MILANO, 25 korrik /ATSH-ANSA-DPA/ – Italia mbështet zgjidhjen me dy popuj, dy shtete, por njohja e shtetit të ri palestinez duhet të ndodhë njëkohësisht me njohjen e shtetit të Izraelit nga ana e tij, deklaroi sot ministri i Jashtëm italian, Antonio Tajani.

“Ne jemi të interesuar për paqen, jo për fitoren e njërit mbi tjetrin dhe ne jemi vendi në botë që ka mirëpritur numrin më të madh të refugjatëve nga Gaza”, theksoi ai, në hapje të Këshillit Kombëtar të “Forza Italia”-s.

“Nuk mund të pranojmë më masakra dhe uri”, theksoi ai.

“Ka ardhur koha për një armëpushim të menjëhershëm. Ne jemi miq të Izraelit, por ia kemi thënë Izraelit këtë”, shtoi Tajani.

Ndërkohë, Franca do ta njohë Palestinën si shtet, postoi presidenti Emmanuel Macron në platformën X të enjten në mbrëmje.

“Në përputhje me angazhimin e saj historik për një paqe të drejtë dhe të qëndrueshme në Lindjen e Mesme, kam vendosur që Franca të njohë shtetin e Palestinës”, shkroi Macron.

“Do ta shpall solemnisht këtë në Asamblenë e Përgjithshme të Kombeve të Bashkuara në shtator të këtij viti”, theksoi ai.

“Paqja është e mundur”, shkroi ai më tej.

Ai tha se u takon francezëve ta demonstrojnë këtë së bashku me izraelitët, palestinezët dhe partnerët evropianë dhe ndërkombëtarë./ /os/

The post ITALI – Tajani: Do ta njohim Palestinën, nëse ajo njeh Izraelin appeared first on Agjencia Telegrafike Shqiptare.

Numri i gazetarëve të vrarë në Rripin e Gazës që nga fillimi i luftës në vitin 2023 ka arritur në 232, sipas një deklarate të lëshuar sot nga Zyra për Media e Qeverisë së Gazës. Viktima më e fundit është fotoreporteri palestinez, Adam Abu Harbid, i cili humbi jetën gjatë kryerjes së detyrës së tij për të dokumentuar zhvillimet në terren.

Në deklaratën e publikuar në platformën Telegram, Zyra për Media e dënoi ashpër vrasjen e gazetarëve, duke e cilësuar atë si një fushatë të organizuar dhe të qëllimshme nga forcat izraelite për të heshtur zërat mediatikë palestinezë dhe për të penguar shpërndarjen e informacionit nga zona e konfliktit.

“Zyra për Media dënon në mënyrën më të ashpër vrasjen sistematike të gazetarëve palestinezë dhe vendosjen e tyre në shënjestër nga ana e okupatorit izraelit. Kjo përbën një shkelje të qartë të ligjit ndërkombëtar humanitar dhe të Konventave të Gjenevës, që garantojnë mbrojtjen e gazetarëve në zonat e luftës”, thuhet në deklaratë.

Zyra shton se vrasjet e gazetarëve nuk janë thjesht pasoja të luftës, por përfaqësojnë, sipas tyre, një strategji të qëllimshme për të fshehur të vërtetën dhe për të penguar dokumentimin e ngjarjeve që po ndodhin në Gazë.

Për këtë arsye, Zyra për Media i ka bërë thirrje të hapur organizatave ndërkombëtare të mediave, përfshirë Federatën Ndërkombëtare të Gazetarëve (IFJ), Federatën Arabe të Gazetarëve, si dhe shoqatave dhe unioneve të gazetarëve në mbarë botën, që të ngrejnë zërin kundër, siç thuhet, krimeve të përsëritura dhe sistematike ndaj punonjësve të medias në Gazë.

“Kërkojmë një reagim të qartë dhe të vendosur nga komuniteti ndërkombëtar i mediave për të ndalur këtë dhunë të paprecedentë ndaj gazetarëve dhe për të kërkuar mbajtjen përgjegjëse të autorëve të këtyre krimeve,” përfundon deklarata.

Organizatat ndërkombëtare të të drejtave të njeriut dhe liritë e shtypit janë nën presion në rritje për të hetuar rastet e raportuara të sulmeve ndaj gazetarëve dhe për të kërkuar llogaridhënie nga palët e përfshira në konflikt. /Telegrafi/

The post Mbi 230 gazetarë që nga nisja e luftës në Gaza appeared first on Telegrafi.

Sekretari amerikan i shtetit, Marco Rubio, deklaroi se Uashingtoni “e kundërshton fuqishëm” planin e presidentit francez, Emmanuel Macron për të njohur shtetin palestinez, ndërsa administrata e presidentit amerikan, Donald Trump njoftoi se nuk do të marrë pjesë në konferencën e ardhshme të Kombeve të Bashkuara që synon zgjidhjen me dy shtete për palestinezët.

Rubio, të enjten vonë, në rrjetin X kritikoi vendimin e Macronit, duke e quajtur atë një “vendim të pamatur” dhe duke thënë se ai “vetëm i shërben propagandës së Hamasit dhe pengon paqen”.

The United States strongly rejects @EmmanuelMacron’s plan to recognize a Palestinian state at the @UN general assembly.

This reckless decision only serves Hamas propaganda and sets back peace. It is a slap in the face to the victims of October 7th.

— Secretary Marco Rubio (@SecRubio) July 25, 2025

Më herët, Macron kishte deklaruar se do ta formalizojë vendimin e Francës për të njohur shtetin palestinez në Asamblenë e Përgjithshme të OKB-së në shtator.

“Në përputhje me angazhimin historik për një paqe të drejtë dhe të qëndrueshme në Lindjen e Mesme, kam vendosur që Franca të njohë Shtetin e Palestinës”, shkroi Macron në rrjetin X.

Aktualisht, të paktën 142 nga 193 shtetet anëtare të OKB-së e njohin ose planifikojnë të njohin shtetin palestinez. Megjithatë, disa vende perëndimore me ndikim – përfshirë Shtetet e Bashkuara, Mbretërinë e Bashkuar dhe Gjermaninë – e kanë refuzuar një gjë të tillë.

Anëtarë të Bashkimit Evropian si Norvegjia, Irlanda dhe Spanja njoftuan në muajin maj se kishin nisur procesin e njohjes së shtetit palestinez.

Por vendimi i Macronit do ta bënte Francën – një nga aleatët më të afërt të Izraelit dhe anëtare të G7-ës – shtetin më të madh dhe ndoshta më me ndikim evropian që e njeh Palestinën.

Fidèle à son engagement historique pour une paix juste et durable au Proche-Orient, j’ai décidé que la France reconnaîtra l’État de Palestine.

J’en ferai l’annonce solennelle à l’Assemblée générale des Nations unies, au mois de septembre prochain.… pic.twitter.com/7yQLkqoFWC

— Emmanuel Macron (@EmmanuelMacron) July 24, 2025

Kryeministri izraelit, Benjamin Netanyahu e dënoi këtë vendim, duke thënë se një hap i tillë “shpërblen terrorizmin dhe rrezikon krijimin e një vasali tjetër iranian”.

