Komiteti Shqiptar i Helsinkit (KSHH), ka reaguar në lidhje me humbjen e jetës së të paraburgosurit Besnik Koçiu, i cili ndërroi jetë më 24 korrik 2025 në ambientet e IEVP “Jordan Misja” në Tiranë.

Reagimi i KShH-së, pason një letër të hapur të familjarëve të të ndjerit, të cilët bënë apel për hetimin e rrethanave të vdekjes së tij.

Pas publikimeve në media, më 29 korrik KShH realizoi një monitorim në ambientet e institucionit, ku u verifikua se Besnik Koçiu, ishte transferuar në paraburgim më 16 korrik 2025.

Ai kishte raportuar diagnoza të rënda shëndetësore, përfshirë Diabetin Tip 2, hipertension të avancuar, dislipidemi dhe një AVC ishemike të kaluar vetëm 6 muaj më parë.

Që në ditët e para, Koçiu kishte paraqitur shqetësime si dhimbje koke, dobësi trupore dhe djegie. Për shkak të gjendjes së tij, ai ishte transferuar nga godina A në godinën B të burgut për kushte më të mira akomodimi, dhe më pas ishte vendosur vetëm në dhomën nr. 6.

Sipas dokumenteve të shqyrtuara nga KShH, më 22 korrik 2025, një punonjës policie kishte rekomanduar mbajtjen nën vëzhgim të vazhdueshëm të Koçiut dhe informimin e specialistit të informacionit për çdo ndryshim në gjendjen e tij.

Megjithatë, nuk u gjetën praktika të dokumentuara që të vërtetonin këtë mbikëqyrje.

Mbrëmjen e 23 korrikut, ndihmës mjekja e burgut e kishte vizituar të paraburgosurin dy herë për matje tensioni, por pas kësaj nuk ka asnjë dokumentim tjetër deri në mëngjesin e 24 korrikut, kur Koçiu u gjet pa ndjenja në dhomën e tij në orën 7:00.

Ai u transportua në urgjencën e QSUT, ku u konstatua vdekja me diagnozën e dyshuar: arrest kardiak.

Pavarësisht ankesave të shpeshta dhe gjendjes së përkeqësuar, i paraburgosuri nuk u dërgua në spital. Sipas stafit mjekësor, parametrat e tij ishin brenda normales dhe ishte planifikuar thjesht ndjekja me ekzaminime laboratorike.

KShH ngre shqetësimin se gjendja e tij kërkonte një reagim më të shpejtë dhe një trajtim të specializuar, gjë që nuk ndodhi.

KShH thekson se, bazuar në nenet 15 dhe 20 të Rregullores së Përgjithshme të Burgjeve, institucionet e vuajtjes së dënimit janë të detyruara të sigurojnë kujdes shëndetësor 24 orë dhe të transferojnë të burgosurit në spitale kur është e nevojshme.

Organizata referon gjithashtu standardet e vendosura nga Gjykata Evropiane për të Drejtat e Njeriut, e cila thekson se ndihma mjekësore në burgje duhet të jetë jo vetëm formale, por e vazhdueshme, sistematike dhe e orientuar drejt parandalimit të përkeqësimit të shëndetit.

Komiteti i Helsinkit kërkon një hetim të thelluar, objektiv dhe të gjithanshëm nga Ministria e Drejtësisë dhe Drejtoria e Përgjithshme e Burgjeve për identifikimin e përgjegjësive dhe marrjen e masave parandaluese për raste të ngjashme në të ardhmen.

Në përfundim, KShH kritikon ashpër përdorimin e tepruar të masës së sigurisë “arrest në burg”, sidomos në raste kur të dyshuarit nuk paraqesin rrezikshmëri të lartë dhe kanë probleme serioze shëndetësore.

“Kjo nuk është hera e parë që një person me probleme të rënda shëndetësore humbet jetën në paraburgim. Sistemi duhet të garantojë jo vetëm drejtësi, por edhe dinjitet njerëzor dhe mbrojtje të shëndetit e jetës”, – përfundon reagimi i Komitetit Shqiptar të Helsinkit.

The post Vdekja e Besnik Koçiut në burg, KSHH: U mbajt 8 ditë në qeli i sëmurë appeared first on Albeu.com.

Një sërë bisedash të përgjuara mes zyrtarëve të larta të Bankers Petroleum, hedhin dritë mbi mënyrën se si janë menaxhuar fondet dhe si vendoseshin përparësitë në pagesat mujore të kompanisë para se të ndërhynte prokuroria, duke vënë përballë akuzës personat përgjegjës.

Në qendër të diskutimeve janë shuma të konsiderueshme që lëvizin përmes një llogarie bankare në Vjenë, ndërsa ndërmarrja shtetërore Albpetrol, një prej partnerëve strategjikë në sektorin e naftës, shtyhet në mënyrë sistematike për t’u paguar “më vonë”.

Në audiopërgjigjimet që disponon prokuroria, newsbomb.al ka zbardhur bisedën e datës 9 prill 2025, midis Majlinda Thanës, drejtoreshë e Thesarit pranë Bankers dhe një zyrtareje të huaj të financave, Sheri.

Ato diskutojnë në mënyrë të drejtëpërdrejtë për planin e pagesave dhe prioritetet që do të ndiqen.

Disa nga kompanitë që përfitojnë janë Antea, PetroSolution, Sherwood dhe SIA Kalandra, ndërsa Albpetrol vendoset në fund të listës.

“Pse ke përfshirë Albetrol? Është në fund të muajit, presim të ardhurat e ardhshme. Mund të presë me 1.5 milionë”, thotë Majlinda Thana.

Në një situatë tjetër, e njëjta zyrtare i sugjeron koleges që të mos dërgohet dokumentacioni për aprovim, duke pranuar se lista e pagesave nuk pasqyron realisht detyrimet emergjente të kompanisë.

Në të njëjtën bisedë diskutohet për përdorimin e një karte krediti që rezulton të jetë në emër të një ish-punonjësi të kompanisë, një person i identifikuar si “Sugar”, i cili, sipas zyrtares, është larguar nga Bankers që prej janarit, por karta vazhdon të përdoret në mënyrë të paqartë.

“Nuk ka arsye që kompania të mbulojë shpenzimet e kartës së tij të kreditit. Ai nuk është më punonjës”, thuhet në përgjimet e siguruara.

Të nesërmen, më 10 prill 2025, në dy biseda të tjera të regjistruara, zbulohet ekzistenca e një llogarie bankare në Vjenë, përmes së cilës janë transferuar 2 milionë euro drejt Shqipërisë, pjesë e të cilave janë përdorur për pagesa të dyshimta dhe jo të dokumentuara qartë.

“Shko te Vienna, është një transfer prej 2 milionësh… edhe një tjetër prej 60 mijë. Këto janë nga Viena”, thotë Thana.

“PetroSolution do paguhet vetëm një faturë, pjesa tjetër më vonë”, vijon ajo.

Nga përmbajtja e përgjimeve del qartë se pagesat ndaj institucioneve shtetërore si Albetrol nuk shihen si përparësi, ndryshe nga furnitorët privatë që, në disa raste, paguhen edhe me fatura të vjetra, pa dokumentacion të plotë.

Skema e menaxhimit të këtyre pagesave ka bërë që Shqipërisë t’i shkaktohet një dëm financiar prej 240 milionë eurosh.

