TIRANË, 30 gusht /ATSH/ Ministrja e Bujqësisë dhe Zhvillimit Rural, Anila Denaj, prezantoi sot njërën nga tre skemat zyrtare të cilësisë për produktet tradicionale shqiptare: Specialiteti Tradicional i Garantuar (STG).

Denaj tha se, kjo skemë ka për qëllim mbrojtjen dhe promovimin e produkteve bujqësore dhe ushqimore që trashëgojnë metoda tradicionale prodhimi, përpunimi ose përbërjeje.

“STG thekson rëndësinë e ruajtjes së trashëgimisë sonë kulinare dhe mbështet prodhuesit vendas që punojnë me përkushtim për të ruajtur cilësinë dhe origjinalitetin e produkteve tradicionale,” deklaroi ministrja Denaj.

Produktet e regjistruara deri më tani në këtë skemë janë:

Djathi i Dhisë Bjeshkët e Runjës. Ky djathë i veçantë i referohet vetëm atij që prodhohet ekskluzivisht nga qumështi i dhisë së Bulacit, një racë autoktone e regjistruar në Katalogun e Burimeve Gjenetike Shtazore të Fermës Shqiptare.

Kumbulla e Thatë e Shumbatit. Ky është një produkt tradicional i zonës së Dibrës, i përgatitur nga varieteti i kumbullës Trojane, e natyralizuar në këtë trevë. Kjo kumbull, e kultivuar prej kohësh në fshatin Shumbat, dallohet për madhësinë dhe aromën e saj të fortë, të cilën e ruan edhe pas përpunimit. Përpunimi kryhet sipas metodave tradicionale të trashëguara që para viteve ’90.

Mjalti i Bedunicës. Një mjaltë monofloral unik, i prodhuar në mënyrë tradicionale në fshatin Gostovisht të Frashërit, nga lulja e rrallë e bedunicës. Ky mjaltë ka shije të veçantë dhe vlera të larta natyrore.

Glikoja e Arrës. Ky është një produkt tipik i Përmetit, me traditë mbi 150-vjeçare. Glikoja përgatitet me një proces të gjatë dhe të kujdesshëm, që garanton cilësinë dhe shijen autentike të saj.

Djathi i Ziem Veleçik, është një produkt i eçantë që përgatitet sipas traditës së vjetët shqiptare.

Këto produkte përfaqësojnë një pjesë të çmuar të identitetit shqiptar dhe shërbejnë si ambasadorë të shijes dhe cilësisë tradicionale jashtë kufijve të vendit.

Ministria fton qytetarët dhe konsumatorët që të kërkojnë logon zyrtare të STG-së në produktet shqiptare për të provuar një përvojë autentike dhe të sigurt ushqimore.

Emërtimi “Specialitet Tradicional i Garantuar (STG)” përfshin produktet bujqësore ose ushqimore që kanë një veçori të caktuar ose një grup veçorish, duke i veçuar ato nga produktet e tjera të ngjashme që i përkasin të njëjtës kategori. Logoja zyrtare funksionon si një diferencues i produktit në treg, duke i mundësuar konsumatorit të dallojë mes produkteve që kanë karakteristika të origjinës gjeografike dhe traditës, nga ato që nuk i gëzojnë këto cilësi.

STG-ja thekson aspektin tradicional të një produkti, i cili përftohet nga një metodë prodhimi apo përpunimi, ose ka një përbërje që korrespondon me praktikën tradicionale për atë produkt bujqësor ose ushqimor. Këto produkte prodhohen nga lëndë të para ose përbërës që janë përdorur në mënyrë tradicionale ndër vite.

1 nga 7

j.p/

The post Denaj: Specialiteti Tradicional i Garantuar ruan trashëgiminë tonë kulinare appeared first on Agjencia Telegrafike Shqiptare.

TIRANË, 29 gusht /ATSH / Në një atmosferë të veçantë mes natyrës mahnitëse të bjeshkëve të Dobërdolit, Bashkia e Tropojës organizoi një takim të hapur me qytetarë dhe të interesuar për të aplikuar në nismën qeveritare “Paketa e Maleve”.

Ky bashkëbisedim synoi informimin e drejtpërdrejtë dhe inkurajimin e investimeve në zonat malore të Tropojës.

Kryetari i Bashkisë, Rexhë Byberi, u shpreh se interesi ka qenë i lartë, me rreth 205 aplikime të regjistruara deri më tani, shumica prej të cilëve janë qytetarë që jetojnë jashtë vendit, por duan të investojnë në pronat e tyre në atdhe.

“Deri tani kemi rreth 205 aplikues që kanë shprehur dëshirën për të investuar në pronat e tyre, në përputhje me ligjin e ri të qeverisë shqiptare. Shumica janë emigrantë, dhe kjo tregon se ‘Paketa e Maleve’ po zgjon besim dhe interes konkret. Bashkia e Tropojës është angazhuar të mbështesë këtë proces në çdo hap”, tha Byberi.

I pranishëm në takim ishte edhe deputeti i qarkut, Eduart Shalsi, i cili e vlerësoi nismën si një nga më premtueset për zhvillimin ekonomik të zonave malore:

“Kjo është një mundësi e artë për banorët dhe pronarët e këtyre zonave. ‘Paketa e Maleve’ do të kthejë Tropojën, dhe zona të tjera alpine, në destinacione të vërteta turistike që ndikojnë pozitivisht jo vetëm në ekonominë lokale, por edhe në atë kombëtare”, tha ai.

Aktualisht, “Paketa e Maleve” ndodhet në fazën e parë të implementimit, që përfshin shprehjen e interesit nga qytetarët dhe pronarët e tokave në zonat malore.

Nisma synon të krijojë kushte më të mira për zhvillimin e turizmit, agroturizmit dhe investimeve të qëndrueshme në pronat private në male, përmes mbështetjes së drejtpërdrejtë nga qeveria. /j.p/

The post Bashkëbisedim në Dobërdol për “Paketën e Maleve”, Byberi: 205 aplikime deri tani appeared first on Agjencia Telegrafike Shqiptare.

