Një shtetase serbe nga Mitrovica me inicialet A.M., së bashku me të dashurin e saj kroat, pjesëtar i KFOR-it në Kosovë, janë arrestuar pasi në telefonat e tyre janë gjetur dëshmi që lidhen me spiunazh në dëm të Kosovës, në favor të inteligjencës serbe.

Raportet tregojnë se informacionet e mbledhura dyshohet të jenë kaluar tek Lista Serbe, e cila më pas i ka dorëzuar institucionet e sigurisë së Serbisë.

Ky zhvillim ka ngjallur shqetësim të madh për sigurinë kombëtare dhe marrëdhëniet ndërkombëtare.

Eksperti i sigurisë, Agim Musiu, ka ngritur pyetje kritike për autoritetet kosovare dhe partnerët ndërkombëtarë:

A ka prokurori në Kosovë që vepron para se lajmi të bëhet publik ndërkombëtarisht?

A duhet ndërkombëtarët të dënojnë Listën Serbe për rolin e saj, apo kjo parti, që sipas Musiut përbëhet nga terroristë dhe spiunë, do të vazhdojë ta mbajë peng Kosovën dhe partnerët perëndimorë?

Apo A.M., me përvojën e saj si spiun dhe lidhjet e dyshimta, posedon edhe fakte të turpshme për ndërkombëtarët?

Sipas Musiut, ky rast tregon rrezikun që përfaqëson veprimtaria e fshehtë e individëve dhe grupeve të lidhura me inteligjencën e shteteve të huaja, duke hedhur hije mbi sigurinë dhe stabilitetin e Kosovës.

Çfarë u raportua për rastin e spiunazhit?

Sipas raportimeve, piloti në të kaluarën kishte kaluar filtrat e sigurisë në autoritetet kroate.

RTL ka shkruar se Ministria e Mbrojtjes e Kroacisë, ajo e Punëve të Brendshme dhe Zyra e Kryeministrit kanë qenë në dijeni për rastin tash e një kohë.

Gruaja serbe nga Mitrovica e Veriut ishte prezantuar si punonjëse e një organizate gjermane. Ajo dyshohet se kishte marrë informata nga ushtari kroat lidhur me lëvizjet e KFOR-it dhe se ato i ka përcjellë në Serbi.

Të dy u arrestuan në fund të korrikut. Të mërkurën u raportua se të dy janë marrë në pyetje nga Prokuroria. Akuzohen për katër vepra penale.

E mediumi kroat “index.hr” ka shkruar se ushtari ka mohuar fajin dhe ka thënë se dikush po përpiqet ta kurthojë. Siç ka thënë ai para autoriteteve, “edhe e dahsura e tij ka qenë viktimë”.

Siç ka shkruar ky medium, gruaja nga Kosova kishte udhëtuar shpesh drejt Kroacisë.

Ndërkaq “vecernji.hr” ka shkruar se serbja ka pasur lidhje edhe me organizata të tjera ndërkombëtare, përfshirë ato të sigurisë.

Konkretisht, sociologia A.M., partnerja e pilotit kroat, ishte e lidhur me organizatat ndërkombëtare në Kosovë, si EULEX dhe UNMIK.

A.M., punoi gjithashtu për Misionin e Bashkimit Evropian për Vendosjen e Sundimit të Ligjit në Kosovë, detyra e të cilit është të ndihmojë institucionet, organet gjyqësore dhe policinë dhe agjencitë e tjera të zbatimit të ligjit (EULEX) dhe Misionin e Administratës së Përkohshme të Kombeve të Bashkuara në Kosovë (UNIMIK).

Dyshohet se ajo kishte lidhje të ngushta me shumë gjyqtarë dhe prokurorë të EULEX-it, të cilët, sipas burimeve, dyshohet se i kishte shantazhuar.

AM, shtojnë burimet, shoqëroi drejtorin e organizatës joqeveritare Aktiv Miodrag Miliçeviq dhe ish-anëtarin e ekipit menaxhues përgjegjës për krijimin e Bashkësisë së Komunave me shumicë serbe, Igor Kallamar, në disa udhëtime.

Rasti ka nxitur reagime të shumta në Kroaci.

“Është problem serioz i sigurisë. Do të shohim çka do të nxjerrin hetimet”, ka thënë Arsne Bauk, shef i Komisionit për Mbrojtje në Parlamentin e Kroacisë.

“Në kohëra të tilla, ne kemi një qëllim, të gjithë, pavarësisht nga cila parti jemi. Kemi një qëllim, që është siguria e të gjithë qytetarëve tanë, e të gjitha misioneve që i kemi”, ka thënë Sandra Bençiq, deputete në këtë komision.

Shqetësuese i ka vlerësuar raportimet për spiun potencial në Forcën Ajrore Kroate edhe deputeti Igor Peternel.

Ai ka thënë se kjo bën që situata e sigurisë në Kroaci “të jetë shumë në dyshim”, transmeton Telegrafi.

The post Spiunazh ndaj Kosovës te Serbia nga piloti kroat i KFOR-it dhe e dashura e tij serbe – çfarë dihet deri më tani? appeared first on Telegrafi.

Kosova, Shqipëria dhe Kroacia po ndërmarrin hapa konkretë për të jetësuar bashkëpunimin në fushën e mbrojtjes, të formalizuar pesë muaj më parë me nënshkrimin e deklaratës së përbashkët më 18 mars në Tiranë.

Tani, vendet po kalojnë në një fazë tjetër, duke ndërtuar një aleancë më të fortë dhe më të qëndrueshme në fushën e sigurisë.

Ministrat e Mbrojtjes të tri vendeve po angazhohen që blerja e parë e armatimit të jetë ajo e kapaciteteve mbrojtëse, përmes një marrëveshjeje të koordinuar për armë nga Shtetet e Bashkuara të Amerikës.

Madje, në Ministrinë e Mbrojtjes së Kosovës kanë konfirmuar për RTK-në se një takim i tillë trelateral tashmë veçse është mbajtur.

“Është mbajtur takimi i përbashkët për hartimin e aktiviteteve trelaterale në kuadër të marrëveshjes, ku përfshihet edhe çështja e blerjeve të përbashkëta bazuar në kërkesat e forcave të secilit shtet. Me të përfunduar ky plan do të nënshkruhet nga secili shtet për të vazhduar më pas tutje”, konfirmoi Liridona Gashi, zëdhënëse e Ministrisë së Mbrojtjes.

Lidhur me këtë, ish-komandanti i Forcës së Sigurisë së Kosovës, Kadri Kastrati, ka thënë se kjo marrëveshje është tejet e mirë, duke treguar për rëndësinë e blerjes së përbashkët të armatimit.

