Shoqata e Kosovës për Kërkim dhe Shpëtim ka reaguar ndaj raportimeve të shumta në rrjete sociale që pretendojnë se është lokalizuar trupi i mërgimtarit të zhdukur në Liqenin e Ujmanit.

Në një njoftim zyrtar, Shoqata ka theksuar se këto informacione janë të pabaza dhe të pavërteta.

Ata konfirmuan se kërkimet ende janë duke vazhduar dhe se çdo informacion zyrtar do të jepet vetëm nga institucionet përkatëse dhe ekipet e angazhuara në operacionin e kërkim-shpëtimit.

“Lusim qytetarët dhe mediat që të mos shpërndajnë lajme të pavërteta që vetëm sa krijojnë konfuzion dhe pengojnë operacionet e kërkim-shpëtimit”, thuhet në njoftim.

Shoqata ka kërkuar mirëkuptim dhe durim nga publiku deri në përfundimin e operacionit dhe konfirmimin e saktë të çdo zhvillimi nga burimet zyrtare.

The post Shoqata për Kërkim dhe Shpëtim mohon se ka lokalizuar trupin e mërgimtarit në Liqenin e Ujmanit appeared first on Telegrafi.

Një 27-vjeçar është plagosur me armë zjarri në fshatin Stanovc të Vushtrrisë.

Policia e ka cilësuar si “Vrasje e rëndë e mbetur në tentativë”.

Sipas njoftimit zyrtar, rreth orës 18:00 është pranuar informata për një plagosje me armë zjarri në këtë fshat.

Viktima, mashkull rreth moshës 27 vjeç, është dërguar menjëherë për trajtim mjekësor dhe, sipas autoriteteve shëndetësore, gjendja e tij është jashtë rrezikut për jetë.

“Në vendin e ngjarjes janë gjetur katër gëzhoja. Hetuesit policor, nën udhëheqjen e prokurorit kompetent, kanë nisur hetimet në drejtim të veprës penale ‘Vrasje e rëndë e mbetur në tentativë’,” thuhet në njoftimin e Policisë.

Ndërkohë, autoritetet janë në kërkim të personit të dyshuar për këtë sulm me armë, i cili është në arrati.

Hetimet janë në vazhdim për zbardhjen e plotë të rrethanave të rastit.

The post Plagosje me armë në Stanovc të Vushtrrisë, policia jep detaje appeared first on Telegrafi.

Albulena Haxhiu, ministre në detyrë e Drejtësisë dhe kandidatja e Lëvizjes Vetëvendosje për kryetare të Kuvendit, e cila nuk mori votat për t’u zgjedhur në këtë post, në një intervistë në Debat Plus është pyetur nëse kishin shpresuar në votat e Listës Serbe në votimin e fshehtë.

Ajo ka thënë se nuk kanë pasur komunikim me ta, por ka pretenduar se kishte vota në Partinë Demokratike të Kosovës (PDK) dhe në Lidhjen Demokratike të Kosovës (LDK).

“Nuk kemi pasur komunikim me ta, kam pasur vota në PDK-LDK”, ka thënë ajo.

”Ne kemi dëshmuar me veprime se jemi kundër Listës Serbe, pra kundër Listës Serbe që për mua nuk është subjekt politik”, është shprehur ajo.

Haxhiu kur është pyetur se pse nuk e kanë shpallur Listën Serbe organizatë terroriste ka thënë se fajtore për këtë është opozita.

”Ne kemi kundërshtuar brenda Komisionit Qendror të Zgjedhjeve që Lista Serbe të mos certifikohej, por se patëm mbështetjen nga partitë tjera”, ka thënë ajo.

”Vetëm po të ishim të unifikuar që të mos lejonim certifikimin e Listës Serbe, unë mendoj se nuk do të përballeshim me këtë situatë”, ka thënë ajo.

Ajo tutje ka thënë se askush nga Lëvizja Vetëvendosje nuk ka pasur komunikim me Listën Serbe.

”Askush nga Lëvizja Vetëvendosje nuk ka pasur komunikim me Listën Serbe. Askush nga Lëvizja Vetëvendosje nuk i ka kërkuar Listës Serbe votë as në këtë rast as…”, ka thënë ajo.

Tutje, Haxhiut i është përkujtuar edhe komunikimi me Listën Serbe, përkatësisht biseda mes Milan Radojçiqit dhe Mimoza Kusari-Lilës.

”Kemi diskutuar shumë për atë çështje, kemi thënë qëndrimet tona”, ka thënë Haxhiu.

The post Haxhiu mohon komunikimin me Listën Serbe: Kam pasur vota në PDK e LDK appeared first on Telegrafi.

Lëvizja Vetëvendoasje ka zyrtarizuar Jetmir Tofajn si kandidat për kryetar të Komunës së Junikut, në zgjedhjet lokale që do të mbahen më 12 tetor.

Kandidatura e tij u konfirmua gjatë një tubimi me strukturat e Lëvizjes në këtë komunë, ku morën pjesë edhe kryeministri Albin Kurti, sekretari organizativ Alim Rama, deputetët Nezir Kraki e Salih Zyba, zëvendësministri i Arsimit Taulant Kelmendi dhe kryetari i Qendrës së Gjakovës, Agon Batusha.

Gjatë këtij takimi u theksua rëndësia e një qeverisjeje që u ngjan qytetarëve të Junikut – e fjalës dhe e punës – ndërsa Tofaj u prezantua si kandidati që do të udhëheq me ndershmëri dhe përkushtim.

“Junikasit e dinë mirë çfarë do të thotë t’i qëndrosh tokës, fjalës dhe punës. Tani është koha që edhe qeverisja në Junik t’u ngjajë qytetarëve të vet”, u tha në mbështetje të kandidaturës së tij.

Me vlerësimin për Junikun si një komunë me histori krenare dhe potencial të madh në turizëm, bujqësi dhe kulturë, përfaqësuesit e LVV-së u zotuan për një qeverisje të hapur dhe të përkushtuar ndaj nevojave të qytetarëve.

