ROME, 10 gusht /ATSH-ANSA/ – Balerinë, prezantuese, aktore, këngëtare, trajnere tek emisioni televiziv ”Amici” i Maria de Filippi-t por mbi të gjitha, ende e konsideruar si “më e dashura e Italisë”, Lorella Cuccarini ”shuan” sot 60 qirinjtë e datëlindjes së saj.

Këtë vit, siç e donte fati, ka një sërë festimesh dhe përvjetorësh për të.

Pesë tetori do të shënojë edhe 40 vjet të karrierës së Lorella-s, që kur Pippo Baudo e prezantoi për herë të parë me audiencën e së shtunës në mbrëmje të Rai1 me ”Fantastico”.

Cuccarini është martuar prej 35 vitesh me Silvio Capitta-n, një producent muzikor dhe televiziv. Më të dashuruar se kurrë, ata kanë katër fëmijë të rritur: Sara, pothuajse 31 vjeç, Giovanni, 29 vjeç, dhe binjakët Chiara dhe Giorgio, 25 vjeç.

E lindur në Romë në vitin 1965, Lorella Cuccarini e filloi karrierën e saj në vallëzim në moshën nëntë vjeç, duke ndjekur shkollën e vallëzimit të Enzo Paolo Turchi-t.

Suksesi i saj i madh në media erdhi në mesin e viteve 1980: karriera e saj mori hov në vitin 1985, kur Baudo i ofroi rolin e balerinës së parë në ”Fantastico 6” (duke zëvendësuar Heather Parisi-n), ku u konfirmua edhe për vitin pasardhës.

Ndër rolet e saj përfshihen ”Festival”, ”Odiens”, ”Paperissima” dhe ”Buona Domenica”, një program i organizuar në vitin 1995 me Amadeus, me të cilin u ribashkua në vitin 2024 në skenën Ariston në Sanremo.

Një synim që ajo e kishte arritur tashmë në vitin 1993 përkrah Pippo Baudos dhe ku konkurroi edhe në vitin 1995 me këngën “Un altro amore no”.

Në vitin 2019, ajo debutoi si prezantuese e një programi të përditshëm: edicioni 2019-2020 i programit të lajmeve të pasdites ”La vita in diretta”, së bashku me Alberto Matano.

Përvoja e saj me programin përfundoi disi turbulente, me largimin e saj nga Rai.

Kështu, Cuccarini u rikthye në Mediaset, e zgjedhur nga Maria De Filippi si mësuese vallëzimi në shkollën ”Amici”.

Cuccarini gjithmonë e ka theksuar, në intervista, angazhimin e saj për ta ndarë këtë shkathtësi me të rinjtë.

”Në Amici përpiqem të jem pranë tyre, t’i motivoj, t’i mbroj dhe madje t’i qortoj nëse është e nevojshme. Por hapi më i rëndësishëm ndërmerret prej tyre përmes punës së tyre, por megjithatë forca dhe streha ime e sigurtë mbetet familja ime, … burri dhe fëmijët e mij”, thekson ajo. /os/

The post KULTURE – Lorella Cuccarini, ylli që magjeps publikun për dekada mbush 60 vjeç! appeared first on Agjencia Telegrafike Shqiptare.

KIEV, 10 gusht /ATSH-AA/ – Presidenti i Ukrainës, Volodymyr Zelenskyy, tha sot se Kievi nuk do të bëjë kompromis mbi çështjet territoriale gjatë negociatave për paqe me Moskën.

“Përgjigjja për çështjen territoriale të Ukrainës tashmë është në Kushtetutën e Ukrainës. Askush nuk do të devijojë nga kjo – dhe askush nuk do të jetë në gjendje të bëjë një gjë të tillë. Ukrainasit nuk do t’ia dhurojnë tokën e tyre pushtuesit”, tha ai në Telegram.

Deklarata e Zelenskyyt erdhi disa orë pasi presidenti amerikan, Donald Trump, njoftoi për një takim me homologun e tij rus, Vladimir Putin, më 15 gusht në Alaskë, me synimin për të diskutuar zgjidhjen e çështjes ukrainase.

Më herët, mediat raportuan se një nga kushtet e Trumpit për takimin ishte pjesëmarrja e Zelenskyyt, por këto raportime ende nuk janë konfirmuar zyrtarisht.

Ndërkohë, Zelenskyy paralajmëroi kundër marrjes së çdo vendimi në lidhje me Ukrainën pa përfaqësuesit e saj.

“Ukraina është gati për vendime reale që mund të sjellin paqe. Çdo vendim që është kundër nesh, çdo vendim pa Ukrainën, është njëkohësisht vendim kundër paqes”, theksoi ai.

Zelenskyy i përshkroi vendimet e marra pa Ukrainën si “të pajeta” dhe “të pazbatueshme”, duke theksuar se ato nuk do të arrijnë asgjë.

“Dhe ne të gjithë kemi nevojë për një paqe të vërtetë dhe të sinqertë. Paqe që njerëzit do ta respektojnë. Ne jemi gati të punojmë së bashku me presidentin Trump, së bashku me të gjithë partnerët tanë, për një paqe të vërtetë dhe, mbi të gjitha, të qëndrueshme”, tha ai.

