Inspektori i IMT-së së Tiranës, Gerald Fuçia, është lënë në burg me vendim të Gjykatës së Posaçme kundër Korrupsionit dhe Krimit të Organizuar, në kuadër të një hetimi të nisur nga SPAK për korrupsion në lidhje me një tendë të vendosur pa leje, në zonën e Kombinatit në Tiranë.

Gjyqtarja Etleva Deda, pranoi kërkesën e prokurorit të SPAK, Sotir Kllapi, dhe caktoi ndaj Fuçias masën e sigurisë “arrest me burg”.

Në seancën me dyer të mbyllura, inspektori Fuçia mohoi çdo përfshirje në ngjarje, duke deklaruar:

“Nuk e njoh fare qytetarin, as e kam kontaktuar, as takuar, as nuk di gjë për ryshfetin. Deklaroj me përgjegjësi morale dhe ligjore se nuk kam lidhje me këtë histori. E ushtroj detyrën me seriozitet dhe profesionalizëm, si në dhjetëra raste të tjera të aksionit për lirimin e hapësirave publike”.

Avokatët e tij kërkuan një masë më të butë sigurie, deri në qartësimin e plotë të rrethanave.

Ndërkohë, për të njëjtën çështje, është vetëdorëzuar në polici edhe inspektori tjetër i IMT-së, Klajdi Zhilla, i cili ishte shpallur në kërkim.

Ai u paraqit mbrëmë në ambientet e Policisë së Tiranës, i shoqëruar nga avokati i tij.

Zhilla dyshohet për korrupsion pasiv dhe, në deklarimin paraprak, ka pretenduar se nuk ishte në dijeni se ishte në kërkim, duke shtuar se këtë e kishte mësuar vetëm nga mediat.

Sipas burimeve zyrtare, hetimet për këtë rast nisën nga Policia e Tiranës dhe më pas u referuan pranë SPAK.

Denoncimi është bërë nga një qytetar, pronar lokali, i cili ka kallëzuar se dy inspektorët i kishin kërkuar 1,000 euro ryshfet për një tendë të vendosur pa leje.

The post Lihet në burg inspektori i IMT-së Tiranë, çfarë deklaroi Gerald Fuçia para gjykatës appeared first on Albeu.com.

Këngëtarja e njohur Besa Kokëdhima po martohet. Prej kohësh ka folur për jetën e saj private, duke bërë me dije se është e lumtur dhe më e dashuruar se kurrë.

Ndonëse një ndër personazhet më diskrete kur vjen puna te jeta sentimentale, gjithnjë këngëtarja e ka pranuar hapur raportin e saj të konsoliduar tanimë.

Dhe më në fund gjithçka duket gati për dasmën e shumëpritur. Këngëtarja ka bërë gati të gjitha detajet, për martesën që do të bëhet me 14 shtator.

Edhe në ditën e saj të shënuar, artistja ka preferuar që të mbajë gjithçka sa më diskrete. Ajo dhe Tedi, do t’i thonë njëri-tjetrit “Po”, në një lokacion shumë të veçantë, larg Tiranës.

 

 

Dasma është projektuar të jetë sa më private, me shumë pak miq dhe personazhe të famshëm. Vetë këngëtarja ka kërkuar që të ftuarit të mos postojnë asgjë nga dasma e saj, duke preferuar që edhe ceremonia të kalojë pa u zbuluar në media, apo në rrjetet sociale.

Ajo dhe Tedi, janë në një lidhje të konsoliduar prej vitesh tanimë, ndonëse e jetojnë këtë histori dashurie larg syve të publikut.

 

 

Për të gjithë ata që nuk e njohin, Tedi është një emër i njohur si ekspert juridik dhe ka preferuar që të mbajë një profil të ulët edhe në profesionin e tij. Pas disa vitesh në një lidhje, çifti më në fund ka vendosur që të bëjë edhe dasmën e tyre.

Me miqtë e ngushtë dhe të afërmit e tyre, çifti ka zgjedhur një resort lart kryeqytetit për të festuar dashurinë. Disa nga emrat më të njohur të skenës, do të jenë të ftuar për të performuar live në festë. E deri me 14 shtator, mendojmë se do të jetë e pashmangshme, që disa foto, apo pamje nga ceremonia mos të ‘rrëshqasin’ në rrjetet sociale.

Në një dalje të saj mediatike, Besa rrëfeu se është më e dashuruar se kurrë dhe se partneri i saj është mbështetja më e madhe në ditët e ngarkuara.

“Kur jam e stresuar, ai është i vetmi që më qetëson. Kuptimi i jetës për mua është dashuria”, – u shpreh këngëtarja, duke treguar se ndjenjat janë në qendër të gjithçkaje për të. Por surprizat nuk përfunduan këtu. Besa la të kuptohet se dasma është shumë afër. “Po, themi që së shpejti do të kemi dasmë”, – tha ajo me entuziazëm, duke shtuar se do të ketë më shumë se një fustan. “Jam gocë serioze, një herë në jetë dua të martohem. Nuk dua të më mbetet gjë peng”, – përfundoi artistja.

Nga ana tjetër, ajo theksoi se gjithmonë ka pasur frikë për të marrë një vendim kaq të rëndësishëm si martesa. “Kam frikë të futem tek diçka nga e cila s’dal dot”, – tha ajo.

 

The post Besa Kokëdhima martohet së shpejti, zbulohen detaje nga dasma private dhe ceremonia jashtë Tiranës/ Kush është djali që i ka fituar zemrën këngëtares? appeared first on Albeu.com.

Në një postim në “Facebook”, Ervin Salianji, ka akuzuar Edi Ramën se e përdor drejtësinë si një vegël politike dhe e trajton si pronë personale.

Salianji denoncon kapjen e sistemit gjyqësor nga qeveria, që sipas tij, jo vetëm që nuk e kontrollon pushtetin ekzekutiv, por i shërben atij duke heshtur për ndërtimet pa leje, korrupsionin dhe abuzimet me ligjin.

Ai i bën thirrje partnerëve ndërkombëtarë të reagojnë jo vetëm kur akuzat vijnë nga opozita, por edhe kur vetë kreu i qeverisë minon institucionet që ata kanë ndihmuar për të ndërtuar.

Postimi:

Edi Rama bën sikur shqetësohet nga drejtësia që kontrollon, kur ndonjë gjyqtar i rrallë nuk i është nënshtruar plotësisht, ndërkohë që pasi e ka kapur sistemin, i përdor dhe sillet me prepotencë duke i trajtuar institucionet e drejtësisë si lecka.

Shumica dërrmuese e gjyqësorit sillen si vartës të qeverisë, jo si pushtet i pavarur kontrolli e balance!

Është përgjegjësi e gjyqësorit që ka lejuar qeverinë në batërdinë urbanistike, ndërtimet pa leje dhe korrupsionin që i ka ushqyer ato. Qeveria i ka lejuar për interesa politike e korruptive dhe sot i përdor politikisht me aksione propagandistike.

Në vend që të kontrollojë pushtetin ekzekutiv, drejtësia ka pranuar të përdoret si armë kundër kundërshtarëve dhe si mburojë për klientelën e qeverisë. Për pasojë, ajo degradohet publikisht nga kryeministri dhe ka frikë dhe ti reagojë.

