“Investimi i ri i kompanisë turke “Çagataj Kabllo’ është edhe një themel i besimit ekonomik dhe sinjal i qartë se kur institucionet janë të përkushtuara, suksesi vjen pashmangshëm. Dita e sotme është edhe një konfirmim se po lëvizim para”, deklaroi kryeministri Hristian Mickoski sot në vendosjen e gurthemelit të fabrikës së re të kësaj kompanie në Zonën Zhvillimore Teknologjike Industriale në Shkup.

“Këta janë tregues që thonë gjënë më të rëndësishme se vendi është i qëndrueshëm, ekonomia aktive dhe se e ardhmja po ndërtohet sot. Jam i vetëdijshëm se qytetarët po përballen me vështirësi, jam i vetëdijshëm se nevojiten ndryshime të shpejta dhe konkrete dhe pikërisht për këtë arsye çdo ditë me gjithë energjinë që kemi, punojmë që këto ndryshime të ndodhin. Luftojmë për çdo vend të ri pune, për çdo denar më shumë në ekonominë e vendit, për çdo shans që mund të sjellë stabilitet në vend. Nuk presim investime, i kërkojmë, i mbështesim, i meritojmë. Nuk flasim për mundësi, por i hapim ato. Bëjmë thirrje për ndryshime dhe i realizojmë këto ndryshime”, theksoi Mickoski në fjalimin e tij.

Ai shtoi se ky është vetëm një nga shembujt e shumtë si krijohet rritje ekonomike jo me teori, por me objekte konkrete dhe se një fillim i tillë është i mirë jo vetëm për kompaninë, por edhe për bashkësinë lokale, ekonominë kombëtare dhe për çdo njeri të ri i cili dëshiron të mbetet në shtetin e vet.

“Qëllimi ynë është që ta bëjmë Maqedoninë vend të mundësive, vend në të cilin mundi paguhet, vend në të cilin investimi ka kuptim, vend në të cilin institucionet janë partnerë të biznesit, jo pengesë, por mbështetje”, nënvizoi Mickoski.

Theksoi se rezultatet e arritura tregojnë se Qeveria ka drejtim të qartë ekonomik.

The post Mickoski: Qëllimi ynë është ta bëjmë Maqedoninë vend të mundësive ku mundi paguhet, ndërsa investimi ka kuptim appeared first on Telegrafi.

Procesi gjyqësor kundër katër mjekëve onkologë, në mesin e të cilëve edhe ish-drejtori i Klinikës së Onkologjisë, Nino Vasev për mjekim të pandërgjegjshëm të pacientëve, në lëndën “Onkologjia”, u shty për më 5 shtator për shkak të mungesës së të akuzuarës së dytë, Meri Peshevska.

Në Gjykatën Themelore Penale Shkup sot në bankën e të akuzuarve u ul i akuzuari i parë Nikolla Vasev dhe dy të akuzuar të tjerë onkologë Simonida Cërvenkovska dhe Dragan Jakimovski, përderisa për Peshevskën avokati i saj, Jovica Strashevski në Gjykatë dorëzoi dokumentacion mjekësor nga 10 korriku dhe kërkesë për shtyrjen e seancës së sotme.

Mbrojtja, para fillimit të seancës së sotme, dorëzoi plotësim të dëshmive me të cilat kontestohen ekspertizat në Prokurori.

Avokati i Nino Vasevit, në Gjykatë ka dorëzuar dëshmi plotësuese, me të cilën, siç theksoi, dëshmohet se personi Maja Radnik, nuk ka status të ekspertit gjyqësor në Slloveni.

“Vlerësoj se dëshmitë e siguruara nga Prokuroria të cilat kanë të bëjnë me ekspertizën nga Sllovenia duhet të ndahen dhe të mos vlerësohen në procedurë”, reagoi avokati.

Prokurorja publike Ana Gogovska Jakimovska, për këtë theksoi se Aktakuza e kaloi procedurën për vlerësim dhe është e paqartë pse kjo nuk ishte theksuar në atë pjesë.

“Në këtë rast konkret, Serbisë dhe Sllovenisë i është dërguar një letër kërkese, e cila siguron ligjshmërinë e dëshmive. Nuk kontestohet përmbajtja e raporteve të ekspertëve, por procedura. Unë besoj se pretendime të tilla nga mbrojtja janë të pakuptimta, pasi ato kanë kaluar nëpër fazën e vlerësimit të aktakuzës”, deklaroi prokurorja Gogovska Jakimovska.

Gjykatësja Snezhana Markovska, e cila e udhëheq lëndën, pranoi kërkesën për shtyrjen e seancës së sotme për shkak të mungesës së të akuzuarit të dytë, dhe me qëllim, siç deklaroi edhe Gjykata të njihet me kërkesat e mbrojtjes për të hedhur poshtë disa nga dëshmitë e siguruara nga Prokuroria.

Sipas aktakuzës I akuzuari i parë, Vasev si drejtor i Klinikës, në bashkëveprim me mjek tjetër të repartit të njëjtë, akuzohet se ka kryer “vepra të rënda të vazhdueshme kundër shëndetit të njerëzve dhe mjekim të pandërgjegjshëm të të sëmurëve”.

Në aktakuzë thuhet se ekspertiza mjekësore ka përcaktuar se te 29 pacientë, i akuzuari i parë ka zbatuar një metodë trajtimi padyshim të papërshtatshme dhe, në kundërshtim me udhëzimet aktuale onkologjike, me devijime në dozë dhe në fazën e trajtimit, ka dhënë ilaçe nga gjenerata të reja të barnave të synuara dhe imunoterapike, duke dëmtuar rëndë shëndetin e pacientëve. Në disa raste, kjo është bërë e mundur nga e akuzuara e dytë, e cila i ka vënë në dispozicion atij faksimilen e saj me të cilin ai miratoi dhe përshkroi terapinë dhe emrin e përdoruesit dhe fjalëkalimin e saj me të cilët ai rinovoi terapinë në sistemin HIS të Institucionit Publik Shëndetësor Klinika Universitare për Onkologji dhe Radioterapi.

Dy mjekët e tjerë akuzohen për veprën themelore penale “mjekim pandërgjegjshëm i të sëmurëve”, e kryer si vepër e vazhdueshme penale.

