UASHINGTON, 1 gusht /ATSH/- Presidenti i SHBA-së, Donald Trump tha se ka urdhëruar zhvendosjen e dy nëndetëseve bërthamore “në rajonet e duhura” në përgjigje të deklaratës provokuese të ish-presidentit rus, Dmitry Medvedev, sipas BBC.

“Këto deklarata të pamenduara dhe nxitëse janë më shumë se kaq. Fjalët janë shumë të rëndësishme dhe shpesh mund të çojnë në pasoja të padëshiruara, shpresoj se ky nuk do të jetë një nga këto raste”, tha Trump në media sociale.

Presidenti i SHBA-se nuk dha detaje se ku do të dislokoheshin dy nëndetëset bërthamore.

Medvedev ka postuar disa komente ditët e fundit duke kërcënuar SHBA-në në përgjigje të ultimatumit të Trump ndaj Moskës për të rënë dakord për një armëpushim në Ukrainë, përndryshe do të përballej me sanksione të ashpra.

Presidenti i SHBA-së, Donald Trump iu përgjigj dje ish-presidentit rus dhe zëvendëskryetarit të Këshillit të Sigurisë Dmitry Medvedev, i cili paralajmëroi në X disa ditë më parë se “çdo ultimatum i SHBA-së ishte një hap drejt luftës”.

“Ish-presidenti i dështuar i Rusisë, i cili ende mendon se është president, duhet të ketë kujdes se çfarë thotë”, tha Trump.

“Ai po hyn në një territor shumë të rrezikshëm. Nuk më intereson se çfarë bën India me Rusinë”, tha presidenti i SHBA-se në “Truth Social”.

Në përgjigje të thirrjes së fundit të Trump drejtuar Medvedev që “të tregohej i kujdesshëm me fjalët e tij”, pasi zyrtari rus kritikoi kërcënimet e SHBA-së për tarifa dhe sanksione, zëvendëskryetari i Këshillit të Sigurimit tha në Telegram: “Nëse disa fjalë të ish-presidentit rus provokojnë një reagim kaq nervoz tek një president kaq i frikshëm amerikan, kjo do të thotë se Rusia ka të drejtë për gjithçka dhe do të vazhdojë të ndjekë rrugën e saj”.

“Trump duhet të kujtojë se sa e rrezikshme mund të jetë e famshmja “Dead Hand”, tha Medvedev – duke iu referuar sistemit gjysmëautomatik të kontrollit të armëve bërthamore të epokës së Luftës së Ftohtë – i cili u ndërtua nga Bashkimi Sovjetik – i projektuar për të garantuar një sulm hakmarrës nëse lidershipi i Moskës shkatërrohej.

Sistemi mbetet në përdorim në Federatën Ruse post-sovjetike. //a.i/

The post SHBA – Trump urdhëron zhvendosjen e dy nëndetëseve bërthamore pas deklarates së ish-presidentit rus appeared first on Agjencia Telegrafike Shqiptare.

BRUKSEL, 1 gusht /ATSH/- Zyrtarët kanë konfirmuar se vulat në pasaportat e njerëzve do të zëvendësohen me kontrolle biometrike për njerëzit që udhëtojnë brenda dhe jashtë BE-së nga 12 tetori, sipas BBC.

Sistemi i Hyrjes/Daljes (EES) do të zëvendësojë kontrollet aktuale në letër dhe do të thotë se pasagjerët nga Mbretëria e Bashkuar do të duhet të skanojnë gjurmët e gishtërinjve dhe fytyrën për të kaluar një kufi të BE-së.

Skema do të zbatohet në të gjitha vendet anëtare gjatë gjashtë muajve, që do të thotë se nuk do të zbatohet plotësisht deri më 10 prill 2026.

Ky vendim pritej të hynte në fuqi nëntorin e kaluar, por është përballur me vonesa teknologjike.

Sipas sistemit të ri, qytetarët nga vendet jo anëtare të BE-së, përfshirë britanikët – do të duhet të regjistrojnë të dhënat e tyre biometrike së bashku me të dhënat e pasaportës së tyre për të hyrë në një vend të BE-së.

Kushdo që refuzon të japë të dhënat biometrike do t’i mohohet hyrja në BE.

Aktualisht, udhëtarët duhet t’ia paraqesin pasaportën e tyre një zyrtari kufitar për t’u kontrolluar dhe vulosur.

Të dhënat do të mblidhen në pikën e nisjes – qoftë në një aeroport, port apo stacion treni – ku do të ketë kabina të dedikuara për skanimin e gjurmëve të gishtërinjve dhe për të bërë një foto.

Ky regjistrim do të jetë i vlefshëm për tre vjet dhe do të thotë se në udhëtimet e mëvonshme, oficerët kufitarë do të duhet vetëm të verifikojnë të dhënat biometrike të një personi, gjë që BE tha se do të marrë më pak kohë.

Personat me pasaporta elektronike do të jenë gjithashtu në gjendje të përdorin portat elektronike.

Nuk ka kosto për regjistrimin në EES.

Për shumicën e turistëve, të dhënat digjitale do të mbahen vetëm për tre vjet e një ditë – por për ata që kalojnë kufirin 90-ditor pa vizë, të dhënat e tyre do të mbahen për pesë vjet.

Sistemi synon të forcojë sigurinë kufitare, por ka ngritur shqetësime për radhë të gjata.

Qeveria e Britanisë së Madhe ka paralajmëruar udhëtarët të jenë të përgatitur të presin gjatë kohërave të ngarkuara – kur të fillojë skema, pasi kontrollet do të zgjasin disa minuta për t’u përfunduar.

