TIRANË, 6 gusht /ATSH/ – Rubrika “Ne, evropianët” na çoi këtë të martë, më 5 gusht, në Shqipëri apo El Doradon e re për pushuesit, sipas stacionit të njohur informativ francez, Franceinfo.

”Ky vend i ish-Bllokut Lindor ishte për një kohë të gjatë një nga regjimet më të mbyllura në Evropë. Tani po hapet për turizëm, me rezultate spektakolare.

Një rritje prej 80% e turistëve në pesë vjet.

Ujëra bruz dhe ishuj të shkretë. Kjo nuk është as Karaibet dhe as Maldivet, por Shqipëria, e vendosur midis Greqisë dhe Italisë, e cila tani është gjithashtu e njohur për turistë nga e gjithë bota.

Shqipëria, ku qytetërimet mesdhetare kanë pasuar njëra-tjetrën, secila duke lënë gjurmë sublime greke, romake, bizantine, veneciane dhe osmane.

Dhe kohët e fundit, përgjatë gjithë vijës bregdetare, bunkerë po aq të shëmtuar sa periudha në të cilën u ndërtuan.

Dhe gjithashtu në Tiranë, kryeqytet, një mbetje e një regjimi komunist paranojak që kishte frikë nga pushtimet.

Njëri prej tyre tani është shndërruar në një muze për turistët mosbesues.

“Ky bunker nuk u përdor kurrë për luftë, sepse nuk patëm kurrë luftë. Pas Luftës së Dytë Botërore, u përdor shumë për të marrë në pyetje njerëzit”, shpjegon Sokol Selami, një guidë në ”Bunk’Art”.

12 milionë turistë në vitin 2024

Kështu veproi regjimi i terrorit i Enver Hoxhës, i fundit i admiruesve të Stalinit. Për më shumë se 40 vjet, Shqipëria mbeti një nga vendet më të mbyllura në botë.

Në vitin 1991, regjimi ra.

Shqiptarët zbuluan lirinë.

Gati 35 vjet më vonë, ndërtesa ultramoderne po shfaqen në sheshin kryesor të Tiranës.

Toka e shqiponjave është hapur ndaj botës së jashtme. Dhe turistët po vërshojnë.

12 milionë u numëruan vitin e kaluar.

Ky është një efekt pas Covid-19 dhe medieve sociale që po e popullarizojnë destinacionin.

“Ne erdhëm të filmojmë Shqipërinë për të inkurajuar njerëzit të vizitojnë këtë vend, sepse në Poloni nuk është ende një destinacion kaq popullor”, thotë Adrianna Skon, një influencere polake.

Dhe profesionistët e turizmit kanë gjetur mënyrën se si ta shesin atë.

“Jam këtu me ftesë të një agjencie udhëtimesh polake që shet udhëtime në Shqipëri. Ne donim vetëm të kontrollonim nëse është vërtet mjaftueshëm interesante për ta rekomanduar, dhe që nga dita jonë e parë, menduam se ishte vërtet e shkëlqyer”, shpjegon gruaja e re në hyrje të videos së saj.

Këto video janë krijuar nga influencerë dhe marka, por edhe nga udhëtarë të zakonshëm.

Në mediat sociale, Shqipëria po shpërthen si destinacion.

“Ne pamë video në TikTok dhe pastaj bëmë disa kërkime dhe kjo na çoi këtu”, rrëfyen turistët.

Një tjetër avantazh për një audiencë shpesh shumë të re janë çmimet janë shumë të ulëta./  a.jor.

The post Franceinfo: Shqipëria, El Doradoja e re e turizmit evropian appeared first on Agjencia Telegrafike Shqiptare.

PARIS, 6 gusht /ATSH-ANSA/ – Të paktën 1 250 zjarrfikës dhe nëntë avionë ”Canadair” u mobilizuan për të luftuar flakët në rajonin Aude, në Francën jugperëndimore, i cili aktualisht është vendi i zjarrit më të fuqishëm në Francë që nga fillimi i verës, sipas gazetës ”Le Figaro”, që specifikon se afërsisht 10 000 hektarë tokë janë djegur plotësisht.

Autostrada A9 që lidh Francën dhe Spanjën dhe autostrada A61 janë mbyllur për trafik.

Sipas gazetës, zjarri ka plagosur shtatë zjarrfikës dhe dy civilë, njëri prej të cilëve është djegur rëndë, siç është raportuar më parë.

Dy helikopterë zjarrfikës dhe pesë avionë ”Dash” janë gjithashtu të mobilizuar.

Rreth 2 500 shtëpi janë pa energji elektrike, ndërsa dy kampe po evakuohen në zonën La Palme.

Ndërkohë, një zjarr i dytë është raportuar në komunën e Montagnac, në parkun Bessulles.

Sipas raportit në X të prefekturës, tetë ekipe reagimi ndaj emergjencave po punojnë në vendngjarje për të shuar flakët, së bashku me një helikopter zjarrfikës./  a.jor.

The post FRANCË – Zjarre të fuqishme përfshijnë jugperëndimin e vendit appeared first on Agjencia Telegrafike Shqiptare.

UASHINGTON, 6 gusht /ATSH-DPA/ – Sekretari i Shëndetësisë i SHBA-së, Robert F. Kennedy Jr., planifikon të shkurtojë rreth 500 milionë dollarë fonde për zhvillimin e disa vaksinave të mRNA-së, njoftoi të martën Departamenti i Shëndetësisë dhe Shërbimeve Njerëzore i SHBA-së.

“Të dhënat tregojnë se këto vaksina nuk arrijnë të mbrojnë në mënyrë efektive kundër infeksioneve të sipërme të frymëmarrjes si COVID dhe gripi”, tha Kennedy në një deklaratë.

“Ne po e zhvendosim këtë financim drejt platformave më të sigurta dhe më të gjera të vaksinave që mbeten efektive edhe kur viruset pësojnë mutacione”, shtoi ai, pa dhënë detaje.

Përdorimet e tjera të teknologjisë së mRNA-së nuk ndikohen nga vendimi.

Teknologjia, e cila bazohet në planet e proteinave të vetë trupit, fitoi rëndësi gjatë pandemisë Covid-19.

Kennedy është përballur me kritika për promovimin e skepticizmit ndaj vaksinave dhe për minimin e besimit të publikut në fushatat e imunizimit, veçanërisht kundër fruthit.

