Pas zhvillimeve të fundit diplomatike mes SHBA-së dhe Rusisë në përpjekje për t’i dhënë fund konfliktit në Ukrainë, Papa Leone XIV ka dhënë një deklaratë shprese, duke theksuar rëndësinë e përpjekjeve të vazhdueshme dhe lutjes së përbashkët.
“Ka shpresë, por ne ende duhet të punojmë shumë, të lutemi shumë dhe të gjejmë një rrugë përpara”, – u shpreh Ati i Shenjtë, duke riafirmuar gatishmërinë e Vatikanit për të mbështetur çdo iniciativë që synon paqen dhe pajtimin.
ROMË, 15 gusht /ATSH-DPA/- Papa Leone XIV u lut sot për një fund paqësor të “dhunës” së luftërave në të gjithë botën, ndërsa mori pjesë në një festë katolike që përkon me takimin SHBA-Rusi – të planifikuar sot në mbrëmje në Alaskë, për luftën në Ukrainë, sipas AP.
Papa i parë amerikan në histori nuk e përmendi takimin e sotëm në Alaskë midis presidentit amerikan, Donald Trump dhe presidentit rus Vladimir Putin.
Por, ai ka bërë vazhdimisht thirrje për dialog mes Putinit dhe udhëheqësit ukrainas Volodymyr Zelensky – dhe për t’i dhënë fund konfliktit.
Papa Leone kujtoi sot se 15 gushti – dita kushtuar Virgjëreshës Mari – ishte shpallur një dogmë nga Papa Piu XII në kulmin e Luftës së Dytë Botërore.
“Papa Piu shpresonte që jetët njerëzore nuk do të shkatërroheshin më kurrë nga luftërat”, tha Papa Leone.
“Sa të rëndësishme janë këto fjalë sot? Fatkeqësisht, edhe sot, ne ndihemi të pafuqishëm përballë përhapjes së dhunës gjithnjë e më të madhe dhe të pandjeshëm ndaj çdo lëvizjeje të njerëzimit”, shtoi ai.
Papa Leone u lut për një të ardhme paqësore.
“Nuk duhet t’i dorëzohemi mbizotërimit të logjikës së konfliktit të armatosur”, tha ai. //a.i/
Papa Leoni XIV, i zgjedhur më 8 maj si pasardhësi i Françeskut, ka mbushur 100 ditët e para në fronin papnor me një profil që ndërthur përkushtimin ndaj traditës me një natyrë njerëzore dhe energjike. I njohur për origjinën e tij amerikane dhe për qasjen më të tërhequr në media, ai ende nuk ka dhënë asnjë intervistë, por ndikimi i tij brenda mureve të Vatikanit po ndjehet gjithnjë e më shumë.
VATIKAN, 2 gusht /ATSH-DPA/ – Papa Leone XIV po kalon një fundjavë të ngjeshur me Jubileun e Rinisë, ndërsa Kisha Katolike feston vitin e saj Jubile.
“Më shumë se gjysmë milioni, thonë ata, ndoshta edhe një milion të rinj kanë ardhur nga shumë vende të botës”, tha sot papa.
“Për mua, është një privilegj, një bekim”, shtoi ai.
Kisha Katolike po feston një Jubile në vitin 2025, siç bën çdo 25 vjet, duke tërhequr edhe më shumë pelegrinë dhe turistë në Romë sesa zakonisht.
Në Tor Vergata, një kompleks sportiv në pjesën lindore të Romës, besimtarë të rinj nga 146 vende iu bashkuan një eventi të madh në ajër të hapur me muzikë dhe lutje.
Pika kulmore e programit është vigjilja e mbrëmjes, një seancë lutjeje mbrëmjeje me papën.
Shumë pjesëmarrës planifikojnë të kalojnë natën nën yje.
Takimi i të rinjve konsiderohet si një ngjarje qendrore në Vitin Jubile, me qindra mijëra të rinj që mblidhen në Romë që nga e marta.
Në meshën e hapjes, Leone i befasoi afërsisht 120 000 pjesëmarrësit në sheshin e Shën Pjetrit me një turne në makinën papale.
Në një fjalim të shkurtër, ai i nxiti ata të jenë simbole të shpresës dhe paqes./ /os/
Një valë entuziazmi dhe shprese pushtoi të martën Sheshin e Shën Pjetrit dhe të gjithë zonën e Vatikanit, ku rreth 120,000 të rinj nga e gjithë bota u mblodhën për të hapur Jubileun e tyre me një meshë mikpritëse. Prania masive, e papritur në këtë shkallë qysh në fillim të ngjarjeve, dëshmon dëshirën e madhe për t’u bashkuar me thirrjen e Papës.
