Presidenti amerikan, Donald Trump ka thënë se është i zhgënjyer, por nuk ka mbaruar punë me Vladimir Putinin, në një telefonatë ekskluzive me BBC-në.

Donald Trump  u pyet nëse i beson udhëheqësit rus dhe u përgjigj: “Nuk i besoj pothuajse askujt”.

Trump foli disa orë pasi njoftoi planet për të dërguar armë në Ukrainë dhe paralajmëroi për tarifa të ashpra ndaj Rusisë nëse nuk do të kishte marrëveshje armëpushimi brenda 50 ditësh.

Në një intervistë të gjerë nga Zyra Ovale, presidenti amerikan gjithashtu mbështeti NATO-n, pasi e kishte përshkruar dikur si të vjetëruar, dhe pohoi mbështetjen e tij për parimin e mbrojtjes së përbashkët të organizatës.

Pasi u takua me shefin e NATO-s, Mark Rutte, në Shtëpinë e Bardhë, presidenti kaloi një pjesë të konsiderueshme të intervistës duke folur gjerësisht për zhgënjimin e tij me udhëheqësin rus.

Trump tha se kishte menduar se një marrëveshje ishte në plan me Rusinë katër herë të ndryshme.

Dhe kur u pyet nga BBC nëse kishte mbaruar me Putinin, presidenti u përgjigj: “Jam i zhgënjyer me të, por nuk kam mbaruar me të. Por jam i zhgënjyer me të”.

Ndërsa i pyetur se si Trump do ta bënte Putinin të “ndalonte gjakderdhjen”, presidenti amerikan tha: “Po punojmë për këtë”./abcnews.al

Presidenti ukrainas Volodymyr Zelensky propozoi sot që kryeministri Denys Shmyhal të emërohet ministër i Mbrojtjes, si pjesë e një riorganizimi të kabinetit që ende ka nevojë për miratim parlamentar.

“Përvoja e gjerë e Denys Shmyhal padyshim do të jetë e dobishme për të si ministër i Mbrojtjes i Ukrainës”, tha Zelensky në një fjalim sonte, duke shtuar se planifikonte të emëronte Ministren e Ekonomisë, Yulia Sviridenko si kryeministre.

Denis Shmyhal, i cili u emërua kryeministër në vitin 2020, drejtoi qeverinë gjatë pandemisë së koronavirusit, përpara se të fillonte pushtimi rus i Ukrainës në shkurt 2022. Ministri aktual i Mbrojtjes, Rustem Umerov do të bëhet ambasador në Shtetet e Bashkuara, tha presidenti ukrainas javën e kaluar.

Riorganizimi më i gjerë që nga fillimi i pushtimit rus vjen pas muajsh pengesash për forcat ukrainase në vijat e frontit, dhe një përshkallëzimi të sulmeve ajrore ruse në qytete në të gjithë vendin.

Emërimi i Denys Shmyhal do të duhet të miratohet nga parlamenti, i cili mbështeti me shumicë dërrmuese Zelensky pas pushtimit rus dhe pritet ta bëjë këtë përsëri.

Dashi

Marrëdhënia me atë që keni në krah do jetë shumë e paqëndrueshme gjatë kësaj dite. Nuk do jeni shumë në humor dhe herë pas here do debatoni ashpër me të. Beqarët do jenë të parezistueshëm dhe do marrin propozime pa fund. Në planin financiar nuk do keni dëshirë të ulni shpenzimet dhe kjo mund ta përkeqësojë gjendjen në të cilën ndodheni.

Demi

Kjo ditë do jetë mjaft e përshtatshme për të bërë disa rregullime në jetën tuaj në çift ose për të marrë vendime për të ardhmen. Të dy do jeni realistë dhe të qartë për atë që doni të bëni. Beqarët jo vetëm që do kenë takime, por mund të fillojnë edhe histori dashurie pasionante. Në planin financiar merrini gjërat shtruar edhe sikur t’ju dalin vështirësi.

Binjakët

Kjo ditë do jetë mjaft romaneske për të dashuruarit. Gjithçka do ndodhë si me magji dhe herë pas here do ju duket vetja sikur jeni vërtet në një ëndërr të bukur. Beqarët nuk do jenë në humorin e duhur për të dalë e për të njohur persona të rinj. Për një buxhet të qëndrueshëm shpenzoni aq sa ua mban xhepi, jo më tepër. Vetëm disa mund të përfitojnë ndonjë shpërblim nga puna.

Gaforrja

Dita do fillojë mjaft mirë sot, por me kalimin e orëve situata do ju dalë jashtë kontrollit. Mos lejoni që problemet në punë apo në familje të ndikojnë në lidhjen tuaj. Beqarët duhet të reflektojnë shumë herë para se të pranojnë ndonjë takim me persona që sapo i kanë njohur. Të ardhurat do jenë në të njëjtën gjendje si disa ditë më parë. Nuk keni pse të shqetësoheni.

