sankBRUKSEL, 15 korrik /ATSH-DPA/- Ministrat e Punëve të Jashtme të Bashkimit Evropian nuk arritën të miratonin unanimisht sot paketën e 18-të të sanksioneve të bllokut ndaj Rusisë për shkak të luftës në Ukrainë, pasi Sllovakia vuri veton.

“Jam vërtet e trishtuar që nuk arritëm këtë marrëveshje sot”, tha shefja e Punëve të Jashtme të BE-së, Kaja Kallas, pas takimit ministror në Bruksel, ku lufta në Ukrainë ishte në krye të axhendës.

Grupi i propozuar i masave ndëshkuese synon sektorët financiarë dhe të energjisë të Rusisë – në përgjigje të refuzimit të presidentit Vladimir Putin për të rënë dakord për një armëpushim – pa kushte në Ukrainë.

Megjithatë, sanksionet u pezulluan pasi kryeministri sllovak, Robert Fico muajin e kaluar tha se nuk ishte gati ta mbështeste propozimin, duke përmendur shqetësimet në lidhje me importet e gazit të Sllovakisë.

“Duhet të them se ishim shumë afër për të siguruar miratimin e Sllovakisë”, tha Kallas.

“Tani, topi është në fushën e Sllovakisë dhe ne duhet ta arrijmë këtë marrëveshje”, shtoi ajo.

Të 27 anëtarët e BE-së duhet të mbështesin sanksionet e reja përpara se ato të mund të zbatohen.

“Sanksionet janë të nevojshme për t’i kufizuar Rusisë mjetet për të zhvilluar këtë luftë. Bashkimi Evropian do të vazhdojë të rrisë kostot, për të ndaluar agresionin e Moskës”, tha Kallas.

Me të mbërritur në takim, ministri gjerman për Evropën, Gunther Krichbaum, tha se masat e reja duhet të miratoheshin sa më shpejt të ishte e mundur.

“Është e rëndësishme të ndërmerren veprime vendimtare për të siguruar që Rusia të vihet nën presion dhe që Ukraina të vihet në një pozicion më të fortë negociues”, tha ai.

“Vetëm atëherë do të jetë e mundur të arrihet një marrëveshje e drejtë në fund të ditës”, shtoi ai.

Sipas planeve, çmimi maksimal ndërkombëtar për eksportet e naftës ruse do të ulet në 45 dollarë për fuçi, nga 60 dollarë për fuçi – por masa nuk arriti të marrë mbështetje unanime në takimin e G7, muajin e kaluar.

“Edhe nëse amerikanët nuk janë dakord, por vendet e tjera të G7 janë dakord, atëherë ne do të ecim përpara me masën”, tha Kallas.

Kallas tha se e mirëpriti njoftimin e SHBA-së për dërgimin e armëve mbrojtëse në Ukrainë. //a.i/

The post BRUKSEL – BE shtyn vendimin për paketën e 18-të të sanksioneve ndaj Rusisë appeared first on Agjencia Telegrafike Shqiptare.

BRUKSEL, 15 korrik /ATSH/- Bashkimi Evropian po kërkon përditësime nga Izraeli mbi zbatimin e një marrëveshjeje të re për të ofruar ndihmë humanitare në Gazë, tha sot diplomatja më e lartë e bllokut, Kaja Kallas, sipas AP.

Ministrat e Jashtëm të 27 vendeve anëtare të BE-së u takuan në Bruksel pas një marrëveshjeje të re për ndihmën në Gazë, e cila u arrit kryesisht nga shefja e politikës së jashtme të BE-së, Kallas, dhe ministri i Jashtëm Izraelit, Gideon Saar.

Saar u takua dje me udhëheqësit e BE-së, pasi ranë dakord javën e kaluar për të lejuar ushqimin dhe karburantin e nevojshëm në enklavën bregdetare prej 2,3 milionë banorësh, të cilët kanë duruar më shumë se 21 muaj luftë.

“Ne kemi arritur një mirëkuptim të përbashkët me Izraelin për të përmirësuar vërtet situatën në terren dhe nuk ka të bëjë me dokumentin, por me zbatimin e këtij dokumenti”, tha Kallas para takimit të Këshillit të Punëve të Jashtme.

“Për sa kohë që nuk është përmirësuar situata humanitare, atëherë nuk kemi bërë mjaftueshëm,” tha ajo, përpara se të bënte thirrje për armëpushim.

Detajet e marrëveshjes mbeten të paqarta, por zyrtarët e BE-së kanë hedhur poshtë çdo bashkëpunim me Fondin Humanitar të Gazës – të mbështetur nga Izraeli për shkak të shqetësimeve etike dhe të sigurisë.

Hapja e më shumë kalimeve kufitare dhe lejimi i më shumë kamionëve me ndihma në Gazë është përparësi, por zyrtarët thonë se do të donin të ngrinin një stacion monitorimi në kalimin Kerem Shalom.

Kallas tha se ministrat do të diskutojnë gjithashtu programin bërthamor të Iranit, shqetësimet mbi zhvillimet në Gjeorgji dhe Moldavi, si dhe sanksionet e reja ndaj Rusisë.

Vendet evropiane si Irlanda, Holanda dhe Spanja kanë bërë thirrje gjithnjë e më shumë që lidhjet e BE-së me Izraelin të rivlerësohen pas luftës në Gazë.

Një raport nga Komisioni Evropian gjeti “indikacione” se veprimet e Izraelit në Gazë po shkelin detyrimet e të drejtave të njeriut në marrëveshjen që rregullon lidhjet e tij me BE-në – por blloku është i ndarë në lidhje me masat që duhet të marrë kundër Tel Avivit.

Lufta në Gaza filloi pasi militantët e udhëhequr nga Hamasi sulmuan Izraelin jugor më 7 tetor 2023, duke vrarë rreth 1200 njerëz dhe duke marrë peng 251 të tjerë, shumica e të cilëve janë liruar në armëpushimet e mëparshme.

“Izraeli u përgjigj me një ofensivë që ka vrarë më shumë se 58 000 palestinezë, më shumë se gjysma e tyre gra dhe fëmijë”, sipas Ministrisë së Shëndetësisë së Gazës. //a.i/

The post BRUKSEL – BE kërkon më shumë informacion nga Izraeli mbi zbatimin e marrëveshjes së ndihmës për Gazën appeared first on Agjencia Telegrafike Shqiptare.

LONDËR, 14 korrik /ATSH/- A mund të jetë dehidratimi i fshehur – shkaku i lodhjes suaj gjatë ditës? Të gjithë kemi përjetuar etjen dhe është e pakëndshme. Është gjithashtu shenja e parë e dehidratimit, e cila mund të avancojë shpejt, sipas BBC.

