TIRANË, 15 gusht /ATSH/ Agjencia Kombëtare e Zonave të Mbrojtura deklaroi sot se Parku Natyror “Syri i Kaltër” në Sarandë tashmë është i hapur për t’u vizituar nga turistët dhe i sigurt për të gjithë.
AKZM apelon që të tregohet kujdes dhe vigjilencë si dhe të njoftohen strukturat shtetërore ndaj çdo situate.
Punonjës të AKZM zhvilluan një ditë më parë një inspektim në terren mbi situatën në Parkun Natyror “Syri i Kaltër”. Në vlerësimin paraprak rezulton 30.66 ha e sipërfaqes së përshkruar apo të djegur brenda parkut.
AKZM së bashku me stafin e AdZM Vlorë dhe struktura shtetërore janë angazhuar plotësisht për të rikthyer sigurinë tek komuniteti, subjektet në zonë dhe vizitorët e shumtë të parkut natyror.
“Analiza e dëmeve dhe humbjeve nga zjarret në pyje dhe kullota është një nga masat e nevojshme për fazën e rimëkëmbjes. Solidarizimi, bashkimi i përpjekjeve, rimëkëmbja psikologjike dhe emocionale, janë parimet që na udhëheqin në këtë fazë të rimëkëmbjes”, thekson AKZM.
Vatra e zjarrit e nisur në fshatin Krane, njësia administrative Mesopotam kaloi në fshatin Pecë e cila ishte shumë pranë Syrit të Kaltër, por falë angazhimit të pandërprerë të strukturave shtetërore u bë i mundur shuarja e flakëve duke parandaluar përhapjen në këtë monument natyror të mbrojtur.
Ministria e Mbrojtjes bëri të ditur mbrëmë se në këtë Park vijoi puna për shuarjen e zjarrit në lartësitë e Malit të Sopotit. Në terren u angazhuar 67 forca zjarrfikëse me 11 automjete, 30 forca bashkiake, 80 efektivë të Forcave të Armatosura me 10 automjete, 6 autoambulanca dhe 30 forca mbështetëse. Në mbështetje për shuarjen e zjarrit ishte edhe avioni italian “Canadair”.
TIRANË, 15 gusht /ATSH/ Ditën e premte vendi ynë do të ndikohet nga kushte atmosferike kryesisht të qëndrueshme.
Sipas Shërbimit Meteorologjik Ushtarak, moti pritet të jetë me kthjellime, ndërsa nga orët e mesditës deri në pasditen e vonë do të ketë alternime vranësirash mesatare deri në të dendura. Në zonat kodrinore e malore, këto vranësira do të shoqërohen me reshje shiu me intensitet të ulët dhe karakter lokal.
Era do të fryjë nga veriperëndimi dhe verilindja me shpejtësi mesatare 4 m/sek, ndërsa në lugina dhe përgjatë bregdetit do të arrijë deri në 5-7 m/sek. Valëzimi në det pritet të jetë i forcës 1-2 ballë.
Shumë ndërtesa në qendër të Prishtinës mbeten të mbuluara me çati që përmbajnë asbest, një material i njohur për rrezikun që paraqet për shëndetin. Janë bërë shumë fushata për heqjen e këtij materiali kancerogjen, por rezultatet konkrete mungojnë. Të dhënat zyrtare tregojnë se në Prishtinë ka mbi 230 mijë metra katrorë çati dhe rreth 70 kilometra gypa ujësjellësi me këtë material.
Një pjesë e banesave në kryeqytet edhe më tej vazhdojnë të jenë të mbuluara me lesenit, material me përbërje asbesti, i cili vlerësohet i dëmshëm për shëndetin e njeriut.
Fushata “Prishtina pa asbest”, e nisur vitin e kaluar nga kryetari i Komunës së Prishtinës, kishte për synim largimin e këtij materiali toksik me qëllim mbrojtjen e shëndetit të qytetarëve. Sipas vlerësimeve, rreth 230 mijë metra katrorë në zonën urbane të kryeqytetit janë të mbuluara me asbest, përfshirë këtu ndërtesa banimi kolektiv, shtëpi private dhe objekte publike. Megjithëkëtë, ndonëse ka kaluar kohë, ky material vazhdon të bashkëjetojë me banorët e kryeqytetit.
Opozita komunale mbetet skeptike se ky projekt do të përmbyllet, duke akuzuar qeverisjen lokale për dështim në mbrojtje të shëndetit publik.
Ndërkohë, zyrtarë komunalë vënë në pah se përgjatë vitit të kaluar është kontraktuar një kompani e cila ka bërë inventarizimin edhe identifikimin e të gjitha objekteve të mbuluara me asbest, përfshirë edhe shtëpitë private. Sipas drejtorit për siguri dhe emergjenca, procesi i inventarizimit tashmë është përmbyllur, ndërkohë që me procedurat e tenderimit pritet të fillojë largimi, që do të ndahet në tri faza.
