Gjatë 24 orëve të fundit janë regjistruar 34 vatra zjarri në Shqipëri, nga të cilat 27 janë shuar, pesë janë aktive dhe dy po mbahen në monitorim.

Sipas njoftimit të Ministrisë së Mbrojtjes, në operacionet për shuarjen e zjarreve janë angazhuar 54 automjete zjarrfikëse dhe 690 forca operacionale, të mbështetura nga 110 trupa të Forcave të Armatosura me dy mjete zjarrfikëse. Gjithashtu u angazhuan dy helikopterë të Forcës Ajrore shqiptare dhe një helikopter nga Emiratet e Bashkuara Arabe.

Vatrat aktive

Në fshatin Tërnovë, njësia administrative Zerqan, bashkia Bulqizë, ka vijuar puna për shuarjen e zjarrit të rënë në kurorë me pyje të dendura. Nga puna e forcave operacionale dhe mbështetja me ndërhyrje nga ajri, janë vënë nën kontroll disa vatra. Problematike ngelet një vatër në vendin e quajtur “Maja e Shkëmbit” dhe tjetra në drejtim të fshatit Valikardhë dhe Peladhi. Në operacion gjatë ditës u angazhuan 8 efektivë të MZSH të bashkisë Bulqizë, 8 forca bashkiake dhe 8 forca të Shërbimi Pyjor. Në mbështetje për përballimin e situatës u angazhuan edhe 30 trupa nga Forcat e Armatosura dhe helikopteri i Forcës Ajrore. Zjarri zhvillohet me intensitet mesatar dhe më së shumti brenda perimetrit të përshkuar ditë më parë, shkruan TCh.

Ka vijuar puna për shuarjen e zjarrit të rënë në fshatin Xeth, njësia administrative Blerim, bashkia Fushë Arrëz. Zjarri është zhvilluar me intensitet duke u përshkallëzuar në fshatrat Kulumri, Trun dhe Kunorë-Dardhë. Në operacion gjatë ditës u angazhuan 42 forca bashkiake, 2 automjete zjarrfikëse dhe 80 trupa nga FA si dhe 20 vullnetarë të cilët punuan deri në mbrëmje vonë. Në mbështetje të forcave në terren u krye ndërhyrje nga ajri nga 2 helikopterë të Forcës Ajrore. Gjatë natës raportohet se situata, e ndikuar edhe nga reshje e shiut që kanë përfshirë zonën, është vënë nën kontroll. Vatra e zjarrit gjatë natës u mbajt në monitorim.

Ka vijuar të jetë aktiv zjarri në fshatin Pezë Helmës, njësia administrative Pezë, bashkia Tiranë. Vatra e zjarrit është vazhdim i zjarrit të rënë në fshatin Damjan-Fortuzaj njësia administrative Vaqarr. Zjarri në mesditë ka marrë përmasa dhe ka dalë jashtë kontrollit. Për vënien nën kontroll kreu ndërhyrje nga ajri helikopteri i Emirateve të Bashkuara Arabe. Situata po mbahet në monitorim. Ditën e sotme raportohet se vatra e zjarrit ka intensitet të ulët.

Në fshatrat Kullollas, Kodovjat, Ermenj, njësia administrative Skënderbegas, bashkia Gramsh, ka vazhduar puna për shuarjen e zjarrit të rënë më datë 12.08.2025. Forcat operacionale, vijuan punën me vatrat e vogla, për të mos i lejuar përhapjen, ku mbetet aktive një vatër në Malin e Koshnicës, e cila po mbahet në monitorim nga punonjës të Shërbimit Pyjor dhe banorë të zonës. Gjatë ditës pati riaktivizim në fshatin Bletëz, e cila u normalizua nga ndërhyrja me 1 mjet zjarrfikës dhe 4 efektivë të MZSH. Gjithashtu në mesditë pati riaktivizim në fshatin Kullollas, ku rrezikohej një masiv me pisha. Në këtë vatër u angazhuan 2 automjete zjarrfikëse me 6 efektivë, të cilët arritën ta shuajnë atë. Situata në fshatrat e përshkuar nga zjarri po mbahet në monitorim.

Në vendin e quajtur “Teqeja e Dushkut”, njësia administrative Kukur, bashkia Gramsh, vatra e zjarrit vijon të jetë aktive. Gjatë ditës në zonë u angazhuan 2 automjete zjarrfikëse me 10 efektivë nga MZSH Gramsh, 2 fadroma të bashkisë me 4 forca bashkiake dhe 4 vullnetarë. Ka patur vështirësi për shuarjen e zjarrit për shkak të shtresave të humusit. Ditën e sotme raportohet se vatra e zjarrit është drejt izolimit.

Ka vijuar puna për shuarjen e zjarrit të rënë më datë 14.08.2025, në fshatin Rreja e Zezë (Velë), njësia administrative Rubik, bashkia Mirditë. Gjatë ditës në operacion u angazhuan 3 automjete zjarrfikëse me 7 efektivë nga MZSH Mirditë, 4 forca policore, 17 forca bashkiake, 7 forca Shërbimi Pyjor dhe 10 vullnetarë, të cilët kanë punuar për shuarjen e tij deri në mbrëmje. Nga puna e forcave, u arrit që vatra e zjarrit të izolohet totalisht dhe nga vlerësimi i bërë nuk paraqet rrezik për përhapje. Vatra po mbahet në monitorim nga forca të Shërbimit Pyjor.

Ka vijuar puna për shuarjen e zjarrit të rënë në Parkun Natyror Gërmenj, njësia administrative Leskovik, bashkia Kolonjë. Zjarri zhvillohej me intensitet midis piramidës 13 dhe 15, në kufi me Greqinë. Shpërthimet herë pas herë të municioneve luftarake të pranishme në zonë që nga lufta italo-greke, bënë që të ndërpritej operacioni. Në zonë u angazhuan 3 mjete zjarrfikëse me 13 efektivë nga MZSH Kolonjë, 6 forca policore, 17 forca bashkiake, 7 AdZM, 4 Shërbimi Pyjor dhe 4 forca vullnetare. Zjarri vazhdon aktiv në disa vatra. Sipas raportimeve ditën e sotme konstatohet se zjarri nuk ka përhapje dhe nuk vihen re riaktivizime.

