TIRANË, 30 korrik/ATSH/ Sipas raportit të fundit të OECD “Economic Convergence Scoreboard for the Western Balkans 2025”, Shqipëria zë vendin e parë në Ballkanin Perëndimor për përputhshmërinë me politikat e gjelbërta të Bashkimit Europian, duke kaluar të gjitha vendet fqinje në “Greening Cluster”, me një rezultat prej 103 pikësh, gjithashtu duke u renditur mbi mesataren e BE-së (100 pikë) dhe të Ballkanit Perëndimor (47 pikë).

Ministri i Ekonomisë, Kulturës dhe Inovacionit, Blendi Gonxhja bëri të ditur se Shqipëria ka shënuar përparim të ndjeshëm në këtë fushë për shkak të rritjes së vëmendjes institucionale ndaj agjendës së gjelbër, përmes përfshirjes së objektivave të qëndrueshmërisë në planet kombëtare dhe ndërsektoriale.

“Renditja në vendin e parë e Shqipërisë në këtë dimension shihet si një mundësi për të udhëhequr tranzicionin rajonal të gjelbër, një avantazh për tërheqjen e investimeve të huaja të qëndrueshme, një dritare për financime të gjelbra nga BE dhe institucionet ndërkombëtare”, theksoi ministri.

Ministria e Ekonomisë, Kulturës dhe Inovacionit, në rolin e Koordinatorit Kombëtar të këtij raporti, theksoi Gonxhja, mbetet e angazhuar për zhvillimin e politikave që promovojnë ekonominë e gjelbër dhe rritjen e qëndrueshme, si pjesë e përpjekjeve të Shqipërisë për integrimin evropian.

/r.e/

The post Shqipëria në krye të rajonit të Ballkanit Perëndimor për ekonominë e gjelbër appeared first on Agjencia Telegrafike Shqiptare.

TIRANË, 30 korrik/ATSH/ Familjet që përfitojnë ndihmë ekonomike, personat me aftësi të kufizuara, pensionistët me të ardhura të pamjaftueshme, si dhe individët pa mbështetje familjare apo sociale, do të mund të përfitojnë një subvencion për konsumimin jetik të ujit. Ky subvencion do të mbulojë deri në 5 metra kub ujë në muaj.

Për këto kategori, do të subvencionohet gjithashtu me tarifa fikse, tarifa për kanalizimet dhe shërbimet e trajtimit të ujërave të ndotura urbane.

Udhëzimi i ri që përcakton metodologjinë për shpërndarjen dhe përdorimin e subvencioneve shtetërore për ofruesit e shërbimeve në sektorin e ujësjellës kanalizimeve për vitin buxhetor 2025 është publikuar në Fletoren Zyrtare dhe ka hyrë në fuqi menjëherë.

Ky udhëzim ka për qëllim të rregullojë procedurat për shpërndarjen e subvencioneve dhe të sigurojë një sistem të qartë dhe të strukturuar mbështetjeje për kategoritë më në nevojë.

Subvencioni do të shpërndahet nga Agjencia Kombëtare e Ujësjellës Kanalizimeve (AKUK) dhe do të përdoret për kompensimin e kostove të ujit të pijshëm dhe shërbimeve të kanalizimeve për ato familje që janë pjesë e kategorive sociale në nevojë, siç janë parashikuar në ligjin për asistencën sociale. Këto familje do të përfitojnë subvencionin për deri në 5 metra kub ujë në muaj, si dhe për tarifat fikse dhe shërbimet e kanalizimeve dhe trajtimit të ujërave të ndotura urbane.

Një aspekt tjetër i rëndësishëm është se çdo familje mund të përfitojë subvencion vetëm një herë, pavarësisht numrit të anëtarëve të saj që mund të përfshihen në kategoritë e ndihmës ekonomike.

Shoqëritë aksionare të ujësjellës kanalizimeve do të kenë përgjegjësinë e akordimit të zbritjeve për kategoritë e nevojshme çdo muaj.

Për të siguruar një përdorim të duhur të fondeve, janë parashikuar disa kushte për shoqëritë UK. Vetëm ato që kanë nënshkruar një kontratë performancë me AKUK mund të përfitojnë nga ky subvencion. Kontrata është e domosdoshme për të siguruar një administrim të saktë të fondeve dhe një mbikëqyrje më të fortë të shpenzimeve.

Në rast se shoqëritë aksionare të ujësjellës kanalizimeve nuk kanë nënshkruar kontratën e performancës, ato nuk do të mund të rimbursohen për zbritjet e aplikuara.

Për shoqëritë që përmbushin kushtet, AKUK do të përllogarisë dhe shpërndajë fondet në përputhje me të dhënat e raportuara nga shoqëritë përkatëse. Gjithashtu, do të realizohet një mbikëqyrje e vazhdueshme për të siguruar që fondet të përdoren siç është planifikuar dhe për të garantuar që subvencioni të arrijë te ata që kanë më shumë nevojë.

/r.e/

The post Udhëzimi i ri, kategoritë në nevojë përfitojnë falas ujë dhe shërbimet e ujësjellës kanalizimeve appeared first on Agjencia Telegrafike Shqiptare.