Më parë ai ka pohuar një lidhje midis vaksinave dhe autizmit, një teori që është diskredituar gjerësisht nga shkencëtarët.

Ky veprim vjen mes një padie të ngritur në korrik nga disa shoqata mjekësore amerikane kundër administratës Trump.

Padia kërkon të rivendosë rekomandimet për vaksinën kundër Covid-19 për gratë shtatzëna dhe fëmijët, të cilat u hoqën në maj nën drejtimin e Kennedyt./ a.jor.

The post FOKUS – SHBA shkurton 500 milionë dollarë fonde për vaksinat e mRNA-së për sistemin respirator appeared first on Agjencia Telegrafike Shqiptare.

TOKIO, 6 gusht /ATSH-AFP/ – Tetëdhjetë vite më parë, më 6 gusht 1945, një bombardues amerikan B-29 hodhi bombën e parë atomike në histori në Hiroshima, në Japoninë perëndimore.

Tre ditë më vonë, i njëjti makth u përsërit në Nagasaki, rreth 400 kilometra më tej, në jugperëndim të vendit.

Përkujtimet, me rreth 100 vende të përfaqësuara, po zhvillohen këtë javë në dy qytetet japoneze.

Këto dy bomba bërthamore janë të vetmet deri më sot që janë përdorur në kohë lufte.

Ato vranë 140 000 njerëz në Hiroshima dhe 74 000 në Nagasaki midis gushtit dhe fundit të vitit 1945.

– Një lëmsh i zjarrtë –

Gjëja e parë që shumë banorë të Hiroshimës vunë re në mëngjesin e 6 gushtit 1945, ishte një “lëmsh zjarri intensiv”, sipas fjalëve të Komitetit Ndërkombëtar të Kryqit të Kuq (KNKK).

“Djali i vogël” apo bomba atomike që shpërtheu rreth 600 metra mbi qytet, ishte 15 000 tonë TNT.

Ajo që u hodh në Nagasaki, me nofkën “Njeriu i shëndoshë”, ishte 21 000 tonë TNT.

Temperatura e arritur në epiqendrën e bombës në Hiroshima vlerësohet në 7 000°C.

Një furrë që shkaktoi djegie të rënda dhe shumë fatale brenda një rrezeje prej rreth tre kilometrash.

”Shpërthimi intensiv i shpërthimeve shkaktoi gjithashtu verbëri të përkohshme dhe dëmtime të pakthyeshme të syve”, sipas KNKK-së.

Rrezatimi termik që pasoi shpërthimet në një pjesë të sekondës shkaktoi zjarre të shumta që shkatërruan disa kilometra katrorë në Hiroshima dhe Nagasaki, ku shumica e ndërtesave atëherë ishin ndërtuar prej druri.

Djegiet dhe zjarret besohet se kanë shkaktuar më shumë se gjysmën e vdekjeve të menjëhershme në Hiroshima.

“Mbaj mend trupat e karbonizuar të fëmijëve të vegjël të shtrirë rreth hipoqendrës si shkëmbinj të zinj”, tha Koichi Wada, atëherë 18 vjeç dhe i pranishëm në Nagasaki.

– Shpërthimi dhe rrezatimi –

Shumë njerëz u vranë ose u plagosën rëndë nga mbeturinat fluturuese, të tjerë nga shembja e ndërtesave ose nga hedhja në ajër.

Shpërthimet atomike lëshuan gjithashtu rrezatim të dëmshëm në afat të shkurtër dhe të gjatë, pasi sëmundja nga rrezatimi preku shumë njerëz që i mbijetuan shkatërrimit të menjëhershëm në Hiroshima dhe Nagasaki.

Sëmundja akute nga rrezatimi, të vjella, dhimbje koke, diarre, hemorragji dhe rënie flokësh, mund të çonte në vdekje brenda javësh ose muajsh.

Dhe “hibakusha” (të mbijetuarit e bombave në japonisht) ishin të ekspozuar për pjesën tjetër të jetës së tyre ndaj një rreziku në rritje për të zhvilluar kancere të caktuara.

Nga afërsisht 50 000 njerëz të rrezatuar në dy qytetet e monitoruara nga Fondacioni Amerikano-Japonez i Kërkimit të Efekteve të Rrezatimit (RERF), rreth 100 vdiqën nga leuçemia dhe 850 prej tyre nga kanceret e lidhura me rrezatimin.

– Pasojat –

Hiroshima dhe Nagasaki i dhanë goditjen përfundimtare Japonisë, e cila u dorëzua më 15 gusht 1945, duke i dhënë fund kështu Luftës së Dytë Botërore.

Por, historianët vazhdojnë të debatojnë nëse ky sulm i dyfishtë bërthamor shpëtoi në të vërtetë më shumë jetë duke përshpejtuar përfundimin e konfliktit.

Vuajtja fizike dhe psikologjike e shumë hibakushave zgjati gjithë jetën e tyre.

Shumë prej tyre i fshehën vuajtjet e tyre për një kohë të gjatë dhe vuajtën nga diskriminimi, veçanërisht në martesë.

Për dekada të tëra, shumë japonezë besonin gabimisht se “sëmundja nga rrezatimi” ishte e trashëgueshme, madje ngjitëse, dhe kështu shmangnin shoqërimin me hibakushat.

Në periudhën e pasluftës, qeveria japoneze krijoi statusin e “viktimës zyrtare” të bombave atomike, duke dhënë trajtim falas.

Por, kjo e drejtë u dha në kushte kufizuese, duke përjashtuar mijëra viktima.

Hibakushat janë bërë aktivistë të zjarrtë për kauza pacifiste dhe antibërthamore, duke udhëtuar nëpër botë për të dëshmuar.

Nihon Hidankyo, një lëvizje që bashkon të mbijetuarit e rrezatuar, e cila i nxit shtetet të veprojnë për të eliminuar armët bërthamore, u vlerësua me Çmimin Nobel për Paqen për vitin 2024.

Në vitin 2019, papa Françesku vizitoi Hiroshimën dhe Nagasaki për të përsëritur “jo”-në e tij ndaj armëve bërthamore.

Në vitin 2016, Barack Obama u bë presidenti i parë në detyrë i SHBA-së që vizitoi Hiroshimën.