Vatrat e shuara

* Val (Martanesh, Bulqizë), Kodër Qerre (Mat)

* Xeth (Blerim, Fushë Arrëz)

* Durishtë (Petrelë), Ferraj–Zall Herr–Brarë–Priskë e Vogël (Dajt), Gjipal (Zall Bastar), Vilë-Ballaj (Rrogozhinë)

* Kalanjas (Skrapar)

Forca nga të gjitha strukturat e emergjencave mbeten në terren për të monitoruar dhe përballuar çdo riaktivizim të mundshëm të zjarreve. /tch/

The post ​34 vatra zjarri në 24 orët e fundit në Shqipëri, i vjen ndihmë nga Emiratet e Bashkuara Arabe appeared first on Telegrafi.

Policia e Merseyside ka konfirmuar se një person është arrestuar pasi Antoine Semenyo raportoi një rast të abuzimit racist gjatë fitores 4-2 të Liverpoolit ndaj Bournemouth në Anfield, të premten. 

Ndeshja e Ligës Premier u ndërpre përkohësisht në minutën e 29-të, pasi Semenyo njoftoi gjyqtarin Anthony Taylor për abuzimin, i cili më pas u konsultua me të dy trajnerët, Arne Slot dhe Andoni Iraola. 

Pas përfundimit të ndeshjes, në të cilën Semenyo realizoi dy gola, reprezentuesi i Ganës publikoi një deklaratë ku falënderoi tifozët për mbështetjen. 

Të shtunën pasdite, policia publikoi një deklaratë tjetër, duke konfirmuar se një burrë 47-vjeçar nga Liverpooli ishte arrestuar nën dyshimin për shkelje të rendit publik me motiv racial. 

“Kemi arrestuar një person pas raportimeve për abuzim racist ndaj lojtarit të Bournemouth, Antoine Semenyo, gjatë ndeshjes së Ligës Premier kundër Liverpoolit në Anfield, të premten më 15 gusht”. 

“Identiteti i të dyshuarit u konfirmua dhe ai u largua nga stadiumi pas raportimit”. 

This is disgusting Semenyo getting racially abused to his FACE just because he’s having a good game. anyways you’ll never walk again..

pic.twitter.com/nEGYXvrJjH

— (@seanafc_) August 15, 2025

“Një burrë 47-vjeçar nga Liverpooli është arrestuar sot (e shtunë, 16 gusht) nën dyshimin për shkelje të rendit publik me përmbajtje raciste.  

“Ai është dërguar në paraburgim për t’u marrë në pyetje”, thuhej në deklaratë./Telegrafi/

The post Arrestohet një person pas abuzimit racist që mori Antoine Semenyo ndaj Liverpoolit appeared first on Telegrafi.

Në palestër shpesh dëgjohet pyetja: “A duhet të ushtrohen femrat njëjtë si meshkujt?” Përgjigjja është e thjeshtë: po. Trupi i njeriut, pavarësisht gjinisë, i nënshtrohet të njëjtave ligje biologjike dhe shkencore. Forca, ushqimi i balancuar dhe disiplina funksionojnë njësoj për të gjithë.

Mitet që mbajnë peng femrat:

Ka vite që qarkullojnë paragjykime të gabuara për stërvitjen e grave. Një ndër to është se ngritja e peshave i bën ato “shumë muskulore”. Në realitet, femrat kanë nivele më të ulëta të testosteronit dhe nuk mund të ndërtojnë muskuj në përmasa mashkullore. Peshat nuk i deformojnë, por u japin formë, forcë dhe tonifikim. Po ashtu, ideja se femrat duhet të bëjnë vetëm kardio është një tjetër mit që ka frenuar progresin. Kardio ndihmon në shëndetin kardiovaskular, por vetëm stërvitja me pesha krijon ndryshime të qëndrueshme në trup.

Dallimet hormonale nuk janë pengesë:

Është e vërtetë që cikli menstrual, shtatzënia apo ndryshimet hormonale ndikojnë në energji dhe gjendje fizike, por kjo nuk do të thotë se femrat duhet të stërviten ndryshe nga meshkujt. Përkundrazi, përshtatja e ushtrimeve sipas fazave të ciklit i ndihmon ato të përfitojnë edhe më shumë.

Përfitimet konkrete

• Shëndet më i mirë afatgjatë: stërvitja me pesha ul rrezikun e osteoporozës, e cila prek kryesisht femrat.
• Formë trupore e balancuar: muskujt e fortë japin linja estetike dhe energji të re.
• Forcë mendore dhe disiplinë: fitnesi nuk ndërton vetëm trupin, por edhe karakterin.

Stërvitja nuk ka gjini, ka vetëm parime. Një mashkull mund të synojë masë më të madhe muskulore, një femër trup më të tonifikuar, por rruga drejt suksesit është e njëjtë: ngarkesë progresive, ushqim i kujdesshëm dhe mentalitet fitues.

Pyetja nuk është më “a duhet të ushtrohen femrat si meshkujt?”, por a janë të gatshme të thyejnë mitet dhe të tregojnë fuqinë e tyre të vërtetë. /Arbër Peci/

The post Trajneri Arbër Peci tregon: Femrat duhet të ushtrojnë njëjtë sikurse meshkujt appeared first on Telegrafi.

Sindikata e Bashkuar e Arsimit, Shkencës dhe Kulturës (SBASHK), në prag të fillimit të vitit të ri shkollor, ka paralajmëruar grevë dhe masa të tjera sindikale nëse deri më 20 shtator të këtij viti nuk fillon dialogu me Ministrinë e Arsimit, Shkencës dhe Teknologjisë.

Ndër kërkesat kryesore të SBASHK-ut janë negocimi dhe nënshkrimi i kontratës së re kolektive, rritja e vlerës së koeficientit, si dhe zbatimi i vendimit të Gjykatës Kushtetuese për kompensimin e përvojës së punës, bashkë me çështje të tjera që lidhen me të drejtat dhe kushtet e punëtorëve të arsimit.