The post KIEV – Zelensky: Nuk bëjmë kompromis mbi çështjet territoriale appeared first on Agjencia Telegrafike Shqiptare.

GAZA, 10 gusht /ATSH-ANSA/ – Ministria e Shëndetësisë e Gazës, ka deklaruar se në 24 orët e fundit, spitalet në Rrip kanë regjistruar pesë vdekje të reja nga uria dhe kequshqyerja, përfshirë dy fëmijë.

Shifra, sipas një deklarate të publikuar në Telegram, e çon numrin total të vdekjeve nga uria dhe kequshqyerja që nga fillimi i armiqësive në 217, përfshirë 100 fëmijë.

Zyrtarët e spitalit në Gaza theksuan gjithashtu se të paktën 17 civilë janë vrarë nga zjarri i ushtrisë izraelite (IDF) që nga agimi i sotëm në pjesë të ndryshme të Rripit, raporton agjencia palestineze e lajmeve Wafa.

Ndër këto viktima, 11 u vranë ndërsa prisnin ndihmë humanitare në pjesën qendrore dhe jugore të territorit. /os/

The post GAZA – Pesë vdekje nga uria në 24 orët e fundit, mes tyre edhe fëmijë appeared first on Agjencia Telegrafike Shqiptare.

BRUKSEL, 10 gusht /ATSH-ANSA/ – Rruga drejt paqes nuk mund të vendoset pa Ukrainën. Ukraina ka lirinë për të vendosur për fatin e saj, thuhet në deklartën e nënshkruar nga presidenti francez Emmanuel Macron, kryeministrja italiane Giorgia Meloni, kancelari gjerman Friedrich Merz, kryeministri polak Donald Tusk, presidentja e KE-së Ursula von der Leyen dhe presidenti finlandez Alexander Stubb në një deklaratë të përbashkët përpara takimit midis Trump dhe Putin.

”Negociatat kuptimplote mund të zhvillohen vetëm në kontekstin e një armëpushimi ose një reduktimi të armiqësive. Ne nënvizojmë angazhimin tonë të palëkundur ndaj sovranitetit, pavarësisë dhe integritetit territorial të Ukrainës”, theksojnë liderët europianë.

Deklarata e përbashkët u nënshkrua edhe nga kryeministri Britanik Keir Starmer. Britania e Madhe priti zyrtarë të lartë të BE-së dhe Ukrainës në samit, në të cilin mori pjesë edhe zëvendëspresidenti i SHBA-së J.D. Vance.

“Ne mbetemi të përkushtuar ndaj parimit që kufijtë ndërkombëtarë nuk duhet të ndryshohen me forcë. Vija aktuale e kontaktit duhet të jetë pika fillestare për negociatat”, shpjeguan udhëheqësit evropianë.

“Ne mirëpresim angazhimin e presidentit Trump për të ndaluar vrasjet në Ukrainë, për t’i dhënë fund luftës së Rusisë dhe për të arritur paqe dhe siguri të drejtë dhe të qëndrueshme për Ukrainën. Jemi të bindur se vetëm një qasje që kombinon diplomacinë aktive, mbështetjen për Kievin dhe presionin ndaj Moskës mund të jetë e suksesshme. Ne jemi të gatshëm ta mbështesim këtë punë diplomatikisht”, ushtarakisht dhe financiarisht”, theksojnë ata. /os/

The post BRUKSEL – Liderët evropianë: Rruga drejt paqes nuk mund të vendoset pa Ukrainën appeared first on Agjencia Telegrafike Shqiptare.

KIEV, 10 gusht /ATSH-AA/ – Presidenti ukrainas Volodymyr Zelensky akuzoi presidentin rus Vladimir Putin se dëshiron “plaçkë territoriale” dhe legalizon pushtimin e territoreve ukrainase.

Zelensky përsëriti nevojën për t’i dhënë fund luftës së vendit të tij me Rusinë dhe jo vetëm “një pauzë në vrasje”.

“Duhet të ketë një fund të drejtë të luftës dhe është Rusia ajo që duhet t’i japë fund luftës që e filloi vetë. Ekziston vetëm një aktor që e kundërshton këtë – Putini. Karta e tij e vetme është aftësia për të vrarë dhe ai po përpiqet ta shesë ndërprerjen e vrasjeve me çmimin më të lartë të mundshëm”, tha ai në një mesazh me video në X.

Zelensky theksoi aftësinë e presidentit të SHBA-së Donald Trump për të arritur një zgjidhje më të përhershme.

“Presidenti i Shteteve të Bashkuara ka levat dhe vendosmërinë. Ukraina ka mbështetur të gjitha propozimet e presidentit Trump, duke filluar që në shkurt. Armëpushimi, të gjitha formatet janë mbështetur”, tha ai.

Zelensky vuri në dukje se dëshira e Putinit për një pauzë në luftime është për shkak të frikës së tij nga sanksionet dhe “për legalizimin e pushtimit të tokës sonë – ai dëshiron të marrë plaçka territoriale për herë të dytë”.

