TIRANË– Juristi Rezart Kthupi, i ftuar në emisionin “Ora e Fundit” në ABC News, u shpreh se Partia Demokratike nuk mund të dalë nga gjendja aktuale ku ndodhet nëse nuk ndryshon lidershipin e saj.

Ai theksoi se PD  nuk mund të fitojë asnjë betejë politike pa një ndryshim rrënjësor në mënyrën si udhëhiqet dhe përfaqësohet, duke paralajmëruar se, nëse kjo nuk ndodh, PD do të mbetet e izoluar në një spirale humbjesh dhe krizash të vazhdueshme.

“Forma më e lartë e absurdit. Është një qerthull që PD ka hyrë prej shumë kohësh. Për të dalë nga kjo, ka një kusht të vetëm: të ndryshohet lidershipi i PD. Mënyra për të hyrë në një betejë politike dhe për të fituar, duhet të ndryshojë lidershipin e saj. Nuk mund të ndryshosh strategji pa ndryshuar njerëzit. Është në një spirale, që PD nuk mund të dalë dot. PD, peng i Berishës”, u shpreh Kthupi.

TIRANË- Pas mbylljes se hetimeve, SPAK dërgon ne gjykate si te pandehur Ilir Metën, Monika Kryemadhin dhe 3 persona të tjerë.Ish-presidenti dhe ish-bashkëshortja e tij akuzohen për korrupsion, pastrim parash e fshehje te ardhurash.

SPAK thotë se ata përdorën pushtetin për të favorizuar biznese, në këmbim të shpërblimeve. Avokati i njohur, Romeo Kara, i ftuar në “Ora e Fundit” u shpreh se, Prokuroria e Posaçme është kujdesur që akuzat e ngritura ndaj Metës të aprovohen edhe nga Gjykata, pasi siç thotë ai provat janë kokëforta dhe provojnë veprimtarinë e jashtëligjshme të Metës.

“Tani fillon procesi i gjykimit paraprak dhe palët në këtë gjykim do të shikojnë ligjshmërinë e akteve. Kjo procedurë mund të zgjasë më gjatë se në gjykime të thjeshta, besoj mund të shkojë deri në tre apo katër muaj. SPAK është matur shumë gjatë në këtë proces, mbase nga frika që mos t’i bjerë dhe ndonjë akuzë dhe është munduar t’i justifikojë të gjitha faktet që ka në akuzë”,  tha ai.

Ai theksoi se ish-kreu i shtetit, Ilir Meta rrezikon një dënim  deri në 15 vjet burg. Më tej ai theksoi se drejtësia duhet t’u konfiskojë të gjitha pasuritë dhe përmes kësaj të japë një shembull për të gjitha funksionarët shtetërore.

“Metën e shoh, nëse jo gjykim të shkurtuar, 12 -15, por dhe më shumë vite. Me gjykim të shkurtuar e shoh nga 8-12 vite burg. Në akuzat për korrupsion, Meta ka ortakë.  Mendoj se këtyre duhet t’u konfiskohen të gjitha pasurie. E para se është e merituar. Ne në këtë gjendjet që kemi, në zhbërjen totale të morale, sidomos atij politikë, duhet të japim shembull për ndëshkim të merituar”, u shpreh ai./abcnews.al

Ministri i Jashtëm belg shprehu keqardhje për vendimin e SHBA-së për të revokuar vizat për përfaqësuesit palestinezë përpara Asamblesë së Përgjithshme të OKB-së, duke e etiketuar këtë veprim si “goditje ndaj diplomacisë”

“Në një moment kur ka një vrull të ripërtërirë drejt një zgjidhjeje me dy shtete… pengimi i zërit palestinez nuk është vetëm i padrejtë, por është edhe kundërproduktiv”, tha Maxime Prevot në platformën sociale të kompanisë amerikane X.

Ai theksoi se OKB-ja duhet të mbetet një vend ku të gjithë popujt mund të dëgjohen, “veçanërisht ata, e ardhmja e të cilëve varet nga dialogu”.

“Përjashtimi i përfaqësuesve palestinezë minon vetë parimet e multilateralizmit dhe të drejtës ndërkombëtare”, tha Prevot, duke shtuar se rruga drejt paqes kërkon “më shumë dialog, jo më pak”.

Vendimi i SHBA-së për të mohuar dhe revokuar vizat për zyrtarët palestinezë dhe për t’i ndaluar ata të marrin pjesë në Asamblenë e Përgjithshme të OKB-së muajin e ardhshëm në New York vjen në një kohë kur disa vende perëndimore përgatiten të njohin një shtet palestinez.

“Në përputhje me ligjin amerikan, Sekretari i Shtetit Marco Rubio po mohon dhe revokon vizat për anëtarët e Organizatës për Çlirimin e Palestinës (PLO) dhe Autoritetit Palestinez (PA) përpara Asamblesë së Përgjithshme të Kombeve të Bashkuara që do të mbahet së shpejti”, tha Departamenti i Shtetit në një deklaratë të premten.

Presidenti kinez, Xi Jinping, do të shoqërohet nga disa prej liderëve të shteteve më të sanksionuara të botës në paradën ushtarake të paralajmëruar për javën tjetër në Kinë. E pos liderëve të Rusisë, Koresë së Veriut, Iranit dhe Birmanisë aty do të jetë edhe presidenti i Serbisë, Aleksandar Vuçiç, shkruajnë mediat e huaja.

Kjo paradë për “Ditën e Fitores” më 3 shtator, shënohet në kujtim të fundit të Luftës së Dytë Botërore. Do të jetë hera e parë që presidenti rus Vladimir Putin dhe ai i Koresë së Veriut, Kim Jong-Un, do të shihen bashkë përkrah Xi Jinping.

