Këtë të premte, për rreth një orë Prokuroria e Posaçme ka marrë në pyetje si person nën hetim kryetarin e Bashkisë së Vaut të Dejës, Kristian Shkrelin.

Ai është marrë në pyetje nga prokurori Dritan Prençi për veprën penale “korrupsion aktiv në zgjedhje” për blerje votash gjatë fushatës për zgjedhjet parlamentare të 11 majit në favor të Partisë Socialdemokrate.

Tre ditë pas zgjedhjeve, Struktura e Posaçme Anti-Korrupsion ka sekuestruar celularin e Kristian Shkreli.

Në prag të zgjedhjeve u përfol se kryebashkiaku socialist kishte thyer besimin e kryeministrit Edi Rama, duke mbledhur vota për PSD-në e Tom Doshit.

Ndërkohë SPAK vijon hetimet për personat e dyshuar për krime zgjedhore.

The post Nën hetim për blerje votash, kryebashkiaku i Vaut të Dejës merret në pyetje nga SPAK appeared first on Euronews Albania.

Pas drejtorëve të bashkive dhe kryetarëve të njësive administrative, kryeministri Edi Rama ka kërkuar edhe shkarkimin e nënkryetarëve të bashkive në të gjithë vendin.

Gjatë një takimi me kryebashkiakët në Durrës, kreu i qeverisë deklaroi se nënkryetarët janë të konsumuar dhe duhet një rifreskim i tyre, duke theksuar se ata nuk po performojnë siç duhet.

“Nënkryetarët i shoh të rraskapitur. Ju qeshni, por edhe dy vjet keni (i drejtohet kryetarëve). I shoh shumë të lodhur, Pjerin, nënkryetarët. Bëni mirë t’i shkarkoni të gjithë dhe të bëni një rifreskim të madh. Nënkryetarët që merren me çështjet urbane dhe rurale duhet të jenë më energjikë. Departamentet e bujqësisë duhet të jenë shumë më të artikuluara,” u shpreh Rama.

Kryeministri shtoi më tej se është e rëndësishme që bashkitë të kenë struktura drejtuese më dinamike dhe të përkushtuara për të realizuar projektet e qeverisë.

“Kush e di se në çfarë ore gjumi janë nënkryetarët tuaj teksa ju jeni këtu. Në nderin tënd, Pjerin, është që t’i shkarkosh dhe t’i rifreskoni të gjithë,” tha Rama.

Deklaratat e Ramës vjen pak orë pasi ai vendosi ultimatum deri ditën e hënë që të shkarkohen drejtuesit e të gjithë Njësive Administrative në vend.

LEXONI GJITHASHTU:

• Aksioni në Theth, Rama: Kishte bum ndërtimesh pa leje para dhe gjatë fushatës
• Rama kërkon shkarkimin e të gjithë drejtorëve në bashkitë e Elbasanit dhe Lushnjës

The post Rama kërkon shkarkimin e nënkryetarëve të bashkive: Janë të lodhur dhe të konsumuar appeared first on Euronews Albania.

Një fadromë e Inspektoratit Kombëtar të Mbrojtjes së Territorit, e angazhuar në prishjet në zonën e Thethit, është sulmuar me lëndë djegëse të tipit Molotov.

Sipas pamjeve të siguruara nga Euronews Albania, shihet një pjesë e nxirë mbi fadromë, ndërkohë që është tentuar të digjet dhe ura me dru që të çon drejt një pjese tjetër të fshatit.

Mbi urë shihen qartë gjurmët e zjarrit dhe shenjat e djegies, ndërsa flakët kanë rrezikuar edhe mjetin e IKMT.

Aktualisht, forca të shumta të policisë të armatosura shoqërojnë mjetet e rënda të Inspektoratit për të siguruar vijimin e punimeve.

“Rreth orës 15:35, një shtetas ende i paidentifikuar ka hedhur në rrugë një shishe me lëndë djegëse, duke tentuar djegien e një ure druri, por me ndërhyrjen e Policisë është parandaluar djegia e plotë e saj. Nga zjarri, ura ka pësuar dëmtime të pjesshme.

Sqarojmë se asnjë mjet fadromë nuk është sulmuar me lëndë djegëse dhe nuk është shkaktuar asnjë dëm material apo rrezik për jetën e qytetarëve apo punonjësve të shërbimeve shtetërore.

Shërbimet e Drejtorisë Vendore të Policisë Shkodër dhe ato të Forcës Kombëtare të Sigurisë ndodhen në zonë, në mbështetje të strukturave të IKMT Tiranë dhe IMT të Bashkisë Shkodër, për zbatimin e planit për prishjen e ndërtimeve pa leje në fshatin Theth.

Grupi hetimor vijon veprimet për identifikimin dhe kapjen e personit që hodhi në rrugë lëndën djegëse”, thueht në njoftimin e policisë.

LEXONI GJITHASHTU:

• Aksioni në Theth, Rama: Kishte bum ndërtimesh pa leje para dhe gjatë fushatës
• Rama kërkon shkarkimin e të gjithë drejtorëve në bashkitë e Elbasanit dhe Lushnjës

The post Sulmohet me molotov fadroma e IKMT dhe ura në zonën e Thethit appeared first on Euronews Albania.

Piku i sezonit turistik në vend ka dhënë efektet e para në monedhën europiane.

Sipas ecurisë së kursit në kursin e këmbimit, në sezonin veror ajo ka humbur vlerë përballë lekut.

Në grafikun që ilustron Banka së Shqipërisë prej datës 1 korrik, një euro është këmbyer me 97 lekë duke pësuar një zhvlerësim konstant, por minimal.

Por nëse bëjmë një krahasim të kursit të këmbimit euro-lek me të njëjtën periudhë të një viti më parë rezulton se monedha europiane është dobësuar me më shumë se 3 pikë.

