Shoqata e Kosovës për Kërkim dhe Shpëtim ka njoftuar se po vazhdon kërkimi për gjetjen e Beqir Malokaj, 67-vjeçarit të humbur që nga e diela.

Në një video të publikuar në faqen e shoqatës nga vendi ku po zhvillohen kërkimet, shihet se po përdoret edhe droni për të mbuluar zona më të gjera dhe për të ndihmuar në gjetjen e personit të zhdukur.

Ndryshe, me datë 19 gusht, shoqata kishte njoftuar nisjen e operacionit për kërkimin e Beqir Malokaj nga Istogu.

“19 gusht 2025 – Shoqata e Kosovës për Kërkim-Shpëtim, me kërkesë të Policisë së Kosovës – Sektori i Hetimeve, Stacioni Policor Istog, është angazhuar në Operacionin e Kërkim-Shpëtimit për gjetjen e shtetasit Beqir Malokaj (67 vjeç) nga Istogu, i raportuar i zhdukur. Shoqata po bashkëpunon ngushtë me Policinë e Kosovës për zhvillimin e operacionit dhe gjetjen sa më shpejt të personit të zhdukur,” thuhet në njoftim.

The post Vazhdon kërkimi për 67-vjeçarin nga Istogu, përdoren edhe dronët appeared first on Telegrafi.

Ksamil, një destinacion i njohur për ujërat e pastra dhe plazhet e bukura, po tërheq jo vetëm turistë, por edhe persona me qëllime kriminale.

Së fundmi, Policia e Sarandës ka arritur të ndalojë tre shtetase italiane, të cilat vodhën sende me vlerë në bulevardin qendror të Ksamilit.

Në kuadër të luftës kundër krimit ndaj pronës, strukturat hetimore të Policisë së Sarandës morën njoftimin për një vjedhje dhe, falë veprimeve të shpejta, arritën të identifikojnë dhe dokumentojnë rastin.

Si rezultat i hetimeve, u arrestua në flagrancë 21-vjeçarja italiane M. D., ndërsa dy bashkëpunëtoret e saj, G. D., 18 vjeçe, dhe G. C., 22 vjeçe, u proceduan penalisht në gjendje të lirë.

Sipas hetimeve, tri vajzat dyshohet se kanë vjedhur një sasi bizhuterish, parfumash dhe suveniresh me vlerë rreth 150 000 lekë, të cilat ndodheshin në stenda. Një pjesë e sendeve të vjedhura u sekuestruan si provë materiale.

Materialet procedurale i janë përcjellë Prokurorisë, pasi shtetaset italiane akuzohen për veprën penale të “Vjedhjes”, kryer në bashkëpunim. Ky rast dëshmon se Policia mbetet e angazhuar për të garantuar sigurinë e qytetarëve dhe turistëve, pavarësisht kombësisë së tyre.

The post Turistet italiane kapen ‘mat’ duke vjedhur në Ksamil appeared first on Telegrafi.

Po bëhet gati një javë që kur KEDS-i nisi shkyçje masive të energjisë elektrike ndaj bizneset që mbetën pa kontratë për furnizim një furnizues i licencuar në tregun e lirë. Por, asnjë deklaratë nuk u dha institucionet qendrore, ani pse përfaqësuesit e bizneseve ka kohë që kanë parashtruar kërkesat e tyre. Ato thonë se qeveria në detyrë ka dalë në anën e furnizuesve, gjersa theksojnë se e njëjta injoroi kërkesat e tyre për subvencionim.

Kanë kaluar disa ditë qëkur në fuqi hyri vendimi i Zyrës së Rregullatorit të Energjisë për shkyçjen e bizneseve që nuk arritën të lidhin kontratë me një furnizues të licencuar për tregun e lirë.

Zhurmë nga bizneset u bë, e edhe paralajmërime u dhanë nga përfaqësuesit e odave të bizneseve për pasojat e formës në të cilën hyri në fuqi vendimi.

Por as edhe një deklarim e veprim nuk u ndërmor nga institucionet qendrore, as nga Presidenca e as nga qeveria në detyrë.

Kjo për përfaqësuesit e bizneseve mbetet zhgënjyese.

“Fatkeqësisht institucionet nuk kanë mbështetur fare bizneset ani se rreth 60% e buxhetit të shtetit mbushet po nga këto biznese që dolën dhunshëm në tregun e lirë. Përkundër kërkesave publike, letrave dhe disa takimeve, institucionet në heshtje kanë mbështetur veprimin e ZRRE-së. Për më tepër përkundër që BE shprehu gatishmërinë që të mbështeste Kosovën të kalonte këtë proces hap pas hapi dhe për të cilin ofroi mbi 22 milionë euro, institucionet sërish heshtën. Kjo është një porosi shumë negative si për bizneset vendëse ashtu edhe për ato të jashtme që kanë investuar dhe që në një nga kushtet e favorshme u është thënë se është energjia”, ka thënë  Kushtrim Ahmeti, kryetar i Dhomës së Tregtisë dhe Industrisë në Kosovë.

Njëzëri shprehen edhe nga Oda Ekonomike gjersa thonë se qeveria ka marrë një anë tjetër.

