Meteorologia Ladja Porja ka dhënë detaje mbi stuhinë e madhe që ka përfshirë Shqipërinë. Ajo shpjegoi se stuhia, e cila ishte parashikuar dhe e përqendruar në Kanalin e Otrantos, ka prekur fillimisht Durrësin, pastaj Shkodrën, Lezhën dhe më pas Tiranën.

Porja theksoi se pritet një përkeqësim i mëtejshëm i situatës gjatë orëve të pasdites. Po ashtu, për jugun e vendit, parashikohet që Vlorë, Sarandë dhe Gjirokastër të përjetojnë rrebeshe shiu.

Meteorologia përmendi se të nesërmen, situata do të përmirësohet, por do të shoqërohet me një rënie të temperaturave. Ndërkohë, i nxehti do të rikthehet në mes të javës së ardhshme, deri në fundjavë.

“Stuhia, e cila ishte parashikuar dhe përqendruar në Kanalin e Otrantos, ka prekur fillimisht Durrësin, pastaj Shkodrën, Lezhën dhe më pas Tiranën. Parashikohet një përkeqësim i situatës gjatë orëve të pasdites, ku qarqet që do të përballen me probleme do të jenë Shkodra, Dibra, Kruja, Tirana, Elbasani dhe Durrësi. Sa i përket jugut, pritet që Vlorë, Sarandë dhe Gjirokastër të kenë rrebeshe shiu. Intensiteti i reshjeve në Tiranë do të jetë më i fortë nga ora 15:00 deri në 18:00. Era do të jetë e fortë deri në orët e mbrëmjes, ndërsa nesër pritet një përmirësim i situatës, por me rënie të temperaturave deri në 27 gradë Celsius. Nxehti do të rikthehet në mes të javës së ardhshme dhe deri në fundjavë, temperaturat pritet të arrijnë deri në 35 gradë Celsius. Këto stuhitë tropikale janë pjesë e sezonit dhe do të rikthehen përsëri në shtator”./euronewsalbania/

The post Meteorologia Ladja Porja flet për stuhinë e madhe që ka përfshirë Shqipërinë appeared first on Telegrafi.

Një 24-vjeçare ka humbur jetën në Prishtinë, pasi e njëjta është plagosur me armë zjarri në një poligon.

Rasti ka ndodhur mbrëmë rreth orës 19:30, në një poligon në rrugën “Dritan Hoxha “në Prishtinë.

“Menjëherë është dërguar për trajtim mjekësor në QKUK, nga ku rreth orës 22:00 është konfirmuar vdekja e viktimës femër, L.S, 24 vjeçare. Njësitet policore menjëherë kanë dalë në vendngjarje dhe kanë ndërmarrë të gjitha veprimet e nevojshme hetimore”, thuhet në njoftim.

Policia njofton se në kuadër të hetimeve, është arrestuar një zyrtar përgjegjës i poligonit dhe me vendim të prokurorit është ndaluar për 48 orë.

Hetuesit policor në koordinim me prokurorinë po punojnë për sqarimin e plotë të rrethanave të rastit, i cili me urdhër të prokurorit është iniciuar Vetëvrasje, Shkaktim i rrezikut të përgjithshëm me pasojë vdekjen. /Telegrafi/

The post Një 24-vjeçare humb jetën në Prishtinë, u plagos me armë zjarri në një poligon appeared first on Telegrafi.

Deputeti i LVV-së, Xhelal Sveçla, ka deklaruar se është detyrë jetike që Lista Serbe të mbetet jashtë Kryesisë së Kuvendit.

Sveçla ka shkruar në Facebook, se ky subjekt ka qenë i përfshirë aktivisht në sulmin ndaj Kushtetushmërisë, institucioneve të Republikës, transmeton Telegrafi.

“Meqenëse ky subjekt ka qenë i përfshirë aktivisht në sulmin ndaj Kushtetushmërisë, institucioneve të Republikës, KFOR-it, misioneve të huaja, gazetarëve e qytetarëve, është detyrë jetike që ky subjekt të mbetet jashtë Kryesisë”, ka pohuar ai.

Vazhdimi i seancës konstituive pritet të vazhdojë pas pak, ku pritet të zgjedhet nënkryetari i Kuvendit nga komuniteti serb./Telegrafi/

The post Sveçla: Është detyrë jetike që Lista Serbe të mbetet jashtë Kryesisë appeared first on Telegrafi.

Kryetari i PDK-së, Memli Krasniqi, ka folur para nisjes së seancës konstituive.

Krasniqi tha se votimi i ndarë për nënkryetarët e Kuvendit, nuk është në përputhje me Kushtetutën, transmeton Telegrafi.

“Qëndrimi ynë ka qenë që çdo veprim duhet të jetë në përputhje me Kushtetutën dhe Rregulloren e Kuvendit. Një votim i tillë, i ndarë, nuk është në pajtim me Kushtetutën. Ne nuk mund të bëhemi pjesë e lojërave politike, pavarësisht se Rashiq është jashtëzakonisht pozitiv brenda komunitetit serb dhe, në rrethana të tjera, do të ishte një nënkryetar i shkëlqyer”, tha ai.

Ai po ashtu njoftoi se ka refuzuar takimin me kryeministrin në detyrë, Albin Kurti, për të diskutuar për çështjen e zgjedhjes së nënkryetarit nga komuniteti serb.

