377 subjekte që cenojnë sigurinë rrugore ka evidentuar Inspektoriati i Mbrojtjes së Territorit në Korçë përgjatë segmenteve Qafë Thanë – Kapshticë dhe Korçë – Leskovik.

“Janë kryesisht rrethime të banesave, ka dhe tabela karburantesh, servise që mund të kenë makina të çmontuara që kanë zënë rrugën,  më pak dhe përpunim mermeri.”

Paralajmërimi për çlirimin vullnetar të hapësirave  publike  ka përfunduar  më 5 gusht  dhe inspektorët  dolën në terren për të monitoruar situatën.

“Ka filluar një lloj ndërgjegjësimi nga banorët apo bizneset për të çmontuar vullnetarisht. Ndërkohë grupet janë në terren duke marrë masa që në rast se nuk ka  nisur ende largimi  do merren masa për ti gjobitur dhe për ti  prishur nga ana e strukturave tona.”

Të enjten inspektorët u ndalën në shembjen e rrethimeve që po bëhej vullnetarisht nga bizneset  që kishin zaptuar hapësirat  që cenonin sigurinë në rrugën  nga Korça në Pogradec./abcnews.al

Një mjet tip skrep është përfshirë nga flakët në fushën e mbetjeve në Vlorë. Zjarri ka përfshirë gjithashtu edhe një pjesë të fushës përreth, duke shkaktuar shqetësim për përhapjen e mëtejshme të flakëve.

Në vendngjarje kanë mbërritur forcat zjarrfikëse, të cilat po punojnë për shuarjen e zjarrit dhe për parandalimin e përhapjes së tij në zonat e tjera të mbetjeve.

Presidenti i Ukrainës, Volodymyr Zelensky, ka zhvilluar një bisedë telefonike me homologun francez, Emmanuel Macron, si pjesë e konsultimeve të vazhdueshme me liderët evropianë lidhur me zhvillimet më të fundit në fushën e sigurisë.

Gjatë bisedës, Zelensky theksoi se Kievi dhe partnerët e tij evropianë po punojnë ngushtë për të harmonizuar qëndrimet e tyre, duke vlerësuar se është e domosdoshme ndërtimi i një qasjeje të bashkërenduar në nivel evropian për çështjet kyçe të sigurisë kontinentale.

“Jemi të vetëdijshëm për rëndësinë e një armëpushimi të mirëfilltë. Ukraina është e përgatitur për këtë hap, por deri tani nuk kemi parë ndonjë reagim të qartë publik nga ana e Rusisë. E ardhmja e afërt do të tregojë se cilat pasoja do të sjellë vazhdimi i luftës dhe pengimi i përpjekjeve për zgjidhje konstruktive nga ana e Moskës,” deklaroi presidenti ukrainas.

Deklaratat e Zelensky-t vijnë në sfondin e lajmit se presidenti rus Vladimir Putin është shprehur i gatshëm të takohet me ish-presidentin amerikan Donald Trump. Ky i fundit ka lënë të hapur mundësinë për një takim trepalësh, ku të përfshihej edhe vetë Zelensky, por deri më tani nuk ka pasur asnjë reagim nga pala ruse në lidhje me këtë propozim.

Zjarri që ka përfshirë zonat e Drenies dhe Gjinoqarës po vazhdon të përhapet me shpejtësi, ndërsa situata mbetet jashtë kontrollit.

Gazetarja e ABC News, bën të ditur se ekipet zjarrfikëse dhe forcat në terren janë angazhuar në përpjekje të pandërprera për frenimin e flakëve, por për shkak të terrenit të thyer dhe erërave të forta, ndërhyrja është e vështirësuar./abcnews.al

Read More...

Kryeministri i Izraelit, Benjamin Netanyahu. Kryeministri i Izraelit, Benjamin Netanyahu, pritet të takohet sot me një grup të vogël ministrash të lartë për t’i shqyrtuar planet që ushtria izraelite t’i marrë nën kontroll më shumë territore në Rripin e Gazës, me gjithë kundërshtimet në rritje brenda dhe jashtë vendit për luftën që ka zgjatur pothuajse dy vjet.

Netanyahu do të mbledhë kabinetin e sigurisë pas një takimi triorësh këtë javë me shefin e ushtrisë, të cilin zyrtarët izraelitë e përshkruan si të tensionuar, duke thënë se kreu i ushtrisë kishte kundërshtuar zgjerimin e fushatës ushtarake.

Sondazhet tregojnë se shumica e izraelitëve duan që lufta të përfundojë me një marrëveshje që do të çonte në lirimin e pengjeve të mbetura në Gazë.

Qeveria e Netanyahut ngul këmbë në fitore të plotë kundër Hamasit grupit militant palestinez të shpallur organizatë terroriste nga Shtetet e Bashkuara dhe Bashkimi Evropian.

Synimi që forcat izraelite të futen në zona që nuk i kontrollojnë ende në enklavën e shkatërruar palestineze ka shkaktuar shqetësim në Izrael.

