Komisioni Evropian deklaroi këtë të martë, 26 gusht, se Bashkimi Evropian ka “të drejtën sovrane” për të rregulluar sektorin e teknologjisë, pas kërcënimeve të Donald Trump për vendosjen e tarifave doganore ndaj vendeve që, sipas tij, synojnë kompanitë amerikane të teknologjisë.

Presidenti amerikan sulmoi një ditë më parë vendet dhe organizatat që rregullojnë sektorin e teknologjisë, duke i kërcënuar me tarifa dhe kufizime eksporti. Edhe pse nuk përmendi drejtpërdrejt BE-në, kjo e fundit ka arsenal juridik më të fuqishëm në botë për rregullimin e tregut digjital.

“Është e drejtë sovrane e BE-së dhe e shteteve anëtare që të rregullojnë aktivitetet ekonomike në territorin tonë, në përputhje me vlerat tona demokratike”, deklaroi zëdhënësja e Komisionit Evropian, Paula Pinho.

Komisioni gjithashtu hodhi poshtë akuzat e administratës Trump dhe gjigantëve të teknologjisë për “censurë”, duke i quajtur ato “plotësisht të pabazuara”.

Një sulm rus në një minierë ukrainase raportohet se ka vrarë një punëtor, ka plagosur tre të tjerë dhe ka bllokuar  rreth 150 minatorë nën tokë.

“Sulmi dëmtoi ndërtesat dhe pajisjet e ndërmarrjes, duke shkaktuar ndërprerje të energjisë elektrike”, u citua të thoshte DTEK, investitori më i madh privat i energjisë në Ukrainë, nga media lajmesh Kyiv Independent.

“Në atë kohë, 146 minatorë ishin nën tokë; ngjitja e tyre në sipërfaqe është duke vazhduar”, shtoi DTEK në lidhje me grevën kundër objekteve të saj.

Firma e energjisë nuk specifikoi vendndodhjen e saktë të minierës së prekur, megjithëse kreu i sindikatës Mykhailo Volynets tha më parë se 148 minatorë mbetën të bllokuar nën tokë pas një sulmi rus në Dobropillia, Donetsk./abcnews.al

Vatra e zjarrit e rënë në një objekt biznesi në krahë të segmentit Laç-Lezhë është vene nën kontroll.

Ministria e Mbrojtjes nëpërmjet një njoftimi zyrtar informon se po punohet për fikjen e plotë të saj.

Forcat zjarrfikëse mbeten të angazhuara në terren. Kujtojmë se zjarri i rënë në segmentin Laç-Lezhë u përhap me shpejtësi i favorizuar edhe nga era, duke rrezikuar kështu edhe disa banesa që ndodheshin aty pranë./abcnews.al

Read More...

Në kuadër të operacionit “The Wanted”, kapen në Itali dhe arrestohen me qëllim ekstradimin në Shqipëri, dy vëllezër, të cilët ishin shpallur në kërkimn ndërkombëtar. H. alias E. L., 35 vjeç. Gjykata e Durrësit, në muajin janar 2022, i ka caktuar këtij shtetasi, masën e sigurisë “Arrest në burg”, për veprat penale “Vjedhja me dhunë” dhe “Përkrahja e autorit të krimit”. Ai akuzohet se në bashkëpunim me disa shtetas të tjerë, më datë 07.02.2021, ka vjedhur me dhunë, një automjet, një shumë parash dhe një celular, në ambientet e një fabrike qumështi. Gjithashtu, ka ndihmuar të fshihej shtetasin H.H, i shpallur në kërkim për veprën penale “Ndihma për kalim të paligjshëm të kufijve”;

H., 31 vjeç. Gjykata e Dibrës, në muajin korrik 2020, e ka dënuar këtë shtetas me 4 vjet e 4 muaj burgim, për veprën penale “Kultivimi i bimëve narkotike”. Në vitin 2019, shtetasi K. H. është kapur në flagrancë brenda një sere në Martanesh, ku kishte kultivuar fidanë narkotikë në 1324 gota plastike. Nga dënimi, këtij shtetasi i kanë mbetur për të vuajtur dhe 1 vit, 6 muaj e 15 ditë.

Interpol Tirana dhe Interpol Roma po kryejnë procedurat për ekstradimin e këtyre shtetasve, në Shqipëri.

Australia ka njoftuar se do ta dëbojë ambasadorin e Iranit nga shteti, pas dyshimeve për përfshirjen direkte të qeverisë iraniane në sulmet antisemitike në Sydney dhe Melbourne.