Luani

Do jetë dita më e favorshme sot për të zgjidhur të gjitha debatet dhe problemet në çift. Do toleroni më shumë se kurdoherë tjetër. Beqarët do jenë në kërkim të princit të kaltër, por nuk do arrijnë dot ta gjejnë as gjatë kësaj dite. Buxhetit do i bëni një riorganizim të përgjithshëm sepse kohët e fundit e kishit lënë goxha pas dore. Dëgjojini edhe këshillat e disa të afërmve.

Virgjëresha

Ata që janë në një lidhje do jenë më të ndjeshëm dhe më romantikë gjatë kësaj dite. Priten çaste të mrekullueshme pranë atij që dashuroni. Beqarët do kenë një ditë të zakonshme pa ndonjë takim mbresëlënës. Mos kërkoni asgjë me ngut ose me inat. Financat do kërkojnë më tepër vëmendje. Po i kaluat limitet e shpenzimeve do keni vështirësi të mëdha.

Peshorja

Do jeni shumë xhelozë ndaj partnerit tuaj gjatë kësaj dite dhe kjo do sjellë probleme serioze në lidhjen që keni ndërtuar. Mos e teproni nëse nuk doni ta humbni atë që keni në krah. Beqarët më mirë të qëndrojnë vetëm sepse përndryshe do përballen me zhgënjime. Edhe pse do e keni të vështirë të kurseni, duhet medoemos ta bëni këtë që të mos keni vështirësi financiare.

Akrepi

Ditë shumë e mirë kjo e sotmja për ata që janë në një lidhje. Do ndiheni të sigurt dhe të lumtur pranë atij që keni në krah dhe do dëshironi që t’i bëni gjërat më serioze. Beqarët nuk do jenë në humorin e duhur për të kërkuar dikë. Financat do jenë goxha të paqëndrueshme. Shmangni çdo lloj shpenzimi të tepruar dhe çdo lloj huaje. Nuk është ende momenti për ta lënë veten të lirë.

Shigjetari

Ditë shumë e zakonshme dhe pa asgjë të veçantë kjo e sotmja. Merrini gjërat si t’ju vijnë pa e vrarë shumë mendjen se ç’do ndodhë më tej. Beqarët duhet të gjejnë mënyrën e duhur për të joshur personin që pëlqejnë dhe do ia arrijnë qëllimit. Të ardhurat nuk do jenë të mira për të gjithë. Ata që kanë pasur probleme do e kenë sërish të vështirë të kryejnë ndonjë shpenzim më tepër.

Bricjapi

Jeta sentimentale e çifteve do jetë e mrekullueshme sot. Do flisni më hapur për gjithçka dhe nuk do mbani mëri për të kaluarën. Beqarët do jenë të lirë të bëjnë çfarë të duan sepse mundësitë për takime dhe për aventura do jenë të shumta. Financat do jenë më delikate se disa ditë më parë, prandaj duhen marrë sa më shpejt masa strikte.

Ujori

Do jeni shumë të qartë për ato që doni të bëni në jetën tuaj në çift sot dhe marrëdhënia me partnerin do ketë ndryshime. Nëse jeni lodhur nga rutina e kohëve të fundit mund të merrni vendime drastike. Beqarët nuk do jenë në humorin e duhur për të dalë e për t’u njohur me persona të rinj. Në planin financiar do jenë disa të afërm që do ju ndihmojnë ta stabilizoni situatën.

Peshqit

Do jeni gjithë kohës me nerva sot dhe shpesh do ia nxirrni gjithçka atij që keni në krah. Kujdes mos e teproni sepse edhe durimi e ka një kufi. Beqarët do jenë pa fat, kështu që edhe sikur të kërkojnë gjithë kohës nuk do e gjejnë princin e kaltër. Në planin financiar do jeni me fat. Do shpenzoni për gjithçka që doni dhe do hiqni edhe disa para mënjanë.

Mbërriti thjesht, por pritet të bëjë mrekulli.

Luka Modriç zbriti në aeroportin Malpensa të Milanos, dhe mori rrugën për në qendrën e Milanelos, ndërsa nisi aventura e tij si lojtar i ri i Milanit.

Ylli më i madh i futbollit të Kroacisë për të gjitha kohët përshëndeti tifozët dhe gazetarët duke deklaruar se ishte i lumtur, dhe është një nga përforcimet e para të arritur nga drejtori i ri sportiv, Igli Tare, dhe u kërkuar e pëlqyer nga trajneri Masimiliano Alegri.

Më pas, veterani 39-vjeçar iu nënshtrua vizitave mjekësore në klinikën Madonina, të cilat i përfundoi me sukses, e më pas erdhi firmosja e kontratës.

Klubi kuqezi njofton se akordi është njëvjeçar, deri në 30 qershor 2026, me mundësi për t’u zgjatur edhe për një sezon tjetër.

Ai do të mbajë fanelën me numrin 14, ashtu si tek Totenhemi, ndërsa për 8 sezone tek Reali pati numrin 10.

Modriç vërtet është pranë fundit të karrierës, por pritet ta ndihmojë Milanin me përvojën e tij të jashtëzakonshme, dhe me mentalitetin tepër fitues.

Jo më kot ai u bë lojtari me më shumë trofe në historinë e Realit të Madridit, me 27 tituj, ndër të cilat 6 Champions, 4 La Liga, 5 Superkupa të Europës e gjashtë Kupa të Botës për Klubet.