“Shteti palestinez në këto kushte do të ishte një platformë për shkatërrimin e Izraelit, jo për bashkëjetesë paqësore me të”, tha Netanyahu në rrjetin X.

Megjithëse pozicioni zyrtar i SHBA-së tradicionalisht mbështet një zgjidhje me dy shtete, vetë presidenti Donald Trump ka shprehur dyshime për realizueshmërinë e saj. Që kur u kthye në Shtëpinë e Bardhë në janar, Trump ka sugjeruar që SHBA mund të “marrë nën kontroll” Gazën, të zhvendosë mbi dy milionë palestinezë nga territori dhe ta shndërrojë atë në një “rivierë të Lindjes së Mesme”.

Ky plan i Trumpit është dënuar nga shumë organizata për të drejtat e njeriut, vende arabe, palestinezët dhe OKB-ja, duke e cilësuar si një formë të “spastrimit etnik”.

We strongly condemn President Macron’s decision to recognize a Palestinian state next to Tel Aviv in the wake of the October 7 massacre. Such a move rewards terror and risks creating another Iranian proxy, just as Gaza became.

A Palestinian state in these conditions would be a…

— Benjamin Netanyahu – בנימין נתניהו (@netanyahu) July 24, 2025

Në qershor, ambasadori amerikan në Izrael, Mike Huckabee, deklaroi se nuk beson se një shtet i pavarur palestinez është më një objektiv i politikës së jashtme amerikane.

Zëdhënësja e Departamentit të Shtetit, Tammy Bruce, u përgjigj duke thënë se Huckabee “flet në emër të vet” dhe se vendimmarrja për politikën i takon Trumpit dhe Shtëpisë së Bardhë.

Të enjten, zëvendëszëdhënësi i Departamentit të Shtetit, Tommy Pigott, deklaroi se SHBA nuk do të marrë pjesë në konferencën e ardhshme të OKB-së për zgjidhjen me dy shtete. Konferenca, e cila organizohet bashkë nga Franca dhe Arabia Saudite, është planifikuar të mbahet midis 28 dhe 30 korrikut dhe synon të hartojë një plan për t’i dhënë fund konfliktit shumëdekadësh dhe për njohjen e shtetit palestinez.

Pigott u tha gazetarëve se nuk kishte asgjë të re për të shtuar, përveç se Uashingtoni “nuk do të jetë i pranishëm”.

Po rritet presioni ndërkombëtar mbi Izraelin për të përfunduar luftën shkatërrimtare në Gazë, e cila filloi pas sulmit të Hamasit më 7 tetor 2023 në jug të Izraelit, ku u vranë rreth 1.139 persona dhe mbi 200 të tjerë u morën peng dhe u dërguan në Rripin e Gazës.

Përgjigjja e Izraelit, që ka zgjatur tashmë 21 muaj, ka rezultuar në vdekjen e pothuajse 60 mijë palestinezëve dhe plagosjen e mbi 144 mijë të tjerëve.

Bisedimet shumëmujore për armëpushim, me ndërmjetësim nga SHBA, Egjipti dhe Katari, ende nuk kanë sjellë një marrëveshje.

Të hënën, 28 vende, përfshirë Mbretërinë e Bashkuar, Japoninë dhe disa shtete evropiane, publikuan një deklaratë të përbashkët duke i bërë thirrje Izraelit që “të ndalojë menjëherë luftën” në Gazë.

Në atë deklaratë u dënua gjithashtu “dërgimi pikë-pikë i ndihmave” si dhe “vrasjet çnjerëzore të civilëve, përfshirë fëmijë, që përpiqen të plotësojnë nevojat bazë për ujë dhe ushqim”. /Telegrafi/

The post SHBA-ja kritikon ashpër Francën që paralajmëroi njohjen e shtetit palestinez appeared first on Telegrafi.

Presidenti francez, Emmanuel Macron ka deklaruar në një letër drejtuar Presidentit të Autoritetit Palestinez, Mahmoud Abbas, se Franca do ta njohë shtetin palestinez në shtator në Asamblenë e Përgjithshme të OKB-së .

Macron tha në një postim në “X” se do ta formalizonte vendimin në Asamblenë e Përgjithshme të OKB-së në shtator.

“Besnik ndaj angazhimit tim historik për një paqe të drejtë dhe të qëndrueshme në Lindjen e Mesme, kam vendosur që Franca të njohë Shtetin e Palestinës.

Do ta njoftoj zyrtarisht këtë në Asamblenë e Përgjithshme të Kombeve të Bashkuara shtatorin e ardhshëm.

Sot, është urgjente të ndalet lufta në Gaza dhe të ndihmohet popullsia civile. Paqja është e mundur. Ne kemi nevojë për një armëpushim të menjëhershëm, lirimin e të gjithë pengjeve dhe ndihmë masive humanitare për popullsinë e Gazës”, tha presidenti francez.

“Ne gjithashtu duhet të sigurojmë demilitarizimin e Hamasit, sigurinë dhe rindërtimin e Gazës.

Së fundmi, Shteti i Palestinës duhet të ndërtohet, qëndrueshmëria e tij duhet të sigurohet dhe duhet t’i jepet mundësia, duke pranuar demilitarizimin e tij dhe njohjen e plotë të Izraelit, të kontribuojë në sigurinë e të gjithëve në Lindjen e Mesme.

Nuk ka alternativë tjetër. Francezët duan paqe në Lindjen e Mesme. Ne, francezët, së bashku me izraelitët, palestinezët, partnerët tanë evropianë dhe ndërkombëtarë, kemi përgjegjësinë të demonstrojmë se kjo është e mundur.

Në dritën e angazhimeve që më ka bërë Presidenti i Autoritetit Palestinez, i shkrova atij duke shprehur vendosmërinë time për të ecur përpara. Besim, qartësi dhe angazhim. Ne do të fitojmë paqen”, shkruan më tej Macron.

Ministri i Jashtëm francez, Jean-Noel Barrot, tha se konsulli në Jerusalem i dorëzoi Autoritetit Palestinez një letër nga Macron, ku deklarohej qëllimi i Francës, dhe Barrot tha se të konfirmonte angazhimin e Francës në Kombet e Bashkuara të hënën.

Zëvendëspresidenti i Autoritetit Palestinez (AP) Hussein Al Sheikh përmes një postimi në “X” ka falënderuar Macronin për letrën e tij drejtuar Presidentit të AP-së Mahmoud Abbas.

Deklarata e presidentit të Francës për njohjen e shtetit të Palestinës vjen ndërsa zemërimi global rritet për njerëzit që vuajnë nga uria në Rripin e Gazës.

Franca, vendi ku ndodhen komunitetet më të mëdha hebraike dhe myslimane në Evropë, do të bëhet vendi i parë i madh perëndimor që njeh një shtet palestinez, duke i dhënë potencialisht një vrull më të madh një lëvizjeje të dominuar deri më tani nga kombe më të vogla që në përgjithësi janë më kritike ndaj Izraelit.

Vendimi ka të ngjarë të shkaktojë zemërim në Izrael dhe Uashington.

Në qershor, Shtetet e Bashkuara të Amerikës thanë se kundërshtonin çdo hap që do të njihte në mënyrë të njëanshme një shtet palestinez.