Seanca konstituive pritet të vazhdojë sot./Telegrafi/

The post Krasniqi thotë se ka refuzuar takimin me Kurtin për të diskutuar për Nenad Rashiqin appeared first on Telegrafi.

Politikani opozitar serb, Çeromir Stojkoviq ka bërë një thirrje publike drejtuar serbëve në Kosovë, duke i ftuar ata që në zgjedhjet lokale të planifikuara për 12 tetor, të mos e votojnë Listën Serbe.

Sipas Stojkoviqit, Lista Serbe nuk përfaqëson më interesat e komunitetit serb, por është një vegël e regjimit të Aleksandar Vuçiqit, e përdorur për të ruajtur kontrollin politik edhe jashtë territorit të Serbisë, raporton KosovaPress.

Ai ka paralajmëruar gjithashtu se duke filluar nga shtatori, do të organizohen protesta të mëdha në Serbi kundër regjimit aktual.

Lista Serbe në mbledhjen e fundit nuk u certifikua nga Komisioni Qendror i Zgjedhjeve për pjesëmarrje në këto zgjedhje, por tani Paneli Zgjedhor për Ankesa dhe Parashtresa këtë vendim e ka rikthyer në rishqyrtim. Pas kësaj, dy anëtarët e Komisionit Qendror të Zgjedhjeve nga Lëvizja Vetëvendosje, janë ankuar në Gjykatën Supreme, e cila dje ka njoftuar se ka refuzuar shqyrtimin e kësaj ankese si të palejuar.

Avokati serb Stojkoviq kërkon që serbët në Kosovë të largohen nga Lista Serbe, në të kundërtën theksoi se do të braktisen nga Serbia.

“Serbët në Kosovë duhet ta dinë se nëse zgjedhin Listën Serbe, ata do të braktisen nga Serbia. Nuk do të kenë lidhje me qeverinë e re dhe politikën e ardhshme të Serbisë. Nëse votojnë për të, ata zgjedhin kriminelë, të korruptuar, kukulla të Vuçiqit, dhe ne në Beograd nuk do të tolerojmë këtë. Nëse vendosin të rrinë me kriminelë, atëherë janë të njëjtë si ata. Mesazhi im për ta është: largohuni nga Lista Serbe, lërini të fundosen bashkë me Vuçiqin dhe zgjidhni njerëz normal që duan marrëdhënie normale me Kosovën dhe Beogradin”, theksoi Stojkoviq.

Politikani serb, Çedomir Stojkoviq thekson se regjimi aktual serb nën udhëheqjen e presidentit, Aleksandër Vuçiq po mundohet ta rikthej kontrollin mbi shtetin dhe qytetarët.

Nga muaji shtator, Stojkoviq paralajmëroi protesta të mëdha kundër regjimit serb.

“Situata është saktësisht ashtu siç e kam pritur, sepse regjimi në fakt tashmë është ndjerë, kështu që regjimi nuk e kontrollon më Serbinë dhe po përpiqet të rikthejë kontrollin mbi shtetin dhe qytetarët. Për këtë arsye, Vuçiq tani po përdor çdo forcë që ka në dorë për të ndaluar protestat, për të mbjellë frikë tek qytetarët, në mënyrë që qytetarët, nga frika, të ndalojnë së protestuari. Por kjo nuk do të ndodhë. Ai e di që gjithçka do të përshkallëzohet, se do të kemi një demonstratë të madhe nga shtatori kur njerëzit të kthehen dhe t’i çojnë fëmijët në shkollë. Nga ajo pikë, do të kemi protestë të madhe dhe përplasje të forta me forcat e Vuçiqit. Vuçiqi e di këtë dhe po përpiqet tani ta parandalojë duke mbjellë frikë tek qytetarët”, shprehet avokati serb.

Në një intervistë për KosovaPress, politikani serb theksoi se duke parë forcën e madhe të popullit kundër Vuçiq, gjithçka brenda partisë në pushtet po shembet.

Avokati serb tha se tani nuk ka mbështetje për Vuçiqin nga populli, por vetëm nga huliganët, kriminelët dhe terroristët.

“Nëse shohim Andrei Vuçiqin në rrugë, kjo do të thotë se regjimi është në telashe të mëdha. Tani ai ka dërguar figurat më të njohura të regjimit në rrugë për të mbajtur disiplina tek besnikët e tij, sepse që nga fillimi, Vuçiqi ka sunduar me forcë dhe shantazh. Kështu ai arriti të mbledhë mijëra anëtarë të partisë së tij, sepse njerëzit ishin të frikësuar, nën presion dhe të shantazhuar. Në momentin kur dikush tjetër tregon forcë më të madhe, sistemi i Vuçiqit bie në kolaps. Tani, të gjithë ata që u detyruan të ishin pjesë e partisë së tij, po shohin forcën më të madhe popullin e Serbisë dhe për këtë arsye gjithçka brenda partisë në pushtet po shembet. Në këtë situatë, Vuçiqi dërgon njerëzit e tij më të rëndësishëm, si vëllai i tij, që në fakt është zëvendësi i tij de facto, për të rikthyer disiplinën mes besnikëve. Por tani askush nuk do të jetë pjesë e partisë në pushtet, askush nuk do t’i mbështesë, askush nuk do të dalë në rrugë për t’u luftuar për ta. Në vend të kësaj, Vuçiqi është i detyruar të paguajë huliganë, kriminelë dhe madje disa terroristë për të dhënë përshtypjen se ka mbështetje. Nuk ka mbështetje për Vuçiqin ka vetëm huliganë, kriminelë dhe terroristë të paguar”, theksoi ai për kp.

