Një e mitur ka humbur jetën si pasojë e një aksidenti në fshatin Zabel i Ulët të Drenasit.

Lajmin për mediat kosovare, e ka konfirmuar zëdhënësja e policisë për rajonin e Prishtinës, Flora Ahmeti, e cila tha se në aksident ka qenë i përfshirë një automjet.

Në këtë aksident ka qenë i përfshirë një automjet. Si pasojë e aksidentit një person ka mbetur i vdekur dhe janë lënduar katër të tjerë.

Vdekja e të miturës është konstatuar nga ekipi mjekësor në vendin e ngjarjes, ndërkohë që personat e lënduar janë dërguar për tretman mjekësor.

Grupi hetimor ndodhet në vengjarje për të zbardhur rrethanat që çuan në aksidentin fatal.

Komisioni i BE-së dëshiron të vendosë sanksione ndaj Izraelit për shkak të gjendjes në Gazë. Por Gjermania dhe vende të tjera nuk janë dakord.

Komisioni i BE-së synon të vendosë sanksione ndaj Izraelit për shkak të situatës katastrofike në Gazë. Fjala është për ndërprerjen e bashkëpunimit me Izraelin në kuadër të programit për nxitjen e kërkimeve dhe hulumtimeve shkencore “Horizon Europe”.

Gjermania nuk është dakord me sanksionet e planifikuara nga Komisioni i BE-së.

Sipas ministrit të Jashtëm gjerman, Johann Wadephul, sanksionet në fushën e hulumtimeve ka të ngjarë të mos kenë ndonjë ndikim në vendimmarrjen politike dhe veprimet ushtarake të Izraelit në Rripin e Gazës.

Wadephul: Gjermania e ka bërë shumë të qartë se refuzon planet izraelite. Ministri i Jashtëm gjerman, Johann Wadephul, theksoi se Gjermania i ka kufizuar dërgesat e armëve në Izrael, gjë që përbën një masë më të përshtatshme.

Përmes këtij vendimi Gjermania e ka “bërë shumë të qartë” refuzimin e saj ndaj planeve izraelite për të pushtuar Gazën.

Ajo që nevojitet tani, theksoi Wadephul, është “gatishmëria për të rënë dakord për një armëpushim” në Rripin e Gazës nga ana e të gjitha palëve ndërluftuese.

BE-ja jo në një mendje lidhur me sanksionet

Shtetet anëtare të BE-së janë thellësisht të ndara sa u përket masave kundër Izraelit në lidhje me luftën kundër Hamasit.

Shumë nga sanksionet që po shqyrtohen duhet të miratohen ose unanimisht ose me shumicë të kualifikuar, që do të thotë prej 15 nga 27 anëtarët e BE-së, të cilët së bashku përfaqësojnë të paktën 65 përqind të popullsisë.

Sanksionet kundër kolonëve izraelitë në Bregun Perëndimor janë bllokuar deri tani nga Hungaria.

Gjatë lutjes së tij javore në Sheshin e Shën Pjetrit në Vatikan, Papa Leoni XIV ka bërë një apel të fuqishëm për ndalimin e dhunës me armë, duke e quajtur situatën aktuale një “pandemi të armëve, të mëdha dhe të vogla”. Ai iu referua si sulmeve të përsëritura me armë në Shtetet e Bashkuara të Amerikës, ashtu edhe konflikteve të armatosura që zhvillohen në vende të ndryshme të botës.

Papa Leoni XIV, i cili është edhe Papa i parë amerikan në histori, me origjinë nga Çikago, iu drejtua besimtarëve në anglisht, teksa u lut për viktimat e sulmit të fundit në shtetin amerikan të Minesotës, ku dy fëmijë humbën jetën dhe disa të tjerë u plagosën rëndë.

“Lutjet tona janë për viktimat e këtij sulmi tragjik, që ndodhi gjatë një meshe në një shkollë në Minesota,” deklaroi ai, sipas “The Guardian”. “Ne përfshijmë në lutjet tona të gjithë fëmijët e pafajshëm që vriten dhe plagosen çdo ditë në mbarë botën. Le të lutemi që Zoti të ndalojë pandeminë e armëve, të mëdha dhe të vogla, që po infekton botën tonë.”

Ngjarja tragjike ndodhi të mërkurën në kishën e shkollës katolike “Annunciation” në Minneapolis, ku dy fëmijë, Fletcher Merkel, 8 vjeç, dhe Harper Moyski, 10 vjeç, humbën jetën, ndërsa 18 persona të tjerë u plagosën. Autori i sulmit hapi zjarr 116 herë përmes xhamave me ngjyra të kishës, përpara se të vetëvritej.

Ky sulm ka rikthyer në qendër të debatit çështjen e kontrollit të armëve në SHBA. Kryebashkiaku i Minneapolis, Jacob Frey, kërkoi veprime konkrete dhe ligjore për të frenuar dhunën, duke theksuar se nuk mjaftojnë më “lutjet dhe mendimet” që përdoren shpesh nga zyrtarë republikanë pas ngjarjeve të tilla. SHBA-të mbeten vendi me numrin më të lartë të sulmeve masive me armë në botë.

