Është marrë në pyetje para efektivëve të policisë dhe më pas nga prokurori nëna e

Violand Braçellarit, i cili vrau mëngjesin e kësaj të premteje efektivin e policisë Enea Mekolli  dhe plagosi rëndë efektivin tjetër Edison Adri.

Ajo jetonte me autorin në stan dhe ka qenë e pranishme në momentin e përplasjes me armë. Policia e ka shoqëruar fillimisht në nënkomisariatin e policisë së Maliqit që në orën 07.30.min të mëngjesit.

Më pas është sjellë për të dhënë deklarimet në prani të prokurorit.

Ngjarja ndodhi në një stan ku fshihej 43-vjeçari Violand Braçellari, person i shpallur në kërkim dhe i dënuar me 10 vite burg për prodhim dhe shitje të lëndëve narkotike. Sipas të dhënave paraprake, forcat e policisë kishin lokalizuar vendndodhjen e tij dhe kishin organizuar operacionin për arrestimin.

Pas rrethimit të objektit, efektivët i kanë bërë thirrje Braçellarit të dorëzohej, por ai ka reaguar duke hapur zjarr në drejtim të uniformave blu. Nga të shtënat, efektivi Enea Mekolli u godit për vdekje, ndërsa kolegu i tij Edison Adri mbeti i plagosur rëndë. Burime pranë hetimit konfirmojnë se plumbi i ka përshkuar nofullën, duke i shkaktuar dëmtime të rënda. Ai u transportua fillimisht në spitalin e Korçës dhe më pas me helikopter drejt Spitalit të Traumës në Tiranë, ku ndodhet nën kujdes intensiv mjekësor.

Gjatë kundërpërgjigjes së forcave të policisë, autori mbeti i plagosur dhe u vu në pranga. Fillimisht ai mori ndihmë mjekësore në Korçë dhe më pas u transferua drejt Tiranës nën masa të forta sigurie.

Hetimet kanë zbuluar se Braçellari, ish-ushtarak profesionist dhe njohës i armëve të zjarrit, konsiderohej person me rrezikshmëri të lartë shoqërore. Në vitin 2017 ai u dënua me 10 vite burg për trafik narkotikësh, vendim që u la në fuqi nga Apeli dhe më pas edhe nga Gjykata e Lartë në janar të vitit 2024.

Megjithatë, mbetet ende e paqartë se si 43-vjeçari ndodhej në liri, pavarësisht vendimit të formës së prerë. Emri i tij rezulton i përfshirë edhe në procedime të tjera penale. Në vitin 2024 ai u mor i pandehur për plagosje të lehtë me dashje, ndërsa në fillim të këtij viti gjykata urdhëroi njoftimin e tij për një proces gjyqësor, pasi nuk ishte gjetur në adresën e deklaruar të banimit.

Grupi hetimor po vijon veprimet për të zbardhur plotësisht rrethanat e ngjarjes, ndërsa vrasja e efektivit të “Shqiponjave” konsiderohet një nga ngjarjet më të rënda që ka goditur Policinë e Shtetit.

Bizneset që dëshirojnë të përfitojnë nga skema e paqes fiskale kanë afat vetëm deri më 5 qershor për të dorëzuar aplikimet e tyre, pas së cilës datë Administrata Tatimore do t’i refuzojë ato automatikisht.

Interesi i sipërmarrjeve, veçanërisht nga sektori i ndërtimit është jashtëzakonisht i lartë për fshirjen e detyrimeve dhe lidhjen e marrëveshjeve të reja, duke krijuar një ngarkesë të madhe pune për ekspertët kontabël.

E ftuar në “Money Report” në ABC News, kontabilistja Etleva Treska sqaroi se kushti parësor për të përfituar është shlyerja e çdo detyrimi aktual ndaj organeve tatimore. Duke parë fluksin e lartë dhe oraret e ngjeshura, Treska u shpreh skeptike për kohën në dispozicion dhe bëri thirrje për një shtyrje të mundshme të afatit me qëllim që procesi të jetë sa më efektiv. Ndërkohë, transparenca e këtij procesi pritet të rritet përmes publikimit të paralajmëruar të një liste me mbi 500 bizneset përfituese.