Ulpiana është identifikuar ndër lagjet me më së shumti asbest në kryeqytet.
Edhe pse i ndaluar në shumë vende të botës, ky material në vendin tonë vazhdon të jetë i pranishëm në infrastrukturë, përfshirë në gypat e ujit dhe në çati të objekteve private e publike, si dhe në spitale e shkolla.
Situata më shqetësuese mbetet në kryeqytet, ku sipas të dhënave zyrtare, përveç rreth 230 mijë metrave katrorë çati të ndërtesave me përmbajtje asbesti, janë edhe rreth 70 kilometra gypa ujësjellësi me këtë material të rrezikshëm.
TIRANË, 14 gusht/ATSH/ Agjencia Kombëtare e Zonave të Mbrojtura dhe stafi i Administratës së Zonave të Mbrojtura Vlorë inspektuan sot Parkun Natyror “Syri i Kaltër” për të evidentuar dëmet e shkaktuara nga zjarri i rënë ditët e fundit.
Në një postim në rrjetet sociale AKZM tha se “në vlerësimin paraprak rezulton 30.66 ha e sipërfaqes së përshkruar apo të djegur brenda parkut”.
Sipas AKZM-së, analiza e dëmeve dhe humbjeve nga zjarret në pyje dhe kullota është një nga masat e nevojshme për fazën e rimëkëmbjes.
AKZM së bashku me stafin e AdZM Vlorë dhe struktura shtetërore janë angazhuar plotësisht për të rikthyer sigurinë tek komuniteti, subjektet në zonë dhe vizitorët e shumtë të parkut natyror.
“Solidarizimi, bashkimi i përpjekjeve, rimëkëmbja psikologjike dhe emocionale, janë parimet që na udhëheqin në këtë fazë të rimëkëmbjes”, tha AKZM.
Ditët e fundit Parku Natyror i Syrit të Kaltër u përfshi nga flakët, të cilat u shuan nga ndërhyrja e forcave zjarrfikëse. Ky park vijon të jetë i mbyllur për vizitorët këto ditë për të siguruar mirëqenien e gjithë pushuesve.
Nga të dhënat vërehet se kjo është sipërfaqja më e madhe e regjistruar që prej vitit 2012 ku rezulton se në të gjithë vitin janë djegur mbi 53 hektarë sipërfaqe në të gjithë vitin.
Ndërkohë në total sipas të dhënave rezulton se janë 97 vatra zjarresh.
Përveç dëmeve materiale dhe mjedisore, fatkeqësisht është shënuar edhe një viktimë në zonën e Gramshit, ku një person humbi jetën si pasojë e përhapjes së zjarrit.
Zjarret e fundit, sipas autoriteteve dhe raportimeve në terren, në shumicën e rasteve dyshohet të jenë të qëllimshme, duke shtuar shqetësimet për mungesë kontrolli dhe masash parandaluese efektive.
TIRANË, 14 gusht/ATSH/- Kryeministri Edi Rama deklaroi sot se do të vijojnë përpjekjet e përbashkëta për shuarjen e vatrave të zjarrit që kanë përfshirë vendin gjatë ditëve të fundit.
Rama shprehet në një postim në rrjetet sociale se edhe sot gatishëmria do të jetë e lartë, por thekson se situata është e përmirësuar falë angazhimit të strukturave shtetërore.
“Një tjetër ditë gatishmërie të lartë e përpjekjesh të përbashkëta, përballë një situate të përmirësuar falë mundimesh e sakrificash të admirueshme por me rreziqe e të papritura në çdo çast”, nënvizon Kreu i Ekzekutivit.
Rama ka reaguar lidhur edhe me reagimet ndaj kësaj situate duke shtuar se “krehin veten para pasqyrave mediatike”.
“Neveri për lehaqeniet që vazhdojnë avazin e tyre të krehjes para pasqyrave mediatike, teksa në tërë Europën Jugore digjen në flakë mijëra vatra zjarri nga Spanja e deri në Turqi”, shprehet kryeministri Rama.
TIRANË, 14 gusht/ATSH/ Ditën e enjte, vendi ynë do të ndikohet nga kushte atmosferike kryesisht të qëndrueshme.
Shërbimi Meteorologjik Ushatarak njoftoi sot se, moti parashikohet me kthjellime, ndërsa nga mesdita deri në orët e vona të pasdites do të ketë alternime vranësirash kalimtare mesatare dhe hera-herës deri të dendura. Përgjatë zonave kodrinore e malore, vranësirat do të shoqërohen me reshje shiu me intensitet të ulët, ndërsa në relievet e larta malore priten edhe shtrëngata të izoluara dhe afatshkurtra.
