Shtyhet seanca për dosjen “Plumbi i Artë” për në 2 shtator. Shkak mungesa e avokatit Artan Simoni që mbron bashkëpunëtorin e drejtësisë Nuredin Dumani.

Të pandehurit e dosjes “Plumbi i Artë” akuzohen për disa vrasje, atentate të mbetur në tentativë dhe vjedhje me dhunë, të zbardhura pas dëshmisë së bashkëpunëtorit të drejtësisë Nuredin Dumani. Pjesa më e madhe e krimeve janë kryer me pagesë.

Dumani është i pari në listën e SPAK si autor i 9 vrasjeve dhe tentativave për vrasje, si dhe 3 episode të vjedhjeve me dhunë.

Në këtë proces, SPAK ka 3 persona të penduar. Fillimisht për ngjarjet rrëfeu Nuredin Dumani, pas tij u pendua edhe Erion Alibej dhe Skerdi Tase, i cili ka dëshmuar në seancë pak ditë parë./abcnews.al

Ministria e Mbrojtjes në një komunikim zyrtar thotë se gjatë 24 orëve të fundit janë raportuar 17 vatra zjarri prej të cilave, 4 janë ende aktive. Këto vatra zjarri janë evidentuar në bashkitë: Dibër, Bulqizë, Mat, Vau i Dejës, Mallakastër, Lezhë, Mirditë, Gjirokastër, Përmet, Himarë, Finiq, Krujë, Tiranë, Kavajë, Rrogozhinë dhe Berat.

Aktualisht mbeten aktive vatrat:

Qarku Dibër. Në vendin e quajtur “Liqeni i Luleve”, pjesë e Parkut Kombëtar Lurë ka vijuar puna për shuarjen e zjarrit të rënë në një sipërfaqe pyjore me pisha dhe livadh. Si pasojë, deri tani është përshkuar një sipërfaqe rreth 200 ha me pyje pishe dhe ahu. Sot, 30 forca operacionale vendore dhe 30 efektivë të Forcave të Armatosura, po vazhdojnë punën për shuarjen e zjarrit.

Në vendin e quajtur “Mali i Peladhisë”, njësia administrative Zerqan, bashkia Bulqizë vijon puna për shuarjen e zjarrit të riaktivizuar. Si pasojë, deri tani është përshkuar një sipërfaqe rreth 30 ha me shkurre dhe barishte.

Qarku Shkodër. Në vendin e quajtur “Qafa e Lacit”, bashkia Vau-Dejës, ka vijuar puna për shuarjen e vatrës së zjarrit të rënë në datë 15.07.2025 në një sipërfaqe prej rreth 25 ha me lis, dushk, shkurre dhe barishte.

Qarku Fier. Forcat po punojnë për shuarjen e zjarrit në fshatin Drenovë, njësia administrative Qendër Dukas, bashkia Mallakastër. Terreni malor dhe era e fortë e kanë vështirësuar situatën. Pranë vatrës ndodhet gjithashtu një pus gazi, që përbën rrezik të shtuar. Sipërfaqja e djegur dhe e përshkuar në total llogaritet rreth 120 ha shkurre dhe pyll me pisha, si dhe janë dëmtuar dhe djegur mbi 1000 rrënjë ullinj. Sot, 36 forca operacionale vendore dhe 40 efektivë të Forcave të Armatosura, po vazhdojnë punën për shuarjen e zjarrit. Në ndihmë të tyre ka shkuar edhe helikopteri Cougar.

Kryesisht zjarret janë regjistruar në sipërfaqe me shkurre dhe bimësi, ku si pasojë janë djegur më shumë se 381 hektarë sipërfaqe dhe mbi 1000 rrënjë ullinj.

Në operacionet për shuarjen e zjarreve u angazhuan 27 automjete zjarrfikëse dhe 288 forca operacionale. Gjithashtu, në operacionet e ditës së djeshme mori pjesë edhe helikopteri Cougar i Forcave të Armatosura. Sot, që prej orës 06:00, në operacionet e shuarjes së zjarrit janë angazhuar 70 forca ushtarake dhe 2 helikopterë nga Forcat e Armatosura.

Bazuar në parashikimet e Institutit të Gjeoshkencave, sot priten reshje të dobëta në qarqet Shkodër dhe Kukës, ndërsa në qarqet e tjerë priten reshje lokalisht të dobëta.

Sa u përket zjarreve në pyje, sot pritet nivel rreziku “I LARTË” në qarqet Tiranë, Elbasan, Fier, Berat, Korçë dhe Gjirokastër nivel rreziku “I MODERUAR” në të gjitha qarqet e tjera.

Nё disa qarqe pritet rrezik “I LARTË”, vetёm nё zona tё lokalizuara, konkretisht: qarku Shkodër (Jug-Perëndim).

Strukturat e Mbrojtjes Civile janë të gjitha të angazhuara, për t’i ardhur në ndihmë komunitetit, në rast nevoje.

Ftojmë qytetarët të bëjnë kujdes, duke shmangur ndezjen e zjarreve në mjedise të hapura dhe të raportojnë menjëherë pranë shërbimeve zjarrfikëse çdo vatër që konstatojnë./abcnews.al

Vijojnë kontrollet në vijën bregdetare, në vijim të operacionit policor të koduar “Plazhi i lirë”, me qëllim lirimin e hapësirave publike. Lirohen hapësira të tjera në plazhin e Currilave, që ishin zënë në mënyrë të paligjshme.

“Gjatë kontrolleve, në hapësira publike, në plazhin e Currilave, në lagjen nr. 1, u hoqën dhe u sekuestruan në total 91 komplete me çadra dhe shezlongë, që ishin vënë në mënyrë të paligjshme nga 3 shtetas. Në vijim të veprimeve, u referuan materialet në Prokurori ku nisi procedimi në gjendje të lirë për shtetasit B. D., 33 vjeç, D. V., 56 vjeç dhe E. H., 34 vjeç, të tre banues në Durrës”, njofton policia.

Shërbimet e Policisë do të vijojnë kontrollet përgjatë gjithë vijës bregdetare, me qëllim lirimin e hapësirave publike, për pushuesit, dhe verifikimin e aktiviteteve që kryejnë subjektet, gjatë sezonit veror./abcnews.al

Presidentja e Komisionit Evropian, Ursula von der Leyen, ka propozuar taksa të reja për kompanitë e mëdha, produktet e duhanit dhe mbeturinat elektronike, si pjesë e një projekti buxheti prej 2 trilionë eurosh për periudhën 2028-2034.