Milani ka nisur fazën përgatitore nën drejtimin e trajnerit Alegri, dhe Modriç pritet të bashkohet pasi të kalojë disa ditë pushim për shkak të pjesëmarrjes në Kupën e Botës për Klubet.

Synimi është kualifikimi të paktën për në Champions, ndërsa dëshira tjetër e madhe është shqiptari nga Kosova, ylli i ri i Zvicrës, Ardon Jashari./abcnews.al

Gazetari Fatos Mahmutaj, i ftuar në emisionin “Ora e Fundit” në Abc News, ka komentuar situatën me ndërtimet pa leje në zonën turistike të Thethit, duke e cilësuar si një “katrahurë” të ndërtuar mbi mungesën e zbatimit të ligjit dhe përfitimin nga fushatat zgjedhore.

Sipas tij, shumë qytetarë kanë zgjedhur rrugën e shkurtër për të ndërtuar ilegalisht, duke përfituar nga periudha e qetësisë institucionale gjatë zgjedhjeve. Mahmutaj thekson se qeveria, përmes nismave të rilindjes urbane, po përpiqet të legalizojë këtë realitet me mjete ligjore, një rrugë që ai e cilëson të vështirë, por të domosdoshme në funksion të integrimit europian dhe reformimit të administratës lokale.

“Ndërtimet pa leje në Theth, Rama po rregullon me ligj parregullsitë. Njerëzit zgjodhën rrugën e shkurtër duke bërë ndërtime pa leje. Njerëzit përfituan nga fushata zgjedhore, duke e ditur që gjatë fushatën nuk bëhen lëvizje, dhe marrë shkas nga kjo kanë ndërtuar në mënyrë të paligjshme, në formën e një katrahurë. Kemi Shqipërinë e viteve të fundit që ka pasur një bum turizmi dhe pse mos të investojmë në formën e duhur, të ligjshme. Rilindja urbane, Rama ka zgjedhur një rrugë të vështirë, nuk po them që është e padrejtë. Ai po kërkon një frymë të re.

Rruga që ka zgjedhur që Rama është i vështirë, por mendoj që pas shtatorit do të kemi zhvillime të reja dhe Shqipëria ka aspirata për të shkuar në BE. E mira është që rinovohet gjithçka, populli thotë që uji që qëndron qelbet, pra le të rrjedhe dhe le të qarkullojnë funksionarët që nga niveli qendror dhe nga niveli lokal. Deri tani kishim qoka, nuk kishim as votime dhe as emërime nëpër bashki dhe komuna, të cila ulnin performancën në nivelin më të ulët të mundshëm. Berisha ka dashur gjithmonë përçarje të Shqiptarëve, këtë ka dashur gjithmonë. Berishës i ka ikur koha, nuk duhet marrë në konsideratë”, tha gazetari./abcnews.al

Anullohet tenderi për ndërtimin e autostradës Milot-Balldre . Ministria e Infrastrukturës argumenton ne njoftimin e anulimit se asnjë ofertë pjesëmarrëse në garë nuk është vlerësuar e përshtatshme pasi nuk plotësonte kushtet e kërkuara.

Koncesioni për ndërtimin dhe operimin e autostradës Milot Balldre ka një vlerë prej 364.7 milionë lekësh dhe është me një kohëzgjatje prej 35 vitesh.

Gjurma e propozuar e rrugës “Milot-Balldre” ka një gjatësi prej 17 km dhe fillon në nyjën e Milotit, ku do të lidhet me segmentin Milot-Thumanë-Kashar-Lekaj dhe me Rrugën e Kombit, dhe do të përfundojë në rrugën ekzistuese Tiranë –Shkodër, në Balldre./abcnews.al

Ultimatumi i Edi Ramës nisi nga zbatimi.

Tre ditë pasi kryeministri kërkoi shkarkim të zyrtarëve lokalë socialistë, kryetarët e njësive administrative në Bashkinë e Elbasanit dhe bashkinë e Librazhdit i kanë paraqitur dorëheqjen kryetarëve respektive.

Në Lushnje, drejtuesja politike Belinda Balluku ka kërkuar dorëheqjen e 13 administratorëve dhe të drejtorëve. Puna e tyre do ti nënshtrohet vlerësimit të një komisioni të posaçëm, i cili do vendosë nëse do qëndrojnë në detyre apo do largohen.

Në Fier kanë dhënë dorëheqjen të gjithë administratoret e njësive, drejtore të bashkisë dhe drejtorive rajonale.

Në Durrës, nga detyra janë larguar administratorët e pesë njësive administrative së bashku me administratorët e gjashtë rajoneve.

Në Shkodër bashkia konfirmoi dorëheqjen e të gjithë administratorëve, te e 10 njësive administrative.

Po ashtu, përpara kryetarëve të tyre, dorëheqjen e kanë paraqitur edhe 6 administratore të Bashkisë së Korçës dhe 3 të Bashkisë së Kolonjës dhe 4 të Devollit.

