TIRANË, 20 qershor /ATSH/ Kryetari i Partisë Demokratike Sali Berisha në një konferencë për mediet u ndal sot tek procesi elektoral në diasporë ku theksoi se “zgjedhjet u manipuluan”.

Berisha tha se “dokumente të pakundërshtueshme faktojnë krimin e shëmtuar kushtetues elektoral, manipulimin e tij ekstrem, shtetëzimin e procesit të votimit të diasporës nëpërmjet akteve më madhore korruptive të njohura ndonjëherë”.

“Shtetëzimi dhe manipulimi i votës së shumicës së shqiptarëve që jetojnë jashtë vendit, që kësaj here me një përfaqësi prej 340 mijë vetësh zgjodhën të votojnë, është një goditje e rëndë e idealeve të lirisë së shqiptarëve, e përpjekjeve të tyre madhore për të qenë së bashku, pavarësisht se ku jetojnë, për të gëzuar të drejtat kushtetuese të vendit të origjinës”, u shpreh Berisha.

Berisha tha ndër të tjera në fjalën e tij se ka besim se diaspora do të angazhohet kundër qeverisë dhe do të kontribuojë në rivendosjen e të drejtës së votës së qytetarëve shqiptarë.

“PD në betejën e saj, në luftën e saj për votën e lirë të shqiptare, ka besimin më të madh se diaspora shqiptare do të mobilizohet dhe angazhohet me të gjithë forcën, potencialin e saj, kundër narkodiktaturës në Shqipëri dhe do japë kontributin e madh në rivendosjen e të drejtës së votës qytetarëve shqiptarë në Shqipëri dhe kudo që janë.

“Ftoj qytetarët shqiptarë që kanë votuar që të përgatiten për një luftë pa kompromis kundër këtij narkoshteti si një ndëshkim i merituar për krimin monstruoz që kreu ndaj atyre dhe vendit dhe për rikthimin e të drejtës së votës qytetarëve shqiptarë”, tha Berisha.

Berisha publikoi disa video për të cilat tha se janë “dëshmi e manipulimit të votave të diasporës”.

Kreu i PD-së tha se “jemi në fazën e dokumentimit të farsës, më pas do nisin të gjitha format e domosdoshme të protestave në Shqipëri dhe në botë”.

Duke iu përgjigjur pyetjeve të gazetarëve, Berisha tha se “vendi nuk mund të ketë opozitë të vërtetë pa rikthyer votën e lirë”.

“Ka vetëm një objekt tani, shqiptarët duhet të votojnë të lirë. Opozitë të vërtetë pa rikthyer votën e lirë, vendi nuk mund të ketë. Nuk mund të jetë opozitë e vërtetë ajo e cila pajtohet me këtë situatë. Ndaj dhe opozita do mobilizojë të gjithë potencialet e saj t’u rikthejë shqiptarëve votën e lirë”, u shpreh Berisha.

/m.q/j.p/

The post Berisha: Mobilizim i opozitës për të rikthyer votën e lirë appeared first on Agjencia Telegrafike Shqiptare.

TIRANË, 14 qershor /ATSH/ Partia Demokratike tha sot se gjatë procesit të votimit në diasporë kompania postare DHL e kontraktuar nga Komisioni Qendror i Zgjedhjeve (KQZ) për shpërndarjen e zarfeve, nuk ka zbatuar kushtet e kontratës.

Zëdhënësja e Antikorrupsionit në PD, Genta Vangjeli në një deklaratë për shtyp, duke iu referuar prononcimit të komisionerit Shtetëror të Zgjedhjeve Ilirjan Celibashit, se “procesi i votimit nga jashtë është zhvilluar në mënyrë model”, tha se ky i fundit duhet të japë shpjegim se pse zarfet me vota u tërhoqën nëpër “tabachino”.

Vangjeli publikoi disa foto për të cilat tha se “kanë mbërritur në adresën tonë nga qytetarë që jetojnë në Greqi dhe votuan në këtë vend, të cilët deklarojnë se tërhoqën dhe dorëzuan zarfet me fletët e votimit në magazina ku shiten cigare e jo vetë”.

“Ky ishte procesi model sipas Celibashi, ku adresat e qytetarëve janë nëpër “tabachino”, dhe zarfet tërhiqen e dorëzohen në këto ambient. Këto sa i takon votimit në Greqi, ndërkohë akoma nuk kemi një përgjigje përse DHL nuk paraqet provat e dorëzimit të zarfit tek çdo votues në diasporë, në Itali, Shtetet e Bashkuara apo Mbretërinë e Bashkuar”, u shpreh Vangjeli.

Vangjeli shtoi se “Celibashi duhet të jetë me dije se përgjegjësia e KQZ-së fillon me procedurën e prokurimit, zbatimin e saj, lidhjen dhe implementimin e plotë e të suksesshëm të kontratës përfshirë mirëmenaxhimin e fondeve publike”, tha Vangjeli.

“E meqenëse kontrata është ende në fazë zbatimi të marri masat e parashikuara në aktet ligjore dhe në kontratën respektive kundrejt përgjegjësve të dështimit të përmbushjes së detyrimeve kontraktuale”, u shpreh Vangjeli. /j.p/

The post Vota e diasporës, PD: Procesi “model” i Celibashit me zarfe në “tabachino” appeared first on Agjencia Telegrafike Shqiptare.

TIRANË, 10 qershor/ATSH/ Kreu i Komisionit Qendror të Zgjedhjeve, Ilirjan Celibashi tha sot se procesi i votimit nga jashtë ka qenë model, ndërsa nga kontrata me shërbimin postar DHL ka kursyer 1.5 deri 2 milionë euro.