Analistët kanë vlerësuar se qëllimi i paradës është që të demonstrojë ndikimin e presidentit kinez në përpjekjen për ndryshim të rendit botëror, të udhëhequr prej Perëndimit.

“Xi Jinping po përpiqet të tregojë se është i fuqishëm, se ka pushtet dhe është i pranueshëm në Kinë”, ka thënë Alfred Wu, profesor në Universitetin Kombëtar të Singaporit. “Kur Xi ishte lider rajonal, ai e pa Putinin dhe pa një lider nga i cili mund të mësojë – dhe tani ai është lider botëror. Me Kimin në krah, po ashtu, Xi do të shfaqet po ashtu si lider botëror”.

Sipas analistëve, ky koalicion i shteteve bazohet në dëshirën për të prishur rendin botëror të udhëhequr nga Perëndimi dhe ka bërë përpjekje që t’i minojë interesat e Shteteve të Bashkuara të Amerikës, e sidomos për shkak të Tajvanit. Këto shtete janë munduar t’i ndihmojnë njëra-tjetrës kur po përballen me valët më të rënda të sanksioneve.

I vetmi lider nga shtetet perëndimore do të jetë Robert Fico, kryeministër i Sllovakisë së Bashkimit Evropian. Fico ka qenë kundër vendosjes së sanksioneve ndaj Rusisë dhe ka vizituar Moskën pavarësisht nisjes së luftës ndaj Ukrainës.

Ndërsa Vuçiç po ashtu vizitoi Moskën në maj dhe ruan raportet e mira me Rusinë e Kinën edhe pse thotë se Serbia pretendon t’i bashkohet BE-së.

Read More...

WASHINGTON- Presidenti i  SHBA, Donald Trump, i ka thënë kryetarit të Dhomës së Përfaqësuesve, Mike Johnson, se nuk do t’i shpenzojë 4.9 miliardë dollarët që Kongresi i ka miratuar për ndihmë të jashtme, duke e shkurtuar në mënyrë efektive buxhetin pa kaluar nëpër degët legjislative.

Trump, i cili i dërgoi një letër Johnsonit të enjten, e ka përdorur me këtë rast atë që njihet si “shfuqizim i fshehtë” — kur një president i dërgon Kongresit një kërkesë për të mos shpenzuar fondet e miratuara drejt fundit të vitit fiskal, në mënyrë që Kongresi të mos ketë kohë të veprojë brenda afatit prej 45 ditësh dhe paratë të mbesin të pashpenzuara.

Ky është rasti i parë në gati 50 vjet që një president përdor një masë të tillë. Viti fiskal përfundon në fund të shtatorit, raportojnë mediat amerikane.

Letra u publikua të premten në llogarinë në X të Zyrës së Menaxhimit dhe Buxhetit të Shtëpisë së Bardhë. Aty thuhet se financimi do të shkurtohet nga Departamenti i Shtetit dhe Agjencia Amerikane për Zhvillim Ndërkombëtar (USAID). Kjo ka qenë një prej kërkesave të para të Trump qëkur mori postin si president sivjet.

Vendimi përputhet me politikat që Trump po i ndjek duke dobësuar agjencitë dhe fuqinë e Kongresit.

Sekretari i Shtetit, Marco Rubio, të premten ka shkruar në X se USAID është në proces mbylljeje dhe ka përgëzuar drejtorin e buxhetit të Shtëpisë së Bardhë, Russ Vought, për menaxhimin e procesit.

Ligji i Kontrollit të Mospërdorimit të fondeve i vitit 1974 i jep presidentit autoritetin për të propozuar anulimin e fondeve të miratuara nga Kongresi. Kongresi mund të votojë brenda 45 ditësh për t’i tërhequr fondet ose për t’i ruajtur ato, por duke propozuar shfuqizimin aq afër datës 30 shtator, Shtëpia e Bardhë është siguruar se paratë nuk do të shpenzohen dhe financimi do të skadojë.

Rasti i fundit që një manovër e tillë pati ndodhur ishte në vitin 1977 nga presidenti demokrat i atëhershëm, Jimmy Carter.

Lëvizja e Trump nxiti menjëherë kundërshtime në disa pjesë të Senatit lidhur me ligjshmërinë e saj. Senatorja Susan Collins ka thënë se Kushtetuta “e bën të qartë se Kongresi ka përgjegjësinë për fuqinë e buxhetit” dhe çdo përpjekje për të tërhequr fondet “pa miratimin e Kongresit është shkelje e qartë e ligjit”.

Udhëheqësi i demokratëve në Senat, Chuck Schumer, ka thënë se manovra e Trump mund të minojë procesin normal të financimit.

Fondet në paketën e ndaluar prej Trump përfshijnë 3.2 miliardë dollarë për grante të ndihmës për zhvillim, 520 milionë dollarë për Kombet e Bashkuara, 838 milionë dollarë për operacione ndërkombëtare të ruajtjes së paqes dhe 322 milionë dollarë për të nxitur vlerat demokratike në vende të tjera.

Trump më parë kishte kërkuar mbështetjen e Kongresit për shfuqizime dhe pati sukses në korrik kur Dhoma dhe Senati miratuan shkurtime prej 9 miliardë dollarësh. Ato shfuqizime prekën financimin për transmetuesit publikë dhe ndihmat e jashtme.

Administrata e Trump ka bërë shkurtime të thella në ndihmat e jashtme si një nga politikat kryesore. Në shkurt, administrata pati thënë se do të eliminojë pothuajse të gjitha kontratat e ndihmës së jashtme të USAID-it dhe 60 miliardë dollarë ndihmë të përgjithshme jashtë vendit. Që atëherë, USAID është shpërbërë dhe programet e mbetura janë vendosur nën kontrollin e Departamentit të Shtetit.