Edhe ai mbështeti një botë pa armë bërthamore, por nuk kërkoi falje në emër të Shteteve të Bashkuara për tragjedinë japoneze të gushtit 1945.

Rusia, nga ana e saj, është një nga afërsisht 100 vendet që pritet të marrin pjesë në përkujtimin e këtij viti në Nagasaki.

Kjo është hera e parë që Moska është ftuar në përkujtime në qytet që nga fillimi i luftës me Ukrainën në shkurt 2022./  a.jor.

The post KOMENT – 80 vite më parë Hiroshima dhe Nagasaki përjetuan ferrin bërthamor appeared first on Agjencia Telegrafike Shqiptare.

HIROSHIMA (Japoni) – 80-vjetori i lëshimit të bombës atomike në Hiroshima.

RUSI – Vizitë e pritur nga i dërguari amerikan, Steve Witkoff.

VARSHAVË (Poloni) – Presidenti i zgjedhur nacionalist Karol Nawrocki bëhet zyrtarisht kreu i shtetit.

MOSKË (Rusi) – Presidenti Vladimir Putin takohet me mbretin Ibrahim të Malajzisë.

LONDËR (Mbretëria e Bashkuar) – Pamje paraprake e rekuizitave të filmave që do të dalin në ankand, përfshirë shpatën e dritës së Darth Vader, kamzhikun dhe rripin e Indiana Jones.

OKB – Mbledhje e Këshillit të Sigurimit të OKB-së mbi Armët e Shkatërrimit në Masë.

LOS ANXHELES (Shtetet e Bashkuara) – Seancë dëgjimore para gjyqit për “Mbretëreshën e Ketaminës” dhe mjekun e akuzuar për vdekjen e Matthew Perry.

LA PAZ (Bolivi) – Bolivia feston 200-vjetorin e krijimit./ a.jor.

The post AXHENDA NDËRKOMBËTARE 06/8/2025 appeared first on Agjencia Telegrafike Shqiptare.

TIRANË, 5 gusht /ATSH/ – Në një artikull për të përditshmen ”Metro”, gazetarja britanike Martina Andretta përshkruan një udhëtim në Tiranë, ku për vetëm 61 paund në ditë shijon një qytet të gjallë, me histori interesante, ushqim të shijshëm dhe jetë nate të larmishme.

”Tirana po zhvillohet me ritme të shpejta dhe ofron shumë për turistët, nga muzetë e periudhës komuniste te arkitektura moderne. Udhëtimi është i lirë, ushqimi cilësor dhe akomodimi i përballueshëm.

Një murale gjigante e një vajze të pikturuar me ngjyra toke, një bllok apartamentesh me vija të ndritshme apo një rrokaqiell i ri në formën e një koke.

Duke udhëtuar nëpër Tiranë, nuk mund të mos ngresh kokën. Shoferi im i taksisë, Erioni përkulet mbi timon dhe tregon ndërtesat përreth nesh.

“Kjo është e re, ajo tjetra është shumë e njohur për turistët, edhe kjo është e re”, thotë ai.

Një aromë joshëse përhapet nga një tezgë pranë xhamit të makinës. Një shitës po hap ballokume të freskëta, një ëmbëlsirë tradicionale, dhe kulaç. Në një cep, burrat po luajnë domino mbi një tavolinë të improvizuar.

Tirana ndihet e gjallë. Kryeqyteti shqiptar, me pothuajse 600 000 banorë, është pak a shumë sa madhësia e lagjes londineze ”Brent”, por ajo ka plane ambicioze.

Dhe me historinë e saj të larmishme, klimën mesdhetare dhe kuzhinën e shijshme, është një zgjedhje e nënvlerësuar për një pushim të përballueshëm në qytet.

Gjëra për të bërë në Tiranë

Është e pamundur të vizitosh Tiranën pa u takuar me kujtimet e së kaluarës së saj komuniste. Jo shumë larg sheshit ”Skënderbej”, i njohur si zemra e qytetit, ndodhet një bunker nëntokësor i Luftës së Ftohtë.

”Bunk’Art 2” dhe ”Bunk’Art 1”, i vendosur më larg – janë muze që i japin jetë paranojës së Enver Hoxhës.

Udhëheqësi komunist i Shqipërisë ishte aq i fiksuar pas pushtimit të huaj saqë vlerësohet se urdhëroi krijimin e më shumë se 170 000 bunkerëve – duke e bërë Shqipërinë vendin me më shumë bunkerë në botë.

Pas rënies së komunizmit në fillim të viteve ’90, Tirana përbëhej kryesisht nga ndërtesa gri të stilit sovjetik.

Në filli të viteve 2000, Edi Rama – kryetari i atëhershëm i bashkisë dhe tani kryeministër – nisi një iniciativë për të injektuar ngjyra në kryeqytet.

Si rezultat, ka murale kudo që kthen kokën, nga cepat e banesave deri te stolat e parkut. Nëse planifikoni të qëndroni vetëm disa ditë, merrni në konsideratë t’i bashkoheni një turi arti rrugor që do t’ju çojë në vende të fshehura që ia vlejnë.

Atraksione të tjera që ia vlen të vizitohen përfshijnë Xhaminë e Et’hem Beut – një monument i bukur kulturor që i shpëtoi shkatërrimit gjatë epokës komuniste – dhe malin e Dajtit, i cili mund të arrihet me teleferik.

Diçka që më habiti për Shqipërinë ishte ushqimi i saj eklektik dhe i shijshëm. Është një përzierje shijesh mesdhetare dhe ballkanike, me pjata të shijshme me mish dhe ushqime të shijshme vegjetariane.

Shijova ndoshta shumë byrek si dhe salca me bazë kosi dhe dollma.

Një nga vaktet e mia të preferuara ishte te Piceri Era Blloku, ku shërbehen qofte të shijshme shqiptare me një salcë kremoze me nardem kumbulle, një reçel tradicional.

Sigurisht, nuk mund të mos e vija në provë jetën e natës shqiptare.

Shkoni në Radio Bar Tirana për disa kokteje vërtet të lira me atmosferë retro.

Nëse po kërkoni diçka më luksoze, bari rrotullues 360° në Sky Club ofron një pamje të jashtëzakonshme dhe një atmosferë romantike. U ula atje për dy orë, duke pritur që dielli të perëndonte dhe të lyente horizontin të kuq duke pirë martini.

Megjithatë, i preferuari im ishte Bar Komiteti.