TIRANË, 29 gusht /ATSH/ Ministrja e Bujqësisë dhe Zhvillimit Rural, Anila Denaj, bëri të ditur se Skema Kombëtare e Investimeve 2025 është një program që synon të fuqizojë sektorin blegtoral dhe të shpendëve në vend, përmes mbështetjes financiare direkte dhe lehtësirave kreditore.

Denaj tha se skema mbështet fermerët dhe sipërmarrësit që planifikojnë ndërtimin e fermave të reja për mbarështimin e kafshëve ose rritjen e shpendëve.

“Fermerët që investojnë në blegtori përfitojnë deri në 50% grant mbi vlerën e investimit, jo më shumë se 15 milionë lekë për subjekt, nëse ndërtojnë stalla dhe stabilimente me kapacitet: minimumi 10 lopë; 100 krerë të imta (dele ose dhi); 10 dosa dhe 10,000 shpendë”, u shpreh ministrja.

Përveç grantit, aplikuesit mund të përfitojnë kredi të butë me interes vetëm 2% dhe garanci sovrane për 70% të kolateralit, duke e bërë të mundur financimin e plotë të projektit të tyre pa pengesa financiare.

Afati i fundit për aplikim është 30 shtator 2025

Ky program synon të rrisë prodhimin vendas, të krijojë më shumë vende pune në zonat rurale dhe të modernizojë kapacitetet prodhuese në blegtori dhe shpendari.

The post Skema e Investimeve, Denaj: Grant deri në 15 milionë lekë financim për blegtorët appeared first on Agjencia Telegrafike Shqiptare.

TIRANË, 29 gusht /ATSH/ Ministrja e Shtetit për Sipërmarrjen dhe Klimën e Biznesit, Delina Ibrahimaj, njoftoi se subjektet që merren me importin, përpunimin dhe eksportin e mallrave joshqiptare përfitojnë nga lehtësitë doganore, duke aplikuar përmes një shërbimi të dedikuar në platformën e-Albania.

Ibrahimaj tha se, përmes këtij shërbimi elektronik, bizneset mund të aplikojnë për autorizimin për regjimin e përpunimit aktiv të mallrave, duke eliminuar burokracitë dhe përshpejtuar procesin e miratimit.

Ministrja ndau në rrjete sociale një video, ku tregohen hapat që ndiqen për kryerjen e aplikimit në e-Albania, në kategorinë “Regjimi i përpunimit aktiv”.

Pas dorëzimit të aplikimit, Drejtoria e Përgjithshme e Doganave (DPD) trajton kërkesën dhe kthen përgjigje brenda një periudhe prej 1 deri në 28 ditë.

Njoftimi i vendimit bëhet përmes email-it, ndërsa autorizimi i miratuar dërgohet me nënshkrim elektronik.

Autorizimi ka vlefshmëri nga 1 deri në 5 vite, në varësi të aktivitetit dhe kërkesës së subjektit.

Ky zhvillim vjen si pjesë e përpjekjeve për të modernizuar administratën doganore, për të lehtësuar procedurat për biznesin, si dhe për të nxitur eksportin dhe përpunimin industrial në Shqipëri.

e-Albania vijon të zgjerojë gamën e shërbimeve publike online, duke ofruar zgjidhje të shpejta, transparente dhe të aksesueshme me vetëm një klik. /j.p/

The post Ibrahimaj: Lehtësi të reja doganore për bizneset, aplikimi në e-Albania appeared first on Agjencia Telegrafike Shqiptare.

TIRANË, 29 gusht /ATSH/ Ministrja e Bujqësisë dhe Zhvillimit Rural, Anila Denaj, ka theksuar rëndësinë strategjike të bimëve aromatike dhe medicinale për zhvillimin e bujqësisë dhe ekonomisë shqiptare.

Denaj u shpreh se ky sektor po orienton eksportet shqiptare drejt tregjeve elitare ndërkombëtare, duke krijuar një burim të qëndrueshëm të ardhurash dhe vendeve të punës për qindra fermerë, gra dhe burra, të angazhuar në ciklin e mbjelljes, grumbullimit dhe përpunimit.

“Sipas të dhënave zyrtare, eksportet e bimëve medicinale dhe aromatike kanë shënuar një rritje prej 9% në periudhën janar–qershor 2025, duke konfirmuar trendin pozitiv dhe potencialin afatgjatë të këtij sektori”, tha ministrja.

Përveç ndikimit ekonomik, parcelat me bimë medicinale janë duke u shndërruar në atraksione të reja për turistët, duke ndihmuar në zhvillimin e turizmit rural dhe ndërthurjen e tij me bujqësinë e qëndrueshme.

Ky zhvillim përputhet me vizionin e Ministrisë së Bujqësisë për “Bujqësinë 2030”, që synon integrimin europian të sektorit, fuqizimin e prodhimit vendas dhe nxitjen e inovacionit në bujqësi. /j.p/

The post Denaj: Eksporti i bimëve aromatike dhe medicinale u rrit me 9% appeared first on Agjencia Telegrafike Shqiptare.

TIRANË, 23 gusht /ATSH/  Më shumë se 100 notarë nga e gjithë Shqipëria dhe jashtë saj morën pjesë në edicionin e pestë të Maratonës së Notit “Agron Ruvina”, e kthyer tashmë në një traditë të rëndësishme sportive në qytetin e Pogradecit.

Maratona, që zhvillohet në ujërat e liqenit të Ohrit në nder të notarit të njohur Agron Ruvina, ka tërhequr këtë vit garues nga vende si Greqia, Ukraina dhe Islanda, duke i dhënë aktivitetit një dimension ndërkombëtar.

Në kategorinë e moshës 14-vjeçare, Lizi Gusho dhe Devi Shtaro u shpallën fitues përkatësisht në kategorinë e vajzave dhe të djemve.

“Jam shumë e lodhur, por e lumtur që fitova. Jetoj dhe stërvitem në SHBA, por jam nga Pogradeci dhe është krenari të jem pjesë e kësaj gare,” – u shpreh Lizi Gusho pas fitores.