Politikani serb, Çedomir Stojkoviq e quan gënjeshtarë presidentin serb, Aleksanëdr Vuçiq. Sipas tij, Vuçiq synon të qetësojë popullin duke thënë “për një vit do të largohem nga pushteti”, por siç u shpreh ai kjo është gënjeshtër.

“Gjëja e parë që kam mësuar dekada më parë është që nuk i besoj një gënjeshtari. Vuçiqi është gënjeshtar dhe çdo person normal nuk duhet t’i besojë atij. Çdo gjë që ai thotë është gënjeshtër dhe synon të qetësojë popullin, duke u thënë “qetësohuni, mos bëni telashe, për një vit do të largohem nga pushteti. Por, kjo është gënjeshtër dhe askush nuk e beson”, u shpreh ai.

Politikani serb thekson se perëndimit është i përfshirë në protestat në Serbi. Ai thekson se populli serbë duan të jetojnë si në shtetet perëndimore dhe jo sipas mënyrës së Vuçiqit.

“Perëndimi është shumë i përfshirë në protestat në Serbi, sepse Perëndimi është pjesë e mirë e botës, Perëndimi ka sundimin e ligjit, Perëndimi ka standarde të mira….Perëndimi është shumë i përfshirë, sepse, e dini, ne kemi parë disa filma të Holliëoodit, kemi parë se si jetojnë njerëzit në Francë, në Mbretërinë e Bashkuar, në Gjermani, dhe shohim që kjo është më e mirë, dhe që në Serbi është keq. Prandaj, ne bëjmë zgjedhjen që duam të jetojmë në atë mënyrë, nuk duam të jetojmë në mënyrën e Vuçiçit”, deklaroi avokati serb, Stojkoviq.

Sipas Stojkoviq, presidenti serb karrierën e tij politike e ka ndërtuar mbi nacionalizmin dhe nxitjen e përçarjeve ndëretnike.

Ai potencon që Vuçiq duke qenë në panik nga humbja e pushtetit, po përpiqet të zhvendosë vëmendjen publike duke krijuar tensione.

“Aleksandar Vuçiq është nacionalist dhe që nga fillimi i karrierës politike ka ardhur në pushtet duke krijuar urrejtje dhe armiqësi mes kombeve, kështu u bë politikan. Tani, në panik nga humbja e pushtetit, po përpiqet të zhvendosë vëmendjen publike diku tjetër. Ai u përpoq të krijonte konflikt mes boshnjakëve dhe serbëve në jug të Serbisë, por kjo dështoi — në vend të kësaj, boshnjakët dhe serbët u bashkuan kundër tij”, u shpreh ai.

Ai tha se edhe arrestimin e ish ushtarëve të UÇK-së, Stojkoviq e paraqiti atë nëpër media sikur diçka e rrezikshme po ndodh, për t’i thënë popullit serb “mos luftoni kundër meje, por kundër shqiptarëve, ata janë të rreziku i vërtetë”.

“Çdo gjë që shihni tani në rrugë, të gjithë ata që gjoja e mbështesin Vuçiqin, nuk e mbështesin atë ata janë aty për para. Gjatë viteve të fundit, ai u ka dhënë huliganëve dhe liderëve të tifozëve kontrata publike me vlera miliona euro, duke i bërë shumë të pasur. Ata tani e mbrojnë pushtetin e tij vetëm për para. Të tjerët marrin para në dorë për çdo ditë që janë në rrugë. Pra, nuk shohim mbështetës të tij, por kompaninë që ai paguan”, tha ai.

The post Stojkoviq fton serbët në Kosovë të mos e votojnë Listën Serbe appeared first on Telegrafi.

Të hënën fillon viti i ri shkollor 2025-2026 e nga Komuna e Prishtinës shprehën të gatshëm për ecuri të mbarë të këtij procesi. Nga ky vit shkollor në kryeqytet do të aplikohet mësimi tërëditor edhe në shtatë shkolla të tjera, prej tyre pesë janë në zonat rurale.

Drejtori për Arsim në Komunën e Prishtinës, Samir Shahini deklaroi se me sukses kanë përmbyllur të gjitha ndërhyrjet në shkolla, por edhe është bërë rekrutimi i mësimdhënësve dhe pranimi i nxënësve në çerdhe dhe kopshte.

“Janë bërë intervenimet e nevojshme, ka shumë procese që kanë përfunduar më herët, shembull ne kemi përmbyllur me sukses rekrutimin e stafit të nevojshëm për fillimin e vitit të ri shkollor, kemi përfunduar disa pranime të numrit të nxënësve të paraparë me nevojat e shkollave fillore në zona përkatëse, fëmijëve në çerdhe, si dhe atyre të shkollave të mesme, të cilat janë procese jashtëzakonisht të rëndësishme dhe voluminoze në punë. Sa i përket infrastrukturës, janë bërë renovime në më shumë se 12 shkolla, objekte fizike të shkollave të kryeqytetit, janë edhe disa që presin të finalizohen në këtë fundjavë… 11/32 Totalisht jemi të gatshëm dhe mirëpresim që të hënën, bashkë me kryetarin, do të jemi në disa shkolla për të uruar nxënësit dhe mësimdhënësit,” tha ai.

