Read More...

Policia e Fieri ka dhënë informacione të tjera në lidhje me aksidentin rrugor, të ndodhur në datë 08.08.2025, në vendin e quajtur “Qafa a Koshovicës”, ku mbetën të dëmtuar katër persona.

Sipas asaj që informon policia shkak i aksidentit është bërë ndërprerja e rrugës nga automjeti që drejtohej nga shtetasi M. A., i cili është larguar nga vendngjarja.

“Në përfundim të veprimeve procedurale specialistët e Sektorit të Qarkullimit Rrugor bënë arrestimin në flagrancë të shtetasit M. A., 45 vjeç, banues në Itali, për veprat penale “Shkelja e rregullave të qarkullimit rrugor” dhe “Largimi nga vendi i aksidentit””, njoftojnë blutë e Fierit./abcnews.al

Një 25-vjeçar ka rënë në prangat e policisë së Lezhës, pasi është autor i një sërë vjedhjesh.

Gjatë kontrollit fizik, 25-vjeçarit iu gjet dhe iu sekuestrua një sasi lënde narkotike e dyshuar e llojit kokainë.

“Nga veprimet hetimore ka rezultuar se shtetasi F. D. është autor i: disa vjedhjeve me thyerje të automjeteve dhe banesave; tentativave për vjedhje në lokale në lagjet dhe zonat përreth Lezhës; disa vjedhjeve në bar-lokale, restorante, agjenci udhëtimi dhe supermarkete në zonën e Laçit”, njofton policia.

Në kërkim është shpallur edhe 26-vjeshpallur edhe 26-vjeçari M. D., banues në Kurbini dyshuar si bashkëpunëtor në këto vepra penale.

Gjithashtu, po punohet për dokumentimin e veprave të tjera penale të dyshuara të kryera nga këta shtetas.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme./abcnews.al

Kryeministri Edi Rama, në një komunikim të drejtpërdrejtë në rrjetet sociale, prezantoi “Rilindjen Urbane 2.0” si një program katërvjeçar që do të zbatohet në mënyrë të vazhdueshme, duke theksuar se nuk bëhet fjalë për një aksion të përkohshëm veror.

Ai iu përgjigj kritikave mbi kohën e nisjes së ndërhyrjeve, duke theksuar se procesi nuk mund të shtyhej për në dimër. Rama kritikoi gjithashtu një pjesë të industrisë turistike për mungesë vizioni afatgjatë, duke paralajmëruar masa të forta për rregullimin e plazheve dhe një “shkundje” të thellë të bashkive për të ngritur nivelin e pushtetit vendor.

“Rilindja urbane 2.0 është program që do të vazhdojë 4 vjet dhe ky proces do të jetë konstant. Nuk është aksion apo sulm veror. Dhe ata që thonë se pse nuk e lije dot për në dimër, jo nuk e linim dot në dimër. Jo se kishim turistë nëpër këmbë, çështja e turistëve lidhet me dy apo tre gjera të tjera për të cilat do të llafosemi në shtator, duke filluar nga një pjesë e industrisë që nuk po mendon fare strategjikisht, por vetëm ‘kap ca të kapësh sot’, dhe po i bën gropën vetes nesër, pasi ato investime që po bën nuk do t’i shlyejë nëse sot vendos çmime të cilat do të hapin me shumë shpejtësi fjalën që është shumë shtrenjtë në Shqipëri. Do të flasim edhe për plazhet, kur kemi bërë hap këtë vit, por të pamjaftueshem. Do të marrim masa radikale edhe për plazhet, por ama shkundja e bashkive sot është domosdoshmëri dhe që pushteti vendor të ngrihet në një moment tjetër”, tha Rama./abcnews.al

Dita e gjashtë sot që disa fshatra në bashkinë Finiq vijojnë të jenë nën pushtetin e zjarrit. Edhe sot situata vijon të përkeqësohet me ritme alarmante.

Zjarri nisi në mal në Dhrovjan dhe ka kaluar fshat pas fshati duke lënë pas gjurmë të dukshme nga djegia. Mbrëmjen e së shtunës dhe gjatë gjithë natës të së dielës është luftuar në fshatrat Livinë, Krongj, Velahovë, dhe sot edhe në fshatin Ardhasovë.

Në fshatin Krongj është djegur vetëm Kisha e fshatit, ndërsa janë evakuar banorët. Ndlrsa  në fshatin Livinë dhe Velahovë janë djegur disa shtëpi.

Zjarri po përhapet me shpejtësi për shkak edhe të erës dhe temperaturave të larta.  Forcat zjarrfikëse të Finiqit, Sarandës, Konispolit dhe Delvinës, ndodhen në terren dhe po punojnë në kushte tepër të vështira për të vënë nën kontroll vatrat aktive, ndërsa është kërkuar ndërhyrje shtesë nga forcat qendrore dhe tjetër ndihmë nga ajri./abcnews.al

Gjatë një komunikimi live në rrjetet sociale, Kryeministri Edi Rama u ndal te nevoja për një bashkëpunim më efektiv mes qytetarëve dhe institucioneve, duke theksuar rëndësinë e platformës në e-Albania si mjet për denoncime dhe bashkëpunim.

Ai paralajmëroi se çdo institucion që nuk reagon brenda 24 orëve mund të denoncohet për papërgjegjësi, ndërsa njoftoi reformimin e strukturës së Inspektoriatit të Mbrojtjes së Territorit (IMT). Rama theksoi se ndërtimet pa leje nuk do të tolerohen dhe paralajmëroi masa të rrepta ndaj shkelësve të ligjit.