Në një konferencë për shtyp, e cila u shty disa orë për shkak të negociatave intensive mbi shifrat, Von der Leyen tha se ky buxhet synon të përballojë sfidat e Europës dhe të forcojë pavarësinë e saj.

“Ky është një buxhet prej 2 trilionë eurosh për një epokë të re… që adreson sfidat e Europës dhe forcon pavarësinë tonë,” deklaroi ajo.

Propozimet parashikojnë një rritje pesëfish të fondeve të BE-së për mbrojtjen, trefishim të fondeve për migracionin dhe menaxhimin e kufijve, si dhe dyfishim të buxhetit për kërkimin shkencor, ku 35% e tij do të jetë e dedikuar për klimën dhe biodiversitetin. Po ashtu, është planifikuar një fond prej 100 miliardë eurosh për Ukrainën, të cilën Komisioneri për Buxhetin e BE-së, Piotr Serafin, e quajti “partnerin tonë më strategjik”.

Megjithatë, politikanët dhe organizatat mjedisore reaguan me zemërim, pasi duket se fondi i vetëm i dedikuar për mbrojtjen e natyrës në BE do të hiqet për të thjeshtuar buxhetin, duke reduktuar ndjeshëm numrin e programeve.

Rasmus Nordqvist, eurodeputet i partisë së Gjelbër daneze, e konsideroi këtë si një vendim “jo të përgjegjshëm dhe afatshkurtër” dhe paralajmëroi se kriza e biodiversitetit do të thellohet pa ndërhyrje.

Kritika pati edhe nga fermerët dhe Parlamenti Evropian për planin e bashkimit të politikave emblemë të BE-së, përfshirë politikën e përbashkët bujqësore dhe fondet rajonale, në një fonde të vetme me më pak programe të dedikuara.

Grupi bujqësor Copa-Cogeca organizoi një protestë të vogël por të zëshme para selisë së Komisionit Evropian, duke thënë se “thelbësisht po minohet dhe shkatërrohet politika bujqësore evropiane, në një ditë që mund të quhet E Mërkura e Zi në Bruksel”.

Zyrtarët e BE-së hodhën poshtë këto akuza, duke siguruar se pagesat direkte për fermerët, në vlerë prej 300 miliardë eurosh, do të mbeten të paprekura.

Në një shenjë të konflikteve të forta që priten, kryeministri hungarez Viktor Orbán — i cili pothuajse pengoi buxhetin e kaluar të BE-së, shprehu sërish kundërshtimin ndaj mbështetjes për Kievin: “Brukseli nuk duhet të braktisë fermerët evropianë për të financuar Ukrainën,” tha ai.

Von der Leyen theksoi se buxheti i saj do të lejojë që qeveritë kombëtare me buxhete të ngushta të mos duhet të paguajnë më shumë, duke prezantuar pesë masa të reja për të rritur të ardhurat e BE-së.

Ajo propozon të arkëtohen taksa nga sistemi evropian i tregtimit të emetimeve, taksa kufitare mbi karbonin, taksa për kompanitë me qarkullim mbi 100 milionë euro, si dhe tatime mbi duhanin dhe mbeturinat elektronike. BE-ja financohet tashmë pjesërisht nga të ardhurat nga taksat doganore.

Ministrat e financave nga vendet që kontribuojnë më shumë sesa marrin, shprehën shqetësim të menjëhershëm. Ministri holandez i financave, Eelco Heinen, tha se buxheti i propozuar është shumë i lartë, ndërsa Suedia deklaroi: “Problemet e BE-së nuk zgjidhen me një buxhet më të madh.”

Gjermania ka kërkuar që buxheti të mos rritet, ndërsa Franca po përballet me sfida të brendshme buxhetore që mund të destabilizojnë qeverinë.

Në kontrast, një grup eurodeputetësh nga qendra e djathtë, socialistët, liberalët dhe të gjelbrit u shprehën se planet nuk “sigurojnë fonde të mjaftueshme për prioritetet kritike, si konkurrueshmëria, kohezioni, bujqësia, mbrojtja, adaptimi ndaj klimës” dhe shpenzime të tjera ekonomike.

Shtimi i kompleksitetit vjen nga fakti që nga viti 2028 BE-ja duhet të nisë shlyerjen e huave të marra për fondin e rimëkëmbjes prej 750 miliardë eurosh pas pandemisë. Komisioni ka vlerësuar më parë se janë të nevojshme 25-30 miliardë euro në vit për shlyerjen e këtyre borxheve, që është dyfish i buxhetit aktual për kërkimin.

Buxheti aktual shtatëvjeçar, pa përfshirë fondin e rimëkëmbjes, arrin në 1.2 trilionë euro, rreth 1% e madhësisë së ekonomisë evropiane.

Ky buxhet duhet të miratohet në mënyrë unanime nga 27 shtetet anëtare dhe Parlamenti Evropian./abcnews.al

Zërat për ndryshime në qeveri kanë kohë q% kanë qarkulluar në Ukrainë  tani ato janë bërë realitet. Të mërkurën, parlamenti ukrainas miratoi dorëheqjen e kryeministrit Denys Shmyhal. Kabineti u shpërbë automatikisht. Shmyhal kishte shërbyer më parë për më shumë se pesë vjet – më gjatë se çdo kryetar tjetër qeverie ukrainas para tij. Dy ditë më parë, Presidenti Volodymyr Zelensky kishte propozuar ish-Ministren e Ekonomisë, Yulia Svyrydenko në krye të qeverisë së. 39-vjeçarja kishte qenë më parë zëvendëse e Shmyhal dhe u bë e njohur gjatë negociatave disajavore për një marrëveshje për lëndët e para me Shtetet e Bashkuara,  e cila u nënshkruan në Uashington në fund të prillit. Svyrydenko dëshmoi të ishte një negociatore e fortë.

Zelensky tha se ishte e nevojshme të ristrukturohej ekzekutivi në vend, mënyrë që të zbatoheshin marrëveshjet e arritura me partnerët ndërkombëtarë. Presidenti ukrainas deklaroi se priste së shpejti një program të ri qeveritar.

A mund të bëhet ndryshim qeverie nën gjendjen e jashtëzakonshme?

