24 shtator të vitit 2023, në të cilin mbeti i vrarë një polic.

Prishtina e ka akuzuar Beogradin për këtë sulm, ndërsa zyrtarët serbë kanë mohuar çdo përgjegjësi.

Raporti vëren se ende nuk është e qartë se si është organizuar ky formacion paraushtarak dhe si është armatosur me armë të rënda me origjinë ushtarake.

Për Millan Radoiçiqin, i cili ka marrë përgjegjësinë për organizimin e sulmit dhe ka qenë pjesëmarrës në të, raportohet se është larguar në Serbi, ku është marrë në pyetje, por ende pritet ngritja e procedurave penale kundër tij.

Raporti i SOA-s përmend edhe përpjekjet e autoriteteve të Kosovës për të shuar institucionet paralele serbe në veri, me qëllim forcimin e sovranitetit të shtetit dhe kufizimin e ndikimit të Beogradit në këtë zonë.

“Në rrethana të tilla, përshkallëzimi i tensioneve në Kosovë mbetet një rrezik i vazhdueshëm. Ndaj, rolin e garantuesit të sigurisë vazhdon ta luajë prania ushtarake e forcave ndërkombëtare”, përfundon SOA.

Balancimi strategjik i Serbisë

Për fqinjin verior të Kosovës, Serbinë, SOA thekson vazhdimësinë e politikës së balancimit midis Perëndimit, Rusisë dhe Kinës.

Kjo strategji përfshin edhe promovimin e konceptit të “botës serbe”, i cili synon bashkimin e serbëve në vendet fqinje – sidomos në Bosnje e Hercegovinë, Mal të Zi dhe Kosovë – nën ombrellën e unifikuar politike të Beogradit zyrtar.

Në nivelin e brendshëm, SOA vëren se Serbia ka përjetuar disa valë protestash antiqeveritare, të organizuara kryesisht nga studentët, të cilët kërkojnë demokratizim të shoqërisë, depolitizim të institucioneve shtetërore, forcim të lirisë së medias dhe luftë kundër korrupsionit.

Raporti thekson se – në një situatë të tillë të ndërlikuar, me polarizim shoqëror në rritje – mediat pranë strukturave qeverisëse përforcojnë një narrativ që identifikon armiq të jashtëm dhe të brendshëm.

Sipas raportit, kjo krijon një atmosferë të kërcënimit kombëtar dhe përdoret për të diskredituar protestat studentore.

Në këtë kontekst, Republika e Kroacisë përmendet si një “faktor i përhershëm antiserb”, thekson SOA.

Sfida të tjera

Agjencia kroate vëren se në Bosnje dhe Hercegovinë vazhdon paqëndrueshmëria politike, e shkaktuar nga mosmarrëveshjet midis entiteteve dhe komuniteteve për rregullimin kushtetues dhe politikën e jashtme.

Konflikti kryesor qëndron midis udhëheqjes së Republikës Sërpska dhe Përfaqësuesit të Lartë mbi juridiksionin.

SOA vlerëson se udhëheqja e Republikës Sërpska mbështet hapur shpërbërjen e Bosnje dhe Hercegovinës dhe kërkon mbështetje politike nga Rusia – gjë që do të vazhdojë të krijojë sfida serioze politike dhe të sigurisë.

Në Mal të Zi, sipas raportit, vazhdon po ashtu ndarja socio-politike mes opsionit proevropian dhe atij serb, i cili është njëkohësisht prorus dhe antiperëndimor.

Partitë radikale serbe janë pjesë e koalicionit aktual qeverisës, dhe megjithëse Qeveria malazeze synon të demonstrojë angazhim evropian, ndikimi i politikave nacionaliste dhe antiperëndimore të opsionit serb mund të pengojë integrimin evropian dhe t’i ndikojë negativisht marrëdhëniet me BE-në, vlerëson raporti i SOA-s.