Në 10 ditët e para të korrikut të viti të kaluar një euro është këmbyer mbi 100 lekë. Banka e Shqipërisë e lidh këtë tendencë të forcimit të lekut me shtimin e eurove në qarkullim nga turizmi.

Të dhënat zyrtare tregojnë se vetëm në muajt e parë Shqipëria priti 3.4 milion shtetas të huaj.

Po ashtu në forcimin e lekut ka dhënë efekte edhe rritja e investimeve të huaja dhe paratë që dërgojnë emigrantët si remitanca.

Ndërsa vetëm në 5 muaj trasaksionet në euro në ekonominë shqiptare arritën vlerën 2.4 miliardë euro. Këto shifra konfirmojnë vlerën e lartë të monedhës europiane në ekonominë shqiptare në një kohë që euro qëndron nën kufijtë e 98 lekëve.

Por pavarësisht këtyre luhatjeve duket se tregu i brendshëm valutor është futur në një normalitet të ri, pasi gradualisht po zbehen edhe luhatjet e forta sezonale në këmbimin e euros me lekun.

LEXONI GJITHASHTU:

• Këmbimi valutor: Euro në nivele të ulëta, me sa shiten e blihen monedhat e tjera
• Këmbimi valutor: Euro vijon e dobët, me sa këmbehen monedhat e tjera

The post Euro humb vlerë përballë lekut, ndikon fluksi turistik në sezonin veror appeared first on Euronews Albania.

Disa ditë pas gjetjes së trupit të 23-vjeçarit Renis Dobra në liqenin e Shkopetit, dyshimet se i riu është vrarë nga persona të tjerë janë rritur. Grupi hetimor ka zbuluar se 23-vjeçari nga fshati Zenisht i Matit ka shenja dhune në pjesën e qafës, që tregon se ai është mbytur dhe më pas është hedhur në humnerë, ndërsa automjeti me të cilin udhëtonte është nxjerrë ditën e enjte nga ujërat e liqenit të Shkopetit. Hetimet janë fokusuar në dy pista kryesore që lidhen me të kaluarën e të riut gjatë qëndrimit të tij në Gjermani.

Të dhënat e para tregojnë se Dobra kishte pasur probleme me ligjin në shtetin gjerman dhe kishte qëndruar për një periudhë kohe në burg. Kjo e kaluar penale po konsiderohet një element kyç në përcaktimin e motivit të krimit.

Pista kryesore që po hetohet është ajo e përfshirjes së mundshme të viktimës në veprimtari kriminale, konkretisht në trafikun e lëndëve narkotike. Grupi hetimor po punon për të zbuluar nëse Dobra kishte pasur konflikte me persona të përfshirë në këtë aktivitet, si në Shqipëri ashtu edhe jashtë saj.

Ndërkohë, autoritetet janë duke mbledhur prova dhe analizuar të dhënat e komunikimeve të fundit të viktimës, si dhe lëvizjet e tij, për të identifikuar autorët e ngjarjes dhe motivin e saktë të vrasjes. Po ashtu, grupi hetimor ka ngritur dyshime pas verifikimit të kamerave të sigurisë, se i riu është ndjekur nga dy automjete, për të cilat po punohet për gjetjen e tyre dhe personave të përfshirë në këtë krim.

LEXONI GJITHASHTU:

• E hodhën me makinë drejt liqenit, zbardhen detaje të reja nga vdekja e 23-vjeçarit
• Mister pranë liqenit të Shkopetit/ 23-vjeçari gjendet i vdekur, makina brenda ujit

The post U mbyt me litar dhe u hodh në Shkopet, pista e hetimit për vrasjen e 23-vjeçarit appeared first on Euronews Albania.

Një grua ukrainase ka humbur jetën këtë të premte në Vlorë pas një incidenti të rrezikshëm në det, ku rrezikoi të mbytej dhe vajza e saj 18-vjeçare. Gruaja ndërroi jetë në spital, ndërsa vajza ndodhet në gjendje të rëndë dhe është intubuar.

Mjeku Edmond Breshani, i cili ka asistuar rastin, shpjegoi se vajza dhe nëna u paraqitën në spital në gjendje kome. Nëna, 44 vjeçe, ishte pa shenja jete dhe nuk u arrit të rikthehej në jetë për shkak të dëmtimit të thellë nga mbytja.

Vajza 18-vjeçare u paraqit në gjendje kome, me frymarrje të ngadalësuar, puls të dobët dhe tension të ulët, sipas mjekut. Ajo u intubua dhe dhe gradualisht, filloi të merrte frymë dhe të reagonte, ndërsa tensioni i është stabilizuar dhe ajo ndodhet në reanimacion.

“Vajza 18 vjeçe dhe nëna 44 vjeçe kanë ardhur në spital rreth orës 12:00 në gjendje shumë të rëndë, në koma. Pacientja mbi 40 vjeçe ishte pa shenja jete, pa puls dhe pa ton zemre.

Ekipi i urgjencës që e asistoi që në plazh zbatoi protokollin për pacientët e mbytur. Pacientja mbi 40 vjeçe ishte pa shenja jete kur erdhi në spital. Komunikuam më parë me ekipin e urgjencës që po vinte dhe zbatuam të gjitha protokollet, por ajo nuk arriti të kthehej në jetë, pasi zemra kishte dalë jashtë funksionit për shkak të uljes së oksigjenimit nga uji i madh dhe rëra që kishte marrë.

Vajza 18 vjeçe ishte në gjendje kome, me frymarrje të ngadalta, puls të dobët dhe tension 5. Ajo u fut në intubim dhe u bë ringjallja me oksigjenim sipas protokollit. Gradualisht filloi të merrte frymë vetë dhe të reagonte e të zgjohej.

