Gjykata e Vlorës ka caktuar masën e sigurisë “arrest me burg” për  Emanuel Shkëmbin, i cili akuzohet për kanosje me armë zjarri ndaj dy punonjësve të tij. Ngjarja ka ndodhur tre ditë më parë, kur Shkëmbi, pas një konflikti të brendshëm dhe banal , ka nxjerrë një armë tip pistoletë dhe ka kërcënuar punonjësit duke i vënë në rrezik serioz për jetën.

Seanca gjyqësore u mbajt ditën e djeshme nën drejtimin e gjyqtarit Ertil Meçaj. Prokurori i çështjes paraqiti provat dhe kërkoi që ndaj Shkëmbit të caktohej masa arrest në burg gjë që u pranua edhe nga gjyqtari i çështjes , Gjykata pranoi kërkesën e prokurorit, duke vendosur që i pandehuri të mbahet në qeli deri në përfundimin e hetimeve.

Pas shpalljes së vendimit, Emanuel Shkëmbi u transferua menjëherë në drejtim të burgut të Fierit, ku do të vuajë masën e sigurisë. Burime pranë hetuesve bëjnë të ditur se armën e përdorur në ngjarje e ka pasur pa leje dhe pritet që ndaj tij të rëndojnë edhe akuza të tjera për armëmbajtje pa leje.

Ngjarja ndodhi tre ditë më parë ku falë ndërhyrjes së policisë u parandalua përshkallëzimi i situatës. Burime bëjnë me dije se ngjarja ka ndodhur për arsye banale .

Hetimet mbi këtë rast pritet të zbardhin motivet që çuan në përshkallëzimin e konfliktit dhe rrethanat e sakta të kanosjes./abcnews.al

Britania e Madhe ua ka ndaluar pjesëmarrjen zyrtarëve izraelitë në panairin e saj më të madh tregtar të mbrojtjes, për shkak të përshkallëzimit të luftës kundër Hamasit në Gazë, në përpjekje për të ushtruar trysni ndaj aleatit historikisht të ngushtë për shkak të konfliktit.

Qeveria e kryeministrit Keir Starmer tha në korrik se do ta njihte shtetin palestinez, nëse Izraeli nuk do të ndërmerrte hapa për t’i lehtësuar vuajtjet e palestinezëve në Gazë dhe nëse nuk do të përmbushte kushte të tjera, duke e zemëruar Qeverinë izraelite.

Ministria e Mbrojtjes e Izraelit tha se, si pasojë e këtij ndalimi, nuk do ta organizojë pavijonin e saj kombëtar si më parë në panairin Defence & Security Equipment International (DSEI), në Londër.

Megjithatë, kompanitë izraelite të mbrojtjes, si Elbit Systems, Rafael, IAI dhe Uvision, do të mundë të marrin pjesë.

Një zëdhënës i Qeverisë britanike tha të premten se vendimi i Qeverisë izraelite për ta përshkallëzuar më shumë luftën në Gazë ishte i gabuar.

“Si pasojë, ne konfirmojmë se asnjë delegacion qeveritar izraelit nuk do të ftohet të marrë pjesë në DSEI UK 2025”, tha ai.

“Duhet të ketë zgjidhje diplomatike për ta përfunduar këtë luftë tani, me armëpushim të menjëhershëm, kthimin e pengjeve dhe një rritje të ndihmës humanitare për popullin e Gazës”, shtoi ai.

Izraeli e cilësoi vendimin e Britanisë si “akt të pafat diskriminimi” dhe se “po fut konsiderata politike krejtësisht të papërshtatshme për një ekspozitë profesionale të industrisë së mbrojtjes”.

Panairi katërditor, i cili hapet më 9 shtator, mbledh delegacione shtetërore dhe kompani private që ekspozojnë pajisje dhe armë ushtarake në qendrën Excel të Londrës. Ky aktivitet zhvillohet çdo dy vjet.

DSEI organizohet nga një kompani private, Clarion Defence and Security, por me mbështetjen e Qeverisë dhe ushtrisë britanike.

Read More...

