TIRANË, 18 gusht/ATSH/ Drejtoria Vendore e Policisë Elbasan arrestoi me qëllim ekstradimin drejt Spanjës një 41-vjeçar të shpallur në kërkim ndërkombëtar nga autoritetet spanjolle, për kultivim të bimëve narkotike dhe vjedhje të energjisë elektrike.

Shërbimet e Policisë Rrugore, në bashkëpunim me specialistët e Seksionit për Hetimin e Trafiqeve dhe Narkotikëve, të DVP Elbasan, bazuar në informacionet e shkëmbyera me Interpol Tiranën, kapën në rrugën e fshatit Papër, ndërkohë që qarkullonte me automjet, dhe arrestuan shtetasin E. B., 41 vjeç.

Ky shtetas ishte shpallur në kërkim ndërkombëtar, pasi Gjykata e Sabadellit (Spanjë), më datë 30 qershor 2025, ka lëshuar urdhër arresti për veprat penale “Kultivimi i bimëve narkotike” dhe “Vjedhja e energjisë elektrike”.

Interpol Tirana, në bashkëpunim me homologët në Spanjë, do të kryejë procedurat për ekstradimin e shtetasit E. B.

/m.m/r.e/

The post Arrestohet një 41-vjeçar i shpallur në kërkim ndërkombëtar, pritet ekstradimi drejt Spanjës appeared first on Agjencia Telegrafike Shqiptare.

TIRANË, 18 gusht/ATSH/ Harta arkeologjike e rajonit të Shkodrës do të plotësohet shumë shpejt edhe me një sit arkeologjik, zonifikim të qartë dhe rregullore administrimi të zonës A.

Bëhet fjalë për qytetin antik në Bushat, ku gërmimet arkeologjike që kanë nisur që në vitin 2018, nga misioni kërkimor shqiptaro-polak drejtuar nga Piotr Dyczek dhe Saimir Shpuza po nxjerrin në dritë të tjera gjurmë dhe të dhëna për qytetin ilir në Bushat.

Gjatë këtyre fushatave kërkimore u zbuluan dy porta hyrëse të qytetit dhe u kuptua shtrirja e tij. Ndërsa gërmimet e fundit janë përqendruar në qytetin e sipërm dhe kanë për qëllim zbulimin e organizimit të brendshëm dhe urbanistikës së këtij qyteti.

Misioni kërkimor po nxjerr në dritë se kjo pjesë e qytetit të sipërm ka qenë e ndërtuar masivisht që në gjysmën e shek. IV para Krishtit, sipas datimeve paraprake.

Tashmë falë bashkëpunimit me IKTK, DRTK Shkodër dhe ndihmën e pakursyer të misionit arkeologjik me të dhënat shkencore dhe rezultatet e arritura u krye në terren rilevimi dhe përcaktimi qartë i zonifikimit të nevojshëm për ruajtjen dhe administrimin e këtij territori me potencial të lartë arkeologjik referuar dhe kuadrit ligjor për këtë qëllim.

1 nga 13

/m.m/r.e/

The post Gjurmë të reja nga qyteti ilir në Bushat appeared first on Agjencia Telegrafike Shqiptare.

TIRANË, 18 gusht/ATSH/ Deputetja e Partisë Demokratike në qarkun e Vlorës, Ina Zhupa i dërgoi sot një kërkesë zyrtare Ministrisë së Brendshme dhe Ministrisë së Mbrojtjes për ngritjen e menjëhershme të grupit të përbashkët të punës për evidentimin e dëmeve të zjarreve në bashkitë Delvinë, Finiq, Konispol dhe marrjen e masave për dëmshpërblimin e plotë të banorëve të prekur.

Zhupa u shpreh se grupi i punës duhet të ngrihet pa vonesë në shërbim të banorëve, duke pasur parasysh përmasat e mëdha dhe dëmet kolosale që kanë sjellë zjarret në këto zona.

“Të ngrihet një grup pune i përbashkët, i përbërë nga përfaqësues të Ministrisë së Mbrojtjes, së Ministrisë së Brendshme, të secilës nga bashkitë, përfaqësues të prefektit të Qarkut dhe përfaqësues të Agjencisë Kombëtare të Mbrojtjes Civile; Të bëhet një proces evidentimi real dhe i shpejtë në terren i dëmeve që la pas situata e zjarreve; Të përgatitet një projektvendim që dëmshpërblen në mënyrë të plotë sipas çmimeve të tregut dëmet e shkaktuara ndaj banorëve”, shtoi ajo.

Zhupa shprehu gatishmërinë e përfaqësuesve demokratë në këshillat bashkiak për të qenë pjesë e grupeve të punës për evidentimin e dëmeve me paanshmëri dhe korrektësi.

“Po ashtu shprehim vullnetin për të votuar çdo vendim për dëmshpërblimin e plotë dhe të shpejtë të banorëve të prekur nga zjarret. Siç e parashikon ligji “Për mbrojtjen civile” pamundësia financiare e buxheteve të këtyre bashkive nuk është dhe nuk mund të jetë justifikim për dëmshpërblimet e banorëve, në këtë rast janë institucionet qendrore që do duhet të përgjigjen”, theksoi Zhupa.

Por fillimisht, ajo nënvizoi se duhet “evidentimi dhe nxjerrja e faturës financiare si detyrë e drejtpërdrejtë e grupit të punës, proces që nuk duhet të vonohet”.

“Djegiet e shtëpive, tokave, bashkë me prodhimet e tyre bujqësore, ullishteve dhe bagëtive, e kanë kthyer jetesën e këtyre banorëve të pamundur për shkak se nuk kanë më asgjë. Banorët nuk mund të braktisen në premtime boshe me thasë koncentratesh. Është detyrë e shtetit t’iu përgjigjet në këtë fatkeqësi për të cilën ata nuk kanë asnjë përgjegjësi”, tha Zhupa.

1 nga 2

/m.m/r.e/

The post Zhupa: Të ngrihet grup pune për evidentimin e dëmeve nga zjarret në Delvinë, Finiq dhe Konispol appeared first on Agjencia Telegrafike Shqiptare.

Çanta e re e Gucci-t është kryefjala e rrjetit.

Gucci Giglio, që vjen në formën e një Tote bag me printin tradicional të markës italiane është obesioni më i ri i të famshmëve nga Sienna Miller, Emily Ratajkowski tek Dakota Johnson. Ato e përshkruajnë si çanta perfekte për punë, udhëtim, madje edhe për mamatë e zëna me fëmijë.

Nëse jeni duke kërkuar për një çantë që mund ta vishni gjatë gjithë vitit, kjo është ajo.

Gucci Giglio, pjesë e koleksionit 2026, u ngjiz dhe u prezantua në Firence, nga emblema e së cilës ka marrë dhe emrin – Giglio- që i referohet zambakut të famshëm të Firences. Gucci e ka quajtuar një “homazh” për qytetin madhështor.

E mbuluar me monogramën GG, simbol i Gucci, kjo çantë është e punuar me mëndafsh dhe kadife dhe me pjesë metalike ngjyrë ari. Gucci Giglio vjen edhe në materialin xhins, denim.

Çanta ka dalë në treg me një çmim zyrtar prej 2.250 dollarësh.

The post Çanta e re e Gucci-t që ka fiksuar të gjithë rrjetin appeared first on Gazeta Si.

Kompania për Shpërndarjen e Energjisë Elektrike në Kosovë ka bërë të ditur se ka filluar shkëputjen e bizneseve nga rrjeti, për shkak të përfundimit të afatit të përcaktuar që ato të lidhin marrëveshje me furnizues tjerë të energjisë. Deri tani janë shkëputur qindra njehsorë nga 1.400 në total që do t’i nënshtrohen këtij procesi.