Ai përmend edhe Kishën Ortodokse Serbe, që përveç rolit fetar, thotë se ka edhe ndikim të fuqishëm politik – kombëtar dhe rajonal.

Udhëheqësit e Kishës promovojnë konceptin e “botës serbe”, duke përfshirë veçanërisht Bosnje dhe Hercegovinën, Malin e Zi dhe Kosovën si pjesë të kësaj hapësire, vë në dukje raporti.

I njëjti paralajmëron, gjithashtu, se organizatat kriminale të Ballkanit Perëndimor, sidomos ato serbo-malazeze, janë shumë aktive në trafikimin e kokainës nga Amerika e Jugut drejt Evropës.

Roli destabilizues i Rusisë

Në një pjesë të raportit, SOA thekson edhe ndikimin e vazhdueshëm dhe destabilizues të Rusisë në Ballkanin Perëndimor.

Moska, sipas raportit, përdor një gamë mjetesh – sidomos lidhjet tradicionale me Serbinë – për të ruajtur dhe zgjeruar ndikimin e saj në rajon.

Agjencia vëren, gjithashtu, praninë aktive të shërbimeve ruse të inteligjencës në Serbi, të cilat, sipas SOA-s, përfshijnë edhe strehimin e agjentëve të larguar nga vendet perëndimore.

Raporti thekson se nga territori serb operojnë edhe mjete hibride ruse dhe përmend në mënyrë të veçantë RT-në dhe Sputnik-un.

Këto media “shërbejnë për të përhapur narrativë prorusë dhe antiperëndimorë në Ballkanin Perëndimor”, thekson raporti.

“Demokraci e sigurt”

Për vetë Kroacinë, SOA vlerëson se është një “demokraci e sigurt dhe e qëndrueshme në një mjedis sfidues të sigurisë”.

Ajo thekson se ndryshimet e shpejta globale, zhvillimet teknologjike dhe pasojat e luftës në Ukrainë kanë ndikuar në përkeqësimin e sigurisë në Evropë.

Por Kroacia, aktualisht, nuk përballet me kërcënime serioze të drejtpërdrejta ndaj sigurisë kombëtare apo rendit demokratik kushtetues, konstaton SOA.

The post Shërbimet kroate: Përshkallëzimi i tensioneve në Kosovë, rrezik i vazhdueshëm appeared first on Telegrafi.

TIRANË, 22 korrik/ATSH/ Ministri i Mbrojtjes, Pirro Vengu zhvilloi sot një takim me Komandën e Forcës Tokësore.

Ministri Vengu tha se ka nisur puna për Rivlerësimin Strategjik të Mbrojtjes (RSM), me fokus modernizimin e forcave dhe arritjen e objektivave të kapaciteteve të vendosura në Samitin e NATO-s në Hagë.

Sipas Vengut, “dy janë përparësitë kryesore të vendosura dhe ato janë planifikimi transparent bazuar në prioritetet reale, duke marrë parasysh modernizimin e mjeteve, pajisjeve dhe sistemeve përmes industrisë “Made in Albania” nga municionet dhe armatimi i lehtë deri tek mjetet e blinduara, mjetet e emergjencave civile, artileria e rendë, dronët luftarakë, dhe sistemet kundër-ajrore”.

“Zhvillimin dhe specializimin e burimeve njerëzore mbështetur në infrastrukturë të re akademike, rritje të trajtimit financiar dhe promovimit të karrierës ushtarake për të rinjtë shqiptarë. Vëmendje të posaçme do të marrë fuqizimi i Regjimentit të Operacioneve Speciale dhe i Komandës Kibernetike si dy shtylla të ekselencës tonë ushtarake”, tha Vengu, krahas modernizimit të Mbrojtjes civile dhe kontrollit të territorit duke investuar në flotën ajrore, atë tokësore, dhe sistemet e monitorimit dhe komandimit kontrollit në kohë reale.