“Gjëja e parë është që të mos kenë detyrim ndaj organeve tatimore. Interesi nga ana e bizneseve është i madh, oraret janë të ngjeshura. Kemi kërkesa për faljen e tatime dhe lidhjen e kontratave për paqen fiskale. Shumë biznese janë të interesuara për pjesën e fshirjes.

Më shumë interes kanë të sektorët e ndërtimit, për të pasur më shumë fitime nga viti në viti. Shkuarja drejt marrëveshje ka ndikuar jashtë mase me arritjen e paqes fiskale. Unë mendoj që jemi shumë ngushtë sa u takon afateve kohore.

Unë tek kjo pjesë jam skeptike, do doja që të kishte një shtyrje të afatit, për të bërë sa më efektivin lidhjen e një marrëveshjeje. Është thënë që do të ketë listë të mbi 500 bizneseve, kjo do e bëjë më transparente gjithë procesin”, u shpreh kontabilistja Etleva Treska.

Prokuroria e Posaccme ka shtuar dy akuza të reja për ish-zëvëndës kryeministren Belinda Balluku.

Krahas akuzës së shkeljes se barazisë në tendera apo ankande publike për të cilën Balluku është marrë e pandehur, SPAK ka shtrirë hetimet edhe në dy vepra të tjera penale që dyshohet se janë kryer nga Balluku.

Prokuroria komunikoi zyrtarisht se po heton edhe veprën penale korrupsion pasiv dhe pastrim parash.

Gjithashtu, me kërkesë të SPAK, GJKKO ka sekuestruar një vilë në Gjilekë që dyshohet se terthorazu i përket Balluku.

Vila e sekuestruar i përket igli Tares, i cili po merret aktualisht në pyetje në prokurori./abcnews.al

Shqipëria do të realizojë censin e bujqësisë. Vendimi është miratuar në mbledhjen  e qeverisë  dhe  censi do të  mbledhë të dhëna për tokën bujqësore, sipërfaqen e mbjelle, bagetite, bletarinë, punësimin në fermë, moshën dhe gjininë e personave të përfshirë në aktivitetet bujqësore.

I gjithë procesi vlerësohet se do të ketë një kosto prej 9.2 milion eurosh . Qëllimi kryesor i censit është  mbledhja e të dhënave  reale për bujqësinë shqiptare, sektor që vijon të mbajë një peshë të rëndësishme sociale dhe ekonomike, sidomos në zonat rurale.

Censi i Bujqësisë, do të realizohet në vend  14 vjet pasi është bërë ‘fotografimi’ i fundit i këtij sektori në Shqipëri. Numërimi pritet të zgjasë 4 javë, dhe ata që refuzojnë të japin informacion për punonjësit e INSTAT do të penalizohen me gjoba nga 30 mijë lekë deri në 100 mijë lekë.

Të dhënat e mbledhura nga censi do të shërbejnë  si bazë të dhënash për ngritjen e regjistrit statistikor të njësive ekonomike bujqësore, i cili do të mirëmbahet dhe do të administrohet vetëm nga INSTAT-i.

Po ashtu në projektligj parashikohet që censi të mbulojë 98% të sipërfaqes së përdorur për qëllime bujqësore, me përjashtim të kopshtarisë, si dhe 98% të njësive blegtorale në vend. Ndërkohë pyjet dhe kullotat publike nuk do të jenë pjesë e censit, përveç rasteve kur përdoren drejtpërdrejt nga njësi ekonomike bujqësore për aktivitetin e tyre.

Ministri i Brendshëm, Besfort Lamallari, ka vizituar mesditën e sotme në Spitalin e Traumës efektivin e policisë, Edison Adri, të mbetur të plagosur gjatë ngjarjes së rëndë në Maliq.