Parlamenti ukrainas pritet të votojë qeverinë e re që të enjten (17 korrik). Megjithatë, neni 10 i gjendjes së jashtëzakonshme thotë se kompetencat e presidentit, parlamentit, qeverisë, Bankës Kombëtare dhe disa organeve të tjera shtetërore nuk mund të ndërpriten gjatë vendosjes së tij. Përfaqësuesit e opozitës dyshojnë në legjitimitetin e ndryshimit të qeverisë. “Parlamenti kohët e fundit e zgjati afatin e gjendjes së jashtëzakonshme dhe mund të shkelë Nenin 10 me këtë, megjithëse të gjithë bien dakord se legjislacioni duhet të më parë precizohet ose ndryshohet “, tha Yaroslav Zheleznyak, një anëtar i fraksionit opozitar “Holos”- “Zëri”.

Ishte presidenti i pakënaqur me qeverinë?

Studiuesi i shkencave politike dhe bashkëthemeluei i Platformës Kombëtare për Qëndrueshmëri dhe Kohezion, Oleh Saakyan, është i mendimit, se parlamenti do të votojë për këtë rezolutë për shkak të oportunitetit politik, duke injoruar ligjet. Saakyan argumenton se ky ndryshim i qeverisë “është i vonuar”, në fakt ai ishte planifikuar për vitin 2024.

Arsyet kryesore për këtë janë tensionet e vazhdueshme brenda qeverisë dhe “një numër problemesh të dukshme të menaxhimit” në fusha të ndryshme të politikave qeverisëse – nga sektori i mbrojtjes te infrastruktura dhe politika sociale. “Qeveria dëshiron të qetësojë publikisht disa nga këto tensione. Ata duan të fitojnë ‘kredibilitet të ri’, si të thuash, në kohën e duhur”, thekson eksperti. Ndëtsa Volodymyr Fesenko, politolog dhe kreu i Qendrës Ukrainase për Studimet Politike të Aplikuara “Penta”, dyshon megjithatë se ndryshimi i kreut të qeverisë do të sjellë ndryshime të mëdha politike të brendshme. “Vendimet kryesore politike do të vazhdojnë të merren në zyrën presidenciale dhe Svyrydenko, ashtu si qeveria, do t’i zbatojë ato”, tha Fesenko. Svyrydenko, që më parë ka qenë zëvendëskryetare e administratës presidenciale nën Andriy Yermak, konsiderohet si e besuara e Zelensky-t dhe një politikane e re dhe dinamike që potencialisht mund të sjellë qasje të reja. Fesenko thekson se Svyrydenko ka “përvojën e nevojshme në punën në kushte lufte dhe në marrëdhëniet me institucionet ndërkombëtare”.

Do të ndryshojë puna e qeverisë?

Petro Oleshchuk, ekspert i politikës në Universitetin Taras Shevchenko në Kiev, beson se pavarësisht disa skandaleve të korrupsionit në kabinetin qeveritar, Zelensky dëshiron të tregojë se ai ende ka një ekip që do të vazhdojë të punojë me të – aq më tepër që qeveria nuk do të ndryshohet plotësisht dhe një numër ministrash do të mbeten në detyrë.

Edhe Denys Shmyhal nuk pritet të largohet plotësisht nga qeveria, përkundrazi pritet të bëhet Ministër i Mbrojtjes. “Transferimi i Shmyhal në një pozicion tjetër brenda qeverisë synon të tregojë se nuk ka mosmarrëveshje të brendshme. Këto janë thjesht ndryshime personeli brenda një ekipi”, tha Oleshchuk për DW.

Nga ana tjetër, eksperti Oleh Saakyan beson se ndryshimi i pjesshëm i qeverisë tregon një mungesë akute të personelit të kualifikuar dhe të besueshëm. Ministrat e rinj dhe ata aktualë janë të detyruar të japin rezultate shpejt. Saakyan është skeptik në lidhje me perspektivat afatgjata. “Kjo është një dozë adrenaline për qeverinë aktuale. Por nuk do ta ndryshojë në thelb cilësinë”, thekson eksperti politik ukrainas.

Ndërkohë, Presidenti Zelensky ka përcaktuar tashmë prioritetet kryesore për qeverinë e re të ardhshme, duke përfshirë rritjen e prodhimit vendas të armëve, zhvillimin e projekteve të mbrojtjes dhe liberalizimin gjithëpërfshirës të ekonomisë./DW

Presidenti amerikan Donald Trump ka deklaruar se kompania Coca-Cola ka rënë dakord të përdorë sheqer kallami natyral në vend të shurupit të misrit në pijet e saj të shitura në Shtetet e Bashkuara.

“Kam biseduar me përfaqësuesit e Coca-Cola për përdorimin e sheqerit të vërtetë nga kallami në Coca-Cola që shitet në SHBA, dhe ata kanë rënë dakord,” shkroi Trump në rrjetin e tij social Truth Social. “Dua të falënderoj të gjithë ata në drejtuesit e Coca-Cola.” Ai e cilësoi këtë si një vendim “shumë të mirë” dhe shtoi: “Do ta shihni. Është thjesht më e mirë!”

Aktualisht, Coca-Cola që shitet në SHBA është zakonisht e ëmbëlsuar me shurup fruktoze misri, një përbërës që ka shkaktuar debat për ndikimin e tij në shëndet. Robert F. Kennedy Jr., Sekretari i Shëndetësisë në administratën e Trump dhe një kritik i hershëm i përbërësve të përpunuar, ka ngritur shqetësime për efektet e mundshme të këtij ëmbëlsuesi në shëndetin publik.

Pavarësisht deklaratës së Trump, Coca-Cola nuk e ka konfirmuar zyrtarisht ndryshimin e recetës. Në një deklaratë të shkurtër, një zëdhënës i kompanisë tha: “E vlerësojmë entuziazmin e Presidentit Trump” dhe shtoi se “së shpejti do të ndajmë më shumë detaje mbi produktet e reja dhe inovative brenda gamës sonë të Coca-Cola”.

Ndërkohë, sheqeri kallami përdoret në variantet e Coca-Cola në vende të tjera si Meksika, Britania e Madhe dhe Australia, ndërsa versioni amerikan mbetet kryesisht me shurup misri.

Në muajin prill, CEO i Coca-Cola, James Quincey, deklaroi para investitorëve se kompania “po vazhdon të bëjë përparim në reduktimin e sasisë së sheqerit në pijet tona”, duke theksuar ndryshimet në receta dhe strategjitë e marketingut global.