Dehidratimi i lehtë deri në të moderuar zhvillohet vetëm pas disa orësh, në varësi të moshes, shëndetit dhe faktorëve mjedisorë.

Personat mund të përjetojnë lodhje, marramendje dhe konfuzion. Pas 24 orësh, efektet e dehidratimit të rëndë mund të rezultojnë në simptoma serioze, duke përfshirë shokun dhe krizat epileptike.

Dehidratimi i fshehur (ose dehidratimi i nivelit të ulët kronik) mund të ndodhë kur jeni të dehidratuar lehtë gjatë një periudhe të gjatë kohore, dhe mund të ketë efekte si fizike ashtu edhe mendore.

Efektet e dehidratimit të fshehur

Siç sugjeron edhe vetë emri, dehidratimi i fshehur është një gjendje disi e fshehtë dhe ju mund të vuani nga efektet e saj pa qenë të vetëdijshëm për shkakun.

Lodhja renditet si ndër simptomat kryesore të dehidratimit të fshehur, të cilat përfshijnë gjithashtu:

• Urinë të errët
• Gojë të thatë
• Marramendje
• Dhimbje koke
• Mungesë përqendrimi

Trupi i njeriut përbëhet mesatarisht nga 60% ujë. Truri dhe zemra janë 73% ujë dhe muskujt përmbajnë 75% ujë.

Dehidratimi shkakton rënie të vëllimit të gjakut, duke rezultuar në presion më të ulët të gjakut – që do të thotë një ulje e rrjedhjes së gjakut në tru, e cila shkakton lodhje.

Njerëzit përjetojnë një rënie natyrale të energjisë pas drekës, megjithatë, nëse nuk jeni hidratuar mjaftueshëm gjatë gjithë ditës, trupi juaj do të ketë një deficit duke bërë që kjo rënie të jetë më ekstreme.

Rekomandohet që një i rritur duhet të pijë nga gjashtë deri në tetë gota ujë (1,2-2 litra) në intervale të rregullta gjatë gjithë ditës.

Meqenëse këshillohet të pihet deri në 2 litra ujë në ditë, cilësia e ujit mbetet shumë e rëndësishme.

Përmirësimi i zakoneve të pirjes së ujit duke pasur një konsum të qëndrueshëm gjatë gjithë ditës do të japë rezultate pozitive, veçanërisht nëse vuani nga mungesa e përqendrimit dhe lodhja gjatë pasdites. //a.i/

The post A mund të jetë dehidratimi i fshehur shkaku i lodhjes suaj gjatë ditës? appeared first on Agjencia Telegrafike Shqiptare.

BRAZILIA, 14 korrik /ATSH-ANSA/- Presidenti brazilian, Luiz Inacio Lula da Silva ka urdhëruar ngritjen e një komiteti të kabinetit të nivelit të lartë për të udhëhequr diskutimet – midis qeverisë braziliane, udhëheqësve të biznesit dhe grupeve të industrisë – mbi tarifën prej 50% të vendosur nga SHBA-ja ndaj eksporteve braziliane.

Administrata e presidentit Lula shpreson të negociojë heqjen e tarifave, por gjithashtu po planifikon të përdorë ligjin e reciprocitetit ekonomik të Brazilit nëse bisedimet dështojnë.

Negociatat do të koordinohen nga komiteti i kabinetit, i cili pritet të krijohet në ditët në vijim.

Grupi ka të ngjarë të përfshijë të paktën pesë ministra të kabinetit dhe përfaqësues nga sektorët e biznesit më të prekur nga rritja e tarifave.

Nëse negociatat dështojnë, qeveria synon të zbatojë Ligjin e Reciprocitetit Ekonomik, me dekretin zbatues që pritet të miratohet nesër.

I miratuar në prill, Ligji i Reciprocitetit autorizon Brazilin të vendosë kundërtarifa për importet nga vendet e tjera dhe të pezullojë koncesionet tregtare.

Ligji është nënshkruar nga presidenti Lula, megjithëse disa dispozita mbeten subjekt i rregullimit të mëtejshëm. //a.i/

The post BRAZIL – Lula krijon komitetin e nivelit të lartë për të udhëhequr negociatat e tarifave me SHBA-në appeared first on Agjencia Telegrafike Shqiptare.

BRUKSEL, 14 korrik /ATSH-ANSA/- Ka pasur disa sinjale se më shumë kamionë dhe furnizime po mbërrijnë në Gazë, por Bashkimi Evropian nuk sheh përmirësim të mjaftueshëm në terren, tha sot shefja e politikës së jashtme të BE-së, Kaja Kallas, përpara një takimi me zyrtarë të lartë të Lindjes së Mesme dhe BE-së, në Bruksel.

“Situata në terren, në Gazë është serioze. Është një gjë të nënshkruash marrëveshje në letër dhe një tjetër t’i zbatosh ato”, tha Kallas.

BE-ja arriti një marrëveshje me Izraelin javën e kaluar për të përmirësuar situatën humanitare në Rripin e Gazës, duke përfshirë rritjen numrit të kamionëve me ndihma dhe hapjen e pikave të kalimit dhe rrugëve të caktuara të ndihmës.

“Më kërkuan të hartoja një listë me sanksione, tani u takon 27 vendeve të vendosin se çfarë duhet të bëjnë”, tha Kallas duke iu referuar masave te mundshme kundër Izraelit për shkelje të të drejtave të njeriut.

Në qershor të vitit 2025, Spanja, Irlanda dhe Sllovenia kërkuan pezullimin e Marrëveshjes së Asociimit BE-Izrael.

Suedia gjithashtu i ka kërkuar Këshillit Evropian të miratojë sanksione kundër ministrave izraelitë që promovojnë aktivitete të paligjshme të vendbanimeve dhe punojnë në mënyrë aktive kundër një zgjidhjeje të negociuar me dy shtete.

Në përputhje me rrethanat, përfaqësuesja e Lartë e BE-së për Punët e Jashtme dhe Politikën e Sigurisë, Kaja Kallas ka propozuar një listë të sanksioneve ndaj Izraelit, të cilat do të diskutohen në Këshillin e ardhshëm të BE-së. //a.i/

The post BRUKSEL – BE: Ndihma për Gazën e kufizuar, pavarësisht marrëveshjes me Izraelin appeared first on Agjencia Telegrafike Shqiptare.

UASHINGTON, 14 korrik /ATSH-DPA/- Sekretari i përgjithshëm i NATO-s, Mark Rutte përshëndeti sot njoftimin e presidentit të SHBA-së, Donald Trump, për vendosjen e sanksioneve të ashpra ndaj Rusisë nëse nuk arrihej një marrëveshje me Ukrainën.