Në një deklaratë për mediat nga ambientet e spitalit, Lamallari bëri të ditur se ka nisur një hetim i thelluar për zbardhjen e plotë të rrethanave të ngjarjes, duke garantuar se kushdo që do të rezultojë përgjegjës do të përballet me ligjin.

Ministri theksoi se Drejtori i Përgjithshëm i Policisë është nisur tashmë drejt Korçës dhe se shumë shpejt do të udhëtojë edhe ai vetë drejt zonës. Duke vënë theksin te përgjegjësia morale dhe ligjore, Lamallari nënvizoi se prioritet absolut në këto momente mbetet shëndeti i efektivit të plagosur, i cili po i nënshtrohet ndërhyrjeve kirurgjikale.

“Kam kërkuar nisjen e procedurave të menjëhershme për shpalljen “Dëshmor i Atdheut”. Kemi plot 232 tashmë, fatkeqësisht, efektivë policie të cilët janë martirë të policisë. Nuk duhej ky rast, është një fatkeqësi si për familjen, ashtu edhe për gjithë shtetin shqiptar.

Patjetër, e kam thënë edhe më herët, në komunikim me Drejtorin e Përgjithshëm, i kam kërkuar të bëjë një vlerësim të plotë, katërcipërisht të situatës, respektimit të protokolleve dhe ndërmarrjes së veprimeve të duhura disiplinore dhe çdo mase tjetër ligjore, konform ligjit në fuqi dhe përgjegjësisë që gjithsecili duhet të ketë për menaxhimin e kësaj situate.

Nga ana tjetër, jemi edhe pranë familjes së efektivit të plagosur, Edison Adri, dhe po sigurojmë çdo mbështetje të kërkuar dhe të nevojshme.

Dëmtimet janë në nofull dhe në qafë, më njoftoi stafi mjekësor. Nuk doja të ndërhyja në punën e tyre, sepse ajo që është e rëndësishme në situata të tilla është që çdo sekondë ka vlerë dhe ata duhet të jenë të pranishëm dhe të qetë në punën e tyre. Por po bëjnë të pamundurën për dëmtimet që kanë ardhur për shkak të armës së zjarrit. Ajo që është më e rëndësishme është që gjendja të paraqitet e saktë dhe e specializuar. Megjithatë, në operacione të tilla, siç thonë edhe mjekët me të drejtë, duhet durim dhe ata të bëjnë punën e tyre.

Padyshim, siç e kam thënë edhe më herët, një situatë e tillë kërkon vëmendje maksimale dhe një hetim të thelluar mbi përgjegjësitë disiplinore dhe ligjore në menaxhimin e situatave. Patjetër, në komunikim me Drejtorin e Përgjithshëm, ju siguroj se një hetim i tillë po vijon. Drejtori i Përgjithshëm është nisur tashmë drejt Korçës. Pasi të mbaroj këtë takim këtu me ju, edhe unë do t’i bashkëngjitem për të shkuar atje.

Sigurisht, ky është një apel për çdo drejtues, i cili duhet, me përgjegjësinë më maksimale dhe më të lartë, të ruajë jetën dhe shëndetin e kolegëve të tij. Më pas, është edhe koha për përgjegjësi morale dhe ligjore.

Çfarëdo që të nxjerrë hetimi dhe kushdo që do të dalë përgjegjës para këtij hetimi, do të mbajë përgjegjësi, për këtë ju siguroj. Ajo që është më e rëndësishme në këtë moment është homazhi dhe respekti me përulje për familjen e efektivit të ndjerë dhe mbështetja. Lutem që Edisoni, i cili po përballet tashmë me ndërhyrjet që po bën stafi mjekësor për të shpëtuar jetën e tij. Kjo është më e rëndësishme për mua në këto momente”, tha Lamallari.

ABC News ka siguruar detaje të reja lidhur me ngjarjen e rëndë që u regjistrua mëngjesin e kësaj të enjteje, 3 qershor, në fshatin Lozhan të Maliqit. Autori i cili ishte shpallur në kërkim qëlloi për vdekje efektivin e “Shqiponjave” Enea Mekolli dhe plagosi rëndë efektivin tjetër Edison Adri.