Tensioni i është stabilizuar në 11 dhe ndodhet në reanimacion me frymarrje të drejtuar dhe i janë bërë të gjitha mjekimet e nevojshme, po ashtu po i bëhet aspirimi.

Për momentin vajza 18 vjeçare është në gjendje më të qëndrueshme dhe ka shanse për mbijetesë. Ambulancat dhe mjekët ishin në dispozicion dhe asistuan që në momentet e para të ngjarjes”, tha mjeku.

The post Mbytja e turistes në Vlorë, flet mjeku: Nëna s’mbijetoi, vajza erdhi në gjendje kome appeared first on Euronews Albania.

Policia e Tiranës ka sekuestruar pasuri me vlerë 875 mijë euro në pronësi të një shtetasi që po vuan dënimin për veprat penale “Vrasja me paramendim e mbetur në tentativë”, “Mbajtja pa leje e armëve” dhe “Trafikimi i lëndëve narkotike”.

Bëhet me dije se në total janë sekuestruar dy garazhe, një apartament, një sipërfaqe trualli dhe një subjekt tregtar, të regjistruara në emër të shtetasit P.P., 32 vjeç, ose të familjarëve të tij.

Policia dyshon se këto pasuri janë fituar nga aktiviteti kriminal i këtij individi.

Materialet e operacionit i janë përcjellë Prokurorisë së Tiranës për hetime të mëtejshme.

LEXONI GJITHASHTU:

• SPAK dhe italianët godasin grupin e Suel Çelës, sekuestrohen rreth 4 mln € pasuri
• Gazetari: Një nga urdhër-arrestet e SPAK për 1 personazh më të fuqishëm se Suel Çela

The post Sekuestrohen pasuri me vlerë 875 mijë euro në Tiranë appeared first on Euronews Albania.

Policia e Vlorës ka goditur një rast të shfrytëzimit për prostitucion të disa personave të huaj. Sipas një njoftimi zyrtar, është identifikuar dhe shpallur në kërkim një shtetase spanjolle, e cila dyshohet se në një apartament me qira në qytetin bregdetar organizontet aktvitet prostitucioni.

“Specialistët për Hetimin e Trafiqeve të Paligjshme të DVP Vlorë, në vijim të punës për goditjen e rasteve të shfrytëzimit të prostitucionit, kanë evidentuar dhe goditur një rast të kësaj veprimtarie kriminale,” thuhet në deklaratën e Policisë.E shpallur në kërkim është A. A., 43 vjeçe, banuese në Spanjë. Sipas hetimeve paraprake, ajo kishte marrë me qira një apartament në lagjen “Pavarësia 3” në Vlorë, ku dyshohet se shfrytëzonte për prostitucion shtetase të huaja.”-thuhet në njoftim.

Më tej policia bën të ditur se në kuadër të këtij operacioni, po ndiqen penalisht në gjendje të lirë tre shtetase venezuelase, R. L., 25 vjeçe, K. C., 30 vjeçe dhe H. S., 30 vjeçe, të cilat jetonin në Vlorë dhe ushtronin aktivitetin në apartamentin e marrë me qira.

Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.

LEXONI GJITHASHTU:

• Shërbimet varionin nga 80 në 200 euro, goditet qendra e prostitucionit në Durrës
• Depozituan mbetje ndërtimi në plazh, arrestohet inxhinieri i objektit në Dhërmi

The post Goditet “çerdhja” e prostitucionit në Vlorë, shpallet në kërkim spanjollja appeared first on Euronews Albania.

Politikani britanik Nigel Farage, një nga figurat më të njohura të fushatës për largimin e Mbretërisë së Bashkuar nga Bashkimi Evropian (Brexit), është përfolur së fundmi për një vizitë të mundshme në Shqipëri. Ftesa i është bërë publikisht nga Kryeministri Edi Rama, pas një debati të ashpër mes tyre për çështjen e emigrantëve shqiptarë në Britani.

Gjithçka nisi me kritika të Ramës ndaj politikave të pas-Brexit-it dhe qasjes së Londrës ndaj emigracionit, të cilat ai i cilësoi si të errëta dhe të padrejta. Farage reagoi duke pretenduar se një në çdo 50 shqiptarë në Mbretërinë e Bashkuar ndodhet në burg, një deklaratë që u hodh poshtë si e pasaktë nga pala shqiptare.

Në vend të përshkallëzimit të debatit, Rama e ftoi Farage në Shqipëri për të parë nga afër realitetin, mikpritjen dhe historinë e vendit. Farage e pranoi ftesën, duke kërkuar që vizita të shërbejë edhe për të diskutuar çështjen e riatdhesimit të shtetasve shqiptarë të dënuar në Britani.

Në pritje të konfirmimit të vizitës, POLITICO ka sugjeruar një axhendë të mundshme për politikanin britanik në Shqipëri:

1. Vizitë në bunkerët e regjimit komunist

Shqipëria është e njohur për rreth 700,000 bunkerë të ndërtuar gjatë diktaturës së Enver Hoxhës. Këto struktura mund të ngjallin interes për Farage, i cili shpesh përdor retorikë për “mbrojtjen e kufijve” dhe ndalimin e emigracionit të pakontrolluar.

2. Takim me burrneshat

Një fenomen kulturor i rrallë, burrneshat janë gra që marrin role tradicionale mashkullore në shoqëri dhe betohen për celibat. Edhe pse nuk kanë lidhje me çështje të identitetit gjinor modern, mund të ofrojnë një perspektivë të pazakontë për Farage, i cili është kritik i lëvizjeve “woke” dhe të drejtave të personave transgjinorë.

3. Shijimi i rakisë tradicionale

Në vitin 2013, Farage udhëtoi në Bullgari pas komenteve të debatueshme për emigrantët, ku u pa duke shijuar verë dhe muzikë tradicionale. Në Shqipëri, ai mund të provojë rakinë, një pije tradicionale e fortë që konsumohet gjerësisht në vend.