“Nëse do të isha Vladimir Putin do t’i rishqyrtoja negociatat me Ukrainën më seriozisht”, tha Rutte.

Ai tha se njoftimi i presidentit Trump ishte një lajm vërtet i shkëlqyer për Ukrainën.

I dërguari special i SHBA-së, Keith Kellogg mbërriti sot në Kiev për bisedime me udhëheqësit ukrainas, mes sinjaleve se mbështetja e Uashingtonit për Ukrainën po forcohet.

Qëndrimi i Trump ka marrë një drejtim tjetër. Ai kishte shpresuar se do të ishte në gjendje t’i jepte fund luftës përmes negociatave – dhe ka zhvilluar disa telefonata me Putinin.

Kohët e fundit, ai ka shprehur pakënaqësinë – duke thënë se ishte shumë i zhgënjyer me presidentin Putin.

Trump njoftoi më herët se SHBA-ja do t’i shiste sisteme armësh “Patriot” vendeve evropiane për t’i dërguar në Ukrainë.

“Do të jetë një biznes për ne. Do t’u dërgojmë vendeve evropiane sisteme “Patriot”, për të cilat ata kanë shumë nevojë sepse Putini, me të vërtetë befasoi shumë njerëz”, u tha Trump gazetarëve.

“Patriot” është një nga sistemet më moderne të mbrojtjes ajrore në botë – që përdoret për të luftuar avionët armik, raketat balistike dhe raketat kruz. //a.i/

The post SHBA – Rutte: Nëse do të isha Vladimir Putin do t’i rishqyrtoja më seriozisht negociatat me Ukrainën appeared first on Agjencia Telegrafike Shqiptare.

UASHINGTON, 14 korrik /ATSH-ANSA/- Presidenti i SHBA-së, Donald Trump i tha sot homologut të tij francez, Emmanuel Macron, gjatë një bisede telefonike, se udhëheqësi rus Vladimir Putin “dëshironte të merrte gjithçka”, duke iu referuar ofensivës së re – të planifikuar nga Moska në Ukrainën lindore, sipas “Axios”

Trump iu referuar një bisede telefonike midis dy udhëheqësve më 3 korrik.

Gjatë kësaj bisede, lideri rus, Putini i tha presidentit Trump se po planifikonte një përshkallëzim tjetër në lindje gjatë 60 ditëve të ardhshme, për të arritur kufijtë administrativë të rajoneve ku ai ka një prani të konsiderueshme.

Trump synon të njoftojë sot një plan të ri për të armatosur Ukrainën, i cili do të përfshijë dërgimin e armëve sulmuese në Kiev.

Iniciativa e re – do të prezantohet në një takim në Uashington midis Trump dhe sekretarit të përgjithshëm të NATO-s, Mark Rutte.

Plani ka të ngjarë të përfshijë raketa me rreze të gjatë veprimi – të afta për të arritur objektiva brenda territorit rus, përfshirë Moskën.

“Nuk kam rënë ende dakord rreth numrit te sistemit “Patriot” që do të dërgohen, por ukrainasit do të kenë disa prej tyre sepse kanë nevojë për mbrojtje, dhe BE-ja do të paguajë. Ne nuk do të paguajmë asgjë, por do t’i dërgojmë”, tha Trump.

“Jam shumë i zhgënjyer me udhëheqësin rus Vladimir Putin. Ai flet bukur dhe pastaj bombardon gjithçka në mbrëmje”, tha ai.

“I dërguari special i SHBA-së për Ukrainën, Keith Kellogg mbërriti sot në Kiev, në vizitën e tij në vend të njoftuar javën e kaluar”, sipas këshilltarit kryesor të presidentit ukrainas, Andriy Yermak, në Telegram.

“Ne e mirëpresim ngrohtësisht të dërguarin special të SHBA-së, Keith Kellogg, në Ukrainë”, shkroi Yermak.

“Paqja përmes forcës është parimi i presidentit të SHBA-së, Donald Trump, dhe ne e mbështesim këtë qasje”, shtoi ai. //a.i/

The post UASHINGTON – Trump: Putini po planifikon një ofensivë të re në lindje të Ukrainës appeared first on Agjencia Telegrafike Shqiptare.

ROMË, 14 korrik /ATSH/- Presidenti i SHBA-së Donald Trump ka sulmuar sërish me taksa të reja, ndërsa BE përpiqet të vlerësojë ndikimin e tarifave amerikane në eksporte, sipas të përditshmes italiane “La Notizia”.

Qëndrimi i Donald Trump mbetet i pandryshueshëm

“Lufta e tarifave është e drejtë dhe e pashmangshme. E gjithë bota ka përfituar për një kohë të gjatë nga SHBA-ja”, tha presidenti amerikan në një postim në “Truth Social”.

“Shtetet e Bashkuara të Amerikës janë grabitur në tregti dhe ushtri, nga miqtë dhe armiqtë, për dekada të tëra”, tha ai.

Sipas Trump, ajo që ka ndodhur deri më tani kishte kushtuar mijëra dollarë dhe situata nuk ishte më e qëndrueshme.

“Vendet duhet të ndalen dhe të thonë: Faleminderit për shumë vitet e lirisë. Por ne e dimë se tani duhet të bëni atë që është e drejtë për Amerikën”, shtoi ai.

Sa do të ndikojnë tarifat e Trump në BE? 

Sipas Leopoldo Rubinacci, zëvendësdrejtori i Drejtorisë së Përgjithshme për Tregtinë e Komisionit, tarifat do të ndikojnë në 70% të eksporteve të BE-së në Shtetet e Bashkuara të Amerikës – duke arritur në 380 miliardë euro.

Në Komisionin e Tregtisë të Parlamentit Evropian, Rubinacci shpjegoi se administrata amerikane po kryente hetime, veçanërisht në lidhje me Seksionin 232 të Aktit të Zgjerimit të Tregtisë të vitit 1962 – i cili prek produktet e aviacionit, produktet farmaceutike, mineralet kritike, drurin, bakrin dhe mallra të tjera.

Nëse Trump do të vendoste tarifa ndaj këtyre produkteve, pjesa e eksporteve të prekura do të rritej në 97%. //a.i/

The post BRUKSEL – BE: Tarifat e Trump do të ndikojnë në 70% të eksporteve të bllokut në SHBA appeared first on Agjencia Telegrafike Shqiptare.

LONDËR, 13 korrik /ATSH/- Muret skulpturore prej betoni të lakuar përqafojnë një sërë tarracash të mbjella për macet dhe qentë në këtë spital veterinar në Shqipëri, të projektuar nga kompania zvicerane “Davide Macullo Architects”, sipas një artikulli të botuar në britaniken “Dezeen”.

