TIRANË, 29 gusht /ATSH/ Policia e Vlorës ka arrestuar 26 drejtues mjetesh, pas kontrolleve të shtuara me alkoolteste në të gjitha rrugët e qarkut.

Policia Rrugore në Vlorë dhe Sarandë njoftoi sot se ka shtuar kontrollet në të gjitha rrugët urbane dhe interurbane të qarkut, me qëllim parandalimin e aksidenteve dhe mbrojtjen e jetës së qytetarëve.

Një ndër prioritetet kryesore të këtyre kontrolleve njoftoi më tej policia kanë qenë testet e alkoolit ndaj drejtuesve të mjeteve, duke qenë se drejtimi i mjeteve në gjendje të dehur është një nga shkaqet kryesore të aksidenteve rrugore.

“Si rezultat, gjatë periudhës 01.08.2025 – 29.08.2025 janë arrestuar në flagrancë 26 drejtues mjetesh (13 në Vlorë dhe 13 në Sarandë), janë proceduar penalisht në gjendje të lirë 2 drejtues mjetesh, janë vendosur gjithsej 110 masa administrative, për drejtim mjeti në efektin e alkoolit”, njoftoi policia.

Sipas policisë vetëm gjatë 72 orëve të fundit, janë arrestuar 8 drejtues mjetesh që qarkullonin në gjendje të dehur, shtetasit: K. Gj., 33 vjeç; Xh. D., 24 vjeç; S. M., 25 vjeç; D. A., 29 vjeç; I. Sh., 44 vjeç,  L. A., 29 vjeç, D. I., 63 vjeç dhe R. Z., 27 vjeç.

/m.q/j.p/

The post Të dehur në timon, 26 shoferë të arrestuar në Vlorë që nga fillimi i gushtit appeared first on Agjencia Telegrafike Shqiptare.

TIRANË, 29 gusht /ATSH/ Tre persona janë arrestuar nga policia dhe dy të tjerë janë proceduar penalisht pasi penguan qarkullimin e automjeteve dhe gjuajtën me sende të forta 3 autobusë që transportonin tifozët e ekipit të futbollit polak Jagiellonias, i cili zhvilloi dje ndeshje me ekipin e Dinamos në Tiranë.

Policia njoftoi se “specialistët për Hetimin e Krimeve të Komisariatit të Policisë Nr. 7, në bashkëpunim me shërbimet e Sektorit të Forcës së Posaçme “Shqiponja”, arrestuan në flagrancë shtetasit A. M., 32 vjeç, K. S., 29 vjeç dhe Sh. S., 30 vjeç, dhe referuan materialet në Prokurori ku nisi procedimi penal për 2 shtetas të mitur 17 vjeç”.

“Nga veprimet hetimore dyshohet se këta shtetas, pas mesnate, në aksin rrugor “Qafë Kashar – Rinas”, kanë penguar qarkullimin e automjeteve dhe kanë gjuajtur me sende të forta, 3 autobusë që transportonin tifozët e një ekipi futbolli”, njoftoi policia.

Punohet për identifikimin dhe kapjen e shtetasve të tjerë të përfshirë në këtë rast.

Materialet procedurale i kaluan Prokurorisë, për veprat penale “Prishja e rendit dhe qetësisë publike”, “Shkatërrim i pronës” dhe “Pengim i qarkullimit të mjeteve të transportit”, të kryera në bashkëpunim.

/m.q/j.p/

The post Sende të forta ndaj autobusëve me tifozë polakë, në pranga 3 persona appeared first on Agjencia Telegrafike Shqiptare.

TIRANË, 28 gusht /ATSH/ Dy persona të shpallur në kërkim janë ekstraduar nga Italia dhe Gjermania.

Policia njoftoi sot se u ekstradua nga Italia, një shtetas i cili gjatë muajit shkurt 2024, kanosi në mënyrë të përsëritur, për shkak të detyrës, gjyqtarin e Gjykatës Administrative Lushnjë.

Gjithashtu u ekstradua nga Gjermania, një shtetas i kërkuar për prodhim dhe shitje të narkotikëve.

“Si rezultat i bashkëpunimit të Interpol Tiranës me Interpol Romën, në kuadër të operacionit “The Wanted”, për kapjen e shtetasve në kërkim ndërkombëtar dhe ekstradimin e tyre, u finalizuan procedurat për ekstradimin nga Italia, të shtetasit H. Xh., 42 vjeç, banues në Tiranë.