The post “Urgjenca sot është të ndalet lu*ta në Gaza”, Macron: Franca do ta njohë shtetin e Palestinës appeared first on Albeu.com.

Kryeministri i Izraelit, Benjamin Netanyahu, reagoi pas njoftimit të Francës se në shtator do ta njohë Palestinën.

Përmes një deklarate në platformën X, ai e dënojë fuqishëm këtë qëndrim të Parisit.

“Ne e dënojmë fuqishëm vendimin e presidentit Macron për të njohur shtetin palestinez pranë Tel Avivit pas masakrës së 7 tetorit. Një veprim i tillë shpërblen terrorizmin dhe rrezikon krijimin e një ndërmjetësi tjetër iranian, ashtu siç është bërë Gaza. Një shtet palestinez në këto kushte do të ishte një trampolinë për shkatërrimin e Izraelit – jo për të jetuar në paqe pranë tij. Të jemi të qartë: palestinezët nuk kërkojnë një shtet pranë Izraelit; ata kërkojnë një shtet në vend të Izraelit”, tha lideri izraelit.

We strongly condemn President Macron’s decision to recognize a Palestinian state next to Tel Aviv in the wake of the October 7 massacre. Such a move rewards terror and risks creating another Iranian proxy, just as Gaza became.

A Palestinian state in these conditions would be a…

— Benjamin Netanyahu – בנימין נתניהו (@netanyahu) July 24, 2025

Macron gjatë ditës së sotme deklaroi se Franca do ta njohë zyrtarisht Palestinën në muajin shtator, si pjesë e një iniciative në Kombet e Bashkuara.

“Është e domosdoshme të ndërtohet shteti i Palestinës, të sigurohet qëndrueshmëria e tij dhe t’i mundësohet që, duke pranuar demilitarizimin dhe njohjen e plotë të Izraelit, të kontribuojë në sigurinë e të gjithëve në Lindjen e Mesme. Nuk ka alternativë tjetër. Populli francez dëshiron paqe në Lindjen e Mesme”, deklaroi ai.

Ndryshe, deri më tani, shtetin e Palestinës e kanë njohur më shumë se 140 vende anëtare të Kombeve të Bashkuara (nga gjithsej 193 vende anëtare). /Telegrafi/

The post Macron tha se Franca do ta njohë shtetin e Palestinës, reagon ashpër Netanyahu appeared first on Telegrafi.

TIRANË, 23 korrik/ATSH/ Pasditen e sotme, në sheshin “Skënderbej” u organizua protesta në emër të kauzës për vuajtjet e popullit palestinez në Gaza, për shkak të konfliktit me Izraelin. 

Protesta nisi në orën 18:00 dhe u zhvillua nën moton “Ndaloni urinë, lejoni ushqimin dhe jetën”. Në këtë protestë, u bashkuan edhe qytetarë të shumtë, mes tyre edhe aktivistja e njohur suedeze Greta Thunberg, e cila bëri thirrje në shqip: Liri për Palestinën! 

Në fjalën e saj, Thunberg tha se arsyeja pse lufta në Gaza ka degraduar në gjenocid është heshtja e vazhdueshme e komunitetit ndërkombëtar ndaj akteve të Izraelit, që kanë ardhur duke u përshkallëzuar. 

Sipas medieve, aktivistja tha se “Gaza ka hyrë në fazën e 5 të kequshqyerjes, ndërkohë që në anën tjetër të kufirit mijëra kamionë me ndihma ushqimore presin për të hyrë. Kjo është pasojë direkte e heshtjes së botës që e lejoi Izraelin të kryente këtë gjenocid. Kjo është në vazhdim të politikave të paligjshme të Izraelit, që ka shkatërruar furrat e bukës për të vazhduar fushatën e urisë në Gaza. Shterimi i resurseve natyrore, ndryshimi klimatik shkojnë dorë më dorë për me shtypjen dhe palestinezët po dëshmojmë këtë në radhë të parë”. 

/e.i//r.e/

The post Protestë për Palestinën në sheshin “Skënderbej” appeared first on Agjencia Telegrafike Shqiptare.

Qindra turistë izraelitë janë bllokuar në anijen e tyre në ishullin grek Syros për shkak të protestave të mëdha kundër gjenocidit në Gaza, të cilat po mbahen në port, sipas disa raporteve në mediat hebraike.

Pasagjerët e anijes, “Crown Iris”, e cila operohet nga kompania detare izraelite Mano Maritime, pritej të zbrisnin në ishullin e Egjeut për një qëndrim gjashtëorësh, por për shkak të protestave nuk u lejua të zbresin nga anija.

Një pasagjer izraelit i tha televizionit Kan se, kur një nga izraelitët në bord pa protestat, “ngritëm flamuj izraelitë, dhe disa prej nesh nisëm të këndonim”. “Brenda anijes ndjehemi të sigurt, por fëmijët janë pak të stresuar”, tha pasagjeri anonim.

Από την σημερινή συγκέντρωση των κατοίκων της Σύρου σε ένδειξη αλληλεγγύης στον Παλαιστινιακό λαό κ ενάντια στα σιωνιστικά γενοκτονικα καθάρματα που επιβαίνουν στο ισραηλινών συμφερόντων κρουαζεροπλοιο CROWN IRIS.

Δεν είναι τουρίστες είναι εγκληματίες πολέμου pic.twitter.com/AgD3dtIkm0

— Stergios Alexiou (@stergiosale) July 22, 2025

Sipas Kanalit 12, protestat janë organizuar nga një grup banorësh të ishullit, të cilët në rrjetet sociale kanë shkruar se “ngremë grushtin në solidaritet me palestinezët në Gaza”.

“Është e papranueshme që turistët izraelitë të mirëpriten ende këtu ndërsa palestinezët vuajnë në Rripin e Gazës”, thanë ata.

Ministri i Jashtëm i Izraelit, Gideon Sa’ar, tha se ka biseduar me homologun grek, Giorgos Gerapetritis, për t’u marrë me këtë situatë. /Telegrafi/

The post Demonstruesit nuk i lejojnë izraelitët të zbresin nga anija turistike në Greqi appeared first on Telegrafi.

Njerëzit e Gazës po vdesin nga uria dhe një nga mënyrat e vetme për të marrë ushqim është të rrezikojnë vdekjen duke shkuar në një pikë shpërndarjeje ndihmash të drejtuar nga Fondacioni Humanitar i Gazës (GHF) i mbështetur nga Izraeli dhe Shtetet e Bashkuara.

Dhe Agjencia Sanad e Al Jazeera ka analizuar imazhet satelitore të qendrës së shpërndarjes së ndihmave GHF në zonën Shakoush të Rafah, të bëra më 13 korrik.

Siç shkruan ky medium, përcjell Telegrafi, ata kanë gjurmuar udhëtimin e njerëzve të uritur dëshpërimisht që presin me orë të tëra, ndonjëherë me ditë, për të ecur në një turmë tankesh, automjetesh të blinduara dhe dronësh izraelitë, ku rrezikojnë të qëllohen nga ushtarët izraelitë.

Ja çfarë duhet të kalojnë ata:

Si hyjnë njerëzit në qendër?

Nuk është aspak aq e thjeshtë sa “të arrish atje”. Njerëzve u lejohet të marrin automjete ose karroca deri në një pikë të caktuar, pas së cilës duhet të zbresin.