TIRANË, 30 korrik/ATSH/ Tregu i sigurimeve shënoi rritje gjatë periudhës janar-qershor të këtij viti, në krahasim me të njëjtën periudhë të vitit të kaluar.

Referuar raportit të publikuar nga Autoriteti i Mbikëqyrjes Financiare (AMF), të ardhurat nga primet e shkruara bruto të sigurimit arritën 12,8 miliardë lekë, duke shënuar një rritje prej rreth 8%, krahasuar me periudhën janar-qershor 2024.

Numri i kontratave të lidhura gjatë gjysmës së parë të vitit arriti 755 806, një rritje prej 8,06% krahasuar me të njëjtën periudhë të vitit të kaluar. Kjo tregon një rritje të interesit nga konsumatorët dhe një forcim të besimit në sigurimet e ofruara nga kompanitë e sigurimeve.

Në aspektin e ndarjes së tregut sipas llojit të sigurimit, tregu vazhdon të jetë i orientuar kryesisht tek sigurimet e jo-jetës, të cilat kanë kontribuar me 90,98% të vëllimit të përgjithshëm të primeve.

Ndërkohë, sigurimet e jetës kanë zënë vetëm 8,99%, një përqindje që mbetet e ulët.

Në ndarjen sipas llojit të sigurimeve, primet e shkruara bruto të sigurimeve vullnetare zënë 41,29% të totalit, ndërsa sigurimet e detyrueshme zënë 58,71% të tregut.

Ndërkohë, dëmet e paguara bruto gjatë periudhës janar-qershor 2025 shënuan një ulje të lehtë prej 0,73%, krahasuar me të njëjtën periudhë të vitit të kaluar, duke arritur në rreth 4 miliardë lekë.

Sigurimi motorik shënoi rritje të konsiderueshme në dëmet e paguara, me një vlerë prej 2640 milionë lekësh, që përbën një rritje prej 6,48% krahasuar me vitin e kaluar.

/r.e/

The post Tregu i sigurimeve rritje me rreth 8% në gjysmën e parë të vitit appeared first on Agjencia Telegrafike Shqiptare.

TIRANË, 29 korrik/ATSH/ Në Tiranë u zhvillua sot ceremonia e diplomimit të 90 studentëve të Akademisë së Forcave të Armatosura, 5 prej të cilëve nga Republika e Kosovës.

Në ceremoninë e diplomimit ishte i pranishëm ministri i Mbrojtjes, Pirro Vengu, si dhe ministri në detyrë i Mbrojtjes i Kosovës, Ejup Maqedonci,.

Ministri Vengu e cilësoi diplomimin e kadetëve të rinj, një moment krenarie për të diplomuarit dhe familjet e tyre, që nisin një kapitull të ri në shërbim të atdheut.

“Diploma që ju do të mbani në duart tuaja nuk është një pikë mbërritjeje, por një pikënisje. Është një rrugë që shpesh është e vetmuar, por gjithmonë e drejtë. Nuk ofron lehtësi, por ofron kuptim. Aty ku disiplina bëhet virtyt dhe sakrifica merr domethënie. Në një botë që relativizon çdo gjë, profesioni juaj mbetet i pakontestueshëm në vlerat e tij. Ju nuk përfaqësoni thjesht shtetin, por i jepni atij formë, drejtim dhe qëndrueshmëri”, u shpreh ministri Vengu

Komandanti i Shkollës së Bashkuar, Bardhyl Nuredinaj tha se betimi ushtarak para flamurit kombëtar nuk është thjeshtë një tekst por një angazhim moral, ligjor e atdhetar, një zotim për të qenë gjithmonë në shërbim të kombit, ruajtur e mbrojtur integritetin e sovranitetin e vendit, rendin kushtetues dhe për të kontribuar në paqen e sigurinë kolektive. /j.p/

The post Diplomohen 90 kadetë, Vengu: Profesion ku sakrifica merr domethënie appeared first on Agjencia Telegrafike Shqiptare.

TIRANË, 29 korrik/ATSH/ Pas vendimit për ndërprerjen e kontratës së aktorit Simon Shkrela dhe një tjetër anëtari të trupës së teatrit “Migjeni”, kryetari i Bashkisë Shkodër, Benet Beci, në një deklaratë për mediet, bëri të ditur se kjo masë është pjesë e një procesi riorganizimi të brendshëm, i cili vjen në kuadër të përgatitjeve për sezonin e ri artistik dhe synon rritjen e cilësisë së aktivitetit artistik dhe organizativ të institucionit.

Beci sqaroi se analiza e performancës individuale të aktorëve gjatë tre viteve të fundit tregoi mungesë produktiviteti dhe angazhimi nga disa prej tyre. Ai tha se nuk bëhet fjalë për shkarkime të motivuara politikisht, por për masa konkrete për të garantuar që paratë e taksapaguesve shkodranë të mos përdoren për të mbështetur paga të pamerituara.

“Në një trupë artistike, ashtu si në çdo sektor tjetër të administratës, ekzistojnë detyrime kontraktuale që kur nuk përmbushen për një periudhë të gjatë, siç është rasti me tre vite rresht, sjellin ndërprerjen e marrëdhënies së punës”, theksoi kryebashkiaku.

