TIRANË, 22 gusht /ATSH/ Ushtria shqiptare do të pajiset për herë të parë me automjete të lehta shumëfunksionale ‘LMV2’, të prodhuara nga Iveco Defence Vehicles, divizioni ushtarak i kompanisë italiane Iveco.

“Një moment i ri historik për LMV2: Forcat e Armatosura Shqiptare do të pajisen me automjetet tona…”, shkruan ne postimin e saj në Linkedin, Iveco Defence Vehicles.

Njoftimi i saj po ashtu shpjegon se blerja e automjeteve ushtarake do të financohet nga Bashkimi Evropian përmes Fondit Evropian për Paqen, ndërsa zbatimi është marrë përsipër nga Agjencia italiane e Industrive të Mbrojtjes.

“Një moment i ri për LMV2: Forcat e Armatosura Shqiptare do të pajisen me automjete LMV2, në një program të rëndësishëm të financuar nga Bashkimi Evropian në kuadër të Fondit Evropian për Paqen dhe të zbatuar nga Agjencia Industriale e Mbrojtjes së Italisë.

Kjo dërgesë përfaqëson furnizimin e parë të IDV me LMV për Shqipërinë, duke konfirmuar më tej këtë automjet si një nga platformat tona më të besueshme dhe më të përhapura gjerësisht në nivel global, të përzgjedhur nga mbi 15 vende për mbrojtjen, shpejtësinë dhe përshtatshmërinë e tij me misionin’, thuhet në një njoftimin e bërë nga kompania italiane.

Ministria e Mbrojtjes bëri të ditur për ATSH-në se, “Bashkimi Evropian, nëpërmjet Instrumentit Evropian të Paqes (European Peace Facility), i krijuar në mars 2021 dhe që synon forcimin e kapaciteteve të mbrojtjes së vendeve partnere si dhe rritjen e sigurisë rajonale e globale, ka mbështetur Shqipërinë me dy paketa ndihmash me një vlerë totale prej 28 milionë eurosh.

Projektet e miratuara do të mbështesin modernizimin e Forcave të Armatosura të Republikës së Shqipërisë. Paketa e parë e ndihmës, e miratuar në korrik 2024, parashikon pajisjen me mjete të lehta të blinduara (rreth 20 të tilla) me një vlerë prej 13 milionë eurosh.

Ndërsa paketa e dytë, e miratuar së fundmi, në vlerën e 15 milionë eurove, do të pajisë FARSh me mjete transporti dhe inxhinierike shumëfunksionale, me përdorim të dyfishtë si për mbështetjen e operacioneve të BE-së, ashtu edhe për përballimin e emergjencave civile në vend dhe rajon. I gjithë ky proces, nga pikëpamja buxhetore, prokuruese dhe proceduriale, drejtohet dhe ndiqet nga strukturat e BE-së.

Ndihma e re pasqyron përparimin e marrëdhënieve strategjike BE–Shqipëri, të konsoliduara pas nënshkrimit të Partneritetit për Siguri dhe Mbrojtje në dhjetor 2024 dhe nisjes së Dialogut të parë për Sigurinë dhe Mbrojtjen në prill 2025. Ajo vlerëson gjithashtu rolin e Shqipërisë si një partner i ngushtë dhe i qëndrueshëm i BE-së në politikën e jashtme dhe të sigurisë, si kontribuuese në operacionet e BE-së dhe njëkohësisht si aleate e NATO-s.

Sipas ecurisë dhe implementimit të projekteve, media dhe publiku do të mbahen të informuar. Parashikohet që mjetet e para të mbërrijnë në vendin tonë gjatë vitit 2026”.

LMV2 përfaqëson gjeneratën e fundit të modelit të suksesshëm LMV, tashmë i përdorur gjerësisht nga ushtritë e NATO-s.

Ky version sjell mbrojtje të rritur balistike dhe kundër minave, një motor të fuqishëm 220 kuaj fuqi me transmision automatik me 8 shpejtësi, si dhe sisteme të përmirësuara të amortizatorëve dhe rrotave, për t’iu përshtatur terreneve të vështira.

Kabina modulare ofron konfigurime të shumta, nga transporti i trupave deri te përdorimet si ambulancë ose qendër komandimi. Përveç kësaj, LMV2 është i pajisur me teknologji moderne komunikimi, navigimi dhe menaxhimi të betejës, duke siguruar një kombinim të lëvizshmërisë së lartë dhe mbrojtjes së avancuar.

Ky model, tashmë i testuar në misione ndërkombëtare përfshirë Afganistanin, ka zëvendësuar LMV-në e parë në ushtritë e disa vendeve evropiane si Italia, Mbretëria e Bashkuar dhe Norvegjia. Përmirësimet e tij garantojnë mbijetesë më të madhe për ekuipazhin dhe përshtatshmëri të lartë ndaj skenarëve të ndryshëm operativë.

Për Shqipërinë, LMV2 përfaqëson një hap cilësor në modernizimin e kapaciteteve ushtarake, veçanërisht krahasuar me flotën aktuale të automjeteve, si Humvee amerikan apo mjetet e pakta MRAP.

Ky zhvillim e vendos vendin në të njëjtin hap me fqinjët, si Maqedonia e Veriut dhe Mali i Zi, që tashmë kanë investuar në platforma moderne të ngjashme.

Në aspektin strategjik, furnizimi me LMV2 jo vetëm që rrit gatishmërinë dhe aftësitë operacionale të Forcave të Armatosura, por gjithashtu forcon partneritetin e Shqipërisë me NATO-n, BE-në dhe Italinë, duke kontribuar në sigurinë dhe stabilitetin e rajonit të Ballkanit.

/gj.m//a.f/

The post Shqipëria pajiset me automjete të blinduara LMV2, MM për ATSH: Pjesë e paketës së parë të ndihmës nga BE appeared first on Agjencia Telegrafike Shqiptare.

Nga Basir Çollaku Nëse hetohet, brenda sistemit të drejtësisë del një organizatë e cila mund dhe duhet të dënohet. Gjithnjë nëse. Ku? Në prokurori, gjyqësor, polici, Këshillin e Prokurorisë, gjyqësor, Gjykatën e Lartë, atë Kushtetuese dhe të rangjeve të tjera më të ulëta. Pas mbylljes së USAID, hetimeve të fondeve të përdorura me dedikim për […]

The post Drejtësia, fitoi Fronti i Lindjes, financoi Fronti i Perëndimit appeared first on BoldNews.al.