Megjithatë, BE ka thënë se, pasi të zbatohet, EES do të shkurtojë pritjet në kufi duke mundësuar kontrolle më të shpejta dhe duke u lejuar pasagjerëve të japin informacionin e tyre paraprakisht.

Që kur Britania e Madhe u largua nga BE-ja, aeroportet në shumë destinacione të njohura evropiane për pushime kanë përjetuar radhë të gjata udhëtarësh britanikë pasi pasaportat e tyre i janë nënshtruar kontrollit. //a.i/

The post BRUKSEL – Sistemi biometrik do të zëvendësojë vulat në pasaporta në kufirin e BE-së nga 12 tetori appeared first on Agjencia Telegrafike Shqiptare.

PRISHTINË, 1 gusht/ATSH/ Sunny Hill Festival është ngjarja më e madhe muzikore dhe kulturore që zhvillohet nga sot deri më 3 gusht dhe tashmë ka nisur ardhja e vizitorëve të shumtë.

Ky festival do të ofrojë një linjë të jashtëzakonshëm, me disa nga emrat më të mëdhenj të muzikës botërore si Dua Lipa, Fatboy Slim, Shawn Mendes, Mochakk, Anyma, Peggy Gou dhe shumë artistë të tjerë nga Kosova dhe rajoni si Ledri Vula, Era Istrefi, Ardian Berisha, Lyrical Son, Ari Lokaj, Loredana, Tayna e shumë të tjerë.

Sunny Hill është më shumë se një festival muzikor – është një ngjarje që bashkon kulturën, artin dhe energjinë e brezit të ri të Kosovës.

Kujtojmë, ky festival ka nisur të mbahet që nga viti 2018 dhe vazhdimisht po zgjon interesim të madh te të gjithë artdashësit. Festivali është organizuar nga këngëtarja e madhe Dua Lipa dhe babai i saj Dukagjin Lipa.

The post Çdo gjë gati për fillimin e Sunny Hill Festival 2025 në Kosovë appeared first on Agjencia Telegrafike Shqiptare.

TIRANË, 1 gusht /ATSH/ Pas aksionit për prishjen e ndërtimeve pa leje, Thethi vijon të mbetet destinacioni turistik që përmbush pritshmëritë e turistëve dhe vizitorëve me panoramat e rralla që ofron.

Së fundmi, po kthehet në trend zgjedhja për shumë çifte që duan një ceremoni martesore të veçantë, mes ajrit të pastër të Alpeve Shqiptare.

Kryeministri Edi Rama, e konsideron Thethin, si kurorën e artë të Shqipërisë, ndërsa ndau sot pamje të një ceremonie martesore të zhvilluar në qendër të Thethit, në kishën ikonike të fshatit turistik.

Zona përpara kishës së famshme në Theth, i është rikthyer tashmë komunitetit dhe banorëve, ndërsa po kthehet edhe në një gjetje për organizimin e eventeve të ndryshme.

IKMT prishi mbi 100 struktura pa leje të ndërtuara nga 40 subjekte në Theth.

I ndodhur 70 km larg Shkodrës, Thethi është një nga destinacionet më të preferuar të turistëve në të gjitha stinët, por veçanërisht gjatë sezonit të verës.

Pasuritë natyrore të kësaj zone janë të lidhura së bashku edhe me trashëgiminë kulturore dhe historike të banorëve vendas, duke formuar kështu, bazat më të rëndësishme për zhvillimin e turizmit.

/e.i/

The post Rama ndan pamjet: Thethi, kurora e artë e Shqipërisë appeared first on Agjencia Telegrafike Shqiptare.

BRUKSEL, 1 gusht /ATSH-AA/ – Ndërsa temperaturat e larta po vazhdojnë në disa rajone të Evropës, veçanërisht në vendet me dalje në Detin Mesdhe, shumë shtete vazhdojnë të përballen me zjarre pyjore për shkak të të nxehtit.

Sipas mediave kombëtare në Portugali, rreth 2 mijë zjarrfikës po luftojnë aktivisht me zjarret në mbarë vendin. Autoritetet raportojnë se zjarri në Ponte da Barca nuk është vënë ende nën kontroll dhe dhjetëra persona janë evakuuar nga zona.

Kryetari i Bashkisë së Ponte da Barcas, Augusto Marinho në një deklaratë për televizionin shtetëror RTP, tha se të paktën 19 persona janë lënduar si pasojë e zjarrit. Ai theksoi se operacionet e shuarjes po vazhdojnë dhe se situata mbetet shumë e rrezikshme.

Sipas të dhënave të publikuara nga Instituti i Deteve dhe Atmosferës i Portugalisë (IPMA), deri më 6 gusht parashikohet një valë e fortë e të nxehtit në gjithë vendin, me temperatura që pritet të lëvizin nga 36 deri në 44 gradë Celsius.

Në Spanjë, zjarri në rajonin Las Hurdes është vënë nën kontroll pas ndërhyrjes së ekipeve edhe gjatë natës së kaluar. Megjithatë, operacionet po vazhdojnë për të parandaluar rindezjen e zjarreve në disa zona të vendit.

Në Bullgari, brenda 24 orëve të fundit ka pasur ndërhyrje në 60 vatra të vogla zjarri.

– Rreth 292 mijë hektarë tokë e djegur në Evropë

Paralajmërimet thonë se rreziku nga zjarret në pyje do të vazhdojë edhe në ditët në vijim, veçanërisht në vendet që kanë dalje në Detin Mesdhe.