“Tek ne është kriju precepsioni se ma shumë Qeveria ka qenë në anën e furnizuesve sesa bizneseve edhe si nuk e kanë marrë mundim asnjë reagim të ketë. Ju kujtohet në fillim të qershorit se si ministrja ka qenë kategorike që bizneset të lidhin kontratë me furnizuesit dhe aty e kemi kuptuar se s’është në rregull.  Kemi kërku nga kryeministri me subvencionu ashtu siç ka kërkuar ZRrE për një subvencionim 50 milionësh po s’kemi pas përgjigje”, ka thënë Lulzim Rafuna, kryetar i Odës Ekonomike.

Rafuna thotë se qeveria ka injoruar thirrjet e tyre ndonëse.

Mes të tjerash, kritika i drejtohen edhe Presidentes, Vjosa Osmani.

“Ju kemi drejtu edhe Presidencës, s’kemi pas asgjë zyrtare por do ishte shumë e mirëseardhur dhe jo të qëndrojë në heshtje gjersa shkatërrohet ekonomia. Rrugës do ishte që qeveria të subvenciononte shumën. Tash është edhe më e vogël se po flasim për 7-8 muaj, të ketë një paketë mbështetëse dhe një kërkesë tek ZRRE ta përgatisë terrenin më mirë”, ka thënë Lulzim Rafuna, Kryetar i Odës Ekonomike.

Televizioni ka pyetur Presidencën që nga java e kaluar për një koment por e njëjta, sikurse edhe qeveria në detyrë, nuk janë deklaruar për Dukagjinin.

Nga vendimi i ZRrE-së preken 1400 biznese, ndërsa shkyçja e tyre ka nisur që nga dita e shtunë dhe po vazhdon ende./Tv Dukagjini

The post Mbi 1,400 biznese të shkyçura nga energjia, institucionet qendrore në heshtje appeared first on Telegrafi.

Sipas disa ekspertëve, situata e bllokadës disamujore mund të zgjidhet vetëm përmes zgjedhjeve të parakohshme.

As emri i Hekuran Muratit nuk i bindi deputetët e partive opozitare që të japin votë për Kryetarin e ri të Kuvendit të Kosovës.

Duke parë këtë situatë dhe mbajtjen e seancave çdo dyzet e tetë orë, njohësit e çështjeve politike në vend thonë se zgjidhja e vetme për të dalë nga kjo krizë institucionale është shkuarja në zgjedhje të jashtëzakonshme.

“Kemi të bëjmë me kalkulime politike, por megjithatë mendoj që brenda një periudhe jo shumë të gjatë, ndoshta dhjetëditore, parlamenti do të konstituohet. Minimumi që mund të presim është që, nëse nuk krijohet shumicë nga asnjëra palë, të shpallen së paku zgjedhje të jashtëzakonshme”, ka deklaruar për RTK-në analisti Melazim Koci.

“Mund t’i drejtohen edhe një herë presidentes, ose presidentja në këtë fazë mund t’i ftojë përsëri palët, në mënyrë që të zhbllokohet situata dhe të ecet përpara. Sa i përket ndarjes së votave, tashmë shihet qartë që njëri bllok ka 57 vota dhe tjetri 56, pra janë aty-aty. Mendoj se situata më e mirë do të ishte votimi për një kryetar Kuvendi, cilido qoftë ai, dhe më pas shkuarja në zgjedhje të reja”, ka shtuar një analistja Fatime Hajdari.

Ndërkohë, konstituimin e Kuvendit e ka kërkuar edhe Instituti i Kosovës për Drejtësi (IKD), duke theksuar se ky është një obligim kushtetues i deputetëve për kthimin e stabilitetit në vend.

“IKD nënvizon se, përkundër faktit që përgjegjësia për konstituimin e Kuvendit bie mbi të gjitha partitë politike, barra kryesore është e Lëvizjes Vetëvendosje, si partia e renditur e para pas zgjedhjeve. Ky subjekt ka dy mundësi reale: ose të propozojë një kandidat për kryetar të Kuvendit, që sipas deklarimeve të partive tjera politike ka mbështetje, ose të arrijë marrëveshje politike me një subjekt tjetër parlamentar. Çdo qasje tjetër çon vetëm në vonesa të panevojshme dhe bllokim institucional”, ka deklaruar IKD.

Sipas IKD-së, partnerët ndërkombëtarë kanë paralajmëruar se pa një Kuvend funksional, Kosova rrezikon humbjen e mbështetjes financiare dhe politike në një periudhë vendimtare për të ardhmen e saj evropiane.

The post Analistët: Zgjedhjet e jashtëzakonshme, zgjidhja për ngërçin politik në vend appeared first on Telegrafi.

Këshilli Gjyqësor i Kosovës (KGJK) dënon me shqetësim ndërhyrjet politike ndaj PZAP, dhe thekson se çdo formë e presionit politik është e papranueshme dhe e rrezikshme.