Papa bëri një paraqitje të papritur, duke përshëndetur turmën nga Popemobile dhe duke i dhënë energji të rinjve, shumë prej të cilëve nuk kishin arritur të hynin në Sheshin e Shën Pjetrit për shkak të numrit të madh.
Mesazh shprese dhe thirrje për paqe
Në fund të kremtimit, i kryesuar nga Imzot Rino Fisichella, Papa i drejtoi një mesazh të fuqishëm të rinjve:
“Ju jeni kripa e tokës, ju jeni drita e botës… bota ka nevojë për mesazhin e shpresës dhe ju jeni kjo shenjë shprese në botë.” Ai theksoi rolin e tyre në ndriçimin e Romës, Italisë dhe mbarë botës.
Më pas, Papa bëri një thirrje të qartë dhe të bujshme për paqe, duke theksuar se “britma jonë duhet të jetë për paqe në botë”, “ne duam paqe në botë”, dhe “ne lutemi për paqe dhe jemi dëshmitarë të paqes dhe pajtimit”. Ai e mbylli përshëndetjen me fjalët: “Shihemi! Do të takohemi në Tor Vergata. Javë të mbarë!”, duke lënë të kuptohet për takime të tjera me të rinjtë.
Në një moment simbolik dhe tejet domethënës, gjatë ofrimit në meshë, dy të rinj palestinezë shfaqën një keffiye në altar – një simbol kulturor dhe politik i Palestinës. Flamujt palestinezë valëviteshin gjithashtu në Via della Conciliazione. Kjo veprimtari u shoqërua me duartrokitje të gjata dhe të fuqishme nga mijëra të rinj të pranishëm, kur pamjet e të rinjve palestinezë u shfaqën në ekranet gjigante. Ky moment thekson qartësisht ndjeshmërinë e thellë ndaj çështjeve të prekura nga lufta, veçanërisht në kontekstin e thirrjes së Papës për paqe.
Pjesëmarrja e paprecedentë dhe mesazhi i Papës Leo
Bumi i pjesëmarrjes në këtë festim fillestar konfirmon vlerësimet se numri i të rinjve mund të arrijë deri në një milion deri në fund të javës së Jubileut. Komisioneri i policisë së Romës, Roberto Massucci, shprehu optimizëm, duke vënë në dukje se “gjithçka po shkon mirë” dhe se “do të ketë një pjesëmarrje të madhe”.
Mëngjesi i sotëm shënoi edhe një takim të veçantë mes Papës Leo dhe influencuesve, si dhe një grupi katekumenësh francezë. Papa Leo foli për çështje që ndikojnë jetën e brezave të rinj, si mediat sociale, lajmet e rreme, seksi dhe drogat. Mbi të gjitha, ai theksoi nevojën për të ndërtuar rrjete dhe ura, pasi bota ka një dëshpërim të madh për paqe dhe marrëdhënie të vërteta.
Papa Leo XIV u kërkoi të rinjve të “heqin dorë nga një kulturë vdekjeje kaq e përhapur në shoqërinë tonë,” e cila manifestohet në “indiferencë, përbuzje për të tjerët, drogë, ndjekje të një jete të lehtë, seksualitet që bëhet argëtim dhe objektivizim i personit njerëzor, [dhe] padrejtësi.” Kjo thirrje e fuqishme synon të frymëzojë të rinjtë të jenë agjentë të ndryshimit dhe paqes në një botë të trazuar./ ANSA
Ditë e sotme, pas lutjes së Engjëllit, Papa Leo XIV, në një mesazh të fuqishëm përsëriti thirrjen e tij për t’i dhënë fund “barbarisë së luftës” në Gaza, ndërsa shprehu dhimbjen e thellë për sulmin izraelit ndaj kishës së vetme katolike në Gaza, ku humbën jetën tre civilë të pafajshëm.
Ati i Shenjtë lexoi me zë të lartë emrat e viktimave të sulmit të ndodhur të enjten – Saad Issa Kostandi Salameh, Foumia Issa Latif Ayyad dhe Najwa Ibrahim Latif Abu Daoud – duke theksuar se; “pas çdo viktime qëndron një histori dhe një familje që nuk duhet harruar”.
Papa i bëri thirrje bashkësisë ndërkombëtare që të respektojë ligjin humanitar, të mbrojë civilët dhe të ndalojë ndëshkimin kolektiv, përdorimin pa dallim të forcës dhe zhvendosjen me dhunë të popullsive.
ROMË, 9 korrik /ATSH-ANSA/- Papa Leone XIV rikonfirmoi sot gatishmërinë e tij për të mirëpritur përfaqësuesit e Rusisë dhe Ukrainës në Vatikan për negociata.
Njoftimi erdhi gjatë një deklarate të Vatikanit pas takimit të Papa Leone XIV dhe presidentit ukrainas, Volodymyr Zelensky.