“Keni një platformë të cilën e keni në e-Albania, ku atje mund të punojmë dhe të bashkëpunojmë. Në3 rastet se brenda 24 orëve nuk ka reagim atëherë keni të drejtën që të denonconi edhe institucionet përkatëse për papërgjegjësi. IMT e bashkive do të reformohet do të ndryshojë struktura. Nuk do të jetë më drejto i IMT-je dhe kjo as që diskutohet. Më e rëndësishmja është një adresë ku robi përcillet me prova dhe fakte dhe jo nga Facebook. Kush do të ndërtojë një metër katror të paligjshëm, nuk do e gëzojë dot, ose do e marrë shteti ose do hidhet në tokë, kjo duhet të jetë shumë e qartë për të gjithë”, tha Rama./abcnews.al

Kryeministri Edi Rama, gjatë një komunikimi të drejtpërdrejtë me qytetarët në rrjetet sociale, ka folur për ndërhyrjet urbanistike të kohëve të fundit, duke theksuar se shumica prej tyre janë “çmontuese” dhe jo aq të mëdha sa mund të duken.

Ai e cilësoi këtë proces si fazën e parë të një “Rilindjeje 2.0”, me synimin për të krijuar hapësira komunitare më cilësore. Rama gjithashtu deklaroi se qytetarët do të kenë jo vetëm detyrime, por edhe të drejta në kuadër të këtij transformimi, ndërsa theksoi rëndësinë e drejtësisë së re, larg ndikimeve politike të së kaluarës.

“”Bëhet fjalë për ndërtime të cmontueshme dhe ka mirëkuptim të madh dhe po i cmontojnë. Ka edhe raste kur kjo nuk ndodh. Ky nuk është sulm ndaj aktivitetit sipërmarrës, po përgatisim një rregullore kombëtare që do të vendosdë qartë kufijtë dhe do të japë qartë hapësirat e lirisë për. Do  të ketë të gjithë hapësirën edhe për njësitë tregtare por pa kaëpërcyer kufirin që është i komunitetit. Në fund kam edhe elementin e teknologjisë. Shqipëria ka bërë progress të jashtëzakonshëm dhe para pak ditësh, një nga institutet më prestigjioze në botë të qeverisjes, të matjes së parametrave të qeverisjes, e përcaktoi Shqipërinë si një nga yjet në ngjitje të hapësirës evropiane së bashku me 4 vende të tjera për reformat dhe transformimin. Shqipëria është dicka krejt tjetër, e tregojnë shumë gjëra. Teknologjia do të na ndihmojë në këtë fazë, që sic kemi kaluar te faza ku të gjithë ngrini  llaç e ngrinin mure, kalojmë te faza që s’do të ketë më. Teknologjia do të na çlirojë nga ky fenomen duke e reduktuar në maksimum. Pjesa dërrmuese e këtyre ndërhyrje janë të çmontuese. Nuk janë aq shumë sa ç’duket. Do të ecim me shpejtësi dhe kjo nuk është gjë të tjetër vetëm se faza e parë e një rilindje të re, Rilindjes 2.0. Për të krijuar hapësira komunitare cilësore. Do u japim disa detyrime për punët për të cilat do të kenë edhe disa të drejta. Si cilat do të kenë edhe disa të drejta. Siç funksionon edhe në çdo vend tjetër. Fatmirësisht ne sot kemi drejtësi dhe nuk është më ajo drejtësia e mëparshme ku e udhëhiqte drejtuesi i partisë. Kur ka fakte dhe prova secili duhet që të ballafaqohet me drejtësinë”, tha kryeministri Rama./abcnews.al

Faza më e fundit e administratës Trump kundër Universitetit të Harvardit përfshin një shqyrtim të plotë të programeve kërkimore të financuara nga shteti, si dhe një kërcënim për t’i hequr institucionit portofolin fitimprurës të patentave.

Në një letër drejtuar presidentit të Harvardit, Alan Garber, dhe të publikuar online të premten, sekretari i Tregtisë në administratën Trump, Howard Lutnick, e akuzon Harvardin për shkelje të detyrimeve ligjore dhe kontraktuale që lidhen me programet kërkimore të financuara nga qeveria dhe patentat përkatëse.

Lutnick njoftoi gjithashtu se Departamenti i Tregtisë ka nisur një proces të njohur si “march-in” në bazë të Ligjit federal Bayh-Dole, i cili i jep qeverisë të drejtën të marrë në zotërim patentat ose të japë licenca për to. “Departamenti e vlerëson jashtëzakonisht shumë kontributin shkencor dhe teknologjik që vjen nga partneritetet e qeverisë me institucione si Harvard,” shkroi ai në letër.

Sipas tij, kjo mbart një “përgjegjësi të rëndësishme” për Harvardin, për të siguruar që prona intelektuale e krijuar me fonde federale të shfrytëzohet për përfitimin maksimal të popullit amerikan./abcnews.al

Të shtunën, më 9 gusht, në Britani u mbajt një takim mes sekretarit të Jashtëm britanik David Lammy, nënpresidentit amerikan JD Vance dhe përfaqësuesve nga Ukraina dhe disa vende evropiane, për të diskutuar rrugët drejt paqes në Ukrainë. Takimi erdhi pak ditë para samitit të paralajmëruar mes Donald Trump dhe Vladimir Putin në Alaskë.

Deklaratat e Trump, sipas të cilave një zgjidhje e mundshme përfshin “shkëmbim territori”, u kundërshtuan ashpër nga presidenti ukrainas Volodymyr Zelenskyy, i cili theksoi se “çdo vendim pa Ukrainën është kundër paqes”.

Shtëpia e Bardhë tha se Trump mund të pranojë një takim trepalësh me Zelenskyyn dhe Putinin, por aktualisht po planifikohet një takim dypalësh me presidentin rus. Lajmi ka ngjallur shqetësime se Ukraina mund të anashkalohet në procesin e negociatave.