Read More...

Më shumë se 60 migrantë dhe azilkërkues janë dëbuar nga SHBA-ja drejt Rusisë. Ky është një nga grupet më të mëdha të shtetasve rusë që janë dëbuar ilegalisht nga SHBA, të cilët janë dërguar në Rusi përmes Kajros.

Një dëbim tjetër i madh ndodhi në muajin qershor, kur SHBA dërgoi rreth 40 persona të tjerë në Rusi.

Numri i fluturimeve për deportimin e emigrantëve nga Shtetet e Bashkuara ka arritur një nivel rekord këtë vit. Sipas të dhënave të publikuara,  gjatë muajit korrik janë regjistruar 1214 fluturime deportimi, shifra më e lartë që nga viti 2020, kur filloi monitorimi i tillë.

Shtetet e Bashkuara kanë ndaluar zyrtarët palestinezë të marrin pjesë në Asamblenë e Përgjithshme të Kombeve të Bashkuara (UNGA) muajin e ardhshëm në New York, një veprim që vjen ndërsa disa vende perëndimore po përgatiten të njohin shtetin palestinez.

“Sipas ligjit amerikan, Sekretari i Shtetit Marco Rubio po refuzon dhe po revokon vizat për anëtarët e Organizatës për Çlirimin e Palestinës (PLO) dhe Autoritetit Palestinez (AP) para Asamblesë së Përgjithshme të Kombeve të Bashkuara që po afrohet”, tha Departamenti i Shtetit në një deklaratë.

Ky veprim vjen ndërsa Franca, Britania, Kanadaja dhe Australia kanë shpallur planet për të njohur një shtet palestinez në Asamblenë e Përgjithshme të ardhshme të OKB-së, duke iu bashkuar mbi 140 vendeve që tashmë e kanë bërë këtë.

TIRANË– Përplasja e radhës mes Trump dhe George Soros i ka dhënë një mundësi Sali Berishës për të kërkuar heqjen e non gratës që sipas tij e ka dhuratë të pakërkuar nga miliarderi 95 vjeçar amerikan.

Por në historinë e gjatë të tranzicionit ku Sali Berisha është aktor kryesor, ai ka një raport të dyfishtë me George Soros, të karakterizuar jo vetëm nga fërkimet, por edhe nga stina të gjata dashurie.

Analisti Roland Lami, i cili ishte i ftuar në “Tirana Live” u shpreh se është vështirë të gjesh parime politike të drejta te figura e ish-kryeministrit të Shqipërisë, Sali Berisha.

Sipas tij, Berisha nuk i manifeston këto parime dhe në këto rrethana veprimtaria e tij varet nga interesat e momentit. Më tej Lami theksoi kryetari i PD-së po tenton të shpikë armiq për të fituar vëmendje.

“Është e vështirë të gjesh parime të Berisha, ai e ndërton ligjërimin në formatin e agjendës dhe interesave që i shkon për shtat atij. Po shpik armiq për vëmendje, sepse s’ka parime. Berisha po aktron si populist i djathtë”, tha ai.

Më tej, Lami theksoi se Partia Demokratike nuk mund të rigjenerohet për sa kohë në krye të saj qëndron Sali Berisha.

“Rigjenerimi i PD derën e ka të mbyllur. Askush nuk do mund t’i ngrejë krye Sali Berishës”, tha ai.

Ai analizoi dhe përbërjen e Parlamentit dhe thotë se puna e mazhorancës do vijojë e qetë pasi opozita nuk ka asnjë shans ligjor, që t’i bëjë ballë në Kuvend pasi vetë numrat e konfiguruar nga zgjedhjet e 11 majit e kanë “vulosur” fatin e sesionit të ri parlamentar.

“Një opozitë me 50 numra, ku përballë ka një mazhorancë me një shumicë, nuk e pengon aspak punën e qeverisë. Do jemi në një “Déjà vu” të legjislaturës së kaluar. Do dalin në dukje më shumë elementët agresivë.”, tha ai./abcnews.al

VLORË- Më 30 gusht 2025, duke filluar nga ora 12:00, jashtë gjirit të Vlorës priten kushte të përkeqësuara hidrometeorologjike me erë 15 m/s dhe dallgë me lartësi 1.0 – 1.5 metra.

Autoritetet detare njoftojnë se do ndalohen nisjet e mjeteve të vogla lundruese dhe të peshkimit drejt detit të hapur. duke nisur nga ora 10:00 e paradites.

Anijet e transportit ndërkombëtar do të operojnë normalisht. Përmirësimi i motit pritet pas orës 08:00 të datës 31 gusht 2025.

Njoftimi i plotë:

Njoftim për kushtet hidrometeorologjike detare datë 30.08.2025

Në bazë të parashikimit për situatën hidrometeorologjike të përkeqësuar jashtë gjirit të Vlorës, gjatë datës 30.08.2025 duke filluar nga ora 12:00 datë 30.08.2025, kushtet hidrometeorologjike do të jenë në drejtimin JUG-JUG-LINDJE në forcën deri 5-6bft me shpejtësi ere deri 10-15m/s dhe lartësi dallge nga 1.00 deri 1.50 metra, kërkojmë :

1.Është ndaluar pajisja me leje-nisje e mjeteve të vogla lundruese dhe ato të peshkimit të cilat duan të operojnë jashtë gjirit të Vlorës në det të hapur duke filluar nga ora 10:00 datë 30.08.2025.

2.Të gjithë drejtuesit e mjeteve të vogla lundruese dhe anijeve të peshkimit që operojnë brenda gjirit të Vlorës dhe Himarës të marrin në konsideratë kushtet hidrometeorologjike dhe marrjen e masave për sigurimin e tyre.