Në të njëjtën kohë, Papa Leoni XIV bëri thirrje për një armëpushim të menjëhershëm në Ukrainë, duke ftuar palët ndërluftuese të angazhohen seriozisht në dialog.

“Ka ardhur koha që përgjegjësit të heqin dorë nga logjika e armëve dhe të zgjedhin rrugën e negociatave dhe të paqes, me mbështetjen e komunitetit ndërkombëtar,” theksoi ai. “Zëri i armëve duhet të heshtë, ndërsa zëri i vëllazërisë dhe drejtësisë duhet të ngrihet.”

Edhe paraardhësi i tij, Papa Françesku, ishte shprehur ashpër kundër industrisë së armëve, duke i cilësuar prodhuesit e armëve si “tregtarë të vdekjes”.

Një 51-vjeçar ka humbur tragjikisht jetën në Kamëz, pasditen e kësaj të diele. Ai ishte duke rregulluar një defekt, ku ra në kontakt me rrymën elektrike dhe për pasojë humbi jetën.

“Kamëz/Informacion paraprak. Rreth orës 16:45, në Valias, shtetasi A. L., rreth 51 vjeç, dyshohet se gjatë kohës që po rregullonte një defekt elektrik ka rënë në kontakt me energjinë elektrike, dhe për pasojë ka humbur jetën”, njofton policia.

Grupi hetimor ndodhet në vendngjarje dhe po punon për sqarimin e rrethanave të rastit./abcnews.al

Vendimi i presidentit francez, Emmanuel Macron për të njohur një shtet palestinez, duke nxitur lëvizje të ngjashme nga vendet e tjera perëndimore, ka zemëruar Izraelin dhe aleatin e tij SHBA-në duke e vendosur zgjidhjen me dy shtete përsëri në zemër të përpjekjeve diplomatike për t’i dhënë fund luftës shkatërruese në Gaza.

Në një letër drejtuar kryeministrit Izraelit, Benjamin Netanyahu javën e kaluar, Macroni ka shkruar se “vendosmëria jonë për të parë popullin palestinez të ketë shtetin e vet është e rrënjosur në bindjen tonë se paqja e qëndrueshme është thelbësore për sigurinë e shtetit të Izraelit”.

Përpjekjet diplomatike të Francës “burojnë nga zemërimi ynë ndaj katastrofës së tmerrshme humanitare në Gazë, për të cilën nuk mund të ketë asnjë justifikim”, ka thënë Macroni.
Izraeli të premten e ka shpallur qytetin më të madh të Gazës një zonë luftimi, ndërsa numri i të vdekurve tejkaloi 63,000 palestinezë, sipas Ministrisë së Shëndetësisë së territorit, që kur lufta filloi më 7 tetor 2023, me një sulm të udhëhequr nga Hamasi ndaj Izraelit.

Franca, Mbretëria e Bashkuar, Kanadaja, Australia dhe Malta kanë thënë se do ta formalizojnë premtimin e tyre gjatë takimit vjetor të liderëve botërorë në Asamblenë e Përgjithshme të OKB-së, e cila fillon më 23 shtator. Disa të tjera, përfshirë Zelandën e Re, Finlandën dhe Portugalinë, po shqyrtojnë një veprim të ngjashëm.

Netanyahu e hedh poshtë shtetësinë palestineze dhe planifikon të zgjerojë ofensivën ushtarake në Gaza.

Letra e Macronit vjen pasi Netanyahu e akuzoi atë për “nxitje” të antisemitizmit me thirrjen e tij për një shtet palestinez, vërejtje që Macroni i ka denoncyar si “të mjerueshme”.

Javën e kaluar, ambasadori i SHBA-së në Francë, Charles Kushner, ka shkruar gjithashtu një letër ku argumentonte se “gjestet drejt njohjes së një shteti palestinez inkurajojnë ekstremistët, nxisin dhunën dhe rrezikojnë jetën hebraike në Francë”.

Partitë politike në Indonezi kanë rënë dakord të tërheqin disa nga përfitimet financiare të financuara nga shteti për politikanët, në përpjekje për të qetësuar protestat e përhapura në mbarë vendin, ka bërë të ditur presidenti i vendit.

Prej një jave, disa qytete në shtetin aziatik përfshirë kryeqytetin Xhakarta janë përfshirë nga protesta të ashpra kundër qeverisë, të cilat në disa raste kanë përfunduar me përplasje mes protestuesve dhe forcave të rendit.

Megjithëse shkaqet e pakënaqësisë janë të shumta përfshirë vdekjen e një drejtuesi të një shërbimi transporti me porosi në qendër të zemërimit qytetar është një shtesë mujore e re në pagesat për deputetët e parlamentit.

Presidenti Prabowo Subianto njoftoi të dielën se disa nga këto përfitime do të reduktohen, përfshirë edhe uljen e disa shtesave financiare. Ai gjithashtu bëri të ditur se do të vendoset një moratorium për udhëtimet jashtë shtetit të deputetëve.

Kreu i shtetit, i cili ka anuluar një vizitë të planifikuar në Kinë për shkak të trazirave, theksoi se disa protesta kanë kaluar kufijtë e manifestimit paqësor dhe mund të cilësohen si “tradhti dhe terrorizëm”.