Era do të fryjë kryesisht nga veriperëndimi-jugperëndimi me shpejtësi mesatare 4 m/sek, ndërsa në lugina dhe përgjatë bregdetit do të arrijë 5-7 m/sek. Në det parashikohet valëzim i forcës 1-2 ballë.
TIRANË, 13 gusht/ATSH/ Shqipëria po përballet me një situatë tejet të vështirë si pasojë e zjarreve të përhapura në disa qarqe të vendit, të cilat po menaxhohen falë guximit vetëmohues dhe angazhimit total të të gjitha forcave në terren, përfshi këtu forcat zjarrfikëse të bashkive, Emergjencat Civile, Forcat e Armatosura.
Në reagimet e tij, në rrjetet sociale kryeministri Edi Rama falënderoi me respekt e mirënjohje të gjithë strukturat që u angazhuan me kurajë të jashtëzakonshme në përballimin e situatës.
“Dy ditë e netë ekstremisht të vështira, ku forcat zjarrfikëse të bashkive, Emergjencat Civile, Forcat e Armatosura po përballen me zjarre të mëdha në Skënderbegas, Sojnik të Gramshit, Koshtan të Memaliajt, në Hormovë, Kodër e Lekël të Tepelenës, në kufi me Gjirokastrën, Dhivër, Kakodhiq në Finiq, si dhe në Dropull në kufi me Delvinën, ku rreziku dhe flakët kanë qenë të pamëshirshme. Falë guximit vetëmohues dhe angazhimit total të të gjitha forcave në terren, është arritur fatmirësisht që zjarret të vihen nën kontroll, ndërkohë që vazhdon puna papushim drejt shuarjes së tyre dhe gatishmëria maksimale për çdo riaktivizim të mundshëm apo vatra të reja. Falenderim, respekt, mirënjohje me zemër për zjarrfikësit, forcat e ushtrisë, policinë, vullnetarët dhe banorët që po përballen me flakët, duke rrezikuar jetën për të mbrojtur njerëzit, shtëpitë dhe natyrën tonë” , shprehet kryeministri Rama në reagimin e tij.
Kryeministri u bëri thirrje të gjithë qytetarëve që të tregojnë kujdes maksimal, të raportojnë menjëherë çdo vatër zjarri dhe të ndjekin me rigorozitet udhëzimet e autoriteteve.
Rama paralajmëron ndëshkimet më të ashpra ligjore për zjarrëvëniet e qëllimshme.
“Thirrje të gjithë banorëve të tregohen të kujdesshëm, të sinjalizojnë çdo vatër zjarri para se të jetë vonë dhe të ndjekin këshillat e autoriteteve, ndërsa për kriminelët që luajnë me flakët, ndëshkimi do të jetë maksimal. Ata që ndezin zjarre qëllimisht, shkatërrojnë pasurinë dhe rrezikojnë jetë, në këtë kohë të vështirë ngrohjeje globale dhe flakësh që po sfidojnë të gjitha shtetet e Mesdheut sidomos, duhet të marrin dënimin më të rëndë që parashikon ligji”, theksoi Kryeministri.
Gjatë 24 orëve të fundit janë evidentuar 64 vatra zjarri, nga të cilat 24 vatra zjarri janë ende aktive. Ministria e Mbrojtjes njoftoi sot se mbi 10 mijë forca të emergjencave, nën koordinimin e Agjencisë së Mbrojtjes Civile ndodhen në terren dhe situata po shkon drejt stabilizimit.
TIRANË, 13 gusht/ATSH/ Kryeministri Edi Rama reagoi sot lidhur me situatën e zjarreve në vend duke falënderuar të gjitha forcat e angazhuar për shuarjen e tyre, ndërsa theksoi se zjarrvënësit duhet të marrin dënimin më të rëndë që parashikon ligji.
Në një postim në rrjetet sociale, Rama ndau pamje nga puna e trupave të angazhuara për shuarjen e zjarreve që kanë përfshirë disa zona të vendit ditët e fundit.
“Falënderim, respekt, mirënjohje me zemër për zjarrfikësit, forcat e ushtrisë, policinë, vullnetarët dhe banorët që po përballen me flakët, duke rrezikuar jetën për të mbrojtur njerëzit, shtëpitë dhe natyrën tonë”, theksoi Rama.
Kryeministri Rama tha se “ata që ndezin zjarre qëllimisht, shkatërrojnë pasurinë dhe rrezikojnë jetë, në këtë kohë të vështirë ngrohjeje globale dhe flakësh që po sfidojnë të gjitha shtetet e Mesdheut sidomos, duhet të marrin dënimin më të rëndë që parashikon ligji”.
Aktualisht situata mbetet kritike në Delvinë, ku zjarri ka vazhduar me intensitet të lartë edhe gjatë orëve të natës. Flakët vijojnë në kodrat përreth qytetit, ndërsa ka nisur edhe ndërhyrja nga ajri me helikopter.