TIRANË, 5 gusht /ATSH/ Një investim strategjik për modernizimin e infrastrukturës hekurudhore shqiptare po bëhet realitet falë mbështetjes së Banka Evropiane për Rindërtim dhe Zhvillim (BERZH), Bashkimit Evropian (BE) dhe Bankës Evropiane të Investimeve (BEI).

Projekti përfshin rindërtimin dhe elektrifikimin e linjës hekurudhore Durrës–Rrogozhinë, një segment i rëndësishëm i Korridorit VIII Panevropian.

BERZH në një njoftim për shtyp bën të ditur se, ka miratuar një kredi sovrane prej 30 milionë euro për kompaninë shtetërore Hekurudha Shqiptare, duke plotësuar një kredi tjetër prej 30 milionë euro nga BEI dhe 60 milionë euro në formë grantesh dhe asistence teknike nga BE përmes Kornizës së Investimeve në Ballkanin Perëndimor.

Projekti përfshin: Rindërtimi dhe elektrifikimi i rreth 34 kilometrave hekurudhë; Përmirësimi i infrastrukturës së stacioneve; Rritje e efikasitetit dhe sigurisë në transport; dhe Zhvillimin e një lidhjeje të parë hekurudhore të Shqipërisë me Maqedoninë e Veriut

Ky projekt pritet të sjellë përfitime të rëndësishme ekonomike, mjedisore dhe sociale, duke zhvendosur trafikun nga rruga në hekurudhë, duke reduktuar ndjeshëm emetimet e karbonit, dhe duke përmirësuar lëvizshmërinë rajonale dhe ndërkufitare.

Petrit Malaj, ministër i Financave tha se, “Ky projekt shënon një moment historik transformues për infrastrukturën tonë. Ai do të luajë një rol jetësor në integrimin afatgjatë të Shqipërisë në rrjetin evropian të transportit.”

Ndërsa Donald Mishaxhiu, drejtues rajonal i BERZH-it për Ballkanin Perëndimor, deklaroi se, “Ky investim pasqyron mbështetjen tonë të vazhdueshme për transformimin hekurudhor të Shqipërisë. Së bashku me partnerët tanë, ne po ndihmojmë në ndërtimin e një rrjeti modern, të qëndrueshëm dhe të lidhur transporti që do t’u sjellë dobi brezave të ardhshëm”.

Ky projekt vjen në vazhdën e angazhimit të BERZH-it për Shqipërinë, pas investimeve të mëparshme në linjat Tiranë–Durrës dhe Vorë–Hani i Hotit, dhe është plotësisht në përputhje me Planin Ekonomik dhe të Investimeve të BE-së për Ballkanin Perëndimor dhe objektivat e Tranzicionit të Gjelbër të BERZH-it.

/a.f/

The post BERZH 30 milionë euro për modernizimin e linjës hekurudhore Durrës–Rrogozhinë appeared first on Agjencia Telegrafike Shqiptare.

TIRANË, 4 gusht /ATSH/ Bizneset shqiptare, veçanërisht ndërmarrjet e vogla dhe të mesme (NVM), tashmë kanë në dispozicion një burim të ri informacioni dhe orientimi për skemat financiare: platformën “Akses në Financë”, të menaxhuar nga Agjencia Shqiptare e Zhvillimit të Investimeve (AIDA).

AIDA njofton se, platforma, e aksesueshme në www.aida-smefinance.gov.al, ofron një pasqyrë të plotë të granteve, kredive, garancive dhe nismave të tjera financiare që ofrohen nga institucione publike, organizata ndërkombëtare, banka dhe donatorë vendas e të huaj.

Synimi kryesor i kësaj platforme është të shërbejë si një portë unike për informimin dhe aksesin në financë, duke lehtësuar qasjen e bizneseve në fondet e nevojshme për zhvillim, zgjerim apo rikuperim pas vështirësive ekonomike.

AIDA bën të ditur se iniciativa u mundësua nga Banka Europiane për Rindërtim dhe Zhvillim (BERZH), në mbështetje të qeverisë shqiptare, me fokus në zbutjen e ndikimeve negative të krizës së COVID-19 ndaj sektorit privat.

AIDA fton të gjithë donatorët, institucionet financiare dhe bankat që operojnë në Shqipëri të dërgojnë informacion mbi skemat e tyre financiare në adresën: info@aida.gov.al, në mënyrë që ato të publikohen dhe të jenë lehtësisht të aksesueshme për komunitetin e biznesit.

/r.e//a.f/

The post Bizneset shqiptare më afër mundësive financiare përmes platformës “Akses në Financë” appeared first on Agjencia Telegrafike Shqiptare.

TIRANË, 28 korrik /ATSH-Maela Marini/ Kryeministri Edi Rama u shpreh sot se sektori i ndërtimi nuk duhet të bazohet më te parashitja dhe kleringu, pasi mundësitë janë për të pasur akses në forma të tjera financimi.

Rama ishte sot në Qendrën për Inovacion dhe Teknologji “NEST”, një strukturë e Fondit Shqiptar të Zhvillimit që u shërben edhe universiteteve dhe sipërmarrjes ku u prezantua një start up-i të rinjsh shqiptarë për financimin e sektorit të ndërtimit.

Duke folur për zhvillimet në sektorin e ndërtimit, Rama theksoi se e rëndësishme është të fitohet me kohën e realizimit të projekteve.

“Kjo nuk është çështje thjesht masash ligjore, por çështje vetëdijeje nga ana e investitorëve dhe ndërtuesve për të aksesuar këtë treg komplet të ri financiar që mund të bëhet një burim shumë i shpejtë, i thjesht dhe i konsiderueshëm të ardhurash në mënyrë që ndërtimi të mos bazohet te parashitja dhe kleringu. Këto janë dy forma që ishin të kuptueshme dhe pranueshme për një periudhë të caktuar kohe por nuk mund të jenë më as të kuptueshme as të pranueshme sot, kur mundësitë janë për të pasur akses në forma të tjera financimi”, shtoi Kryeministri.

Rama theksoi se bëhet fjalë për një formulë investimesh që është një parashitje e bazuar te garancia e investimit.

“Këtë garanci ta jep fakti se ke menjëherë në dispozicion likuiditete për të ecur pa u angazhuar dhe pa angazhuar njerëz që në gropë, por për të angazhuar financim duke pasur krahët të mbuluar me financim dhe duke arritur që të shtosh vlerën e produktit tënd final që tjetër është kur e shet në gropë dhe kur e shet në fund. Ne kemi parë se si ka ndodhur që apartamente të blera në gropë rishiten nga ata që i kanë blerë në gropë kur ka mbaruar puna dhe rishiten me një çmim shumë më të lartë që e fiton ai që ka blerë në gropë, jo ai që ka ndërtuar”, shtoi Rama.