Liderët e Britanisë, Francës, Gjermanisë, Italisë, Polonisë, Finlandës dhe BE-së publikuan një deklaratë të përbashkët ku theksojnë se paqja nuk mund të arrihet pa përfshirjen e Ukrainës dhe se do të vazhdojnë ta mbështesin atë si ushtarakisht, ashtu edhe diplomatikisht.

Sipas burimeve jozyrtare, në samitin që pritet të mbahet në mes të gushtit mes presidentit rus Vladimir Putin dhe Donald Trump, Moska do të formalizojë kërkesat për njohjen ndërkombëtare të kontrollit rus mbi rajonet lindore të Ukrainës. Kërkesat përfshijnë aneksimin e plotë të Donetskut ku aktualisht Rusia kontrollon rreth dy të tretat e territorit dhe Luganskut, i cili është pothuajse tërësisht nën pushtim. Ndërkohë, kufijtë në rajonet jugore të Zaporizhzhias dhe Khersonit pritet të mbeten në vijën aktuale të frontit.

Në negociatat e mëparshme, Rusia kishte pretenduar aneksimin e plotë të këtyre rajoneve, të cilat u shpallën si pjesë e saj nëpërmjet referendumeve të diskutueshme në vjeshtën e vitit 2022. Moska do të kërkojë gjithashtu edhe njohjen e sovranitetit mbi Krimenë, e aneksuar në vitin 2014. Nëse këto kërkesa do të përmbusheshin, Rusia do të merrte nën kontroll afërsisht një të pestën e territorit zyrtar të Ukrainës.

Këto lëvizje pasqyrojnë një realitet të ri në fushëbetejë, ku luftimet janë ngurtësuar në një status quo të përgjakshme. Forcat ruse nuk kanë arritur të bëjnë përparime të mëdha, por kanë shkaktuar humbje të konsiderueshme në radhët ukrainase, me Kiev-in që vuan për të zëvendësuar të rënët me rekrutë të rinj. Strategjia ruse ka kaluar nga ofensivat në shkallë të gjerë në një seri sulmesh të vogla, por të qëndrueshme, që synojnë pikat më të dobëta të mbrojtjes ukrainase.

Megjithatë epërsinë taktike në disa sektorë, analistët nuk besojnë se Rusia do të mund të marrë nën kontroll të gjithë Donetskun brenda verës. Avancimet janë të ngadalta në korrik, Rusia pushtoi rreth 564 kilometra katrorë, shifër e ngjashme me muajin paraardhës dhe më e lartë se në maj. Në nëntor 2024, ushtria ruse kishte shënuar një rritje të ndjeshme, duke marrë 730 kilometra katrorë rekord që prej pranverës së vitit 2022.

Aktualisht, Ukraina mban një pozitë më të favorshme vetëm në rajonin e Sumyt, ku avancimi rus është ndalur nga brigadat elitare ukrainase. “Kordoni mbrojtës” i shpallur nga Kremlini në këtë zonë është i brishtë, duke ngritur dyshime se kjo ishte një manovër për të tërhequr trupat ukrainase larg nga Donbasi objektivi kryesor strategjik i Rusisë.

Një situatë kritike po zhvillohet në Pokrovsk, qytet strategjik në Donetsk, që është pothuajse i rrethuar. Njësitë ruse po sulmojnë nga ndërtesat e betonit të epokës sovjetike të shndërruara në fortifikata. Fati i qytetit mund të ndikojë seriozisht në linjat e komunikimit dhe mbrojtjes në rajon, përfshirë edhe qytetin kyç të Kramatorskut. Ekziston frika se një përparim rus në Pokrovsk do t’i jepte Putinit një fitore simbolike për t’u shfaqur në samitin me Trump-in.

Ndërkohë, Rusia po ushtron gjithnjë e më shumë presion në rajonet e Dnipropetrovskut dhe në kufirin mes Kharkivit dhe Luganskut. Vëmendje e veçantë po i kushtohet edhe frontit jugor, në Zaporizhzhia dhe Kherson. Megjithatë, një ofensivë e madhe në Kherson do të kërkonte kalimin e lumit Dnipro, duke ekspozuar trupat ndaj zjarrit të artilerisë ukrainase. Edhe në Zaporizhzhia, ku terreni i hapur është i favorshëm për tanket, forcat ukrainase kanë ndërtuar një sistem të gjerë bunkerësh mbrojtës.

Një ofensivë ruse në këtë sektor mund të vërë në presion serioz komandën e Kievit, e cila tashmë përballet me tre fronte aktive që ndodhen mbi 300 kilometra larg njëra-tjetrës.

Ndërsa Moska vazhdon të mobilizojë vullnetarë dhe të ruajë forcat e saj të blinduara për operacione të mundshme befasuese, Ukraina përballet me mungesë të theksuar të burimeve njerëzore dhe ndihmës ushtarake. Mbështetja nga SHBA është tkurrur ndjeshëm, ndërsa vendet evropiane nuk po arrijnë ta kompensojnë këtë deficit. Megjithatë, Kievi nuk jep shenja dorëzimi. Ka spekulime se mund të jetë në përgatitje e sipër për një sulm të ri në territorin rus të ngjashëm me operacionin në Kursk vitin e kaluar për të dëshmuar vullnetin për rezistencë të vazhdueshme.

Presidenti ukrainas Volodymyr Zelensky jo vetëm që është i shqetësuar nga mundësia e një marrëveshjeje paqeje të vendosur pas dyerve të mbyllura, pa përfshirjen e Ukrainës, por ndodhet gjithashtu nën presion të shtuar për shkak të përpjekjeve të Rusisë për të shfrytëzuar çështjen e luftës kundër korrupsionit. Kështu deklaron për gazetën italiane Corriere della Sera një burim brenda qeverisë ukrainase, që foli në kushte anonimiteti.