Ai deklaroi se ka urdhëruar policinë dhe ushtrinë të ndërhyjnë me vendosmëri kundër akteve të plaçkitjes dhe dëmtimit të pronës. Ndërtesa e ministres së Financave, Sri Mulyani Indrawati, ishte mes objekteve që u sulmuan nga protestuesit, sipas agjencisë së lajmeve AFP.

Zemërimi qytetar u përshkallëzua pas vendimit për rritjen me 50 milionë rupiah (rreth 3,030 dollarë amerikanë) të pagesës mujore për deputetët – një shumë që është afro dhjetëfish më e lartë se paga minimale në Xhakartë.

Protestat morën një kthesë tragjike të enjten, kur Affan Kurniawan, një 21-vjeçar që punonte si shofer me aplikacion, u përplas për vdekje nga një automjet i policisë gjatë një proteste në kryeqytet.

Të paktën tre persona humbën jetën të premten në mbrëmje, pasi protestuesit i vunë flakën një ndërtese të parlamentit rajonal. Përgjatë fundjavës, protestat vazhduan. Në qendër të Xhakartës, policia përdori gaz lotsjellës për të shpërndarë turmat, ndërsa disa protestues hodhën kokteje molotov dhe fishekzjarrë në drejtim të një kompleksi policor.

Megjithëse presidenti nuk dha detaje se cilët deputetë do të preken nga shkurtimet, kritikët thonë se lëshimet e bëra nuk janë të mjaftueshme për të ndalur pakënaqësinë popullore.

Kreu i Bashkimit të Ekzekutivëve Studentorë të Indonezisë, Muzammil Ihsan, deklaroi për Reuters se “kjo nuk mjafton” dhe se po shqyrtohet organizimi i protestave të tjera.

“Qeveria duhet të trajtojë problemet e thella që ndodhen në rrënjë të kësaj krize,” u shpreh ai. “Zemërimi në rrugë nuk është pa arsye.”

Ndër kërkesat kryesore të protestuesve janë: paga më të larta, ulje taksash, luftë më e fortë ndaj korrupsionit, si dhe ndalimi i dhunës policore ndaj protestave.

Rusia ka vazhdar bombardimet e pamëshirshme kundër Ukrainës të dielën, duke i goditur objektet e energjisë në të paktën dy rajone dhe duke shënjestruar disa lokacione të tjera në të gjithë vendin.

Sulmet me dronë dëmtuan katër objekte energjetike në rajonin e Odesës mëngjesin e së dielës, duke lënë pa rrymë më shumë se 29.000 banorë, tha në Telegram kreu rajonal Oleh Kiper.

Kiper shtoi se sulmet ruse dëmtuan gjithashtu shtëpi private dhe ndërtesa të tjera dhe se një person u plagos.

“Infrastruktura kritike po furnizohet përmes gjeneratorëve”, tha Kiper, duke shtuar se qyteti bregdetar Çernomorsk, në jug të Odesës, u godit më së rëndi.

Një sulm me dronë disa orë më vonë goditi infrastrukturën civile energjetike në rajonin e Çernihivit në Ukrainën veriore, duke lënë pa energji elektrike 30.000 familje në qarkun Nizhin, tha guvernatori rajonal Vjacheslav Chaus.

Ai tha se furnizimi me rrymë është rikthyer për spitalin kryesor dhe sistemin e ujit të qytetit.Sulmet e reja ndodhën teksa aleatët e një politikani të njohur ukrainas, i vrarë me armë zjarri një ditë më parë në qytetin perëndimor të Lvivit, fajësuan Rusinë, ndërkohë që presidenti rus, Vladimir Putin, mbërriti në Kinë për takimin vjetor të një organizate rajonale që përfshin gjithashtu Kinën, Indinë dhe shtatë vende të tjera.

Read More...

Kabineti i sigurisë i kryeministrit Benjamin Netanyahu pritet të diskutojë planin për të marrë nën kontroll qytetin e Gazës. Sipas autoriteteve lokale të shëndetësisë, të paktën 30 persona u vranë të dielën nga të shtënat dhe bombardimet, përfshirë 13 që po përpiqeshin të merrnin ushqim pranë një pike ndihme në pjesën qendrore të Gazës dhe dy të tjerë brenda një shtëpie në qytetin e Gazës.

Një ditë më parë, të paktën 15 persona, mes tyre pesë fëmijë, u vranë nga një sulm mbi një ndërtesë banimi në qendër të qytetit. Banorët e lagjes Sheikh Radwan thanë se zona ishte nën zjarr të pandërprerë tankesh dhe bombardime ajrore gjatë së shtunës dhe së dielës, duke detyruar shumë njerëz të kërkojnë strehë në pjesën perëndimore.

Ushtria izraelite ka intensifikuar gradualisht operacionet rreth qytetit gjatë tre javëve të fundit dhe të premten shpalli fundin e pauzave të përkohshme që lejonin shpërndarjen e ndihmave, duke e shpallur zonën “fushëbetejë të rrezikshme”. Një zyrtar izraelit tha se kabineti i sigurisë do të mblidhet për të vendosur hapat e ardhshëm të ofensivës për të marrë kontrollin e qytetit, që Netanyahu e ka cilësuar si bastioni i fundit i Hamasit.