Një 52-vjeçar është arrestuar nga policia, pasi ka përplasur me makinë një 90-vjeçar, i cili për pasojë humbi jetën.

“Në vijim të informacionit paraprak të dhënë dje, për aksidentin e ndodhur në aksin rrugor “Përmet-Çarçovë”, bëjmë me dije se specialistët e Sektorit të Policisë Rrugore, në përfundim të veprimeve procedurale, arrestuan në flagrancë shtetasin A. M., 52 vjeç, banues në Përmet, pasi dyshohet se përplasi me automjet, shtetasin S. P., 90 vjeç, banues në Përmet, i cili për pasojë humbi jetën”, njofton policia.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme./abcnews.al

Menjëherë pas përfundimit të ndeshjes me Dinamon një grup tifozësh kanë qëlluar më gurë dhe sende të forta ndaj tre autobusëve të tifozëve të skuadrës polake.

Lidhur me këtë icident, janë identifikuar pesë persona, tre prej të cilëve janë vënë në prangat e policisë, kurse dy të tjerë janë shpallur në kërkim./abcnews.al

Një ditë pasi Komisioni Rregullator certifikoi zgjedhjet e 11 majit, duke shpallur rezultatin përfundimtar, e ngarkuara me punë e SHBA-ve Nancy Vanhorn ka shkuar paraditen e së premtes në godinën e kryeministrisë

Vizita e saj vjen në një kohë, kur pritet nisja e sesionit të ri parlamentar, si dhe në një kohë kur Rama pritet që të shpallë kabinetin e ri qeveritar./abcnews.al

Disa vatra zjarri ka rënë gjatë natës në zonën me pyje në Krastë të Krujës, duke shkaktuar shqetësim për përhapjen e flakëve.

Terreni është mjaft i vështirë, dhe e bën të pamundur ndërhyrjen me mjetet zjarrfikëse. Për këtë arsye, autoritetet kanë kërkuar ndërhyrjen nga ajri me helikopter të forcave ushtarake, për të ndihmuar në shuarjen e flakëve.

Në terren ndodhen forcat të repartit zjarrfikës të Krujës të cilët po punojnë me mjete rrethanore për izolimin e përhapjes së zjarreve në Krastë të Krujës./abcnews.al

Asnjë surprizë në listën e kombëtares për dy sfidat e shtatorit. Sylvinho ka zhgënjyer të gjithë ata që mendonin se tekniku kuqezi do të vinte me risi në zgjedhjet e tij për miqësoren kundër Gjibraltarit më 4 shtator në transfertë dhe atë të 9 shtatorit kundër Letonisë në “Air Albania” për eliminatoret e “Botërorit 2026”.

Ashtu siç pritej, jashtë ka mbetur Ardian Ismajli, që vazhdon fazën e rikuperimit me Torinon pas dëmtimit të fundit.

Një rikthim është ai i Mario Dajsninanit, portieri i Egnatias, që plotëson treshen e gardianëve me Thomas Strakoshën dhe Elhan Kastratin.

Për pjesën tjetër të lojtarëve të grumbulluar nga trajneri i kombëtares ka vendosur të mos ndryshojë.

Kështu, në mbrojtje kanë marrë ftesë futbollistët e zakonshëm, ashtu si në mesfushë dhe sulm, dy reparte këto ku priteshin prurje të reja.

Por Silvinjo do të mbështetet te më të besuarit e tij, pavarësisht se disa prej tyre nuk po kalojnë një moment të mirë me skuadrat e klubeve si Nedim Bajrami, apo Jasir Asani që sapo ka ndryshuar ekip duke u transferuar në Iran.

Sa I përket sulmit, tekniku i përfaqësueses kuqezi do të mbështetet sërish te Armando Broja, Mirlind Daku, Myrto Uzuni dhe Rey Manaj.

Kombëtarja e Shqipërisë do të nisë zyrtarisht përgatitjet për dy sfidat e ardhshme më 1 shtator.