Shqetësimi kryesor lidhet me mundësinë që Donald Trump, në rast të një rikthimi në presidencën amerikane, të përpiqet të arrijë një zgjidhje të shpejtë për luftën, duke i ofruar Vladimir Putinit koncesione territoriale. Një marrëveshje e tillë mund të legjitimonte aneksimin e Krimesë dhe pushtimin e pjesëve të konsiderueshme të rajoneve Donetsk, Luhansk, Kherson dhe Zaporizhzhia.

Ndërkohë që mbështetja e ukrainasve për paqe në këmbim të territorit është në rritje (69% këtë vit, nga 52% vitin e kaluar sipas Gallup), vetëm një përqindje shumë e vogël, 17% sipas Institutit Ndërkombëtar të Sociologjisë në Kiev janë të gatshëm ta pranojnë pa marrë garanci të qarta në këmbim. Vetë Zelensky e theksoi këtë në një deklaratë të fundit, duke e quajtur situatën aktuale “ndoshta një nga momentet më të vështira që nga fillimi i luftës”.

Burimet shtojnë se Zelensky është i vetëdijshëm për sakrificat e mijëra ushtarëve dhe civilëve që kanë luftuar për më shumë se 10 vjet në Donbas dhe që nuk do të pranonin kurrë që gjaku i derdhur të kishte qenë i kotë. Por ai njeh gjithashtu lodhjen e popullsisë, pas më shumë se tre vjetësh që nga pushtimi në shkallë të plotë i Rusisë.

Protestat e fundit në Kiev, të nxitura nga përpjekjet për të centralizuar më shumë pushtetin dhe për të kufizuar agjencitë kundër korrupsionit, janë parë nga disa si paralajmërim për një tjetër Maidan. Një ushtarak në frontin e Sumy, që foli për Corriere në kushte anonimiteti, paralajmëroi se situata mund të përshkallëzohet më tej.

Ndërkohë, batalioni Azov ka intensifikuar një fushatë rekrutimi, ku theksohet nevoja për fitore me çdo kusht. Një nga reklamat e tyre më të përhapura në rrjetet sociale paraqet një skenë të përditshme me një baba të shqetësuar për të birin në front, ndërsa merr përgjigjen: “Unë kam një vajzë – por ajo është rekrutuar në Azov”. Muret e qyteteve në të gjithë vendin janë të mbuluara me postera dhe pankarta që lavdërojnë “heronjtë” e Mariupolit.

Por a do të mundet Zelensky, komandanti suprem rreth të cilit u bashkua kombi, t’ia “shesë” një paqe të padrejtë një popullsie të re dhe thellësisht nacionaliste? Ndërkohë, tensionet po shtohen për shkak të lodhjes nga lufta dhe mobilizimeve të detyruara, të shoqëruara edhe nga propagandë ruse që i shfrytëzon këto tensione, sidomos përmes sulmeve ndaj zyrave të rekrutimit.

Së fundmi, një incident në rajonin Mykolaiv dhe protestat në Vinnytsia kanë tërhequr vëmendjen e Shërbimit të Sigurisë së Ukrainës (SBU), që po monitoron nga afër çdo zhvillim.

Raportet e inteligjencës perëndimore theksojnë se objektivat e Kremlinit shkojnë përtej territoreve të pushtuara: Vladimir Putin kërkon të zëvendësojë qeverinë aktuale me një regjim kukull pro-rus, të dobësojë ushtrinë ukrainase, të pengojë anëtarësimin në NATO dhe të ndryshojë kushtetutën e vendit duke e orientuar drejt neutralitetit.

Ndërkohë, autoritetet në Kiev kanë refuzuar çdo diskutim për zgjedhje të reja, duke u mbështetur në ligjin e gjendjes ushtarake që ndalon votimet gjatë luftës. Por me rritjen e kritikave për përqendrimin e pushtetit në duart e Zelenskyt dhe shefit të kabinetit të tij Andriy Yermak, mbështetja për presidentin ka rënë nga 65% në 58% brenda një muaji./abcnews.al

Prej më shumë se 50 vitesh, Ali Akbar ecën në rrugët e Bregut të Majtë në Paris, me gazetat nën krah dhe titujt më të fundit në buzë. Ai konsiderohet sot shitësi i fundit i gazetave në Francëndoshta edhe në gjithë Evropën dhe së shpejti do të nderohet për kontributin e tij në kulturën franceze.

Presidenti Emmanuel Macron, i cili si student ka blerë gazeta nga Akbar, do t’i dorëzojë muajin e ardhshëm Urdhrin e Meritës, një nga dekoratat më të larta në Francë.

“Kur fillova këtu në vitin 1973, ishim 35 ose 40 shitës gazetash në Paris,” tregon ai. “Tani jam i vetëm. Gjithçka është dixhitale. Njerëzit mjaftohen të shikojnë telefonin.”

Sot, gjatë xhiros së tij nëpër kafenetë e lagjes Saint-Germain, Akbar shpreson të shesë rreth 30 kopje të Le Monde. Fiton gjysmën e çmimit të shitjes, por nuk merr rimbursim për gazetat e papaguara. Dikur, para internetit, shiste mbi 80 kopje brenda orës së parë pas botimit të pasdites.

“Dikur njerëzit mblidheshin rreth meje për të marrë gazetën. Tani duhet t’i ndjek klientët që t’ua shes,” thotë ai, pa e humbur optimizmin.

Në moshën 72-vjeçare, Ali Akbar është një figurë e dashur e lagjes. “Kam ardhur këtu në vitet ’60 dhe jam rritur me Aliun. Është si vëlla për mua,” thotë një banore. “E njeh të gjithë dhe është shumë gazmor,” shton një tjetër.