Ai vuri në dukje se “Putinit iu lejua të merrte Krimenë”, gjë që, sipas tij, çoi në pushtimin e Donetskut dhe Luhanskut.

“Ne nuk do ta lejojmë këtë përpjekje të dytë për të ndarë Ukrainën. Duke e ditur Rusinë, aty ku ka një të dytë, do të ketë një të tretë. Kjo është arsyeja pse ne qëndrojmë të vendosur, në qëndrime të qarta ukrainase. Ne duhet ta përfundojmë luftën me një paqe dinjitoze, të bazuar në një arkitekturë sigurie të qartë dhe të besueshme”, tha Zelensky.

Mesazhi i tij vjen ndërsa Trump pritet të takohet me Putinin më 15 gusht në shtetin amerikan të Alaskës për të diskutuar një marrëveshje paqeje.  /os/

The post KIEV – Zelensky: Putinin po përpiqet të legalizojë pushtimin e territoreve ukrainase appeared first on Agjencia Telegrafike Shqiptare.

NJU JORK, 10 gusht /ATSH/ – Tre persona u plagosën në një të shtënë me armë zjarri në sheshin ikonik ”Times Square” të New Yorkut, shkruan AP.

”Një person u arrestua nga policia dhe u mor në pyetje në lidhje me të shtënat”, deklaroi Departamenti i Policisë së New York-ut.

Një video në mediat sociale tregon njerëz që ikin nga vendi i ngjarjes, policinë që rrethon një automjet dhe trajton të plagosurit në tokë.

New York City ka parë një rënie të dukshme të dhunës me armë këtë vit. Deri më 3 gusht, ka regjistruar numrin më të ulët të të shtënave në dekada, një rënie prej 23% krahasuar me vitin e kaluar.

New York City ndalon armët e zjarrit në disa vende të ashtuquajtura të ndjeshme, siç janë transporti publik, spitalet, shkollat dhe Times Square,

Në Shtetet e Bashkuara, Gjykata Supreme hodhi poshtë një sfidë ndaj ligjeve të shtetit për armët e zjarrit. /os/

The post NJU JORK – Të shtëna në ‘Times Square’, plagosen tre persona appeared first on Agjencia Telegrafike Shqiptare.

TEL AVIV, 10 gusht /ATSH/ – Protestuesit në mbështetje të pengjeve dolën në rrugët e Jerusalemit dhe marshuan drejt rezidencës së kryeministrit Benjamin Netanyahu për të shprehur zemërimin e tyre ndaj planit të qeverisë së tij për të pushtuar plotësisht Rripin e Gazës, shkruan BBC.

Një sh-ushtar, i quajtur Max Kresch, marshoi duke mbajtur një pankartë ku shkruhej “Unë refuzova”.

“Ne jemi mbi 350 ushtarë që shërbyen gjatë luftës dhe po refuzonim të vazhdonim të shërbenim në luftën politike të Netanyahut”, deklaroi ai.

Protestat u zhvilluan në të gjithë Izraelin në qytete duke përfshirë Haifën dhe Tel Avivin.

Vendimi i Izraelit për të zgjeruar luftën e tij në Gaza – një përshkallëzim i madh në konflikt – shkaktoi dënim nga OKB-ja dhe shumë vende duke përfshirë Mbretërinë e Bashkuar, Francën, Australinë, Turqinë, Gjermaninë, Finlandën dhe Kanadanë.

OKB ka paralajmëruar se një marrje e plotë ushtarake e kontrollit do të rrezikonte “pasoja katastrofike për civilët palestinezë dhe pengjet izraelite të mbajtura në Gaza”.

Plani, i miratuar nga kabineti i sigurisë izraelite, liston pesë “parime” për t’i dhënë fund luftës: çarmatosja e Hamasit, kthimi i të gjithë pengjeve, demilitarizimi i Rripit të Gazës, marrja e kontrollit të sigurisë së territorit dhe krijimi i “një administrate civile alternative që nuk është as Hamasi dhe as Autoriteti Palestinez”. /os/

The post TEL AVIV – Mijëra izraelitë protestojnë ndaj planit qeveritar për pushtimin e qytetit të Gazës appeared first on Agjencia Telegrafike Shqiptare.

LONDER, 10 gusht /ATSH-ANSA/ – Të paktën 466 mbështetës të organizatës ”Palestine Action” u arrestuan dje në Londër gjatë një proteste në mbështetje të organizatës filo-palestineze, të ndaluar nga autoritetet britanike dhe të etiketuar nga ato si një “organizatë terroriste”.

Arrestimet, numri më i lartë në një protestë të vetme në kryeqytetin britanik, u bënë me motivacionin e “mbështetjes së organizatës së ndaluar nga autoritetet britanike”.

Policia deklaroi se ”arrestoi dhe do të arrestojë të gjithë ata që shfaqin pankarta me mbishkrimin “Kundërshtoj genocidin, unë mbështes veprimet e ‘Palestine Action”. /os/

The post LONDER – Arrestohen 466 mbështetës të organizatës ”Palestine Action” appeared first on Agjencia Telegrafike Shqiptare.