Reagimi i Becit vjen pas valës së reagimeve dhe kundërshtimeve publike, të cilat, sipas tij, janë përdorur për qëllime politike nga faktorë të ndryshëm të spektrit të djathtë në Shkodër dhe Tiranë.

Në deklaratë gjithashtu thuhet se Bashkia nuk ka asnjë qëllim të denigrojë individë, por nuk do të fshehë paaftësitë e atyre që, sipas saj, nuk kanë kontribuar në skenën teatrore për një kohë të gjatë.

Kreu i bashkisë siguroi publikun se sezoni i ri artistik nuk do të preket nga këto ndryshime, përkundrazi, pritet të sjellë një nivel të ri të cilësisë artistike dhe organizative.

“Sezoni i ardhshëm do të jetë pa dyshim një sukses i vërtetë për Teatrin “Migjeni” dhe trupën e tij artistike, ashtu siç Shkodra e meriton”, tha Beci. /j.p/

1 nga 2

The post Largimi i Shkrelit nga teatri “Migjeni”, Beci: Riorganizim për cilësi më të lartë artistike appeared first on Agjencia Telegrafike Shqiptare.

TIRANË, 29 korrik/ATSH/ Kryetarja e Kuvendit, Elisa Spiropali, merr pjesë në konferencën e gjashtë të kryetarëve të parlamenteve të Unionit Ndërparlamentar, e cila po mbahet në datat 29-31 korrik në Gjenevë dhe i kushtohet bashkëpunimit parlamentar, multilateralizmit për paqen, drejtësinë dhe prosperitetin.

Gjatë qëndrimit në Gjenevë, Spiropali u takua sot pasdite me Presidenten e Bundestagut Gjerman, Julia Klöckner.

Kryetarja Spiropali diskutoi me presidenten Klöckner mbi forcimin e marrëdhënieve të shkëlqyera mes dy vendeve, bashkëpunimin e suksesshëm mes Kuvendit dhe Budestagut dhe mbështetjen e Gjermanisë për objektivin strategjik të Shqipërisë për t’u anëtarësuar në Bashkimin Europian brenda vitit 2030.

“Shqipëria dhe Gjermania po zhvillojnë marrëdhënie të shkëlqyera, një parteritet të fuqishëm e dinamik, shkëmbime të vazhdueshme të nivelit të lartë dhe bashkëpunim të sukseshëm në mjaft sektorë si drejtësia, siguria, punët e bredshme, energjia, arsimi, turizmi, etj. Mbështetja e Gjermanisë, si një ndër aleatët më të rëndësishëm politik, është thelbësore për avancimin e reformave, integrimin europian të Shqipërisë dhe zhvillimin, stabilitetin e paqen në rajon. Bashkëpunimi intensiv mes Kuvendit dhe Budestagut për thellimin e reformave, sidomos reformës në drejtësi dhe asaj zgjedhore do të vijojë në mbështetjen e Kuvendit për realizimin e objektivit kombëtar për përfundimin e negociatave brenda 2027 dhe anëtarësimin brenda 2030. Ne vlerësojmë vizionin dhe kontributin e veçantë të Gjermanisë për perspektivën europiane të Ballkanit Perëndimor nëpërmjet Procesit të Berlinit dhe nismave të tjera”, u shpreh Spiropali.

Presidentja e Bundestagut, Klöckner, vlerësoi bashkëpunimin e gjithanshëm mes dy vendeve dhe nënvizoi se mbështetja e fuqishme e Gjermanisë për anëtarësimin e Shqipërisë në BE do të vijojë dhe Bundestagu do të bashkëpunojë e ndihmojë Kuvendin në lidershipin e procesit të integrimit europian.

Pasditen e sotme Spiropali u takua edhe me kryetarin e Knesset të Izraelit, Amir Ohana, me të cilin diskutuan mbi partneritetin politik, bashkëpunimin ekonomik dhe marrëdhëniet e ngushta mes Shqipërisë dhe Izraelit, të cilat i kanë rrënjët në miqësinë e thellë historike dhe aktin unik të shqiptarëve për shpëtimin e hebrenjve gjatë ditëve të errëta të Holokaustit.

“Shqipëria do të vijojë të jetë një zë i fuqishëm kundër antisemitizmit, pjesë e kontributit për respektimin dhe mbrojtjen e të drejtave themelore të njeriut, kundër padrejtësive dhe diskriminimit të çdo lloji”, u shpreh Spiropali.

Kuvendi dhe Knesset do të intensifikojnë ndërveprimin për të mbështetur marrëdhëniet e shkëlqyera mes dy vendeve dhe miqësinë e fortë mes dy popujve tanë. /j.p/

1 nga 6

The post Spiropali në Gjenevë, takime me presidenten e Bundestagut dhe kreun e Knessetit të Izraelit appeared first on Agjencia Telegrafike Shqiptare.

TIRANË, 29 korrik/ATSH/ Brigjet e lumit Vjosë, zemra e Parkut Kombëtar po mbushen me vizitorë nga e gjithë bota këto ditë vere.

Nga adhurues të natyrës, deri tek aventurierët me kanoe e turistë që kërkojnë qetësinë, Vjosa ofron një eksperiencë të rrallë dhe të paprekur nga civilizimi modern.