Në aspektin e interesit publik, Rama tha se kjo ka të bëjë me cilësinë dhe kohën me të cilën realizohen projektet.

“Investitorët duan kohën. Nuk mund t’i japësh një projekt për një godinë në Tiranë dhe pastaj projekti të marri 10 vjet për t’u realizuar. Ata duan të dinë kur fillon, kur mbaron dhe çfarë kapacitetesh ka për ta filluar e mbaruar në kohë”, tha Rama.

Këtu, sipas Kryeministrit, përfshihen faktorë të tjerë që kanë të bëjnë me kapacitete ndërtimore të kompanive me krahun e kualifikuar të punës që është bërë shumë i çmuar.

“Për këtë duhen parë mundësitë e kthimit të sinergjive me kompani ndërkombëtare edhe ndërtimi për të fituar përmes kohës atë që faktikisht nuk e humbet në dukje, por e humbet nga kohëzgjatja e paarsyeshme e një projekti”, nënvizoi ai.

/r.e/

The post Rama: Jo më parashitje dhe klering në ndërtim, akses në financime për të garantuar investimin appeared first on Agjencia Telegrafike Shqiptare.

TIRANË, 28 korrik /ATSH/ Ministrja e Shtetit për Sipërmarrjen dhe Klimën e Biznesit, Delina Ibrahimaj, tha sot se, “qeveria është duke ndërtuar strategjinë e re mbi Inteligjencën Artificiale për përdorimin e saj në çdo komponet, me qëllim zhvillimin e vendit”.

E pranishme në takimin që u zhvillua në Tiranë, me pjesëmarrjen e kryeministrit Edi Rama, në Qendrën për Inovacion dhe Teknologji NEST, një strukturë e Fondit Shqiptar të Zhvillimit që u shërben edhe universiteteve dhe sipërmarrjes, ajo theksoi se, “takimi i sotëm me ndërtuesit ka në fokus inovacionin, si një mundësi e mirë për të çuar përpara këtë sektor të rëndësishëm të ekonomisë së vendit”.

Ibrahimaj vlerësoi rëndësinë e zbatimit të teknologjive inovative në ofrimin e shërbimeve publike për qytetarët dhe zhvillimin e ekonomisë, ndërsa theksoi se, “tashmë platfomat inovative shërbejnë edhe për rritjen e financimit të sipërmarrjeve dhe veçanërit të sektorit të ndërtimit, që luan një rol të rëndësishëm në ekonominë e vendit”.

“Qeveria ka një vizion të qartë që vetëm përmes inovacionit, digjitalizimit, ekonomia shqiptare do të zhvillohet”, u shpreh Ibrahimaj, teksa tërhoqi vëmendjen se në sektorin privat teknologjitë inovative kanë nivel më të ulët përdorimi, në një kohë kur zbatimi i teknologjive të reja ul kostot dhe po rrit efikasitetin në prodhim.

“Takimi që zhvillohet sot në qendrën NEST ka për qëllim të na njohë sesi IA dhe zhvillimet teknologjike arrijnë të monitorojnë projekte në mbarë Shqipërinë dhe të reduktojë gabimet e mundshme. Ndërsa prezantimi i një start-up të ri do të na tregojë për lehtësitë që sjell përdorimi i teknologjisë në rritjen e aksesit në financim”, tha Ibrahimaj.

Sipas ministres, tashmë ka ardhur koha që financimi të mos jetë i fokusuar vetëm në kreditimin e bankave, por dhe në instrumente të reja teknologjike (promovim i biznesit në real estate apo qendra tregtare) ndihmon në zgjerimin e aksesit për financim nga investitorët apo partnerë ndërkombëtarë që kanë interes të investojnë në Shqipëri.

“Për këtë qëllim ne do të prezantojmë sot një platformë që rrit aksesin në financim me përfitim nga sipërmarrësit si në kosto, dhe lehtësi përfitimi”, tha ministrja e Shtetit për Sipërmarrjen dhe Klimën e Biznesit, Delina Ibrahimaj.

/r.e/

The post Qendra për Inovacion NEST, Ibrahimaj: Rrisim aksesin në financimin e sektorit të ndërtimit appeared first on Agjencia Telegrafike Shqiptare.

Në dukje, Shqipëria qëndron larg rrjedhave të errëta të kapitalit rus. Në praktikë, ekspertët paralajmërojnë se ky mund të jetë vetëm një iluzion i rehatshëm. Ndonëse investimet ruse në territor janë minimale dhe të padukshme në sipërfaqe, struktura të cunguara mbikëqyrjeje, tregje të pambrojtura dhe një mjedis i lartë informaliteti krijojnë hapësira të rrezikshme për depërtimin e kapitalit të padëshiruar — përfshirë atë me origjinë nga Moska.

Nga Jona Plumbi

Në korrik 2025 komisioni i posaçëm parlamentar kundër dezinformimit dhe ndërhyrjeve të huaja miratoi stratëgjinë në bazë të të cilës do të zbatojë punën e tij. Kryetari i Komisionit, Erion Braçe, e quajti luftën ndaj dezinformimit dhe ndërhyrjes së huaj keqdashëse një prioritet kombëtar që kërkon vëmendje në nivelin më të lartë legjislativ. Ndërsa grupi i ekspertëve pranë këtij komisioni përgatiti disa propozime për mbrojtjen ndaj ndikimeve të huaja, ku përfshihet ngritja e një platforme bashkëpunimi ndërmjet bankave si dhe komunikimin mes institucioneve financiare.

Këtë shqetësim e kanë edhe ekspertët e ekonomisë me të cilët Faktoje bisedoi lidhur me rrezikun e mundshëm që i kanoset Shqipërisë për ndërhyrjen e parasë “së pisët” nga vende keqdashëse si Rusia. Edhe pse sot për sot Shqipëria duket se nuk është shumë e ekspozuar ndaj kapitalit rus, rreziku qëndron.

Në kërkim të gjurmëve të padukshme

“Shqipëria është më pak e ekspozuar ndaj kapitalit rus se vendet e tjera të rajonit,” thotë Ilir Brasha, ekspert ekonomie për Faktoje. Ai thekson se për momentin nuk ka të dhëna konkrete për investime direkte të fshehura nga Rusia. Një kërkim në databazën Open Corporates tregon vetëm 43 biznese me origjinë ruse të regjistruara në vend, dy prej të cilave themeluar në vitin 2023. Por kjo nuk do të thotë se gjithçka është në rregull.