Kryeministri Anthony Albanese ka thënë se sulmet ishin “akte të jashtëzakonshme dhe të rrezikshme të agresionit, të orkestruara nga një shtet i huaj”. Askush nuk ishte lënduar në sulmet që ndodhën vitin e kaluar.

Shefi i organizatës së Inteligjencës së Sigurisë në Australi, Mike Burgess, ka thënë se informatat që posedon agjencia e tij janë se Irani ka shumë gjasa të ketë qenë prapa sulmeve ndaj komunitetit hebre në incidentet në Australi.

Ambasadori Ahmad Sadeghi dhe tre zyrtarë të tjerë iranianë janë urdhëruar të largohen nga Australia brenda shtatë ditësh. Irani nuk ka komentuar akuzat.

Është hera e parë që Australia ka dëbuar një ambasador që prej Luftës së Dytë Botërore. Albanese po ashtu ka thënë se qeveria e tij do t’i shpallë Trupat e Gardës Revolucionare Iraniane si organizatë terroriste.

Flakët që kanë përfshirë një sipërfaqe të madhe me shkurre dhe ferra pranë një biznesi në afërsi të superstradës Lezhë-Milot, janë përhapur me shpejtësi duke kërcënuar edhe disa banesa e një restorant që ndodhet aty afër.

Në vendin e ngjarjes ndodhet forcat zjarrfikëse të cilat po luftojnë me flakët për të bërë të mundur neutralizimin e flakëve. Siç shihet dhe nga pamjet e siguruara nga gazetari i ABC News, Gjergj Figuri, dëmet materiale janë të konsiderueshme. Ndërkohë që fatmirësisht nuk raportohet për të lënduar./abcnews.al

Analisti Arben Meçe i ftuar në “News Line” në ABC News, komentoi të reja e fundit sa i takon ndryshimeve që pritet të bëjë kryeministri i vendit Edi Rama, për nisjen e legjislaturës së re parlamentare.

Meçe tha se kryeministri në një mënyrë apo në një tjetër ka paralajmëruar ndryshime. Analisti shtoi se pritet të shohim një qeveri me një natyrë të panjohur më parë për ne, ku do të lartësohet të gjitha figurat politikë që kanë spikatur. Sipas Meçes, kësaj here jo si zgjatime të Ramës, por si figura individuale.

“Pjesën tjetër e vë në dyshim nëse kanë një forcë të pavarur. Rama duhet të përgatisë një strukturë të re evidente. Ministrat nuk duhet të jenë teknikë, duhet që të jenë edhe politikë. Ky është misioni i Ramës. Unë mendoj se Rama në kuadrin e gjithë kësaj skeme që ndërton, qeveria do të jetë e një natyre të panjohur që ne jemi mësuar të shikojmë. I ka dhënë shenjat, por mendoj të mos e vazhdojë këtë skemë në qeveri, sepse ministrat duhet që të jenë ikonat. Rama në kuadër të këtij plani, do të bëjë që këto figura që kanë arritur të evidentohet, do i ngrejë në nivele të larta, por jo si zgjatimi i Ramës, por si individë më vete. Në parim jo më qeveri teknike”, tha analisti./abcnews.al

Në një intervistë për “News Line” në ABC News, analisti Arben Meçe ka komentuar zhvillimet më të fundit në opozitë, duke theksuar se strategjia politike e Sali Berishës është e përqendruar tek justifikimi i humbjes dhe prodhimi i zhurmës.

Sipas tij, Berisha nuk synon më fitoren, por ruajtjen e një ndikimi të vetëm personal në të djathtën shqiptare. Meçe thekson se opozita ka dështuar të paraqitet si një alternativë reale për qytetarët dhe se veprimet aktuale nuk i shërbejnë ndërtimit të një opozite funksionale, por vetëm tensionimit të qëllimshëm të skenës politike.

“Justifikimi i humbjes është e gjithë beteja e Berishës. Doktorit i intereson që të justifikojë humbjen. Ajo që është më kryesorja është e nesërmja se çfarë parlamenti do të kemi. Strategjia e Berishës është që të prodhojë sa më shumë gjëra për të prodhuar një opozitë që nuk vjen vetëm nga Berisha. Situata politike është ‘pro-Rama’, ‘anti-Rama’, nuk ka anë tjetër. Pritshmëria më pozitive është që t’u jepet hapësirë këtyre partive që t’u jepet terren. Por, pse Berisha po krijon këto grupe?!