Kryeministri Edi Rama përcolli foto nga brigjet e lumit plot turistë.

Me rrjedhën e saj të lirë përmes kanioneve, pyjeve të dendur dhe fushave të gjelbra, Vjosa është cilësuar si lumi i fundit i egër në Europë.

Kjo veçori e bën atë një magnet për turistët që kërkojnë autenticitet, biodiversitet dhe aktivitete të qëndrueshme në natyrë.

Autoritetet shpresojnë që përmes promovimit dhe ruajtjes së Vjosës si Park Kombëtar, Shqipëria të kthehet në një destinacion model për ekoturizmin në Ballkan dhe më gjerë. /j.p/

The post Brigjet e lumit Vjosa plot me turistë, Rama ndan foto appeared first on Agjencia Telegrafike Shqiptare.

TIRANË, 29 korrik/ATSH/ Gjykata Kushtetuese shqyrtoi kërkesën e shtetases Onejda Ymeraj, e cila kundërshtoi sekuestrimin e celularit të saj nga Prokuroria e Posaçme në një procedim penal ku ajo vetë nuk ishte subjekt.

Kërkuesja pretendoi shkelje të së drejtës për fshehtësinë e korrespondencës, mbrojtjen e të dhënave personale dhe të drejtës së pronës private.

Gjykata vlerësoi se komunikimet elektronike përfshirë mesazhet përmes platformave online përfshihen në mbrojtjen kushtetuese të nenit 36, duke i konsideruar si formë moderne të korrespondencës njerëzore.

Në përfundim të shqyrtimit Gjykata konstatoi se është cenuar e drejta e kërkueses për fshehtësinë e korrespondencës dhe mbrojtjen e të dhënave personale për pjesët që nuk lidhen me objektin e hetimit penal.

Gjykata vendosi pranimin e pjesshëm të kërkesës, asgjësimin e kopjeve të të dhënave që nuk kanë lidhje me hetimin dhe vijimin e sekuestrimit për pjesën tjetër nën kontroll gjyqësor.

Gjithashtu Gjykata urdhëroi respektimin e garancive procedurale për sekuestrimin dhe përpunimin e të dhënave dhe ngarkoi Prokurorinë e Posaçme për zbatimin e vendimit brenda një afati tremujor

Vendimi nuk ka efekt prapaveprues për çështje të ngjashme të përfunduara ose që nuk janë ankimuar. /j.p/

The post Iu sekuestrua telefoni nga SPAK pa vendim, Kushtetuesja pranon pjesërisht kërkesën e qytetares appeared first on Agjencia Telegrafike Shqiptare.

TIRANË, 29 korrik/ATSH/ Kolegji i Posaçëm i Apelimit shkarkoi nga detyra prokuroren e Tiranës, Eranda Laze.

Trupi gjykues i Kolegjit arriti në përfundimin se prokurorja Eranda Laze gjendet në kushtet e deklarimit të pamjaftueshëm për pasurinë dhe u vendos ndryshimi i vendimmarrjes së Komisionit e shkarkimi nga detyra i këtij subjekti rivlerësimi.

Laze u konfirmua në detyrë nga Komisioni i Pavarur i Kualifikimit, KPK më 8 nëntor të vitit të kaluar.

Gjatë hetimit administrativ në KPK, ajo e kundërshtoi bilancin negativ në masën 10 milionë lekë, si dhe gjetjet për udhëtime me persona të përfshirë në krimin e organizuar, duke kërkuar konfirmimin.

Shumica e trupës së KPK i gjeti bindëse shpjegimet dhe provat e dorëzuara nga subjekti, duke e reduktuar pamundësinë në rreth 1.5 milionë lekë, që u konsiderua në përfundim jo penalizues.

Vendimi i shumicës së Komisionit u gjet i pabazuar dhe nga Operacioni Ndërkombëtar i Monitorimit që pasi evidentoi probleme për pasurinë dhe etikën, u kërkoi Komisionerëve Publikë përmes një rekomandimi, që të ushtronin ankim në Kolegj. /j.p/

The post KPA shkarkon nga detyra prokuroren e Tiranës, Eranda Laze appeared first on Agjencia Telegrafike Shqiptare.

TIRANË, 29 korrik/ATSH/ Shqipëria është përfshirë ndër 19 vendet e përzgjedhura në raportin e ri global të Organizatës së Kombeve të Bashkuara për Ushqimin dhe Bujqësinë (FAO), të titulluar “Transformimi i ushqimit dhe bujqësisë përmes një qasjeje sistemike”.

Ky raport thekson rrugëtimin e vendeve që kanë kaluar nga përpjekje të fragmentuara drejt një modeli të integruar për zhvillimin rural dhe sistemet ushqimore, në përputhje me vizionin “Bujqësia 2030”.

Për Shqipërinë, vuri në dukje ministrja e Bujqësisë dhe Zhvillimit Rural Anila Denaj, ky është një vlerësim i qartë i progresit të arritur në drejtim të një bujqësie të qëndrueshme, inovative dhe të lidhur me sektorë të tjerë strategjikë.