Ndërkohë, Netanyahu konfirmoi se ushtria izraelite kishte goditur Abu Ubaidën, zëdhënësin e krahut të armatosur të Hamasit, por shtoi se ende nuk dihet rezultati i sulmit. Abu Ubaida, i njohur si Hozayfa Al-Khalout, është një figurë e rëndësishme e Hamasit prej dy dekadash dhe njihet për komunikimet e tij publike nëpërmjet videomesazheve.

Kryetarja e Kryqit të Kuq, Mirjana Spoljaric, paralajmëroi se një evakuim i qytetit do të sillte një zhvendosje masive të popullsisë që asnjë zonë tjetër e Rripit të Gazës nuk është e përgatitur të përballojë, mes mungesave të theksuara të ushqimit, strehimit dhe furnizimeve mjekësore. Rreth gjysma e mbi 2 milionë banorëve të enklavës ndodhen aktualisht në qytetin e Gazës, ndërsa mijëra të tjerë janë larguar drejt zonave qendrore dhe jugore.

Autoritetet shëndetësore raportojnë se mbi 63 mijë persona, kryesisht civilë, janë vrarë që nga fillimi i ofensivës izraelite, ndërsa të dielën u konfirmua vdekja e shtatë personave të tjerë nga uria dhe kequshqyerja, duke e çuar në 339 numrin e viktimave nga mungesa e ushqimit, mes tyre 124 fëmijë. Izraeli ka vënë në dyshim shifrat e raportuara nga Ministria e Shëndetësisë e drejtuar nga Hamasi.

Protestat në Izrael për lirimin e pengjeve dhe kundër vazhdimit të luftës janë shtuar në javët e fundit, ndërsa ushtria ka paralajmëruar qeverinë se ofensiva mund të rrezikojë jetën e tyre. Lufta nisi më 7 tetor 2023, pas një sulmi të Hamasit në jug të Izraelit, ku u vranë rreth 1,200 persona dhe u rrëmbyen 251 të tjerë. Besohet se vetëm 20 nga 48 pengjet e mbetura janë ende gjallë

Izraeli tha të dielën se e ka shënjestruar një zëdhënës të Hamasit në Rripin e Gazës, ndërsa spitalet dhe dëshmitarët në të gjithë enklavën raportuan për dhjetëra palestinezë të vrarë nga bombardimet ajrore dhe të shtënat me armë.

Kryeministri i Izraelit, Benjamin Netanyahu, tha se ushtria izraelite e sulmoi Abu Obeidan, zëdhënësin e kamotshëm të Brigadave al-Qassam të Hamasit, por nuk e dinte nëse ai është vrarë.

“Shpresoj që ai të mos jetë më në mesin tonë, por vërej se askush nga pala e Hamasit nuk po e trajton këtë çështje”, tha Netanyahu para ministrave në mbledhjen javore të kabinetit të tij.

Hamasi është shpallur organizatë terroriste nga Shtetet e Bashkuara dhe Bashkimi Evropian.

Obeida lëshoi deklaratë për herë të fundit të premten. Ai tha se luftëtarët në Qytetin e Gazës ishin të përgatitur, pasi Izraeli e shpalli qytetin zonë lufte dhe nisi fazat e para të ofensivës së tij.

Hamas do të përpiqej t’i mbante pengjet gjallë, tha ai, duke paralajmëruar se përleshje priteshin në zonat ku disa prej tyre po mbahen. Nëse vdekja e tij konfirmohet, ai do të ishte përfaqësuesi më i fundit i Hamasit i shënjestruar dhe i vrarë nga Izraeli, i cili po përpiqet t’i rrënojë kapacitetet ushtarake të grupit dhe ta parandalojë përsëritjen e sulmit të 7 tetorit 2023, kur militantët rrëmbyen 251 njerëz dhe vranë rreth 1.200 të tjerë, shumica civilë, në Izrael.

Hamas ende nuk ka komentuar mbi gjendjen e Obeidas. Si pjesë e fushatës për shkatërrimin e Hamasit, Izraeli ka vrarë shumë nga drejtuesit e tij kryesorë ushtarakë dhe politikë. Të paktën 43 palestinezë janë vrarë që nga e shtuna, shumica në Qytetin e Gazës, sipas spitaleve lokale.

Spitali Shifa – më i madhi në territor – tha se 29 trupa ishin sjellë në morgun e tij, përfshirë 10 persona të vrarë ndërsa kërkonin ndihmë dhe të tjerë të goditur në pjesë të ndryshme të qytetit.

Të dielën në mëngjes, zyrtarët e spitaleve raportuan edhe 11 viktima nga bombardimet dhe të shtënat. Spitali Al-Awda tha se shtatë prej tyre ishin civilë që përpiqeshin të arrinin tek ndihmat.

Dëshmitarët thanë se trupat izraelite hapën zjarr mbi turmat në Korridorin Netzarim, një zonë ushtarake izraelite që përshkon Gazën.

“Po përpiqeshim të merrnim ushqim, por hasëm në plumbat e pushtuesit”, tha Ragheb Abu Lebda, nga Nuseirati, i cili pa të paktën tre persona të gjakosur nga plagët me armë zjarri.