“Gjykata e Shkallës së Parë e Juridiksionit të Përgjithshëm Tiranë,  në vitin 2024, i ka caktuar atij, masën e sigurisë “Arrest në burg”, për veprat penale “Kanosja për shkak të detyrës” dhe “Prishja e qetësisë publike”. Shtetasi H. Xh. akuzohet se gjatë muajit shkurt 2024, ka kanosur në mënyrë të përsëritur, nëpërmjet celularit, për shkak të detyrës, shtetasin E. L., gjyqtar i Gjykatës Administrative Lushnjë, si dhe ka protestuar para Gjykatës së Lartë”, njoftoi policia.

Policia njoftoi më tej se “si rezultat i bashkëpunimit me homologët gjermanë, u finalizua ekstradimi nga Gjermania, i shtetasit shqiptar B. S., 34 vjeç. Gjykata e Shkallës së Parë e Juridiksionit të Përgjithshëm Korçë, i ka caktuar atij, masën e sigurisë “Arrest në burg” për veprën penale “Prodhimi dhe shitja e narkotikëve”. Shtetasi B. S. akuzohet për shitje të dozave të kokainës, në qytetin e Pogradecit”.

Shtetasit e ekstraduar iu dorëzuan Drejtorisë së Përgjithshme të Burgjeve.

/m.q/j.p/

The post Ekstradohen nga Italia dhe Gjermania dy shtetas në kërkim ndërkombëtar appeared first on Agjencia Telegrafike Shqiptare.

TIRANË, 28 gusht /ATSH/ Kryetari i Partisë Demokratike Sali Berisha deklaroi sërish sot se opozita nuk do të njohë zgjedhjet parlamentare të 11 majit. Pas certifikimit nga Komisioni Rregullator të rezultatit, Berisha i cilësoi zgjedhjet si “farsë elektorale”.

“Përfaqësuesit tanë mbajtjen një qëndrim dinjitoz në komision. Shprehën mendimet, këto ishin një farsë e vërtetë elektorale. Ky është qëndrimi ynë dhe ne e kemi shprehur këtë”, tha Berisha.

Në konferencën për mediet kreu i PD-së gjithashtu i bëri thirrje qeverisë së SHBA-së që të “shtrijë hetimet për Xhorxh Sorosin dhe të birin e tij edhe në Shqipëri gjatë 20 viteve”.

“Të hetojnë politikën e jashtme të Xhorxh Sorosit, e cila në mënyrë absolute përputhej me Beogradin dhe binte ndesh me interesat e shqiptarëve, me politikën e ndjekur zyrtare të SHBA gjer në atë kohë, por dhe me politikën e ndjekur nga presidenti Donald Trump në mandatin e parë”, u shpreh Berisha.

Gjatë fjalës së tij, Berisha tha se Porti i peshkatarëve në Durrës është përdorur për trafik droge.

Sipas Berishës ky port, i ndërtuar me fonde publike në vlerën e mbi 12 milionë eurove, është dhuruar pa asnjë investim privat dy emrave të lidhur drejtpërdrejt me pushtetin që sipas dosjeve italiane, kanë lidhje me grupe kriminale dhe trafikun e narkotikëve.

Ai akuzoi se ka kthyer portet shqiptare në qendra të trafikut ndërkombëtar të drogës, duke mbrojtur dhe favorizuar klanet kriminale në dëm të ligjit dhe interesit publik.

/m.q/j.p/

The post Berisha: Nuk i njohim zgjedhjet, ishin farsë elektorale appeared first on Agjencia Telegrafike Shqiptare.

TIRANË, 28 gusht /ATSH/ Komisioni Rregullator shpalli sot rezultatin përfundimtar të zgjedhjeve për Kuvendin e Republikës së Shqipërisë, të datës 11 maj 2025.

Komisioni Rregullator votoi në parim dhe nen për nen me 3 vota pro dhe 2 kundër projektvendimin e Komisionerit Shtetëror të Zgjedhjeve Ilirjan Celibashi për shpalljen e rezultatit përfundimtar të zgjedhjeve.

Gjatë mbledhjes së Komisionit Rregullator, u miratua numri i votave, numri i mandateve dhe lista emërore e deputetëve për çdo subjekt zgjedhor, për çdo zonë zgjedhore.

Po ashtu, Komisioni Rregullator miratoi numrin e votave, numrin e mandateve dhe listën emërore të deputetëve për çdo subjekt zgjedhor në rang vendi.

Gjatë mbledhjes anëtarët e Komisionit Rregullator Muharrem Çakaj dhe Helga Vukaj shprehën votën e tyre kundër këtij certifikimi.