Qindra biznese në Kosovë janë përballur me ndërprerje të furnizimit me energji elektrike nga data 16 gusht, pasi ka hyrë në fuqi vendimi për liberalizimin e tregut të energjisë.

Kompania për Shpërndarjen e Energjisë Elektrike (KEDS) ka konfirmuar se mbi 90 për qind e mbi 1.400 njehsorëve të identifikuar si biznese tashmë janë shkyçur, ndërsa pjesa tjetër pritet të shkyçet ditëve në vijim nëse nuk arrijnë marrëveshje me furnizues privatë të licencuar nga Zyra e Rregullatorit për Energji (ZRRE).

“Shumica e mbi 1400 njehsorëve elektrikë, të identifikuar si prona të kompanive, janë shkyçur gjatë ditës së djeshme, janë diku 90 për qind e atyre janë shkyçur. Pjesa tjetër e mbetur do të shkyçen në ditët në vijim, nëse nuk arrijnë marrëveshje me ndonjë nga furnizuesit e licencuar nga ZREE-ja”, kanë treguar nga KEDS.

Sipas vendimit, kompanitë me mbi 50 punëtorë ose qarkullim mbi 10 milionë euro në vit nuk mund të furnizohen më nga KEDS si operator publik, por janë të detyruara të lidhen me një nga 22 furnizuesit e licencuar në treg.

Për dy muaj (qershor-korrik), Korporata Energjetike e Kosovës (KEK) kishte vepruar si Furnizues i Mundësisë së Fundit për të shmangur ndërprerjet, por ky afat ka skaduar më 31 korrik.

Aktualisht, në Kosovë janë të licencuara 22 kompani për tregtim me energji, ndërsa tre të tjera janë në proces të licencimit.

Në mesin e tyre përfshihet edhe Operatori për Furnizim me Energji Elektrike (KESCO) dhe KEK-u.

Deri më 31 korrik, mbi 250 biznese private kanë nënshkruar kontratë me KESCO-n, ndërkohë që janë në pritje edhe dhjetëra kërkesa të tjera.

Pas vendimit të Gjykatës Komerciale, Dhoma e Shkallës së Dytë dhe njoftimit të pranuar nga Zyra e Rregullatorit të Energjisë, KEDS ka njoftuar bizneset që nuk kanë lidhur kontrata se do të detyrohen të zbatojnë vendimet duke paralajmëruar se mosveprimi do të rezultojë në shkyçje nga rrjeti duke filluar nga data 16 gusht.

Dhoma Ekonomike e Grave të Kosovës – G7 ka reaguar ashpër ndaj vendimit të Zyrës së Rregullatorit për Energji (ZRrE) dhe veprimeve të ndërmarra nga KEDS për ndërprerjen masive të furnizimit me energji elektrike ndaj bizneseve, duke theksuar ndikimin disproporcional që kjo ka tek bizneset në pronësi të grave.

Në reagimin zyrtar, G7 shpreh shqetësimin e thellë për situatën e krijuar. Sipas tyre, ky proces, i zbatuar në mënyrë të menjëhershme, shpeshherë në prani të forcave policore, ka krijuar një klimë pasigurie të thellë për sektorin privat dhe ka dërguar sinjale negative tek investitorët vendorë dhe ndërkombëtarë.

Sipas Dhomës, më së shumti të dëmtuara janë gratë sipërmarrëse.

“Veçanërisht të prekura nga kjo situatë janë bizneset në pronësi të grave, të cilat përbëjnë një pjesë të rëndësishme të ekonomisë vendore”, thuhet në reagim.

G7 thekson se ato përballen me humbje të të ardhurave, dëmtim të zinxhirit të shërbimeve dhe prodhimit, si dhe rrezikim të vendeve të punës, “shumica prej tyre të mbajtura nga gra – si dhe mbyllje të mundshme të aktiviteteve ekonomike”.

Dhoma Ekonomike e Grave të Kosovës gjithashtu thekson se kanë pranuar ankesa nga anëtaret për raste ku edhe bizneset me kontrata të vlefshme janë përballur me shkyçje, si dhe raste të tjera ku subjekte që nuk e plotësojnë kriterin ligjor për të kaluar në tregun e lirë janë përfshirë në këtë proces.

Sipas tyre, kjo dëshmon se “tranzicioni drejt tregut të lirë të energjisë është zbatuar në mënyrë të papërgatitur dhe pa analizë të plotë të implikimeve për ekonominë”.

Në reagimin e saj, Dhoma Ekonomike e Grave të Kosovës – G7 paraqet tri kërkesa konkrete:

-Që ZRrE dhe KEDS të pezullojnë menjëherë ndërprerjen e furnizimit me energji për bizneset dhe të sigurojnë një proces të drejtë, transparent dhe ligjërisht të qartë.

-Që të hapet një dialog i strukturuar dhe gjithëpërfshirës me odat ekonomike dhe organizatat e biznesit, në mënyrë që të hartohet një plan tranzicioni i arsyeshëm për daljen në tregun e lirë të energjisë.

-Që të krijohen mekanizma mbrojtës dhe lehtësues për bizneset e vogla dhe të mesme, me fokus të posaçëm tek ndërmarrjet në pronësi të grave, për të shmangur dëme të pariparueshme në aktivitetin e tyre ekonomik.

Edhe Oda Ekonomike e Kosovës (OEK) ka reaguar me shqetësim të madh ndaj situatës së krijuar pas vendimit të Zyrës së Rregullatorit për Energji (ZRrE) për ndërprerjen e energjisë elektrike, duke e cilësuar atë si të jashtëligjshëm dhe të dëmshëm për bizneset, ekonominë dhe qytetarët e vendit.

Në reagimin e saj, OEK ka bërë të ditur se ka pranuar ankesa të shumta nga bizneset, të cilat raportojnë se zyrtarë të KEDS-it, të shoqëruar nga policia, kanë ndërprerë energjinë elektrike në objektet e tyre.

Kjo prani e forcave policore, sipas Odës, ka krijuar një imazh tepër negativ tek investitorët e huaj dhe ka ulur besimin për sjelljen e investimeve të reja në Kosovë.

“Ky veprim jo vetëm që ka dëmtuar bizneset dhe shpresat për investime të huaja, por ka penguar edhe zgjerimin e investimeve vendore. Për më tepër, kemi raste kur edhe bizneset me kontrata të vlefshme janë përballur me ndërprerje të energjisë, si dhe raste kur bizneseve që nuk plotësojnë kriterin ligjor për daljen në tregun e lirë u është ndërprerë furnizimi”.

OEK ka vlerësuar se procesi i liberalizimit të tregut të energjisë elektrike nuk është menaxhuar siç duhet nga ZRrE, duke e cilësuar atë si të papërgatitur dhe arbitrar.

“Bizneset përbëjnë 60% të ekonomisë së Kosovës dhe punësojnë mbi 143 mijë qytetarë. Një vendim si ky i sotmi, u ka shërbyer vetëm armiqve të Kosovës”.

Kurse, Dhoma e Tregtisë dhe Industrisë Kosovë përmes një reagimi ka thënë se procesi ka një mori shkeljesh ligjore dhe procedural, derisa ka apeluar Qeverinë e Kosovës dhe ZRRE-në që të pezullojnë menjëherë zbatimin e vendimit dhe të hapin një proces të rishqyrtimit transparent.

“Ne ritheksojmë se forma e zgjedhur nga ZRRE, e përkrahur në heshtje nga të gjitha institucionet relevante, do të shkaktojë pasoja të rënda për ekonominë e vendit, përfshirë rritje të ndjeshme të çmimit të energjisë elektrike, rritje të çmimit të produkteve, rrezikimin e mijëra vendeve të punës, uljen e prodhimit vendor dhe mbytjen e tij nga importet që po rriten çdo ditë dhe mbylljen e një numri të madh veprimtarish biznesore”.