Nënkryetarja e SBASHK-ut, Vjollca Shala, ka thënë për KosovaPress, se nëse deri më 20 shtator nuk fillon dialogu me MASHT-in, sindikata do ta thërrasë këshillin drejtues për të shqyrtuar situatën dhe mund të ndërmarrë veprime sindikale, përfshirë edhe grevën.

“Kur flasim për çështjen e mësimdhënësve dhe çështjen e kërkesave të SBASHK-ut, ne më herët e kemi mbajtur një kongres të jashtëzakonshëm, kongresin e nëntë. Në kongres është marrë një vendim si organi më i lartë i SBASHK-ut që nëse deri më 20 shtator nuk fillon dialogu me Ministrinë e Arsimit, atëherë do të mblidhet këshilli drejtues si organ më i lartë i SBASHK-ut në mes të dy kongreseve dhe do ta analizojë gjendjen dhe pastaj mund të shkohet edhe me veprime sindikale duke mos përjashtuar edhe grevën”, thotë Shala.

Derisa përmend kërkesat kryesore të SBASHK-ut, Shala potencon se rritja e pagave për 55 euro është simbolike karshi ngritjes enorme të çmimeve.

“Kërkesat e SBASHK-ut janë… negocimi dhe nënshkrimi i kontratës së re kolektive. Po ashtu, është kërkesë edhe ngritja e vlerës së koeficientit. Tashmë veçse janë bërë dy vite që nuk është ngritur vlera e koeficientit në ligjin e pagave edhe përkundër rritjes së inflacionit. Kemi një rritje të rangimit të koeficientit që është një ngritje prej 55 eurove, që është shumë simbolike karshi ngritjes enorme të çmimeve të produkteve elementare për jetesë. Është edhe zbatimi i vendimit të Gjykatës Kushtetuese ku nga korriku i vitit 2024 është dashur të zbatohet një vendim i tillë i Gjykatës Kushtetuese për përvojën e punës për 15 vitet e para, që është duke u paguar me 0.25 për qind e vendimi i gjykatës është që të paguhet 0.5 për qind”, potencon Shala.

Shala thekson se SBASHK-u ka dorëzuar një iniciativë legjislative qytetare për ndryshimin e ligjit të skemave pensionale të financuara nga shteti. Kjo iniciativë, siç thotë ajo, synon që vitet e punës së mësimdhënësve gjatë periudhës 1990–1999, të cilat aktualisht nuk llogariten si vite kontributdhënëse, të njihen si të tilla.

Po ashtu, Shala përmend kushtet e vështira të punës në shkollat e Kosovës, duke theksuar mungesën e dixhitalizimit në shumë prej tyre, ndryshe nga shtetet fqinje ku ky proces është përparuar më tej.

Nënkryetarja e SBASHK-ut, Vjollca Shala, thotë se që nga viti 2022 nuk kanë pasur takime të frytshme me Ministrinë e Arsimit dhe veçanërisht me ministren Nagavci.

“Me Ministrinë e Arsimit dhe në veçanti me ministren Nagavci që nga viti 2022 kemi pasur një takim kur ka qenë nënkryetari i sindikatës së mësuesve të SHBA-së, edhe atë një takim veç formal 15-minutësh, pa pasur mundësi t’i paraqesim kërkesat e punëtorëve të arsimit. Dhe kemi pasur një takim në ditën kur është mbajtur protesta… Përndryshe, për kërkesat që ne në vazhdimësi i bëjmë për t’u ulur dhe bashkëbiseduar me qëllim të zgjidhjes së problemeve dhe kërkesave që i kanë punëtorët e arsimit, ne nga viti 2022 nuk kemi pasur takim të tillë”, tregon Shala.

Ndër të tjera, Shala flet edhe për mënyrën e subvencionimit të librave shkollorë për nxënësit, për çka thotë se dy vitet e fundit nuk ka qenë e duhur. Ajo vlerëson se më efektive dhe më e lirë ka qenë mënyra kur librat siguroheshin paraprakisht për nxënësit.

“Është parë edhe në dy vitet e kaluara që nuk ka qenë mënyrë e duhur, ngase nxënësit ndoshta edhe me muaj të tërë nuk kanë qenë të pajisur me libra shkollorë. Shumë më e mirë ka qenë mënyra kur janë siguruar paraprakisht dhe ka qenë më e lirë… Ka pasur raste kur një subvencionim i tillë është bërë në familje, duke pasur parasysh që kemi edhe familje të varfëra, ndoshta familjet e tilla i kanë marrë ato të holla të cilat u kanë takuar për blerjen e librave për fëmijët e tyre. Por, një gjë e tillë, duke pasur mungesë ndoshta edhe të produkteve elementare për jetesë, apo mjete i kanë shpenzuar për jetesë. Ndërsa, nxënësi ka shkuar ndoshta edhe tërë vitin pa libra”, potencon Shala.

SBASHK-u ka zhvilluar protestën e fundit më 4 dhjetor 2024 duke kërkuar rritje të pagave dhe nënshkrimin e Kontratës Kolektive. /KP/

The post Shkollat në prag të grevës, SBASHK vendos ultimatum për dialog me MASHTI-n appeared first on Telegrafi.

Aktorja e njohur dhe e dashur për publikun shqiptar, Olta Gixhari, vazhdon të mbetet një ndër emrat më të komentuar në rrjetet sociale.

Së fundmi, ajo po shijon disa ditë pushimi në një destinacion luksoz, prej nga ka ndarë me ndjekësit e saj disa imazhe mjaft tërheqëse.

E veshur me një fustan të shkurtër dhe të ngushtë, Olta ka theksuar linjat e saj trupore, ndërsa dukja e saj provokuese ka marrë vëmendjen jo vetëm të pushuesve në vendin ku ndodhet, por edhe të fansave online.

Postimet e aktores kanë marrë me dhjetëra komente dhe pëlqime, duke dëshmuar edhe një herë popullaritetin e saj të madh në publik.