Përparësia e dytë, sipas ministrit të Mbrojtjes, është përmbushja e angazhimeve në NATO, duke përditësuar Planin Zhvillimor të FARSH, me një kalendar të qartë investimesh që shoqërojnë rritjen e buxhetit të Mbrojtjes në mënyrë graduale deri në 3.5% të PBB-së.

Gjithashtu, Vengu u shpreh se “vijon puna me të gjitha komandat dhe kompanitë e prodhimit ushtarak për të ndërtuar një Forcë të Armatosur të aftë dhe të përgatitur për sfidat e së nesërmes”.

Ministri i Mbrojtjes, Pirro Vengu takim me Komandën e Forcës Tokësore

1 nga 14

/e.i/j.p/

The post Vengu: Rivlerësim strategjik i Mbrojtjes sipas objektivave të samitit të NATO-s appeared first on Agjencia Telegrafike Shqiptare.

Presidenti ukrainas Volodymyr Zelensky deklaroi se integrimi i Ukrainës me vendet e NATO-s vazhdon në nivel pune.

Në këtë drejtim, ai u kërkoi diplomatëve ukrainas të ndërmarrin “çdo hap të mundshëm në nivel politik” për të mbështetur procesin.

Zelensky e tha këtë gjatë fjalimit të tij para pjesëmarrësve të takimit vjetor të krerëve të misioneve diplomatike të huaja të Ukrainës, shkruajnë mediat e huaja, përcjell Telegrafi.

“NATO mbetet arkitektura e sigurisë më e fortë dhe potencialisht më efektive në Evropë dhe ndoshta në botë. Pa dyshim për të gjithë, dhe ne jemi plotësisht të vetëdijshëm për këtë. Në nivel pune, integrimi ynë me NATO-n vazhdon, dhe ne gjithashtu duhet të ndërmarrim çdo hap të mundshëm në nivel politik”, ka thënë Zelensky.

“Ju kërkoj të vazhdoni të përcillni këtë qëndrim në angazhimin tuaj me partnerët – është NATO që është garancia e paqes në Evropë, më efektive nga ana e kostos – është një fakt – garancia më efektive nga ana e kostos dhe më efikase”, ka shtuar Zelensky.

Ai shtoi se Rusia flet shumë për përparimin e NATO-s, por është pikërisht aty ku NATO ka përparuar që dekada të tëra paqeje kanë zënë vend, ndërsa në vendet ku NATO është e ngadaltë në veprim, paqja shpesh është e pakët.

Mediat ukrainase kujtojnë se në prill, presidenti i SHBA-së, Donald Trump i tha revistës Time se nuk besonte se Ukraina do t’i bashkohej ndonjëherë Aleancës së Atlantikut të Veriut. /Telegrafi/

The post Zelensky tregon se “në cilën fazë” është integrimi i Ukrainës në NATO appeared first on Telegrafi.

Anëtarët e Grupit të Kontaktit për Mbrojtjen e Ukrainës (UDCG), të kryesuar nga Mbretëria e Bashkuar dhe Gjermania, do të takohen për të diskutuar planet e presidentit të SHBA-së Donald Trump që aleatët e NATO-s t’i sigurojnë Ukrainës armë.

UDCG – i njohur edhe si formati Ramstein – vjen pasi Trump tha se dërgesat e armëve, duke përfshirë sistemet e mbrojtjes ajrore Patriot, mund të mbërrijnë në Ukrainë brenda ditësh.

Trump javën e kaluar tha se ai nënshkroi një marrëveshje me aleatët e NATO-s që do të çonte në dërgesa armësh në shkallë të gjerë në Ukrainë, duke përfshirë sistemet Patriot – të konsideruara si një nga më të mirat në botë për zbulimin dhe kapjen e një game të gjerë objektivash ajrore që vijnë.

“Ne do të dërgojmë Patriot në NATO dhe më pas NATO do t’i shpërndajë ato”, tha Trump.