Sipas të dhënave nga Sistemi Evropian i Informacionit për Zjarret Pyjore (EFFIS) dhe Shërbimi i Ndryshimeve Klimatike Copernicus, që nga fillimi i vitit 2025 janë regjistruar 1.339 zjarre në Evropë, një rritje krahasuar me 900 zjarret në të njëjtën periudhë të vitit të kaluar.

Këtë vit, rreth 292 mijë hektarë tokë janë djegur si pasojë e zjarreve pyjore në kontinent, ndërsa vitin e kaluar kjo shifër ishte rreth 139 mijë hektarë.

– Shumë vende në nivel “shumë ekstrem” rreziku

Sipas Hartës së Rrezikut nga Zjarret të përgatitur nga Indeksi i Kushteve të Motit për Zjarret (FWI) për periudhën 28 korrik-4 gusht, shumë vende janë të kategorizuara në nivele rreziku “shumë ekstrem”, “ekstrem”, “shumë i lartë” dhe “i lartë”, të paraqitura me ngjyra të kuqe.

Sipas të dhënave të hartës, parashikohet që rreziku i zjarreve të ulet në Italinë e jugut, Ballkan, Greqi, Bullgari, Rumani dhe Turqi, por në disa rajone do të mbetet ende në nivele “ekstreme” ose “shumë ekstreme”.

Gjithashtu, parashikohet që rreziku i zjarreve të rritet në lindje të Finlandës, Portugali, Spanjë dhe në jug të Francës.   /os/

The post FOKUS – Evropa vazhdon të përballet me temperatura të larta dhe zjarre appeared first on Agjencia Telegrafike Shqiptare.

MOSKË, 1 gusht /ATSH/- Presidenti rus Vladimir Putin tha sot se Rusia ka filluar prodhimin e raketave të saj më të reja hipersonike dhe rikonfirmoi planet e saj për t’i dislokuar ato në Bjellorusinë aleate, këtë vit.

I ulur përkrah presidentit të Bjellorusisë, Alexander Lukashenko në ishullin Valaam pranë Shën Peterburgut, Putini tha se ushtria tashmë ka zgjedhur vendet e dislokimit për raketën balistike me rreze të mesme veprimi “Oreshnik”, në Bjellorusi.

“Puna përgatitore është duke vazhduar dhe ka shumë të ngjarë që ne do ta përfundojmë atë para fundit të vitit”, tha Putin, duke shtuar se seria e parë e “Oreshnik” dhe sistemet e tyre janë prodhuar dhe kanë hyrë në shërbimin ushtarak.

Rusia e përdori për herë të parë “Oreshnik”, që në rusisht do të thotë “pemë lajthie”, kundër Ukrainës në nëntor, kur qëlloi armën eksperimentale në një fabrikë në Dnipro që ndërtonte raketa kur Ukraina ishte pjesë e Bashkimit Sovjetik.

Ai e paralajmëroi Perëndimin se Moska mund ta përdorte atë kundër aleatëve të Ukrainës në NATO, të cilët i lejuan Kievit të përdorte raketat e tyre me rreze të gjatë veprimi për të sulmuar brenda Rusisë.

Shefi i forcave raketore të Rusisë ka deklaruar se Oreshnik, i cili mund të mbajë koka luftarake konvencionale ose bërthamore, ka një rreze veprimi që i lejon asaj të arrijë në të gjithë Evropën.

Vjeshtën e kaluar, Putini dhe Lukashenko nënshkruan një traktat që i jepte Bjellorusisë garancitë e sigurisë nga Moska, duke përfshirë përdorimin e mundshëm të armëve bërthamore ruse për të ndihmuar në sprapsjen e çdo agresioni.

Pakti vjen pas rishikimit të doktrinës së saj bërthamore nga Kremlini, i cili për herë të parë e vendosi Bjellorusinë nën ombrellën bërthamore ruse mes tensioneve me Perëndimin për shkak të konfliktit në Ukrainë.

Vendosja e armëve taktike bërthamore në Bjellorusi, e cila ka një kufi prej 1,084 kilometrash (673 milje) me Ukrainën, do t’u lejonte avionëve dhe raketave ruse të arrinin objektivat e mundshme më lehtë dhe shpejt – nëse Moska vendos t’i përdorë ato.

Gjithashtu zgjeron aftësinë e Rusisë për të synuar disa aleatë të NATO-s në Evropën Lindore dhe Qendrore.

Doktrina bërthamore e ripërpunuar që Putini nënshkroi vjeshtën e kaluar thotë – se Moska mund të përdorë armë bërthamore “në përgjigje të përdorimit të armëve bërthamore – dhe llojeve të tjera të shkatërrimit në masë” kundër Rusisë ose aleatëve të saj –  si dhe “në rast agresioni” kundër Rusisë dhe Bjellorusisë me armë konvencionale që kërcënojnë “sovranitetin dhe/ose integritetin e tyre territorial”. //a.i/

The post MOSKË – Putin: Raketa hipersonike e Rusisë ka hyrë në shërbim dhe do të dislokohet në Bjellorusi appeared first on Agjencia Telegrafike Shqiptare.

TIRANË, 1 gusht /ATSH/ Minstrja e Turizmit dhe Mjedisit, Mirela Kumbaro përcolli sot pamje nga aksioni për pastrimin e aksit kombëtar, Gjirokastër-Tepelenë.

Ministrja Kumbaro tha se “rruga nuk është kosh”, ndërsa theksoi se po vazhdon lufta me mbetjet edhe në akset kombëtare.