Berisha edhe kur nuk është në Parlament dhe e ke në televizor për gati 6 orë. Berisha e ka pasur gjithmonë të njëjtën strategji. Berisha e ka pasur gjithmonë të njëjtën strategji, çdo opozitë të re e ka neutralizuar për të qenë e vetmja frymë e djathtë në Shqipëri. Por, cila do të jetë strategjia e Berishës në parlament?! Unë mendoj se Berisha nuk di të bëjë gjë tjetër vetëm se të bëjë rrëmujë në Parlament. Do të vazhdojnë që të kërkojnë komisione nga më absurdet.

Asnjëherë opozita nuk u ngrit në një perceptim që qytetari ta shihte si zgjidhjen e probleme të tij, ky ishte dhe shkaku që opozita nuk fitoi kurrë. PD asnjëherë nuk u prodhua si një alternativë zgjidhje. Kërkojnë të marrin fitoren në tavolinë, por nuk funksionon kështu. Duan të fitojnë nëpërmjet zhurmës. Farsa e Berishës ra dhe nuk ka qytetar në Shqipëri që ta besojë atë”, tha analisti Meçe./abcnews.al

Një zjarr i përmasave të mëdha ka përfshirë një sipërfaqe me shkurre dhe ferra pranë një biznesi në afërsi të superstradës Lezhë–Milot.

Për shkak të përhapjes së flakëve nga era, në rrezik janë edhe disa banesa përreth, si dhe një restorant i madh dasmash që ndodhet pranë zonës së përfshirë nga zjarri.

Forca të shumta zjarrfikëse janë angazhuar në terren për të penguar përhapjen e flakëve dhe për t’i vendosur ato nën kontroll.

Deri më tani nuk raportohet për dëme në njerëz, ndërsa zjarrfikësit po punojnë për të vënë nën kontroll flakët./abcnews.al

Read More...

Kompania xAI e Elon Musk ka ngritur padi ndaj Apple dhe OpenAI, duke i akuzuar se kanë shkelur ligjet amerikane të konkurrencës përmes një marrëveshjeje që, sipas saj, pengon konkurrencën në fushën e inteligjencës artificiale. Kjo padi hap një kapitull të ri në përplasjen mes miliarderit dhe dy prej kompanive më të fuqishme në teknologji.

Në qendër të padisë është marrëveshja që Apple ka lidhur me OpenAI për të integruar chatbot-in ChatGPT në asistentin zanor Siri, si dhe në veçori të tjera të pajisjeve të saj, përfshirë ato të shkrimit dhe kamerës. Sipas padisë së paraqitur të hënën në një gjykatë federale në SHBA, ChatGPT është bërë jo vetëm zgjedhja e paracaktuar, por edhe e vetmja teknologji AI e këtij lloji me integrim të drejtpërdrejtë në iPhone.

“Kjo marrëveshje i ka dhënë OpenAI akses ekskluziv në miliarda kërkesa të mundshme nga përdoruesit,” thuhet në dokumentin ligjor të firmosur nga xAI dhe kompania tjetër e Musk, X (ish-Twitter).

Padia përforcon përplasjen në rritje mes Musk dhe Sam Altman, drejtuesi ekzekutiv i OpenAI dhe një ish-bashkëpunëtor i tij. Ajo përfshin edhe Apple në këtë përballje të gjatë mes miliarderëve rivalë.

Sipas padisë, marrëveshja mes Apple dhe OpenAI është “e paligjshme” dhe u mohon rivalëve aksesin e njëjtë te përdoruesit. Ajo gjithashtu pretendon se Apple nuk ka qenë inovative në fushën e inteligjencës artificiale, duke përmendur edhe vështirësitë në lançimin e platformës së saj “Apple Intelligence”.

Gjithashtu, Apple akuzohet për manipulim të renditjes së aplikacioneve në App Store dhe për vonesa të qëllimshme në përditësimin e aplikacionit Grok të zhvilluar nga xAI, për të dëmtuar konkurrencën.

Megjithëse Apple ka deklaruar më herët se planifikon të bashkëpunojë edhe me kompani të tjera të AI, përveç OpenAI, deri tani nuk është bërë publike asnjë marrëveshje e re pas integrimit të ChatGPT në dhjetor 2024. Apple ka zhvilluar bisedime me Google për të integruar Gemini, por pa rezultate konkrete.

Zëdhënësi i OpenAI, duke reaguar ndaj padisë, tha: “Kjo është në vazhdën e një sjelljeje të vazhdueshme ngacmuese nga z. Musk.”

Ndër të tjera, padi akuzon OpenAI për mbajtje të një monopoli në tregun e chatbot-ëve me inteligjencë artificiale.