Në bazë të historive mjekësore të këtyre dy mjekëve të akuzuar, është përcaktuar se ata kanë përshkruar terapi me ilaçe të gjeneratës së re të synuara dhe imunoterapie gjatë fazës së trajtimit, kur ishte shumë e qartë se pacientët nuk do të përfitonin fare nga një ilaç i tillë për shkak të gjendjes së tyre të dobët shëndetësore dhe mungesës së kohës për zhvillimin e mekanizmit të veprimit, pa specifikuar peshën dhe gjatësinë trupore të pacientëve, me devijime në dozë, të cilat e përkeqësuan më tej gjendjen e tyre.

Në rastin “Onkologjia”, prokuroria ngriti një aktakuzë tjetër, e cila është ende në shqyrtim nga Gjykata Penale, dhe ka të bëjë me punën ekonomike të Klinikës, në të cilën ish-drejtori Vasev është gjithashtu i akuzuari i parë, së bashku me ish-drejtorin ekonomik të Klinikës. Dy drejtorët akuzohen për keqpërdorim detyre, mashtrim dhe përvetësim në periudhën nga viti 2018 deri në vitin 2022, gjatë së cilës i kanë shkaktuar dëm buxhetit të shtetit prej mbi 2,2 miliardë denarësh përmes procedurave të paligjshme për furnizimin e ilaçeve. Vasev dhe Nuhi u dënuan me 30 ditë paraburgim për këtë rast më 20 qershor të këtij viti.

Në aktakuzë qëndron se ata, në kundërshtim me ligjet dhe pa dokumentacion të vlefshëm, mundësuan pagesa nga Fondi i Sigurimit Shëndetësor, me çka furnizuesit përfituan mbi 430 milionë denarë. Gjithashtu, drejtori mjekësor në mënyrë fiktive ka paguar ilaçe dhe ka përvetësuar një pjesë të tyre, me çka personalisht ka përfituar materialisht të paktën 13 milionë denarë.

Hetimin PTHP Shkup e përfundoi më 22 maj të këtij viti dhe në Penale parashtroi dy akuza për lëndën “Onkologjia”.

The post Rasti “Onkologjia”, gjykimi do të vazhdojë më 5 shtator appeared first on Telegrafi.

Nga Lidhja Auto Moto e Maqedonisë njoftojnë se komunikacioni në rrugët e vendit po zhvillohet pa ndërprerje, nëpër rrugë të thata. Intensiteti i komunikacionit në akset rrugore jashtë mjediseve urbane është matur.

Lidhja Automoto e Maqedonisë njofton se në vendkalimin kufitar “Tabanoc” vërehet frekuencë e rritur e automjeteve në vend, koha e pritjes është rreth 30 minuta.

Në vendkalimet kufitare nga ana e Maqedonisë nuk ka vonesa të gjata për hyrje dhe dalje nga shteti.

LAMM njoftoi gjithashtu se që nga pasditja e djeshme, trafiku i automjeteve të rënda është normalizuar në dalje nga vendi, nga PB “Dizel” deri në VK “Bllacë”.

LAMM rekomandon shpejtësi të adaptuar të lëvizjes, respektimin e sinjaleve të vendosura të komunikacionit e veçanërisht drejtim të kujdesshëm të automjetit, posaçërisht në rrugët nëpër gryka malore dhe lugina të lumenjve ku ekziston mundësia e rrëshqitjes së dheut.

Kjo vlen veçanërisht për akset rrugore Katllanovë – Veles, Mavrovë – Dibër – Strugë, Vinicë – Berovë dhe Koçan – Dellçevë.

The post LAMM: Në “Tabanoc” për hyrje në Maqedoni pritet rreth 30 minuta appeared first on Telegrafi.

Kryeministri Hristijan Mickoski thotë se autoritetet kanë fakte se disa nga zjarret në rajonin e Shkupit janë shkaktuar qëllimisht.

Mickoski tha se tashmë ka edhe persona të arrestuar.

“Jo vetëm që dyshojmë, por kemi edhe fakte, kemi edhe persona të ndaluar, që këtë e kanë bërë, posaçërisht në territorin e Shkupit, që Qytetit të Shkupit. Për shkak se zjarri, të themi i fundit që ishte në afërsi të Liqenit të Smillkovës, ishte në mbrëmje, pas orës 21, dhe atë që e gjetëm atje. Kishte edhe tre persona që pastaj u siguruan, tregojnë se ka baza të dyshimit për aksion të koordinuar dhe mirë të menduar, posaçërisht në Shkup”, tha Mickoski.

The post Mickoski: Kemi fakte se disa zjarre janë shkaktuar qëllimisht, ka edhe persona të ndaluar appeared first on Telegrafi.

MPB Maqedoni njofton se midis natës 9 dhe 10 korrik 2025, nga ora 22:00 deri në orën 02:00 të mëngjesit, në bazë të një plani të përgatitur paraprakisht nga Sektori për Punë të Brendshme të Tetovës dhe Drejtoria e Punëve të Brendshme të Gostivarit, u krye kontroll aksionar në një objekt hotelerik – bar nate në fshatin Zhelinë, në pronësi të J.F. (47) nga fshati Zhelinë, për zbulimin e shtetasve të huaj, qëndrimit të paligjshëm dhe keqpërdorimit të qëndrimit turistik.

“Gjatë kontrollit në objekt, u gjetën pesë shtetase femra të Republikës së Shqipërisë, të moshës 24 deri në 50 vjeç. Gjithashtu, në një objekt hotelerik – klub nate në fshatin Zubovcë, Gostivar, në pronësi të R.B. (50) nga fshati Dobridol, u gjetën dy shtetase femra të Republikës së Shqipërisë, të moshës 33 dhe 36 vjeç”.

“Për shkak të keqpërdorimit të qëndrimit turistik dhe qëndrimit në kundërshtim me qëllimin, ato u ndaluan në Stacionet Policore të Tetovës dhe Gostivarit për procedura të mëtejshme”, thonë nga MPB.

The post Aksione në klubet e natës në Tetovë dhe Gostivar, policia ndalon shtatë shtetase të huaja appeared first on Telegrafi.

Komunikacioni nga qarkorja Orman deri në qarkoren Mirkovc është lëshuar për komunikacion të rregullt, gjithashtu edhe prej Shkupi për në pikën kufitare Bllacë.

Siç informon sot në mëngjes LAMM, është normalizuar edhe komunikacioni në rrugën e shpejtë Rankovc – Kriva Pallankë në dy drejtimet.