“Problemi qëndron pikërisht tek mungesa e gjurmimit të përfituesve përfundimtarë të investimeve,” shpjegon Brasha. Paratë ruse mund të vijnë jo në mënyrë direkte, por përmes kompanive të ndërmjetme, juridiksioneve offshore, apo partnerëve që operojnë nga parajsa fiskale.

Eduart Gjokutaj shpjegon për Faktoje se sektorët më të rrezikuar për infiltrimin e kapitalit rus janë ndërtimi, tregu i pasurive të paluajtshme, energjia, minierat dhe turizmi rural. “Pikërisht aty ku ka informalitet të lartë dhe mbikëqyrje të dobët, aty mund të penetrojë kapitali i huaj me interesa të errëta,” analizon Gjokutaj.

Sipas tij tregu i pasurive të paluajtshme është tejet i pambrojtur dhe veçanërisht zonat turistike si Saranda, Vlora, Lezha, Shkodra apo Tirana shihen si mënyra idelae për të legalizuar fonde të dyshimta.

Arben Malaj, një nga ekspertët që dha propozime në komisionin për dezinformimin dhe ndërhyrjet e huaja në kuvendin e Shqipërisë, thekson edhe nevojën për të “skanuar” të gjithë ato biznese që në dukje e kanë një problem.

“Bizneset aktuale që janë në fushën e lojërave të fatit dhe në ndërtim aty ku ka, se nuk duhet t’i biem në qafë askujt kot, aty ku ka flamuj të kuq të ngritur, duhet të skanohen dhe ta mbrojmë ekonominë tonë nga paratë kriminale”, tha Malaj.

Pikat e dobëta të shtetit

Edhe pse Shqipëria ka përditësuar legjislacionin për të qenë në përputhje me direktivat e Bashkimit Europian, institucionet e saj mbeten të papërgatitura për të ndaluar kapitalin e kamufluar. Gjokutaj gjykon se Agjencia e Inteligjencës Financiare (AIF) funksionon me kapacitete të kufizuara dhe nuk disponon mjete të avancuara të analizës. Autoriteti i Mbikëqyrjes Financiare (AMF) ushtron mbikëqyrje kryesisht formale, ndërsa Drejtoria e Tatimeve nuk ka akses të plotë mbi të dhënat e transaksioneve ndërkombëtare.

Ekspertët vlerësojnë se në mungesë të një sistemi për verifikimin e përfituesve fundorë të kapitalit, gjurmimi bëhet gati i pamundur. Mekanizmi i vetëm që duhet të funksionojë për të identifikuar lidhjet me vendet e sanksionuara si Rusia, është ai i pronësisë përfundimtare – dhe ai mungon.

Njëkohësisht “Shqipëria nuk aplikon kontrolle të forta për kapitalin që vjen nga juridiksione offshore, si Qipro, Malta apo Ishujt Virgjër, ku fshihet shpesh pronësia”, vlerëson Gjokutaj.

Një tjetër portë që Shqipëria ka lënë hapur për ndërhyrje të tilla është Ligji për Investimet Strategjike, vlerëson Gjokutajt. Ligji ofron përjashtime dhe përfitime të mëdha, pa hetim të thelluar mbi origjinën e fondeve, duke krijuar hapësirë për kapitalin që kërkon të fshehë gjurmët e veta.

Sot, ndikimi rus në ekonominë shqiptare duket i vogël dhe periferik. Por ekspertët paralajmërojnë se Shqipëria nuk duhet të mashtrohet nga kjo qetësi relative.

“Kapitali është si uji – kërkon të rrjedhë aty ku ka më pak pengesa,” thotë Artan Gjergji, studiues i kapitalit dhe tregjeve financiare. Ai përmend faktin se shumë investime që shfaqen si evropiane apo nga Lindja e Mesme shpesh rezultojnë me struktura pronësie që çojnë tek kompani guackë offshore, ku identiteti i investitorëve është praktikisht i pakapshëm.

Kjo mund të përbëjë një kërcënim serioz nëse flukset financiare nga Rusia fillojnë të devijojnë nga shtetet më të kontrolluara drejt vendeve si Shqipëria, ku kontrolli është më i brishtë.

Çfarë duhet bërë?

Shqipëria e ka shmangur ekspozimin e drejtpërdrejtë, pavarësisht përpjekjeve për hyrje të kapitalit kinez dhe rus në disa raste – përfshirë blerjen e Albpetrol nga Gazprom në vitin 2012 apo zotërimin e përkohshëm të Aeroportit “Nënë Tereza” nga një kompani kineze.

Ekspertët bien dakord për disa hapa urgjentë që duhet të ndërmarrë Shqipëria. Krijimi i një regjistri të detyrueshëm dhe publik të përfituesve përfundimtarë të çdo investimi të huaj është ai që i bën bashkë të gjithë ekspertët. Gjithashtu shkëmbimi në kohë reale i të dhënave mes institucioneve si AIF, Banka e Shqipërisë, AMF, DPT dhe SHISH është kyç në kndvështrimin e Eduart Gjokutajt.

Ligji për Investimet Strategjike – i miratuar si ligj i përkohshëm por që ka pësuar shtyrje të njëpasnjëshme të afatit për përfundimin e tij – duhet të vendosë filtra të fortë mbi origjinën e kapitalit. Themelimi i një task-force të përhershme për hetimin e flukseve financiare të dyshimta nga vendet e sanksionuara dhe forcimi i rolit të bankave në raportimin dhe analizimin e transfertave ndërkombëtare të dyshimta është një tjetër hap që duhet ndërmarrë sipas ekspertëve.

Përfundim

Ndërkohë që flukset financiare nga Rusia në dukje janë minimale në Shqipëri, ekspertët paralajmërojnë se nuk është çështja “nëse”, por “kur” do të tentohet një formë më agresive e depërtimit. Pa një arkitekturë mbrojtëse të mirëfilltë, Shqipëria rrezikon të shndërrohet në hallkën e dobët të sigurisë ekonomike në Ballkan.

Në një botë ku luftërat nuk bëhen më vetëm me armë, por me para, mosvëmendja ndaj kapitalit të padukshëm është një luks që Shqipëria nuk mund ta përballojë.

The post Kapitali në hije: A është Shqipëria në shënjestër të financimit rus? appeared first on Faktoje.al.

TIRANË, 23 korrik /ATSH/ Këshilli i Ministrave miratoi sot financimin e Federatës Shqiptare të Skive në mbështetje të përgatitjes për pjesëmarrje në Lojërat Olimpike Dimërore, Milano Cortina 2026.  