Ky është portreti më i qartë i kapjes së shtetit dhe shkatërrimit të pavarësisë së institucioneve.

Qytetarët shqiptarë dhe opinioni publik kane pritur reagimin e partnerëve ndërkombëtarë që kanë investuar për ndërtimin e institucioneve të reja të drejtësisë: a do të ketë një reagim të fortë kur Rama i godet, i poshtëron dhe i minon institucionet e drejtësisë? Apo standardet e reagimet vlejnë vetëm kur opozita denoncon abuzimet?

 

The post Ervin Salianji: Rama e ka kapur drejtësinë dhe e përdor si armë kundër kundërshtarëve appeared first on Albeu.com.

Inspektori i Inspektoratit të Mbrojtjes së Territorit, Klajdi Zhilla, i shpallur në kërkim në kuadër të një operacioni të përbashkët të Policisë së Tiranës dhe Prokurorisë së Posaçme, është vetëdorëzuar mbrëmjen e së premtes në ambientet e Policisë së Tiranës.

Zhilla u paraqit i shoqëruar nga avokati i tij mbrojtës, ndërsa ndaj tij rëndon akuza për korrupsion pasiv, të personave që ushtrojnë funksione publike.

Gjatë dëshmisë paraprake, ai ka deklaruar se nuk ishte në dijeni se ishte shpallur në kërkim dhe se këtë informacion e kishte marrë nga mediat.

Ndërkohë, këtë të shtunë në orën 10:00, në Gjykatën e Posaçme, ka nisur seanca për vlerësimin e masës së sigurisë ndaj inspektorit tjetër të IMT-së, Geraldo Fuçia, i cili u arrestua më herët në kuadër të së njëjtës çështje.

Sipas burimeve zyrtare, hetimet për këtë rast nisën nga Policia e Tiranës dhe më pas u referuan pranë SPAK, pasi një qytetar, pronar i një lokali, ka kallëzuar inspektorët duke i akuzuar se i kishin kërkuar 1,000 euro ryshfet për një tendë të vendosur pa leje.

The post Një mijë euro për një tendë/ Dorëzohet inspektori i IMT-së Klajdi Zhilla, kolegu i tij del para gjykatës appeared first on Albeu.com.

Aktiviteti fizik, ka një ndikim të jashtëzakonshëm në shëndetin e lëkurës dhe mund të ndihmojë në parandalimin e rrudhave, duke përmirësuar qarkullimin e gjakut dhe rritur furnizimin me oksigjen dhe lëndë ushqyese për qelizat e lëkurës.

Ushtrimi i rregullt stimulon prodhimin e kolagjenit, një proteinë që mban lëkurën të fortë dhe elastike, duke reduktuar shfaqjen e linjave të holla dhe rrudhave.

Po ashtu, aktiviteti fizik ndihmon në uljen e stresit, duke parandaluar rritjen e niveleve të kortizolit, një hormon që mund të dëmtojë kolagjenin dhe elastinën e lëkurës, duke kontribuar në plakjen e parakohshme.

Ushtrimet aerobike, si vrapimi dhe noti, rrisin qarkullimin e gjakut, duke ndihmuar në shpërndarjen e oksigjenit dhe lëndëve ushqyese në të gjithë trupin, përfshirë lëkurën, dhe kështu mund të rrisin ndjeshëm pamjen e lëkurës.

Aktiviteti fizik, gjithashtu ndihmon në rregullimin e nivelit të sheqerit në gjak, duke parandaluar glikacionin, një proces që dëmton fibrat e kolagjenit dhe përshpejton plakjen.

Ndërsa ushtrimet janë të dobishme për shëndetin e lëkurës, është gjithashtu e rëndësishme të kujdeseni për lëkurën pas aktivitetit, duke aplikuar produkte hidratues dhe mbrojtës nga dielli për të parandaluar dëmet nga ekspozimi i tepërt ndaj kushteve të jashtme.

Për më tepër, aktiviteti fizik ndihmon në kontrollin e peshës trupore dhe reduktimin e inflamacionit, faktorë që gjithashtu mund të ndikojnë në shëndetin e lëkurës dhe formimin e rrudhave.

The post Mos kini më dyshime! Ja si aktiviteti fizik ndikon te rrudhat appeared first on Albeu.com.

Në një Shqipëri ku çdo cep i “Instagram-it” ndriçon me dritat LED të “haulit” të fundit apo me filtrin e një dite “perfekte”, influencuesit kanë marrë një status që dikur u rezervohej vetëm VIP-ave klasikë.

Me një telefon në dorë dhe një audiencë të ndërtuar mbi një algoritëm, ata janë kthyer në motorë ekonomikë që prodhojnë të ardhura të konsiderueshme, tashmë edhe në objekt vëzhgimi të Administratës Tatimore…

Në rrjetet sociale shqiptare, çdo mëngjes fillon me një ”story”. Një kafe në dritë të mëngjesit, një “unboxing”, një urim me zë të ëmbël për ndjekësit, një bashkëpunim i koduar si dashuri e sinqertë për një produkt të ri.

Në sipërfaqe, ky është një ritual modern, një formë komunikimi e përditshme, intime dhe e padëmshme. Por pas këtij rrëfimi minimalist fshihet një realitet financiar shumë më i madh sesa duket: një ekonomi në hije, që funksionon nëpërmjet shikimeve, pëlqimeve dhe një audience që konvertohet në të ardhura të ndjeshme.

Në Shqipëri, ku shumica e të rinjve janë përdorues aktivë të rrjeteve sociale dhe ku tregu reklamues dixhital është rritur me mbi 25 për qind çdo vit pas pandemisë, fenomeni i influencuesve nuk është më një trend i pakicës, por një pjesë qendrore e mënyrës sesi konsumohet, reklamohet dhe shitet gjithçka, nga kremi për fytyrën te mendimi për veten.

Dhe po, shitet edhe “mendja”! Dhe megjithatë, për vite me radhë, këto të ardhura nuk janë përfshirë në logjikën fiskale të shtetit, duke krijuar një vakum të rrezikshëm: nga njëra anë kemi qytetarë që fitojnë dhjetëra mijë euro në vit; nga ana tjetër, një shtet që deri dje nuk dinte as ku t’i kërkonte.

Në njoftimin e disa muajve më parë nga Drejtoria e Përgjithshme e Tatimeve, i bazuar në verifikime me bankat, thuhej se mbi 33 milionë euro janë gjeneruar nga individët nëpërmjet platformave dixhitale si Meta, Facebook, YouTube, Google, etj.

Shifra është zyrtare, por në të vërtetë nuk përfaqëson të gjithë tregun, ajo është vetëm maja e një ajsbergu të të ardhurave të pamatshme, të cilat, për shkak të natyrës së decentralizuar dhe të paformalizuar të sektorit, nuk janë as të dokumentuara, as të kontrolluara.

Ky realitet po ndryshon. Për herë të parë, individët që gjenerojnë të ardhura nga platformat sociale janë ftuar të deklarojnë fitimet e tyre në formularin vjetor DIVA 2024.

E nëse për shumicën e profesionistëve të lirë, kjo datë ishte e pritur dhe e pranuar, për shumë influencues ajo përfaqësonte një dilemë ekzistenciale: të pranojnë se janë biznese dhe të hyjnë në sistem, apo të vijojnë të qëndrojnë në hijen e famës, pa llogari e pa përgjegjësi.