“Procesi i votimit nga jashtë, pa asnjë lloj droje e hezitimi them se ka shkuar shumë mirë. I kuptoj pretendimet e kujtdo subjekti zgjedhor, ka pasur problematika por duke i kalkuluar dhe efektin e këtyre problematikave, mendoj se procesi i votimit nga jashtë është zhvilluar në mënyrë model. Episodet, veçanërisht ato të shpërndarjes së zarfeve në Greqi, me bindje për mua nuk e cenojnë këtë proces. Për mënyrën se si u organizua procesi dhe për integritetin e këtij procesi. Jam i ndërgjegjshëm që për opozitën kjo gjë nuk qëndron kështu, por jam i bindur për këtë gjë. Kursimi i parave në lidhje me votimin nga jashtë, s’e ka cenuar standardin e këtij procesi. Nëse nuk gaboj janë tek rreth 1.5-2 milionë euro të kursyera vetëm për pagesën e shërbimit postar. Sikurse thashë kemi kursime edhe nga aspekte të tjera të procesit të votimit dhe brenda vendit”, tha Celibashi.

Kryekomisionieri tha se puna në KQZ do të vazhdojë pa ndërprerje, ndërsa janë anuluar edhe lejet e verës për punonjësit e KQZ-së, pasi do të ketë angazhim të administratës së këtij institucioni në rinumërimin e votave për qarkun e Tiranës dhe Fierit.

“Do vazhdojmë pa ndërprerje, gjithë administrata do jetë në punë, kemi anuluar dhe lejet vjetore për gjithë stafin, për të qenë në punë edhe gjatë korrikun edhe gushtit. Me siguri që sikurse e thashë vetëm për këto dy qarqe do duhen 18-20 ditë, për të përfunduar procesin e rinumërimit, shto edhe ditët që do mund të duhen për ankimet në Kolegj. Edhe gjysma e parë e muajit gusht do na gjejë të angazhuar me procesin zgjedhor të 11 majit. Të dyja qarqet për 18 deri në 20 ditë”, u shpreh ai.

Gjithashtu, Celibashi nënvizoi faktin se KQZ nuk do të kërkojë fonde shtesë për procesin e rinumërimit të votave për qarkun Fier dhe Tiranë. “KQZ s’do kërkojë fonde shestë për këtë proces, kemi kursyer fonde nga procesi i votimit nga jashtë, nga kontrata që kemi me operatorin e shërbimit postar dhe aspekte të tjera të këtij procesi dhe procesit zgjedhor më tërësi. Nga një vlerësim paraprak, s’do kemi nevojë për fonde shtesë për këtë proces”, tha Celibashi.

/a.f/

The post Celibashi: Votimi nga jashtë ishte model, kursyem rreth 2 milion euro nga kontrata me shërbimin postar appeared first on Agjencia Telegrafike Shqiptare.

TIRANË, 22 maj /ATSH/ Komisioneri Shtetëror i Zgjedhjeve Ilirjan Celibashi e cilësoi procesin e votimit nga jashtë si një model suksesi për sa i përket punës së administruar nga Komisioni Qendror i Zgjedhjeve.

I pyetur në lidhje me pretendimet e opozitës për parregullsi dhe manipulime, Celibashi tha se sa i takon përgjegjësisë së KQZ-së “jemi në gjendje t’u japim subjekteve politike përgjigje për çdo lloj pretendimi”.

“Administrimi këtij procesi nga KQZ është model nga çdo pikëpamje. Duke thënë këtë nuk dekurajoj askënd dhe njoh të drejtën e gjithkujt për ta kontestuar dhe për të prezantuar atë se çfarë është mbështetëse e pretendimeve të çdo subjekti, për çfarë mendon se subjekti nuk është zhvilluar siç duhet”, tha Celibashi.

“Kemi të gjithë dokumentacionin apo elementët të tjera që konfirmojnë atë që unë thash, që ky proces është zhvilluar model dhe çfarë është zhvilluar nën përgjegjësinë e KQZ-së jap garanci të plotë që standardi, integriteti i asaj që është administruar nga KQZ, është i plotë. Jemi në gjendje tu japim përgjigje çdo lloj pretendimi për atë që KQZ ka pasur nën përgjegjësinë e vet”, tha Celibashi.

Sa i përket punës së kryer nga shërbimi postar DHL, Celibashi u shpreh se “i kemi kërkuar që të na vërë në dispozicio të gjithë dokumentacionin i cili besohet, mendohet se tregon sesi është bërë operacioni i shpërndarjes së fletëve të votimit, të dokumentacionit zgjedhor kudo në botë përfshirë edhe Greqinë. Do t’ja vëmë në dispozicion subjekteve politike”.

“Është me rëndësi ta theksoj se të gjitha partitë politike e dinë këtë, që procesi i përgatitjes së dokumentacionit zgjedhor në Parkun Olimpik, dorëzimi i dokumentacionit tek operatori i shërbimit postar, është një proces që garanton 100% integritetin e procesit të votimit nga jashtë”, tha Celibashi.

Sipas Celibashit dokumentacioni zgjedhor në Parkun Olimpik është monitoruar nga përfaqësues të subjekteve politike dhe nga kamerat.

“Kjo vlen edhe për rastin e kthimit të dokumentacionit zgjedhor nga DHL tek KQZ. Gjithë ky segment është zhvilluar nën mbikëqyrjen e përfaqësuesve të partive politike, të organizatave të shoqërisë civile. Ka qenë 24/7 i monitoruar nga kamerat. Çdo gjë ka shkuar siç duhet të shkonte, nuk ka fletë votimi të shtuara, as vota të trafikuara. Ngelet të vlerësojmë pretendimet që lidhen me sa është respektuar integriteti i votës së shqiptarëve në procesin e marrjes së fletëve të votimit dhe të kthimit të tyre nëpërmjet shërbimit postar”, u shpreh Celibashi.