Megjithatë, kjo lëvizje mund të mos pritet mirë nga fermerët amerikanë të misrit. Presidenti i Shoqatës së Rafinerëve të Misrit, John Bode, paralajmëroi se zëvendësimi i shurupit të misrit me sheqer kallami “do të sillte humbjen e mijëra vendeve të punës në industrinë amerikane ushqimore, do të ulte të ardhurat e fermerëve dhe do të rriste importet e sheqerit të huaj, pa asnjë përfitim ushqyes.”

Kjo çështje është pjesë e një nisme më të gjerë të quajtur “Make America Healthy Again”, e mbështetur nga Sekretari Kennedy, e cila synon eliminimin e përbërësve të kontestuar si shurupi i misrit, vajrat bimore të rafinuara dhe ngjyruesit artificialë nga produktet ushqimore në SHBA. Kennedy ka kritikuar gjithashtu konsumin e lartë të sheqerit në vend dhe raportohet se këtë verë do të propozojë udhëzime të reja dietike në nivel kombëtar.

Ndërkohë, vetë Trump njihet për konsumimin e rregullt të Diet Coke, e cila përdor ëmbëlsues artificial aspartame. Ai kishte madje një buton të posaçëm në tavolinën e tij në Shtëpinë e Bardhë për t’i shërbyer menjëherë pijen e preferuar./abcnews.al

Tre djem në të njëzetat janë dënuar me burg nga autoritetet suedeze për rolin e tyre në vrasjen e reperit të njohur C Gambino, emri i vërtetë i të cilit ishte Karar Ramadan. Artistit, i cili vetëm një muaj më parë ishte shpallur “Hip-Hop Artist i Vitit 2023” në ceremoninë e çmimeve muzikore Grammis të Suedisë, iu mor jeta në një atentat të armatosur në qytetin Gothenburg gjatë qershorit të vitit 2024.

Ngjarja ndodhi në një parkim me shumë kate, ku 26-vjeçari u qëllua disa herë në atë që gjykata e përshkroi si një sulm “të planifikuar dhe me karakter ekzekutimi”. Edhe pse C Gambino arriti të kërkonte ndihmë pas të shtënave, ekipet emergjente patën vështirësi në komunikim për shkak të një defekti teknik dhe u detyruan të ndërvepronin përmes thirrjeve me zë të lartë. Ai ndërroi jetë në spital rreth një orë pas plagosjes.

Hetimi nuk çoi në gjetjen e armës së krimit, ndërsa makina e përdorur nga autorët u gjet e djegur. Prokuroria deklaroi se motivi i vrasjes mbetet i paqartë, por dyshohet se ngjarja ka lidhje me përplasje mes bandave rivale. Megjithatë, nuk ka asnjë provë që tregon se vetë viktima kishte lidhje me ndonjë grup kriminal.

Në mungesë të provave biologjike, hetuesit përdorën sinjalet e telefonave celularë dhe analizuan orë të tëra pamjesh sigurie nga kamerat në zonë, për të rindërtuar lëvizjet e autorëve. Këto pamje treguan se automjeti i përdorur për krimin ishte futur në parkim më shumë se një javë përpara vrasjes. Autorët kishin qëndruar për orë të tëra aty, duke pritur që C Gambino të kthehej nga palestra në orët e vona të mbrëmjes.

Gjykata e Gothenburg shpalli fajtorë tre të rinjtë për “ndihmë dhe nxitje të vrasjes”. Dy prej tyre u shpallën të pafajshëm për vetë aktin e vrasjes, pasi nuk u gjetën prova të mjaftueshme që të provohej se cili prej tyre kishte qëlluar me armën fatale.

Njëri nga të pandehurit, 22 vjeç, u dënua me burgim të përjetshëm. Dy të tjerët, të moshës 21 dhe 20 vjeç, morën dënime me nga 15 vite e gjysmë dhe 12 vite e gjysmë burg. Ndërkohë, një person i katërt, 19 vjeç, u shpall fajtor për djegien e makinës së përdorur në krim dhe u dënua për këtë vepër./abcnews.al

Tetë foshnja kanë lindur në Mbretërinë e Bashkuar duke përdorur material gjenetik nga tre persona, në një përpjekje për të parandaluar sëmundjet mitokondriale të trashëguara, shpesh fatale dhe të pashërueshme kanë bërë të ditur mjekët britanikë.

Teknika, e zhvilluar nga shkencëtarë në Newcastle të Anglisë, përfshin kombinimin e vezës dhe spermës së prindërve biologjikë me një vezë të dytë nga një grua donatore, me qëllim që të përdoren mitokondri të shëndetshme.

Ligji që lejon përdorimin e kësaj metode është miratuar që para një dekade në Britani, por këto janë rastet e para që tregojnë se teknika ka çuar në lindjen e fëmijëve pa sëmundje mitokondriale.

Çfarë janë sëmundjet mitokondriale?

Sëmundjet mitokondriale janë çrregullime të trashëguara që prekin mënyrën se si qelizat prodhojnë energji. Ato kalojnë nga nëna te fëmija përmes mitokondrive — struktura mikroskopike brenda çdo qelize, që veprojnë si “termoqendra” të trupit. Kur mitokondritë janë të dëmtuara, trupi nuk mund të prodhojë energji të mjaftueshme, gjë që mund të çojë në dëmtime të trurit, zemrës, muskujve, madje edhe vdekje të hershme.

Rreth një në çdo 5,000 foshnja lind me një formë të sëmundjes mitokondriale.

Si funksionon teknika e “tre prindërve”?

Procesi i njohur si “donacion mitokondrial” përfshin:

Marrjen e vezës nga nëna biologjike dhe një gruaje donatore,

Fertilizimin e të dyjave me spermën e babait,

Më pas, ADN-ja nga nëna dhe babai transferohet te embrioni që përmban mitokondritë e shëndetshme të gruas donatore.

Foshnja lind kështu me 99.9% të ADN-së nga prindërit biologjikë dhe rreth 0.1% nga gruaja donatore, një ndryshim i trashëgueshëm që kalon te brezat e ardhshëm nëse fëmija është vajzë.

Prindërit flasin për shpresën dhe falënderimin

Familjet që kanë përfituar nga kjo metodë nuk kanë dalë publikisht për të ruajtur privatësinë, por kanë ndarë deklarata përmes Qendrës së Fertilitetit në Newcastle.