“Kur blejnë tre shtete për njëherë, është kostoja shumë më e vogël, liferimi është shumë më i lehtë, dhe çdo prodhues i çdo armatimi ushtarak do të jetë më joshës për t’i furnizuar përnjëherë. Kur e kanë betimin edhe të NATO-s edhe të Uashingtonit, atëherë normal që prodhuesit do të jenë shumë të lumtur dhe shumë ekspeditivë në liferimin e armatimeve shumë më shpejt dhe shumë më mirë”, tha Kadri Kastrati, ish-komandant i FSK-së.

Duke u nisur nga rëndësia strategjike e partneritetit me SHBA-në për sigurinë dhe zhvillimin e Forcës së Kosovës, ish-koloneli i FSK-së konsideron se aleanca me SHBA-në është jetike për të ardhmen e ushtrisë.

“Krerët që e udhëheqin shtetin, cilido qoftë ai, duhet paraprakisht të kenë interesin kombëtar dhe nacional të vendit, sidomos në kuptim të mbrojtjes, sepse nëse nuk ke fuqi mbrojtëse, ti fare s’ki asgjë. Ushtria është ajo që ta mbron sovranitetin dhe integritetin territorial të Republikës së Kosovës dhe rendin kushtetues të saj, dhe kjo mund të arrihet vetëm nëse jemi në partneritet të fuqishëm me SHBA-në,” tha Afrim Veseli, ish-kolonel në FSK.

Ndërkohë, në kuadër të blerjeve dhe ngritjes së kapaciteteve të Forcës së Sigurisë së Kosovës, para dy javësh në Kazermën “Adem Jashari” në Prishtinë është bërë dorëzim-pranimi i kontingjentit të dytë prej 50 autoblindave të blera nga ushtria e Shteteve të Bashkuara të Amerikës për FSK-në.

The post Kosova, Shqipëria dhe Kroacia do të blejnë bashkë armatim nga ShBA-ja appeared first on Telegrafi.

Kryetari i Lidhjes Demokratike të Kosovës (LDK), Lumir Abdixhiku, ka deklaruar se nuk sheh asnjë ndryshim mes kryeministrit Albin Kurti dhe deputetit të Vetëvendosjes, Dimal Basha.

“Nuk shoh dallim mes Albin Kurtit dhe produkteve të tij si Dimal Basha, është e njëjta mendësi… absolutisht, sepse njerëzit e tillë prodhojnë rezultate të tilla. Dora ime, nënshkrimi im, mendimi im s’kish propozuar askund një gjë të tillë për krye të Kuvendit, ta keni të sigurt”, tha Abdixhiku në emisionin Debat Plus.

Ai theksoi se deputetët e Kuvendit nuk duhet gjykuar, pasi janë reflektim i shoqërisë, duke pasur parasysh se listat zgjedhore përfshijnë përfaqësues nga kategori të ndryshme të qytetarëve.

Duke folur për kryeministrin, kreu i LDK-së shtoi se shpeshherë është befasuar nga “cekëtësia e mendimeve” të Albin Kurtit në takimet politike.

“Për shembull, në takimin që kemi pasur me liderët politikë ku ishim mbledhur të gjithë, niveli me të cilin ai interpretonte në gjuhën shqipe vendimin e Gjykatës Kushtetuese – fakti që s’i kuptonte gjërat e shkruara shqip – ishte shqetësues për secilin prej nesh”, u shpreh Abdixhiku.

The post Abdixhiku: Nuk shoh dallim mes Albin Kurtit dhe produktit të tij, Dimal Bashës appeared first on Telegrafi.

Asociacioni i Gazetarëve të Kosovës (AGK) ka reaguar ashpër ndaj një komunikate të Menaxhmentit të RTK-së, duke e cilësuar atë si formë intimidimi publik ndaj gjashtë redaktorëve të këtij mediumi.

Në reagimin e saj, AGK tha se komunikata e RTK-së përmban elemente kërcënuese, pasi Menaxhmenti thekson se “çdo deklarim i pabazuar në fakte, që përhap dezinformata duke dëmtuar integritetin e institucionit, nuk do të tolerohet tutje dhe të gjitha këto veprime do të trajtohen në përputhje me ligjin dhe rregulloret e RTK-së në fuqi”.

Sipas AGK-së, një deklaratë e tillë paraqet kërcënim të drejtpërdrejtë për masa ndëshkimore ndaj gjashtë redaktorëve, të cilët dolën publikisht kundër vendimit për largimin e tyre nga drejtimi i emisioneve informative.

“Ky është një kërcënim i hapur që synon të heshtë zërat kritikë brenda transmetuesit publik. AGK e dënon fuqishëm këtë formë censure dhe veprimet arbitrare të Menaxhmentit aktual”, thuhet në reagim.

AGK ka shprehur përkrahje të plotë për redaktorët në kërkesën e tyre për anulimin e vendimit të Menaxhmentit, duke theksuar se autonomia profesionale dhe liria e shprehjes duhet të mbrohen në institucionet publike të informimit.

The post AGK: Komunikata e Menaxhmentit të RTK-së është intimidim ndaj gazetarëve appeared first on Telegrafi.

Jana Arsovska, profesoreshë në Kolegjin e Drejtësisë Penale “John Jay” dhe autore e artikullit të vitit 2012 “Globalizimi i Ballkanit Perëndimor: Krimi Ndërkombëtar, Islami Fundamental dhe Aleancat e Pahijshme”, ka reaguar pas diskutimeve në Kosovë për përmbajtjen e artikullit pasi njëri nga autorët e tij është edhe kryetari aktual i Kuvendit të Kosovës, Dimal Basha.

Arsovska në një reagim dërguar mediave ka thënë se Basha është përgjegjës vetëm për kapitullin tre të këtij artikulli, dhe se për pjesën tjetër është ajo autorja.

“Meqenëse unë jam autorja e pjesës më të madhe të punës në këtë studim, do të doja t’ia bëja të qartë publikut se Dimal Basha është përgjegjës vetëm për kapitullin e tretë “Zgjerimi i islamit radikal” dhe asnjë nga kapitujt e tjerë nuk janë punë e tij. Shkurt, z. Basha paraqiti vetëm kapitullin e tretë për botim, një pjesë që shqyrton përhapjen e islamit fundamentalist në Europën Juglindore me një fokus të veçantë në Kosovë”- ka shkruar ajo në reagimin e saj, raporton Kallxo.

Lexo po ashtu Publikimi i Bashës: UÇK-ja u financua nga bandat kriminale, paratë e drogës - diaspora u kërcënua që të financonin Ushtrinë Çlirimtare

Ky artikull i publikuar në vitin 2012 ka gjithsej katër kapituj, ‘Shpërbërja e Jugosllavisë’, ‘Rritja e krimit të organizuar ndërkombëtar’, ‘Zgjerimi i Islamit radikal’ dhe ‘Globalizimi, konflikti kulturor dhe tendosja ekonomike: një diskutim’.

