NJU JORK, 30 gusht /ATSH/ – Kërkimet e herëpashershme kanë lidhur një vitaminë të zakonshme me një ngadalësim të plakjes, dhe tani një studim i ri i Harvardit duket se i konfirmon këto zbulime, sipas “Foxnews”.

Studimi, i cili u botua në “The American Journal of Clinical Nutrition”, zbuloi se marrja e një pilule ditore të vitaminës D parandaloi shkurtimin e telomereve, një shenjë dalluese e plakjes.

Telomeret, të cilat shpesh krahasohen me “majat plastike në skajet e lidhëseve të këpucëve”, veprojnë si skaje mbrojtëse në fijet e kromozomeve, sipas një njoftimi për shtyp të Harvardit.

Ndërsa njerëzit plaken, telomeret shkurtohen, gjë që mund të rrisë gjasat e shëndetit të dobët dhe vdekshmërisë, kanë treguar studime të mëparshme.

Kërkimet  kanë sugjeruar gjithashtu se nivelet më të larta të vitaminës D në gjak lidhen me telomere më të gjata.

Në këtë provë të fundit të rastësishme, afërsisht 1 000 njerëz të moshës 50 vjeç e lart u ndanë në dy grupe, një grup mori 2 000 njësi ndërkombëtare (IU) pilula vitaminash D çdo ditë, dhe grupi tjetër mori pilula placebo. Pas një periudhe katërvjeçare, njerëzit që merrnin vitaminë D treguan më pak se gjysmën e shkurtimit të telomereve sesa grupi placebo.

Grupi i vitaminës D gjithashtu kishte më pak sëmundje autoimune dhe shënjues të reduktuar të inflamacionit.

Autorja kryesore e studimit JoAnn Manson, profesoreshë e mjekësisë në shkollën mjekësore të Harvardit, tha se gjetjet “sugjerojnë një rol premtues për vitaminën D në ngadalësimin e një rruge për plakjen biologjike dhe sëmundjet kronike të lidhura me moshën”.

Ndërsa studiuesit u habitën që vitamina D ishte e lidhur me një mbrojtje kaq të konsiderueshme kundër shkurtimit të telomereve, Manson i tha Fox News Digital se gjetjet janë në përputhje me provat e mëparshme.

“Vitamina D zvogëlon inflamacionin, një shkak kryesor i shkurtimit të telomereve dhe sëmundjeve kronike të plakjes”, tha ajo.

Në studim, ekipi zbuloi se 2000 IU në ditë ishte “shumë e sigurt”, pa efekte anësore ose ngjarje të padëshiruara.

Nivelet e gjakut për mungesën dhe nivelet e rekomanduara të gjakut ndryshojnë në organizata, laboratorë dhe vende të ndryshme, gjë që është një nga arsyet për dyshime në lidhje me dobinë e testit”, tha Manson.

“Task Forca e Shërbimeve Parandaluese të SHBA-së dhe shumica e shoqatave profesionale në SHBA nuk rekomandojnë shqyrtim universal për nivelet e vitaminës D në gjak ose përdorimin rutinor të suplementeve të vitamins D”, përfundoi studiuesja./Ad.Ab./

The post FOKUS – Studimi, vitamina D ngadalëson plakjen në 4 vite appeared first on Agjencia Telegrafike Shqiptare.

UASHINGTON, 30 gusht /ATSH-DPA/ Shtetet e Bashkuara të Amerikës kanë miratuar shitjen e disa sistemeve të mbrojtjes ajrore Patriot dhe armëve të tjera për aleatin e NATO-s, Danimarkën, e cila planifikon të mbështesë Ukrainën në luftën kundër Rusisë.

Departamenti amerikan i Shtetitë ka miratuar marrëveshjen me vlerë 8,5 miliardë dollarë, që përfshin gjashtë raketahedhës, sisteme radari dhe udhëzimi si dhe raketat përkatëse.

Danimarka dhe anëtarë të tjerë të NATO-s synojnë të furnizojnë Ukrainën me sisteme të avancuara armësh për të forcuar mbrojtjen e saj ndaj sulmeve ruse.

Meqenëse Danimarka nuk përdor sisteme “Patriot”, ajo duhet t’i blejë ato nga SHBA. Edhe Holanda ka blerë sisteme “Patriot” për të forcuar mbrojtjen ajrore të Ukrainës.

Kievi ka kërkuar në mënyrë të përsëritur sisteme “Patriot” nga aleatët perëndimorë muajt e fundit për të mbrojtur më mirë qytetet e tij nga sulmet ajrore ruse.

Me SHBA-në që heziton të financojë dërgesa shtesë armësh për Ukrainën, partnerët e NATO-s po blejnë sisteme amerikane dhe po i transferojnë ato tek forcat ukrainase. /Ad.Ab./

The post UASHINGTON –SHBA miraton shitjen e sistemeve “Patriot”për Danimarkën appeared first on Agjencia Telegrafike Shqiptare.

ROMË, 30 gusht /ATSH/ – Një turist britanik, që përpiqej të vidhte disa gurë nga parku arkeologjik i Pompeit, po përballet me një gjobë të madhe nga autoritetet italiane, sipas larepubblica.it.