Kumbaro u shpreh se “anët e rrugëve shndërrohen në kosha plehrash për mbetjet e të paudhëve që nuk u dhimbset shëmtia dhe dëmi që shkaktojnë”.

Ministrja Kumbaro cilësoi se aksi Gjirokastër-Tepelenë përshkohet nga mijëra udhëtarë e vizitorë çdo ditë, teksa ritheksoi thirrjen që të denoncohet në Policinë e Shtetit çdo rast i ndotjes nga makinat, pasi çdo ndotje është krim mjedisor”.

/e.i/j.p/

The post Kumbaro: Aksion pastrimi në aksin Gjirokastër-Tepelenë appeared first on Agjencia Telegrafike Shqiptare.

BUDAPEST, 1 gusht /ATSH-AA/ – Emocionet e Kampionatit Botëror të Formula 1 do të vazhdojnë me fazën e 14-të të sezonit, me Çmimin e Madh (Grand Prix) të Hungarisë.

Gara, e cila do të zhvillohet në pistën 4,3-kilometrëshe Hungaroring në kreqytetin e Belgjikës, Budapest, do të zhvillohet në 70 xhiro.

Raundet kualifikuese do të fillojnë nesër në orën 16:00. Gara do të zhvillohet të dielën, më 3 gusht, në orën 15:00.

Deri më tani në sezon, piloti i McLaren, Oscar Piastri, ka fituar 6 gara, Lando Norris 4 gara, piloti i Mercedes George Russell 1 garë, ndërsa kampioni në fuqi i Red Bull, Max Verstappen, ka 2 fitore në gara.

Renditja e 5 pilotëve dhe ekipeve më të mira përpara Çmimit të Madh të Hungarisë është si më poshtë:

Pilotët:

1. Oscar Piastri (Australi): 266 pikë

2. Lando Norris (Britani e Madhe): 250

3. Max Verstappen (Holandë): 185

4. George Russell (Britani e Madhe): 157

5. Charles Leclerc (Monako): 139

Ekipet:

1. McLaren: 516

2. Ferrari: 248

3. Mercedes: 220

4. Red Bull: 192

5. Williams: 70   /os/

The post F1 – Hungaria, ndalesa e radhës appeared first on Agjencia Telegrafike Shqiptare.

TEL AVIV, 1 gusht /ATSH-DPA/- Dy zyrtarë të lartë të administratës Trump vizituan sot vendin e shpërndarjes së ndihmave në Rripin e Gazës, ndërsa aleati i ngushtë i Uashingtonit, Izraeli, përballet me një protestë ndërkombëtare për urinë e përhapur në territorin palestinez – të shkatërruar nga lufta.

I dërguari special i presidentit Donald Trump, Steve Witkoff dhe ambasadori i SHBA-së në Izrael, Mike Huckabee vizituan një vend të drejtuar nga Fondacioni Humanitar i Gazës (GHF), i cili mbështetet nga SHBA-ja dhe Izraeli.

Huckabee ndau foto të vizitës në X, duke e quajtur punën e GHF-së “të pabesueshme”.

“Ne morëm informacione nga Forcat Mbrojtëse të Izraelit dhe folëm me njerëzit në terren”, shkroi ai.

Huckabee tha se qëllimi i vizitës në Gazë me Witkoff ishte për të “mësuar të vërtetën” rreth situatës humanitare – pas 21 muajsh lufte.

Zëdhënësja e Shtëpisë së Bardhë, Karoline Leavitt njoftoi dje në mbrëmje se dy zyrtarët do ta shfrytëzonin vizitën për të ndihmuar në “sigurimin e një plani për të shpërndarë më shumë ushqim” në Gazë.

Me ndihmën e kontraktorëve amerikanë, GHF shpërndan ndihma humanitare përmes kanaleve që anashkalojnë agjencitë e OKB-së, të cilat prej kohësh kanë luajtur një rol kryesor në shpërndarjen e ushqimit, barnave dhe furnizimeve për palestinezët.

Ka raportime të shpeshta për palestinezë të uritur që vriten ndërsa përpiqen të kenë akses në ushqim në vendet e shpërndarjes së GHF-së.

Presidenti i SHBA-së, Donald Trump tha të hënën se në Gazë po ndodhte “uri e vërtetë”.

Izraeli ka kufizuar ndjeshëm shpërndarjen e ndihmës për muaj të tërë, duke lejuar pak ose aspak akses humanitar në territorin bregdetar, megjithëse kufizimet e tij janë lehtësuar ditët e fundit. //a.i/

The post GAZË – Zyrtarët e Trump vizitojnë vendet e shpërndarjes së ndihmës appeared first on Agjencia Telegrafike Shqiptare.

TIRANË, 1 gusht /ATSH/ Dita e djeshme, 31 korrik ishte edhe afati i fundit për lirimin vullnetar të hapësirave nga subjektet e vendosura pranë akseve kombëtare, duke respektuar distancat e përcaktuara në ligj.

Zëvendëskryeministrja, njëherësh ministre e Infrastrukturës dhe Energjisë, Belinda Balluku u shpreh sot se për tetë ditë është zhvilluar një fushatë këshillimore nga ARRSH dhe IKMT, duke pasur edhe raste konkrete të bashkëpunimit të subjekteve me trupat në terren.

“Mjafton t’ju tregoj një rast në aksin rrugor Kombinat-Plepa, ku subjekti ka ndërmarrë tërheqjen dhe respektimin e distancës nga trupi i aksit kombëtar, si dhe sistemimin estetik të zonës ku operon. Ky është një shembull i mirë për t’u ndjekur kudo”, tha Balluku.