Artikulli ka zgjuar diskutim në Kosovë për shkak të përmbajtjes së tij.

Lexo po ashtu "UÇK-ja u financua nga bandat kriminale", reagon Basha: Mbaj përgjegjësi vetëm për kapitullin III

Në kapitullin dy të këtij artikulli thuhet se “ka pasur akuza të shumta nga agjencitë perëndimore të zbatimit të ligjit se Ushtria Çlirimtare e Kosovës (UÇK), gjatë ngritjes së saj, bashkëpunoi me kriminelë etnikë shqiptarë brenda dhe jashtë Kosovës”… “Sipas rasteve të hetuara, fondet për UÇK-në vinin nga shqiptarë të zakonshëm në diasporë, si dhe nga trafikantë droge që vepronin në të gjithë Europën Perëndimore dhe SHBA-në. Kjo mbështetje nuk kufizohej vetëm në para, por trafikantët e drogës dërgonin gjithashtu njerëz të armatosur për të luftuar përkrah UÇK-së dhe blinin armë në emër të UÇK-së”.

The post Jana Arsovska: Dimal Basha është përgjegjës vetëm për një kapitull të artikullit appeared first on Telegrafi.

Deputetja e Lidhjes Demokratike të Kosovës (LDK), Hykmete Bajrami, ka reaguar ndaj emërimit të Dimal Bashës si kryetar i Kuvendit dhe dorëheqjes së Liburn Aliut nga posti i ministrit të Infrastrukturës.

Përmes një postimi në Facebook, Bajrami iu drejtua mbështetësve të Lëvizjes Vetëvendosje, duke u kujtuar se përgjegjës për këto vendime është kryeministri Albin Kurti.

“Veç dua t’ua kujtoj të gjithë mbështetësve të LVV-së që s’janë të kënaqur me Dimal Bashën, se Albin Kurti e ka vlerësu se ai ju përfaqëson juve denjësisht, pra Dimali është vlerësimi që Albini ka për ju”, shkroi Bajrami.

Ajo shtoi se Kurti për më shumë se katër vjet e ka mbrojtur Liburn Aliun, të cilin sot disa përkrahës të Vetëvendosjes po e kritikojnë.

“Gjithashtu dua t’ju kujtoj mbështetësve të LVV-së, që sot po e quajnë të korruptuar dhe dështak Liburn Aliun: se Liburni ka qenë ministër i Albin Kurtit për katër vjet e gjysmë, me buxhetin më të madh në vend, dhe korrupsionin e dështimet e Liburnit i ka mbrojtë Albin Kurti deri më sot”, tha ajo.

Bajrami u bëri thirrje qytetarëve që të mendojnë me arsye dhe të përdorin votën për të ndëshkuar politikanët që, sipas saj, kanë dështuar.

“Pra, mendoni racionalisht, se kemi zgjedhje lokale dhe nacionale. Qytetarët mund ta çojnë në pension me votë politikanin e korruptuar, të dështuar dhe nënçmues”, theksoi deputetja e LDK-së.

The post Bajrami: Dimali është pasqyrë e vlerësimit që Kurti ka për mbështetësit e Vetëvendosjes appeared first on Telegrafi.

Organizata e Veteranëve të Luftës së Ushtrisë Çlirimtare të Kosovës (OVL-UÇK) ka reaguar ashpër pas zgjedhjes së Dimal Bashës si kryetar i Kuvendit të Kosovës, duke e cilësuar këtë vendim si të papranueshëm dhe fyese ndaj vlerave të luftës.

Në reagimin e saj, OVL-UÇK thekson se Basha njihet për “qëndrime denigruese dhe fyese ndaj UÇK-së”, duke e paraqitur atë si të lidhur me krimin dhe duke njollosur sakrificën e ish-luftëtarëve dhe dëshmorëve.

“Është e papranueshme dhe e pafalshme që Kuvendi i Kosovës të drejtohet nga një njeri që ka fyer dhe sulmuar UÇK-në dhe dëshmorët tanë. Ky akt është një njollë e rëndë mbi dinjitetin e Kuvendit të Kosovës dhe një goditje e drejtpërdrejtë për vlerat mbi të cilat është ndërtuar shteti”, thuhet në reagim.

OVL-UÇK ka kritikuar ashpër edhe deputetët që votuan në favor të Bashës, duke ngritur pyetjen se si është e mundur të mbështetet një kandidat që, sipas tyre, “ka qenë vazhdimisht kundër UÇK-së”, ndërkohë që ata përfaqësojnë popullin që është çliruar falë sakrificës së saj.

Në fund, organizata thekson se do të mbetet gjithmonë në mbrojtje të UÇK-së dhe vlerave të saj, duke mos lejuar, siç thotë, “që historia të tjetërsohet apo të përlyhet nga individë të tillë”.

The post “Qëndrimet e tij denigruese dhe fyese ndaj Ushtrisë Çlirimtare”, reagon OVL-UÇK: Basha, njollë mbi dinjitetin e institucioneve appeared first on Telegrafi.

Kryetari i sapozgjedhur i Kuvendit të Kosovës, Dimal Basha, ka bërë deklarata të rëndë për Ushtrinë Çlirimtare të Kosovës (UÇK) në një punim akademik të botuar më 22 gusht 2012.

Në këtë punim, Basha pretendon se gjatë ngritjes së saj, UÇK-ja kishte bashkëpunuar me kriminelë brenda dhe jashtë Kosovës.

“Ka pasur akuza të shumta nga agjencitë perëndimore të zbatimit të ligjit se Ushtria Çlirimtare e Kosovës (UÇK), gjatë ngritjes së saj, bashkëpunoi me kriminelë shqiptarë etnikë brenda dhe jashtë Kosovës”, shkruante Basha.

Ai theksonte se fondet për UÇK-në nuk vinin vetëm nga diaspora shqiptare, por edhe nga rrjete të trafikut të drogës që operonin në Evropën Perëndimore dhe SHBA.

Sipas tij, kjo mbështetje përfshinte edhe dërgimin e luftëtarëve të armatosur për t’u bashkuar me UÇK-në dhe blerjen e armëve në emër të saj.

Në punimin e tij, Basha citon raste gjyqësore nga Gjermania, Italia, Belgjika dhe Çekia, të cilat, sipas tij, sugjeronin lidhje të forta midis trafikantëve të drogës dhe UÇK-së.

Ai përmend një rast në Belgjikë, ku “i ashtuquajturi ‘bosi i mafias shqiptare’ VH” i kishte lënë plumba para dyerve të familjeve shqiptare në diasporë si mjet presioni për pagesën e “taksave vullnetare” në mbështetje të UÇK-së.

Basha shprehet se mbijetesa e UÇK-së “varej nga financimi që merrte nga banditët patriotikë që operonin përtej kufijve”.

