TIRANË, 1 gusht/ATSH/ Bashkimi Evropian konfirmoi sot se ende nuk ka një qëndrim mbi projektamendamentet e Kodit të ri Penal.

Delegacioni i BE-së në Tiranë iu përgjigj interesimit të një medieje mbi këtë çështje ndërsa u shpreh se nuk ka marrë pjesë në hartimin e draftit. Delegacioni i BE-së sqaron se “ka marrë njoftim mbi prezantimin e projektamendamenteve të Kodit Penal, rezultat i punës së një grupi ekspertësh të ngarkuar nga qeveria”.

“Duke qenë se rishikimi i përgjithshëm i Kodit Penal është një proces i rëndësishëm dhe kompleks, me një ndikim të mundshëm afatgjatë në shoqëri dhe në sistemin e drejtësisë, BE-ja nënvizon rëndësinë e garantimit të një konsultimi gjithëpërfshirës dhe të plotë me të gjitha institucionet kryesore të drejtësisë dhe aktorët e shtetit të së drejtës, si dhe me shoqërinë civile, për të garantuar cilësinë më të lartë të legjislacionit që do të miratohet”, u shpreh Delegacioni i BE-së në Tiranë.

BE vlerëson se si pjesë e negociatave të anëtarësimit në Bashkimin Evropian, Shqipëria pritet të ndryshojë një numër dispozitash specifike të Kodit Penal për t’u përafruar standardeve evropiane dhe legjislacionit të BE-së.

“Në periudhën afatshkurtër, BE-ja e inkurajon Shqipërinë t’i japë përparësi atyre ndryshime legjislative që janë të nevojshme për të përmbushur standardet ndërmjetëse të përcaktuara në Qëndrimin e Përbashkët të BE-së për Grup-kapitullin 1 (Themeloret). BE-ja është e gatshme të ofrojë ndihmë teknike në këtë drejtim”, përfundon reagimi i BE-së.

/m.m//r.e//a.f/

The post BE: Nevojitet konsultim gjithëpërfshirës për Kodin e ri Penal appeared first on Agjencia Telegrafike Shqiptare.

TIRANË, 1 gusht /ATSH/ Në gjithë vendin po vijon aksioni për lirimin e hapësirave publike dhe kthimin e ambienteve të përbashkëta komuniteteve.

Përveç lirimit të hapësirave publike në zonat e banuara, aksioni është shtrirë po ashtu në plazhe dhe akset nacionale ku po prishen strukturat pa leje anës rrugëve.

Në vijim të këtyre masave, kryeministri Edi Rama paralajmëroi sot se asnjë lavazh nuk do të qëndrojë mes lagjeve për të larë makinat nëpër trotuare, ndryshe do të gjobiten.

Rama i ftoi subjektet që të marrin leje për një njësi shërbimi normale brenda rregullave, jo për lavazh në rrugë.

“Çuna, respekte po e kuptoni edhe vetë që nuk ecën më kjo punë kështu, apo jo Turi?
Prandaj hiqini vetë këto që mos merrni edhe gjobë dhe po e patët tokën tuaj, merrni leje për një njësi shërbimi normale brenda rregullave jo për lavazh në rrugë. Deri atëherë toka do rrijë bosh dhe pastër në shërbim të komunitetit. Po s’e patët tokën tuaj, në këto hapësira do të mbillen përfundimisht pemë e do të vihen stola apo lodra për fëmijët”, u shpreh Rama.

Lirimi i hapësirave publike shihet si një hap i domosdoshëm për rritjen e shërbimit, funksionalitetit të çdo biznesi dhe sipërmarrjeje në përputhje me standardet kombëtare të mikpritjes dhe shërbimit jo vetëm në zonat turistike, por në çdo cep të Shqipërisë.

Lirimi i hapësirave publike do të jetë në fokus të angazhimit të pushtetit vendor dhe qendror në mbrojtje të komuniteteve.

/m.m//r.e/a.f/

The post Rama: Gjobë për lavazhet në rrugë, subjektet të aplikojnë për leje brenda rregullave appeared first on Agjencia Telegrafike Shqiptare.

TIRANË, 1 gusht/ATSH/ Shtetet e Bashkuara të Amerikës dhe Shqipëria po vijojnë bashkëpunimin në fushën e mbrojtjes.

Ambasada e SHBA-së në Tiranë bëri sot të ditur se pjesëtarë të Forcave të Armatosura shqiptare po kalojnë tri javë duke u trajnuar dhe duke kryer mirëmbajtjen e automjeteve së bashku me personelin e Gardës Kombëtare të Nju-Xhersit (NJNG) në bazën e përbashkët McGuire-Dix-Lakehurst, në Nju-Xhersi.

Ky angazhim është pjesë e Programit të Partneritetit Shtetëror të NJNG, që synon rritjen e bashkëpunimit dhe ndërveprimit midis dy forcave.

Gjatë muajit korrik, një ekuipazh ajror i Gardës Kombëtare të Nju-Xhersit (New Jersey) ishte në Shqipëri për të punuar me Forcat Ajrore në mirëmbajtjen e helikopterëve dhe për përgatitje për misione kërkimi dhe shpëtimi.

1 nga 6

/m.m//r.e//a.f/

The post Pjesëtarë të FA-së, trajnim pranë bazës së Gardës Kombëtare të Nju-Xhersit appeared first on Agjencia Telegrafike Shqiptare.

TIRANË, 1 gusht/ATSH/ Kryeministri Edi Rama sqaroi sot se Ministria e Drejtësisë dhe Këshilli i Ministrave nuk kanë marrë pjesë në hartimin e draftit të Kodit të ri Penal, por ia kanë besuar një grupi ekspertësh.

Rama reagoi ndaj qëndrimit të disa shoqatave të gazetarëve, të cilët sipas tij, “bëjnë thirrje urdhëruese për të ndërhyrë urgjentisht në draftin e Kodit të ri Penal”.

Kryeministri theksoi se “qeveria është thjeshtë njëra nga shumë palët në këtë proces dhe e ka marrë dhe po e studion draftin, për të ballafaquar më pas qëndrimet tona me ato të grupit të ekspertëve”.

“Ky është një proces demokratik dhe transparent, ku, kush do të kontribuojë për një Kod të ri Penal për Shqipërinë 2030 në BE i ka rrugët e hapura e të gjithë kohën e nevojshme, ndërsa kush do të bëjë zhurmën e vet mund ta bëjë, se demokracia i ka edhe zhurmuesit e vet, po s’mund të thotë dot që s’na pyeti kush”, siguroi Kryeministri.

Rama u shpreh se “drafti i rishikuar do të konsultohet edhe me Komisionin Europian, sepse pa vulën e Brukselit drafti nuk shkon dot në parlament”.

Më poshtë reagimi i plotë i Kryeministrit:

“Shoh që disa shoqata gazetarësh na kanë bërë një thirrje urdhëruese për të ndërhyrë urgjentisht në draftin e Kodit të ri Penal, çka tregon se ata që duhet të informojnë publikun për procesin e saponisur të diskutimit të këtij drafti nuk e kanë kuptuar akoma (edhe pse u tha shumë qartë nga ministri i drejtësisë) se Ministria e Drejtësisë dhe Këshilli i Ministrave, nuk kanë marrë pjesë në hartimin e draftit po ia kanë besuar një grupi ekspertësh të nderuar, nën udhëheqjen e Drejtorit të Shkollës së Magjistraturës, profesor Arben Rakipit.

Kështu, hëpërhë qeveria është thjeshtë njëra nga shumë palët në këtë proces dhe e kemi marrë e po e studiojmë draftin, për të ballafaquar më pas qëndrimet tona me ato të grupit të ekspertëve, gjë që ua sugjerojmë edhe shoqatave të alarmuara për lirinë e shtypit, të cilat në këtë fazë, në vend se të alarmohen duhet të ndjehen shumë të lehtësuara e të respektuara, sepse kanë të gjithë kohën e nevojshme për ta studiuar e pastaj ballafaquar draftin e Kodit të Ri Penal me grupin e punës, njësoj siç do të bëjë qeveria e siç duhet të bëjnë të tëra palët e interesuara – sidomos ato brenda sistemit, të cilat në vend se të japin deklarata sa të nxituara aq edhe qesharake për shtyp, bëjnë mirë të ulen me grupin e ekspertëve dhe të ballafaqojnë opinionet e tyre.