ANKARA, 10 gusht /ATSH-AA/ – Profesori turk, Nurullah Okumus deklaroi se qumështi i gjirit i mbron foshnjat nga sëmundjet në të ardhmen, i ndihmon ata të arrijnë gjatësinë dhe peshën e tyre ideale si dhe i mbron nga obeziteti.

Në një deklaratë me rastin e “Javës Botërore të Ushqyerjes me Gji”, Okumus tha se një shoqëri dhe e ardhme e shëndetshme mund të arrihet vetëm me breza të shëndetshëm.

Ai theksoi se një brez i shëndetshëm kërkon para së gjithash ushqyerje të shëndetshme dhe natyrale për foshnjat.

“Qumështi i gjirit është ushqim i mrekullueshëm si asnjë tjetër. Është plotësisht i përshtatur për foshnjën dhe përmban të gjitha lëndët ushqyese të nevojshme për zhvillimin e trurit dhe trupit. Megjithatë, për të siguruar këtë, ushqyerja me gji duhet të jetë në formën më të mirë”, tha Okumus.

Sipas tij, hapi më i rëndësishëm pas lindjes është ushqyerja me gji.

Okumuş thotë se foshnjat duhet të ushqehen ekskluzivisht me qumësht gjiri në gjashtë muajt e parë, pa asnjë ushqim shtesë. “Edhe nëse japim ushqim shtesë pas muajit të gjashtë, ne preferojmë që ushqyerja me gji të vazhdojë të paktën deri në moshën dy vjeç”, tha ai.

Okumus deklaroi se është bërë përparim i konsiderueshëm në rëndësinë e ushqyerjes me gji dhe qumështit të gjirit përmes hulumtimit.

“Ne përpiqemi t’ua shpjegojmë rëndësinë e ushqyerjes me gji nënave shtatzëna dhe vajzave të reja kudo. Qumështi i gjirit është ushqim i mrekullueshëm. Është i vetmi ushqim ideal për foshnjat. Ne e dimë se ka shumë përfitime jo vetëm për foshnjat, por edhe për nënat. Është ushqim i jashtëzakonshëm dhe i mrekullueshëm”, tha ai.

“Në njërën anë është nëna dhe në anën tjetër foshnja. Është ushqim i mrekullueshëm që e mbron foshnjën nga sëmundjet e ardhshme dhe e ndihmon atë të arrijë gjatësinë dhe peshën ideale si një individ i shëndetshëm. Foshnjat që ushqehen me gji nuk bëhen obezë. Qumështi i gjirit është produkt i mrekullueshëm, sa që në fillim të ushqyerjes me gji, lëshon hormone që i tregojnë foshnjës se është e uritur, por kur foshnja duhet të jetë e ngopur, lëshon pikërisht të kundërtën, duke i thënë të ndalojë ushqyerjen me gji”, tha Okumus.

Ai thotë se “një foshnjë që ushqehet me formulë nuk ndihet kurrë i ngopur, ai vazhdon të thithë dhe të ushqehet. Derisa arrijmë një foshnjë ideale dhe të shëndetshme, ajo ka përfitime të konsiderueshme për nënën. Ndihmon nënën të kthehet shpejt në normalitet pas lindjes pas ndryshimeve fiziologjike që ndodhin gjatë shtatzënisë”.

Më tej Okumus thekson se ushqyerja me gji është proces që rrit ndjeshëm lidhjen nënë-foshnjë.

“Duke përdorur prekjen, dëgjimin, nuhatjen dhe shijen, është një nga faktorët më të rëndësishëm që ndihmon në krijimin e një lidhjeje midis nënës dhe foshnjës dhe nga ana tjetër, ndihmon foshnjën të zhvillohet në një individ të shëndetshëm”, u shpreh ai./    /os/

The post FOKUS – Qumështi i gjirit mbron fëmijët nga mbipesha appeared first on Agjencia Telegrafike Shqiptare.

BUENOS AIRES, 8 gusht /ATSH-DPA/ – Pas dekadash stabiliteti relativ, akullnaja e famshme ”Perito Moreno” në Argjentinën jugore po tërhiqet më shpejt nga sa mendohej më parë, sipas një studimi.

Ndërsa akullnaja Jugore e Fushave të Akullit të Patagonisë humbi mesatarisht vetëm 34 centimetra trashësi në vit midis viteve 2000 dhe 2019, ajo u tkurr midis 5,5 dhe 6,5 metra në vit nga viti 2019 deri në vitin 2024, sipas një studimi të udhëhequr nga Moritz Koch i Universitetit të Erlangen-Nurembergut.

Në disa zona, akullnaja e famshme botërore u tërhoq më shumë se 800 metra gjatë një periudhe pesëvjeçare, deri në vitin 2024.

Studiuesit panë akullnajën 30 kilometra të gjatë duke përdorur një sistem të veçantë radari dhe hartuan shtratin e liqenit përtej skajit të akullnajës, pikës ose kufirit të saj më të ulët.