Anaid Kaloti, themelues i platformës “SHET Industry”, që ndjek nga afër zhvillimet e tregjeve kreative, shprehet se aktualisht, menaxhimi bëhet nga agjenci të mirëfillta, por edhe formalizimi total i tregut është çështje kohe.

“Ne jemi dëshmitarë të një realiteti të ri ekonomik që po e sfidon modelin tradicional të sipërmarrjes. Kur të ardhurat e një vajze që publikon një video ‘morning routine’ kalojnë të ardhurat e një biznesi të vogël që paguan qiranë, sigurimet dhe taksat, shteti nuk mund të mbyllë më sytë. E njëjta logjikë duhet të vlejë për të gjithë: nëse fiton, kontribuo”, – thotë ai.

Influencuesit janë bërë motorët më të fuqishëm të komunikimit tregtar dhe shpesh edhe kulturor. Ata ndikojnë në vendimet për blerje, në vlerat që promovohen, në mënyrën si të rinjtë e shohin veten, suksesin, trupin, modën dhe identitetin.

Dhe këtë ndikim e ushtrojnë pa ndonjë mbikëqyrje institucionale, pa trajnime për përgjegjësi sociale, pa etikë të detyrueshme. Ata janë një media alternative me ndikim masiv, por pa strukturë llogaridhënieje.

Tomi Kallanxhi, themelues i “Big Media Expert”, e artikulon më drejtpërdrejt këtë boshllëk: “Në çdo treg serioz, influencuesit nuk janë thjesht persona me shumë ndjekës, ata janë subjekte tregtare.

Ata kanë marrëveshje, kontrata, detyrime ligjore. Në Shqipëri, ndodh e kundërta. Fama perceptohet si e mjaftueshme për të justifikuar të ardhura të pamatshme. Kjo ka deformuar mënyrën sesi shihet puna, suksesi dhe përgjegjësia. Ka deformuar edhe tregun e agjencive të marketingut dixhital, jo të gjitha janë të formalizuara”, – pohon ai.

Problemi është se shumë influencues nuk janë thjesht të pandërgjegjshëm; ata funksionojnë në një ekosistem ku informaliteti është normë.

Pagesat për bashkëpunime shpesh bëhen “cash” ose përmes platformave të pallogaritura në sistemin tatimor shqiptar.

Një pjesë e tyre edhe me shkëmbime klering. Asnjë kontratë, asnjë faturë, asnjë deklarim. Po a është influenceri shqiptar shpesh viktimë e një sistemi të ndërtuar për të nxitur fshehjen dhe jo transparencën?

Në vendet perëndimore, ky është një debat i kaluar. Franca, Italia, Gjermania e kanë përfshirë prej kohësh industrinë dixhitale në sistemin e vet të tatimeve dhe së drejtës së punës.

Sipas ligjit të ri të 2024 të Bashkimit Europian, influencuesit janë të detyruar të etiketojnë qartë përmbajtjen e sponsorizuar, të deklarojnë partneritetet tregtare dhe të paguajnë kontribute sociale si çdo profesionist tjetër i pavarur. Në Shqipëri, kjo etikë është ende larg, duke qenë një sektor shumë i ri dhe i pastrukturuar.

Formalizimi i kësaj industrie nuk duhet të fillojë me frikë, por me edukim, thotë për “Monitor”, Selami Xhepa, ekspert i ekonomisë. Sipas tij, shteti nuk mund të vijë me gjoba pa ofruar më parë mjete për orientim dhe strukturim.

“Këta individë duhet të kuptojnë si të hapin një NIPT, si të lëshojnë një faturë, si të bëjnë vetëdeklarim online, si të përfshihen në skemat e sigurimeve shoqërore dhe shëndetësore.

Në të kundërt, çdo përpjekje për të përfshirë këtë sektor në sistemin tatimor do të dështojë dhe do të kthehet në një betejë kulturore, ku fama përplaset me burokracinë, dhe ku viktimizimi mediatik mbizotëron mbi logjikën fiskale”, – thotë z. Xhepa.

Anaid Kaloti, thekson se pagesa që merr një influencues nuk përcaktohet vetëm nga numri i ndjekësve, por nga një kombinim faktorësh që lidhen me korrektësinë ndaj publikut dhe mënyrën e komunikimit me të.

Ai nënvizon se ka rëndësi nëse një person është thjesht figurë publike apo ndërvepron realisht me audiencën, duke ndarë momente nga jeta e përditshme, si veshje, gatime, pushime apo evente të ndryshme.

Këto elemente e bëjnë marrëdhënien me ndjekësit më të afërt dhe më autentike, duke rritur vlerën e influencuesit në sytë e bizneseve.

Sipas tij, një tjetër tregues i rëndësishëm është analiza e numrave, që përfshin jo vetëm ndjekësit, por edhe nivelin e angazhimit, shikueshmërinë dhe ndikimin real që ka influencuesi në audiencë.

Këto matje ndihmojnë markat të kuptojnë nëse investimi në një bashkëpunim është i justifikuar dhe cilat janë përfitimet që mund të marrin në këmbim.

Z. Kaloti shton se figurat publike, veçanërisht ata që janë të mirënjohur në ekranet mediatike, zakonisht paguhen më shumë.

Arsyeja, sipas tij, lidhet me imazhin që kanë ndërtuar dhe reputacionin e tyre të konsoliduar, i cili e bën më të lehtë për markat të lidhin produktin ose shërbimin e tyre me një figurë të besueshme dhe të njohur nga një audiencë e gjerë.

Sipas Tomi Kallanxhit, drejtues i “Big Media Expert”, tregu i influencuesve në Shqipëri ka evoluar dukshëm me kalimin e kohës. Agjencitë aktualisht luajnë rol kyç si urë ndërmjet influencuesve dhe kompanive, duke strukturuar bashkëpunimet dhe duke ndihmuar në profesionalizimin e lidhjeve mes palëve.

Ai thekson se marketingu dixhital tashmë ka marrë pjesën më të madhe të “tortës” nga ai tradicional, kompanitë janë gjithnjë e më shumë të orientuara drejt këtij modeli.

Për këtë arsye, format e bashkëpunimit janë zhvilluar në paketa që përfshijnë story, postime dhe reels në Instagram, dhe pagesat variojnë nga 50 euro për një foto deri në mbi 5 000 euro për paketë.

Sipas z. Kallanxhi, pagesat nuk varen nga numri i ndjekësve, por nga reagimet që influencuesi gjeneron, specifikisht nga sa herë postimet u shfaqen ndjekësve në ekran gjatë një muaji.

Gjithashtu, është thelbësore që produkti të pasqyrojë audiencën e influencuesit; p.sh., një modele nuk është e përshtatshme për reklamimin e produktit për bebe, pasi audiencat duhet të përputhen për të maksimizuar efektivitetin, përfundon ai.

Pagesat për influencerët në Shqipëri

Foto e vetme në Instagram
Shpesh përdoret për promovime të shpejta dhe të drejtpërdrejta të produkteve ose shërbimeve. Çmimi fillon nga 50 euro dhe rritet në varësi të audiencës dhe nivelit të angazhimit.