Ata do të qëndrojnë në detyrë deri kur të zëvendësohen ndërkohë që burime për ABC Neës konfirmojnë se nuk do të ketë largime të nënkryetareve.

Në ditët në vijim mësohet se kryeministri Edi Rama do të vizitojë qarkun e Korçës.    Dorëheqjen e kanë dhënë edhe 7 administratorë në Bashkinë e Gjirokastrës.

Në Kukës, dy nënkryetarët e Bashkisë dhe 14 drejtuesit e njësive administrative u shkarkuan nga kryebashkiaku Albert Halilaj.

Kjo valë dorëheqjesh vjen pas një procesi të gjerë riorganizimi dhe vetëpastrimi të administratës vendore, me qëllim rritjen e efikasitetit, transparencës dhe shërbimeve publike ndaj qytetarëve. Kjo do ti hapë rrugë emërimeve të reja, që siç ka deklaruar kryeministri, do të kryhen mbi bazën e meritokracisë dhe integritetit profesional.

Në takimin me kryebashkiakët të premten, Rama paralajmëroi se do të punësojë specialiste si dhe do të emërojë në postë drejtuese edhe demokratë./abcnews.al

Ka pasur disa sinjale se më shumë kamionë dhe furnizime po mbërrijnë në Gazë, por Bashkimi Evropian nuk sheh përmirësim të mjaftueshëm në terren, tha sot shefja e politikës së jashtme të BE-së, Kaja Kallas, përpara një takimi me zyrtarë të lartë të Lindjes së Mesme dhe BE-së, në Bruksel.

“Situata në terren, në Gazë është serioze. Është një gjë të nënshkruash marrëveshje në letër dhe një tjetër t’i zbatosh ato”, tha Kallas.

BE-ja arriti një marrëveshje me Izraelin javën e kaluar për të përmirësuar situatën humanitare në Rripin e Gazës, duke përfshirë rritjen numrit të kamionëve me ndihma dhe hapjen e pikave të kalimit dhe rrugëve të caktuara të ndihmës.

“Më kërkuan të hartoja një listë me sanksione, tani u takon 27 vendeve të vendosin se çfarë duhet të bëjnë”, tha Kallas duke iu referuar masave te mundshme kundër Izraelit për shkelje të të drejtave të njeriut.

Në qershor të vitit 2025, Spanja, Irlanda dhe Sllovenia kërkuan pezullimin e Marrëveshjes së Asociimit BE-Izrael.

Suedia gjithashtu i ka kërkuar Këshillit Evropian të miratojë sanksione kundër ministrave izraelitë që promovojnë aktivitete të paligjshme të vendbanimeve dhe punojnë në mënyrë aktive kundër një zgjidhjeje të negociuar me dy shtete.

Në përputhje me rrethanat, përfaqësuesja e Lartë e BE-së për Punët e Jashtme dhe Politikën e Sigurisë, Kaja Kallas ka propozuar një listë të sanksioneve ndaj Izraelit, të cilat do të diskutohen në Këshillin e ardhshëm të BE-së.

Në frutat e ngrira të malit, me prejardhje nga Serbia dhe të destinuara për tregun gjerman, është zbuluar prania e virusit të hepatitit A, thuhet në faqen zyrtare të Sistemit Evropian për Alarme të Shpejta për Ushqimin (RASFF).
Paralajmërimi është lëshuar më 10 korrik, ndërsa mostrat janë marrë më 15 maj të këtij viti.
Rreziku është vlerësuar si “serioz”. Hepatiti A është inflamacion i mëlçisë i shkaktuar nga virusi i hepatitit.

Ky virusi përhapet kryesisht kur një person i painfektuar (dhe i pavaksinuar) konsumon ushqim ose ujë të ndotur me jashtëqitje të një personi të infektuar. Sëmundja është ngushtësisht e lidhur me ujë ose ushqim të pasigurt, kushte të pamjaftueshme sanitare dhe higjienë të dobët personale, sipas Organizatës Botërore të Shëndetësisë.

Ndryshe nga hepatiti B dhe C, hepatiti A nuk shkakton sëmundje kronike të mëlçisë, por mund të shkaktojë simptoma nga të lehta deri në të rënda dhe rrallëherë hepatit fulminant (dështim akut i mëlçisë), i cili shpesh është fatal.

Një aksident i rëndë ka ndodhur mbrëmjen e kësaj të hëne, rreth orës 20:40, në aksin rrugor Elbasan – Metalurgji, në afërsi të vendit të njohur si “Ish qendra tregtare”. Sipas burimeve nga vendngjarja, një automjet ka përplasur një person rreth 60 vjeç, i cili po lëvizte me biçikletë. Përplasja ka qenë e fortë, duke i shkaktuar drejtuesit të biçikletës dëmtime në kokë.

Për shkak të goditjes  së rëndë, i plagosuri është  nisur nga Elbasani me urgjencë drejt Spitalit të Traumës në Tiranë për trajtim të specializuar.

Policia ka mbërritur në vendngjarje dhe ka nisur hetimet për të zbardhur rrethanat e aksidentit./abcnews.al

Read More...