Gjatë takimit, Papa Leone dhe presidenti ukrainas, Zelensky diskutuan rreth konfliktit të vazhdueshëm Rusi-Ukrainë dhe urgjencës për arritjen e paqes së drejtë dhe të qëndrueshme.
Gjithashtu, ata rikonfirmuan rëndësinë e dialogut si rruga e vetme për t’i dhënë fund armiqësive.
“Papa Leone shprehu keqardhje për viktimat dhe popullin ukrainas, duke inkurajuar çdo përpjekje që synon lirimin e të burgosurve dhe kërkimin e zgjidhjeve të përbashkëta”, sipas deklaratës. //a.i/
ROMË, 22 qershor /ATSH-DPA/- Papa Leone XIV bëri një thirrje urgjente për t’i dhënë fund luftimeve në Lindjen e Mesme – në lutjen tradicionale të së dielës, në Sheshin e Shën Pjetrit, në Vatikan.
“Çdo anëtar i unionit ndërkombëtar ka një përgjegjësi morale për të ndaluar tragjedinë e luftës – përpara se të bëhet një “humnerë të e pandreqshme”, tha kreu i Kishës Katolike.
“Kombet duhet ta formësojnë të ardhmen e tyre me vepra paqeje, jo me dhunë dhe konflikte të përgjakshme”, tha Papa Leone – pas përshkallëzimit të konfliktit midis Izraelit dhe Iranit, ku SHBA-ja sulmoi tre objekte të programit bërthamor në Iran brenda natës.
“Kjo krijoi një skenar dramatik që përfshin edhe Izraelin dhe Palestinën”, tha Papa Leone – i lindur në SHBA – duke theksuar se asnjë konflikt nuk ishte i largët kur ishte në rrezik dinjiteti njerëzor.
“Lufta nuk i zgjidh problemet. Përkundrazi, i amplifikon ato dhe shkakton plagë të thella në historinë e popujve – plagë që duhen breza për t’u shëruar”, tha ai.
“Përveç kësaj, vuajtjet e popullsisë, veçanërisht në Gazë dhe zona të tjera, janë në rrezik të harrohen – pikërisht aty ku ndihma humanitare nevojitet gjithnjë e më urgjentisht”, tha Papa Leone. //a.i/
LIMA, 22 qershor, 22 qershor /ATSH/- Papa Leone XIV tha se nuk duhet të ketë tolerancë në Kishën Katolike për asnjë lloj abuzimi – seksual, shpirtëror apo abuzim me autoritetin – ndërsa bëri thirrje për procese transparente për të krijuar një kulturë parandalimi në të gjithë kishën, sipas AP.
Deklarata e Papa Leone ishte një reagim ndaj skandalit të abuzimit seksual të klerit në një mesazh me shkrim drejtuar një gazetareje peruane – e cila dokumentoi një rast veçanërisht të shëmtuar abuzimi dhe korrupsioni financiar në “Sodalitium Christianae Vitae” – Shoqëria e Jetës Apostolike të së Drejtës Papnore brenda Kishës Katolike, e themeluar në Lima, Peru, nga Luis Fernando Figari më 8 dhjetor 1971.
Mesazhi u lexua me zë të lartë të premten në mbrëmje në Lima – të bazuar në skandalin e “Sodalitium Christianae Vitae” dhe punën e gazetares, Paola Ugaz.
“Është urgjente të rrënjoset në të gjithë kishën një kulturë parandalimi që nuk duhet të tolerohet asnjë formë abuzimi – as të pushtetit apo autoritetit, as abuzimit të ndërgjegjes, abuzimit shpirtëror apo seksual”, tha Papa Leone.
“Kjo kulturë do të jetë autentike vetëm nëse lind nga vigjilenca aktive, nga proceset transparente dhe dëgjimi i sinqertë i atyre që janë lënduar. Për këtë, ne kemi nevojë për gazetarë”, shtoi ai.
Papa Leone është shumë i vetëdijshëm për skandalin e “Sodalitium Christianae Vitae”, pasi ai kaloi dy dekada si prift misionar dhe peshkop në Peru – ku grupi u themelua në vitin 1971.
Ipeshkvi i atëhershëm, Robert Prevost ishte përgjegjës për dëgjimin e viktimave të “Sodalitium Christianae Vitae”- si personi i kontaktit të peshkopëve peruanë për viktimat e abuzimit dhe ndihmoi disa prej tyre të arrinin marrëveshje financiare me organizatën.
Pasi Papa Françesku e solli atë në Vatikan në vitin 2023, Prevost ndihmoi në shpërbërjen e plotë të grupit duke mbikëqyrur dorëheqjen e një peshkopi të fuqishëm të “Sodalitium Christianae Vitae”.