Trafiku në rrugët tjera shtetërore po zhvillohet pa probleme, në rrugë të thata.

Intensiteti i trafikut në rrugët jashtë zonave urbane është mesatar. Në pikat kufitare në anën e RMV-së, nuk ka vonesa më të gjata për hyrje dhe dalje nga vendi.

LAMM rekomandon shpejtësi të rregulluar, duke respektuar sinjalistikën e vendosur të trafikut dhe menaxhim të kujdesshëm të automjeteve, veçanërisht në rrugët nëpër lugina, lugina lumenjsh dhe gryka, ku ekziston mundësia e rrëshqitjeve të dheut. Kjo vlen veçanërisht për seksionet Katllanovë – Veles, Mavrovë – Dibër – Strugë, Vinicë – Berovë dhe Koçan – Delçevë.

The post Normalizohet komunikacioni drejt Bllacës, LAMM: Nuk ka vonesa në pikat kufitare appeared first on Telegrafi.

Zgjedhjet lokale në Maqedoninë e Veriut po afrohen, ndërsa partitë politike kanë nisur me kalkulimet se si do të dalin në garë. Ende nuk është zyrtarizuar asgjë, por ajo që dihet është se partitë në pushtet do ta përkrahin njëra-tjetrën, madje që në raundin e parë në disa komuna.

Kryeministri Hristijan Mickoski, tha se negociatat me VLEN-in dhe ZNAM-in që janë partnerë qeverisës, po shkojnë në drejtim të mirë. Mickoski tha se pret që të kenë mbështetje reciproke të partive në qeveri.

“Sa i përket ZNAM-it, kemi marrëveshje në parim që ata do të kandidojnë me listat e tyre të këshilltarëve, koalicioni i udhëhequr nga OBRM-PDUKM do të kandidojë me listat e tyre, dhe në ato komuna ku vendosim të mbështesim një kandidat, qoftë nga koalicioni i udhëhequr nga OBRM-PDUKM apo ZNAM, njëri apo tjetri nuk do të nominojë kandidat, ata do të mbështesin njëri-tjetrin”.

“Sa i përket koalicionit VLEN, pres që të mbështesim kandidatët e këtij koalicioni në raundin e parë sepse besojmë fuqimisht se partia që nuk ka bërë asgjë për më shumë se 20 vjet dhe fokusi kryesor i së cilës ishte lëshimi i licencave të marihuanës, hapja e kazinove dhe loja e futbollit në zyra, mendoj se duhet të mposhtet në këto zgjedhje dhe të hyjë në histori në skenën politike maqedonase”, tha Mickoski, duke iu referuar BDI-së për dështimet në vitet e fundit.

Edhe kryetari i Komunës së Tetovës, Bilall Kasami, i cili pritet të nominohet edhe për një mandat nga radhët e VLEN-it, tha se do të kenë marrëveshje me partitë e qeverisë për zgjedhjet lokale.

“Jemi në fazën e analizës së kandidatëve të VLEN-it. Nuk kemi vendosur nëse do të nxjerrim kandidat në Shkup. Kur do të kemi vendim edhe për komunat tjera do të kemi qëndrim kandidatëve tjerë. Ajo që e kam thënë është që si koalicion qeveritar, do të ketë bashkëpunim, në drejtim të përkrahjes së kandidatëve që do të shkojnë në raundin e dytë”.

“Sa i përket raundit të parë ne do të shkojmë në të gjitha komunat ku ka gjasa reale që edhe kandidati shqiptarë të garojë për kreun e komunës”, tha Kasami.

Situata është më interesante në kampin opozitar shqiptar, e cila pritet të zgjerohet edhe me kalimin e Arben Taravarit nga qeveria. Ky i fundit në një deklaratë për media para disa ditëve tha se së shpejti do të dalin me emrat e kandidatëve për kryetarë së bashku me partitë tjera të siç e quajti ai “Aleancës Kombëtare”.

“Së shpejti në koordinim me partitë që do të dalim së bashku në zgjedhje si Aleancë Kombëtare, do të promovojmë emrat e kandidatëve të cilët do të jenë të pranuar nga të gjithë. Emri i koalicioni nuk është përfundimtar nëse do të jetë Aleanca Kombëtare ose Fronti Kombëtar”, tha Taravari.

Ndërsa i pyetur kur do të ketë takim me Ali Ahmetin për të definuar bashkëpunimin në zgjedhjet lokale, Taravari tha se do të ketë grupe pune që do të merren me këtë çështje.

“Do të ketë grupe pune që do të vazhdojnë të koordinohen dhe do të shohim nëse do të dalim me lista të përbashkëta ose të veçanta. Unë si kryetar jam që të dalim me lista të veçanta, por për këtë duhet të vendos kryesia e partisë”, tha Taravari.

Përveç kandidatëve partiak në zgjedhjet lokale do të marrin pjesë edhe kandidatë të pavarur. I tillë është Mendi Qyra për Komunën e Strugës, por i cili do të merr mbështetjen e koalicionit VLEN. Ndërsa sot kandidaturë të pavarur për Komunën e Gostivarit ka shpallur edhe Visar Ademi.

Lexo po ashtu Mendi Qyra shpall kandidaturë për Komunën e Strugës: Ftoj partitë politike të më mbështesin

Ndryshe, zgjedhjet lokale do të shpallen në muajin gusht ndërsa të njëjtat pritet të mbahen më 19 tetor, ndërsa do të votohet për 80 komuna dhe Bashkinë e Shkupit./Telegrafi/

The post Kush kë do ta mbështesë në zgjedhjet lokale – partitë politike nisin me deklarata zyrtare appeared first on Telegrafi.

Sërish ka shpërthyer zjarr në deponinë mes Shuto Orizares dhe Vizbegut në Shkup. Nga pamjet që janë publikuar në media shihet sesi del tym i zi nga deponia, që ka mbuluar një pjesë të vendbanimeve për rreth.

Nga pamjet shihet se digjen kryesisht goma. Autoritetet tashmë janë në terren, po bëhen përpjekje për t’u ballafaquar me situatën.

Komandanti i Njësisë Territoriale të Zjarrfikësve të Qytetit të Shkupit, Zvonko Tomeski, thotë se në terren janë dërguar katër automjete që po intervenojnë së bashku me dy automjete nga “Higjiena Komunale”.

The post Shpërthen zjarr në Vizbeg, zjarrfikësit e Shkupit në terren appeared first on Telegrafi.