Tashmë drejtuesit e kësaj kompanie janë vënë para përgjegjësisë penale, ndërsa gjykata ka caktuar masën “arrest me burg” për ish-administratorin e “Bankers Petroleum”, Leonidha Çobo dhe drejtorin aktual Hongping Xiao. Ndërkaq, për Majlinda Thanën është vendosur një masë sigurie “Detyrim Paraqitje”.

Bisedat e regjistruara në 9 prill 2025, mes Majlinda Thana drejtoreshë e Thesarit pranë Bankers Petrolium me një shtetase të huaj të quajtur Sheri (punonjëse e lartë brenda Bankers në fushën e Financave)

Personi  – A – Është shtetasja Majlinda Thana me numër telefoni 06970…

Personi – B – Është shtetasja Sheri me numër telefoni 06940…

Personi B: Përshëndetje Majlinda

Personi A: Përshëndetje Sheri, si je?

Personi A: Pra, fillimisht dua të të informoj që jam me pushime deri më 28 Prill. Pushimet nga viti 2024.

Personi A: Viti i kaluar, viti i kaluar.

Personi A: Kjo do të thotë që nuk do të kontrolloj email-in shumë shpesh, por nëse ka ndonjë urgjencë, mund të më ndihmoj, sigurisht. Së dyti, pashë planin tënd të pagesave (cash plan), ku më ke kërkuar të jap mendimin tim, etj.

Personi A: E pashë që nuk ka shumë hapësirë për pagesa të tjera, ndërkohë që ka shumë pagesa urgjente. Për shembull, së pari është Antea. Me Antea kemi garanci bankare, siç e di, dhe duhet të paguajmë, sepse kanë kaluar disa muaj pa bërë pagesë ndaj tyre, dhe borxhi i grumbulluar është rreth 500,000 USD, dhe kjo duhet patjetër të paguhet…Së dyti, kemi qiratë e tokës. Vlera e tyre është më pak se 1 milionë USD, por u kam kërkuar të dërgojnë kërkesat më urgjente sdhe vlera e tyre shkon deri në 400,000 USD. Gjithsesi, unë do të përgatis pagesat urgjente sipas atyre që shoh si më të rëndësishmet që nuk mund të shtyhen z.Xiao dhe të tjerët mund të japin sugjerime apo të konfirmojnë.

Personi B: Po, po…(flet dhe nuk kuptohet)

Personi A: Por kam parë që ke përfshirë këtu edhe Albetrol. Pse? Eshtë në fund të muajit, atëherë të presim të ardhurat e ardhshme për ta paguar Albetrol.

Personi B: Po mund të diskutojmë për këtë. Ndoshta duhet ta shtyjmë. Duhet të diskutojmë cilat.

Personi A: Po, sipas meje, albpetrol mund të presë me 1.5 milionë. Duhet të presë padiskutim. Përndryshe na mbeten shumë pak para në dispozicion dhe ka shumë furnitorë të rinj që nuk janë përfshirë si psh Seriani, SIA Kalandra etj…kështu që…

Personi B: Duhet të përditësosh…(flet por nuk kuptohet)

Personi A: Nuk e di nëse ke përfshirë këtu…lërme të kontrolloj…Petro Solution 800 mijë duket paksa shumë. Mund ta shtyjmë një pjesë të shumës për në fund të muajit. Këshilla ime është që të shtyjmë një pjesë të shumës për Petro Solution dhe Albetrol deri në të ardhurat e ardhshme.

Personi B: Flet po nuk kuptohet

Personi A: Por sidoqoftë duhet të përgatitemi edhe për përballjen tjetër financiare – të përcaktojmë pagesat urgjente që të dimë sa para kemi, sa mund të shpenzojmë. Sigurisht, edhe një lojale tjetër doganore për tu hequr, dhe pastaj mund të shohësh se cfarë mbetet për tu shpërndarë te furnitorët e tjerë. Sepse në këtë formë nuk është shumë e saktë për tu derguar për aprovim te menaxhmenti – ata duhet të jenë të informuar për të gjitha shpenzimet e detyrueshme të muajit. Ok? Ndoshta do ta përditësoj më vonë. Nuk e di nëse do ta dërgoj gjatë orarit të punës apo pasdite, por më mirë të mos aprovohet ky version. Më mirë të mos aprovohet. Sepse…

Personi B: (flet por nuk kuptohet)

Personi A: Po, sepse ka disa furnitorë të vegjël që po kërkojnë pagesë çdo ditë. Më mirë të bëjmë pagesat. Po. Po, e di.

Personi A: Më fal, një shqetësim nga departamenti financiar është në lidhje me kartën e kreditit të Sugar-it. E dimë që ai është larguar nga kompania dhe nuk është më pjesë e pagave tona që prej janarit, por karta e tij e kreditit vazhdon të përdoret. Kjo i takon menaxhmentit të vendosë çfarë të bëhet me atë kartë. Nëse duan ta mbajnë apo jo – ata duhet t’i japin një udhëzim, sepse ai nuk është më punonjës. Por shpenzimet që janë bërë që kur është larguar, nuk e dimë për sa kohë – kompania duhet të vendosë nëse do t’i mbulojë apo do t’i paguajë vetë. Nëse ai nuk është më punonjës, nuk ka arsye që kompania të mbulojë shpenzimet e kartës së tij të kreditit.

Por është prioritet që dikush të flasë me z. Wang ose z. Xiao. Nuk e di. ndoshta z. Xiao ka qenë shefi i tij. Por edhe z. Wang. Sepse, nga ana financiare, karta e kreditit është në departamentin e financës dhe duhet ta zgjidhim këtë sa më shpejt. Besoj se ti i ke dërguar shpenzimet e tij edhe te qendra, sepse merr deklaratat e kartës së kreditit.

Personi B: (flet por nuk kuptohet)

Personi A: Okej, pra karta e tij e kreditit është pjesë e kontrollit të auditimit. Sipas politikave të brendshme, nëse dikush nuk është punonjës, dhe ka kartë krediti, atëherë duhet të justifikohen shpenzimet – ose të paguhet nga z. Xiao, ose të vendosë kompania çfarë do bëjë… Pra, është një vendim që duhet ta marrin. Okej? Por të lutem, vendose si prioritet për diskutim me Z. Xiao.

Z. Wang apo qendra. sepse duhet ta zgjidhim këtë çështje.

Personi A: Faleminderit. Mirupafshim./NEWSBOMB.al

The post Skandali i “Bankers”/ Zbardhen përgjimet mes drejtuesve: Mbarojmë punë me kompanitë e tjera, Albpetroli do paguhet më vonë… appeared first on Albeu.com.

Këtë të enjte, presidenti i Ukrainës, Volodymyr Zelensky, ka bërë thirrje për një takim ballë për ballë me presidentin e Rusisë, Vladimir Putinin, për t’i dhënë fund luftës gati katërvjeçare.

Ai e tha këtë një ditë pas takimit që i dërguari i posaçëm amerikan, Steve Witkoff, e zhvilloi me Putinin në Moskë.

Presidenti i Shteteve të Bashkuara, Donald Trump, i quajti bisedimet ndërmjet të dërguarit të tij dhe Putinit, si “shumë frytdhënëse”, por zyrtarët amerikanë prapëseprapë u zotuan të vendosin sanksione ndaj partnerëve tregtarë të Moskës.