“I lodhur, por i emocionuar. Ishte një sfidë e bukur,” – tha Devi Shtaro.

Triumf në kategorinë e notarëve veteranë shënoi Ana Angjellari, e cila pas tre pjesëmarrjesh arriti më në fund vendin e parë.

“Jam shumë e lumtur. Ky ishte synimi im prej tre vitesh. Besoj kjo do të jetë edhe pjesëmarrja ime e fundit,” – tha ajo me emocione.

Organizatori Vladimir Mato theksoi rëndësinë e rritjes së vazhdueshme të interesit për maratonën:

“Kemi mbi 100 pjesëmarrës nga të gjitha trevat shqiptare, por edhe nga jashtë vendit. Kjo tregon se eventi po fiton emër dhe respekt.”

E pranishme në aktivitet, Sofika Ruvina, motra e notar Agron Ruvinës, u shpreh e emocionuar për nderin që i bëhet çdo vit vëllait të saj:

“Fjalët janë të pakta për të. Krenohemi pa masë me Agronin dhe jemi të nderuar për çdo kujtim që mbetet gjallë përmes kësaj maratone.”

Maratona e Notit “Agron Ruvina” konfirmon edhe një herë lidhjen e veçantë të Pogradecit me sportin e notit dhe shërben si frymëzim për brezat e rinj që duan të ndjekin pasionin në ujërat e ëmbla të liqenit të Ohrit.

The post Maratona e notit “Agron Ruvina” në Pogradec, homazh sportiv me jehonë ndërkombëtare appeared first on Agjencia Telegrafike Shqiptare.

TIRANË, 23 gusht /ATSH/ Kryeministri Edi Rama e cilësoi Urën e Dragotit, si një nga veprat më të rëndësishme inxhinierike dhe historike të Shqipërisë.

E ndërtuar në vitet 1930, kjo urë lidh Tepelenën me Përmetin, duke shërbyer si një nyje e rëndësishme infrastrukturore dhe një simbol i zhvillimit të jugut të vendit.

“Një kryevepër inxhinierike që qëndron krenare mbi Vjosë,” shkroi Kryeministri në rrjetet sociale, duke theksuar vlerat historike dhe estetike të strukturës.

Me arkitekturën e saj karakteristike dhe pozicionimin strategjik mbi lumin Vjosa, ura është jo vetëm funksionale, por edhe një pikë referimi për udhëtarët dhe vizitorët që eksplorojnë bukuritë natyrore të Parkut Kombëtar të Vjosës.

Në një kohë kur zhvillimi i turizmit natyror dhe kulturor po merr gjithnjë e më shumë vëmendje, Ura e Dragotit mbetet dëshmi e një tradite ndërtimi që kombinon funksionin me hijeshinë arkitektonike.  e.xh/

The post Rama: Ura e Dragotit, një kryevepër inxhinierike mbi lumin Vjosa appeared first on Agjencia Telegrafike Shqiptare.

TIRANË, 23 gusht /ATSH/ Gazetari, analisti dhe ish-drejtori i përgjithshëm i ATSH-së, Artur Zheji është ndarë sot nga jeta në moshën 64-vjeçare.

Ai ka ndërruar jetë në qytetin e Sarandës, ku ndodhej për pushime së bashku me familjen.

Policia e Shtetit në njoftimin zyrtar bëri me diej se “sot, rreth orës 16:10, në afërsi të rrugës “Butrinti”, shtetasi A. Zh., 64 vjeç, banues në Tiranë, dyshohet se ka shfaqur probleme shëndetësore gjatë qëndrimit në një restorant dhe gjatë transportit drejt spitalit me autoambulancë, ka ndërruar jetë”.

Me një karrierë të gjatë në media, Zheji u bë një nga zërat dhe penat më të spikatur të gazetarisë dhe debatit publik në Shqipëri. Ai ka shërbyer në funksione drejtuese në disa media, në Radio Televizionin Shqiptar dhe Agjencinë Telegrafike Shqiptare (ATSH).

Për vite me radhë, Zheji do të jepte kontributin e tij si analist, drejtues emisioni, por edhe si editorialist dhe komentues politik, duke lënë gjurmë në mendimin mediatik shqiptar.

I lindur më 29 gusht 1961, Artur Zheji ishte i biri i euriditit të njohur shqiptar Petro Zhejit dhe aktores së njohur shqiptare Besa Imamit.

Zheji u diplomua për regjisor në Institutin e Lartë të Arteve, ku spikati dhe la gjurmën e tij në dramaturgjinë shqiptare. Në skenën e Teatrit Kombëtar, u vendos në skenë drama e tij “Raimonda”, përgjatë kohës së diplomimit.

Pas diplomimit, Zheji u zhvendos në Itali ku qëndroi për rreth 10 vite. Aty, ai punoi në “Radio Radicale” si specialist i çështjeve të Evropës dhe Ballkanit, përgjatë kohës së luftës së Kosovës, duke u bërë kështu dhe një zë i rëndësishëm i shqiptarëve në arenën ndërkombëtare.

Që prej vitit 2017, ai ishte drejtues i emisionit politik dhe analitik 360 Gradë.

Zheji la pas dy vajza dhe një djalë, së bashku me bashkëshorten e tij. Humbja e tij e papritur ka tronditur jo vetëm familjen, por edhe kolegët dhe opinionin publik, të cilët e shihnin si një figurë me integritet dhe profesionalizëm të lartë. Vdekja e tij është një humbje e madhe për gazetarinë, analizën politike dhe median shqiptare në përgjithësi.

Ministri i Shtetit për Diasporën, Taulant Balla ka shprehur ngushëllime për ndarjen nga jeta të publicistit Zheji. “Shumë, shumë i trishtë lajmi për ndarjen e parakohshme të gazetarit Artur Zheji. U prehsh në paqe mik”, shprehet Balla në rrjetet sociale.

Kreu i PD, Sali Berisha shkruan: “Homazh për Artur Zhejin! Miq, gazeteri, analisti, botuesi, publicisti i mirënjohur Artur Zheji mbylli sot, papritmas dhe parakohe, sytë përgjithmonë. Duke shprehur ngushëllimet e mia më të ndjera familjes, miqve të afërmëve, unë lutem së bashku me ta që shpirti i Arturit të tyre të dashur të gjejë paqen e merituar. Amin”.