Forumi i Familjeve të Pengjeve, që përfaqëson të afërmit e të rrëmbyerve që mbahen në Gazë, i kërkoi shefit të shtabit të ushtrisë, Eyal Zamir, ta kundërshtojë zgjerimin e luftës dhe i bëri thirrje Qeverisë ta pranojë një marrëveshje që do ta përfundonte luftën dhe do ta siguronte lirimin e pengjeve të mbetura.

Ministri i Mbrojtjes i Izraelit, Israel Katz, theksoi të mërkurën se ushtria do t’i zbatojë vendimet e Qeverisë deri në arritjen e të gjitha synimeve të luftës.

Udhëheqësit izraelitë kanë kërkuar prej kohësh që Hamasi të çarmatoset dhe të mos ketë më asnjë rol në një Gazë të demilitarizuar dhe që pengjet të lirohen.

OKB-ja i ka quajtur raportimet për një zgjerim të mundshëm të operacioneve ushtarake të Izraelit në Gazë si “thellësisht shqetësuese”.

Ushtria izraelite thotë se kontrollon rreth 75 për qind të Gazës. Shumica e popullsisë prej rreth 2 milionë banorësh është zhvendosur disa herë gjatë 22 muajve të fundit dhe organizatat humanitare paralajmërojnë se banorët janë në prag të urisë ekstreme. Rreth 200 palestinezë kanë vdekur nga uria që nga fillimi i luftës, gati gjysma prej tyre fëmijë, sipas Ministrisë së Shëndetësisë në Gazë.

Netanyahu përballet me trysni të madhe ndërkombëtare për të arritur një marrëveshje armëpushimi, por përballet gjithashtu edhe me trysni të brendshme nga koalicioni i tij për të vazhduar luftën.

Disa aleatë të ekstremit të djathtë në Qeverinë e tij kanë kërkuar që Gaza të pushtohet plotësisht dhe që Izraeli t’i rivendosë vendbanimet hebraike atje, dy dekada pas tërheqjes.

Ministri i Financave i ekstremit të djathtë, Bezalel Smotrich, u tha gazetarëve të mërkurën se shpreson që Qeveria të miratojë marrjen nën kontroll të pjesës tjetër të Gazës nga ushtria.

Lufta nisi kur militantët e udhëhequr nga Hamasi vranë rreth 1 mijë e 200 njerëz, shumica civilë, në sulmin e 7 tetorit 2023 dhe morën peng 251 të tjerë.

Shumica e pengjeve janë liruar përmes armëpushimeve ose marrëveshjeve të tjera. Nga rreth 50 që mbeten ende në Gazë, besohet se rreth 20 janë ende gjallë.

Lufta hakmarrëse e Izraelit ka vrarë mbi 61 mijë palestinezë, sipas Ministrisë së Shëndetësisë në Gaza, e cila nuk specifikon se sa prej tyre ishin luftëtarë apo civilë, por thotë se rreth gjysma ishin gra dhe fëmijë.

Kompania izraelite e energjisë NewMed Energy ka nënshkruar një marrëveshje me vlerë 35 miliardë dollarë për të trefishuar gradualisht sasinë e gazit natyror që dërgohet nga fusha gjigande Leviathan drejt Egjiptit.

Fusha Leviathan, që është një nga rezervat më të mëdha të gazit në Mesdhe, zotërohet nga NewMed, Chevron dhe Ratio Oil, dhe aktualisht furnizon Egjiptin me rreth 4.5 miliardë metra kub (bcm) gaz në vit. Ajo konsiderohet si një nga burimet më të rëndësishme të gazit për Egjiptin.

Sipas drejtorit ekzekutiv të NewMed, Yossi Abu, marrëveshja parashikon që nga viti 2029, prurjet e gazit nga Leviathan të rriten në rreth 12 miliardë metra kub në vit. Ai e cilësoi marrëveshjen si “fitimprurëse për të dyja palët”, duke theksuar se Egjipti do të kursejë “shuma të mëdha” në krahasim me importin e gazit të lëngshëm (LNG).

Gjatë 15 viteve të ardhshme, NewMed do të eksportojë 130 miliardë metra kub gaz drejt Egjiptit, ekuivalente me rreth dyfishin e konsumit vjetor të këtij vendi.

Për të përmbushur kërkesën e shtuar, do të ndërtohet një linjë e tretë furnizimi nga fusha Leviathan drejt platformës detare, ndërsa planifikohet investimi i 2.5 miliardë dollarëve për hapjen e dy puseve të reja dhe për instalimin e sistemeve mbështetëse deri në vitin 2029. Abu shtoi se fluksi aktual do të rritet në 6.5 bcm në vit brenda këtij viti ose në fillim të vitit të ardhshëm, para se të dyfishohet në 12 bcm.

Një tubacion i ri tokësor do të ndërtohet nga Izraeli drejt kufirit egjiptian në Nitzana, për të lehtësuar transportin e gazit.