Ky është një proces demokratik dhe transparent, ku kush do të kontribuojë për një Kod të Ri Penal për Shqipërinë 2030 në BE i ka rrugët e hapura e të gjithë kohën e nevojshme, ndërsa kush do të bëjë zhurmën e vet mund ta bëjë, se demokracia i ka edhe zhurmuesit e vet, po s’mund të thotë dot që s’na pyeti kush.

Pasi të bëhen të gjitha ballafaqimet e grupit të punës me të gjitha palët e interesuara dhe në pavarësi të plotë nga qeveria, Ministria e Drejtësisë do ta marrë draftin e rishikuar e do ta konsultojë natyrisht edhe me Komisionin Europian, sepse pa vulën e Brukselit drafti nuk shkon dot në parlament!

Kështu që miq të shoqatave të shtypit rrini të qetë se nuk ju vjen dot asnjë e keqe nga Kodi i Ri Penal, në Shqipërinë që po shkon në BE dhe jo në BRSS”.

/r.e/

The post Drafti i Kodit të ri Penal, Rama: Është hartuar nga ekspertët, pa vulën e Brukselit nuk shkon në parlament appeared first on Agjencia Telegrafike Shqiptare.

TIRANË, 1 gusht/ATSH-Maela Marini/ Kryeministri Edi Rama siguroi sot se veprimi në territor për lirimin e hapësirave publike nuk është sulm për të shkatërruar iniciativat private, sipërmarrjet e vogla, njësitë e shërbimi apo jetën mesdhetare të kafeneve e restoranteve.

Përmes një videomesazhi në rrjetet sociale, Rama tha se synohet të vendoset kufiri mes hapësirës së biznesit dhe hapësirës në dispozicion të komunitetit.

“Shoh disa që ankohen që jo po hoqi tendat, po mbetën karriget. Duhet ta kuptojmë të gjithë që është Tiranë, Shqipëri, nuk është Teheran, nuk është Iran, pra ne nuk kemi dalë në një sulm për të shkatërruar iniciativat private, sipërmarrjet e vogla, njësitë e shërbimit, jetën mesdhetare të kafeneve, të restoranteve, etj., etj., po për të vendosur kufirin”, u shpreh Rama.

Sipas tij, duhet bërë e qartë që trotuari është i qytetarëve dhe në një pjesë të tij, patjetër mund të përdoret për ata qytetarë që duan të ndalen mbi një kafe, por me kufij shumë të qartë.

“Nuk mundet dot nënat me fëmijë me karroca të kalojnë përmes karrigeve, nuk mundet dot që të moshuarit të mos kenë mundësi të ulen në një hapësirë brenda lagjes, sepse aty janë vendosur tendat dhe janë ngritur strukturat metalike të kafeneve të pafundme, apo sepse aty dikush ka vendosur një tra dhe ka vendosur arbitrarisht të mbledhë lekët për një parkim pa leje, apo dikush tjetër ka vendosur të lidhë zorrën me sistemin e ujit, apo të hapë një pus për të bërë lavash makinash apo bërë një gomisteri etj. Por ama, nga ana tjetër, duhet dhe durim, sepse janë shumë, janë shumë dhe po ashtu, duhet durim edhe për faktin se disa nuk marrin vesh”, theksoi ai.

Rama theksoi se po bëhet rregullorja kombëtare, e cila do të vendosë qartë kufijtë.

“Kemi studiuar rregulloret e shumë qyteteve. Ka qytete si Barcelona apo si Kopenhaga që i kanë me një masë metrash të caktuar, disa i kanë 1.8 metra, disa 2 metra, disa 2.5 metra, Madridi e tjerë, e tjerë, se sa duhet të jetë absolutisht bosh. Ka qytete tjera që i kanë me formula të tjera, por do t’i bëjmë shumë të qarta këto, ashtu sikundër do t’i bëjmë shumë të qarta për të gjithë, edhe detyrimet, edhe nga ana tjetër ndëshkimet”, tha Rama.

Kryeministri iu përgjigj edhe atyre që shprehen se përse u kujtuan tani për të ndërhyrë, ndërsa solli në vëmendje masat që ka adresuar që nga koha kur ishte Ministër i Kulturës.

“Tani ka disa që thonë pse u kujtuat tani? Ne nuk jemi kujtuar tani, dhe unë posaçërisht jam kujtuar që ditën e parë për të drejtuar Tiranën në 2000-shin. Madje jam kujtuar që ditën e parë që kam hyrë në një zyrë shteti si Ministër i Kulturës, kur mora disa fëmijë dhe pastrova dhe pikturova disa teneqe që ishin vendosur për të rrethuar zonën ngjitur me Ministrinë e Kulturës, ku sot janë vëllezërit Frashëri në bulevard. Pra, jo vetëm që nuk jam kujtuar tani, pra nuk jemi kujtuar tani, por jemi kujtuar me kohë, por ama ky është një proces”, shtoi ai.

Kryeministri ftoi qytetarët që të marrin pjesë në këtë proces, duke çuar në mënyrë të vazhdueshme denoncime.

Ai paralajmëroi hapjen e një portali të posaçëm, “Hapësira ime”’, ku të gjithë do të mund çojnë denoncime në mënyrë të vazhdueshme.

“Kjo është betejë e vazhdueshme derisa të ndahet mendja që këtu nuk bëhet, pra siç u nda mendja që nuk ndërtohet te Lana, nuk ndërtohet te parku ‘Rinia’, nuk ndërtohet këtu e nuk ndërtohet aty, duhet të ndahet mendja që nuk mund të shtyhesh përtej kufirit ku fillon jeta e komunitetit”, shtoi ai.

/r.e/

The post Lirimi i hapësirave publike, Rama: Nuk është sulm ndaj iniciativës private, portal për denoncimet appeared first on Agjencia Telegrafike Shqiptare.

TIRANË, 1 gusht /ATSH-Maela Marini/ Kryeministri Edi Rama bëri të ditur sot se në kuadër të programit “Rilindja urbane 2.0”, hapësirat publike do të transformohen në hapësira të bukura për komunitetin.

Përmes një videomesazhi në rrjetet sociale, Rama foli për masat që po merren në territor për lirimin e hapësirave publike, ndërsa theksoi se “jemi duke u përgatitur dhe kemi ngritur grupe që hap pas hapi këto hapësira t’i kthejmë në hapësira të bukura për komunitetin”.

Në këtë proces, Rama u shpreh se ndëshkimet janë shumë të rëndësishme për ata që shkelin ligjin.

“Kemi vendosur plazhet publike, jemi shumë më mirë se vjet, por nuk jemi aq mirë sa duhet, sepse nga njëra anë është bërë si lojë macja me miun, por nga ana tjetër bashkitë nuk janë angazhuar në mënyrë të plotë për të vendosur çadra dhe shezlongë të tyret. Pra nuk është plazh publik, thjesht një territor bosh. Në plazhet publike duhet të përmirësohen kushtet.”

Nga ana tjetër, Rama siguroi se për ata që e bëjnë këtë lojë, “macja me miun”, ndëshkimet janë shumë të forta.

“Pra, nuk mund të jetë që ne të angazhojmë forcat, të angazhojmë policitë, të angazhojmë inspektorët, të paguajmë naftë, të angazhojmë kohë për të shkuar dhe për të marrë masë dhe pastaj, sa kthejnë kurrizin forcat e ligjit, përsëri fillon loja nga e para. Do të jenë ndëshkime të atilla që mos t’i shkojë mendja njeriut aq kollaj që të fillojë lojën e parë”, shtoi Rama.