Turisti, një 51-vjeçar nga Skocia, u kap me një çantë që përmbante gjashtë artefakte, pesë fragmente gurësh dhe tulle, të marrë nga siti i lashtë romak.

Ai u denoncua pasi u pa duke mbledhur pjesë të kalldrëmit gjatë një turi nga një udhërrëfyes, i cili njoftoi sigurimin e parkut.

Ai  u arrestua nga policia jashtë parkut pranë Villa dei Misteri dhe pranoi se kishte marrë gurët për t’ia dhuruar djalit të tij si pjesë të koleksionit të objekteve të rralla dhe pretendoi se nuk e dinte që ishte e paligjshme të hiqeshin artefakte nga vendi i gërmimeve.

Objektet e vjedhura u konfiskuan dhe iu kthyen parkut arkeologjik, ndërsa turistit i ngarkohet akuza ”vjedhje e rëndë”.

Ai mund të marrë një thirrje për në gjykatë dhe tëpërballet me një dënim të mundshëm deri në gjashtë vjet burg dhe një gjobë maksimale prej 1 500 eurosh.

”Urime dhe falënderime për udhërrëfyesin e vëmendshëm, për kujdestarët dhe stafin e sigurisë dhe për karabinierët në këtë përpjekje bashkëpunuese për të mbrojtur trashëgiminë tonë”, u shpreh Gabriel Zuchtriegel, drejtori i Parkut Arkeologjik të Pompeit./ /Ad.Ab./

The post SOFT NEWS – Nga Pompei nuk mund të marrësh as… gurët! appeared first on Agjencia Telegrafike Shqiptare.

LONDËR, 30 gusht /ATSH/ – Ndërsa shumica prej nesh e marrim tokën nën këmbët tona për të mirëqenë, brenda shtresave të saj komplekse, si faqet e një libri, është historia e saj dhe historia jonë, sipas ”The NewsWeek”.

Hulumtimet tregojnë se ka kapituj pak të njohur në atë histori, thellë brenda të kaluarës së Tokës.

Në fakt, duket se bërthama e brendshme e Tokës ka një bërthamë edhe më të brendshme brenda saj.

”Tradicionalisht na është mësuar se Toka ka katër shtresa kryesore: kore, mantel, bërthamën e jashtme dhe bërthamën e brendshme”,  shpjegoi Joanne Stephenson gjeologe e Universitetit Kombëtar Australian.

Nga këto vëzhgime indirekte, shkencëtarët kanë llogaritur se bërthama e brendshme, me temperatura që tejkalojnë 5 000 gradë Celsius përbën vetëm 1% të vëllimit total të Tokës.

Stephenson dhe kolegët e saj gjetën prova që bërthama e brendshme e Tokës mund të ketë dy shtresa të veçanta.

”Është shumë emocionuese  dhe mund të na detyrojë të rishkruajmë librat e shkollës”, shpjegoi Stephenson.

Ekipi përdori një algoritëm kërkimi për të krahasuar mijëra modele të bërthamës së brendshme me të dhënat e vëzhguara gjatë dekadave për kohën që marrin valët sizmike për të udhëtuar nëpër Tokë, të mbledhura nga Qendra Ndërkombëtare e Sizmologjisë.

Pra, çfarë ka atje poshtë?

Ekipi analizoi disa modele të anizotropisë së bërthamës së brendshme se si ndryshimet në përbërjen e materialit ndryshojnë karakteristikat e valëve sizmike  dhe gjeti se disa modele ishin më të besueshme se të tjerat.

Disa modele sugjerojnë që materiali i bërthamës së brendshme lejon kalimin më të shpejtë të valëve sizmike paralel me ekuatorin, ndërsa të tjera tregojnë se përzierja e materialeve lejon valët të lëvizin më shpejt paralel me boshtin rrotullues të Tokës. Edhe atëherë, ekzistojnë debate mbi shkallën e ndryshimit në këndet e caktuara.

Studimi nuk tregoi shumë ndryshime me thellësinë brenda bërthamës së brendshme, por gjeti një ndryshim në drejtimin e ngadalësimit të valëve në një kënd prej 54 gradësh, ku drejtimi më i shpejtë i valëve është paralel me boshtin.

”Ne gjetëm prova që mund të tregojnë një ndryshim në strukturën e hekurit, gjë që sugjeron ndoshta dy ngjarje të ndara të ftohjes në historinë e Tokës”, tha Stephenson.

Këto zbulime mund të shpjegojnë pse disa prova eksperimentale kanë qenë të papërshtatshme me modelet tona aktuale të strukturës së Tokës. /Ad.Ab./

The post FOKUS – Shkencëtarët zbulojnë një strukturë të fshehur brenda bërthamës së Tokës appeared first on Agjencia Telegrafike Shqiptare.

NJU JORK, 30 gusht /ATSH/ – Një studim i fundit i zhvilluar nga Ohio State University sugjeron se jetesa pranë oqeanit mund të lidhet me jetëgjatësi më të madhe, sipas Reuters.