Bisedimet për këtë marrëveshje janë zhvilluar gjatë dy viteve të fundit. Abu nuk komentoi nëse lufta në Gaza ka ndikuar në negociata, duke theksuar se kompania është e fokusuar te përfitimet komerciale dhe jo te aspektet politike apo gjeopolitike.

Megjithatë, marrëveshja vjen në një moment tensioni në opinionin publik egjiptian për shkak të luftës 22-mujore të Izraelit kundër Hamasit në Rripin e Gazës. Presidenti egjiptian, Abdel Fattah al-Sisi, e ka cilësuar ofensivën izraelite si gjenocid, ndërsa Egjipti përpiqet të ndërmjetësojë një armëpushim.

Në rrjetet sociale, shumë egjiptianë kanë shprehur zemërim për veprimet izraelite në Gaza dhe zhgënjim ndaj autoriteteve në Kajro që, sipas tyre, nuk kanë bërë sa duhet për të ndihmuar palestinezët.

“Raportet mes Kajros dhe Tel Avivit janë në pikën më të ulët në vite për shkak të luftës në Gaza, e cila ka zemëruar çdo shtresë të shoqërisë egjiptiane,” deklaroi Dr. H.A. Hellyer, studiues i lartë në Institutin Mbretëror për Studime të Bashkimit dhe Sigurisë në Lindjen e Mesme. “Shumë egjiptianë druajnë se varësia nga gazi izraelit mund të përdoret si presion ndaj Kajros.”

Egjipti, dikur eksportues i madh i gazit, është bërë gjithnjë e më i varur nga importet për shkak të rënies së prodhimit të brendshëm. Gjatë verës së vitit 2024, vendi përjetoi ndërprerje të përditshme të energjisë që nxitën pakënaqësi publike dhe ndikuan negativisht në aktivitetin ekonomik.

Për të përballuar krizën, qeveria egjiptiane ka rritur importet dhe ka filluar të shlyejë borxhet ndaj kompanive ndërkombëtare të energjisë për të inkurajuar rikthimin e kërkimeve dhe prodhimit të gazit vendas./abcnews.al

Një 28-vjeçar ka rënë në prangat e policisë pasi tentoi të hynte në Shqipëri, ndërkohë që ishte dënuar me 4 muaj burgim në Maqedoninë e Veriut për plagosje.

“Në PKK Bllatë, ndaluan shtetasin A.  L., 28 vjeç, banues në Dibër të Madhe, RMV, sepse nga verifikimet në hyrje të RSh-së, rezultoi se ishte në kërkim, pasi ishte i dënuar me 4 muaj burgim, nga autoritetet gjyqësore në RMV, për plagosje. Vijon bashkëpunimi me homologët maqedonas, nëpërmjet Interpol Tiranës, për ekstradimin e 28-vjeçarit”, njofton policia.

Materialet procedurale iu referuan Prokurorisë, për veprime të mëtejshme./abcnews.al

Hasi dikur ishte një ndër zonat më të varfra në vend,  por falë emigracionit  prej një dekade  po merr  frymë ekonomikisht.

Në këtë qytet kanë mbetur pak banorë, kryesisht çifte të moshuarish.

Të rinjtë janë larguar drejt Britanisë së Madhe. Jetojnë e punojnë atje dhe të ardhurat i investojnë  në  familjet e  tyre në Has.

Shpesh Hasi është vënë në qendër të vëmendjes se mediave prestigjioze ndërkombëtare për numrin e lartë të emigrantëve dhe lidhjen me Britaninë e Madhe  simbolet e së  cilës i sheh të ndërthurura me ato shqiptare në sheshe, lokale e shtëpitë e hasjanëve./abcnews.al

Roja Bregdetare dhe Policia Kufitare po vijojnë patrullimet intensive në det në përpjekje për të gjetur personin që dyshohet se është zhdukur disa ditë më parë nga një traget i linjës Greqi-Itali.

Sipas informacioneve të deritanishme, ende nuk është gjetur asnjë gjurmë e tij. Lidhur me këtë ngjarje, është dhënë njoftim edhe për anijet turistike dhe peshkarexhat, që të jenë të kujdesshme dhe të raportojnë çdo sinjal të mundshëm.

Sipas ekuipazhit të tragetit, personi rezulton i zhdukur, por nuk është konfirmuar ende nëse ai është hedhur, ka rënë aksidentalisht në det, apo bëhet fjalë për ndonjë divergjencë nga ana e vetë personit që ka çuar në mosgjetjen e tij.

Hetimet vijojnë ndërkohë që strukturat përkatëse janë në gatishmëri të plotë./tvklan.al

Kryeministri Edi Rama ka ndarë në llogarinë e tij në “Facebook”, një video për lirimin e hapësirave publike.

“Çarja e bllokadave vazhdon. Ecim”, tha Rama.