Qeveria, vendosi financimin, në masën 10 000 000 (dhjetë milionë) lekë, për Federatën Shqiptare të Skive (FSHS) për mbështetje dhe përgatitje për pjesëmarrje në Lojërat Olimpike Dimërore Milano Cortina 2026. 

Në vendim thuhet se fondi i përcaktuar transferohet në llogarinë e Federatës Shqiptare të Skive, në një bankë të nivelit të dytë, dhe përballohet nga buxheti i miratuar për vitin 2025 për Ministrinë e Arsimit dhe Sportit. 

Gjithashtu, Federata Shqiptare e Skive, brenda muajit gusht 2025, duhet të paraqesë në Ministrinë e Arsimit dhe Sportit planin e detajuar dhe të miratuar nga Asambleja e Përgjithshme e Federatës Shqiptare të Skive të veprimtarisë, për të cilën do të përdoret ky fond. 

Ngarkohen Ministria e Arsimit dhe Sportit dhe Federata Shqiptare e Skive për zbatimin e këtij vendimi. 

Ky vendim hyn në fuqi pas botimit në “Fletoren zyrtare”. 

/e.i//r.e/

The post Federata e Skive mbështetet me 10 milionë lekë për pjesëmarrjen në Lojërat Olimpike Dimërore 2026 appeared first on Agjencia Telegrafike Shqiptare.

TIRANË, 23 korrik/ATSH-Maela Marini/ Kryetari i Komisionit të Posaçëm Antikorrupsion, Fatmir Xhafaj vlerësoi sot rëndësinë e hartimit të një drafti lidhur me çështjen e financimit të partive politike.

Gjatë një tryeze konsultimi të draftit paraprak të projektligjit “Për financimin e partive politike”, Xhafaj tha se kjo mbetet një çështje tejet e rëndësishme pasi lidhet me shtyllën antikorrupsion dhe është përcaktuar si prioritet në Planin e Veprimit.

Kjo, sipas tij, përkon njëkohësisht edhe me disa detyrime që ka Shqipëria në kuadrin e procesit të negociatave.

“Ky draft është kusht i përcaktuar nga BE, që do të duhet të jetë në listën e projekt-akteve që janë detyrim i shtetit shqiptar për t’u hartuar dhe miratuar”, tha Xhafaj, ndërsa pranoi se kjo është një vendimmarrje e vështirë.

Xhafaj nënvizoi se ky është një projekt shumë i vështirë, edhe për shkak se eksperienca është minimaliste dhe interesat në këtë aspekt janë shumë të forta.

“Këtu subjekte të drejtpërdrejta janë partitë politike. Por edhe për shkak të disa praktikave jo të shëndetshme që mendohen ose perceptohen që janë të pranishme sidomos kur bëhet fjalë për financimin e fushatave zgjedhore. Por ne nuk duam ta shohim çështjen e financimit vetëm në aspektin zgjedhor, por duam ta shohim shumë më gjerë”, shtoi Xhafaj.

Dilema, sipas tij, ka të bëjë me faktin nëse do të duhet të bëhen ndryshime në kuadrin ligjor ekzistues që ka vendi, apo të bëhet një ligj i ri që është i dedikuar vetëm për financimin e partive politike.

“Natyrisht edhe ne kemi këndvështrimet tona të cilat janë të diskutueshme, të debatueshme dhe kjo është arsyeja kryesore që ne kërkuam të kemi këtë tryezë sot për të tërhequr mendime nga ky auditor dhe në vijimësi edhe nga ekspertët ndërkombëtarë”, tha Xhafaj.

Sipas tij, “Bashkimi Europian ja ka deleguar Këshillit të Europës përgjegjësinë për të na asistuar edhe për shkak të eksperiencës të dedikuar dhe ekspertizës shumë të mirë që ka Këshilli i Europës në në këtë fushë”.

“Ndaj do të duhet të hartojmë një draft paraprak për ta parë me këtë ekspertizë. Ne do shohim se cila është më e përshtatshme, një ligj i posaçëm, i dedikuar për këtë çështje apo një amendim i legjislacionit ekzistues. Pasi të kemi zgjidhur këtë vendimmarrje do të kalojmë në hartimin e draftit. Më e rëndësishmja është të bëjmë diçka me standardet më të mira”, shtoi ai.

/m.m/j.p/

The post Konsultime për draftprojektligjin e financimit të partive politike, Xhafaj: Duhet të ruajmë standardet më të mira appeared first on Agjencia Telegrafike Shqiptare.

TIRANË, 22 korrik/ATSH/ Një paketë prej 87,7 milionë eurosh për investime në energjinë e pastër në Shqipëri, Mal të Zi dhe Serbi u miratua nga Bordi Operacional i WBIF (Kuadri i Investimeve të Ballkanit Perëndimor).

Delegacioni i Bashkimit Europian në Tiranë bëri të ditur sot se në kuadër të Planit të Rritjes së BE-së për Ballkanin Perëndimor, këto investime do të ndihmojnë për të forcuar rrjetet e energjisë.

Po ashtu, ato do të ndihmojnë për të përmirësuar hidrocentralet ekzistuese, si dhe për të ofruar zgjidhje diellore për ngrohje.

Nga ky fond Shqipëria do të përfitojë për investime në sistemin e transmetimit të energjisë elektrike, konkretisht për digjitalizimin e nënstacioneve, për rritjen e kapaciteteve dhe uljen e humbjeve të energjisë.

Po ashtu fondet do të përdoren në HEC-in e Fierzës për përmirësimin e pajisjeve dhe sistemeve për sigurimin e funksionimit afatgjatë.

Gjithashtu do të investohet edhe në linjën ajrore të transmetimit Rrashbull-Unaza e Tiranës, në kuadër të zgjerimit për plotësimin e kërkesës dhe përmirësimin e sigurisë energjetike.

“Pas lajmit të mirë nga Belshi, vjen edhe një tjetër zhvillim pozitiv për rajonin tonë”, thuhet në njoftimin e Delegacionit të BE-së në Tiranë.

1 nga 5

/m.m/r.e/

The post Shqipëria, përfituese nga paketa 87,7 milionë euro e BE-së për investime në energji appeared first on Agjencia Telegrafike Shqiptare.

Kryeministri Rama sërish kritika kryebashkiakut të Vlorës. Thotë se Bashkia e Vlorës financon me me dhjetëra mijëra euro një televizion privat.

“Ka tepër për një vend si Shqipëria që nuk e ka luksin të konsolidohen ujësjellësat. Me bashki që arrijnë deri në absurditete si Vlora që financon me dhjetëra mijëra euro një tv privat. Për nuk e di se cfarë, por nuk mundet të vijojnë kështu”, tha Rama.