Studimi përfshiu të dhëna nga më shumë se 6 000 zona në Shtetet e Bashkuara të Amerikës, duke krahasuar jetëgjatësinë sipas afërsisë me trupat e ujit.

Rezultatet treguan se banorët që jetojnë brenda rreth 30 kilemetrash nga oqeani ose gjiri jetojnë mesatarisht një apo dy vite më gjatë se mesatarja kombëtare prej 79 vjetësh.

Në të njëjtën kohë, ata që jetojnë pranë lumenjve dhe liqeneve të brendshme në zonat urbane mund të kenë jetëgjatësi më të shkurtër, rreth 78 vjet.

Edhe banorët ruralë pranë ujërave mund të përfitojnë disa avantazhe, por jo aq të dukshme sa ata pranë bregdetit.

Shkencëtarët shpjegojnë këtë diferencë me faktorë të ndryshëm mjedisorë dhe socialë; ajër më i pastër, temperatura më të ulëta gjatë verës, më shumë mundësi për aktivitet fizik dhe rekreacion, transport më i mirë dhe të ardhura më të larta pranë bregdetit.

Ndërkohë, ndotja, varfëria, mungesa e mundësive të sigurta për aktivitet fizik dhe rreziku i përmbytjeve janë faktorë që mund të ndikojnë negativisht në jetëgjatësi në zonat e brendshme.

Studimi sfidon idenë se çdo hapësirë blu, qoftë liqene apo lumenj, sjell të njëjtat përfitime shëndetësore, duke treguar se uji bregdetar ka avantazhe të veçanta për jetëgjatësinë./ /Ad.Ab./

The post FOKUS – Ajri i oqeaneve të shton jetëgjatësinë appeared first on Agjencia Telegrafike Shqiptare.

BORME LES MIMOSAS (Francë), 29 gusht /ATSH-DPA/ – Presidenti francez Emmanuel Macron përshëndeti rikthimin e marrëdhënieve të ngushta mes Parisit dhe Berlinit, teksa priti kancelarin gjerman Friedrich Merz në rezidencën e tij verore, përpara bisedimeve të nivelit të lartë mes ministrave të të dyja shteteve.

Pas viteve me marrëdhënie të tensionuara me paraardhësin e Merzit, Olaf Scholz, lideri francez tha se rifillimi i suksesshëm i bashkëpunimit mund të shërbejë si një forcë shtytëse për forcimin e Evropës.

Pas ndryshimit të qeverisë në Berlin më herët këtë vit, të dy udhëheqësit kanë “hapur një kapitull të ri në marrëdhëniet franko-gjermane”, tha Macron, pasi mirëpriti homologun e tij gjerman në Fort de Bregançon, në Cote d’Azur.

“Besoj se tandemi franko-gjerman tani është plotësisht i koordinuar për të krijuar një Evropë më të fortë në fushën e ekonomisë, tregtisë dhe monedhës”, deklaroi ai.

Merz gjithashtu theksoi rëndësinë e “boshtit” të lidhjeve mes dy vendeve, duke thënë se “Gjermania dhe Franca luajnë një rol qendror në këtë Bashkim Evropian, në këtë kontinent evropian”.

Ai nënvizoi gjithashtu rolin vendimtar të unitetit midis të 27 vendeve anëtare të BE-së. Nëse arrihet ky unitet, “atëherë jemi vërtet të fortë dhe Evropa bëhet një faktor në botë”, tha Merz.

“Zhvillimet në botë tregojnë sa e rëndësishme është për ne të bëhemi një faktor i fuqishëm në botë — ekonomikisht, politikisht dhe gjithashtu në aspektin e sigurisë,” shtoi ai.

Macron theksoi se marrëdhënia do të jetë kyçe për të ndërtuar “një Evropë që përcakton pozicionin e saj gjeopolitik në konfliktin në Ukrainë përballë agresionit rus dhe një Evropë që ka vendosur të riarmatoset për të siguruar mbrojtjen e saj”.

Marrëdhënia mes Macron dhe Merz shihet ndjeshëm më e mirë se ajo me paraardhësin Olaf Scholz. /Ad.Ab./

The post FRANCË – Macron e Merz rivendosin boshtin franko-gjerman për një Evropë më të fortë appeared first on Agjencia Telegrafike Shqiptare.

BANGKOK, 29 gusht /ATSH–DPA/ – Kryeministrja tajlandeze, Paetongtarn Shinawatra është detyruar të largohet nga qeverisja e vendit vetëm një vit pasi mori detyrën.

Gjykata Kushtetuese vendosi që 39-vjeçarja, e cila ishte pezulluar në fillim të korrikut, shkeli parimet etike në një bisedë telefonike të publikuar dhe duhet të heqë dorë nga pozicioni i saj.

Vendimi i gjykatës u transmetua drejtpërdrejt sot në faqen e saj të internetit.

I gjithë kabineti duhet të japë dorëheqjen gjithashtu, megjithëse do të mbetet në detyrë derisa të formohet një qeveri e re.