Ministria e Mbrojtjes ka bërë të ditur se gjatë 24 orëve të fundit janë raportuar 21 vatra zjarri në disa zona të vendit, prej të cilave 18 janë shuar ndërsa 3 vijojnë të jenë aktive.

Situata më problematike paraqitet në qarqet Vlorë, Berat dhe Fier, ku flakët kanë përfshirë sipërfaqe pyjore dhe zona të banuara, duke kërkuar ndërhyrje intensive nga forcat zjarrfikëse, Forcat e Armatosura, strukturat vendore dhe vullnetarët.

Pavarësisht përpjekjeve për shuarjen e vatrave, rreziku mbetet i lartë, veçanërisht për shkak të kushteve atmosferike, ndërsa autoritetet janë në gatishmëri për të garantuar sigurinë e qytetarëve dhe mbrojtjen e pasurisë.

Qarku Vlorë – Malet mbi fshatin Dhivër, bashkia Finiq. Zjarri vijon të përhapet mbi zonat Cerkovicë, Llupsat dhe Shëndre, në një sipërfaqe pyjore me pisha dhe bimësi të ulët.

Në terren për izolimin e plotë janë angazhuar: 34 efektivë me 10 automjete zjarrfikëse nga MZSH-të e Finiqit, Sarandës, Delvinës, Konispolit, Gjirokastrës, Himarës dhe Dropullit, 30 forca vullnetare, forca bashkiake, të pyjores si dhe  30 efektivë të FA me mbështetje ajrore po nga Forcat e Armatosura.

Qarku Berat – Zona e ish-Uzinës Mekanike Poliçan, ku në terren ndodhen 7 automjete zjarrfikëse, 40 efektivë të MZSH nga Poliçani, Berati dhe Skrapari, 20 forca bashkiake si dhe 1 automjet zjarrfikës me ekipin nga FA. Forcat po punojnë për izolimin e plotë të zjarrit me kujdes të shtuar për shkak të zonës.

Qarku Fier – Fshati Lofkënd, bashkia Mallakastër:

Zjarri ka përfshirë një sipërfaqe me pisha, me përhapje për shkak të erës. Forcat në terren po punojnë për izolimin e tij.

Në operacionet për shuarjen e zjarreve u angazhuan: 41 automjete zjarrfikëse dhe 314 forca operacionale, të ndihmuar nga Forcat e Armatosura me 30 efektivë, 3 automjet zjarrfikëse me ekuipazh dhe mbështetje nga ajri.

Sipas parashikimeve nga IGJEO, sot nuk priten reshje. Sa u përket zjarreve, sot pritet rrezik i lartë në qarkun Fier, rrezik i ulët në Kukës, Dibër, Korçë dhe rrezik i moderuar në qarqet e tjera.

Agjencia Kombëtare e Mbrojtjes Civile mbetet në gatishmëri të plotë për koordinimin e mëtejshëm të forcave në terren dhe mbështetjen e çdo strukture me qëllim mbrojtjen e qytetarëve dhe pasurisë së përbashkët./abcnews.al

Ish- ministri i Mjedisit, Lefter Koka ka lënë përkohësisht për 8 orë qelinë e burgut. Drejtoria e Përgjithshme e Burgjeve miratoi kërkesën e ish-ministrit të mjedisit për t’u larguar nga qelia deri në orën 17.00 të kësaj të enjte për shkak se nëna e tij është sëmurë.

Koka është shoqëruar nga forca të shumta policie dhe do të kthehet sërish në qelinë e burgut në IEVP Durrës pas disa orësh.

Ish-ministri i mjedisit mbahet në qeli që prej dhjetorit të vitit 2021, për çështjen e inceneratorëve./abcnews.al

Dy ministra të qeverisë së Ganë, Afrikë, ministri i Mbrojtjes Edward Omane Boamah dhe ministri i Mjedisit, Shkencës dhe Teknologjisë Ibrahim Murtala Muhammed humbën jetën në një aksident ajror ushtarak të ndodhur në rajonin qendror të Ashanti-t. Lajmi u konfirmua nga zëdhënës i qeverisë, i cili tha se në përplasjen fatale të helikopterit u vranë gjithsej tetë persona.

Shefi i kabinetit të presidencës, Julius Debrah, e përshkroi ngjarjen si një “tragjedi kombëtare”.

Sipas Forcave të Armatosura të Ganës, helikopteri ushtarak i tipit Z9, që transportonte tre anëtarë ekuipazhi dhe pesë pasagjerë, ishte zhdukur nga radarët pasi ishte nisur nga kryeqyteti Akra në orën 09:12 me orën lokale, me destinacion qytetin Obuasi. Delegacioni po udhëtonte për të marrë pjesë në një aktivitet kundër minierave të paligjshme, një problem madhor mjedisor në vend.

Trupat e viktimave u gjetën në vendin e ngjarjes dhe janë transferuar drejt Akras me avion ushtarak, sipas njoftimit të ushtrisë. Në rrjetet sociale janë shpërndarë pamje që pretendohet të tregojnë mbetjet e djegura të helikopterit.