Ministrat e Bashkimit Evropian ranë dakord në takimin që patën këtë të hënë që të përqendrohen në negociata intensive me Shtetet e Bashkuara për të shmangur tarifat e reja prej 30% ndaj importeve Europiane, të cilat presidenti Amerikan Donald Trump ka paralajmëruar se do të hyjnë në fuqi në 1 gusht.

Komisioneri Evropian për Tregtinë, Maros Sefcovic (Maros Sefkovic), paralajmëroi se një tarifë e tillë do të “shkatërronte tregtinë transatlantike” dhe do të kishte pasoja të mëdha për zinxhirët e furnizimit dhe ekonominë në të dy anët e Atlantikut. Ai shtoi se ndonëse kërcënimi ka krijuar një “dinamikë të re”, negociatat janë ende të hapura dhe mund të sjellin një rezultat të mirë për të dyja palët.

“Një tarifë 30% e bën pothuajse të pamundur të vazhdohet tregtia si më parë. Prandaj do të bëj gjithçka për të shmangur këtë skenar jashtëzakonisht negativ,” tha Sefcovic para takimit të ministrave të BE-së për çështjet tregtare. Edhe pse Trump ka dërguar një letër zyrtare për vendosjen e tarifave, BE ende beson se negociatat me SHBA-të mund të vazhdojnë. Megjithatë, Komisioni Evropian ka theksuar se BE-ja duhet të përgatitet për çdo skenar, përfshirë edhe kundërmasa ndaj Washingtonit.

Komisioni ka propozuar pezullimin e paketës së parë të tarifave të mundshme kundër mallrave amerikane në vlerë prej 21 miliardë eurosh, për të zbutur marrëdhëniet me Washingtonin.

Megjithatë mediat ndërkombëtare shkruajnë se Unioni 27 anëtaresh mund të përgatis edhe një paketë të dytë që do të godiste mallrat amerikane me vlerë prej 72 miliardë eurosh. Ministri i Jashtëm danez, deklaroi se është ende herët për kundërmasa, por BE duhet të jetë gati për çdo hap të nevojshëm.

“Nëse do paqe, duhet të përgatitesh për luftë. Dhe mendoj se kjo është situata ku ndodhemi,” u shpreh ai. Ndërkohë, Ministri francez për Tregtinë, kërkoi që BE të shkojë përtej propozimeve të Komisionit dhe të shqyrtojë goditjen edhe ndaj shërbimeve amerikane apo përdorimin e një instrumenti financiar që lejon BE-në të hakmerret kundër vendeve të treta që ushtrojnë presion ekonomik ndaj vendeve anëtare./abcnews.al

Shtetet e Bashkuara do të tarifojnë Rusinë me 100% tarifa tregtare nëse Vladimir Putin nuk pranon t’i jap fund luftës me Ukrainën brenda 50 ditësh. Ishte ky njoftimi i fortë i paralajmëruar nga Presidenti Amerikan që u dha këtë të hënë nga Shtëpia e Bardhë, pasi Trump takoi Sekretarin e përgjithshëm të NATO-s, Mark Rute.

Kreu i Shtëpisë së Bardhë deklaroi se presioni, i tij tregtar ka shërbyer për të ndalur dhe parandaluar disa luftëra, ku mes tyre sipas asaj që Trump tha ishte edhe një luftës mes Kosovës dhe Serbisë.

“Jemi shumë të pakënaqur me Rusinë dhe ne do të vendosim tarifa shumë të ashpra nëse ata nuk arrijnë një marrëveshje paqeje brenda 50 ditësh. Tarifa tregtare prej 100%, do ti quaja tarifa dytësore dhe ju mund ta kuptoni se çfarë do të thotë kjo. Ne kemi qenë të suksesshëm në zgjidhjen e shumë luftërave nëpërmjet presionit tregtar. Keni Indi – Pakistan, keni Ruandë – Kongo keni gjithashtu Kosovën dhe Serbinë. E përdora tregtinë për ta ndalur këtë luftë mes tyre”, tha Trump.

Donald Trump tha se është koha që Vladimir Putin ti kthejë vendit të tij ekonominë që meriton, ndërsa shtoi se nuk është i sigurt nëse tani ne këto momente duhen Sanksione te reja ndaj Rusisë. Presidenti Amerikan tha se ai ka folur disa herë me Presidentin Rus dhe tha se bisedimet me të ishin shumë të mira, por shtoi se Kreu i Kremlinit sapo mbyllte telefonatën me të zgjidhte të bombardonte qytetet Ukrainës duke shfaqur qarte zhgënjimin me të.

Kreu i Shtëpisë së Bardhë dha më shumë detaje edhe mbi armët që Washingtoni do ti jap Ukrainës ku theksoi se pagesat e këtyre armëve prej miliarda dollarësh  do të bëhen nga Bashkimi Europian dhe nga NATO, duke shtuar se kjo nuk do të jetë më një barrë vetëm e Amerikës. Trump tha se në dërgesat e armëve për Ukrainën  do të ketë edhe armë të tjera përveç sistemeve të mbrojtjes ajrore Patriot, por për diçka të tillë nuk dha më shumë detaje.