Sipas informacioneve, autori Violand Braçellari është parë ditën e djeshme në Lozhan, policia ka marrë informacion dhe sot kanë organizuar kapjen e tij pasi kanë marrë informacion që nga fshati ka shkuar në stanin ku kishte bagëtitë dhe rrinte me nënën e tij.

Braçellari i ka shpëtuar edhe katër herë ndër vite operacioneve të RENEA. Burime bëjnë me dije se ne operacion kanë qenë 6 efektivë të Shqiponjave.

Mbeten edhe vetëm tri ditë dhe gara është bërë spektakolare.

Florentino Perez mund të jetë një president I madh I Realit të Madridit, por sfida për numrin 1 të klubit më të madh të botës duket e ashpër.

Përballë miliarderit të shquar spanjoll është një ish-yll I fushës, Huan Roman Rikelme, një nga lojtarët më të talentuar që mban mend historia e futbollit.

Njeriu që ironikisht nuk e ka veshur asnjëherë fanelën e Realit, e madje që ka luajtur për Barcelonën, synon t’i japë fund mbretërimit të gjatë të Perezit, dhe ka bërë një premtim madhështor.

Argjentinasi 47-vjeçar deklaroi se nëse do të fitojë zgjedhjet presidenciale në “Santiago Bernabeu” do të sjellë në Madrid sulmuesin e madh norvegjez, Erling Haland.

Futbollisti 25-vjeçar luan për Mançester Sitin në Premier Ligën angleze, dhe është një nga yjet më të shquar të sulmit sot për sot në botë.

Ka shënuar 162 gola e ka shërbyer 30 asistë në 198 ndeshje për Sitin, ndërsa kartoni I tij vlerësohet në 200 milionë euro.

Mançester Siti ka kërcënuar se do ta hedhë në gjyq Rikelmen për shkelje të çdo rregulli dhe norme, ndërsa Halang ka kontratë në stadiumin “Etihad”.

Nga ana tjetër, Perez ka deklaruar hapur se nëse ai fiton sërish, trajner I ekipit do të jetë Zhoze Murinjo.

Portugezi I famshëm ka qenë edhe më parë në stolin “merenges”, në periudhën nga 2010 deri në 2013, duke fituar titullin me rekord pikësh e golash, por duke mos ia dalë dot në Champions, të cilën ai e ka fituar dy herë me Porton dhe Interin.

Zgjedhjet për presidentin e Realit do të mbahen në 7 qershor.

U luajt një derbi, e do të kemi edhe një tjetër.

Italia është papritur një superfuqi në Grand Slemin e tenisit “Rolan Garos”, me dy përfaqësues në gjysmëfinale, dhe me një finalist të sigurt.

Derbi në Paris ishte mes Mateo Arnaldit dhe Mateo Berretinit, dhe fitues ishte I pari.

Berretini, një veteran nga Apeninet në moshën 30-vjeçare, vazhdon të ketë zhgënjime njërin pas tjetrit duke u dëmtuar përsëri e duke u detyruar të braktisë ndeshjen çerekfinale.

Arnaldi fitoi setin e parë 7-5, pra pas një beteje të ashpër, ndërsa më pas gjithçka ndryshoi.

Berretini dalë nga dalë ndjeu vështirësi dhe u dorëzua në rezultatin 5-2 të setit të dytë.

Gjysmëfinalisti tjetër I Grand Slemit francez është Flavio Koboli.

Italiani 24-vjeçar kapërceu rezistencën e kanadezit Aliasimë, tenist me origjinë franceze, ndërsa u luajt për 4 sete.

Rivali fitoi setin e parë 6-4, por pastaj Koboli ia doli tri herë me të njëjtin rezultat, sërish 6-4.

Një djalosh tepër simpatik, ai I foli në frengjisht publikut në Arenën kryesore në “Rolan Garos”, duke treguar se është tepër supersticioz, edhe pse jo I çmendur.