“Me Jetmir Tofajn dhe Lëvizjen VETËVENDOSJE!, Juniku do të ecë përpara me hap të sigurt dhe me duar të pastra”, u theksua në përmbyllje të tubimit.

Zgjedhjet lokale do të mbahen më 12 tetor, dhe LVV ka bërë thirrje për bashkim rreth vizionit të një Juniku më të drejtë dhe më të zhvilluar.

The post Jetmir Tofaj zyrtarizohet kandidat i LVV-së për kryetar të Junikut appeared first on Telegrafi.

Mbrëmjen e së shtunës, pesë persona mbetën të bllokuar në një ashensor në një ndërtesë në rrugën “Pajazit Islami” në Fushë Kosovë.

Ashensori kishte rënë nga kati i gjashtë në përdhese dhe dy persona mbeten të lënduar. Gjendja e tyre momentale është e mirë.

Funksionin po e kryen mirë.

Por ky lift në një ndërtesë në rrugën “Pajazit Islami” në Fushë Kosovë nuk punoi si duhet mesnatën e së shtunës.

Kjo pasi që pesë të rinj mbetën të bllokuar pikërisht në këtë ashensor.

Pasi hypën në të dhe dhanë komandën për në katin e gjashtë, lifti ra papritur në përdhesë.

Brenda ndodheshin katër djem dhe një vajzë, të moshës 17 deri në 22 vjeç.

Dy prej tyre u lënduan.

Për Tëvë1, mbrapa kamerave, se si ndodhi ngjarja e tregoi një familjar.

“Kur kanë arritur te kati 6, u është hapur dera veç në gjysmë dhe është mbyllur menjëherë, kështu që fëmijët s’kanë pasur mundësi me dalë nga lifti dhe lifti ka filluar me hecë poshtë, po falë Zotit deri në katin e 4-t është zvogëluar shpejtësia, edhe fëmijët, si e kanë pa që lifti s’po ndalet, janë ulur të gjithë këmbëkryq dhe janë përqafuar mes veti me britma e trauma. Të gjithë i kanë mbyllur sytë dhe s’e kanë besuar që po kanë shpëtim. Dy djem janë lënduar më shumë: njëri në qafë, tjetri në këmbë. Kurse dy djemtë tjerë dhe vajza kanë filluar dhimbjet e trupit që dje”, kanë thënë familjarët.

Tutje, shtoi se gjendja e tyre momentale është e mirë, por sipas saj, ata kanë përjetuar trauma dhe që nga ajo ditë as gjumin nuk po e bejnë siç duhet.

Krejt ngjarjen e pa nga afër edhe banori i ndërtesës, Habib Mekolli.

Mekolli tregon edhe shkakun që sipas tij, kanë dhënë autoritetet për krejt këtë ndodhi.

“Erdhën shërbimet e Ndihmës së Shpejtë nga Fushë Kosova, erdhi policia, më vonë erdhen edhe hetues policorë me një ekspert gjyqësor për ta parë vendin e ngjarjes. Ndërkohë, erdhi edhe mirëmbajtësi i ashensorit dhe i këtyre shërbimeve të banesës. Fatkeqësisht është vërtetuar që kontrolli vjetor i ashensoit mungon”, ka thënë qytetari Mekolli.

Se gjendja e liftit nuk është e mirë, e thotë edhe banori tjetër, Bajram Orlloti.

“Që një vit jom, me fëmijë, me krejt. Gjendja e liftit është katastrof edhe pastertia është katastrof……I merr në qaf 8 katë janë afër 500 banor. E me i mbyt me sy në ballë, katastrof. 10euro i merr në muaj”, është shprehur një banorë.

Televizioni për këtë çështje ka tentuar të flasë edhe me kompaninë që e mirëmbajnë ashensorin. Ata thanë që krejt çfarë kanë pasur të deklarohen e kanë bërë para autoriteteve.

Po ashtu është kontaktuar edhe kompania që ka ndërtuar banesën me ç’rast kanë thënë që përgjegjësia i takon kompanisë mirëmbajtëse të ashensorëve.

Ndërkohë që ekipi i Tëvë1 tentoi të marrë një qëndrim edhe nga Policia e Kosovës, por deri në momentin e publikimit të kronikës të njëjtit nuk kanë kthyer përgjigje.

The post Ashensori bie nga kati i 6-të në përdhesë – pesë të rinj të bllokuar, dy të lënduar në Fushë Kosovë appeared first on Telegrafi.

Atë kohë si 18 vjeçare, duke qenë se ishte krah i babait, mes lotësh ajo rrëfen se si kur shkoi në shtëpinë e saj për ta kërkuar të atin, të cilin ia kishin zënë paramilitarët serbë dhe e kishin lidhur me konop për karrigeje, u kap nga forcat serbe edhe ajo, ku përjetoi dhunimin në sy të babait.

E gjithë kjo, ajo tha se ndodhi në shtëpinë e familjarit të saj, të cilin, thotë se e ka sikurse axhën e saj.

“Jo, shtëpia…prej asaj shtëpie kemi kaluar në shtëpinë tjetër e axhës, mund ta quaj axhë se lidhjet familjare i kemi ashtu. E kishin lidhur babën për karrige, me konop. Baba i gjakosur ka qenë komplet. Pastaj me kanë marrë mua, me kanë zhvesh, me kanë lidhur. Afër babës, në prezencë të babës, veç me kujtohet një fjalë që i kanë thënë babës shikoje të dy do të jeni të vdekur. Se, baba bërtiste në pjesën tjetër dhe u mundojke së bashku me karrige. Ajo është pjesa më e ndjeshme që mund ta flas tash. Kanë qenë dy vetë, i treti i dehur me shishe në dorë dhe mua me ka humbur komplet vetëdija, nuk kam qenë më e vetëdijshme”, rrëfen ajo mes lotësh.

Teksa rrëfen tmerrin që përjetoi në prani të babait, ajo thotë se të gjitha rrobat i ishin shqyer me thika.