“PZAP është institucion i pavarur dhe çdo tentativë për ta ndikuar atë përbën sulm të drejtpërdrejtë ndaj sistemit të drejtësisë dhe rendit kushtetues në vend. Tolerimi i këtij presioni politik rrezikon të minojë besimin e qytetarëve në procesin zgjedhor dhe në institucionet e drejtësisë”, thuhet në reagim.

“Tolerimi i këtij presioni politik rrezikon të minojë besimin e qytetarëve në procesin zgjedhor dhe në institucionet e drejtësisë. KGJK, kërkon nga të gjithë që të ndalin menjëherë këto praktika të papranueshme dhe t’i adresojnë pakënaqësitë në mënyrë ligjore”, vijon reagimi i KGJK-së, më 22.08.2025.

KGJK kërkon nga të gjithë që të ndalin menjëherë këto praktika të papranueshme dhe t’i adresojnë pakënaqësitë në mënyrë ligjore, duke paralajmëruar se do të reagojë ndaj çdo forme presioni që cenon funksionimin e drejtë dhe të ligjshëm të sistemit gjyqësor.

Kjo komunikatë e KGJK-së vjen pasi Lista Serbe njoftoi më 22.08.2025 se është ankuar në PZAP pasi nuk u certifikua nga Komisioni Qendror i Zgjedhjeve për zgjedhjet lokale që do të mbahen më 12.10.2025./Telegrafi/

The post ​Këshilli Gjyqësor dënon ndërhyrjet politike në PZAP appeared first on Telegrafi.

Drejtoria për Administratë në Pejë ka njoftuar për ndarjen nga jeta të zyrtares së Shërbimit të Gjendjes Civile, Luljeta Cena.

Në njoftim, kolegët e saj e kanë kujtuar atë si një mike dhe bashkëpunëtore të dashur, e cila la pas vepra të rralla dhe një staf që e donte dhe e respektonte jashtëzakonisht shumë.

“Lule, ike e bekuar duke lënë pas një staf që të donin dhe i doje aq shumë, duke na lënë vepra të rralla për ne që gjithmonë do t’i mbajmë në mendjet dhe zemrat tona. Shpirti yt u prehtë në paqe, e mira Luljetë”, thuhet në mesazhin ngushëllues./Telegrafi/

The post Ndahet nga jeta zyrtarja e Gjendjes Civile në Pejë, Luljeta Cena appeared first on Telegrafi.

Në një deklaratë të përbashkët, pesë vendet e Quint-it, ku përfshihen Shtetet e Bashkuara, Britania, Franca, Gjermania dhe Italia së bashku me Zyrën e BE-së në Kosovë, kanë shprehur shqetësimin e tyre lidhur me moscertifikimin e Listës Serbe.

“Shprehim shqetësimin lidhur me përpjekjet e aktorëve politikë për të kufizuar garën midis partive politike që përfaqësojnë komunitetet pakicë para zgjedhjeve lokale të 12 tetorit”, thuhet në deklaratë.

Quint thotë  se çdo përpjekje për të përjashtuar komunitete të caktuara cenon parimet demokratike dhe minon besimin në institucionet e Kosovës.

“Presim nga qeveria në detyrë dhe të gjitha partitë politike që të përmbahen nga hapa që mund të pengojnë regjistrimin e partive. Të gjitha procedurat duhet të zhvillohen në përputhje të plotë me rregullat dhe mandatin e Komisionit Qendror të Zgjedhjeve”, thuhet në reagim.

Po ashtu, partitë që ndihen të prekura nga këto pengesa janë inkurajuar të përdorin në mënyrë të plotë Panelin për Ankesa dhe Parashtresa të Zgjedhjeve (PZAP) për të kërkuar drejtësi.

Ndryshe, në një mbledhje të mbajtur të enjten pasdite, anëtarët e KQZ-së nuk votuan për certifikimin e Listës Serbe pas ankesave të dy anëtarëve të Lëvizjes Vetëvendosje të kryeministrit në detyrë, Albin Kurti.

Njëri nga anëtarët, Sami Kurteshi, tha se mbi “90 për qind të personave që janë në listat e kandidatëve të Listës Serbe janë të anëtarësuar në institucione paralele serbe në Kosovë”.

Vendimi u përshendet nga ministrja në detyrë e Drejtësisë në Kosovë, Albulena Haxhiu, e cila tha se Lista Serbe “në mënyrë të përsëritur ka vepruar kundër parimeve kushtetuese dhe ka cenuar rendin demokratik të Republikës së Kosovës”.

Lista Serbe mund të ankohet ndaj këtij vendimi në Panelin Zgjedhor për Ankesa dhe Parashtresa (PZAP), i cili, sipas disa ekspertëve ligjorë, do ta rrëzojë vendimin e KQZ-së./Telegrafi/

The post Quint-i dhe BE-ja të shqetësuar për moscertifikimin e Listës Serbe appeared first on Telegrafi.

Një shqiptar i dënuar me 32 vite burg për vrasje në Britani të Madhe, përmes videove në TikTok kërkon të transferohet në një nga qelitë e vendit tonë.

Videot e shpërndara nga i burgosuri shqiptar kanë bërë jehonë në mediat britanike.