Në gjysmëfinale do të luhet derbi I Apenineve mes Kobolit dhe Arnaldit, pra italianët e kanë një finalist të sigurt.

Të shohim nëse do të mundet ta fitojnë titullin e parë në Paris që nga viti 1976 kur ia doli Adriano Panata.

Ksamili është përfshirë sot nga një fenomen i pazakontë atmosferik, teksa mbi ujërat e detit janë shfaqur vorbulla ajri të ngjashme me tornado, duke krijuar një spektakël të rrallë natyror.

Pamjet janë filmuar nga banorë dhe pushues që ndodheshin pranë plazheve të Ksamilit, ku fenomeni u shfaq për disa minuta mbi sipërfaqen e detit. Vorbullat e ajrit tërhoqën menjëherë vëmendjen e të pranishmëve, të cilët i kanë shpërndarë videot në rrjetet sociale.

Sipas dëshmitarëve, fenomeni u zhvillua larg vijës bregdetare dhe nuk paraqiti rrezik të drejtpërdrejtë për pushuesit. Deri në këto momente nuk raportohen dëme materiale apo persona të lënduar.

A thua e pabesueshmja më në fund do të ndodhë?

Kur ke më shumë se gjysmë shekulli që pret, të duket e vështirë edhe nëse e prek trofeun me dorë, por gjithsesi Nju Jorku është më afër se kurrë.

Niksat e nisën me këmbën e mbarë serinë finale për titull në NBA, duke arritur fitore në “gojën e ujkut”, në fushën e San Antonios.

Spërsat, që cilësohen favoritë për titullin, dhe që kishin epërsinë e faktorit fushë, u mundën në shtëpi me shifrat 105-95, në nisje të një beteje të ashpër që mund të zgjasë plot 7 ndeshje.

Më I miri në parket për miqtë, por edhe në përgjithësi, ishte Xhejlën Branson, numri 1 I Nju Jorkut, që shënoi 30 pikë.

Ai nuk bëri shumë më tepër, me vetëm tre topa në tabela e dy asistë, por gjithsesi ishte katalizatori I vetëve.

Ekipi nga qyteti që mbiquhet “Molla e Madhe”, luajti I bashkuar, dhe Tauns shtoi 18 pikë e 12 topa në tabela, Anuobi 17 dhe Shamet pati 13 pikë.

San Antonio e nisi më mirë ndeshjen, por më pas njujorkezët morën në dorë frenat e lojës.

Nuk u bëri punë vendasve “alieni” nga Franca, Viktor Uembaniama.

Gjigandi tepër I talentuar shënoi 26 pikë dhe shtoi 12 topa në tabela, 2 asiste, 1 vjedhje topi dhe 3 bllokime gjuajtjesh, por gaboi shumë në gjuajtjet për tri pikë si dhe e humbi tepër shpesh topin.

Ndeshja e dytë finale për titull në NBA do të luhet duke u gdhirë 7 qershori sipas orës së Shqipërisë, sërish në San Antonio.

“Botërori 2026” është pranë dhe në kombëtaren e Hollandës kanë rënë sirenat e alarmit.

“Tulipanët” zhgënjyen në miqësoren e parë përgatirore për Kupën e Botës, duke u mundur në shtëpi 1-0 nga Algjeria, edhe ajo finaliste e turneut që do të nisë më 11 qershor në Shtetet e Bashkuara të Amerikës, Meksikë dhe Kanada.

Gjithsesi, rezultati nuk është pasqyrimi i saktë i asaj që skuadra e drejtuar nga Ronald Kuman dha në fushën e lojës.

Të zotët e shtëpisë dominuan në të gjithë komponentët, duke kontrolluar topin në përqindjen më të madhe dhe duke goditur më shumë në katërkëndëshin e kundërshtarëve.

Por në futboll, ashtu si në çdo sport tjetër, i rëndësishëm është vetëm rezultati.

Këtë e mori Algjeria, që goditi vetëm në fundin e ndeshjes.