Kuvendi sot duhet ta fillojë seancën e re të 59-të në të cilën si pikë e parë e rendit të ditës është interpelanca për punën e kryetarit të Gjykatës Kushtetuese, Darko Kostadinovski, e parashtruar nga grupi parlamentar Fronti Evropian.

Kryetari i Kuvendit, Afrim Gashi në brifingun javor me gazetarët theksoi se në koordinimin e së hënës me koordinatorët e grupeve parlamentare mbizotëroi perceptimi se nuk është mirë që Kuvendi të bëjë interpelancë të kryetarit të Gjykatës Kushtetuese.

“U hap çështja për interpelancën e kryetarit të Gjykatës Kushtetuese. Ne e vendosëm këtë si pikë në rendin e ditës. Ka pasur diskutime nëse kemi vepruar drejtë, nëse është në rregull apo jo, që është normale. Dilema jonë dhe e imja, si Kuvend, si kabinet dhe si shërbim. Ne jemi udhëhequr sipas nenit 72 të Kushtetutës dhe 47 të Rregullores së Kuvendit ku thuhet “interpelanca mund të ngritet për çdo bartës të funksionit publik”. Tani ne si Kuvend duhet ta procesojmë këtë. Nga ana tjetër flasim për pushtetin gjyqësor dhe kjo mbetet temë që do ta shohim. Ndoshta disa nga deputetët do të kërkojnë që kjo pikë të hiqet nga rendi i ditës. Kryesisht, në koordinim me koordinatorët e grupeve parlamentare mbizotëroi perceptimi se nuk është mirë që si Kuvend të bëjmë interpelancë ngaj kryetarit të Gjykatës Kushtetuese. Do të shohim si do të vendosë plenumi”, tha Gashi.

Ai informoi se do të kërkojë nga Komisioni kuvendor për Çështje të Rregullores dhe të Mandatit-Imunitetit të organizojë një seancë publike për definimin e fjalës “bartës i funksionit publik”.

“Do t’i kërkoj Komisionit për Çështje të Rregullores dhe të Mandatit dhe Imunitetit të mblidhet dhe të vazhdojë të zhvillojë debat publik për të përcaktuar më saktë fjalën ‘bartës i funksionit publik’, sepse këtu përfshihen presidenti i shtetit, kryetarët e komunave, veçanërisht gjykatat. Mendoj se duhet ta sqarojmë ligjërisht në mënyrë që të mos mbetet në vullnetin e kryetarit të Kuvendit apo të ndonjë individi, por të lëmë një gjurmë institucionale se si të veprohet ndaj këtyre nismave”.

Gashi theksoi se parashtruesit e nismës për Konstandinovskin, gjegjësisht BDI-ja, nuk morën pjesë në koordinimin e sotëm të koordinatorëve të grupeve parlamentare. Propozoi që kjo pikë të hiqet nga rendi i ditës.

“Parashtruesi i nismës për interpelancë, gjegjësisht BDI, nuk ishte në koordinim sot. Doja të propozoja nëse do të hiqej, por atëherë do të kishte reagime pse e hoqëm, dhe plus koordinatori i BDI-së nuk ishte aty, kështu që nuk do të vendosnim në emër të tyre. Votimi do të mbahet në vetë seancën nëse do të hiqet. Kushtetuta thotë vetëm ‘bartës i funksionit publik’. Për shembull, atëherë BDI reagoi ndaj interpelancës për anëtarët e Këshillit Gjyqësor, dhe tani po e propozojnë vetë”, tha ai.

Gashi njoftoi se Kuvendi i ka ndjekur të gjitha afatet dhe deri te Konstandinovski është dërguar interpelancë. Theksoi se ai ka pasur afat të përgjigjet, por nuk është përgjigjur. Potencoi se Konstandinovski ka treguar se nuk do të marrë pjesë në seancën plenare ku do të diskutohet për interpelancën e tij. Gashi tha se është e drejta e tij.

Deputeti i Frontit Evropian, Ilir Hasani, në konferencën për mediat shpjegoi se interpelanca është paraqitur për punën e Kostadinovskit në bazë të nenit 72, pika 1 dhe 2 të Kushtetutës. Sipas Hasanit, Kostadinovski ka shkelur qëllimisht Ligjin për përdorimin e gjuhëve dhe nenin 101 të Ligjit për Gjykatën Kushtetuese.

“Dua të theksoj se kjo nismë nuk ka për qëllim të ushtrojë presion mbi Gjykatën Kushtetuese, për dallim nga interpelancat e mëparshme që ishin qartazi me natyrë politike, por ka ndikim social dhe mediatik. Qëllimi ynë është të nisim një debat institucional për funksionimin e këtij institucioni dhe rolin e kryetarit të saj në respektimin e Kushtetutës dhe ligjeve ekzistuese”, tha Hasani.

Sipas Hasanit, Kostandinovski ka paragjykime ndaj gjuhës shqipe.

“Në arsyet për interpelancën mund të përmendet një intervistë që është dhënë për agjencinë e lajmeve AIM në gusht të vitit 2024, ku ai theksoj “se politika që krijoi atë ligj krijoi një lloj kaosi të ligjshëm që rezultoi me kaos politik, mosbesim dhe dilemë. Është fakt se ligji po zbatohet dhe po krijon probleme me implementimin e tij”. Kjo deklaratë ngre disa pyetje: Në bazë të cilit nen të Kushtetutës ose ligji konkret kryetari i Gjykatës Kushtetuese mund të karakterizojë një ligj si burim të kaosit politik dhe juridik, dhe nëse është në kompetencën e kryetarit të Gjykatës Kushtetuese të përcaktojë problemet në zbatimin e ligjit dhe të parashikojë ndërhyrje legjislative? Deklarata të tilla i zvogëlojnë kufijtë e kompetencave të përcaktuara me ligj dhe krijojnë një seri dyshimesh për paanshmërinë e kryetarit të Gjykatës në raste që janë ende në fazën e shqyrtimit”, tha Hasani.

Në reagimin e Gjykatës Kushtetuese atëherë përmes një komunikate, u theksua se Kostadinovski nuk do të komentojë asnjë deklaratë politike.