“Në qendër të këtij transformimi qëndron agroturizmi, i cili është shndërruar në një pikë kyçe strategjike që lidh sektorët e bujqësisë, turizmit, arsimit profesional dhe financave”, deklaroi Denaj.

Kjo qasje sistemike ka sjellë një sërë përfitimesh konkrete për komunitetet rurale dhe ekonominë kombëtare, si: rritje të përfshirjes së të rinjve në inovacionin agroushqimor; përmirësime të ndjeshme në infrastrukturën rurale; krijimin e njësisë për agroturizëm në Ministrinë e Bujqësisë dhe Zhvillimit Rural (MBZHR); mbështetje të konsiderueshme financiare, përmes Fondit për Zhvillim Rural në vlerën e 250 milionë eurove, si dhe Paketës së Maleve.

Ky model zhvillimi synon jo vetëm të rrisë produktivitetin dhe qëndrueshmërinë e sektorit bujqësor, por edhe të krijojë më shumë mundësi për ekonominë vendase, duke fuqizuar komunitetet rurale, ruajtur biodiversitetin dhe promovuar një zhvillim gjithëpërfshirës.

Përfshirja e Shqipërisë në raportin global të FAO-s është një dëshmi e qartë e vizionit dhe angazhimit të institucioneve shqiptare për ndërtimin e një bujqësie të së ardhmes, të lidhur ngushtë me natyrën, teknologjinë dhe potencialin njerëzor të vendit. /j.p/

The post FAO përzgjedh Shqipërinë si shembull transformimi për sistemet ushqimore dhe zhvillimin rural appeared first on Agjencia Telegrafike Shqiptare.

TIRANË, 29 korrik/ATSH/ Ministri i Financave, Petrit Malaj, zhvilloi sot një takim me drejtoreshën e Agjencisë Italiane për Zhvillim dhe Bashkëpunim (AICS Tirana), Stefania Vizzaccaro, ku u diskutua mbi thellimin e bashkëpunimit dypalësh dhe projektet e përbashkëta për zhvillimin ekonomik të vendit.

Në fokus të bisedimeve ishin sektorë kyç për zhvillimin e qëndrueshëm të Shqipërisë, si energjia, furnizimi me ujë, infrastruktura rrugore dhe transporti, ku AICS ka kontribuar në mënyrë të vazhdueshme përmes projekteve të financuara dhe ekspertizës teknike.

Ministri Malaj vlerësoi angazhimin e Italisë si një partner i rëndësishëm zhvillimi për Shqipërinë, duke theksuar se bashkëpunimi me AICS ka sjellë rezultate konkrete në terren dhe synohet të thellohet edhe më tej.

“Ndamë vullnetin për të forcuar më tej bashkëpunimin mes institucioneve tona, si dhe ambicien për zbatimin e projekteve të reja me ndikim të qartë social dhe ekonomik”, u shpreh ministri Malaj.

Ai vlerësoi mbështetjen e vazhdueshme nga AICS dhe vizionin e përbashkët me Italinë për zhvillimin dhe integrimin e shpejtë të Shqipërisë në strukturat europiane.

Agjencia Italiane për Zhvillim dhe Bashkëpunim (AICS) është partner aktiv në fushën e reformave ekonomike, zhvillimit rural, mbështetjes ndaj sektorit privat dhe nxitjes së inovacionit në Shqipëri, duke forcuar më tej marrëdhëniet tradicionale mes dy vendeve fqinje. /j.p/

1 nga 3

The post Projektet e përbashkëta, Malaj takim me drejtoreshën e Agjencisë Italiane për Zhvillim dhe Bashkëpunim appeared first on Agjencia Telegrafike Shqiptare.

TIRANË, 29 korrik/ATSH/ Në kuadër të zbatimit të masave të marra për garantimin dhe ofrimin e kujdesit shëndetësor gjatë gjithë sezonit turistik, ministrja e Shëndetësisë dhe Mbrojtjes Sociale, Albana Koçiu zhvilloi sot takim me drejtuesit e spitaleve rajonale në mbarë vendin.

Ministrja Koçiu kërkoi nga strukturat përkatëse angazhim për ofrimin e shërbimeve shëndetësore dhe gatishmërinë për menaxhimin e fluksit të shtuar të pacientëve dhe përforcimin e ekipeve të urgjencës.

“Të gjithë strukturat spitalore që kanë fluks të shtuar pushuesish vendas dhe të huaj do duhet të jenë në gatishmëri njësoj si muajt e kaluar, por me një fokus të shtuar tek shërbimet e urgjencës”, tha ajo.

Gjithashtu, Koçiu theksoi se një vëmendje e veçantë i është kushtuar edhe Qendrave Shëndetësore Verore, të cilat janë në funksion përgjatë gjithë vijës bregdetare dhe zonave turistike, duke ofruar ndërhyrje të shpejtë dhe shërbim cilësor për pushuesit.

“Shëndetësia është në gatishmëri të plotë për të garantuar një sezon të sigurt për të gjithë”, theksoi ministrja e Shëndetësisë, Koçiu.

Në kushtet e një fluksi të shtuar të qytetarëve dhe turistëve në zonat bregdetare dhe në qendrat turistike të vendit, ministria e Shëndetësisë ka ndërmarrë një sërë masash për të garantuar ofrimin e pandërprerë, cilësor dhe në kohë të shërbimeve shëndetësore 24/7 në të gjitha strukturat spitalore dhe në 36 qendrat shëndetësore verore në vend.