Eugert Merizaj i njohur me emrin “Babale” në rrjetet sociale, ka arritur të fus një celular në qeli edhe pse është rreptësisht i ndaluar dhe përbën vepër penale.

Gjatë komunikimeve live me ndjekësit e tij ai ka treguar përse ndodhet në burg.

Ndërsa lidhur me arsyen që kërkon të kthehet në tokën shqiptare, 32-vjeçari thotë për të parë familjen e tij pasi ka shtatë vite që nuk i ka takuar.

Ndër të tjera ai tregon se ushqimi në burg është i tmerrshëm.

Ajo çfarë të bie në sy nga videot e publikuara nga qelia në të cilën ndodhet Merizajt janë simbolet kombëtare të Shqipërisë, libra në gjuhën shqipe, por nga ana tjetër edhe veshjet e tij të kushtueshme të markave të ndryshme.

Eugert Merizaj ka qenë në qendër të vëmendjes së medias britanike edhe vitin e shkuar ku përmes TikTok kërkonte para nga ndjekësit e tij.

32-vjeçari shqiptar është dënuar për vrasjen e një trafikanti droge në vitin 2019, edhe pse nuk e ka pranuar asnjëherë krimin.

Merizaj u arrestua në Belgjikë dhe u ekstradua në Mbretërinë e Bashkuar.

Shqiptarët përbëjnë numrin më të madh të të burgosurve në Britaninë e Madhe.

Prej majit të vitit 2023, vendi ynë ka një marrëveshje me Anglinë për transferimin e të burgosurve.

Mbetet për t’u parë nëse kërkesa e Eugert Merizajt do të pranohet nga autoritetet./Euronews Albania

The post I burgosuri shqiptar në Britani, thirrje nga TikTok: Më transferoni në Shqipëri appeared first on Telegrafi.

Në kampin Bondsteel kanë mbërritur sot rreth 70 automjete ushtarake dhe personel mbështetës, duke shënuar përfundimin e dislokimit të përkohshëm të forcave rezervë në kuadër të KFOR-it.

Kontingjenti britanik, i përbërë nga mbi 350 trupa të “Scots Guards”, do të zhvillojë aktivitete stërvitore së bashku me pjesëtarë të KFOR-it.

NATO njofton se  ky aktivitet është pjesë e trajnimeve të rregullta që synojnë të rrisin gatishmërinë operacionale dhe aftësinë e KFOR-it për t’iu përgjigjur në mënyrë efektive zhvillimeve të sigurisë.

Operacionet zhvillohen në përputhje me mandatin e KFOR-it të bazuar, me qëllim të garantimit të një ambienti të sigurt dhe të qetë për të gjitha komunitetet në Kosovë dhe lirinë e lëvizjes, në bashkërendim me Policinë e Kosovës dhe EULEX-in.

Pas përfundimit të stërvitjes, “Scots Guards” do të kthehen në bazën e tyre në Mbretërinë e Bashkuar./Telegrafi/

The post Arrijnë në Kosovë 350 ushtarë britanikë me 70 automjete ushtarake appeared first on Telegrafi.

Nga sot e tutje linja hekurudhore Fushë Kosovë – Ferizaj mund të përdoret për transportin e qytetarëve dhe të mallrave. Pas pesë vitesh, Infrakos bëri testimin e kësaj linje, pavarësisht se ende nuk është bërë sinjalizimi përgjatë saj. Tani e tutje këta binarë mund të përdoren për transportin e qytetarëve dhe të mallrave.

“Është bërë instalimi i binarëve, janë bërë të gjitha. Do të shkojmë me një shpejtësi të kufizuar për shkak të mungesës së instalimit me 60 km në orë nga stacioni në Miradi deri në Bablak”, tha Nexhmi Rama, kryesues i njësisë për implementimin e projektit.

Gjatë rrugës, ekipet e Infrakosit qëndruan në kontakt me njëra-tjetrën, në mënyrë që transporti të jetë i sigurt. Kjo linjë hekurudhore shënon lidhje më të shpejtë dhe më të lehtë ndërmjet Fushë Kosovës e Ferizajt.

Ndërmjet Fushë Kosovës dhe Ferizajt janë tre vendndalime dhe 3 stacione për udhëtarët, njëri nga to është në Lipjan.

Për rëndësinë e projektit foli kryeshefi ekzekutiv i Infrakosit, Naser Krasniqi.

“Ky segment është plotësisht funksional dhe nga sot është i hapur për të operuar për operatorët hekurudhor me shpejtësi lëvizëse deri në 60 km. Në hapin e radhës ky projekt do të përmbyllet me instalimin e sinjalistikës bashkëkohore që do të mundësojë rritjen e shpejtësisë deri në 120 km në orë”, tha Krasniqi.

Ai shtoi se këtë vit pritet të bëhet edhe testimi i linjës hekurudhore për Mitrovicë.

“Po ashtu është bërë montimi i 86 km të linjës së re, përfshirë ndërtimin e 3 shtresave të trasesë hekurudhore duke lënë edhe vetëm 6 km deri në Mitrovicë”, nënvizoi Krasniqi.