Komuna e Prishtinës po planifikon që mësimin tërëditor gjatë vitit shkollor 2025-2026 ta shtrijë edhe në shtatë shkolla të tjera.

Sipas udhëheqësit të Arsimit në Prishtinë, Samir Shahini, mësimi gjithëditor ka përmirësuar ekonomitë familjare.

Shahini në një intervistë për KosovaPress, tregon se orari i mësimit tërëditor për klasat 1 dhe 2 është deri në ora 14:30, ndërsa për nxënësit e klasave 3, 4 dhe 5 është deri në 15:30.

“Po shtojmë shtatë shkolla në mësim tërëditor këtë vit, nga pesë sa ishin vitin e kaluar, shkon në 12 tash. Lajm tjetër i mirë është që kemi dy shkolla që kalojnë në mësim tërëditor i gjithë niveli, nga klasa e parë e deri në klasën e nëntë. Në Barilevë, në shkollën ‘Ali Kelmendi’ dhe ‘Ditët e Miratorit’ në Kishnicë. Për më tepër, kemi pesë shkolla në këtë shtatëshen e re që po e shtojmë, që janë në zona rurale: Barileva, Kishnica, Mramori, Grashtica dhe fshati Llukar, që i bashkëngjiten pesë shkollave të tjera të kryeqytetit të zonës urbane. Dy të tjera që shtohen në qytet janë ‘Pjetër Bogdani’ dhe ‘Zenel Hajdini’. Ka prekur ekonomitë familjare duke kursyer miliona euro të ekonomive familjare nga qëndrimi ditor deri në ora 15:30, nga shujtat të cilat ne i ofrojmë falas në shkollat tona përmes kuzhinës së kryeqytetit, duke qenë edhe më të shëndetshme edhe falas për të gjithë nxënësit pa dallim. Për më tepër, në fshatrat që i përmenda, pesë shkolla, për shkak të numrit më të vogël të nxënësve, ushqimi do të ofrohet për të gjithë, edhe për klasat 6-9 që nuk janë në mësim tërëditor këtë vit, por sigurisht i paraprinë kalimit në mësim tërëditor vitin tjetër,” theksoi Shahini.

Me qëllim që programi i mësimit gjithëditor të jetë pjesë e të gjitha shkollave në gjithë vendin, Shahini e sheh urgjente hartimin e një udhëzimi administrativ që parasheh buxhetimin për të ndihmuar komunat.

“Që nga ky vit apo nga viti që vjen, është nevojë urgjente që ministria të hartojë një udhëzim të veçantë administrativ që parasheh edhe një pjesë të buxhetimit për të ndihmuar komunat në aspektin, në veçanti në siguri të ushqimit dhe materialeve të nevojshme, por edhe lehtësimeve për rekrutim të stafit, që mund t’i bëjnë më të lehta për komunat,” theksoi Shahini.

Tash e tri vite, Ministria e Arsimit, Shkencës, Teknologjisë dhe Inovacionit ka nisur subvencionimin e familjeve për blerjen e librave, për dallim nga vitet e mëhershme kur librat nga klasa 1 deri në 9 ofroheshin nga shkollat falas.

E metoda e viteve të fundit për sigurimin e librave për ciklin e ulët dhe atë të mesëm të ulët, nga drejtori i Arsimit në Prishtinë, Samir Shahini, po konsiderohet sa e gabuar aq e dëmshme.

“Kjo formë e subvencionimit të librave është jashtëzakonisht e lodhshme, jo vetëm për drejtoritë e arsimit, e panevojshme, panevojshmërisht e lodhshme për drejtoritë e Arsimit, për shkollat, por në veçanti për prindërit, të cilëve iu shkakton shumë kokëçarje… Nuk është zgjidhje, forma është totalisht e gabuar dhe e dëmshme, sepse në fund po e shohim që tash e tri vite po ndodh kjo formë dhe në secilin prej viteve, jo vetëm në fund të shtatorit ose edhe tetorit, por ka raste që edhe në fillim të gjysmëvjetorit të dytë nxënësit nuk i kanë librat,” theksoi ai.

Tekstet dhe materialet e tjera shkollore për nxënësit nga klasa e parë deri në të nëntën edhe këtë vit financohen nga Qeveria e Kosovës.

Sikurse vitin e kaluar, paratë janë transferuar në llogaritë bankare të prindërve, në mënyrë që ata t’i blejnë vetë librat për fëmijë.

The post ​Viti i ri shkollor në Prishtinë, shtohen shtatë shkolla me mësim tërëditor appeared first on Telegrafi.

Policia ka arrestuar një person në fshatin Ternovë të Skenderajt.

Siç njofton policia, i dyshuari kishte therur me thikë një person.

“Është arrestuar i dyshuari m/k, pasi që pas një mosmarrëveshje ka therur me një mjetë të mprehtë (thikë) viktimën m/k. Viktima është dërguar në spitalin e Pejës për tretman mjekësor. Me vendim të prokurorit i dyshuari është dërguar në mbajtje”, thuhet në njoftim./Telegrafi/

The post Theri me thikë një person, arrestohet i dyshuari në Skenderaj appeared first on Telegrafi.