Presidenti John Dramani Mahama ka pezulluar të gjitha aktivitetet publike të planifikuara për pjesën e mbetur të javës dhe ka shpallur tre ditë zie kombëtare duke nisur nga dita e enjte. Me urdhër të shefit të kabinetit, flamujt kombëtarë do të ulen në gjysmështizë në të gjithë vendin.

Në emër të presidentit Mahama dhe qeverisë, Debrah shprehu ngushëllime për familjet e viktimave, duke përfshirë edhe “anëtarët e shërbimit që dhanë jetën në shërbim të atdheut”.

Shkaku i aksidentit nuk është bërë ende i ditur, ndërsa autoritetet ushtarake kanë nisur një hetim zyrtar.

Donald Trump, njoftoi të mërkurën se kompania teknologjike Apple do të investojë edhe 100 miliardë dollarë në SHBA një lëvizje që mund ta ndihmojë kompaninë të shmangë tarifat e mundshme mbi iPhone-t e prodhuar jashtë vendit.

Me këtë angazhim të ri, totali i investimeve të planifikuara nga Apple në SHBA arrin në 600 miliardë dollarë për katër vitet e ardhshme. Në fillim të këtij viti, Apple kishte deklaruar se do të investonte 500 miliardë dollarë dhe do të punësonte 20 mijë punonjës në të gjithë vendin gjatë kësaj periudhe.

Plani i investimit synon të zgjerojë zinxhirin e furnizimit dhe kapacitetet e prodhimit të avancuar të Apple në territorin amerikan, ndonëse nuk përmbush ende kërkesën e vazhdueshme të Trump që iPhone-t të prodhohen tërësisht në SHBA.

“Kompanitë si Apple po kthehen në shtëpi. Të gjithë po kthehen,” tha Trump për gazetarët nga Zyra Ovale, pak pasi CEO i Apple, Tim Cook, i dhuroi një suvenir të prodhuar në SHBA me bazë ari 24 karatësh.

“Kjo është një hap i rëndësishëm drejt objektivit përfundimtar që iPhone-t që shiten në Amerikë të prodhohen edhe në Amerikë,” shtoi Trump.

I pyetur nëse Apple do të prodhojë ndonjëherë të gjithë iPhone-t brenda SHBA-së, Cook theksoi se shumë komponentë, si gjysmëpërçuesit, xhami dhe moduli Face ID, tashmë prodhohen në SHBA, por pranoi se montimi përfundimtar “do të vazhdojë të bëhet jashtë vendit për një kohë”.

Megjithëse angazhimi financiar është i madh, analistët vlerësojnë se investimi përputhet me ritmin e zakonshëm të shpenzimeve të Apple dhe ngjan me premtime të ngjashme të bëra gjatë administratës Biden dhe mandatit të mëparshëm të Trump.

Në muajin maj, Trump kishte kërcënuar me një tarifë prej 25% mbi produktet e Apple të prodhuara jashtë vendit një ndryshim i papritur nga politika e mëparshme, kur administrata e tij kishte përjashtuar smartphone-t, kompjuterët dhe pajisje të tjera elektronike nga raundet e tarifave ndaj mallrave kineze. Sipas të dhënave financiare, tarifat e vendosura më parë i kushtuan Apple rreth 800 milionë dollarë vetëm në tremujorin e dytë të vitit.

“Ky është një hap i mirë për Apple dhe një mënyrë për të përmirësuar raportet me Trump pas muajve të tensionuar mes kompanisë dhe Shtëpisë së Bardhë,” u shpreh analisti Daniel Ives nga Wedbush Securities. Sipas tij, Apple ka një histori të përzier sa i përket realizimit të premtimeve të investimit.

Në vitin 2019, për shembull, Tim Cook vizitoi një fabrikë në Teksas së bashku me Trump, e cila u promovua si një objekt i ri prodhimi. Por rezultoi se kjo fabrikë prodhonte kompjuterë Apple që prej vitit 2013, dhe më vonë Apple zhvendosi këtë prodhim në Tajlandë.

Apple vazhdon të prodhojë pjesën më të madhe të produkteve të saj përfshirë iPhone-t dhe iPad-ët në Azi, kryesisht në Kinë, megjithëse vitet e fundit ka zhvendosur pjesë të prodhimit në Vietnam, Tajlandë dhe Indi.

Pavarësisht presionit politik, analistët janë të një mendimi se ndërtimi i iPhone-ve në SHBA mbetet jo realist, për shkak të kostove të larta të fuqisë punëtore dhe kompleksitetit të zinxhirit global të furnizimit.