Zelensky tregoi më vonë se kishte folur në telefon me Trumpin, i cili tha se mund të takohet me Putinin “shumë shpejt”.

“Ne në Ukrainë kemi thënë vazhdimisht se gjetja e zgjidhjeve reale mund të jetë vërtet efektive në nivelin e udhëheqësve”, shkroi Zelensky në rrjete sociale.

“Është e nevojshme të përcaktohet koha për një format të tillë dhe gamën e çështjeve që do të trajtohen”, shtoi ai.

Udhëheqësi ukrainas, tha të enjten në mëngjes se ka planifikuar t’i zhvillojë “disa” biseda gjatë ditës, përfshirë me kancelarin gjerman Friedrich Merz, si dhe me zyrtarë francezë dhe italianë.

“Do të ketë gjithashtu komunikim në nivelin e këshilltarëve të sigurisë kombëtare”, shtoi Zelensky.

“Gjëja kryesore është që Rusia, e cila e filloi këtë luftë, të ndërmarrë hapa të vërtetë për t’i dhënë fund agresionit të saj”, përfundoi ai.

The post Zelensky kërkon takim ballë për ballë me presidentin rus Putin për t’i dhënë fund luftës appeared first on Albeu.com.

Tashmë jemi zyrtarisht në sezonin e dasmave dhe disa tradita duket se nuk do të vdesin kurrë. Kështu disa dasmorë në qytetin e Vlorës, kanë zgjedhur që lumturinë e tyre ta ndajnë edhe me njerëz të tjerë.

Sipas disa informacioneve, dasnorët fillimisht ia kanë marrë valles në rrugën Transballkanike, duke shkaktuar kështu edhe për disa çaste bllokim të qarkullimit të automjeteve.

Pas këtij momenti, siç shihet edhe nga pamjet, shohim se disa prej dasmorëve ecin me shpejtësi për t’u larguar me makinat e tyre.

The post Dasmorët në Vlorë ia marrin valles në mes të rrugës, bllokojnë qarkullimin e automjeteve appeared first on Albeu.com.

Kreu i PD-së, Sali Berisha ka denoncuar përdorimin e mbi gjysmë miliard eurosh nga qeveria gjatë periudhës para zgjedhjeve të 11 majit 2025, për organizimin e aktiviteteve dhe prokurimeve me qëllim ndikimin e votës së qytetarëve shqiptarë.

Berisha tha se gjatë periudhës janar-maj, që sipas ligjit elektoral është e ndaluar për aktivitete që mund të ndikojnë në zgjedhje, u zhvilluan mbi 4,500 ngjarje kombëtare dhe ndërkombëtare, përfshirë edhe ‘Giro d’Italia’.

Ai theksoi se bashkitë e vendit kanë kryer prokurime me vlerë rreth 57 milionë euro, nga të cilat 14 milionë euro janë përdorur për blerje të përqendruara, ndërsa Fondi Shqiptar i Zhvillimit ka shpenzuar 10 milionë euro në aktivitete elektorale.

Berisha kritikoi ashpër Altin Dumanin, duke e cilësuar si njeriun e dytë më përgjegjës për organizimin e zgjedhjeve. Berisha shtoi duke thënë se Dumani mohon ekzistencën e fakteve dhe provave për shkeljet, duke e cilësuar atë si “avokat të verbër të krimit elektoral” dhe bashkëfajtor në farsën elektorale së bashku me qeverinë.

Pjesë nga fjala e kreut të PD, Sali Berisha:

Njëri nga aspektet më kriminale të farsës elektorale 11 maj 2025, ishte përdorimi i ngjarjeve, prokurimeve të cilat tejkalojnë mbi gjysmë miliardi euro për qëllime elektorale për të ndikuar votën e qytetarëve shqiptarë.

Në periudhën janar gjer në 11 Maj, periudhë në të cilën ligji elektoral, neni 91/3 i tij ndalon prokurimet, ndalon ngjarjet, aktivitetet, organizimin e tyre, aktivitetet që mund të kenë ndikim në zgjedhje dhe sipas raportit të OSBE-ODIHR, pikërisht në këtë periudhë u organizuan 4500 veprimtari kombëtarë dhe ndërkombëtare, përfshirë ‘Giro d’Italia’, 7 mln euro një organizate private ditën e votimit dhe një ditë para zgjedhjeve.

Pra përveç këtyre, bashkitë e vendit kanë prokuroruar tërësisht për qëllime elektorale në total 57 mln euro, nga të cilat rreth 14 mln para xhepi të themi, blerje të përqendruara. 32 mln bashkitë të ndryshme dhe Fondi shqiptar i grabitjes apo plaçkitjes, apo i zhvillimit siç quhet, ka përdorur për qëllime elektorale 10 mln euro.

Standardet e OSBE/ODIHR për ndarjen e shtetit nga partia, përfshirë Dokumenti i Kopenhagenit pika 5/4 dhe Kodi i Praktikës së Mirë në Çështjet Zgjedhore të Komisionit të Venecias, sanksionojnë të njëjtin parim.

Këtu kemi më poshtë tenderat e bashkive të vendit, të cilat nuk kanë respektuar asnjë ligj, as kushtetutën, por kanë bërë gjithçka që të ndikojnë në elektoratin e tyre në veprimtari kriminale antiligjore dhe për këtë njeriu i dytë më përgjegjës për farsën elektorale Altin Dumani, thotë se nuk kemi të dhëna, fakte dhe prova, sepse për Dumanin ligji është letër e vdekur, dokumentet zyrtare janë letra pa vlerë, mbasi ai është një fanatik i verbër, një avokat i verbër i krimit elektoral të qeverisë dhe bashkëfajtor në farsën elektorale, njëlloj me Edi Ramën dhe ministrat e tij.
Vazhdojmë …

Me blerje të përqendruara tani.
14.5 mln euro të ndaluara me ligj përdorimi i tyre dhe këto i ligjëron vetëm Altin Troplini, i cili bën mashtrimin publik se thotë nuk kemi prova dhe fakte.

Për atë dokumentet zyrtar dhe aktet në shkelje flagrante të ligjit për interesa të partisë shtet, nuk përbëjnë vepër penale.
Vazhdojmë …

Tenderat elektronik të Fondit shqiptar të grabitjes dhe plaçkitjes, të famozit Agolli që i dha 500 mln lekë djalit të vet për restorantin, për të bërë një manual për kuzhinën, nga kuzhinieri i restorantit të tij.
Këtu janë vlerat në lek, janë përpjekjet pra … poli i festivaleve të industrisë. E kuptoni ju terminologjinë e Lubi Ballukut.

The post Berisha: Altin Dumani mohon faktet, qeveria përdori gjysmë miliard euro për të ndikuar qytetarët në zgjedhje appeared first on Albeu.com.

Përmes një video të postuar në rrjetet sociale, kryetari i Partisë Demokratike, Sali Berisha, ka denoncuar gjendjen e turizmit në Shqipëri.

Kreu demokrat Berisha, e ka cilësuar si skandaloze situatën me ndotjen e bregdeteve dhe plazheve.