Në rastet e nevojave urgjente Kreu i shtëpisë së Bardhë tha  se armët për Ukrainën mund të dërgohen nga bazat amerikane në Europë dhe më pas Washingtoni do ti zëvendësoj ato në vende siç është Gjermania. Hapi i fundit i Donald Trump për të shtuar presionin maksimal ndaj Rusisë vjen pasi Presidenti Amerikan ka deklaruar më herët se mbyllja e luftës në Ukrainë mbetet një nga prioritetet e tij kryesore./abcnews.al

THETH- Kryeministri i vendit, Edi Rama ka reaguar sërish mbi aksionin e ndërmarrë në pikën turistike të Thethit për shembjen e ndërtimeve pa leje.

Ai theksoi se forcat e xhenios do vijojnë të qëndrojnë në Theth deri në largimin e mbeturinës së fundit.

Sipas Ramës, mbetet edhe një godinë masive për t’u shembur, që të përmbyllet ekzekutimi i plotë i vendimeve të IKMT dhe rikthimi i Thethit në normalitetin e para kësaj “marrëzie kriminale”.

Shefi i qeverisë pohon se ka nisur “Rilindja Urbane 2.0”, të cilën e shikon si një domosdoshmëri jetike për rrugëtimin e Shqipërisë drejt Bashkimit Evropian.

“Ka nisur sot në Theth me mbështetjen e forcave të xhenios, pastrimi i mbetjeve inerte të ekzekutimit të vendimeve në ngarkim të 40 subjekteve që kishin mbjellë mbi 100 ngrehina pa leje – nga ato me mure tek ato me kontruksion metalik e me dru – në dhunim ekstrem të ligjit për zonat e mbrojtura, të historisë e të pejsazhit magjepsës të asaj zone dhe të turizmit që kanë kultivuar në vite ata që kanë sakrifikuar për ta bërë Thethin destinacionin që është sot.

Forcat e xhenios nuk do të largohen nga Thethi deri kur të jetë hequr edhe mbeturina e fundit, ndërkohë që mbetet edhe nje godinë masive për t’u shembur, që të përmbyllet ekzekutimi i plotë i vendimeve të IKMT dhe rikthimi i Thethit në normalitetin e para kësaj marrëzie kriminale.

Ka filluar Rilindja Urbane 2.0 si domosdoshmëri jetike për Shqipërinë 2030 në BE”, tha ai./abcnews.al

I ftuar në emisionin “Real Story” në ABC News, analisti politik Roland Bejko theksoi se për të çarë në skenën politike, partitë e vogla duhet të ndërtojnë një bazë të qëndrueshme mbi parime dhe vlera të qarta. Sipas tij, këto forca nuk mund të funksionojnë si modele autoritare, por duhet të gjejnë një kohezion të brendshëm dhe të ndërtojnë një marrëdhënie të shëndetshme mes anëtarëve të tyre, e cila nuk duhet të prishet përmes përplasjeve publike.

Bejko nënvizoi se partitë që synojnë të sjellin ndryshim duhet të kenë si udhërrëfyes vlerat demokratike, tolerancën, komunikimin e hapur dhe përkushtimin ndaj çështjeve thelbësore si liria, ndërtimi i shtetit dhe reforma sociale e ekonomike.

“Gjithçka që këta e kanë realizuar shumë gjatë dhe në detaj se si është paraqitur politika në 35 vite dhe e kanë paraqitur atë në fushata që kanë bërë, në studio dhe në biseda individuale. Këta duhet t’i kenë manual mbi tavolinë, duhet që të mbështeten në vlera morale, në parime të qëndrueshme, mbi tolerancën pa diskutim dhe duhet që të gjejnë një kohezion të brendshëm, sepse nuk mund që të funksionojë një parti moderne mbështetur tek autoritarizmi i një lidershipi të caktuar dhe tek disiplina. Këta janë të detyruar që të bashkëjetojnë në koherencë dhe të ndërtojnë disa shtylla pricipale mbi të cilat këta nuk duhet t’i negociojnë me asnjë siç janë çështjet e lirisë, të komunikimit dhe njëri-tjetrin, me shtet bërjen, me republikën me gjithçka që është keq në aspektin politik, por dhe ekonomik, social e të tjera. Këta duhet të ruajnë fillimisht një marrëdhënie të brendshme, të ruajnë njëri-tjetrin dhe të mos i zgjidhin në debate publike”, tha Bejko./abcnews.al

TIRANË- Kryetari i Nisma Thurje, Endri Shabani, i ftuar në “Real Story” foli mbi debatin e krijuar për “fatin” e mandatit të koalicionit “Nisma Shqipëria Bëhet”.

Ai komentoi dhe shkresën që Zeqir Kordhoni, i ka bërë KQZ, i cili i ka kërkuar t’i vihet në dispozicion letra e dorëheqjes të cilën pretendon se nuk e ka dhënë ai personalisht.

“Më lëvizjen që ka bërë Zeqiri, sikur ta çoj më tej, unë  përfundimisht nuk kam më asnjë shans që ketë mandat ta marr në katër vitet e ardhshme, sepse nëse mandati mbetet në listën e  mbyllur, unë skam më asnjë shans.