Kryeministri i përkohshëm, Phumtham Wechayachai do të vazhdojë të mbikëqyrë punët e qeverisë derisa parlamenti të zgjedhë një kryetar të ri qeverie.

Mbetet e paqartë nëse kryeministri i ri do të vijë përsëri nga partia ”Pheu Thai” e Paetongtarn.

Çështja gjyqësore u përqendrua në një regjistrim audio të publikuar të një telefonate midis Paetongtarn, nga dinastia e fuqishme Shinawatra e Tajlandës, dhe ish-sundimtarit të Kamboxhias për një kohë të gjatë dhe presidentit aktual të Senatit, Hun Sen.

Në bisedë, e cila kishte të bënte me një konflikt kufitar që ziente dhe u përshkallëzua pak më vonë, ajo iu referua një oficeri të lartë ushtarak në rajonin kufitar si “kundërshtari” i saj dhe iu drejtua Hun Sen, i cili është i afërt me familjen e saj, si “xhaxha”.

Vërejtjet shkaktuan trazira në Tajlandë dhe shkaktuan protesta./  /Ad.Ab./

The post TAJLANDË – Kryeministrja Shinawatra shkarkohet nga gjykata pas një viti në detyrë appeared first on Agjencia Telegrafike Shqiptare.

ROMË, 29 gusht /ATSH-DPA/ – Më shumë se 15 000 hotele në gjithë Evropën janë bashkuar në një padi kolektive kundër faqes së udhëtimit Booking.com, sipas aleancës evropiane të hoteleve ”Hotrec”.

Qëllimi i padisë është të kërkohet kompensim për pretendimin e çmimeve fikse gjatë periudhës 2004–2024.

“Hotrec” njoftoi se padia do të dorëzohet në Gjykatën Rajonale të Amsterdamit deri në fund të vitit.

Sipas faqes së padisë, hotelierët mund të rikuperojnë deri në 30% të komisioneve të paguara, plus interesin.

Shumica e hoteleve pjesëmarrëse janë nga Italia, me rreth 3 000 regjistrime, ndjekur nga Gjermania, Holanda, Greqia dhe Austria, tha shoqata italiane e hoteleve “Federalberghi”.

Rreth 2 000 hotele nga Gjermania janë të përfshira, sipas organizatës tregtare “IHA”, përveç 2 000 objekteve të tjera që tashmë kanë ndjekur procedura ligjore të ngjashme kundër Booking.com në Amsterdam dhe Berlin që nga viti 2020.

Sfondi i këtij rasti është një vendim i Gjykatës Evropiane të Drejtësisë (ECJ) në 2024, i cili sugjeroi se klauzolat e ashtuquajtura ”çmimi më i mirë” mund të shkelin ligjin e konkurrencës së BE-së.

Këto klauzola ndalonin hotelet të ofronin tarifa më të lira në faqet e tyre të internetit.

Booking.com, e cila lejon turistët të rezervojnë hotele direkt përmes faqes së saj, e hoqi këtë praktikë vitin e kaluar. /Ad.Ab./

The post FOKUS – 15 000 hotele padisin Booking.com për çmime fikse appeared first on Agjencia Telegrafike Shqiptare.

SANA’A, 29 gusht /ATSH-DPA/ – Kreu i milicisë Houthi në Jemen, Ahmed al-Rahawi, i konsideruar edhe si kryeministër nga ana e rebelëve, është vrarë në një sulm ajror izraelit në kryeqytetin Sana’a, i cili kontrollohet nga rebelët aleatë të Iranit, thanë sot burime pranë grupit.

Sipas burimeve, disa prej truprojave të al-Rahawit u vranë gjithashtu gjatë bombardimeve, që ishin pjesë e një serie sulmesh izraelite në Sana’a.

Portali informativ jemenas “Adan al-Ghad” raportoi se al-Rahawi u vra bashkë me disa shoqërues, pas një sulmi  izraelit që goditi një ndërtesë banimi.

Deri më tani, houthit nuk kanë komentuar dhe kanë refuzuar të japin informacione mbi vendet e goditura.

Ushtria izraelite deklaroi se kishte goditur dje një objektiv ushtarak të Houthive në Sana’a.

Që nga fillimi i luftës në Gaza në tetor 2023, Houthit kanë sulmuar rregullisht Izraelin me raketa dhe dronë në mbështetje të Hamasit palestinez, ndërsa Izraeli ka goditur vazhdimisht objektiva në zonat e kontrolluara nga ta në Jemen./   /Ad.Ab./

The post JEMEN – Kryeministri i rebelëve Houthi vritet pas një sulmi izraelit appeared first on Agjencia Telegrafike Shqiptare.

KOPENHAGË, 29 gusht /ATSH-DPA/  – Shefja e diplomacisë së BE-së, Kaja Kallas, dënoi ashpër një valë sulmesh të rënda ajrore mbi Kievin, ku humbën jetën mbi një duzinë njerëzish, mes tyre edhe fëmijë, dhe bëri thirrje për sanksione të reja ndaj Moskës.

“Këto sulme tregojnë se Putini po tallet me çdo lloj përpjekjeje që bëhet për paqe”, tha Kallas, teksa mbërriti në një takim dyditor të ministrave të mbrojtjes dhe punëve të jashtme të BE-së në Kopenhagë.