Balluku, gjithashtu, përgëzoi të gjithë subjektet që operojnë në aksin nga Gjirokastra në Levan, pasi pas inspektimeve atje me inxhinierët e ARRSH-së dhe inspektorët e IKMT-së, nuk është evidentuar asnjë shkelje në këtë territor.

“Bëjmë me dije se nga ky moment IKMT, mbështetur nga Policia e Shtetit, do të ndërmarrë masa konkrete për respektimin e distancave nga akset kombëtare. Çka po ndodh sot në territorin e Shqipërisë, nuk është një aksion kundër tendave, ashtu siç thuhet, është një reformë e thellë për lirimin e hapësirave publike dhe respektimin e rregullave dhe ligjeve të mbrojtjes së territorit në Republikën e Shqipërisë”, vijoi Balluku.

Zëvendëskryeministrja nënvizoi se bëhet fjalë për një “reformë që nuk lë jashtë vëmendjes as tendat, as oborret e përbashkëta të pallateve të zaptuara e të kthyera në parkingje dhe as TEC-et e ndërtuara në mënyrë të paligjshme në territoret e vendburimeve shqiptare, pavarësisht mohimit qesharak të ekzistencës së tyre apo mbrojtjes akoma më qesharake nga segmente të paguara për të goditur të mirën publike”.

Balluku falënderoi qytetarët pë bashkëpunimin, të cilin ajo e cilësoi si të shkëlqyer gjatë gjithë kësaj periudhe, ndërsa i inkurajoi ata që të vijojnë denoncimet, në vazhdim edhe përmes një platforme të dedikuar, platforma ‘Hapësira ime’ që është njoftuar nga Kryeministri, Edi Rama.

Në fund të mesazhit, Balluku i siguroi qytetarët se të gjitha institucionet janë në krye të detyrës në çdo skaj të vendit për të garantuar cilësisht shërbime më të mira për qytetarët shqiptarë dhe vizitorët e shumë të huaj që ndodhen këtë sezon në vendin tonë.

/e.i/

The post Lirimi i hapësirave publike, Balluku: Nga sot, masa konkrete për respektimin e distancave nga akset kombëtare appeared first on Agjencia Telegrafike Shqiptare.

TIRANË, 1 gusht /ATSH/ Ministrja e Bujqësisë dhe Zhvillimit Rural, Anila Denaj u shpreh sot se Qeveria Shqiptare synon ndërtimin e një konsorciumi për vajin e ullirit, duke bashkuar 50 fermerë dhe prodhues të vajit në një brand shqiptar.

Në një takim me autoritetet lokale të bashkive në Berat, përfaqësues të biznesit të vajit të ullirit dhe ekspertë teknikë nga Banka Botërore, Denaj tha se u diskutua për krijimin e konsorciumit të vajit të ullirit “Berati 2400 vjet”.

Sipas Denajt, ky është një financim nga Qeveria Shqiptare, që synon bashkimin e 50 fermerëve prodhues të ullirit dhe vajit të ullirit në qarkun Berat dhe zonat përreth.

“Objektivi është krijimi i një brendi shqiptar për një nga produktet më autoktone, prodhim me vlerë, cilësi dhe të bashkuar”, u shpreh Denaj.

Ministrja Denaj tha se në këtë takim u ndanë edhe hapa konkretë për forcimin e bashkëpunimit bujqësor në të gjithë Shqipërinë, me 5 bashki pilot për konsorciume të ngjashme në qarqet Fier, Gjirokastër, Elbasan, Lezhë dhe Vlorë.

“Një model bashkëpunimi mes pushtetit vendor dhe fermerëve për të forcuar ekonominë rurale, kapërcyer prodhimin individual dhe garantuar akses më të madh në financim dhe të ardhura për fermerët”, vijoi ajo.

Denaj nënvizoi se të pranishmit u ndalën edhe te Skema Kombëtare e Investimeve 2025, aplikimet e së cilës janë të hapura deri më 30 shtator për investime në sektorin bujqësor me 9 masa mbështetëse.

Ministrja e Bujqësisë dhe Zhvillimit Rural, Anila Denaj në një takim me Ervin Demon dhe kryetar...

1 nga 20

/e.i/

The post Denaj: Synojmë krijimin e konsorciumit të vajit të ullirit “Berati 2400 vjet” appeared first on Agjencia Telegrafike Shqiptare.

TIRANË, 1 gusht /ATSH/ Kryetarja e Kuvendit, Elisa Spirali nderoi sot kujtimin e Dom Ndre Mjedës, i ndarë nga jeta më 1 gusht 1937.

Spiropali e konsideroi Mjedën, si një prej figurave të ndritura të Rilindjes Kombëtare, që i dha kulturës dhe gjuhës shqipe forcë, bukuri, pasuri e dinjitet.

“Vepra e Ndre Mjedës është një gur themeli në ndërtimin e identitetit tonë kombëtar, një zë zgjues i ndërgjegjes së shtypur të shqiptarëve, një mbrojtës si rrallëkush i kulturës dhe i gjuhës sonë. Si mësues, poet, përkthyes, klerik dhe atdhetar, me mendje të ndritur e zemër të naltësuar prej idealeve të shqipes, dijes e lirisë, Ndre Mjeda i shërbeu me dashuri kombit dhe kulturës shqiptare”, tha Spiropali në një postim në rrjetet sociale.