/a.f/

The post Votimi nga jashtë, Celibashi: Proces model nga administrimi i KQZ-së, u monitorua nga partitë politike dhe kamerat 24/7 appeared first on Agjencia Telegrafike Shqiptare.

TIRANË, 20 maj /ATSH/ Kryetari i Komisionit Qendror të Zgjedhjeve, Ilirjan Celibashi, bëri me dije sot se ka përfunduar, procesi i numërimit dhe vlerësimit të votave nga jashtë për kandidatët e votimit preferencial në listë të hapur në 12 qarqet e vendit.

Sipas Celibashit, numërimi për kandidatët preferencial në votimin nga jashtë ka përfunduar në Kukës, Shkodër, Dibër, Durrës, Fier, Tiranë, Berat, Lezhë, Vlorë, Gjirokastër, Korçë dhe Elbasan.

Numërimi i votave të diasporës ka përfunduar po ashtu edhe për subjektet politike, pjesëmarrëse në zgjedhjet parlamentare të 11 majit. Nga 246 mijë votues të regjistruar në platformën elektronike PER, më shumë se 200 mijë votues kthyen zarfet me fletët e votimit për subjektet politike dhe kandidatët e votimit preferencial.

/a.f/

The post Celibashi: Përfundon numërimi i votave nga jashtë appeared first on Agjencia Telegrafike Shqiptare.

TIRANË, 20 maj /ATSH/ Komisioni Qendror i Zgjedhjeve bëri me dije se ka përfunduar procesi i numërimit dhe vlerësimit të votave nga jashtë për kandidatët e votimit preferencial (në listë “të hapur”) në 11 qarqe.

Konkretisht ka përfunduar numërimi në qarqet Kukës; Shkodër; Dibër; Durrës; Fier; Tiranë; Berat; Lezhë; Vlorë; Gjirokastër; Korçë.

Sipas KQZ-së “vijon numërimi dhe vlerësimi votave për kandidatët që i janë nënshtruar votimit parapëlqyes për qarkun Elbasan”.

Në bazë të rezultatit të publikuar nga KQZ të votimit nga jashtë, Partia Socialiste ka marrë 122 236 vota, Partia Demokratike-Aleanca për Shqipërinë Madhështore 47 056 vota. Partia e tretë është renditur Nisma Shqipëria Bëhet e cila ka marrë 14 800 vota.

/a.f/

The post Votimi nga jashtë, KQZ: Përfundon numërimi për kandidatët në 11 qarqe, vijon në Elbasan appeared first on Agjencia Telegrafike Shqiptare.

TIRANË, 19 maj /ATSH/ Kryekomisioneri Shtetëror i Zgjedhje Ilirjan Celibashi bëri me dije se janë edhe 50 mijë fletëvotimi nga jashtë për t’u numëruar sa i përket votave për kandidatët.

Në një konferencë për mediet sot Celibashi evidentoi gjithashtu se “201 795 është numri i fletëve të votimit të vlerësuara, prej të cilave 199 824 janë fletëvotimi të vlefshme. 1971 janë të pavlefshme. Për ta kuptuar më qartë, janë 201 795 votues nga jashtë”.

“Numri i votave për kandidatët nga një vlerësim paraprak janë rreth 50 mijë të tilla. Janë rreth 50 mijë vota për kandidatë që janë akoma për t’u vlerësuar për 9 qarqe”, tha Celibashi, ndërsa në Kukës, Shkodër dhe Dibër numërimi ka përfunduar.

Celibashi shtoi se “në momentin që flasim po vazhdon vlerësimi i fletëve të votimit për kandidatët, janë duke u rivlerësuar. Po vlerësohen vetëm ato fletëvotimi në të cilat ka pasur votë për kandidatët”.

Celibashi theksoi gjithashtu se “janë 201 956 dërgesa apo dokumentacion zgjedhor unik të dorëzuar nga DHL në KQZ. Janë zarfe të DHL-së të dorëzuar në KQZ, zgjedhës që e kanë kthyer mbrapsht fletën e votimit nëpërmjet shërbimit të DHL, dhe janë 353 dërgesa të tjera postare unike, pra zgjedhës të tjerë të cilët e kanë kthyer në KQZ jo nëpërmjet DHL. Nga 353 të tilla 107 i janë nënshtruar procesit të shqyrtimit dhe vlerësimit nga KQZ”, tha Celibashi.

Celibashi shtoi se këto zarfe nuk kanë ardhur nëpërmjet rrugës normale, por shërbimit postar të operatorit tjetër postar, përfshirë dhe Postën Shqiptare.

“6 zgjedhës e kanë dorëzuar personalisht. 347 të tjerë kanë ardhur me postë tjetër. I kemi garantuar që dërgimi i zarfeve të bëhet nëpërmjet një operatori të zgjedhur për të cilin zgjedhësi nuk paguante kosto shtesë. Asnjë prej zgjedhësve nuk pengohej që këtë zarfin ta dërgonte nëpërmjet një shërbimi tjetër postar”, u shpreh Celibashi.

/r.e/a.f/

The post Celibashi: Janë 201 795 votues nga jashtë, 1 971 fletëvotimi të pavlefshme appeared first on Agjencia Telegrafike Shqiptare.

TIRANË, 18 maj /ATSH/ Numërimi i votave të diasporës për subjektet politike ka përfunduar në të gjithë vendin.