“Aleanca do të paguajë për sistemet”, shtoi ai.

Presidenti amerikan, duke folur së bashku me shefin e NATO-s Mark Rutte, tha se armët do të paguhen nga aleatët evropianë dhe se dërgesat fillestare do të mbërrijnë “brenda disa ditësh”.

Kuptohet që kombet evropiane do t’i transferojnë armët – të mbledhura nga rezervat ekzistuese ose nga ato të reja të blera nga SHBA – në Ukrainë.

Zëvendësimet do të blihen nga SHBA, shkruan euronews.

Nuk është ende e qartë nëse janë bërë transferime armësh në Ukrainë, me Komandantin Suprem të Forcave Aleate të NATO-s për Evropën, Gjeneralin Alexus Grynkewich, i cili tha se përgatitjet për dorëzimin e armëve ishin “në proces”.

Ambasadori i SHBA-së në NATO, Matthew Whitaker, tha se nuk mund të jepte një afat kohor.

Ndërsa kancelari gjerman Friedrich Merz tha se ishte i bindur se Gjermania së shpejti do të arrinte një marrëveshje me SHBA-në për dorëzimin e Patriotëve.

“Negociatat midis ministrave të mbrojtjes ishin konkrete dhe dorëzimi i tyre ishte çështje ditësh, ndoshta javësh”, tha Merz.

Raportohet se Forcat e armatosura të Gjermanisë, Bundeswehr, do të dorëzojnë dy nga nëntë sistemet e saj të mbetura Patriot dhe do të marrin zëvendësime nga SHBA.

Ky veprim vjen pavarësisht planeve fillestare për të blerë dy sisteme Patriot nga SHBA dhe për t’i dërguar ato direkt në Ukrainë.

Sisteme të tjera mund të dorëzohen nëpërmjet Zvicrës, ministria e mbrojtjes e së cilës njoftoi gjithashtu se ishte informuar nga Departamenti i Mbrojtjes i SHBA-së për të “ripërcaktuar përparësitë e dorëzimit” të pesë sistemeve të porositura më parë për të mbështetur Ukrainën.

Një zyrtar i lartë i NATO-s deklaroi se aleanca po koordinon dorëzimin e mbështetjes shtesë ushtarake, duke përfshirë municione dhe predha artilerie, ndërsa Ukraina pret mbërritjen e sistemeve Patriot.

Ndryshe, presidenti ukrainas Volodymyr Zelensky njoftoi se zyrtarët e tij kanë propozuar një raund të ri bisedimesh për paqe që do të zhvillohen këtë javë. /Telegrafi/

The post Takim i nivelit të lartë, Perëndimi koordinon armatimin e Ukrainës appeared first on Telegrafi.

Kievi i ka propozuar Moskës një raund të ri bisedimesh paqeje javën e ardhshme, njoftoi presidenti i Ukrainës, Volodymyr Zelensky, pasi negociatat ngecën në fillim të qershorit.

Dy raunde bisedimesh në Stamboll midis Moskës dhe Kievit nuk arritën të sjellin ndonjë përparim drejt një armëpushimi, duke dhënë në vend të kësaj shkëmbime të të burgosurve në shkallë të gjerë dhe marrëveshje për kthimin e trupave të ushtarëve të vrarë, shkruan the Guardian.

“Sekretari i Këshillit të Sigurisë Rustem Umerov raportoi gjithashtu se kishte propozuar takimin e ardhshëm me palën ruse për javën e ardhshme”, tha Zelensky në fjalimin e tij të mbrëmjes drejtuar vendit.

“Vrulli i negociatave duhet të rritet”, shtoi ai.

Zelensky përsëriti gatishmërinë e tij për të pasur një takim ballë për ballë me presidentin rus, Vladimir Putin.