“Po, edhe këtu ma kanë futur thikën, por baba e kishte të pamundur të bëjë diçka për mua. Pastaj mua me ka rënë të fikët, nuk kam ditur asgjë, kam qenë e zhveshur, si u zgjidh baba nuk e kanë mbytur babën, si u zgjidh, si ka arritur të më mbështjell me batanije, nuk e di unë, veç e kam parë vetën në ****, në traktor, që më kishte dërguar baba dhe e kam parë vetën në *****. Deri në atë kohë e dëgjoja zërin e babës, por kam menduar se jam në ëndërr, duke më folur”, thotë ajo në një rrëfim në RTVDukagjini.

E mbijetuara e dhunës seksuale thekson se ishte babai i saj me butësinë e tij, afërsinë e tij, ajo, sot nuk do të ishte.

Madje, babai i kishte lënë një amanet, që ajo të mos dorëzohet, pavarësisht dhunës që përjetoi.

The post E mbijetuara e dhunës seksuale në Kosovë: Më dhunuan në prani të babës, s’mundi të bëjë asgjë appeared first on Telegrafi.

Deputeti i Aleancës për Ardhmërinë e Kosovës (AAK), Daut Haradinaj, ka reaguar pas vendimit të Gjykatës Supreme që rrëzoi masën e Ministrisë së Bujqësisë për përgjysmimin e subvencioneve për operatorët me mbi 100 hektarë tokë bujqësore.

Haradinaj e ka quajtur këtë vendim një fitore ndaj diskriminimit institucional, duke theksuar se “e drejta mbrohet me ligj dhe gjykatë”, pavarësisht siç tha ai, tendencave të Ministrisë për t’i dëmtuar investitorët e mëdhenj në sektorin bujqësor.

Ai përmendi në veçanti kompaninë “Stone Castle”, duke thënë se kjo kompani ka triumfuar kundër një padrejtësie që iu shkaktua me dashje nga institucionet.

“Më bën krenar puna e palodhshme dhe fuqia prodhuese e këtyre investitorëve që po e lartësojnë Kosovën në aspekt global me verërat më cilësore në Ballkan e më gjerë,” shkroi Haradinaj në një reagim publik.

“Padrejtësia nuk kalon”, shkroi Haradinaj.

The post Supremja rrëzoi masën e Ministrisë së Bujqësisë, reagon Haradinaj: Padrejtësia nuk kalon appeared first on Telegrafi.

Agjencia e Menaxhimit Emergjent, ka njoftuar se vetëm nga ora 14:00 deri në 20:00 të së dielës janë raportuar gjithsej 80 vatra zjarri në territorin e Kosovës.

Sipas njoftimit, 35 prej tyre janë ende aktive, ndërsa 45 janë lokalizuar nga ekipet emergjente.

Situata më e rënduar paraqitet në Komunën e Klinës, konkretisht në fshatrat Siqevë dhe Resnik, ku zjarret janë më të fuqishme dhe përhapja më e shpejtë.

“Fatmirësisht, deri më tani nuk është raportuar për viktima apo persona të lënduar. Situata po menaxhohet me të gjitha kapacitetet në dispozicion nga AME dhe Njësitë e Zjarrfikësve”, thuhet në njoftimin e agjencisë.

AME u ka bërë thirrje qytetarëve për kujdes të shtuar, duke kërkuar që të shmangen çdo veprim që mund të shkaktojë zjarr, si ndezja e zjarreve në ambient të hapur apo djegia e mbeturinave.

Çdo vatër e dyshimtë duhet të raportohet menjëherë në numrat emergjentë: 112, 193 ose 192.

“Agjencia, në bashkëpunim me Zjarrfikësit dhe Policinë e Kosovës, mbetet në gatishmëri të plotë. Falënderojmë zjarrfikësit për përkushtimin e palodhshëm, Policinë e Kosovës dhe KFOR-in për mbështetjen, si dhe qytetarët për bashkëpunimin”, thuhet në reagimin nga AME.

The post Mbi 30 vatra zjarri ende aktive në Kosovë – gjendja më e rënduar në Klinë appeared first on Telegrafi.

Një ngjarje e rëndë është shënuar pasditen e së dielës në Shkodër, ku trupi i pajetë i një 26-vjeçari është gjetur në ujërat e Liqenit të Shkodrës.

Sipas njoftimit zyrtar, rreth orës 18:40, Salla Operative e Drejtorisë Rajonale të Kontrollit të Mjedisit Shkodër njoftoi për praninë e një kufome në liqen, në afërsi të zonës së Shirokës. Trupi është konstatuar nga disa peshkatarë, të cilët njoftuan menjëherë autoritetet.

Viktima është identifikuar si shtetasi I. L., 26 vjeç, ndërsa burime nga grupi hetimor bëjnë me dije se ai dyshohet të ketë vuajtur nga depresioni. Nga ekzaminimet paraprake, në trupin e tij nuk janë konstatuar shenja dhune, duke shtuar dyshimet se mund të bëhet fjalë për një akt vetëvrasje.

Policia dhe grupi hetimor nga Komisariati i Shkodrës po vijojnë punën për zbardhjen e plotë të rrethanave të ngjarjes, ndërsa trupi i të ndjerit është dërguar në morg për ekspertizë mjeko-ligjore.

The post I zhdukur prej disa orësh, nxirret i pajetë trupi i 26-vjeçarit nga Liqeni i Shkodrës appeared first on Telegrafi.

Në Gjykatën Themelore në Prishtinë, nesër do të shpallet aktgjykimi i parë në mungesë për dhunim seksual gjatë luftës.

Të akuzuar janë Ivica Rajkoviq dhe Dragan Deniq, të dy këta ishin policë në Prishtinë.

Përveç për dhunim seksual, në bazë të dëshmive të dëshmitarëve, të njëjtit kanë kryer edhe krime të tjera te luftës, si maltretime, plaçkitje, tortura, por që nuk jnë përfshirë në këtë aktakuzë

Rasti i dhunimit seksual ka ndodhur në Kolovicë. E mbijetuara e këtij krimi u dhunua para syve të burrit të saj, i cili ka qenë dëshmitari kryesor i rastit, dhe dëshmia e tij ka qenë kryesore në gjykatë.