“Sot kemi një zgjidhje të zgjuar ndaj kërkesës së presidentit që Apple të prodhojë të gjitha iPhone-t në SHBA,” tha Nancy Tengler, drejtore ekzekutive dhe investimeve në Laffer Tengler Investments, kompani që zotëron aksione në Apple./abcnews.al

Më shumë se 1 mijë e 500 civilë dyshohet se janë masakruar gjatë një sulmi të zhvilluar në prill mbi kampin më të madh të zhvendosurve në Sudan, në një nga krimet më të rënda të luftës që nga fillimi i konfliktit shkatërrues në vend

Një hetim i gazetës britanike The Guardian për sulmin 72-orësh të forcave paraushtarake të Rapid Support Forces (RSF) mbi kampin Zamzam në Darfurin Verior kampi më i madh për personat e zhvendosur nga lufta ka dokumentuar dëshmi të shumta për ekzekutime masive dhe rrëmbime në shkallë të gjerë. Qindra civilë ende rezultojnë të zhdukur

Përmasat e viktimave të dyshuara e bëjnë këtë sulm të dytin më të rëndë për nga numri i të vrarëve në këtë luftë, pas një masakre etnike të ndodhur në Darfurin Perëndimor dy vite më parë.

Lufta ndërmjet RSF-së, e udhëhequr nga arabë, dhe ushtrisë sudaneze shpërtheu në prill të vitit 2023 dhe ka qenë e shoqëruar nga mizori të përsëritura, që kanë detyruar miliona njerëz të largohen nga shtëpitë e tyre dhe kanë shkaktuar krizën më të madhe humanitare në botë.

Deri tani, raportimet për sulmin në Zamzam (11–14 prill) flisnin për rreth 400 civilë jo-arabë të vrarë. Kombet e Bashkuara kanë deklaruar se “qindra” janë vrarë.

Megjithatë, një komitet i ngritur për hetimin e numrit të viktimave thotë se ka dokumentuar deri më tani mbi 1 mijë e 500 të vrarë, një shifër që mund të rritet ndjeshëm, pasi shumë trupa ende nuk janë nxjerrë nga rrënojat në kampin që aktualisht kontrollohet nga RSF.

“Trupat ndodhen brenda shtëpive, në fusha dhe nëpër rrugë,” deklaroi për The Guardian Mohammed Sharif, pjesë e administratës së mëparshme të kampit.

Një ekspert i krimeve të luftës me përvojë dekadash në Darfur, i cili ka intervistuar dhjetëra të mbijetuar nga Zamzam, beson se numri i të vrarëve mund të arrijë deri në 2 mijë. Duke folur në kushte anonimiteti, ai theksoi se niveli i dhunës ishte i pashembullt, madje edhe krahasuar me masakrat ndaj grupeve etnike afrikane gjatë viteve 2000 nga milicitë arabe që më vonë formuan RSF-në.

“Çdo person që ka arritur të shpëtojë, ka humbur një anëtar familjeje. Diçka e tillë nuk ka ndodhur më parë,” shtoi ai.

Sipas Abdallah Abugarda, nga Shoqata e Diasporës së Darfurit në Mbretërinë e Bashkuar, rreth 4 mijë e 500 anëtarë të organizatës së tij njohin personalisht dikë mik apo të afërm që ka humbur jetën në sulm. Ai tha gjithashtu se të paktën 2 mijë banorë të Zamzam mbeten të zhdukur.

“Masakra në Zamzam një vendstrehim për të zhvendosurit për më shumë se 20 vjet është një nga krimet më të rënda në historinë e fundit të njerëzimit. Megjithatë, bota është treguar e heshtur,” theksoi Abugarda

Zëvendësshefjа për emergjencat në Médecins Sans Frontières (MSF), Claire Nicolet, deklaroi se sulmi goditi “një nga popullsitë më të pambrojtura në planet”. Sipas saj, të mbijetuarit janë përballur me “plaçkitje të përhapura, dhunë seksuale dhe kushte të mjerueshme në vendet e tranzitit”.

Një numër i madh grash janë rrëmbyer dhe nuk dihet asgjë për fatin e tyre. Mohammed Sharif tha se të paktën 20 prej tyre janë dërguar në qytetin Nyala, një nga bastionet e RSF-së, rreth 160 km nga Zamzam./abcnews.al

Gjykata e Vlorës ka dhënë këtë të enjte masat e sigurisë për personat e arrestuar pak ditë më pare në Orikum.

Tre prej tyre janë lënë në burg ndërsa vetëm për njërin prej tyre është vendosur masa detyrim paraqitje.

I njohur me nofkën “Pole Qorri”, Plaku është i dyshuar për vrasjen e Gentian Bejtjes. Më herët në pranga e policisë ka rënë edhe dy bashkëpunëtorët e tij, Edison Haxhiun dhe Ilir Beqaraj. Këta të fundit mendohet se ndihmuan që Plaku të largohej jashtë vendit. Gentian Bejtja u ekzekutua me mbi 30 plumba pasditen e 15 marsit, brenda serës në oborrin e banesës së tij në fshatin Larushk të Fushë-Krujës.