4. Vizitë në selinë botërore të Bektashinjve

Bektashinjtë përfaqësojnë një sekt liberal të Islamit Sufi, me qendër botërore në Tiranë. Hapësira përfshin një filozofi të hapur ndaj grave dhe përdorimit të alkoolit në rituale. Vizita mund të shërbejë për të kuptuar më mirë larminë fetare në Shqipëri.

5. Homazh në Varrezat Gjermane dhe Murin e Berlinit

Duke qenë stërnip i një emigranti gjerman dhe bashkëshort i një qytetareje gjermane, Farage mund të vizitojë Varrezat Gjermane në Tiranë dhe një fragment të Murit të Berlinit, të vendosur pranë zyrës së Kryeministrit Rama, si një reflektim për historinë dhe migrimin.

6. Vizitë në Teatrin e Kukullave

Farage është shprehur se pas politikës do të donte të kalonte më shumë kohë në teatër. Teatri i Kukullave në Tiranë, i rikonstruktuar pas tërmetit të vitit 2019 me mbështetje të BE-së, mund të jetë një ndalesë simbolike, sidomos duke pasur parasysh kritikat që ai ka drejtuar më parë ndaj liderëve evropianë.

7. Vizitë në Has dhe Kukës

Në qytetin verior Has, ku shumica e banorëve kanë të afërm në Britani, ndodhet një statujë e Mbretëreshës Elizabeth II. Në Kukës, një qytet me lidhje të forta me diasporën në Britani, Farage mund të njihet nga afër me ndikimin e komunitetit shqiptar atje, si dhe me historinë e mikpritjes ndaj refugjatëve kosovarë gjatë luftës së viteve 1998-1999.

8. Një kafe tradicionale shqiptare

Pas incidentit në fushatën zgjedhore të 2024-ës, ku iu hodh një filxhan kafeje, Farage mund të përjetojë një pritje më të ngrohtë në Shqipëri. Tirana ka një numër të madh kafeneje për frymë në Evropë, dhe kodi tradicional i mikpritjes shqiptare “besa” garanton respekt maksimal për mysafirët.

9. Pushime në bregdetin shqiptar

Me një vijë bregdetare prej rreth 276 kilometrash që shtrihet nga Adriatiku në Jon, Shqipëria ofron plazhe të bukura për çdo shije. Kjo mund të jetë edhe pjesa më relaksuese e udhëtimit për politikanin britanik.

Çështja e emigracionit: Kush ka të drejtë?

Në tetor 2024, gazeta The Telegraph raportoi se në Mbretërinë e Bashkuar jetojnë rreth 52,000 shqiptarë, prej të cilëve 1,227 ndodhen në burg. Këto janë shifrat që përdor Farage.

Megjithatë, Ambasadori i Shqipërisë në Londër, Uran Ferizi, i tha POLITICO-s se komuniteti shqiptar është shumë më i madh  mbi 300,000 vetë. Ai sqaroi se shifrat e Telegraph nuk përfshijnë shqiptarët e natyralizuar, fëmijët e lindur në MB me prejardhje shqiptare dhe ata që kanë pasaporta italiane apo greke.

Për sa i përket të dënuarve, ambasada thekson se të dhënat nuk marrin parasysh moshën, gjininë apo përkatësinë sociale, dhe se kur llogariten në raport me popullsinë reale shqiptare në MB, rezulton se rreth 1 në 500 shqiptarë janë të burgosur  jo 1 në 50, siç pretendon Farage.

Kryeministri Rama ka theksuar se nëse Farage pranon se është gabuar, ai duhet të jetë i pari që t’i kërkojë publikut të mos flasë më padrejtësisht për shqiptarët.

Nëse vizita e Farage në Shqipëri ndodh vërtet, ajo pritet të zgjojë vëmendje mediatike dhe politike jo vetëm për simbolikën, por edhe për mundësinë e një dialogu më të thelluar mbi emigracionin, perceptimet dhe faktet.

The post Politico ironizon Nigel Farage: 9 gjërat që do të bëjë sapo të mbërrijë në Shqipëri appeared first on Euronews Albania.

Bashkëshortja e kapitenit të anijes, Arben Anamali, i cili humbi jetën për të shpëtuar dy turistet e huaja nga mbytja në Liqenin e Shkodrës, ka dhënë një deklaratë për media.

Mes lotësh ajo tha se Arbeni ishte një njeri i jashtëzakonshëm, gjithmonë i përkushtuar për të ndihmuar të tjerët.

“Është një dhimbje e madhe për të gjithë familjen tonë, për nënën e tij në radhë të parë, për mua, për djalin dhe vajzën, dhe për të gjithë ata që e kanë njohur, sepse ka qenë njeri shumë i mirë, shumë punëtor dhe shumë i përkushtuar. Ka qenë shumë i dhënë pas të tjerëve, të gjithëve u thoshte: ‘Ke nevojë për gjë?’, sa dhe jetën e vet e dha për turistët,” – u shpreh bashkëshortja e tij.

Ajo rrëfeu momentin kur mori lajmin tragjik:

Na njoftoi një koleg që kishte punuar me të. Më tha që Beni ka pësuar aksident. Nuk e mendova këtë gjë, sepse ka qenë shumë i fortë fizikisht, i guximshëm, notar i mirë dhe nëse do të kishte aksident, do ta rregullonte vetë anijen.”

Ndërkohë, nipi i tij theksoi se humbja është e jashtëzakonshme dhe falënderoi të gjithë ata që punuan për gjetjen e trupit. Ai shtoi se shpallja e të afërmit të tij si Dëshmor i Atdheut është nderim i merituar.