Po ashtu edhe Lidhja e Bizneseve të Kosovës (LBK) ka reaguar ashpër ndaj vendimit të Zyrës së Rregullatorit për Energji (ZRRE) për ndërprerjen e furnizimit me energji elektrike për bizneset, duke e cilësuar si të jashtëligjshëm, arbitrar dhe shkatërrues për ekonominë e vendit.

Sipas LBK-së, këto masa godasin rëndë prodhimin vendor, minojnë besimin e investitorëve të huaj, dëmtojnë imazhin ndërkombëtar të Kosovës dhe cenojnë mirëqenien e qytetarëve.

“Bizneset që përbëjnë 56% të ekonomisë dhe punësojnë mbi 140 mijë persona nuk duhet të përballen me masa të padrejta dhe të paarsyeshme. Ky vendim i sotëm nuk i shërben Kosovës – përkundrazi, i shërben interesave të individëve të caktuar dhe shteteve fqinje”.

Organizata i ka bërë thirrje spektrit politik, Presidentes dhe Kryeministrit në detyrë që të ndërhyjnë menjëherë, duke kërkuar: Formimin e institucioneve sa më shpejt, shkarkimin e bordit të ZRRE-së dhe ndalimin e menjëhershëm të ndërprerjes së energjisë për bizneset.

“ZRRE me vendime arbitrare po shkatërron prodhimin dhe ekonominë e Kosovës. Kërkojmë ndaljen e menjëhershme të këtyre veprimeve dhe dialog me bizneset”.

Shkyçjen e qindra bizneseve nga rrjeti i furnizimit me energji elektrike nga KEDS e ka quajtur persekutim Lidhja Demokratike e Kosovës (LDK) teksa kjo parti i bëri thirrje Prokurorisë Speciale që të merret sa më parë me institucione siç janë Zyra e Rregullatorit të Energjisë dhe asessi të mos mbetet e pa ndëshkuar.

Ndërsa Partia Demokratike e Kosovës shkyçjen e bizneseve nga rrjeti i energjisë elektrike e ka cilësuar si një katastrofë kombëtare ekonomike duke theksuar se kjo situatë rrezikon mbi 100 mijë familje në Kosovë, për shkak të mungesës së furnizimit me energji dhe ndërprerjes së aktivitetit ekonomik të bizneseve.

Në Kosovë, liberalizimi i tregut të energjisë është paraparë me Ligjin për energjinë elektrike të miratuar në vitin 2016, por zbatimi i tij është shtyrë për shkak të rrethanave të ndryshme.

Në vendet e Bashkimit Evropian, procesi i liberalizimit të tregut të energjisë ka filluar në fund të viteve ’90 me qëllim rritjen e konkurrencës, efikasitetit, sigurisë dhe zgjedhjes për konsumatorët.

Në Ballkanin Perëndimor ky proces është ende në zhvillim e sipër./ Fatos Shala

The post “Tregu i lirë” i lë në errësirë bizneset e Kosovës, mbi 90% shkëputen nga rrjeti elektrik appeared first on Revista Monitor.

TIRANË, 18 gusht/ATSH/ Boga është një margaritar i turizmit malor dhe agroturizmit shqiptar që po tërheq gjithnjë e më shumë turistë të huaj.

Zhvillimi i agroturizmit në këtë zonë, si dhe ndërtimi i strukturave hoteliere me standarde, i ka dhënë tjetër hov zhvillimit të turizmit në këtë zonë.

Ministrja e Turizmit dhe Mjedisit, Mirela Kumbaro ndau sot shembullin e Gëzim Olajt, që kishte vizionin dhe iniciativën për ngritjen e Kullës së Bajraktarit.

“Zona ka marrë jetë të re me kuzhinën tradicionale që të çon në rrënjët e shijes shqiptare, mikpritjen e ngrohtë dhe një model zhvillimi që i jep frymëmarrje ekonomisë lokale”, u shpreh Kumbaro.

Ky, sipas ministres Kumbaro, është shembulli më i mirë se si turizmi i qëndrueshëm mund të kthehet në motor të punësimit dhe zhvillimit rural, duke ruajtur njëkohësisht traditat dhe peizazhet natyrore të Alpeve tona.

“Në zemër të Alpeve Shqiptare, Boga po kthehet çdo ditë e më shumë në një destinacion të preferuar për udhëtarët që kërkojnë qetësi, aventura dhe shije autentike shqiptare, edhe në këto ditë të nxehta ku jo të gjithë preferojnë plazhin, por shpërndahen në territor për turizëm malor, për të përjetuar emocionet e rafting, për të shijuar zonat e mbrojtura apo sitet e kulturës”, theksoi Kumbaro.

Ndërsa sipërmarrësi Gëzim Olaj u shpreh se gjithë kursimet nga emigracioni në Angli i ka investuar në këtë sipërmarrje.

“Kemi filluar para 13 viteve. Investimi i parë ka qenë investimi në Qafë-Thore. Para 4 viteve kam bërë Kullën e Bajraktarit. Arsyeja më e madhe është dashuria për vendlindjen. Të gjitha kursimet e mia në Londër i kam investuar këtu. Investimet janë përqendruar në agroturizëm, i cili është i certifikuar. Kam ndërtuar edhe fermën time duke krijuar një cikël të mbyllur. Po ashtu mbledhim edhe prodhimet e zonës”, tha ai.

Olaj shprehet se investimi është kryer me standarde të larta dhe jo me idenë e përfitimit të shpejtë dhe pa cilësi.

“Kam vendosur standard. Nuk kam bërë një investim sot për sot, me gjëra të lira. Kam lënë Londrën dhe Anglinë ku kam jetuar 30 vjet dhe kam ardhur këtu. Shpresoj që të jap kontributin tim që Boga të ketë turizmin elitar”, shtoi ai.

“Shumica e turistëve janë europianë. Vijnë nga Europa Perëndimore, shumica janë turistë gjermanë e francezë, tani kanë filluar edhe spanjollë apo nga Polonia, Çekia e Sllovakia. Kemi pasur edhe nga Amerika, Australia dhe Zelanda e Re”, tha ai, ndërsa prezantoi edhe gatimet tradicionale të zonës që ofrohen në këtë agroturizëm.

/m.m/r.e/

The post Kumbaro: Boga, një margaritar i turizmit malor dhe agroturizmit shqiptar appeared first on Agjencia Telegrafike Shqiptare.

TIRANË, 18 gusht/ATSH/ Kryetari i Partisë Demokratike, Sali Berisha u paraqit sot në Prokurorinë e Posaçme Kundër Korrupsionit dhe Krimit të Organizuar (SPAK) në zbatim të masës detyrim paraqitje për dosjen “Partizani”.

Në një prononcim për mediet pas paraqitjes në SPAK, Berisha tha se institucioni që supozohet të luftojë krimin e organizuar po funksionon, sipas tij, si “aleat” i krimit.

Berisha akuzoi kreun e SPAK, Altin Dumani për mbështetje të aktivitetit kriminal brenda dhe jashtë territorit shqiptar.

Po ashtu, Berisha komentoi edhe deklaratat e kryeministrit Edi Rama mbi vendimet e marra nga gjyqtari Hazbi Balliu dhe prokurorja e Shkodrës Elsa Gjeli.

“Rama sulmoi me egërsinë më të madhe një prokurore me mbiemrin Gjeli, e cila në mënyrë absolute kishte zbatuar pikë për pikë atë që kërkohej në raportin e policisë së Shkodrës. Më pas i është vërsulur edhe një gjyqtari të ri, Balliu, që ka zbatuar vendimin e qeverisë për të njohur të drejtën e parablerjes për disa qytetarë. Rama kërkon që njëherë gjykatësi ta zbatojë ligjin, e herën tjetër të mos e zbatojë, sipas interesit të tij”, shtoi ai.