Story të sponsorizuar
Një nga format më popullore, pasi lejon komunikim të shpejtë dhe interaktiv me ndjekësit. Pagesat variojnë zakonisht nga 50 deri në 150 euro për një story, me mundësi shtesë nëse përfshihet edhe link drejt produktit ose një seri storiesh.

Reels / Video të shkurtra
Shërbejnë për të treguar produktin në veprim, duke gjeneruar më shumë shikueshmëri organike. Çmimi zakonisht është 100 deri në 500 euro, në varësi të idesë kreative, kohëzgjatjes së videos dhe cilësisë së prodhimit.

Paketa të plota (postime + reels + story)
Për fushata të strukturuara marketingu, kompanitë zgjedhin paketa të kombinuara që ofrojnë ekspozim të vazhdueshëm. Këto paketa mund të arrijnë mbi 5 000 euro, sidomos kur përfshihet një figurë publike e njohur ose kur bashkëpunimi zgjat për disa javë.

Faktorët që ndikojnë në pagesë
Çmimet nuk varen vetëm nga numri i ndjekësve, por më shumë nga angazhimi real që gjeneron influencuesi (pëlqime, komente, shpërndarje) dhe përputhja e produktit me audiencën e tij. Një audiencë e përfshirë dhe e besueshme është çelësi për një bashkëpunim të suksesshëm./ Monitor

The post Nga “like” te ligji, audienca 33 milionë euro e VIP-ave shqiptarë të rrjeteve sociale, sa kushtojnë postimet dhe faktorët që ndikojnë në pagesë appeared first on Albeu.com.

Regjistrimet për nxënësit që do të nisin klasën e parë dhe të dhjetë në vitin shkollor 2025-2026, janë ende të hapura dhe do të vijojnë deri më 1 Shtator në platformën zyrtare e-Albania.

Ministrja e Arsimit, Ogerta Manastirliu, ka kërkuar nga prindërit që të përfundojnë procesin e regjistrimit brenda afatit, duke theksuar se është një procedurë e thjeshtë dhe e shpejtë.

“Njoftim i rëndësishëm për të gjithë prindërit – regjistrimet në klasat e para dhe të dhjeta janë të hapura në e-Albania deri më 1 Shtator. Ju lutem, përfundoni regjistrimin e fëmijëve tuaj brenda këtij afati. Është një proces që merr vetëm disa minuta”, u shpreh ministrja Manastirliu gjatë një vizite në shkollën e re “Gaqi Karakashi” në Kuçovë, një nga 30 shkollat e reja që do të hapin dyert më 8 Shtator.

Ministrja shtoi se sistemi i regjistrimit online përmes e-Albania, ka për qëllim lehtësimin e procedurave dhe shmangien e radhëve në shkolla, duke garantuar një proces transparent dhe të aksesueshëm për të gjithë.

The post Viti i ri shkollor/ Ogerta Manastirliu: Regjistrimet për klasat e para dhe të dhjeta, prindërit kanë afat deri në 1 Shtator appeared first on Albeu.com.

Mjeku gjinekolog Shkëlqim Balili, teksa ishte i ftuar në emisionin “Koha për t’u zgjuar” në News24, foli gjerësisht mbi rëndësinë e shëndetit riprodhues si tregues i shëndetit të përgjithshëm të njeriut.

Sipas tij, periudha riprodhuese është faza më vitale e jetës dhe energjia që ka trupi gjatë kësaj kohe është e pakrahasueshme me çdo periudhë tjetër.

“Njerëzit në moshë riprodhimi kanë një fuqi të pashtershme, ndryshe nga shumë specie bimore e shtazore që vdesin pas kësaj faze. Por pas riprodhimit, njeriu nuk ka më të njëjtën energji”, u shpreh Balili.

Gjithashtu, gjinekologu theksoi rëndësinë e ciklit menstrual si “një dhuratë e Zotit” për gratë, duke sqaruar funksionin që kanë hormonet gjatë këtij procesi.

“Në dy javët e para, estrogjeni luan rol vendimtar për identitetin gjinor dhe funksionet e tjera hormonale, ndërsa në fazën e dytë dominon progesteroni-hormoni i lumturisë, i cili përgatit trupin për një shtatzëni të mundshme”.

Ai shpjegoi edhe funksionin e hipotalamusit, i cili kontrollon temperaturën trupore, metabolizmin, sistemin hormonal dhe ruan aktivitetin seksual.

Balili ngriti shqetësimin për shëndetin riprodhues të meshkujve, duke theksuar se temperaturat e larta ndikojnë negativisht në prodhimin e spermatozoideve.

“Meshkujt nuk duhet të mbajnë të mbathura të zeza apo të ngushta, sidomos në temperatura të larta, pasi testet humbasin aftësinë riprodhuese nëse kalojnë 37.5°C”, tha ai.

Mjeku theksoi rëndësinë e edukimit seksual që në moshë të hershme, duke propozuar që të fillojë që në moshën 3-vjeçare. “Fëmijët duhet të dinë të thonë ‘JO’ dhe të raportojnë menjëherë për çdo shqetësim që lidhet me organet intime. Marrëdhëniet kërkojnë maturitet dhe nuk është normale të ketë aktivitet seksual në moshën 14 apo 15-vjeç”.

Balili paralajmëroi për rreziqet që vijnë nga ndërhyrjet njerëzore në natyrë dhe përdorimi i kimikateve.

“Jetojmë në një kohë kur gjithçka është artificiale. Plastika, kozmetika, pesticidet, detergjentët e përmbajnë ksenoestrogjenë – kimikate që imitojnë estrogjenin dhe dëmtojnë shëndetin e gruas”, shpjegoi ai.

Sipas mjekut, këto substanca lidhen me infertilitetin, dështimin e vezoreve, obezitetin dhe sëmundje kanceroze si kanceri i gjirit, vezoreve, mitrës dhe prostatës.

Balili kritikoi fort konsumin e ushqimeve të përpunuara dhe pijeve të gazuara nga të rinjtë, duke theksuar se këto janë burim kryesor i hormoneve të dëmshme dhe antibiotikëve.

The post Shëndeti riprodhues/ Flet mjeku gjinekolog: Rinia shqiptare po ushqehet keq, ja rreziku nga kimikatet dhe ndikimi te hormonet appeared first on Albeu.com.

Shtëpia në të cilën Marilyn Monroe kaloi ditët e fundit të jetës së saj, në lagjen Brentwood të Los Anxhelosit, është në rrezik të shembet, pasi pronarët aktualë, Brinah Milstein dhe Roy Bank, kanë ndërmarrë hapa për ta rrënuar ndërtesën historike.

Sipas një raportimi të Bloomberg, plani i tyre ka shkaktuar kundërshtime ligjore dhe ndërhyrje nga autoritetet lokale.

Milstein, vajza e një manjati pasurish të patundshme nga Cleveland dhe Bank, producent i televizioneve reality, blenë pronën historike në adresën 12305 Fifth Helena Drive vitin e kaluar, duke paguar 8.4 milionë dollarë në vitin 2023.

Kjo pronë ndodhet ngjitur me rezidencën e tyre ekzistuese, të cilën e zotërojnë që nga viti 2016.