Vendi e quan veten një “kafe-muze” dhe është i dekoruar me objekte nga periudha komuniste. Në mure ka peceta të punuara me dorë, makina qepëse të përdorura dhe kostume tradicionale. Pas vizitës sonë të parë, kur pimë disa kokteje klasike, u kthyem përsëri, këtë herë të vendosur të provonim raki.

Ekipi pas barit na priti me një buzëqeshje, duke bërtitur nga larg “u kthyet përsëri?!”.

Për shkak të disa vështirësive gjuhësore, vendosëm t’i besonim plotësisht kamerierit tonë për të zgjedhur një përzgjedhje pijesh me raki bazuar në opsionet “pikante, të ëmbla ose të tharta”.

Nuk u zhgënjyem kur morëm një infuzion freskues me bazë manaferrash dhe me shoqërimin perfekt të muzikës live në sfond.

Një qytet që ndryshon me shpejtësi

“Kudo në Shqipëri ka një kantier ndërtimi aktiv”, më thotë Arber Musabelliu, një guidë lokale nga Free Walking Tour Tirana.

Kur e vizitoi vitin e kaluar, Alice Murphy e ”Metro” vuri re gjithashtu se disa zona të vendit ishin të mbingarkuara dhe të mbipopulluara.

Përpara se të bëhej kryeqyteti i Shqipërisë në vitin 1920, Tirana ishte një qytet relativisht i vogël, në një pozicion strategjik në qendër të vendit.

Tani, pak më shumë se 100 vjet më vonë, është një qytet modern evropian me plane të guximshme zhvillimi.

Një masterplan – i njohur si Tirana 2030 – synon ta transformojë kryeqytetin në një qendër urbane më të gjelbër, më të qëndrueshme dhe teknologjike.

I udhëhequr nga arkitekti italian Stefano Boeri, vizioni përfshin ndërtesa të çuditshme.

Disa nga ato që janë ngritur tashmë përfshijnë një hartë të pikselizuar të vendit, një rrokaqiell që duket se është frymëzuar nga një set Jenga dhe një bllok patriotik apartamentesh luksoze në formën e heroit kombëtar të Shqipërisë.

Dhe, për shkak se Tirana përbëhet kryesisht nga ndërtesa të ulëta të epokës komuniste, efekti është çorientues.

Arkitektura zakonisht nuk është gjëja ime, por në Tiranë, u fiksova.

Duke parë horizontin e qytetit, me malin Dajti në sfond, sytë e mi u magjepsën nga këto shtylla monumentale, që ngriheshin mbi peizazhin.

Ku të qëndroni në Tiranë

Krahasuar me kryeqytetet e tjera evropiane, Tirana është e vogël dhe e lehtë për t’u eksploruar në këmbë. Autobusët në qendër janë gjithashtu shumë të shpeshtë.

Për një pushim fundjave, qëndroni pranë Bllokut të gjallë ose sheshit ”Skënderbej” për të qenë afër atraksioneve kryesore dhe jetës së natës.

Qyteti ka shumë mundësi të përballueshme kur bëhet fjalë për akomodimin.

Meqenëse po udhëtoja me tre miq, zgjodhëm diçka me hapësira të përbashkëta. Për ne, shfrytëzimi maksimal i kohës sonë së bashku – qoftë duke vizituar një muze apo thjesht duke pushuar në divan pas një dite shëtitjeje – ishte gjëja më e rëndësishme.

Zgjodhëm një Airbnb me dy dhoma gjumi dhe dy banjo me një vlerësim 4,98 për 220 paund në total.

I vendosur pranë Bllokut, ishte vetëm katër minuta në këmbë nga rruga kryesore, që do të thoshte se mund të ktheheshim lehtësisht në shtëpi pas darkës dhe pijeve në një nga baret në modë të lagjes.

Apartamenti u certifikua si i Preferuari i Mysafirëve, që do të thotë se lista u vlerësua shumë nga mysafirët e mëparshëm.

Eltoni, pritësi ynë, ishte jashtëzakonisht i përgjegjshëm dhe u sigurua që të ndiheshim si në shtëpi./  a.jor.

The post ”Metro”: Tirana, qyteti me histori interesante, ushqim të shijshëm dhe jetë nate të larmishme appeared first on Agjencia Telegrafike Shqiptare.

NJU JORK, 5 gusht /ATSH/ – Pas dekadash mosveprimi dhe negociatash të ngrira, çështja e një shteti të pavarur palestinez që jeton në paqe me Izraelin u rikthye në qendër të vëmendjes në një konferencë të nivelit të lartë të OKB-së, ndërkohë që Franca dhe Arabia Saudite, të cilat udhëhoqën përpjekjet, janë të vendosura të ruajnë vrullin, sipas AP.

Por, pengesat për një zgjidhje me dy shtete që do ta shihte Izraelin të jetonte krah për krah me një Palestinë të pavarur janë shumë të larta.

Lufta në Gaza, pjesë thelbësore e një shteti palestinez, vazhdon me dhunë në rritje në Bregun Perëndimor. Kryeministri i Izraelit, Benjamin Netanyahu dhe qeveria e tij e krahut të djathtë kundërshtojnë me forcë një shtet të pavarur palestinez, të cilin udhëheqësi izraelit thotë se do të ishte një shpërblim për terrorizmin, pas sulmeve të Hamasit më 7 tetor 2023 kundër vendit të tij.

Megjithatë, pas tetë dekadash konflikti midis Izraelit dhe palestinezëve, presioni po rritet për një zgjidhje me dy shtete, siç demonstroi konferenca e nivelit të lartë të OKB-së javën e kaluar, e bashkëkryesuar nga Franca dhe Arabia Saudite, edhe pse u bojkotua nga Izraeli dhe aleati i tij i ngushtë, SHBA.

Konferenca ilustroi se shumë veta besojnë se një zgjidhje politike është e mundur.

Ambasadori francez në OKB, Jerome Bonnafont, pranoi në një intervistë për ”Associated Press” se pa një armëpushim në Gaza dhe ndihmë humanitare masive për mbi dy milionë palestinezë që po shkojnë drejt urisë, “do të jetë jashtëzakonisht e vështirë të ecet përpara për të përcaktuar një mënyrë të re të administrimit të Gazës si pjesë e Palestinës”.