Izraeli prej javësh po operon në periferi të Qytetit të Gazës si dhe në kampin e refugjatëve Xhabalia. Ai gjithashtu ka intensifikuar sulmet ajrore në zonat bregdetare të qytetit.

Të paktën 63.371 palestinezë janë vrarë në Gazë gjatë luftës së Izraelit, sipas Ministrisë së Shëndetësisë në Gazë, e cila është pjesë e qeverisjes së Hamasit dhe e përbërë nga profesionistë mjekësorë.

Mijëra australianë kanë marrë pjesë në tubime kundër emigracionit në qytete të mëdha si Sidnei, Melburn e Adelaide, protesta të cilat qeveria i cilësoi me lidhje të ekstremit të djathtë dhe si “përhapje urrejtjeje”.

Manifestimet, të quajtura “Marshi për Australinë”, u shoqëruan me kundër-protesta dhe përplasje sporadike, ndërsa në disa raste u përfshinë politikanë të opozitës, përfshirë senatoren Pauline Hanson dhe deputetin Bob Katter.

Në Sidnei morën pjesë deri në 8 mijë persona, ndërsa në Melburn protestuesit u përplasën me pjesëmarrës të një mitingu pro-Palestinë.

Në Adelaide, policia raportoi se rreth 15 mijë vetë ishin të pranishëm në të dyja manifestimet, duke shtuar se shumica u treguan të qetë.

Mes organizatorëve dhe folësve u shfaqën edhe figura të njohura të ekstremit të djathtë, si Thomas Sewell, i lidhur me grupimet neo-naziste.

Qeveria australiane reagoi ashpër kundër protestave. Ministri i Brendshëm Tony Burke deklaroi se “nuk ka vend në vendin tonë për ata që duan të përçajnë dhe të minojnë kohezionin social”, ndërsa ministrja e Çështjeve Multikulturore, Anne Aly, tha se ky lloj aktivizmi i ekstremit të djathtë, i bazuar në racizëm dhe etnocentrizëm, “nuk ka vend në Australinë moderne”.

Presidenti i Kinës, Xi Jinping, dhe Kryeministri i Indisë, Narendra Modi, deklaruan se marrëdhëniet mes dy vendeve kanë hyrë në një fazë të re të besimit të ndërsjellë, pas një periudhe të gjatë tensioni, përfshirë edhe mosmarrëveshjet e pazgjidhura kufitare.

Dy udhëheqësit u takuan në kuadër të samitit të Organizatës së Bashkëpunimit të Shangait (SCO), i cili po zhvillohet në qytetin portual të Tianjinit. Ky është viziti i parë i Modi-t në Kinë pas shtatë vitesh. Gjatë takimit, presidenti Xi theksoi se Kina dhe India duhet të jenë partnere dhe jo rivale. Nga ana tjetër, Modi u shpreh se tashmë ekziston një “atmosferë paqeje dhe stabiliteti” mes dy vendeve.

Në samit merr pjesë edhe presidenti rus Vladimir Putin, së bashku me mbi 20 liderë botërorë. Por këtë vit, takimi po zhvillohet nën hijen e tensioneve tregtare me Shtetet e Bashkuara. Presidenti amerikan Donald Trump ka vendosur tarifa të larta ndaj mallrave indiane, si ndëshkim për vazhdimin e blerjeve të naftës ruse nga India. Nga ana tjetër, Putin përballet me kërcënime për sanksione të reja për shkak të vazhdimit të luftës në Ukrainë.

Ndërkohë që marrëdhëniet SHBA-Indi po përballen me sfida të reja, Modi po afrohet më shumë me Kinën. Të dy vendet janë ndër më të populluarat në botë dhe kanë ndër ekonomitë më të mëdha globale. Modi njoftoi gjithashtu se fluturimet mes Indisë dhe Kinës të pezulluara që prej përplasjes vdekjeprurëse mes trupave ushtarake në kufirin Himalaje në vitin 2020 do të rifillojnë, ndonëse nuk dha një afat të saktë.

Xi theksoi se “të dy palët duhet të trajtojnë marrëdhëniet nga një këndvështrim strategjik dhe afatgjatë” dhe se “të qenit miq është zgjedhja e duhur për të dyja palët.”

Edhe pse samiti i SCO-së ka më tepër karakter simbolik, ai u krijon liderëve mundësinë për të shprehur shqetësime të përbashkëta dhe për të diskutuar interesa të përbashkëta. Ngjarja zhvillohet pak ditë para një parade ushtarake madhështore në Pekin, që do të shënojë 80-vjetorin e përfundimit të Luftës së Dytë Botërore.

Organizata ka 10 shtete anëtare përfshirë Rusinë, Pakistanin dhe Iranin si dhe 16 vende vëzhguese dhe partnere në dialog. Putin, aleat i ngushtë i Kinës, mbërriti në Tianjin të dielën, ku u prit me tapet të kuq. SCO është themeluar në vitin 2001 nga Kina, Rusia dhe katër vende të Azisë Qendrore, si një kundërpeshë ndaj ndikimit të aleancave perëndimore si NATO.