Pas blerjes, çifti siguroi leje për prishjen e shtëpisë, por konservatorët kulturorë arritën të bindin autoritetet e Los Anxhelosit që të klasifikojnë ndërtesën si monument historik-kulturor, duke ndaluar përkohësisht çdo ndërhyrje ndërtimore.

Tashmë, Milstein dhe Bank presin një vendim nga Gjykata e Lartë e Qarkut të Los Anxhelosit, për të ditur nëse do të lejohen të vazhdojnë me planet e tyre për të bashkuar pronën me shtëpinë e tyre ekzistuese.

Megjithatë, statusi i monumentit historik, kufizon ndjeshëm të drejtat e tyre si pronarë.

“Shteti i Kalifornisë ka mijëra shtëpi ku kanë jetuar ose vdekur njerëz të famshëm”, deklaroi avokati i tyre, Peter Sheridan, për Bloomberg.

“A do të thotë kjo që çdo ndërtesë e tillë duhet të ruhet si ‘monument’? Sigurisht që jo”. Në padinë e paraqitur, ata pretendojnë se; “nuk ka asnjë provë konkrete që Monroe ka kaluar qoftë edhe një ditë aty”.

Marilyn Monroe’s last home faces demolition in battle over landmarkshttps://t.co/i3g1miPAkS pic.twitter.com/bnG7NM6ni0

— Edmonton Sun (@Edmontonsun) August 29, 2025

 

Megjithatë, faktet historike tregojnë ndryshe. Monroe e bleu shtëpinë për 75.000 dollarë në atë kohë, vlerë që sot do të barazohej me rreth 800.000 dollarë dhe ishte prona e parë që bleu vetë pas divorcit me Joe DiMaggio dhe Arthur Miller.

Gjatë qëndrimit të saj atje, ajo fitoi një Golden Globe dhe dha performancën e famshme “Happy Birthday, Mr. President” për John F. Kennedy.

Që nga vdekja e saj, shtëpia ka kaluar në duart e 14 pronarëve të ndryshëm, ndërsa janë bërë shtesa të shumta, përfshirë një dhomë rekreacioni dhe një studio.

Përballë presionit publik dhe interesit të madh turistik, çifti Milstein dhe Bank janë shprehur të hapur për të ruajtur ndërtesën, por kanë propozuar që ajo të zhvendoset në një vend publik.

Ata theksojnë se privatësia e tyre është cënuar rëndë, për shkak të fluksit të turistëve dhe përdorimit të dronëve, që mbërrijnë vazhdimisht për të fotografuar shtëpinë e ikonës së Hollywood-it.

 

The post Shtëpia e fundit e Marilyn Monroe në rrezik shembjeje/ Pronarët kërkojnë prishjen, por përballen me kundërshtime ligjore appeared first on Albeu.com.

Policia e Shtetit, ka finalizuar një tjetër fazë të operacionit ndërkombëtar të koduar “The Wanted”, në bashkëpunim me partnerët ndërkombëtarë dhe në kuadër të përpjekjeve të vazhdueshme për kapjen e personave në kërkim ndërkombëtar.

Falë informacionit të siguruar nga Departamenti i Policisë Kriminale dhe shkëmbimit të menjëhershëm të të dhënave mes Interpol Tiranës dhe Interpol Madridit, u bë e mundur lokalizimi, kapja dhe arrestimi në Spanjë i shtetasit Algert Zeneli., 25-vjeç, lindur në Laç, i shpallur në kërkim ndërkombëtar.

Ky shtetas, ishte i dënuar nga Gjykata e Shkallës së Parë e Juridiksionit të Përgjithshëm Shkodër, në vitin 2023, me masën e sigurisë “Arrest në burg”, për disa vepra penale të rënda, përfshirë “Kultivim i bimëve narkotike”, “Prodhimi dhe shitja e narkotikëve”, “Grupi i strukturuar kriminal”, si dhe “Kryerja e veprave penale nga organizata kriminale ose grup i strukturuar kriminal”.

Sipas hetimeve, Algert Zeneli, akuzohet se në bashkëpunim me persona të tjerë, ka qenë i përfshirë në kultivimin e 10 900 bimëve narkotike të llojit Cannabis Sativa, në territorin malor të fshatit Kir, njësia administrative Pult, dhe pranë zonës turistike të Thethit në Shkodër.

Interpol Tirana, në bashkëpunim të ngushtë me autoritetet spanjolle dhe Interpol Madridin, po vijon punën për përmbylljen e procedurave ligjore që do të mundësojnë ekstradimin e shtetasit Algert Zenelidrejt Shqipërisë, ku do të përballet me drejtësinë.

The post Ishte shpallur në kërkim ndërkombëtar, arrestohet në Spanjë 25-vjeçari shqiptar, ja për çfarë akuzohet (EMRI) appeared first on Albeu.com.

Kuvendi i Kosovës do t’i vazhdojë nesër (të shtunën 30 gusht) punimet në përpjekje për konstituimin e legjislaturës së nëntë.

Kështu, një ditë para tentimit të 60-të për konstituimin e Kuvendit, presidentja e Kosovës, Vjosa Osmani, u ka bërë thirrje partive parlamentare që të formojnë sa më shpejt Kuvendin dhe Qeverinë e re. Kryeministri në detyrë, Albin Kurti, shpreson që nesër të zgjidhet çështja e nënkryetarëve të Kuvendit.

“Kuvendi të konstituohet urgjentisht, po ashtu qeveria të zgjidhet urgjentisht. Çdo ditë e humbur është ditë e humbur për Kosovën, për popullin e saj, për perspektivën tonë euroatlantike, kështu që shpresoj që të gjendet një zgjidhje në përputhje me Kushtetutën sa më parë që të jetë e mundur”, ka thënë Osmani.

Votimi ndaras për nënkryetarët ka shkaktuar mospajtime në parlament dhe ka sjellë ngërçin e radhës, të cilin kryeministri në detyrë shpreson ta zgjidhin nesër.

“Besoj që më së miri do të ishte që të kryhet kjo punë nesër duke e përzgjedhur aty Nenad Rashiqin i cili e pranon Republikën e Kosovës, punon për institucionet e shtetit tonë dhe njëkohësisht është ministri i cili ka bërë më së shumti për komunitetin serb në vendin tonë”, ka deklaruar Kurti.

Ndërkohë, zyrtarët e Bashkimit Evropian i kanë bërë të ditur Kurtit se nuk do të zhvillojnë takime në ndërtesën e Qeverisë së Kosovës derisa vendi të ketë një ekzekutiv me mandat të plotë.

“Në përputhje me këtë aktgjykim dhe në interes të qëndrueshmërisë institucionale dhe respektimit të sundimit të ligjit, vizitorët e nivelit të lartë nga shtetet anëtare të BE-së dhe institucionet e BE-së do të përmbahen, përkohësisht, nga mbajtja e takimeve me kryeministrin në detyrë dhe ministrat brenda ndërtesës së Qeverisë së Kosovës, derisa të vijë një qeveri me mandat të plotë”, ka thënë Ambasadori i Bashkimit Evropian në Kosovë, Aivo Orav.

Letra e Bashkimit Evropian ka shkaktuar reagime të shumta me kritika ndaj kryeministrit në detyrë.

Zëdhënësi i Qeverisë në detyrë, Përparim Kryeziu, ka theksuar se takimet duhet të zhvillohen në ambientet e Kryeministrisë, duke shtuar se kjo nuk e ndalon mbajtjen e takimeve edhe jashtë zyrës së tij, me dakordimin e palëve.