Sipas Berishës, as Këshilli i Lartë i Prokurorisë dhe as Këshilli i Lartë Gjyqësor nuk kanë reaguar për të mbrojtur prokuroren dhe gjyqtarin, megjithëse vepruan në përputhje me ligjin.

Berisha akuzoi gjithashtu KLGJ-në për mbrojtjen e gjyqtares Irena Gjoka, e cila sipas tij është e përfshirë në tri vepra penale dhe e dënuar me burg nga një gjykatë greke për deklarim të rremë pasurie dhe mashtrim gjatë procesit të vetting-ut.

Berisha e cilësoi rastin si “një mashtrim”, ndërsa u shpreh se “Gjoka justifikoi një pasuri të marrë si hua në vitin 1996 duke iu referuar nenit 830 të Kodit Civil, i cili hyri në fuqi vetëm në 2015”.

Po ashtu, Berisha tha se “pas largimit të PD nga parlamenti, kreu i qeverisë miratoi një ligj antikushtetues që autorizon SPAK të regjistrojë telefonat e gjykatësve”.

“De facto ata tre gjykatës, dhe jo vetëm ata, por të gjithë gjykatësit e gjykatës speciale në të dy nivelet, janë në kontrollin e plotë të Altin Troplinit. Kjo është e gjithë puna dhe kjo nuk ndodh në botë”, theksoi kryetari i PD-së.

/m.m/r.e/

The post Berisha: Antikushtetues, ligji që autorizon SPAK të regjistrojë telefonat e gjykatësve appeared first on Agjencia Telegrafike Shqiptare.

TIRANË, 18 gusht/ATSH/ Ministri i Mbrojtjes Pirro Vengu kujtoi sot se deri në datën 29 gusht është afati i dorëzimit të dokumentacionit për këdo që do të aplikojë për të ndjekur studimet në Akademinë e Forcave të Armatosura.

Qendra e Personel Rekrutimit do të rekrutojë kandidatë për të ndjekur studimet për përgatitjen e oficerëve të rinj në Akademinë e Forcave të Armatosura, për vitin akademik 2025 – 2026, për 60 të drejta studimi.

Ministri Vengu ftoi të aplikojnë të gjithë ata që duan të provojnë sfidën dhe nderin e uniformës.

“Forcat e Armatosura hapin dyert për të gjithë të rinjtë dhe të rejat, deri në moshën 29 vjeç. Ushtarë detarë, ajrorë, aktivë. Periudha e rekrutimit: 20 tetor – 31 dhjetor 2025. Afati për dorëzimin e dokumentacionit: 29 gusht 2025”, bëri të ditur ministri Vengu.

Kursi i Përgatitjes së Oficerit, sipas ministrit Vengu përfshin 60 kuota studimi në kursin përgatitor 9-mujor të Akademisë së Forcave të Armatosura 2025–2026 në fusha të tilla si
mjekësi, inxhinieri, ndërlidhje, logjistikë, këmbësori e shumë specialitete të tjera.

Konkretisht  sipas specialiteteve ofrohen: Ndërlidhje 15 Kuota (Fakulteti i Inxhinierisë Elektronike, IT, Telekomunikacion, Inxhinieri Informatike, Kompjuterike, Mirëmbajtje rrjeti dhe Programim); Logjistikë 7 kuota (Fakulteti Ekonomik, Financë, Menaxhim); Inxhinieri 10 kuota (Gjeodezi, Mekanikë, Transport); Xhenio/Infrastrukturë 5 kuota (Fakulteti i Inxhinierisë së Ndërtimit); Mjekësi 3 kuota, (Mjekësi e përgjithshme); Shkenca mjekësore 2 kuota; Kimi 5 kuota (ushqimore, industriale); Këmbësori 13 kuota, (Diplomë bachelor në fusha të tjera).

/m.m/r.e/

The post Studimet në Akademinë e FA-së, Vengu: Afat deri në 29 gusht për dorëzimin e dokumentacionit appeared first on Agjencia Telegrafike Shqiptare.

Nga Gazeta ‘SI’ – Në muajin qershor, në Shqipëri janë regjistruar 1.2 mln netë qëndrime nga vizitorët vendas dhe të huaj, duke shënuar një rritje me 38% nga qershori i shkuar.

Për të njëjtën periudhë, vizitorët janë shtuar me 37%, rreth 500 mijë, vendas dhe të huaj. 19% e vizitorëve që erdhën në Shqipëri ishin nga Kosova, 13% Italia dhe 10% Polonia.

INSTAT raporton se bregdeti, në rajonin qendror dhe jugor, ishin destinacionet më të vizituara gjatë këtij muaji si për të huajt dhe për rezidentët. Hotelet mbeten alternativa e preferuar e vizitorëve të huaj, ndjekur nga modeli AirBnB dhe qëndrimet në kampingje.

Norma e shfrytëzimit të dhomave në hotele arriti në 39.5 %, krahasuar me 35.9 % në Qershor 2024.

The post Turistët e huaj mbushin hotelet shqiptare, 1.2 mln netë qëndrime gjatë qershorit appeared first on Gazeta Si.

Eksportet janë rritur në korrik për të tretin muaj radhazi. Edhe ecuria e korrikut është ndikuar nga rritja e fortë e lëndëve djegëse drejt Kosovës si dhe shtimi i shitjeve të produkteve ushqimore në vendet e tjera.

Në rritje ishin dhe eksportet e grupit makineri e pjesë këmbimi. Sektori që punon me material porositësi, kryesisht tekstile e këpucë po rimëkëmbet lehtë.

Ndërsa në rënie të fortë vazhdojnë materialet e ndërtimit e metalet, të ndikuara nga frenimi i aktivitetit të Kurum.

Të dhënat e INSTAT bënë të ditur se në Korrik 2025 eksportet e mallrave arritën vlerën 35 mld lekë, duke u rritur me 5,7 %, në krahasim me të njëjtën periudhë të një viti më parë.

Sipas INSTAT, Gjatë muajit Korrik 2025, në rritjen e eksporteve prej 5,7 %, pozitivisht kanë ndikuar grupet: “Minerale, lëndë djegëse, energji elektrike” me +12,8 pikë përqindje, “Makineri, pajisje dhe pjesë këmbimi” me +1,2 pikë përqindje dhe “Ushqime, pije, duhan” me +0,8 pikë përqindje, etj. Negativisht kanë ndikuar grupet:

“Materiale ndërtimi dhe metale” me -8,0 pikë përqindje dhe “Produkte kimike dhe plastike” me -1,3 pikë përqindje.
Për 7 mujorin, tendenca mbetet pozitive.

Eksportet, gjatë këtij shtatëmujori janë rritur me 2,6 %, krahasuar me një vit më parë. Grupet që kanë ndikuar në rritjen vjetore të eksporteve, janë: “Minerale, lëndë djegëse dhe energji elektrike” me +9,2 pikë përqindje, “Ushqime, pije, duhan” me +1,1 pikë përqindje, etj. Ndërsa negativisht kanë ndikuar grupet: “Materiale ndërtimi dhe metale” me -6,3 pikë përqindje, “Produkte kimike dhe plastike” me -0,7 pikë përqindje, etj.