E vendosur në kryeqytetin shqiptar, Tiranë, ndërtesa prej 2,243 metrash katrorë përmban një klinikë veterinare dhe një hotel për kafshë shtëpiake në tre katet e saj.

Sipas “Davide Macullo Architects”, muret e lakuara prej betoni të klinikës dhe tarracat e jashtme do të kontribuojnë në mirëqenien psikologjike të kafshëve shtëpiake që trajtohen, duke ndihmuar në eliminimin e frikës nga mbyllja.

“Hapësira e bollshme jashtë spitalit bie në kontrast me logjikën e strukturuar të planit, duke krijuar një ndjenjë mrekullie dhe harmonie”, tha kompania.

Ashtu si në kujdesin shëndetësor njerëzor, psikologjia hapësinore luan një rol kritik – format fluide eliminojnë çdo frikë nga mbyllja, duke krijuar një mjedis të hapur dhe çlirues.

Përveçse i japin ndërtesës atë që kompania e quan një pamje “fluide, skulpturale”, muret e ekspozuara të betonit u transportuan në ambientet e brendshme, ku ato formojnë një hyrje dhe zonë pritjeje me xham.

Në pjesën e prapme të ndërtesës, dhomat e trajtimit dhe zyrat e klinikës zënë një zonë drejtkëndëshi, në formë L-je, në katin e parë.

Sipër, këto dhoma perimetrike kanë mure paksa të përkulur, të krijuara aty ku format e lakuara të betonit nderpresin planin e këndeve të drejta.

“Ajo që fillon si gjeometri e thjeshtë statike – e rrënjosur në psikologjinë hapësinore dhe parimet antropologjike – shpaloset në një rrjet dinamik kthesash që e shndërrojnë këtë hapësirë në një vend të vërtetë, plot lëvizje dhe jetë”, tha kompania.

“Kontrasti midis formave të buta, organike dhe forcës së papërpunuar të betonit i shton intensitetin estetik”, tha “Davide Macullo Architects”.

Në katet e sipërme, zonat publike si korridoret dhe një mensë në katin e dytë kanë qasje në tarracat e ngritura të klinikës, të cilat janë të hijezuara nga muret skulpturore dhe kanë vazo betoni.

“Davide Macullo Architects” kishin për qëllim që këto tarraca të vepronin si hapësira terapeutike si për pacientët kafshë shtëpiake të klinikës ashtu edhe për pronarët e tyre, duke krijuar zona gjysmë të izoluara larg klinikës kryesore.

“Tarracat dhe kopshtet nuk janë thjesht dekorative, ato shërbejnë si hapësira terapeutike për ‘pacientët’, duke u ofruar atyre dritë, ajër dhe një lidhje me natyrën”, shtoi kompania.

Organizimi i hapësirave për macet dhe qentë ndjek të njëjtat parime si ato për njerëzit, rehati, veçim kur është e nevojshme dhe një qasje e menduar mirë ndaj bashkëjetesës.//a.i/

1 nga 19

The post “Dezeen”: “Davide Macullo Architects” përfundon spitalin veterinar për macet dhe qentë në Tiranë appeared first on Agjencia Telegrafike Shqiptare.

LONDËR, 13 korrik /ATSH/- Ekziston një enigmë që i ka magjepsur të gjithë shkencëtarët: kur Toka u formua 4,5 miliardë vjet më parë, planeti ynë në thelb ishte një top shkëmbi i shkrirë, sipas BBC.

Uji që mund të ketë qenë i pranishëm gjatë formimit të planetit – me siguri do të ishte zhdukur menjëherë. Megjithatë, sot, uji mbulon rreth 70% të sipërfaqes së Tokës.

Pra, nga erdhi i gjithë ky ujë? Dhe akoma më intriguese, kur mbërriti në Tokë?

Një ekip kërkimor nga Universiteti i Emirateve të Bashkuara Arabe ka publikuar së fundmi një studim të ri në “Nature Astronomy”, një nga revistat kryesore ndërkombëtare në astronomi.

Studimi paraqet prova të reja që sugjerojnë se uji ekzistonte në univers para se të formoheshin blloqet ndërtuese të galaktikës sonë, gjë që sfidon dhe ripërcakton kuptimin shkencor të formimit të ujit dhe potencialin për jetë në universin e hershëm.

Dr. Muhammad Abdul Latif, Profesor i Asociuar në Departamentin e Fizikës në Universitetin e Emirateve të Bashkuara Arabe dhe autor kryesor i studimit, shpjegoi se hulumtimi hedh dritë mbi rolin e supernovave të para në formimin e ujit.

“Grumbullime të dendura të pasura me ujë mund të kenë formuar disqe proto-planetare, duke çuar potencialisht në krijimin e planetëve të qëndrueshëm në agimin e universit dhe mundësinë e ekzistencës së jetës shumë më herët sesa mendohej më parë”, tha ai.

Studimi ka tërhequr vëmendje të konsiderueshme globale.

Toka e hershme nuk ishte një vend miqësor me ujin – një peizazh i shkëmbinjve të shkrirë, shpërthimeve vullkanike dhe bombardimeve të vazhdueshme nga kometat dhe asteroidet, me nivele të larta të rrezatimit diellor.  Këto kushte do ta kishin avulluar ujin.

Gjithashtu, Prof. Richard Greenwood nga “Open University”, tha se bërthama prej hekuri e shkrirë e Tokës do të kishte qenë një top ndryshku nëse do të kishte pasur ujë në përzierjen proto-tokë.

Pra, nëse uji nuk ka qenë gjithmonë këtu, nga ka ardhur?

Në Muzeun e Historisë Natyrore në Londër, Prof. Sara Russell ka krahasuar “gjurmën e gishtërinjve” izotopike të ujit të Tokës me ujin e gjetur në asteroidin Bennu – të kapur dhe të sjellë nga misioni i fundit i NASA-s “Osiris Rex”.  //a.i/

The post SHKENCË – Nga erdhi uji i Tokës? appeared first on Agjencia Telegrafike Shqiptare.

UASHINGTON, 13 korrik /ATSH/-  Presidenti i SHBA-së, Donald Trump, po shqyrton autorizimin e fondeve të reja për Ukrainën për herë të parë që nga marrja e detyrës në janar, raportoi “CBS News”, duke cituar burime diplomatike.

Këtë javë, Trump la të kuptohej se donte t’i dërgonte Ukrainës armë shtesë mbrojtëse.

Disa ditë më parë, administrata e tij pezulloi disa dërgesa armësh, një veprim që një zyrtar i Shtëpisë së Bardhë tha se ishte pjesë e një shqyrtimi më të gjerë global të transferimeve të armëve.