Apple nuk ka komentuar menjëherë mbi çështjen. Kur Musk paralajmëroi padinë më herët këtë muaj, Apple deklaroi se App Store është “i ndërtuar për të qenë i drejtë dhe paanshëm”.

Padia e së hënës shkon më tej, duke akuzuar Apple për mbrojtje të pozitës së saj monopoliste në tregun e telefonëve inteligjentë, përmes pengimit të zhvillimit të “super-aplikacioneve” të fuqizuara nga AI aplikacione që mund të konkurrojnë me grupin tradicional të aplikacioneve që gjenerojnë të ardhura të mëdha për kompaninë.

Kjo padi pason një tjetër proces gjyqësor të ngritur nga Departamenti Amerikan i Drejtësisë ndaj Apple vitin e kaluar, që e akuzon gjithashtu kompaninë për frenimin e inovacionit të aplikacioneve të avancuara.

Musk ka reaguar ashpër edhe kur u njoftua marrëveshja Apple-OpenAI në qershor 2024, duke e cilësuar atë si një “shkelje të papranueshme të sigurisë”, që do t’i jepte OpenAI akses në të dhënat e përdoruesve të iPhone. Ai madje kërcënoi se do të ndalonte pajisjet Apple në ambientet e kompanive të tij.

Marrëdhëniet mes Musk dhe Apple janë tensionuar më parë. Pas blerjes së Twitter në nëntor 2022, Musk akuzoi Apple se kishte kërcënuar të hiqte aplikacionin nga App Store. Më vonë, ai kritikoi edhe komisionin 30% që Apple merr nga blerjet dixhitale.

Përplasja u zbut pas një takimi me shefin ekzekutiv të Apple, Tim Cook. Megjithatë, në nëntor 2023, tensionet u rindezën kur Apple ishte mes kompanive që tërhoqën reklamat nga platforma X. Reklamimi është rikthyer që prej atëherë.

Padia përbën gjithashtu një sulm tjetër të Musk ndaj OpenAI, një kompani të cilën ai ndihmoi në themelimin e saj në vitin 2015, por që e la në vitin 2018 pas një përplasjeje me Altman. Musk themeloi xAI në vitin 2023 dhe e bashkoi këtë vit me platformën X.

Në një tjetër proces gjyqësor në Kaliforni, Musk e akuzon OpenAI se ka tradhtuar misionin e saj jofitimprurës në ndjekje të përfitimeve financiare. Më herët këtë vit, ai bëri një ofertë për të blerë asetet kryesore të OpenAI, që u refuzua. Një dokument i fundit gjyqësor zbuloi se ai kishte tentuar të përfshinte në këtë ofertë edhe shefin ekzekutiv të Meta-s, Mark Zuckerberg.

Po këtë muaj, Musk e ka quajtur Altman “gënjeshtar” për pretendimet se ai ka manipuluar platformën X për të promovuar postimet e tij. Musk i është përgjigjur duke thënë: “Postimi yt pati më shumë shikime se shumë prej të miave, megjithëse unë kam 50 herë më shumë ndjekës se ti!”

Në padi theksohet gjithashtu se OpenAI dhe Apple kanë përdorur platformën X për të përhapur dezinformata mbi skemën e tyre të dyshuar anti-konkurruese.

Policia e Lezhës ka arrestuar në Laç 41-vjeçarin, Ritvan Keqi, i shpallur më parë për trafikim armësh.

Keqi ishte shpallur në kërkim nga Policia Tiranë, në kuadër të operacionit të koduar “Puzzle”, i zhvilluar rreth 3 muaj më parë, për goditjen e trafikimit të armëve të zjarrit nga Kosova në Shqipëri.

Në kuadër të këtij operacioni janë sekuestruar 14 armë zjarri./abcnews.al

Kur Rusia e ka nisur një sulm me 39 dronë në një stacion kompresorësh në perëndim të Ukrainës këtë muaj, Ukraina e ka kuptuar se objektivi i sulmeve ka ndryshuar.

Sulmi ka ndodhur më pak se dy javë pasi Ukraina e ka arritur një marrëveshje për të blerë gaz natyror prej Azerbajxhanit, e para e tillë.

Shënjestra e sulmit ka qenë kritike për importim të naftës prej jugut të Evropës përmes korridorit trans-ballkanik për në Ukrainë.

Ky ka qenë vetëm njëri prej shumë sulmeve ndaj infrastrukturës së gazit natyror në Ukrainë këtë vit, për dallim prej sulmeve të kryera në tre vjetët e fundit në rrjetin e energjisë.