Nga Infrakos thanë se janë duke punuar në modernizimin e rrjetit hekurudhor në vend duke e nxitur kështu zhvillimin ekonomik dhe duke kontribuuar në integrimin e Kosovës në rrjetet rajonale dhe evropiane të transportit.

Aktualisht për transportin në linjën hekurudhore Fushë-Kosovë-Ferizaj janë të licencuar vetëm dy operatorë. Edhe pse hekurudha është gati për qarkullim, varet nga operatorët se kur do të nisin transportin në të.

The post Linja hekurudhore Fushë Kosovë-Ferizaj e gatshme për qarkullim appeared first on Telegrafi.

Bashkia e Lezhës ka njoftuar se në orët e para të mëngjesit të 22 gushtit, duke nisur nga ora 01:00, priten reshje të dendura shiu të shoqëruara me furtunë.

Autoritetet u bëjnë thirrje qytetarëve të tregojnë kujdes dhe të marrin masat e nevojshme për sigurinë e tyre dhe të familjarëve.
Në njoftim theksohet se Emergjencat Civile dhe Shërbimet Publike të Bashkisë janë në gatishmëri të plotë për të ndërhyrë në çdo rast që mund të shkaktohet nga moti i keq.

“Të nderuar qytetarë të Bashkisë Lezhë, sipas parashikimeve meteorologjike, priten reshje të dendura shiu dhe një furtunë që parashikohet të nisë në orët e para të mëngjesit të datës 22 gusht, duke filluar nga ora 01:00. Ju bëjmë thirrje të tregoni kujdes dhe të merrni masat e nevojshme për sigurinë tuaj dhe të familjarëve”, njoftoi Bashkia e Lezhës.

The post Bashkia e Lezhës paralajmëron qytetarët për furtunë appeared first on Telegrafi.

Policia e Shtetit në Shqipëri ka shpëtuar të enjten tre turistë që po rrezikonin të mbyteshin në thellësi në plazhin e Velipojës.

Veprimi i shpejtë i shërbimeve të Stacionit të Policisë Velipojë, në bashkëpunim me Policinë Kufitare, parandaloi një tragjedi.

Turistët, identiteti i të cilëve nuk është bërë i ditur, po laheshin në det të thellë dhe nuk po arrinin të ktheheshin në breg për shkak të dallgëve të forta. Pas marrjes së njoftimit, menjëherë u angazhua një skaf i Policisë Kufitare.

Me anë të mjetit lundrues, forcat e rendit lokalizuan shpejt tre shtetasit dhe i kthyen ata në breg të sigurt.

Fatmirësisht, gjendja shëndetësore e të treve është e mirë.

Policia Kufitare dhe Drejtoria Vendore e Policisë konfirmuan se shërbimet e tyre do të vazhdojnë të jenë në gatishmëri 24/7 për të garantuar sigurinë e qytetarëve dhe turistëve gjatë sezonit veror.

The post Policia shpëton tre turistë nga mbytja në Velipojë appeared first on Telegrafi.

Komisioni Qendror i Zgjedhjeve (KQZ) nuk e ka certifikuar Listën Serbe për zgjedhjet lokale të 12 tetorit, pasi votimi rezultoi me dy vota për, dy kundër dhe shtatë abstenime.

Fuqishëm kundër ishin dy anëtarët e Lëvizjes Vetëvendosje, Sami Kurteshi dhe Alban Krasniqi. Përfaqësuesit e partive të tjera abstenuan.

Megjithatë, analisti politik Visar Ymeri e cilësoi këtë veprim të LVV-së si një manovër politike.

“Këto janë vetëm lojëra politike të LVV-së, të cilat as nuk e kanë për qëllim as me certifiku as Listën Serbe, e as ndonjë kandidat të LS. Por vetëm me e shmang vëmendjen nga çështjet të cilat do të duhej të diskutoheshin sot e deri në zgjedhjet lokale. E që janë çështjet lokale. LVV-ja duke pas parasysh që nuk as performon si duhet në zgjedhje lokale e as nuk ka fort çka me kallxu. Ndërton kësi narracione…

Dhe këto lojëra që i bën LVV-ja, i bë duke e ditë që Lista Serbe do ta kaloj procesin, siç e ka bërë herën kaluar në PZAP. Duke e dit që Lista Serbe nuk dëmtohet, nuk ka gjë më të keqe për mendimin tim dhe gjë më të pështirë se sa me vepru në publik thu ti je ka mundohesh me ndal diçka, të cilën e din që nuk mundesh me ndal e as nuk ki bazë me ndal”, ka thënë Ymeri.

The post Ymeri: Veprimet e LVV-së kundër Listës Serbe janë vetëm lojëra politike appeared first on Telegrafi.

Pesë persona kanë mbetur të lënduar si pasojë e një aksidenti trafiku që ka ndodhur mbrëmjen e sotme në fshatin Lupç të Podujevës.

Zëdhënësja e policisë për rajonin e Prishtinës, Flora Ahmeti, ka konfirmuar për Telegrafin se aksidenti ka ndodhur rreth orës 20:00 në rrugën Prishtinë–Podujevë, ku janë përfshirë dy automjete.