“Ajo që duhet të bëjmë është të rrisim presionin ndaj Rusisë,” shtoi ajo, duke theksuar se sanksionet e reja mbi eksportet e energjisë dhe shërbimet financiare ruse “do t’i dëmtojnë më shumë”.

Përveç masave ndëshkuese ndaj Rusisë, Kallas u bëri thirrje vendeve të BE-së të vazhdojnë furnizimin e Kievit me armë.

“Ukrainës i nevojitet tani e gjithë mbështetja ushtarake”, tha ajo.

Ministrat e mbledhur në kryeqytetin danez do të diskutojnë gjithashtu garancitë e sigurisë për Ukrainën pas përfundimit të luftës.

Sipas Kallas, BE-ja mund të mbështesë Kievin duke vazhduar trajnimin e ushtrisë ukrainase dhe duke forcuar industrinë e mbrojtjes së vendit, përveç angazhimeve të vendeve anëtare individuale.

Megjithatë, ajo pranoi se dita pas luftës “nuk është afër, nëse shohim çfarë po bën Putini”. /Ad.Ab./

The post KOPENHAGË – Kallas: Putini po tallet me përpjekjet për paqe në Ukrainë appeared first on Agjencia Telegrafike Shqiptare.

STAMBOLL, 29 gusht /ATSH-DPA/ – Jose Mourinho është shkarkuar nga posti i trajnerit të Fenerbahçes.

Largimi i 62-vjeçarit vjen dy ditë pasi klubi turk nuk arriti të kualifikohej për fazën e ligës së Ligës së Kampionëve pas humbjes ndaj Benficas në raundin e play-off-it.

Ish-trajneri i Real Madridit, Interit, Chelseat, Manchester Unitedit dhe Tottenhamit, Mourinho, u emërua në këtë rol përpara sezonit 2024-25.

Fenerbahçe përfundoi i dyti në Super Ligë sezonin e kaluar, 11 pikë larg rivalëve Galatasaray.

“Jemi ndarë me Jose Mourinhon”, thuhet në një deklaratë të klubit.

“E falënderojmë për përpjekjet e tij për ekipin tonë dhe i urojmë suksese në karrierën e tij të ardhshme”, shtohet në të.

Lajmi vjen një ditë pasi Ole Gunnar Solskjaer, i cili zëvendësoi Mourinhon si trajner i United në vitin 2018, u shkarkua nga rivalët e Fenerbahçes në Super Ligë, Beshiktash./ /Ad.Ab./

The post FUTBOLL – Mourinho shkarkohet nga posti i trajnerit të Fenerbahçes appeared first on Agjencia Telegrafike Shqiptare.

NJU JORK, 29 gusht  /ATSH-DPA/ – Sekretari i përgjithshëm i OKB-së, Antonio Guterres, i bëri thirrje Izraelit të përmbahet nga marrja e qytetit të Gazës, mes frikës për një katastrofë humanitare.

“Civilët në Gaza po përballen me një tjetër përshkallëzim vdekjeprurës”, tha mbrëmë Guterres në një postim në X.

“Shpallja e Izraelit për synimin për të pushtuar qytetin e Gazës sinjalizon një fazë të re dhe të rrezikshme”, shtoi ai.

Sipas tij, qindra mijëra civilë do të detyroheshin të largoheshin përsëri, duke i zhytur familjet në rrezik edhe më të madh.

“Kjo duhet të ndalet. Nuk ka zgjidhje ushtarake për këtë konflikt”, shtoi ai.

Kryeministri izraelit, Benjamin Netanyahu, ka urdhëruar ushtrinë të marrë kontrollin e qytetit të Gazës, ku besohet se jetojnë rreth një milion njerëz.

Guterres tha se “niveli i vdekjeve dhe shkatërrimit në Gaza është i paprecedentë në kohët e fundit”.

“Gaza është mbushur me rrënoja, me trupa, me shembuj të asaj që mund të jenë shkelje serioze të ligjit ndërkombëtar”, theksoi kreu i OKB-së.

“Kemi nevojë për një armëpushim të menjëhershëm dhe të përhershëm”, shtoi ai.//Ad.Ab./

The post NJU JORK – Guterrez: Marrja e Gazës nga Izraeli përshkallëzim vdekjeprurës appeared first on Agjencia Telegrafike Shqiptare.

ROSTOK, 28 gusht /ATSH-DPA/ – Gjermania do të vazhdojë të forcojë ushtrinë e saj për të siguruar aftësinë e NATO-s për t’u mbrojtur, tha sot kancelari Friedrich Merz të gjatë vizitës së tij të parë në marinën gjermane.

“Ne shohim veprime të përditshme nga ushtria ruse. Ato po testojnë gatishmërinë dhe aftësinë tonë për të mbrojtur veten”, tha kancelari në bordin e fregatës antinëndetëse “Bayern” pranë brigjeve veriore të vendit.