“Kushdo që kërkon takim me kryeministrin në detyrë të Republikës së Kosovës, duhet të vijë në vendin ku punon kryeministri në detyrë i Republikës së Kosovës, gjithsesi kjo nuk do të thotë që nuk mban takime pune edhe jashtë zyrës së tij, por për këtë duhet të ketë dakordim të palëve”, ka thënë Kryeziu.

The post Mblidhet sërish Kuvendi i Kosovës/ A do të arrijnë deputetët ta konstituojnë Kuvendin? appeared first on Albeu.com.

Kryeministri indian Narendra Modi, tha të enjten se do të zhvillojë bisedime me presidentin rus Vladimir Putin dhe presidentin kinez Xi Jinping në Tianjin të Kinës.

Modi do të vizitojë Kinën të shtunën për takimin e 25-të të Këshillit të Krerëve të Shteteve të samitit të Organizatës së Bashkëpunimit të Shangait (SCO).

Në një postim në X, Modi tha se India ka luajtur “një rol aktiv dhe konstruktiv” në SCO.

“India do të vazhdojë të punojë me anëtarët e SCO-së për të adresuar sfida të ndryshme të përbashkëta”, tha ai.

“Unë gjithashtu do të takohem me Presidentin Xi Jinping, Presidentin Putin dhe udhëheqës të tjerë gjatë Samitit”.

SCO është një bllok ndërkombëtar sigurie që u krijua në vitin 2001 nga Kina, Rusia, Taxhikistani, Kirgistani, Kazakistani dhe Uzbekistani.

India dhe Pakistani u bënë anëtarë të plotë në korrik 2023. Grupi tani ka 10 anëtarë, përfshirë Iranin dhe Bjellorusinë.

Vizita e Modit në Kinë, vjen në një kohë kur marrëdhëniet Indi-SHBA janë të tensionuara, për shkak të tarifave prej 50% të Uashingtonit mbi importet indiane.

SHBA-të i vendosën Indisë tarifa prej 25% në fillim të gushtit, pasi bisedimet për një marrëveshje tregtare dështuan.

Një tjetër tarifë prej 25% iu vendos Nju Delhit si penalizim këtë javë, pasi India refuzoi të ndalonte blerjen e naftës ruse.

Marrëdhëniet e Nju Delhit me Pekinin, kanë qenë në përmirësim që nga tetori i vitit 2024, kur Modi dhe Xi zhvilluan bisedime në kuadër të samitit të BRICS në Kazan.

Marrëdhëniet u tendosën pas një përplasjeje kufitare në vitin 2020 që mori jetën e ushtarëve nga të dyja palët.

Kina ka mbështetur fuqimisht Indinë lidhur me tarifat e SHBA-së. “SHBA-të kanë vendosur tarifa deri në 50% ndaj Indisë dhe po kërcënojnë të vendosin më shumë”, tha javën e kaluar ambasadori i Kinës në Nju Delhi, Xu Feihong. Kina e kundërshton me vendosmëri këtë. Përballë akteve të tilla, heshtja ose kompromisi vetëm sa e trimëron ngacmuesin. Kina do të qëndrojë fort në krah të Indisë”.

Zyrtarë të lartë nga Moska, Pekini dhe Nju Delhi, kanë folur gjithashtu për ringjalljen e formatit trepalësh Rusi-Indi-Kinë (RIC), sipas të cilit takohen ministrat e jashtëm të tre vendeve.

The post SHBA vendosi tarifa 50% për importet nga India, Modi njofton bisedime me Putin dhe Xi Jinping appeared first on Albeu.com.

Në tregun e këmbimit valutor shqiptar, një dollar amerikan,do të blihet sot me 82.8 lekë dhe do shitet me 84.2 lekë.

Ndërkohë monedha evropiane euro, do blihet me 97 lekë dhe do shitet me 98.1 lekë.

Franga zvicerane, sot në tregun shqiptar do blihet me 103 lekë dhe do shitet me 104.3 lekë.

Ndërsa paundi britanik, do blihet me 111.5 lekë dhe do shitet me 112.8 lekë.

Më poshtë, po sjellim të dhënat e këmbimin valutor, për të gjitha monedhat e huaja:

 

The post Këmbimi valutor/ Çfarë po ndodh sot me monedhat e huaja? Ja me sa po blihen dhe shiten dollari dhe euro appeared first on Albeu.com.

Këngëtarja britanike Jessie J, ka njoftuar se do të shtyjë turneun e saj të ardhshëm për shkak të një ndërhyrjeje të dytë kirurgjikale që duhet të kryejë, pas diagnostikimit me kancer të gjirit.

Në një video të publikuar të enjten në “Instagram”, 37-vjeçarja, emri i vërtetë i së cilës është Jessica Ellen Cornish, tha se operacioni nuk është serioz, por duhet të kryhet brenda këtij viti, pikërisht në mes të datave të turneut.

“Fatkeqësisht, më duhet të bëj një operacion të dytë. Nuk është ndonjë gjë shumë serioze, por duhet ta kryej para fundit të vitit dhe për fat të keq, kjo bie pikërisht në mes të një turneu që e kisha planifikuar”, tha ajo.

Jessie J, bëri të ditur në qershor se ishte diagnostikuar me kancer të gjirit në fazë të hershme, ndërsa operacionin e parë e kreu në fund të atij muaji. Në korrik, ajo tregoi se nuk kishte përhapje të sëmundjes dhe se ndjehej mirë.

Megjithatë, ndërhyrja e dytë është e domosdoshme. Edhe pse nuk dha shumë detaje, ajo më herët kishte shpjeguar se synon një rikuperim estetik pas mastektomisë, për të rregulluar pamjen e gjoksit.

“Po jetoj momentin, po e përqafoj këtë rrugëtim dhe po shkoj me rrjedhën… më vjen keq. Jam e trishtuar… por duhet të shërohem, duhet të jem më mirë – dhe e di që kjo është zgjedhja e duhur”, shtoi ajo në mesazhin e saj.

Jessie J, konfirmoi se pjesa evropiane e turneut, e planifikuar fillimisht për tetor 2025, është shtyrë për prill 2026. Ndërsa turneu në SHBA, i planifikuar për nëntor, është anuluar për momentin, për shkak të pamundësisë për të gjetur një periudhë të përshtatshme me sallat koncertale.

“Ju lutem kini durim me ne për pjesën amerikane të turneut. Dua ta realizoj, por vetëm kur të jetë koha e duhur. Mund të ndodhë më vonë këtë vit… ose më herët, nuk e di ende”, u shpreh ajo.

Këngëtarja theksoi se po përpiqet të balancojë të gjitha sfidat që po përjeton, por se shëndeti është përparësia e saj absolute.

“Po mundohem të bëj më të mirën. Po përpiqem të menaxhoj të gjitha gjërat që po ndodhin në jetën time dhe energjinë që duhet të ndaj. Më duhet të shërohem. më falni, më vjen keq…”, përfundoi ajo.

The post Jessie J shtyn turneun botëror pas operacionit të dytë: Më falni, më duhet të shërohem appeared first on Albeu.com.