Çakaj tha se “pata shpresë së SPAK do ta luftonte krimin zgjedhor, por çfarë ndodhi, nuk kemi asnjë ndëshkim të krimit zgjedhor. Krim zgjedhor kishte, vetëm KQZ dhe SPAK nuk e pa”.

Ndërsa Vukaj u shpreh se “këto zgjedhje nuk ishin të lira, ishin larg standardeve, rezultatet nuk ishin reale dhe jemi në një regjim. Në këto kushte deklaroj votën time kundër këtij rezultati”.

Kundër këtij vendimi mund të bëhet ankim në Kolegjin Zgjedhor Gjyqësor pranë Gjykatës Administrative të Apelit Tiranë, brenda 5 ditëve nga shpallja e tij.

Në zgjedhjet e 11 majit, Partia Socialiste mori 83 mandate, Partia Demokratike-Aleanca për Shqipërinë Madhështore 50 mandate. Partia Socialdemokrate 3 deputetë, partia “Mundësia” 2, ndërsa Lëvizja Bashkë dhe Nisma Shqipëria Bëhet nga një mandat.

/m.q/j.p/

The post Komisioni Rregullator certifikon rezultatin përfundimtar të zgjedhjeve të 11 majit appeared first on Agjencia Telegrafike Shqiptare.

TIRANË, 28 gusht /ATSH/ Dy persona me rrezikshmëri të lartë shoqërore janë arrestuar mbrëmjen e djeshme në Durrës.

Drejtori i Policisë së Durrësit Vilson Bala në një konferencë për shtyp njoftoi sot se “strukturat e Drejtorisë Vendore të Policisë Durrës dhe ato të Komisariatit të Policisë Durrës zhvilluan dhe finalizuan me sukses një tjetër operacion policor me rrezikshmëri të lartë, të koduar “The next Gun””.

“Gjatë operacionit u kapën dhe u vunë në pranga 2 shtetas, njëri me rrezikshmëri të lartë, konkretisht shtetasit A. M., 39 vjeç, dhe A. H., 23 vjeç, të dy banues në Durrës, të cilëve në momentin e arrestimit iu është gjetur një armë zjarri pistoletë, me fishek në fole gati për qitje”, njoftoi Bala.

Sipas Balës “39-vjeçari A. M., person me rrezikshmëri të lartë shoqërore, me precedentë të theksuar kriminal në fushën e krimeve kundër personit dhe armëmbajtjes pa leje. Ky shtetas ishte i shpallur në kërkim policor, i dyshuar si autor i ngjarjes së ndodhur më datë 13.08.2025, në lagjen nr. 14, Durrës, ku është vënë lëndë eksplozive banesës së shtetasit I. Gj”.

Drejtori i Policisë së Durrësit nënvizoi gjithashtu se gjatë sezonit turistik në qarkun Durrës nuk ka pasur asnjë problem për sa i përket rendit dhe sigurisë.

/m.q/j.p/

The post Durrës, arrestohen dy persona me rrezikshmëri të lartë appeared first on Agjencia Telegrafike Shqiptare.

TIRANË, 28 gusht /ATSH/ Drejtori i Policisë së Durrësit Vilson Bala dha sot detaje për arrestimin e ish-kryeinspektorit të Inspektoratit të Mbrojtjes së Territorit në Durrës shtetasit A. H.

Bala tha se “gjatë verifikimeve të kryera nga shërbimet e Policisë dhe ato të IKMT-së, ky shtetas u kap duke kryer punime ndërtimi pa leje në subjektin e tij “Sent Michele Rezidencë””.

“Shtetasi A. H. e ka ndërtuar këtë objekt, i cili përbëhet nga 11 kabina tip garsoniere, një godinë 2-katëshe, një fushë minifutbolli dhe një pishinë, në një sipërfaqe toke prej 5,600 m², gjatë kohës kur ai ka ushtruar funksionin e Kryeinspektorit të IMT-së në Bashkinë Durrës dhe konkretisht gjatë viteve 2018-2021”, njoftoi Bala.

Sipas Balës, nga verifikimet e kryera rezultoi se ndërtimi i këtij objekti pa leje ka filluar prej vitit 2018 e në vijim.

“Materialet iu referuan Prokurorisë së Posaçme kundër Korrupsionit dhe Krimit të Organizuar, Tiranë, për veprat penale: “Ndërtim i paligjshëm me qëllim përfitimi”, “Korrupsion i zyrtarëve të lartë” dhe “Shpërdorim i detyrës””, tha Bala.

/m.q/j.p/

The post Arrestimi i ish-kreut të IMT Durrës, policia: Ndërtoi pa leje 11 garsoniere, një vilë dykatëshe dhe fushë minifutbolli appeared first on Agjencia Telegrafike Shqiptare.