Sipas Komisionit Qendror të Zgjedhjeve numërimi dhe vlerësimi i fletëve të votimit nga jashtë për subjektet zgjedhore ka përfunduar në qarqet: Durrës; Tiranë; Shkodër; Dibër; Lezhë; Fier; Vlorë; Elbasan; Berat; Gjirokastër, Korçë dhe Kukës.

“Procesi i numërimit dhe vlerësimit të fletëve të votimit nga jashtë për subjektet zgjedhore”, njoftoi KQZ.

KQZ bëri me dije se “ka filluar procesi i numërimit dhe vlerësimit të votave nga jashtë për kandidatët e votimit preferencial (në listë “të hapur”) në qarqet: Durrës; Tiranë; Shkodër; Fier; Lezhë; Dibër; Elbasan; Vlorë; Berat; Gjirokastër”.

Sipas KQZ-së për qarkun Kukës ka përfunduar procesi i numërimit dhe vlerësimit të votave nga jashtë edhe për kandidatët e votimit preferencial (në listë “të hapur”).

/a.f/

The post KQZ: Përfundon numërimi i votave nga jashtë për partitë, vijon numërimi për kandidatët appeared first on Agjencia Telegrafike Shqiptare.

TIRANË, 18 maj /ATSH/ Kryekomisioneri Shtetëror i Zgjedhjeve Ilirjan Celibashi ka dhënë detaje në lidhje me procesin e numërimit të votimit jashtë vendit, konkretisht nga Greqia.

Nëpërmjet një postimi në rrjetet sociale, Celibashi bëri me dije se “ka përfunduar numërimi dhe vlerësimi i fletëve të votimit nga jashtë (Greqi) për subjektet zgjedhore në qarqet: Durrës; Tiranë; Shkodër; Dibër; Lezhë; Fier; Vlorë; Elbasan”.

Celibashi theksoi se vijon procesi i numërimit dhe vlerësimit të fletëve të votimit nga jashtë (Greqi) për subjektet zgjedhore në qarqet: Korçë; Gjirokastër; Berat.

Po ashtu sipas kryekomisionerit “ka filluar procesi i numërimit dhe vlerësimit të votave nga jashtë për kandidatët e votimit preferencial (në listë “të hapur”) në qarqet: Durrës; Tiranë; Shkodër; Fier; Lezhë; Dibër; Elbasan; Vlorë”.

“Për qarkun Kukës ka përfunduar procesi i numërimit dhe vlerësimit të votave nga jashtë për kandidatët e votimit preferencial (në listë “të hapur”)”, theksoi Celibashi.

/a.f/

The post Votimi nga Greqia, Celibashi: Ka përfunduar numërimi për 8 qarqe appeared first on Agjencia Telegrafike Shqiptare.

TIRANË, 15 maj /ATSH/ Partia Demokratike i është drejtuar me një kërkesë Komisionit Qendror të Zgjedhjeve për t’i vënë në dispozicion dokumentacionin lidhur me procesin e votimit nga Diaspora.

Kërkesa, e firmosur nga Sekretari i Përgjithshëm i PD-së, Flamur Noka, konstaton disa pika.

Pika e parë lidhet me dokumentacionin juridiko-ligjor që vërteton se çdo emigrant i regjistruar në platformën PER ka marrë dhe dorëzuar zarfin personalisht, ka firmosur vetë dhe ka paraqitur mjet identifikimi.

Së dyti PD kërkon “numrin e fletëve të votimit (zarfeve) të diasporës të papërdorura, vendndodhjen aktuale të tyre dhe kushtet e sigurisë. Kërkojmë rakordimin e inventarit të këtyre zarfeve në çdo fazë të procesit: zarfin, dorëzim tek DHL dhe gjendja faktike e tyre sot – të mbështetur me dokumentacion provues të plotë”.

Në pikën e tretë PD kërkon “numrin e fletëve të votimit të diasporës të vulosura nga KQZ, por ende të papërdorura (pra, të pashpërndara – përfshirë këtu edhe ato të fondit rezervë)”.

Së katërti, PD-ja kërkon numrin e sasisë së zarfeve të papërdorura A dhe B, si dhe vendndodhjen e tyre aktuale.

Së pesti, kërkohet sa zarfe janë dorëzuar tek DHL-ja, sa janë kthyer pas si të parregullta për t’u marrë në administrim shpërndarje nga kompania postare, si dhe ato që janë kthyer nga DHL-ja pas dorëzimit dhe marrjes së zarfeve nga votuesi emigrant.

Partia Demokratike kërkon gjithashtu procesverbalet mbi gjendjen numerike dhe fizike të dërgesave postare që DHL-ja ka raportuar në zonën doganore dhe ka administruar në ambientet e dedikuara postare. Kjo pikë parashikon dhe informacionin nëse ka pasur ndërhyrje në ndonjë rast nga ana e autoriteteve doganore apo policore mbi zarfet.

Që në nisje të procesit të numërimit të votave të diasporës, Partia Demokratike kërkoi ndarjen e zarfeve që vinin nga Greqia, pasi pretendon për parregullësi. /j.p/

The post PD i kërkon KQZ-së dokumentacionin e procesit të votimit nga diaspora appeared first on Agjencia Telegrafike Shqiptare.

TIRANË, 14 maj /ATSH/ Procesi i numërimit të votave të zgjedhësve nga jashtë vendit vijon.

Sipas të dhënave të publikuara nga Komisioni Qendror i Zgjedhjeve, sot deri në orën 22:00′ janë numëruar 113 509 zarfe me vota nga 194 889 që janë në total.