Edhe në Gramsh dje, por edhe sot situata është më e vështirë në fshatin Menkollar, ku të pranishme janë tre zjarrfikëse të shoqëruara me forca të shumta të ushtrisë, vullnetarë e banorë të shumtë të zonës si dhe dy helikopterë që hedhin ujë vazhdimisht për të parandaluar përhapjen e flakëve.
Nga Gazeta ‘Si’- Zjarrfikësit në të gjithë Spanjën, Portugalinë, Greqinë, Turqinë dhe Ballkanin po luftonin me zjarret e egra të martën, me një valë tjetër të nxehti që i shtyu temperaturat mbi 40 gradë Celsius (104 gradë Fahrenheit) në pjesë të Europës.
Ngrohja globale po i shkakton rajonit të Mesdheut vera më të nxehta dhe më të thata, thonë shkencëtarët, me zjarre që shtohen çdo vit dhe ndonjëherë shndërrohen në “vorbulla” .
“Po na ziejnë të gjallë, kjo nuk mund të vazhdojë”, tha një kryetar bashkie në Portugali, Alexandre Favaios, ndërsa digjeshin tre zjarre.
Në periferi të kryeqytetit spanjoll, Madridit, një zjarr vrau një burrë që punonte në një stallë kuajsh dhe përfshiu disa shtëpi dhe ferma, por u vu nën kontroll deri të martën, thanë autoritetet rajonale.
Një burrë vdiq gjithashtu në një zjarr në Shqipëri, ndërsa një punëtor sezonal hungarez 61-vjeçar dyshohet se ka vdekur nga shkaqe të lidhura me nxehtësinë, ndërsa po mblidhte fruta në Lleida, në rajonin lindor të Katalonjës në Spanjë.
Në zonën malore Kuci të Malit të Zi, në verilindje të kryeqytetit Podgoricë, një ushtar i ushtrisë u vra dhe një tjetër u plagos rëndë kur një cisternë uji që ata po drejtonin u përmbys, tha Ministria e Mbrojtjes.
Në Tarifa , në skajin më jugor të gadishullit Iberik, plazhistët dhe shefi i kuzhinës i famshëm Jose Andres filmuan flakë dhe tym të zi në kodrat mbi vilat e lyera me gëlqere.
Më shumë se 2,000 njerëz u evakuuan nga atje ndërsa zjarri – që besohet se ka filluar në pyjet e eukaliptit dhe pishave – u përhap, thanë zyrtarët. Helikopterët e shuan flakët me ujë deti.
Autoritetet në Shqipëri, Mal të Zi, Gjermani, Spanjë, Itali dhe Francë lëshuan lloje të ndryshme paralajmërimesh për nxehtësinë.
Në Spanjë, temperaturat arritën 44 gradë Celsius në disa rajone, sipas shërbimit meteorologjik AEMET, me reshje minimale shiu dhe kushte me erë që pritet të përkeqësojnë rrezikun e zjarrit.
Ministria e Brendshme e Spanjës ka vënë shërbimet kombëtare në gatishmëri, ndërsa pothuajse 1,000 anëtarë të forcave të armatosura tashmë po mbështesin shuarjen e zjarreve.
Operatori hekurudhor i vendit tha se trenat midis Galicisë veriperëndimore dhe Madridit u ndaluan për shkak të një zjarri.
Në rajonin më të madh të Spanjës, Castile dhe Leon, më shumë se 1,200 zjarrfikës luftuan 32 zjarre të martën dhe mijëra banorëve iu tha të largoheshin nga shtëpitë e tyre.
Ndërkohë, policia tha se kishte arrestuar një zjarrfikës pranë qytetit të rrethuar me mure të Avilës në veriperëndim të Madridit, i cili kishte rrëfyer se kishte ndezur një zjarr dy javë më parë për shkak të të ardhurave të mundshme nga puna për shuarjen e tij.
Në Portugalinë veriore, më shumë se 1,300 zjarrfikës të mbështetur nga 16 avionë po luftonin me tre zjarre të mëdha. Njëri prej tyre, në zonën e Vila Real, ka qenë duke u djegur prej 10 ditësh.
“Kanë kaluar 10 ditë që popullsia jonë është në panik, pa e ditur se kur zjarri do t’u trokasë në derë”, tha kryebashkiaku Favaios për transmetuesin RTP, duke kërkuar më shumë ndihmë nga qeveria.
Në Shqipëri, sipërfaqe të mëdha pyjesh dhe tokash bujqësore janë djegur nga zjarret gjatë javës së kaluar dhe 30 zjarre të ndara vazhdojnë të digjen të nxitura nga erërat e forta.
Beteja me flakët në Delvinë, 12 gusht 2025, foto nga Reuters
Ministria e Mbrojtjes tha se katër helikopterë ushtarakë dhe 80 ushtarë po ndihmonin zjarrfikësit. Gjithashtu raportoi vdekjen e një burri të dyshuar se kishte ndezur në oborrin e tij një zjarr që u përhap në një zonë më të gjerë.