TIRANË, 27 gusht /ATSH/ Projektligji për Kodin e ri Penal është hedhur për konsultim publik, ku do të analizohen në mënyrë me të detajuar nevoja për ndryshime dhe përmirësime.

Kontributet në kuadër të procesit të konsultimit dhe përmirësimit të përmbajtjes së këtij projektligji, do të përcillen nga subjektet e interesuara nëpërmjet postës elektronike drejtuar Ministrisë së Drejtësisë, nëpërmjet adresave zyratre.

Kodi Penal aktual është miratuar në vitin 1995 dhe që prej asaj periudhe ka pësuar deri më tani 32 ndërhyrje, nga të cilat 23 ndërhyrje legjislative dhe 9 ndërhyrje me vendime të Gjykatës Kushtetuese.

Drafti i parë i Kodit të ri Penal u paraqit më 25 korrik pas një pune voluminoze disavjeçare nga një grup ekspertësh i udhëhequr nga Drejtori i Shkollës së Magjistraturës, Profesor Arben Rakipi.

Drafti u hodh për konsultim nga Ministria e Drejtësisë me aktorët e sistemit të drejtësisë, partnerët ndërkombëtarë, universitetet, shoqërinë civile, mediat dhe qeverinë si pjesë e angazhimeve të anëtarësimit në Bashkimin Europian dhe një domosdoshmëri për forcimin e Shtetit të së Drejtës.

/m.q/j.p/

The post Projektligji për Kodin e ri Penal hidhet për konsultim publik appeared first on Agjencia Telegrafike Shqiptare.

TIRANË, 27 gusht /ATSH/ Policia Kufitare e Himarës shpëtoi tre pushues që rrezikuan të mbyteshin në det pasi skafi i tyre pësoi defekt gjatë lundrimit.

Sipas njoftimit të policisë “mbrëmjen e djeshme, pas njoftimit të marrë nga Salla Operative e DRKM Vlorë, shërbimet e Policisë Kufitare organizuan menjëherë punën për t’i shkuar në ndihmë një mjeti lundrues skaf në zonën e Gramë-Brisanit”.

“Pas kërkimeve, u bë i mundur lokalizimi i skafit që kishte pësuar defekt teknik dhe po përmbytej. Në bord ndodheshin 3 shtetas, të cilët u morën dhe u shoqëruan me mjetin lundrues të Policisë Kufitare, drejt bregut, në gjendje të mirë shëndetësore”, njoftoi policia.

Policia njoftoi se pavarësisht përpjekjeve të shërbimeve të Policisë Kufitare për ta tërhequr dhe për ta nxjerrë skafin në breg, ai u fundos në det.

/m.q/j.p/

The post Rrezikuan të mbyteshin në det në zonën e Gramës, policia shpëton tre pushuesit appeared first on Agjencia Telegrafike Shqiptare.

TIRANË, 27 gusht /ATSH/ Policia zbuloi sot dy ambiente të përshtatura për organizimin dhe ushtrimin e veprimtarisë së paligjshme të lojërave të fatit.

Policia njoftoi se në kuadër të operacionit policor i koduar “Jackpot”, u proceduan penalisht 4 shtetas dhe u shpallën në kërkim 2 të tjerë.

“Gjatë kontrolleve, u konstatua se 2 ambiente, në Mjull Bathore dhe në Vaqarr, ishin përshtatur për organizimin dhe ushtrimin e veprimtarisë së paligjshme të lojërave të fatit.

“Në vijim të veprimeve për këto dy raste, u referuan materialet në Prokurori ku nisi procedimi penal për shtetasit B. D., 65 vjeç, R. L., 33 vjeç, L. M., 63 vjeç dhe G. Ch., 43 vjeç (shtetas kinez), si dhe u shpallën në kërkim 2 shtetas kinezë Ë. Zh dhe Y. L. Punohet për kapjen e tyre”, njoftoi policia.

Materialet procedurale iu referuan Prokurorisë së Tiranës, për veprime të mëtejshme.

/m.q/j.p/

The post Operacioni “Jackpot”, nën hetim 4 persona në Tiranë appeared first on Agjencia Telegrafike Shqiptare.

TIRANË, 27 gusht /ATSH/ Ish-kryeinspektori i Inspektoratit të Mbrojtjes së Territorit (IMT) në Durrës në vitin 2017, është arrestuar nga policia, pasi dyshohet se ka ndërtuar pa leje.