“Është një humbje shumë e madhe. Falënderoj të gjithë ata që kanë kontribuar si për gjetjen e trupit, ashtu edhe për nderimin që e ka pasur të merituar. Të mos harrohet dhe të respektohet si hero, pasi ka bërë një akt që nuk e bën çdokush,” – u shpreh ai.

Me djalin që i mban dorën, flet mes lotësh gruaja e kapitenit hero: Edhe jelekun e fundit ia dha turistëve pic.twitter.com/e44MUeB68s

— Euronews Albania (@EuronewsAlbania) July 11, 2025

LEXONI GJITHASHTU:

• Rama nderon kapitetin që humbi jetën për të shpëtuar turistët në Shkodër
• U mbyt pasi shpëtoi 2 turistët, gjendet pas 48 orësh trupi i kapitenit Arben Anamali

The post “E dha jetën për të tjerët”- Flet mes lotësh bashkëshortja e kapitenit në Shkodër appeared first on Euronews Albania.

Kreu i Partisë Demokratike, Sali Berisha, ka hedhur akuza të forta ndaj qeverisë për mënyrën se si është trajtuar procesi i votimit nga diaspora. Në një deklaratë për shtyp, Berisha e cilësoi kryeministrin Edi Rama si “armik të egër të shqiptarëve jashtë vendit”, duke e krahasuar qëndrimin e tij ndaj votës së emigrantëve me sjelljet e diktatorëve në histori.

“Duhet të them se kapitulli i diasporës apo qëndrimi i Edi Ramës apo i Ramaduros ndaj votës së diasporës kalon çdo qëndrim të cilitdo diktatori tjetër në histori. Por shtypja që i ka bërë shqiptarëve në diasporë me manipulimin masiv të votave të tyre, tregon se është një armik i egër i shqiptarëve”- tha Berisha.

Ai njoftoi se tashmë është në një fazë të re të këtij procesi, duke akuzuar qeverinë për manipulim të drejtpërdrejtë të zarfeve që u dërguan përmes DHL.

“Tani jemi përsëri në fazën ku DHL e qeverisë ka dorëzuar zarfat. Këtu kemi të bëjmë me zarfa që i adresohen një personi të caktuar”- tha ai.

“Shikoni firmat që ka vendosur personi V., sikur gjoja e ka marrë personi V. Zarfat e diasporës kanë firma, zhgarravina të manipuluara. Siç e shihni, zarfet nuk u dorëzuan te qytetarët, por në mënyrë kriminale u grumbulluan në një qendër që i përdori ato për PS-në”-vijoi kreu i PD-së.

Berisha tha se përpjekjet e Ramës për të shmangur vëmendjen publike nga kjo çështje janë të kota, pasi sipas tij, opozita nuk do ta njohë këtë proces.

“Rama, sado të mundohet ta largojë vëmendjen nga kjo farsë, kjo s’do të thotë që ne do t’i njohim. Ai ka vetëm një mbrojtës, që quhet Altin Troplini”- përfundoi Berisha.

The post Berisha: Vota e diasporës është manipuluar, zarfat u përdorën në mënyrë kriminale appeared first on Euronews Albania.

SPAK ka zhvilluar këtë të premte një operacion të gjerë në Shkodër, në kuadër të një hetimi për trafik ndërkombëtar droge.

Burime për Euronews Albania bëjën me dije se, janë lëshuar 13 masa sigurie, nga të cilat deri tani janë ekzekutuar 8, ndërsa 5 persona të tjerë janë shpallur në kërkim. Mes të shpallurve në kërkim janë edhe punonjës policie, të implikuar në këtë aktivitet kriminal.

Burime bëjnë me dije se një ndër efektivët e përfshirë është Erjon Dani, më herët ish-drejtues i sektorit të krimeve në komisariatin nr. 3 në Tiranë.

Operacioni është zhvilluar mbi bazën e transkripteve të siguruara nga aplikacioni i koduar Sky ECC, ndërsa hetimi është drejtuar nga prokurori Adnan Xholi.

Lajm në përditësim…

The post SPAK operacion në Shkodër, lëshohen 13 masa sigurie appeared first on Euronews Albania.

Një ngjarje e rëndë është shënuar mesditën e sotme në plazhin e Qerretit, Kavajë, ku një 59-vjeçar ka humbur jetën tragjikisht.

Sipas burimeve paraprake, rreth orës 12:00, shtetasi K. Gj., banues në Tiranë, dyshohet se ka pësuar arrest kardiak në momentin që ka hyrë në det. Për fat të keq, ai nuk ka mundur të mbijetojë.

Grupi hetimor ndodhet në vendngjarje dhe po punon për të dokumentuar plotësisht shkaqet e vdekjes së 59-vjeçarit.

The post Pëson arrest kardiak sa hyn në det, ndërron jetë 59-vjeçari në Qerret appeared first on Euronews Albania.

Një ngjarje e rëndë është shënuar sot në fshatin Tervol të Gramshit, ku një 58-vjeçar ka humbur jetën tragjikisht gjatë punës.

Sipas burimeve paraprake, shtetasi H.D., 58 vjeç, ishte duke punuar me një fadromë për hapjen e një pusi, kur një masiv dheu ka rrëshkitur dhe e ka zënë poshtë. Si pasojë e plagëve të marra, ai ka ndërruar jetë në vendngjarje.

Shërbimet e Policisë dhe grupi hetimor ndodhen në vendin e ngjarjes dhe po punojnë për sqarimin e plotë të rrethanave.

The post 58-vjeçari humb jetën gjatë punës me fadromë, e zë poshtë masivi i dheut appeared first on Euronews Albania.

Një ngjarje e rëndë ka ndodhur këtë të premte në plazhin e Lungomares, Vlorë, ku dy persona kanë rrezikuar të mbyten.