Olta përndryshe këtë vit ka qenë e angazhuar si analiste në spektaklin shumë të ndjekur, Big Brother VIP Kosova, teksa nuk është bërë ende e ditur nëse do të jetë prapë në sezonin tjetër. /Telegrafi/

The post Olta Gixhari mahnit ndjekësit me poza provokuese nga pushimet luksoze appeared first on Telegrafi.

Kompania Rajonale e Ujësjellësit “Prishtina” ka bërë të ditur se ka identifikuar një rast të keqpërdorimit të ujit, ku një konsumator kishte lidhje ilegale për mbushjen e një pishine duke anashkaluar matësin e ujit.

Sipas njoftimit zyrtar, gjatë një kontrolli nga inspektorët e kompanisë është vërtetuar se pishina po furnizohej me ujë jashtë sistemit të ligjshëm, duke dëmtuar kështu edhe kompaninë edhe konsumatorët e tjerë.

“Nga inspektorët është identifikuar mbushja e pishinës përmes një lidhjeje ilegale, jashtë ujëmatësit. Konsumatori është shkyçur dhe do të vazhdohet me procedurat tjera përkatëse”, thuhet në reagimin e KRU “Prishtina”.

Në përfundim të njoftimit, kompania e ka quajtur këtë veprim “turp”, duke kërkuar nga qytetarët që të raportojnë raste të tilla dhe të kontribuojnë në përdorimin e drejtë dhe të ndershëm të resurseve ujore. /Telegrafi/

The post Mbushte pishinën me ujë të vjedhur – KRU “Prishtina” shkyç konsumatorin për lidhje ilegale appeared first on Telegrafi.

Pas vrasjes së një tjetër 14-vjeçari dy ditë më parë ën Maliq ka reaguar familja e Martyin Canit, 14-vjeçari i cili u vra me thikë po nga një bashkëmoshatar te shkolla “Fan Noli” në kryeqytet.

Në një deklaratë të shpërndarë për mediat, prindërit e Martin Canit shprehen se kjo tragjedi tregoi që mbyllja e TikTok nuk ishte zgjidhje, por vetëm një pretekst politik.

“Megjithë mbylljen e rrjetit social TikTok nga qeveria, një i mitur tjetër u vra nga një bashkëmoshatar në Maliq. Kjo tragjedi e re tregon qartë se mbyllja e TikTok nuk ishte zgjidhje, por vetëm një pretekst politik. Kush e ka radhën që të fajësohet tani për këtë krim të rëndë? Snapchat apo Instagram?”, thuhet në deklaratan e prindërve të Martinit, përcjell A2 CNN.

Ata kërkojnë nga qeveria masa konkrete për përmirësimin e sigurisë në shkolla për të parandaluar tragjedi të tilla. Sipas tyre 14-vjeçarë nuk u vranë nga rrjetet sociale por nga dështimi i sistemeve që duhet të mbrojnë jetën e fëmijëve.

Lexo po ashtu Mbyllja e Tik Tok, Familja Cani: Tragjedia jonë po përdoret për qëllime politike

“Ne kërkojmë që qeveria të ndërmarrë masa konkrete, jo thjesht reforma kozmetike për opinion publik. Kërkojmë veprime të dukshme dhe efektive për përmirësimin e sigurisë në shkolla, forcimin e bashkëpunimit me familjet, angazhimin e komunitetit dhe fuqizimin e sistemit shëndetësor. Vetëm me masa të tilla mund të parandalohen tragjedi të tjera dhe të shpëtohen jetë fëmijësh. Martini dhe Eraldi nuk u vranë prej rrjeteve sociale. Ata u vranë nga mungesa e sigurisë, nga papërgjegjësia institucionale dhe nga dështimi i sistemeve që duhet të mbrojnë jetën e fëmijëve. Mbyllja e një aplikacioni nuk e kthen mbrapsht realitetin dhe nuk zgjidh problemet”.

Ata i shprehin ngushëllimet familjes së të miturit në Maliq dhe apelojnë që tragjedi të tilla të mos përsëriten më.

“Në këtë moment dhimbjeje të madhe, shprehim ngushëllimet më të sinqerta për nënën dhe familjen e të miturit të vrarë në Maliq. E dimë se çfarë do të thotë të humbasësh dritën e jetës, dhe ndajmë me ta dhimbjen e pamasë. Zëri ynë bashkohet me të tyren në thirrjen për drejtësi dhe për masa të vërteta, që asnjë nënë tjetër të mos derdhë lot për fëmijën e saj”./a2cnn/

The post Vrasja e 14-vjeçarit në Maliq, reagon familja e Martin Canit: Mbyllja e TikTok nuk ishte zgjidhje, duhen masa konkrete appeared first on Telegrafi.

Një moment historik për gjyqtarët kosovarë në arenën ndërkombëtare. Për herë të parë, një ekip gjyqtarësh nga Kosova do të drejtojë një ndeshje të fazës “play-off” në garat evropiane të UEFA-s. 

UEFA ka deleguar Genc Nuzën si gjyqtar kryesor për sfidën mes Strasbourg dhe Brondby në kuadër të “play-offit” të Ligës së Konferencës, e cila do të zhvillohet të enjten në “Stade de la Meinau” në Francë, duke nisur nga ora 20:00. 

Ky është një tjetër vlerësim i madh për Nuzën, i cili është shpallur shtatë herë gjyqtari më i mirë në Kosovë, duke konfirmuar besimin e vazhdueshëm që institucioni më i lartë i futbollit evropian ka ndaj tij. 

Në këtë përballje, Nuza do të ketë përkrah asistentët Bujar Selimaj dhe Granit Hyseni. 

 Ndërkohë, në sistemin VAR do të jetë i angazhuar gjyqtari holandez Clay Ruperti, kurse AVAR do të jetë Dardan Çaka. 

 Rolin e gjyqtarit të katërt do ta mbajë Burim Jahmurataj. 