Kryeministri theksoi se “do duhet të ndërhyhet me projekte urbanistike për të krijuar hapësira të bukura publike”.

“Atëherë mbrapa vjen Rilindja Urbane 2.0. Jemi duke u përgatitur, kemi ngritur grupe, që hap pas hapi, këto hapësira t’i kthejmë në hapësira të bukura për komunitetin. Për shembull, pastrojmë tek “21 Dhjetori”, pastrojmë tek “Komuna e Parisit”, pastrojmë tek “5 Maji”, etj., por nuk mundet dot që gjërat të mbeten ashtu. Ata që kanë prona dhe që i përdorin si parkime në mënyrë të paligjshme, janë të ftuar të vijnë të kërkojnë leje dhe të ndërtojnë parkime. Nuk mund të ndërtojnë dot pallatet brenda pallatit. Po mund të ndërtojmë parkime, parkime me dy apo tre kate, të cilat mund të jenë godina shumë të bukura që mund të shfrytëzohen”, shtoi Rama.

Kryeministri siguroi se ka filluar puna me një prej ekspertëve më të famshëm në botë, i cili ka punuar në shumë qytete dhe faktikisht është bërë shumë i famshëm me të ashtuquajturit super blloqet e Barcelonës, për reduktimin e trafikut, për rritjen e hapësirave pedonale, për uljen e shpejtësisë.

/a.f//r.e/

The post Rama: Vijojmë me Rilindjen Urbane 2.0, projekte urbanistike për të krijuar hapësira të bukura publike appeared first on Agjencia Telegrafike Shqiptare.

TIRANË, 1 gusht/ATSH-Maela Marini/ Kryeministri Edi Rama siguroi sot se lirimi i hapësirave publike nuk është një aksion, por është një përpjekje e pandalshme për kthimin e ligjshmërisë në territor.

Përmes një videomesazhi në rrjetet sociale, Rama bëri të ditur se nga dje ka skaduar afati për tërheqjen e të gjitha llojeve të rraqeve buzë rrugëve kombëtare.

“Sot do të fillojë hap pas hapi ndërhyrja e forcave përkatëse të kontrollit mbi territorin. Ambicia jonë është që të jemi kampionë të Ballkanit në turizëm. Kemi arritur të bëjmë jashtëzakonisht shumë në vitet e fundit. Jo më larg se sot paradite më dërguan një raport të një prej instituteve më prestigjioze të botës për mirëqeverisjen në Singapor”, tha Rama.

Kryeministri informoi se në këtë raport Shqipëria vlerësohet si një nga yjet në ngjitje të Europës në mirëqeverisje.

“E thonë ata. Nuk kemi kushërinj në Singapor dhe nuk kemi influencë mbi institutin e qeverisjes në Singapor, qeveria jonë vlerësohet së bashku me Italinë, Lituaninë, Greqinë etj., për çfarë ka bërë vitin e fundit në aspektin e reformave të qeverisjes”, shtoi Rama.

Duke folur për lirimin e hapësirave publike, kryeministri siguroi se forcat përkatëse do të duhen të angazhohen shumë më tepër tani e mbrapa.

“Na duhet që të jetojmë dhe të bashkëjetojmë me idenë që të gjithë së bashku duhet tani t’i japim një cilësi të re vendit tonë si një destinacion turistik, por edhe si një shtet i së drejtës, për t’u bërë anëtar i BE-së”, tha Rama.

Rama theksoi se “nuk mund të bëhemi anëtar të BE-së nëse disa përpiqen të bëjnë punën dhe disa nga ana tjetër përpiqen të bëjnë gjithçka duke mos pyetur për punën e përbashkët”.

Në këtë aspekt, Rama theksoi se territori ka një rëndësi të posaçme dhe po ashtu respekti për hapësirën publike.

“Ka rëndësi të posaçme vendosja e qartë e kufirit mes të drejtës së secilit mbi hapësirën e përbashkët dhe të drejtës së kujtdo që do të zhvillojë një aktivitet të caktuar, legjitim në këtë hapësirë. Është një domosdoshmëri. Nuk mundet dot që të vazhdojmë që bukuritë e mëdha që na ka falur Zoti e natyra të abuzohen, dhe që nga ana tjetër ne të paraqitemi para fëmijëve tanë si rraqexhinj, delenxhinj dhe si abuzues me pasuri që nuk janë tonat, janë të përbashkëta”, shtoi Rama.

Kryeministri siguroi se “është shumë e rëndësishme që të jetë e qartë që këtu nuk ka absolutisht, nuk ka për t’u lejuar asgjë selektive”.

“Nuk ka për t’u lejuar! Sigurisht tentativat do bëhen, sigurisht dikush do kthej kurrizin, sigurisht dikush do mbylli sytë. Këto janë të pashmangshme, por nuk ka për t’u lejuar asgjë selektive. Dhe si nuk do lejohet asgjë selektive, duke bashkëpunuar komuniteti me autoritetet, duke këmbëngulur, duke denoncuar, duke insistuar dhe duke çuar përpara këtë proces të përbashkët”, shtoi Rama.

/r.e//a.f/

The post Rama: Lirimi i hapësirave publike përpjekje e pandalshme, nuk ka selektime appeared first on Agjencia Telegrafike Shqiptare.

TIRANË, 1 gusht/ATSH/ Për përballimin e situatës së zjarreve gjatë periudhës 21 dhe 31 korrik 2025, Bashkimi Evropian mobilizoi edhe në Shqipëri avionë zjarrfikës, helikopterë, si dhe mbështetje satelitore përmes sistemit “Copernicus”.

Delegacioni i Bashkimit Euopian në Tiranë bëri sot të ditur se në total gjashtë vende, përfshirë Shqipërinë, u përballën me zjarre të rënda dhe aktivizuan Mekanizmin e Mbrojtjes Civile të BE-së.

“Si reagim, Bashkimi Evropian mobilizoi avionë zjarrfikës, 2 helikopterë, ekipe nga terreni dhe mbështetje satelitore nga e gjithë Evropa, për të ndihmuar në përballimin e situatës dhe mbrojtjen e komuniteteve të prekura”, thuhet në njoftimin për shtyp të BE-së.

Konkretisht në Shqipëri u angazhuan pesë avionë zjarrfikës nga Greqia, Italia dhe Kroacia, helikopterë nga Hungaria, si dhe mbështetje me imazhe satelitore përmes sistemit “Copernicus”.

“Ky reagim i shpejtë dhe i koordinuar dëshmon përkushtimin e palëkundur të Bashkimit Evropian për të qëndruar pranë vendeve partnere në momente sfiduese, duke ofruar jo vetëm mjete dhe kapacitete, por edhe solidaritet, bashkëpunim dhe mbështetje afatgjatë”, thuhet në njoftimin për shtyp të Delegacionit të BE-së në Tiranë.

1 nga 9

/m.m//r.e//a.f/

The post Situata nga zjarret – BE aktivizoi pesë avionë, dy helikopterë dhe mbështetje satelitore për Shqipërinë appeared first on Agjencia Telegrafike Shqiptare.

TIRANË, 1 gusht/ATSH/ Shqipëria turistike vijon të marrë jehonë në mediet ndërkombëtare.

Këtë herë është RTL Radio, një platformë mediatike e vendosur në Luksemburg, që i ka kushtuar një artikull të posaçëm potencialeve turistike të Shqipërisë.

Kryeministri Edi Rama ndau sot në rrjetet sociale artikullin e publikuar në “RTL Radio”, e cila në serinë e saj për destinacionet e pushimeve në Europë ka ndaluar në Shqipëri.

“’Xhevahiri ballkanik’ që po kthehet nga një sekret, në destinacion qendror të hartës turistike europiane”, shkruan RTL Radio.