“Kushtetuta e RMV-së nuk parashikon mundësinë e shkarkimit të një gjykatësi kushtetues, as nga ana legjislative dhe as nga ana e ekzekutivit. Gjykata Kushtetuese, si organ i Republikës që mbron kushtetueshmërinë dhe ligjshmërinë, nuk i nënshtrohet parimit të ndarjes së pushtetit. Krijuesi i Kushtetutës e ka vendosur Gjykatën Kushtetuese mbi tre pushtetet, sepse ajo është kontrolluesi i procedurave, akteve dhe veprimeve të tyre. Pavarësia dhe autonomia e Gjykatës Kushtetuese dhe gjykatësve kushtetues kanë garancinë më të fortë kushtetuese. Kushtetuta nuk i lejon Kuvendit që me aktet ligjore të ndikojë në kompetencat, mënyrën e zgjedhjes dhe të mbarimit të mandatit të gjyqtarëve të Gjykatës Kushtetuese. Kompetenca e Kuvendit përfundon në momentin e zgjedhjes së gjykatësve”, thuhet në njoftimin e Gjykatës Kushtetuese.

Në seancën e 59-të, në rend të ditës u propozuan 31 pika, në mesin e të cilave edhe Propozimi për zgjedhjen e një anëtari të Komisionit për Marrëdhënie Ndërmjet Bashkësive, nga bashkësia rome, propozim ligjin për të punësuarit në sektorin publik, në lexim të dytë, propozim ligjin për nëpunësit administrativë, propozim ligjin për zhvillimin profesional dhe trajnimin e nëpunësve administrativë në lexim të dytë, propozim ligjin për ndryshimin dhe plotësimin e Ligjit për marrëdhëniet e punës, propozim ligjin për ndryshimin dhe plotësimin e Ligjit për sigurimet shëndetësore, propozim ligjin për ndryshimin dhe plotësimin e Ligjit për kontributet e sigurimeve shoqërore të detyrueshme.

Me procedurë të shkurtër janë parashtruar Propozimi i ligjit për plotësimin e Ligjit për siguri në komunikacion në rrugë dhe Propozimi i ligjit për ndryshimin e Ligjit për aviacion.

The post Propozimi për interpelancën ndaj kryetarit të Gjykatës Kushtetuese sot para deputetëve appeared first on Telegrafi.

“Arsimi i mesëm profesional në Maqedoni është një model i suksesshëm që kombinon në mënyrë efektive mësimin teorik me punën praktike. Nxënësit kanë mundësinë të fitojnë njohuri të zbatueshme me të cilat mund të hyjnë shpejt në tregun e punës ose të vazhdojnë avancimin e tyre akademik. Të rinjtë e dinë këtë dhe për këtë arsye arsimi profesional nuk është më një alternativë, por zgjedhja e parë midis tyre”.

Këtë e theksoi Ministrja e Arsimit dhe Shkencës, Vesna Janevska, në një konferencë kushtuar zhvillimit të arsimit dhe trajnimit profesional në Maqedoni, të organizuar nga Ambasada Zvicerane dhe projekti E4E – “Arsim për Punësim”.

“Ne synojmë përsosmëri në arsimin e mesëm profesional. Kemi miratuar ligj të ri që rregullon konceptin e arsimit të dyfishtë, po rrisim numrin dhe po forcojmë qendrat rajonale për arsimin e mesëm profesional. Në bashkëpunim me dhomat, po rrisim numrin e kompanive të përfshira në trajnimin praktik dhe po prezantojmë profesione të reja në përputhje me nevojat e ekonomisë. Kemi siguruar buxhet prej 50 milionë denarësh për 1,570 bursa për studentët që do të regjistrohen në klasa të dyfishta në vitin e ri shkollor”, tha Janevska.

Ministrja theksoi se përpjekjet e institucioneve dhe organizatave partnere kanë një ndikim të shkëlqyer. Trendi i rritjes së vazhdueshme të numrit të nxënësve vazhdoi edhe në periudhën e regjistrimeve të qershorit në arsimin e mesëm, me më shumë se dyfishin e numrit të nxënësve të regjistruar në shkollat ​​e mesme profesionale, krahasuar me shkollat ​​e mesme.

Konferenca promovoi gjithashtu anëtarësimin e Maqedonisë në rrjetin World Skills Europe, i cili mundëson lidhjen dhe shkëmbimin e praktikave dhe përvojave pozitive midis vendeve dhe institucioneve në fushën e arsimit dhe trajnimit profesional, dhe në kuadër të tij, organizohen gara ndërkombëtare studentore. Sipas Janevskës, kjo do të mundësojë përparim të mëtejshëm në cilësinë e arsimit profesional në vend.

The post Janevska: Arsimi i mesëm profesional nuk është më alternativë tek të rinjtë, por zgjidhje e parë appeared first on Telegrafi.

Ministri i Transformimit Digjital Stefan Andonovski, në një konferencë për shtyp me rastin e përvjetorit të parë të themelimit të ministrisë, tha se janë përmbushur objektivat për vitin e parë. Ai tha se janë vendosur 120 shërbime të reja, ndërsa e përmendi portalin uslugi.gov.mk, në të cilin për herë të parë, dokumentet ligjërisht të vlefshme mund të merren pa prani fizike, me nënshkrim elektronik, kod QR, në formë elektronike ose të shtypura.

Ai tha se gjithashtu, qytetarët që nuk kanë qasje në mjete dixhitale ose nuk kanë aftësi nuk janë harruar, kështu që gjatë verës, përveç tre Qendrave të reja të Shërbimit, do të hapen të paktën tre të tjera.

“E kemi lidhur shtetin. Përmes platformës së ndërveprimit, sot mbi 70 institucione shkëmbejnë të dhëna në kohë reale. Në vend që qytetarët të mbajnë letër nga një sportel në tjetrin – institucionet kanë filluar të komunikojnë elektronikisht. Gjithashtu kemi forcuar mbrojtjen e sistemeve shtetërore. Së pari, miratuam Strategjinë Kombëtare të Sigurisë Kibernetike pas tre vitesh vakum. Ajo gjithashtu ka një buxhet, një plan veprimi me përgjegjësi dhe detyrime për të gjithë të përfshirët”, tha Andonovski.

Ministri gjithashtu theksoi miratimin e 4 ligjeve reformuese, të harmonizuara me rregulloret e BE-së, siç janë Ligji për Komunikimet Elektronike dhe Ligji i parë për Sigurinë Kibernetike, Ligji për Veprimtaritë Arkivore dhe Ligji për Dokumentet Elektronike. Ai tha se është krijuar edhe një Sektor për Sigurinë Kibernetike, brenda kornizës së të cilit duhet të ketë një Qendër Qeveritare për Reagim ndaj Incidenteve (QRP).