Policia e Durrësit njoftoi sot se “specialistët për Hetimin e Krimit Ekonomiko-Financiar arrestuan shtetasin A. H., 55 vjeç, banues në Tiranë, pasi dyshohet se në vitin 2017, kur ka qenë me detyrë kryeinspektor i IMT Durrës, ka ndërtuar pa leje, disa objekte (shtëpi pushimi), në fshatin Shetaj, Ishëm”.

Sipas medieve bëhet fjalë për një rezidencë me vila pushimi, pishinë e vende parkimi, buzë detit pranë zonës së Kepit të Rodonit.

/m.q/j.p/

The post Ndërtoi shtëpi pushimi pa leje në Ishëm, arrestohet ish-kreu i IMT-së në Durrës appeared first on Agjencia Telegrafike Shqiptare.

TIRANË, 27 gusht /ATSH/ Sekretari i Përgjithshëm i Partisë së Lirisë Tedi Blushi tha sot se presidenti i PL-së Ilir Meta prej 10 muajsh po mbahet në burg pa asnjë fakt penal.

Duke e konsideruar izolimin e Metës si “politik”, Blushi tha edhe gjykata është bërë palë me Prokurorinë e Posaçme Kundër Korrupsionit dhe Krimit të Organizuar.

“Presidenti i Partisë së Lirisë, Ilir Meta, prej 10 muajsh, ndodhet në burg jo për shkak të ligjit, por të politizimit ekstrem të SPAK-ut dhe shantazhit institucional që Prokuroria e Posaçme ushtron mbi gjykatat speciale, përmes përgjimit permanent të gjyqtarëve dhe familjarëve, duke cenuar në mënyrë flagrante pavarësinë e tyre në vendimmarrje”, u shpreh Blushi.

Sipas Blushit, gjatë kohës që Meta është mbajtur i burgosur “nuk është zbuluar dhe paraqitur asnjë provë reale ligjore që të vërtetojë ndonjë veprim të paligjshëm të Meta”.

Deputeti i zgjedhur i PL-së nënvizoi se “alibia e “dëshmitarëve të paqëndrueshëm” kundër Ilir Metës nuk provon gjë tjetër veçse ata janë pengje të SPAK-ut”.

“Ilir Meta, pa pushtet ekzekutiv, pa asnjë instrument presioni dhe pa mandat deputeti nuk ka asnjë fuqi intimiduese ndaj kërrkujt. Ndaj gjykata për rastin e Metës duhet të argumentonte për çfarë dëshmitarësh bëhet fjalë”, tha Blushi.

Blushi shtoi se “nuk ka asnjë dëshmitar, që të jetë i PL, jo se jo, që e fajëson Ilir Metën apo që e bën përgjegjës në raport me ligjin”.

“Presioni ndaj gjyqtarit nën mbikëqyrje të vazhdueshme nga SPAK, afërmendsh që do prodhojë bërjen palë të tij me SPAK në këtë proces, duke riprodhuar po afërmendsh të njëjtën alibi për “provat e gjalla të paqëndrueshme”, që më pas kthehet në “argument” ligjor për të mbajtur Ilir Metën në paraburgim politik”, tha Blushi.

Blushi u shpreh se gjykata duhet të garantojë një proces të rregullt ligjor midis palëve dhe SPAK është palë në këtë.

Sipas Blushit “i gjithë procesi karakterizohet nga manipulimi, selektiviteti, mungesë transparence, paligjshmëria dhe politizimi”.

Më 13 gusht Gjykata e Posaçme e Shkallës së Parë për Korrupsionin dhe Krimin e Organizuar vendosi të mos ndryshojë masën e sigurisë ndaj Ilir Metës, duke e lënë në fuqi “arrestin në burg”.

SPAK i ka komunikuar zyrtarisht Ilir Metës mbylljen e hetimeve dhe kalimin e dosjes në gjykatë.

Meta akuzohet për korrupsion, pastrim parash dhe fshehje pasurie, për çështjet që kanë të bëjnë me dosjen e lobimit të LSI në SHBA dhe aferën CEZ-DIA.

Ai u arrestua më 21 tetor 2024 dhe që prej atij momenti qëndron në paraburgim me masë “arresti në burg”.

/m.q/j.p/

The post Blushi: Zero prova kundër Metës, gjykata palë me SPAK-un appeared first on Agjencia Telegrafike Shqiptare.

TIRANË, 27 gusht /ATSH/ Një 22-vjeçar është arrestuar nga policia e Tiranës pasi u kap në flagrancë duke transportuar 2 armë zjarri kallashnikov, nga Burreli në Tiranë, për t’i shitur për llogari të grupeve kriminale.

Policia njoftoi sot se u vu në pranga A. D., 22 vjeç, banues në Burrel.