“Dhe kjo është arsyeja pse dua të them se ne do të bëjmë gjithçka që është në fuqinë tonë në muajt dhe vitet e ardhshme për të mbrojtur lirinë, paqen dhe integritetin territorial të territorit të aleancës”, tha Merz.

“Mbrojtja e Gjermanisë dhe NATO-s është bërë më e nevojshme që nga fillimi i luftës së Rusisë kundër Ukrainës në shkurt 2022”, theksoi ai.

Merz kishte folur më parë me inspektorin e marinës, Jan Christian Kaack, në komandën detare në portin verior të Rostockut dhe kishte vizituar selinë e re taktike detare, të njohur si “Komandanti i Task Forcës Baltike.

E themeluar në vitin 2024, selia qendrore ka për detyrë planifikimin e operacioneve dhe stërvitjeve detare, si dhe drejtimin e forcave detare të caktuara nga NATO.

Marina gjermane ka rreth 15 300 ushtarë. Pas forcave ajrore dhe ushtrisë, është dega më e vogël e Bundeswehr-it, ushtrisë gjermane./  /Ad.Ab./

The post GJERMANI – Merz: Forcojmë ushtrinë tonë për mbrojtjen e NATO-s nga kërcënimet appeared first on Agjencia Telegrafike Shqiptare.

BERLIN,  28 gusht /ATSH-DPA/ – Ministri i Jashtëm i Gjermanisë, Johann Wadephul, synon të thellojë bashkëpunimin në fushën e sigurisë me Estoninë dhe Danimarkën, në kushtet e veprimeve agresive të Rusisë në rajonin e detit Baltik.

“Siguria e rajonit të Baltikut është edhe siguria jonë në Gjermani”, tha politikani konservator gjatë vizitave të tij të para zyrtare në vendet partnere të BE-së dhe NATO-s, Estoni dhe Danimarkë.

Ai planifikon të takohet me homologun e tij Margus Tsahkna në kryeqytetin estonez, Tallinn, si dhe me presidentin Alar Karis.

Pasdite, janë parashikuar takime në Kopenhagë me ministrin e Jashtëm danez, Lars Lokke Rasmussen, dhe me ministren për Çështjet Evropiane, Marie Bjerre.

Nga Danimarka, Wadephul do të udhëtojë drejt qytetit francez Toulon, ku nesër do të marrë pjesë në këshillin ministror franko-gjerman.

Ai vlerësoi se Estonia dhe shtetet baltike kishin paralajmëruar herët për rreziqet reale dhe se BE-ja dhe NATO-ja sot përfitojnë nga parashikimi dhe ekspertiza e tyre.

“Ne duam ta thellojmë më tej këtë bashkëpunim”, u shpreh Wadephul.

“Forcimi i mbrojtjes së infrastrukturës kritike në Detin e Veriut dhe Baltik është një tjetër prioritet që Danimarka po shtyn përpara gjatë presidencës së saj në Bashkimin Evropian”, tha ai./  /Ad.Ab./

The post BERLIN – Wadenphul : Bashkëpunimin me Estoninë dhe Danimarkën në fushën e sigurisë appeared first on Agjencia Telegrafike Shqiptare.

BRUKSEL, 28 gusht /ATSH-DPA/ – Presidentja e Komisionit Evropian, Ursula von der Leyen njoftoi sot masa të reja ndëshkuese ndaj Rusisë pasi raketat ruse goditën në afërsi të zyrës diplomatike të Bashkimit Evropian në Kiev.

“Së shpejti do të paraqitemi me paketën tonë të 19-të të sanksioneve të ashpra”, u tha von der Leyen gazetarëve në Bruksel.

“Paralelisht, po përparojmë punën mbi asetet e ngrira ruse për të kontribuar në mbrojtjen dhe rindërtimin e Ukrainës”, tha ajo.

Rusia sulmoi Ukrainën me 629 dronë, raketa dhe raketa lundrimi që nga mbrëmja e së mërkurës, duke vrarë të paktën 15 persona, sipas Forcave Ajrore Ukrainase.

Von der Leyen tha se dy raketa kishin goditur brenda 20 sekondave nga njëra-tjetra në një distancë prej 50 metrash nga zyra e BE-së.

”Asnjë anëtar i stafit nuk u lëndua”, shtoi ajo, por kryediplomatja e BE-së Kaja Kallas tha se ndërtesa u dëmtua në sulm.

Puna për një paketë të 19-të sanksionesh kundër Rusisë ishte njoftuar disa javë më parë. Sipas diplomatëve, sulmi i fundit rus tani mund të çojë në përpjekje të intensifikuara dhe masa më të forta.

Ministrat e jashtëm të BE-së do të diskutojnë sanksionet e reja në një takim të planifikuar më parë nesër në Kopenhagë. /Ad.Ab./

The post BRUKSEL – BE sanksione të reja ndaj Rusisë, pas sulmit në Kiev appeared first on Agjencia Telegrafike Shqiptare.

VJENË, 28 gusht /ATSH-DPA/ – Gjermania, Franca dhe Britania e Madhe mund të rikthejnë që sot sanksionet e OKB-së ndaj Iranit, nëse Teherani nuk përpiqet të zgjidhë mosmarrëveshjen mbi programin e tij bërthamor, pavarësisht se ekspertët ndërkombëtarë bërthamorë janë rikthyer në Iran.