Këtë të shtunë, si pasojë e temperaturave të larta vendi ynë do të përfshihet nga stuhi-tropikale, duke bërë që vranësirat dhe shirat të jenë dominante.

Herë pas here, priten rrebeshe shoqëruar me stuhi të forta ere. Orët e pasdites do të vijojnë me vranësira dhe shira të dendura, duke rrezikuar përmbytje në disa qarqe të utësirës perëndimore.

Ndërsa shira mesatar priten në zonat malore Lindore. Gjatë nates do të ketë rënie të ndjeshme të intensiteti të reshjeve.

Temperaturat e ajrit do të ulen lehtë në mëngjes, por mesdita sjell rënie të ndjeshme të tyre duke u luhatur nga 14°C temperatura më e ulët, deri në 29°C vlera më e lartë në rang vendi.

Era do të fryjë e fortë si në tokë dhe në det, me shpejtësi mbi 65 km/h nga drejtimi kryesisht Jugor, për pasojë në brigjet detare do të gjenerohet dallgëzim 6 ballë.

The post Parashikimi i motit 30 Gusht 2025/ Rrebeshe shiu dhe stuhi tropikale appeared first on Albeu.com.

Ditën e sotme, një aksident tragjik me pasojë vdekjen e një 83-vjeçari, ka ndodhur në aksin Rrogozhinë-Kavajë.

Një këmbësor 83-vjeçar, u përplas nga një automjet, duke humbur jetën nga plagët e marra.

Policia njofton se drejtuesi i mjetit është shoqëruar për veprime të mëtejshme. Grupi hetimor ndodhet në vendngjarje dhe po punon për zbardhjen e plotë të ngjarjes.

Njoftimi i policisë:

Kavajë/Informacion paraprak

Rreth orës 14:00, në aksin Rrogozhinë-Kavajë, shtetasi R. M, ka përplasur me automjetin që drejtonte, këmbësorin, shtetasin M. H., 83 vjeç, i cili si pasojë e plagëve të marra ka humbur jetën.

Shtetasi R. M, është shoqëruar në Komisariat, për kryerjen e veprimeve të mëtejshme procedurale.

Grupi hetimor është në vendngjarje dhe po punon për sqarimin e rrethanave të aksidentit.

The post Aksident i rëndë në Kavajë, makina përplas për vdekje këmbësorin appeared first on Albeu.com.

SPAK, në fund të vitit pritet të ketë një drejtues të ri, ashtu siç e përcakton ligji që mandati i kreut të institucionit është trevjeçar dhe zgjedhja e tij bëhet në KLP.

Sipas ligjit, në KLP ka votim me kandidatura alternative. Votohet pasi kandidatët paraqesin platformat e tyre dhe bëhet zgjedhja e drejtuesit të ri të SPAK-ut.

Drejtuesi i parë i këtij institucioni në themelimin e tij ka qenë Arben Kraja. Më pas, tre vite më parë, më 16 dhjetor të vitit 2022 në krye të SPAK-ut, u zgjodh zoti Altin Dumani.

Dumani në tre vite shkroi epokën e tij në krye të këtij institucioni, jo vetëm si drejtues, por edhe si prokuror. Një epokë që le një standart të lartë profesional dhe integriteti.

Me aktet e forta dhe veprimet e pandalshme duke goditur krimin, kupolën e tij, por dhe politikën e korrupsionin, Dumani tregoi se me ndershmëri dhe duke zbatuar ligjin prokuroria mund të çojë në bankën e të akuzuarve edhe ata që quheshin “të paprekshmit”.

Përtej një vlerësimi që tashmë dihet publikisht, kjo për shkak edhe të mbështetjes së gjerë publike që ka zoti Dumani, SPAK-u do të ketë nevojë për standardin e tij, integritetin dhe profesionalizmin.

CNA ka shkruar shpesh për standardin “Dumani” në hetime, të cilin nuk e shohim te prokurorët e tjerë, pra nuk janë në lartësinë e tij profesionale apo integritetin e tij, por ashtu siç e ka deklaruar dhe vetë zoti Dumani flirtojnë me politikën apo kanë qëllime të tjera.

Gjithsesi, këto tre vite të Altin Dumanit në krye të SPAK-ut janë përtej të lavdërueshmes, ashtu siç e theksuam më sipër, janë një epokë, jo vetëm për institucionin, por edhe për Shqipërinë.

Janë një rrugë e shtruar drejt për të shkuar në BE, duke luftuar krimin dhe korrupsionin dhe mjafton që me vullnet, përkushtim dhe integritet profesional gjithçka ta bësh më të thjeshtë.

Kjo nuk është e rastësishme dhe nuk është thjesht puna e një hetuesi apo prokurori që qëndron dhe udhëzon pas një tavoline. Është një betejë e fortë, e vazhdueshme deri në gjunjëzimin e krimit dhe korrupsionit.

Janë me qindra persona të arrestuar dhe të shpallur në kërkim, grupet kryesore kriminale në vend janë të shpartalluara dhe nën akuzë krerët e tyre, politikanë nga zyrtarë më të lartë të shtetit, ish-Presidentë, ish-kryeministra, ministra, kryetarë bashkish, të cilët SPAK-u i ka çuar me akuza dhe u ka provuar veprat e tyre penale.

Altin Dumani, do të largohet nga kreu i SPAK-ut dhe institucioni do të ketë një drejtues të ri, por gjithsesi ai ngelet prokuror në këtë institucion.

Sipas të dhënave që ka siguruar CNA nga burime të saj jozyrtare, deri në momentin e tanishëm janë katër emra që mund të garojnë për kreun e këtij institucioni.

Adnan Xholi, është emri më i përfolur deri tani në garën për kreun e SPAK-ut.

 

Adnan Xholi dhe kreu i SPAK Altin Dumani

Xholi është një nga njerëzit që qëndron dhe e kemi parë shpesh në krah të majtë të Dumanit në komisionet parlamentare apo takimet e tjera publike.

Është një prokuror me eksperiencë dhe në një tjetër shkrim CNA do të sjellë CV-në e plotë të tij profesionale dhe deklarimin e tij të pasurisë.

Emri i dytë është Vladimir Mara.

Vladimir Mara, prokuror i SPAK-ut

Një tjetër prokuror në SPAK, një emër që pretendon. Në disa dosje dhe arrestime tëbujshme qëndron firma e tij.

Emri i tretë në garë është Klodian Braho, prokurori i dosjes “5D” dhe inceneratorit të Elbasanit.

 

Klodian Braho

Një nga pretendentët për kreun e SPAK-ut.

Emri i katërt, jo i fundit dhe jo më i parëndësishmi, është Anita Jella.

 

Anita Jella

Një prokurore me integritet dhe në rast se do të zgjidhej ajo për herë të parë SPAK-u do të kishte një zonjë në krye të institucionit.

Këto janë katër emrat që CNA ka mundur të zbulojë.

Në të tjera materiale ne do të sjellim profilet e kandidatëve, si dhe pasuritë e tyre deri në momentin që kanë kaluar vetingun.

Të katërt janë emëruar në kohë të ndryshme në SPAK. Dihet që mandati i një prokurori të SPAK-ut është 9 vjet dhe ka të drejtë të garojë për kryetarë.