Ata i kombinuan këto vëzhgime me të dhënat satelitore për të analizuar se si ndryshoi lartësia e sipërfaqes dhe shpejtësia e sipërfaqes midis viteve 2000 dhe 2024.

“Ekziston një kreshtë shkëmbore poshtë gjuhës së akullnajës që vepron si një spirancë. Kjo e ka mbajtur akullnajën në ekuilibër për një kohë të gjatë’’, theksoi Koch, autori kryesor i studimit.

“Të dhënat tona tregojnë se akullnaja aktualisht po shkëputet nga pika e saj e spirancës”, tha Koch.

Prandaj, tërheqja e akullnajës mund të përshpejtohet ndjeshëm dhe sipërfaqja e akullit mund të tkurret me 15 kilometra katrorë vetëm në pak vite./   /os/

The post ARGJENTINË – Akullnaja ”Perito Moreno” po shkrin më shpejt nga sa mendohej appeared first on Agjencia Telegrafike Shqiptare.

TIRANË, 8 gusht /ATSH/ – Më 8 gusht 1969 ndodhi një nga ngjarjet më të imituara në historinë e muzikës pop, sipas BBC.

“Beatles”-at George Harrison, Paul McCartney, Ringo Starr dhe John Lennon – u mblodhën për një fotosesion të shkurtër jashtë EMI Studios në Londër, ku grupi po punonte.

Fotografi Iain Macmillan bëri foton mjaft modeste të muzikantëve në një kalim vijash të bardha, një imazh që do të zbukuronte kopertinën e albumit të grupit.

Çuditërisht, rruga u bllokua vetëm për 10 minuta për të bërë fotografinë: James Macmillan bëri vetëm gjashtë foto dhe ishte Paul McCartney ai që zgjodhi të fundit.

Prej pesë dekadash, njerëz nga të gjitha anët kanë ardhur për të provuar të rikrijojnë pozat e ”Beatles”./ /os/

The post MUZIKË – 56 vite nga fotoja legjendare e “Beatles” appeared first on Agjencia Telegrafike Shqiptare.

ROMË, 8 gusht /ATSH-ANSA-DPA/ – Pas dekadash debati politik, Italia ka miratuar planin për të ndërtuar një urë që lidh Siçilinë me kontinentin.

Një komision ndërministror, i kryesuar nga kryeministrja Giorgia Meloni, i hapi dritën jeshile projektit, i cili pritet të kushtojë mbi 13,5 miliardë euro.

Ura do të lidhë Kalabrinë jugore me Siçilinë duke zëvendësuar shërbimin e trageteve që aktualisht kalon Ngushticën e Mesinës, gati tre kilometra të gjerë.

Trafiku rrugor dhe hekurudhor do të lejohet në të dyja drejtimet.

Puna paraprake pritet të fillojë në fund të vitit dhe përfundimin e planifikuar për vitin 2032.

Nëse përfundon, ura do të jetë ura më e gjatë e varur në botë.

Megjithatë, projekti mbetet shumë i diskutueshëm.

Grupimet mjedisore, shkencëtarët dhe politikanët e opozitës kanë ngritur shqetësime në lidhje me rreziqet sizmike, ndikimin ekologjik dhe përfshirjen e mundshme të krimit të organizuar.

Planet për një urë mbi Ngushticën e Mesinës kanë ekzistuar që të paktën nga viti 1971, por projekti është shtyrë ose braktisur vazhdimisht.

Qeveria e krahut të djathtë e Melonit e ringjalli iniciativën në vitin 2022.

Ministri i Transportit Matteo Salvini, e ka promovuar urën si një projekt kryesor infrastrukturor, duke e quajtur atë një nxitës të zhvillimit për Italinë Jugore.

Drita jeshile për ndërtimin e urës mbi Ngushticën e Mesinës po bën bujë në të gjithë botën, me lajmin të raportuar nga mediat kryesore ndërkombëtare.

“The New York Times” shkruan se “Italia miraton projektin e urës për të lidhur Siçilinë me kontinentin”, dhe shton se “qeveria pretendon se lidhja rrugore dhe hekurudhore do të krijojë vende pune dhe do të nxisë ekonominë e rajonit, por kritikët janë të shqetësuar për ndikimin mjedisor dhe social”.

Sipas CNN, “Italia jep dritën jeshile përfundimtare për projektin historik të urës për në Siçili”, një “prioritet” i qeverisë së krahut të djathtë të Giorgia Melonit”, e cila, megjithatë, “përballet me kundërshtim të fortë”.

“Italia jep miratimin përfundimtar për urën më të gjatë të varur në botë që shkon në Siçili”, është titulli kryesor në faqen e internetit të BBC-së, e cila shkruan se “Roma shpreson ta klasifikojë urën si shpenzime ushtarake, për ta bërë atë të përshtatet në objektivin e NATO-s prej 5% të PBB-së për mbrojtjen”.