Ky delegim përfaqëson një hap të madh për përfaqësimin e Kosovës në futbollin evropian dhe një njohje të punës së palodhur të gjyqtarëve kosovarë në skenën ndërkombëtare./Telegrafi/

The post Gjyqtarët nga Kosova do të ndajnë drejtësinë në një ndeshje të fazës ‘play-off’ të Ligës së Konferencës appeared first on Telegrafi.

Me rastin e 18 Gushtit, Ditës së Armatës, sonte nga ora 19:00 në kazermën “Ilinden” do të bëhet qitje nderi artilerie me shkrepje të 10 togave nga 6 topa të batalionit të artilerisë së Armatës.

Siç informon Armata, më parë, në orën 18:00, do të kryhet një provë artilerie e qitjes me një breshëri të vetme.

Qitja nderi e artilerisë do të kryhet nga një njësi e batalionit të artilerisë së Armatës.

“Qitja e artilerisë si pjesë e detyrimeve protokollare të Armatës për shënimin e festave është pjesë e aktiviteteve të zhvilluara me rastin e 18 gushtit, Ditës së Armatës”, deklaron Armata.

The post Armata e Maqedonisë sot shënon ditën e saj appeared first on Telegrafi.

Në kuadër të manifestimit “Ditët e Diasporës”, mbrëmë në sheshin “Katër Dëshmorët” në Podujevë është mbajtur edicioni i parë i festivalit “Fli Fest”, një ngjarje që synon të promovojë trashëgiminë kulturore dhe kulinarinë tradicionale shqiptare.

Festivali mblodhi pjesëmarrës nga Kosova, Shqipëria, Mali i Zi, Maqedonia e Veriut dhe Lugina e Preshevës, të cilët prezantuan mënyra të ndryshme të përgatitjes së flisë, një ndër gatimet më autentike të kuzhinës shqiptare.

Ky bashkëdyzim kulturash dhe recetash e shndërroi Podujevën në një pikëtakim shijesh, duke përçuar mesazhin e unitetit dhe pasurisë kulturore mbarëkombëtare.

“Qëllimi i këtij festivali është të promovojë traditën tonë dhe njëkohësisht të nxisë turizmin lokal, duke e vendosur Podujevën në hartën e aktiviteteve kulturore dhe gastronomike të Kosovës,” u tha në njoftimin zyrtar të Komunës së Podujevës.

Në hapje të festivalit, të pranishmit i përshëndeti Drejtoresha për Kulturë, Rini dhe Sport, Vlora Humolli-Jashanica, e cila falënderoi grupet pjesëmarrëse për kontributin dhe bashkëpunimin në këtë iniciativë të re kulturore.

“Fli Fest” u prit me interes të madh nga qytetarët dhe vizitorët, duke dhënë sinjal pozitiv për edicionet e ardhshme të këtij festivali që tashmë është pozicionuar si pjesë e rëndësishme e kalendarit kulturor të Podujevës. /Telegrafi/

The post U mbajt “Fli Fest” në Podujevë, festivali i parë kushtuar flisë tradicionale appeared first on Telegrafi.

Khamzat Chimaev, i cili mposhti Dricus Du Plessis me vendim unanim të shtunën në mbrëmje në Çikago në UFC 319, mori rripin e peshës së mesme.  

Chimaev kaloi pjesën më të madhe të pesë raundeve duke kontrolluar kundërshtarin e tij në tokë. 

Në total, Chimaev kaloi 21 minuta e 40 sekonda duke kontrolluar kundërshtarin e tij, pjesërisht falë aftësive të tij në mundje. 

 Kjo është koha e dytë më e gjatë e kontrollit në UFC, pas 22 minutave të Sean Sherk kundër Hermes Franca në korrik 2007 në një ndeshje për titullin e peshave të lehta. 

Khamzat Chimaev’s (@KChimaev) 529 total strikes landed vs Dricus Du Plessis are a new @UFC record.

He earned 21:40 of control time, 2nd most in a UFC fight (22:18 by Sean Sherk vs Hermes Franca).

Complete #UFC319 Main Card Results https://t.co/69LHKjPUVp

— UFC News (@UFCNews) August 17, 2025

Chimaevit iu deshën më pak se dhjetë sekonda për ta rrëzuar rivalin e tij në tokë, pastaj përsëriti taktikat e tij të parashikueshme, por shumë efektive.  

Kundër Du Plessis, Chimaev shënoi 12 rrëzime dhe 529 goditje (nga 567 të tentuara), krahasuar me një rrëzim dhe 45 goditje për afrikano-jugorin.  

Lexo po ashtu Khamzat Chimaev “mbreti i ri” i kafazit, rrëzon nga froni Dricus Du Plessis për titullin e peshave të mesme

31-vjeçari regjistroi fitoren e tij të 15-të në MMA, të tetën në UFC, dhe vazhdon të mbetet i pamposhtur . 

Dricus Du Plessis kishte një shans të vogël në raundin final, por atij iu desh ta nokautonte kundërshtarin e tij për të fituar./Telegrafi/

The post Statistikat që e dëshmojnë dominimin e frikshëm të Chimaev ndaj Du Plessis appeared first on Telegrafi.

Situata e zjarrit në Parkun Natyror të Gërmenjit paraqitet disi më e qetë dhe nuk ka shumë vatra të reja të zjarrit, por sipërfaqja e prekur është zgjeruar më shumë.

Kjo është bërë e ditur nga autoritetet e qarkut të Korçës sipas të cilave, në terren sot janë rreth 65 forca të MZSH Kolonjë, drejtoria rajonale e Zonave të Mbrojtura, policia kufitare, shërbimi pyjor e vullnetarë.

Ato janë mbështetur edhe prej forcave të ushtrisë nga reparti i Drenovës, duke qenë se përhapja dje depërtoi në zonën e mbrojtur të pyllit dhe risku është i lartë.

“Besojmë që falë kësaj përpjekjeje sot situata të normalizohet, duke shpresuar që do të favorizohemi sot apo nesër edhe nga reshje shiu, sepse parashikimi i motit është i vranët”, njofton prefektura./a2cnn/

The post Zgjerohet sipërfaqja e zjarreve në Parkun e Gërmenjit, në terren 65 forca appeared first on Telegrafi.