Agjencia për Informim dhe Privatësi (AIP) përmes një komunikate drejtuar mediave njofton se ka monitoruar dhe evidentuar disa raste të mashtrimeve digjitale që po qarkullojnë në rrjetet sociale dhe platformat online, ku shfrytëzohen emrat e personazheve publikë, emrat e bizneseve të njohura dhe oferta të rreme kredie me qëllim të mashtrimit dhe përfitimit të paligjshëm nga qytetarët.

Në njoftim thuhet se, bazuar në raportimet publike dhe verifikimet tona, janë identifikuar disa forma më të shpeshta të mashtrimeve, si:

Keqpërdorimi i imazhit të artistëve për postime dhe reklama mashtruese;

Oferta të rreme për kredi në emër të bankave të njohura, duke kërkuar të dhëna personale nga qytetarët;

Postime dhe video mashtruese që premtojnë kupona dhuratë në emër të marketeve të mëdha si “VivaFresh”, “ETC” dhe bizneseve të tjera të njohura;

Konkurse të rreme online që shfrytëzojnë logot e institucioneve dhe kompanive të besueshme për të mbledhur të dhëna nga qytetarët;

AIP thotë se këto aktivitete jo vetëm që cenojnë privatësinë, por gjithashtu paraqesin rrezik serioz për sigurinë financiare të qytetarëve.

Duke marrë parasysh rastet e evidentuara, AIP ju bën thirrje qytetarëve:

Kontrolloni burimet zyrtare

Përdorni vetëm faqet dhe aplikacionet zyrtare të institucioneve dhe bizneseve për informacione dhe shërbime.

Verifikoni ofertat për kredi dhe dhurata

Çdo ofertë kredie me norma të ulëta interesi, dhurate apo kuponi “falas” duhet të konfirmohet drejtpërdrejt përmes bankës ose kompanisë përkatëse.

Mbroni të dhënat personale

Mos ndani të dhëna personale (numri personal, të dhënat bankare, fjalëkalimet dhe kodet e verifikimit) në burime të pasigurta.

Kontrolloni adresat e faqeve

Faqet mashtruese shpesh imitojnë ato zyrtare. Kontrolloni me kujdes URL-në (linkun e faqes) dhe mos klikoni në linqe që duken të dyshimta ose kanë gabime drejtshkrimore.

Mos ndërveproni me përmbajtje të dyshimta

Lojëra, kuize ose video që premtojnë fitime të menjëhershme, përdoren për mashtrime online. Keni kujdes dhe mos klikoni në to.

Raportoni mashtrimet

Çdo faqe apo përmbajtje e dyshimtë duhet të raportohet menjëherë në platformën përkatëse (Facebook, Instagram, TikTok).

Forconi mbrojtjen digjitale

Instaloni mbrojtje teknike (antivirus, firewall), përdorni verifikimin me dy hapa (2FA) dhe shmangni rrjetet publike Wi-Fi për qasje bankare.

Në njoftim theksohet se, Agjencia për Informim dhe Privatësi është e përkushtuar për mbrojtjen e të dhënave personale të qytetarëve dhe sigurinë e tyre.

“Ne do të vazhdojmë të bashkëpunojmë me institucionet relevante për të identifikuar faqet mashtruese dhe për të ndërmarrë masa ligjore ndaj shkelësve”./Telegrafi/

The post Rrezik nga mashtrimet online në Kosovë, AIP publikon format më të zakonshme appeared first on Telegrafi.

Kryeministri në detyrë i Republikës së Kosovës, Albin Kurti, së bashku me ministren në detyrë të Arsimit, Shkencës, Teknologjisë dhe Inovacionit, Arbërie Nagavci, vendosën gurthemelin e Shkollës Fillore dhe të Mesme të Ulët, në Fushë Kosovë, investim i Ministrisë së Arsimit, Shkencës, Teknologjisë dhe Inovacionit në vlerë prej 3.9 milionë euro.

Në njoftim thuhet se objekti do ketë një sipërfaqe prej 8212 metra katrorë.

“Do të ketë 12 klasë të mësimit fillor, gjashtë klasë të mësimit parashkollor dhe shtatë laboratore me shumë hapësira përcjellëse e me zyra administrative. Kapaciteti i shkollës do të jetë deri në 1500 nxënës”, thuhet në njoftim.

Kryeministri Kurti u shpreh i nderuar dhe gëzuar pasi që menjëherë pas përurimit të çerdhes së përfunduar, siç tha ai, erdhëm të vendosim këtu afër edhe gurthemelin e Shkollës Fillore dhe të Mesme të Ulët në Fushë Kosovë.

Duke uruar për punime të mbara dhe të shpejta për ndërtimin e kësaj shkolle të re, ai theksoi se investimi total në Fushë Kosovë, në fushën e arsimit gjatë këtij mandati tonë është mbi 5.6 milionë euro. /Telegrafi/

The post Vendoset gurthemeli i objektit të ri të Shkollës Fillore dhe të Mesme të Ulët në Fushë Kosovë appeared first on Telegrafi.

Për herë të parë në vendin tonë janë dhënë katër çmime për agro-gazetari, dy për video artikuj dhe dy të tjerë për artikuj të shkruar.