Këtë vit, takimi është më i madhi që nga themelimi i organizatës. Në Tianjin, samiti ka marrë përmasat e një ngjarjeje madhore. Banderola dhe postera janë shpërndarë në çdo cep të qytetit verior, ndërsa mijëra qytetarë janë mbledhur çdo mbrëmje në zonën buzë lumit për të ndjekur një shfaqje dritash të projektuar mbi kullat e larta.

Rrugët janë tejmbushur, duke e bërë të vështirë qarkullimin, veçanërisht pranë urës historike Jiefang. Gjatë ditës, këmbësorët shpesh ndalohen përkohësisht për t’i hapur rrugë autokolonave të liderëve të huaj. Në qendër të qytetit janë pezulluar shërbimet e taksive dhe makinave me qira, por kjo nuk ka ndikuar në entuziazmin e qytetarëve, të cilët duan të jenë pjesë e asaj që përshkruhet si një takim historik.

Autoritetet policore kanë këshilluar mbi 13 milionë banorët e Tianjinit të kufizojnë lëvizjet dhe të frekuentojnë vetëm dyqanet pranë banesave për nevojat e përditshme.

Avokati Idajet Beqiri në një intervistë për “ABC News”, akuzoi Partinë Demokratike dhe Lëvizjen Socialiste për Integrim për përfshirje në veprimtari kriminale gjatë fushatave elektorale.

Sipas tij, këto parti kanë përdorur para të pista për financimin e fushatave, përfshirë edhe blerjen e votave të qytetarëve.

Beqiri u shpreh se lobimi në SHBA është bërë me qëllim të heqjes së “non gratës” ndaj Sali Berishës, duke e cilësuar këtë si një krim zgjedhor dhe pastrim parash. Ai kritikoi gjithashtu SPAK-un dhe KQZ-në për mungesë reagimi ligjor dhe kërkoi trajtim të barabartë për të gjithë aktorët politikë, duke theksuar nevojën për ndëshkim konkret në shtator ndaj Berishës dhe familjes së tij.

“Kontratat që PD i ka bërë në fushatë kanë qenë të vjedhura më kusari. Gjithmonë fushatat elektorale i bënë me para të pista dhe këtë gjë e shtynë deri tek LSI. Ku më pas LSI dhe PD u bënë dy organizata kriminale. KQZ nuk ka marrë vendimet ligjore të duhura, për të gjithë paratë që shpërndahen për fushata elektorale, që shpërndaheshin me thasë dhe më pas përfundojnë edhe për të blerë votat e qytetarëve. Lobimi me shumën e madhe u bënë vetëm për të hequr “non gratën” e Berishës.

Ligjërisht ky kjo vetëm që është një krim zgjedhor, Berishën dhe LaCivita-n për ndikimin në zgjedhje, sepse një person nga SHBA nuk ka të drejtë që të bëjë fushatë në Shqipëri. Berisha duhet të japë llogari për ndikimin në zgjedhje dhe për fshehjen e të ardhurave. Kjo është një pastrim i parave që rrjedhin nga krimi. Kjo është një vepër penale. SPAK dhe Gjykata duhet të venë në peshore të drejtën, duhet të kuptojnë që nuk ka standard të dyfishtë.

Duhet që të veprojnë me Berishën njësoj si me Metën. SPAK po përdor dy standard dhe e ka future veten e vet në një llum, pasi po merret me gjëra të vogla dhe kjo të mëdha. Në shtator duhet që të dënohet Berisha dhe familja e tij, në të kundërt SPAK-ut duhen vënë minat”, tha avokati./abcnews.al

Në afërsi të fshatit Xhyherinë në Vlorë, reshjet e dendura të shiut kanë shkaktuar çarjen e kanalit të ujërave të larta, duke rrezikuar përmbytjen e dy banesave dhe një subjekti pularie.

Në vendin e ngjarjes ndodhen shërbimet e policisë dhe ato të zjarrfikëses, ndërsa emergjencat civile kanë dërguar një mjet fadromë për të frenuar përhapjen e ujit. Autoritetet njoftojnë se për të shmangur përmbytjen, është i domosdoshëm përdorimi i një mjeti skrep për pastrimin e inerteve që kanë bllokuar kanalin.

Situata vijon të jetë nën monitorim nga autoritetet./abcnews/al

“Nëse kërcënohemi, nuk do të hezitojmë të përgjigjemi”. Kështu ka deklaruar ministri i Jashtëm turk, Hakan Fidan, në një intervistë televizive, duke folur për kërcënimin që, sipas Ankarasë, vjen nga “çmenduria e Hitlerit” që ka prekur qeverinë e shtetit të Izraelit, politikat e së cilit rrezikojnë stabilitetin e të gjithë rajonit.

“Nuk kemi ndërmend të sulmojmë askënd, përveç nëse do të kërcënohemi. Në atë rast nuk do të tërhiqemi dhe përgjigja jonë nuk do të vonojë”, tha Fidan. “Mesazhi ynë është i qartë dhe i drejtohet të gjithëve: mos u tregoni armiqësorë ndaj nesh dhe ne nuk do të jemi armiqësorë ndaj jush. Por nëse dikush guxon të na kërcënojë, do të përballet me pasojat”, theksoi ministri i Jashtëm turk.