I lindur në Rawalpindi, Pakistan, Akbar mbërriti në Evropë në fund të viteve ’60, fillimisht në Amsterdam, ku punoi në një anije turistike. Në vitin 1972, anija u ankorua në Rouen të Francës, dhe një vit më vonë ai u vendos në Paris. Dokumentet e qëndrimit i siguroi në vitet ’80.

Në Saint-Germain, dikur qendër intelektuale e Parisit, ai u njoh me artistë dhe personalitete të shumta. Elton John dikur e ftoi për një çaj me qumësht në Brasserie Lipp, ndërsa para universitetit prestigjioz Sciences Po u miqësua me breza të tërë studentësh që më vonë u bënë politikanë përfshirë vetë Macronin.

Megjithatë, sipas tij, lagjja ka humbur atmosferën e dikurshme. “Dikur kishte botues, shkrimtarë, aktorë e muzikantë. Vendi kishte shpirt. Tani është vetëm një destinacion turistik,” thotë ai me një buzëqeshje të lehtë./abcnews.al

Një natë tepër sfiduese ka përfshirë zonën e Finiqit, ku zjarre të fuqishme të favorizuara nga era e fortë kanë rrezikuar banesa, biznese dhe objekte strategjike mes fshatrave Velahovë, Livinë, Ardhasovë, Bistricë dhe Krongj.

Ministri i Mbrojtjes, Pirro Vengu, njoftoi se forcat zjarrfikëse të bashkive përreth, të mbështetura nga Forcat e Armatosura dhe efektivët e Policisë së Shtetit, ndërhynë gjatë gjithë natës për të përballuar situatën.

Janë kryer evakuime të përkohshme, është garantuar mbrojtja e popullatës dhe objekteve, ndërsa në orët e para të mëngjesit është zhvilluar një operacion i suksesshëm për të shpëtuar Hidrocentralin e Bistricës nga përhapja e flakëve. Ndërhyrjet në terren dhe nga ajri pritet të vijojnë, ndërkohë që qarkullimi në aksin Muzinë – Bistricë mbetet i kufizuar për arsye sigurie.

“Natë tepër sfiduese në Finiq ku ekipet zjarrfikëse të Bashkive Finiq, Delvinë, Konispol, Sarandë, të mbështetura nga 5 zjarrëfikëse dhe 70 efektivë të FA, si dhe 20 efektivë të Policisë së Shtetit, u përballën pareshtur me vatrat që u përhapën të favorizuara nga era e fortë mes fshatrave: Velahovë, Livinë, Ardhasovë, Bistricë, Krongj.

U realizuan evakuimet e përkohshme të banorëve në Livinë dhe Ardhasovë, si dhe u morën masa për ofrimin e asistencës mjeksore për personat e moshuar, ndërkohë që forcat operacionale dhe ato vullnetare siguruan mbrojtjen e çdo banese dhe biznesi të rrezikuar.

Në orët e para të mëngjesit, u realizua një operacion i suksesshëm për të parandaluar përhapjen e flakëve që rrezikonin Hidrocentralin e Bistricës, ku në këto momente pritet të ndërhyhet gjithashtu nga ajri.

Për arsye sigurie, qarkullimi i mjeteve në aksin Muzinë – Bistricë do të vijojë të mbetet i kufizuar deri në përmbyllje të operacioneve.  Forcat operacionale vijojnë punën në terren për të kontrolluar çdo hapësirë që mund të riaktivizohet nga era dhe temperaturat e larta që pritet të mbizotërojnë në orët në vijim”, ka shkruar ministri i Mbrojtjes./abcnews.al

Shqipëria po përballet sot me një valë të nxehti ekstrem, me temperatura që në shumë zona do të kalojnë 38°C. Sipas MeteoAlb, moti do të mbetet i kthjellët gjatë gjithë ditës, ndërsa priten kushte për temperatura maksimale deri në 39°C në zonat e ulëta dhe bregdetare.

Në Tiranë, termometri do të shënojë mbi 37°C që në orët e mesditës, ndërsa gjatë pasdites vlerat do të ngjiten pranë 39°C. Në zonat malore priten temperatura më të buta, por gjithsesi mbi mesataren sezonale.

MeteoAlb paralajmëron qytetarët të shmangin ekspozimin e gjatë në diell nga ora 11:00 deri në 17:00 dhe të konsumojnë sa më shumë lëngje për të shmangur dehidratimin.

Temperaturat minimale pritet të zbresin gjatë natës deri në 20°C në ultësirën perëndimore, duke sjellë një freskim të lehtë pas vapës përvëluese të ditës.

Sipas meteorologëve, vala e të nxehtit pritet të vijojë edhe në ditët në vijim, duke mbajtur mbi vendin tonë kushte tipike të motit veror ekstrem.

Qindra protestues në mbështetje të pengjeve marshuan në rrugët e Jerusalemit drejt rezidencës së kryeministrit Benjamin Netanyahu, duke shprehur zemërimin ndaj planit të qeverisë për të pushtuar plotësisht qytetin e Gazës.

Mes tyre ishte edhe ish-ushtari Max Kresch, i cili mbante një pankartë me mbishkrimin “Refuzova”. “Jemi mbi 350 ushtarë që shërbyem gjatë luftës dhe refuzojmë të vazhdojmë shërbimin në luftën politike të Netanyahut,” tha ai për BBC.

Protesta u zhvilluan edhe në qytete të tjera të Izraelit, përfshirë Haifën dhe Tel Avivin.

Vendimi i Izraelit për të zgjeruar luftën në Gaza, i konsideruar si një përshkallëzim i madh i konfliktit, ka nxitur reagime të ashpra nga OKB-ja dhe shumë vende, mes tyre Mbretëria e Bashkuar, Franca, Australia, Turqia, Gjermania, Finlanda dhe Kanadaja.