“Nuk është e qartë se ku mund t’i sigurojë Trump fondet e reja, por zyrtarët amerikanë thanë se presidentit i kishin mbetur 3,85 miliardë dollarë nga ish-presidenca e Biden, të cilat mund të përdoren për të dërguar pajisje ushtarake amerikane në Ukrainë.

Ish-zyrtarë i thanë gjithashtu “CBS News” se presidenti kishte autoritetin për të sekuestruar afërsisht 5 miliardë dollarë nga asetet ruse jashtë vendit dhe për t’i dërguar fondet në Ukrainë.

Megjithatë, as Trump dhe as ish-presidenti Joe Biden nuk e kanë ushtruar ndonjëherë këtë pushtet. //a.i/

The post “CBS News”: Trump shqyrton autorizimin e fondeve të reja për Ukrainën appeared first on Agjencia Telegrafike Shqiptare.

BRUKSEL, 13 korrik /ATSH-DPA/- Bashkimi Evropian do të zgjasë pezullimin e tarifave për mallrat e importuara nga SHBA-ja deri në fillim të gushtit, pavarësisht vendimit të Uashingtonit për të vendosur një taksë prej 30% ndaj importeve nga blloku, tha sot shefja e Komisionit Evropian, Ursula von der Leyen.

“Shtetet e Bashkuara të Amerikës na kanë dërguar një letër me masa që do të hyjnë në fuqi nëse nuk ka një zgjidhje të negociuar”, tha ajo.

“Prandaj, ne gjithashtu do ta zgjasim pezullimin e kundërmasave tona deri në fillim të gushtit”, shtoi Von der Leyen.

Vendimi i bllokut erdhi pas njoftimit dje të presidentit të SHBA-së, Donald Trump për vendosjen e tarifave prej 30% për importet nga Bashkimi Evropian duke filluar nga 1 gushti, pavarësisht negociatave të vazhdueshme për të shmangur një luftë tregtare.

Në një letër dërguar Von der Leyen dhe të postuar në platformën e tij “Truth Social”, ai u ankua për deficitin tregtar “afatgjatë, të madh dhe të vazhdueshëm” që SHBA-ja ka me BE-në, duke akuzuar bllokun prej 27 vendesh për politika dhe barriera tregtare të padrejta.

Trump tha se administrata e tij do të hiqte normën e lartë të tarifave nëse Bashkimi Evropian, ose vendet brenda BE-së, vendosnin të ndërtonin ose prodhonin brenda SHBA-së.

Von der Leyen theksoi sot se BE-ja nuk do të qëndronte duarkryq dhe të vëzhgonte, duke thënë se komisioni i saj do të vazhdonte të përgatiste kundërmasa të mëtejshme në javët e ardhshme, kështu që “blloku ishte plotësisht i përgatitur”. //a.i/

The post BRUKSEL – BE vonon tarifat për mallrat amerikane pavarësisht taksës prej 30% të njoftuar nga Trump appeared first on Agjencia Telegrafike Shqiptare.

LONDER, 13 korrik /ATSH/- Një projektligj dypartiak amerikan – i cili do të vendoste sanksione të ashpra ndaj Rusisë – në një përpjekje për të ushtruar presion mbi Moskën për të arritur paqen në Ukrainë – pritet të miratohet këtë javë në Kongres, sipas “Reuters”.

Tani, mbështetësit e Ukrainës në Uashington dhe Kiev, të cilët për muaj të tërë kanë shpresuar që presidenti Donald Trump të mbështesë projektligjin – po presin me padurim atë që presidenti republikan ka thënë se do të jetë një “deklaratë e madhe” mbi Rusinë.

Trump, i cili u zotua gjatë fushatës së tij zgjedhore se do t’i jepte fund pushtimit rus në Ukrainë – nuk ka dhënë detaje se çfarë do të përfshijë njoftimi i tij i planifikuar – por javët e fundit ai është bërë gjithnjë e më i ashpër publikisht me presidentin rus Vladimir Putin – për shkak të hezitimit të tij për të pranuar armëpushimin dhe numrit në rritje të viktimave civile nga sulmet ruse.

Të martën, Trump miratoi dërgimin e armëve mbrojtëse amerikane në Ukrainë.

Dy ditë më vonë, ai iu afrua më shumë se kurrë miratimit të projektligjit të sanksioneve, megjithëse ende nuk e ka nënshkruar dokumentin e legjislacionit.

John Thune, udhëheqësi i shumicës në Senat dhe udhëheqësi i republikanëve në Senat që nga janari i vitit 2025 – u tha gazetarëve se Senati mund të votojë për projektligjin këtë muaj.

Mike Johnson, republikani më i lartë në Dhomën e Përfaqësuesve, ka shprehur optimizëm të ngjashëm, ndërsa senatori republikan Lindsey Graham dhe sekretari amerikan i Shtetit Marco Rubio u kanë thënë privatisht diplomatëve evropianë se projektligji do të miratohet menjëherë.

“Senati do të miratojë së shpejti projektligjin për sanksione të ashpra – jo vetëm kundër Rusisë – por edhe kundër vendeve si Kina dhe India që blejnë produkte energjie nga Rusia –  që financojnë makinerinë e luftës së Putinit”, shkroi Graham në X të martën.

Megjithatë, nuk ishte e qartë nëse Trump kishte hequr dorë nga shtytja për diplomaci me Rusinë. Dhe fuqia e gjerë e vetos mbi sanksionet që Shtëpia e Bardhë po kërkon mund ta bëjë projektligjin më simbolik sesa thelbësor, pranojnë disa mbështetës.

Duke folur me gazetarët në Kuala Lumpur të premten pas takimit të tij të dytë personal me ministrin e Jashtëm rus Sergei Lavrov, Rubio tha se ishte diskutuar “një ide e re” që ai do t’ia përcillte Trump për konsultime të mëtejshme.

Por ai gjithashtu përsëriti zhgënjimin e Trump për mungesën e gatishmërisë së Moskës për të qenë më fleksibile dhe tha se amerikanët u kishin thënë rusëve disa javë më parë se një projektligj për sanksione mund të miratohej.

Projektligji, do të vendoste sanksione të gjera kundër individëve të ndryshëm rusë, organeve qeveritare dhe institucioneve financiare.

Ai gjithashtu do të ndëshkonte vendet e tjera që tregtojnë me Moskën, duke vendosur tarifa prej 500% për vendet që blejnë naftë, gaz, uranium dhe eksporte të tjera ruse.