Kjo lëvizje u shtyp zyrtarisht në fillim të këtij viti, pak kohë para se të vdiste Papa Françesku.
Tani si papë, Leone duhet të mbikëqyrë shpërbërjen e “Sodalitium Christianae Vitae” dhe aseteve të tij të konsiderueshme.
I dërguari i Vatikanit në terren që merret me punën, Monsinjor Jordi Bertomeu, lexoi mesazhin e Papa Leone të premten në mbrëmje.
Në mesazh, Papa Leone gjithashtu vlerësoi gazetarët për guximin e tyre dhe kërkoi që autoritetet publike t’i mbronin ata.
“Një shtyp i lirë është një e mirë e përbashkët nga e cila nuk mund të hiqet dorë”, tha Papa Leone.
Skandali i abuzimit është një nga dosjet më të vështira me të cilat përballet Papa Leone -veçanërisht duke pasur parasysh kërkesat e të mbijetuarve – për të vazhduar më tej me zbatimin e një tolerance zero për abuzimin në të gjithë kishën, përfshirë abuzuesit. //a.i/
Gjatë audiencës së përgjithshme të mbajtur të mërkurën në Vatikan, Papa Leon XIV ka bërë një thirrje të fuqishme për paqe në të gjitha zonat e përfshira nga lufta. Ati i Shenjtë u shpreh me tone të forta zemra e Kishës copëtohet nga britmat që ngrihen nga frontet e luftës, veçanërisht nga Ukraina, Irani, Izraeli dhe Gaza.
Papa theksoi se lufta nuk duhet të bëhet një realitet i pranueshëm. Duke cituar paraardhësit e tij, ai u bëri apel udhëheqësve botërorë që të veprojnë në frymën e paqes dhe të drejtës ndërkombëtare.
“Nuk duhet të mësohemi me luftën. Përkundrazi, duhet të refuzojmë, si tundim, armët e fuqishme dhe më të avancuara. Në emër të dinjitetit njerëzor dhe të së drejtës ndërkombëtare, u kujtoj përgjegjësve – ashtu siç thoshte Papa Françesku – se lufta është gjithmonë një humbje. Dhe se, siç kishte thënë Papa Piu XII, me paqen nuk humbim asgjë, ndërsa me luftën mund të humbasim gjithçka”, tha Papa.
ROMË, 14 qershor /ATSH-DPA/- Papa Leone XIV bëri thirrje sot për përgjegjësi, arsye dhe dialog në kuadër të konfliktit në rritje midis Izraelit dhe Iranit.
“Askush nuk duhet të kërcënojë kurrë ekzistencën e tjetrit”, tha kreu i Kishës Katolike, në Bazilikën e Shën Pjetrit gjatë një audience të veçantë për të shënuar Jubileun në Romë.
“Duhet të ketë një angazhim për të ndërtuar një botë më të sigurt dhe të lirë nga kërcënimi bërthamor”, theksoi Papa Leone.
Dy ditë pas sulmit të madh surprizë të Izraelit ndaj Iranit, ai u bëri thirrje udhëheqësve të të dy vendeve të tërhiqen nga lufta dhe të angazhohen në dialog për të mirën e përbashkët.
Papa i parë i lindur në SHBA u bëri thirrje gjithashtu shteteve të tjera – të punonin aktivisht drejt zgjidhjeve që garantojnë siguri dhe dinjitet për të gjithë.
“Kjo mbetet e nevojshme për të krijuar një paqe të qëndrueshme të bazuar në drejtësi, vëllazëri dhe të mirën e përbashkët, tha Papa Leone. //a.i/
Presidenti i Rusisë Vladimir Putin ka zhvilluar telefonatën e parë me Papa Leon XIV. Kremlini ka bërë me dije se biseda u përqendrua në përpjekjet për t’i dhënë fund luftës në Ukrainë.
Putin falënderoi Papën për gatishmërinë e tij për të ndihmuar në arritjen e paqes, shprehu shpresën që Selia e Shenjtë të angazhohet më aktivisht në mbrojtjen e lirisë fetare në Ukrainë.
Putin i tha Papës se “Rusia dëshiron paqen”, por theksoi se “autoritetet e Kievit po kërkojnë përshkallëzimin e mëtejshëm të konfliktit”.
Putin ritheksoi “interesin për arritjen e paqes përmes mjeteve politike dhe diplomatike”, por shtoi se për të pasur një “zgjidhje përfundimtare, të drejtë dhe gjithëpërfshirëse”, duhet trajtuar “shkaku i vërtetë dhe i thellë i krizës”.
Kreu i Kremlinit denoncoi veprimet e Ukrainës, duke thënë se “regjimi i Kievit po përpiqet ta përshkallëzojë qëllimisht konfliktin, përmes sulmeve ndaj infrastrukturës civile në territorin rus”.