Rama nënvizoi se “nga Alpet e Shqipërisë, deri në Dhërmi, Ksamil e Himarë, duke kaluar përmes Parkut Kombëtar të Vjosës dhe qyteteve UNESCO si Gjirokastra e Berati, kjo guidë e plotë u ofrohet pushuesve europianë për pushimet e tyre në Shqipërinë tonë”.

Në artikullin dedikuar Shqipërisë RTL Radio vlerëson se vendi është në mes të transformimit drejt një pike të nxehtë në hartën e pushimeve të Evropës.

Artikulli veçon natyrën e paprekur në veri, e cila ofron një larmi të jashtëzakonshme në një zonë të vogël, me natyrë shumë larg turizmit masiv.

“Fshatrat e vegjël me shtëpi guri, lumenj të pastër dhe pamje panoramike e bëjnë zonën një parajsë për entuziastët e aktiviteteve në natyrë dhe ata që kërkojnë paqe. Parku Kombëtar i Vjosës, i klasifikuar në vitin 2023 si ‘Parku Kombëtar i Lumit të Egër’ i parë në Evropë, ofron edhe më shumë bukuri natyrore. Vjosa konsiderohet si lumi i fundit i madh me rrjedhë të lirë në kontinent, me rajonin përreth që strehon mbi 1100 lloje kafshësh dhe bimësh, duke përfshirë rrëqebullin, vidrat dhe zogj të rrallë”, shkruan RTL Radio.

Po ashtu Riviera Shqiptare përgjatë bregdetit Jon konsiderohet një nga rajonet më të bukura, por më pak të zhvilluara në Mesdhe.

“Plazhe si Maldivet. Ata që preferojnë detin në vend të maleve nuk do të zhgënjehen gjithashtu. Plazhet e Ksamilit, Dhërmiut dhe Himarës kanë rërë të imët, ujëra bruz dhe një atmosferë të relaksuar, turmat e vendpushimeve të mëdha”, thuhet në artikull.

RTL Radio shkruan po ashtu për Tiranën, një qytet që përzien ngjyrat, historinë dhe jetën e gjallë. “Qendra e tij është plot me energji krijuese, nga kafenetë me muzikë live dhe art rruge, deri te restorantet inovative dhe një popullsi e re që i jep jetë qytetit”, vijon artikulli.

/m.m//a.f//r.e/

The post Rama ndan artikullin e “RTL Radio”: Shqipëria, “xhevahiri ballkanik” që po kthehet në destinacion qendror në hartën turistike europiane appeared first on Agjencia Telegrafike Shqiptare.

TIRANË, 31 korrik/ATSH/ Punonjësit e policisë së shtetit të cilët caktohen me detyrë si oficerë ndërlidhës jashtë vendit, do të trajtohen financiarisht nga buxheti i shtetit i caktuar për Drejtorinë e Përgjithshme të Policisë së Shtetit.

Këshilli i Ministrave miratoi sot vendimin për trajtimin financiar që përfshin shpenzimet publicitare në interes të Policisë së Shtetit, udhëtimet dhe dietat jashtë vendit pritës, kur këto kryhen në interes të Policisë së Shtetit, udhëtimet dhe dieta, brenda vendit pritës.

Po ashtu, punonjësve të policisë do t’u paguhen shpenzimet për përmbushjen e detyrimeve protokollare për pritjen e partnerëve zyrtarë, ceremonitë zyrtare të karakterit policor dhe pritje të personelit policor të nivelit të lartë në vendin pritës, shpenzimet për mbështetjen e veprimtarive, veçanërisht të rëndësishme, të studentëve të policisë shqiptare në vendet përkatëse.

Gjithashtu, qeveria shqiptare do të mbulojë dhe shpenzimet për qiranë e apartamentit, mirëmbajtjen e tij dhe të ambienteve të përbashkëta për ngrohje, gaz, energji elektrike dhe ujë, pajisje shtëpiake, siguracionin, mirëmbajtje, riparim defekti dhe shërbimi karrotrec, karburant, parkim, regjistrim dhe kontrollet periodike në vendin pritës të automjetit, komisionet bankare, internetin dhe telefoninë fikse e të lëvizshme.

Po ashtu do t’u paguhen shpenzimet për zyrë, mobilje e pajisje zyre dhe kancelari, transportin e oficerit ndërlidhës dhe familjarëve të tij nga Shqipëria në kohën e emërimit, si dhe shpenzimet e transportit nga vendi i emërimit për në Shqipëri, kur ata mbarojnë detyrën, transporti i sendeve personale në momentin e emërimit dhe kthimit në atdhe.

Transporti i sendeve dhe orendive personale bëhet me miratimin e drejtorit të Përgjithshëm të Policisë së Shtetit, deri në masën 7,4 m3 për anëtar familjeje, pa kaluar limitin e 30 m3 për çdo familje. Prokurimi i fondeve për mbulimin e këtyre shpenzimeve i nënshtrohet legjislacionit në fuqi.

Vendimi parashikon po ashtu sigurimin e shëndetit gjatë udhëtimit, si dhe sigurimin e jetës së oficerit ndërlidhës, që shërben në përfaqësitë diplomatike të Republikës së Shqipërisë dhe në organizatat ndërkombëtare jashtë vendit dhe të familjarëve të tyre, në rastet kur vendi pritës konsiderohet vend me rrezikshmëri të lartë.

Sigurimi i jetës do të paguhet për sa kohë vazhdon situata e rrezikshmërisë së lartë.

Prokurimi i fondeve për mbulimin e këtyre shpenzimeve i nënshtrohet legjislacionit në fuqi.

Rrezikshmëri e lartë, për efekt sigurimi, sipas këtij vendimi, konsiderohen situatat, kur në shtetin pritës shpallet gjendja e luftës ose e jashtëzakonshme; në shtetin pritës mbizotërojnë situata të përkeqësuara të sigurisë dhe të rendit publik, të cilat vlerësohen të rrezikshme për jetën.

Oficeri ndërlidhës ka të drejtë të përfitojë shpenzime udhëtimi, akomodimi dhe dietë, në valutë të huaj, sipas legjislacionit në fuqi, kur emërohet në detyrë, thirret në atdhe ose dërgohet me shërbim në një shtet tjetër, si dhe kur kthehet në atdhe, në përfundim të detyrës./m.m/j.p/

The post Trajtim financiar për punonjësit e policisë që punojnë në ambasadat jashtë vendit appeared first on Agjencia Telegrafike Shqiptare.

TIRANË, 31 korrik/ATSH/ Këshilli i Ministrave miratoi sot dorëzimin e 150 apartamenteve të reja të banimit për të dëmtuarit nga tërmeti i 26 nëntorit 2019.

The post Rindërtimi, Qeveria i dorëzon bashkisë së Krujës 150 apartamente të reja appeared first on Agjencia Telegrafike Shqiptare.

TIRANË, 31 korrik/ATSH/ Këshilli i Ministrave vendosi sot transferimin te Korporata e Investimeve Shqiptare të pronave shtetërore për realizimin e projektit “Korpusi i Inspektorateve” dhe projekteve të tjera të investimit.

Autorizimi i shoqërisë aksionare “Korporata e Investimeve Shqiptare”, vetë apo nëpërmjet entitetit të krijuar prej saj, për të vepruar si zhvillues i pronave, të përcaktuara në këtë vendim vjen në funksion të realizimit të projektit të investimit, që ka si qëllim, ndër të tjera, përmbushjen e interesit publik.

Korporata e Investimeve Shqiptare dhe institucionet publike përfituese brenda 30 ditëve nga hyrja në fuqi e këtij vendimi duhet të lidhin marrëveshje bashkëpunimi për përcaktimin e standardit, metodologjisë, termave dhe kushteve të bashkëpunimit për përmbushjen e interesit publik, përmbushjen e interesit të Korporatës, si dhe entiteteve në pronësi të të cilit regjistrohet prona e re shtetërore.

Korporata e Investimeve Shqiptare ngarkohet të kryejë procesin e konsolidimit të pronave, në rast se konstatohet mospërputhje midis gjendjes faktike dhe ligjore të pronës.