Kosova “shpëton eksportet, por është thjesht efekt metodologjie, tendenca reale në rënie

Rritja e eksporteve është ndikuar nga Kosova, shitjet drejt të cilës u rritën me 72.5% në shtatëtëmujor, e ndikuar kryesisht nga grupi “mineralet, lëndët djegëse e energjia”.
Nga 6 miliardë që janë rritur eksportet në total në vlerë, shitjet e Kosovës janë zgjeruar me 17.3 miliardë lekë, për 7 mujorin, duke amortizuar rënien e eksporteve drejt shteteve të tjera, kryesisht drejt Italisë (-10.3 miliardë lekë), Maqedonisë së veriut (-2.5 miliardë lekë).

Eksportet drejt Kosovës unë 17.2% të totalit në 7 mujorin 2025, nga 10% të njëjën periudhë të një viti më parë, duke u renditur e dyta pas Italisë (38.8%).
Por, rritja e fortë e eksporteve me Kosovën ka të bëjë me faktin se që nga 1 janari 2025 tranzitet e karburantit drejt Kosovës raportohen edhe si ri eksporte, duke ndikuar në zgjerimin e fortë të eksporteve në vlerë.

Duke hequr efektin e ndryshimit të metodologjisë, që nuk janë eksportet reale drejt Kosovës, por tranzit i produkteve përmes Shqipërisë, tendenca reale e eksporteve vijon me rënie, me rreth 8-10 miliardë lekë.

Lëndët djegëse, energjia e mineralet, rritja nga Kosova
“Minerale, lëndë djegëse e energji” është grupi me rritjen më të madhe në gjashtë muajt e parë të këtij viti. Për janar-korrik, eksportet arritën në gati 66 miliardë lekë, me një rritje prej 48% në krahasim me të njëjtën periudhë të një viti më parë.

Ndryshe nga vitet e mëparshme, kur efektin kryesor e kishin shitjet e Bankers Petroleum në Spanjës, ose energjia, ndikimin kryesor në këtë tendencë e ka dhënë Kosova, që ka pasur një zgjerim të fortë të shitjeve të grupmallit “Lëndët djegëse minerale, vajrat minerale dhe produktet e distilimit të tyre”, që siç u shpjegua më lart ka të bëjë me riklasifikimin e eksporteve drejt shtetit fqinjë.

Fasoni rritje e lehtë

Eksportet e tekstile e këpucë kanë shënuar luhatje të shumta përgjatë muajve të parë të këtij viti, me rënie e rritje të lehta. Në korrik, ky grup u rrit lehtë me 1.2%.
Për shtatëmujorin tendenca është negative, me një rënie prej 1% me bazë vjetore.

Ekspertët e tregut kanë pohuar se sezoni i prodhimit për veshjet dhe këpucët e stinës së dimrit sivjet është përqendruar në 4 muaj nga 5 muaj që zgjat zakonisht. Sezoni i prodhimit për veshjet e stinës së dimrit nga kompanitë e manifakturës sivjet nisi në muajin Prill dhe pritet të përfundojë më 15 Shtator.

Nga sektori është parashikuar një rritje eksportesh në nivelet 3 deri 5%, e ndikuar nga rritja e shitjeve në periudhën janar-shkurt 2025, krahasuar me vitin e kaluar. Këpucët janë produkti më i kërkuar, pas një rënieje në shitje gjatë viteve 2023 dhe 2024.

Materiale ndërtimi dhe metale, tkurrje e fortë 34%

“Materialet e ndërtimit dhe metalet” kanë vijuar tendencën rënëse edhe këtë vit, të ndikuar nga reduktimi i aktivitetit të Kurum, përpunuesit të çelikut, që është një nga eksportuesit më të mëdhenj në vend.
Për shtatë mujorin, ky grup ra me 33%. Sektori po vuan nga kërkesa e dobët rajonale dhe tkurrja e çmimeve.

Ushqime pije e duhan, ngadalësojnë rritjen

“Ushqime pije e duhan”, një nga grupet me ecurinë më të mirë vitet e fundit po shënon rritje. Në janar-korrik, ky grup u rrit me 8.15%, teksa në korrik zgjerimi u ngadalësua në 5.9%, nga rreth 23% që ishte në qershor. Ecuria është ndikuar nga riorganizimi i fermave të vogla ë ferma më të mëdha për eksporte, shtimi i kontratave dhe zgjerimi i zonave që eksportojnë, si dhe shtimi i investimeve në magazina e zgjerimi i tregjeve deri në vendet nordike.

Makineri, pajisje, pjesë këmbimi rritje e fortë

“Makineri, pajisje, pjesë këmbimi” shtë grupi që e ka marrë vetën në korrik, pasi kishte shfaqur shenja stanjacioni dy vitet e e fundit. Në korrik grupi u rrit me 12.6%, ndërsa për 7 mujorin zgjerimi është 5.1%. Ky grup po vuan zhvlerësimi i euros, rritja e kostove dhe mungesa e fuqisë punëtore.

Ulet deficiti tregtar

Në këtë shtatëmujor eksportet e mallrave arritën vlerën 239 mld lekë, duke u rritur me 2,6 %, ndërkohë importet e mallrave arritën vlerën 515 mld lekë, duke u ulur me 2,1 %, krahasuar me një vit më parë. Deficiti tregtar arriti vlerën 276 mld lekë, duke u ulur me 5,8 %, krahasuar me të njëjtën periudhë të 2024.

Në Korrik 2025 eksportet e mallrave arritën vlerën 35 mld lekë, duke u rritur me 5,7 %, në krahasim me të njëjtën periudhë të një viti më parë dhe duke u ulur me 0,5 %, në krahasim me Qershor 2025.

Importet e mallrave arritën vlerën 83 mld lekë, duke u ulur me 2,4 %, në krahasim me një vit më parë dhe duke u rritur me 9,1 %, në krahasim me Qershor 2025. Defiçiti tregtar i këtij muaji është 48 mld lekë, duke u ulur me 7,5 %, krahasuar me Korrik 2024 dhe duke u rritur 17,3 %, në krahasim me Qershor 2025.

The post Rritje fiktive e eksporteve, pas ndryshimit të raportimit me Kosovën, ecuria reale është me rënie appeared first on Revista Monitor.

Hotelet raportuan rritje të vizitorë ve dhe netqëndrimeve të të huajve në muajin qershor ku në krye të grupeve vijuan të mbeten Kosova dhe Italia me respektivisht 19 për qind dhe 13 për qind. Nisja e turizmit të organizuar që në maj duket se bëri që edhe polakët të ishin grupi i tretë sipas shteteve të cilët regjistronin 10 për qind të vizitorëve të raportuar.

Të dhënat tregojnë një tendencë të raportuar edhe nga turoperatorët ku për herë të parë edhe francezët janë bërë një grup i rëndësishëm me 6 për qind teksa gjermanët qëndrojnë para tyre me 8 për qind të vizitorëve.

Të dhënat zyrtare të Institutit të Statistikave mbi strukturat akomoduese për muajin qershor tregojnë se vizitorët gjithsej u rritën me 37,2 %, ku ata jo-rezidentë shënuan një rritje prej 37,4 % dhe rezidentë 36,7 %. Net qëndrimet gjithsej u rritën me 38,2 %, ku ato jo-rezidentë u rritën me 38,3 %, ndërsa ato nga rezidentët me 38,0 %.

“Rritja më e madhe e vizitorëve jo-rezidentë u shënua në zonat bregdetare (+42,4 %) dhe në hotelet dhe akomodimet e ngjashme (+35,0 %). Vizitorët e huaj sipas vendit të rezidencës Në Qershor 2025, shumica e vizitorëve jo-rezidentë të cilët u akomoduan në strukturat pritëse në Shqipëri vijnë nga Kosova (19 %), Italia (13 %), Polonia (10 %). Gjermania dhe Franca kontribuuan përkatësisht me 8 % dhe 6 % të vizitorëve, ndërsa 44 % e tyre ishin nga vende të tjera.