Ai theksoi se “sulmi i fundit i qëllimshëm ndaj civilëve nga Ukraina është, sipas së drejtës ndërkombëtare, një akt i qartë terrorizmi”.
Papa Leone XIV bekoi sot çiklistët, përpara etapës së fundit të ”Giro d’Italia”.
Papa përshëndeti pjesëmarrësit para fillimit të etapës 143 kilometrërshe, e cila filloi në Vatikan për t’i bërë homazh udhëheqësit të ri të Kishës Katolike dhe për t’i dhënë lamtumirën papa Françeskut, përpara se të hynte në garën zyrtare.
Para se të kalonte nëpër Vatikan, ”Fanella rozë”, Simon Yates dhe çiklistët e tjerë shtrënguan duart me papën, i cili në këmbim mori një fanellë rozë, të veshur tradicionalisht nga udhëheqësi i garës.
“Çiklizmi është shumë i rëndësishëm. Faleminderit për gjithçka që bëni. Shpresoj ta kujtoni gjithmonë rolin tuaj si një model për të tjerët. Jeni gjithmonë të mirëpritur këtu”, tha papa.
“Shpresoj që për të gjithë ju të jetë vërtet një ditë e bukur. Ju falënderoj për gjithçka që bëni. Ju jeni vërtet modele për të rinjtë dhe ashtu siç keni mësuar të kujdeseni për trupin, edhe shpirti është gjithmonë i bekuar. Jini gjithmonë të vëmendshëm ndaj të gjithë qenies njerëzore: trupit, mendjes, zemrës dhe shpirtit. Urime të gjithëve”, përfundoi papa duke bekuar atletët.
Ndalesa në Vatikan thuhet se ishte një nga vendimet e fundit të papa Françeskut, i cili vdiq të hënën e Pashkëve.
Është hera e parë që etapa e fundit e ”Giro”-s kalon nëpër Vatikan./atsh/ KultPlus.com
Papa Leoni XIV rikthehet sërish me një apel të fuqishëm për paqe në botë, duke i bërë thirrje veçanërisht atyre që mbajnë përgjegjësi politike për të punuar drejt një dialogu të sinqertë dhe për të ndalur konfliktet. Pavarësisht se Moska refuzoi ofertën për të zhvilluar një takim për Ukrainën në Romë, Ati i Shenjtë nuk […]
Bazilika romake e Augustinianëve, urdhri fetar i Papa Leo XIV, strehon një pikturë ikonike të ”Virgjëreshës Mari” nga artisti shumë i shquar që revolucionarizoi përdorimin e dritës dhe errësirës në artin perëndimor, Caravaggio, shkruan AP.
Deri më 6 korrik, një ekspozitë e re me vepra të piktorit barok mund të vizitohet në Romë, duke ofruar një vështrim të përditësuar mbi marrëdhënien e tij me spiritualitetin.
Nga ”Madonna dei Pellegrini” në Bazilikën e Sant’Agostinos deri te ”Martirizimi i Shën Ursulës” që mbyll ekspozitën “Caravaggio 2025″, historianët e artit dhe anëtarët e klerit po nxjerrin në pah lidhjet midis besimit fetar dhe dritë-hijeve së Caravaggio-s.
«Është drita që na drejton drejt atyre që për të janë pikat kyçe të historisë. Përvoja jonë jetësore ka kuptim vetëm kur ndriçohet nga një dritë shpirtërore”, theksoi kuratorja e ekspozitës, Francesca Cappelletti.
Në ”Madonna degli Agostiniani”, që daton që nga fillimi i viteve 1600, ajo që i bie në sy vëzhguesit në nivelin e syrit janë shputat e pista të këmbëve të një çifti pelegrinësh të veshur me lecka, të gjunjëzuar para shfaqjes së Virgjëreshës Mari.
Ajo mbështetet shkujdesur në kornizën e një dere ndërsa mban në dorë Jezusin në madhësinë e një foshnjeje.
”Ne jemi larg përfaqësimeve të zakonshme të botës tjetër dhe të shumicës së Madonnave. Kjo e bën atë edhe më prekëse brenda spiritualitetit augustinian, sepse ilustron takimin midis natyrës së njeriut dhe mëshirës së Zotit”, theksoi rektori i bazilikës, Don Pasquale Cormio.
Ne e shohim dëshirën e Zotit për t’iu shfaqur njerëzimit si dikush që ecën përkrah të varfërve. Është e sigurt se kjo Virgjëreshë Mari është afër një njerëzimi ndoshta të lodhur, ndoshta të plagosur, sigurisht edhe të papastër dhe të shtypur nga jeta e përditshme”, shton Cormio.