“Një takim në nivel udhëheqësish është i nevojshëm për të siguruar vërtet paqen – paqe të qëndrueshme”, tha ai.

Ndryshe, në bisedimet e muajit të kaluar, Rusia përshkroi një listë kërkesash të ashpra, duke përfshirë thirrjet që Ukraina të lëshojë më shumë territor dhe të refuzojë të gjitha format e mbështetjes ushtarake perëndimore.

Kiev i hodhi poshtë ato si të papranueshme dhe në atë kohë vuri në pikëpyetje qëllimin e negociatave të mëtejshme nëse Moska nuk ishte e gatshme të bënte lëshime.

Kremlini tha më parë këtë muaj se ishte gati të vazhdonte bisedimet me Ukrainën pasi Donald Trump i dha Rusisë 50 ditë për të arritur një marrëveshje paqeje ose të përballej me sanksione.

Presidenti amerikan u zotua gjithashtu të furnizonte Kievin me ndihmë të re ushtarake, të sponsorizuar nga aleatët e NATO-s, ndërsa qytetet e saj vuajnë nga sulmet ajrore gjithnjë e në rritje ruse. /Telegrafi/

The post Ukraina kërkon raund të ri bisedimesh me Rusinë, Zelensky: Një takim ballë për ballë me Putinin appeared first on Telegrafi.

Deputeti i SPD-së, Adis Ahmetoviq ka bërë thirrje që Gjermania të rrisë ndjeshëm mbështetjen për Kosovën. Ai theksoi se stabiliteti në Ballkanin Perëndimor varet nga integrimi i plotë i rajonit në strukturat euroatlantike.

Ahmetoviq deklaroi se integrimi i gjashtë vendeve të Ballkanit Perëndimor në Bashkimin Evropian është mënyra e vetme për të garantuar paqe dhe siguri afatgjatë në rajon.

“Ne duhet ta monitorojmë situatën në Ballkanin Perëndimor çdo ditë dhe në mënyrë të vazhdueshme. Politika për këtë rajon nuk duhet të kufizohet vetëm në promovimin ekonomik, por duhet të mbetet pjesë integrale e agjendës sonë të politikës së jashtme. Po ndjek nga afër zhvillimet në Shqipëri, Serbi dhe Kosovë. Ne jemi të interesuar për stabilitet politik”, deklaroi Ahmetoviq.

Ai shtoi “Për Kosovën kjo nënkupton në mënyrë të veçantë që duam që ky vend të bëhet anëtar i Këshillit të Evropës sa më shpejt që të jetë e mundur; nga këndvështrimi i SPD-së, sa më shpejt, aq më mirë”

Megjithëse nuk dha një datë konkrete se kur Gjermania do ta trajtojë çështjen e anëtarësimit të Kosovës në Këshillin e Evropës, Ahmetoviq dhe kolegu i tij Frank Schwabe janë të përkushtuar që kjo çështje të mbetet prioritet për SPD-në në Bundestag.

I pyetur për përgjegjësinë politike për këtë dështim, Ahmetoviq theksoi se qeveria gjermane është dashur të angazhohej më shumë për të bindur shtetet anëtare të Këshillit të Evropës, duke nënvizuar se Gjermania ka ndikim të madh.

Zyrtari i SPD-së shtoi se, përveç anëtarësimit në BE, anëtarësimi në NATO mbetet po ashtu prioritet për Kosovën dhe vendet e tjera të rajonit.

“Anëtarësimi në NATO është të paktën po aq i rëndësishëm sa ai në BE. Të dyja, si BE-ja ashtu edhe NATO-ja, janë thelbësore për një jetë në paqe, liri dhe siguri. Nuk mund ta vlerësoj saktësisht kur do të ndodhë kjo, por si deputet i SPD-së, do të vazhdoj të luftoj për këtë çështje,” tha ai për Deutsche Welle.