Kujtojmë që prej disa ditësh Rama ka nisur një sulm të paprecedentë kundër kryebashkiakut Ermal Dredha, të cilit i detyroi drejtorët të dorëhiqeshin dhe tani i ka ngritur një komision për të marrë në punë drejtuesit e rinj.

The post Vijon përplasja/ Rama: Bashkia Vlorë financon një televizion privat appeared first on Lapsi.al.

TIRANË, 10 korrik /ATSH/ Po vijon puna për ndërtimin e urës së re të Viroit, e para nga 30 urat që do të ndërtohen ose përmirësohen në të gjithë Shqipërinë, falë investimit të qeverisë me mbështetjen e Bankës Botërore.

Banka Botërore ndau foto nga puna që po zhvillohet për ndërtimin e urës së re të Viroit, teksa bëri të ditur se, ura është e vendosur në aksin SH4 drejt pikës kufitare të Kakavijës me Greqinë dhe është thelbësore për lidhjen rajonale.

Ura do të jetë 33 metra e gjatë dhe 7 metra e gjerë, me 2 korsi dhe trotuare për kalimtarët në të dy anët e saj. Ura e re do të shkurtojë kohën e udhëtimit, përmirësojë sigurinë gjatë përmbytjeve dhe lidhë komunitetet e Jugut të Shqipërisë duke krijuar më shumë mundësi punësimi, arsimimi, të kujdesit shëndetësor dhe aksesit në tregje.

Sipas BB-së, në mungesë të rrugëve alternative, kur ura përmbytet, ndërtimi i urës së re do të sigurojë qarkullim të pandërprerë gjatë gjithë vitit .

“Mbi 200 000 drejtues mjetesh dhe 150 000 këmbësorë do të përfitojnë si pjesë e përpjekjeje për një infrastrukturë transporti të qëndrueshme ndaj klimës”, shkruan BB në rrjete sociale.

Punimet për urën e re të Viroit

1 nga 7

/e.xh//a.f//r.e/

The post Investimi në urën e re të Viroit, përfitojnë mbi 200 mijë drejtues mjetesh e 150 mijë këmbësorë appeared first on Agjencia Telegrafike Shqiptare.

TIRANË, 7 korrik /ATSH/ Zeqir Beci në Pezë të Madhe, Tiranë prej 18 vitesh punon me përkushtim në bujqësi, duke kultivuar në një sipërfaqe prej 5.4 hektarësh kultura foragjere, pemë frutore, ullinj dhe vreshta.

Ministrja e Bujqësisë dhe Zhvillimit Rural, Anila Denaj ndau në rrjete sociale historinë e tij, teksa vuri në dukje se, përmes mekanizimit ai ka rritur efikasitetin e prodhimit.

Denaj tha se, “me mbështetjen nga Skema Kombëtare e Investimeve pranë AZHBR, ka përfituar traktor dhe pajisje ndihmëse bujqësore, duke sjellë një ndryshim të dukshëm në ritmin e punës në fermë”.

“Mekanizimi ka rritur efikasitetin, ka kursyer kohë dhe ka bërë proceset shumë më të lehta”, u shpreh ministrja.

Denaj bëri të ditur adresimin e mbështetjes në rritje të qeverisë, për rritjen e aksesit në financim të fermerëve dhe agrobiznesit në nxitjen e investimeve në teknologji dhe mekanizim që zhvillojnë sektorin dhe të ardhurat prej tij.

“Përmes Skemës Kombëtare të Investimeve, me 50% grant dhe mbështetjes nga Kredia e Butë të kombinuar me Garancinë Sovrane, çdo fermer mund të përfitojë financim me normë interesi vetëm 2% dhe mbulim kolateral deri në 70%”, tha ministrja Denaj.

Zeqiri tregon se aplikoi shumë lehtë në Skemën Kombëtare të Investimeve dhe u shpall përfitues për blerjen e një traktori dhe agregateve bujqësore me financim grant.

“Përdorimi i mekanikës më ka ndihmuar të rrisë prodhimin dhe të efikasitetin në punë. Përveç 14 hektarëve tokë që i kam në pronësinë time, kam marrë edhe 40 ha me qira, të cilat i kam të kultivuara me kulturat foragjere, pemë frutore, ullinj dhe vreshta”, tha ai, ndërsa u shpreh se me traktorin e ri, ka kursyer kohë dhe shpejtur proceset në bujqësi.

/e.xh//a.f/

The post Denaj: Tri masa mbështetëse për rritjen e aksesit në financim të fermerëve appeared first on Agjencia Telegrafike Shqiptare.

TIRANË, 23 qershor/ATSH-Maela Marini/ Deputeti i Partisë Socialiste, Erion Braçe, njëherësh kryetar i komisionit të posaçëm kundër Dezinformimit u shpreh sot se ka ardhur koha për ndryshime ligjore lidhur me çështjen e financimit të partive politike.

Braçe prezantoi para komisionit të Ligjeve draft-strategjinë kombëtare kundër ndërhyrjeve të huaja dhe dezinformimit 2025-2030 dhe udhërrëfyesin për zbatimin e saj.

Ai theksoi se edhe në fushatën zgjedhore të zgjedhjeve të 11 majit ka pasur flukse të mëdha të parave nga burimet e treta që deri më tani nuk kanë pasur ndonjë detyrim të bëjnë deklarim.

“Duhet të shkojmë drejt këtij rregullimi ligjor. Këto historitë me celularin para, ja sa harxhoj unë në ditë, dhe ja sa para më japin mua në ditë, duhet të marrin fund që zgjedhjet të mos komercializohen, por të ngelen e drejtë për të zgjedhur me votë”, theksoi ai.

Duke folur për Strategjinë Kombëtare kundër Ndërhyrjeve të Huaja dhe Dezinformimit, Braçe vuri theksin tek forcimi i kapaciteteve për të parandaluar ndërhyrjet e huaja që mund të ndikojnë në demokraci.

“Strategjia synon të forcojë dhe mbrojë nga forma të reja të ndikim të huaj, që rrezikojnë funksionimin e shtetit të së drejtës. Shqipëria si vend kandidat për anëtarësimin në BE dhe anëtare e NATO-s nuk është imune ndaj këtyre formave të reja të ndërhyrjes. Pozicioni ynë gjeopolitik na bëjnë të ekspozuar ndaj rreziqeve hibride”, shtoi ai.

/a.f/

The post Financimi i partive politike, Braçe: Nevojiten ndryshime ligjore, në fushatë pati flukse parash nga burime të treta appeared first on Agjencia Telegrafike Shqiptare.