Lidhur me kujdesin për sigurinë digjitale të fëmijëve dhe të rinjve, Andonovski tha se Ministria po punon në mënyrë aktive për krijimin e Qendrës Kombëtare për Internet më të Sigurt MKSafeNet, e cila do të jetë sistemi i parë i integruar kombëtar i këtij lloji që e vendos sigurinë e më të rinjve në botën digjitale si përparësi kryesore.

Ai gjithashtu iu referua ndalimit të mbi 220 faqeve për lojëra të paligjshme të fatit online – që është një rezultat konkret i analizës digjitale dhe monitorimit të adresave IP dhe mekanizmave VPN.

The post Andonovski: I kemi përmbushur objektivat tona për këtë vit, me punë intensive përshpejtojmë proceset e transformimit digjital appeared first on Telegrafi.

MPB Maqedoni njofton se dje (02.07.2025) në periudhën nga ora 16.00 deri në orën 22.00, Sektori i Çështjeve të Trafikut i Departamentit të Policisë së Uniformuar të Byrosë së Sigurisë Publike dhe Njësia Mobile për Siguri në Trafikun Rrugor kryen kontroll aksionar në territorin e Sektorit për Punë të Brendshme të Tetovës dhe Kumanovës, për të sanksionuar shoferët që nuk respektojnë rregullat e trafikut.

Gjatë kontrollit, u sanksionuan 169 shoferë, nga të cilët 17 për vozitje pa leje drejtimi, 13 për vozitje të automjetit me leje të skaduar trafiku dhe dy shoferë për vozitje me kategori të papërshtatshme.

“U shqiptuan nëntë masa ndaj shoferëve që drejtojnë mjet motorik si shofer fillestar, pra me fuqi motori më të madhe se e lejuara, 73 sanksione për shoferë motoçikletash për mospërdorim të helmetës mbrojtëse, pesë masa për xhama të errët pa test A, tetë sanksione për sigurimin e transportit publik të udhëtarëve pa certifikatë mjekësore, u konfiskuan dy motoçikleta sipas nenit 344 të Ligjit për Trafikun Rrugor. Janë përgatitur raporte përkatëse për të gjithë shkelësit”.

“Kontrollet e trafikut do të vazhdojnë edhe në ditët në vijim. U bëjmë thirrje të gjithë përdoruesve të rrugës që të respektojnë rregullat e trafikut dhe të kontribuojnë së bashku për rrugë më të sigurta”, thonë nga MPB./Telegrafi/

The post Kontrolle në Tetovë dhe Kumanovë, 169 gjoba për shkelje të rregullave në trafik appeared first on Telegrafi.

Komunikacioni në rrugët e vendit po zhvillohet pa ndërprerje, nëpër rrugë të thata.

Intensiteti i komunikacionit në akset rrugore jashtë mjediseve urbane është rritur. Në vendkalimet kufitare nga ana e Maqedonisë nuk ka vonesa të gjata për hyrje dhe dalje nga shteti.

LAMM rekomandon shpejtësi të adaptuar të lëvizjes, respektimin e sinjaleve të vendosura të komunikacionit e veçanërisht drejtim të kujdesshëm të automjetit, posaçërisht në rrugët nëpër gryka malore dhe lugina të lumenjve ku ekziston mundësia e rrëshqitjes së dheut. Kjo vlen veçanërisht për akset rrugore Katllanovë – Veles, Mavrovë – Dibër – Strugë, Vinicë – Berovë dhe Koçan – Dellçevë.

Nga 1 korriku deri më 31 gusht, në rrugët shtetërore në Maqedoni u vendos regjim i përkohshëm veror i trafikut, i cili ndalon lëvizjen e automjeteve të rënda transportuese me një masë totale mbi 15 ton, gjatë fundjavave dhe në ditët me temperatura jashtëzakonisht të larta.

The post Komunikacioni në Maqedoni, nuk ka vonesa në pikat kufitare appeared first on Telegrafi.

Lënda në lidhje me zjarrin në diskotekën “Puls”, e formuar nga Prokuroria Themelore Publike – Koçan, sot u transferua nga Gjykata Themelore Koçan në Gjykatën Themelore Penale Shkup, në përputhje me vendimin e Gjykatës Supreme të RMV-së, me të cilin përcaktohet se gjykata e Shkupit është kompetent për të vlerësuar aktakuzën.

Siç kumtuan nga Gjykata Themelore Penale e Shkupit, Gjykata Themelore Penale e Shkupit është përcaktuar si kompetente për procedurën, dhe në këtë drejtim, aktakuza e paraqitur, në përputhje me sistemin AKMIS, do t’i shpërndahet një këshilli për vlerësimin e aktakuzës, i cili më pas do t’ua dorëzojë aktakuzën të akuzuarve, pas së cilës fillon të ecë afati ligjor për ankesë të të njëjtës.

“Pas përmbushjes së kushteve të parapara për veprim, këshilli do të caktojë një seancë për të vlerësuar rezultatin, palët dhe opinioni do të njoftohen me kohë”, qëndron në kumtesën nga Gjykata Penale.

Nga atje kujtojnë se Gjykata Supreme e Republikës së Maqedonisë së Veriut, duke vepruar sipas propozimit të Gjykatës së Apelit në Shtip, ka vendosur që Gjykata Themelore Penale në Shkup të jetë kompetente për të vepruar për lëndën konkrete, për shkak të numrit të pamjaftueshëm të gjyqtarëve penalë në gjykatat në Shtip dhe Strumicë. Vendimi është marrë në bazë të një analize të kapaciteteve njerëzore dhe teknike, si dhe kompleksitetit dhe interesit publik të lëndës dhe në të theksohet nevoja për gjyqtarë me përvojë të cilët do të sigurojnë procedura efikase, profesionale dhe ligjore.

Sipas aktakuzës, 34 individë dhe tre persona juridikë të akuzuar për zjarrin në diskotekën “Puls” akuzohen për krime të rënda kundër sigurisë publike.

Midis të akuzuarve janë pronarë të lokalëve, menaxherë, inspektorë, kryetarë komunash, anëtarë të sigurimit dhe nëpunës civilë.

Për shkak të mungesës së provave të mjaftueshme, procedura ndërpritet për 11 persona, përfshirë dy ish-ministra.