Reagimi vjen një ditë pasi Fidan njoftoi se Ankaraja ka ndërprerë të gjitha lidhjet tregtare me Izraelin, ka ndaluar anijet turke të ankorohen në portet izraelite dhe ka mbyllur hapësirën ajrore për avionët izraelitë.

Ministri i Jashtëm turk e bëri këtë deklaratë gjatë një seance të jashtëzakonshme të parlamentit turk të thirrur për situatën në Gaza.

“Turqia ka ndërprerë çdo formë tregtie me Izraelin, anijet tona nuk do të ndalen më në portet izraelite dhe asnjë avion izraelit nuk do të mund të përdorë hapësirën ajrore turke”, tha Fidan, duke ritheksuar se vendimi vinte si përgjigje ndaj ofensivës së Izraelit në Rripin e Gazës.

Ky është një hap tjetër i ashpër në marrëdhëniet mes dy vendeve, pas vendimeve të mëparshme të qeverisë turke për të kufizuar lidhjet diplomatike e ekonomike me Izraelin.

Kujtojmë se në maj 2024, Turqia ndërpreu të gjitha lidhjet tregtare me Izraelin, duke ndaluar eksportet dhe importet, përfshirë produkte kyçe si çelik, çimento dhe aviacion. Ky hap erdhi pas refuzimit të Izraelit për të lejuar Turqinë të dërgojë ndihma humanitare në Gaza. Presidenti turk, Recep Tayyip Erdoğan, e akuzoi Izraelin për “krime kundër njerëzimit”.

Tanimë, Turqia ndodhet në një pozicion kritik në Lindjen e Mesme, pasi po përballet edhe me sfida të tjera rajonale, përfshirë tensionet me Iranin dhe përpjekjet për të ndërmjetësuar në konflikte të tjera.

Ndërsa presidenti amerikan është shprehur me rezerva lidhur me mundësinë e mbajtjes së një takimi mes Ukrainës dhe Rusisë, presidenti ukrainas Volodymyr Zelensky ka bërë të ditur pesë vendet që, sipas tij, mund të shërbejnë si vendtakime të mundshme për zhvillimin e bisedimeve, raporton Sky News.

Pas samitit të fundit në Uashington, Ukraina dhe aleatët e saj kanë shtuar përpjekjet për të organizuar një takim me Rusinë, por Moska vazhdon të kundërshtojë.

Në mes të spekulimeve të shumta për vendndodhjen e mundshme të takimit, duke pasur parasysh se ndaj presidentit rus Vladimir Putin është lëshuar një urdhër-arrest ndërkombëtar Zelensky, në fjalimin e tij të përditshëm, ka përmendur pesë vende si opsione të mundshme: Turqinë, Emiratet e Bashkuara Arabe, Arabinë Saudite, Katarin dhe Zvicrën.

Zelensky shtoi gjithashtu se këshilltari i tij i lartë, Andrii Yermak, ndodhet aktualisht në Shtetet e Bashkuara ku po zhvillon takime me të dërguarin special amerikan, Steve Witkoff. Ndërkohë, vetë presidenti ukrainas ka planifikuar të udhëtojë drejt Evropës gjatë javës për takime të tjera diplomatike./abcnews.al

Udhëheqësi i Koresë së Veriut, Kim Jong Un, është takuar me familjet e ushtarëve koreano-veriorë të vrarë gjatë luftimeve në mbështetje të Rusisë në luftën kundër Ukrainës, duke u shprehur “ngushëllimet më të thella”, njoftoi media shtetërore koreano-veriore.

Ceremonia e veçantë u zhvillua të premten, ku Kim u pa duke ngushëlluar familjet e të rënëve dhe duke iu dhuruar portrete të të afërmve të tyre të vdekur, të mbështjella me flamurin kombëtar.

Sipas autoriteteve të Koresë së Jugut, Koreja e Veriut ka dërguar rreth 15 mijë trupa për të mbështetur Rusinë në pushtimin e saj ndaj Ukrainës, së bashku me raketa dhe armë me rreze të gjatë veprimi. Në këmbim, Pheniani dyshohet të ketë marrë ndihma në ushqim, para dhe mbështetje teknike.

Vetëm në muajin prill, Koreja e Veriut e pranoi zyrtarisht përfshirjen në konfliktin e huaj, duke konfirmuar se disa nga ushtarët e saj ishin vrarë. Zyrtarë perëndimorë i thanë BBC-së në janar se besohej që të paktën 1,000 ushtarë koreano-veriorë ishin vrarë brenda tre muajve të parë të dërgimit, me disa mijëra të tjerë të plagosur. Megjithatë, vlerësimet më të fundit flasin për rreth 600 të vrarë.

Ceremonia e së premtes ishte e dyta e këtij lloji brenda një jave. Gjatë fjalës së tij, Kim u shpreh se ishte i mbushur me “trishtim” që nuk kishte arritur t’i sillte ushtarët gjallë në atdhe, duke premtuar ndërtimin e një monumenti në nder të tyre si dhe përkujdesje për fëmijët e të rënëve.