Financimi i Partive Politike dominoi mbledhjen e kësaj të hëne të Komisionit Parlamentar të Ligjeve. Deputeti socialist Erion Brace tha se përgjatë fushatës elektorale të 11 majit subjekte politike kanë përdorur para nga burime te treta, të cilat nuk janë të deklaruara. Ndaj thote, se ka ardhur koha për ndryshime ligjore.

“Edhe në këtë fushatë që shkoi kemi patur flukse të mëdha të parave nga burimet e treta që deri më tani nuk kanë patur ndonjë detyrim të bëjnë deklarim, duhet të shkojmë drejt këtij rregullimi ligjor. Këto historitë me celularin para, ja sa harxhoj unë në ditë, dhe ja sa para më japin mua në ditë, duhet të marrë fund që zgjedhjet të mos komercializohen, por të ngelen e drejtë për të zgjedhur me votë, jo për të blerë vote”

Gjatë prezantimit të Strategjisë Kombëtare kundër Ndërhyrjeve të Huaja dhe Dezinformimit, Brace vuri theksin tek forcimi I kapaciteteve për të parandaluar ndërhyrjet e huaja që mund të ndikojnë në demokracinë.

“Strategjia synon të forcojë mbroj nga forma të reja të ndikim të huaj, që rrezikojnë funksionimin e shtetit të së drejtës. Shqipëria si vend kandidat për anëtarësimin në BE dhe anëtare e NATO nuk është imune ndaj këtyre formave të reja të ndërhyrjes. Pozicioni ynë gjeopolitik na bëjnë të ekspozuar ndaj rreziqeve hibride”

Miratimi i Strategjisë Kombëtare kunder Ndërhyrjeve të Huaja dhe Dezinformimit do të mundësoje edhe mbrojtjen e sigurisë kombëtare, ekonominë dhe infrastrukturës kritike të Shqipërisë.

TIRANË, 22 qershor/ATSH/ Fiqiri Curri, fermer në Ndroq, prej vitesh kultivon rrush, pjepër, shalqi dhe perime sezonale në gjashtë dynimë serra.

Ministrja e Bujqësisë dhe Zhvillimit Rural, Anila Denaj, ndau sot në rrjete sociale historinë e tij, si shembullin model që, siç tha ajo, “kontribuon në ekonominë lokale dhe në promovimin e produkteve “Made in Albania” në tregjet ndërkombëtare”.

Ministrja bëri të ditur se me aktivitetin e tij bujqësor, ky fermer kontribuon në zhvillimin e ekonomisë lokale, duke siguruar të ardhura edhe për familjen e tij.

Sipas ministres Denaj, “përmes Skemës Kombëtare të Investimeve, me 50% grant dhe mbështetjes nga Kredia e Butë të kombinuar me Garancinë Sovrane, çdo fermer mund të përfitojë financim me normë interesi vetëm 2% dhe mbulim kolateral deri në 70%”.

Garancia Sovrane me fond prej 3 miliardë lekësh, ose 30 milionë euro, është një instrument i cili do të vihet në shërbim të sektorit privat me qëllim lehtësimin e aksesit në financë për fermerët dhe Ndërmarrjet e Vogla dhe të Mesme.

Garancia Sovrane, e kombinuar me kredinë e butë të Bankës së Shqipërisë, ul normën e interesit në vetëm 2% dhe mbulon deri në 70% të kolateralit për kredi, deri në 25 milionë lekë për subjekt, duke krijuar lehtësi për ndërmarrjet e vogla dhe të mesme që operojnë në prodhim bujqësor, agropërpunim, turizëm rural dhe akuakulturë.

Normat që parashikohen për këtë skemë do të jenë tejet të favorshme dhe me mbulim deri në 70% të principalit të kredisë, shuma e së cilës nuk do të kalojë 25 milionë lekë për secilin prej subjekteve aplikuese.

Nga serrat e Fiqiri Currit, fermer në Ndroq që kultivon rrush, pjepër, shalqi dhe perime sezona...

1 nga 6

/e.i//r.e/

The post Kredi të buta në bujqësi, Denaj: Financim me normë interesi 2% appeared first on Agjencia Telegrafike Shqiptare.

TIRANË, 19 qershor/ATSH/ Ambasadori i Delegacionit të Bashkimit Evropian në Tiranë, Silvio Gonzato inspektoi sot disa prej investimeve në infrastrukturë në bashkinë e Beratit, të cilat janë realizuar me financime të Bashkimit Evropian.

Këto projekte përfshijnë nga ura në Bilçë mbi lumin Osum, e financuar plotësisht nga Bashkimi Evropian, te rruga e re që të çon drejt malit të Tomorit, dhe nga mbrojtja e brigjeve të lumit pranë Goricës, deri te pamjet panoramike të lumit Osum.

“Me një pritje të ngrohtë nga ish-kryetari Ervin Demo dhe kryetari në detyrë Ervin Ceca, çdo ndalesë sot na kujtoi pse ky qytet është një nga thesaret kulturore të Shqipërisë dhe një destinacion kyç për turizmin e qëndrueshëm”, vlerësoi ambasadori Gonzato.

Me mbi 6 milionë euro grante nga BE-ja të investuara përmes “Modelit të Zhvillimit Ekonomik Vendor të Udhëhequr nga Turizmi”, në partneritet me BERZH dhe të zbatuar nga Fondi Shqiptar i Zhvillimit, këto projekte shkojnë përtej punimeve ndërtimore.

Ambasadori vlerësoi se ato përmirësojnë aksesin, mbrojnë trashëgiminë kulturore dhe natyrore dhe krijojnë mundësi të reja për komunitetet lokale.

Gonzato u shpreh se ato janë gjithashtu pjesë e mbështetjes më të gjerë të BE-së që po ndihmon në formësimin e një Berati më të lidhur dhe të qëndrueshëm.

“Krenohemi që jemi partnerë me qytetin e Beratit për të promovuar turizmin e qëndrueshëm dhe për të përmirësuar jetën e qytetarëve të tij. Investimet e BE-së shkojnë përtej infrastrukturës. Ato mbështesin një vizion të rritjes gjithëpërfshirëse, ku turizmi, trashëgimia dhe komunitetet lokale bashkohen për të ndërtuar një të ardhme më të qëndrueshme, një të ardhme që e afron Shqipërinë me BE-në. Kjo është mënyra se si BE-ja mbështet Shqipërinë për të përmirësuar jetën e përditshme të njerëzve”, u shpreh ambasadori i BE-së, Silvio Gonzato.