Ai përmend edhe emrin e ish-deputetit të PDK-së, Xhavit Haliti, duke thënë se ky i fundit kishte rol kyç në fondin “Vendlindja Thërret”, i cili grumbullonte të ashtuquajturat taksa vullnetare.

Sipas punimit të Bashës, një raport i KFOR-it e lidhte Halitin me menaxhimin e këtij fondi, duke pretenduar se kur financimi kishte rënë, fondi “u kthye në krim të organizuar në një masë të madhe”.

Publikimin në rrjetin social Facebook, të këtij punimi e ka bërë gazetari, Besnik Krasniqi.

Publikimin e plotë mund ta gjeni KËTU.

The post Publikimi i Dimal Bashës në 2012-ën: UÇK-ja bashkëpunoi me kriminelë dhe u financua nga bandat e drogës appeared first on Telegrafi.

E Ngarkuara me Punë në Ambasadën Amerikane në Prishtinë, Anu Prattipati, ka vlerësuar vendimin e Kosovës për heqjen e tarifës 10 për qind ndaj produkteve amerikane, duke e cilësuar atë si një hap të madh drejt forcimit të marrëdhënieve ekonomike mes dy vendeve.

“Kjo është një arritje e madhe dhe një pikë kthese në partneritetin tonë. Vendimi i Kosovës për të eliminuar tarifat doganore pasqyron vizionin tonë të përbashkët për më shumë tregti, investime dhe mirëqenie mes dy kombeve tona”, tha Prattipati gjatë një diskutimi të organizuar nga Oda Ekonomike Amerikane në Kosovë.

Ajo shtoi se heqja e tarifave e ka bërë më të lehtë qasjen e qytetarëve të Kosovës në produktet amerikane, ndërsa për bizneset ka hapur mundësi të reja për investime e bashkëpunim tregtar.

Në panel mori pjesë edhe ministri në detyrë i Financave, Hekuran Murati, i cili tha se ky hap duhet të shërbejë si bazë për arritjen e një marrëveshjeje të tregtisë së lirë mes Kosovës dhe SHBA-së.

“Ky vendim e forcon partneritetin strategjik që kemi me SHBA-në, duke hapur rrugën për rritjen e bashkëpunimit ekonomik dhe të investimeve. Përveç kësaj, është një testament i marrëdhënieve të shkëlqyera që kemi me partnerin tonë kryesor”, tha Murati.

Ndërkohë, drejtori i Doganës, Agron Llugaliu, theksoi se masat e ngjashme në të kaluarën, si Marrëveshja e Stabilizim-Asociimit me BE-në, kanë sjellë rritje të ndjeshme të shkëmbimeve tregtare dhe se pritet një efekt i ngjashëm edhe me këtë vendim.

Drejtori i Odës Ekonomike Amerikane, Arian Zeka, u shpreh se heqja e tarifave pritet të nxisë prodhimin dhe investimet amerikane në Kosovë, duke thelluar më tej partneritetin ekonomik mes dy vendeve.

The post SHBA mirëpret heqjen e tarifave ndaj produkteve amerikane në Kosovë: Një pikë kthese në partneritetin ekonomik appeared first on Telegrafi.

Hysen Durmishi është caktuar ushtrues detyre i ministrit të Mjedisit, Planifikimit Hapësinor dhe Infrastrukturës, pas dorëheqjes së ministrit Liburn Aliu.

Durmishi deri tash ka qenë zëvendësministër.

“Kryeministri në detyrë i Republikës së Kosovës, Albin Kurti, ka caktuar sot zëvendësministrin e deritanishëm të Mjedisit, Planifikimit Hapësinor dhe Infrastrukturës, Hysen Durmishi, ushtrues të detyrës së Ministrit të Mjedisit, Planifikimit Hapësinor dhe Infrastrukturës, pas dorëheqjes dhe lirimit nga detyra të ministrit të këtij dikasteri, Liburn Aliu. Kryeministri Kurti e uron z. Durmishi për përgjegjësinë e re dhe i dëshiron suksese në përmbushjen e detyrave”, thuhet në njoftim të Zyrës së Kryeministrit.

Aliu gjatë ditës njoftoi se ka dhënë dorëheqje, duke thënë se e ka marrë këtë vendim pasi Dimal Basha mori postin e kryeparlamentarit. Sipas Aliut, zgjedhja e Bashës s’ka qenë në lartësinë e idealit të tij për Republikën.

The post Hysen Durmishi caktohet ushtrues detyre i ministrit të MMPHI-së appeared first on Telegrafi.

Presidentja Vjosa Osmani priti në takim të dërguarin e posaçëm të Francës për Ballkanin Perëndimor, ambasadorin René Troccaz, ku u diskutuan zhvillimet politike në Kosovë dhe siguria rajonale.

Presidentja përsëriti orientimin strategjik të Kosovës drejt integrimit në Bashkimin Evropian dhe NATO, si dhe përkushtimin e palëkundur për anëtarësim në Këshillin e Evropës, duke theksuar se reformat, sundimi i ligjit dhe përputhja me standardet evropiane mbeten prioritetet kryesore.

Presidentja theksoi se Kosova është e përkushtuar ndaj stabilitetit politik dhe funksionimit të plotë demokratik të institucioneve, duke përmendur zgjedhjen e Kryetarit të Kuvendit dhe të shumicës së nënkryetarëve si hapa kyç në këtë drejtim.

Në lidhje me hapjen e urës së re mbi lumin Ibër si dhe vazhdimin e ndërtimit të një ure shtesë, Presidentja Osmani theksoi se mirëpret ndërtimin e tyre, duke vënë në pah rolin pozitiv që urat luajnë në integrimin, bashkimin dhe afrimin e qytetarëve, përmes lehtësimit të lëvizjes, bashkëpunimit dhe transportit.

Ajo rikujtoi më tej se mbyllja e urës kryesore në Mitrovicë në vitin 1999 nuk ishte bërë për çështje sigurie por për shkak të vendimeve jashtëzakonisht të dëmshme politike dhe se është për keqardhje që edhe 26 vite pas mbylljes e tashmë 10 vite pas marrëveshjes së Brukselit për hapjen e urës, ende ajo mbetet e mbyllur.

Sipas saj, nuk janë urat ato që krijojnë tensione, por janë njerëzit e dhunshëm sikur strukturat ilegale kriminale të financuara nga Serbia, të cilat kanë krijuar dhunë e tensione përgjatë këtyre dekadave.

“Është veprimtaria kriminale dhe destabilizuese e Radojçiqit dhe grupeve kriminale në veri që pengonte normalitetin dhe lëvizjen e lirë, duke krijuar atmosferë frike dhe tensioni , e jo urat”, theksoi ajo. Presidentja sqaroi se këto struktura ilegale kriminale janë të vetmet përgjegjëse për dhunën e tensionet dhe jo infrastruktura që ndërtohet për të bashkuar komunitetet.