Turistja në videon e postuar nga Berisha, shprehet se heziton të kthehet sërish për të vizituar Shqipërinë vetëm për shkak të ndotjes

“Aty është pisllëk. Mbeturina kudo. Metale dhe plastikë kudo. Po mendoja të kthehesha sërish në Shqipëri për pamjen e bukur, për të notuar por tani po hezitoj se është shumë pisllëk dhe nuk më pëlqen kjo ndotje”, shprehet turistja në Sarandë.

 

The post Berisha publikon e videon e turistes së huaj: Turizmi elitar i Ramaduros, është pisllëk dhe ka mbeturina kudo appeared first on Albeu.com.

Mesditën e sotme, një tërmet me magnitudë 4.7 të shkallës Rihter goditi Greqinë jugore.

Sipas të dhënave zyrtare, lëkundjet u regjistruan në orën 12:49 me orën lokale, me epiqendër 11 kilometra në veriperëndim të qytetit Messíni dhe rreth 126 kilometra në jug-juglindje të Patrës.

Tërmeti ndodhi në një thellësi të vogël prej vetëm 5 kilometrash, ç`ka e bën më të ndjeshëm në sipërfaqe.

Për momentin nuk raportohet për dëme materiale apo të lënduar, por autoritetet greke janë në gatishmëri në rast të pasgoditjeve.

Lëkundjet u ndjenë edhe në qytete të tjera përreth rajonit të Peloponezit.

 

The post Tërmet në Greqi, epiqendra dhe magnituda appeared first on Albeu.com.

Këtë të enjte, është mbajtur në Gjykatën e Vlorës seanca për caktimin e masës së sigurisë ndaj katër personave të arrestuar, së bashku me Flodian Plakun në Orikum.

Të ndaluarit janë:

Albano Lapshi, i cili dyshohet se i çonte ushqim Plakut- arrest me burg

Armando Dano, berber nga Shkodra- detyrim paraqitje.

Ligor Doko, pronar i hotelit ku u arrestua Plaku- arrest me burg.

Julian Aliaj, i cili u kap me armë zjarri me vete dhe rezulton të ketë qenë më parë i dënuar për trafik droge- arrest me burg.

 

 

Në masën e sigurisë gjykata vendosi; arrest me burg për të 3 shtetasit e ndaluar si të përfshirë në fshehjen dhe dhënien e ndihmës për të akuzuarin për vrasje Flodian Plaku.

Ndërsa për berberin Armando Dano, gjykata vendosi detyrim paraqitje.

The post Siguruan ushqim dhe strehuan Flodian Plakun, ja masat që dha gjykata për të arrestuarit në Orikum appeared first on Albeu.com.

Policia e Tiranës njofton se ka nisur hetimet për dhunuesin e personazhit të njohur në internet Genard Hajdini dhe babain e tij.

Sipas policisë, ka nisur procedimi në gjendje të lirë për shtetasin Sh. G., 40-vjeç, për veprën penale “Plagosja e lehtë me dashje”, dhe për shtetasen A. P., 25-vjeçe, për veprën penale “Veprime që pengojnë zbulimin e së vërtetës”.

Nga hetimet e kryera dyshohet se më datë 03.08.2025, në ambientet e një lokali në rrugën “Bardhyl”, shtetasi Sh. G. ka goditur me grushte shtetasit P. H. dhe G. H. (babë e bir), ndërsa shtetasja A. P., e cila shoqërohej me 40-vjeçarin, në momentin e ngjarjes, ka dhënë deklarime kontradiktore, me qëllim shmagien e përgjegjësisë penale për shtetasin Sh. G.

 

The post Dhunoi Genard Hajdinin dhe babain e tij, nis hetimi për 40-vjeçarin dhe 25-vjeçaren që e shoqëronte appeared first on Albeu.com.

Ardon Jashari, i afrohet shumë Charles De Ketelaere në rekordin e transferimit më të shtrenjtë në historinë e futbollit belg.

Faktor vendimtar për të ndryshuar ekuilibrat do të jenë bonuset, por ndërkohë, mesfushori shqiptaro-zviceran siguron një vend në podiumin e mesfushorëve më të kushtueshëm në historinë e Milanit.

Rekordi në këtë kategori vijon të qëndrojë prej 24 vitesh dhe për këtë merkato verore mbetet i paprekur.

Rui Costa, mbetet ende lojtari për të cilin Milani ka shpenzuar më shumë.

Për momentin, në pritje të aktivizimit ose jo të bonuseve, vendi i dytë vijon t’i takojë Lucas Paqueta, për të cilin tifozët kuqezinj kanë kujtime më pak të bukura sesa për portugezin.

Në detaje, ja 10 mesfushorët më të shtrenjtë në historinë e Milanit.

Kjo renditje përfshin edhe lojtarë aktualë të skuadrës kuqezi:

1. Rui Costa

Nga Fiorentina te Milani në vitin 2001

41.32 milionë euro

2. Lucas Paqueta

Nga Flamengo te Milani në vitin 2019

38.4 milionë euro

3. Ardon Jashari

Nga Brugge te Milani në vitin 2025

36 milionë euro

4. Franck Kessie

Nga Atalanta te Milani në vitin 2019

32 milionë euro

5. Tijjani Reijnders

Nga AZ Alkmaar te Milani në vitin 202

24.8 milionë euro

6. Samuele Ricci

Nga Torino te Milani në vitin 2025

23 milionë euro

7. Clarence Seedorf

Nga Interi te Milani në vitin 2002

22.5 milionë euro

8. Hakan Çalhanoğlu

Nga Leverkusen te Milani në vitin 2017

22.3 milionë euro

9. Yunus Musah

Nga Valencia te Milani në vitin 2023

21.2 milionë euro

10. Andrea Bertolacci

Nga Roma te Milani në vitin 2015

21 milionë euro

The post Ardon Jashari, rekord për futbollin belg, i treti mes mesfushorëve më të shtrenjtë të Milanit appeared first on Albeu.com.

Numërimi mbrapsht për “Topin e Artë” ka filluar, procesi që çon në ceremoninë e ndarjes së çmimeve në Paris më 22 shtator fillon zyrtarisht ditën e sotme me listën e 30 kandidatëve.

Dhe Parisi, së bashku me PSG-në, është qendra rreth së cilës sillen shumica e finalistëve.

Sezoni i shkëlqyer i parisienëve i bën Donnarumma-n, Vitinha-n dhe Dembele-n tre pretendentët më të fortë për çmimin.

Krahas tyre, Lamine Yamal i Barcelonës, një kandidaturë mjaft e fortë.

Të preferuarit e zakonshëm Salah, Kane, Mbappé dhe Vinicius me siguri do të jenë të pranishëm, por nuk do të kenë ndonjë ambicie të madhe për të fituar.

Do të jetë gjithçka parisiene, me një shije të kaltër, edhe nëse Donnarumma shfaqet pas Dembele dhe Vitinha.

Lista e 30 finalistëve do të publikohet rreth orës 15:00 të ditës së sotme, dhe ka edhe një surprizë të mundshme që përfshin Serie A.

Disa thashetheme nga Anglia sugjerojnë se Scott McTominay, do të jetë midis kandidatëve.

Mesfushori ishte një lojtar kyç në fushatën e Napolit në kampionatin italian, si për performancat e tij ashtu edhe për 12 golat që shënoi gjatë triumfit.