Në rast se zgjidhet kryetar ka një mandate trevjeçar dhe më pas vazhdon prokuror i thjeshtë në këtë institucion deri në përfundimin e mandatit për t’u emëruar më pas në një tjetër Prokurori./ Marrë nga CNA

The post FOTO+EMRAT/ Kush janë katër kandidatët që kërkojnë vendin e Altin Dumanit? appeared first on Albeu.com.

Sinpotikani i njohur grek Sakis Arnaoutoglou, paralajmëron për fenomene të ekstreme të motit në orët e ardhshme në disa zona të Shqipërisë Perëndimore dhe Veriperëndimore.

Arnaoutoglou, në edicionin e tij të përditshëm në kanalin Youtube, thekson dhe lajmëron banorët e zonave në fjalë në Shqipëri, por edhe turistët e shumtë, se priten sasi të mëdha shiu gjatë së shtunës, stuhi të forta me vetëtima dhe breshër të fortë.

“Nga mesdita e së shtunës dhe më pas shikoni si bëhen të errëta këto zona në Shqipëri prandaj ju që jeni ose do të shkoni në Shqipëri duhet të dini se fenomenet kohore atje do të kenë edhe forcë dhe kohëzgjatje dhe ndoshta do të ketë përmbytje të mëdha. Kujdes të gjithë ju që ndodheni atje”, shprehet ai.

Gjithashtu, këto fenomene do të shfaqen edhe në Veri të detit Jon edhe në zonat perëndimore të Greqisë në kufij me Shqipërinë, nga Janina e deri në Follorinë.

Sinoptikani grek thekson se këto fenomene, do të zgjasin nga mesdita e së shtunës do të vazhdojnë gjatë pasdites, në orët e vona të natës , deri të dielën në mesditë.

Sipas tij, duhet pasur kujdes tek zonat e ulta më të prekshme për përmbytje nga ora dy pas mesdite deri në mbrëmje.

The post Meteorologu grek paralajmëron për stuhi të forta nesër në Shqipëri, ja zonat që rrezikojnë më tepër appeared first on Albeu.com.

SPAK, përfundon hetimet dhe dërgon në Gjykatën e Posaçme ish-presidentin Ilir Meta, ish-bashkëshorten e tij, Monika Kryemadhin, Pirro Xhixhën dhe Fatime Kryemadhin.

SPAK përfundon hetimet dhe dërgon në Gjykatën e Posaçme procedimin penal nr. 55 të vitit 2019.

Prokuroria e Posaçme kundër Korrupsionit dhe Krimit të Organizuar pas përfundimit të hetimeve, më 29.08.2025 ka dërguar për gjykim në Gjykatën e Posaçme të Shkallës së Parë, procedimin penal nr. 55/2019, në ngarkim të të pandehurve:

Ilir Meta, i akuzuar për kryerjen e veprave penale “Korrupsioni pasiv i funksionarëve të lartë shtetërore ose i të zgjedhurve vendorë” në 3 raste, dy prej të cilave të kryera në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim,“Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i çdo personi tjetër që ka detyrimin ligjor për deklarim”, parashikuar nga nenet 260 dhe 25, 287/2 dhe 257/a/2 të Kodit Penal.

Monika Kryemadhi, e akuzuar për kryerjen e veprave penale “Korrupsioni pasiv i funksionarëve të lartë shtetërore ose i të zgjedhurve vendorë” në dy raste të kryera në bashkëpunim,“Pastrimi i produkteve të veprës penale ose veprimtarisë kriminale” e kryer në bashkëpunim , “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i çdo personi tjetër që ka detyrimin ligjor për deklarim”, parashikuar nga nenet 260 dhe 25, 287/2 dhe 257/a/2 të Kodit Penal.

Pirro Xhixho, i akuzuar për kryerjen e veprës penale “Korrupsioni pasiv i funksionarëve të lartë shtetërore ose i të zgjedhurve vendorë” e kryer në bashkëpunim, parashikuar nga nenet 260 dhe 25 të Kodit Penal.

Ema Çoku, e akuzuar për kryerjen e veprës penale “Pastrimi i produkteve të veprës penale ose veprimtarisë kriminale” e kryer në bashkëpunim, parashikuar nga neni 287/2 i Kodit Penal.

Fatime Kryemadhi, e akuzuar për kryerjen e veprës penale “Pastrim i produkteve të veprës penale ose veprimtarisë kriminale” e kryer në bashkëpunim, parashikuar nga neni 287/2 i Kodit Penal.

Ky procedim penal është rezultat i një hetimi intensiv, i cili ka nisur në vitin 2019 dhe është zgjeruar në vitet pasardhëse në bazë të kallëzimeve të ndryshme. Në vitin 2024, të gjitha procedimet e veçuara u bashkuan në një të vetëm.

Hetimet zbuluan një sërë skemash korruptive, përdorimin e influencës dhe pushtetit politik me qëllim favorizimin e bizneseve të caktuara kundrejt shpërblimit të marrë apo të premtuar, pastrim të produkteve të veprës penale, dhe fshehje të pasurive apo mosdeklarimi i shpenzimeve të konsiderueshme në deklaratat periodike të pasurive.

Episodet e dokumentuara tregojnë subjektet e procedimit, të cilët në bashkëpunim mes tyre janë përfshirë në kryerjen e veprave penale të përmendura më sipër.

Episode të detajuara në lidhje me akuzat e ngritura dhe faktet penale të kryera nga të pandehurit, mund ti gjeni në Njoftimin për Shtyp, i publikuar në faqen zyrtare të SPAK: NJOFTIM PËR SHTYP Datë 21.10.2024 – spak.gov.al

Për hetimet e kryera, Prokuroria e Posaçme kundër Korrupsionit dhe Krimit të Organizuar, ka bashkëpunuar me autoritetet e Shteteve të Bashkuara të Amerikës, Austrisë, Italisë, San Marinos dhe Qipros.

Sqarim: Çdo person prezumohet i pafajshëm derisa nuk vërtetohet fajësia e tij me vendim gjyqësor të formës së prerë.

 

The post SPAK përfundon hetimet për Ilir Metën dhe Monika Kryemadhin, dërgon dosjen në Gjykatën e Posaçme appeared first on Albeu.com.

E ardhmja e Edon Zhegrovës nuk do të jetë në Itali, pavarësisht interesimit të gjatë të Juventusit. Sipas raportimeve të portalit francez Foot Mercato, sulmuesi anësor kosovar, 26-vjeç, ka arritur një marrëveshje me Olympique Marseille, të drejtuar nga trajneri italian Roberto De Zerbi.

Zhegrova pritet të firmosë një kontratë deri në vitin 2030 me klubin francez, ndërsa në orët në vijim do të finalizohen edhe detajet e fundit të marrëveshjes mes Marseille dhe Lille, klubit me të cilin lojtari është aktualisht nën kontratë.

Ky zhvillim duket se i jep fund interesit të Juventusit për talentin kosovar, duke bërë që bardhezinjtë të rishikojnë opsionet e tyre për repartin ofensiv.

Në këtë situatë, gjithnjë sipas mediave italiane, nuk përjashtohet mundësia që Nico Gonzalez të qëndrojë në Torino edhe për sezonin e ardhshëm.

The post Ishte pranë Juventusit, Zhegrova drejt kalimit në një tjetër skuadër appeared first on Albeu.com.