Sa i përket masave kufizuese të Bashkimit Evropian ndaj Kosovës, Presidentja Osmani tha se përveçse këto masa janë të padrejta, sepse godasin pa arsye qytetarët e Kosovës dhe mirëqenien e tyre, ato poashtu dëmtojnë proceset demokratike dhe zhvillimin e vendit si dhe dëmtojnë kredibilitetin e dialogut të udhëhequr nga BE-ja.

Në përfundim, Presidentja riafirmoi gatishmërinë e Kosovës për të qenë një partner i besueshëm në forcimin e paqes, stabilitetit dhe bashkëpunimit rajonal.

The post Osmani në takim me përfaqësuesin francez kërkon heqjen urgjente të masave ndaj Kosovës appeared first on Telegrafi.

Pas përpjekjeve të shumta për konstituimin e Kuvendit të Kosovës, përpjekja e 58-të doli pjesërisht e suksesshme.

Deputetët zgjodhën kryetarin e Kuvendit, Dimal Basha, dhe katër nënkryetarë, por konstituimi nuk konsiderohet i plotë, pasi nuk u zgjodh nënkryetari nga Lista Serbe.

Basha mori besimin e 73 deputetëve, 30 ishin kundër dhe tetë abstenuan. Ndërsa nënkryetarët nga tri partitë më të mëdha shqiptare, Albulena Haxhiu, Vlora Çitaku dhe Kujtim Shala, u votuan me shumicë të votave: 101 pro, 0 kundër dhe 9 abstenime.

Nga komunitetet jo-shumicë, u zgjodh nënkryetarja Emilia Rexhepi me 73 vota pro, 1 kundër dhe 23 abstenime.

Problemet filluan me propozimin nga Lista Serbe, e cila tre herë tentoi të zgjidhte Slavko Simiqin për nënkryetar, por nuk mori votat e mjaftueshme.

Deputeti Igor Simiq insistoi në propozimin e katërt, por kryetari Basha ia ndali mikrofonin duke vepruar sipas rregullores së Kuvendit.

Tentativa për të zgjedhur Nenad Rashiq nga Partia e Pavarur Liberale gjithashtu dështoi, pasi mori vetëm 55 vota pro, një kundër dhe 17 abstenime, ndërkohë që deputetët e LDK-së nuk morën pjesë në votim.

Krasniqi: PDK mbajti fjalën, në një situatë normale asnjëherë nuk do ta votonim dikë si Dimal Basha

Kryetari i Partisë Demokratike të Kosovës, Memli Krasniqi pasi u zgjodh kryetar i Kuvendit, Dimal Basha tha se është i bindur se as votuesit e Lëvizjes Vetëvendosje dhe as qytetarët e Kosovës nuk janë të kënaqur me përzgjedhjen e Albin Kurtit për kryetar të Kuvendit.

Krasniqi në një deklaratë për media theksoi se sot e kanë parë qartë votuesit se sa i vlerëson Albin Kurti.

“Pas gati pesë muajve bllokadë nga Lëvizja Vetëvendosje, me rikthimin te rendi kushtetues dhe tërheqja nga propozimi i anëtarëve të Qeverisë Kurti, ashtu siç kemi thënë nga fillimi, sot, larg nga e dëshiruara, u zgjodh Kryetari i Kuvendit”, tha Krasniqi.

Kreu i PDK-së tutje tha se “në një situatë normale asnjëherë nuk do të votonim dikë si Dimal Basha në krye të kuvendit, por ne sot kemi votuar siç kemi thënë nga dita e parë për ta zhbllokuar situatën dhe për t’i qëndruar besnik fjalës së dhënë publike”.

Abdixhiku: LDK-ja nuk ka votë për promovuesit vulgar të urrejtjes, ndarjes e propagandës

Kryetari i LDK-së, Lumir Abdixhiku, ka theksuar se partia e tij nuk do të marrë pjesë në një skenar që, sipas tij, përfaqëson degradimin e vlerave politike dhe promovimin e urrejtjes.

“Ne refuzojmë të përfaqësojmë këtë mendësi dhe të bëhemi pjesë e cirkut votues për nënkryetarët minoritarë. Ky s’është drejtimi ynë,” tha Abdixhiku.

Ai u bëri thirrje qytetarëve për bashkim rreth LDK-së, si adresë të përfaqësimit me dinjitet dhe respekt për Kushtetutën.

Nëse dëshiron, mund ta bëj edhe një version edhe më të shkurtër për rrjete sociale, në një-dy rreshta që përmbledh thelbin: LDK refuzon cirkun politik dhe bën thirrje për bashkim.

“I betonuar për bllokadë”, Haradinaj i reagon Abdixhikut: Vazhdo të vendnumërosh se kjo të shkon për shtati ty, Lumir

Kryetari i Aleancës për Ardhmërinë e Kosovës, Ramush Haradinaj, ka kritikuar qëndrimin e kryetarit të LDK-së, Lumir Abdixhiku, për bllokadë institucionale.

Ai tha se për dallim nga AAK, Lumir Abdixhiku dhe mbështetësit e tij janë “betonuar” në qëndrimin e bllokadës.

“Veç Lumir Abdixhiku me të tijët, janë betonuar pro kësaj bllokade. Lumiri ka vendnumëruar në vazhdimësi dhe po vazhdon të vendnumërojë ende”.

“Vazhdo të vendnumërosh se kjo të shkon për shtati ty, Lumir”.

Ai kujtoi se AAK ka vepruar me përgjegjësi, duke dërguar kërkesën për interpretim në Gjykatën Kushtetuese dhe duke mbështetur modelin e daljes nga bllokada.

“Kjo ishte përgjegjësia jonë kryesore dhe e kemi përmbushur,” tha Haradinaj.

Haxhiu: Opozita të reflektojë për votimin e Rashiqit të enjten

Ministrja në detyrë e Shëndetësisë, Albulena Haxhiu, ka reaguar lidhur me procesin e konstituimit të Kuvendit të Kosovës dhe zgjedhjen e nënkryetarëve nga komunitetet joshumicë.

Haxhiu la fajtor opozitën se nuk patën guximin të votojnë Nenad Rashiqin, nënkryetar të Kuvendit.

“Sot kishte mundësi që dita të përmbyllej me dy lajme të mira: konstituimi i Kuvendit dhe largimi i përfaqësuesit të Listës Serbe nga Kryesia e Kuvendit. Por fatkeqësisht, opozita nuk pati as vullnetin dhe as guximin e nevojshëm,” tha Haxhiu.

Ajo shtoi se për vetëm gjashtë vota më shumë, deputeti Nenad Rashiq do të ishte zgjedhur nënkryetar i Kuvendit.