Lista e plotë:

Portierë: Thomas Strakosha, Elhan Kastrati, Mario Dajsinani

Mbrojtës: Elseid Hysaj, Ivan Balliu, Mario Mitaj, Naser Aliji, Marash Kumbulla, Adrian Bajrami, Berat Gjimshiti, Arlind Ajeti

Mesfushorë: Ylber Ramadani, Juljan Shehu, Kristjan Asllani, Medon Berisha, Qazim Laçi, Adrion Pajaziti, Nedim Bajrami, Arbër Hoxha, Ernest Muçi, Jasir Asani

Sulmues: Armando Broja, Myrto Uzuni, Rey Manaj, Mirlind Daku

Grumbullimi i Kombëtares do të nisë të hënën, më 1 shtator, në Malaga, ku kuqezinjtë do të përgatiten për ndeshjen miqësore ndaj Gjibraltarit, e cila do të luhet më 4 shtator në stadiumin “Europa Point”, në orën 18:00.

Më pas, më 5 shtator, Kombëtarja do të rikthehet në Tiranë për të vijuar përgatitjet në kuadër të ndeshjes kualifikuese ndaj Letonisë, që do të zhvillohet më 9 shtator, në stadiumin “Air Albania”, në orën 20:45.

Read More...

Read More...

Read More...

Kryeministri i qeverisë Houthi që kontrollon pjesë të Jemenit, Ahmed Ghaleb Al-Rahwi, është vrarë dje në një sulm të kryer nga Izraeli në Sana’a.  Sipas raporteve nga mediat e huaja, Al-Rahwi ka humbur jetën gjatë bombardimit të një banese në Sana’a, ku ndodheshin edhe disa zyrtarë të lartë të milicisë shiite, disa prej të cilëve thuhet se kanë vdekur bashkë me të.

Operacioni, ku u raportua vdekja e kreut të qeverisë Houthi, ishte i veçantë dhe ndodhi në të njëjtën ditë me një sulm tjetër izraelit që kishte goditur dhjetë ministra të administratës rebelë, përfshirë edhe ministrin e Mbrojtjes, të cilët ishin mbledhur jashtë kryeqytetit për të dëgjuar një fjalim të udhëheqësit të milicisë pro-Iran, Abdul Malik al-Houthi. Nuk ka ende informacion mbi pasojat e këtij bombardimi të fundit.

Deri tani, milicia shiite nuk ka lëshuar asnjë deklaratë zyrtare. Forcat e armatosura izraelite thanë vetëm se kanë “goditur një objektiv të regjimit terrorist Houthi në Sana’a”, pa dhënë detaje të mëtejshme./abcnews.al

Është vetëdorëzuar në polici në orët e para të mëngjesit të kësaj të premteje, 29 gusht, autori i vrasjes në Dukagjin. Ndoc Maçaj është vetëdorëzuar tek forcat e rendit bashkë me armën e krimit, pasi qëlloi për vdekje 61-vjeçarin, Piro Prroni.

“Dyshohet se vrau me armë zjarri pistoletë, 61-vjeçarin, për motive të dobëta, arrestohet 58-vjeçari, i cili u vetëdorëzua disa orë pas ngjarjes, bashkë me armën e krimit. Specialistët e Sektorit për Hetimin e Krimeve ndaj Personit vunë në pranga shtetasin N. M., 58 vjeç, për veprat penale “Vrasja me dashje” dhe “Mbajtja pa leje dhe prodhimi i armëve, armëve shpërthyese dhe i municionit”, njofton policia.

Ngjarja ndodhi mbrëmjen e djeshme, 28 gusht, në fshatin Abat të Shalës në Shkodër. Shkak i ngjarjes dyshohet se ka qene një konflikt i çastit dhe debati me pas ka përfunduar ne përdorimin e armës. Krimi ka ndodhur në një zonë të thellë malore./abcnews.al

Sipas Qendrës Kombëtare Operacionale të Emergjencave Civile (QKOEC), gjatë 24 orëve të fundit janë regjistruar 26 vatra zjarri në vend. Nga këto vatra, 21 janë shuar plotësisht, 4 vijojnë ende aktive, ndërsa 1 vatër ndodhet në monitorim nga autoritetet përkatëse.