“Sot rreth orës 20:00 kemi pranuar informatën se në rrugën Prishtinë–Podujevë ka ndodhur një aksident trafiku me lëndime. Në këtë aksident kanë qenë të përfshira dy automjete”.

“Si pasojë e aksidentit janë lënduar pesë persona. Me rastin po merret Njësiti i Trafikut Rajonal”, ka thënë Ahmeti./Telegrafi/

The post Pesë persona lëndohen në aksident trafiku në Lupç të Podujevës appeared first on Telegrafi.

9 anëtarë të familjes Ujkani, në Reznik të Vushtrrisë, më 6 prill 1999 u masakruan e u dogjën nga forcat paramilitare, policore e ushtarake serbe.

Në seancën ku ia caktuan 30 ditë paraburgim si i dyshuar për krime lufte ndaj civilëve shqiptarë, erdhi e doli me duar të lidhura. Por gjatë luftës, Sinisha Spasiqin, banorët e Reznikut të Vushtrrisë e kujtojnë me revole në duar dhe të shoqëruar me paramilitarë e forca serbe.

“Spasiqin në këtë shtëpinë e Shaip Zenelit u kanë këtu punkti këtu, u kanë komandandir i paramilitarëve Spasiqi, atë e kam njohur qysh para luftës… qitu e kam pa shumë herë Spasiqin, edhe këtu ka nejt ai me paramilitarët. Atë ditë u dalë me ata paramilatarët me dy kerre prej këtu edhe Spasiqi… knej nuk e kam pa se nuk kam guxu me u afru, se mos po na vrasin…” , ka thënë dëshmitari i masakrës, Bilall Ujkani.

Bilall Ujkani do të bëhej dëshmitar i masakrës së familjes së tij, për të cilën dyshohet edhe Spasiqi.

Një ditë para masakrës, më 5 prill 1999, kushëririn Faikun, e kërcënuan me armë në kokë. Atë e detyruan të tregojë se ku i ka të afërmit.

Të nesërmen, më 6 prill, nisën britmat, ekzekutimet, filluan të shtënat, shtëpitë u dogjën.

Edhe Billalli pa e ditur se çka po ndodhte andej mureve, bashkë me gruan dhe djalin 9 vjeçar po e prisnin vdekjen.

“I tha çka po i bojna po i vrasim, ai tha jo njëherë edhe u nis këndej rreth 20 metra, ai po thotë mos luaj prej këtu se ju vrasim, ky u nis në drejtim të tij, ai vetëm kur njeriu nuk po u tuke vetëm kur e kam pa e ka qu automatin edhe ja ka dhanë një refall në dritare mbi kokë edhe tu kapën ata ndërmjet vete a e pe që gati më vrave mua edhe dulën te kamxhiku te kusherini…”, ka shtuar Ujkani.

E vetmja që mbijetoi nga shtëpitë e vëllezërve ishte Nazmie Ujkani, të cilës ia masakruan burrin, e vetë arriti të largohet.

Bashkë me të, me gruan dhe djalin e mitur, Bilalli tash 77 vjeçar, u kthye tek shtëpitë e vëllezërve.

“Kjo shtëpia e nipit, Ymer Ujkani, edhe jam hy por nuk kam mujt me pa asgjë të kallta krejt, kulmi ish ra, katër shpijave iu ka dalë flaka. Kam vazhdu te shpija dytë Muhamet Ujkani vëllai aty u kanë vëllai me gruan Fatimen edhe aty e kalltë. Jam shku te shtëpia e vëllait, Behxhetit, vëllai Behxheti edhe aty kurgjo nuk kemi mujt me pa. Gruan e ka pasur Nazmija ajo ka shpëtu. Pas kësaj kam shku tek shtepija e vëllait Fehmisë, aty nuk kam pa asgjë. Ishte Sofia, të dy ishin të vrarë e të djegur”, ka thënë Ujkani.

3 vëllezërit, nipin, dy gratë e vëllezërve i pa të vrarë e të djegur deri në asht, por për Bilallin tmerri nuk përfundoi me kaq. Serbët e ekzekutuan edhe kushëririn Faikin, nga i cili një ditë para masakrës, me dhunë kishin marrë informacione për kushërinjtë e tij, të cilët i paralajmëroi për rrezikun, por nuk shpëtuan.

“E kam gjetur Faikin të vrarë plumbin në ballë, shpija nuk ish kallë hiq, e kishin ujdis sikur kur fle”, ka shtuar Ujkani.

Tefik dhe Halide Ujkani, edhe këta kushërinj, u ekzekutuan disa metra më larg, vetëm për faktin se dyshohet që i kishin njohur serbët që i takuan në rrugë dhe u vranë për t’i zhdukur gjurmët e dëshmitarët e mundshëm.

Skena e krimit kishte mbetur e paprekur në qiell të hapur deri më 17 qershor. Atë ditë mbesa, Nedimja, u kthye, në shtëpinë ku ishte rritur, duke e kërkuar nënën e babën.