Ndre Mjeda ishte anëtar i Komisionit për hartimin e alfabetit të njësuar të shqipes, në Kongresin e Manastirit, në vitin 1908.

Spiropali tha se trashëgimia e Ndre Mjedës mbetet e gjallë edhe përmes vargjeve të tij plot muzikalitet, elegancë e atdhedashuri, ndërsa ndau një nga poezitë më të njohura të Mjedës, “Gjuha Shqipe”:

Nji kto gjuhë që jam tue ndie,

jan’ të bukra me themel,

por prap’ kjo, si diell pa hije,

për mue t’tanave iu del.

/e.i/j.p/

The post Spiropali përkujton Ndre Mjedën: Vepra e tij, gur themeli në ndërtimin e identitetit tonë kombëtar appeared first on Agjencia Telegrafike Shqiptare.

STAMBOLL, 1 GUSHT /ATSH-AA/ – Presidenti i Turqisë, Recep Tayyip Erdoğan priti kryeministren italiane Giorgia Meloni dhe kryeministrin e Qeverisë së Unitetit Kombëtar të Libisë, Abdulhamid Dibeybe, në kuadër të Samitit të Bashkëpunimit Turqi-Itali dhe Libisë.

Presidenti Erdoğan priti kryeministren italiane Meloni dhe kryeministrin e Qeverisë së Unitetit Kombëtar të Libisë, Dibeybe, me ceremoni zyrtare të ndara në Zyrën Presidenciale Dolmabahçe.

Në takimin me dyer të mbyllura, presidentin Erdoğan e shoqëruan ministri i Jashtëm Hakan Fidan, drejtori i Agjencisë Kombëtare të Inteligjencës, İbrahim Kalın dhe këshilltari kryesor për Politikë të Jashtme dhe Siguri i presidentit, Akif Çağatay Kılıç.   /os/

The post STAMBOLL – Nis punimet samiti Turqi-Itali-Libi appeared first on Agjencia Telegrafike Shqiptare.

ROMË, 1 gusht /ATSH-DPA/- Italia planifikon të evakuojë fëmijët e sëmurë palestinezë nga Rripi i Gazës për trajtim, në kuadër të përkeqësimit të situatës humanitare, tha sot ministri i Jashtëm, Antonio Tajani.

Tajani tha se Roma po punonte për një plan për të dërguar me avion rreth 50 persona, përfshirë të rritur për të shoqëruar fëmijët.

Ai gjithashtu njoftoi se Italiaka planifikuar t’u bashkohet me vendeve të tjera që kanë dërguar ndihma nga ajri mbi Gazë ditët e fundit, megjithëse nuk përmendi një datë specifike.

Italia, gjithashtu ka vendosur të sigurojë 5 milionë euro të tjera (5,7 milionë dollarë) që do të shpenzohen për ushqim për banorët e Gazës.

Avionët nga Izraeli, Jordania dhe Emiratet e Bashkuara Arabe kanë hedhur paleta me ushqime në Gaza që nga e diela, kur Izraeli filloi të lejojë më shumë ndihmë në territoret e mbyllura – pas disa muajsh bllokade, pothuajse totale.

Gjermania dhe Franca gjithashtu bashkuan përpjekjet për të ofruar ndihmë në Gaza – mes paralajmërimeve për një krizë urie.

Megjithëse OKB-ja dhe organizata të tjera ndihme i kanë kritikuar masa të tilla si kryesisht simbolike, duke argumentuar se është dukshëm më pak e kushtueshme dhe më efikase të ofrohet ndihmë nëpërmjet tokës.

Që nga e diela, përveç autorizimit të dërgesave nga ajri, Izraeli ka lejuar hyrjen e rreth 200 kamionëve në ditë nga agjencitë e OKB-së dhe organizata të tjera. //a.i/

The post ROMË – Italia do të evakuojë fëmijët e Gazës për trajtim mjekësor appeared first on Agjencia Telegrafike Shqiptare.

TIRANË, 1 gusht/ATSH/ Bashkimi Evropian konfirmoi sot se ende nuk ka një qëndrim mbi projektamendamentet e Kodit të ri Penal.

Delegacioni i BE-së në Tiranë iu përgjigj interesimit të një medieje mbi këtë çështje ndërsa u shpreh se nuk ka marrë pjesë në hartimin e draftit. Delegacioni i BE-së sqaron se “ka marrë njoftim mbi prezantimin e projektamendamenteve të Kodit Penal, rezultat i punës së një grupi ekspertësh të ngarkuar nga qeveria”.

“Duke qenë se rishikimi i përgjithshëm i Kodit Penal është një proces i rëndësishëm dhe kompleks, me një ndikim të mundshëm afatgjatë në shoqëri dhe në sistemin e drejtësisë, BE-ja nënvizon rëndësinë e garantimit të një konsultimi gjithëpërfshirës dhe të plotë me të gjitha institucionet kryesore të drejtësisë dhe aktorët e shtetit të së drejtës, si dhe me shoqërinë civile, për të garantuar cilësinë më të lartë të legjislacionit që do të miratohet”, u shpreh Delegacioni i BE-së në Tiranë.

BE vlerëson se si pjesë e negociatave të anëtarësimit në Bashkimin Evropian, Shqipëria pritet të ndryshojë një numër dispozitash specifike të Kodit Penal për t’u përafruar standardeve evropiane dhe legjislacionit të BE-së.