OKB-ja ka paralajmëruar se një pushtim i plotë ushtarak mund të sjellë “pasoja katastrofike” për civilët palestinezë dhe pengjet izraelite që mbahen në Gaza.

Plani, i miratuar nga kabineti i sigurisë së Izraelit, përmban pesë “parime” për përfundimin e luftës: çarmatosjen e Hamasit, lirimin e të gjithë pengjeve, demilitarizimin e Rripit të Gazës, marrjen e kontrollit të sigurisë në territor dhe krijimin e një “administrate civile alternative që nuk është as Hamasi dhe as Autoriteti Palestinez”.

Aleatët kryesorë europianë kanë rikonfirmuar mbështetjen e tyre për Ukrainën, duke theksuar se çdo bisedim paqeje me Rusinë duhet të përfshijë detyrimisht Kievin. Deklarata vjen ndërsa presidenti amerikan Donald Trump pritet të takohet të premten në Alaskë me presidentin rus Vladimir Putin.

“Nuk mund të vendoset rruga drejt paqes në Ukrainë pa Ukrainën,” thuhet në deklaratën e përbashkët të liderëve të Mbretërisë së Bashkuar, Francës, Italisë, Gjermanisë, Polonisë, Finlandës dhe Komisionit Europian.

Presidenti Volodymyr Zelensky paralajmëroi se çdo marrëveshje e arritur pa pjesëmarrjen e Ukrainës do të ishte “një vendim i vdekur”. Shtëpia e Bardhë njoftoi se Trump mund të ishte i gatshëm të zhvillonte një takim trepalësh me Putinin dhe Zelenskyn, por deri më tani takimi mbetet vetëm mes dy liderëve, siç kishte kërkuar Moska.

Trump ka sugjeruar se negociatat mund të përfshijnë “shkëmbime territoriale”, një ide që u kundërshtua ashpër nga Zelensky. “Nuk do ta shpërblejmë Rusinë për atë që ka kryer,” tha ai. “Çdo vendim kundër nesh, çdo vendim pa Ukrainën, është edhe kundër paqes.”

Sipas raportimeve të mediave amerikane, Shtëpia e Bardhë po përpiqet të bindë disa vende europiane të pranojnë një marrëveshje ku Rusia do të mbante të gjithë rajonin e Donbasit dhe gadishullin e Krimesë. Ndërkohë, Ukraina dhe disa fuqi europiane kanë paraqitur një plan alternativ, duke kërkuar që çdo tërheqje nga territori të jetë e ndërsjellë.

Liderët europianë theksuan se një zgjidhje diplomatike është thelbësore, jo vetëm për të mbrojtur Ukrainën, por edhe sigurinë e vetë Europës. Presidenti francez Emmanuel Macron paralajmëroi se kontinenti nuk mund të përjashtohet nga bisedimet, pasi “siguria e tij është në rrezik”.

Ndihmësit më të lartë të Zelenskyt, në takime me zëvendëspresidentin amerikan JD Vance në Londër, nënvizuan se paqja e qëndrueshme mund të arrihet vetëm me Ukrainën në tryezën e negociatave.

Samiti i Alaskës, një territor që Rusia ia shiti SHBA-së në vitin 1867, do të ishte takimi i parë mes një presidenti amerikan dhe atij rus që nga qershori i vitit 2021, kur Joe Biden u takua me Putinin në Gjenevë. Në më pak se një vit, Rusia nisi pushtimin e plotë të Ukrainës, duke shpallur në vitin 2022 aneksimin e katër rajoneve ukrainase: Donetsk, Luhansk, Zaporizhzhia dhe Kherson, pavarësisht se nuk i ka nën kontroll të plotë.

Dashi – Kjo ditë sjell një zgjim të rëndësishëm të brendshëm. Pas javësh me lodhje apo përgjegjësi të rënda, rikthehet një shtysë më e fortë drejt të ardhmes. Në dashuri, kush ka pasur një pauzë apo konflikt mund të gjejë fjalët e duhura për sqarim. Mbaje krenarinë nën kontroll, por dëshira për pajtim është e sinqertë. Në punë, vijnë përgjegjësi të reja që, edhe pse të lodhin, të bëjnë të ndihesh i vlerësuar. Kujdes të mos e teproni me ngarkesën. Ditë e mirë për rikthim emocional.

Demi – Hëna të ndihmon të ruash qetësinë dhe të reflektosh. Në dashuri, çiftet e qëndrueshme mund të planifikojnë hapa konkretë për vjeshtën: shtëpi, familje, udhëtime. Beqarët duhet të dalin jashtë rutinës së zakonshme dhe të mos përpiqen të kontrollojnë çdo gjë. Në punë, je në fazë ndërtimi të sigurt, por mund të vijë një propozim që ia vlen të merret në konsideratë. Një ndryshim i vogël mund të të surprizojë pozitivisht.

Binjakët – Je ndër shenjat më të favorizuara të ditës. Mendja punon shpejt dhe nga ide të vogla mund të krijosh projekte të mëdha. Në dashuri je tërheqës dhe i komunikueshëm; mund të kesh kontakte edhe nga e kaluara, por vendos ti nëse do t’i hapësh apo mbyllësh dyert. Në punë, është momenti të shprehësh idetë e tua dhe të shfrytëzosh bashkëpunimet. Kujdes të mos shpërndash energjinë në shumë drejtime njëkohësisht.

Gaforrja – Mund të nisësh ditën me pak mërzi, por më pas arrin një kuptim më të thellë të ndjenjave të tua. Në dashuri, çiftet duhet të rikthejnë komunikimin; për beqarët, mos e detyroni veten në lidhje të reja, gjërat do vijnë natyrshëm. Në punë, nuk je i predispozuar për presion ose provokime; vendimet e rëndësishme më mirë shtyji. Në mbrëmje, një gjest i ngrohtë nga dikush i afërt të përmirëson humorin.