Ministria e Ekonomisë, Kulturës dhe Inovacionit shkruan në një reagim në rrjetet sociale se “Lajm i hidhur i ndarjes nga jeta të gazetarit, publicistit dhe analistit të njohur Artur Zheji (1961–2025)! Zheji u shqua për kontributin e tij në fushën e medias dhe publicistikës, si dhe në artin skenik, ku ka lënë gjurmë si regjisor dhe autor i veprave artistike.Trashëgimia e tij profesionale mbetet pjesë e historisë së gazetarisë dhe kulturës shqiptare. Ngushëllime familjes, kolegëve dhe komunitetit mediak”.

The post Ndahet nga jeta gazetari dhe publicisti i njohur, Artur Zheji appeared first on Agjencia Telegrafike Shqiptare.

TIRANË, 23 gusht /ATSH/ Në një aktivitet të zhvilluar pranë Qendrës Kombëtare të Kinematografisë (QKK), janë shpallur tre projektet fituese që do të realizohen si filma artistikë me metrazh të gjatë, në kuadër të mbështetjes së QKK-së për kinematografinë kombëtare dhe bashkëprodhimet ndërkombëtare.

Ministri i Ekonomisë, Kulturës dhe Inovacionit Blendi Gonxhja, tha se “këto projekte të reja përfaqësojnë zëra të ndryshëm krijues dhe sjellin histori me potencial të lartë artistik dhe kulturor për ekranin shqiptar dhe ndërkombëtar”. Filmat fitues janë: “Diell i Ftohtë”, Produksioni: Artalb Film Productions, Regji & Skenar: Gentian Koçi, Producent: Blerina Hankollari. Filmi i dytë “E Bardhë… E Kuqe” me produksion ARTFILM P&D, Regji & Skenar: Pluton Vasi, Producent: Vjollca Dedei. Filmi i tretë fiturs u shpall, “Revoltë në Ferr” me produksion Mediavision, Regji: Namik Ajazi dhe skenar Visar Zhiti dhe producent Namik Ajazi.

Ministri Gonxhja, përgëzoi ekipet fituese dhe theksoi rëndësinë e mbështetjes së talenteve vendase, duke nxitur zhvillimin e industrisë së filmit dhe promovimin e Shqipërisë në skenën ndërkombëtare të kinemasë.

Projektet pritet të marrin jetë së shpejti dhe të sjellin në jetë histori që pasqyrojnë realitete, emocione dhe sfida të reja.

1 nga 10

The post Shpallen 3 projektet fitues për filma me metrazh të gjatë në Qendrën Kombëtare të Kinematografisë appeared first on Agjencia Telegrafike Shqiptare.

TIRANË, 23 gusht /ATSH/ Unioni i Gjyqtarëve ka reaguar lidhur me qendrimet e e kryeministrit Edi Rama drejtuar dy gjyqtarëve, Hazbi Balliu dhe Klarent Demiri, të cilët sipas kreut të qeverisë, me vendimet e tyre kanë cënuar interesin publik.

Unioni i gjyqtarëve në reagimin e tij, thekson se “ka ndjekur me vëmendje pakënaqësitë e shprehura publikisht nga ana e publikisht nga ana e Kryeministrit ndaj disa vendimeve gjyqësore, duke anatemuar personalisht gjyqtarët për vendimmarrjet dhe kthyer ushtrimin e detyrës kushtetuese në një gjyq publik, ku njëra nga palët ndërgjygjëse për shkak të fuqisë, hapësirës mediatike dhe virtuale, jo vetëm denigron figurën e gjyqtarëve individualë, por ushtron presion të hapur ndaj trupës gjyqësore në tërësi, duke përcjellë mesazhin te gjyqtarët se nëse vendimmarrja e tyre nuk do të pëlqehet, do të jenë objektivat e radhës”.

“UGJSH mirëpret dhe inkurajon çdo kritikë ndaj gjyqtarëve dhe punës së tyre, kur këto kritika janë brenda kornizës kushtetuese dhe ligjore, të cilat kanë për qëllim t’i shërbejnë rritjes së besimit të publikut tek gjykatat, forcimit të pavarësisë së gjykatave, të sundimit të ligjit dhe shtetit të së drejtës”, theksohet në reagim, teksa dënohet

UGJSH thekson se “çdo palë që është e pakënaqur, ka të drejtën e ankimit në një gjykatë më të lartë, apo vendosë në lëvizje organet disiplinore për çdo shkelje të ligjit qe pretendon se ka kryer gjyqtari”.

“Republika e Shqipërisë është një republikë parlamentare, ku ndarja e pushteteve e sanksionuar qartësisht në Kushtetute, është një ndër shtyllat kryesore, mbi të cilat është ndërtuar dhe qëndron demokracia jonë parlamentare dhe zhvillohet shoqëria jonë. Në këtë kuadër kushtetues funksionon edhe sistemi gjyqësor dhe ushtrohet vendimmarrja nga gjykatat. Është ky kuadër kushtetues dhe ligjor, sipas të cilit janë përcaktuar saktë subjektet, koha dhe mënyrat e kontrollit të një vendimi gjyqësor, i cili kursesi nuk lejon përfaqësues të pushteteve të tjera të anatemojnë vendimet e gjykatave e aq me keq, të kërkojnë ndëshkimin e gjyqtarëve, kur nuk u pëlqejnë vendimet e tyre”, vijon regimi.

UGJSH kërkon që “Çdo veprim i kujtdo qoftë, që shmanget nga kuadri kushtetues dhe ligjor në fuqi në Republikën e Shqipërisë, jo vetëm që nuk i shërben forcimit të shtetit ligjor, por përkundrazi, është një hap prapa për pavarësinë e pushtetit gjyqësor, forcimin e shtetit të së drejtës dhe minon besimin e publikut te drejtësia”.