3.Me qëllim parandalimin e çdo situate të papritur për shkak të kushteve atmosferike, kërkojmë bashkëpunimin e të gjithë subjekteve dhe institucioneve që ushtrojnë veprimtari në fushën e detarisë, për të marrë të gjitha masat e nevojshme për sigurimin e mjeteve në port dhe rritje e gatishmërisë së ekuipazhit në mjetet lundruese.

4.Anijet e transportit ndërkombëtar detar do të vazhdojnë të operojnë normalisht sipas destinacioneve përkatëse.

5.Përmirësimi i situatës hidrometeorologjike të përkeqësuar për mjetet e vogla lundruese dhe të peshkimit do të jetë mbas orës 08:00 të datës 31.08.2025.

Google përballet me një shkelje të të dhënave dhe ishte vetë gjiganti i teknologjisë që njoftoi lajmin duke përshkruar një sulm sigurie që rezultoi në akses dhe zbulim të paautorizuar të të dhënave personale të përdoruesve, shkruajnë mediat e huaja.

”Gjiganti i teknologjisë me seli në Mountain View paralajmëroi gjithashtu së fundmi për një tjetër mashtrim të ri, në të cilin individë keqdashës imitojnë mbështetjen e IT-së së Google për të hakuar llogaritë e përdoruesve dhe për të aksesuar informacionin personal ose financiar”, sipas Columbus Dispatch.

Për këtë arsye, kompania me seli në Kaliforni ka këshilluar 2,5 miliardë përdoruesit e saj të Gmail të përditësojnë fjalëkalimet e tyre dhe të forcojnë sigurinë e tyre.

Si të mbroheni?

Siç raportohet nga blogu i sigurisë kibernetike Malwarebytes Labs, mashtruesit zakonisht u dërgojnë një email përdoruesve duke i informuar ata se “llogaria e tyre nuk është e sigurt” dhe duke i nxitur ata të rivendosin fjalëkalimin e tyre.

Pasi të futin kredencialet e tyre të hyrjes duke përdorur lidhjen mashtruese, viktimat pa e ditur u japin hakerëve qasje në llogarinë e tyre.

Pra, si mund ta mbroni veten? Google ka deklaruar se Gmail nuk dërgon kurrë mesazhe ose email-e që kërkojnë fjalëkalimet e përdoruesve ose informacione të tjera personale. Kompania e madhe e teknologjisë ka përpiluar gjithashtu një listë këshillash për të shmangur mashtrimet e phishing:

• Raportoni email-et e phishing te Ndihma e Google
• Edhe pse Google lëshon paralajmërime për phishing nëse zbulon email-e të dyshimta, ai nuk dërgon kurrë email-e të padëshiruara që kërkojnë informacione personale
• Mos u përgjigjeni kërkesave për informacione private përmes email-it, mesazhit me tekst ose telefonatës
• Mos e futni fjalëkalimin tuaj pasi të klikoni një lidhje në një mesazh. Email-et e Google nuk kërkojnë kurrë fjalëkalimin e llogarisë suaj
• Kini kujdes me mesazhet që duken urgjente
• Mos klikoni kurrë në lidhje nga burime të panjohura ose të pabesueshme.

Presidenti francez Emmanuel Macron përshëndeti rikthimin e marrëdhënieve të ngushta mes Parisit dhe Berlinit, teksa priti kancelarin gjerman Friedrich Merz në rezidencën e tij verore, përpara bisedimeve të nivelit të lartë mes ministrave të të dyja shteteve.

Pas viteve me marrëdhënie të tensionuara me paraardhësin e Merzit, Olaf Scholz, lideri francez tha se rifillimi i suksesshëm i bashkëpunimit mund të shërbejë si një forcë shtytëse për forcimin e Evropës.

Pas ndryshimit të qeverisë në Berlin më herët këtë vit, të dy udhëheqësit kanë “hapur një kapitull të ri në marrëdhëniet franko-gjermane”, tha Macron, pasi mirëpriti homologun e tij gjerman në Fort de Bregançon, në Cote d’Azur.

“Besoj se tandemi franko-gjerman tani është plotësisht i koordinuar për të krijuar një Evropë më të fortë në fushën e ekonomisë, tregtisë dhe monedhës”, deklaroi ai.

Merz gjithashtu theksoi rëndësinë e “boshtit” të lidhjeve mes dy vendeve, duke thënë se “Gjermania dhe Franca luajnë një rol qendror në këtë Bashkim Evropian, në këtë kontinent evropian”.

Ai nënvizoi gjithashtu rolin vendimtar të unitetit midis të 27 vendeve anëtare të BE-së. Nëse arrihet ky unitet, “atëherë jemi vërtet të fortë dhe Evropa bëhet një faktor në botë”, tha Merz.

“Zhvillimet në botë tregojnë sa e rëndësishme është për ne të bëhemi një faktor i fuqishëm në botë — ekonomikisht, politikisht dhe gjithashtu në aspektin e sigurisë,” shtoi ai.

Macron theksoi se marrëdhënia do të jetë kyçe për të ndërtuar “një Evropë që përcakton pozicionin e saj gjeopolitik në konfliktin në Ukrainë përballë agresionit rus dhe një Evropë që ka vendosur të riarmatoset për të siguruar mbrojtjen e saj”.

Marrëdhënia mes Macron dhe Merz shihet ndjeshëm më e mirë se ajo me paraardhësin Olaf Scholz.

Njëzet e gjashtë shtete anëtare të Bashkimit Evropian (BE), përveç Hungarisë, dënuan sulmet e fundit ruse ndaj Kievit dhe u zotuan të përshpejtojnë punën për pakon e 19-të të sanksioneve kundër Moskës.