Vatra të izoluara dhe të shuara

Është bërë izolimi i plotë dhe shuarja e zjarreve në: Havalehas (Kuçovë), Krutje (Lushnjë), Rubjek (Shijak), Lagjja nr.10 (Korçë), Drobonik (Berat), Kotë (Selenicë), Kameras (Durrës), Martalloz (Memaliaj), Stadiumi dhe puset e naftës (Kuçovë), Fushë Milot (Kurbin), “Gjëmbi” (Selenicë), Lanabreges (Tiranë), Bogovë (Skrapar), Durisht (Tiranë), Barbullush (Vau Dejës), Bogiç-Palvar (Malësi e Madhe), Katundi i Ri (Durrës), Mjull Bathore (Tiranë), Hamallaj (Durrës), Parku Natyror Gërmenj (Kolonjë), si dhe midis fshatrave Nivicë, Salari e Dhëmblan (Tepelenë).

Vatra aktive

Aktualisht vijojnë të jenë aktive 4 vatra zjarri:

• Në fshatin Pezë Helmës, bashkia Tiranë, ku janë të pranishme disa vatra të izoluara që po mbahen në monitorim nga zjarrfikësit.
• Në fshatin Fage, bashkia Tiranë, ku zjarri është aktiv dhe në monitorim nga zjarrfikësit, forcat bashkiake dhe vullnetarët.
• Në fshatin Miras, bashkia Devoll, ku ka prani tymi në disa zona dhe rreth 100 forca janë angazhuar për shuarjen e flakëve.
• Në lagjen Boje, bashkia Krujë, ku dy vatra po përfshijnë sipërfaqe pyjore me pisha në zonë të mbrojtur.

Ndërkohë, vatra e zjarrit në fshatin Delisuf, bashkia Vlorë, është nën monitorim, ndërsa situata është e qetë dhe pa prani tymi./abcnews.al

Presidenti i Ukrainës, Volodymyr Zelensky, e ka cilësuar sulmin e Rusisë me raketa dhe dronë në Kiev, ku u vranë të paktën 21 njerëz si “goditje nga Rusia” kundër presidentit amerikan, Donald Trump, i cili vetë ishte “i pakënaqur” me sulmin, sipas Shtëpisë së Bardhë.

“Rusia tani po e godet këdo në botë që dëshiron paqe”, tha Zelensky në adresimin e tij të natës të enjten.

“Është një goditje kundër Ukrainës… Dhe është gjithashtu një goditje nga Rusia kundër presidentit Trump”, theksoi Zelensky.

Mungesa e përparimit drejt një armëpushimi në luftën në Ukrainë ka filluar ta zemërojë Trumpin, i cili e ka kërcënuar Moskën me sanksione dhe tarifa të reja.

“Ne kemi dëgjuar në Uashington se [presidenti rus Vladimir] Putini gjoja është gati ta përfundojë luftën… Por, në vend të kësaj, ai zgjedh raketat balistike para çdo hapi të mirëfilltë drejt paqes”, shtoi Zelensky.

Zelensky tha se pret që të përcaktohet një kornizë për garancitë e sigurisë për Ukrainën javën e ardhshme.

Aleatët evropianë janë zotuar se do t’i ofrojnë Ukrainës garanci për sigurinë, në rast të një armëpushimi, me mundësinë e përfshirjes së SHBA-ve gjithashtu.

Zelensky u tha një grupi liderësh evropianë në një takim virtual se është “e rëndësishme që presidenti Trump të shohë se ne në Evropë jemi të bashkuar në vendosmërinë tonë për ta përfunduar luftën”.

Ndërkohë, Shtëpia e Bardhë tha se Trump ishte i pakënaqur për shkak të sulmeve të Rusisë të enjten, si pasojë e të cilave gjithashtu u plagosën dhjetëra njerëz në kryeqytetin ukrainas.

“Ai nuk ishte i kënaqur me këtë lajm, por nuk ishte as i befasuar. Këto janë dy vende që janë qenë në luftë për një kohë shumë të gjatë”, tha zëdhënësja e Shtëpisë së Bardhë, Karoline Leavitt, në një konferencë për media.