Nëse mandatin e merr Adriatikun, në katër vite mund të ndodhin një mijë gjëra, ai mund të garojë për bashkinë, garon për këtu, për aty dhe mandati më kalon mua.. Nëse mandati mbetet te lista e mbyllur, nuk  vjen kurrë radha te unë, sepse janë 12 veta aty.

E para e listës së mbyllur është familjare e Adriatik Lapajt, Ana Dajko. E dyta, pse duhet ta inkurajoja dikë që është në fund të listës pasi mund të kisha inkurajuar të dytën e listës, që është e fejuara ime apo motrën apo… Thelbi është se nuk kam asnjë interes. Nuk kam ndryshuar asnjë gjë nga fillimi në fund. Unë besoj se kemi gjetur një artificë për të garuar me lista të hapura edhe te sistemi i tyre, sepse kjo është loja dhe skema e tyre.

Vazhdoj të insistoj, i kam dërguar një letër KQZ, shpresoj që KQZ do ndjek precedentët që ka pasur. E kuptoj që aty do ketë presion edhe nga klasa e vjetër politike, sepse të gjithëve u intereson që mandati të mos kaloj në listën e hapur, Nuk ka për t’i kaluar Nismës ajo, nuk kemi për të marr mandat. Rreziku është që të mbetet te lista e mbyllur, por ngeli te lista e mbyllur askush nuk do provoj skemën që provuam ne.”, theksoi ai.

Ai pohoi se Lapaj pretendon të marrë mandatin e deputetit.

“Ai ka synimin për të marrë mandatin dhe i takon sepse është më i votuari”, theksoi ai./abcnews.al

Në një debat të ngarkuar emocionalisht në studion e emisionit Real Story në ABC News, gazetari Martin Leka dhe analisti Roland Bejko shprehën shqetësimin e tyre mbi situatën aktuale politike dhe përçarjet brenda koalicionit “Shqipëria Bëhet”. Leka u shpreh i zhgënjyer nga zhvillimet e fundit, duke vënë në dyshim nëse votat e marra nga ky koalicion përfaqësojnë shpresën e qytetarëve, apo janë produkt i zhgënjimit të thellë ndaj opozitës dhe mazhorancës.

Sipas Lekës, morali dhe ideja fillestare e bashkimit për ndryshim janë komprometuar, dhe bashkëpunimi me nismën “Thurje” duhet të rishqyrtohet. Ai shtoi se mandati, sipas parimeve të shpallura nga vetë drejtuesit e koalicionit, duhet t’i kishte kaluar kandidatit Shabani.

“Jam i zhgënjyer nga e gjithë kjo që ndodh. Jam shumë në dilemë se shumë vota që i kanë shkuar Shqipëria Bëhen janë vota të shpresës, apo thjesht të zhgënjimit nga opozita apo mazhoranca. Është një spektakël i shëmtuar. Nëse ne i shkojmë idesë që duhet të ngjallim shpresë, shpesa është tek fjala që hyn. Sipas fjalës së Lapajt, mandati sot duhet të merrte Shabani Në këtë situatë unë mendoj, se për hir të së vërtetës koalicioni ‘Shqipëria bëhet’ dhe nisma ‘Thurje’ duhet prishur, është prishur morali i koalicionit dhe idesë për të cilën kanë hyrë në këto zgjedhje”, tha Martin Leka.

Analisti Roland Bejko e cilësoi si të dhimbshme çfarë po ndodh me koalicionin, duke theksuar se, pavarësisht arritjes së 200 mijë votave, një sukses në kushtet e sistemit aktual zgjedhor dhe përballë figurave dominante si Rama dhe Berisha brenda strukturës është shfaqur një krizë e thellë identiteti dhe morali. Ai kritikoi mungesën e një ideologjie të qartë, duke thënë se përplasjet mes drejtuesve dhe debati publik e kanë dëmtuar rëndë imazhin e kësaj force politike.

“200 mijë vota nuk janë pak Këta janë më të votuarit dhe u mërzita shumë. Të kesh dy dinozaur të mëdhenj si Rama e Berisha dhe me këtë Kod Zgjedhor është arritje për partitë e vogla. Kam qenë pesimist se do të prisheshin. Ju mund edhe ta mbani këtë koalicion, por moralisht keni rënë. Nuk keni më një ideologji. Deri dje PD ka patur një program të djathtë që nuk e zbatoi dot kurrë. Sot nuk ka ideologji, ka vetëm Berishën. PD u ndërtua rreth një ëndrre të cilën e prishi Sali Berisha rrugës. Nuk mendoj se partia juaj do të fitonte. Unë personalisht për ty kam qenë në mbështetje, jam investuar dhe të kam dhënë vota. Në këtë moment, më dhimbset kjo që po ndodh, po humbet. U krijua perceptimi se edhe si gjithë të tjerët po ziheni për pushtet. Në këto kushte partia juaj nuk do të shkonte lart, sepse filluar cicmicet e vogla. Debati që bëri Lapaj dhe Qorin iu dëmtoi, që bëri Shehaj me Lapajn iu dëmtoi. Debatet me të mëdhenjtë dhe me të vegjlit ju ka dëmtuar”, tha Bejko i prerë./abcnews.al

TIRANË- Ujërat brenda opozitarëve të rinj janë trazuar. Një ditë pasi kandidati I Nismës thurje Zeqir Kordhoni, la të kuptohej se firma e dorëheqjes se tij ishte falsifikuar, nipi i tij Endri Shabani, i është drejtuar me një shkresë kryekomisionerit Ilirjan Celibashi, ku i kërkon të njohë të gjithë dorëheqjet  e 46 kandidatëve të koalicionit të paraqitura në KQZ më 11 maj.