“Gjatë operacionit, në tunelin e Murrizit, shërbimet e Policisë kanë ndaluar automjetin që drejtonte 22-vjeçari, në të cilin, gjatë kontrollit, gjetën të fshehura në bagazh, 2 armë zjarri kallashnikov dhe 4 krehra për to”, njoftoi policia.

Sipas policisë nga hetimet dyshohet se ky shtetas po i transportonte armët në Tiranë, për t’i shitur për llogari të grupeve kriminale. Vijojnë hetimet për dokumentimin e kësaj veprimtarie kriminale, identifikimin dhe kapjen e shtetasve të tjerë që mund të jenë përfshirë.

Materialet procedurale i kaluan Prokurorisë, për veprën penale “Mbajtja pa leje dhe prodhimi i armëve, armëve shpërthyese dhe i municionit”.

/m.q/j.p/

The post Shiste armë për grupet kriminale, arrestohet 22-vjeçari në tunelin e Murrizit appeared first on Agjencia Telegrafike Shqiptare.

TIRANË, 27 gusht /ATSH/ Policia e Shtetit finalizoi tre operacione në qarkun e Fierit për kapjen e shtetasve të shpallur në kërkim ndërkombëtar.

Në pranga u vunë tre shtetas të cilët akuzohen nga autoritetet italiane, si pjesëtarë të një organizate kriminale që trafikonte lëndë narkotike.

Policia njoftoi sot se “konkretisht në kuadër të operacionit “Operacionalja 61”, u kap dhe u vu në pranga shtetasi K. Sh., 24 vjeç, banues në Fier; në kuadër të operacionit “Operacionalja 62” u kap dhe u vu në pranga A. M., 29 vjeç, banues në Fier; në kuadër të operacionit “Operacionalja 63” u kap dhe u vu në pranga shtetasi E. F., 22 vjeç, banues në Fier”.

“Këta shtetas ishin shpallur në kërkim ndërkombëtar, pasi Gjykata e Riminit, Itali, iu ka caktuar masën e sigurisë “Arrest në burg”, për veprat penale “Organizata kriminale” dhe “Trafikimi i  narkotikëve”. Maksimumi i dënimit: 10 vjet burgim”, njoftoi policia.

Sipas policisë ata akuzohen se gjatë periudhës qershor-dhjetor 2024, në bashkëpunim me njëri-tjetrin dhe me shtetas të tjerë, kanë blerë sasi të mëdhaja droge, me qëllim shitjen në qytetin e Riminit.

Interpol Tirana, në bashkëpunim me Interpol Romën, vijon procedurat për ekstradimin e këtyre shtetasve në Itali.

/m.q/j.p/

The post Në kërkim në Itali si pjesëtarë të grupeve kriminale, arrestohen tre persona në Fier appeared first on Agjencia Telegrafike Shqiptare.

TIRANË, 26 gusht/ATSH/ Në kuadër të operacionit “The Wanted”, janë arrestuar në Itali me qëllim ekstradimin në Shqipëri, 2 shtetas (vëllezër), të shpallur në kërkim ndërkombëtar.

Policia njoftoi sot se “si rezultat i sigurimit të informacionit nga Departamenti i Policisë Kriminale në Policinë e Shtetit dhe i shkëmbimit të tij, në kohë reale nëpërmjet Interpol Tiranës, me Policinë italiane janë arrestuar: E. H. alias E. L., 35 vjeç dhe K.H, 31-vjeç.

“Gjykata e Durrësit, në muajin janar 2022, i ka caktuar këtij shtetasi, masën e sigurisë “Arrest në burg”, për veprat penale “Vjedhja me dhunë” dhe “Përkrahja e autorit të krimit””. Ai akuzohet se në bashkëpunim me disa shtetas të tjerë, më datë 07.02.2021, ka vjedhur me dhunë, një automjet, një shumë parash dhe një celular, në ambientet e një fabrike qumështi. Gjithashtu, ka ndihmuar të fshihej shtetasin H.H, i shpallur në kërkim për veprën penale “Ndihma për kalim të paligjshëm të kufijve””, njoftoi policia.

Gjithashtu sipas policisë gjykata e Dibrës, në muajin korrik 2020, e ka dënuar K. H., 31 vjeç me 4 vjet e 4 muaj burgim, për veprën penale “Kultivimi i bimëve narkotike”.

“Në vitin 2019, shtetasi K. H. është kapur në flagrancë brenda një sere në Martanesh, ku kishte kultivuar fidanë narkotikë në 1324 gota plastike. Nga dënimi, këtij shtetasi i kanë mbetur për të vuajtur dhe 1 vit, 6 muaj e 15 ditë”, njoftoi policia.