Ukraina në kërkim të gazit

Ky ndryshim e ka detyruar Kievin që të sigurojë importe, përfshirë prej Azerbajxhanit dhe indirekt nga Shtetet e Bashkuara.

Kompania shtetërore Naftogaz, më e madhja për prodhim të gazit në Ukrainë, ka thënë se infrastruktura është goditur mbi 100 herë në nëntë sulme të ndryshme ajrore më 2025.

Në shkurt, kur temperaturat mesatare ditore në Ukrainë janë në minus, Rusia e ka goditur këtë sektor ukrainas, duke ia pamundësuar ruajtjen e gjysmës së sasisë së gazit. Kështu, Kievi është detyruar t’i importojë 0.8 miliard metra kub gaz.

Prandaj Ukraina po përpiqet që t’i mbushë rezervat nëntokësore me kapacitet prej 13.2 miliardë metrash kub para sezonit të ngrohjes. Prej tyre, 4.6 miliardë metra kub duhet të jenë prej importeve.

Oleksandr Kharchenko, drejtor menaxhues në Qendrën për Kërkime në Industrinë e Energjisë, kompani për konsulencë me bazë në Kiev, i ka thënë Radios Evropa e Lirë se situata me gazin e brendshëm është “e vështirë, por nën kontroll”.

Sfida më e madhe nuk ka të bëjë me sigurimin e gazit të lëngshëm, por me financimin e tij. Banka Kombëtare e Ukrainës ka vlerësuar në prill se shtetit do t’i duhet t’i shpenzojë 2.9 miliardë dollarë në importet e gazit më 2025.

Pse e shënjestron Rusia sektorin energjisë?

“Infrastruktura e gazit natyror nuk ka qenë shënjestër e sulmeve në vitet e para, mirëpo tani gjithçka është lojë”, ka thënë Olga Khakova, analiste e energjisë në Këshillin Atlantik në Uashington, në disa përgjigje për Radion Evropa e Lirë.

“Është përpjekje për ta destabilizuar sigurinë energjetike, jo vetëm në Ukrainë, por në gjithë Evropën. Moska synon krijimin e kaosit brenda industrisë së energjisë”.

Sulmet e Rusisë në infrastrukturën e gazit natyror të Ukrainës janë intensifikuar prej përfundimit të kontratës ruse për ta bartur naftën në Evropë përmes tubacioneve ukrainase, çështje e kontestueshme edhe në kohë të paqes më 1 janar të këtij viti.

Volodymyr Omelchenko, drejtor i programeve të energjisë në Qendrën Razumkov, i ka thënë Radios Evropa e Lirë se sulmet synojnë dobësimin e Ukrainës para dimrit.

“Shtabi i përgjithshëm i ushtrisë ruse e kupton qartë se kërcënimi më i madh për Ukrainën këtë dimër është mungesa e gazit natyror, sepse në rezervat e gazit ukrainas momentalisht ka shumë zbraztësi”, ka thënë Omelchenko.

Analisti politik me bazë në Kiev, Oleh Saakian, ka thënë se sulmet janë pjesë e një strategjie ruse për të dalë në përparësi teksa zhvillohen bisedimet për paqe.

“Ata po tentojnë të krijojnë një sfond të përshtatshëm informativ, propagandistik dhe ideologjik për negociata”, i ka thënë ai Radios Evropa e Lirë.

“Ky nuk është asgjë përveç presionit ndaj popullsisë civile dhe presionit psikologjik ndaj autoriteteve ukrainase”.

Gazi i lëngshëm natyror, synim shumë i qartë

Strategjia ruse e ka rritur urgjencën te Kievi që t’i rrisë importet dhe t’i diversifikojë furnizuesit.

Përveç Azerbajxhanit, Kievi ka dhënë sinjale se është i interesuar në blerjen e gazit të lëngshëm natyror të Shteteve të Bashkuara, hap i denjë politik teksa presidenti amerikan, Donald Trump, e ka kthyer këtë lëndë në prioritet dhe i ka bërë thirrje Ukrainës ta rimbusojë SHBA-në për ndihmën e dhënë ushtarake.

Andrew Favorov, biznesmen me seli në SHBA, i cili ka punuar gjatë me sektorin e industrisë së gazit në Ukrainë, ka thënë se nënshkrimi i kontratave afatgjata për sigurimin e gazit të lëngshëm natyror prej furnizuesve amerikanë është “synim i qartë” për Kievin, duke marrë parasysh potencialin për përfitime diplomatike.

Ai ka sugjeruar se Ukraina mund të kërkojë ndihmë financiare prej Korporatës për Financa Zhvillimore krahu i Uashingtonit për investime për të siguruar kredi më të favorshme.