Kjo do të ishte një arritje e merituar, por që duhet harruar se mund të fitojë trofeun.

100 gazetarët që përbëjnë jurinë votojnë sipas kritereve të mëposhtme: performanca individuale, karakter vendimtar ose spektakolar, vlera kolektive dhe trofetë e fituara. Klasi dhe loja e ndershme merren gjithashtu në konsideratë.

Çdo anëtar jurie zgjedh 10 emra, duke i dhënë vendit të parë 15 pikë, vendit të dytë 12, vendit të tretë 10, vendit të katërt 8, vendit të pestë 7, vendit të gjashtë 5, vendit të shtatë 4, vendit të tetë 3, vendit të nëntë 2 dhe vendit të dhjetë 1.

The post Publikohen sot kandidatët për “Topin e Artë 2025”, një emër surprizë appeared first on Albeu.com.

Këtë të enjte, ish-ministri i Mjedisit, Lefter Koka, ka lënë përkohësisht qelinë në institucionin e paraburgimit në Durrës.

Mësohet se, Kokës i është miratuar leje e kufizuar që zgjat nga ora 11:00 deri në orën 17.00.

Lefter Koka, ka marrë lejen për arsye familjare, pasi e ëma është sëmurë, ndërsa do të jetë gjithë kohën i shoqëruar nga policia e burgjeve.

The post Ish-ministri i Mjedisit Lefter Koka lë përkohësisht qelinë, zbulohet arsyeja appeared first on Albeu.com.

Ish-deputeti Myslim Murrizi i ka drejtuar një letër publike drejtuesit të Prokurorisë së Posaçme, Altin Dumani në lidhje me çështjen e “Bankers Petroleum”.

Në letrën drejtuar Dumanit, Murrizi kerkon nga drejtuesi i SPAK të hedhë sytë nga Bankers dhe të hetohet nga SPAK si çështje.

Murrizi shkruan se shuma e parave që është vjedhur në rastin Bankers, nuk është vjedhur as nga të gjithë të burgosurit së bashku, që nga vitit 1991.

Letra e Myslim Murrizit drejtuar Altin Dumanit

Pas vendimit të djeshëm të gjyqtares së Apelit, znj. Gilda Hoxha, për të lënë në fuqi masat e arrestit për drejtuesin dhe ish-drejtues të kompanisë BANKERS, habitem nga heshtja e drejtuesit në detyrë të SPAK-ut, z. Dumani.

Nisur nga shifrat marramendëse të qindra miliona eurove të “qerasura” nga kjo kompani te kompani të tjera, te individë, politikanë apo sekserë të politikanëve në 21 vite, nga viti 2004, duke mos paguar asnjë kokërr leku si tatim fitimi në shtet, kjo është vjedhja më e madhe e pasurisë së shqiptarëve në 35 vite, rreth 15 miliardë euro.

Z. Dumani!
Të kërkoj ndjesë që ndoshta ta prish rehatinë e pushimeve të gushtit, se edhe ti njeri je, dhe të takon të bësh pushime pas një pune intensive, plot ngarkesë me deklarata pritshmërie se do godasësh fort korrupsionin në nivele të larta… dhe në afro 3 vjet ke arrestuar 4 herë Lefter Kokën, 4 herë Alqi Bllakon, 5 herë Fatos Tushen. Por kur të kthehesh nga pushimet, shife njëherë këtë punën e BANKERS-it, se mos është për “ndërmarrjen” tuaj si çështje – meqë kaq euro nuk janë vjedhur as nga të gjithë të arrestuarit së bashku që nga viti 1991.

Ndoshta e kam gabim, por meqë pak ditë më parë ke emëruar si këshilltare znj. Brunilda Bekteshi, që ka punuar tek CEZ-i dhe ia di marifetin këtyre qindra milionave euro të “shpërndara” dorë më dorë te hajdutët e politikës, pyete dhe atë njëherë si e sheh ajo këtë aferën e BANKERS-it.

Megjithëse znj. Bekteshi e ke marrë të “këshillojë” për vettingun, pasi “realizoi” me sukses fazën e parë si ish-anëtare e KPK-së që në fakt ishte KÇK, e tani në konflikt të hapur interesi do “gjuajë” ata që nuk arriti t’i “gjuante” dot në KPK, se nuk ishte e mundur të ishte në trup gjykues në çdo subjekt.

Z. Dumani!
Po ju drejtohem juve, se mendova t’i drejtohem z. Metani, por ai ka afro 6 vjet që është rraskapitur nga lodhja në krye të ILD-së, duke u marrë rreth 3 vjet me rikonstruksionin e godinës dhe 2 vjet ju bënë bythët kallë në kafe tek lokali Panevino tek hotel Plazza, e i takon të bëjë 3-4 muaj pushime të shtrydhë kockat, se edhe 3 vjet deri sa të mbarojë mandatin 9-vjeçar do ketë “ngarkesë” të madhe me mobilimin e zyrave.

Bile, meqë ti ke marrë si këshilltare Brunildën e KPK-së, Metani mund të marrë këshilltare Klotildën e Komisionit të Ligjeve, se kënaqet edhe Llagami e KLGJ-së dhe e bën tutar të gjithë sistemin e drejtësisë, e pastaj nuk kanë ku të futen gjyqtarë e prokurorë që nuk zbatojnë ligjin.

Z. Dumani!
Këto 3 muaj që të kanë ngelur si drejtues i SPAK-ut, mos u lodh më kot me Krifcën e IPARD-it, me inceneratorin e Tiranës, me Tigrin e tërmetit që po “vuan” të zezën në Zvicër, me Tigrin 1 dhe Tigrin 2 të Bangladeshit në Vlorë, me telefonat BQ, SKY, ECROÇAT, me tenderat e AKSH-it, me çunat e Dubait, me të “emëruarin” koordinator të bandave me qeverinë, me këta shejtanër që blenë vota më 11 maj, me 4 koncesionet 500 milionë euro të Ministrisë së Shëndetësisë, me portin e Pashalimanit, me tendera rrugësh e tunelesh, me Bektashin me autokombajn nga Kozara dhe Bektashin e Partizanit, me Gërdecin apo 21 Janarin, me kontejnerët me drogë që kanë edhe ndonjë arkë banane brenda, me harabelin e Arjolës, apo me zogun e Tiranës e me lloj-lloj çështjesh “bombastike”.

Por po ke këlqe, meru me këta zogj k… kinezë e shqiptarë të BANKERS-it, që kanë vjedhur miliarda euro dhe kanë tallur trapin 21 vjet me pasurinë e shqiptarëve, duke ushqyer si qen zinxhiri pothuajse të gjithë zagarët e politikës. E ke kryer detyrën tënde si drejtues i SPAK-ut, se aty i ke paketë të gjitha hallet që kanë mbërthyer prej fyti Shqipërinë 35 vjet, e që bëjnë sikur zihen apo luftojnë njëri-tjetrin./ CNA

The post Myslim Murrizi letër Altin Dumanit: Hidhi sytë nga “Bankers” appeared first on Albeu.com.

Ish-banori i “Big Brother Vip Albania 4”, Jozefin Marku, pasi pranoi publikisht se është në një lidhje me një vajzë shqiptare jashtë botës së ekranit, nuk ka mundur ta mbajë më gjatë të fshehtë jetën e tij sentimentale.