Interpol Tirana dhe Interpol Roma po kryejnë procedurat për ekstradimin e këtyre shtetasve, në Shqipëri.

/m.q/j.p/

The post Në kërkim për disa vepra penale, arrestohen dy vëllezërit shqiptarë në Itali appeared first on Agjencia Telegrafike Shqiptare.

TIRANË, 26 gusht/ATSH/ Në Bibliotekën Kombëtare u kremtua sot 115-vjetori i lindjes së Shën Nënë Terezës, shenjtores shqiptare të njohur botërisht.

Përmes një ekspozite filatelike dhe biografiko-historike, pjesë e koleksionit privat të koleksionistit Hysen Dizdari, i cili është edhe autor i librit “Nënë Tereza në pullat shqiptare”, iu prezantua publikut figura e shenjtores nën dritën e kujtesës kulturore dhe historike.

I pranishëm në aktivitet ishte edhe studiuesi nga Kosova, Anton Nikë Berisha, autor i 150 veprave për letërsinë shqipe dhe 27 veprave për Nënë Terezën.

Anton Nikë Berisha i dhuroi Bibliotekës Kombëtare një kolanë me vepra të zgjedhura të tij, si dhe 10 libra për Shën Nënë Terezën ia dhuroi koleksionistit Hysen Dizdari.

Takimi u moderua nga zëvëndësdrejtorja e Bibliotekës Kombëtare, Majlinda Toçi, ndërsa ekspozita zgjoi interesin e studiuesve, kritikëve dhe grupeve të tjera të interesit.

/m.q/j.p/

The post 115-vjetori i Shën Nënë Terezës, ekspozitë filatelike në Bibliotekën Kombëtare appeared first on Agjencia Telegrafike Shqiptare.

TIRANË, 26 gusht /ATSH/ Kryetarja e Kuvendit Elisa Spiropali uroi sot kryetarin e ri të zgjedhur të Kuvendit të Kosovës, Dimal Bashën.

Nëpërmjet një postimi në rrjetet sociale, kryeparlamentarja përgëzoi gjithashtu Kuvendin e Kosovës “për çeljen e rrugës për ndërtimin e institucioneve të reja demokratike pas zgjedhjeve”.

“Mezi pres të rifillojmë bashkëpunimin e ngushtë vëllazëror mes Kuvendit të Shqipërisë dhe Kuvendit tē Kosovës, për të mirën e qytetarëve tanë, për mbështetjen e integrimit euroatlantik të dy vendeve tona, dhe garantimin e mbrojtjen e të drejtave të shqiptarëve në rajon”, shkruan Spiropali.

Kuvendi i Kosovës zgjodhi sot deputetin e Lëvizjes Vetëvendosje, Dimal Basha për kryetar të Kuvendit.

Në përpjekjen e 58-të për konstituimin e Kuvendit, propozimi i Vetëvendosjes u miratua me 73 vota pro, 30 kundër dhe 3 abstenim.

Ai arriti t’i marrë votat e nevojshme falë votës së një pjesë të deputetëve të PDK-së, AAK-së dhe një pjese të pakicave. LDK dhe Lista Serbe votuan kundër.

Pas vendimit të Gjykatës Kushtetuese për zgjidhjen e ngërçit të krijuar, kjo ishte seanca e katërt e zhvilluar ku deputetët dhanë dakordësi për emrin e Dimal Bashës si kreu i ri i Kuvendit të Kosovës.

/m.q/j.p/

The post Dimal Basha në krye të Kuvendit të Kosovës, Spiropali: Rifillojmë bashkëpunimin e ngushtë vëllazëror appeared first on Agjencia Telegrafike Shqiptare.

TIRANË, 26 gusht /ATSH/ Partia e Lirisë, përmes një deklarate nga zëdhënësja e Presidentit të Partisë së Lirisë, Jasmira Memelli u shpreh sot se Shqipëria e vitit 2024 është vendi me popullsinë më të kequshqyer në Europë.

Sipas saj “nga viti 2022 deri në vitin 2024, Shqipëria nuk ka qenë në gjendje të sigurojë ushqim të mjaftueshëm për qytetarët e saj. 5.4% e popullsisë është e nënushqyer, ndërkohë që në vendet e rajonit ky tregues është thuajse i zhdukur”.

Memelli theksoi se ky është një turp kombëtar, por mbi të gjitha një krim social.

“Në Shqipëri nuk mungon toka pjellore, nuk mungon potenciali prodhues, por mungon politika e ndershme, mungon vizioni dhe mungon përgjegjësia”, nënvizoi Memelli.