Në një deklaratë nisur Radios Evropa e Lirë, ministrja ukrainase e Energjisë, Svitlana Grynchuk, ka thënë se Ukraina është në bisedime me kompani amerikane, mirëpo nuk ka dhënë më shumë hollësi.

Megjithatë, ajo ka konfirmuar se një stacion kompresorësh në Odesë, që është sulmuar në gusht, është pjesë e infrastrukturës së domosdoshme për të importuar gazin e lëngshëm natyror amerikan prej porteve në jug të Evropës.

Shtetet e Bashkuara janë eksportueset më të mëdha në botë të gazit natyror, dhe sasia më e madhe transportohet në botë në formë të gazit të lëngshëm natyror.

Eksportet e gazit të lëngshëm natyror amerikan pritet të rriten dukshëm deri në fund të dekadës për shkak të ndërtimit të objekteve të reja për magazinim.

Marrëveshje në proces e sipër

Kompania më e madhe private për energji në Ukrainë, DTEK ka thënë më herët gjatë vitit se është duke negociuar me kompani amerikane për kontrata afatgjata.

Kjo kompani ka importuar gaz të lëngshëm natyror prej SHBA-së për herë të parë në dhjetor të vitit të kaluar.

Naftogaz ka arritur marrëveshje këtë vit për blerjen e 0.44 miliard metrave kub të gazit të lëngshëm natyror amerikan prej kompanisë polake të energjisë, Orlen.

Hinson Peters, menaxher i komunikimeve strategjike në Qendrën për gaz të lëngshëm natyror, grup tregtar amerikan, e ka konfirmuar se ekziston interes komercial prej blerësve ukrainas për kontrata afatgjata.

Në të njëjtën kohë, evropianët janë duke i rritur përpjekjet për t’i ndihmuar Ukrainës në blerjen e naftës për dimrin e ardhshëm. Banka Evropiane për Rindërtim dhe Zhvillim ka thënë më herët gjatë muajit se do të ndajë kredi prej 580 milionë eurosh për Naftogazin për blerje të gazit natyror.

Norvegjia, furnizuesja më e madhe e gazit natyror në Evropë, është zotuar për ndarjen e 100 milionë dollarëve për Naftogazin për qëllime të njëjta.

Se sa fonde do t’i duhen Ukrainës këtë vit për t’i përmbushur kërkesat e brendshme për gaz do të varet prej veprimeve të Rusisë, pra nëse Moska do të vazhdojë t’i shënjestrojë me dronë dhe raketa zonat për prodhimin e gazit, ruajtjen dhe pajisjet për transport./REL

Australia e ka akuzuar të martën Iranin për kryerjen e dy sulmeve antisemitike me zjarrvënie në dy qytete të vendit, Sidnei dhe Melburn, si edhe e urdhëroi ambasadorin iranian të largohet nga vendi brenda shtatë ditësh.

Ky është dëbimi i parë i këtij lloji që nga Lufta e Dytë Botërore.

Që nga fillimi i luftës së Izraelit në Rripin e Gazës në tetor të vitit 2023, shtëpitë, shkollat, sinagogat dhe automjetet në Australi janë vënë në shënjestër të vandalizmave dhe zjarrvënieve antisemitike.

Kryeministri i Australisë, Anthony Albanese, tha se Agjencia Australiane për Inteligjencë dhe Siguri ka mbledhur të dhëna të besueshme se Irani kishte drejtuar të paktën dy nga këto sulme.

“Këto ishin akte të jashtëzakonshme dhe të rrezikshme agresioni, të orkestruara nga një shtet i huaj në tokën australiane”, tha Albanese në një konferencë për shtyp.

“Ishin përpjekje për ta minuar kohezionin social dhe për të mbjellë përçarje në komunitetin tonë”, nënvizoi ai.

Sipas tij, Irani ishte përpjekur ta “fshihte përfshirjen e vet” në sulmet e vitit të kaluar ndaj një restoranti në Sidnei dhe ndaj Sinagogës Adass Israel në Melburn.

Albanese shtoi se agjencia e sigurisë së Australisë vlerëson se është e mundur që Irani të ketë drejtuar edhe sulme të tjera.

Australia i ka pezulluar operacionet në Ambasadën e vet në Teheran dhe të gjithë diplomatët e saj janë të sigurt në një vend të tretë, tha kryeministri, duke shtuar se Qeveria e tij do ta shpallë Korpusin e Gardës Revolucionare Islamike të Iranit si organizatë terroriste.