Luani – Këtë të diel energjia jote duket se është e lartë sajë Diellit në shenjën tënde. Ke vendosmëri dhe dëshirë të madhe për të marrë kontrollin e jetës tënde. Në dashuri, është momenti ideal për të fituar zemrën e dikujt ose për të rindërtuar një lidhje. Kujdes të mos bëhesh dominues me partnerin. Në punë, një mundësi e mirë mund të shfaqet së shpejti, ndaj qëndro gati. Këtë të diel gjithçka duket se shkon në favorin tënd.

Virgjëresha – Ke nevojë për rregull dhe këtë ditë të fundit të javës arrin të zgjidhësh çështje të mbetura pezull. Në dashuri, zakonisht je racional, por këtë 10 gusht mund të ndjekësh zemrën. Çiftet forcojnë lidhjen, ndërsa beqarët duhet të jenë më të hapur. Në punë, saktësia jote është në kulm, gjë që të ndihmon sidomos në detyra organizative apo financiare. Kujdes të mos jesh shumë kritik ndaj të tjerëve. Kjo e diel është ditë e mirë për të vënë qartësi në çdo fushë.

Peshorja – Je në kërkim të ekuilibrit dhe të dielën mund ta gjesh aty ku nuk e pret. Në dashuri, lidhjet e reja po marrin formë, por kërkojnë ende durim. Çiftet afatgjata duhet të zgjidhin një çështje praktike së bashku, por me komunikim të mirë gjithçka ecën pa pengesa. Në punë, rikthehet dëshira për ndryshim: një projekt i lënë mënjanë mund të bëhet sërish aktual. Ke nevojë për stimuj të rinj dhe universi po fillon të t’i sjellë. Humori përmirësohet pasdite, sidomos nëse i kushton kohë artit apo kujdesit për pamjen.

Akrepi – Ditë e ngarkuar me emocione të forta, siç të pëlqen ty. Në dashuri je pasional, por edhe kërkues: kujdes të mos kesh pritshmëri tepër të larta nga partneri. Beqarët janë shumë tërheqës dhe mund të tërheqin vëmendjen me një shikim. Në punë, arrin të përballosh çështje të ndërlikuara me qartësi dhe intuitë. Këtë të diel mund të zbulosh prapaskena ose lojëra të fshehura. Përdore intuitën me zgjuarsi. Humori është i thellë, por i fuqishëm.

Shigjetari – Ke një dëshirë të fortë për arratisje: udhëtime, plane dhe horizonte të reja të tërheqin. Në dashuri, nevojitet më shumë lehtësi; jo çdo gjë duhet analizuar. Lidhjet e reja duhen ushqyer me entuziazëm, por pa presion. Në punë, mund të të vijë një ofertë interesante, sidomos nëse je në kërkim të ndryshimit. Kujdes të mos veprosh me tepër besim pa parë detajet. Humori është i mirë, por energjia mund të shpërndahet; fokusoje në objektiva të qarta.

Bricjapi – Ditë ndërtimi dhe stabiliteti, tipike për natyrën tënde. Në dashuri je praktik dhe i qëndrueshëm, dhe partneri e di që mund të mbështetet tek ti. Nëse ka pasur tensione, është momenti i duhur për t’i zgjidhur me qetësi. Beqarët mund të takojnë një person serioz që tërheq vëmendjen e tyre. Në punë, je shumë i fokusuar në objektiva afatgjata; tani është koha për të mbjellë, edhe pse rezultatet do të vijnë më vonë. Humori është pozitiv dhe i qetë.

Ujori – Ditë dinamike dhe plot surpriza. Në dashuri, ke dëshirë të bësh gjëra të reja; nëse marrëdhënia ka hyrë në rutinë, befaso partnerin me diçka ndryshe. Beqarët janë në kërkim të autenticitetit dhe jo thjesht stimujsh sipërfaqësorë. Në punë, idetë kreative vlerësohen dhe mund të marrësh një propozim interesant, edhe jashtë planeve të zakonshme. Ke nevojë për liri që të japësh maksimumin. Humori është i luhatshëm, por kurrë i mërzitshëm.

Peshqit – Je shumë i ndjeshëm këtë të diel 10, edhe më tepër se zakonisht. Emocionet janë në plan të parë dhe mund t’i përdorësh si udhërrëfyes për vendimet e tua. Në dashuri, gjithçka ka intensitet: një fjalë apo një shikim mund të të ndryshojë ditën. Kujdes të mos idealizosh tepër personin përballë. Në punë, ke një ide apo ndjesi të fortë që ia vlen ta ndjekësh, edhe nëse të tjerët nuk e kuptojnë. Humori është poetik, me pak melankoli. Moment i mirë për art, muzikë apo meditimin.

Më 8 gusht, kontratat e së ardhmes për arin në SHBA shënuan një nivel rekord prej 3,534 dollarësh për troi ons, pas një vendimi të papritur nga administrata e Donald Trump për të vendosur tarifa mbi importet e shufrave të arit me peshë një kilogram dhe 100 ons. Ky vendim, i ndërmarrë nga Agjencia e Doganave dhe Mbrojtjes së Kufirit të SHBA-së (CBP), përmbysi një praktikë të gjatë tregtare dhe erdhi në kundërshtim me dokumentet e mëparshme zyrtare që e përjashtonin arin në shufra nga tarifat doganore.