Kjo pikë është të paktën 1.5 km (0.9 milje) larg qendrës së shpërndarjes, që do të thotë se ata do të duhet të ecin në atë distancë duke mbajtur çfarëdo thasësh ose kutish me ushqim që mund të marrin.

Për t’u siguruar që marrin diçka, njerëzit fillojnë të mbërrijnë orë ose edhe ditë para se qendra të shpërndajë.

Pasi mbërrijnë, ata nuk largohen sepse nuk duan të humbasin radhën e tyre, pasi disa kanë ecur me orë të tëra për të arritur atje.

Çfarë është ‘al-Joura’?

Duke dashur të shmangin pritjen në natyrë, njerëzit nxitojnë për një distancë prej rreth 560 metrash (1,800 këmbë) përtej një barriere izraelite drejt “al-Joura”, një gropë me rërë midis dunave, ku ata kërkojnë strehim nga plumbat izraelitë dhe vendosen për të pritur për një kohë të panjohur.

Vështirësitë fizike përkeqësohen nga nxehtësia e padurueshme dhe pritjet e gjata, pasi familjet shpesh mbërrijnë 12 deri në 24 orë më herët për të pritur një “sinjal nisjeje” për të marrë pak ushqim.

Çfarë ndodh kur vjen “sinjali për nisje”?

Zakonisht, dëgjimi i “sinjalit të nisjes” – normalisht nga dronët që qëndrojnë pezull – do të thotë që njerëzit mund t’i afrohen pikës së shpërndarjes së ndihmave, e cila është ende rreth 1 km larg.

Por gjërat shpesh nuk funksionojnë në atë mënyrë, dhe rreziku për t’u qëlluar rritet ndjeshëm.

Përveç kontrollit të plotë ushtarak mbi Rafah, ushtria izraelite ka barriera dhe automjete të shumta ushtarake që rrethojnë pikën e shpërndarjes së ndihmave.

Dëshmitarët thonë se “foletë” e snajperëve izraelitë, dronët dhe postblloqet ushtarake e përforcojnë këtë kontroll.

Palestinezët e zhvendosur presin një sinjal nga ushtria izraelite, i cili u tregon atyre se është e sigurt të shkojnë në vendin e ndihmës.

Megjithatë, raportet e dëshmitarëve thonë se njerëzit u qëlluan edhe kur prisnin një “sinjal nisjeje” për t’u drejtuar drejt qendrës.

Më 12 korrik, forcat izraelite vranë 34 persona që prisnin për ndihmë ushqimore në vendin e GHF.

Pra, njerëzit që arrijnë në qendrën e shpërndarjes janë mirë?

Jo, jo gjithmonë, pasi palestinezët përballen me keqtrajtime të ndryshme nga ushtarët izraelitë, ndërsa i afrohen qendrës.

Si është të marrësh ndihmë në të vërtetë?

Edhe për ata njerëz që shkojnë te dyert e qendrës, lufta nuk ka mbaruar ende.

Gazetari Muhannad Qeshta, vetë i zhvendosur nga Rafah, tregoi për procesin e shpërndarjes së ndihmave, shkruan Al Jazeera, përcjell Telegrafi.

Ai përshkroi skena kaosi të nxitura nga koordinimi i dobët, mungesa e orareve të qarta të shpërndarjes dhe mungesa totale e masave për të organizuar turmën.

Njerëzit nxitojnë në qendër, ku janë vendosur tavolina me pako ndihme të grumbulluara rastësisht sipër.

Bëhet një vend i lirë për të gjithë, me njerëz të dëshpëruar që shtyjnë dhe luftojnë për të marrë çdo sasi ushqimi që mund të përballojnë.

Shumica përfundojnë duke u larguar duarbosh për shkak të kërkesës së madhe dhe furnizimeve të kufizuara, pa asnjë urdhër të vendosur se kush merr një paketë ndihme.

Ata që marrin pak ushqim duhet të kthehen në të njëjtën rrugë ku qindra ose mijëra njerëz të uritur ende përpiqen të hyjnë në qendrën e ndihmës.

Madje atje kanë shpërthyer përleshje ndërsa njerëz të dëshpëruar përpiqen të rrëmbejnë ushqim nga krahët e njëri-tjetrit.

Kush janë “viktimat e ndihmës”?

Të dielën, Ministria Palestineze e Shëndetësisë publikoi një njoftim për shtyp në kanalin e saj Telegram, duke ofruar një përditësim mbi “viktimat e ndihmës”.

Ministria tha se gjatë 24 orëve të fundit, 31 persona kishin vdekur dhe më shumë se 107 ishin plagosur ndërsa mbërritën në spitale.

Kjo e çoi numrin total të vdekjeve të “viktimave të ndihmës” në 922 dhe të lëndimeve në 5,861.

Më 16 korrik, të paktën 21 palestinezë u vranë gjatë një rrëmuje ndërsa përpiqeshin të merrnin racione ushqimore.

Sipas një vlerësimi të mbështetur nga Kombet e Bashkuara të publikuar në maj, një në pesë persona në Gaza aktualisht po përballen me urinë si rezultat i bllokadës izraelite ndaj ushqimit dhe ndihmës, ndërsa 93 për qind e popullsisë po vuan nga mungesa të rënda ushqimore.

Pse është GHF “famëkeq”?

I përballur me presionin ndërkombëtar për të lejuar ndihmën në Gaza dhe duke dashur të lërë mënjanë agjencitë e OKB-së dhe ato ndërkombëtare që punojnë atje, Izraeli propozoi GHF-në, duke pretenduar se duhej të parandalonte që ndihma të devijohej drejt grupit palestinez Hamas.

Izraeli nuk paraqiti asnjë provë që ndihma ushqimore dhe mjekësore po devijohej te luftëtarët ose po përdorej për ndonjë gjë tjetër përveç qëllimit të synuar.

Por OKB-ja dhe organizatat humanitare pretendojnë se plani i GHF-së shkel parimet themelore humanitare.

Shefi humanitar i OKB-së, Tom Fletcher, i tha Këshillit të Sigurimit në maj se GHF “e kufizon ndihmën vetëm në një pjesë të Gazës, ndërsa lë të paplotësuara nevojat e tjera të tmerrshme”.

Ai argumentoi se GHF e kushtëzon ndihmën nga objektivat politike dhe ushtarake, e kthen urinë në një mjet negociues dhe shërben si një “shfaqje anësore cinike” dhe një “gjethe fiku për dhunë dhe zhvendosje të mëtejshme”.

Njëmbëdhjetë organizata humanitare dhe të të drejtave të njeriut nënshkruan një deklaratë në të cilën e konsideronin GHF-në “një projekt të udhëhequr nga figura perëndimore të sigurisë dhe ushtarake të lidhura politikisht, të koordinuara në bashkëpunim me qeverinë izraelite”. /Telegrafi/

The post Çfarë është “zona e vdekjes” që duhet të kalojnë njerëzit në Gaza për të marrë ndihmë? appeared first on Telegrafi.