UGJSH dëshiron të theksojë angazhimin maksimal kundër çdo fenomeni antiligjor të vërejtur në punën e përditshme të gjykatave, sikurse dhe angazhimin e plotë në mbrojtje të parimeve kushtetuese të ndarjes së pushteteve, pavarësisë së gjykatave, respektimit të të drejtave dhe lirive themelore të shtetasve dhe forcimit të sundimit të ligjit në vend.

Së fundmi, UGJSH i bën thirrje Këshillit të Lartë Gjyqësor si qeveri e gjyqësorit dhe organi i ngarkuar nga Kushtetuta dhe ligji për të garantuar pavarësinë dhe integritetin e gjyqtarëve, që të reagojë dhe mbajë qëndrim ndaj sulmeve që i’u bëhen gjyqtarëve për shkak të detyrës, pavarësisht se nga vijnë ato.

/a.f/

The post UGJSH: KLGJ të reagojë dhe mbajë qëndrim ndaj sulmeve që i’u bëhen gjyqtarëve appeared first on Agjencia Telegrafike Shqiptare.

TIRANË, 23 gusht /ATSH/ Një eksperiencë autentike që ndërthur natyrën, traditën dhe mikpritjen shqiptare po merr jetë në Parkun Kombëtar Germenj–Shelegur. “Një ditë me bariun” është një projekt fitues i platformës TIP Korça, i mbështetur nga Ministria e Turizmit dhe Mjedisit në bashkëpunim me GIZ, që sjell një model të ri të turizmit rural të qëndrueshëm.

Ky aktivitet i veçantë fton vizitorët të përjetojnë nga afër jetën e përditshme të barinjve të Kolonjës nga shtegtimi i bagëtive dhe shëtitjet me kuaj, te gatimet tradicionale dhe netët magjike nën yje, pranë zjarrit.

Përmes kësaj nisme, promovohet transhumanca, një traditë shekullore e zonës, duke krijuar mundësi të reja ekonomike për komunitetin lokal dhe duke ruajtur trashëgiminë kulturore. Këto aktivitete tashmë janë kthyer në pjesë të paketave turistike që i japin një zhvillim dhe nxitje turizmit rural .

/a.f/

The post “Një ditë me bariun” – Udhëtim i veçantë turistik në zemër të Kolonjës appeared first on Agjencia Telegrafike Shqiptare.

TIRANË, 22 gusht /ATSH/ Banka e Shqipërisë bën të ditur se përdorimi i pagesave elektronike nga qytetarët dhe bizneset ka shënuar një rritje të vazhdueshme gjatë gjashtëmujorit të parë të këtij viti, duke reflektuar zhvillimin e teknologjisë financiare dhe rritjen e besimit ndaj shërbimeve digjitale.

Sipas BSH-së, gjatë periudhës janar–qershor 2025, numri total i pagesave përmes sistemit bankar arriti në 27.9 milionë, një rritje prej 24% në krahasim me të njëjtën periudhë të vitit të kaluar.

Vlera totale e pagesave kap shifrën e 3.475 miliardë lekëve, me një rritje prej 13% në terma vjetorë.

Ndërkohë kartat bankare kanë qenë një tjetër instrument shumë i përdorur në këtë periudhë.

“Pagesat me kartë janë rritur me 30%, duke zënë 67% të totalit të pagesave, çka tregon adoptimin gjithnjë e më të gjerë të këtij instrumenti në jetën e përditshme. Ndërkohë, transfertat e kreditit online kanë shënuar rritje me 23%, dhe tani përbëjnë 19% të totalit të pagesave”, njofton BSH-ja.

Referuar statistikave, numri i kartave të debitit dhe kreditit në qarkullim ka arritur në 1.572 milionë, duke shënuar një rritje vjetore prej 4.1%.

Këto shifra tregojnë qartë zhvendosjen drejt një ekonomie gjithnjë e më digjitale dhe moderne, me qytetarë që po përqafojnë më shumë komoditetin dhe sigurinë që ofrojnë pagesat elektronike. Banka e Shqipërisë vijon të mbështesë këtë zhvillim përmes reformave dhe rregulloreve që rrisin aksesin, transparencën dhe sigurinë në tregun financiar.

/e.xh//a.f/

The post BSH: 3,5 miliardë lekë pagesa elektronike në 6-mujorin e parë 2025 appeared first on Agjencia Telegrafike Shqiptare.

TIRANË, 22 gusht /ATSH/ Ministrja e Infrastrukturës dhe Energjisë, Belinda Balluku, deklaroi se pavarësisht rritjes historike të konsumit të energjisë gjatë sezonit turistik veror, furnizimi ka vijuar në standardet më të mira në të gjithë vendin, përfshirë zonat me interes të lartë turistik.

“E megjithëse sistemi elektroenergjetik dhe rrjeti janë ekspozuar në kërkesën më të lartë historike të konsumit, furnizimi me energji elektrike në vend, edhe në zonat me interes në ekonominë e turizmit, ka vijuar të jetë në standardet më të mira të tij”, u shpreh ministrja Balluku nga salla SCADA e OST-së.

Ajo tha se, është shënuar një rritje rekord e konsumit të energjisë në verën e këtij viti 2025.

“Konsumi i energjisë janar–korrik 2025 është rritur me 2.2% krahasuar me vitin 2024 (41,885 MWh më shumë). Krahasuar me vitin 2023, rritja arrin në 10.3% ose mbi 184,151 MWh më shumë. Në muajt qershor dhe korrik, rritja respektive e konsumit është 21.5% dhe 30.7% krahasuar me vitin 2019  viti i fundit para pandemisë dhe krizës energjetike. Dita me konsum më të lartë në histori është regjistruar më 13 gusht 2025, me 27,995 MWh, duke kaluar për herë të parë 31 dhjetorin si dita me konsumin më të lartë në vit”, u shpreh Balluku.

Ministrja theksoi edhe vështirësitë e përballuara nga sektori energjetik gjatë verës, veçanërisht për shkak të zjarreve që kanë rrezikuar nënstacione dhe linja transmetimi.