Në një postim të fundit në “Instagram”, ai ndau një foto nga një ndeshje padeli, ku shihej me një vajzë të panjohur, fytyra e së cilës ishte e fshehur.

Por ndjekësit dhe burimet pranë çiftit nuk e patën të vështirë ta identifikonin: bëhet fjalë për Xhoana Toshin, vajzën që pak ditë më parë ishte parë në publik duke e përqafuar Jozin gjatë një koncerti.

 

Edhe më herët, emri i saj është lakuar në rrjete sociale si e dashura e mundshme e artistit, por duket se tani gjërat po shkojnë drejt konfirmimit të heshtur.

“We ♥ Padel”, ishte mbishkrimi që Jozi vendosi mbi foton me vajzën, një detaj i thjeshtë që po merr kuptim të ri pas këtyre zhvillimeve.

The post Zbulohet kush është vajza misterioze krah Jozit (EMRI+FOTO) appeared first on Albeu.com.

Për dekada me radhë, mijëra burra dhe gra kanë punuar në nëntokë, në miniera, rafineri dhe uzina metalurgjike, shpesh në kushte të rënda, pa mjete të duhura sigurie e pa asnjë kusht për t’u përballur me ngarkesën toksike të mjedisit të tyre të punës.

Këta punëtorë janë ata që kanë ndërtuar një pjesë të madhe të pasurisë industriale të Shqipërisë në vitet më të vështira. Por për një kohë të gjatë, mundi dhe sakrifica e tyre nuk është reflektuar siç duhet në sistemin e pensioneve.

Për të korrigjuar këtë padrejtësi historike, qeveria shqiptare miratoi një skemë të re për shtesë në pension për punonjësit e sektorëve të vështirë, konkretisht për minatorët, naftëtarët dhe metalurgët, duke njohur realisht kontributin dhe riskun që kanë mbartur gjatë viteve të punës.

Sipas vendimit të miratuar nga Këshilli i Ministrave dhe zbatuar nga Instituti i Sigurimeve Shoqërore, kjo shtesë në pension llogaritet mbi vitet e punës dhe profesionin dhe ka si qëllim të rrisë përfitimin mujor të pensionistëve që kanë punuar në këto kushte të rënda.

Çdo vit pune në këto profesione, njihet me një përqindje shtesë që i shtohet pensionit të rregullt.

Konkretisht, minatorët përfitojnë një shtesë prej 1% në pensionin mujor për çdo vit pune të siguruar në profesionin e tyre.

Naftëtarët dhe metalurgët përfitojnë një shtesë prej 0.6% në pension për çdo vit pune në këto profesione.

Kjo do të thotë se për një punonjës që ka 25 vite pune si minator, pensioni i tij bazë do të rritet me 25% shtesë. Nëse pensioni i tij është psh.. 20,000 lekë në muaj, atëherë do të përfitojë një shtesë prej 5,000 lekësh, duke e çuar pensionin mujor në 25,000 lekë.

Po kështu, një naftëtar me 30 vite pune do të përfitojë një shtesë prej 18% të pensionit bazë, që në shumicën e rasteve përkthehet në deri në 4,000 lekë më shumë çdo muaj.

Këto përqindje nuk janë të kufizuara vetëm për vitet mbi një prag të caktuar, por aplikohen për çdo vit të deklaruar në mënyrë të dokumentuar dhe të ligjshme në këto profesione.

Vlen të theksohet se, kjo shtesë nuk zëvendëson asnjë përfitim tjetër dhe nuk ndikon negativisht në përfitimet ekzistuese, siç janë shtesat për invaliditet, të ardhurat nga ndihma ekonomike apo përfitimet e mbetjeve familjare.

Për të përfituar këtë shtesë, qytetarët duhet të ndjekin një procedurë të thjeshtuar për aplikim pranë degëve të Sigurimeve Shoqërore, duke paraqitur: librezën e punës ose dokumentacionin e sigurimeve shoqërore, ku provohen vitet e punës në sektorin përkatës.

Një vërtetim nga ish-ndërmarrja apo institucioni punëdhënës, nëse është ende funksional, ose një deklaratë noteriale në mungesë të dokumentacionit të drejtpërdrejtë; karta e identitetit dhe dokumentacioni që vërteton statusin aktual të pensionistit.

Instituti i Sigurimeve Shoqërore ka bërë të ditur se aplikimet trajtohen me përparësi dhe se përfitimi fillon nga muaji pasardhës i aplikimit, me efekte të menjëhershme.

Kjo shtesë nuk është e përkohshme, por do të jetë pjesë e përhershme e pensionit mujor. Sipas të dhënave zyrtare, nga kjo skemë pritet të përfitojnë mbi 23,000 persona në të gjithë vendin, shumica prej të cilëve kanë kaluar tashmë moshën e pensionit dhe kanë nevojë për përkujdesje më të madhe sociale.

Për ta, çdo mijë lekë më shumë nuk është vetëm lehtësim ekonomik, por një shenjë e qartë se shteti e njeh dhe vlerëson punën e tyre.

Ky zhvillim vjen si pjesë e një pakete më të gjerë për drejtësi sociale në sistemin e pensioneve dhe përbën një hap të rëndësishëm në drejtim të balancimit të kontributit dhe shpërblimit në fund të jetës aktive. Në thelb, është një reflektim i vonuar institucional, por thelbësor, për kategoritë që për shumë vite kanë qenë të harruara.

Në rrëfimet e vetë minatorëve, shpesh gjen fjalë si “sakrificë”, “pluhur”, “errësirë”, “rrezik” dhe “dëshmorë të punës”.

Në këtë kuptim, kjo shtesë nuk është thjesht një përmirësim teknik i një skeme përllogaritjeje. Është një akt moral, njerëzor dhe politik, që e kthen vëmendjen tek ata që i kanë dhënë shumë këtij vendi, por që për shumë kohë nuk kanë marrë mbrapsht atë që u takon.

Kjo skemë nuk është vetëm një kompensim moral dhe simbolik, por një përfitim real dhe i qëndrueshëm financiar, i cili ndryshon për çdo individ në bazë të historikut të tij të punës.

Për mijëra pensionistë që jetojnë me kufizime ekonomike, kjo shtesë vjen si një mbështetje jetike dhe është një shembull i mirë i asaj se si politika sociale mund të jetë konkrete, e drejtpërdrejtë dhe e bazuar në kontributin real të çdo qytetari.

Libreza e punës ose dokumentacioni i sigurimeve shoqërore, ku provohen vitet e punës në sektorin përkatës.

Një vërtetim nga ish-ndërmarrja apo institucioni punëdhënës, nëse është ende funksional, ose një deklaratë noteriale në mungesë të dokumentacionit të drejtpërdrejtë.

Karta e identitetit dhe dokumentacioni që vërteton statusin aktual të pensionistit.

Minatorët: për çdo vit pune të siguruar si minator, pensionit bazë i shtohet 1%. Pra, nëse një person ka 20 vite si minator, do të marrë 20% më shumë se pensioni i tij bazë.

Naftëtarët dhe metalurgët: për çdo vit pune të siguruar në këto profesione, pensionit bazë i shtohet 0.6%. Pra, një naftëtar me 25 vite pune do të përfitojë një shtesë totale prej 15%.