“Mendova shumë për familjet e dëshmorëve që nuk ishin të pranishme në ceremoninë e kaluar… Kështu që vendosa të organizoj këtë takim për të ngushëlluar familjet e të gjithë heronjve dhe për të lehtësuar sadopak dhimbjen dhe pikëllimin e tyre,” citoi agjencia shtetërore KCNA fjalët e Kim Jong Un.

Javën e ardhshme, Kim pritet të takohet me presidentin rus Vladimir Putin në Kinë, gjatë një vizite që përkon me paradën ushtarake për përkujtimin e dorëzimit të Japonisë në fund të Luftës së Dytë Botërore.

Kjo do të jetë takimi i tretë mes Kim dhe Putin brenda dy viteve, në një periudhë kur marrëdhëniet mes dy vendeve po thellohen gjithnjë e më shumë.

Në tetor të vitit të kaluar, Kim i dërgoi Putinit një mesazh urimi për ditëlindje, duke e përshkruar atë si “shokun më të ngushtë”. Po atë muaj, Putin prezantoi një projekt-ligj për ratifikimin e një marrëveshjeje ushtarake të arritur me Kimin, e cila parashikon ndihmë të ndërsjellë në rast të ndonjë “agresioni” ndaj njërës prej palëve. Koreja e Veriut ka rreth 1.28 milionë ushtarë aktivë, por përpara përfshirjes në Ukrainë, ushtria e saj nuk kishte përvojë të fundit në operacione luftarake jashtë vendit./abcnews.al

Read More...

Zyra e presidentit palestinez Mahmoud Abbas i kërkoi të shtunën Shteteve të Bashkuara që të rishikojnë dhe të tërheqin vendimin për anulimin e vizës së tij, vendim ky që vjen pak javë para pjesëmarrjes së parashikuar të Abbasit në Asamblenë e Përgjithshme të OKB-së dhe në një konferencë ndërkombëtare për shtetësinë palestineze.

Departamenti Amerikan i Shtetit njoftoi të premten se sekretari i Shtetit, Marco Rubio, ka anuluar vizat për Abbasin dhe rreth 80 zyrtarë të tjerë palestinezë, në prag të mbledhjes vjetore të nivelit të lartë në Kombet e Bashkuara, e planifikuar për muajin e ardhshëm.

Abbas, që prej vitesh ka mbajtur fjalime në Asamblenë e Përgjithshme, zakonisht udhëheq delegacionin palestinez në këtë forum global.

“Ne i bëjmë thirrje administratës amerikane që të ndryshojë këtë vendim, i cili vetëm sa e përshkallëzon tensionin dhe rrit ndasitë”, deklaroi zëdhënësi presidencial Nabil Abu Rudeineh për agjencinë Associated Press nga Ramallahu.

Sipas tij, autoritetet palestineze kanë nisur kontakte të menjëhershme me vende arabe dhe ndërkombëtare, përfshirë ato më të përfshirat në këtë çështje. “Kjo përpjekje do të vazhdojë pa ndërprerje”, theksoi Abu Rudeineh.

Ai gjithashtu u bëri thirrje shteteve të tjera që të ushtrojnë presion ndaj administratës amerikane për të anuluar vendimin, veçanërisht ndaj atyre që do të organizojnë më 22 shtator një konferencë ndërkombëtare të nivelit të lartë mbi zgjidhjen me dy shtete në Lindjen e Mesme. Konferenca pritet të mbahet nën bashkëorganizimin e Francës dhe Arabisë Saudite.

Në këtë kontekst, ministri i Jashtëm francez, Jean-Nowl Barrot, shprehu shqetësim për kufizimet në hyrjen në selinë e Kombeve të Bashkuara dhe paralajmëroi se kjo çështje do të diskutohet me homologët e tij në Bashkimin Evropian.

“Selia e OKB-së është territor neutral, një vend i kushtuar paqes dhe zgjidhjes së konflikteve”, u shpreh Barrot të shtunën.

Ndërkohë, zëdhënësi palestinez Abu Rudeineh përsëriti thirrjen për ndërprerjen e ofensivës ushtarake izraelite në Rripin e Gazës dhe për të ndalur përshkallëzimin e dhunës në Bregun Perëndimor, duke theksuar se “asnjë nga këto veprime nuk ndihmon në gjetjen e një zgjidhjeje”.

Izraeli ka shpallur qytetin e Gazës si një zonë lufte, duke deklaruar se ky mbetet një bastion i fortë i Hamasit.

Administrata Trump ka ndjekur një linjë të ashpër ndaj autoriteteve palestineze, duke vendosur masa të ndryshme kufizuese, përfshirë edhe anulimin e vizave.

“Është në interesin tonë të sigurisë kombëtare që OÇP dhe Autoriteti Palestinez të mbahen përgjegjës për shkeljen e angazhimeve të tyre dhe për përpjekjet që dëmtojnë perspektivën për paqe”, thuhet në deklaratën e Departamentit të Shtetit.

Në reagim, Autoriteti Palestinez ka dënuar vendimin si një shkelje të rolit të SHBA-ve si vend mikpritës i OKB-së dhe si pengesë ndaj dialogut ndërkombëtar për paqen./abcnews.al