Por, konferenca tregoi se shumica e 193 vendeve anëtare të OKB-së janë “të bindura se ekziston mundësia e një zgjidhjeje politike”, tha ai, dhe kjo është “ajo që ndjekja e saj do të vazhdojë të promovojë”.

Nga 160 vende që morën pjesë, 125 folën në mbështetje të një zgjidhjeje me dy shtete.

Një shtet i pavarur i Palestinës njihet nga mbi 145 vende dhe nga takimi dolën premtime të reja njohjeje nga tre nga shtatë anëtarët e G7-s, Franca, Mbretëria e Bashkuar dhe Kanadaja.

Një deklaratë nga shtatë vende të tjera, përfshirë Australinë, Zelandën e Re, Finlandën dhe Portugalinë, shprehu “konsideratë pozitive” për të ndjekur shembullin.

Ministri i Jashtëm francez Jean-Noel Barrot dhe ministri i Jashtëm saudit Princi Faisal bin Farham janë të vendosur të mos e lënë vëmendjen të zbehet.

Ata po planifikojnë “një ngjarje” gjatë takimit vjetor të liderëve botërorë në Asamblenë e Përgjithshme, e cila fillon më 23 shtator, kur premtimet e reja pritet të shpallen zyrtarisht.

Konferenca prodhoi edhe të ashtuquajturën “Deklarata e Nju Jorkut” me shtatë faqe.

Ministrat e Jashtëm francezë dhe sauditë ia dërguan deklaratën, me një aneks të gjatë rekomandimesh nga grupet e punës, të 193 anëtarëve të OKB-së dhe u kërkuan atyre ta miratonin atë deri në fillim të shtatorit, para mbledhjes së liderëve botërorë.

Deklarata, e cila u miratua gjithashtu nga Bashkimi Evropian dhe Liga Arabe, i kërkon Izraelit të angazhohet për një shtet palestinez dhe kërkon njohje të mëtejshme si “një komponent thelbësor dhe i domosdoshëm i arritjes së zgjidhjes me dy shtete”.

Për herë të parë, 22 vendet anëtare të Ligës Arabe dënuan “sulmet e kryera nga Hamasi kundër civilëve” në Izraelin jugor më 7 tetor dhe ranë dakord që “Hamasi duhet t’i japë fund sundimit të tij në Gaza dhe t’ia dorëzojë armët e tij Autoritetit Palestinez”.

Takimi u dha shteteve me peshë, përfshirë Francën, BM dhe Kanadanë, mundësinë “për të sinjalizuar pakënaqësinë e tyre me politikën izraelite./  a.jor.

The post KOMENT – Parisi dhe Riadi mbajnë premtimin për zgjidhjen me dy shtete të konfliktit Izrael-Palestinë appeared first on Agjencia Telegrafike Shqiptare.

GJENEVË (Zvicër) – Sesion shtesë i negociatave ndërkombëtare për të krijuar një traktat kundër ndotjes plastike.

KUALA LUMPUR (Malajzi) – Takim i komitetit kufitar tajlandezo-kamboxhian.

TAJPEI (Tajvan) – Forumi Ketagalan mbi Sigurinë në Rajonin Indo-Paqësor

LITTLE RUN OF KUTCH (Indi) – 60-vjetori i Luftës së Dytë Indiano-Pakistaneze në Kashmir.

ZAGREB – Kroacia feston 30-vjetorin e përfundimit të Luftës për Pavarësi.

DRESDEN (Gjermani) – Hapja e gjyqit për spiunazh ndaj një bashkëpunëtori kinez të eurodeputetit gjerman të ekstremit të djathtë, Maximilian Krah.

OKB – Mbledhje e Këshillit të Sigurimit të OKB-së mbi situatën e pengjeve në Gaza.

PANAMA (Panama) – Administratori i Kanalit të Panamasë, Ricaurte Vasquez flet mbi të ardhmen e rrugës ujore ndëroqeanike./ a.jor.

The post AXHENDA NDËRKOMBËTARE 05/8/2025 appeared first on Agjencia Telegrafike Shqiptare.

TEL AVIV, 4 gusht /ATSH-DPA/ – Kryeministri izraelit, Benjamin Netanyahu deklaroi se grupi militant palestinez Hamas nuk ka interes të arrijë asnjë marrëveshje armëpushimi ose të lirojë pengjet e mbetura në Gaza.

“E kuptoj saktësisht se çfarë dëshiron Hamasi. Nuk dëshiron asnjë marrëveshje”, tha Netanyahu në një mesazh video, sipas një përkthimi në anglisht nga ”The Times of Israel”.

Ai shtoi se videot e fundit të publikuara nga Hamasi vetëm sa e kishin forcuar vendosmërinë e tij për të mposhtur grupin dhe për të sjellë pengjet në shtëpi.

Vërejtjet e Netanyahut u pritën me kritika të ashpra nga Forumi i Familjeve të Pengjeve dhe të Zhdukurve, i cili përfaqëson shumicën e familjeve të 50 pengjeve që besohet se janë ende në Gaza.

“Për 22 muaj tani publikut i është shitur iluzioni se presioni ushtarak dhe luftimet intensive do t’i kthejnë pengjet”, tha grupi në një deklaratë.

Ditët e fundit, Hamasi ka publikuar video që tregojnë dy nga pengjet në një gjendje të kequshqyerjes akute.

Imazhet kanë tronditur publikun izraelit dhe shumë njerëz në mbarë botën gjatë fundjavës, me udhëheqës, përfshirë kancelarin gjerman Friedrich Merz dhe Emmanuel Macron të Francës, që shprehën tronditjen e tyre.

Në Izrael, dyshohet se Hamasi qëllimisht i solli pengjet në prag të urisë në mënyrë që të ushtrojë presion mbi qeverinë e Netanyahut.

“Hamas kërkon të na thyejnë – me këto video tmerruese dhe me propagandën e rreme të tmerrit që përhap në të gjithë botën”, tha Netanyahu.

“Por, ne nuk do të thyhemi”, theksoi ai./ a.jor.

The post TEL AVIV – Netanyahu: Hamasi nuk dëshiron asnjë marrëveshje appeared first on Agjencia Telegrafike Shqiptare.

GJENEVË (Zvicër) – Tubim i Greenpeace për një të ardhme pa plastikë përpara negociatave të Traktatit të Plastikës në Gjenevë.