“Në periudhën afatshkurtër, BE-ja e inkurajon Shqipërinë t’i japë përparësi atyre ndryshime legjislative që janë të nevojshme për të përmbushur standardet ndërmjetëse të përcaktuara në Qëndrimin e Përbashkët të BE-së për Grup-kapitullin 1 (Themeloret). BE-ja është e gatshme të ofrojë ndihmë teknike në këtë drejtim”, përfundon reagimi i BE-së.

/m.m//r.e//a.f/

The post BE: Nevojitet konsultim gjithëpërfshirës për Kodin e ri Penal appeared first on Agjencia Telegrafike Shqiptare.

TIRANË, 1 gusht /ATSH/ Prokuroria e Posaçme kundër Korrupsionit dhe Krimit të Organizuar ka përfunduar hetimet për një grup të strukturuar kriminal dhe ka dërguar për gjykim 6 persona të dyshuar për vepra të rënda penale.

Sipas njoftimit zyrtar të SPAK, gjashtë personat që dërgohen për gjykim janë Albert Zaja, Edison Muceku, Elvis Ndreca, Armando Ndreca, Deivis Bajramaj dhe Adrian Pikli.

Veprat e rënda në të cilat këta persona janë përshirë, sipas SPAK janë nga tentativë për vrasje ndaj Durim Bamit dhe Ervin Kodrës, te trafiku i drogës dhe tregtia e armëve.

Albert Zaja akuzohet për vrasje në rrethana të tjera cilësuese, kundër dy ose më shumë personave, mbetur në tentativë, me pasojë plagosjen e shtetasve Durim Bami dhe Ervin Kodra, në kuadër të një grupi të strukturuar kriminal.

Edison Muceku, i arrestuar në Mbretërinë e Bashkuar më 10.01.2025 dhe ekstraduar në Shqipëri më 28.03.2025, akuzohet për sigurim të kushteve dhe të mjeteve materiale për të kryer vrasje”, në dëm të shtetasit Hamza Terziu, grup të strukturuar kriminal.

Nga tërësia e veprimeve hetimore të kryera deri më tani, provohet se më 4 nëntor 2020 tek Ura e Tapizës, Fushë Krujë – Albert Zaja dhe persona të tjerë tentuan të vrisnin me armë zjarri shtetasit Durim Bami dhe Ervin Kodra.

Nga aktet hetimore provohet se më datë 01.02.2021, rreth orës 10:00-11:00, në lagjen “Sheq i Madh”, Fier, te vendi i quajtur “rrotontua e Sheqit” është vrarë me armë zjarri shtetasi Shkëlzen Brahim Kastrati, i cili ka qenë duke udhëtuar me mjetin tip Benz me targa AA 871 AN.

Nga hetimet e kryera nga Prokuroria e Posaçme, referuar bisedave të realizuara nga përdoruesit e SkyEÇ të zhvilluara mes anëtarëve të një grupi të strukturuar kriminal, ka dalë në pah organizimi i këtyre shtetasve me qëllim realizimin e vrasjes së shtetasit Kelmend Kastrati, por kanë lajthitur në objekt dhe kanë vrarë shtetasin Shkëlzen Kastrati.

Gjatë hetimit janë evidentuar personat e interesuar dhe porositës, si dhe personat që janë angazhuar për lokalizimin e këtij shtetasi dhe ekzekutorët, ku njëri nga ekzekutorët është dënuar për këtë ngjarje me vendim penal të formës prerë nr. 62-2023-1137 (160), datë 04.04.2023, të Gjykatës së Rrethit Gjyqësor Fier.

Nga hetimi nuk u arrit të provohej që të pandehurit Silvio (Roland) Cara dhe Elmir Tufa të ishin bashkëpunëtorë të këtij grupi të strukturuar kriminal dhe të kishin marrë pjesë në realizimin e veprave penale.

Për anëtarët e tjerë të grupit të strukturuar kriminal të identifikuar apo paidentifikuar nga ana jonë, të përfshirë në vrasjen me armë zjarri më datë 01.02.2021 të shtetasit Shkëlzen Kastrati, po vazhdojnë hetimet paraprake në lidhje me procedimin penal nr.59 të vitit 2022, nga i cili është ndarë dhe procedimi penal nr.59/2, i vitit 2022.

/e.i/j.p/

The post SPAK mbyll hetimet, dërgon për gjykim 6 persona për vepra të rënda penale appeared first on Agjencia Telegrafike Shqiptare.

MOSKË, 1 gusht /ATSH-DPA/- Presidenti rus Vladimir Putin u përpoq sot t’ia kalojë përgjegjësinë Ukrainës për mungesën e progresit në negociatat për t’i dhënë fund luftës që ai nisi më shumë se tre vjet më parë.

Putini tha se mbështet angazhimin në bisedime me Ukrainën, ndersa shtoi se pritshmëritë për rezultate nuk duhet të jenë “të larta”.

Deklarata e tij erdhi gjatë një takimi me udhëheqësin bjellorus Alexander Lukashenko në Valaam, një ishull në veriperëndim të Rusisë.

“Për të arritur një zgjidhje paqësore, na duhen bisedime të plota, jo publike. Kjo duhet të bëhet në heshtje, në heshtjen e “procesit të negociatave”, tha Putin, sipas agjencisë së lajmeve TASS.

“Nëse udhëheqja ukrainase beson se tani nuk është koha, se duhet të presim, atëherë jemi gati të presim”, shtoi ai.

Presidenti rus po i përgjigjej deklaratave të fundit të presidentit ukrainas Volodymyr Zelensky, në të cilat ai tha se negociatat kuptimplote do të ishin të mundura vetëm pas një ndryshimi të pushtetit në Moskë.