Në minutën e 86-të, Haxh Musa ndali topin në rrjetë, duke i dhuruar skuadrës së tij një fitore shpresdhënëse dhe një Hollandës një humbje që alarmon tifozët e saj, në vigjilje të Kupës së Botës.

Kjo frikë nuk është pa baza, duke ditur që “Tulipanët” do të luajnë në një grup të vështirë siç është ai F i “Botërorit 2026”, kundër Japonisë, Suedizë dhe Tunizisë.

Pas dështimit të radhës në kualifikueset e “Botërorit 2026”, Italia sheh pak dritë në fund të tunelit.

Të kaltërit u kthyen në fushë me fitore në miqëoren e parë, pas “dramës” që jetuan pas eliminimit nga Bosnja në finalen e plej-of, duke mundur 1-0 Luksemburgun.

Një fitore e vogël, në lojë dhe rezultat, por që i faturohet një periudhe të vërtetë tranzicioni.

Me një trajner të përkohshëm dhe me pjesën më të madhe të lojtarëve U21, italianët e kishin të vështirë të largonin peshën e dështimit.

Skuadra e drejtuar nga Baldini mbajti më shumë topin, provoi më shumë të gjente golin e epërsisë, por nuk ia doli në pjesën e parë.

Vetëm pas pushimit, Pio Espozito ndryshoi fatin e ndeshjes. Sulmuesi i Interit, i cili bashkë me portierin Donarumma ishin të vetmit të “shpëtuar” nga ndeshja e fundit në Zenica, gjeti rrugën e rrjetës në minutën e 49-të.

Ky gol ishte çlirues, por edhe vendimtar, pasi në fund sigloi fitoren e Italisë, e cila vazhdon të jetë shumë larg emrit të saj të madhe. Të kaltërit do të luajnë edhe një miqësore tjetër më 7 qershor kundër Greqisë, e fundit e kësaj periudhe të vështirë.

Nuk ishte rezultati që kishte ëndërruar për debutimin e tij me Shqipërinë, si kombëtarja e parë në karrierë. Por, Rolando Maran nuk e bën dramë humbjen 1-0 kundër Izraelit.

Tekniku kuqezi u shpreh pas ndeshjes se pa gjëra të mira, por edhe shumë të tjera që duhen rregulluar.

“Një mëkat. Shpresoja të merrja një fitore për tifozët, për ne, sepse kur e nis një punë është mirë ta nisësh mirë. Pjesërisht loja ishte mirë, më pak një pjesë tjetër. Ajo që më pëlqeu ishte ku u munduam të bënim ndeshjen, në nivel situatash që kishim shumë, jo gjuajtje. Pastaj humbëm pak ekuilibrin dhe ky është aspekti ku duhet të punojmë që të mos kemi humbje ekuilibri”, tha Rolando Maran.

Koha e paktë në dispozicion për të injektuar idetë e tij mund të jetë një alibi për trajnerin. Gjithsesi, ai nuk preferon ta përdorë atë si një justifikim.

“Koha ishte e paktë, por edhe sot më shërbeu shumë të shihja disa situata në fushë, që do jenë mësim për ne. Se unë po mundohem të bëj diçka më shumë, të luaj më shumë në gjysmëfushën kundërshtare, kjo ka sjellë më pak në disa pjesë të tjera dhe duhet të gjejmë ekuilibrin”, shtoi ai.

Pas ndeshjes me Izraelin, Maran ka krijuar ide më të qarta për kombëtaren kuqezi dhe te lojtarët ku do të mbështesë lojën e tij.

“Ai duhej të ishte më shumë pikë referimi qendrore, por karakteristikat e bëjnë të lëvizë. Sipas meje ai duhet të jetë më shumë pikë referimi, për të ishte hera e parë, ka punuar tre ditë me mua, ka gjëra që duhet përmirësuar. Por ai u mundua të bënte gjëra që i kërkova, por edhe shkoi të gjente hapësira në krah, se sulmuesi ka nevojë të gjejë kontaktin me topin në momentin kur nuk e dërgonim tek ai”, u shpreh më tej trajneri i Kombëtares.