Ky zhvillim u cilësua si një goditje e rëndë për tregun global të arit dhe sidomos për Zvicrën, eksportuesen më të madhe të këtij metali të çmuar. Marrëdhëniet mes SHBA-së dhe Zvicrës tashmë ishin tensionuar pas njoftimit të një tarife prej 39% ndaj importeve zvicerane vetëm një javë më parë.

Për pasojë, çmimet e kontratave të së ardhmes për arin në bursën Comex në New York u shkëputën ndjeshëm nga çmimet spot (ato aktuale në treg), duke krijuar një diferencë mbi 100 dollarë për ons. Kjo ndarje sinjalizon trazira të mundshme në tregun ndërkombëtar të arit, pasi shumë investitorë dhe institucione financiare përdorin kontratat e Comex-it për të mbrojtur pozicionet e tyre. Analistët paralajmërojnë se një situatë e tillë mund të dobësojë rolin e Nju Jorkut si qendër kryesore e tregtimit të arit, duke rritur interesin për tregje alternative.

Analistja Joni Teves nga UBS e quajti vendimin një “befasi të madhe” dhe theksoi shqetësimet për pasojat afatgjata që mund të ketë në mënyrën si tregtohet dhe sigurohet ari në nivel global. Sipas saj, kjo situatë mund të çojë në kërkimin e formave të reja të zgjidhjes së kontratave të së ardhmes, qoftë përmes produkteve të reja apo zhvendosjes së tregut në vende të tjera.

Vendimi i CBP-së, i formalizuar në një letër më 31 korrik, riklasifikon shufrat e arit në një kod doganor që nuk përfitoi nga përjashtimet e mëparshme. Megjithëse një dokument i Shtëpisë së Bardhë më 2 prill kishte deklaruar se “ari në shufra” do të përjashtohej nga tarifat, ky përjashtim nuk u aplikua për shufrat me peshë 1 kg dhe 100 ons.

Ndërkohë, tregtarët e arit kishin filluar të grumbullonin rezerva të mëdha në SHBA gjatë muajve të fundit, në pritje të mundësisë që ari të përfshihej në tarifat e reja. Ky parashikim i kujdesshëm, sipas John Reade nga Këshilli Botëror i Arit, ka ndihmuar që lëvizjet e çmimeve të mos jenë edhe më të ashpra.

Megjithatë, disa pjesëmarrës në treg besojnë se CBP mund të ketë bërë një gabim në interpretimin e kodit doganor dhe shpresojnë që vendimi të rishikohet në të ardhmen.

Si shenjë simbolike dhe revolte, deputetët e partisë opozitare italiane Lëvizja Pesë Yjet (M5S) morën pjesë në një seancë të Dhomës së Deputetëve të veshur me ngjyrat e flamurit palestinez të kuqe, të zezë, të bardhë dhe të gjelbër.

Ata u ulën të shpërndarë në mënyrë të tillë që trupat e tyre formuan flamurin palestinez, duke dërguar një mesazh të fortë simbolik në mbështetje të kauzës palestineze.

Gjatë fjalës së tij, deputeti i M5S Riccardo Ricciardi tha se nuk kishin sjellë flamurin palestinez fizikisht, pasi kishin frikë se do t’ua konfiskonin. Ai shtoi se flamuri i Palestinës tashmë është kthyer në një simbol universal të atyre që luftojnë për njerëzimin. Ricciardi kritikoi ashpër qeverinë italiane, duke e akuzuar për heshtje dhe bashkëpunim të heshtur me qeverinë izraelite, ndërkohë që “një popull po masakrohej”. Ai akuzoi autoritetet se kishin “shtrënguar duart e përgjakura të Netanyahut”.

L’Italia deve stare dalla parte giusta. I nostri governanti dicono che non bisogna riconoscere lo Stato di Palestina, che non si deve sanzionare Israele, che non si devono stracciare le intese militari con un governo criminale. Noi continueremo a dire che bisogna schierarsi di… pic.twitter.com/2dcgF6Aioj

— Giuseppe Conte (@GiuseppeConteIT) August 6, 2025

Kryetari i M5S, Giuseppe Conte, publikoi në rrjetet sociale një fotografi të deputetëve të veshur me ngjyrat e flamurit palestinez, duke theksuar se Italia duhet të qëndrojë në anën e drejtë të historisë dhe të mbështesë të drejtat e popullit palestinez, përfshirë njohjen zyrtare të shtetit të Palestinës.

Kjo protestë e pazakontë tërhoqi vëmendje të madhe në Itali dhe jashtë saj. Shumë qytetarë dhe mbështetës të çështjes palestineze ndanë në rrjetet sociale imazhe nga seanca, duke shprehur mbështetje për mesazhin e M5S dhe duke kritikuar qëndrimin zyrtar të qeverisë italiane ndaj konfliktit në Lindjen e Mesme./abcnews.al

Sipas burimeve italiane të kontaktuara nga gazeta La Repubblica, Donald Trump ka diskutuar me kryeministren italiane Giorgia Meloni, gjatë një bisede telefonike të zhvilluar dje, mbi mundësinë që Roma ndoshta Vatikani të jetë mikpritëse e një takimi me presidentin rus Vladimir Putin.

Nga ana e Kryeministrisë italiane (Palazzo Chigi) deri më tani nuk ka asnjë koment apo konfirmim zyrtar për këtë çështje.

E njëjta burim thekson se ideja është e ndërlikuar dhe mund të jetë tashmë e hedhur poshtë. Sipas raportimeve, që citon dy burime pranë negociatave, Roma ishte një nga opsionet e mundshme për organizimin e një takimi mes Trump dhe Putin në ditët në vijim. Në diskutim kanë qenë edhe vende të tjera evropiane.

Megjithatë, një burim anonim i cituar nga agjencia ruse Tass ka mohuar këtë mundësi, duke deklaruar se takimi “nuk do të mbahet në Evropë”./abcnews.al