Forcat izraelite kanë nisur një sulm tokësor dhe ajror në qytetin Deir al-Balah në Gazën qendrore, duke shkaktuar valë të reja zhvendosjeje midis civilëve që tashmë janë zhvendosur nga konflikti i vazhdueshëm.

Operacioni filloi herët të hënën, vetëm disa orë pasi ushtria izraelite lëshoi paralajmërime për evakuim për banorët e gjashtë blloqeve të banimit në pjesën jugperëndimore të qytetit.

Zona është aktualisht e mbushur me mijëra njerëz të zhvendosur nga Rafah dhe Khan Younis, në Gazën jugore, transmeton Telegrafi.

Gazetarët vendas i thanë BBC-së se tanket dhe automjetet ushtarake izraelite hynë në qytet nga pika e kontrollit Kisufim, nën mbulim të rëndë artilerie dhe ajror.

Dhjetëra predha thuhet se goditën lagjet Abu al-‘Ajin dhe Hikr al-Jami’, ndërsa forcat tokësore hynë brenda.

Pamjet e shpërndara në mediat sociale treguan shpërthime dhe zhurma të armëve të zjarrit të vazhdueshme, ndërsa trupat izraelite përparuan.

Mijëra banorë ikën nga qyteti gjatë natës drejt zonës bregdetare të al-Mawasi, pranë Khan Younis, e cila është bërë një nga zonat e pakta të mbetura të strehimit relativ në Gazën jugore.

Ndër banorët vendas po shtohet frika se sulmi i fundit ushtarak mund të jetë pjesë e një përpjekjeje për të krijuar një korridor të ri, që do të izolonte Deir al-Balah nga rajoni qendror përreth Gazës.

Nëse konfirmohet, ky do të jetë aksi i tretë i tillë, pas krijimit të rrugëve ushtarake izraelite përmes korridorit Netzarim në qytetin jugor të Gazës dhe boshtit Morag në Rafah. /Telegrafi/

The post Forcat izraelite nisin sulme tokësore dhe ajrore në Deir al-Balah në pjesën qendrore të Gazës appeared first on Telegrafi.

Ushtria izraelite ka lëshuar urdhra evakuimi për një pjesë të mbushur me njerëz të Gazës qendrore, ku nuk ka nisur një ofensivë tokësore gjatë 21 muajve të luftës kundër Hamasit.

Forcat Mbrojtëse të Izraelit (IDF) thanë të dielën se banorët dhe palestinezët e zhvendosur që strehohen në qytetin Deir al-Balah duhet të evakuohen menjëherë dhe të lëvizin drejt al-Mawasi në bregdetin e Mesdheut, transmeton Telegrafi.

Kërkesa për evakuim, e cila mund të sinjalizojë një sulm të afërt, ka shkaktuar panik të përhapur midis dhjetëra mijëra palestinezëve, si dhe familjeve të pengjeve izraelite që kanë frikë se të afërmit e tyre po mbahen në qytet.

IDF ka kryer sulme ajrore në zonë, por ende nuk ka vendosur trupa tokësore.

Të dielën, ushtria izraelite hodhi fletëpalosje nga qielli duke u urdhëruar njerëzve në disa rrethe në jugperëndim të Deir al-Balah të largohen nga shtëpitë e tyre dhe të shkojnë më në jug.

“Forcat Mbrojtëse (Izraelite) vazhdojnë të operojnë me forcë të madhe për të shkatërruar aftësitë e armikut dhe infrastrukturën terroriste në zonë”, tha ushtria, duke shtuar se ende nuk kishte hyrë në këto rrethe gjatë luftës.

Lagjet e prekura të Deir al-Balah janë të mbushura me njerëz të zhvendosur që jetojnë në tenda.

Burime izraelite i thanë agjencisë së lajmeve Reuters se arsyeja pse ushtria ka qëndruar jashtë këtyre distrikteve deri më tani, është sepse dyshojnë se Hamasi mund të mbajë pengje atje.

Të paktën 20 nga 50 pengjet e mbetura në robëri në Gaza besohet se janë ende gjallë.

Shumica e popullsisë së Rripit prej më shumë se dy milionë banorësh është zhvendosur të paktën një herë gjatë luftës së Izraelit me Hamasin, me thirrje të përsëritura izraelite për evakuim që mbulojnë pjesë të mëdha të territorit.

Urdhrat e rinj të evakuimit erdhën ndërsa zyrtarët shëndetësorë në spitalin Shifa të qytetit të Gazës thanë se më shumë se 40 persona u vranë dhe dhjetëra të tjerë u plagosën nga zjarri izraelit, ndërsa turma u mblodh për të pritur hyrjen e kamionëve me ndihma të OKB-së të dielën në mëngjes.

Spitalet në jug thanë se më shumë njerëz u vranë gjithashtu në pikat e ndihmës atje.

Të dielën, Papa Leo XIV bëri thirrje për një “fund të menjëhershëm të barbarisë së luftës” dhe kërkoi kundër “përdorimit pa dallim të forcës”.

Komentet e tij erdhën disa ditë pasi një sulm vdekjeprurës izraelit goditi Kishën e vetme Katolike të Gazës, për të cilën kryeministri izraelit Benjamin Netanyahu tha se vendi i tij ndjeu keqardhje të thellë.

Ndërkohë, OKB-ja ka thënë se civilët po vdesin urie në Gaza dhe bëri thirrje për një fluks urgjent të mallrave thelbësore.

Por ka pasur pothuajse çdo ditë raportime për palestinezë të vrarë ndërsa kërkojnë ndihmë që kur Fondacioni Humanitar i Gazës (GHF) i mbështetur nga SHBA-të dhe Izraeli filloi operacionet në fund të majit. Dëshmitarët thonë se shumica janë qëlluar nga forcat izraelite. Izraeli thotë se sistemi i ri i shpërndarjes ndalon ndihmën që shkon për Hamasin.

Izraeli nisi luftën e tij në Gaza në hakmarrje për sulmet e udhëhequra nga Hamasi më 7 tetor 2023, të cilat vranë rreth 1,200 njerëz dhe çuan në marrjen peng të 251 të tjerëve.

Sulmet izraelite që atëherë kanë vrarë më shumë se 58,895 njerëz në Gaza, sipas ministrisë së shëndetësisë të drejtuar nga Hamasi. Shifrat e ministrisë citohen nga OKB-ja dhe të tjerët si burimi më i besueshëm i statistikave të disponueshme mbi viktimat. /Telegrafi/

The post Izraeli lëshon urdhra të rinj evakuimi në qytetin qendror të Gazës, i cili është i mbushur me njerëz appeared first on Telegrafi.

Të paktën 67 palestinezë janë vrarë dhe më shumë se 150 janë plagosur ndërsa prisnin për ndihmë në Gaza.

Vdekjet e fundit ndodhën në al Sudaniya në Gazën veriore, ku ndihma po hynte përmes pikës kalimtare Zikim me Izraelin, njoftoi drejtori i spitalit al Shifa.

Më shumë se 150 persona u plagosën, disa në gjendje kritike, sipas spitaleve në zonë.

Bëhet e ditur se në javët e fundit, qindra palestinezë janë vrarë ndërsa prisnin ushqim dhe ndihmë, shkruan skynews.