1 nga 5

The post Koçiu me drejtuesit e spitaleve: Përforcim i ekipeve të urgjencës gjatë sezonit turistik appeared first on Agjencia Telegrafike Shqiptare.

TIRANË, 29 korrik /ATSH/ Një investim i rëndësishëm infrastrukturor është finalizuar në bashkinë Divjakë, me ndërtimin e urës së re që lidh zonat e Kularit dhe Sulzotajt. Ky projekt rrit ndjeshëm sigurinë dhe lehtësinë e lëvizjes për banorët, duke sjellë një ndikim të drejtpërdrejtë në jetën e përditshme të komuniteteve rurale.

Kryeministri Edi Rama publikoi sot pamje nga ura e sapopërfunduar, duke theksuar rëndësinë e saj për dhjetëra familje, fermerë dhe biznese të vogla të zonës që tashmë kanë një rrugë më të sigurt dhe më funksionale për të arritur tregjet dhe shërbimet urbane.

Me përfundimin e këtij projekti, përmirësohet transporti i përditshëm, rritet qasja në shërbimet publike dhe lehtësohet lëvizja për raste emergjente.

Përveç ndikimit në jetën individuale të banorëve, kjo vepër konsiderohet një hap drejt zhvillimit ekonomik lokal dhe përmirësimit të kushteve të punës për sektorin bujqësor.

Bashkia Divjakë është një nga zonat më të rëndësishme për prodhimin bujqësor dhe blegtoral në vend. Me një sipërfaqe të gjerë tokash të punueshme, ajo kontribuon ndjeshëm në furnizimin me fruta, perime dhe produkte të tjera të freskëta për tregjet kombëtare dhe rajonale.

Divjaka njihet gjithashtu për pasuritë e saj natyrore, duke përfshirë Parkun Kombëtar të Divjakë-Karavastasë, një nga zonat më të mbrojtura dhe më të vizituara në vend, që tërheq vëmendjen e turistëve vendas dhe të huaj për shkak të florës dhe faunës së pasur, veçanërisht për pelikanin kaçurrel, një specie në rrezik zhdukjeje.

Zhvillimi i infrastrukturës rrugore në këtë zonë është thelbësor për rritjen e turizmit, rritjen e vlerës së tokës bujqësore dhe lehtësimin e aksesit në tregje për prodhuesit vendas. /j.p/

1 nga 10

The post Ura e re që lidh Kularin me Sulzotajn, Rama ndan pamjet appeared first on Agjencia Telegrafike Shqiptare.

TIRANË, 28 korrik /ATSH/ Ka përfunduar sot faza e intervistës për përzgjedhjen e Drejtorit të Byrosë Kombëtare të Hetimit (BKH), pas zhvillimit të testit të poligrafit më datat 24 dhe 25 korrik.

Intervistat u zhvilluan në ambientet e Strukturës së Posaçme kundër Korrupsionit dhe Krimit të Organizuar (SPAK).

Kjo fazë u monitorua nga përfaqësues ndërkombëtarë dhe kishte në fokus vlerësimin e njohurive profesionale, aftësive drejtuese si dhe qasjen e kandidatëve ndaj sfidave që lidhen me detyrën e Drejtorit të BKH-së.

Në përfundim të intervistave, Komisioni i Përzgjedhjes vendosi që të shtatë kandidatët pjesëmarrës, Andi Pogaçe, Artur Beu, Elton Kërluku, Gentian Ndoi, Gentjan Shehaj, Gledis Nano dhe Joni Keta, të kalojnë në fazën e verifikimit të figurës dhe deklarimit të pasurisë, në përputhje me ligjit “Për organizimin dhe funksionimin e institucioneve për të luftuar korrupsionin dhe krimin e organizuar”.

SPAK rikonfirmon angazhimin për një proces përzgjedhjeje transparent, të drejtë dhe të bazuar në kritere të qarta profesionale dhe ligjore. /j.p/

The post Përfundon faza e intervistës në procesin e përzgjedhjes së kreut të BKH-së appeared first on Agjencia Telegrafike Shqiptare.

TIRANË, 28 korrik /ATSH/ Për të dytin vit radhazi, sheshi i Dervicianit në Dropull u mbush me tinguj, ngjyra dhe emocione në ngjarjen folklorike “Më ço në fshatin tënd”, organizuar nga Shoqëria Kulturore “DROPULLI”.

Ministrja e Turizmit dhe Mjedisit, Mirela Kumbaro, bëri të ditur se ky aktivitet është kthyer në një pikëtakim të rëndësishëm kulturor, ku Shqipëria dhe Greqia bashkohen përmes traditave të përbashkëta.

“Dropulli tregoi edhe një herë se është një vend ku kultura nuk njeh kufij dhe tradita bëhet gjuhë e përbashkët”, u shpreh ministrja Kumbaro, duke vlerësuar pjesëmarrjen dhe përkushtimin e grupeve folklorike nga të dy vendet.