“Shpresoj që deri të enjten të ketë reflektim opozitar,” tha Haxhiu.

Sipas Haxhiut, kryeterroristi Milan Radoiçiq është kryetar formal i Listës Serbe, qytetarët dhe partitë duhet të bashkohen për të mbrojtur interesin e Kosovës dhe për nder të heronjve, si Enver Zymberi dhe Afrim Bunjaku.

Osmani mirëpret hapjen e rrugës për zhbllokimin e procesit të konstituimit të Kuvendit

Presidentja e Kosovës Vjosa Osmani, ka thënë të martën se mirëpret nisjen e zhbllokimit të procesit të konstituimit të Kuvendit, dhe shpreson që ai të përmbyllet sa më parë, në përputhje me Kushtetutën.

Përmes një komunikate për media të lëshuar nga Presidenca, Osmani citohet të ketë thënë se shpreson që sa më parë Kuvendi të votojë edhe Qeverinë e re, si dhe e ka uruar kryetarin dhe nënkryetarët e rinj të Kuvendit.

Qeveria e re mund të formohet vetëm pasi të konstituohet plotësisht Kuvendi me kryetarin dhe pesë nënkryetarët.

Procesi tani është bllokuar, në mungesë konsensusi për zgjedhjen e nënkryetarit serb.

Kryeziu: PDK dhe LDK pa argument juridik për të mos e votuar Rashiqin

Ish-gjyqtari i Kushtetueses, Kadri Kryeziu, ka reaguar ndaj mospjesëmarrjes së PDK-së dhe LDK-së në votimin për zgjedhjen e Nenad Rashiqit në pozitën e nënkryetarit të Kuvendit.

Ai tha se një vendim i tillë është i pakuptimtë, duke theksuar se Kushtetuta përcakton qartë kushtin e vetëm – kandidati duhet të jetë deputet nga komuniteti serb.

Sipas tij, askund nuk thuhet se ai duhet të vijë domosdoshmërisht nga partia më e madhe serbe.

Kryeziu kujtoi se edhe rregullorja e Kuvendit, e cila është akt më i ulët se Kushtetuta, e parasheh mundësinë që në rast refuzimi nga partia më e madhe serbe, situata të përfundojë përmes shortit.

“PDK dhe LDK mund të thirren në argumente politike, por nuk ekziston asnjë argument juridik që e pengon nominimin dhe zgjedhjen e Rashiqit”, u shpreh ai.

Sipas Kryeziut, e udhës është që Kuvendi të votojë Rashiqin të enjten, me ç’rast do të mundësohej konstituimi i institucioneve. Ndërsa, siç tha ai, Lista Serbe mund ta kontestojë më pas këtë çështje në Gjykatën Kushtetuese.

“Aman, mos u bëni më katolikë se Papa, se nuk po dua të shprehem ndryshe”, përfundoi Kryeziu.

Enver Hasani: Rashiq s’mund të propozohet për nënkryetar në emër të komunitetit serb, ajo çfarë pamë është kundërkushteteuse

Ish-kryetari i Gjykatës Kushtetuese, Enver Hasani, ka bërë me dije se ajo që ka ndodhur sot në Kuvendin e Kosovës në lidhje me zgjedhjen e nënkryetarëve nga komuniteti jo-shumicë ka qenë tërësisht në kundërshtim me Kushtetutën e Kosovës.

Ai ka vlerësuar se nuk mund të pyetet komuniteti shumicë për të drejtat kushtetuese të komuniteteve joshumicë.

Hasani ka thënë se deputeti Nenad Rashiq nuk ka të drejtë dhe nuk mund të propozohet për nënkryetar të Kuvendit të Kosovës në emër të komunitetit serb.
Sipas tij, atë propozim mund ta bëjë vetëm grupi parlamentar i serbëve në Kuvendin e Kosovës.

Ambasadori gjerman: Mungon vullneti politik për të zgjidhur krizën, kjo është e keqe për Kosovën

Duke komentuar mos konstituimin e Kuvendit, për shkak se shumica e deputetëve refuzuan ta votojnë nënkryetarin nga Lista Serbe, Rohde ka thënë se protagonistët nuk kanë vullnet politik për të gjetur një zgjidhje dhe se kjo është e keqe për Kosovën.

Ai u ka thënë mediave se kishte shpresë që kriza mund të zgjidhej por në këto momente nuk duket e mundur.

“Më duket se këtë mëngjes kisha një shpresë të shkurtër që kriza mund të zgjidhej, por në këtë moment nuk duket e mundur. Ndoshta nuk ka mjaft vullnet politik ndër protagonistët për të gjetur një zgjidhje. Kjo është e keqe për Kosovën, sepse shumë fonde janë në lojë dhe na duhen institucione funksionale, si parlamenti dhe qeveria”, tha ai.

Ambasadori britanik bën thirrje që sa më shpejt të konstituohet Kuvendi

Ambasadori i Britanisë së Madhe në Kosovë, Jonathan Hargreaves, u ka bërë thirrje partive politike që të ndërmarrin sa më shpejt hapat e radhës dhe ta konstituojnë Kuvendin e të krijohet qeveria e re.

Hargreaves ka mirëpritur zgjedhjen e kryetarit të Kuvendit. Dimal Basha është zgjedhur kryekuvendar të martën, ndërsa konstituimi i plotë i Kuvendit ka ngecur te zgjedhja e nënkryetarit nga radha e komunitetit joshumicë serb. Seanca është shtyrë për të enjten.

“Zgjedhja e kryetarit të Kuvendit është përparim i mirëpritur dhe tregon se kompromisi politik në interes të vendit është i mundur nëse ekziston vullneti. U bëj thirrje partive politike në Kosovë që të marrin hapat e radhës sa më shpejt e ta përfundojnë formimin e Kuvendit dhe të qeverisë së re”, ka shkruar Hargreaves në Facebook.

Instituti Demokratik i Kosovës (KDI) ka shprehur shqetësimin për procesin, duke vlerësuar se devijimi nga procedurat e rregullta cenon konstituimin dhe përfshirjen e komunitetit serb në institucionet e vendit.

KDI bën thirrje që partitë parlamentare të punojnë me përgjegjësi për të përfunduar procesin në përputhje me Kushtetutën, Rregulloren dhe aktgjykimet e Gjykatës Kushtetuese.

Procesi konstituiv, sipas Kushtetutës, përfshin verifikimin e mandateve, betimin e deputetëve dhe zgjedhjen e kryetarit dhe nënkryetarëve të Kuvendit.

“Seanca konstituive përfundon me zgjedhjen e kryetarit dhe nënkryetarëve, ndërsa ndërprerjet nuk mund të zgjasin më shumë se 48 orë”.

Seanca konstituive do të vazhdojë të enjten prej orës 11:00.