Çmimin e parë në kategorinë për artikull të shkruar e fitoi Nadije Ahmeti me shkrimin “Perimet vendore shkojnë jashtë, tregu mbushet me import” kurse çmimin e parë për video storje e fitoi Ibrahim Berisha dhe Erza Elezaj me video-storjen me titull “Në 4 ari tokë, Shqipja rindërtoi jetën e saj”. Të dyja këto janë publikuar në Radio Evropa e Lirë.

Me çmimin e dytë për artikull të shkruar u vlerësua Bubulina Peni dhe Donjeta Rexhbogaj me artikullin, “Nën qiellin që ndryshon, gratë bartin mbi supe ndryshimet klimatike në bujqësi”, publikuar në Telegrafi.com

Në kategorinë për video storje, çmimin e dytë shkoi për gazetaren e Kimete Hoti me artikullin “La Zvicrën dhe gjen lumturinë mes bagëtive në Kosovë: Mbi 1 mijë litra qumësht në ditë” të botuar në Insajderi.

Gazetarët, storjet e të cilëve u vlerësuan në këtë event, e vlerësuan këtë iniciativë si nismë që do të ndikojë në rritjen e vullnetit të tyre, por edhe cilësisë së raportimeve.

Erëza Elzaj, bashkë-autore e video-artikullit fitues të vendit të parë, tha se storjet për gratë në bujqësi prapa vetës fshehin rrëfime shumë emocionale.

“Gratë në vendin tonë, por sidomos në zonat rurale përballen me vështirësi të mëdha, me mungesë të integrimit”, tha ajo pas pranimit të çmimit.

Veton Rruka, Menaxheri i Projektit nga Caritas-i Zviceran në Kosovë, theksoi se media luan rol të rëndësishëm në informim të publikut e me këtë rast edhe për informim në bujqësi.”

Kurse Sefedin Haxhia, Menaxher i Komunikimit në Caritas-in Zviceran, ndër të tjera tha se synimi është i iniciaitvës Agro-Media është të jetë garë e përvitshme dhe që të rris nxisë gazetarët për më shumë raportime e storje – si në sasi ashtu edhe në cilësi – në temat e bujqësisë e zhvillimit rural. Ai dha detaje edhe detaje më të shumta rreth projekti Agro-Media Partnership, brenda të cilit u organizua edhe kjo garë gazetareske.

Thirrja për këtë kompeticion ishte aktive nga 1 korriku – 10 gusht, teksa janë pranuar aplikuar 21 artikuj.

Kjo garë u organizua në kuadër të projektit EREA, i cili implementohet nga Caritas-i Zviceran dhe financohet nga Bashkëpunimi Austriak për Zhvillim.

The post Caritas-i Zviceran në Kosovë ndan katër çmime për agro-gazetari appeared first on Telegrafi.

Para disa ditëve në media u publikua një punim akademik i  vitit 2012, e ku bashkëautor ishte edhe kryetari i sapozgjedhur i Kuvendit të Kosovës, Dimal Basha.

Në këtë punim në të cilën Basha është bashkëautor me Jana Arsovska, profesoreshë në Kolegjin e Drejtësisë Penale “John Jay”, thuhet se UÇK-ja kishte bashkëpunuar me kriminelë brenda dhe jashtë Kosovës, përfshirë paratë e drogës, transmeton Telegrafi.

“Ka pasur akuza të shumta nga agjencitë perëndimore të zbatimit të ligjit se Ushtria Çlirimtare e Kosovës (UÇK), gjatë ngritjes së saj, bashkëpunoi me kriminelë shqiptarë etnikë brenda dhe jashtë Kosovës”, shkruhej në punim.

Publikimi i këtij punimi akademik ka nxitur reagime të shumta, ndërsa sot një koment mbi situatën e bëri edhe kryeministri në detyrë, Albin Kurti.

Kurti tha se problemet që ka Kosova, nuk vijnë nga një deformim që sipas tij po ndodhë rreth artikullit.

“Unë besoj që problemet qe i kemi sot në Kosovë nuk i kemi nga një deformim, e keqinterpretim, i një artikulli në bashkautorësi, ku ky nuk është autor i atij kapitulli, të para më shumë se një dekade. Problemet i kemi kur është nënshkruar ‘Zajdenica’, në 2013-tën, problemet i kemi kur janë administruar kriminelët serbë në veri, problemet i kemi kur është votuar Gjykata Speciale në vitin 2015”, tha Kurti para mediave.

Lexo po ashtu Basha reagoi ndaj akuzave për punimin akademik të vitit 2012: Janë shumë të ulëta dhe të rënda për mua

Ai po ashtu tha se problemet janë edhe kur është themeluar Lista Serbe në bashkëpunim me Listën Serbe në vitin 2013.

“Problemet i kemi kur politikanët e Kosovës kanë bërë qeveri duke u varur nga Lista Serbe. Problemet i kemi kur kanë hyrë në pazare për ndarje të Kosovës, jo të ky far artikulli ku po manipulohet një kre në të cilin ky ska autorësi fare”, theksoi Kurti.

Ndryshe, Basha kishte reaguar pas publikimit të artikullit, ku kishte shkruar se punimi është shkruar kur ai ishte student dhe se ai mban përgjegjësi vetëm për kapitullin III, i cili trajton depërtimin e Islamit fundamentalist në Evropën Juglindore, me fokus Kosovën.