Në zjarrin që ndodhi më 16 mars të këtij viti, humbën jetën 62 persona, përfshirë gjashtë fëmijë, ndërsa mbi 200 janë lënduar.

The post Lënda për zjarrin në diskotekën “Pulse” do të kalojë nën kompetenca të Gjykatës Penale të Shkupit appeared first on Telegrafi.

Përfaqësuesi i VLEN-it Fatmir Sabriu, sot në konferencë për shtyp tha se do të dorëzojnë kallëzim penal kundër ish-udhëheqësisë së Entit Shtetëror për Statistikë, personave tjerë në kryesinë e ish-Qeverisë së BDI-së dhe LSDM-së, për siç tha, marrëveshjeve politike në lidhje me regjistrimin e popullsisë.

Siç tha ai, arsyeja për kallëzimin është dyshimi serioz për marrëveshje politike dhe si pasojë e kësaj, falsifikim i rezultateve të Regjistrimit të vitit 2021.

“Pasojat e këtij akti janë të thella: numri i shqiptarëve të paraqitur në shumë fshatra, vendbanime dhe qytete është ulur në mënyrë drastike dhe të vetëdijshme. Me këtë, shqiptarët humbasin shumë të drejta personale dhe individuale (të garantuara me Kushtetutë), siç janë: punësimi, përfaqësimi politik dhe barazia gjuhësore. Po ashtu, edhe institucionet janë vënë në pozitë të marrin vendime për ndarjen e mjeteve dhe fondeve bazuar në të dhëna të gabuara dhe të zvogëluara, me ç’rast qytetarët në shumë komuna janë dëmtuar. Kërkojmë nga Prokuroria Publike të hetojë këto dyshime”.

“Për më tepër, ditëve të fundit funksionarë të lartë të BDI-së kanë pranuar publikisht se “regjistrimi ishte në kuadër të marrëveshjes”, çka e përforcon edhe më shumë dyshimin për një skenar politik të gjithë operacionit. VLEN ndërmerr këtë iniciativë në mbrojtje të ligjshmërisë, barazisë dhe pasqyrës reale statistikore të shtetit. Presim që Prokuroria të hapë menjëherë lëndë, të sigurojë të gjitha provat materiale dhe të zhvillojë një hetim të plotë. Nuk ka kompromis kur preket dinjiteti dhe numri i popullatës tone. Lufta për drejtësi fillon tash dhe do ta vazhdojmë deri në fund, në interes të të gjithë qytetarëve të Republikës së Maqedonisë së Veriut”, thonë nga VLEN./Telegrafi/

The post VLEN: Do të dorëzojmë kallëzim penal për ish-udhëheqësinë e ESHS-së për manipulim të numrit të shqiptarëve appeared first on Telegrafi.

Ministri i Transformimit Digjital, Stefan Andonovski, njoftoi se do të hapen terminale shërbimesh, ku qytetarët do të kenë qasje në shërbimet bazë, si dhe ligj për qasjen e personave me aftësi të kufizuara në faqet e internetit dhe aplikacionet mobile të institucioneve.

Andonovski tha se brenda një viti, ka 120 shërbime të reja digjitale dhe se me këtë turmat në sportele janë zvogëluar

“Numri po rritet nga 1,000 në 6,000 transaksione në muaj, dhe kjo tregon qartë se njerëzit përdorin shërbime elektronike shumë më tepër sesa i kanë përdorur në të kaluarën. Në të njëjtën kohë, mund të vërej se turmat në sportele, të paktën në Drejtorinë e librave amë, nuk janë asgjë në krahasim me atë që ishin vitin e kaluar. Detyra jonë është të transferojmë të gjitha shërbimet nga kjo zyrë, siç janë dasmat, regjistrimi i të porsalindurve, madje edhe caktimi i dasmave, në portalin kombëtar uslugi.gov.mk. Në programin e partisë kemi premtuar se një nga shërbimet e para që do të jetë i madh dhe i digjitalizuar është regjistrimi i një të porsalinduri dhe deri në fund të vitit do ta zgjidhim atë”, tha Andonovski.

Ministri theksoi se po punohet për një aplikacion qeveritar që do të jetë aplikacion për të gjithë qytetarët, në të cilin do të ketë qasje në të gjitha shërbimet e ofruara nga portali kombëtar.

“Me aplikacionin, kemi idenë ta shkarkojmë atë në telefonat e njerëzve dhe praktikisht të kemi mundësinë të përdorim këto mjete digjitale, versionin elektronik të kartës së identitetit dhe patentës së shoferit dhe shërbimet elektronike. Vendimi për të pasur një aplikacion është me qëllim që të tërhiqen të gjitha shërbimet nga kujdesi shëndetësor, shërbimet administrative dhe të tjera në atë aplikacion”, njoftoi Andonovski./Telegrafi/

The post Andonovski: Regjistrimi i të porsalindurve dhe caktimi i kurorëzimeve do të bëhet online appeared first on Telegrafi.

Stojançe Angelov, ushtrues detyre drejtor i Drejtorisë për Mbrojtje dhe Shpëtim (DMSH), dje nënshkroi marrëveshje për angazhimin e dy pilotëve në pension për avionë zjarrfikës “Air tractor”, Stojee Arsovski dhe Vasko Mihalçev.

Me këtë, avionët DMSH-së do të jenë funksionalë për veprime zjarrfikëse për shuarjen e zjarreve të rrezikshme në ajër të hapur në Maqedoninë e Veriut.

Përndryshe, pritet që avioni i dytë i DMSH-së të kthehet nga shërbimi i rregullt nga Austria në një kohë të shkurtër.

The post DMSH: Pilotët e pensionuar angazhohen sërish për shuarjen e zjarreve appeared first on Telegrafi.

Nga sot e deri më 31 gusht vendoset ndalesë e plotë për lëvizje në pyje. Siç njoftohet, ndalesa vendoset për shkak të rrezikut të shtuar nga shfaqja dhe përhapja e zjarreve në hapësira të hapura.

Lëvizja do të lejohet vetëm me leje të shkruar të lëshuar nga degët e NP “Pyjet nacionale” – Shkup, për zonat që i menaxhojnë.

Për mosrespektimin e kësaj ndalese, personat fizikë që kapen duke lëvizur në pyll do të gjobiten me 1500 deri në 2000 euro në kundërvlerë në denarë.