Po ashtu, Korporata e Investimeve Shqiptare autorizohet për hapjen e procedurës konkurruese për përzgjedhjen e partnerit privat, për zhvillimin e pronave nëpërmjet instrumentit të sipërmarrjes, me qëllim realizimin e projekteve të saj të investimit.

Agjencia Kombëtare e Planifikimit të Territorit autorizohet që në të njëjtën procedurë, të asistojë Korporatën e Investimeve Shqiptare nëpërmjet hartimit të termave të referencës për projektidetë arkitekturore, hartimin e kritereve të kualifikimit për projektuesit dhe kritereve të vlerësimit paraprak e përfundimtar të projektideve arkitekturore.

Po ashtu autorizohet Korporata e Investimeve Shqiptare për negociimin me subjekte private, me qëllim lidhjen e kontratës përkatëse për zhvillimin e pronave të transferuara në pronësi apo për të cilat ka autorizim zhvillimi, në funksion të realizimit të projekteve të saj të investimit.

Institucionet publike, të cilat zhvillojnë aktivitet në godinat e ngritura në pronat e përcaktuara në këtë vendim, do të vazhdojnë të përdorin pronën në funksion të aktivitetit të tyre deri në momentin e marrjes në dorëzim të ambienteve të reja, të ndërtuara në përputhje me termat dhe kushtet e përcaktuara në marrëveshje.

Kur, për nevoja të realizimit të projekteve të investimit, institucioni publik duhet të largohet nga prona ku kryen aktivitet, institucioni publik, me njoftimin e Korporatës së Investimeve Shqiptare liron ambientet ku kryen veprimtarinë e tij, vetëm pasi Korporata e Investimeve Shqiptare, në bashkëpunim me institucione të tjera, publike apo subjekte private, i ka siguruar ambiente të përkohshme për vazhdimin e aktiviteteve të punës deri në marrjen në dorëzim të ambienteve të reja të ndërtuara.

Për zbatimin e këtij vendimi ngarkohen Ministria e Bujqësisë dhe Zhvillimit Rural, Ministria e Shëndetësisë dhe Mbrojtjes Sociale, Inspektorati i Përgjithshëm, Inspektorati Shtetëror i Punës dhe Shërbimeve Shoqërore (ISHPSSHSH), Autoriteti Kombëtar i Ushqimit (AKU), Agjencia Kombëtare e Mjedisit (AKM), Agjencia Kombëtare e Bregdetit (AKB), Agjencia Kombëtare e Arsimit Parauniversitar (AKAP), Inspektorati Shtetëror Teknik dhe Industrial (ISHTI), Inspektorati Shtetëror Shëndetësor (ISHSH), Zyra e Mbrojtjes nga Rrezatimet (ZMR), Autoriteti Kombëtar për Sigurinë dhe Emergjencat Minerare (AKSEM), Inspektorati Shtetëror i Mbikëqyrjes së Tregut (ISHMT), Agjencia Kombëtare e Barnave dhe Pajisjeve Mjekësore (AKPMB), Autoriteti Kombëtar i Veterinarisë dhe Mbrojtjes së Bimëve (AKVMB), Drejtoria e Shërbimeve të Peshkimit dhe Akuakulturës (DSHPA), Drejtoria e Përgjithshme e Arkivave (DPA), Agjencia Kombëtare e Zonave të Mbrojtura, Agjencia Kombëtare e Pyjeve (AKP), Universiteti Politeknik i Tiranës, Agjencia Kombëtare e Planifikimit të Territorit, Agjencia Shtetërore e Kadastrës dhe Korporata e Investimeve Shqiptare.

/m.m/j.p/

The post “Korpusi i Inspektorateve”, transferohen pronat shtetërore tek Korporata e Investimeve Shqiptare appeared first on Agjencia Telegrafike Shqiptare.

TIRANË, 31 korrik/ATSH/ Pallati i Kongreseve në Tiranë ka kaluar në pronësi të Ministrisë së Ekonomisë, Kulturës dhe Inovacionit, ndërsa pritet zbatimi i projektit të investimit për rivitalizimin e godinës.

Këshilli i Ministrave miratoi sot ndryshimin e përgjegjësisë së administrimit, nga Bashkia Tiranë te Ministria e Ekonomisë, Kulturës dhe Inovacionit, të pasurisë me numër 7/74, në zonën kadastrale 8160, Tiranë, sipas planit të rilevimit, në funksion të realizimit të projektit të investimit “Rivitalizimi i Pallatit të Kongreseve”.

Pas këtij vendimi, kjo pronë do t’i hiqet listës së inventarit të pronave të paluajtshme shtetërore të Bashkisë Tiranë.

Për zbatimin e këtij vendimi ngarkohen Ministria e Ekonomisë, Kulturës dhe Inovacionit, Bashkia Tiranë dhe Agjencia Shtetërore e Kadastrës.

Vendimi për kalimin e pronësisë së Pallatit të Kongreseve u miratua në 24 korrik edhe nga Këshilli Bashkiak i Tiranës.

Kryetarja në detyrë e Bashkisë, Anuela Ristani, shpjegoi se me kalimin e viteve dhe pavarësisht mirëmbajtjes e kujdesit të vazhdueshëm, Pallati i Kongreseve ka paraqitur shenja amortizimi e degradimi.

“Vendimi synon të shndërrojë Pallatin e Kongreseve në një qendër multifunksionale për konferenca, evente kulturore”, shtoi ajo. /m.m/ j.p/

The post Projekt për rivitalizimin e Pallatit të Kongreseve, kalon në pronësi të MEKI appeared first on Agjencia Telegrafike Shqiptare.

TIRANË, 31 korrik/ATSH/ Këshilli i Ministrave përcaktoi sot institucionet përgjegjëse, si dhe procedurat e miratimit dhe të dokumentacionit që duhet të plotësojnë familjet që përfitojnë kredi me interes të barabartë me 0%, të subvencionuar nga buxheti i shtetit nëpërmjet Entit Kombëtar të Banesave.

Vendimi përfshin familjet që banojnë si qiramarrës në ish-pronë private, familjet e punonjësve të Policisë së Shtetit të rënë në detyrë, si dhe fëmijët në përkujdesje të Republikës.

Masa e subvencionit të interesave të kredisë për këto familje, për banesa me kosto të ulët, është me 0 % interes.

Aplikimi për përfitimin e kredisë me interes 0% kryhet nga kryefamiljari ose kujdestari ligjor në portalin qeveritar “e-Albania”, në sistemin e Entit Kombëtar të Banesave, duke ngarkuar vërtetimin negativ nga zyra e regjistrimit të pasurive të paluajtshme, që në emër të kryefamiljarit dhe anëtarëve të tjerë të familjes nuk figuron, në të gjithë territorin e Republikës së Shqipërisë, pronë e regjistruar ose në proces regjistrimi ose vërtetimin për një pronë që është nën normat e banimit.

Me kërkesë të Entit Kombëtar të Banesave, Ministria e Brendshme i përcjell EKB-së dokumentacionin që vërteton statusin e familjes aplikuese si familje e punonjësit të Policisë së Shtetit të rënë në detyrë.

Individët ose familjet e miratuara për të përfituar kredi me interes 0% qëndrojnë në listë pritjeje pa afat kohor të caktuar.

Lista e familjeve, që plotësojnë kushtet për të përfituar kredi me interes 0 %, miratohet me vendim të komisionit ad hoc të kredisë, të ngritur pranë EKB-së. Komisioni ad-hoc ngrihet me urdhër të drejtorit të Përgjithshëm të Entit Kombëtar të Banesave, brenda 5  ditëve nga paraqitja e kërkesave. Komisioni shqyrton kërkesën brenda 10 ditëve nga ngritja e tij. Ndaj vendimit të refuzimit të komisionit, kërkuesit paraqesin ankim administrativ pranë EKB-së brenda 5 ditëve nga njoftimi i vendimit, në përputhje me Kodin e Procedurave Administrative.