Ai theksoi se autorësia e pjesës tjetër i përket vetëm autores, Jana Arsovska, e cila tashmë ka dërguar një email demantues, duke sqaruar se Basha dorëzoi për publikim vetëm kapitullin në fjalë.

“Unë, Dimal Basha, e çmoj lart luftën e Ushtrisë Çlirimtare të Kosovës dhe sakrificën e popullit tonë për liri. Nga goja ime dhe nga duart e mia nuk është shkruar dhe nuk do të mund të gjendet asnjë përmbajtje që bie ndesh me këtë vlerë të shenjtë të popullit tonë”, tha Basha.

Ai i kërkoi falje qytetarëve që u shqetësuan nga raportimi i medias dhe bëri thirrje që temat kaq të ndjeshme të trajtohen me saktësi dhe përgjegjësi./Telegrafi/

The post Publikimi i Bashës ku përmendet UÇK-ja, Kurti thotë se problemet e Kosovës nuk vijnë nga artikulli, por nga disa vendime politike të së kaluarës appeared first on Telegrafi.

Procesi drejt kuptimit të fatit të të zhdukurve ka vite e muaj që ka ngecur, ka thënë ambasadori i Britanisë së Madhe në Kosovë, Jonathan Hargreaves.

Në Ditën Ndërkombëtare të Viktimave të Zhdukjeve me Dhunë, ai tha se “duhet të bëhet më shumë menjëherë”. Në konferencën e organizuar nga Programi i Kombeve të Bashkuara për Zhvillim (UNDP) dhe Ambasada Britanike me temën “Ndërtimi i Urave: Avancimi i Pajtimit, Dialogut dhe Zërit Qytetas – Çfarë kemi mësuar”, është nderuar Bajram Qerkinaj, i cili ishte zëri i të gjithë familjarëve të të pagjeturve.

Ambasadori i Britanisë së Madhe në Kosovë, Jonathan Hargreaves tha se mbetën të përkushtuar për të ndihmuar Kosovën.

“Mbi 1500 njerëz janë ende të zhdukur dhe familjet ende po presin për përgjigje për drejtësi, paqen dhe për qetësi të mendjes. Më bën përshtypje që kudo ku shkojë në Kosovë se sa delikate mbetet besimi dhe se si në shumë vende frika ende i pengon njerëzit për të dëshmuar. Por, familjet kanë të drejtë që të dinë për fatin e më të dashurve të tyre, ata meritojnë veprimet tona dhe të institucioneve. Si Britania e Madhe mbetemi të përkushtuar për t’i ndihmuar Kosovës, sepse të gjithë qytetarët e Kosovës me trashëgiminë e konflikteve të viteve të 90-ta, sepse kjo nuk ka të bëjë vetëm me të shkuarën por edhe me të ardhmen… Edhe unë po shqetësohem se progresi drejt kuptimit të fatit të të zhdukurve ka vite dhe muaj që ka ngecur, që nuk po ecën shpejt sa duhet. Qeveria e Britanisë së Madhe vazhdon të kërkojë në nivelet më të larta këtu dhe në Serbi që mund të bëhet më shumë dhe duhet të bëhet menjëherë”, tha ai.

Ai ka kujtuar Bajram Qerkinaj, për të cilin tha se vdiq pa arritur të sigurojë informacione për djalin e tij.

“Baca Bajram kurrë nuk pushoi së kërkuari djalin e tij të zhdukur që u bë zë i familjeve, i të gjitha komuniteteve në gjithë Kosovën por edhe përtej saj. E di se forca dhe bashkë-dhimbja e tij na ka frymëzuar shumë prej nesh për kaq shumë vite… Zëri i bacës Bajram do të na mungojë thellësisht. Derisa shënojmë Ditën Ndërkombëtare të të Zhdukurve të rikujtojmë se të gjithë kemi përgjegjësi të thellë për të vazhduar të qojmë përpara trashëgiminë e bacës Bajram dhe të vazhdojmë për vetëdijesim të hapim dyer duke inkurajuar institucionet e Kosovës dhe në Serbi që të punojnë së bashku për të zhbllokuar pengesat për të ditur të vërtetën”, deklaroi ai.

Edhe Marta Gazideda e cila është menaxhere e programit për qeverisje dhe paqe në UNDP ka kujtuar Qerkinaj, duke thënë se duhet të vazhdohet kërkesa për drejtësi.

“Ai [Bajram Qerkinaj] ishte figurë e unitetit, ai ishte i palëkundur në kurajon e tij por edhe kishte bashkëndjenë të thellë. Kjo është një fotografi apo takimi që filloi bashkëpunimin e UNDP-së dhe ambasadorit britanik në Prishtinë. Baca Bajram kishte një tragjedi personale dhe ai ishte zëri i të gjithëve, ai kërkonte të vërtetën për të gjithë, kërkonte drejtësi për të gjithë por gjithashtu edhe dinjitet për familjet që vazhdojnë të kërkojnë të zhdukurit…Ne kemi humbur bacën Bajram fizikisht, por trashëgimia e tij si kampion për të vërtetën dhe avokat për drejtësi vazhdon të jetojë”, tha ajo.

Edhe Nuno Queiros, i cili është përfaqësues i përhershëm i UNDP Kosova tha se trashëgimia e konfliktit vazhdon të hedh “një hije të gjatë për më shume se dy dekada”.