“Shprehim ngushëllimet tona, solidarizohemi me të gjithë ukrainasit dhe dënojmë fuqimisht sulmet e vazhdueshme të Rusisë ndaj civilëve dhe infrastrukturës civile, të cilat janë përshkallëzim i qëllimshëm dhe minojnë përpjekjet drejt paqes”, thuhet në një deklaratë të lëshuar nga shefja e politikës së jashtme të BE-së, Kaja Kallas, e mbështetur nga 26 shtetet anëtare, përveç Hungarisë.

Duke kujtuar ndërtesën e dëmtuar të Delegacionit të BE-së, deklarata vuri në dukje se rrezikimi i jetës së diplomatëve dhe personelit diplomatik është “shkelje e qartë” e Konventës së Vjenës për Marrëdhëniet Diplomatike.

“Sulmet e qëllimshme kundër civilëve dhe objektivave jo-ushtarake janë krime lufte. Të gjithë komandantët, autorët dhe bashkëpunëtorët e këtyre shkeljeve të rënda të së drejtës ndërkombëtare humanitare do të mbahen përgjegjës”, shtoi deklarata.

Në deklaratë thuhet se sulme të tilla “vetëm përforcojnë” vendosmërinë e bllokut për të mbështetur Ukrainën.

“BE-ja do të vazhdojë dhe do të rrisë mbështetjen e saj gjithëpërfshirëse për Ukrainën në të gjitha aspektet, përfshirë përshpejtimin e punës për pakon e 19-të të sanksioneve”, nënvizoi më tej deklarata.

Deklarata i kërkon Rusisë të “ndalojë vrasjet” dhe të tregojë “gatishmëri të sinqertë” për paqe. Ukraina njoftoi të enjten se të paktën 21 persona u vranë në një sulm masiv rus ndaj Kievit gjatë natës. Këshilli Britanik dhe misioni i BE-së në Kiev thanë se ndërtesat e tyre u goditën dhe u dëmtuan në sulm.

TIRANË- Kryetari i Partisë Demokratike, Sali Berisha, shpreson që një vendim i administratës se Trump për George Soros e rrëzon “non grata-n” e tij. Doktori  duket i gëzuar, por një verifikim faktesh tregon se ai vazhdon të jetë person në listën e zezë të Departamentit të Shtetit, ndërsa Soros nuk është shpallur “non grata”.

Gazetari i ABC News, Andon Kello, i ftuar në “Ora e Fundit” tha se Departamenti Amerikan i Shtetit vijon ta ketë Sali Berishën dhe familjen e tij në listën e personave non grata.

“DASH ende sot e kësaj dite e ka në fuqi “non grata”. E ka ende zyrtare në faqen e tij, prej 17 majit të vitit 2021. Nuk ka asnjë shenjë nga SHBA për heqjen e saj”, tha ai.

Ai theksoi se aktualisht PD ka dy kontrata në Shtetet e Bashkuara të Amerikës, që lidhen njëra për lobimin për heqjen e njollës non grata dhe tjetra për këshillimin nga Chris Lacivita për zgjedhjet e 11 majit.

“PD me dy kontrata në SHBA, ajo e lobimit për heqjen e non gratës dhe me Chris LaCivita . Nga sot, PD ka afat 60 ditë për të dorëzuar faturat e shpenzimet në KQZ. Kontrata me LaCivita është zotuar nga vetë Berisha se do bëhet publike. Është një kontratë, e cila zgjat deri në mars të 2027. “, tha ai.

Ndërkohë, gazetari  Fatos Mahmutaj thotë se Sali Berishës nuk do t’i hiqet asnjëherë njolla e Shteteve të Bashkuara të Amerikës, e cila e ka rreshtuar atë dhe familjen e tij në mesin e personave të padëshirueshëm për Amerikën.

Sipas tij, Berisha është një personazh, i cili është zhytur në krime dhe për këto duhet të mbajë përgjegjësi para drejtësisë.

“ Berisha është totalisht i parashikueshëm në veprimet e tij. Mendonte se pas rikthimit të Trump, ky i fundit do t’ia hiqte non gratën. Është delirant dhe ai mendon se gjithçka vërtitet rreth tij. Non grata nuk do t’i hiqet sa të jetë gjallë as atij dhe as familjes së tij. E ka të kotë me këtë mënyrë duke goditur Sorosin. Berisha ka porositur vrasje, ka bërë vrasje, ka vjedhur paratë e shqiptarëve. E kemi më zë e figurë, që ka porositur krimin ndaj Haklajve Është shkaktuari i zhdukjes së 14 burrave të familjes Haklaj, është akuzuar nga familja Haklaj dhe Berisha asnjëherë nuk është prononcuar për këto. Familja Berisha është e zhytur në krim”, tha ai./abcnews.al

Industria e mbrojtjes e Turqisë, e cila është një burim krenarie, po shkruan histori, u shpreh presidenti turk Recep Tayyip Erdogan në eventin e madh turk të teknologjisë, edicionin detar të festivalit TEKNOFEST, të emëruar si “Atdheu Blu”.

Eventi katërditor, “TEKNOFEST Atdheu Blu”, po mbahet në Komandën e Kantierit Detar të Stambollit.

Ashtu si lufta e vendit për pavarësi u dha shpresë të shtypurve 100 vjet më parë, iniciativat e sotme të industrisë së mbrojtjes po u japin kurajë të shtypurve, tha ai.

“Kudo që ka një vëlla ose motër që vuan nga vështirësitë, nga Palestina në Siri, nga Jemeni në Somali, nga Sudani në Libi, ata krenohen me arritjet e Turqisë”, vuri në dukje ai.

Në një kohë shumë të shkurtër, Turqia ka arritur një nivel që bota e ka zili, nënvizoi ai.