Ndryshe, LVV-ja e kryeministrit në detyrë, Albin Kurti, i fitoi 48 ulëse gjatë zgjedhjeve të 9 shkurtit dhe partitë e tjera parlamentare nuk kanë pranuar ta votojnë kandidaten e saj për kryetare të Kuvendit, për emërimin e së cilës nevojiten të paktën 61 vota.

PDK-ja doli e dyta me 24 ulëse, LDK-ja e treta me 20, pasuar nga Lista Serbe – partia më e madhe e serbëve në Kosovë me 9, dhe koalicioni mes AAK-së dhe Nismës Socialdemokrate, me 8 të tilla.

Edhe 11 ulëse tjera janë të pakicave./Telegrafi.

The post Dimal Basha u zgjodh kryeparlamentar por s’pati konstituim, krejt detajet e seancës së Kuvendit appeared first on Telegrafi.

Emisari i Bashkimit Evropian për dialogun Kosovë-Serbi, Peter Sorensen, ka zhvilluar sot një takim në Beograd me presidentin serb, Aleksandar Vuçiq.

Kjo vizitë erdhi pas asaj që Sorensen kishte realizuar në fillim të muajit gusht në Prishtinë, ku kishte biseduar me udhëheqësit kosovarë lidhur me procesin e dialogut.

Sipas tij, qëllimi i takimeve mbetet i njëjtë – përgatitja e terrenit për raundet e ardhshme të bisedimeve.

“Pas vizitës sime në Prishtinë në fillim të gushtit, sot isha në Beograd për bisedime përgatitore përpara takimeve të ardhshme të Dialogut. I dëgjova me kujdes bashkëbiseduesit e mi dhe theksova rëndësinë e normalizimit për hir të njerëzve në terren”, u shpreh Sorensen.

Ende nuk është bërë e ditur se kur do të mbahet takimi i radhës mes përfaqësuesve të Kosovës dhe Serbisë në Bruksel.

The post Sorensen takohet me Vuçiqin në Beograd, në fokus dialogu Kosovë-Serbi appeared first on Telegrafi.

Një furrë e njohur për përgatitjen e “peracave” në Mitrovicën e Jugut është përfshirë nga zjarri mbrëmjen e së martës.

Në pamjet e publikuara shihet se flakët janë përhapur në brendësi të furrës, ndërsa dhjetëra qytetarë janë afruar për të ndihmuar në shuarjen e tyre.

Në vendngjarje ka arritur policia dhe zjarrëfikësit, duke e lokalizuar zjarrin.

Telegrafi ka dërguar pyetje në Policinë e Kosovës për të mësuar më shumë detaje rreth këtij rasti dhe është në pritje të përgjigjes zyrtare.

Raportohet se kjo furrë ishte përfshirë nga zjarri edhe në muajin prill të vitit 2024.

The post Furrë e njohur në Mitrovicë përfshihet nga zjarri appeared first on Telegrafi.

Agim Veliu, ish-ministër i Punëve të Brendshme, ka folur lidhur me një aksion të Policisë së Kosovës në veri gjatë kohës sa ishte në detyrë, të cilin e ka përmendur gazetari Lirim Mehmetaj duke thënë se ishte ndalur nga Albin Kurti.

Veliu në një lidhje direkte në “Debat Plus” ka deklaruar se Policia e Kosovës e kishte pasur planin e detajuar për ndërhyrje, por Kurti nuk e kishte pranuar.

“Jo unë, por Policia e Kosovës e ka pasur planin e detajuar për ndërhyrje, dhe Albin Kurti nuk e ka pranuar”, ka thënë ai.

“Unë ia kam kërkuar, por arsyetimi ka qenë pse unë po dua me hap tash telashe. Kjo qeveri me Serbinë, me veriun e të tjera, e të tjera – arsyetime bajate”, ka shtuar ai, duke theksuar se aksioni kishte qenë i ndarë në dy plane: për veriun dhe për lojërat e fatit në kufi.

“Të dy planet kanë qenë të përgatitura, të detajuara. Njëri është plani për veriun, tjetri është plani për lojërat e fatit… Të dyja ia kam kërkuar dhe Albin Kurti, në njëfarë forme, nuk e ka pranuar asnjërën”, ka deklaruar Veliu.

The post Veliu: Kurti e ka pas refuzuar kërkesën time për të dërguar policinë në veri appeared first on Telegrafi.

Analisti Visar Ymeri ka thënë se komunitetet në Kuvendin e Kosovës përfaqësohen përmes votës, ashtu sikurse edhe partitë e komunitetit shumicë, pra shqiptarët.

Ai në DebatPlus ka theksuar se rregulli është që partia më e madhe në Kuvend e propozon kandidatin për kryetar të Kuvendit.

Prandaj, Ymeri ka shtuar se duke qenë se tri partitë e para shqiptare janë më të mëdha, atëherë secilës prej tyre i takon pozita e nënkryetarit.

Sipas së njëjtës logjikë, Ymeri ka thënë se edhe partisë më të madhe serbe i takon pozita e nënkryetarit.

Andaj, sipas tij duke ia shpjeguar analistit Zebica ka thënë se propozimi i Nenad Rashiqit për nënkryetar të Kuvendit ishte një shkarje, të cilën do ta rrëzonte edhe Gjykata Kushtetuese.

The post Ymeri: Gjykata Kushtetuese do ta rrëzonte Rashiqin po të bëhej nënkryetar i Kuvendit appeared first on Telegrafi.

Kryetari i PDK-së, Memli Krasniqi, ka komentuar propozimin e Dimal Bashës për kryetar të Kuvendit nga radhët e Lëvizjes Vetëvendosje.

Krasniqi në emisionin ‘Rubikon’ të Klan Kosovës është shprehur i habitur se si Lëvizja Vetëvendosje ka përfunduar nga fryma e filozofit gjerman, Hegel, tek Dimal Basha, shkruan Insajderi.

“Ne besojmë që edhe brenda grupit të tyre mund të ketë një figurë që tek e fundit mundet me qenë në krye të atij kuvendi me më pak toksicitet, por ne ua votojmë këdo. Unë as sot s’e kam të qartë se si ka mbërrirë Lëvizja Vetëvendosje nga Hegeli te Dimali, por ky është problem moral i tyre“, deklaroi Krasniqi.

“Ndoshta tendenca ka qenë që ta nxjerrin një kandidat që ka qenë polarizues, që ka qenë jashtëzakonisht i zëshëm dhe pa i zgjedhë fjalët kundër PDK-së e të tjerëve. Gjithmonë i kemi zgjedhë në Kuvendin e Kosovës figura përfaqësuese. Filluan një lloj propagande, fushate linçuese qysh ne s’e majmë fjalën, por s’ishte kjo e vërteta. Mu në fakt më shqetëson fakti se ky lloj taktizimi nuk është i dobishëm për politikën, e më së paku prej qytetarët“, deklaroi më tej ai.