“Qeveria italiane jep miratimin përfundimtar për urën që lidh Siçilinë me kontinentin” është titulli kryesor në gazetën britanike “Guardian”, e cila flet për “një ëndërr të ish-kryeministrit Berlusconi, të ringjallur nga qeveria Meloni”.

Gazeta franceze Le Monde titullon “Ura e Mesinës: Qeveria italiane pranon të ndërtojë urën më të gjatë të varur në botë”.

Sipas gazetës gjermane Süddeutsche Zeitung, “Një ëndërr e lashtë romake është gati të bëhet realitet”./   /os/

The post KOMENT – Italia miraton ndërtimin e urës së varur më të gjatë në botë appeared first on Agjencia Telegrafike Shqiptare.

UASHINGTON, 8 gusht /ATSH-ANSA/ – Shtëpia e Bardhë ka njoftuar se oficerët federalë të zbatimit të ligjit do të patrullojnë rrugët e Uashington DC për shtatë ditët e ardhshme, raporton ”The Hill”.

Prania e shtuar federale do të fillojë mesnatën e sotme.

Ajo do të drejtohet nga Policia e Parqeve e Shteteve të Bashkuara dhe do të përfshijë oficerë dhe agjentë nga FBI, DEA, ATF, Zbatimi i Imigracionit dhe Doganave (ICE) dhe agjenci të tjera.

Shtëpia e Bardhë ka deklaruar se forcat federale të zbatimit të ligjit do të vendosen në njësi të përcaktuara posaçërisht.

”Uashingtoni është më i dhunshëm se Bagdadi, më i dhunshëm se pjesë të Etiopisë dhe shumë vende të tjera të rrezikshme në botë”, deklaroi Stephen Miller, zëvendësshefi i stafit të Shtëpisë së Bardhë, pasi Donald Trump urdhëroi policinë federale të patrullojë kryeqytetin.

“Presidenti është shumë i qartë se duhet të ndërmerren veprime për ta bërë Uashingtonin të sigurt për ata që jetojnë atje dhe për të gjithë amerikanët që duan ta vizitojnë”, theksoi Miller./ /os/

The post SHBA – Trump urdhëron forcat federale të patrullojnë Uashingtonin appeared first on Agjencia Telegrafike Shqiptare.

BRUKSEL, 8 gusht /ATSH-AFP-ANSA-DPA/ – Presidentja e Komisionit Evropian, Ursula von der Leyen, i bëri sot thirrje Izraelit të heqë dorë nga plani i tij për Gazën.

“Qeveria izraelite duhet të heqë dorë nga vendimi e saj për të zgjeruar operacionin e saj ushtarak në Gaza”, tha kreu i Komisionit Evropian në rrjetin social X.

“Një armëpushim është i nevojshëm menjëherë”, pohoi ajo.

”Në të njëjtën kohë, të gjithë pengjet e mbajtura në kushte çnjerëzore duhet të lirohen. Për më tepër, ndihmës humanitare duhet t’i jepet akses i menjëhershëm dhe i papenguar në Gaza për të ofruar atë që nevojitet urgjentisht në terren”, shkruan Von der Leyen.

Kabineti izraelit i sigurisë miratoi sot herët në mëngjes një propozim nga kryeministri Benjamin Netanyahu për të marrë kontrollin ushtarak të qytetit të Gazës dhe për të çarmatosur organizatën militante palestineze Hamas, sipas një deklarate nga zyra e Netanyahut.

Deklarata tha se qeveria miratoi një pushtim nga ushtria izraelite të qytetit të Gazës, në veri të territorit, duke ofruar ndihmë humanitare për popullsinë civile jashtë zonave të luftimit.

Zyra e Netanyahut tha se qeveria miratoi një plan nga kryeministri i cili do të shihte çarmatimin e Hamasit, kthimin e pengjeve në Izrael, demilitarizimin e Rripit të Gazës dhe kontrollin e sigurisë izraelite mbi territorin në këmbim të përfundimit të luftës, që vazhdon  prej më shumë se 22 muajsh.

Plani gjithashtu kërkon që territori të qeveriset nga një “qeveri alternative civile që nuk është Hamasi ose Autoriteti Palestinez”./ /os/

The post BRUKSEL – Von der Leyen: Izraeli të heqë dorë nga plani për Gazën appeared first on Agjencia Telegrafike Shqiptare.

UASHINGTON, 8 gusht /ATSH-DPA/ – Departamenti amerikan i Drejtësisë dhe Departamenti amerikan i Shtetit dyfishuan shpërblimin për informacionin që çon në arrestimin e udhëheqësit autoritar venezuelian, Nicolas Maduro në 50 milionë dollarë.

“Maduro përdor organizata të huaja terroriste si ‘Tren de Aragua’, ‘Sinaloa’ dhe ‘Cartel de Soles’ për të sjellë dhunë vdekjeprurëse në vendin tonë”, theksoi prokurorja e përgjithshme e SHBA-së, Pam Bondi në një deklaratë video, duke e quajtur shpërblimin “historik”.