Ndeshja e dytë e Maran në pankinën e kombëtares së Shqipërisë do të jetë më 6 qershor, sërish në “Air Albania” kundër Luksemburgut.

Dashuria mund të jetë e madhe, por nuk është ndjenja e vetme.

Njeriu ka nevojë edhe për paratë, për korrektesën dhe për qartësinë për të ardhmen, dhe Jasir Asani është në një moment të vështirë të karrierës.

Mediat nga Irani raportojnë se futbollisti I kombëtares shqiptare I ka vendosur një ultimatum klubit të tij, Esteglal.

Përse?

Për çfarë tjetër përveçse për paratë!

Esteglal ka qenë në vështirësi financiare gjatë këtyre muajve për shkak të ndërprerjes së kampionatit, për shkak të luftës së Iranit ndaj Shteteve të Bashkuara e Izraelit, që ka shkaktuan dëme të mëdha ekonomike dhe ka ndërprerë rrjedhën normale të gjërave.

Siç njoftohet nga Teherani, shqiptari nga Shkupi I ka dhënë Esteglalit 14 ditë kohë për të zgjidhur problemet e për t’i dhënë paratë.

Nga ana tjetër, njëri nga drejtuesit e klubit, Ali Tajernia, deklaroi se kanë nisur bisedimet me njerëzit e Asanit dhe me vetë lojtarin, për të tejkaluar ngërçin.

Sipas fjalëve të drejtorit ekzekutiv të Esteglalit, shqiptari nuk ka kërkuar ndërprerjen e kontratës, dhe se letra që ai I dërgoi klubit ishte në kuadrin e kërkesave të tij për të marrë paratë që I takojnë.

Ai shtoi se klubi do të veprojë profesionalisht, në bashkëpunim, për të zgjidhur kërkesat e ligjshme të Asanit.

Nuk qenka e lehtë të ulesh në këtë stol. Të paktën, fillimi duket tepër I vështirë, siç ndodhi me trajnerin e tanishëm të kombëtares, Rolando Maran, por edhe siç ka ngjarë edhe më parë.

Tekniku italian e nisi me humbje aventurën e tij si kuqezi, një disfatë 0-1 ndaj Izraelit në “Arenën Air Albania”, jo e drejtë për mënyrën sesi shkoi ndeshja, edhe pse Shqipëria nuk arriti të bënte asnjë gjuajtje në kuadrat.

Natyrisht, Maran nuk mund të gjykohet në fare pak ditë punë, dhe në futboll ndikon edhe fati.

Paraardhësi I tij, Silvinjo, nuk u lumturua në debutim, sepse ndeshja e tij e parë përfundoi me humbje 1-0 në Varshavë ndaj Polonisë në start të eliminatoreve të Kampionatit Europian.

Ndërkaq, statistikat tregojnë se përgjithësisht trajerët e kombëtares e nisin me humbje kur vijnë në Shqipëri.

Kështu I ndodhi të shquarit Xhani De Biazi, që besohet se mbetet më I dashuri për tifozët.

Italiani u mund me shifrat 2-1 në Gjeorgji në shkurt të vitit 2012, ndërsa më pas pati 4 rezultate pozitive radhazi.

Edhe Edi Reja e pati startin negativ.

Kombëtarja u mposht me rezultat minimal 1-0 në fushën e Islandës në qershor 2019, në eliminatoret e Kampionatit Europian, edhe pse nuk luajti keq.

I vetmi këto kohë që e filloi me këmbë të mbarë ishte ai që më pas doli me I pasukseshmi, Kristian Panuçi.

Italiani I radhës fitoi 2-0 në shtëpi ndaj Lihtenshtajnit në ndeshjen eliminatore të Kupës së Botës.

Me humbje, ndërkaq e filloi edhe kroati Josip Kuzhe ndaj Portugalisë në Tiranë në qershor 2009, si dhe holandezi, Ari Han, që u mposht 1-0 në miqësore ndaj Polonisë.