Këto të dhëna reflektojnë prirjen e rritjes së turizmit hyrës nga tregjet kryesore të rajonit dhe Evropës. Norma e shfrytëzimit të dhomave në hotele arriti në 39,5 %, krahasuar me 35,9 % në Qershor 2024” thuhet në njoftimin e INSTAT.

Të dhënat zyrtare të turizmit këtë vit kanë qenë të luhatura. Turoperatorët kanë raportuar se viti 2025 në total ndoshta do të shënojë një shifër më të mirë se viti që lamë pas por vera 2025 është shfaqur më e zbehtë të paktën për disa rajone.

Rezervimet individuale kanë qenë më të ulëta gjatë korrikut teksa piku i sezonit mendohet se është regjistruar vetëm në gusht. Gjithsesi situatën reale pritet që ta tregojnë të dhënat vetëm pas mbylljes së sezonit.

The post Turizmi, të huajt në hotele u rritën me 37.4%, në krye Kosova dhe Italia appeared first on Revista Monitor.

TIRANË, 18 gusht/ATSH/ Viti i ri shkollor 2025-2026 do të nisë në 8 shtator për arsimin bazë dhe arsimin e mesëm të lartë dhe do të përfundojë në 12 qershor 2026.

Lajmin e bëri sot të ditur ministrja e Arsimit dhe Sportit, Ogerta Manastirliu, e cila ndau disa informacione të rëndësishme për vitin e ri shkollor 2025-2026.

Manastirliu informoi se për maturantët e klasave të 12-a viti shkollor do të përfundojë në 29 maj 2026.

Ministrja publikoi po ashtu edhe kalendarin e pushimeve të dimrit për arsimin bazë dhe arsimin e mesëm të lartë, i cili do të jetë nga data 22 dhjetor 2025, deri në 2 janar 2026.

Ndërsa pushimet e pranverës për arsimin bazë janë në periudhën 30 mars deri në 3 prill 2026.

Provimet kombëtare për klasat e 9-a të arsimit bazë do të zhvillohen gjatë periudhës 15-26 qershor 2026, ndërsa Matura Shtetërore në periudhën 1-26 qershor 2026.

Ministrja Manastirliu informoi se regjistrimet online në “e-Albania” për klasat e para dhe të dhjeta vijojnë deri në 31 gusht.

Edhe këtë vit librat do të shpërndahen falas para fillimit të shkollës. “Shkolla do të afishojë listën e librave dhe do të njoftojë datat dhe vendin e shpërndarjes”, theksoi Manastirliu.

Ministrja Manastirliu kujtoi edhe rregullat që duhen zbatuar në shkollë, si për shembull ndalimi i telefonave. “Në rast shkelje dhe mosrespektimi të rregullave do të ketë forcim të masave nga shkolla dhe lajmërim të menjëhershëm të prindit”, bëri të ditur ministrja.

Ndërkohë komunikimi prind-shkollë do të realizohet në SMIP ku sigurohen hapësira të reja për informacion mbi cilësinë e mësimdhënies dhe orientimin e karrierës së fëmijës.

Në platformën SMIP mund të konsultohen dokumentet zyrtare të shkollës online, pa pasur nevojë për paraqitjen fizike.

Manastirliu u shpreh se siguria edhe mbështetja për fëmijët realizohet përmes shërbimit psiko-social dhe oficerëve të sigurisë me standarde të reja për mbështetje më efektive dhe një ambient më të sigurt në shkollë.

Po ashtu, Ministrja theksoi se edhe këtë vit ofrohet përdorim i gjerë i laboratorëve inteligjentë në lëndë shkencore, teknologji, gjuhë të huaja dhe projekte praktike.

Lidhur me aktivitetet në nivel kombëtar, ministrja Manastirliu informoi se edhe këtë vit shkollor do të realizohet Konkursi Kombëtar i Teatrit për shkollat 9-vjeçare; Festivali i Shkencës për shkollat e mesme si dhe Konkursi Kombëtar i Gjuhës Shqipe për klasat IX.

/m.m/r.e/

The post Viti i ri shkollor nis në 8 shtator, Manastirliu: Laboratorë inteligjentë dhe standarde të reja sigurie appeared first on Agjencia Telegrafike Shqiptare.

TIRANË, 18 gusht /ATSH/ Gjiri i Gramës, në Gadishullin e Karaburunit, është një ndër destinacionet e preferuara nga turistët vendas dhe të huaj në bregdetin e jugut të Shqipërisë.

Kryeministri Edi Rama ndau sot pamje nga Gjiri i Gramës, i cili ofron një peizazh natyror shumë tërheqës për çdo vizitor.

“Me energjinë verore nga Gjiri i Gramës”, shkruan Rama, ndërsa ndan pamje nga plazhet më spektakolare të jugut, me ujin e pastër kristal e natyrën e virgjër.

Gjiri detar futet disa qindra metra në tokë, ku formon një bregdet shkëmbor me foleza. Aty ka dhe disa shpella nënujore. Ky gji është përdorur shumë për mbrojtjen e anijeve nga furtuna në det.

Gjithashtu, ai është përdorur gjatë në antikitet si gurore. Gurorja e Gramës është mjaft e njohur që në lashtësi.

Detarët që strehonin aty anijet, punëtorët që nxirrnin blloqe shkëmborë që përdoreshin për ndërtim në qytetet ilire e më gjerë, kanë gdhendur edhe emrat në faqet shkëmbore e shumë të dhëna të tjera që bëjnë kureshtar vizitorin.

Ndaj dhe shpesh shpella që ndodhet aty njihet si “Shpella e shkrimeve”. Arkeologët i kanë studiuar dhe kanë shkruar për këto dokumente historike të gdhendura në shkëmb.

Vlerat e këtij monumenti natyror janë shkencore, historike, kulturore e turistike. Por sot ky gji i bukur detar shfrytëzohet si një plazh i vogël e intim. Drejt tij shkohet me rrugë tokësore, por edhe detare. Shfrytëzohet nga aventurierët e ujit dhe të shpellave.

/m.m/r.e/

The post Rama: Energji verore nga Gjiri i Gramës appeared first on Agjencia Telegrafike Shqiptare.

TIRANË, 18 gusht/ATSH/ Spitali Rajonal i Lezhës, i cili tashmë ka marrë Kartën e Autonomisë Menaxheriale, po rikonstruktohet tërësisht duke rritur gamën e shërbimeve shëndetësore për të gjithë qytetarët e Lezhës.

Kryeministri Edi Rama ndau sot në rrjetet sociale pamje nga kantieri i Rilindjes së Spitalit të Lezhës, ku shumë shpejt qytetarët do të gjejnë hapësira dinjitoze, aparatura moderne dhe kushte bashkëkohore shërbimi.

Spitali i Lezhës është një prej 53 strukturave spitalore që po transformohet me infrastrukturë moderne dhe me kushte më të mira në shërbim të qytetarëve dhe stafit shëndetësor.

Pas maternitetit, investimi në godinën qendrore të Spitalit Rajonal Lezhë përmbyll ciklin e investimeve në këtë spital.

Ky investim përfshin godinën qendrore të spitalit me sipërfaqe ndërtimi rreth 4 mijë m2, ku përfshihen të gjithë shërbimet me shtretër, reanimacioni, urgjencat peadiatrike dhe ato për të rritur, terapia intensive, pediatria, kirurgjia.

Me një kapacitet prej 117 shtretërish, ky spital do të ofrojë shërbime cilësore për rreth 200 mijë banorët e zonës që mbulon.

/m.m/r.e/

The post Rama: Spitali i Lezhës me aparatura moderne dhe kushte bashkëkohore shërbimi appeared first on Agjencia Telegrafike Shqiptare.