Presidenti ukrainas Volodymyr Zelensky u ka kërkuar vazhdimisht aleatëve perëndimorë të Ukrainës të vendosin sanksione më të ashpra ndaj Moskës – për të detyruar Kremlinin të bjerë dakord për një armëpushim – si një hap për t’i dhënë fund luftës, tani 40 muajshe.

Shtëpia e Bardhë po punon me Kongresin dhe mbështetësit e projektligjit për të siguruar një përmirësim të objektivave të politikës së jashtme të presidentit Trump.

Stafi i kongresit ka punuar për të zgjidhur çështje teknike ditët e fundit, të tilla si mënyra për të parandaluar që çdo sanksion të ndikojë në operacionet e ambasadës amerikane në Moskë.

Dhoma e Përfaqësuesve, e cila do të duhet të votojë për masën, niset për pushimet e gushtit pas dy javësh, që do të thotë se koha e seancës është e kushtueshme.

Disa mbështetës të projektligjit pranojnë se legjislacioni është kryesisht simbolik, duke pasur parasysh se Trump do të kishte autoritet të gjerë për të vënë veton ndaj sanksioneve dhe, në çdo rast, mund të lëshonte thjesht sanksione nga dega ekzekutive nëse dëshiron.

“Presidenti tashmë i ka të gjitha këto autoritete”, tha një anëtar i stafit republikan të Senatit. //a.i/

The post KOMENT – Interesi i Trump për sanksionet ndaj Rusisë rrit shpresat e aleatëve të Ukrainës appeared first on Agjencia Telegrafike Shqiptare.

LONDËR, 13 korrik /ATSH/- Një analizë e re gjaku mund të zbulojë se sa shpejt po plaken organet tuaja – dhe çfarë do të thotë kjo për shëndetin tuaj, sipas BBC.

Shkencëtarët kanë zbuluar një mënyrë për të matur moshën biologjike të trurit – duke rezultuar të jetë një nga parashikuesit më të mirë të shëndetit dhe jetëgjatësisë në të ardhmen.

Në një studim të ri, studiuesit analizuan mostrat e gjakut të marra nga 45 000 të rritur, duke matur nivelet e tyre të më shumë se 3,000 proteinave.

Shumë nga këto proteina ishin të lidhura me organe specifike, përfshirë trurin, duke i lejuar ata të vlerësonin një ‘moshë biologjike’ për secilin sistem organesh.

Kur profili i proteinave të një organi ndryshonte ndjeshëm nga mesatarja për moshën kronologjike të dikujt (numri i ditëlindjeve që kanë pasur), ai klasifikohej si ‘jashtëzakonisht i moshuar’ ose ‘jashtëzakonisht i ri’.

“Nga të gjitha organet e matura, truri dallohej si parashikuesi më i mirë i rezultateve shëndetësore”, zbuluan studiuesit.

“Truri është portieri i jetëgjatësisë”, tha në një deklaratë Prof. Tony Wyss-Coray, autori kryesor i studimit të ri të botuar në “Nature Medicine”.

“Nëse keni një tru të vjetër, keni një probabilitet më të lartë vdekshmërie. Nëse keni një tru të ri, ndoshta do të jetoni më gjatë”, tha ai.

Pjesëmarrësit me një tru jashtëzakonisht të plakur kishin 12 herë më shumë gjasa të diagnostikoheshin me sëmundjen e Alzheimerit brenda një dekade sesa ata të së njëjtës moshë me një tru biologjikisht të ri.

Një tru i plakur gjithashtu rriti rrezikun e vdekjes nga çdo shkak me 182% gjatë një periudhe 15-vjeçare, ndërsa truri i ri ishte i lidhur me një ulje prej 40% të vdekshmërisë.

“Vlerësimi i trurit dhe organeve të tjera në aspektin e moshës së tyre biologjike mund të sjellë një epokë të re të mjekësisë parandaluese”, tha Wyss-Coray.

“Kjo është, idealisht, e ardhmja e mjekësisë”, tha ai.

“Sot, shkon te mjeku sepse të dhemb diçka, dhe ata shikojnë për të parë se çfarë nuk shkon. Ne po përpiqemi të kalojmë nga kujdesi për të sëmurët në kujdesin shëndetësor dhe të ndërhyjmë përpara se njerëzit të preken nga sëmundje specifike të organeve”, shtoi ai.

Ekipi tani po punon për të komercializuar testin, i cili sipas tyre mund të jetë i disponueshëm në dy deri në tre vitet e ardhshme – me shumë mundësi duke filluar me organe kyçe si truri, zemra dhe sistemi imunitar. //a.i/

The post Mosha biologjike e trurit tuaj mund të parashikojë se sa gjatë do të jetoni appeared first on Agjencia Telegrafike Shqiptare.

LONDËR, 13 korrik /ATSH/- Dy studime të reja kanë zbuluar të dhëna – rreth kohës dhe vendit ku macet u zbutën për herë të parë – të cilat na çojnë drejtpërdrejt ne Egjiptin e lashtë, sipas BBC.

Më herët, studiuesit besonin se zbutja e maceve kishte filluar kur macet e egra nisën të endeshin rreth fshatrave të para bujqësore më shumë se 9,000 vjet më parë.

Ndërsa rezervat e grurit tërhiqnin brejtësit, macet e egra të Afrikës së Veriut filluan të gjuanin parazitët, duke krijuar një marrëdhënie të dobishme reciproke – që përfundimisht çoi në zbutjen e tyre. Por ky model tani mbetet nën shqyrtim.

“Shpesh thuhet se paraardhësi i egër – i maces shtëpiake – macja e egër e Afrikës së Veriut – u zbut gjatë Neolitit”, tha Dr. Sean Doherty, një shkencëtar arkeologjik në Universitetin e Exeter dhe autor kryesor i studimit të parë.

“Studimi ynë e sfidon këtë teori – duke shqyrtuar provat osteologjike (të kockave), gjenetike dhe ikonografike në dispozicion. Ne sugjerojmë se zbutja e maceve filloi në Egjipt rreth mijëvjeçarit të dytë deri në mijëvjeçarin e parë para Krishtit”, shtoi ai.

Ekipi i Doherty përdori analiza zooarkeologjike, gjenetikë dhe datim radiokarbon për të rivlerësuar mbetjet e maceve të lashta nga vendet arkeologjike në të gjithë Evropën dhe Afrikën e Veriut – që datojnë nga lashtësia deri në kohët moderne.

Kockat e gjetura në një fshat bujqësor 9,500-vjeçar në Qipro, që dikur mendohej se tregonin zbutje të hershme, u zbulua se ngjanin më shumë me macet e egra.

“Disa gabime në datim mund të kenë ndodhur për shkak të faktit se kockat e maceve janë të vogla dhe mund të zhvendosen midis shtresave të tokës me kalimin e kohës”, tha Doherty.