Megjithatë, Zelensky sinjalizoi sot se ishte i hapur ndaj dialogut.

Në një postim në X menjëherë pas deklaratës së Putinit, Zelensky shkroi: “Nëse këto janë sinjale të një gatishmërie të vërtetë për t’i dhënë fund luftës me dinjitet dhe për të vendosur një paqe vërtet të qëndrueshme – dhe jo thjesht një përpjekje për të fituar më shumë kohë për luftë ose për të vonuar sanksionet – atëherë Ukraina rikonfirmon edhe një herë gatishmërinë e saj për t’u takuar në nivelin e udhëheqësve në çdo kohë”.

Moska dhe Kievi rifilluan diskutimet e drejtpërdrejta në maj për herë të parë që nga viti 2022.

Tre raundet pasuese të bisedimeve rezultuan në shkëmbime të të burgosurve dhe trupave, por pa ndonjë progres në ndalimin e luftimeve. //a.i/

The post RUSI – Putini fajëson Ukrainën për bllokimin e bisedimeve për armëpushim appeared first on Agjencia Telegrafike Shqiptare.

JERUZALEM, 1 gusht  /ATSH-DPA/ – Gjermania do të ofrojë pesë milionë euro të tjera në ndihmë për popullsinë civile në Rripin e Gazës, tha sot  ministri i Jashtëm Johann Wadephul, në ditën e dytë të vizitës së tij në Izrael dhe Territoret Palestineze.

Wadephul tha se paratë do të shkojnë në Programin Botëror të Ushqimit të OKB-së për t’u përdorur kryesisht për “furra buke dhe mensa për t’u siguruar popullit të Gazës bukë dhe vakte të ngrohta në afat të mesëm”.

”Berlini gjithashtu planifikon të financojë një spital fushor të drejtuar nga Urdhri i Maltës për të ofruar kujdes shëndetësor bazë të nevojshëm urgjentisht në qytetin e Gazës”, shtoi ministri.

Wadephul i bëri thirrje qeverisë izraelite që të rifillojë shpejt bashkëpunimin e ngushtë me Kombet e Bashkuara dhe organizatat e saj në terren për të përmirësuar shpërndarjen e ndihmës humanitare në Rripin e Gazës .

Stafi i OKB-së kishte “treguar qartë se është në gjendje të sigurojë furnizime të mjaftueshme për të gjithë njerëzit në Gaza nëse u lejohet ta bëjnë këtë dhe nëse mund të punojnë në siguri”, tha ai.

Ndërsa diplomati më i lartë i Gjermanisë pranoi se një pjesë e ndihmës mund të përfundojë në duart e grupit ekstremist palestinez Hamas, ai theksoi se “katastrofa humanitare në Rripin e Gazës tani është aq e madhe sa nuk është e justifikuar të krijohen pengesa të mëtejshme këtu”.

”Për më tepër, mënyra më e mirë për të parandaluar abuzimin është të lejohet sa më shumë ushqim dhe ndihmë të jetë e mundur në Rripin e Gazës”, shtoi ai.

Sipas Ministrisë së Jashtme gjermane, ndihma humanitare gjermane për Territoret Palestineze ka arritur në total mbi 330 milionë euro që nga fillimi i luftimeve në Gaza në tetor 2023./  /Ad.Ab./

The post JERUZALEM – Gjermania premton miliona euro të tjera për Gazën appeared first on Agjencia Telegrafike Shqiptare.

TIRANË, 1 gusht /ATSH/ Në gjithë vendin po vijon aksioni për lirimin e hapësirave publike dhe kthimin e ambienteve të përbashkëta komuniteteve.

Përveç lirimit të hapësirave publike në zonat e banuara, aksioni është shtrirë po ashtu në plazhe dhe akset nacionale ku po prishen strukturat pa leje anës rrugëve.

Në vijim të këtyre masave, kryeministri Edi Rama paralajmëroi sot se asnjë lavazh nuk do të qëndrojë mes lagjeve për të larë makinat nëpër trotuare, ndryshe do të gjobiten.

Rama i ftoi subjektet që të marrin leje për një njësi shërbimi normale brenda rregullave, jo për lavazh në rrugë.

“Çuna, respekte po e kuptoni edhe vetë që nuk ecën më kjo punë kështu, apo jo Turi?
Prandaj hiqini vetë këto që mos merrni edhe gjobë dhe po e patët tokën tuaj, merrni leje për një njësi shërbimi normale brenda rregullave jo për lavazh në rrugë. Deri atëherë toka do rrijë bosh dhe pastër në shërbim të komunitetit. Po s’e patët tokën tuaj, në këto hapësira do të mbillen përfundimisht pemë e do të vihen stola apo lodra për fëmijët”, u shpreh Rama.

Lirimi i hapësirave publike shihet si një hap i domosdoshëm për rritjen e shërbimit, funksionalitetit të çdo biznesi dhe sipërmarrjeje në përputhje me standardet kombëtare të mikpritjes dhe shërbimit jo vetëm në zonat turistike, por në çdo cep të Shqipërisë.

Lirimi i hapësirave publike do të jetë në fokus të angazhimit të pushtetit vendor dhe qendror në mbrojtje të komuniteteve.

/m.m//r.e/a.f/

The post Rama: Gjobë për lavazhet në rrugë, subjektet të aplikojnë për leje brenda rregullave appeared first on Agjencia Telegrafike Shqiptare.

/r.e//a.f/

The post Dollari forcohet, euroja humb pikë në këmbim me lekun appeared first on Agjencia Telegrafike Shqiptare.