Në Malin e Zi fqinj, autoritetet e mbështetura nga helikopterë nga Serbia dhe Kroacia kontrolluan një zjarr të madh pranë Podgoricës të martën, me kryeqytetin e mbuluar nga tymi. Në Gornja Vrbica, banorët ndihmuan zjarrfikësit të ndalonin një zjarr që po arrinte një kishë dhe varrezë lokale, raportoi e përditshmja Pobjeda.
Më shumë ndihmë pritej nga Austria, Sllovenia dhe Italia në kuadër të mekanizmit të mbrojtjes civile të BE-së.
Dragana Vukoviç, shtëpia e së cilës në Piperi juglindor u shndërrua në rrënoja, i tha Reuters: “Çdo gjë që mund të paguhet dhe të blihet do të kompensohet, por kujtimet që u dogjën në këto katër dhoma dhe në papafingo nuk mund të kompensohen.”
Në Greqi, në skajin më jugor të Evropës, zjarret në disa raste të nxitura nga erërat e forta detyruan evakuimin e disa fshatrave dhe një hoteli në ishujt turistikë të Zakynthos dhe Cefalonisë në Detin Jon, së bashku me katër pjesë të tjera të kontinentit.
Një zjarr i madh në rajonin jugor grek të Akaisë detyroi banorët e pesë fshatrave pranë një zone industriale të largoheshin, ndërsa 85 zjarrfikës dhe 10 avionë u përpoqën të ndalonin një zjarr që të arrinte shtëpitë pranë qytetit perëndimor grek të Vonitës.
Pamja ishte e ngjashme në Turqi , ku një zjarr i madh në provincën veriperëndimore të Çanakalasë u ndez për të dytën ditë me radhë, duke shkaktuar evakuimin e qindra banorëve.
Burimi: Reuters/Përshtati Gazeta Si
Raportimi nga Pietro Lombardi dhe David Latona në Madrid, Andrei Khalip në Lisbonë, Angeliki Koutantou në Athinë, Fatos Bytyci në Finiq, Shqipëri, Stevo Vasiljevic në Podgoricë; shkrimi nga Aislinn Laing, Redaktimi nga Andrei Khalip, Andrew Cawthorne dhe Tomasz Janowski.
TIRANË, 13 gusht/ATSH/ Shërbimi Meteorologjik Ushtarak bëri të ditur se ditën e mërkurë vendi ynë do të ndikohet nga kushte të qëndrueshme.
Moti parashikohet i kthjellët në të gjithë territorin përjashtuar vranësirat e pakta deri mesatare kalimtare në relievet malore në lindje dhe në zonën e jugut.
Era do të fryjë me drejtim kryesor veriperëndim- verilindje me shpejtësi mesatare 7 m/s, ndërsa në lugina dhe bregdet do të arrijë 12 m/s, shoqëruar me valëzimin në dete të forcës 1-2 ballë.
TIRANË, 12 gusht /ATSH/ Ditën e martë, vendi ynë do të ndikohet nga kushte të qëndrueshme atmosferike.
Shërbimi Meteorologjik Ushtarak njofton se moti do të jetë kryesisht i kthjellët, me kalime të pakta vranësirash herë pas here, veçanërisht në zonat lindore përgjatë vargmaleve në orët e mesditës dhe pasdites. Pas këtyre orëve, moti do të mbetet i kthjellët në të gjithë territorin.
Era do të fryjë nga verilindja–veriperëndimi me shpejtësi mesatare 6 m/sek, ndërsa në lugina dhe në bregdet do të arrijë 10-12 m/sek. Në det, valëzimi parashikohet i ulët, me forcë 1-2 ballë.
TIRANË, 11 gusht /ATSH/ Sot vendi ynë do të ndikohet nga kushte atmosferike të qëndrueshme, njoftoi Shërbimi Meteorologjik Ushtarak.
Moti parashikohet i kthjellët dhe me kohëzgjatje të orëve me diell në të gjithë territorin.
Era do të fryjë me drejtim veriperëndim – verilindje me shpejtësi mesatare 6 m/s, ndërsa në zonat luginore dhe përgjatë vijës bregdetare hera-herës do të fitojë shpejtësi 8-12 m/s.
Valëzimi në dete parashikohet të jetë i forcës 1-2 ballë.
TIRANË, 10 gusht/ATSH/ Ministria e Mbrojtjes deklaroin se “në bashkinë Poliçan, jashtë territorit të Uzinës Mekanike, vijon aktive një vatër zjarri në një sipërfaqe me shkurre dhe ullishte”.
Në një deklaratê për mediet mbrëmjen e sotme, Ministria e Mbrojtjes bën me dije se “flakët kanë kaluar mbi ujësjellësin dhe janë afruar pranë një grupi banesash si dhe pranë Azilit të të Moshuarve në qytet”.