Prokuroria Themelore në Mitrovicë, Departamenti i Krimeve të Rënda, ka njoftuar se Gjykata Themelore në Mitrovicë ka aprovuar kërkesën për caktimin e masës së paraburgimit ndaj dy të dyshuarve, E.S. dhe Sh.S., të cilët dyshohen për veprën penale “Blerja, posedimi, shpërndarja dhe shitja e paautorizuar të narkotikëve, substancave psikotrope apo analoge në vazhdim dhe në bashkëkryerje”.

Në këtë rast, i mituri U.S., ndaj të cilit Departamenti për të Mitur kishte parashtruar kërkesë, është vënë nën masën e arrestit shtëpiak.

Prokuroria ka njoftuar se arrestimet janë kryer pas hetimeve të koordinuara me Policinë, përfshirë edhe zbatimin e masave të veçanta hetimore.

“Gjatë aksionit janë gjetur dhe sekuestruar vetura, substanca narkotike të llojit marihuanë dhe kokainë, si dhe para të dyshuara,” thuhet në njoftimin e Prokurorisë.

Në përputhje me aktakuzën, të dyshuarit dyshohet se kanë kryer veprën penale sipas nenit 267 paragrafi 2, lidhur me nenin 31 dhe 77 të Kodit Penal të Republikës së Kosovës.

Prokuroria Themelore në Mitrovicë do të vazhdojë me procedurat ligjore në këtë rast. /Telegrafi/

The post Paraburgim për dy të arrestuarit në Mitrovicë për shitblerje të narkotikëve appeared first on Telegrafi.

Manchester United dikur kishte propozuar një marrëveshje shkëmbimi që mund ta kishte ndryshuar plotësisht mënyrën se si duket klubi sot. 

Si një nga klubet më të mëdha të futbollit në botë, United ka mundësinë të tërheqë disa nga talentet më të mira dhe më emocionuese në këtë sport. 

Emra si Cristiano Ronaldo, Wayne Rooney dhe Roy Keane kanë përfaqësuar “Djajtë e Kuq” gjatë viteve të fundit, duke treguar fuqinë tërheqëse që ka klubi. 

Megjithatë, ka edhe shumë lojtarë që janë lidhur me një kalim te Old Trafford por që kurrë nuk u bashkuan me klubin, përfshirë legjenda të sportit si Ronaldo Nazario dhe Zinedine Zidane. 

Lexo po ashtu Man Utd ka pesë alternativa për mesfushën pasi dështuan ta transferojnë Baleban

Më së fundmi, ekziston një marrëveshje shkëmbimi e propozuar që bie në sy si një prej atyre që mund të kishte ndryshuar ndjeshëm situatën aktuale të klubit po të ishte realizuar. 

Sipas një raporti të Sky Sports nga viti 2020, Juventusi gjithashtu dëshironte ta nënshkruante Lukakun në verën e vitit 2019, duke ofruar Dybalan si pjesë të marrëveshjes. 

Thuhet se United ishte i hapur ndaj marrëveshjes, por ajo përfundimisht dështoi kryesisht sepse Dybala nuk dëshironte të largohej nga Torino atë verë. 

Në vend të kësaj, Lukaku u bashkua me rivalët e Serie A, Milanin, ndërsa United e drejtoi vëmendjen te Bruno Fernandes, i cili iu bashkua klubit vetëm gjashtë muaj më vonë. 

Edhe pse është e pamundur të thuhet se si do të performonte Dybala po të ishte bashkuar me United, është e vështirë të imagjinohet që ndikimi i tij do të ishte i ngjashëm me atë të Fernandes./Telegrafi/ 

The post Man Utd tentoi një marrëveshje të çmendur shkëmbimi që do të kishte ndryshuar historinë e Ligës Premier appeared first on Telegrafi.

Fox News publikoi letrën nga zonja e parë e SHBA-së, Melania Trump, e cila iu dorëzua personalisht Vladimir Putinit nga presidenti i SHBA-së Donald Trump gjatë takimit në Alaska.

Çfarë thotë letra?

“I dashur President Putin,

Çdo fëmijë mbart të njëjtat ëndrra të heshtura në zemrën e tij, pavarësisht nëse lind në një peizazh të përulur rural apo në një qendër madhështore qyteti. Ata ëndërrojnë dashuri, mundësi dhe siguri nga rreziku.

Si prindër, është detyra jonë të ushqejmë shpresën e brezit të ardhshëm. Si udhëheqës, përgjegjësia jonë për të ardhmen e fëmijëve tanë shkon përtej rehatisë së disa njerëzve. Është e pamohueshme që ne duhet të përpiqemi të formësojmë një botë të mbushur me dinjitet për të gjithë – në mënyrë që çdo shpirt të mund të zgjohet në paqe dhe që vetë e ardhmja të jetë e mbrojtur në mënyrë të përsosur.

Një mendim i thjeshtë, por i thellë, z. Putin, me të cilin jam i sigurt se jeni dakord, është se pasardhësit e çdo brezi e fillojnë jetën e tyre me pastërti – një pafajësi që qëndron mbi gjeografinë, pushtetin dhe ideologjinë.

E megjithatë, në botën e sotme, disa fëmijë detyrohen të mbajnë buzëqeshje të qeta, të paprekura nga errësira përreth tyre – një gjest i heshtur sfide kundër forcave që mund t’u marrin të ardhmen.

Putin, vetëm ju mund t’ua ktheni të qeshurat melodioze.

Duke mbrojtur pafajësinë e këtyre fëmijëve, ju do të bëni më shumë sesa t’i shërbeni vetëm Rusisë – ju do t’i shërbeni vetë njerëzimit. Një ide kaq e guximshme tejkalon të gjitha ndarjet njerëzore, dhe ju, z. Putin, jeni njeriu i aftë ta realizoni këtë vizion me një të rënë të lapsit sot.

“Është koha”, thuhet në letrën e Melania Trump drejtuar presidentit rus.