Nga këto, Partia Socialiste ka marrë 60 845 vota ose 54.11% në total, ndërsa Partia Demokratike e cila renditet e dyta ka marrë 31 739 vota ose 28.22% në total.

Partia e tretë më e votuar nga diaspora është “Nisma Shqipëria Bëhet” me 9 391 vota ose 8.35% në total.

Nr		Subjekti	Sigla	Vota	%
1.		Koalicioni Partia Demokratike – Aleanca për Shqipërinë Madhështore	PD-ASHM	31739		28.22 %
2.		Lëvizja Bashkë	BASHKE	3019		2.68 %
3.		Lëvizja Atdheu	LA	176		0.16 %
4.		Partia Koalicioni Euroatlantik	KEA	808		0.72 %
5.		Partia Socialiste e Shqipërisë	PS	60845		54.11 %
6.		Koalicioni Nisma Shqipëria Bëhet	NISMA-SHB	9391		8.35 %
7.		Partia Aleanca Kombëtare Shqiptare	AKSH	625		0.56 %
8.		Partia Aleanca Demokracia e Re	ADR	65		0.06 %
9.		Koalicioni Djathtas për Zhvillim	DZH	327		0.29 %
10.		Partia Mundësia	MUNDESIA	4132		3.67 %
11.		Partia Socialdemokrate	PSD	1323		1.18 %

/a.f/

The post Numërohen 113 509 vota nga jashtë, PS merr 54.11%, PD 28.22% appeared first on Agjencia Telegrafike Shqiptare.

TIRANË, 14 maj /ATSH/ Procesi i numërimit të votave të zgjedhësve jashtë vendit vijon.

Sipas të dhënave të publikuara nga Komisioni Qendror i Zgjedhjeve, sot deri në orën 17:30 janë numëruara 100 835 zarfe me vota nga 194 889 që janë në total.

Nga këto, Partia Socialiste ka marrë 54 164 ose 54.20% në total, ndërsa Partia Demokratike e cila renditet e dyta ka marrë 28 273 vota ose 28.29% në total.

Partia e tretë më e votuar nga diaspora është “Nisma Shqipëria Bëhet” me 8 402 vota ose 8.41% në total.

Partia Mundësia ka marrë 3 589 vota

Lëvizja Bashkë ka marrë 2 615 vota

Partia Socialdemokrate ka marrë 1 155 vota

Partia Koalicioni Euroatlantik ka marrë 700 vota

Koalicioni Djathtas për Zhvillim 272 vota

Partia Aleanca Kombëtare Shqiptare ka marrë 561 vota.

Lëvizja Atdheu ka marrë 150 vota

Partia Aleanca Demokracia e Re 56 vota

/a.f/

The post Numërohen 100 835 fletëvotimi nga jashtë, PS 54.2%, PD 28.29% appeared first on Agjencia Telegrafike Shqiptare.

TIRANË, 13 maj /ATSH/ Komisioni i Ankimimeve dhe Sanksioneve zhvilloi sot seancën publike për shqyrtimin e kërkesës së depozituar nga Partia Socialiste për shfuqizimin e aktit të Komisionerit Shtetëror të Zgjedhjeve, Ilirjan Celibashi lidhur me mënyrën e administrimit të fletëve të votimit nga jashtë konkretisht nga Greqia, duke e konsideruar si të pavlefshëm dhe të nxjerrë në kundërshtim me ligjin.

Përfaqësuesja e Partisë Socialiste në KQZ, Elena Xhina tha se “vendimi duhet të shfuqizohet”.

“Akti nuk është nxjerrë në përputhje të dispozitave ligjore. Kërkojmë të shpallet si një akt absolutisht i pavlefshëm”, tha Xhina.

Në përfundim të mbledhjes, KAS vendosi pranimin e ankimimit të PS-së dhe konstatimin e pavlefshmërisë absolute të vendimit të KSHZ-së.

“Vendosi pranimin e kërkesës ankimore të PS-së konstatimin e pavlefshmërisë absolute të vendimit të Komisionarit Shtetëror të Zgjedhjeve për administrimin e zarfit B pjesë përbërëse e dokumentacionit të votimit nga jashtë në rastin kur ai nuk vlerësohet nga GNVJ dhe KANVVJ”, tha Ledio Braho anëtar i KAS.

/r.e/j.p/

The post KAS pranon ankimimin e PS-së: Shpallet i pavlefshëm vendimi i Celibashit për votat nga Greqia appeared first on Agjencia Telegrafike Shqiptare.

TIRANË, 13 maj/ATSH/ Komisioni Qendror i Zgjedhjeve ka publikuar të dhënat e procesit të numërimit të votave për zgjedhjet parlamentare të 11 majit për votuesit nga jashtë. Në total janë numëruar 38 806 zarfe të ardhura nga diaspora, nga 194 889 në total.

Sipas rezultati të publikuar nga Komisioni Qendror i Zgjedhjeve deri në orën 09:10, 21 305 vota janë për Partinë Socialiste, ndërsa 10 951 vota janë për Partinë Demokratike – Aleanca për Shqipërinë Madhështore.

Koalicioni “Nisma Shqipëria Bëhet” ka marrë 1161 vota

Partia Mundësia ka marrë 1196 vota

“Lëvizja Bashkë” ka marrë 934 vota

Partia Socialdemokrate ka marrë 361 vota

Partia Koalicioni Euroatlantik ka marrë 248 vota

Koalicioni Djathtas për Zhvillim ka marrë 100 vota

Partia Aleanca Kombëtare Shqiptare ka marrë 227 vota

Lëvizja Atdheu ka marrë 49 vota

Partia Aleanca Demokracia e Re ka marrë 16 vota

/j.p/r.e/

The post Numërohen 38 806 zarfe nga diaspora, PS 21 305 vota, PD 10 951 vota appeared first on Agjencia Telegrafike Shqiptare.