1 nga 13

/m.m/r.e/a.f/

The post Gonzato: Mbi 6 milionë euro grante nga BE-ja të investuara në Berat appeared first on Agjencia Telegrafike Shqiptare.

Vëzhguesi i OSBE/ODHIR, Björn Söder, ka komentuar zgjedhjet e 11 Majit, teksa deklaroi se disa prej rekomandimeve të bëra prej kohësh mbetën të paadresuara.

“Kjo nuk është thjesht një çështje e moszbatimit teknik, por çështje e përforcimit të integritetit demokratik dhe është urgjente duke pasur parasysh rrugën e Shqipërisë në negocimin me BE”, theksoi ai.

Söder shtoi se problemet me zgjedhjet, si financimi i partive politike dhe përdorimi i burimeve shtetërore duhet të zgjidhen nëse Shqipëria do që të bëjë progres drejt BE.

Björn Söder: Këto zgjedhje ishin zhvillim i rëndësishëm për Shqipërinë, për herë të parë shtetasit që jetojnë jashtë patën mundësinë të jetojnë këtu, një hap i rëndësishëm përpara dhe me shpresën që do të çojë në zgjedhje më të mira në të ardhmen.

Disa rekomandime të bëra prej kohësh mbeten ende të paadresuara. Është shpresa jonë e sinqertë që Shqipëria do të tregojë vullnetin e duhur politik dhe të ndërmarrë hapa për adresimin e këtyre rekomandimeve ende të pazbatuara. Kjo nuk është thjesht një çështje e moszbatimit teknik, por çështje e përforcimit të integritetit demokratik dhe është urgjente duke pasur parasysh rrugën e Shqipërisë në negocimin me BE.

Forma demokratike dhe integrimi europian shkojnë dorë më dorë, vonesat në to ndikojnë. Problemet me zgjedhjet, si financimi i partive politike, përdorimi i burimeve shtetërore duhet të zgjidhen nëse Shqipëria do të bëjë progres drejt BE.

Ne jemi të gatshëm ta mbështesim institucionet e Shqipërisë dhe aktorët politikë në këtë rrugë drejt zhvillimeve demokratike.

The post Vëzhguesi i OSBE/ODHIR bën kritika mbi financimin e partive politike appeared first on Lapsi.al.

Presidenti i SHBA-së, Donald Trump, ka lëshuar një urdhër ekzekutiv duke kërkuar bllokimin e të gjitha fondeve federale për Shërbimin Publik të Transmetimit (PBS) dhe Radion Publike Kombëtare (NPR). Të enjten në mbrëmje, Trump pretendoi se të dy organizatat janë angazhuar në mbulim lajmesh partiake të njëanshme. Urdhri udhëzon bordin e Korporatës së Transmetimeve Publike, […]

The post Trump nënshkruan urdhër për bllokimin e financimit të radios publike appeared first on BoldNews.al.

TIRANË, 15 prill /ATSH/ Skema Kombëtare e mbështetjes në Bujqësi 2025, financon 100% grupimet e fermerëve ose Shoqëritë e Bashkëpunimit Bujqësor. Ndërsa risi e këtij viti është edhe përfshirja në mbështetje e krerëve viça.

Skema Kombëtare synon zhvillimin e qëndrueshëm të bujqësisë dhe blegtorisë në vend, me qëllim uljen e kostove dhe rritjen e bashkëpunimit mes fermerëve.

Fermerët dhe blegtorët do të kenë mundësi të aplikojnë deri më 30 Maj për të përfituar pagesa të drejtpërdrejta për 8 masat mbështetëse që adreson Skema Kombëtare 2025

Kriteret që duhet të plotësojnë fermerët për të përfituar nga skema e naftës, janë që të kenë NIPT aktiv; tokë bujqësore në pronësi dhe/ose në përdorim, të provuar me dokumentacionin përkatës; sipërfaqja totale për të cilën aplikohet duhet të jetë jo më pak se 1 ha, ndërsa madhësia e parcelave, me sipërfaqe jo më pak se 0.1 ha.

Do të konsiderohen të vlefshme edhe kontratat qiramarrjes/huapërdorjes/dokument të ligjshëm të firmosur nga palët.

Aplikanti vetëdeklaron kulturat bujqësore të mbjella ose që parashikon të mbjellë, sipas përcaktimeve të formularit të aplikimit online. Çdo parcelë, sipas dokumentacionit të pronësisë apo përdorimit, plotësohet me kulturën/kulturat përkatëse të mbjellë ose që parashikohen të mbillen.

Vlera e saktë që do të përfitojnë aplikantët fitues, është e kategorizuar me vendim qeverie sipas kulturës së mbjellin.

Sa i takon kultivimit të bimëve të arave, do të jepen 18.582 lekë/ha për kulturat pranverore si misër, fasule, luledielli, sojë,  sorgum.  12.714 lekë/ha për bimët e lashta si grurë, tërshërë, thekër, elb, foragjerë njëvjeçarë, industriale (patate, duhan, panxhar, pambuk. Dhe 8.802 lekë/ha për foragjerë shumëvjeçarë, bimë aromatike-mjekësore.

Në grupin e drufrutorëve, do të jepet pagesë për naftën për kultivimin e mollëve me 18,582/ ha, 15,648 lekë/ha për të gjitha llojet e frutave, ulli, agrume dhe  vreshta si dhe 13,692 lekë/ha për  arra, bajame, lajthi dhe gështenja të kultivuara si dhe 16,626 lekë/ha për të gjithë fidanët e bimëve farore, bërthamore dhe arrore.

Sa i takon grupit të tretë, kultivimit të perimeve,  pagesat për naftën variojnë nga 14,670 lekë/ha për të gjitha llojet e perimeve të fushës sezoni i parë, përfshi shalqi,  pjepër, luleshtrydhe dhe 16,626 lekë/ha për të gjitha perimet e serës, sezoni i parë.

Të gjitha aplikimet e kryera nëpërmjet e-Albania, i nënshtrohen procesit të kontrollit administrativ, që shqyrton përputhjet e vetëdeklarimeve, në lidhje me parcelat, sipërfaqet, kulturat dhe dokumentacionin që i mbështet këto deklarime. Pas kontrollit administrativ, aplikanti njoftohet mbi rezultatin e aplikimit (i kualifikuar/i skualifikuar).

Vitin e kaluar nga kjo skemë kanë përfituar mbi 52 mijë fermerë në të gjithë vendin.

1 nga 2

The post Skema Kombëtare 2025, AZHBR: Financim 100% grupimeve të fermerëve appeared first on Agjencia Telegrafike Shqiptare.