NJU DELHI (India) – Presidenti filipinas Ferdinand Marcos në një vizitë shtetërore në Indi.

SINGAPOR (Singapor) – Konferencë për shtyp nga agjencia përgjegjëse për trajtimin e tarifave amerikane.

MOSKË (Rusi) – Fillon gjyqi për sulmin në bashkinë e Crocus pranë Moskës, i cili vrau 149 persona.

OKB – Takim me dyer të mbyllura i Këshillit të Sigurimit të OKB-së për Sudanin.

BEJRUT (Liban) – Përvjetori i pestë i shpërthimit vdekjeprurës në portin e Bejrutit.

EGJIPT – Zgjedhje senatoriale./ a.jor.

The post AXHENDA NDËRKOMBËTARE 04/8/2025 appeared first on Agjencia Telegrafike Shqiptare.

ROMË (Itali) – Papa Leone XIV kremton një meshë në Tor Vergata të Romës si pjesë e Jubileut të Rinisë.

VILNIUS (Lituani) – Turneu i presidentit izraelit, Isaac Herzog në vendet baltike.

DUSZNIKI ZDROJ (Poloni) – Festivali i 80-të Ndërkombëtar i Shopenit në qytetin e vogël polak Duszniki Zdroj.

ATLANTA (Shtetet e Bashkuara) – Futboll – Ndeshje miqësore parasezonale – Manchester United – Everton./ a.jor.

The post AXHENDA NDËRKOMBËTARE 03/8/2025 appeared first on Agjencia Telegrafike Shqiptare.

BERLIN, 2 gusht /ATSH-DPA/ – Qeveria gjermane vëren një përparim të vogël fillestar në ndihmën humanitare për popullsinë në Rripin e Gazës, sipas zëdhënësit Stefan Kornelius edhe pse, sipas tij, kjo mbetet e pamjaftueshme për të lehtësuar emergjencën.

Komentet e Kornelius u bënë, ndërsa ministri i Jashtëm, Johann Wadephul informoi kabinetin e sigurisë në mbyllje të vizitës së tij në Izrael dhe Bregun Perëndimor.

“Izraeli mbetet i detyruar të sigurojë furnizim gjithëpërfshirës edhe me mbështetjen e Kombeve të Bashkuara dhe organizatave të tjera humanitare”, tha Kornelius.

“Në të njëjtën kohë, qeveria gjermane është e shqetësuar për informacionin që tregon se sasi të mëdha të furnizimeve me ndihmë po mbahen nga Hamasi dhe organizatat kriminale”, theksoi ai.

Sipas burimeve gjermane të sigurisë, midis gjysmës dhe të gjitha furnizimeve me ndihmë që arrijnë në Rripin e Gazës po devijohen nga grupi islamik palestinez Hamas ose organizata të tjera kriminale.

”Rripi i Gazës po përballet me kërcënimin e urisë”, tha OKB.

Izraeli kontrollon të gjitha pikat e hyrjes në zonë dhe për disa muaj, nuk lejoi asnjë ose vetëm dërgesa minimale ndihmash të kalonin nëpër të, në një përpjekje për të rritur presionin mbi Hamasin.

Por, Izraeli lejoi dërgesa më të mëdha ndihmash nëpërmjet rrugëve tokësore dhe gjithashtu lejoi dërgesa nga ajri që nga java e kaluar dhe 220 kamionë kanë sjellë furnizime me ndihma në zonë çdo ditë.

Aktualisht, dy nga tre tubacionet kryesore të ujit në Rripin e Gazës janë në funksion, si dhe një nga 10 linjat e transmetimit të energjisë.

Por, çmimi i miellit është në një shifër të pabesueshme prej 80 eurosh (92 dollarë) për kilogram./  a.jor.

The post FOKUS – Gjermania: Izraeli duhet të sigurojë furnizime për Gazën appeared first on Agjencia Telegrafike Shqiptare.

VATIKAN, 2 gusht /ATSH-DPA/ – Papa Leone XIV po kalon një fundjavë të ngjeshur me Jubileun e Rinisë, ndërsa Kisha Katolike feston vitin e saj Jubile.

“Më shumë se gjysmë milioni, thonë ata, ndoshta edhe një milion të rinj kanë ardhur nga shumë vende të botës”, tha sot papa.

“Për mua, është një privilegj, një bekim”, shtoi ai.

Kisha Katolike po feston një Jubile në vitin 2025, siç bën çdo 25 vjet, duke tërhequr edhe më shumë pelegrinë dhe turistë në Romë sesa zakonisht.

Në Tor Vergata, një kompleks sportiv në pjesën lindore të Romës, besimtarë të rinj nga 146 vende iu bashkuan një eventi të madh në ajër të hapur me muzikë dhe lutje.

Pika kulmore e programit është vigjilja e mbrëmjes, një seancë lutjeje mbrëmjeje me papën.

Shumë pjesëmarrës planifikojnë të kalojnë natën nën yje.

Takimi i të rinjve konsiderohet si një ngjarje qendrore në Vitin Jubile, me qindra mijëra të rinj që mblidhen në Romë që nga e marta.

Në meshën e hapjes, Leone i befasoi afërsisht 120 000 pjesëmarrësit në sheshin e Shën Pjetrit me një turne në makinën papale.

Në një fjalim të shkurtër, ai i nxiti ata të jenë simbole të shpresës dhe paqes./ /os/

The post VATIKAN – Papa Leone XIV feston Jubileun me qindra mijëra besimtarë të rinj appeared first on Agjencia Telegrafike Shqiptare.

TEL AVIV, 2 gusht /ATSH-DPA/ – I dërguari special i SHBA-së, Steve Witkoff, u takua sot në Tel Aviv me të afërmit e pengjeve të mbajtura në Rripin e Gazës dhe u tha atyre se Shtetet e Bashkuara do t’i sjellin të dashurit e tyre në shtëpi dhe do të sigurohen që Hamasi të mbahet përgjegjës.

“Ne do t’i kthejmë fëmijët tuaj në shtëpi dhe do ta mbajmë Hamasin përgjegjës për çdo akt të keq nga ana e tyre. Ne do të bëjmë atë që është e drejtë për popullin e Gazës”, u tha Witkoff familjeve, sipas një deklarate.

“Ne e dimë kush është gjallë dhe dikush do të jetë fajtor nëse nuk del i gjallë. SHBA-ja qëndron pas kësaj deklarate”, shtoi ai.