Erdogan tha se Turqia po forcon industrinë e saj të mbrojtjes, ndërsa po punon gjithashtu për të rritur interesin e brezit të ri për teknologjinë, digjitalizimin dhe inovacionin.

Vizitorët do të jenë në gjendje të shohin se sa larg ka përparuar teknologjia detare turke, shtoi ai.

Read More...

Kryeqyteti i Shqipërisë, Tirana, ashtu sikurse e gjithë pjesa tjetër e Shqipërisë ishte i izoluar nga bota për dekada të tëra nën sundimin komunist, shkruan faqja e internetit lonelyplanet.com në një shkrim të gazetares Laura Millar.

Turizmi sapo ka filluar të evoluojë në qytetin, që tani është gjithnjë e më kozmopolit gjatë dekadave të fundit ku vizitorët për herë të parë kanë mundësi të përjetojnë disa përvoja kulturore interesante.

Shumë nga ato që mund të shihni dhe të bëni në Tiranë sillen rreth historisë së saj, si të lashtë ashtu edhe të kohëve të fundit, me disa monumente mbresëlënëse dhe art e arkitekturë avangardë, shumica e të cilave lidhen me ish-udhëheqësin e Shqipërisë, Enver Hoxha.

Shtrohet pyetja çfarë mund të shohim në Tiranë?

Ja 20 nga pamjet dhe përvojat më interesante në dhe përreth Tiranës.

1. Xhamia e Namazgjasë në stilin osman

Me një sipërfaqe mbresëlënëse prej 10 000 metrash katrorë kjo xhami është më e madhja në Ballkan. Ajo u frymëzua nga arkitektura klasike osmane dhe të kujton Xhaminë Blu të Stambollit.

Katër minaret arrijnë deri në 50 metra dhe kupola qendrore ngrihet në 30 metra lartësi. Pas rënies së komunizmit, xhamia u konsiderua si një shtesë e nevojshme për qytetin, pasi nuk kishte xhami qendrore për myslimanët shqiptarë.

Ndërtimi më në fund filloi në vitin 2015 dhe Namazgja u hap në vitin 2024; ajo mund të akomodojë 10 000 besimtarë.

2. Shëtitni nëpër sheshin kryesor Skënderbej

Sheshi Skënderbej, sheshi kryesor i madh i shtruar dhe i lëmuar i Tiranës, shtrihet në një sipërfaqe prej 3700 metrash katrorë.

Një vend i njohur për takime, shëtitje dhe biseda midis miqve dhe familjeve, ai është i rrethuar nga disa ndërtesa të rëndësishme, shumë prej të cilave datojnë nga epoka komuniste.

Është emëruar sipas heroit kombëtar shqiptar Gjergj Kastrioti Skënderbeu, një komandant ushtarak i shekullit të 15-të i cili udhëhoqi një rebelim kundër Perandorisë Osmane dhe u bë simbol i rezistencës.

3. Mrekullohuni me afresket brenda Xhamisë së Et’hem Beut

Afresket që zbukurojnë këtë xhami të vogël dhe simpatike të shekullit të 18-të në Sheshin Skënderbej duken pothuajse po aq të gjalla sot sa ditën kur u pikturuan.

Ngjyra portokalli e thellë, jeshile e gjelbër, blu e kaltër dhe blu e errët janë përdorur në modelet e hollësishme që mbulojnë muret dhe tavanin e kupolës.

Ka imazhe magjepsëse pemësh, ujëvarash, urave dhe peizazheve të ndryshme. Një mbishkrim thotë: “Xhamia i ka dhënë bukuri të përjetshme qytetit, ashtu siç i ka dhënë Shën Sofia Stambollit” – me të vërtetë një vlerësim i lartë.

Ndërsa ishte e mbyllur gjatë sundimit të Hoxhës, ajo është rikthyer në një vend lutjeje për komunitetin mysliman të Tiranës.

4. Vizitoni Kalanë e Tiranës

E njohur si Kalaja e Justinianit, kjo strukturë bizantine daton që nga shekulli i 13-të. Dikur ishte në zemër të qytetit dhe ishte ndërtuar fort me mure të trasha guri dhe kulla vrojtimi.

Vetëm disa nga muret dhe themelet origjinale kanë mbetur. Dyqanet në pazarin e vogël brenda shesin artizanate së bashku me një numër të vogël restorantesh në stilin tradicional.

5. Eksploroni muzeun më të madh të Shqipërisë

Gjëja e parë që do të vini re në lidhje me Muzeun Historik Kombëtar është mozaiku mbresëlënës mbi hyrje, vepër e pesë artistëve vendas.

Mozaiku “Shqiptarët” përshkruajnë figura të të gjithë historisë së vendit, duke përfshirë ushtarë që luftonin Perandorinë Osmane, një punëtor komunist dhe një përfaqësim të Nënës Shqipëri me veshje kombëtare, të gjitha në stilin social realist.

Artefaktet datojnë që nga koha romake, përmes Mesjetës dhe Rilindjes, deri në epokën moderne, me ekspozita mbi pavarësinë, komunizmin dhe çlirimin kombëtar.

6. Kontrolloni kohën në Kullën e Sahatit

Ky monument i qytetit u ndërtua midis viteve 1822 dhe 1830 nga poeti Haxhi Et’hem Bej, pasi përfundoi xhaminë që ndërtoi me të atin, Molla Bej.

Me një lartësi prej 35 metrash ajo ishte struktura më e lartë në Tiranë deri në vitet 1970. Mund të ngjiteni në 90 shkallët deri në majë për pamje të mrekullueshme rreth Sheshit Skënderbej.

7. Piknik në Parkun e Liqenit të Tiranës

Liqeni nga i cili ka marrë emrin parku është artificial, por kjo nuk ia zvogëlon pamjen. I vendosur në buzë të një hapësire të madhe të gjelbër në pjesën jugore të qytetit, është vendi i përsosur për të kaluar një ditë me diell.