/abcnews.al

Ndërsa reshje të rrëmbyeshme godasin Kinën, Pakistanin dhe pjesë të Indisë, një valë përvëluese e të nxehtit ka përfshirë Japoninë dhe Korenë e Jugut, duke shkaktuar qindra viktima në të gjithë rajonin e Azisë.

Sipas shkencëtarëve, ndryshimet klimatike po e bëjnë motin gjithnjë e më ekstrem, më të shpeshtë dhe të paparashikueshëm. Ky trend është veçanërisht i theksuar në Azi, e cila, sipas Organizatës Botërore Meteorologjike, po ngrohet gati dyfish më shpejt se mesatarja globale.

Sipas raportit vjetor Climate Risk Index, rajoni ka humbur mbi 2 trilionë dollarë amerikanë (rreth 1.5 trilionë paund britanikë) në tre dekadat e fundit për shkak të fatkeqësive klimatike si përmbytje, valë të të nxehtit dhe thatësira.

Rekorde të të nxehtit në Japoni dhe Korenë e Jugut

Japonia regjistroi ditën më të nxehtë ndonjëherë të martën, kur temperaturat në qytetin Isesaki, në prefekturën Gunma, arritën në 41.8°C. Ky vit ka shënuar gjithashtu qershorin dhe korrikun më të nxehtë në historinë e vendit.

Sipas zyrës së mjekësisë ligjore në Tokio, nga mesi i qershorit deri në fund të korrikut, 56 persona kanë humbur jetën si pasojë e goditjes nga të nxehtit. Disa linja hekurudhore janë pezulluar përkohësisht nga autoritetet për shkak të frikës se nxehtësia mund të dëmtojë shinat e trenit.

“Ndihem e shqetësuar për ngrohjen globale, por në jetën e përditshme nuk mund të rri pa kondicioner,” tha për AFP një punonjëse zyre në Japoni. “Nuk di çfarë të bëj, thjesht po mundohem të kaloj ditët.”

Parashikimet flasin për një lehtësim të përkohshëm të të nxehtit në ditët në vijim, me reshje deri në 200 mm në disa rajone të Japonisë.

Në Korenë e Jugut, korriku solli një rekord prej 22 netësh radhazi me temperatura mbi 25°C të ashtuquajturat “netë tropikale”. Autoritetet kanë raportuar një rritje të ndjeshme të rasteve të sëmundjeve të lidhura me nxehtësinë. Institucionet dhe kompanitë kanë zbutur kodet e veshjes për të lehtësuar punën dhe për të reduktuar përdorimin e kondicionerëve.

Ndërkohë, kryeqyteti i Vietnamit, Hanoi, përjetoi për herë të parë në muajin gusht një ditë me temperatura mbi 40°C. “Qyteti është kthyer në një tigan të zjarrtë,” tha për AFP Nam, një punëtor ndërtimi.

Përmbytje shkatërruese në Kinë, Indi dhe Pakistan

Në kontrast me të nxehtin përvëlues në verilindje të Azisë, pjesë të mëdha të Kinës janë përballur me përmbytje të mëdha nga Shangai deri në Pekin ku dhjetëra persona kanë humbur jetën javët e fundit.

Jugu i vendit është goditur nga reshje të dendura dhe ekipet e emergjencës po punojnë për të pastruar rrënojat, ndërsa rajoni përgatitet për rrëshqitje të mëtejshme dherash dhe përmbytje. Vetëm në qytetin Guangzhou, kryeqendra e provincës Guangdong, qindra fluturime janë anuluar ose vonuar. Përmbytjet po rrezikojnë të përkeqësojnë edhe përhapjen e virusit chikungunya, që transmetohet nga mushkonjat.

Ndërsa reshje të dendura janë të zakonshme në Kinën jugore gjatë kësaj periudhe të vitit, këtë herë ato janë shtuar nga aktiviteti i shtuar i stuhive tropikale sidomos gjatë muajit të fundit. Vetëm javën e kaluar, tre stuhi tropikale ishin aktive në Paqësorin perëndimor, ndërsa para qershorit aktiviteti ishte thuajse i papërfillshëm.

Rajone malore në rrethinat e Pekinit u goditën nga përmbytje vdekjeprurëse muajin e kaluar, ku humbën jetën dhjetëra persona, përfshirë 31 banorë të një shtëpie për të moshuar. Zonat malore dhe ato të populluara mbeten më të rrezikuarat nga përmbytjet dhe rrëshqitjet e dherave.

Tragjedi edhe në Indi dhe Pakistan

Në shtetin verior indian të Uttarakhand-it, mbi 100 persona rezultojnë të zhdukur pas një “cloudburst” një reshje ekstreme dhe e papritur mbi një zonë të kufizuar që shkaktoi përmbytje të menjëhershme.

Në Pakistan, që nga qershori, gati 300 persona kanë vdekur nga incidente të lidhura me shirat, përfshirë më shumë se 100 fëmijë. Reshjet e dendura kanë shkatërruar qindra shtëpi dhe ndërtesa. Sipas organizatës Save the Children, të paktën një e katërta e shkollave në provincën Punjab janë dëmtuar pjesërisht ose plotësisht.