TIRANË, 12 maj /ATSH/ Procesi i numërimit të votave për zgjedhjet parlamentare të 11 majit ka nisur tashmë edhe për votuesit nga jashtë. Në total janë numëruar 1660 zarfe të ardhura nga diaspora nga 194 889 në total.

Sipas rezultati të publikuar nga Komisioni Qendror i Zgjedhjeve deri në orën 07:40, 726 vota janë për Partinë Demokratike-Aleanca për Shqipërinë Madhështore, 705 vota janë për Partinë Socialiste.

Koalicioni “Nisma Shqipëria bëhet” ka marrë 117 vota

Partia “Mundësia” ka marrë 35 vota

Partia Social-Demokrate ka marrë 34 vota

“Lëvizja Bashkë” ka marrë 21 vota

Partia Koalicioni Euroatlantik ka marrë 4 vota

Koalicioni Djathtas për Zhvillim 0 vota

Partia Aleanca Kombëtare Shqiptare ka marrë 10 vota.

Lëvizja Atdheu ka marrë 0 vota

Partia Aleanca Demokracia e Re 0 vota

The post Vota e diasporës, numërohen 1660 zarfe, PD 43.95%, PS 42.68% appeared first on Agjencia Telegrafike Shqiptare.

TIRANË, 9 maj /ATSH/ Kryeministri Edi Rama, njëherësh kryetar i Partisë Socialiste iu ka bërë thirrje shqiptarëve jashtë vendit që ende nuk e kanë dërguar mbrapsht zarfin me votën e tyre, që ta dorëzojnë.

Nëpërmjet një postimi në rrjetet sociale thekson se ende ka kohë që ata të bëhen pjesë e takimit historik të 11 majit që do të përcaktojë rrugën e fatit evropian të Shqipërisë.

“Është dita e fundit e ballafaqimit mes të gjitha palëve përpara gjykimit të popullit sovran, gjykimit të të gjithëve me votën tuaj të dielën më 11 maj. Ky është edhe mesazhi i fundit që dua t’iu përcjell të gjithë motrave dhe vëllezërve tanë në Greqi, Itali, Gjermani, Britani e me radhë ku ende ka zarfe që janë nëpër shtëpi, kur ende ka kohë për t’u bërë pjesë e takimit historik të 11 majit, për të takuar historinë së bashku me shumicën dërrmuese të shqiptarëve që më 11 maj do të përcaktojnë pas asnjë ekuivok rrugën fatit evropian të Shqipërisë”, u shpreh Rama.

“Ju lutem, keni marrë mundimin të regjistroheni. Jeni në kushtet kur për herë të parë në histori mund të votoni drejtpërdrejt, por keni edhe shansin historik që të merrni pjesë në një palë zgjedhje që janë më shumë sesa zgjedhje për partitë janë më shumë sesa zgjedhje kush do të qeverisë e kush do të qëndrojë në opozitë, janë zgjedhje për të përcaktuar se ku do  të jetë Shqipëria 2030, se si Shqipëria do të përballojë dhe mbyllë negociatat me BE në 2027, janë zgjedhje për të dhënë një fuqi të re vendimmarrëse dhe një frymë të fortë Bashkimi Evropian vetë Shqipërisë”, tha Rama.

Rama theksoi se “kush ende e ka zarfin në shtëpi të bëjë një përpjekje, një mund të vogël krahasuar me gjithë mundet e mëdha që keni bërë para për t’iu bashkuar dallgëve të mëdha kuqezi që do ta përmbysin me shpresë, me energji, me ardhmëri Shqipërinë e 11 majit”. /j.p/

The post Rama votuesve jashtë vendit: Ende kohë për të kthyer zarfat e për t’u bërë pjesë e takimit historik të 11 majit appeared first on Agjencia Telegrafike Shqiptare.

TIRANË, 6 maj /ATSH/ Kryeministri Edi Rama, njëherësh kryetar i Partisë Socialiste, u ka bërë sërish sot thirrje votuesve shqiptare që jetojnë në Greqi që të mos presin postën DHL, por t’i kthejnë zarfet me vota në pikat përkatëse.

Nëpërmjet një postimi në rrjetet sociale pas takimit elektoral në Kavajë, Rama tha se votimi nga jashtë ka progres të mirë pasi ka një rritje të numrit të zarfeve që janë kthyer në Komisionin Qendror të Zgjedhjeve.

“Super Kavaja! Faleminderit të gjithë atyre që ishin të pranishëm, ngrohtë, pozitive, shumë bukur dhe një atmosferë e bukur në atë bulevardin mesdhetar të Kavajës që është një nga gjurmët e punëve që ne bëmë për Kavajën, kur Kavaja na e dha besimin dhe e nxorëm nga llumi i i kënetës shumëvjeçare. Është shumë interesant, dy janë pikat më të painvestuara, ose totalisht të lëna pas dore nga qeverisja e Bufit: Tropoja dhe Kavaja. Kjo ka një shpjegim, një shpjegim shumë më të thjeshtë dhe të hidhur, por është për një herë tjetër.