“Në terren po punojnë forcat zjarrfikëse të bashkive Poliçan, Berat, Skrapar, Lushnje, Patos dhe Roskovec, të ndihmuara nga 60 trupa të Forcave të Armatosura dhe mbështetje nga ajri. Pavarësisht përpjekjeve intensive, zjarri ende nuk është shuar. Forcat operacionale vijojnë punën me intensitet për ta vendosur nën kontroll”, thuhet në njoftimin për shtyp.
TIRANË, 10 gusht /ATSH/ Kryeministri Edi Rama ka ndarë sot pamje të spektaklit që dhurojnë flamingot në Lagunën e Nartës, duke e cilësuar atë “magjike”.
Shqipëria është një habitat i dashur dhe i sigurt për një shumëllojshmëri speciesh, të cilat jetojnë, folezojnë, apo ushqehen në territoret e zonave të mbrojtura dhe jo vetëm. Flamingo është një tjetër lloj i cili duket se tani më ka nisur të folezojë në Shqipëri, konkretisht në Lagunën e Nartës.
Flamingot në zonat e mbrojtura ujore jetojnë të paqtë, në një numër shumë të lartë. Kjo specie e mrekullueshme jeton mesatarisht deri në 30 vite.
Ato jetojnë gjithmonë në grupe, që nga ato me numër të vogël, deri në qindra-mijëra. Zogjtë ngrihen në ajër në grup dhe fluturojnë me qindra kilometra gjatë periudhës së shtegtimit.
Laguna e Nartës ndodhet rreth 14 km në veriperëndim të qytetit të Vlorës dhe ka një sipërfaqe prej rreth 42 km2. Ndahet nga deti Adriatik nga një rrip i ngushtë toke ranore, që përbëhet nga duna rëre dhe plazhe të vegjël pa bimësi të dendur.
Laguna e Nartës, renditet e dyta më e madhe nga rëndësia për shpendët e ujit në vendin tonë. Në këtë lagunë janë rreth 20 mijë shpendë dimërorë të rreth 40 llojeve, duke u kthyer në një habitat shumë të pasur, gjithashtu vendushqimi për pelikanin dhe ku takohen rregullisht flamingot.
TIRANË, 10 gusht/ATSH/ Ministri i Mbrojtjes, Pirro Vengu informoi sot se zjarri në Finiq aktualisht është vënë nën kontroll, ndërkohë që ka vatra aktive në Bulqizë, Mat, Bolenë të Himarës dhe Tepelenë.
Në një intervistë televizive, Vengu informoi se për menaxhimin e situatës në Finiq janë angazhuar 120 forca ndërkohë që pritet të ndërhyhet gjithashtu edhe me një avion “Canadair” nga Mekanizmi i Mbrojtjes i BE-së.
“Gjatë gjithë këtyre ditëve kemi qenë prezentë në gjithë hapësirën e Finiqit. Patëm një situatë shumë të vështirë në krahun përballë Syrit të Kaltër, bëmë evakuim të përkohshëm në dy fshatra, në Livinë dhe Ardhasovë. Aktualisht banorët janë rikthyer. Ndërkohë kemi përqendruar më shumë se 120 trupa në këtë perimetër të 5 fshatrave”, shtoi Vengu.
Aktualisht, sipas tij, situata paraqitet më e stabilizuar. “Kemi pasur ndërhyrje nga ajri në orët e para të mëngjesit. Vijon operacioni për të siguruar perimetrin dhe infrastrukturën kritike, pasi kemi HEC-in e Bistricës. Do të vijojmë të jemi prezentë gjatë ditës me helikopterë që ndërhyjnë herë pas here dhe me avionë ‘Canadair’ që janë në dispozicion nga Mekanizmi Europian”, shtoi ai.
I pyetur për dëmet, ministri theksoi se nga vlerësimi paraprak janë të vogla, duke marrë parasysh intensitetin e madh që pati zjarri në këto fshatra gjatë natës.
“Fillimisht u krye ndërhyrja në zonat e banuara. Rreth orës 22:00 deri në mesnatë bëmë evakuimin e përkohshëm të fshatrave të rrezikuara. Më pas forcat ndërhynë shtëpi më shtëpi duke mbrojtur çdo banesë të rrezikuar nga flakët. Nga vlerësimet paraprake dëmet janë minimale, duke marrë parasysh vatrën intensive. Këto ndërhyrje në terren kanë mundësuar që të mos kemi dëme në jetë njerëzish e në prona”, shtoi ai.
Në vijim, ministri bëri të ditur se u realizua ndërhyrja për të krijuar perimetrin e sigurisë në hidrocentralin e Bistricës.