Të shtunën, trupat izraelite u akuzuan për vrasjen e të paktën 32 personave në dy incidente, në zonën Teina të Rripit të Gazës dhe në qytetin më jugor të Gazës, Rafah, pranë qendrave të shpërndarjes të operuara nga Fondacioni Humanitar i Gazës (GHF) i mbështetur nga SHBA-ja dhe Izraeli.

Vrasjet e fundit nuk ndodhën pranë pikave të shpërndarjes të lidhura me GHF, i cili filloi shpërndarjen e pakove ushqimore në Gaza në fund të majit, pasi Izraeli lehtësoi bllokadën 11-javore të ndihmës në territor.

Ndërsa ushtria izraelite ende nuk ka dhënë asnjë koment mbi vdekjet e së dielës.

Disa dëshmitarë thanë se ushtria izraelite qëlloi mbi turmën, megjithëse nuk ishte menjëherë e qartë nëse ata u vranë nga ushtria izraelite, bandat e armatosura apo nga të dyja.

Ndryshe, ushtria izraelite lëshoi urdhra evakuimi në zonat e Gazës qendrore të mbushura me palestinezë të zhvendosur ku nuk ka vepruar deri më tani në luftën e saj me Hamasin.

Kërkesa për evakuim ushtarak, e cila mund të sinjalizojë një sulm të afërt në lagjet në Deir al Balah, alarmoi familjet e pengjeve izraelite, të cilët kanë frikë se të afërmit e tyre po mbahen atje. /Telegrafi/

The post Të paktën 67 persona u vranë ndërsa prisnin për ndihmë në Gaza appeared first on Telegrafi.

Të paktën 73 palestinezë janë vrarë teksa po tentonin të arrinin në qendrat për shpërndarjen e ndihmave në mbarë Gazën më 20 korrik, tha Ministria e Shëndetësisë në territorin palestinez.

Numri më i madh i viktimave është regjistruar në veri të Gazës, ku të paktën 67 palestinezë u vranë teksa po tentonin të arrin në një qendër të ndihmës përmes kalimit Zikim me Izraelin, tha Ministria e Shëndetësisë në Gazë dhe spitalet lokale.

Më shumë se 150 persona janë plagosur dhe disa prej tyre janë në gjendje kritike, sipas spitaleve.

Ende është e paqartë nëse ata janë vrarë nga ushtria izraelite apo nga bandat e armatosura. Por, disa dëshmitarë thanë se ushtria izraelite shtiu drejt turmës.

Vrasjet në veri të Gazës nuk ndodhën në afërsi të qendrave të shpërndarjes së ndihmës, që udhëhiqen nga Fondi Humanitar për Gazën (GHF), që mbështetet nga Izraeli dhe Shtetet e Bashkuara. Dëshmitarët dhe punëtorët e ndihmës kanë thënë se qindra persona janë vrarë nga Izraeli teksa tentonin të arrinin në qendrat e GHF-së.

Ushtria izraelite ende nuk ka komentuar për vrasjet që ndodhën të dielën.

Njoftimi për vrasjen e palestinezëve vjen në kohën kur Izraeli lëshoi një urdhër të ri për evakuimin e banorëve nga pjesa qendrore e Gazës dhe disa zona të tjera, pasi tha se synon të kryejë operacione ndaj Hamasit, grupit palestinez të shpallur organizatë terroriste nga Shtetet e Bashkuara dhe Bashkimi Evropian.

Zgjerimi i ofensivës, në pjesë ku Izraeli më parë nuk ka operuar, vjen teksa Izraeli dhe Hamasi po mbajnë bisedime indirekte për një armëpushim 60-ditor dhe lirimin e pengjeve.

Gjatë sulmit të 7 tetorit të vitit 2023 – sulm që nxiti luftën – Hamasi vrau afër 1.200 persona dhe rrëmbeu 251 të tjerë. Nga ta, 49 ende mbahen në Gazë, përfshirë 27 që ushtria izraelite thotë se kanë vdekur.

Ndërkaq, si pasojë e ofensivës izraelite, në Gazë janë vrarë më shumë se 58.000 palestinezë, shumica civilë, sipas Ministrisë së Shëndetësisë në enklavën palestineze./REL

Bllokada izraelite në Gaza ka çuar në uri masive.

Ministria e Shëndetësisë e Gazës njoftoi se të paktën 70 fëmijë kanë vdekur nga uria dhe kequshqyerja që nga marsi i vitit 2025.

Në raportin e saj, ministria paralajmëroi se qindra banorë janë pranë vdekjes pasi kanë kaluar periudha të gjata pa ushqim të duhur, duke vënë në dukje se spitalet po marrin një numër në rritje pacientësh që vuajnë nga kequshqyerja akute dhe lodhja e rëndë fizike.

“Ushqimi tani është një përparësi më e lartë se ilaçi”, zbuloi Suhaib al-Homs, drejtor i spitalit të specializuar fushor të Kuvajtit në Khan Younis, duke u kërkuar aktorëve ndërkombëtarë të veprojnë shpejt për të parandaluar vdekje të mëtejshme.

Rrjeti i OJQ-ve Palestineze e përshkroi situatën aktuale si fazën më të keqe të krizës humanitare në Gaza deri më tani, duke ia atribuar kushtet asaj që e quajtën një “politikë sistematike të urisë”.

Sa e dëshpëruar është situata në Rripin e Gazës u tregua edhe nga fjalimi tronditës i një gruaje të uritur, e cila mezi flet ndërsa shpjegon se nuk ka ngrënë për pesë ditë.

“Nuk kam ngrënë për pesë ditë. Dua vetëm ushqim. Eca pak dhe ndjeva marramendje, stomaku im është bosh”, tha gruaja.

A displaced, starving Palestinian woman:

“I haven’t eaten in 5 days. I just want food. I walk a little and feel dizzy — my stomach is empty.” pic.twitter.com/IRNg6DN7yq

— Clash Report (@clashreport) July 19, 2025

Ndryshe, një burim në spitalin Al-Aksa në Gaza tha se një fëmijë katërvjeçar palestinez vdiq nga ndërlikimet e shkaktuara nga kequshqyerja dhe uria.

Drejtori i Spitalit al-Shifa tha se dy palestinezë, përfshirë një foshnjë 35 ditëshe, vdiqën nga uria në spital së fundmi.

Agjencia e OKB-së për Refugjatët Palestinezë (UNRWA) bëri thirrje për heqjen e menjëhershme të kufizimeve që pengojnë ndihmën shpëtimtare të arrijë në Gaza, duke thënë se ka furnizime ushqimore për të mbështetur të gjithë popullsinë e territorit për më shumë se tre muaj.

“UNRWA ka ushqim të mjaftueshëm për të gjithë popullsinë e Gazës për më shumë se tre muaj, të ruajtur në depo, përfshirë këtë në Al Arish, Egjipt, në pritje të hyrjes”, tha agjencia.

Pavarësisht se ka sisteme furnizimi dhe logjistike, agjencia tha se qasja mbetet e bllokuar.

“Hapni dyert, hiqni rrethimin, lejoni UNRWA-në të bëjë punën e saj dhe të ndihmojë njerëzit në nevojë, përfshirë një milion fëmijë”, kërkoi ajo. /Telegrafi/

The post “Nuk kam ngrënë për pesë ditë, dua vetëm ushqim”, apeli prekës i një gruaje palestineze appeared first on Telegrafi.