Sipas informacioneve paraprake, bëhet fjalë për një vajzë të re dhe një grua, të cilat janë nxjerrë nga uji në gjendje të rëndë shëndetësore.

Të dyja janë transportuar menjëherë drejt spitalit të Vlorës, ku mësohet se janë intubuar nga mjekët për shkak të gjendjes së rënduar.

Shërbimet mjekësore po bëjnë përpjekje për t’u dhënë ndihmën e nevojshme dhe për të stabilizuar gjendjen e tyre.

Autoritetet kanë nisur hetimet për të zbardhur rrethanat e ngjarjes.

LEXONI GJITHASHTU:

• Nxori nga deti nënën e vajzën që po mbyteshin, flet heroi i Vlorës: U hodha i vetën

The post Ngjarje e rëndë në Vlorë: Dy gra rrezikojnë të mbyten, intubohen në spital appeared first on Euronews Albania.

Gjatë takimit që kryeministri Edi Rama mbajti me kryebashkiakët e vendit këtë të premte, u prezantua një plan i hartuar nga Ministria e Financave mbi performancën ekonomike të bashkive. Plani evidentoi bashkitë që përballen me vështirësi financiare dhe vendosi afate konkrete për rikuperimin e situatës.

Sipas të dhënave të bëra publike, bashkitë që rezultojnë me probleme më të theksuara financiare janë: Vora, Pogradeci, Peqini, Konispoli dhe Cërriku. Ndërkohë, bashkitë që ndodhen në vështirësi financiare janë: Dimali, Rrogozhina dhe Kavaja.

Për këto dy kategori bashkish është vendosur si afat 20 korriku për hartimin e planit të shlyerjes së detyrimeve. Planet duhet të miratohen nga Këshillat Bashkiakë dhe të dërgohen në Ministrinë e Financave brenda datës 25 korrik, ndërsa realizimi i tyre duhet të përfundojë brenda 12 muajve.

Detajet e planit për bashkitë me probleme financiare

Bashkitë: Vorë, Pogradec, Peqin, Konispol, Cërrik

Hartimi i planit të shlyerjes së detyrimeve deri më 20 korrik.

Miratimi i planit nga Këshilli Bashkiak dhe dërgimi i tij në Ministrinë e Financave brenda 25 korrikut.

Zbatimi i planit për shlyerjen e detyrimeve brenda 12 muajve.

Bashkitë: Dimal, Rrogozhinë, Kavajë

Kryetari i NJVQV-së përgatit planin e rehabilitimit financiar deri më 20 korrik.

Plani dërgohet në Ministrinë e Financave për komente dhe rekomandime deri më 25 korrik.

Plani i miratuar zbatohet përmes degëve të Thesarit deri më 30 korrik.

Bashkitë me performancë më të mirë

Ndërkohë, janë evidentuar edhe bashkitë që kanë performuar më mirë:

Realizimi i të ardhurave vendore (mbi 70% fakt/plan):

• Tiranë
• Kamëz
• Durrës
• Vlorë
• Elbasan
• Shkodër

Realizimi i investimeve (mbi 70% realizim):

• Tiranë
• Kamëz
• Durrës
• Lezhë
• Elbasan

-Shkodër

Bashkitë që nuk janë pjesë e dy kategorive problematike nuk kanë shfaqur probleme financiare dhe kanë ruajtur stabilitetin e tyre ekonomik.

The post Performaca e bashkive: Qeveria ultimatum atyre me probleme ekonomike, plani appeared first on Euronews Albania.

Në Gjykatën e Posaçme të Apelit për Korrupsionin dhe Krimin e Organizuar u mbajt këtë të premte seanca për rigjykimin e dosjes së Festim Bexhdilit, i akuzuar për vrasjen dhe zhdukjen e Jan Prengës, ngjarje e ndodhur në janar të vitit 2020.

Bexhdili është kopshtari i resortit luksoz “Golden” në Shijak, ku dyshohet se u mbajt peng dhe më pas u zhduk Jan Prenga. Rigjykimi në Apel zhvillohet pas vendimit të Gjykatës së Lartë, e cila prishi dënimin me burgim të përjetshëm për Bexhdilin dhe e ktheu çështjen për shqyrtim të ri.

Ndërkohë, gjatë seancës prokurorët e SPAK u përplasën në sallë në lidhje me dënimin e kopshtarit.

Prokurorja Elida Kaçkini kërkoi lënien në fuqi të vendimit të dhënë nga GJKKO për dënimin me burgim të përjetshëm të Festim Bexhdilit.

“Ne vlerësojmë që vendimi i GJKKO, i dhënë për Festim Bexhdilin, duhet të lihet në fuqi si vendim i mbështetur në ligj dhe prova. I pandehuri duhet të deklarohet fajtor sa i përket veprave penale që kemi ngritur për të. Rrëmbimi ka qenë i paralajmëruar sepse viktima është ndjekur disa ditë radhazi. Kompleksi “Golden” ka qenë i paracaktuar nga ana e tyre. I pandehuri, ditën e ngjarjes, ka pasur një vendndodhje të ndryshme nga kompleksi deri të paktën në orën 10:57, ku ka hyrë në drejtim të Shijakut. Ai është gjendur në kompleks, referuar pamjeve filmike, në orën 11:19 dhe shkon në drejtim të një garazhi, më pas shfaqet duke pasur një vëmendje të shtuar ndaj aparatit celular. Ai shfaqet duke pritur në derën hyrëse të garazhit. Në këtë derë më pas futet makina Audi A6 që i përket Altin Hajrit. Kjo mënyrë ndërveprimi tregon që ata kanë pasur dijeni dhe secili prej të pandehurve drejtohet drejt kompleksit për të kryer rolet e tyre. Altin Hajri shfaqet në 11:27, ndërsa në 11:36 vjen mjeti i autorëve. Veprimet e kryera tregojnë bindshëm që Festim Bexhdili ka pasur dijeni për ngjarjen. Në tërësinë e provave, ne vlerësojmë se i pandehuri ka pasur rol aktiv në ngjarje, ndaj vendimi me burgim të përjetshëm është proporcional. I pandehuri nuk ka shprehur as pendesë, nuk i ka kërkuar falje familjarëve, ka mbajtur vetëm qëndrim mohues, jo sqarues.”- tha Kaçkini.