Po ashtu, viktimën e kanë dhunuar gjashtë persona, por vetëm këta dy janë identifikuar nga viktima.Ky është rasti i katërt që ka përfunduar gjykimi, i raportuar dhe përfaqësuar nga Qendra Kosovare e Rehabilitimin të të Mbijetuarve të Torturës (QKRMT).

Gjykimi është zhvilluar në mungesë, në pamundësi që të njëjtit të arrestohen.

Deri më tani janë shpallur tri aktgjykime për dhunim seksual. Zoran Vukotiq është dënuar me 13 vjet burg, në rastin tjetër Vukotiq është liruar, dhe rasti Zhivojin Nesiq “Zhika” u dënua me 15 vjet.

Ndërkaq, ky është rasti i parë për gjykim në mungesë për këtë krim lufte.

The post Nesër shpallet aktgjykimi ndaj Ivica Rajkoviq e Dragan Deniq për dhunim gjatë luftës appeared first on Telegrafi.

Lëvizja Vetëvendosje ka kandiduar për kryetar të Komunës së Artanës, Abdyl Gashin, për zgjedhjet lokale të 12.10.2025.

LVV njofton se në një takim atje, së bashku me strukturat e partisë dhe në prani të kryetarit të LVV-së Albin Kurti e sekretarit organizativ Alim Rama, u konfirmua kandidatura e Gashit.

“Projektet e suksesshme të qeverisjes qëndrore për Artanën do t’i shumëfishojmë edhe në nivel lokal. Adresa e shqiptarëve në Artanë është Lëvizja VETËVENDOSJE!. Abdyl Gashi është kandidati që përfaqëson të gjithë qytetarët, përtej dallimeve, përfshirë ato partiake” – thuhet në postimin e LVV-së.

“Na priftë e mbara në Artanë me Abdyl Gashin, kandidatin tonë në zgjedhjet e 12 tetorit dhe zgjedhjen e duhur për banorët e kësaj komune” – ka shkruar Kurti në rrjete sociale.

Abdyl Gashi, tanimë kandidat për Kryetar të Artanës, më herët ishte angazhuar si ekspert në Ministrinë e Mjedisit, Planifikimit Hapësinor dhe Infrastrukturës gjatë.

The post LVV kandidon Abdyl Gashin për kryetar të Artanës, më 2024 ishte angazhuar si ekspert në MMPHI appeared first on Telegrafi.

Kryeprokurori i Prokurorisë Speciale, Blerim Isufaj, ka dhënë detaje të padëgjuara më parë për vendimin për tërheqjen e urdhër-arrestit ndaj Milan Radojiçiqit në vitin 2021, i cili ishte lëshuar në lidhje me vrasjen e politikanit serb, Oliver Ivanoviq.

Në gusht të vitit 2019 Ministria e Drejtësisë kishte lëshuar letër- rreshtim ndaj Milan Radoiçiqit. Konfirmimin për letër- rreshtimin në vitin 2019 e kishte dhënë edhe ish-ministri i Drejtësisë, në atë kohë, Abelard Tahiri.

Kryeprokurori Blerim Isufaj për Kallxo tha se deklaratat e tij të mëhershme lidhur me këtë çështje mund të kenë krijuar paqartësi, por tani vendosi të sqarojë gjithçka për publikun.

“Në konferencë të cilën e pata mbajtur kohë më parë, pata deklaruar se për këtë çështje nuk mund të shpalosi detaje. Unë jam i vetëdijshëm se kjo deklaratë ka mujt me shkaktu konfuzion, keqinterpretim” – tha Isufaj.

Ai sqaroi se procedura ishte zhvilluar nga prokurori i çështjes Burim Qerkini dhe se ai ishte informuar si kryeprokuror, bashkë me kryeprokurorin e atëhershëm të shtetit dhe disa prokurorë të tjerë.

“Mos harro, po e përsëris – e kam thanë se nuk mund të ndaj detaje me publikun. Ato detaje po i shpalosi këtu. Procedurën e ka zhvilluar prokurori i çështjes, sikurse në çdo rast tjetër. Prokurorët janë të pavarur për punën e tyre në zhvillimin e procedurës. Për këtë proces, kam qenë i informuar si kryeprokuror. Përveç meje ka qenë kryeprokurori i shtetit dhe disa prokurorë të zyrës time. Kjo do të thotë se kjo çështje në asnjë mënyrë nuk është ba që si të themi në mënyrë sekrete” – shtoi ai.

Isufaj zbuloi prapaskenat e një takimi ndërmjet prokurorit të çështjes, Burim Qerkini dhe avokatit të Radoiçiqit. Radoiçiq i kishte premtuar PSRK-së se do të jepte informacione kredibile për vrasjen e Oliver Ivanoviqit, në mënyrë qe urdhër-arresti ndaj tij të hiqej.

“Në një moment, prokurori i çështjes (Burim Qerkini) ka ardhë në zyrën time dhe më ka njoftu për një takim që ai kishte pasur me avokatin e Milan Radoiçiqit. Si ma interpretoi prokurori mua, ishte kështu situata – avokati i Radoiçiqit i kishte thënë prokurorit se Radoiçiqi po jep sinjale bashkëpunimi dhe nëse pranoni me ja hjek urdhërarrestin, ai do të jap informacione që janë shumë kredibile për vrasjen e Oliver Ivanoviqit” – tha kryeprokurori.

Ai theksoi se në atë kohë nuk kishte shumë informacion për rolin e Radoiçiqit dhe nuk kishte pranuar “ofertën” për heqjen e urdhër-arrestit.

“Të jeni të sigurt, unë në atë kohë nuk kam pasur shumë informacione kush është Radoiçiqi. E kam ditur që është i akuzuar si bashkëkryerës në kryerje të veprës penale të Oliver Ivanoviqit, por nuk kam ditur më shumë. Ju e dini që ka pasur tentime me u arrestu disa herë nga Policia por nuk ka mundur. Në momentin kur ma tha këtë prokurori i çështjes, unë kam qenë i qartë, i kam thanë jo. Pse i kam thanë jo? Nuk është se unë s’kam dashur ta pranoj një ofertë të tillë, nuk është se unë nuk kam dashur të siguroj informacionet që pretendohej se ishin shumë relevante për çështjen e vrasjes së Oliver Ivanoviqit sepse urdhër-arresti ka të bëjë për vrasjen e Ivanoviqit. Nuk u pajtova me prokurorin dhe i thashë vazhdo me procesin kështu si je” – deklaroi Isufaj në KallxoPërnime.