Banorët kalojnë andej duke bërë vrapime në mëngjes, ndërsa janë në pushim nga zyra ose si vend takimi në mbrëmje. Është i mbushur me pika referimi, duke përfshirë Kishën e Shën Prokopit dhe Pallatin Presidencial, si dhe një kompleks pishinash, kopsht zoologjik dhe kopsht botanik, ku ndodhen mbi 120 lloje bimësh, lulesh dhe pemësh.

Një amfiteatër pret ngjarje kulturore gjatë verës. Merrni një piknik, gjeni një vend me hije dhe vendoseni.

8. Shijoni pamjen nga Parku Kombëtar i Malit Dajti

Rreth 25 km në lindje të Tiranës, ky park kombëtar është një pushim i këndshëm nga qyteti.

Mund të qëndroni në nivelin e tokës në një nga shtigjet e ecjes nëpër pyjet e pishave dhe ahut, por për një përvojë vërtet emocionuese, merrni teleferikun për në majën e Malit Dajti.

Udhëtimi emocionues 15-minutësh me Dajti Express do t’ju shpërblejë me pamje të pakrahasueshme të Tiranës dhe Detit Adriatik.

Në majë të tij, do të gjeni një park të vogël aventuresk ajror dhe një fushë mini-golfi. Ndalo në restorantin Ballkoni Dajti, i cili i ngjan një kasolle druri dhe shërben gatime dhe verëra tradicionale shqiptare. Nëse ndiheni energjikë, mund të zbrisni përsëri në këmbë.

9. Bëni një foto para statujës së Skënderbeut

Kjo statujë prej bronzi e heroit kombëtar shqiptar – mbi kalë, me shpatë të zhveshur, duke udhëhequr trupat e tij në betejë kundër Perandorisë Osmane – përfaqëson fuqishëm krenarinë, qëndrueshmërinë dhe vazhdimësinë historike të vendit.

Tre skulptorë mjeshtra bashkëpunuan në monumentin Sheshi Skënderbej, i përuruar në vitin 1968, tre shekuj pas vdekjes së Skënderbeut.

10. Zhytuni në të kaluarën e vendit në Bunk’Art 1

Diktatori Hoxha ishte i fiksuar pas ndërtimit të bunkerëve: ai ishte i bindur se Shqipëria do të pushtohej nga armiqtë e komunizmit gjatë Luftës së Ftohtë.

Në vdekjen e tij në vitin 1985, u vlerësua se ekzistonin mbi 750 000 bunkerë.

Bunk’Art i ndërtuar nën tokë për elitën politike të regjimit në vitet 1970, mbulon një sipërfaqe prej 275 metrash katrorë. Është interesante të eksplorosh këto tunele të lagështa dhe të errëta, të cilat kombinojnë një eksplorim të epokës komuniste të Shqipërisë, e cila filloi me ardhjen në pushtet të Hoxhës në vitin 1944, me vepra arti dhe instalime bashkëkohore.

Mos e humbisni Sallën e madhe të Asamblesë, ku takoheshin zyrtarët, dhe ambientet private; ekspozitat shfaqin dokumente dhe fotografi nga kjo periudhë, si dhe një video të funeralit shtetëror të Hoxhës.

11. Vizitoni Bunk’Art 2

Në një tjetër ish-bunker, vetëm pak minuta në këmbë nga Sheshi Skënderbej, Bunk’Art 2 ka një atmosferë paksa të çuditshme.

Përgjatë korridoreve labirintike dhe tuneleve të betonit të shpërndara në disa nivele nëntokësore, ka dhjetëra dhoma që shfaqin objekte shqetësuese, të tilla si pajisjet e përdorura nga policia sekrete (e njohur si Sigurimi) për të spiunuar qytetarët, apartamentin e përdorur nga ministri i Brendshëm dhe madje edhe një zonë dushi për të larë materialet radioaktive në rast të një sulmi bërthamor.

12. Merrni pjesë në një shfaqje në Pallatin e Kulturës

Qendra më e rëndësishme kulturore e Tiranës: ndërtesa e ulët e bardhë strehon Muzeun Historik Kombëtar, Galerinë Kombëtare të Artit, Bibliotekën Kombëtare të Shqipërisë dhe Teatrin Kombëtar të Operas dhe Baletit.

Guri i themelit u vendos nga ish-sekretari sovjetik Nikita Hrushov në vitin 1959.

13. Vizitoni Katedralen Ortodokse të Ngjalljes së Krishtit

Një përzierje e arkitekturës bizantine dhe moderne, kjo katedrale, e përuruar në vitin 2014, strehon disa nga mozaikët më të mëdhenj bashkëkohorë ortodoksë në Ballkan.

Si nga brenda ashtu edhe nga jashtë, është vizualisht mbresëlënëse dhe sigurisht ndryshe nga shumica e kishave ortodokse që keni parë ndonjëherë.

14. Admironi Piramidën ekscentrike të Tiranës

Piramida e Tiranës padyshim që bie në sy. E projektuar nga vajza e Hoxhës, arkitektja Pranvera, ajo u themelua në vitin 1988 si një muze kushtuar trashëgimisë së ish-udhëheqësit.

Pas rënies së komunizmit në vitin 1991, ajo u përdor si një qendër konferencash, pastaj si një bazë e NATO-s në vitin 1999 gjatë Luftës së Kosovës.

Tani funksionon si TUMO, një qendër për teknologji krijuese, duke u përqendruar në programimin kompjuterik, robotikën dhe startup-et. Shkallët ngjiten përgjatë anëve dhe panelet e xhamit mbushin brendësinë me dritë.