“Kemi kërkuar që të pezullohet aksesi i mjeteve nga Muzina drejt Bistricës që të vijojë aktiviteti i ndërhyrjes nga ajri në kushte optimale. Ka nisur ndërhyrja nga ajri që në orët e para të mëngjesit. Për më shumë se një orë po ndërhyhet me helikopter. Do vijojmë të ndërhyjmë me një mjet ‘Canadair’ në Dhrovjan, ku kemi konstatuar me dronët ‘Bayraktar’ disa vatra të vogla dhe duhet t’i mbajmë në kontroll që të mos përhapen”, u shpreh ministri.
Duke folur për situatën nga zjarret në gjithë territorin e vendit, Vengu theksoi se “çdo mëngjes dy dronë të Forcave të Armatosura mbikëqyrin territorin në veri dhe në jug të vendit”.
“Në Bulqizë, Mat, Bolenë të Himarës, Tepelenë dhe Finiq, që mbetet vatra më intensive sa i përket përhapjes dhe zonave të banuara. Do vijojmë të mbetemi vigjilentë. Kemi kërkuar gatishmëri të plotë të të gjitha bashkive dhe madje vendosjen në dispozicion të mjeteve private si betonieret që mund të shpërndajnë ujë në zonat me terren të vështirë apo edhe cisternave”, shtoi ai.
Ministri tha gjithashtu se synojnë që të blejnë helikopterë të specializuar për situata të tilla, pasi ato të FA-së kanë shumë misione.
“Prej disa vitesh mbarë Mesdheu ka hyrë në një epokë të zjarreve masive. E kemi parë çfarë ka ndodhur në vende shumë më të mirëpajisura se ne si Franca, Italia, Greqia, Turqia. Edhe Shqipëria është pjesë e këtij zinxhiri të riskut të zjarreve masive”, shtoi ai.
Sipas Vengut, “kurrë më parë Shqipëria nuk ka pasur kaq shumë mjete të dedikuara tokësore dhe ajrore dhe personel të mirëstërvitur dhe mirëpajisur.
“Do të vijojmë specializimin e trupës sonë për zjarret. Kemi investime me qendrat rajonale zjarrfikëse. Prej pak javësh kemi një instrument të ri, KAYO do të fillojë prodhimin e mjeteve zjarrfikëse. Kemi gjithashtu në proces prokurimi edhe mjetet ajrore për të përforcuar flotën ajrore. Do ta pasurojmë flotën ajrore dhe modernizojmë flotën tokësore. Dhe të kemi qendra rajonale për një zinxhir më të fortë reagimi”, shtoi ai.
TIRANË, 10 gusht /ATSH/ Ditën e diel vendi ynë do të ndikohet nga kushte atmosferike të qëndrueshme, duke sjellë mot të kthjellët dhe të nxehtë në të gjithë territorin.
Era do të fryjë nga veriperëndimi në jugperëndim me shpejtësi mesatare deri në 7 m/sek, ndërsa në zonat luginore dhe përgjatë bregdetit hera-herës do të arrijë 8-14 m/sek, duke shkaktuar dallgëzim të forcës 1-2 ballë.
Temperaturat pritet të regjistrojnë vlera të larta, duke arritur deri në 42°C në disa zona të vendit.
TIRANË, 9 gusht /ATSH/ Ministri i Mbrojtjes, Pirro Vengu, ishte sot në Vlorë, ku së bashku me kryebashkiakun, Ermal Dredha inspektuan punimet ku puna vazhdon për rehabilitimin e plotë të rrjetit të kanalizimeve të qytetit me forcat xheniere, të cilat janë kudo në mbështetje të bashkive dhe në shërbim të komuniteteve.
“Jemi në zonën e kanalit të ujërave të larta të Skiavit që ndërlidh zonën e ish-fabrikës së çimentos me zonën e Lungomares. Prej disa ditësh kemi një ndërhyrje rehabilituese në këtë kanal. Të angazhuara në terren janë forcat e bashkisë së Vlorës, xhenio, reparti i Forcave të Armatosura që është gjithmonë në mbështetje me logjistikën përkatëse dhe patjetër dhe ujësjellës-kanalizimet e Vlorës që do të mbeten të angazhuara deri sa të kemi një pastrim të plotë të këtij kanali që nga pikënisja e tij dhe deri poshtë”, tha Vengu.
Ndërkohë, shtoi ministri, “po realizojmë një projekt të ri rehabilitues në bashkëpunim me Agjencinë e Zhvillimit të Territorit në mënyrë që nga njëra anë të kemi infrastrukturë të re më cilësore, të sigurojmë pastërtinë e ujërave, sepse ky është një kanal që duhet të ketë ujëra të bardha, ujëra shiu, që mund të filtrohen dhe cilësia e tyre duhet kontrolluar dhe jo të kemi derdhje inertesh, apo bllokime. Ndaj dhe do vijojmë këto ditë që ta pastrojmë infrastrukturën”.