Liderët evropianë, amerikanë dhe të OKB-së e dënuan sulmin rus kundër Kievit, ndërsa Britania e Madhe dhe Bashkimi Evropian thirrën diplomatët rusë për ta shprehur pakënaqësinë e tyre.

Udhëheqës të lartë ukrainas pritet të takohen me të dërguarin e posaçëm të Trumpit, Steven Witkoff, në Nju Jork, për të diskutuar mënyra shtesë për ta ndihmuar Ukrainën të mbrohet dhe për përpjekjet për t’i dhënë fund luftës.

Të paktën 21 njerëz u vranë në Kiev në sulmin rus me raketa dhe dronë, gjatë të cilit gjithashtu u shkatërruan ndërtesa banimi dhe shtëpi në kryeqytet. Një nga zonat më të goditura ishte në qarku Darnitsia të Kievit, ku një pjesë e një ndërtese banimi pesëkatëshe u godit drejtpërdrejt.

Në Kiev dhe rajonin e tij, e premtja u shpall ditë zie për të nderuar viktimat e sulmit rus. Presidentja e Komisionit Evropian, Ursula von der Leyen, njoftoi se BE-ja do ta miratojë së shpejti një paketë të re sanksionesh kundër Rusisë, të 19-tën që nga nisja e pushtimit të plotë në shkurt 2022.

Këshilli i Sigurimit i OKB-së caktoi një mbledhje urgjente për sulmet ajrore në pasditen e së premtes, me kërkesë të Ukrainës dhe pesë anëtarëve të Këshillit Evropian, Britanisë, Francës, Sllovenisë, Danimarkës dhe Greqisë.

Mëngjesin e kësaj të premteje, në fshatin Dragostunjë të Librazhdit është gjetur nga kalimtarët një trup i pa jetë. Viktima është Nazmi Cani, 63 vjeç.

Nga dyshimet e para dhe veprimet që po kryen grupi hetimor dyshohet për infarkt.

Sipas informacioneve të siguruara nga gazetarja e ABC News, Edisona Skënderi, 63-vjeçari nuk është ndjerë mirë gjatë kohës që ngiste mjetin, dhe ka ndaluar duke dal prej tij, në atë moment dyshohet se ka pësuar infarktin. Vijon puna në vendngjarje./abcnews.al

Një seancë në Senatin e Meksikës agravoi deri në përleshje fizike këtë javë, pasi dy prej figurave kryesore politike të vendit u konfliktuan me njëri-tjetrin pas një debati të ashpër mbi praninë e mundshme të trupave të huaja në vend.

Alejandro “Alito” Moreno, kryetar i Partisë Revolucionare Institucionale (PRI), u përplas me presidentin e Senatit, Gerardo Fernández Noroña, përfaqësues i partisë në pushtet Morena. Përplasja ndodhi menjëherë pas përfundimit të seancës së së mërkurës, sapo deputetët kishin përfunduar këndimin e himnit kombëtar.

“Po të kërkoj të më lësh të flas”, dëgjohet të thotë Moreno në një video të transmetuar drejtpërdrejt nga senati.

“Nuk më prek!”, ia kthen Fernández Noroña.

Në pamje shihet se pasi Fernández Noroña përpiqet të largohet, Moreno e kap sërish, duke e shtyrë dhe qëlluar në qafë. Kur një ndihmës i Fernández Noroñës ndërhyn për t’i ndarë, Moreno e rrëzon atë në tokë. Në përpjekje për të dalë nga podiumi, një ligjvënës tjetër ndërhyn në konflikt, duke tentuar të godasë presidentin e senatit.

“Më provokoi, më preku, më tërhoqi”, tha më pas Fernández Noroña në një konferencë për shtyp. “Më goditi në krahë dhe më tha: ‘Do të të rrah, do të të vras.’”

Nga ana e tij, Moreno reagoi në rrjetin social X (ish-Twitter): “Kur Noroña e kaloi kufirin, e dinte mirë çfarë po bënte. Do të përballem gjithmonë ballë për ballë, me karakter dhe pa frikë, për të mbrojtur Meksikën dhe për t’i dhënë asaj drejtimin që meriton.”