Nga Gazeta ‘SI’ – Ditën e sotme, 18 gusht 2025, maturantët në të gjithë vendin që kanë aplikuar në degën e mjekësisë, do t’i nënshtrohen testimit, që zhvillohet në Qendrën e Shërbimeve Arsimore, në Tiranë.

Provimi kryhet në mënyrë elektronike, çka do të thotë se rezultatet merren në kohë reale.

Këtë vit janë në 1.202 kandidatë që garojnë, rreth 41^% më pak se vitine shkuar.

Sa i përket numrit të kuotave, janë 446 për maturantët brenda vendit, por në total Universiteti i Mjekësisë ka 500 kuota për vitin akademik 2025-2026. Por, pjesa tjetër e kuotave janë për kandidatët jashtë trojeve.

Provimi i sotëm u jep maturantëve 30% në total, ndërsa 70% ata e marrin nga rezultatet e Maturës Shtetërore.

The post Maturantët i nënshtrohen testimit të Universitetit të Mjekësisë, 41% aplikantë më pak appeared first on Gazeta Si.

Nga Gazeta ‘SI’ – Ende në fazë konsultimi, Kodi i ri Penal është pritur me rezerva nga ligjvënësit dhe gjyqësori, të cilët janë të shqetësuar për shkelje të të drejtave.

Së fundmi, edhe shoqata e profesionistëve të lirë, APL, ka kritikuar Kodin, duke i kërkuar qeverisë rishikim të draftit, duke respektuar mbrojtjen e lirisë ekonomike dhe lirisë së fjalës.

Duke ngritur shqetësimin për zgjerimin e panevojshëm të ndërhyrjes penale në fusha që tradicionalisht janë trajtuar nga e drejta civile apo administrative, APL në një letër drejtuar ministrit Ulsi Manja, sjell në vëmendje disa nene që sipas tyre mund të sjellin pasoja negative në marrëdhëniet mes bizneseve.

Neni 537, që penalizon “tarifat e papërshtatshme të shërbimit”, duhet të rishikohet me prioritet, pasi në një ekonomi tregu, çmimet përcaktohen nga marrëdhënia kërkesë–ofertë dhe natyra e shërbimit, jo nga sanksione penale. Nocioni është i paqartë dhe rrezikon të penalizojë ofruesit e shërbimeve, duke ndërhyrë në mënyrë të panevojshme në marrëdhënie kontraktuale që tradicionalisht trajtohen nga e drejta civile ose administrative.

Neni 604 që parashikon se mospagimi, brenda afatit ligjor, i detyrimeve tatimore të vetëdeklaruara përbën kundërvajtje penale, e dënueshme me gjobë ose burgim deri në një vit, por pa dalluar ndërmjet vonesave të paqëllimshme dhe shmangies së qëllimshme;

Neni 625, mund të penalizojë konkurrencën e ligjshme në marrëdhënie tregtare, duke e penalizuar ofertën në prani të një marrëveshjeje paraprake.

Gjithashtu, ata ngrenë shqetësimin edhe për nene të tjera për shpifjen, ndikimin në pavarësinë e gjykatësve etj.) rrezikojnë se do të dobësojnë rolin mbikëqyrës të medias dhe do të rrezikojnë transparencën në një shtet ligjor funksional.

Aleanca kërkon që procesi i miratimit të Kodit të mos nxitohet, por të shoqërohet me konsultime të gjera dhe gjithëpërfshirëse, ku të përfshihen profesionistë të drejtësisë, përfaqësues të biznesit dhe shoqërisë civile.

Profesionistët e APL shprehen të gatshëm të kontribuojnë me ekspertizë dhe propozime konkrete, duke theksuar se kjo reformë duhet të shërbejë për të ndërtuar një sistem më të drejtë, efikas dhe në përputhje me standardet europiane.

The post Profesionistët e lirë kundër Kodit të ri Penal: Penalizon konkurrencën e ndershme! appeared first on Gazeta Si.

TIRANË, 16 gusht/ATSH/ Thethi, perla e Alpeve Shqiptare, po mirëpret vizitorë nga e gjithë bota me hapësirat e rikthyera publike në identitet e në harmoni me peizazhin.

Kryeministri Edi Rama ndau sot në rrjetet sociale përshtypjet e disa prej tyreve, të cilët shprehen të mahnitur me pamjet përrallore, mikpritjen tradicionale, me ujin e kristaltë e me ajrin e pastër që të falin qetësi dhe energji pozitive.

Një turiste australiane tregoi se si e magjepsur nga Thethi është rikthyer disa herë këtu.

“Të zgjohesh në një ditë me diell, me qiell të kaltër, të rrethuar me malet, në një fshat të bukur si Thethi. Si mund të mos jetë një ditë e mirë? Jam nga Australia dhe e dua Thethin aq shumë sa kam ardhur në Shqipëri 8 javë më parë dhe në total kam kaluar gati një muaj këtu në Theth, duke u larguar dhe kthyer përsëri, sepse e dua aq shumë”, tha ajo.

Turistja e huaj e rekomandon Thethin për shtëpitë e pritjes të cilat sipas saj, janë thjesht të bukura.

“Atmosfera, ndjesia këtu është magjike. Është mistike, të jep një ngrohtësi. Ti vjen në Theth eksploron ujëvarën, del në ecje tek Syri i Kaltër, noton në ujin e ftohtë, shkon në male, ha ushqime tradicionale të mira, pi me miqtë e tu. Të vendos ty në një lloj vendi të magjisë dhe të përfshin brenda”, tha ajo.

Një tjetër turist nga Austria u shpreh se përshtypja e parë për Thethin ishte e mrekullueshme. “Nuk e prisnim këtë lloj lëndine në mes të maleve. Është më thjesht, më reklaksuese këtu se sa në Austri”, tha ai.

Një tjetër turiste e huaj u shpreh se gjithçka është e mrekullueshme. “Ne e shijuam shumë të vinim këtu me motoçikleta dhe u ndjemë shumë të relaksuar”, tha ajo.

“Vend shumë i bukur, ushqimi shumë i mirë. Kemi ardhur edhe herë të tjera na pëlqen shumë”, u shprehën disa vizitorë të tjerë.

Një tjetër turiste e huaj vlerësoi njerëzit dhe mikpritjen. “Janë shumë të këndshëm dhe të ndihmojnë shumë me çdo gjë”, tha ajo.

“Jemi nga Austria. Ne na pëlqen natyra dhe vendosëm të vinim në Theth sepse kërkuam një vend më të largët. Shkuam tek Syri i Kaltër, natyrë shumë e bukur që e rekomandoj. Është fantastike këtu na pëlqeu shumë. Është shumë impresionuese me kaq male, thjesht shumë bukur”, tha një tjetër.

Dy pushuese nga Zelanda e Re thanë se po e shijojnë shumë  qëndrimin e këndshëm në Theth. “Duket pak si malet Dalmat, na pëlqen kisha”, thanë ato.

“Jam nga Franca. Po kërkoja për një vend ku të bëja hiking në malet këtu. Pashë këtë. Disa njerëz ma rekomanduan nga Tirana, por më pëlqen shumë, është shumë bukur”, tha një turist francez.

Një tjetër turist skocez tha se e zgjodhi Thethin nga Majat e Ballkanit. “Përshtypja e parë është shumë e këndshme. Ushqim i mirë, biseda të këndshme dhe bujtina shumë të këndshme. Mund ta rekomandoj vërtetë. Është një vend shumë i mirë në Shqipëri. Është ndryshe nga Tirana ku ishim më parë”, tha ai.

Ndërkohë për turistët që zgjedhin Thethin ofrohen edhe sportet e aventurës.