“Ajo që dua të shtoj është se kemi progres shumë të mirë në Greqi, po shkojmë drejt një rritjeje të zarfeve të kthyer. Bëj edhe një herë thirrje që mos prisni t’ju vijë DHL t’ua marrë zarfet por kthejini në pikën përkatëse. Është pak mundim, por s’kemi se çfarë bëjmë tani, është një mundim shumë pak krahasimisht më i vogël se gjithë mundimet që ju keni bërë atje në atë vend për të qenë këta që jeni sot dhe ia vlen ky mundimi i zarfit për atë që do bëjmë së bashku që ju atje të jeni zot në vendin tuaj që nesër do të jetë BE vendi ynë i përbashkët i të gjithëve Shqipëria është atdheu ynë, por vendi ynë do të jetë Shqipëria në BE, pra i gjithë BE”, u shpreh Rama.

/a.f//r.e/

The post Rama votuesve në Greqi: Mos prisni DHL-në në shtëpi, dorëzojini zarfet në pikën përkatëse appeared first on Agjencia Telegrafike Shqiptare.

TIRANË, 5 maj /ATSH/ Partia Demokratike ka ngritur shqetësimin për procesin e votimit të shqiptarëve që jetojnë në Greqi dhe Itali, duke nënvizuar se procesi po manipulohet.

Nëpërmjet një deklarate për mediet, e deleguara politike e PD-së për Diasporën, Jozefina Topalli tha se “zyrtarë të PS-së po manipulojnë votat në Greqi dhe Itali”.

“Posta DHL në Greqi ka kontaktuar nënkontraktorë që është një thyerje e normave ligjore dhe Kodit Zgjedhor. Kemi raste që jo vetëm nuk dorëzohen zarfet individualisht me pasaportën, ky do të ishte një pretendim i çmendur ndoshta, edhe pse është ligjor, por ata çojnë email dhe i thonë të vijnë në pikën më të afërt”, u shpreh Topalli.

“Kemi raste si në Itali, që një zonjë që punon në ambasadën në Romë, shkon e mbledh zarfet dhe i dorëzon zarfet në mënyrë antiligjore. Kjo është e pabesueshme, jo se nuk e kanë bërë gjatë regjistrimit, por tani kanë kaluar çdo masë. Por nëse Italia është më e kufizuar, por zonja do të merret nën hetim, ajo që po ndodh në Greqi është në të gjithë territorin e shtetit grek dhe shqetësimi është jashtëzakonisht i madh. Kemi informacione që marrin makina me qira dhe i çojnë në Greqi për të mbledhur votat”, tha Topalli.

Topalli tha më tej “e kuptoj alarmin që ka pala tjetër në lidhje me situatën që është aty, por thyerja e ligjit, futja e njerëzve të PS-së sikur të ishin zyra të DHL-së, është e papranueshme”.

“Për këto raste i kërkojmë jo vetëm KQZ-së, por edhe SPAK që në mënyrë të veçantë në Greqi, të verifikojnë raste të tilla skandaloze që e kanë nxjerrë gati jashtë kontrollit procesin e votimit dhe të dorëzimit të zarfeve në këtë vend”, tha Topalli.

Nga ana tjetër përfaqësuesi ligjor i PD-së në KQZ, Franc Nuri tha se i kanë kërkuar KQZ-së hetim mbi votat nga Greqia.

“Sot, para pak minutash nga nisja e kësaj konference, isha në protokollin e KQZ-së dhe depozitova një shkresë tjetër, një kërkesë tjetër, në emër të koalicionit PD dhe Aleancës për Shqipërinë Madhështore, ku kërkuam zyrtarisht nga KQZ-ja që t’u kërkojë operatorëve postarë të na vënë në dispozicion çdo komunikim, çdo dokument shkrimor që vërteton se vota i ka shkuar zgjedhësit në mënyrë individuale”, tha Nuri.

“Pra, me pak fjalë, kërkojmë provën që vota e dikujt i ka shkuar atij personi dhe ai person ka nënshkruar kundrejt një dokumenti identifikimi – ID ose pasaportë, për marrjen në dorëzim të materialeve zgjedhore me votën brenda, siç kërkon ligji dhe kushtetuta”, tha Nuri.

Sekretari për Ligjet dhe Çështjet Zgjedhore në PD, Ivi Kaso tha se “votimi në Greqi po degradon, zarfet po lihen në pika bastesh dhe po ia japin kujtdo që paraqitet aty”.

“Në rastin e Greqisë, duke u kontraktuar ky proces, duke u përdorur pika bastesh e lojërash fati kryesisht, procesi ka degraduar në atë fazë sa kontraktorët ia japin kujtdo që paraqitet sikur e njeh x person që do t’i dorëzohet zarfi. Janë dhënë udhëzime të nevojshme të bëhen denoncime në polici, të bëhen denoncime në numrin që DHL ka lënë, ose të bëhen në platformë, por kjo për fat të keq nuk e zgjidh problemin. I bëjmë thirrje Komisionit të Zgjedhjeve që ky proces të shkojë mbarë dhe në fund, pavarësisht sfidave”, tha Kaso. /j.p/

The post Votimi nga jashtë, Topalli: Zyrtarë të PS-së po manipulojnë votat në Greqi dhe Itali appeared first on Agjencia Telegrafike Shqiptare.

TIRANË, 5 maj /ATSH/ Partia Demokratike i ka bërë thirrje Komisionit Qendror të Zgjedhjeve për një ndërhyrje urgjente për rikthimin e ligjshmërisë në procesin e votimit të diasporës në Greqi. Nëpërmjet një letre drejtuar kryekomisionerit Shtetëror të Zgjedhjeve, Ilirjan Celibashi dhe që mban firmën e përfaqësuesit të opozitës në KQZ, Franc Nuri, shprehet shqetësimi për procesin e votimit të shqiptarëve në Greqi.