“Pas viteve me pasiguri, kjo trajtim na dha shpresë dhe pastaj na dha fëmijën tonë,” tha nëna e një vajze të porsalindur.

Nëna e një djali shtoi: “Faleminderit këtij përparimi të jashtëzakonshëm dhe mbështetjes që morëm, tani familja jonë është e plotë. Pesha emocionale e sëmundjes mitokondriale është zëvendësuar me shpresë, gëzim dhe falënderim të thellë.”

Rezultatet e para: fëmijët janë të shëndetshëm

Sipas një studimi të publikuar në New England Journal of Medicine, 22 familje kanë përdorur këtë metodë në Newcastle. Deri tani janë lindur tetë foshnja, katër djem dhe katër vajza, përfshirë një çift binjakësh, ndërsa një shtatzëni është ende në vazhdim.

Prof. Bobby McFarland nga Shërbimi i Specializuar i NHS për Sëmundjet e Rralla Mitokondriale, tha: “Është jashtëzakonisht e bukur të shohësh lehtësimin dhe gëzimin në fytyrat e prindërve, pas gjithë atij pritjeje dhe frike.”

Të gjitha foshnjat kanë lindur pa shenja të sëmundjes mitokondriale dhe kanë përmbushur pritshmëritë zhvillimore. Në një rast u shfaq epilepsi, që kaloi vetvetiu, dhe një fëmijë ka ritëm të pazakontë të zemrës që po trajtohet me sukses. Nuk ka prova se këto probleme janë të lidhura me mitokondritë e dhuruara.

Sfida dhe të panjohura

Në disa raste, sasi të vogla mitokondrish të dëmtuara u gjetën në analizat e gjakut dhe urinës, por në nivele shumë të ulëta për të shkaktuar sëmundje. Kërkimi i mëtejshëm do të jetë i nevojshëm për të kuptuar se si të eliminohet rreziku i transmetimit të mitokondrive të dëmtuara.

Prof. Mary Herbert nga Universiteti i Newcastle dhe Monash University theksoi: “Rezultatet japin arsye për optimizëm, por kërkimi duhet të vazhdojë për të përmirësuar më tej rezultatet.”

Shpresë për familjet

Kat, një nënë britanike, ka dy vajza, Poppy, 14 vjeçe, e cila vuan nga sëmundja mitokondriale dhe është në karrocë, dhe Lily, 16 vjeçe, e cila mund të jetë bartëse e sëmundjes. Kat shprehet: “Edhe pse e duam Poppy-n ashtu siç është, kjo sëmundje e ka prekur çdo aspekt të jetës së saj.”

Lily thotë se teknologjia e re i jep shpresë brezave të ardhshëm: “Tani kemi mundësinë të shpresojmë për një jetë të zakonshme.”

Një arritje britanike

Mbretëria e Bashkuar jo vetëm që zhvilloi këtë teknologji, por ishte edhe vendi i parë në botë që e legalizoi pas një votimi historik në Parlamentin britanik në vitin 2015. Kjo u konsiderua një hap i madh dhe një ndryshim i përhershëm në trashëgiminë gjenetike njerëzore, duke hapur debat rreth etikës dhe rrezikut të krijimit të “foshnjave të dizajnuara”.

Prof. Sir Doug Turnbull, një nga shkencëtarët kryesorë që udhëhoqi kërkimin, tha: “Kjo nuk mund të ndodhte askund tjetër përveçse në Mbretërinë e Bashkuar shkencë e klasit të parë, legjislacion për ta mundësuar, dhe NHS për ta zbatuar. Tani kemi tetë fëmijë të shëndetshëm, çfarë arritjeje e mrekullueshme.”

Liz Curtis, themeluese e fondacionit The Lily Foundation, përfundon: “Pas shumë vite pritjeje, më në fund kemi prova që funksionon. Kjo është shpresa e parë reale për shumë familje për të thyer ciklin e kësaj sëmundjeje të trashëguar.”

Komisioni Evropian ka paralajmëruar Qeverinë e Gjeorgjisë për atë që e cilëson si “shkelje serioze të të drejtave dhe lirive themelore”, duke e vënë në dijeni se mosrespektimi i vazhdueshëm i rekomandimeve të Bashkimit Evropian mund të çojë në pezullimin e udhëtimit pa viza për qytetarët gjeorgjianë.

Në një letër drejtuar ministres së Jashtme, Maka Botchorishvili, drejtoresha e Përgjithshme për Migracionin dhe Punët e Brendshme, Beate Gminder, iu referua gjetjeve të Raportit të Shtatë për Mekanizmin e Pezullimit të Vizave, i miratuar nga Komisioni në dhjetor të vitit 2024.

Raporti evidentoi shkelje nga ana e Gjeorgjisë, sidomos në lidhje me parimin e mosdiskriminimit dhe legjislacionin që bie ndesh me standardet evropiane dhe ndërkombëtare.

Komisioni i bëri thirrje autoriteteve gjeorgjiane të shfuqizojnë Ligjin për “transparencën e ndikimit të huaj” dhe paketën legjislative për “vlerat familjare dhe mbrojtjen e të miturve”, si dhe të ndryshojnë strategjinë kombëtare për të drejtat e njeriut, për të garantuar plotësisht të drejtat e personave LGBTIQ. Rekomandime shtesë përfshijnë edhe ndryshimin e Ligjit për Byronë Kundër Korrupsionit për të garantuar pavarësinë efektive dhe neutralitetin politik të saj.

Për shkak të mungesës së veprimit nga ana e autoriteteve gjeorgjiane, BE-ja ka ndërmarrë tashmë hapa konkretë.

Në janar të vitit 2025, ajo pezulloi pjesërisht Marrëveshjen për Lehtësimin e Vizave dhe hoqi përjashtimin nga vizat për mbajtësit e pasaportave diplomatike dhe të shërbimit nga Gjeorgjia. Dymbëdhjetë shtete anëtare të BE-së tashmë kanë rikthyer kërkesat për viza për këto kategori, dhe pritet që të tjerat të ndjekin të njëjtën rrugë, sipas letrës.

Komisioni theksoi angazhimin e tij për të ruajtur marrëdhënie të forta dhe të bazuara në vlera me Gjeorgjinë, ndërsa i kërkoi qeverisë të raportojë për zbatimin e rekomandimeve deri në fund të muajit gusht.