“Ne përdorëm datimin radiokarbon për të konfirmuar datat e tyre – e cila tregoi se disa mace ishin dukshëm më të reja nga sa besohej”, shtoi ai.

E gjithë kjo sugjeron se afati kohor kur macet u zbutën është në të vërtetë më “i freskët” nga sa mendohej.

Studiuesit argumentojnë se, ndërsa kontrolli i brejtësve ka të ngjarë të ketë luajtur një rol në zbutjen e maceve, feja mund të ketë qenë më e rëndësishme.

Në Egjipt, macet u bënë të shenjta për perëndeshën Bastet dhe miliona prej tyre u rritën për sakrificë rituale.

“Lidhja midis maceve shtëpiake dhe perëndeshës egjiptiane Bastet arriti kulmin e saj në mijëvjeçarin e parë para Krishtit”, tha Doherty.

“Në tempujt kushtuar perëndeshës, gjejmë miliona mace të mumifikuara. Kishte aq shumë saqë në periudhën viktoriane, shumë prej tyre u dërguan sërish në Britani të Madhe për t’u bluar dhe përdorur për pleh”, tha ai.

Në procesin e mbarështimit të miliona maceve për vrasje rituale, tiparet që i bënin ato më të lehta për t’u trajtuar u përzgjodhën gradualisht – dhe ja ku lindi “macja shtëpiake”.

Një studim i dytë gjenomik, në të cilin Doherty është bashkautor, analizoi 87 gjenome macesh të lashta dhe moderne dhe nuk gjeti prova se macet shtëpiake hynë në Evropë me fermerët neolitikë.

Në vend të kësaj, ato mbërritën brenda 2,000 viteve të fundit – me shumë mundësi nga Afrika e Veriut.

“Mendoj se kjo tregon se afërsia midis njerëzve dhe maceve nuk është rezultat i kohëzgjatjes së marrëdhënies midis tyre, si me qenin”, tha Doherty.

Dhe duke pasur parasysh arsyen e zbutjes së tyre të hershme, nuk është çudi që macet ende sillen sikur të jenë perëndi. //a.i/

The post Shkencëtarët zbulojnë se kur u mbajtën për herë të parë macet si kafshë shtëpiake appeared first on Agjencia Telegrafike Shqiptare.

BRUKSEL, 13 korrik /ATSH/- Bashkimi Evropian dhe Meksika kanë shprehur zhgënjim ndaj paralajmërimit të presidentit të SHBA-së Donald Trump për të vendosur tarifa prej 30% ndaj importeve të tyre duke filluar nga 1 gushti, sipas BBC.

Meksika tha se kjo ishte një “marrëveshje e padrejtë” e Trump dhe këmbënguli se sovraniteti i saj ishte i panegociueshëm.

Ndërsa shefja e BE-së, Ursula von der Leyen, paralajmëroi se do të ndërmerrte “kundërmasa proporcionale” nëse do të ishte e nevojshme.

Të dy vendet thanë se do të donin të vazhdonin negociatat me SHBA-në.

Trump ka paralajmëruar se do të vendosë taksa edhe më të larta ndaj importeve nëse ndonjëri prej partnerëve tregtarë të SHBA-së vendoste të hakmerrej.

Këtë javë Trump njoftoi gjithashtu tarifa të reja ndaj mallrave nga Japonia, Koreja e Jugut, Kanadaja dhe Brazili – të cilat do të zbatohen duke nisur nga muaji i ardhshëm.

“Kemi vite që diskutojmë marrëdhëniet tona tregtare me Bashkimin Evropian dhe kemi arritur në përfundimin se duhet të largohemi nga këto deficite tregtare afatgjata të mëdha dhe të vazhdueshme, të shkaktuara nga politikat tuaja tarifore dhe jo-tarifore dhe barrierat tregtare”, shkroi Trump në letrën që i dërgoi të premten presidentes së Komisionit Evropian Ursula von der Leyen.

“Marrëdhënia jonë, për fat të keq, ka qenë larg të qenit reciproke”, thuhej në letër.

Në letrat e tij drejtuar BE-së dhe Meksikës, Trump paralajmëroi se nëse ndonjë partner tregtar do të hakmerrej me detyrime importi kundër SHBA-së, ai do të kundërpërgjigjej duke rritur tarifat me një përqindje të ngjashme mbi 30%.

Në një intervistë për “Fox News”, dje në mbrëmje, presidenti Trump tha se disa vende ishin shumë të mërzitura, por ai këmbënguli se tarifat nënkuptonin “qindra miliarda dollarë” që po grumbulloheshin.

BE-ja ka qenë një objektiv i shpeshtë i kritikave të Trump. Më 2 prill, ai propozoi një tarifë prej 20% për mallrat nga blloku, si dhe dhjetëra partnerë të tjerë tregtarë.

Më pas ai kërcënoi se do të rriste taksat e importit të BE-së në 50%, ndërsa bisedimet tregtare ishin bllokuar.

Uashingtoni dhe Brukseli shpresonin të arrinin një marrëveshje para afatit të 9 korrikut, por nuk ka patur njoftime për progres.

“Në vitin 2024, deficiti tregtar i SHBA-së me bllokun ishte 235,6 miliardë dollarë (202 miliardë euro (174 miliardë paund)”, sipas zyrës së përfaqësuesit të tregtisë së SHBA-së.

Von der Leyen tha se BE-ja mbetej e gatshme të vazhdonte të punonte drejt një marrëveshjeje deri më 1 gusht.

“Ne do të ndërmarrim të gjitha hapat e nevojshëm për të mbrojtur interesat e BE-së, duke përfshirë miratimin e kundërmasave proporcionale nëse është e nevojshme”, tha von der Leyen. //a.i/

The post BRUKSEL – BE kritikon tarifat prej 30% të SHBA-së appeared first on Agjencia Telegrafike Shqiptare.

SEUL, 13 korrik /ATSH/- Udhëheqësi i Koresë së Veriut, Kim Jong Un, i tha diplomatit më të lartë të Rusisë se vendi i tij ishte gati të “mbështeste pa kushte” të gjitha veprimet e ndërmarra nga Moska për të zgjidhur konfliktin në Ukrainë, raportoi sot media shtetërore, ndërsa të dy vendet zhvilluan bisedime strategjike të nivelit të lartë, sipas “Reuters”.

Ministri i Jashtëm rus, Sergei Lavrov ndodhet në një vizitë treditore në Korenë e Veriut, e cila ka siguruar trupa dhe armë për luftën e Rusisë.

Koreja e Veriut premtoi më shumë mbështetje ushtarake ndërsa Moska përpiqet të bëjë përparime në konflikt.