Tre vendet evropiane, të njohura si E3 ,mund të aktivizojnë të ashtuquajturin mekanizëm të “snapback” në Këshillin e Sigurimit të OKB-së në Nju Jork.

Ky mekanizëm lejon që sanksionet e vjetra të OKB-së, si embargoja e armëve dhe masat ndëshkuese ndaj individëve dhe organizatave iraniane, të hyjnë sërish në fuqi.

Më herët, kreu i Agjencisë Ndërkombëtare për Energjinë Bërthamore (IAEA), Rafael Grossi, tha se inspektorët ndërkombëtarë bërthamorë janë rikthyer në Iran pas një mungese prej më shumë se shtatë javësh. Inspektorët u larguan nga vendi pas sulmeve të SHBA-së dhe Izraelit në qershor ndaj objekteve bërthamore iraniane.

Një ekip i IAEA-së është dërguar fillimisht në termocentralin bërthamor të Bushehr-it, i cili nuk ishte objektiv i sulmeve izraelite, dhe jo në impiantet e dëmtuara të pasurimit të uraniumit në Natanz dhe Fordo, sipas informacioneve të siguruara nga dpa.

Agjencia shtetërore iraniane e lajmeve IRNA raportoi se një ekip inspektorësh të IAEA-së ka nisur mbikëqyrjen e ndërrimit të karburantit në centralin e Bushehr-it.

IRNA citoi zëvendësministrin e Jashtëm, Kazem Gharibabadi, të ketë thënë se mbikëqyrja e këtij objekti nga agjencia, i cili operohet së bashku me Rusinë, ishte koordinuar paraprakisht me autoritetet lokale dhe Moskën./   /Ad.Ab./

The post VJENË – E3 kërcënon Iranin me rikthim sanksionesh appeared first on Agjencia Telegrafike Shqiptare.

PEKIN, 28 gusht /ATSH-DPA/ –  Udhëheqësi i Koresë së Veriut, Kim Jong Un, do të udhëtojë në Pekin në shtator për një paradë ushtarake, në një nga udhëtimet e tij të rralla jashtë vendit, njoftoi sot qeveria kineze.

Presidenti rus, Vladimir Putin, do të marrë gjithashtu pjesë në paradën ushtarake në Pekin më 3 shtator, e cila shënon kapitullimin zyrtar të Japonisë ndaj forcave aleate në vitin 1945 dhe konsiderohet fundi i Luftës së Dytë Botërore në Kinë.

“Kina dhe Koreja e Veriut janë fqinjë miqësorë dhe Pekini e mirëpret ngrohtësisht Kimin”, tha zëvendësministri i Jashtëm, Hong Lei.

Ai theksoi se Pekini dhe Pheniani luftuan së bashku gjatë Luftës së Dytë Botërore, duke shtuar se Kina është e gatshme të forcojë bashkëpunimin me Korenë e Veriut dhe të promovojë paqen në rajon.

Kim rrallëherë udhëton jashtë vendit. Që nga pandemia e koronavirusit, ai ka lënë vendin vetëm një here, në shtator 2023 për një samit me Putinin, që u zhvillua në Lindjen e Largët, rreth 100 kilometra nga kufiri me Kinën.

Vizita e fundit e Kim në Kinë ishte në janar 2019, kur ai u takua me presidentin Xi Jinping në Sallën e Madhe të Popullit në Pekin.

Në total, Pekini pret 26 liderë të huaj që të marrin pjesë në përkujtimet.

Sipas burimeve kineze, nga Evropa pritet të udhëtojnë presidenti serb Aleksandar Vuçiç dhe kryeministri sllovak Robert Fico./   /Ad.Ab./

The post KINË – Kim dhe Putin në Pekin për një paradë ushtarake appeared first on Agjencia Telegrafike Shqiptare.

UASHINGTON, 28 gusht /ATSH-DPA/ – Qeveria e SHBA-së planifikon të reduktojë periudhën e vlefshmërisë së vizave për studentët dhe gazetarët.

”Vizat e tipit F, që lejon studentët e huaj të qëndrojnë në Shtetet e Bashkuara, tani do të jenë të vlefshme për maksimumi katër vjet”, njoftoi Departamenti i Sigurisë Kombëtare të SHBA-së.

Aktualisht, studentët marrin vizë për kohëzgjatjen e programit të tyre akademik, që mund të zgjasë deri në pesë vjet në rastin e doktoraturës.

Propozimi i administratës së presidentit Donald Trump përfshin gjithashtu kufizimin e vlefshmërisë së vizave për profesionistët e mediave deri në 240 ditë.

Sipas raportimeve, vizat për gazetarët mund të zgjaten deri në 240 ditë, por nuk duhet të jenë të vlefshme më gjatë sesa koha e detyrës gazetareske.

Zgjatjet do të kërkojnë aplikim pranë Shërbimit të Shtetësisë dhe Emigracionit të SHBA-së (USCIS), duke përfshirë kontrolle më të thelluara.