Sipas Memellit, nuk mund të ketë zhvillim me qytetarë që vuajnë për ushqim.

Memelli tha se “Partia e Lirisë ka një program të qartë dhe më se të realizueshëm, 5 prioritete për katër milionë shqiptarë plus, ku fokusi kryesor është të garantohet siguria ushqimore për çdo familje shqiptare me programe emergjente mbështetëse për shtresat më të varfra”.

“Të rikthejë bujqësinë si prioritet kombëtar, duke e bërë Shqipërinë të vetëmjaftueshme në prodhimin e ushqimit bazë, por jo vetëm edhe shndërrimin e saj në fuqi eksportuese. Të ulë koston e jetesës përmes politikave fiskale të drejta dhe subvencioneve reale për prodhuesit vendas”, u shpreh Memelli.

/m.q/j.p/

The post PL: Të rikthejmë bujqësinë si prioritet kombëtar appeared first on Agjencia Telegrafike Shqiptare.

TIRANË, 26 gusht /ATSH/ Autoriteti Portual Durrës njoftoi sot se gjatë shtatë muajve të parë të vitit 2025, në kalatat e Portit të Durrësit janë akostuar 1,709 mjete lundruese, mes tyre 135 jahte turistike.

Sipas APD Ky numër reflekton jo vetëm rritjen e lëvizjes turistike, por edhe rolin e rëndësishëm të portit në shërbimin ndaj shkëmbimeve tregtare.

“Kjo dëshmon për cilësinë e shërbimeve portuale që ofron Porti i Durrësit”, nënvizoi APD përmes një njoftimi në rrjetet sociale.

The post APD: Në 7 muaj, 135 jahte turistike në portin e Durrësit appeared first on Agjencia Telegrafike Shqiptare.

TIRANË, 25 gusht /ATSH/ Numri i të huajve me leje qëndrimi në Shqipëri ka arritur në 21.940 në fund të vitit 2024, duke shënuar një rritje prej 2,2% krahasuar me vitin 2023. Të dhënat e publikuara nga Instituti i Statistikave (INSTAT) pasqyrojnë një tendencë në rritje të interesit të të huajve për të jetuar dhe punuar në Shqipëri.

Sipas statistikave, meshkujt përbëjnë shumicën e të huajve me leje qëndrimi me 61,9%, ndërsa femrat zënë 38,1%. Grup-mosha më e përfaqësuar është ajo nga 30 deri në 39 vjeç, që përbën 24,6% të të huajve gjithsej.

Po sipas shifrave të INSTAT, numri i aplikimeve për leje qëndrimi në Shqipëri, në vitin 2024 shënoi rritje prej 6,0%, krahasuar me vitin 2023. Shtetasit nga Italia dhe India përbëjnë 28,8% të aplikimeve.

Të huajt me origjinë nga Kosova, Italia dhe Turqia përbëjnë numrin më madh të të huajve me leje qëndrimi në Shqipëri.

Shumica e të huajve kanë ardhur për qëllime punësimi, duke përbërë 54,3% të lejeve të qëndrimit, ndjekur nga bashkimi familjar me 24,5%, arsye të tjera me 16,3%, studimet me 4%, dhe qëllimet humanitare me 0,9%.

Në 2024 u identifikuan 1540 të huaj të parregullt në territorin e Shqipërisë, duke shënuar një rënie të konsiderueshme, krahasuar me 6630 në vitin 2023.

Të huajt në Shqipëri sipas vendit të origjinës

Në vitin 2024, të huajt me origjinë nga Kosova janë 4592 banorë, duke shënuar një rritje me 23,7%, krahasuar me 2023, ndërsa të huajt me leje qëndrimi në Shqipëri me origjinë nga Italia janë 3763 banorë, duke shënuar një rritje me 11,5%, krahasuar me 2023.

Sipas të dhënave, Evropa zë pjesën më të madhe me 65,5% (14.367 persona me leje qëndrimi), duke shënuar një rënie prej 5,6%, krahasuar me 2023; Azia ka shënuar rritje të ndjeshme me 20,1% (4545 persona); Amerika, Afrika dhe Oqeania rritje me 23,4% (3028 persona).

Të dhëna mbi të huajt me leje qëndrimi në Shqipëri si dhe të huajt e parregullt sigurohen nga Departamenti për Kufirin dhe Migracionin.

/m.q//r.e/

The post INSTAT: Numri i të huajve me leje qëndrimi në Shqipëri u rrit me 2,2% gjatë 2024-ës appeared first on Agjencia Telegrafike Shqiptare.