Kim u takua me Lavrov në qytetin bregdetar lindor të Wonsan, ku ministrat e Jashtëm të të dy vendeve zhvilluan dialogun e tyre të dytë strategjik – duke u zotuar për bashkëpunim të mëtejshëm – sipas një traktati partneriteti të nënshkruar vitin e kaluar që përfshin mbrojtjeje të ndërsjellë.

“Kim Jong Un rikonfirmoi se DPRK (Republika Popullore Demokratike e Koresë së Veriut) ishte gati të mbështeste pa kushte dhe të inkurajonte të gjitha masat e ndërmarra nga udhëheqja ruse në lidhje me trajtimin e shkakut rrënjësor të krizës ukrainase”, tha KCNA.

Lavrov, më herët zhvilloi bisedime me homologun e tij të Koresë së Veriut Choe Son Hui në Wonsan.

“Ata lëshuan një deklaratë të përbashkët duke premtuar mbështetje për të mbrojtur sovranitetin kombëtar dhe integritetin territorial të njëri-tjetrit”, tha KCNA.

Marrëdhëniet midis Rusisë dhe Koresë së Veriut janë thelluar në mënyrë dramatike gjatë dy viteve të fundit të luftës në Ukrainë, e cila filloi në shkurt 2022.

Pheniani dislokoi më shumë se 10,000 trupa dhe armë në Rusi për të mbështetur fushatën ushtarake të Moskës.

Qeveria e Kim është zotuar të dërgojë rreth 6,000 inxhinierë dhe ndërtues ushtarakë për të ndihmuar në punën e rindërtimit në rajonin Kursk të Rusisë. //a.i/

The post SEUL – Koreja e Veriut rikonfirmon mbështetjen për luftën e Rusisë në Ukrainë appeared first on Agjencia Telegrafike Shqiptare.

UASHINGTON, 11 korrik /ATSH/- Departamenti Amerikan i Shtetit (DASH) do të shkarkohen nga detyra më shumë se 1 300 punonjës – në përputhje me planin e riorganizimit të administratës Trump, i cili sipas kritikëve mund të dëmtojë lidershipin global të Amerikës dhe përpjekjet për t’iu kundërvënë kërcënimeve jashtë vendit, sipas “Washington Post”.

“Departamenti ka filluar të dërgojë njoftime për pushim nga puna për 1 107 nëpunës civilë dhe 246 oficerë të shërbimit të jashtëm me detyra në SHBA”, sipas një zyrtari të lartë të departamentit, i cili foli në kushte anonimiteti.

“Zyrtarët e shërbimit të jashtëm të prekur – do të vendosen menjëherë në leje administrative për 120 ditë – pas së cilës ata do të humbasin zyrtarisht vendet e tyre të punës”, sipas një njoftimi të brendshëm.

“Shkurtimet e numrit të punonjësve janë përshtatur me kujdes duke prekur funksionet jo-thelbësore, zyrat e dyfishta ose të tepërta”, thuhet në njoftim.

Ndërsa plani i riorganizimit u vlerësua nga presidenti Donald Trump, sekretari amerikan i Shtetit, Marco Rubio dhe aleatët e tyre republikanë – shkurtimet janë kritikuar ashpër nga diplomatët aktualë dhe ish-diplomatë të cilët thonë se ato do të dobësojnë ndikimin e SHBA-së dhe aftësinë për t’u përballur me kërcënimet ekzistuese dhe të reja jashtë vendit. //a.i/

The post SHBA – DASH shkarkon mbi 1 300 punonjës, pjesë e planit të ristrukturimit të Trump appeared first on Agjencia Telegrafike Shqiptare.

LONDËR, 11 korrik /ATSH/- Fansat e “Oasis” janë “çmendur” sërish pas muzikës së grupit anglez të Rock-ut – pas ribashkimit të tyre, duke e renditur atë në vendin e parë në top listën e albumeve më të mira në Britaninë e Madhe, sipas BBC.

Pasi grupi nisi turneun e tyre të rikthimit javën e kaluar, albumi “Time Flies” është rikthyer në vendin e parë, i ndjekur nga “(What’s the Story) Morning Glory?” i vitit 1995 – i renditur në vendin e dytë.

Albumi debutues “Definitely Maybe”, i vitit 1994 është në vendin e katërt.

“Oasis” kanë pasur tetë albume në vendin e parë në total, dhe për herë të fundit kryesuan listën me “Definitely Maybe” shtatorin e kaluar pasi u njoftua ribashkimi i grupit.

Albumet “Time Flies” dhe “Morning Glory” gjithashtu u rikthyen në pesë vendet e para në atë kohë.

Tre nga këngët e tyre kanë hyrë gjithashtu në listën e 20 këngëve më të mira këtë javë, të kryesuara nga “Acquiesce”, në vendin e 17 – e ndjekur nga “Don’t Look Back in Anger” në vendin e 18-të dhe “Live Forever” në vendin e 19-të.

Noel dhe Liam Gallagher i dhanë fund mosmarrëveshjeve duke u rikthyer në skenë për herë të parë pas 16 vitesh. //a.i./

The post MUZIKË – “Oasis” pushton top listat britanike pas ribashkimit appeared first on Agjencia Telegrafike Shqiptare.

IRAK, 11 korrik /ATSH/- Tridhjetë militantë të Partisë së Punëtorëve të Kurdistanit (PKK) dogjën sot armët e tyre në hyrje të një shpelle në Irakun verior, duke shënuar një hap simbolik, por domethënës drejt përfundimit të një kryengritjeje 10-vjeçare kundër Turqisë, sipas “Reuters”.

PKK-ja, e bllokuar në konflikt me shtetin turk dhe e jashtëligjshme që nga viti 1984, vendosi në maj të shpërbëhej, të çarmatosej dhe t’i jepte fund luftës së saj separatiste – pas një thirrjeje publike nga udhëheqësi i saj i burgosur, Abdullah Oxhallan.

Pas një sërë përpjekjesh të dështuara për paqe, iniciativa e re mund t’i hapë rrugën Ankarasë për t’i dhënë fund një kryengritjeje që ka vrarë mbi 40 000 njerëz, ka rënduar ekonominë dhe ka shkaktuar përçarje të thella sociale dhe politike në Turqi dhe në rajonin e gjerë.

Presidenti turk, Tayyip Erdogan tha se shpresonte që shpërbërja e PKK-së do të forconte sigurinë turke dhe stabilitetin rajonal. //a.i/

The post IRAK – Militantët kurdë të PKK-së djegin armët në një hap historik për t’i dhënë fund konfliktit 10-vjeçar me Turqinë appeared first on Agjencia Telegrafike Shqiptare.