Nga ana tjetër, prokurori Behar Dibra kërkoi rikualifikim të veprës penale dhe dënimin e Bexhdilit me 20 vite burg.

“Në respekt të koleges dhe duke qenë dakord për parashtrimet që bëri, kam një vlerësim ndryshe për elementët e fajësisë së të pandehurit. Fakti është që vepra penale ‘mbajtja peng e Jan Prengës’ është pasojë e një aktiviteti të kryer në Angli nga një i pandehur tjetër që është në një procedim tjetër. Prezenca e Festim Bexhdilit brenda në kompleks në orën 12:15 mund të ketë qenë për arsye të punëve të tij. Ai është kushëri i Altin Hajrit dhe punonte në kompleks. Nuk ka asnjë provë që Festim Bexhdili njihte Aldo Majnishtën, Korado Geshtenjën, Dritan Rexhepin etj. Në orën 18:49 Festim Bexhdili ndihmon Majnishtën dhe Martin Bletën të nxirrnin Jan Prengën nga bagazhi i makinës dhe më pas e zhvendosin në një automjet tjetër. Në automjetin ku u fut trupi hipin Altin Hajri, Geraldo Martini, Aldo Majnishta e të tjerë, dhe më pas automjeti rikthehet sërish në kompleks pa trupin e Jan Prengës. Trupi tashmë ishte fshehur. Nuk ka prova të gjetjes fizike të Jan Prengës, nuk mund t’i kërkojmë të pandehurit të thotë diçka që ai mbase nuk e di.”- tha Dibra.

Në sallën e gjyqit u dëgjua edhe vetë i pandehuri Festim Bexhdili, i cili vijoi të mohojë akuzat.

“Jam dakord me çfarë kam thënë në shkallë të parë. Nuk jam dakord as me pengmarrjen, as me vrasjen. Kam qenë aty, nga frika kam marrë trupin. Kushdo të ishte ashtu do bënte dhe prokuroria. Jam hallexhi, isha në punë, u gjenda aty. Ishalla bëhet drejtësi.”- tha ai.

Mbrojtja e Bexhdilit, përfaqësuar nga avokati Ilir Murati, kërkoi pafajësi, duke vënë theksin te mungesa e provave për implikimin e tij në ngjarje.

“Gjykata e Lartë e prishi këtë vendim. Prokuroria ka qëndrim të dyzuar. Thotë se ai ka pasur telefon, por nuk e kemi hapur dot. Kishte Encro, por s’gjetëm gjë. Zoti gjyqtar, duhen prova. E vërteta e Festimit është që u ndodh në atë ambient dhe bëri ato veprime. Përkrahu autorët, nuk kallëzoi krimin… Së fundmi, dënimi i Festim Bexhdilit ka bërë jehonë edhe për vetë ata aty.”- tha avokati.

LEXONI GJITHASHTU:

• Pamjet filmike ‘fundosin’ kopshtarin për vrasjen e Jan Prengës
• Dy rrëmbimet e bujshme, humbja e gjurmëve të Jan Prengës dhe Ervis Martinajt

The post Prokurorët e SPAK përplasen me njëri tjetrin për kopshtarin e kompleksit “Golden” appeared first on Euronews Albania.

Kryeministri Edi Rama mbajti këtë të premte një takim me kryetarët e bashkive, ku ndau me ta disa nga shqetësimet mbi performancën e punës së institucioneve lokale.
Rama u ndal dhe te shkarkimi i drejtuesve të policisë në Shkodër, pasi kishin lejuar ndërtimin e objekteve të paligjshme në zonën e Thethit. Rama tha se të gjithë shefat e komisariateve dhe drejtuesit e policisë në qarqe duhet ta kenë të qartë se do të mbajnë përgjegjësi për çdo ndërtim pa leje në territor.

“Duke qenë se këtu është i pranishëm Drejtori i Përgjithshëm i Policisë dhe drejtues të tjerë, dua të ritheksoj se ajo që ndodhi dje me shkarkimin e drejtorit të Policisë së Shkodrës është dhe shpresoj të shërbejë si një mesazh i qartë për të gjithë: asnjë drejtor qarku nuk mund të justifikohet se “nuk dinte gjë”, kur nuk bëhet fjalë për një tavolinë me katër karrige që ka dalë nga vija, por për 40 ndërtime pa leje, apo qoftë edhe për një ndërtim të vetëm pa leje.

Policia e Shtetit ka treguar se, kur do, di të shkojë edhe në majë mali, kur një fshatar ndërton një avlli dhe i thotë se është ndërtim pa leje. Edhe në majë të Pilurit, ku duhet zemër për të ngjitur, kanë gjetur dikë që kishte ngritur një mur, ndërsa në bregdet, aty ku ndërtohen resorte dhe ku merret dheu nga kantieri dhe hidhet në det, duke e kthyer detin tonë të kaltër, Jonin, në një lumenjtë e ndotur si Lana.

Ne nuk mund të lejojmë që kjo të ndodhë. Të gjithë drejtorët e qarqeve dhe shefat e komisariateve duhet ta dinë se mbajnë përgjegjësi për çdo ndërtim të paligjshëm. Kam parasysh zonat e mbrojtura, bregdetin dhe qendrat turistike. Nuk kemi më luksin të lejojmë dëmtimin e bregdetit, siç ka ndodhur në të shkuarën”, tha Rama.