Festivali solli në skenë kostume tradicionale, valle popullore dhe këngë që mbajnë gjallë kujtesën kolektive, duke krijuar një atmosferë të veçantë për banorët dhe vizitorët e shumtë. /j.p/

1 nga 8

The post Dropulli, vendtakimi i dy kulturave në festivalin “Më ço në fshatin tënd” appeared first on Agjencia Telegrafike Shqiptare.

TIRANË, 28 korrik /ATSH/ Në Vlorë u zhvillua një takim pune me grupin e ngritur për ristrukturimin e qeverisjes vendore, nën drejtimin e ministrit të Shtetit për Pushtetin Vendor, Arbjan Mazniku, dhe kryetarit të bashkisë së Vlorës, Ermal Dredha.

Ky takim u organizua në kuadër të vizionit për transformimin e qytetit, me synimin për të forcuar kapacitetet institucionale dhe për të ofruar shërbime më cilësore për qytetarët.

Ministri Mazniku deklaroi se ristrukturimi vendor është një domosdoshmëri për t’i dhënë energji të re Vlorës, për të garantuar standarde të reja europiane në administrim dhe për të ndërtuar një bashki që ecën në hap me vizionin e Shqipërisë 2030.

Ai nënvizoi rëndësinë e këtij procesi për modernizimin e shërbimeve publike dhe menaxhimin e qëndrueshëm të territorit.

Kryebashkiaku Ermal Dredha the se përmes një riorganizimi institucional dhe qeverisjeje më efikase, po ndërtohet një strukturë që u shërben më mirë qytetarëve dhe i jep qytetit më shumë kapacitete për zhvillim.

“Vlora 2030 është vizioni afatgjatë për një qytet që shkëlqen në çdo hallkë, nga turizmi te ekonomia dhe zhvillimi i qëndrueshëm, duke e kthyer Vlorën në një model suksesi në nivel kombëtar”, tha Dredha.

1 nga 6

The post Mazniku: Ristrukturimi vendor për t’i dhënë energji të re Vlorës appeared first on Agjencia Telegrafike Shqiptare.

TIRANË, 28 korrik/ATSH/ Vijojnë punimet për ndërtimin e rrugës Berat–Ballaban, një aks strategjik që po afron gjithnjë e më shumë dy prej qyteteve më të rëndësishme të trashëgimisë kulturore në Shqipëri, Beratin dhe Gjirokastrën, të dy të mbrojtur nga UNESCO.

Kryeministri Edi Rama ndau sot pamje nga kantieri i punimeve, duke bërë të ditur se ka përfunduar shtresa e parë e asfaltit në segmentin Ballaban–Zhitom, ndërsa në pjesën Zhitom–Drobonik po vijon vendosja e tombinove dhe përgatitja e terrenit për asfaltim.

Rruga, me një gjatësi prej 60 kilometrash, nuk është thjesht një projekt infrastrukturor, por një nyje lidhëse e rëndësishme që forcon rrjetin e turizmit kulturor në jug të vendit.

Ajo shkurton ndjeshëm kohën e udhëtimit nga jugu drejt Beratit, duke sjellë më afër vizitorët vendas dhe të huaj që lëvizin përmes akseve Përmet–Tepelenë dhe më gjerë.

“Shkurton ndjeshëm kohën e udhëtimit nga Jugu drejt Beratit, duke sjellë më afër vizitorët vendas dhe të huaj që kalojnë përmes Përmetit e Tepelenës. Me përfundimin e saj, turizmi kulturor dhe historik merr një hov të ri. Berati bëhet më lehtësisht i aksesueshëm për ata që zbresin nga Gjirokastra apo vijnë nga Greqia, duke ndikuar drejtpërdrejt në rritjen e numrit të vizitorëve, zhvillimin e agroturizmit dhe gjallërimin ekonomik të zonave rurale që kjo rrugë prek dhe vice versa. Çdo turist që ka parë Beratin e ka më të lehtë rrugën drejt Jugut”, u shpreh Rama. /j.p/

The post Rama: Rruga Berat–Ballaban afron dy destinacione kyçe të turizmit kulturor appeared first on Agjencia Telegrafike Shqiptare.

TIRANË, 28 korrik /ATSH/ Pas një nate intensive dhe sfiduese për shkak të përhapjes së zjarreve në jug të vendit, Forcat e Armatosura të Shqipërisë, në bashkëpunim me strukturat vendore dhe mbështetjen ajrore, arritën të vendosin nën kontroll flakët që rrezikonin drejtpërdrejt jetën e banorëve në Bashkitë Himarë dhe Delvinë.

Ministri i Mbrojtjes, Pirro Vengu, bëri të ditur se situata u menaxhua me sukses në disa zona të prekura si Kalasë, Shën Vasil, Lukovë, Sasaj dhe Piqeras.

Në Kalasë, zjarri, i nxitur nga era e fortë, kaloi kufirin administrativ të bashkisë Himarë dhe u përhap drejt një lagjeje të fshatit. Forcat operacionale reaguan menjëherë duke ndërmarrë masa evakuimi, ndërsa 75 efektivë dhe një helikopter i Forcës Ajrore ndërhynë në terren për të frenuar përparimin e flakëve. Falë këtij reagimi të koordinuar, banesat u mbrojtën dhe u shmang çdo rrezik për jetën e banorëve.