Prokurori Burim Qerkini kishte insistuar, duke sjellë një plan hetimi dhe strategji për marrjen e atij informacioni, që ishte përkrahur edhe nga ish-kryeprokurori i shtetit, Aleksandër Lumezi.

“Ndërkohë prokurori i çështjes insistoi dhe mua ma solli një plan hetimi, një strategji për mënyrën se si ai mendon marrjen e atij informacioni. Për të gjitha këto biseda, i informuar dhe në takime ka qenë ish-kryeprokurori i shtetit, Aleksandër Lumezi. Meqenëse prokurori – e thashë edhe më herët – është i pavarur në mënyrën se si e trajton një rast, se si e siguron një provë, se si e prezanton provën para gjykatës, unë nuk mujta me u ba pengesë me thanë nuk bën në asnjë mënyrë sepse e kisha një instancë më të lartë aty” – sqaroi kryeprokurori.

I pyetur për qëndrimin e ish-kryeprokurorit të shtetit Aleksandër Lumezi, Isufaj tha se ai e kishte përkrahur tërheqjen e urdhërarrestit ndaj Radoiçiqit.

“Po, ishte pro kësaj dhe unë i besova sinqeritetit të prokurorit. Isha i bindur dhe jam edhe sot se qëllimi i prokurorit të çështjes nuk ka qenë që të amnistohet Radoiçiqi, përkundrazi qëllimi ka qenë që ai të vihet këtu edhe të ballafaqohet me drejtësinë. Imagjinoje, Kreshnik, sikur ai të vinte në Prokurorinë Speciale, ose e kish dhënë informacionin për vrasjen e Oliver Ivanoviqit ose do të arrestohej sepse e ka pasur statusin e personit të pandehur” – tha Isufaj.

Ndërkohë Blerim Isufaj tha se deri më tani askush nuk është hetuar për heqjen urdhër-arrestit ndaj Milan Radoiçiqit. Por, shtoi se “nëse ka ndonjë provë që dëshmon se tërheqja e urdhër-arrestit lidhet me ndonjë vepër penale, garantoj se do ta hetojë pa kompromis”

Ai shtoi se aktualisht, Prokuroria Speciale e Kosovës ka katër urdhër-arreste aktive për Radoiçiqin: për vrasjen e Ivanoviqit, për rastin e Banjskës, për organizimin e barrikadave dhe për krime të luftës.

“Po e përsëris, ne Radojiçiqin jemi duke e hetu në shumë pista të hetimit. Po e hetojmë edhe për mundësinë e bashkëpunimit me persona të tjerë në Kosovë. Përndryshe, Prokuroria Speciale i ka katër urdhër-arreste të lëshuara për Radoiçiqin: për rastin e Oliver Ivanoviqit, për rastin Banjska, për rastin e barrikadave dhe për krime të luftës. Atë që ma tha prokurori i çështjes, u betu se nëse nuk arrin me sjellë Radoiçiqin këtu, urdhër-arresti ndaj tij do të kthehet – dhe kjo ndodhi” – përfundoi Isufaj.

I pyetur për faktin se si ndodhi që Radoiçiqi më pas jetoi lirshëm në Mitrovicë dhe nuk ishte paraqitur në Prokurorinë Speciale, Isufaj tha:

“Nuk e di pse nuk ka ardhë. Synimi i prokurorit ka qenë që ai me ardhë, e vërteta është që ai nuk ka ardhë dhe e vërteta është që për këtë arsye ju ka kthyer urdhërarresti. Unë e them me përgjegjësi të plotë një fakt – se kjo çështje është politizu tej mase. Nuk e kam besu që shkon deri në këtë nivel” – tha kryeprokurori.

Ndaj Milan Radoiçiq kishte një urdhërarrest në lidhje me vrasjen e ish- politikanit serb në Kosovë, Oliver Ivanoviq për çka dyshohej se ka marrë pjesë në organizimin dhe vrasjen e Ivanoviqit.

Sipas një aktakuze të ngritur nga Prokuroria Speciale në Kosovë, Milan Radoiçiq dhe një serb tjetër i Kosovës, Zvonko Veselinoviq, ishin udhëheqësit e një grupi të organizuar kriminal përgjegjës për vdekjen e Oliver Ivanoviqit.

Në fillim të muajit shkurt të vitit 2021 në Gjykatën e Prishtinës ka filluar procesi gjyqësor në rastin për vrasjen e ish-politikanit serb të Kosovës, Ivanoviq.

Me kërkesë të Prokurorisë Speciale, urdhërarresti ndaj Milan Radoiçiqit ishte tërhequr po në fillim të vitit 2021.

“PRSK (Prokuroria Speciale e Republikës së Kosovës) ka bërë kërkesë për tërheqjen e letër- rreshtimit dhe gjykata duke vepruar sipas kërkesës së saj e ka tërhequr letër-rreshtimin”- kishte deklaruar ai.

Ish-politikani serb i Kosovës, Oliver Ivanoviq, u vra më 6 janar 2018.

The post Çka i kishte premtuar Radoiçiqi Prokurorisë Speciale, në këmbim të tërheqjes se urdhër-arrestit më 2021? appeared first on Telegrafi.

Boshnjakët dhe goranët e rajonit të Prizrenit dhe Dragashit po interesohen gjithnjë e më shumë për pasaportat bullgare, derisa përfaqësuesit e komunitetit boshnjak këtë dukuri e konsiderojnë si përpjekje për krijimin e një bashkësie të re bullgare.

Deputeti boshnjak Rasim Demiri i tha Radio Kosovës se viteve te fundit, ka përpjekje për bullgarizim të qytetarëve boshnjakë të Kosovës.

Mungesa e zhvillimit ekonomik dhe thellimi i varfërisë në vend ka shtyrë disa qytetarë të Komunës së Dragashit dhe rajonit të Zhupës që të pajisen me pasaporta dhe shtetësi bullgare, me qëllim të shkuarjes nëpër vendet e Bashkimit Evropian.