“Besojmë se autoritetet gjeorgjiane do të përgjigjen në mënyrë konstruktive dhe do të ndërmarrin masat e nevojshme për të zbatuar plotësisht rekomandimet e Komisionit”, thuhet në letër, duke paralajmëruar se mospërmbushja e vazhdueshme mund të çojë në aktivizimin e mekanizmit të pezullimit të vizave, sipas nenit 8 të Rregullores së rishikuar për Vizat.

Kryeministri i qeverisë së udhëhequr nga partia Ëndrra Gjeorgjiane, Irakli Kobakhidze, e ka cilësuar deklaratën e BE-së për mundësinë e anulimit të liberalizimit të vizave si “shantazh” dhe “kërcënim”.

“Shoqëria duhet të gjykojë vetë se cilat janë qëllimet e zyrtarëve të caktuar evropianë, përfshirë ata të lëvizjes kombëtare kolektive, të cilët duan të rikthejnë në pushtet njerëzit që ndërtuan regjimin e përgjakshëm… Në sytë e shoqërisë gjeorgjiane, besimi në burokracinë evropiane dhe, fatkeqësisht, edhe në vetë Bashkimin Evropian, është tronditur seriozisht.”

“Duhet bërë gjithçka për ta kthyer këtë proces. Për këtë, para së gjithash, disa zyrtarë të caktuar evropianë duhet të heqin dorë nga ideja se ata që ndërtuan regjimin e përgjakshëm në Gjeorgji duhet të rikthehen në pushtet”, deklaroi Kobakhidze.

Liderët e partisë Ëndrra Gjeorgjiane i lidhin kritikat e Bashkimit Evropian dhe përfaqësuesve të tij me të ashtuquajturin “deep state”, duke theksuar se “ashtu siç ka nevojë Gjeorgjia për Evropën, edhe Bashkimi Evropian ka po aq nevojë për Gjeorgjinë”.

Diskutimet për rishikimin e bazës së udhëtimit pa viza me Gjeorgjinë nisën në BE që në vitin 2023, ndërsa një pjesë e punës u përfundua në vitin 2024.

Për më tepër, tash e disa muaj, mbajtësit e pasaportave diplomatike dhe të shërbimit nga Gjeorgjia kanë nevojë për vizë për të hyrë në disa shtete të BE-së.

Gjeorgjisë iu mundësua udhëtimi pa viza më 28 mars 2017, si rezultat i përmbushjes së kushteve të Planit të Veprimit./REL

Autoritetet kineze kanë rikonfirmuar të mërkurën se do të normalizojnë raportet me Parlamentin Evropian, teksa Pekini zyrtar ka për synim të thellojë raportet ekonomike e politike me Brukselin në mesin e tensioneve globale tregtare, ka raportuar Reuters.

“Viteve të fundit, shkëmbimet ndërmjet trupave legjislativë të Kinës dhe Evropës janë përballur me disa pengesa për arsye që dihen shumë mirë”, ka njoftuar Ministria e Jashtme e Kinës, tek iu ka referuar pretendimeve për abuzime me të drejtat e njeriut në rajonin e Xinjiangut.

“Në rrethanat e tanishme, të dyja palët besojnë se është shumë e rëndësishme që Kina dhe Evropa të përforcojnë dialogun dhe bashkëpunimin”, ka thënë zëdhënësja Lin Jian, duke shtuar se Pekini zyrtar dhe Parlamenti Evropian kanë vendosur për të hequr të gjitha kufizimet sa u përket shkëmbimeve të ndërsjella të ligjvënësve.

Komentet nga Ministria e jashtme e Kinës janë bërë pasi gazeta “South China Morning Post” kishte raportuar se Pekini ka hequr “kufizimet” ndaj ish-ligjvënësit të BE-së, Reinhard Buetikofer.

Normalizimi i raporteve ishte konfirmuar paraprakisht nga Parlamenti Evropian dhe Kina në fillim të këtij viti.

Në marsin e vitit 2021, Kina i kishte vendosur 10 zyrtarë dhe 4 entitete evropiane në listë të zezë, si kundërpërgjigje për sanksionet e Brukselit ndaj zyrtarëve kinezë në Xinjiang.

Komentet e së mërkurës janë realizuar gjithashtu përpara një samiti të liderëve Kinë-BE të planifikuar gjatë këtij muaji, ku presidentja e Komisionit Evropian, Ursula von der Leyen dhe presidenti i Këshillit Evropian, Antonio Costa, pritet të takohen me presidentin kinez Xi Jinping dhe kryeministrin Li Qiang në Pekin.

Një 78-vjeçar është gjetur i pajetë në rrugë, në lagjen “Dyli Haxhire” të Elbasanit. Sipas informacioneve paraprake të policisë, dyshohet se ka ndërruar jetë për shkaqe natyrale.

Trupi i pajetë është dërguar në morg, për kryerjen e ekspertizës. Grupi hetimor po punon për dokumentimin ligjor të rastit./abcnews.al

Një gjykatë turke dënoi të mërkurën kryetarin opozitar të Stambollit, Ekrem Imamoglu, me një vit e tetë muaj burg për fyerje dhe kërcënim ndaj një zyrtari publik.

Imamoglu, rival kryesor i presidentit Recep Tayyip Erdogan, ndodhet në burg që nga 23 marsi dhe pritet të apelojë vendimin, raporton AP.

Rasti lidhet me komentet e tij më 20 janar, ku ai kritikoi Prokurorin e Përgjithshëm të Stambollit, Akin Gurlek, duke e akuzuar për hetime të motivuara politikisht ndaj figurave opozitare.

Gjykata e shpalli Imamoglun fajtor për fyerje dhe kërcënim, por e liroi nga akuza për identifikim publik të zyrtarit me qëllim shënjestrimi.

Imamoglu e ka mohuar fajësinë, duke e quajtur procesin “ndëshkim, jo drejtësi”, dhe ka akuzuar gjyqësorin se vepron nën presionin e qeverisë.

Ai u arrestua bashkë me figura të tjera të Partisë Popullore Republikane, partia kryesore opozitare, si pjesë e një hetimi për korrupsion, arrestime që nxiten protestat më të mëdha në Turqi në mbi një dekadë.

Pavarësisht se ndodhet në burg, Imamoglu është shpallur zyrtarisht kandidat presidencial nga Partia Popullore Republikane për zgjedhjet që pritet të mbahen në vitin 2028, por që mund të përshpejtohen.