Ministrja e Jashtme e Australisë, Penny Wong, tha se ambasadori Ahmad Sadeghi dhe tre zyrtarë iranianë kanë shtatë ditë kohë për t’u larguar.

Kjo do të jetë hera e parë që një ambasador dëbohet nga Australia që prej Luftës së Dytë Botërore.

Ambasada e Izraelit në Australi e mirëpriti këtë veprim ndaj rivalit të saj kryesor, Iranit.

“Regjimi i Iranit nuk përbën kërcënim vetëm për hebrenjtë ose Izraelin, ai rrezikon gjithë botën e lirë, përfshirë Australinë”, tha Ambasada izraelite në X.

Izraeli dhe Irani e zhvilluan një luftë ajrore 12-ditore në qershor, pasi Izraeli nisi sulme ndaj objekteve bërthamore të Iranit.

Rreth 90 mijë njerëz të lindur në Iran jetojnë në Australi.

Dy burra janë akuzuar për sulmin e dhjetorit që dogji sinagogën, e ndërtuar në vitet 1960 nga të mbijetuarit e Holokaustit në lagjen Ripponlea.

Javën e kaluar, policia në shtetin juglindor të Viktorias tha se po ekzaminonte pajisje elektronike të sekuestruara gjatë një kontrolli në shtëpinë e njërit prej të dyshuarve, i cili pritet të dalë në gjyq të mërkurën.

Policia tha se tre persona ishin futur me forcë në sinagogë dhe ia kishin vënë zjarrin. Mediat raportuan se burri i arrestuar në janar për atë sulm kishte lidhje me një bandë të njohur motoçiklistësh australianë. Ai i mohoi akuzat në gjykatë dhe u lirua me kusht./REL

Një përplasje diplomatike ka shpërthyer të shtunën pasi presidenti amerikan, Donald Trump, ka njoftuar se do të takohet me homologun e tij rus, Vladimir Putin, javën e ardhshme në Alaska, ndërkohë që udhëheqësit evropianë nxituan të kuptonin kushtet e takimit dhe të siguroheshin që Ukraina nuk po lihej jashtë diskutimeve për të ardhmen e saj.

Zyrtarët evropianë ia paraqitën rastin e tyre zëvendëspresidentit JD Vance në një takim të organizuar me nxitim në Angli të shtunën.

Udhëheqësit e disa vendeve evropiane kanë thënë më pas se, teksa mbështesnin përpjekjet diplomatike të Trumpit, çdo bisedë paqeje duhet të paraprihet nga një armëpushim dhe vetë Ukraina duhet të përfshihet në mënyrë aktive, raporton CNN.

Presidenti ukrainas, Volodymyr Zelensky nuk është përmendur si pjesëmarrës në samitin e Alaskës, që do të zhvillohet të premten midis Trumpit dhe Putinit.

Megjithatë, Shtëpia e Bardhë nuk e ka përjashtuar plotësisht përfshirjen e Zelenskyt në disa takime, kanë thënë për CNN dy burime të njohura me çështjen.

Një zyrtar i Shtëpisë së Bardhë ka theksyar se çdo gjë që përfshin Zelenskyn ka të ngjarë të ndodhë pas takimit Trump-Putin.

Samiti është zhvilluar shumë shpejt dhe detajet janë ende në ndryshim e sipër. Një vend i saktë nuk është njoftuar ende.

Një zyrtar i Shtëpisë së Bardhë ka thënë se Trumpi mbetet “i hapur për një samit trepalësh me të dy udhëheqësit”, por se “Shtëpia e Bardhë po planifikon takimin dypalësh të kërkuar nga presidenti Putin”.

Që kur Trumpi zbuloi planet për t’u takuar me Putinin në një postim në mediat sociale të premten, ka pasur një përpjekje intensive diplomatike prapa skenave për të bindur aleatët e SHBA-së të marrin pjesë.

Në njoftimin e Trumpit nuk është bërë e ditur nëse ose kur Zelensky do të përfshihej në proces.

Ndërkohë, Zelensky dhe udhëheqësit evropianë kanë theksuar se Ukraina duhet të jetë pjesë e çdo diskutimi për përfundimin e luftës.

Read More...

Të paktën 100 fëmijë kanë vdekur në Gazë nga kequshqyerja dhe uria, ka thënë të dielën ministria e Shëndetësisë e territorit.

Gjatë 24 orëve të fundit, spitalet në Rripin e Gazës regjistruan pesë vdekje të reja për shkak të urisë dhe kequshqyerjes, përfshirë dy fëmijë, sipas ministrisë.