“Skuadrat e OST dhe OSHEE kanë qenë në gatishmëri të plotë dhe kanë kontribuar aktivisht jo vetëm në riparimin e rrjetit, por edhe në shuarjen e zjarreve, duke mbrojtur asetet tona strategjike,” theksoi Balluku.

Duke u ndalur në humbjet teknike në rrjet, Balluku infomoi se vijohet të shënohet rënie.

“Humbjet teknike në rrjet kanë rënë me 1.45%, duke kursyer 21,699 MWh energji. Ky kursim përkthehet në 7 milionë euro më pak humbje financiare për sistemin”, informoi Balluku.

Ajo tha se, ky përmirësim i performancës mbështet forcimin e sektorit energjetik dhe krijon hapësirë për ulje të mëtejshme të çmimit të energjisë për abonentët familjarë, pas zbritjes prej 10.5% që hyri në fuqi në fillim të vitit 2025.

Ndërsa u ndal se fokus në të ardhmen do të jetë rritja e kapaciteteve dhe integrimi në tregun rajonal.

Ministrja njoftoi se Ministria e Infrastrukturës dhe Energjisë po vijon me nisma të rëndësishme për rritjen e kapaciteteve të prodhimit, transmetimit dhe shpërndarjes, me qëllim përballimin e kërkesës në rritje dhe përfshirjen e plotë në tregun rajonal të energjisë.

“Do të vazhdojmë të punojmë me përkushtim për të ofruar një shërbim energjetik cilësor dhe të qëndrueshëm, edhe përtej sezonit veror”, përfundoi ministrja Balluku.

/e.xh//a.f/

The post Balluku: Furnizim i pandërprerë me energji elektrike pavarësisht konsumit rekord gjatë sezonit turistik appeared first on Agjencia Telegrafike Shqiptare.

TIRANË, 22 gusht /ATSH/ Gjatë muajit korrik 2025, mbi 1,82 milionë shtetas të huaj kanë hyrë në vendin tonë me një rritje me 0,4%, duke treguar vijimësinë e interesit për Shqipërinë si destinacion turistik.

Instituti i Statistikave (INSTAT) publikoi sot raportin mbi lëvizjet e shtetasve, ku evidenton se, në Korrik 2025, 95% e hyrjeve të shtetasve të huaj janë nga kontinenti Evropian.

INSTAT raporton se në 99% të rasteve, hyrjet e shtetasve të huaj kanë qenë për pushime dhe turizëm, me një rritje prej 0,2% krahasuar me Korrik 2024. Ndërkohë, hyrjet për qëllime biznesi dhe profesionale kanë shënuar një rritje domethënëse prej 15,6%, duke reflektuar rritjen e interesit për Shqipërinë edhe në aspektin ekonomik.

Ky trend konfirmon potencialin në rritje të Shqipërisë si një vend me rëndësi në hartën turistike dhe ekonomike të rajonit. Autoritetet po theksojnë rëndësinë e menaxhimit të qëndrueshëm të kësaj rritjeje për të garantuar një përvojë pozitive për vizitorët dhe përfitime afatgjata për vendin.

Sipas INSTAT, gjatë muajit Korrik 2025, në territorin e Republikës së Shqipërisë janë regjistruar 2.663.010 hyrje të shtetasve shqiptarë dhe të huaj, duke shënuar një rritje prej 1,5% krahasuar me të njëjtën periudhë të vitit 2024.

Daljet nga territori rezultojnë të kenë qenë 2.576.342, me një rritje më të lartë prej 9,6% krahasuar me Korrik 2024, duke reflektuar një dinamikë të shtuar të qarkullimit ndërkombëtar.

INSTAT raporton se, 782.849 shtetas shqiptarë kanë dalë nga territori shqiptar (rritje me 11,1%), dhe 1.793.493 shtetas të huaj kanë dalë nga vendi (rritje me 9,0%).

/e.xh//a.f/

The post INSTAT – Në korrik mbi 1.82 mln të huaj hynë në Shqipëri, hyrjet për biznes u rritën 15.6% appeared first on Agjencia Telegrafike Shqiptare.

TIRANË, 22 gusht /ATSH/ Numri i transaksioneve të realizuara me home banking arriti në 4,3 milionë, në 5-mujorin e parë të këtij viti duke shënuar një rritje me 21% në krahasim me të njëjtën periudhë të 2024, bëri të ditur Banka e Shqipërisë.

Sipas statistikave të BSH-së, paralelisht me numrin rritje ka shënuar edhe shuma e transaksioneve që kapi një vlerë rekord prej 1 miliardë lekësh.

Krahasur me janar-maj 2024, shuma e transaksionve u rrit me 14,7% këtë vit.

Home banking, i quajtur ndryshe si bankingu në shtëpi, përdoret për të kryer transferta parash, paguar taksat, faturat e energjisë elektrike, ujit, të telefonit, gjobat e policisë, pagesat e kartës së kreditit dhe të tjera, pa qenë nevoja e paraqitjes në degët fizike të bankave.

Klientët e bankave mund të kenë qasje në këto shërbime bankare kudo që ndodhen për sa kohë që kanë internetin.

Rritja e transaksioneve që kryhen përmes aplikacioneve ose faqeve online të bankave është një tregues i digjitalizimit të shërbimeve bankare, ndërsa rrit edhe më tepër përfshirjen financiare të qytetarëve, si dhe transparencën e veprimeve bankare.

The post Transaksionet home banking u rritën me 21 % appeared first on Agjencia Telegrafike Shqiptare.

TIRANË, 22 gusht /ATSH/ Drejtoria e Rrugëve Rurale pranë Bashkisë Kukës vijon me investimet e planifikuara për përmirësimin e infrastrukturës rrugore në zonat rurale, me fokus përmirësimin e kushteve të lëvizjes për banorët dhe automjetet.

Aktualisht, janë ndërmarrë ndërhyrje në disa zona të Njësisë Administrative Shishtavec.

Sipas njoftimit të Bashkisë Kukës, në fshatin Shtrezë është realizuar zgjerimi i rrugës, një investim i domosdoshëm që ka përmirësuar ndjeshëm qarkullimin e përditshëm, duke garantuar më shumë siguri, shpejtësi dhe lehtësi në lëvizje për banorët.