I dërguari i Trump gjithashtu ngriti shpresat se fundi i luftës është afër.

“Ne kemi një plan për t’i dhënë fund luftës dhe për t’i sjellë të gjithë në shtëpi”, theksoi ai./  a.jor.

The post TEL AVIV – Witkoff: SHBA-ja planifikon t’i japë fund luftës dhe të kthejë pengjet appeared first on Agjencia Telegrafike Shqiptare.

NJU JORK, 2 gusht /ATSH/ – Më të mirat e videove me mace në internet do të shfaqen në ekranin e madh këtë fundjavë, sipac abcnews.go.com.

”Cat Video Fest” është një përzgjedhje 73-minutëshe me vlerësim maksimal të të gjitha gjërave që kanë të bëjnë me macet – qesharake, të përkëdhelura, sentimentale dhe komike.

Ky ”film” do të shfaqet në më shumë se 500 kinema në SHBA dhe Kanada.

Një pjesë e të ardhurave nga biletat shkojnë në dobi të organizatave bamirëse, strehimoreve dhe organizatave të mirëqenies së kafshëve të fokusuara te macet.

Që nga viti 2019, janë mbledhur mbi një milion dollarë.

Videot janë kuruar nga Will Braden, krijuesi i filmave të shkurtër komikë ekzistencialë, Henri, le Chat Noir, me bazë në Seattle.

”Dua të tregoj se sa e gjerë mund të jetë ideja e një videoje me mace, kështu që ka gjëra të animuara, video muzikore dhe dokumentarë të vegjël”, tha Braden.

”Nuk është thjesht ajo që unë e quaj ‘vVideot më qesharake të maceve shtëpiake në Amerikë’. Nuk janë të gjitha macet që bien në vaskë. Kjo do të ishte shumë e mërzitshme”, shtoi ai.

Tani në vitin e tij të tetë, ”Cat Video Fest” është më i madh se kurrë, me një prani globale që është zgjeruar tashmë në Mbretërinë e Bashkuar dhe Danimarkë, dhe, për herë të parë, në Francë, Spanjë, Japoni dhe Brazil.

Fillimisht ishte një proces paksa i vështirë për të bindur kinematë e pavarura të programonin ”Cat Video Fest”.

Por, Braden dhe distributori ”Oscilloscope Laboratories” kanë zbuluar se një vit është i mjaftueshëm për ta kaluar atë pengesë.

Partnerët aktualë teatralë përfshijnë ”Alamo Drafthouse”, ”IFC Center”, ”Nitehawk”, ”Vidiots”, ”Laemmle” dhe ”Music Box”.

Shfaqjet tërheqin audiencë të larmishme, nga fëmijët te gjyshërit dhe të gjithë ata që janë midis tyre.

“Është një nga gjërat e vetme, ndoshta përveç një filmi Pixar ose koncertit të Taylor Swift, që u pëlqen të gjithëve”, tha Braden.

“Nuk do të na mbarojnë videot me mace dhe nuk do të na mbarojnë njerëzit që duan t’i shohin”, theksoi ai./  a.jor.

The post SOFT NEWS – Macet ”aktore” në një ”shfaqje” kinematografike 73-minutëshe appeared first on Agjencia Telegrafike Shqiptare.

WACKEN (Gjermani), 2 gusht /ATSH-DPA/ – Organizatorët e festivalit të muzikës heavy metal ”Wacken Open Air”, në Gjermaninë veriore nderuan legjendën e ndjerë të rokut Ozzy Osbourne me një shfaqje me dron mbi skenën kryesore.

Në orët e para të mëngjesit të sotëm, fjalia “Ozzy, ne të duam” ndriçoi qiellin e natës pas performancës së fundit të ditës.

Homazhi u shoqërua nga kënga e Osbourne “Mama, I’m Coming Home”, e ndjekur nga himni i Black Sabbath “Paranoid”.

Në të njëjtën kohë, imazhet e Osbourne u shfaqën në ekranet gjigante të festivalit.

Këngëtari ikonik britanik dhe ylli i reality show-t vdiq më 22 korrik në moshën 76 vjeç.

Si bashkëthemelues dhe vokalist i ”Black Sabbath”, Osbourne u vlerësua gjerësisht për ndihmën në përcaktimin e zhanrit heavy metal.

”Black Sabbath” u formua në Birmingham në fund të viteve 1960.

Vetëm disa javë para vdekjes së tij, Osbourne, i cili kishte luftuar me sëmundjen e Parkinsonit vitet e fundit, dha një koncert lamtumire në qytetin e tij të lindjes.

”Wacken Open Air”, i cili zhvillohet në një fshat me vetëm 2 000 banorë, konsiderohet si një nga festivalet më të mëdha të heavy metal në botë./  a.jor.

The post MUZIKË – Festivali gjerman i heavy metal i bën homazh Ozzy Osbourne appeared first on Agjencia Telegrafike Shqiptare.

RIO DE ZHANEIRO, 2 gusht /ATSH-DPA/ – Ish-presidenti kolumbian, Alvaro Uribe është dënuar me 12 vjet arrest shtëpiak për manipulim të dëshmitarëve dhe mashtrim procedural.

Dënimi, i dhënë në shkallën e parë, përfshin gjithashtu një gjobë dhe një ndalim shumëvjeçar për të mbajtur poste politike, raportuan disa medie kolumbiane duke cituar gjyqtaren kryesuese, Sandra Heredia.

Ekipi i tij ligjor ka njoftuar planet për të apeluar vendimin, që do të thotë se vendimi nuk është ende përfundimtar.

Megjithatë, gjykata urdhëroi që Uribe të fillojë të vuajë dënimin e tij menjëherë në pronën e tij rurale, duke përmendur baza procedurale dhe detyrime ligjore.

Nëse gjykata e apelit nuk jep një vendim deri në mesin e tetorit, çështja rrezikon të parashkruhet sipas ligjit kolumbian.

Ish-presidenti u shpall fajtor për dy nga tre akuzat.

Një akuzë e veçantë për ryshfet u rrëzua.

Çështja buron nga procedurat që vetë Uribe nisi më shumë se një dekadë më parë kundër senatorit të krahut të majtë Iván Cepeda, i cili kishte hetuar lidhjet e dyshuara të Uribes me grupet paraushtarake.