Nëse një minator ka një pension bazë prej 22,000 lekësh në muaj dhe ka punuar 25 vite në minierë, llogaritja do të jetë:

22,000 lekë x 25% = 5,500 lekë shtesë, që do të çojë pensionin total në 27,500 lekë në muaj.

Nëse një naftëtar ka pension bazë 20,000 lekë dhe ka 30 vite pune në sektorin e naftës, përllogaritja është:

20,000 lekë x 18% = 3,600 lekë shtesë, që përkthehet në një pension total prej 23,600 lekë në muaj.

The post Vendimi i qeverisë/ Pensionet, si përfitohet shtesa për minatorët, naftëtarët dhe metalurgët, procedura dhe dokumentet e nevojshme appeared first on Albeu.com.

Mbrëmjen e djeshme, skuadra nga Kazakistanit ia besoi penalltinë në minutat e fundit një 16-vjeçari në Champions League.

Skuadra e Kairat Almaty, mbrëmë shënoi fitore 1-0 ndaj Slovan Bratislava, në ndeshjen për parakualifikim në Ligën e Kampionëve.

Në minutat e fundit, u akordua një penallti për ekipin vendës.

Pikërisht për këtë penallti po diskutohet shumë, pasi e konkretizoi një 16-vjeçar.

Skuadra nga Kazakistani, ia besoi këtë 11-metërsh një lojtari që është vetëm 16-vjeçar, Dastan Satpaev, i cili po e zhvillon sezonin e tij të fundit në Kairat.

Sulmuesi edhe pse i ri, në sajtin “Transfermarkt” ka vlerën prej 1.8 milionë euro, kurse në sezonin tjetër do luajë te Chelsea U-21.

 

🇰🇿 Dastan Satpaev (16) scores from the spot for FC Kairat against Slovan Bratislava in the UEFA Champions League Third Qualifying Round (1st leg).
Being trusted to take such a high-pressure penalty at just 16 says a lot about his character – the club clearly believes in him. pic.twitter.com/ZAwCar6Cvz

— Kazakhstan Football Scout🇰🇿 (@scout_kazakh) August 6, 2025

The post Penalltia vendimtare në Champions League i besohet një 16-vjeçari, shihni ku e dërgon topin (VIDEO) appeared first on Albeu.com.

Lionel Mesi dhe Kristiano Ronaldo, dy nga lojtarët më të mëdhenj në histori. Dueli më i madh i të gjitha kohërave në këtë lojë të bukur (futbolli).

Një rivalitet që filloi në vitin 2009, me nënshkrimin e portugezit për Realin e Madridit dhe që, deri më sot, vazhdon pavarësisht se të dy janë më shumë se 12,000 kilometra larg njëri-tjetrit.

Jo në të njëjtën masë si në vitet e arta, sigurisht, me dy rivalët historikë të futbollit spanjoll në kulmin e tyre dhe me “Topin e Artë” të ndarë mes njëri-tjetrit për vite me radhë, liderët brenda dhe jashtë fushës.

Por ata lënë një shembull të mirë tani, në muzgun e karrierës së tyre, talenti dhe etja e tyre nuk janë zbehur pavarësisht se janë në të 40-at dhe larg ligave kryesore.

Deri kur? Kjo është pyetja që janë të shumtë ata që po bëjnë.

Kristiano Ronaldo, po shënon gola në Arabinë Saudite dhe Mesi po bën të njëjtën gjë në Shtetet e Bashkuara, me të parin që fitoi një tjetër titull me Portugalinë – Ligën e Kombeve – një muaj më parë dhe të dytin që ka fituar Kupën e Botës dhe Kupën e Amerikës në dy vjet e gjysmë të fundit.

Portugezi do të hyjë në sezonin e tij të 24-të si profesionist, ndërsa argjentinasi është në të 22-tin. Kjo nuk është asgjë.

Data e parë e shënuar me të kuqe për të dy është Kupa e Botës 2026, e cila do të mbahet në Shtetet e Bashkuara, Meksikë dhe Kanada verën e ardhshme.

Do të ishte e gjashta për të dy – një rekord i të gjitha kohërave – dhe mund të jetë kulmi perfekt i karrierave të tyre legjendare … megjithëse realiteti sot është disi i ndryshëm, veçanërisht në rastin e portugezëve.

Kristiano, sfida e 1,000 golave dhe djali i tij – Këtë verë, pavarësisht shumë zërave për një largim të mundshëm nga Al Nasr, Kristiano Ronaldo nënshkroi një mega-kontratë të re deri në vitin 2027 — ai do të fitojë pothuajse gjysmë milioni në ditë – duke konsoliduar pozicionin e tij si pionier në futbollin arab dhe me objektivin e qartë të Kupës së Botës të vitit të ardhshëm. Golashënuesi portugez ka synimin të arrijë 1,000 gola.

Ai aktualisht ka 939, 61 larg këtij rekordi. Ai ka shënuar 99 gola për klubin saudit në tre sezone – një mesatare prej 33 për sezon – kështu që nëse vazhdon me atë mesatare, mund të arrijë shifrën e ëndrrave… të gjitha pa llogaritur ndeshjet e tij për ekipin e tij kombëtar.

Dhe nëse arritja e një mijë golave përbën një motivim të jashtëzakonshëm për “El Bicho”, të luajë me të birin nuk është më pak e tillë. Lojtari nga Madeira e ka pranuar gjithnjë se të luajë me djalin e vet është një nga ëndrrat e tij dhe sot kjo nuk është aspak utopi.

Kristiano Xhunior, aktualisht luan për Al-Nassr U-15 dhe ka debutuar tashmë në sistemin e të rinjve të Portugalisë, kështu që nuk do të ishte e pabazë të mendohej t’i shihje të dy duke luajtur për ekipin e parë të klubit arab në një moment.

Pyetja është nëse kjo do të kishte më shumë të bënte me performancën në futboll apo si një imazh me ndikim për sportin, ngjashëm me LeBron Xhejms dhe djalin e tij Broni me Lakers.

Mesi, Kupa e Botës dhe një fund i paparashikueshëm – Sa i përket yllit nga Rozario, realiteti i tij është se kontrata me Inter Majamin skadon më 30 dhjetor 2025.

Megjithatë, negociatat janë duke u zhvilluar aktualisht për të zgjatur kontratën e tij për të paktën një vit tjetër, duke i lejuar atij të vazhdojë të garojë dhe të arrijë në Kupën e Botës me ekipin kombëtar argjentinas në formën më të mirë.

Megjithatë, klubi nga Florida dëshiron të rinovojë kontratën e tij derisa Mesi ta shohë të arsyeshme dhe të ndihet mjaftueshëm i fortë. 874 gola dhe 388 asiste janë shifrat e tij stratosferike sot, me 46 tituj dhe tetë “Topa të Artë” në karrierën e tij midis Barcelonës, PSG-së, Argjentinës dhe Inter Majamit.

Këto shifra vazhdojnë të rriten javë pas jave në “MLS”, por ai përballet me një të ardhme shumë të pasigurt në planin afatmesëm.

Kupa e Botës — e cila do të mbahet gjithashtu në Shtetet e Bashkuara duket të jetë skena madhështore për lamtumirën e tij. Të paktën, për lamtumirën e tij me ekipin kombëtar… dhe kush e di, ndoshta edhe për karrierën e tij në klube. Nëse konfirmohet rinovimi, i cili do të zgjasë deri në fund të vitit 2026, çdo skenar duket i mundur.