Kjo e çon numrin e përgjithshëm të palestinezëve që kanë vdekur nga uria dhe kequshqyerja në 217, përfshirë 100 fëmijë. Miratimi i planit për ta ripushtuar tërësisht Gazën të premten nga kabineti i sigurisë i kryeministrit, Benjamin Netanyahu, ka shtuar shqetësimet për përkeqësim të situatës në enklavë.

Ndërkohë, shumë njerëz po vazhdojnë të vdesin atje, gjatë përpjekeve të tyre për të siguruar ushqim, qoftë nga ajri apo nga kamionët e paktë që lejohen të hyjnë në Gazë.

Izraeli ka vendosur një bllokadë totale të ndihmës për 11 javë duke filluar nga marsi, që është parë si taktikë për të ushtruar presion mbi Hamasin për të liruar pengjet, dhe sasia e vogël e ushqimit, karburantit dhe furnizimeve mjekësore e lejuar që nga maji nuk e ka lehtësuar urinë ekstreme.

Grupet e ndihmës kanë thënë se bllokada e ndihmës humanitare nga Izraeli në Rripin e Gazës është shkaku kryesor i krizës së urisë.

Kur Izraeli lejoi kthimin e ndihmës, e bëri këtë kryesisht sipas një sistemi të ri të diskutueshëm të shpërndarjes së ndihmës – të drejtuar nga grupi logjistik i mbështetur nga Izraeli, Fondacioni Humanitar i Gazës.

Izraeli thotë se sistemi i ri i shpërndarjes ndalon ndihmën që shkon te Hamasi. Të paktën 1 mijë e 400 njerëz janë vrarë ndërsa kërkonin ndihmë që nga 27 maji 2025, shumica e të cilëve u vranë pranë vendeve të GHF-së, ndërsa palestinezë të tjerë u vranë përgjatë rrugëve të konvojeve të ndihmës, sipas OKB-së.

Mirlind Daku nuk ndalet në atë që mund të jetë sezoni më i mirë në karrierën e tij. Soulmuesi i kombëtares së Shqipërisë gjeti golin e tij të katërt me Rubin Kazan në po aq javë të luajtura deri tani në Premiere Ligën e Rusisë.

Futbollisti 27 vjeçar realizoi rrjetën e vetme në humbjen e thellë 5-1, që skuadra e tij pësoi kundër CSKA të Moskës. Një gol nderi, por shumë i rëndësishëm në aspektin personal dhe që konfirmon formën e shkëlqyer të Mirlind Dakut.

Në sezonin e ri të futbollit rus, ai numëron gjashtë realizime në pesë ndeshje, duke llogaritur edhe ato në Kupë. Po ashtu, ai është në bindshëm që tani në garën për “Këpucën e Artë”, ndërsa vijon të thellojë rekordet me Rubin Kazan.

Pas ndeshjes së fundit, Mirlind Daku ngjitet në kuotën e 29 golave në 58 ndeshje me Rubin, që nga koha kur debutoi në Premier Ligën e Rusisë.

Statistika që mund të jenë të rëndësishme edhe për kombëtaren e Shqipërisë, e cila do të kthehet në fushë në shtator për dy ndeshjet e radhës në eliminatoret e Botërorit 2026 kundër Serbisë dhe Letonisë.

Sylvinjo shpreson të ketë në formë të gjithë lojtarët dhe në këtë aspekt, mund të mbështetet te Mirlind Daku.

Nga një plazh i frekuentuar kryesisht nga banorët e zonës përreth, bregdeti i Kunës në Shëngjin është shndërruar në një destinacion të preferuar edhe nga pushuesit nga Kosova dhe emigrantët që kthehen në atdhe për pushimet e verës.

Hapësirat e shumta publike, pastërtia, siguria dhe qetësia janë disa nga arsyet pse kjo zonë po shënon çdo vit rritje të ndjeshme të frekuentimit.

Pushuesit vlerësojnë mundësinë për të vendosur çadrën e tyre pa kosto. Pylli me pisha që kufizon bregdetin ofron freski natyrale, duke e bërë zonën tërheqëse edhe për turistë të huaj që udhëtojnë me kamerë.

Zona lidhet me Lezhën dhe superstradën bëhet përmes rrugës së re të ndërtuar dy vite më parë, që shmang trafikun e rënduar të sezonit.

Numri i pushuesve në Kunë po rritet ndjeshëm vit pas viti, ndërsa çmimet mbeten të pandryshuara, duke i dhënë mundësi vizitorëve të zgjedhin sipas buxhetit të tyre./abcnews.al