Listat e përfituesve përfshijnë të dhëna për përbërjen e familjes, sipas certifikatës familjare, strukturën e apartamentit që përfiton, si edhe të dhëna mbi gjendjen: e strehimit; familjare; sociale.

Procedura e dhënies së subvencionimit të interesave të kredisë zbatohet nga institucionet financiare me të cilat ministria përgjegjëse për strehimin ka lidhur marrëveshje. Në rastet kur kryefamiljari, emri i të cilit i është përcjellë institucionit financiar, në rastin e familjeve qiramarrëse në ish-pronë private, ka ndërruar jetë, institucioni financiar vijon me procedurat e përfitimit të kredisë, duke pasur parasysh certifikatën familjare të datës 1 dhjetor 1992, të vënë në dispozicion nga EKB-ja.

Listat e familjeve përfituese të programit të subvencionimit të interesave të kredisë me 0% interes i dërgohen institucionit financiar me të cilin është nënshkruar marrëveshja, si dhe çdo institucioni që do të monitorojë subvencionimin.

Enti Kombëtar i Banesave, në rolin e institucionit që zbaton programin, njofton institucionin financiar për ndërprerjen e subvencionimit të interesave të kredisë kur, nga verifikimet konstatohen: se qytetari nuk ka liruar banesën e pronarit brenda afatit të përcaktuar; falsifikime të dokumenteve apo deklarata të rreme; mangësi apo të meta në dokumentacionin e dosjes së familjes përfituese.
/m.m/j.p/

The post Kredi me interes zero për disa kategori sociale, miratohen procedurat appeared first on Agjencia Telegrafike Shqiptare.

TIRANË, 31 korrik/ATSH/ Këshilli i Ministrave miratoi sot kushtet e negociimit të shoqërisë “KAYO”, sh.a, me shoqëri private, me qëllim krijimin e një shoqërie aksionare të përbashkët për prodhimin dhe tregtimin e armëve të kalibrave të vegjël, të mesëm dhe dronëve.

Sipas këtij vendimi, shoqëria “KAYO”, sh.a., negocion dhe pranon një pjesëmarrje jo më të ulët se 20 % të aksioneve në shoqërinë e përbashkët, që do të krijojë me shoqëri private.

Shoqëria “KAYO”, sh.a., kontribuon në entitetin e ri tregtar me pasuri të paluajtshme, në masën jo më pak se 5000 m2, që do t’i jepen në përdorim shoqërisë së përbashkët, në një nga format e parashikuara nga Kodi Civil i Republikës së Shqipërisë, pa të drejtë tjetërsimi dhe pa të drejtë transferimi të pronës, e cila do të mbetet në çdo rrethanë pronë e shoqërisë shtetërore “KAYO”, sh.a.

Po ashtu, shoqëria shtetërore “KAYO”, sh.a., gjatë procesit të negociimit, në çdo rast, siguron nga subjekti më të cilin negocion, minimalisht një vlerë investimi jo më të ulët se 50 milionë euro.

Të tjera kushte janë ofrimi i linjave teknologjike të prodhimit ose montimit të armëve të kalibrave të vegjël, të mesëm dhe dronëve sipas nevojave operacionale të Forcave të Armatosura të Republikës së Shqipërisë dhe strukturave të tjera të sigurisë, si dhe sigurimi i rrjetit të shpërndarjes së produkteve në rast eksporti.

Shoqëria “KAYO”, sh.a., siguron nga pala tjetër, gjatë negociatave, se, përpos parashikimeve të tjera, objekti i aktivitetit të shoqërisë tregtare, që do të krijohet, do të përmbajë prodhimin, montimin dhe tregtimin e armëve të kalibrave të vegjël dhe dronëve për Forcat e Armatosura dhe për përdorim nga strukturat e tjera të sigurisë.

Shoqëria “KAYO”, sh.a., siguron nga pala tjetër gjatë negociatave se administratori/ët e shoqërisë, që do të krijohet nga dy shoqëritë e sipërpërmendura, zgjidhet me dakordësinë e shoqërisë “KAYO”, sh.a.

Po ashtu, shoqëria “KAYO”, sh.a., siguron nga pala tjetër gjatë negociatave se, minimalisht 40 % e Këshillit Drejtues ose Këshillit Mbikëqyrës të shoqërisë, që do të krijohet, në rast se forma e shoqërisë parashikon këto organe drejtuese/mbikëqyrëse, do të emërohen nga shoqëria “KAYO”, sh.a.

Statuti i shoqërisë, që do të krijohet, përmban dispozitat mbi të drejtën e vetos, që gëzon shoqëria “KAYO”, sh.a., në bazë të ligjit“Për krijimin e shoqërisë shtetërore për prodhimin dhe tregtimin e armëve, municioneve, pajisjeve dhe teknologjive ushtarake”.

Siguria fizike e personelit dhe infrastrukturës sigurohet nga Forcat e Armatosura, sipas akteve nënligjore, të nxjerra nga autoritetet kompetente, sipas ligjit “Për pushtetet dhe autoritetet e drejtimit dhe komandimit të Forcave të Armatosura të Republikës së Shqipërisë”, të ndryshuar.

/m.m/j.p/

The post Shoqëri aksionare për prodhimin dhe tregtimin e armëve, Qeveria miraton kushtet e negociimit të “KAYO” appeared first on Agjencia Telegrafike Shqiptare.

TIRANË, 31 korrik/ATSH/ Gjykata Kushtetuese rrëzoi sot kërkesën e një të pestës së deputetëve të Kuvendit për shfuqizimin e ligjit “Për disa shtesa dhe ndryshime në ligjin ‘Për Zonat e Mbrojtura’”, si të papajtueshëm me Kushtetutën dhe marrëveshjet ndërkombëtare.

Gjatë shqyrtimit të kritereve paraprake, Gjykata vlerësoi njëzëri, se pretendimet për lirinë e kërkimit shkencor dhe të sigurisë juridike në lidhje me komunitetin, janë pretendime të reja, të paraqitura pas çeljes së shqyrtimit gjyqësor, për rrjedhojë ato nuk mund të merren në shqyrtim.

Kurse për sa u përket pretendimeve për cenimin e parimit të barazisë përpara ligjit, parimeve të shtetit të së drejtës dhe të hierarkisë së akteve normative, Gjykata vlerësoi njëzëri se kërkuesi nuk ka sjellë argumente kushtetuese në mbështetje të tyre.

Për sa i përket pretendimit për papajtueshmërinë e ligjit me MSA-në dhe cenimin e acquies communitarire, qëndrimet e gjyqtarëve u ndanë. Për rrjedhojë, për sa kohë nuk u arrit numri i kërkuar prej 5 gjyqtarësh për vendimmarrje, ky pretendim konsiderohet i rrëzuar.

Konkretisht, sipas njërit qëndrim, MSA-ja është një marrëveshje ndërkombëtare që synon një proces për t’u ndërmarrë nga shteti shqiptar, që i përcakton direktivat si bazë dhe referencë për përafrim të legjislacionit, por pa i bërë ato instrumente me forcë detyruese dhe pjesë të së drejtës së brendshme në kuptimin kushtetues dhe për këtë shkak kontrolli kushtetues, sipas nenit 122 të Kushtetutës, shtrihet vetëm për pajtueshmërinë e ligjit objekt shqyrtimi me nenin 108 të MSA-së.

Sipas qëndrimit tjetër, neni 108 i MSA-së nuk mund të shihet i shkëputur nga acquis communautaire pasi ndryshe do të mbetej pa substancë. Ndaj, në rastet kur kërkohet kontrolli i pajtueshmërisë së ligjit me MSA-në, neni 108 përfshin në përmbajtjen e tij edhe acquies communautarire, për rrjedhojë kontrolli duhet bërë duke konsideruar edhe përmbajtjen e direktivave në fjalë.