Kishte shumë spekulime për një rikthim te Barcelona apo edhe te Neëell’s Old Boys, klubi ku ai filloi si fëmijë. Megjithatë, ai vetë rrëfeu vitin e kaluar se Inter Majami do të ishte klubi i tij i fundit, kështu që gjithçka tregon për një tërheqje në moshën 39 vjeç, pasi të mbrojë kurorën e fituar në Katar me kombëtaren e vendit të tij.

Dhe pastaj çfarë? – Kur të dy “kanibalët” të varin këpucët në gozhdë, futbolli do të jetë pak më pak futboll pa të dy yjet, megjithëse të dy synojnë të mbeten të lidhur ngushtë me sportin në fund të fundit.

Kristiano Ronaldo, ka shprehur vazhdimisht se do të donte të ishte president i një klubi dhe se, për momentin, nuk e sheh veten si trajner.

Përveç një roli të mundshëm si ambasador për futbollin arab, lojtari portugez ka një strukturë të rëndësishme biznesi me investime në hotele, veshje, kinema, tenis padel, klinika flokësh dhe madje edhe filma.

Messi ka qenë më i rezervuar dhe nuk ka hyrë në shumë detaje kur është pyetur për këtë, përveçse ka theksuar se do të donte të kalonte më shumë kohë cilësore me familjen dhe miqtë e tij.

Megjithatë, aktualisht, ai ka aksione në disa biznese në sektorët e pasurive të paluajtshme, hotelerive dhe modës.

The post Kristiano dhe Leo, deri kur? Përpara me sfidat e tyre të fundit dhe “daljen në pension” në horizont appeared first on Albeu.com.

Këtë të enjte, në Gjykatën e Vlorës, do të zhvillohet seanca  për masën e sigurisë ndaj 4 personave që u arrestuan së bashku me Flodian Plakun, i cili ishte në kërkim për vrasjen e Gentian Bejtjas.

Tre prej tyre akuzohen se e ndihmonin të kërkuarin e drejtësisë, ndërsa i katërti që u gjet nën shoqërinë e Flodian Plakut ishte i armatosur me pistoletë.

Albano Lapshi, Ligor Doko dhe Armand Dano, akuzohen për përkrahje të autorit të krimit. Bashkë me Pole Qorrin u kap edhe Julian Aliaj, i armatosur me pistoletë. Aliaj ka qenë më parë i dënuar për trafik droge.

Të katërt u kapën së bashku në Orikum me Flodian Plakun, i njohur edhe si Pole Qorri.

Ky i fundit strehohej në hotelin e Ligor Dokos. Albano Lapshi i dërgonte ushqim Flodian Plakut, kurse Armand Dano nga Shkodra ishte berberi i tij.

Në ditën e ndërhyrjes dhe arrestimit, policia ndoqi Albano Lapshin, personi që i çonte ushqimin ne hotel, si dhe berberi Armando Dano me origjinë nga Shkodra.

Kujtojmë se Flodian Plaku, u la në arrest në burg dy ditë më parë nga Gjykata e Tiranës. Ai akuzohet për vrasjen e Gentian Bejtjas, më 15 Mars 2024, në banesën e tij në Larushk të Fushë-Krujës.

The post U arrestuan me Flodian Plakun, Gjykata e Vlorës jep masat e sigurisë për 4 persona (EMRAT) appeared first on Albeu.com.

Sezoni i katërt i “Big Brother VIP Kosova”, po ngjall gjithnjë e më shumë kureshtje, dhe një takim i pazakontë i zhvilluar sot në Prishtinë, ka ndezur spekulimet për një emër me peshë ndërkombëtare që mund t’i bashkohet spektaklit.

Në qendër të vëmendjes ka qenë stilisti Valdrin Sahiti, i cili është parë në një takim me moderatorin dhe autorin e BBVK, Alaudin Hamiti, si dhe producenten Olsa Muhameti.

Për çfarë bëhej fjala?

Spekulimet janë të shumta – a do të jetë Sahiti një prej banorëve VIP të sezonit të ri?

Apo do të ketë një rol tjetër në format, si opinionist apo ndoshta pjesë e një elementi të ri surprizë që do prezantohet për herë të parë?

 

Për momentin, asgjë nuk është konfirmuar zyrtarisht, por burime nga afër produksionit thonë se përgatitjet kanë hyrë në një fazë intensive, dhe emrat surprizë nuk do të mungojnë.

Spektakli, që vazhdon të jetë më i ndjekuri në tregun shqiptar, premton një sezon me ndryshime, lojë të fortë dhe figurë të re publike që pritet të sjellin dinamika të reja.

Për më shumë… mbetet të pritet.

The post Një personazh me famë ndërkombëtare, njihuni me banorin e mundshëm të “Big Brother VIP” për këtë sezon (EMRI) appeared first on Albeu.com.

Ditën e djeshme, një ngjarje tragjike ka ndodhur në një subjekt minerar në Bulqizë, ku humbi jetën 66-vjeçari F.V., si pasojë e rënies së një masivi shkëmbor në galeri.

Policia ka arrestuar në flagrancë pesë punonjës të stafit teknik të minierës, të dyshuar se nuk morën masat e nevojshme për sigurimin e kushteve të punës.

Të arrestuarit janë Njazi Përkola, Besnik Çupi, Ferit Truka, Ervis Kadiu dhe Edmond Xhafa. Hetimet paraprake tregojnë se neglizhenca në respektimin e rregullave të sigurisë ka çuar në pasojën fatale.

Ngjarja ka tronditur opinionin publik dhe ka rikthyer vëmendjen te kushtet e punës në minierat shqiptare.

Njoftimi i policisë:

Bulqizë

Nuk morën masa për sigurimin e kushteve të mbrojtjes në subjektin minerar ku humbi jetën dje, shtetasi F.V., arrestohen 5 punonjës të stafit teknik.

Në vijim të veprimeve hetimore dhe operacionale të kryera me qëllim zbardhjen e përgjegjësive dhe rrethanave, në lidhje me ngjarjen e djeshme, të ndodhur në një subjekt minerar në Bulqizë, ku humbi jetën shtetasi F. V., 66-vjeç, dyshohet se si pasojë e rënies së një masivi shkëmbor, gjatë punës në galeri, shërbimet e Komisariatit të Policisë Bulqizë arrestuan në flagrancë shtetasit Nj. P., 46-vjeç, B. Ç., 68-vjeç, F. T., 61-vjeç, E. K., 35-vjeç dhe E. Xh., 51-vjeç, të gjithë punonjës të stafit teknik të subjektit minerar.

Nga hetimet e deritanishme rezulton se këta shtetas, me veprimet ose mosveprimet e tyre, nuk kanë marrë masat e duhura për garantimin e kushteve të sigurimit teknik të punës në subjektin minerar.

Materialet procedurale iu referuan Prokurorisë së Dibrës, për veprime të mëtejshme, për veprën penale “Shkelja e rregullave të mbrojtjes në punë”, me pasojë vdekjen.

The post Vdekja e minatorit në Bulqizë/ Arrestohen 5 punonjës të stafit teknik: Nuk morën masa për sigurimin e kushteve (EMRAT) appeared first on Albeu.com.