Shabani thotë se mandati duhet ti kalojë të parit të listës së hapur, në këtë rast Adriatik Lapajt, duke shuar zërat se letra e Kordhonit ishte nxitur prej tij, dhe duke ja lënë topin Adriatik Lapaj për deklaratën e tij para zgjedhjeve lidhur me mandatin e vetëm qe nxori koalicion I tyre në 11 maj.

Të enjten, Zeqir Kordhoni, kërkoi nga KQZ që t’i vihet në dispozicion letra e dorëheqjes të cilën pretendon se nuk e ka dhënë ai personalisht, por ia ka bërë partia e Lapajt, ndaj dhe KQZ i ka hequr emrin.

Kreu i Nisma Thurje, Endri Shabani, i ftuar në “Real Story” theksoi se partia e tij nuk ka asnjë pretendim për mandatin në fjalë, ndërsa theksoi se vonesat e KQZ-së për të konfirmuar dorëheqjet ka lënë hapësirë për interpretime të tilla.

“Median e ushqen kjo telenovelë. Zeqiri është në fund të listës së mbyllur. Aktualisht mandatin e ka Ana Dako, e cila është në krye të listës së mbyllur dhe të gjithë kanë depozituar në KQZ dorëheqjet. 46 vetë kanë depozituar dorëheqjet.  KQZ ka dy muaj që i mban dorëheqjet aty dhe ende nuk ka proceduar për njohjet e dorëheqjeve dhe të kalojë direkt te lista e hapur, Adriatik Lapaj është i parë, unë i dyti dhe kështu vazhdon, Pano Soko, që janë të renditur në listë të hapur. Këto dy muaj kanë krijuar, kanë lënë hapësirë për fushëbetejë dhe tensione që ndodhin brenda një grupimi politik. Ka disa kandidatë aty, që edhe te lista e mbyllur, por edhe aktivistë të tjerë që janë mërzitur me dy apo tre gjera, me deklarata pas zgjedhore. Këta janë të partisë Shqipëria Bëhet, nga ana e Nismës Thurje janë mërzitur për shkak sepse para zgjedhjeve Adriatiku pati marrë një angazhim, që nëse do jetë vetëm një mandat do japë dorëheqjen për pasojë do angazhohemi të gjithë, sepse ju nuk po angazhoheni të më bëni mua deputet, pas zgjedhjeve ndryshoi qëndrim. Ne si Nisma Thurje s’kemi asnjë pretendim për atë mandat. Për ne është që të ruhet parimi i listës së hapur. Fjalët që thuhet duhen mbajtur, Adriatiku ka angazhimin e vet, ka figurën e vet politike dhe e ndërton vetë marrëdhënien me votuesit, kjo është një çështje, që është në dorë të  KQZ.”, tha ai.

Read More...

Gjykata e Sarandës ka lënë në burg 3 persona, të cilët lëvizin me armë në një automjet luksoz të premten në mbrëmje. Me kërkesë të Prokurores Hava Memko, Gjyqtari Fatmir Ndreu caktoi sot masën e sigurisë “Arrest në burg” për 27-vjecarin Endrit Doku, 27-vjecarin Ervis Cukali dhe 21-vjecarin Imer Gega, të tre nga Kamza.

Ata u ndaluan mbrëmjen e së premtes nga efektivët e forcave “Shqiponja” të Komisariatit të Sarandës, në rrugën “Butrinti”, teksa lëviznin me një automjet luksoz “Porsche” Panamera. Njëri prej tyre, pikërisht Endrit Doku, tentoi t’i largohej kontrollit duke u hedhur në det bashkë me çantën që mbante në krah.

Ai u arrit të kapej nga skafi i policisë kufitare Sarandë, ndërsa një polumbar gjeti në thellësi çantën bashkë me armën e zjarrit pistoletë brenda saj. Ndaj tij policia ngriti akuzën “mbajtje pa leje të armëve të zjarrit” dhe “kundërshtim i punonjësit të rendit publik.

Ndërsa dy të tjerët u arrestuan për akuzat “moskallëzimi i krimit” dhe “veprime që pengojnë zbulimin e së vërtetës”. Cukali ndërkohë rezultoi person në kërkim prej dy vitesh për “sigurim i kushteve dhe mjeteve materiale për të kryer vrasje” dhe “mbajtja pa leje dhe prodhimi i armëve luftarake”, për një ngjarje të ndodhur në Fier ku u zbuluan 21 kg tritol./abcnews.al