“Ata gjatë bisedës në mes vete i kam dëgju, që këtu është përdor diçka se këtu nuk mundet trupi i njeriut me u djeg në atë formë me u bë shkumë edhe mbetjet kanë qenë të pakta të tilla, prej secilës kuformë ne kemi arritur me thanë kështu, një palë grushta eshtra me i gjetë për me i dëshmu krejt. Njëjtë i ke gjetë edhe prindërit e tu? Njëjtë të dy prindërit e mi. Njëjtë prindërit e mi njëtjë axhallarët, pak diçka pjesën e kurrizit e ka pasur më të ruajtur djali i axhës, Ymer Ujkani”, ka thënë Nedime Ujkani.

Pak kocka nga ato çka kanë mbetur nga 9 anëtarët e familjes Ujkani, u varrosën më 23 qershor 1999.

Sinisha Spasiqi përpos për pjesëmarrjen në masakrën e Reznikut dyshohet edhe për dëmtim e plaçkitje, dhunë fizike e seksuale ndaj civilëve gjatë luftës në Vushtrri.

Për krime ndaj shqiptarëve në këtë zonë, përfshirë edhe Reznikun, aktakuzë është ngritur edhe ndaj serbit, Sllagjan Trajkoviq.

Në Reznik, Vërnicë dhe Shallc gjatë luftës janë vrarë e masakruar 21 civilë shqiptarë./Tv Dukagjini

The post Spasiqi në paraburgim për krime lufte, dëshmitarët rrëfejnë masakrën në Reznik appeared first on Telegrafi.

Ministrja në detyrë e Drejtësisë, Albulena Haxhiu, e ka përshëndetur vendimin e Komisionit Qendror të Zgjedhjeve për moscertifikimin e Listës Serbe në zgjedhjet e 12 tetorit.

Ajo e ka cilësuar këtë vendim si një hap të rëndësishëm për mbrojtjen e demokracisë dhe sigurisë në Kosovë.

“Vendimi për moscertifikimin e Listës Serbe përbën një fitore të rëndësishme për demokracinë, integritetin e procesit zgjedhor dhe sigurinë qytetare e shtetërore. Lista Serbe, në mënyrë të përsëritur, ka vepruar kundër parimeve kushtetuese dhe ka cenuar rendin demokratik të Republikës së Kosovës. Ajo nuk ka synuar përfaqësim qytetar, por ka shërbyer si dorë e zgjatur e Vuçiqit. Sulmi terrorist në Banjskë, i organizuar nga kryetari i saj faktik, Milan Radoiçiq, është një nga aktet kriminale ndaj të cilave Kosova ka reaguar me vendosmëri”, ka deklaruar Haxhiu.

Edhe pse disa njohës të çështjeve juridike e kanë vlerësuar këtë vendim si të padrejtë, Haxhiu theksoi se ai është plotësisht në përputhje me Kushtetutën.

“Moscertifikimi i saj është vendim i drejtë, legjitim dhe në përputhje të plotë me parimet kushtetuese të Republikës së Kosovës. Ky është garant që zgjedhjet do të jenë shprehje e vullnetit të lirë të qytetarëve, pa ndërhyrje të jashtme dhe pa presione nga struktura kriminale. Institucionet mbeten të përkushtuara për të siguruar një proces zgjedhor të drejtë, gjithëpërfshirës dhe demokratik”, ka shtuar ajo.

The post Haxhiu: Moscertifikimi i Listës Serbe është fitore për demokracinë appeared first on Telegrafi.

Në Komunën e Mamushës, për shkak të motit të nxehtë, kanë shpërthyer zjarre në tokat përreth.

Zjarrfikësit e Mamushës intervenuan menjëherë.

Autoritetet kanë njoftuar se po punohet intensivisht që zjarri të mos përhapet në zonat e banuara.

Gjatë ditëve të fundit, Kosova është përballur me disa vatra zjarri për shkak të temperaturave të larta dhe thatësisë. Në disa raste, ekzistojnë dyshime se zjarret mund të jenë vënë qëllimisht.

Agjencia për Menaxhimin e Emergjencave ka bërë apel te qytetarët që të tregojnë kujdes të shtuar.

“Agjencia u bën apel të gjithë qytetarëve që të tregojnë kujdes të shtuar, të shmangin çdo veprim që mund të shkaktojë zjarr dhe të raportojnë menjëherë çdo vatër në numrat emergjentë 112, 193 dhe 192.”

The post Zjarr në tokat përreth Mamushës, flakët i ofrohen shtëpive appeared first on Telegrafi.

Komisioni Qendror i Zgjedhjeve ka nisur sot mbledhjen e radhës, në kuadër të përgatitjeve për zgjedhjet lokale të 12 tetorit 2025.

Në këtë mbledhje marrin pjesë anëtarët e KQZ-së, përfaqësues të Zyrës për Regjistrim dhe Certifikim të Subjekteve Politike, si dhe përfaqësues të institucioneve relevante.

Një nga pikat më të debatueshme të rendit të ditës është certifikimi i partisë Lista Serbe dhe kandidatëve të saj.

Zyra për rekomandimin e partive ka raportuar se pas verifikimeve pranë Këshillit Gjyqësor të Kosovës dhe Ministrisë së Jashtme, asnjëri prej kandidatëve të Listës Serbe nuk rezulton në listat e personave të kërkuar ose të ndaluar.