Kryetari i Komunës së Dragashit, Bexhet Xheladini, në një intervistë për Radio Kosovën, thotë se ambasada e Bullgarisë në Kosovë disa herë ka vizituar këtë komunë duke bërë investime kapitale me qëllim joshjen e popullatës që të regjistrohen si bullgarë dhe të pajisen me pasaporta bullgare.

“Ambasada e Bullgarisë bën investime në Dragash çdo vit, realizon nga një ose dy projekte kapitale. Edhe më herët ka pasur raste kur disa qytetarë janë regjistruar si bullgarë për të marrë pasaportë bullgare. Regjistrimi i fundit ka treguar se ka shumë pak raste të tjera, pasi në fshatrat ku kanë menduar se do të regjistrohen si bullgarë, kanë dështuar”, tha ai.

Përfaqësuesit e komunitetit boshnjak këtë dukuri e konsiderojnë si përpjekje për përçarje dhe ndarje të mëtejshme të bashkësisë së tyre dhe krijimin e një bashkësie të re bullgare. Ata kanë apeluar te përfaqësuesit e BE-së që të ndalin këtë dukuri.

Rasim Demiri, deputet në Kuvendin e Kosovës, për Radio Kosovën thotë se vitet e fundit ka pasur përpjekje për bullgarizimin e qytetarëve të Kosovës. Në regjistrimin e fundit të popullsisë, asnjë pjesëtar nga komuniteti boshnjak nuk është regjistruar si bullgar, sqaron Demiri.

“Ky regjistrim ka qenë edhe dëshmi se përpjekja për bullgarizimin në Kosovë ka dështuar, përkundër përpjekjeve. Sa i përket dokumenteve, ka ndonjë individ që për interesa personale ka marrë pasaportë bullgare, për arsye se Kosova ka qenë nën regjimin e vizave dhe njerëzit kanë dashur të udhëtojnë nëpër botë”, theksoi ai.

Ndërkaq, qytetarët thonë se askush që ka marrë pasaportë bullgare nuk është bullgar, por se një gjë të tillë e kanë bërë krejtësisht për interesa personale.

“Nuk janë bullgarë, krejt e dimë. Janë shqiptarë, marrin pasaporta bullgare për interesa personale. Kam dëgjuar fjalë… nuk e di, më duket se e kanë një zyrë, por nuk e di a është këtu, apo në Dragash, apo ndoshta diku tjetër”, thekson qytetari i intervistuar.

Ndryshe, Departamenti për Shtetësi, Azil dhe Migracion, në një përgjigje përmes postës elektronike, ka sqaruar se nuk ka kufizime ligjore, pasi që ligji lejon dy ose më shumë shtetësi.

The post ” Krijimi i një bashkësie bullgare”, rritet interesi për pasaporta bullgare në Dragash e Prizren appeared first on Telegrafi.

Zgjedhja e furnizuesit të energjisë është një vendim financiar me ndikim të drejtpërdrejtë në bilancin e kompanisë.

Me liberalizimin e tregut të energjisë në Kosovë, bizneset kanë sot mundësinë të zgjedhin furnizues qe ofron çmim të garantuar, shërbim të besueshëm dhe transparencë të plotë.

MDA Energy ofron

Zgjidhje të qëndrueshme, pa çmime të larta të përkohshme

Furnizimi përmes kontratës emergjente zakonisht sjell tarifa më të larta dhe pasiguri në planifikim. Zgjedhja e një furnizuesi me çmim fiks dhe marrëveshje të qartë krijon bazë të fortë për stabilitet financiar dhe mundëson planifikim me te qëndrueshëm financiar.

Kursimi nis nga dita e parë

Çdo muaj me tarifa të larta përkthehet në para të humbura. Kompanitë që veprojnë me kohë përfitojnë nga çmime të personalizuara, oferta të garantuara dhe asistencë të plotë gjatë kalimit te furnizuesi i ri – një proces që është i thjeshtë dhe pa ndërprerje në furnizim.

Kontroll dhe transparencë në çdo hap

Zgjedhja e një furnizuesi që ofron transparence të plotë mbi strukturën e çmimeve, kushtet e kontratës dhe mundësitë për optimizim energjetik fuqizon bizneset për të marrë vendime të informuara

MDA Energy ofron çmime fikse afatgjata, kontrata transparente, si dhe edhe mbështetje të dedikuar gjatë gjithë procesit – teknike, ligjore dhe financiare. Kalimi është i thjeshtuar, pa kosto shtesë dhe i garantuar me asistencë 24/7.

Kjo qasje e integruar ndihmon bizneset të ruajnë stabilitetin financiar dhe të optimizojnë shpenzimet mujore të energjisë – duke e kthyer MDA Energy në një partner të qëndrueshëm për çdo kompani që kërkon kontroll dhe përfitim afatgjatë.

Vizitoni www.mda.energy, kërkoni ofertën tuaj dhe shihni sa mund të kurseni.

Koha për veprim është tani.

The post Si te ulet kostoja e rrymës elektrike dhe si mund të bëni edhe ju? appeared first on Telegrafi.

Petrit Hajdari është zyrtarizuar si kandidati i Partisë Demokratike të Kosovës (PDK) për kryetar të Komunës së Drenasit për zgjedhjet lokale të 12 tetorit.

Pas konfirmimit nga kryesia e partisë, ai ka reaguar përmes një postimi në rrjetin social “Facebook”, duke falënderuar lidershipin e PDK-së për besimin e dhënë.

Në reagimin e tij, Hajdari theksoi se është rritur dhe formuar në Drenas dhe se ky vend mbetet arsyeja e angazhimit të tij në politikë.

“Me nderim të lartë e falënderim të sinqertë për kryetarin Memli Krasniqi dhe kryesinë e PDK-së, kam pranuar konfirmimin e kandidaturës sime. Rrugëtimi im me PDK-në ka qenë i gjatë, sfidues por jashtëzakonisht krenar”, shkruan ai.