Our incredible First Lady ⁦@MELANIATRUMP⁩ shared this powerful, deeply moving letter with President Putin. She speaks from the heart of every American in calling for a world where children, regardless of where they are born, can live in peace. pic.twitter.com/Soqrv1euAm

— Attorney General Pamela Bondi (@AGPamBondi) August 16, 2025

Siç raportoi Reuters dje, Trump i dorëzoi personalisht Putinit letrën e gruas së tij Putinit.

Ndryshe, Melania Trump, e cila ka lindur në Slloveni, nuk udhëtoi me presidentin amerikan në Alaska.

Ukraina ka argumentuar prej kohësh se rrëmbimi i dhjetëra mijëra fëmijëve të saj, të çuar në Rusi ose në territoret e pushtuara pa pëlqimin e familjeve ose kujdestarëve të tyre, është një krim lufte që përmbush kërkesat për gjenocid sipas konventës së OKB-së.

Moska, nga ana tjetër, pretendon se po “mbron fëmijët e cenueshëm” nga zona e luftës, të cilën Kievi dhe qeveritë perëndimore e konsiderojnë si propagandë. /Telegrafi/

The post Gruaja e Trumpit i shkruan letër Putinit: Tani është koha appeared first on Telegrafi.

Koalicioni VLEN përmes një komunikate për media thonë se Bujar Osmanit nuk i intereson  Çairi pasi për 20 vite ka ndërtuar vetëm karrierën e tij politike.

“Për 20 vite me radhë, Bujar Osmani ndërtonte karrierë politike, por nuk ndërtoi asnjë projekt për Çairin. Sot, ai bën sikur i intereson Çairi. Për dy dekada, Osmani ka qenë në funksionet më të larta shtetërore, por asnjë qytetar i Çairit nuk ka ndjerë mbështetje apo ndihmë nga ai. Sot shohim vetëm lojëra dhe fjalë boshe. Programe dhe plane shpall një njeri që për dy dekada nuk ka lënë asnjë gjurmë në Çair. Libër i zbrazët”, thonë nga VLEN.

Nga VLEN thonë se Bujar Osmani nuk është kandidat i Çairit, ai është kandidat për karrierën e tij.

“Ai kërkon mbështetje nga Çairi, jo për Çairin, por që të kthehet përsëri në pushtet. Nëse dëshiron të mësojë çfarë është Çairi, le të ecë nëpër rrugët e tij dhe të shohë gjendjen e vërtetë. Qytetarët e Çairit nuk duan më politikanë me fjalë boshe, karrieristë, por duan përkushtim, punë të vërtetë dhe rezultate konkrete. Jo vetëm që nuk solli projekte për Çairin, por Osmani as nuk shuan dot egon e tij personale. Përjashton edhe atë rini të pakët që ka mbetur në BDI, duke e përdorur si shtizë për flamuj partiakë e jo si potencial për ndryshim. Sot, ajo rini është larguar prej tij dhe është rreshtuar fuqishëm pas Izet Mexhitit dhe VLEN-it, sepse aty gjen vizion, perspektivë dhe respekt. Çairi ka nevojë për punë dhe zhvillim, jo për një politikan që për 20 vite e ka parë këtë komunë vetëm si shkallë për karrierë personale.” theksohet në komunikatën e VLEN-it.

The post VLEN: Bujar Osmani nuk ndërtoi asnjë projekt për Çairin, ai dëshiron vetëm kthimin në pushtet appeared first on Telegrafi.

Këngëtarja britanike Jessie J ka treguar se diagnoza me kancer të gjirit i ka ndryshuar tërësisht perspektivën për jetën, duke e shtyrë të ndjekë ëndrra e projekte që gjithmonë i kishte lënë pezull.

Artistja 37-vjeçare, e cila në qershor iu nënshtrua një mastektomie të plotë pasi mjekët zbuluan sëmundjen në fazë të hershme, është aktualisht në proces rikuperimi, shkruan DailyMail.

Në një video të publikuar në Instagram, ajo rrëfeu disa nga synimet e reja që dëshiron të realizojë: “Dua të shkruaj libra. Të bëj një album për fëmijë. T’i heq të gjitha tatuazhet. Të marr familjen time me pushime. Dua të mësoj të ngas biçikletën. Do të kisha dashur të mësoj edhe një gjuhë të huaj, por e di që s’ka për të ndodhur. Dua gjithashtu të gjej trajtimin e duhur për ADHD dhe OCD”.

Jessie shtoi se përvoja me kancerin i dha shtysën për t’i kthyer këto dëshira në realitet: “Kur kalon nëpër diçka të tillë, njerëzit thonë ‘je ndryshuar’. Por në fakt unë këto mendime i kam pasur gjithmonë. Thjesht kanceri të bën të veprosh, sepse kupton se jeta është e shkurtër. Dhe unë dua t’i bëj tani”.

Pak kohë më parë, këngëtarja ndau edhe momentin e vështirë pas operacionit, kur shpërtheu në lot duke parë plagët e saj.

“Mami po më masazhon gjoksin sepse unë s’mund t’i prek plagët. Fillova të qaja dhe thashë ‘Nuk mund ta besoj që më ka ndodhur mua kjo’. Ajo më tha ‘Do doja të isha unë në vendin tënd’ dhe ne të dyja shpërthyem në lot… jam e lumtur që nuk është ajo,” tregoi Jessie në një intervistë për The Sunday Times.

Mjekët i kishin thënë se falë zbulimit të hershëm nuk do t’i duhej as radioterapi apo kimioterapi, por për shkak të madhësisë së tumorit, iu desh të kryente një mastektomi të plotë.

Edhe pse e pret një ndërhyrje tjetër kirurgjikale për të përmirësuar simetrinë e implantit, Jessie është e vendosur të rikthehet fuqishëm në muzikë. Kënga e saj e re, Believe In Magic, do të publikohet më 29 gusht.

Ajo foli gjithashtu për djalin e saj dyvjeçar, Sky, të cilin e quajti “drita e jetës” gjatë gjithë betejës me sëmundjen.