LEXONI GJITHASHTU:

• Aksioni në Theth, Rama: Kishte bum ndërtimesh pa leje para dhe gjatë fushatës
• Rama kërkon shkarkimin e të gjithë drejtorëve në bashkitë e Elbasanit dhe Lushnjës

The post Rama apel shefave të policisë: Do mbani përgjegjësi për çdo ndërtim pa leje appeared first on Euronews Albania.

Rama shënjestroi kryebashkiakun e Elbasanit Gledian Llatja, për të cilin kërkoi më shumë angazhim në kryerjen e detyrës.

Ai mori si shembull barin e paprerë në varrezat e Elbasanit, si një tregues se drejtuesit e bashkisë janë në gjumë.

Rama kërkoi nga bashkia e Elbasanit dhe e Lushnjës shkarkimin e të gjithë drejtuesve lokalë dhe hapjen e garës për caktimin e drejtuesve të rinj.

“Është e pakonceptueshme të ndodhin këto gjëra. Mos të jetë kryetari i bashkisë i informuar mbi çdo tullë që ndodh në qytet. Patjetër që nëse kryetari i bashkisë i ka sytë gjysmë të hapur dhe gjysmë të mbyllur, ata që janë nën të i kanë të mbyllur. Siç i kishin ata në Vlorë. Pastaj edhe në bashkinë e Elbasanit dhe të Lushnjës duhet bërë pezullimi i plotë dhe shkarkimi i të gjithë drejtorëve me dorëheqje, për t’i dhënë mundësinë që të provojnë që janë njerëzit e duhur për atë pozicion. Duhet shkundur e gjithë kjo pemë, pasi 10 mandate në Elbasan kryetar janë një barrë që mua personalisht bashkë me 12 mandatet e Fierit, bashkë me 9 mandatet e Vlorës më kanë marrë dhe ato orë që flija gjumë. Duhet të të lëmë pa gjumë ty, jo të flesh më shumë. E kam vënë re se për disa morëm 83 mandate dhe presin të tregojnë sa të fortë jemi, në fakt nuk jemi më të fortë, jemi më të ekspozuar ndaj njerëzve të cilët duan 10-fishin nga ne. Çfarë 10-fishi mund t’i japësh ti Elbasanit nëse e lë barin në varreza ashtu? Justifikime mund të japësh sa të duash, por nuk ka asnjë justifikim, zero”, tha Rama.

Gjithashtu shefi i qeverisë kërkoi më shumë angazhim nga bashkitë në marrjen e kredive të buta si bashkëaksionere me fermerët e zonës.

“Sot kemi një instrument domethënës ku patjetër bashkitë duhet të marrin përgjegjësinë dhe pjesën e tyre që është linja e kredisë të Bankës së Shqipërisë 250 mln euro. Një kredi e butë ku bashkitë duhet të jenë forcë udhëheqëse, bashkitë duhet t’i bëjnë bashkë fermerët dhe të bëhen aksionerë për të bërë një linjë përpunimi të ullirit dhe për të prodhuar vajin e ullirit. Sigurisht duke qenë bashkitë pjesë bëhet shumë më e thjeshtë për bankat të mbështesin fermerët me kredi të buta. Duke u bërë bashkitë pjesë e kësaj edhe qeveria mund të futet dhe të rrisë mbështetjen”, tha Rama.

LEXONI GJITHASHTU:

• Aksioni në Theth, Rama: Kishte bum ndërtimesh pa leje para dhe gjatë fushatës
• Rama: Të gjithë kryetarët e njësive administrative në Shqipëri duhet të shkarkohen

The post Rama kërkon shkarkimin e të gjithë drejtorëve në bashkitë e Elbasanit dhe Lushnjës appeared first on Euronews Albania.

Kryeministri Edi Rama, gjatë një takimi me kryetarët e bashkive këtë të enjte, u ndal te problematika e ndërtimeve pa leje në territorin e vendit. Ai paralajmëroi masa të reja për forcimin e kontrollit dhe monitorimit të kantierëve ndërtimorë.

Sipas Ramës, kantieret do të jenë të pajisura me kamera online 24 orë dhe sisteme GPS, ndërsa do të ngrihet edhe Qendra e Monitorimit të Ndërtimeve.

“Duhet një qasje me legalizimet. Jemi në kushte ku nuk mund të mbetemi vetëm tek sytë e njerëzve në territor, kur tanimë po i bëjmë gjërat bashkë për të pasur një kontroll teknologjik për territorin, që të na garantojë punën si qendra e monitorimit të trafikut. Tërësisht e njëjta gjë duhet të ndodhë me territorin. Inspektimi për ndërtimet duhet të mbështetet nga satelitë që i kemi, dronët dhe një strukturë të dedikuar, të ndërtojmë qendrën e monitorimit të ndërtimeve”- tha Rama.

Kreu i qeverisë bëri të ditur gjithashtu se Agjencia e Zhvillimit të Territorit ka përgatitur një rregullore të re për kompanitë ndërtuese. Sipas saj, të gjitha ndërtimet që kanë qëllime përfitimi, si pallatet, do të monitorohen në kohë reale.

“Agjencia e Zhvillimit të Territorit ka përgatitur një rregullore për kompanitë. Do të detyrohen që për të gjitha ndërtimet që kanë qëllime përfitimi – pallate, ndërtime që nuk mund të lejojnë të kalojnë kufijtë e lejeve – kantieret të jenë me kamera online 24 orë dhe të ndiqen në kohë reale nga forcat e inspektimit. Të gjitha kantieret të pajisen me GPS që të monitorohet trafiku i tyre, materialet që hedhin apo materialet që futen në kantiere”- tha Rama.

The post Rama: Do ngrihet qendra e monitorimit të ndërtimeve, kantieret me kamera e GPS appeared first on Euronews Albania.