”Administrata amerikane e Zbatimit të Ligjit për Drogën (DEA) ka sekuestruar 30 tonë kokainë të lidhura me Maduron dhe bashkëpunëtorët e tij, duke përfshirë gati shtatë tonë të lidhur me vetë Maduron, të cilat përfaqësojnë një burim kryesor të ardhurash për kartelet kriminale me bazë në Venezuelë dhe Meksikë”, shtoi Bondi.

”Maduro është një nga trafikantët më të mëdhenj të drogës në botë dhe një kërcënim për sigurinë tonë kombëtare. Prandaj, ne e kemi dyfishuar shpërblimin e tij në 50 milionë dollarë”, theksoi Bondi.

Sipas qeverisë amerikane, regjimi i Maduros e ka transformuar Venezuelën në një narkoshtet, duke krijuar aleanca me gueriljet kolumbiane për të eksportuar drogë në Evropë dhe Shtetet e Bashkuara përmes një organizate të njohur si ”Karteli i diejve”, që dyshohet se përbëhet nga zyrtarë të lartë venezuelianë.

Në vitin 2020, Maduro u padit në një aktakuzë federale në Qarkun Jugor të Nju Jorkut për narkoterrorizëm, komplot për importimin e kokainës dhe posedim e komplot për posedimin e mitralozëve dhe pajisjeve shkatërruese./  /os/

The post UASHINGTON – SHBA ofron shpërblim historik 50 milionë dollarësh për arrestimin e Maduros appeared first on Agjencia Telegrafike Shqiptare.

BERLIN, 8 gusht /ATSH-ANSA/ – Qeveria gjermane nuk do të autorizojë më asnjë eksport të pajisjeve ushtarake që mund të përdoren në Rripin e Gazës deri në njoftim të mëtejshëm, deklaroi sot kancelari gjerman, Friedrich Merz.

”Izraeli ka të drejtë të mbrohet kundër terrorizmit të Hamasit, i cili duhet të çarmatoset, por veprimi edhe më agresiv ushtarak i ushtrisë izraelite në Rripin e Gazës, i vendosur mbrëmë nga qeveria izraelite, e bën gjithnjë e më të vështirë të shihet se si mund të arrihen këto objektiva”, thekson Merz.

Merz mbi situatën në Rripin e Gazës, kujtoi gjithashtu se “lirimi i pengjeve dhe negociatat për një armëpushim janë përparësia kryesore e qeverisë gjermane dhe pikërisht për këto arsye, Berlini nuk do të autorizojë asnjë dërgesë armësh që mund të përdoren në Rrip”.

“Me ofensivën e planifikuar, qeveria izraelite ka një përgjegjësi edhe më të madhe se më parë për mbështetjen e popullsisë civile. Ajo duhet të lehtësojë aksesin e plotë në furnizimet me ndihmë, duke përfshirë organizatat e Kombeve të Bashkuara dhe institucionet e tjera joqeveritare”, shtoi ai.

Berlini më në fund i kërkon qeverisë izraelite “të mos ndërmarrë hapa të mëtejshëm drejt aneksimit të Bregut Perëndimor”./   /os/

The post FOKUS – Merz: Gjermania pezullon eksportet e armëve drejt Izraelit appeared first on Agjencia Telegrafike Shqiptare.

STAMBOLL, 8 gusht /ATSH-AFP-DPA/ – Turqia i bëri sot thirrje bashkësisë ndërkombëtare të “parandalojë” zbatimin e planit të paraqitur nga kryeministri izraelit Benjamin Netanyahu për të marrë kontrollin ushtarak të qytetit të Gazës.

“Ne i bëjmë thirrje bashkësisë ndërkombëtare të marrë përgjegjësitë e saj për të parandaluar zbatimin e këtij vendimi, i cili synon të zhvendosë me forcë palestinezët nga toka e tyre dhe ta bëjë Gazën të pabanueshme”, shkroi Ministria e Jashtme turke në një deklaratë.

Kabineti izraelit i sigurisë miratoi sot herët në mëngjes një propozim nga kryeministri Benjamin Netanyahu për të marrë kontrollin ushtarak të qytetit të Gazës dhe për të çarmatosur organizatën militante palestineze Hamas, sipas një deklarate nga zyra e Netanyahut.

Deklarata tha se qeveria miratoi një pushtim nga ushtria izraelite të qytetit të Gazës, në veri të territorit, duke ofruar ndihmë humanitare për popullsinë civile jashtë zonave të luftimit.

Zyra e Netanyahut tha se qeveria miratoi një plan nga kryeministri i cili do të shihte çarmatimin e Hamasit, kthimin e pengjeve në Izrael, demilitarizimin e Rripit të Gazës dhe kontrollin e sigurisë izraelite mbi territorin në këmbim të përfundimit të luftës, e cila ka vazhduar për më shumë se 22 muaj.

Plani gjithashtu kërkon që territori të qeveriset nga një “qeveri alternative civile që nuk është Hamasi ose Autoriteti Palestinez”./ /os/

The post STAMBOLL – Turqia i kërkon bashkësisë ndërkombëtare të parandalojë planin izraelit në Gaza appeared first on Agjencia Telegrafike Shqiptare.