Që prej arrestimit të tij, dhjetëra zyrtarë të komunave të kontrolluara nga opozita janë përballur me arrestime për dyshime mbi manipulim tenderësh dhe ryshfet.

Opozita i ka quajtur këto akuza politike.

Ndërkohë, qeveria e Erdoganit këmbëngul se gjykatat janë të pavarura dhe veprojnë pa ndikim politik./REL

Read More...

Kryeministri Edi Rama ka ndarë këtë të mërkurë në faqen e tij zyrtare në Facebook një përditësim mbi interesin e madh për Paketën e Maleve, një nismë e re që synon të mbështesë zhvillimin ekonomik dhe turistik në zonat malore të Shqipërisë.

Ai publikoi hartën e aplikimeve, ku theksoi se brenda vetëm 5 ditëve nga hapja e thirrjes, janë regjistruar plot 787 aplikantë nga e gjithë Shqipëria.

“Kjo është një hartë frymëzuese e aplikimeve për Paketën e Maleve, ku në vetëm 5 ditë numërohen 787 aplikantë”, shkroi Rama, duke nënvizuar entuziazmin dhe interesin që ka gjeneruar kjo paketë tek qytetarët që jetojnë apo duan të investojnë në zonat malore.

Pritet që Paketa e Maleve të ketë një impakt të ndjeshëm në promovimin e turizmit të qëndrueshëm, zhvillimin rural dhe fuqizimin ekonomik të komuniteteve lokale.

/abcnews.al 

Ligjvënësit iranian kanë thënë të mërkurën se Republika Islamike nuk do të vazhdojë bisedimet bërthamore me Shtetet e Bashkuara të Amerikës, derisa të plotësohen disa parakushte të caktuara, ka shkruar Reuters.

“Kur SHBA-ja i përdor negociatat si një mjet për të mashtruar Iranin dhe për të mbuluar një sulm të papritur ushtarak nga regjimi zionist (Izraeli), bisedimet nuk mund të zhvillohen si më parë. Duhet të vendosen parakushte dhe nuk mund të ketë negociata të reja derisa ato të përmbushen plotësisht”, thuhet në deklaratën e trupit legjislativ.

Në deklaratë nuk specifikohen ose definohen parakushtet, porse kryediplomati iranian, Abbas Aragchi, kishte thënë kohë më parë se duhet të ofrohen garanci të forta që Teherani zyrtar s’do të sulmohet më.

Izraeli dhe SHBA-të patën lansuar sulme ndaj impianteve bërthamore të Iranit muajin e kaluar, duke pretenduar se ato kishin për qëllim të shkatërronin programin e orientuar drejt zhvillimit të armëve bërthamore. Në anën tjetër, lidershipi iranian ka argumentuar e konsideruar qëmoti se programi i tij bërthamor është tërësisht për qëllime civile.

Teherani dhe Washingtoni kishin zhvilluar pesë runde negociatash indirekte të ndërmjetësuara nga Omani përpara luftës 12-ditore, teksa kërkesë kyç e delegacionit amerikan ishte që Republika Islamike të hiqte dorë nga pasurimi i uraniumit.

Javën e kaluar, Aragchi e kishte riafirmuar qëndrimin se Teherani zyrtar nuk do të pranojë një marrëveshje që ia ndalon pasurimin e uraniumit, si dhe ka refuzuar të diskutojë për çështje të tjera jashtë këtij programi.

Presidenti amerikan, Donald Trump, ka thënë të martën se s’është aspak në nxitim për të negociuar me Iranin pasi që bazat e tij bërthamore tashmë janë “shkatërruar”, ndonëse SHBA-ja dhe tri vende evropiane janë pajtuar për të caktuar fundin e muajit gusht si afatin final për arritjen e marrëveshjes bërthamore.

Ministri i Punëve të Jashtme i Francës, Jean-Noel Barrot, ka theksuar po ashtu se Parisi, Londra e Berlini do ta aktivizojnë të ashtuquajturin mekanizmin “snapback” të Kombeve të Bashkuara, i cili do të rivendoste sanksionet ndaj Iranit, deri në fund të gushtit në rast se s’ka përparim konkret lidhur me marrëveshjen.

Është rrëzuar mocioni në rastin e Thaçit dhe të tjerëve.

“Trupi gjykues nuk është bindur që ai ka autoritet sipas rregullës 130 për të rrëzuar pjesë të akuzave ose fakteve materiale që formojnë pjesë të aktakuzës nëse për shkaqe kohe ose për shkaqe tjera. Mbi këtë bazë, trupi gjykues rrëzon mocionin e mbrojtjes sipas rregullës 130 në tërësinë e vet”, tha kryetari i trupit gjykues, Charles Smith.

Mbrojtja ka kërkuar që të rrëzohen të gjitha akuzat për krimet apo incidentet e kryera para majit të vitit 1998 dhe pas 20 qershorit 1999.

Kjo është periudha brenda së cilës ekipet Mbrojtëse janë të bindura se ka zgjatur konflikti i armatosur në Kosovë, ndryshe nga çfarë ka përfshirë ZPS në aktakuzë, pra krime gjatë periudhës mars 98 dhe shtator 99.

Vendimi u bë publik sot në Gjykatën e Hagës.

Ish-krerët e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi e Rexhep Selimi ndodhen në paraburgim në Hagë prej nëntorit të vitit 2020.

Fondacioni Humanitar për Gazën (GHF), i mbështetur nga Shtetet e Bashkuara dhe Izraeli, ka bërë të ditur se 20 persona kanë humbur jetën në atë që e ka cilësuar si një “incident tragjik” në një nga qendrat e shpërndarjes së ndihmave në jug të Rripit të Gazës.

Sipas një deklarate të fondacionit, 19 persona janë shkelur për vdekje dhe një tjetër është therur me thikë “gjatë një përplasjeje të dhunshme dhe të rrezikshme” në zonën e Khan Younis. Fondacioni shtoi se beson se përplasja është nxitur nga “nxitës brenda turmës”, të cilët, sipas tyre, ishin të lidhur me Hamasin.

Raporti nuk mund të verifikohej në mënyrë të pavarur.

Ndërkohë, zyrtarë nga Spitali Nasser në Khan Younis më herët bënë të ditur se mbi 10 persona kanë humbur jetën dhe të tjerë janë plagosur si pasojë e “mbytjes” që ndodhi pasi kontraktorët privatë të sigurisë të GHF-së mbyllën qendrën e ndihmave.