Përplasja ndodhi pas një debati të tensionuar, gjatë të cilit partia në pushtet Morena dhe aleatët e saj akuzuan partitë opozitare PRI dhe PAN se po mbështesnin një ndërhyrje ushtarake të Shteteve të Bashkuara në Meksikë pretendim që të dy partitë e mohuan.

Pak ditë më parë, një senator i partisë PAN kishte deklaruar në Fox News se “ndihma nga Shtetet e Bashkuara për të luftuar kartelet në Meksikë është plotësisht e mirëpritur”.

Çështja është bërë veçanërisht e ndjeshme në Meksikë, pasi ish-presidenti amerikan Donald Trump raportohet se ka autorizuar përdorimin e forcës ushtarake kundër karteleve të drogës në disa vende të Amerikës Latine, të cilat i konsideron organizata terroriste.

Presidenti i Senatit, Fernández Noroña, njoftoi se do të thërrasë një seancë të jashtëzakonshme të premten, ku do të propozojë përjashtimin e Moreno dhe tre senatorëve të tjerë të PRI-së për shkak të incidentit. Ai gjithashtu bëri të ditur se ka paraqitur një kallëzim penal ndaj Moreno.

Në një tjetër deklaratë në rrjetet sociale, Moreno akuzoi partinë në pushtet se kishte ndryshuar rendin e ditës në minutën e fundit, me qëllim për të heshtur opozitën./abcnews.al

Rusia nisi ditën e djeshme, 28 gusht, një ofensivë ajrore të përmasave të mëdha ndaj Ukrainës, duke sfiduar paralajmërimet ndërkombëtare dhe negociatat e hapura me Shtetet e Bashkuara. Presidenti rus Vladimir Putin urdhëroinjë sulm të koordinuar dhe brutal, që ka goditur jo vetëm Kievin, por edhe objektiva të tjerë civilë e ushtarakë në disa rajone të vendit.

Sulmi mbi kryeqytetin ukrainas u shënua si një nga episodet më të përgjakshme të kësaj fushate. Një seri shpërthimesh me raketa dhe dronë goditën ndërtesa banimi dhe infrastrukturë civile, duke lënë pas dhjetëra viktima dhe një mesazh të qartë për qeverinë e Volodymyr Zelensky dhe aleatët e saj perëndimorë: një përshkallëzim i mëtejshëm është real.

Operacioni rus vjen si kundërpërgjigje ndaj sulmeve të fundit të Ukrainës mbi rafineritë e naftës në territorin rus sulme që kanë prekur rëndë furnizimin me karburant dhe kanë nxitur reagimin e ashpër të Kremlinit.

Në mesin e objektivave të goditura ishte edhe një ndërtesë në Kiev ku ndodhen zyrat e delegacionit të Bashkimit Evropian dhe selia e British Council. Po ashtu, një operacion i veçantë është zhvilluar në deltën e Danubit, pranë kufirit me Rumaninë, pra, buzë territorit të BE-së. Një dron detar rus ka depërtuar dhjetëra kilometra në lumenj dhe ka goditur anijen “Simferopol”, një nga të paktat njësi të mbetura të marinës ukrainase, e specializuar në zbulim elektronik dhe e përdorur në operacione kundër porteve në Krime.

Një tjetër objektiv me peshë simbolike ishte edhe fabrika e kompanisë turke Bayraktar, e cila ndodhet në periferi të Kievit. Edhe pse ende e painauguruar, ajo u godit nga dy raketa hipersonike ruse Kinzhal, që kaluan sistemin mbrojtës amerikan Patriot. Goditja shkaktoi një zjarr të madh që vazhdoi për orë të tëra dhe që u pa në pjesën më të madhe të kryeqytetit.

Kremlini, me këtë sulm, ka dhënë një sinjal të fortë për kompanitë e huaja që mbështesin industrinë ushtarake të Ukrainës, përfshirë ato që ndihmojnë ndërtimin e asaj që presidentja e Komisionit Evropian Ursula von der Leyen e ka quajtur “Iriqi prej çeliku”, mbrojtja e re ukrainase kundër pushtimit rus.