Emri ”Madonna dei Pellegrini” i referohet jo vetëm dy figurave që qëndrojnë para Marisë, por edhe faktit se në këtë vend, që nga fundi i shekullit të 13-të, augustinianët kanë mirëpritur pelegrinët që shkojnë në Vatikanin aty pranë.
Spiritualiteti i një artisti rebel
”Në të vërtetë, pavarësisht jetës së tij aventureske dhe artit të tij realist, Caravaggio punoi për patronë prestigjiozë dhe të devotshëm, përfshirë një kardinal, dhe është dokumentuar se merrte pjesë në ritet katolike, përfshirë adhurimin eukaristik”, shtoi Zuccari.
Kjo nuk i shkon aspak reputacionit të “artistit të mallkuar” dhe transgresivit që Caravaggio (emri i plotë i të cilit ishte Michelangelo Merisi) ka fituar gjatë shekujve.
”Nuk e dimë çfarë mendonte Caravaggio, sepse ai nuk la asnjë shkrim. Jam i bindur, si ekspertë të tjerë, se Caravaggio ka spiritualitetin e tij”, shton ai.
Nga afërsisht 70 pikturat e Caravaggio-s, më shumë se 50 përshkruajnë shenjtorë ose skena biblike, madje edhe ato të destinuara për koleksione private dhe jo për kisha.
Ndër më të njohurat janë dy duzina piktura të ekspozuara në Palazzo Barberini, të cilat mbulojnë periudhën nga mbërritja e Caravaggio-s në Romë, rreth vitit 1595, deri në vdekjen e tij në vitin 1610.
Ekziston piktura e parë fetare e Caravaggio-s, ”Shën Françesku i Asizit”, i përshkruar në krahët e një engjëlli, ndërsa një nga shokët e tij të parë, Vëllai Leo, mezi shihet në errësirën përreth.
Në atë që është ndoshta piktura e fundit e artistit para se të vdiste në moshën 39 vjeç, dhe e fundit e ekspozuar në ekspozitën e re, Caravaggio portretizoi edhe veten.
Është burri që shikon, i habitur dhe me gojë hapur, nga errësira, ushtarin që sapo ka qëlluar një shigjetë në gjoksin e Shën Ursulës. /atsh/ KultPlus.com
ROMË, 19 maj /ATSH-DPA/- Zëvendëspresidenti i SHBA-së JD Vance u prit sot nga Papa Leone XIV për një audiencë private, në fund të vizitës së tij në Romë.
Kreu i Kishës Katolike u takua me Vance dhe sekretarin amerikan të Shtetit, Marco Rubio në Vatikan.
Kjo u pasua nga një takim midis mysafirëve amerikanë dhe Kryepeshkopit Paul Richard Gallagher, sekretarit të Vatikanit për marrëdhëniet me shtetet e huaja.
Selia e Shenjtë raportoi se gjatë takimeve pati shkëmbime pikëpamjesh mbi luftërat aktuale në të gjithë botën.
“Palëve të përfshira iu bë thirrje për të demonstruar respekt për ligjin humanitar dhe ligjin ndërkombëtar në zonat e konfliktit dhe për të arritur një zgjidhje të negociuar”, tha Vatikani në një deklaratë.
Luftërat specifike nuk u përmendën në deklaratë. Të dielën, Papa Leone përmendi në mënyrë të qartë Gazën, Mianmarin dhe Ukrainën gjatë një meshe në Sheshin e Shën Pjetrit.
Zëvendëspresidenti i SHBA-së mori pjesë në inaugurimin zyrtar të Papa Leone XIV.
“Zyrtarët e lartë komentuan mbi kënaqësinë për marrëdhëniet e mira dypalëshe midis Selisë së Shenjtë dhe Shteteve të Bashkuara të Amerikës”, tha Vatikani. //a.i/
Papa Leoni XIV nisi zyrtarisht shërbimin e tij të dielën duke iu drejtuar konservatorëve që ndiheshin të përjashtuar nën paraardhësin e tij, duke bërë thirrje për unitet, duke premtuar ruajtjen e trashëgimisë së Kishës Katolike dhe duke deklaruar se nuk do të qeverisë si “një autokrat”.
Pas një parade të parë me papamobilin përmes një turme me rreth 200.000 njerëz në Sheshin e Shën Pjetrit dhe rrugët përreth, Leoni u kurorëzua zyrtarisht si papa i 267-të i Kishës Katolike Romake gjatë një meshë në ambient të hapur.
Mbështetësit valëvitnin flamuj amerikanë dhe peruanë, me njerëz nga të dy vendet që e shpallin atë si papën e parë nga kombet e tyre. I lindur në Çikago, papa 69-vjeçar kaloi shumë vite si misionar në Peru dhe ka gjithashtu shtetësi peruviane.