Prandaj është rekomanduar certifikimi i saj me 238 kandidatë, për kryetarë në 11 komuna dhe për asamble komunale në 19 komuna.

Megjithatë, anëtari i Vetëvendosjes në KQZ, Sami Kurteshi, ka kundërshtuar certifikimin, duke e cilësuar Listën Serbe si parti me “trashëgimi terroriste” dhe duke akuzuar disa prej kandidatëve të saj se punojnë në mënyrë subversive kundër Republikës së Kosovës.

Ai tha se ka dokumente së paku për një person nga Lista Serbe që nuk i plotëson kushtet.

“Sasha Millosheviq, nga Lista Serbe që kandidon për Novoberdë, është i emëruar nga Serbia për kryetar paralel te Gjilanit”, ka shtuar Kurteshi.

Anëtari i PDK-së në Komisionin Qendror të Zgjedhjeve, Arianit Elshani, ka deklaruar se edhe pse të gjitha institucionet kompetente kanë rekomanduar certifikimin e Listës Serbe, subjekti i tij politik ka vendosur të abstenojë nga votimi.

“Është dashur që këto informata të pranohen në mënyrë institucionale. Ne si PDK abstenojmë nga certifikimi, nuk jemi për certifikim. Abstenojmë nga votimi përderisa nuk kemi veprime nga institucionet e sigurisë, të cilat na tregojnë rrugën që duhet ndiqet për këtë parti”, tha Elshani.

Edhe anëtari i AAK-se ne KQZ, Muharrem Nitaj ka deklaruar se dokumentet qe posedon LVV dhe Sami Kurteshi është dashur te dërgohen ne institucionet përgjegjëse.

“Sekretariati thotë se kjo parti politike politike plotëson kriteret pas informatave qe kane marre nga institucionet përgjegjëse”.

Çështja ka marrë vëmendje edhe ndërkombëtare.

Një diplomate amerikane ka shprehur shqetësim për tendencat që, sipas saj, synojnë ndalimin e pjesëmarrjes së partive serbe në zgjedhje.

“Të gjithë qytetarët e Kosovës duhet të kenë mundësinë e plotë të zgjedhin përfaqësuesit e tyre. Është me rëndësi që serbët e Kosovës të përfshihen në këtë proces. Jemi të shqetësuar për çdo tentim që limiton zgjedhjet e tyre”, ka deklaruar ajo, duke theksuar se këto qëndrime ia ka bërë të ditura kryeministrit në detyrë./Telegrafi/

The post KQZ nis certifikimin e subjekteve politike për zgjedhjet lokale, debat rreth Listës Serbe appeared first on Telegrafi.

Një histori prekëse e një shqiptari ka marrë vëmendje në Gjermani.

Kadri Mahmuti, u bë baba në Paris në vitin 1979. Por kur vajza e tij Hamide ishte vetëm dy vjeç, nëna e saj vendosi të shpërngulej në Portugali, duke ia lënë Kadrisë frikën më të madhe të jetës: se nuk do ta shihte më kurrë të bijën, shkruan albinfo.ch.

Pas dekadash kërkimesh dhe shprese, Kadri Mahmuti iu drejtua emisionit të njohur gjerman “Bitte melde dich” të Julia Leischik, i cili prej vitesh ndihmon njerëzit të ribashkohen me familjarë të humbur.

Dhe aty ndodhi mrekullia, Kadriu arriti ta gjente Hamiden e tij, duke përjetuar një ribashkim emocionues që vetëm jeta mund ta shkruajë.

Emisioni “Bitte melde dich” transmetohet në kanalin SAT1 dhe sjell histori të forta njerëzore, ku fati dhe dhimbja e ndarjes shpesh kthehen në gëzim e lot lumturie.

The post Kadri Mahmuti gjen vajzën e tij pas shumë vitesh, falë një emisioni televiziv gjerman appeared first on Telegrafi.

Një grafit me mbishkrimin famëkeq në gjuhën serbe dhe alfabetin cirilik “Kad se vojska na Kosovo vrati” (Kur ushtria të kthehet në Kosovë), është vendosur mbrëmjen e djeshme në rrugën kryesore të qytetit të Kollashinit në Mal të Zi.

Ky akt është cilësuar si provokim i hapur ndaj shqiptarëve që jetojnë në Mal të Zi, por edhe ndaj vizitorëve nga trojet shqiptare që frekuentojnë zonën turistike të këtij qyteti malor.

Nuk është hera e parë që shfaqen të tilla parulla.

Grafite me të njëjtin përmbajtje janë parë edhe më herët në disa qytete të Serbisë dhe Bosnjës.

Po ashtu tifozët e klubit të futbollit “Crvena Zvezda” (Ylli i Kuq), gjatë një ndeshjeje miqësore kundër Fiorentinës , shpalosën një banderolë me të njëjtin mesazh, duke shkaktuar reagime të shumta në opinionin publik./Telegrafi/

The post Grafiti provokues serb “Kur ushtria të kthehet në Kosovë” shfaqet në Kollashin të Malit të Zi appeared first on Telegrafi.