Krasniqi fajësoi Lëvizjen Vetëvendosje për bllokadën në Kuvend, përmes, siç u shpreh ai, kryeneçësisë së Kurtit që të jetë Albulena Haxhiu kandidatja për kryetare dhe insistimit për komision të fshehtë.

The post Krasniqi: Nuk e kam të qartë si LVV-ja nga Hegeli përfundoi tek Dimal Basha appeared first on Telegrafi.

Procesi i pranimit në BE për Malin e Zi, Serbinë, Shqipërinë, Maqedoninë e Veriut, Bosnjën dhe Hercegovinën dhe Kosovën nuk po përparon.

Ministri i Jashtëm gjerman Johann Wadephul dëshiron ta nxisë procesin e zgjerimit të BE me këto vende.

Ai beson se Kroacia ka një rol kyç për të luajtur në këtë drejtim.

“Tani duhet t’i japim një shtysë të re zgjerimit për Ukrainën, Moldavinë dhe shtetet e Ballkanit Perëndimor”, tha politikani i CDU-së gjatë një takimi me homologun e tij Gordan Grlic Radman në kryeqytetin kroat, Zagreb. “Shpresoj që Kroacia të luajë një rol aktiv dhe vendimtar si një shoqëruese”, shtoi ai.

Wadephul: Anëtarësimi në BE gjithmonë çështje gjeopolitike

Ndër vendet e Ballkanit Perëndimor, Mali i Zi konsiderohet më i përparuari në procesin e pranimit në BE, por nuk është caktuar ende një datë për pranimin e tij. BE ka zhvilluar negociata pranimi me Malin e Zi dhe Serbinë që nga viti 2012 dhe 2014. Negociatat me Shqipërinë dhe Maqedoninë e Veriut filluan në vitin 2022. Bosnja dhe Hercegovina ka statusin e kandidatit për pranim, por ende nuk ka filluar negociatat. Kosova është një kandidat potencial për pranim.

Anëtarësimi në BE nuk është një proces thjesht teknik, por edhe një çështje gjeopolitike, tha Wadephul.

“Fqinjët tanë nuk duhet t’ia lëmë autokratëve që kërkojnë të ushtrojnë ndikimin e tyre përmes dezinformimit dhe korrupsionit ose të na fusin në varësi të reja”, paralajmëroi ai, pa përmendur vende si Rusia dhe Kina. Krahas procesit të zgjerimit, BE duhet të reformohet nga brenda për të qenë në gjendje të përballet me sfidat gjeopolitike si një Bashkim i aftë dhe i konsoliduar demokratikisht.

Urë për Ballkanin Perëndimor

Kroacia është e domosdoshme për procesin e zgjerimit, tha Wadephul. “Ju i dini vështirësitë e procesit të pranimit nga përvoja juaj. Kjo ju bën një urë midis Ballkanit Perëndimor”.

Kroacia ka rol “thelbësor që Evropa të vazhdojë të rritet, jo vetëm në aspektin e anëtarësimit, por edhe në forcë, kohezion dhe ndikim”. Kroacia ishte vendi i fundit që iu bashkua Bashkimit Evropian, në mesin e vitit 2013, dheështë gjithashtu anëtare e NATO-s.

Ministri i Jashtëm kroat Radman deklaroi se vendi i tij po merrte pjesë aktive në procesin e negociatave të BE-së me vendet e Ballkanit Perëndimor.

“Ne nuk duam të shohim ndikim të palëve të treta mbi këto vende”, theksoi ai. Ballkani Perëndimor nuk duhet të mbetet “në një vakum gjeostrategjik”. Radmani shtoi: “Ballkani Perëndimorështë pjesë e Evropës; ata i përkasin gjeopolitikisht dhe gjeostrategjikisht BE.”/DW/

The post Ministri gjerman: Kosova është një kandidat potencial për pranim në BE appeared first on Telegrafi.

Policia e Kosovës ka parandaluar një rast të kontrabandës me kafshë të imëta në rajonin lindor të vendit, konkretisht në fshatin Domorovc, Komuna e Kamenicës.

Sipas njoftimit zyrtar, njësitë policore kufitare nga SPMK – Muqivërc (DRK Lindje), pas pranimit të informatave operative, kanë ndërmarrë veprime të shpejta taktike që kanë rezultuar me ndalimin e një automjeti me targa vendore. Automjeti po drejtohej nga një person i dyshuar, mashkull kosovar.

Gjatë kontrollit, në automjet janë gjetur 40 krerë kafshë të imëta (keca) me një vlerë të përafërt prej 6,000 euro, për të cilat i dyshuari nuk posedonte asnjë dokumentacion të nevojshëm ligjor.

Lidhur me rastin është njoftuar prokurori kujdestar, i cili ka urdhëruar inicimin e procedurës penale për kontrabandë. Ndërkohë, kafshët janë dorëzuar në Doganën e Kosovës për trajtim të mëtejshëm.

Policia e Kosovës ka ritheksuar përkushtimin e saj në luftimin e të gjitha formave të kontrabandës dhe ka falënderuar qytetarët për bashkëpunimin dhe informatat që ndihmojnë në parandalimin e veprimtarive të paligjshme.

The post ​Tentoi të kontrabandojë 40 keca, ndalohet nga Policia appeared first on Telegrafi.

I riu nga Ferizaj, Valdrin Haliti, është rikonfirmuar në listën zyrtare të gjigandit teknologjik Apple, për kontributin e tij në raportimin e problemeve të sigurisë në serverët e kompanisë.

Pas një periudhe të gjatë verifikimesh teknike dhe identifikimit të detajuar të çështjeve të raportuara, Apple ka njohur dhe vlerësuar punën e tij, duke e përfshirë emrin e Halitit për herë të dytë në faqen zyrtare të saj.

“Siguria kibernetike është pasion imi dhe vlerësimi zyrtar i Apple, për herë të dytë, është motiv i madh për mua t’i vazhdoj hulumtimet e mëtejshme me përkushtim,” tha Haliti.

Ai ka theksuar se ky sukses nuk është vetëm i tij personal, por një arritje që i takon të gjithë vendit, pasi si shtetas i Republikës së Kosovës është ranguar mes pak ekspertëve të shquar të teknologjisë në botë.

Haliti, i cili prej kohësh merret me hulumtime në fushën e sigurisë kibernetike, konsiderohet një ndër të rinjtë më premtues dhe një shembull frymëzimi për gjeneratat e reja që aspirojnë karrierë në teknologji.

The post Valdrin Haliti nga Ferizaj rikonfirmohet nga Apple për kontributin në sigurinë kibernetike appeared first on Telegrafi.