Robert Prevost, një figurë relativisht e panjohur në skenën botërore që u bë kardinal vetëm dy vjet më parë, u zgjodh papa më 8 maj pas një konklavi të shkurtër kardinalësh që zgjati rreth 24 orë.
Ai pasoi Françeskun, një argjentinas që vdiq më 21 prill pas një udhëheqjeje 12-vjeçare shpesh të trazuar gjatë së cilës u përball me tradicionalistët dhe mbrojti të varfrit e të margjinalizuarit.
Në predikimin e tij, të lexuar në italishte të rrjedhshme, Leoni tha se si udhëheqës i 1.4 miliard katolikëve në mbarë botën, ai do të vazhdojë trashëgiminë e Françeskut në çështje sociale si lufta kundër varfërisë dhe mbrojtja e mjedisit.
Ai premtoi se do të përballet me “pyetjet, shqetësimet dhe sfidat e botës së sotme” dhe, në një gjest ndaj konservatorëve, premtoi të ruajë “trashëgiminë e pasur të fesë së krishterë”, duke bërë thirrje të përsëritura për unitet.
Nënpresidenti amerikan, JD Vance, një i konvertuar në katolicizëm që u përplas me Françeskun për politikat e ashpra të emigracionit të Shtëpisë së Bardhë, udhëhoqi delegacionin amerikan së bashku me sekretarin e Shtetit, Marco Rubio, gjithashtu katolik.
Vance shtrëngoi dorën shkurtimisht me presidentin ukrainas, Volodymyr Zelensky, në fillim të ceremonisë. Të dy u takuan për herë të fundit në shkurt në Shtëpinë e Bardhë, kur u përplasën fort përpara mediave botërore.
Zelensky dhe Papa Leoni pritet ta mbajnë një takim privat më vonë gjatë të dielës, ndërsa Vance pritet të takohet me papën të hënën.
Në një apel të shkurtër në fund të meshës, Papa Leoni iu referua disa konflikteve globale. Ai tha se Ukraina po “martirizohet”, një frazë e përdorur shpesh nga Françesku, dhe bëri thirrje për një “paqe të drejtë dhe të qëndrueshme” atje. Ai përmendi gjithashtu situatën humanitare në Gazë.
Ndër ata që ishin në turmë të dielën kishte shumë pelegrinë nga SHBA-ja dhe Peruja. Që nga zgjedhja si papë, Leoni ka sinjalizuar disa prioritete kyçe për papatin e tij, përfshirë një paralajmërim për rreziqet e inteligjencës artificiale dhe rëndësinë e sjelljes së paqes në botë dhe brenda vetë Kishës. Papati i Françeskut la një Kishë të përçarë, me konservatorët që e akuzonin atë për krijimin e konfuzionit.
Duke thënë se po merrte këtë mision “me frikë dhe dridhje”, Leoni përdori fjalët “unitet” ose “të bashkuar” shtatë herë të dielën dhe fjalën “harmoni” katër herë.
Konservatorët gjithashtu akuzuan Françeskun se qeveriste në mënyrë autoritare dhe ankohen se ai i përçmonte shqetësimet e tyre dhe nuk konsultohej gjerësisht përpara marrjes së vendimeve.
Duke iu referuar Shën Pjetrit, apostullit të krishterë të shekullit të parë nga i cili papët e nxjerrin autoritetin e tyre, Leoni tha: “Pjetri duhet të kullosë kopenë pa iu dorëzuar ndonjëherë tundimit për të qenë autokrat, duke sunduar mbi ata që i janë besuar. Përkundrazi, ai thirret t’i shërbejë besimit të vëllezërve dhe motrave të tij dhe të ecë përkrah tyre”.
Shumë udhëheqës botërorë morën pjesë në ceremoni, përfshirë presidentët e Izraelit, Perusë dhe Nigerisë, kryeministrat e Italisë, Kanadasë dhe Australisë, kancelarin gjerman, Friedrich Merz, dhe presidenten e Komisionit Evropian, Ursula von der Leyen./REL
ROMË, 18 maj /ATSH-DPA/- Kancelari gjerman, Friedrich Merz e ka përshkruar inaugurimin e Papa Leone XIV në Sheshin e Shën Pjetrit si një “moment frymëzues”.
Një katolik praktikues, politikani konservator mori pjesë sot në Meshën inauguruese të Papa Leone XIV, së bashku me dhjetëra mijëra besimtarë dhe përfaqësues të lartë nga rreth 150 vende.
Merz shprehu mirëkuptim për kritikën e Papa Leone XIV ndaj kapitalizmit gjatë predikimit të tij, duke vënë në dukje se mesazhe të tilla ishin pjesë e “përgjegjësive thelbësore” të Papës.