Në një postim të gjatë në Instagram, Jessie sqaroi se nuk do të lejojë që operacionet apo problemet shëndetësore ta ndalin si nënë dhe artiste: “Mund të pushoj, të kujdesem për djalin dhe të publikoj muzikë të re. Kam 18 vite që lashë pas një label të madh, pikërisht që të mos frikësohem të shkruaj rregullat e mia dhe ta përshtas jetën me shëndetin tim. Një tjetër operacion më pret këtë vit – por unë mund ta përballoj. Po rris një fëmijë të vogël – mund ta bëj. Po sjell muzikë të re – mund ta bëj”.

Jessie shtoi: “Jeta kurrë nuk është e përsosur. Ka ulje-ngritje dhe thjesht duhet të vazhdojmë të jetojmë mes tyre. Kështu jam unë sot – duke jetuar – dhe dua që ju të keni muzikën time. Pranuar?”. /Telegrafi/

The post “Dua t’i heq të gjitha tatuazhet” – Jessie J zbulon se si kanceri e bëri të kuptonte se ‘jeta është shumë e shkurtër’ appeared first on Telegrafi.

Shoqata e Transportit të Autobusëve në relacionin Prishtinë – Podujevë ka njoftuar se duke filluar nga e hëna, kthimi i autobusëve nga Prishtina për në Podujevë do të bëhet nga Xhamia e Llapit, ashtu siç ka qenë më parë.

Ky ndryshim sipas Shoqatës është bërë për shkak të mungesës së një stacioni të përshtatshëm, gjë që sipas tyre rrezikon sigurinë e udhëtarëve, përfshirë nxënësit dhe banorët e lagjes së Llapit.

“Ky ndryshim është i domosdoshëm, sepse mungesa e një stacioni të përshtatshëm rrezikon sigurinë e nxënësve të shkollave, të qytetarëve të Llapit, si dhe të gjithë udhëtarëve që udhëtojnë në relacionin Prishtinë – Podujevë. Po ashtu, përderisa orarin e kemi nga Xhamia e Llapit, ligji është në anën tonë dhe na mbron në këtë vendim,” thuhet në njoftimin e Shoqatës.

Kjo pikë kthimi do të vlejë jo vetëm për udhëtarët e linjës kryesore për Podujevë, por edhe për ata që udhëtojnë përmes fshatrave si Orllan, Shajkoc dhe Majac, pasi ndalesa për ta do të bëhet po ashtu te Xhamia e Llapit – njësoj si në të kaluarën.

Shoqata i bën thirrje udhëtarëve që të marrin parasysh këtë ndryshim dhe të planifikojnë udhëtimet e tyre në përputhje me vendimin e ri. /Telegrafi/

The post Nga nesër, kthimi i autobusëve për Podujevë do të bëhet nga Xhamia e Llapit appeared first on Telegrafi.

Njësitë policore kanë ndërmarrë një sërë veprimesh gjatë 16 gushtit lidhur me armëmbajtje pa leje në zona të ndryshme të Kosovës, duke rezultuar me konfiskime armësh dhe arrestime.

Në fshatin Gushterica e Epërme, Graqanicë, rreth orës 08:30, është gjetur dhe konfiskuar një pushkë gjuetie në posedim të një mashkulli kosovar. Sipas raportit policor, i dyshuari nuk ka bashkëpunuar me autoritetet dhe dyshohet se ka probleme psikike, ndaj është dërguar për trajtim në repartin psikiatrik në Mitrovicë.

Më vonë rreth orës 21:45, në rrugën B në Prishtinë në një pikë kontrolli, është ndaluar një veturë me targa vendore, ku drejtuesi i saj, një mashkull kosovar ka pranuar se posedon armë.

Policia ka konfiskuar armën, e cila ka rezultuar pa municion. I dyshuari është intervistuar dhe rasti ka kaluar në procedurë të rregullt sipas vendimit të prokurorit.

Në fshatin Barilevë, rreth orës 22:35, është arrestuar një mashkull kosovar pasi dyshohet se ka shtënë me armë zjarri. Në vendngjarje janë sekuestruar një pistoletë me gaz dhe 16 gëzhoja. Pas intervistimit, me vendim të prokurorit, i dyshuari është liruar në procedurë të rregullt. /Telegrafi/

The post Arrestime dhe konfiskime armësh në Graqanicë, Prishtinë dhe Barilevë appeared first on Telegrafi.

Joan Garcia shënoi debutimin e tij zyrtar me Barcelonën duke ruajtur portën e paprekur në fitoren 3-0 në “Son Moix” ndaj Mallorcas në xhiron hapëse të La Ligas. 

Ai ofroi siguri mes shtyllave, megjithëse nuk pati shumë punë përballë një skuadre të Mallorcas që mbeti me nëntë lojtarë para përfundimit të pjesës së parë. 

Megjithatë, mbrëmja e 24-vjeçarit nuk kaloi pa dramë.  

Ai raportoi shqetësime në dorë gjatë nxehjes para ndeshjes dhe më vonë mori një goditje në fytyrë nga Vedat Muriqi, një episod që përfundoi me përjashtimin me karton të kuq të sulmuesit kosovar. 

After breaking a finger during warm-up, Muriqi tried to peel of Joan Garcia face during the game

he got sent offpic.twitter.com/L5lA8RxplT

— ArgentineCuler (@FCB_Argentine) August 16, 2025

Duke folur për mediat pas ndeshjes, Joan Garcia dha versionin e tij për incidentin me Muriqin, duke sqaruar momentin e kontaktit. 

“Më godet në fytyrë. Nuk e kam parë përsëritjen, por më godet në fytyrë. Nuk e di me cilën pjesë të trupit të tij, por më godet në fytyrë”. 

“Nëse VAR-i ka thënë që është karton i kuq, atëherë ashtu qenka. Tani do vendos pak akull”, ka thënë Garcia./Telegrafi/

The post Joan Garcia flet për ndërhyrjen brutale që i bëri Vedat Muriqi appeared first on Telegrafi.