Ai theksoi se Kosova, Serbia, Bosnja e Hercegovina, Mali i Zi, Shqipëria dhe Maqedonia e Veriut duhet të përmbushin detyrimet e tyre për të përparuar në këtë proces.

Ahmetoviq komentoi edhe situatën politike në Kosovë, ku Kuvendi ka dështuar të konstituohet pas gati 50 përpjekjesh.

Ai e cilësoi Lëvizjen Vetëvendosje si parti motër të SPD-së dhe theksoi nevojën për një qeveri stabile dhe një parlament funksional, pa komentuar drejtpërdrejt bllokadën në vazhdim.

“Kam kontakte të ngushta me qeverinë e Kosovës. Duam veprim qeveritar të qëndrueshëm dhe një parlament funksional. Kjo është thelbësore për të gjitha hapat pasues. Vetëm nëse kjo vazhdon të funksionojë, Kosova do të mund të avancojë në Këshillin e Evropës, në procesin e anëtarësimit në BE dhe ndoshta së shpejti edhe në NATO. Këto procese janë të ndërlidhura ngushtë,” përfundoi ai./DW/

The post Deputeti gjerman kërkon që Kosova të bëhet pjesë e NATO-s dhe BE-së sa më shpejt appeared first on Telegrafi.

Zëdhënësja e Ministrisë së Punëve të Jashtme të Rusisë, Maria Zaharova, ka komentuar situatën në Moldavi dhe i është bashkuar narrativës së politikanëve pro-rusë në këtë vend, duke pretenduar se NATO po planifikon “okupimin” e Moldavisë.

Në një intervistë për agjencinë ruse TASS, Zaharova tha se NATO po e përgatit Moldavinë për rolin e një shteti në vijën e parë të frontit.

“Gjatë vitit 2024 janë mbajtur 30 ushtrime të përbashkëta ku kanë marrë pjesë trupa moldave dhe të NATO-s. Kishinau po forcon bashkëpunimin me shtetet anëtare të NATO-s dhe ushtrimet e përbashkëta ushtarake kanë për qëllim ta dëshmojnë këtë,” deklaroi Zaharova.

Ajo përsëriti se kjo përbën një shembull të militarizimit të Moldavisë, nga i cili do të përfitonte NATO, raportojnë mediat.

“Pse ndodh e gjithë kjo? Moldavia po përgatitet të bëhet një tjetër Ukrainë”, tha Zaharova.

Ndërkohë, për bashkëpunimin ndërmjet NATO-s dhe Moldavisë janë shprehur më parë edhe zyrtarë nga rajoni separatist moldav i Transnistrisë. Një nga anëtarët e parlamentit, Andrej Safonov, deklaroi se NATO synon okupimin e Moldavisë me ndihmën e Rumanisë.

“Futja e trupave rumune dhe të NATO-s në Moldavi do të përfundojë të gjitha negociatat për zgjidhjen e konfliktit moldavo-transnistrian, pasi kjo do të nënkuptojë de facto luftë mes NATO-s dhe Rusisë, trupat e së cilës janë të stacionuara në tokën transnistriane. Prandaj, le të mbetet ish-RSS-ja Moldave një territor paqeje. Një alternativë ushtarake do t’u sjellë vetëm dhimbje të gjithëve,” theksoi Safonov.

Transnistria është një rajon separatist në lindje të Moldavisë, përgjatë lumit Dniester, që kufizohet me Ukrainën.

Shpalli pavarësi në vitin 1990, por nuk njihet ndërkombëtarisht. Që nga lufta e vitit 1992, funksionon de facto si shtet i pavarur me mbështetje nga Rusia, e cila ka trupa ushtarake atje. Zona është një pikë tensioni mes Moldavisë, Rusisë dhe Perëndimit. /Telegrafi/

The post Rusët në paranojë në lidhje me stërvitjet e NATO-s në Moldavi, Kremlini përmendin “Ukrainën e re”: appeared first on Telegrafi.