Një 78-vjeçar ka humbur jetën në mënyrë tragjike mëngjesin e sotëm në fshatin Fushë-Milot, pasi u përfshi nga flakët teksa ishte duke djegur mbeturina në bahçen e tij.

Viktima është identifikuar si Demer Haxhiu. Sipas burimeve paraprake, zjarri ka dalë jashtë kontrollit dhe ka përfshirë trupin e të moshuarit. Në vendngjarje kanë mbërritur shërbimet zjarrfikëse të Laçit dhe grupi hetimor, të cilët po punojnë për të zbardhur rrethanat e ngjarjes./abcnews.al

Administrata e presidentit Donald Trump ka njoftuar nisjen e një hetimi zyrtar ndaj praktikave tregtare të Brazilit, të cilat Uashingtoni i cilëson si “të padrejta dhe diskriminuese”.

Në një deklaratë zyrtare, Zyra e Përfaqësuesit të Tregtisë së SHBA-së (USTR) tha se hetimi do të përfshijë politikat braziliane që lidhen me tregtinë digjitale, shërbimet e pagesave elektronike, tarifat preferenciale ndaj partnerëve të tjerë dhe ndërhyrjet në çështje të korrupsionit.

Qëllimi i hetimit është të përcaktojë nëse këto praktika “janë të paarsyeshme apo diskriminuese dhe nëse ato pengojnë apo dëmtojnë tregtinë amerikane”.

Sipas përfaqësuesit amerikan të tregtisë, Jamieson Greer, hetimi është urdhëruar drejtpërdrejt nga presidenti Trump. Ai akuzoi Brazilin se ka ndërmarrë veprime kundër kompanive amerikane të rrjeteve sociale dhe ka zbatuar politika tregtare që dëmtojnë kompanitë, punëtorët, fermerët dhe inovatorët teknologjikë amerikanë.

“Kam arritur në përfundimin se barrierat tarifore dhe jotarifore të Brazilit meritojnë një hetim të thelluar dhe, nëse është e nevojshme, masa reciproke”, tha Greer.

Ai akuzoi gjithashtu Brazilin se po favorizon vendet e tjera me tarifa më të ulëta, duke vënë në disavantazh eksportet amerikane. Hetimi do të shqyrtojë gjithashtu përpjekjet e pretenduara të Brazilit për të ndëshkuar kompanitë amerikane në sektorin digjital për shkak të refuzimit të tyre për të censuruar përmbajtje me përmbajtje politike.

Një tjetër shqetësim i ngritur nga USTR është mungesa e zbatimit të duhur të të drejtave të pronësisë intelektuale në Brazil, gjë që – sipas deklaratës – dëmton punëtorët amerikanë që varen nga sektorë të mbështetur në inovacion dhe krijimtari.

Trump e kishte paralajmëruar këtë hetim në një letër drejtuar presidentit brazilian Luiz Inácio Lula da Silva javën e kaluar. Në të njëjtën letër, ai kishte shpallur një tarifë shtesë prej 50% ndaj produkteve braziliane duke nisur nga 1 gushti.

Presidenti Lula reagoi duke paralajmëruar se Brazili do të kundërpërgjigjej me masa të njëjta tarifore nëse SHBA zbaton tarifat e reja.

Vitin e kaluar, vlera e tregtisë ndërmjet dy vendeve arriti në 90 miliardë dollarë. SHBA raportoi një suficit tregtar prej 7.4 miliardë dollarësh me Brazilin për vitin 2024 – një rritje prej 33% krahasuar me një vit më parë.

Izraeli ka ndërmarrë sulme ajrore ndaj forcave qeveritare siriane në rajonin e Suweida-s, në jug të Sirisë, pas shpërthimit të përplasjeve të përgjakshme sektare mes milicive druze dhe fiseve beduine. Përleshjet nisën pas rrëmbimit të një tregtari druzi dhe përshkallëzuan shpejt në dhunë të armatosur, duke shkaktuar të paktën 200 të vdekur sipas Observatorit Sirian për të Drejtat e Njeriut (SOHR).

Izraeli tha se sulmet kishin për qëllim të parandalonin përdorimin e forcës nga regjimi sirian kundër komunitetit druzi, me të cilin ka lidhje të ngushta për shkak të popullsisë druze që jeton në Izrael dhe në Lartësitë Golan të pushtuara. Kryeministri Benjamin Netanyahu dhe ministri i Mbrojtjes Israel Katz thanë se do të vepronin për të mbrojtur druzët në Siri nga dhuna e forcave të Damaskut.

Qeveria siriane e dënoi ashpër ndërhyrjen izraelite, duke e cilësuar një akt agresioni dhe duke raportuar viktima si në radhët e ushtrisë, ashtu edhe mes civilëve. Ndërkohë, sipas burimeve lokale dhe SOHR, forcat qeveritare siriane janë akuzuar për ekzekutime të menjëhershme të civilëve druzë, djegie dhe plaçkitje të pronës private.

Pavarësisht shpalljes së një armëpushimi nga ministri i Mbrojtjes së Sirisë, luftimet vazhduan në disa pjesë të provincës. Një udhëheqës shpirtëror i komunitetit druzi u bëri thirrje luftëtarëve të rezistojnë “me çdo mjet”, duke akuzuar qeverinë për shkelje të marrëveshjes së armëpushimit.

Nga ana tjetër, Shtetet e Bashkuara i kanë kërkuar Izraelit të ndalojë sulmet ndaj ushtrisë siriane, ndërsa raportohet se Izraeli pranoi ta ndalë ofensivën nga mbrëmja e së martës.

Situata në Suweida përshkruhet si “katastrofike” nga banorët, me shumë njerëz që janë larguar nga qyteti për shkak të përplasjeve të armatosura, pavarësisht ndalim-qarkullimit të shpallur nga autoritetet. Shifrat e sakta të viktimave nuk janë verifikuar në mënyrë të pavarur, por raportohet për shumë të vrarë, përfshirë fëmijë, civilë druzë dhe beduinë, si dhe forca të sigurisë siriane.

Kjo është ndër përshkallëzimet më të rënda në jug të Sirisë që nga rënia e regjimit të Asadit dhe ka ringjallur tensionet ndërkombëtare lidhur me përfshirjen e aktorëve të jashtëm në konfliktin sirian.