PD thotë se në nisje të procesit, autoritetet siguruan se çdo zarf do të dorëzohej në adresën e deklaruar të votuesit, por kjo ka ndryshuar para pak ditësh papritur.

“Para pak ditësh, KQZ ndryshoi papritur qasje. Përmes një njoftimi të thjeshtë të publikuar në rrjetet sociale të KQZ, votuesit shqiptarë në Greqi u njoftuan nga KQZ se duhet të paraqiten personalisht pranë pikave të DHL-së për të tërhequr zarfin e votimit. Ky ndryshim i befasishëm ka sjellë jo vetëm konfuzion mes votuesve, por ka ngritur edhe shqetësime serioze për transparencën, standardin dhe ligjshmërinë e procesit”, thotë PD.

Sipas PD-së, ndryshimi i mënyrës së shpërndarjes së zarfeve bie ndesh me deklaratat dhe rregullat e mëparshme të KQZ-së.

PD nënvizon më tej se ka raportime se zarfet me vota nuk po u dorëzohen qytetarëve në dorë në banesë, por po përvetësohen në mënyrë të organizuar nga individë të caktuar. Sipas PD, këta persona përdorin makina me qira me targa shqiptare për të shmangur gjurmët.

“Në Greqi prej javësh kemi raportime se zarfet me vota nuk po u dorëzohen qytetarëve në dorë në banesë, por shpesh herë po përvetësohen në mënyrë të organizuar nga individë të ndryshëm që lidhen me organizata partiake ose shtetërore (qoftë zyrtare, qofte nënpagesa si zyra bastesh, apo zyra postare), duke grumbulluar qindra zarfa në emra të ndryshëm dhe shpërndarë më pas në mënyrë të organizuar disa ditë përpara zgjedhjeve për të ndikuar në rezultatin zgjedhor. Këta persona shfaqen me emra të njëjtë si përfaqësues të partive politike dhe në të njëjtën kohë edhe si punonjës të shërbimit postar. Kjo bie ndesh me ligjin shqiptar dhe atë grek për ruajtjen e sekretit të votës”, thekson PD.

PD sqaron se “shteti shqiptar ka firmosur një kontratë me vlerë rreth 9.2 milionë euro me kompaninë postare DHL për të garantuar shpërndarjen e grumbullimit korrekt të zarfeve të Diasporës”.

PD ndalet edhe te fluksi i fletëve të votimit të ardhur 1 javë para ditës së zgjedhjeve.

“Sot më 4 Maj 2025, vetëm një javë para ditës së zgjedhjeve janë raportuar nga KQZ se mbi 6 mijë zarfe të ardhura në Tiranë nga Greqia, ndërkohë që për disa javë më parë numri total ishte 17,700. Si shpjegohet që një e treta e të gjithë zarfave të Greqisë vijnë në një ditë të vetme? Ky fluks i pazakontë dhe i papritur, në kontekstin e problemeve të raportuara përforcon dyshimet mbi integritetin e procesit”, thotë PD-ja.

Sipas selisë blu, ndryshimi i papritur në mënyrën e dorëzimit, nga “zarfi vjen në shtëpi” në “shko e merre vetë”, rrit vështirësitë praktike për mijëra votues, por krijon hapësirë për “ndërhyrje, parregullsi dhe potencialisht manipulime procesi”.

“Shqetësimi ynë është i thellë jo vetëm për integritetin e votës, por edhe për pasoja të rënda që kjo situatë mund të ketë në besimin e publikut te procesi zgjedhor dhe demokracia në tërësi. Nëse kjo situatë nuk korrigjohet menjëherë, procesi i votimit të diasporës rrezikon të mbetet një eksperiment i dështuar, i shtrenjtë dhe me pasoja serioze për vendin”, tha PD.

Deri sot sipas shifrave të bëra publike nga KQZ kanë mbërritur 23 640 zarfe me fletë votimi nga Greqia, ndërsa në total janë dërguar 68 380. /j.p/

The post Votimi nga Greqia, PD i kërkon KQZ-së të ndërhyjë: Po krijohen hapësira për parregullsi e manipulim appeared first on Agjencia Telegrafike Shqiptare.

TIRANË, 5 maj /ATSH/ Procesi i votimit të shqiptarëve që jetojnë jashtë vendit vijon, ndërsa deri sot në orën 09:05, sipas Komisionit Qendror të Zgjedhjeve kanë mbërritur 144 783 zarfe me fletëvotimi.

Sipas të dhënave të publikuara nga KQZ janë 221 653 zarfe të marra nga zgjedhësit, ndërsa në total janë 245 935 zarfe të dërguara. Janë 24 282 zarfe me fletë votimi ende të patërhequra nga votuesit.

Numrin më të lartë të kthimeve e mban Italia me 63 220 zarfe, ndjekur më pas nga Greqia më pas Gjermania. Sipas qarqeve, kryeson Tirana me 34 155 zarfe, Fier 18 403, Durrës 16 955.

Sipas KQZ-së posta DHL ka detyrimin që të mbajë në zyra zarfet që nuk ka mundur t’ua dorëzojë votuesve dhe që votuesit nuk kanë mundur që t’i tërheqin deri më datën 8 maj.

Çdo votë që mbërrin në Shqipëri në datën 11 maj, pas orës 19:00, do të konsiderohet e pavlefshme.

Vendi i caktuar për administrimin e këtij procesi është Pallati i Sportit “Feti Borova”, pranë Parkut Olimpik Tiranë. /j.p/

The post Votimi nga jashtë, KQZ: 144 783 zarfe me fletëvotimi të mbërritura në Tiranë appeared first on Agjencia Telegrafike Shqiptare.