Kryebashkiaku Dredha tha se, “është bërë një punë shumë e mirë. Me ndërhyrjen që bëmë, qoftë edhe me ndihmën që kanë dhënë kompani private, patjetër nga diskutimi dhe nga kërkesa që ka ardhur dhe nga Agjencia e Zhvillimit të Territorit, në bashkëpunim me Ministrinë e Mbrojtjes, drejtorinë e Ujësjellës Kanalizime dhe bashkinë Vlorë”.
Dredha theksoi se, “është bërë një punë shumë e kënaqshme, por siҫ e shohim edhe vetë ka akoma disa pjesë që ne duhet të ndërhyjmë. Ka mbulesa betoni monolite që normalisht ka një angazhim tjetër sa i përket edhe mjeteve që duhet të përdorim. Dhe them se shumë shpejt duke i hequr të gjitha këto pengesa do të bëhet një pastrim i përgjithshëm për të kalaur tek projekti që thatë pak më parë”.
“Kemi projektues të huaj që ka ardhur dhe e ka parë dhe merret posaҫërisht me pjesën e kanalizimeve dhe kanaleve për ta ridimensionuar dhe për ta rregulluar gjithë këtë pjesë. Dhe shpresojmë të bëhet sa më shpejt që të vijë në funksion të gjithë territorit këtu, pra komunitetit, edhe për ta rimodeluar edhe pjesën anësore të të dyja anëve të kanalit duke pasur parasysh edhe objektet që janë këtu që janë ndërtuar ndër vite, që mund të jenë patjetër pa leje, disa kanë qenë në proces legalizimi apo janë legalizuar. Por aty ku cenohet ky projekt do të bëjmë maksimumin që t’i zhbëjmë sepse në fund të ditës nuk duhet të merremi me një apo dy banorë që posedojnë një objekt, por me gjithë komunitetin që është shumicë”, theksoi Dredha.
Ministri Vengu shtoi se “gushti patjetër duhet të na gjejë me finalizimin e ndërhyrjes këtu”.
“Së bashku me kryetarin kemi biseduar për ta vijuar në 3 akset e rëndësishme në Vlorë. Ta vazhdojmë tek kanali i Naumkës dhe ta vazhdojmë dhe ke kanali tjetër që ҫon direkt në hidrovor, duke ditur që bashkia aktualisht ka edhe mundësinë që të financojë në rehabilitimin tërësor të hidrovorit të Vlorës, një hidrovor tejet i amortizuar, prej më shumë se 60 vitesh tashmë. Ndërkohë kemi një zonë që është në zhvillim e sipër dhe ka aktivitet turistik gjithëvjetor dhe duhet që kjo pjesë e infrastrukturës fundore t’i përgjigjet këtij realiteti të ri”, deklaroi Vengu.
TIRANË, 8 gusht /ATSH/ Shqipëria do të ndikohet nesër nga kushte atmosferike të qëndrueshme, duke sjellë një ditë kryesisht me diell në të gjithë territorin.
Sipas parashikimit nga shërbimet meteorologjike, moti pritet të jetë i kthjellët në pjesën më të madhe të vendit, ndërsa në relievet e larta malore të qendrës dhe jugut, në orët e mesditës deri në ato të pasdites, do të ketë vranësira kalimtare.
Era do të fryjë me drejtim verilindje – veriperëndim, me shpejtësi mesatare prej 8 m/s. Në zonat luginore dhe përgjatë vijës bregdetare pritet forcim i përkohshëm i saj me shpejtësi 8-16 m/s, shoqëruar me valëzim në det të forcës 1-3 ballë.
Temperaturat do të shënojnë vlera të larta në të gjithë territorin, si më poshtë:
Shkodër: 22 / 37°C – Diell
Kukës: 18 / 35°C – Diell
Lezhë: 24 / 37°C – Diell
Dibër: 15 / 34°C – Diell
Durrës: 21 / 35°C – Diell
Tiranë: 22 / 37°C – Diell
Elbasan: 21 / 39°C – Diell me pak re
Berat: 19 / 38°C – Diell me pak re
Vlorë: 20 / 36°C – Diell
Korçë: 15 / 32°C – Diell me re
Gjirokastër: 17 / 37°C – Diell me pak re
Sarandë: 15 / 32°C – Diell
TIRANË, 7 gusht /ATSH/ Shërbimi Meteorologjik Ushtarak njoftoi se sot vendi ynë do të ndikohet nga kushte atmosferike të qëndrueshme.
Moti parashikohet i kthjellët e me vranësira të pakta e hera-herës deri mesatare në orët e mesditës në relievet malore në verilindje e juglindje të territorit.
Era do të fryjë me drejtim verilindje – veriperëndim me shpejtësi mesatare 7 m/s, ndërsa në zonat luginore dhe përgjatë vijës bregdetare hera-herës do të fitojë shpejtësi 7-14 m/s, shoqëruar me valëzimin të forcës 1-3 ballë.
Login