Dritat e shatërvanit të famshëm Trevi (Fontana di Trevi), një nga simbolet më të njohura të kryeqytetit italian Romë, janë fikur si shenjë solidariteti me Gazën, e cila ndodhet nën sulme dhe bllokadë nga Izraeli.

Pas një vendimi të marrë muajin e kaluar nga Këshilli i Qytetit të Romës dhe nën sloganin “Roma nuk do të heshtë”, dritat e shatërvanit historik u fikën për një orë, respektivisht midis orës 22:00 dhe 23:00 me kohën lokale, për të bërë thirrje për një armëpushim në Gaza.

Ky gjest simbolik u shoqërua me praninë e një grupi njerëzish mbështetës të kauzës palestineze, të cilët shkaun para shatërvanit me flamuj palestinezë dhe protestuan kundër Izraelit, të cilin e akuzuan për gjenocid në Gaza.

Ndërkohë, përpara Pallatit Poli, që ndodhet pas shatërvanit, u projektua mbishkrimi “Ndaleni luftën në Gaza”.

Ky aktivitet dhe protesta përpara shatërvanit Trevi tërhoqën edhe vëmendjen e turistëve që kishin shkuar për ta vizituar strukturën historike.

Disa vizitorë u panë duke mbështetur thirrjet e grupit pro-Palestinë. /AA/

The post Dritat e shatërvanit historik Trevi në Romë fiken për Gazën appeared first on Telegrafi.

Edhe dhjetë pengje do të lirohen së shpejti nga Gaza, ka thënë presidenti amerikan, Donald Trump, pa dhënë detaje shtesë.

Trump e bëri këtë deklaratë gjatë një darke me ligjvënës në Shtëpinë e Bardhë, duke lavdëruar përpjekjet e të dërguarit të tij të posaçëm, Steve Witkoff.

Negociatorët izraelitë dhe ata të Hamasit po marrin pjesë në raundin më të fundit të bisedimeve për armëpushim që po zhvillohen në Doha që nga 6 korriku, ku po diskutohet një propozim për një armëpushim 60-ditor, i mbështetur nga SHBA.

“E kemi kthyer shumicën e pengjeve. Së shpejti do të kemi edhe dhjetë të tjerë dhe shpresojmë që gjithçka të përfundojë shpejt,” tha Trump.

Trump prej javësh ka parashikuar se një armëpushim dhe marrëveshje për lirimin e pengjeve është e pashmangshme, por deri më tani një marrëveshje konkrete ka rezultuar e paarritshme.

Zëdhënësi i krahut të armatosur të Hamasit, grupit militant palestinez që kontrollon Gazën, deklaroi të premten se grupi mbështet arritjen e një armëpushimi të përkohshëm në luftën në Gaza, por mund të rikthehet në kërkesën për një marrëveshje gjithëpërfshirëse nëse aktualisht nuk arrihet një marrëveshje.

Propozimi për armëpushim parasheh lirimin e dhjetë pengjeve që mbahen në Gaza, së bashku me kthimin e trupave të 18 të tjerëve, gjatë një periudhe prej 60 ditësh. Në këmbim, Izraeli do të lirojë disa të burgosur palestinezë.

Në fushatën izraelite në Gaza kanë humbur jetën mbi 58,600 palestinezë, sipas të dhënave të autoriteteve shëndetësore në Gaza.

Nga ana tjetër, sipas të dhënave izraelite, rreth 1,650 izraelitë dhe shtetas të huaj janë vrarë në konflikt, përfshirë 1,200 të vrarë në sulmin e Hamasit ndaj Izraelit jugor më 7 tetor 2023. /Telegrafi/

The post Trump thotë se së shpejti do të lirohen pengje të tjera nga Gaza appeared first on Telegrafi.

Ushtria izraelite thotë se nuk e ka goditur objektivin e synuar pasi zyrtarët e Gazës thanë se 10 palestinezë – përfshirë gjashtë fëmijë – u vranë në një sulm në një pikë grumbullimi uji.

17 persona të tjerë u plagosën në sulmin në një pikë shpërndarjeje uji në kampin e refugjatëve Nuseirat, tha Ahmed Abu Saifan, një mjek urgjence në spitalin Al Awda, transmeton Telegrafi.

Forcat Mbrojtëse të Izraelit (IDF) thanë se kishin ndërmend të godisnin një militant të Xhihadit Islamik, por një “gabim teknik me municionin” kishte bërë që raketa të binte “dhjetëra metra larg objektivit”.

IDF tha se incidenti është duke u shqyrtuar, duke shtuar se “punon për të zbutur dëmin ndaj civilëve të papërfshirë sa më shumë që të jetë e mundur” dhe “ndjen keqardhje për çdo dëm ndaj civilëve të papërfshirë”.

Zyrtarët në spitalin Al Awda thanë se morën 10 trupa pas sulmit izraelit në pikën e grumbullimit të ujit, dhe gjashtë fëmijë ishin midis të vdekurve.

Ramadan Nassar, i cili jeton në zonë, tha se rreth 20 fëmijë dhe 14 të rritur u rreshtuan të dielën në mëngjes për të mbushur ujë.

Kur ndodhi sulmi, të gjithë vrapuan dhe disa, përfshirë ata që u plagosën rëndë, ranë përtokë, tha ai.

Në total, 19 persona u vranë në sulmet izraelite në Rripin e Gazës të dielën, thanë zyrtarët lokalë të shëndetësisë.

Dy gra dhe tre fëmijë ishin midis nëntë të vrarëve pas një sulmi izraelit në një shtëpi në qytetin qendror të Zawaidës, thanë zyrtarët në spitalin Al Aksa.

Izraeli ka pretenduar se ka goditur më shumë se 150 objektiva në enklavën e rrethuar gjatë ditës së kaluar.

Sulmet e fundit vijnë pasi ushtria izraelite hapi zjarr pranë një qendre ndihme në Rafah të shtunën. Kryqi i Kuq tha se 31 persona u vranë.

IDF ka thënë se ka qëlluar “të shtëna paralajmëruese” pranë vendit të shpërndarjes së ndihmave, por “nuk ishte në dijeni të individëve të plagosur” si rezultat.

Lufta në Gaza filloi në përgjigje të sulmit të Hamasit ndaj Izraelit më 7 tetor 2023, i cili vrau 1,200 persona dhe pa rreth 250 të marrë peng.

Më shumë se 58,000 palestinezë janë vrarë që atëherë, ku më shumë se gjysma janë gra dhe fëmijë, sipas ministrisë së shëndetësisë të Gazës, e cila nuk bën dallim midis civilëve dhe luftëtarëve në numërimin e saj. /Telegrafi/

The post IDF fajëson ‘gabimin teknik’ pasi zyrtarët e Gazës thonë se fëmijët që merrnin ujë u vranë në sulm appeared first on Telegrafi.

Dhjetë persona, përfshirë gjashtë fëmijë, janë vrarë në një sulm ajror izraelit, ndërsa prisnin të mbushnin ujë në Gazën qendrore.

Trupat e tyre u dërguan në Spitalin al-Awda të Nuseirat, i cili trajtoi gjithashtu 16 persona të plagosur, përfshirë shtatë fëmijë.