Pas ceremonisë, Merz u takua me Papa Leone në Bazilikën e Shën Pjetrit, ku shkëmbyen disa fjalë.
Në predikimin e tij, Papa i ri kërkoi solidaritet më të madh me më të varfrit e botës, duke paralajmëruar për rrezikun e margjinalizimit të tyre të mëtejshëm.
“Merz u takua sot në mëngjes, gjithashtu me kryeministrin kanadez, Mark Carney në Romë, përpara inaugurimit”, sipas një deklarate qeveritare.
“Të dy udhëheqësit shkëmbyen pikëpamjet e tyre lidhur me çështjet kryesore ndërkombëtare, duke përfshirë luftën në Ukrainë, marrëdhëniet tregtare dhe bashkëpunimin energjetik”, thuhet në deklaratë.
Papa Leone, 69-vjeçari, Robert Francis Prevost i Çikagos, u bë udhëheqësi i ri i Kishës Katolike Romake, pas vdekjes së paraardhësit të tij, Papa Françesko, më 21 prill. //a.i/
ROMË, 18 maj /ATSH-DPA/- Papa Leone XIV bëri thirrje për unitet më të madh global dhe dënoi dëmet e kapitalizmit dhe pushtetit të pakontrolluar – gjatë meshës inauguruese sot në Sheshin e Shën Pjetrit – përpara dhjetëra mijëra njerëzve, përfshirë të ftuarve shtetërorë.
“Ne ende përjetojmë shumë mosmarrëveshje, shumë plagë të shkaktuara nga urrejtja, dhuna, paragjykimet, frika nga të tjerët dhe një model ekonomik që shfrytëzon burimet e Tokës dhe margjinalizon më të varfrit”, tha Papa i ri në Vatikan.
Papa Leone, ish-kardinali 69-vjeçar Robert Francis Prevost i Çikagos, tha se shpresonte që Kisha Katolike të mund të bëhej një forcë për shërim dhe pajtim.
Mesha inauguruese shënon fillimin zyrtar të tij si Papa i Vatikanit.
Që nga zgjedhja e tij si Papa i 267-të më 8 maj, ai u ka bërë vazhdimisht thirrje udhëheqësve botërorë të punojnë për t’i dhënë fund konfliktit global.
Kohët e fundit, Papa Leone XIV ofroi Vatikanin si një vend për negociata paqeje midis Ukrainës dhe Rusisë.
Papa Leone konsiderohet si një ndërtues urash i moderuar, i cili mund të ndërmjetësojë midis kampeve të ndryshme brenda Kishës.
Besohet, gjerësisht se kjo është një nga arsyet pse ai u zgjodh nga konklava e kardinalëve.
Në mesazhin e tij inaugurues, Papa Leone tha se do të punonte për unifikimin e Kishës – dhe se ky kohezion mund të shërbente si shembull për të tjerët. //a.i/
Një delegacion i lartë nga Shqipëria do të marrë pjesë në ceremoninë e përurimit të Atit të Shenjtë, Papa Leoni XIV. Ceremonia solemne do të zhvillohet në Vatikan, dhe do të nisë në orën 10:00.
Pjesë e delegacionit të Shqipërisë do të jetë Presidenti Bajram Begaj, ministri i Jashtëm Igli Hasani dhe krerë të komuniteteve fetare.
Po ashtu të pranishëm do të jenë edhe krerë e përfaqësues të komuniteteve fetare në Shqipëri. Kisha Katolike do të përfaqësohet nga Imzot Arjan Dodaj, Imzot Gjergj Meta dhe Imzot Simon Kulli, ndërsa nga Kisha Ortodokse do të marrin pjesë Mitropoliti Nikolla dhe At Ignat Todri. Komuniteti Mysliman përfaqësohet nga Bujar Spahiu dhe Ejup Lila, ndërsa Kryegjyshata Bektashiane nga Baba Mondi dhe gazetari Ferdinand Samarxhi.
Të hënën në orën 9:30, delegacionet do të marrin pjesë në audiencën e posaçme me Papa Leo XIV, nën shoqërinë e ambasadores shqiptare në Vatikan, Majlinda Frangaj.
Çfarë është Mesha e Kurorëzimit?
Kjo është Mesha e Inagurimit që do të shënojë zyrtarisht fillimin e shërbesës Petrine të Papës . Leo XIV, i cili do të marrë përqafimin e besimtarëve nga e gjithë bota, do të mbajë një fjalim “programatik”, në të cilin do të lartësojë parimet, vlerat dhe udhëzimet e Papnisë së tij . Në të kaluarën, Françesku e kishte thjeshtuar ritin, por ai mbetet ende një nga Meshat më solemne në Vatikan. Nuk janë publikuar të gjitha detajet e eventit deri më tani, por festimi pritet të zgjasë të paktën disa orë.
Login