Gjithashtu, në Sasaj dhe Piqeras, ku situata u përkeqësua gjatë natës, u krye evakuimi i përkohshëm i banorëve ndërsa forcat operacionale arritën të neutralizonin vatrat dhe të ndalonin përhapjen e mëtejshme të zjarrit drejt zonave të banuara.

Në Lukovë dhe Shën Vasil, flakët kishin përfshirë zona kodrinore dhe pyjore, por ndërhyrja e shpejtë e forcave zjarrfikëse dhe operacionale bëri të mundur vendosjen e situatës nën kontroll pas një përpjekjeje të pandërprerë.

Aktualisht, Forcat Ajrore dhe ekipet zjarrfikëse të koordinuara nga Agjencia Kombëtare e Mbrojtjes Civile vijojnë operacionet pranë vatrave në lartësitë e Lukovës dhe Skërficës për të parandaluar përhapjen e mëtejshme të zjarreve.

Ministri Vengu shprehu mirënjohje për të gjithë efektivët e përfshirë në këto operacione, përfshirë Forcat e Armatosura, zjarrfikësit vendorë, pilotët e helikopterëve të Forcës Ajrore, ekipet ajrore të ardhura nga Italia, si dhe kryetarët e bashkive Delvinë, Himarë dhe Konispol për drejtimin e operacioneve në terren nën koordinimin e zëvendëskryeministres Belinda Balluku.

Ai falënderoi gjithashtu banorët e zonave të prekura për bashkëpunimin dhe qetësinë e treguar gjatë proceseve të evakuimit. /j.p/

1 nga 14

The post Vengu: Situata e zjarreve në jug e stabilizuar falë ndërhyrjes së shpejtë appeared first on Agjencia Telegrafike Shqiptare.

TIRANË, 28 korrik /ATSH/ Ministria e Bujqësisë dhe Zhvillimit Rural, në bashkëpunim me Institutin Tony Blair dhe Universitetin Bujqësor të Tiranës, ka konceptuar një model të ri funksional për Qendrat e Transferimit të Teknologjive Bujqësore në Shqipëri, në kuadër të vizionit strategjik “Bujqësia 2030”.

Qendrat në Fushë-Krujë, Lushnjë, Korçë, Vlorë dhe Shkodër do të bashkërendohen për herë të parë në një strukturë të vetme kombëtare, duke ndjekur praktikat më të mira ndërkombëtare dhe ofruar një qasje moderne, efikase dhe të matshme për kërkimin shkencor dhe shërbimin ndaj fermerëve.

Gjatë një takimi të zhvilluar sot në Tiranë me përfaqësues të Institutit Tony Blair, Universitetit Bujqësor dhe aktorë të tjerë të sektorit, ministrja e Bujqësisë dhe Zhvillimit Rural, Anila Denaj, theksoi rëndësinë e kësaj reforme për transformimin e sektorit.

“Me këtë reformë, “Bujqësia 2030” merr formë konkrete përmes një infrastrukture të re që vendos në qendër fermerin, dijen dhe teknologjinë, duke e kthyer transformimin e sektorit në një realitet të prekshëm dhe të matshëm,” u shpreh ministrja Denaj.

Sipas saj, ky model i ri përbën një riorganizim thelbësor të sistemit ekzistues, duke forcuar lidhjen me fermerët përmes strukturave rajonale dhe krijuar terrenin për më shumë financime ndërkombëtare, projekte të reja dhe përfshirje të ekspertizës së specializuar.

Reforma gjithashtu synon përdorimin më eficient të aseteve dhe ndërtimin e një sistemi më funksional dhe të përgjegjshëm. /j.p/

1 nga 14

The post Denaj: Qendër kombëtare për Teknologjitë Bujqësore, qasje efikase për kërkimin shkencor appeared first on Agjencia Telegrafike Shqiptare.

TIRANË, 28 korrik /ATSH/ Sot shënohet 103-vjetori i vendosjes së marrëdhënieve diplomatike mes Shteteve të Bashkuara të Amerikës dhe Shqipërisë.

Ambasada e SHBA-së në Tiranë publikoi një deklaratë përmes së cilës vlerësoi marrëdhëniet e qëndrueshme dhe bashkëpunimin e ngushtë me Shqipërinë ndër vite.

“Sot festojmë 103 vjet marrëdhënie diplomatike mes Shteteve të Bashkuara dhe Shqipërisë! Jemi krenarë për partneritetin tonë me Shqipërinë për të çuar përpara sigurinë, forcën dhe mirëqenien tonë të përbashkët”, thuhet në deklaratë.

Marrëdhëniet mes dy vendeve janë karakterizuar nga bashkëpunimi në fusha të ndryshme si siguria, zhvillimi ekonomik, sundimi i ligjit dhe reformat demokratike.

SHBA mbetet një aleate e rëndësishme e Shqipërisë, si në kuadër të NATO-s, ashtu edhe në proceset demokratizuese dhe integruese të vendit. /j.p/

The post 103 vjet marrëdhënie diplomatike, ambasada amerikane: Krenarë për partneritetin appeared first on Agjencia Telegrafike Shqiptare.