“Zipline është atraksion. Shtimi i Zipline e bën më interesante për turistët e huaj. Turistë ka nga gjithë bota. Shumica janë holandezë, gjermanë nga Izraeli, nga Arabia Saudite”, shtoi një operator vendas.

“Jemi nga Australia. Vendosëm të vinim në Theth nga pamja e maleve. Është këndshëm të relaksohesh”, tha një tjetër.

/m.m/ /a.g/

The post Rama: Thethi mirëpret vizitorë nga e gjithë bota me hapësirat publike të rikthyera në identitet appeared first on Agjencia Telegrafike Shqiptare.

TIRANË, 16 gusht/ATSH/ Qendra historike e fshatit Qeparo, ndodhet në bregdetin e Himarës dhe është një nga zonat më të rëndësishme të trashëgimisë kulturore.

Ajo pasqyron një harmoni të rrallë mes arkitekturës dhe peizazhit natyror. E vendosur mbi kodra me pamje mahnitëse mbi detin Jon, ajo ruan kujtimet e një jete të thjeshtë mesdhetare dhe trashëgiminë e pasur kulturore të zonës.

Kryeministri Edi Rama ndau sot në rrjetet sociale videon promovuese të Pandeli Cecos, pjesëmarrës në Konkursin Ndërkombëtar të Fotografisë dhe Video Reels “Wanderlust in Albania 2” të organizuar nga Agjencia Kombëtare e Turizmit.

“Një udhëtim në Qeparo, midis blusë së Jonit dhe gjelbërimit, me ftesën për një ecje nëpër rrugicat me kalldrëm të fshatit të vjetër, ku guri ruan kujtimet e shekujve, ndërsa aroma e agrumeve të përqafon me freskinë e saj”, u shpreh Rama, krahas pamjeve.

Qendra historike e fshatit Qeparo ruan një shtrirje urbane dhe ansambël karakteristik banesash të shekujve XVIII-XIX, të cilat pasqyrojnë mënyrën tradicionale të ndërtimit në zonat bregdetare.

Një karakteristikë e qendrës historike të Qeparoit është rrjeti rrugor me kalldrëm. Rrugicat pasqyrojnë mënyrën e organizimit shoqëror dhe ekonomik të qytetit.

Qeparoi është nga fshatrat më të vjetër të bregdetit shqiptar dhe ofron dëshmi të jetës dhe kulturës së banorëve vendas, ndër shekuj. Qendra historike e këtij fshati përfshin disa monumente kulture të shpallura, mes tyre banesa tradicionale dhe objekte fetare.

/m.m/ /a.g/

The post Rama: Një udhëtim në Qeparo, midis blusë së Jonit dhe gjelbërimit appeared first on Agjencia Telegrafike Shqiptare.

TIRANË, 16 gusht/ATSH/ Partia Demokratike reagoi sot lidhur e një denoncim të bërë nga disa qytetarë për ndërtim pa leje në zonë e “5 Majit” në Tiranë.

Në një deklaratë për medie, zëdhënësja e Antikorrupsionit në PD, Genta Vangjeli bëri të ditur se sipas informacioneve të tyre, objekti ndodhet në rrugën “Dervish Luzha”, pranë mbikalimit që të nxjerr në rrugën “5 Maji”.

“Pamjet e siguruara nga banorët tregojnë qartë ndërtimin e paligjshëm. Ata shprehen se kanë njoftuar disa herë Policinë e Shtetit, por nuk ka pasur asnjë reagim. E njëjta situatë përsëritet edhe me strukturat kryesore inspektuese në nivel kombëtar për evidentimin dhe prishjen e ndërtimeve pa leje, të cilave u është bërë me dije shkelja, por pa asnjë ndërhyrje nga ana e tyre”, shtoi Vangjeli.

Duke iu referuar denoncimit të qytetarëve, Vangjeli tha se “zyrtarë të shtetit marrin pagesa të përsëritura nga pronarët e biznesit që ushtron aktivitet në këtë objekt, dhe në këmbim, shkelja e ligjit injorohet”.

“Partia Demokratike i bën thirrje Prokurorisë dhe të gjitha organeve ligjzbatuese që të verifikojnë situatën dhe veprojnë menjëherë, në mënyrë që të ndalohen abuzimet dhe ligji të zbatohet njësoj për të gjithë, pa mbrojtje për shkelësit”, shtoi ajo.

/m.m/ /a.g/

The post PD denoncon ndërtimin pa leje te “5 Maji” në Tiranë appeared first on Agjencia Telegrafike Shqiptare.

TIRANË, 16 gusht/ATSH/ Linda Rama, bashkëshortja e kryeministrit Edi Rama rrëfen në një intervistë për revistën “Newsbomb.al” shumë të pathëna nga jeta familjare, por edhe një mendim të saj për reformat dhe intensitetin që ka filluar të punojë qeveria në fund të mandatit të tretë e në vigjilje të mandatit të katërt.

“Kam krijuar një distancë të sigurt higjienike nga pushteti…I kam rezistuar çdo përpjekjeje për të më konsideruar si paradhomë të zyrës së Edit dhe i kam bërë ballë çdo keqkuptimi kur njerëz të afërt a të panjohur, më janë adresuar si pëshpëritëse në veshin e tij”, shprehet Linda Rama.

Pak kohë më parë në një media gjermane kryeministri Edi Rama tha se opozitën e vërtetë e kishte në familje, duke nënkuptuar debatet me Lindën.

Por Linda Rama thotë se në familje nuk krijojnë dy jetë paralele, atë politike e atë familjare. Padyshim që gjërat fliten mes tyre, por Linda tregon se ajo kryen në familje ato detyra të çdo nëne e gruaje tjetër, që nga zgjimi i Zahos në mëngjes, e deri tek nxitimi për të mos kapur trafikun e rënduar të çuarjes së tij në shkollë.

Linda tregon në intervistë se prej 4 muajsh është bërë gjyshe për herë të dytë, pasi Rea, vajza e saj, ka sjellë në jetë një një vajzë, Rui. E tashmë familja e tyre është rritur shumë me gjithë fëmijët që vijnë vërdallë.

“Zaho, Avi dhe Rui janë tre zogj që, kur jemi së bashku, na mbështjellin me një larmi të hatashme zërash e tingujsh, të qarash e të qeshurash, zënkash, ngacmimesh e përqafimesh fëminore. Ndërsa momentet intime familjare secili i konsumon për veten, ndryshe nuk do të quheshin intime”, tregon Linda Rama.

Më tej, si eksperte e shoqërisë civile, Linda ka folur edhe për ndjesitë e përjetuara nga letra që një grup deputetësh të Partisë Demokratike dërguan në institucionet ndërkombëtare duke u kërkuar atyre ta përjashtonin nga punët studimore meqenëse ishte bashkëshortja e kryeministrit.

“Fillimisht mu duk një çudi e madhe që përfaqësimi më i lartë institucional opozitar, në vigjilje të fushatës elektorale, i kishte mbledhur të gjitha forcat dhe firmat e veta, për të më hequr nga puna mua. Jo Edin. Domethënë në atë moment parazgjedhor për opozitën pushteti për t’u luftuar nuk ishte Edi me të vetët, por isha unë dhe studimet e mia”, shprehet Linda.

Gjatë kësaj interviste, Linda Rama u është përgjigjur edhe shumë pyetjeve të tjera; për punën e saj, për familjen, për ritmin e vrullshëm të Rilindjes Urbane 2.0, për debatin mbi sistemin fiskal, për marrëdhëniet ndërkombëtare, sfidat dhe idhujt që e frymëzojnë.

/m.m/ /a.g/

The post Linda Rama për “Newsbomb.al”: Liria është pushteti im appeared first on Agjencia Telegrafike Shqiptare.