Ai ka bërë thirrje për bashkim dhe unifikim në Drenas, duke kërkuar që përballë sfidave politike të mbizotërojë uniteti.

“Drenasi është adresa jonë e përbashkët dhe e vetmja. Ka pasur, ka dhe do të ketë gra dhe burra që i përgjigjen thirrjeve për ta bërë vendin më të jetueshëm. Drenasi i është përgjigjur thirrjes për luftë, për shtetndërtim e do t’i përgjigjet edhe kësaj thirrjeje për përbashkim”, tha Hajdari.

Ai nënvizoi se fitorja e PDK-së në këtë komunë është e sigurt dhe se do të angazhohet maksimalisht për të qenë në shërbim të qytetarëve.

“Drenasin e kemi të shenjtë. Ndaj të gjithëve, pavarësisht bindjeve, shtrij dorën e bashkëpunimit: Drenasi kushton më shumë se egot e kujtdo”, përfundon reagimi i tij.

The post U zgjodh nga kryesia e PDK-së, reagon Petrit Hajdari: Drenasi kushton më shumë se egot e kujtdo appeared first on Telegrafi.

Kryeprokurori i Prokurorisë Speciale të Kosovës, Blerim Isufaj, është deklaruar hapur rreth mosdekretimit të tij si Kryeprokuror i Shtetit, duke komentuar zërat publikë se arsye për këtë vendim mund të jetë tërheqja e urdhër-arrestit për Milan Radoiçiqin në vitin 2021.

Në një intervistë për “KallxoPërnime”, ai tha se nuk e di arsyen pse nuk është dekretuar, por se nëse tërheqja e urdhër-arrestit është një prej arsyeve, atëherë sipas tij “kjo nuk duhet me qenë arsyeja”.

“Unë mendoj që këtu nuk ka arsye hiç. Nëse kjo është arsyeja, kjo nuk duhet me qenë arsyeje. Por të jeni të sigurt se unë arsyet nuk i di për mosdekretim” – deklaroi Isufaj.

Pasi u përmend fakti që kryeministri në detyrë Albin Kurti ka deklaruar në Kuvend se nuk i beson Isufajt, bashkë me Presidenten Vjosa Osmani dhe ish-kryeparlamentarin Glauk Konjufca, ai u përgjigj qartë duke thënë se nuk i prishë punë kjo gjë.

“Ata kanë thanë që s’më duan, edhe mirë që nuk m’dojnë. Nuk prishë punë. Nuk e di pse nuk më duan, pyetni ata.”

Blerim Isufaj u shpreh i vendosur për integritetin e tij personal dhe profesional.

“Shiko… kurrë në jetën time, më para e pranoj vdekjen se poshtërimin. As edhe një lidhje me Radoiçiqin e as Radoiçiqët kurrë në jetë, as mirëdita as dobar dan. Unë i ftoj të gjitha institucionet e Kosovës që kush ka argument për mua në këtë drejtim të i prezantoj, por nuk ka çka me prezantu sepse kurrkush nuk e di më mirë se unë punën time për veten time.”

Isufaj u shpreh i habitur se si mund të jetë në krye të Prokurorisë Speciale, kurse nuk bën për kryeprokuror të shtetit.

“Duhet me ditë krejt opinioni një gjë – integriteti është një, nuk është dy e as tre, integriteti ose ekziston ose nuk ekziston. Nëse ekziston, unë e plotësoj atë kusht. Nëse nuk ekziston tek unë, unë nuk duhet të jem as kryeprokuror i Prokurorisë Speciale”- tha ai.

Kryeprokurori i Speciales, tha se nuk flet me presidenten Vjosa Osmani e as me kryeministrin në detyrë Albin Kurti.

The post Kryeprokurori Isufaj: Mirë që nuk më duan Osmani e Kurti, nuk prishë punë appeared first on Telegrafi.

Kosova këtë vikend është përballur me gjendje të rënduar me zjarr. Mbi 20 vatra të zjarrit janë evidentuar vetëm brenda 24 orëve të fundit, ndërkohë që gjendja është qetësuar pak të dielen.

Përveç arave e shkurreve zjarri bëri shkrumb edhe stalla të fermerëve, vetura e pasije tjera bujqësore në disa komuna të Kosovës

Terreni është i vështirë e i pamundur që të shkohet me kamionë.

Andaj zjarrefikësit e Prishtinës, rrugën për ta shuar zjarrin në Trudë, po shkojnë në këmbë.

Me të tilla zjarre të njejtit jane duke u përballur nga dje, e situatë e ngjashme ka qenë edhe më heret.

“Numri ka qenë i jashtëzakonshëm dje për një kohë të shkurtër, e kemi potencuar disa herë edhe për juve që karakteristike e këtyre zjarreve është brenda një kohe të shkurtër shpërthejnë disa vatra të zjarrit dhe sigurisht që e bënë të vështirë shurjen e tyre sepse thatësia ka qenë e madhe barishtet shkurret janë të thata dhe përhapja e zjarrit është për një kohë të shkurtër, përfshinë sipërfaqe të mëdha”, ka theksuar Mal Gashi – zjarrëfikës.

Gashi tek thotë se kohëve të fundit iu kanë shtuar zjarrëfikës, numri i madh i vatrave të zjarrit po e pamundëson të i mbërrihnë të gjitha.

“Në brigadën profesionale të zjarrfikësve dhe shpetimit në Prishtinë, nuk qëndrojmë keq në mars janë pranuar edhe 26 zjarrëfikës të ri që i kanë dhënë një energji të re shërbimit, sigurisht nëse i shikojmë standardet ne kemi mungesë ende mirëpo prap po du me thanë sa i përket kapaciteteve ne nuk qëndrojmë shumë keq e vetmja  e met është që automjetet janë të vjetra”, ka deklauar Gashi për RTVDukagjini.

Situata me zjarre një ditë më parë ishte e rënduar, ndërkohë që të dielen situara ishte më e qete sipas Agjencisë për menaxhimin e emergjencave.