Gjykata vendosi të shqyrtojë në themel pretendimet që lidhen me procedurën parlamentare (që kanë të bëjnë me raportin shoqërues të projektligjit dhe konsultimin publik) dhe pretendimet që lidhen me përmbajtjen e ligjit në drejtim të pajtueshmërisë me marrëveshjet ndërkombëtare të detyrueshme për zbatim dhe respektimit të identitetit kombëtar e trashëgimisë natyrore.

Për pretendimin për cenimin e nenit 82 të Kushtetutës në lidhje me raportin shoqërues të projektligjit që përligj shpenzimet financiare për zbatimin e tij, qëndrimet e gjyqtarëve u ndanë në dy drejtime, për rrjedhojë nuk u arrit numri i kërkuar prej 5 gjyqtarësh për vendimmarrje. Në këto kushte ky pretendim u rrëzua.

Konkretisht, sipas njërit qëndrim, u vlerësua se, në mënyrën sesi është formuluar ligji i kundërshtuar në lidhje me krijimin e Zyrave të Administrimit të Parqeve Kombëtare, duket se ai nuk sjell shpenzime financiare dhe për këtë qëllim llogaritja e tyre ishte pamundur të bëhej. Në verifikim të normës kushtetuese duket se qëllimi i kushtetutëbërësit nuk është verifikimi i masës së shpenzimeve, pra llogaritja e tyre, por përligjja e tyre.

Në këtë kuptim, për sa kohë që shpenzimet në këtë ligj janë të përligjura, për shkak të angazhimeve që ka marrë shteti shqiptar në kuadrin konventor të pasqyruar edhe në ligjin ekzistues, si edhe në konsideratë që edhe funksionet, në thelb, mbeten të njëjta, nuk duket se ka pasur nevojë për një përligjje të mëtejshme të këtyre shpenzimeve.

Sipas qëndrimit tjetër, u vlerësua se Zyra e Administrimit të Parqeve Kombëtare është një strukturë e re dhe në shtesë të funksioneve shtetërore aktuale i shtohen edhe funksionet e reja që kanë të bëjnë me planet e menaxhimit në përputhje me ndryshimet e reja ligjore që lejojnë veprimtarinë ekonomike, turistike dhe infrastrukturë mbështetëse për to.

Efektet financiare rezultojnë jo vetëm nga përmbajtja e ligjit që parashikon krijimin e këtyre zyrave, por konfirmohen edhe nga raporti i Komisionit të Ligjeve që ka pohuar se projektligji sjell efekte financiare.

“Neni 82, pika 1, i Kushtetutës vendos detyrimin që projektligji të shoqërohet kurdoherë kur është rasti me raportin që përligj shpenzimet financiare për zbatimin e tij, pasi kjo është një çështje që ka të bëjë jo vetëm me financat publike, që merren në mbrojtje shprehimisht nga Kushtetuta, por edhe me faktin se procedura e hartimit, miratimit dhe zbatimit të buxhetit i nënshtrohet procedurave specifike kushtetuese, të cilat karakterizohen edhe nga parimi i transparencës dhe llogaridhënies. Ky detyrim nuk është përmbushur në këtë rast ndaj neni 17 i ligjit nr. 21/2024 dhe dispozitat e tjera që lidhen me të duhen shfuqizuar”, thuhet në njoftimin e Gjykatës Kushtetuese.

Në lidhje me pretendimin për konsultimin publik, Gjykata, me shumicë votash, vendosi rrëzimin e tij me arsyetimin si më poshtë.

Sipas nenit 56 të Kushtetutës e drejta e konsultimit publik përfshin jo vetëm informimin për gjendjen e mjedisit, por edhe informimin për mbrojtjen e tij. Ky nen, së bashku me nenin 8 të Konventës së Aarhus-it, përcakton detyrimin pozitiv për konsultim publik, i cili shtrihet si për aktet individuale dhe projektet konkrete, ashtu edhe për aktet rregullatore normative me natyrë të përgjithshme në fushën e mjedisit.

Gjykata vëren se ligji i kundërshtuar, i cili sjell ndryshime në zonat e mbrojtura, është qartësisht një ligj që ka të bëjë me mjedisin dhe për këtë arsye ai u analizua në këndvështrim të nenit 56 të Kushtetutës dhe nenit 8 të Konventës së Aarhus-it si më sipër.

“Edhe pse Konventa e Aarhus-it e ka kufizuar detyrimin për konsultim vetëm për aktet qeveritare dhe procedurat e ndërmarrë nga autoritetet publike ekzekutive dhe jo ndaj atyre legjislative, duke qenë se e drejta për t’u informuar për gjendjen e mjedisit dhe mbrojtjen e tij është një e drejtë kushtetuese, sipas nenit 56 të Kushtetutës, ajo shtrihet ndaj të gjitha organeve, përfshirë Kuvendin. Në këtë kuptim, në rastin në shqyrtim, nisma për ndryshimin e ligjit për zonat e mbrojtura është një nismë e deputetëve dhe pavarësisht faktit se ajo nismë ka pësuar ndryshime, ndër të tjera, bazuar në sugjerimet e Këshillit të Ministrave, ajo mbetet një nismë origjinale e deputetëve”, thuhet në njoftimi n e Gjykatës Kushtetuese.

Për këtë shkak, Gjykata vlerëson se konsultimi publik i bërë nga Kuvendi në lidhje me draftin e paraqitur nga deputetët përmbush detyrimin e përcaktuar nga neni 56 i Kushtetutës dhe nuk cenon nenin 8 të Konventës së Aarhus-it, e cila, për sa më sipër, nuk gjen zbatim për Këshillin e Ministrave në përgatitjen e sugjerimeve të tij për ligjin, për sa kohë kjo nuk ishte një nismë ligjore qeveritare.

Pretendimet për cenimin e identitetit kombëtar dhe trashëgimisë natyrore, të parashikuar në Preambulën e Kushtetutës dhe për respektimin e detyrimeve ndërkombëtare, Gjykata vendosi t`i shqyrtojë ato së bashku në kuptim të nenit 122 të Kushtetutës. Në lidhje me thelbin e këtyre pretendimeve, Gjykata, me shumicë votash, vendosi rrëzimin e tyre, me arsyetimin si më poshtë.

Gjykata vëren se MSA-ja synon bashkëpunimin në luftën kundër degradimit të mjedisit, duke përcaktuar një proces përafrimi legjislativ pa vendosur detyrime konkrete të zbatueshme. Pavarësisht se në dukje ligji objekt kërkese liberalizon politikat shtetërore në administrimin e zonave të mbrojtura, ai, në thelb, përbën një ligj kuadër, i cili nuk është i vetëzbatueshëm dhe në vetvete nuk sjell pasoja dhe, për rrjedhojë, nuk cenon detyrimet ndërkombëtare për mbrojtjen e mjedisit sipas MSA-së.

Gjykata u ndal në mënyrë të posaçme në përputhshmërinë e ligjit objekt shqyrtimi me nenin 108 të MSA-së, i cili parashikon se “Palët do të zhvillojnë dhe forcojnë bashkëpunimin në detyrën shumë të rëndësishme të luftës kundër degradimit mjedisor, me synim promovimin e qëndrueshmërisë mjedisore”.

Gjykata vlerësoi se ky nen synon bashkëpunimin në luftën kundër degradimit mjedisor dhe arriti në përfundimin se ligji i kundërshtuar, duke qenë ligj kuadër, edhe pse shton disa elemente të reja të administrimit të zonave të mbrojtura në raport me ligjin ekzistues, nuk duket të sjellë pasoja konkrete të drejtpërdrejta në këtë drejtim.

Duke pasur parasysh se për zbatimin e ligjit do të nxirren VKM-të specifike për shpalljen e zonave të mbrojtura, të cilat do të bëjnë përcaktimet e detajuara përkatëse për secilën zonë, vetëm në atë moment mund të verifikohet mospërputhja me detyrimet ndërkombëtare sipas nenit 108 të MSA-së, pra nëse përmbushet detyrimi për mosdegradim mjedisor.