Kohët e fundit, për shembull, gazetarëve nga Gjermania u ishin lëshuar viza me vlefshmëri deri në pesë vjet.

”Për shumë kohë, administratat e mëparshme kanë lejuar që studentët e huaj dhe mbajtës të tjerë vizash të qëndrojnë praktikisht pa kufij në SHBA, duke rrezikuar sigurinë, duke shpenzuar fonde të konsiderueshme të taksapaguesve dhe duke u sjellë në disavantazh qytetarëve amerikanë”, tha Departamenti i Sigurisë Kombëtare.

Rregulli i synuar ka për qëllim të parandalojë abuzimin dhe të mundësojë autoriteteve të monitorojnë më mirë mbajtësit e vizave./  /Ad.Ab./

The post UASHINGTON – SHBA kufizon kohëzgjatjen e vizave për studentët dhe gazetarët appeared first on Agjencia Telegrafike Shqiptare.

KIEV, 28 gusht  /ATSH-DPA/ – Godina e delegacionit të Bashkimit Evropian në Kiev u dëmtua gjatë sulmeve ajrore të natës nga Rusia mbi kryeqytetin ukrainas.

Ministri i Jashtëm i Ukrainës, Andrii Sybiha, akuzoi sot Rusinë në platformën X t për  sulm të qëllimshëm të diplomatëve.

Ai tha se kjo përbën shkelje të Konventës së Vjenës dhe bëri thirrje për dënim ndërkombëtar të sulmit.

“Shprehim solidaritet me kolegët tanë të BE-së dhe jemi gati të ofrojmë ndihmë”,  tha Sybiha, i cili publikoi edhe foto të dëmeve në hapësirat e zyrave.

“Dënoj fuqishëm këto sulme brutale, një shenjë e qartë se Rusia refuzon paqen dhe zgjedh terrorin”, shkroi në X komisionerja e BE-së për Zgjerimin, Marta Kos.

Sipas presidentit ukrainas, Volodymyr Zelensky, të paktën tetë persona u vranë dhe dhjetëra të tjerë u plagosën në sulmet ajrore në Kiev.

Gazeta ”Kyiv Independent” raportoi se numri i viktimave ka arritur të paktën në 10.

Ushtria ruse përdori jo vetëm dronë, por edhe raketa balistike.

Ukraina, e cila synon të anëtarësohet në BE, po mbron veten nga pushtimi i plotë rus prej më shumë se tre vitesh e gjysmë. /Ad.Ab./

The post KIEV – Godina e delegacionit të BE-së dëmtohet nga sulmet ruse appeared first on Agjencia Telegrafike Shqiptare.

VENECIA, 27 gusht /ATSH/ – Festivali i 82-të Ndërkombëtar i Filmit në Venecia hapet sot nën prezantimin e Emanuela Fanellit, dy herë fituese e çmimit ”Davide di Donatello”, sipas tg24.sky.it.

Një nga titujt më të pritur të këtij viti, i pari nga pesë filmat në garë, “La Grazia” nga Paolo Sorrentino, do të debutojë sot në ”Sala Sardena”, ku luajnë aktorët Toni Servillo, Anna Ferzetti, Orlando Cinque, Massimo Venturiello, Milvia Marigliano, Giuseppe Gaiani, Linda Messerklinger, Vasco Mirandola

Regjisori gjerman, Werner Herzog do të jetë gjithashtu një figurë kyçe, duke marrë çmimin  e parë nga dy “Luanët e Artë” të vitit 2025 për Arritje Gjithëpërfshirëse (tjetri do t’i shkojë  aktores Kim Novak) dhe do të prezantojë dokumentarin e tij të fundit ”Ghost Elephants”, jashtë garës në Festivalin e Filmit në Venecia.

Një tjetër mjeshtër i kinemasë, Francis Ford Coppola, do të mbajë fjalimin mirënjohës për regjizorin Hercog.

Francis Ford Coppola, në mënyrë të papritur, u shfaq në ”Sala Sardena” para fillimit të eventit për të ndjekur versionin e restauruar, premierën botërore, të filmit ”Queen Kelly” (1929) të legjendarit Erich von Stroheim.

Atë e përshëndeti presidenti i Bienales së Venecias, Pietrangelo Buttafuoco, i cili kërkoi një duartrokitje për të.

Salla e mbushur plot u ngrit në këmbë për të nderuar regjisorin e madh të ”The GodFather” dhe ”Apocalypse Now” dhe duke e duartrokitur gjatë atë.

I ulur pranë Coppolës ishte regjisori Alexander Payne, edhe ai i pritur me shumë duartrokitje.

Ovacione pati gjithashtu për Alberto Barbera, drejtori i Festivalit të Filmit, i cili më pas prezantoi filmin.

Para se të largohej, Buttafuoco kujtoi se bienalja është ”një katedër e kulturës në botë dhe ne jemi të vetëdijshëm për këtë”./  /Ad.Ab./

The post KINEMA – Hap siparin Festivali i 82-të i Filmit në Venecia appeared first on Agjencia Telegrafike Shqiptare.