Ndërkohë, edhe depoja e lokomotivave dhe trenave në Ukrainë u godit, në një përpjekje për të ndëshkuar sulmet e fundit ukrainase mbi linjat hekurudhore në territoret e pushtuara nga Rusia, një taktikë që Kievi ka nisur ta përdorë për të penguar përgatitjet e një ofensive të re tokësore ruse.

Pesë mesazhet e “koduara” të Putin:

/abcnews.al

Dy fëmijë, Harper Moyski, 10 vjeçe, dhe Fletcher Merkel, 8 vjeç, janë identifikuar si viktimat e një sulmi me armë zjarri të ndodhur të mërkurën gjatë meshës në Kishën Katolike “Annunciation” në Minneapolis. Sulmi la gjithashtu të plagosur edhe 18 persona të tjerë, përfshirë fëmijë dhe të moshuar.

Prindërit e viktimave kanë reaguar përmes deklaratave prekëse, duke ndarë kujtimet për fëmijët e tyre dhe duke bërë thirrje për ndryshim.

“Një burracak vendosi dje të na marrë djalin tonë tetëvjeçar Fletcher,” tha i ati i tij, Jesse Merkel, në një konferencë për shtyp të enjten. “Ju lutem, kujtojeni Fletcher-in për atë që ishte, jo për mënyrën se si i morën jetën.”

Merkel përshkroi të birin si një fëmijë të dashur që adhuronte sportet, gatimin dhe peshkimin. “Kurrë më nuk do ta mbajmë në krahë, nuk do të luajmë apo të flasim me të. Ai po rritej në një djalë të mrekullueshëm,” shtoi ai mes lotësh. Familja njoftoi se synon të krijojë një fond bursash në emër të Fletcher-it.

Ndërkohë, prindërit e Harper Moyski, Michael Moyski dhe Jackie Flavin, thanë se vajza e tyre ishte “e zgjuar, plot gëzim dhe e dashur thellësisht nga të gjithë”. Ata shtuan se motra e vogël e Harper-it “e adhuronte motrën e madhe” dhe është duke përjetuar një dhimbje të papërshkrueshme.

“Si familje, jemi të shkatërruar. Fjalët nuk mjaftojnë për të përshkruar dhimbjen tonë,” thuhej në deklaratën e tyre. “Shpresojmë që kujtimi i Harper-it të nxisë veprim për t’i dhënë fund dhunës me armë. Asnjë familje nuk duhet të përjetojë këtë lloj humbjeje.”

Të plagosurit përfshijnë 15 fëmijë të moshës 6 deri në 15 vjeç dhe tre të moshuar në të 80-at. Një person mbetet në gjendje kritike në spital. Në qytet janë mbajtur vigjile në kujtim të viktimave, ndërsa flamujt janë ulur në gjysmështizë. Para ndeshjes së bejsbollit mes Minnesota Twins dhe Toronto Blue Jays të mërkurën, u mbajt një moment heshtjeje në nder të viktimave.

Policia ende nuk ka zbuluar një motiv të qartë për sulmin, por ka deklaruar se sulmuesi mbante bindje ekstreme antireligjioze dhe kishte ndjekur më parë të njëjtën shkollë. Nëna e tij, një ish-punonjëse e shkollës, nuk i është përgjigjur përpjekjeve të autoriteteve për kontakt.

Familjet e Harper-it dhe Fletcher-it kanë kërkuar privatësi për të përballuar dhimbjen, për të mbështetur motrën e vogël të Harper-it dhe për të qëndruar të bashkuar në këtë moment të vështirë./abcnews.al

Shqipëria do të përjetojë një ditë tipike vere më 29 gusht 2025, me mot të kthjellët dhe temperatura të larta në të gjithë territorin.

Sipas të dhënave meteorologjike, qielli do të jetë kryesisht i pastër nga mëngjesi deri në mbrëmje, ndërsa temperaturat pritet të ngjiten ndjeshëm gjatë mesditës.

Era do të jetë e lehtë dhe nuk parashikohen reshje në asnjë rajon të vendit./abcnews.al