Read More...

Read More...

Kryeministri Edi Rama në festivalin “Bukë e Zemër”, një ngjarje e re europiane, që bashkon në Tiranë, për të dytin vit radhazi, arkitektë të mirënjohur ndërkombëtarë nga Europa, Azia, Amerika e Veriut dhe Amerika e Jugut, të cilët punojnë në Shqipëri, për të ndarë eksperiencat, për të diskutuar sfidat e zhvillimit urban e social të ditëve të sotme, si edhe për të kontribuar në formulimin e politikave dhe masave në funksion të transformimit të madh të vendit tonë, si Europa e Ballkanit.

“Ju e dini respektin që kam për arkitektët. Arkitektët janë foshnjet e privilegjuara të Zotit. Nuk do jetonim në një qytet, nëse nuk do kishte arkitektë pas tij. Unë i besoj arkitekturës, si diçka që shkon shumë përtej asaj që shohim si prani fizike. Arkitektura dhe ruajtja e natyrës mund të shkojnë dhe bashkë. Zhvillimi duhet të jetë në harmoni me natyrën. Duhet të mendojmë që të kemi ndërtesa të bukura, por edhe natyra të ruhet në mënyrë perfekte. Më duket e jashtëzakonshme sot, më shumë se sa vitin e kaluar.

Nuk është se kemi një numër më të madh arkitektësh apo profesionistësh që vijnë në këtë festival, por ka të bëjë me faktin se këtu nuk kemi vetëm disa arkitektë të mëdhenj, por disa arkitektë që vijnë nga të gjitha anët, nga Europa në Kinë, nga SHBA në Amerikën Latine dhe është nder i madh për mua, që kam sot këtu dikë që edhe në ëndrrat e mia më të çmenduar do ta mendoja që do e shihja këtu. Është po kështu një përulësi shumë e madhe. Gjatë gjithë karrierës sime kam marrë shumë sulme dhe disa komplimente.

Sigurisht që kjo nuk i kundërvihet që ti nuk merr nderin e madh nga të tjerët. Poilitika kur përdoret në mënyrën e duhur është e jashtëzakonshme. Dua të ndaj me ju komplimentin më të madh që më kanë bërë ndonjëherë nga një vend shumë i pasur jashtë Evriopës. I dërgova pamje nga festivali i parë “Bukë e Zemër” dhe disa pamje nga puna juaj. Dhe komenti i tij ishte “uau Shqipëria, vëlla vërtet duhet të ulemi një ditë dhe duhet të më tregosh se si e bën këtë pa para”, tha Rama.

Ky që shihni në foto është autori, Violand Braçellari, i cili qëlloi për vdekje efektivin në Maliq,  Enea Mekolli, teksa la të plagosur policin tjetër Edison Adri.

Sipas informacioneve të siguruara nga ABC News, ai ishte ushtarak dhe njohës shumë i mirë i armëve.

Braçellari është dënuar në mungesë me 10 vite burg për prodhim dhe shitje narkotikësh.

Braçellari ka vepruar i vetëm. Ngjarja ka ndodhur pranë banesës ku ai qëndronte, në një zonë të njësisë administrative Lozhan.

Vetë i shpalluri në kërkim ka mbetur i plagosur gjatë shkëmbimit të zjarrit dhe është vënë në pranga nga forcat e Policisë. Ndërkohë, efektivi i plagosur pritet të transportohet drejt Tiranës me helikopter për trajtim të specializuar mjekësor.

Efektivi i forcave “Shqiponja”, Edison Adri, i cili mbeti i plagosur gjatë operacionit të zhvilluar në Lozhan të Maliqit, është transportuar me helikopter ushtarak drejt Spitalit të Traumës për të marrë trajtim të specializuar mjekësor.

Fillimisht, ai mori ndihmën e parë në spitalin e Korçës. Deri më tani, nuk ka ende informacion zyrtar mbi gjendjen e tij shëndetësore.