The post Sot hyn në fuqi ndalesa për lëvizje nëpër pyje, gjoba arrin deri në dy mijë euro appeared first on Telegrafi.

“Gjykata Kushtetuese, në përputhje me Kushtetutën dhe Aktin e gjykatës është kompetente që ta vlerësojë kushtetutshmërinë e ligjeve, ndërsa jo të propozim-ligjeve. Si rrjedhojë e kësaj, Gjykata Kushtetuese, nga aspekti i kontrollit abstrakt, është kompetente për të vlerësuar kushtetutshmërinë dhe ligjshmërinë e së drejtës pozitive, gjegjësisht rregulloret e përgjithshme dhe aktet e përgjithshme që janë pjesë e rendit juridik dhe kushtetutshmërinë dhe ligjshmërinë e tyre”.

Këtë e thekson në letrën me shkrim kryetari i Gjykatës Kushtetuese, Darko Kostadinovski dërguar si përgjigje e kërkesës së kandidateve të pavarur nga dhjetëra komuna që Gjykata të reagojë ndaj Propozim-ligjit të ri për ndryshimet në Kodin zgjedhor.

“Është e pakontestueshme se në përputhje me nenin 13 dhe 91 nga Akti i gjykatës, Gjykata Kushtetuese ndjek realizimin e kushtetutshmërisë, ligjshmërinë dhe lirinë e të drejtave të njeriut dhe qytetarit të përcaktuara me Kushtetutë dhe mund të miratojë raport të posaçëm në të cilin do të tregojë nevojën për të marrë masa për realizimin dhe mbrojtjen e tyre dhe do t’ia paraqesë atë organit kompetent, gjegjësisht në bazë të të dhënave dhe njoftimeve të marra më parë, Gjykata Kushtetuese mund të nxjerrë vendim të posaçëm me të cilin do të vërtetoj se vendimi i saj nuk është zbatuar dhe njofton prokurorinë publike kompetente, si dhe organin që emëroi ose zgjodhi udhëheqësin e organit ose trupit të cilin nuk arriti të zbatojë vendimin e Gjykatës”.

“Por, në lidhje me kërkesën tuaj për miratimin e raportit të posaçëm për Propozim-ligjin për ndryshimet dhe plotësimet në Kodin zgjedhor, me procedurë të shkurtër, ju informoj se Gjykata Kushtetuese, raporti nga aspekti i Nenit 13 nga Akti i gjykatës, mund të miratojë raport ekskluzivisht për një ligj i cili është pjesë e urdhrit parësor”, theksohet në letrën me shkrim të Kostadinovit, informojnë nga Gjykata Kushtetuese.

Letra, siç informojnë nga Kushtetuesja është dërguar deri te këshilltarët e pavarur për Karposhin – Për mbrojtjen e Karposhit në komunën e Karposhit; Këshilltarët e Pavarur nga Qyteti i gjelbër human në Qytetin e Shkupit; Këshilltarë të pavarur nga “Shansa” për Qendër në komunën Qendër; Këshilltarë të pavarur nga “Më ndryshe” në Komunën e Manastirit; Ish këshilltarët e pavarur nga Më mirë për Tetovën në Komunën e Tetovës, Iniciativa Qytetare Të Gjelbrit nga Gazi Baba etj.

The post Ndryshimi i Kodit Zgjedhor, Kostadinovski: Gjykata Kushtetuese nuk mund të vlerësojë propozim-ligjet appeared first on Telegrafi.

Fluksi i shtuar në vendkalimet kufitare kyçe të vendit gjatë periudhës së pushimeve, ka bërë që autoritetet të zgjerojnë bashkëpunimet me fqinjët për modelin “One Stop Shop”. Këtë të premte pritet që në vendkalimin kufitar Tabanocë-Preshevë të fillojë me punë sistemi i integruar ndërkufitar i Maqedonisë së Veriut me Serbinë. Ministri i Brendshëm Pançe Toshkovski tha se nga 4 korriku në këtë do kontrollohen vetëm hyrjet e njerëzve dhe mallrave në shtet.

“Me Serbinë, zyrtarisht do ta vëmë në funksion në fund të kësaj jave, mendoj se të premten e kemi bërë ujdinë të kemi ceremoninë e hapjes dhe fillimin e funksionimit në këtë mënyrë të kontrollit të udhëtarëve në kufi. Jemi në fazën e bisedimeve intensive edhe me Republikën e Shqipërisë, ku flasim për dy vendkalimet kufitare, ku vlerësojmë se do të lehtësohet lëvizja e qytetarëve nëpër kufij me mënyrën e re të kontrollit të udhëtarëve të ashtuquajtur ‘One Stop Shop”, tha ministri i Punëve të Brendshme, Pançe Toshkovski.

Deri më tani vendi ynë këtë sistem të integruar kufitar e ka bërë me Republikën e Kosovës në dy vendkalime kufitare në Bllacë dhe Jazhincë, por ende nuk e ka aktivizuar edhe në Bellanocë. Toshkovskii tha se këtë model pritet ta zbatojnë në të ardhmen edhe me Shqipërinë. Ndërsa me dy fqinjët tjerë, të cilët janë anëtare të BE-së, Bullgaria dhe Greqia që janë në zonën Shengen, tregoi se do të bëhet një riorganizim kufitar për shtimin e korsive nga pjesa jonë.

“Sa i përket Republikës së Greqisë, gjatë ditës së djeshme isha në vendkalimin kufitar të Bogorodicës ku ne konstatuam se ka kushte për përmirësimin e mbikëqyrjes kufitare që e kryejmë nga ana jonë. Përkatësisht, mund të vëmë në funksion së paku edhe dy korsi për dalje me riorganizim dhe mund të vëmë në funksion së paku edhe një korsi për hyrje në pjesën e ngarkesës së mauneve”, shtoi Pançe Toshkovski – ministër i Punëve të Brendshme.

Këto u thanë në takimin pas takimit dypalësh të ministrit Toshkovski me homologun e tij të Lituanisë, Vladislav Kondratoviç, që po qëndron për vizitë zyrtare në Shkup, e ku të dy ministrat nënshkruan Marrëveshje të riatdhesimit dhe për bashkëpunim ndërshtetëror të policive./TV21/

The post Nga e premtja “One Stop Shop” në Tabanoc, Toshkovski: Do të ulet fluksi i pritjeve në kufi appeared first on Telegrafi.