Situata ndryshoi në vitin 2018 kur vetë Uribe u akuzua se kishte ushtruar presion ndaj ish-të burgosurve paraushtarakë për të dhënë dëshmi shfajësuese për të.

Procedurat u vonuan vazhdimisht dhe vetëm në vitin 2024 u ngritën akuza kundër tij.

Uribe, një konservator që shërbeu si president nga viti 2002 deri në vitin 2010, mbetet një figurë përçarëse në Kolumbi.

Mbështetësit e shohin atë si një mbrojtës të vendosur të sigurisë kombëtare gjatë një periudhe konflikti të fortë me grupet guerile të krahut të majtë.

Kritikët, megjithatë, e akuzojnë atë për shkelje të të drejtave të njeriut dhe për mbajtjen e lidhjeve të ngushta me forcat paraushtarake.

Konflikti i brendshëm dekadash i Kolumbisë midis forcave qeveritare, gueriljeve dhe paraushtarakëve të krahut të djathtë ka lënë rreth 220 000 njerëz të vdekur dhe miliona të zhvendosur./  a.jor.

The post KOLUMBI – Ish-presidenti Uribe dënohet me 12 vjet arrest shtëpiak për manipulim dëshmitarësh dhe mashtrim procedural appeared first on Agjencia Telegrafike Shqiptare.

MANÇESTER (Mbretëria e Bashkuar) – Marshimi i parë në Britaninë e Madhe nga e djathta ekstreme bën thirrje për dëbime masive.

BANGKOK (Tajlandë) – Demonstratë për të dënuar luftën me Kamboxhian dhe për të kërkuar dorëheqjen e kryeministrit.

BRUKSEL (Belgjikë) – Periudha e pajtueshmërisë me BE-në fillon për modelet e inteligjencës artificiale si ChatGPT dhe Gemini.

ROMË (Itali) – Papa Leone XIV kryeson vigjiljen e lutjes së Jubileut për të rinjtë.

SHTETET E BASHKUARA – Protesta kundër Trump.

SALÉ (Marok) – Maroku dërgon gati 180 ton ndihmë humanitare në Rripin e Gazës nëpërmjet Izraelit.

KENIA – Futboll – Kampionati i Vendeve Afrikane (CHAN).

KARAKAS (Venezuela) – Ndeshje boksi midis Canizales dhe Pradabsri për titullin WBC të peshave të lehta./ a.jor.

The post AXHENDA NDËRKOMBËTARE 02/8/2025 appeared first on Agjencia Telegrafike Shqiptare.

PEKIN, 1 gusht /ATSH-ANSA/ – Forcat e armatosura kineze janë të gatshme të shtypin çdo përpjekje për pavarësi në Tajvan dhe ne nuk do të lejojmë kurrë që asnjë projekt pavarësie separatiste të ketë sukses dhe jemi të gatshëm të mposhtim çdo ndërhyrje të armatosur të jashtme në çdo kohë, pasi për ribashkimin e plotë të atdheut, Ushtria Çlirimtare Popullore është e gatshme në çdo kohë, paralajmëroi ministri kinez i Mbrojtjes, Dong Jun duke folur të enjten në mbrëmje në një pritje të organizuar në Sallën e Madhe të Popullit në sheshin ”Tienanmen” për 98-vjetorin e themelimit të Ushtrisë Çlirimtare Popullore.

”Viti 2025 shënon 80-vjetorin e fitores së luftës së rezistencës së popullit kinez kundër agresionit japonez dhe luftës botërore antifashiste, 80-vjetorin e çlirimit të Tajvanit dhe 80-vjetorin e themelimit të Kombeve të Bashkuara”, shtoi ai.

Brenda pak më shumë se një muaji, Ushtria Popullore do të nderohet nga partia dhe populli kinez në lidhje me paradën e 3 shtatorit që feston fitoren ndaj Japonisë militariste.

“Ne do të bashkohemi edhe më ngushtë rreth Komitetit Qendror të PKK-së… për të promovuar pa u lodhur zhvillimin politik të forcave të armatosura, për të forcuar në mënyrë gjithëpërfshirëse stërvitjen dhe gatishmërinë luftarake dhe për të përmbushur në mënyrë efektive misionin dhe detyrat e Ushtrisë Popullore në epokën e re”, vazhdoi ministri.

”Ushtria kineze është e gatshme të bashkëpunojë me ushtritë e të gjitha vendeve për të zbatuar konceptin e një komuniteti me një të ardhme të përbashkët për njerëzimin dhe tre nismat kryesore globale, për të adresuar së bashku rreziqet dhe sfidat dhe për të punuar së bashku për të ndërtuar një botë me paqe të qëndrueshme, siguri universale, prosperitet të përbashkët, hapje dhe përfshirje”, theksoi ai./ a.jor.

The post FOKUS – Kina: Nuk do ta lejojmë kurrë pavarësinë e Tajvanit appeared first on Agjencia Telegrafike Shqiptare.

UASHINGTON (Shtetet e Bashkuara) – Hyjnë në fuqi tarifat më të larta në Shtetet e Bashkuara për BE-në dhe partnerët e tjerë tregtarë.

SHANGAI (Kinë) – Panairi i argëtimit dixhital ”ChinaJoy”.

EDIMBURG (Mbretëria e Bashkuar) – Festivali i Edimburgut ”Fringe”.

LOS ANXHELES (Shtetet e Bashkuara) – Premiera Botërore e “Weapons”.

UASHINGTON (Shtetet e Bashkuara) – Tarifa prej 50% e importit të bakrit e vendosur nga Trump hyn në fuqi.

OTAVA (Kanada) – Kryeministri Mark Carney do të përshtatë tarifat për çelikun dhe aluminin amerikan nëse negociatat dypalëshe tregtare dështojnë.

BOGOTA (Kolumbi) – Gjykata shpall vendimin kundër ish-presidentit, Alvaro Uribe.

SAO PAULO (Brazil) – Protestë para konsullatës amerikane në mbështetje të Brazilit dhe kundër tarifave amerikane>

BUDAPEST (Hungari) – Auto – Kampionati Botëror i Formula 1 – Çmimi i Madh i Hungarisë./  a.jor.

The post AXHENDA NDËRKOMBËTARE 01/8/2025 appeared first on Agjencia Telegrafike Shqiptare.