E njëjta analizë vlen edhe për përputhshmërinë e këtij ligji me konventat ndërkombëtare të Rio-së, Bernë-s, Ramsar-it dhe Paris-it, për shkak të mungesës së efekteve dhe pasojave konkrete të ligjit kuadër objekt shqyrtimi.

/m.m/

The post Kërkuan shfuqizimin e ligjit për zonat e mbrojtura, Kushtetuesja rrëzon deputetët e opozitës appeared first on Agjencia Telegrafike Shqiptare.

TIRANË, 31 korrik/ATSH/ Shërbimi i Kardiologjisë pranë Qendrës Spitalore Universitare “Nënë Tereza” në Tiranë ofron kushte dinjitoze dhe trajtim me teknologji moderne për çdo pacient.

Ministrja e Shëndetësisë dhe Mbrojtjes Sociale, Albana Koçiu ndau sot opinionin e disa prej tyre të cilët vlerësojnë shërbimin e ofruar si dhe kushtet sipas standardeve më të mira europiane.

“Me zërin e qytetarëve që trajtohen çdo ditë në Shërbimin e Kardiologjisë pranë QSUT, aty ku profesionalizmi, përkushtimi dhe teknologjia moderne bashkohen për të ofruar kujdes të specializuar për çdo pacient”, u shpreh Koçiu.

Pacientët shprehen të kënaqur nga shërbimi i ofruar në këtë spital.

“Mua më kanë pritur, më kanë përcjellë dhe më kanë shpëtuar jetën në kohë rekord. Kam përshtypjet më të mira. Rregull special, nuk më kanë lënë gjë, si jashtë shtetit”, u shpreh një pacient.

“Kam qenë edhe në Greqi, por këtu kam ngelur shumë e kënaqur”, tha një tjetër.

“Po vij në një spital të ri. Gjendja këtu është jashtëzakonisht e përmirësuar, njësoj si në spitalet shumë të mira që ka Europa”, shtoi një tjetër.

/j.p/

The post Koçiu: Shërbimi i Kardiologjisë në QSUT, kujdes të specializuar për çdo pacient appeared first on Agjencia Telegrafike Shqiptare.

TIRANË, 11 korrik /ATSH/ Lumi Vjosa, i njohur si “lumi i fundit i egër në Evropë”, po kthehet në një destinacion gjithnjë e më të preferuar për adhuruesit e natyrës dhe sporteve ekstreme.

Të apasionuar pas sporteve ekstreme, turistë të shumtë rendin në rrjedhën e Vjosës për të përjetuar eksperiencën unike të rafting.

Kryeministri Edi Rama ndau sot pamje të një grupi turistësh duke bërë rafting në Vjosë.

Me rrjedhje të lirë dhe natyrë të paprekur, Vjosa përshkon një territor të mbrojtur me kanione, shpella dhe një biodiversitet të pasur, duke ofruar një përvojë të rrallë për ata që zgjedhin ta eksplorojnë përmes raftingut.

Turistët e aventurës përshkojnë me gomone lumin nga Përmeti deri në Këlcyrë me një gjatësi gati 20 km.

Rrjedha është e qetë në disa vende dhe e tërthortë e me dallgë në vende të tjera me thellësi më të madhe.

Turizmi i aventurës gërshetohet shumë mirë në Përmet me traditën, kulinarinë e mikëpritjen.

Ndaj rafting në Vjosë nuk është vetëm një sport, por konsiderohet edhe një përvojë gjithëpërfshirëse që ndërthur emocionin me bukuritë natyrore, duke kontribuar njëkohësisht në zhvillimin ekonomik të komuniteteve lokale dhe në rritjen e profilit ndërkombëtar të Shqipërisë si një destinacion turistik alternativ.

1 nga 6

/m.m/j.p/

The post Eksperienca unike e rafting në Vjosë tërheq turistë të shumtë appeared first on Agjencia Telegrafike Shqiptare.

TIRANË, 31 korrik/ATSH/ Falë reagimit të menjëhershëm të Policisë dhe të vrojtuesve bregdetarë u mundësua gjetja e një fëmije që ishte larguar nga prindërit, në plazhin e Shëngjinit.

Punonjësit e Policisë në Shëngjin i dorëzuan familjes, në gjendje të mirë shëndetësore, fëmijën 7-vjeçar nga Kosova.

Salla Operative e DVP Lezhë u njoftua nga një pushuese nga Kosova, se djali i saj ishte larguar dhe nuk po e gjente dot.

Menjëherë pas marrjes së njoftimit, shërbimet e Rendit të planifikuara me shërbim në zonën e plazhit në Shëngjin, së bashku me patrullat me biçikleta dhe vrojtuesit bregdetarë, u angazhuan dhe koordinuan veprimet për gjetjen e fëmijës.

Pas rreth një ore kërkimesh intensive në terren, punonjësit e Policisë e lokalizuan të miturin. Fëmija ndodhej në gjendje të mirë shëndetësore dhe iu rikthye menjëherë nënës së tij.

Nëna e fëmijës ka falënderuar shërbimet e Policisë dhe vrojtuesit bregdetarë për reagimin e shpejtë dhe profesional që kontribuoi në gjetjen e të miturit.

/m.m/j.p/

The post Ishte larguar nga familja, gjendet fëmija 7-vjeçar në plazhin e Shëngjinit appeared first on Agjencia Telegrafike Shqiptare.

TIRANË, 31 korrik/ATSH/ Këshilli i Ministrave miratoi sot Strategjinë Kombëtare të Turizmit 2030.

Lajmin e bëri të ditur Ministrja e Turizmit dhe Mjedisit Mirela Kumbaro, përmes një videomesazhi ku shprehet se strategjia është finalizim i një pune dyvjeçare.

“Qeveria Shqiptare sot miratoi Strategjinë Kombëtare të Turizmit 2030, pas një procesi gati 2-vjeçar hulumtimesh, studimesh dhe konsultimesh, ndërsa kjo strategji vendos objektiva të qartë dhe të matshëm për rritjen e të ardhurave nga turizmit deri në vitin 2030, shoqëruar me rritje të kapaciteteve akomoduese dhe përmirësim të standardeve, ndarjen e Shqipërisë në gjashtë rajone turistike dhe detyra të reja për agjencitë shtetërore që lidhen me industrinë e turizmit”, njoftoi Kumbaro.

Strategjia e Turizmit 2030 mbështetet në gjashtë shtylla kryesore: investimet, politika fiskale dhe rregullatore në turizëm, menaxhimi i destinacioneve, zhvillimi i produktit turistik, marketingu i destinacioneve dhe ngritja e kapaciteteve mbështetur në tre parimet bazë që janë aspekti social, mjedisor dhe ekonomik, ndërsa dokumenti ka kaluar edhe fazën e konsultimit publik me grupet e interesit.

Strategjia Kombëtare e Turizmit 2024-2030 projekton gjithashtu krijimin, përmirësimin dhe konsolidimin e produkteve turistike duke e ndarë vendin në 6 rajone turistike: rajoni turistik i bregdetit të Adriatikut, rajoni turistik verior i brendshëm, rajoni turistik i Tiranës, rajoni qendror, rajoni turistik i bregdetit të Jonit si dhe rajoni turistik jugor i brendshëm.

“Sot mirënjohje për të gjithë stafin e Ministrisë së Turizmit dhe Mjedisit, për ata dhjetëra specialistë që u përfshinë në hartimin e kësaj strategjie dhe sigurisht për partnerët tanë të GIZ që japin një kontribut të çmuar në zhvillimin e turizmit të qëndrueshëm”, shprehet Ministrja e Turizmit dhe Mjedisit Mirela Kumbaro.

/m.m/j.p/

The post Miratohet Strategjia Kombëtare e Turizmit 2030, Kumbaro: Objektiva të qartë për rritjen e të ardhurave nga turizmi appeared first on Agjencia Telegrafike Shqiptare.