TEL AVIV, 8 gusht /ATSH-DPA/ – Udhëheqësi i opozitës izraelite, Yair Lapid, e ka përshkruar vendimin e kabinetit të sigurisë për të pushtuar qytetin e Gazës si një “katastrofë” që “do të çojë në shumë katastrofa të tjera”.

Ai shkroi sot në platformën X se pushtimi i planifikuar i qytetit më të madh në Rripin e Gazës do të çonte në vdekjen e pengjeve si dhe në vrasjen e shumë ushtarëve izraelitë.

“Kryeministri Benjamin Netanyahu është nxitur nga partnerët e tij të koalicionit të ekstremit të djathtë, Itamar Ben-Gvir dhe Bezalel Smotrich, në kundërshtim me kundërshtimet e udhëheqjes ushtarake”, shpjegoi më tej Lapid.

Dy ministrat ultra të djathtë janë avokatë të idesë së pushtimit të plotë të Rripit të Gazës dhe dëbimit të afërsisht DY milionë palestinezëve që jetojnë atje.

Kabineti i Sigurisë miratoi një plan për të pushtuar qytetin e Gazës sot herët në mëngjes.

Para se të fillonte takimi, Netanyahu i tha transmetuesit amerikan ”Fox News” se Izraeli donte të merrte kontrollin e të gjithë Rripit të Gazës, por jo ta pushtonte zonën përgjithmonë. Duhet të çlirohet nga organizata islamiste palestineze Hamas për t’u dorëzuar përfundimisht forcave të tjera./ /os/

The post IZRAEL – Opozita e konsideron vendimin për Gazën një katastrofë appeared first on Agjencia Telegrafike Shqiptare.

KAJRO, 8 gusht /ATSH-ANSA/ – Egjipti ka paralajmëruar Shtetet e Bashkuara të Amerikës se vendimi i Izraelit për të pushtuar qytetin e Gazës do ta shtyjë Hamasin të ekzekutojë pengjet izraelite që mban, sipas gazetës libaneze ”Al-Akhbar”, që citon një diplomat egjiptian.

Sipas diplomatit, pengjet do të ekzekutohen sepse Hamasi dhe grupet e tjera terroriste që i mbajnë ata “kanë urdhër t’i ‘neutralizojnë’ nëse pengmarrësit e tyre janë të rrethuar dhe nuk janë në gjendje të shpëtojnë”.

Artikulli gjithashtu thotë se zyrtarë të lartë egjiptianë kanë bërë thirrje për një kthim urgjent në tryezën e negociatave midis Izraelit dhe Hamasit për një armëpushim në Gaza dhe se presidenti egjiptian Abdel Fattah el-Sisi ka kërkuar kontakt të drejtpërdrejtë me presidentin e SHBA-së Donald Trump për të diskutuar çështjen./    /os/

The post KAJRO – Egjipti: Vendimi i Izraelit për Gazën dënim me vdekje për pengjet appeared first on Agjencia Telegrafike Shqiptare.

BERLIN, 7 gusht /ATSH-DPA/ – Ministri i Brendshëm gjerman, Alexander Dobrindt tha se vendi do të zgjerojë kontrollet aktuale kufitare dhe do të kërkojë të dëbojë më shumë njerëz që nuk janë të autorizuar ligjërisht të qëndrojnë në Gjermani.

“Ne do të vazhdojmë të ruajmë kontrollet kufitare”, tha Dobrindt për podkastin “Table.Today”.

Ai shtoi se nuk do të ketë vetëm kontrolle, por edhe kthime mbrapsht.

Gjermania intensifikoi kontrollet kufitare, të cilat më parë ishin sporadike, në kufijtë e saj të jashtëm më 8 maj, me një urdhër të lëshuar nga Dobrindt menjëherë pasi qeveria e re e koalicionit e udhëhequr nga konservatorët mori detyrën.

Ai gjithashtu urdhëroi që migrantët e parregullt të kthehen mbrapsht në kufi edhe nëse ata aplikojnë për azil, një politikë e diskutueshme në Gjermani.

Ky veprim ka tërhequr kritika të forta nga disa vende fqinje.

Gjermania është pjesë e zonës Schengen, e cila është projektuar për të pasur kufij të hapur.

“Ne po punojmë për të organizuar fluturime shtesë dëbimi në Afganistan dhe gjithashtu në Siri”, deklaroi ministri i Brendshëm.

Ai deklaroi se kjo ishte “absolutisht e nevojshme” për të siguruar që njerëzit – përfshirë kriminelët – që nuk mund dhe nuk duhet të qëndrojnë në Gjermani të riatdhesohen në vendet e tyre të origjinës.

Në mesin e korrikut, qeveria deportoi 81 afganë në Afganistan me një aeroplan çarter.

Ky ishte vetëm fluturimi i dytë i tillë që kur talebanët islamikë rimorën pushtetin në gusht 2021./   /os/

The post BERLIN – Gjermania intensifikon kontrollet kufitare dhe premton riatdhesime appeared first on Agjencia Telegrafike Shqiptare.