Ndërsa në aksin rrugor Çernalevë–Oreshkë janë kryer punime sistemimi dhe riparimi, të cilat kanë ndikuar pozitivisht në përmirësimin e infrastrukturës rrugore dhe në lehtësimin e ndërlidhjes ndërmjet tre fshatrave të zonës.

Këto investime janë pjesë e një strategjie afatgjatë të Bashkisë Kukës për zhvillimin e qëndrueshëm të zonave rurale, si dhe për rritjen e aksesit dhe cilësisë së jetës për komunitetin lokal.

Bashkia Kukës shpreh mirënjohje të veçantë për ekipet e punës në terren, të cilët me përkushtim dhe profesionalizëm po realizojnë projekte që sjellin ndryshime të prekshme në jetën e përditshme të qytetarëve.

1 nga 7

/e.xh/a.f/

The post Vijon puna për përmirësimin e infrastrukturës në Shishtavec appeared first on Agjencia Telegrafike Shqiptare.

TIRANË, 22 gusht /ATSH/ Jugu i Shqipërisë po gjallërohet permes investimeve në restaurimin e trashëgimisë kulturore dhe përmirësimin e infrastrukturës në qytete si Berati, Gjirokastra, Përmeti dhe Saranda.

Banka Botërore në një artikull të publikuar në faqen e saj zyrtare vlerëson se, investimet dhe projektet e ndryshme kanë sjellë nxitjen e turizmit, krijimin e vendeve të punës dhe zhvillim ekonomik, teksa ky realitet i ri po tërheq ish-banorët të kthehen në vendlindjet e tyre dhe po nxit mundësi të reja biznesi dhe zhvillimi.

Sot, gjithçka ka ndryshuar, pasi bashkitë kanë ndërmarrë hapa për të vlerësuar historinë e pasur dhe bukuritë natyrore të zonës, qytete të shpallura Trashëgimi Botërore nga UNESCO, kala antike, arkitekturë osmane, bregdet piktoresk dhe shumë të tjera. Nëpërmjet Projektit për Zhvillimin e Integruar Urban dhe të Turizmit (PIUTD), Qeveria Shqiptare në bashkëpunim me Bankën Botërore, kanë ndihmuar në restaurimin e zonave historike, përmirësimin e infrastrukturës dhe zgjerimin e shërbimeve turistike, duke sjellë mundësi të reja ekonomike dhe vende të reja pune në qytetet e Beratit, Gjirokastrës, Përmetit, Sarandës dhe zonave përreth.

Sipas BB, PIUTD është përqëndruar në restaurimin e 12 zonave kryesore turistike, si Qafa e Pazarit, shëtitorja e Sarandës, kalatë e Beratit, Borshit, Gjirokastrës dhe Kaninës, duke i bërë ato më të aksesueshme. Janë përmirësuar pothuajse 200,000 m² hapësira publike, përfshirë rikonstruksionin e rrugëve me kalldrëm, asfaltimin e rrugëve, rehabilitimin e shesheve dhe vendosjen e tabelave orientuese, trotuareve, ndriçimit, shtigjeve të reja, stolave, rampave dhe pikave të informacionit për vizitorët.

Referuar të dhëneve të INSTAT, Shqipëria regjistroi një rritje prej 82% të numrit të vizitorëve në vitin 2024 krahasuar me vitin 2019. Në jug të vendit shifrat janë edhe më mbresëlënëse, Berati ka pritur gati katërfishin e turistëve dhe Gjirokastra gjashtëfishin, gjatë të njëjtës periudhë.

Ky fluks vizitorësh, i nxitur nga përpjekjet e sektorit publik, po i hap rrugën investimeve nga sektori privat. Sipërmarrjet vendase po zhvillohen, familjet po shndërrojnë shtëpitë karakteristike në bujtina duke krijuar eksperienca kulinarie e kulturore dhe investojnë në infrastrukturë të re si shtigje për ecje dhe biçikleta, autobusë elektrikë, varka dhe së shpejti  zip-line.

Këto sipërmarrje, vlerëson BB, po gjallërojnë fusha si turizmi i aventurës dhe aktivitetet rekreative në natyrë. Që nga fillimi i zbatimit të PIUTD në vitin 2019, numri i bizneseve të lidhura me turizmin në zonën e mbështetur nga projekti është më shumë se dyfishuar.

Ky ekosistem në rritje i sipërmarrjeve private po zgjat sezonin turistik në jug të vendit, po diversifikon burimet e të ardhurave të banorëve dhe po i kthen vendet e restauruara të trashëgimisë kulturore në qendra ekonomike plot jetë.

E gjithë kjo veprimtari ekonomike ka qenë një pikë kthese për tregun e punës në rajon, sidomos në sektorët e mikpritjes, turizmit dhe transportit. Me rëndësi është fakti se kjo rritje është gjithëpërfshirëse, më shumë se gjysma e vendeve të reja të punës u përkasin personave që shpesh përjashtohen nga tregu i punës, si gratë, të rinjtë dhe personat me aftësi të kufizuara.

Kristi Magllara, e kthyer në Sarandë pas 15 vitesh në Gjermani dhe Austri, sot menaxhon biznesin familjar në turizëm shprehet se, “Kur pashë zhvillimin e turizmit në Shqipëri, mendova se kishte ardhur momenti i duhur për t’u rikthyer në shtëpi, për të zhvilluar biznesin familjar dhe për të sjellë ide të reja”, tha ajo.

Ky rikthim po i jep frymëmarrje të re komuniteteve dhe po ndihmon në vazhdimin e ciklit të investimeve dhe zhvillimit që po rigjallëron Jugun e Shqipërisë.

BB vlerëson se ky është një model për zhvillim të qëndrueshëm

Projekti po ruan asetet natyrore dhe kulturore të Shqipërisë, duke nxitur rritjen ekonomike. Nga restaurimi i Kalasë së Gjirokastrës, te investimet në infrastrukturë publike, ekoturizëm dhe shërbime për vizitorët, qëndrueshmëria është pjesë e çdo ndërhyrjeje të PIUTD.