“Pasditen e djeshme, situata me zjarret ishte e rënduar. Megjithatë, falë reagimit të shpejtë dhe efikas të Njësive Profesionale të Zjarrfikjes dhe Shpëtimit, me mbështetjen e Agjencisë, si dhe reshjeve të shiut, numri i zjarreve gjatë 12 orëve të fundit ka rënë ndjeshëm. Aktualisht, është aktiv vetëm një  zjarr në fshatin Trudë, Komuna e Prishtinës, ku ekipet janë në terren. U bëjmë thirrje të gjithë qytetarëve që të tregojnë kujdes të shtuar, të shmangin çdo veprim që mund të shkaktojë zjarr dhe të raportojnë menjëherë çdo vatër të dyshimtë tek autoritetet përkatëse. Agjencia falënderon zjarrfikësit për përkushtimin e tyre të palodhshëm, Policinë e Kosovës dhe KFOR-in për mbështetjen, si dhe qytetarët për bashkëpunimin”.

Ndërkohë në raportin 24 orësh të Policisë së Kosovës, janë evidentuar pesw raste që kanë të bëjnë me zjarr.

Në Lubizhdë të Prizrenit, zjarri ka përfshirë edhe një stallë të lopëve, e si shkak i kësaj të njëjtit i kanë ngordhur tetë lopë. Ndërkohë që në komunën e Pejës, është djegur një pllac me vetura në vlerë të 50 mije eurove.

Sipas raportit policor në Prekaz të Epërm në Skënderaj, janë djegur disa paisje bujqësore, disa pemë, material ndërtimor, si dhe rrethojat e oborrit.

The post Zjarri përfshinë Kosovën, disa u ndezën qëllimshëm, apelohet për kujdes appeared first on Telegrafi.

Zëvendëskryeministrja dhe ministrja e Infrastrukturës dhe Energjisë në Shqipëri, Belinda Balluku, ka paralajmëruar masa të ashpra ndaj personave që shkaktojnë zjarre në mënyrë të qëllimshme, duke i cilësuar veprimet e tyre si të papranueshme dhe të patolerueshme.

Gjatë një vizite në Bulqizë, një nga zonat më të goditura nga flakët ditët e fundit, Balluku tha se autoritetet do të marrin masa ekstreme ndaj zjarrvënësve, përfshirë publikimin e identitetit të tyre. Qëllimi, sipas saj, është të ndalet një herë e mirë ky fenomen që rrezikon jetën, pronën dhe mjedisin.

“Është e patolerueshme kjo që po ndodh. Kjo nuk është vetëm në zonën e Bulqizës, por në të gjithë Shqipërinë. Është bërë një punë e shkëlqyer nga policia, zjarrfikësit dhe Forcat e Armatosura, të cilët kanë qenë në krye të kësaj beteje me zjarrin. I falënderojmë për kontributin e tyre”, u shpreh Balluku për ABC News Albania.

Ajo nënvizoi se deri tani nuk janë shënuar viktima në njerëz, një fakt që e quajti “më të rëndësishmin”, pavarësisht situatës së rëndë me zjarret.

Sipas saj, jugu i vendit mbetet ende në një situatë kritike, por pritet që rënia e temperaturave në ditët në vijim të ndihmojë në përmirësimin e situatës.

Autoritetet kanë intensifikuar kontrollet dhe fushatat ndërgjegjësuese, ndërkohë që hetimet për rastet e zjarrvënieve të qëllimshme janë duke vijuar.

The post Balluku paralajmëron masa të rënda për zjarrvënësit në Shqipëri appeared first on Telegrafi.

Pas vendimit të Partisë Demokratike të Kosovës për të mos e rikandiduar në garën për kryetar të komunës së Drenasit, ka reaguar Ramiz Lladrovci.

Përmes një postimi në rrjetet sociale, Lladrovci u shpreh i vendosur se karriera e tij politike nuk është në përfundim dhe se fjalën përfundimtare do ta kenë qytetarët.

“Deri sot nuk jam rrëzuar, kush më njeh me mbi katër dekada këtë e di. Respekt për votat pro dhe kundër në seli të PDK-së, po ashtu, faleminderit atyre që nuk morën pjesë në votim. Ky është fillimi i fundit politik për bedelët dhe përkrahësit e tyre,” shkroi ai.

Ai shtoi se mbështetja e qytetarëve të Drenasit mbetet vendimtare.

“Qytetarët e komunës së Drenasit e kanë fjalën e fundit, bashkë, vazhdojmë, +4!”

Reagimi i tij vjen pas mbledhjes së Kryesisë së PDK-së, ku u miratua lista përfundimtare e kandidatëve për zgjedhjet lokale të 12 tetorit, listë në të cilën Lladrovci nuk është përfshirë.

The post Lladrovci reagon pas vendimit të PDK-së: Deri sot nuk jam rrëzuar, vazhdojmë +4 appeared first on Telegrafi.

Kërkimet për gjetjen e trupit të pajetë të një 33-vjeçari, i cili dyshohet se është mbytur në Liqenin e Ujmanit, janë ende duke vazhduar.

Në vendin e ngjarjes ndodhen njësite të kërkim-shpëtimit dhe zyrtarë të Policisë së Kosovës, të cilët po angazhohen intensivisht për të lokalizuar trupin e personit të zhdukur.

Togeri Erduan Baliqi, shef i njësisë së planifikimit dhe vlerësimit operacional në Drejtorinë Rajonale të Policisë në Mitrovicën e Veriut, tha se ngjarja është raportuar rreth orës 14:25, kur është pranuar informata se një person ishte hedhur nga ura në liqen dhe nuk kishte dalë më nga uji.

“Njësitë policore kanë dalë në vendin e ngjarjes. Po ashtu janë informuar edhe ekipet e kërkim-shpëtimit, të cilat janë duke zhvilluar aktivitetet për ta gjetur trupin, mirëpo deri më tani nuk kemi rezultat,” deklaroi Baliqi.

Rrethanat e ngjarjes mbeten ende të paqarta, ndërsa autoritetet kanë njoftuar se kërkimet do të vazhdojnë deri në gjetjen e trupit.

The post Vazhdojnë kërkimet për trupin e 33-vjeçarit të zhdukur në Liqenin e Ujmanit appeared first on Telegrafi.