Të martën, mbi 350 mm reshje ranë në Hong Kong dita më e lagësht e gushtit në qytet që nga viti 1884. Për krahasim, qyteti merr mesatarisht rreth 2400 mm reshje në vit, shumica e të cilave bien gjatë verës./abcnews.al

Qeveria italiane ka dhënë miratimin përfundimtar për ndërtimin e urës më të gjatë me një hapësirë të vetme në botë, e cila do të lidhë Sicilinë me Italinë kontinentale përmes ngushticës së Mesinës. Ky projekt i shumëdebatuar është shtyrë për dekada për shkak të shqetësimeve mjedisore, financiare dhe të tjera, por tashmë ka marrë dritën jeshile nga Komiteti Ndërministror për Planifikim Ekonomik dhe Zhvillim të Qëndrueshëm (CIPESS), gjatë një takimi në Romë.

Ura pritet të jetë rreth 3.7 kilometra e gjatë dhe është përfolur për ndërtim që nga fundi i viteve 1960, si një mjet për të nxitur zhvillimin ekonomik të jugut të varfër të Italisë. Qeveria e djathtë e kryeministres Giorgia Meloni e ka bërë projektin një ndër prioritetet kryesore, duke planifikuar një fond prej 13.5 miliardë eurosh përgjatë dhjetë viteve të ardhshme për ndërtimin e urës dhe infrastrukturës përreth saj.

Sipas kompanisë “Messina Strait”, e cila mbikëqyr projektin, ura pritet të përfundojë në vitin 2032.

Megjithatë, projekti ka hasur në kundërshtime të forta nga aktivistë dhe qytetarë që shprehin shqetësime për ndërtimin në një zonë të rrezikuar nga tërmetet, kosto të larta që mund të tejkalojnë parashikimet, ndikime të mundshme mjedisore dhe përfshirje të mundshme të mafies në tenderat e ndërtimit. Këtë javë, organizata mjedisore kanë paraqitur një ankesë pranë Bashkimit Evropian, duke ngritur alarmin për rreziqe serioze për mjedisin lokal.

Nga ana tjetër, projekti ka mbështetje të gjerë nga ata që besojnë se lidhja hekurudhore dhe rrugore do të sjellë përfitime të mëdha për Sicilinë dhe rajonet jugore të Italisë, duke zëvendësuar kalimin aktual me traget dhe duke përmirësuar ndjeshëm lëvizshmërinë.

Konkursi ndërkombëtar për ndërtimin e urës është fituar nga konsorciumi “Eurolink”, i udhëhequr nga kompania më e madhe ndërtimore në Itali, “Webuild”. Pjesë e konsorciumit janë gjithashtu grupi spanjoll “Sacyr” dhe ai japonez “IHI”.

Sipas “Messina Strait Company”, miratimi i dhënë do të mundësojë nisjen e punimeve paraprake, përfshirë studimet arkeologjike dhe gjeologjike, si dhe do të autorizojë shpronësimet e nevojshme.

Ministri i Transportit dhe zëvendëskryeministri Matteo Salvini ka deklaruar se vendimi i CIPESS duhet të ratifikohet nga Gjykata Kombëtare e Auditit për të hyrë në fuqi, një proces që pritet të zgjasë disa javë.

“Webuild”, e cila aktualisht është e angazhuar në projekte madhore në mbarë botën, përfshirë projektin gjigant NEOM në Arabinë Saudite, ka vlerësuar se ndërtimi i urës mund të krijojë mbi 100,000 vende pune. Ndërkohë, “Sacyr” ka qenë pjesë e zgjerimit të Kanalit të Panamasë, ndërsa “IHI” ka kontribuar në ndërtimin e urave të mëdha pezulluese si ura Akashi në Japoni dhe ura Osman Gazi në Turqi.

Të paktën 138 persona janë vrarë gjatë 24 orëve të fundit në Rripin e Gazës nga forcat izraelite, sipas Ministrisë së Shëndetësisë të drejtuar nga Hamasi në këtë territor. Kjo e çon në 61.158 numrin total të të vrarëve që nga fillimi i luftës.

Sipas të njëjtës ministri, 771 persona të plagosur janë dërguar në spitalet e Gazës gjatë ditës së fundit, ndërsa një numër viktimash ndodhen ende nën rrënoja. Ambulancat dhe ekipet e mbrojtjes civile nuk kanë mundur të arrijnë deri te ta për shkak të situatës së rënduar në terren.

Në përditësimin më të fundit, Ministria e Shëndetësisë ka bërë të ditur edhe shifrat për viktimat mes atyre që kërkojnë ndihma humanitare. Sipas saj, 87 persona janë vrarë dhe 570 të tjerë janë plagosur ndërsa përpiqeshin të merrnin ndihma ushqimore ose mjekësore./abcnews.al