Dëshmitarët okularë thanë se një dron qëlloi një raketë drejt një turme që priste në radhë me bidona bosh pranë një cisterne uji në kampin e refugjatëve al-Nuseirat.

Banorët nxituan në vendngjarje dhe transportuan të plagosurit duke përdorur automjete private dhe karroca, shkruan BBC.

Bëhet e ditur se sulmi vjen ndërsa sulmet ajrore izraelite në të gjithë Rripin e Gazës janë përshkallëzuar.

Një zëdhënës i Agjencisë së Mbrojtjes Civile të Gazës tha se 19 palestinezë të tjerë ishin vrarë sot, në tre sulme të ndara në ndërtesa banimi në Gazën qendrore dhe në Qytetin e Gazës.

Komiteti Ndërkombëtar i Kryqit të Kuq (KNKK) tha se spitali i tij në terren në Rafah kishte pranuar 132 pacientë “që vuanin nga lëndime të lidhura me armë” vetëm të shtunën, 31 prej të cilëve vdiqën.

“Frekuenca dhe shkalla alarmante e këtyre incidenteve me viktima masive nënvizojnë kushtet e tmerrshme që po përjetojnë civilët në Gaza”, tha KNKK.

Të premten, zyra e të drejtave të njeriut e OKB-së tha se kishte regjistruar 789 vrasje të lidhura me ndihmën.

Nga këto, 615 ishin në afërsi të vendeve të Fondacionit Humanitar të Gazës (GHF) të mbështetur nga SHBAdhe Izraeli, të cilat u hapën më 27 maj dhe operohen nga kontraktorë privatë të sigurisë amerikane brenda zonave ushtarake në Gazën jugore dhe qendrore. /Telegrafi/

The post Gjashtë fëmijë palestinezë vriten ndërsa prisnin të mbushnin ujë appeared first on Telegrafi.

Më shumë se shtatëdhjetë pjesëmarrës në protesta u arrestuan në Londër, Mançester dhe Kardif pasi lëvizja pro-palestineze Palestine Action u përfshi në listën e organizatave të ndaluara në vend, thanë agjencitë ligjzbatuese të Mbretërisë së Bashkuar. Dyzet e një protestues u arrestuan për shprehje mbështetjeje ndaj organizatës së ndaluar; një person tjetër u arrestua për […]

The post Protestuan në mbështetje të Palestinës, arrestohen mbi 70 persona në Britani appeared first on BoldNews.al.

Një pamje dramatike nga Rripi i Gazës është shfaqur në rrjete sociale, duke treguar një moment jashtëzakonisht të guximshëm dhe të rrallë nga luftimet në pjesën jugore të kësaj enklave palestineze.

Videoja, e cila dyshohet se daton më 8 korrik dhe është bërë në lindje të Khan Younis, tregon një luftëtar palestinez që del nga një ndërtesë i vetëm dhe i afrohet tankeve izraelite, duke futur më pas pajisje shpërthyese dhe duke i shpërthyer ato.

Ky është një lloj luftimi i afërt që shihet rrallë në një mjedis urban, ku një luftëtar në afërsi të tankeve shfrytëzon njohurinë e terrenit dhe elementin e surprizës për të kryer një sulm vdekjeprurës.

Pamjet tërhoqën shumë vëmendje në internet, si për shkak të guximit të sulmuesve, ashtu edhe sepse tregon intensitetin e luftimeve në terren, pavarësisht muajve të operacioneve ushtarake izraelite në Gaza.

A lone Palestinian fighter attacks two Israeli tanks in the Gaza Strip. pic.twitter.com/UI0NrHZdIR

— Clash Report (@clashreport) July 12, 2025

Ndryshe, qindra njerëz dolën në rrugë në Stokholm, kryeqytetin e Suedisë, për të protestuar kundër sulmeve izraelite dhe heshtjes së qeverisë në lidhje me pushtimin e Gazës nga Izraeli.

Të mbledhur në sheshin Odenplan në përgjigje të një thirrjeje nga organizatat e shoqërisë civile, protestuesit i kërkuan qeverisë suedeze të ndërmarrë veprime të menjëhershme për të ndaluar menjëherë krimet e luftës të kryera nga Izraeli në enklavën e rrethuar. /Telegrafi/

The post Video nga Gaza, një luftëtar palestinez sulmon në mënyrë të pavarur dy tanke izraelite appeared first on Telegrafi.

Qindra njerëz dolën sot në rrugë në Stokholm, kryeqytetin e Suedisë, për të protestuar kundër sulmeve izraelite dhe heshtjes së qeverisë në lidhje me pushtimin e Gazës nga Izraeli.

Të mbledhur në sheshin Odenplan në përgjigje të një thirrjeje nga organizatat e shoqërisë civile, protestuesit i kërkuan qeverisë suedeze të ndërmarrë veprime të menjëhershme për të ndaluar menjëherë krimet e luftës të kryera nga Izraeli në enklavën e rrethuar.

Gjatë protestës, ku u theksua heshtja e vazhdueshme e qeverisë ndaj pushtimit izraelit të Gazës, demonstruesit mbanin pankarta me mbishkrime si “Fëmijët po vriten në Gaza”, “Shkollat dhe spitalet po bombardohen” dhe “Jepini fund mungesës së ushqimit”.

Ata gjithashtu brohoritën slogane të tilla si “Liri për Palestinën” dhe “Netanyahu vrasës”.

Protestuesit më vonë marshuan drejt Ministrisë së Punëve të Jashtme për të përcjellë mesazhin e tyre më drejtpërdrejt.

Aktivisti australian Damian Ridgwell, i cili mori pjesë në protestë, tha se Grupi i Veprimit për Palestinën ka ndihmuar në organizimin e protestave të shumta.

“Ne jemi pjesë e një lëvizjeje globale për të luftuar kundër gjenocidit sionist në Gaza dhe për një Palestinë të lirë. Nga lumi në det, Palestina do të jetë e lirë”, tha Ridgwell.

Aydin Amir Hashimi, aktivist suedez me origjinë azerbajxhanase, tha se është vënë në shënjestër nga mediat suedeze për pjesëmarrjen në demonstratat pro Palestinës gjatë dy viteve të fundit.

Hashimi, një nëpunës civil, shpjegoi se për shkak të mbështetjes së tij të hapur për Palestinën – e shprehur brenda kuadrit ligjor të lirisë së shprehjes në Suedi – gazeta më e madhe e vendit, “Dagens Nyheter”, ka kërkuar shkarkimin e tij.

“Ata po përpiqen të frikësojnë nëpunësit civilë dhe punëdhënësit në mënyrë që të mos flasin kundër gjenocidit të vazhdueshëm në Palestinë”, tha Hashimi.

“Por kjo nuk do të na heshtë”, theksoi ai.

Duke nënvizuar rëndësinë e qëndrimit të vendosur, ai i inkurajoi të tjerët në Suedi të rezistojnë ndaj presionit të medias dhe të vazhdojnë të ushtrojnë të drejtën e tyre për të protestuar. /AA/

The post “Nga lumi në det, Palestina do të jetë e lirë”, protesta në Suedi kundër Izraelit appeared first on Telegrafi.