Gjithashtu, bizneset kanë fituar përvojë dhe aftësi të reja, duke krijuar njësi të turizmit për të siguruar zhvillimin afatgjatë të sektorit.

Sipas BB, përvoja e zhvillimit të Jugut të Shqipërisë tregon se si ruajtja e trashëgimisë dhe zhvillimi i turizmit kulturor, të mbështetur nga komunitetet e fuqizuara dhe partnerët ndërkombëtarë, mund të krijojnë vende pune, të nxisin investime dhe të gjenerojnë transformim ekonomik.

“Duke investuar në të shkuarën, Shqipëria po ndërton një të ardhme më të begatë”, thekson BB.

1 nga 3

/e.xh//a.f/

The post BB: Turizmi mbi trashëgiminë kulturore në Shqipëri, po nxit investime dhe transformim ekonomik appeared first on Agjencia Telegrafike Shqiptare.

TIRANË, 22 gusht /ATSH/ Ministrja e Bujqësisë dhe Zhvillimit Rural, Anila Denaj, bëri të ditur se eksportet e peshkut të freskët shënuan një rritje prej 23% gjatë periudhës janar–qershor 2025, krahasuar me të njëjtën periudhë të një viti më parë.

Në 6-mujorin e parë të këtij viti u eksportuan 5 615 tonë peshk i freskët, kundrejt  4 558 tonëve peshk që u eksportuan në të njëjtën periudhë vitin e kaluar.

Ministrja tha se, “kjo rritje reflekton përkushtimin e peshkatarëve shqiptarë për të sjellë në treg produkte cilësore MadeinAlbania, si dhe ndikimin pozitiv të politikave mbështetëse të ndërmarra nga qeveria”.

Sipas saj, masat përfshijnë naftën pa taksa, rinovimin e flotës së peshkimit, si dhe investimet në motorë dhe pajisje frigoriferike, të cilat garantojnë freskinë dhe cilësinë e produkteve peshkore dhe rrisin konkurrueshmërinë në tregjet ndërkombëtare.

Ministrja Denaj theksoi gjithashtu objektivin për të arritur 30 mijë tonë produkte peshkore deri në vitin 2030.

“Për të mbështetur këtë zhvillim, përmes Skemës Kombëtare të Investimeve 2025, e cila ka aplikimet e hapura deri më 30 shtator, ofrohet: 50% grant për akuakulturën, rrjetat dhe koshat e rritjes së peshkut; Kredi e butë me interes 2%; Garanci sovrane deri në 70% të kolateralit”, u shpreh Denaj.

Këto masa synojnë modernizimin dhe zgjerimin e sektorit të peshkimit dhe akuakulturës në Shqipëri.

/e.xh//a.f/

The post Denaj: Rritje me 23% e eksporteve të peshkut, 5 615 tonë në gjashtë muaj appeared first on Agjencia Telegrafike Shqiptare.

TIRANË, 21 gusht /ATSH/ Drejtoria e Përgjithshme e Doganave ka nisur hartimin e një Strategjie të re për Zhvillimin e Sistemeve Digjitale Doganore, në bashkëpunim me AKSHI-n, UNCTAD dhe me asistencën teknike të DG TAXUD të Komisionit Evropian.

Kjo strategji është pjesë e procesit të integrimit në Bashkimin Evropian dhe synon përafrimin e sistemeve dhe legjislacionit doganor me Kapitullin 29 – Bashkimi Doganor.

Në një njoftim për shtyp sot, Drejtoria e Përgjithshme e Doganave bën të ditur se, gjatë mbledhjes së fundit të Grupit të Përhershëm të Punës, u diskutuan tri shtyllat kryesore të digjitalizimit: Sistemet qendrore transevropiane, për shkëmbim certifikatash, kontroll importi dhe menaxhim risku; Sistemet e decentralizuara transevropiane, përfshirë NCTS dhe zhdoganimin e centralizuar; Sistemet kombëtare, të zhvilluara nga Shqipëria, si njoftimi i mbërritjes, magazinimi i përkohshëm dhe sistemi kombëtar i importit.

“Kjo strategji synon të transformojë doganën shqiptare në një strukturë moderne, transparente dhe të integruar me tregun e përbashkët evropian, duke lehtësuar procedurat tregtare dhe garantuar siguri më të madhe në shkëmbimet ndërkombëtare”, thuhet në njoftimin e DPD-së.

1 nga 4

/r.e//s.g/

The post Dogana drejt digjitalizimit sipas standardeve të BE: Strategji e re për sistemet IT doganore appeared first on Agjencia Telegrafike Shqiptare.

TIRANË, 21 gusht /ATSH/ Përmes Skemës Kombëtare të Investimeve 2025 qeveria po nxit investimet në agroturizëm dhe sektorin bujqësor, duke ofruar deri në 50% grant, deri në 15 milionë lekë për subjekt, për investime që përfshijnë edhe instalimin e paneleve fotovoltaike.

Agjencia për Zhvillimin Bujqësor dhe Rural bën të ditur se kjo masë synon rritjen e kapaciteteve prodhuese dhe uljen e kostove për bizneset rurale, duke garantuar energjisë të qëndrueshme dhe të mjaftueshme deri në 110% të nevojave energjetike të objektit.

Sipas AZHBR-së, subjektet përfituese mund të sigurojnë financim të plotë falë kombinimit të grantit me Kredi të Butë (me interes vetëm 2%) dhe garanci sovrane prej 70% të kolateralit.

Aplikimet janë të hapura deri më 30 shtator 2025 në zyrat e AZHBR, në kuadër të 9 masave mbështetëse për sektorin bujqësor dhe agroturizmin.

Kjo nismë synon të përshpejtojë kalimin drejt një ekonomie rurale më të gjelbër dhe të vetëqëndrueshme, duke kthyer zonat rurale në burim të qëndrueshëm zhvillimi dhe punësimi.

/r.e//a.f/

The post Skema Kombëtare e Investimeve 2025: Deri në 50% mbështetje për agroturizëm dhe energji të rinovueshme appeared first on Agjencia Telegrafike Shqiptare.