15. Shëtitni pranë rezidencës së Hoxhës

Shtëpia e mëparshme e Hoxhës, Vila 31, është çuditërisht modeste.

Shtëpia trekatëshe në një lagje të quajtur Blloku paraqiste detaje luksoze, të tilla si dysheme mermeri dhe korridore të zbukuruara.

Palmat e harlisura lulëzonin në kopshtet e mirëmbajtura. Në bodrum kishte edhe një pishinë dhe, sigurisht, një tunel të fshehur shpëtimi që të çonte në një bunker nëntokësor.

Sot, është një hapësirë ​​arti e drejtuar nga fondacioni Arts Explora.

16. Kaloni një mbrëmje të këndëshme në Bllok

Blloku ishte i famshëm për lagjen ku jetonin figurat e rëndësishme komuniste. Por, në vend që të ishte plot shkëlqim dhe shumëngjyrëshe, zona ishte gri dhe e shkretë, një zonë e ndaluar për qytetarët.

Që nga vitet 1990, kjo lagje është transformuar plotësisht në një nga më trendet e Tiranës, e mbushur me butiqe, bare, kafene dhe restorante të panumërta moderne.

Rrugët e ngushta përshkohen nga një mori gjethesh dhe arti rrugor, duke e bërë atë një nga zonat më tërheqëse të qytetit.

Rehatohuni për një pije të sofistikuar në një bar elegant si Colonial, pastaj shkoni në një restorant tradicional si Era për të shijuar kuzhinën vendase.

Provoni një pjatë të shijshme si tove kosi Elbasani (qengj i gatuar në kos) ose fergese (rikota me speca dhe vaj ulliri).

17. Vizitoni Muzeun Arkeologjik Kombëtar

Thesaret e këtij muzeu datojnë që nga kohërat parahistorike. Ekspozitat mbulojnë fiset ilire të Epokës së Bronzit, antikitetin klasik, Mesjetën dhe epokën moderne.

Mbi 2 000 objekte të zbuluara gjatë gërmimeve arkeologjike në të gjithë vendin janë në ekspozitë, nga bizhuteritë e lashta te statujat romake, qeramika, mozaikët dhe monedhat.

18. Bleni ushqime të shijshme lokale në Pazarin e Ri

Ky treg i mbuluar i gjallë është vendi ideal për suvenire dhe prodhime të freskëta. I rrethuar nga restorante, tregu pret dhjetëra tezga që shesin specialitete lokale, të tilla si mjaltë gështenje, pishe dhe lulesh të egra; kavanoza me ajvar shtëpiak (një krem ​​me spec të kuq të pjekur); dhe shishe raki (raki rrushi shqiptar, një shije pikante).

Do të gjeni gjithashtu produkte artizanale të tilla si pantofla leshi, qilima të endur me dorë, kapele tradicionale dhe objekte prej druri të gdhendura.

Atmosfera është e gjallë, ditë e natë, ndërsa banorët vijnë të furnizohen me fruta dhe perime dhe të bisedojnë.

19. Zbuloni sekretet policore në Shtëpinë e Gjetheve

Pavarësisht emrit të saj të padëmshëm kjo ndërtesë e qetë ishte selia e policisë sekrete të Hoxhës.

Tani një muze, aty shfaqen të gjitha truket e zanatit të tyre, nga insektet në dorezat e fshesave deri te valixhet me kamera të fshehura.

Mund të duket emocionuese, por e vërteta nuk mund të harrohet: këta zyrtarë ua bënë jetën shumë shqiptarëve të pafajshëm të vështirë, nëse jo fjalë për fjalë të dhimbshme, përmes paraburgimit dhe torturës.

20. Kaloni në Urën e Tabakëve

E emëruar sipas regjësve që jetonin në zonë dhe ndërtuan këtë urë elegante prej guri për këmbësorë në shekullin e 18-të.

Kjo strukturë lidhte rrugën e lashtë nga malësitë lindore me tregun e qytetit.

Ajo kalon përgjatë lumit Lana dhe përdorej nga tregtarët që transportonin bagëti dhe mallra përtej saj në pazar.

Është një nga strukturat e pakta të epokës osmane që kanë mbijetuar në Tiranë.

DUKAGJIN- Detaje të reja mësohen për ngjarjen kriminale në fshatin Abat në Dukagjin.

Abc News mëson se autori i dyshuar Ndoc Maçaj dhe viktima Piro Prroni ishin shokë me njeri tjetrin dhe kanë qëndruar bashkë.

Sipas të dhënave nga zona, mësohet se shkak ka qenë një debat i çastit mes dyve gjatë kohës që po rrinin me njeri tjetrin.

Ky debat mes tyre përfundoi në përdorimin e armës, me pasojë vdekjen e 61-vjeJari Piro Prroni.

Policia dhe grupi hetimor po punojnë për kapjen e autorit të vrasjes dhe sqarimine plotë të rrethanave/abcnews.al

DUKAGJIN- Një vrasje me armë zjarri është regjistruar mbrëmjen e se enjtes në fshatin Abat të Shalës në Shkodër. Viktimë ka mbetur 61-vjeçari Piro Prroni. ABC News ka mundur të sigurojë edhe foton e viktimës.

Ndërkohë, autori i dyshuar është identifikuar nga policia. Ndoc Maçaj është shpallur në kërkim, pasi është larguar menjëherë pas vrasjes.

viktima dhe autori i dyshuar kane qene shoke me njeri tjetrin.

Shkak i ngjarjes dyshohet se ka qene një konflikt i çastit dhe debati me pas ka përfunduar ne përdorimin e armës.

Krimi ka ndodhur në një zonë të thellë malore.

Policia ka ngritur një grup te posaçëm hetimor për të zbardhur vrasjen dhe sqaruar rrethanat dhe dinamikën.