“Konferenca që po mbahet sot do të na japë mundësinë të dëgjojmë zëra nga akterë të ndryshëm mbi atë se çfarë do të thotë përballja me trashëgiminë e të zhdukurve, si mund të sigurojmë më mirë drejtësinë dhe si gjenerata e ardhshme mund të shfrytëzojë mjetet digjitale dhe kujtesën kolektive për të ndërtuar një të ardhme më të drejtë dhe gjithëpërfshirëse. Dëshiroj të falënderoj edhe një herë Qeverinë e Mbretërisë së Bashkuar përmes ambasadës së tyre, për mbështetjen dhe përkushtimin e palëkundur për këtë çështje. Ju jeni vërtet partnerë të mëdhenj. Po ashtu, dua të shpreh një falënderim të sinqertë për të gjithë ata që kanë ecur në këtë rrugë me ne – organizatat e shoqërisë civile, Qendrën e Burimeve për Personat e Zhdukur, shoqatat e familjeve, median dhe institucionet”, deklaroi ai.

Krerët institucional gjatë ditës kanë kërkuar edhe një herë që Serbia të hapë arkivat shtetërore, që sipas tyre, do të ndihmonin në zbardhjen e fatit të të pagjeturve. /kp/

The post ​Ambasadori i Britanisë së Madhe: Procesi i zbardhjes së fatit të të zhdukurve ka vite që ka ngecur appeared first on Telegrafi.

Me rastin e shënimit të 35-vjetorit të vizitës historike të senatorëve amerikanë në Kosovë, Kryetari i Kryeqytetit, Përparim Rama, zhvilloi sot një vizitë përkujtimore në disa prej pikave më simbolike të Prishtinës, duke nderuar figurat që lanë gjurmë të pashlyeshme në historinë e Kosovës.

Komuna e Prishtinës njofton se vizita u realizua: Te busti i Senatorit Robert Dole – në nderim të mbështetjes së tij të jashtëzakonshme për lirinë dhe demokracinë e Kosovës. Te plaka përkujtimore e Robert Dole – duke theksuar rolin e tij historik në sensibilizimin e çështjes së Kosovës në arenën ndërkombëtare. Te busti i Sekretares Madeleine Albright – në kujtim të kontributit vendimtar për çlirimin dhe pavarësinë e Kosovës.

“Kjo vizitë shënon një moment të veçantë të kujtesës dhe mirënjohjes ndaj përkrahjes së palëkundur të Shteteve të Bashkuara për popullin e Kosovës”, thuhet në njoftim.

Kryetari Rama theksoi se mirënjohja për miqtë amerikanë mbetet e përhershme, duke shtuar se kujtesa për figurat që i dhanë zë lirisë së Kosovës është pjesë e identitetit dhe historisë sonë.

“Përjetë falënderues për miqësinë dhe mbështetjen e SHBA-së, ne sot nderojmë figurat që me veprën dhe vizionin e tyre bënë të mundur lirinë tonë. Ky është një mesazh i fortë për brezat që vijnë, që Kosova kurrë nuk harron miqtë e saj” u shpreh kryetari Rama./Telegrafi/

The post Rama nderon figurat amerikane që mbështetën lirinë e Kosovës appeared first on Telegrafi.

Forca e Sigurisë së Kosovës njofton të gjithë qytetarët e Republikës së Kosovës se nga data 31 gusht deri më 05 shtator 2025 do të realizojë ushtrimin fushor “Ujku Shigjetë”, në kuadër të përgatitjeve për validimin e Regjimentit të Tretë.

Gjatë kësaj periudhe do të ketë lëvizje të konvojeve ushtarake nga vendbazimet e FSK-së në drejtim të rajonit të Gjakovës, konkretisht në Aeroportin e Gjakovës dhe në Poligonin Ushtarak në Babaj të Bokës.

“E gjithë kjo lëvizje do bëhet me qëllim të realizimit të ushtrimit, andaj kërkojmë mirëkuptim nga qytetarët”, thuhet në njoftimin e FSK-së./Telegrafi/

The post FSK njofton për ushtrimin fushor “Ujku Shigjetë” nga 31 gushti deri më 5 shtator appeared first on Telegrafi.

Policia e shtetit ka njoftuar se ka sekuestruar pasuri me vlerë 26 milionë e 500 mijë euro, në pronësi të një 45-vjeçari, i dënuar për vrasje dhe për pjesëmarrje në grup kriminal për trafikim të lëndëve narkotike, nga autoritetet italiane.

Në njoftimin e policisë thuhet se operacioni është koduar “Fortesa”, transmeton Telegrafi.

“Specialistët e Seksionit për Hetimin e Pastrimit të Parave, në bashkëpunim me specialistët e Agjencisë së Administrimit të Pasurive të Sekuestruara dhe të Konfiskuara, në kuadër të një procedimi penal të drejtuar nga Prokuroria e Tiranës, ekzekutuan vendimin e Gjykatës së Tiranës, për sekuestrimin e pasurive në pronësi të shtetasit K. K., alias O. M., 45 vjeç, i dënuar më parë për veprat penale “Vrasja me paramendim” dhe “Trafikimi i lëndëve narkotike”, kryer në kuadër të grupit të strukturuar kriminal”, ka njoftuar policia.

Pasuritë e sekuestruara janë konkretisht: 19 prona, 2 automjete dhe 20 llogari bankare, të regjistruara në emër të 45-vjeçarit ose të familjarëve të tij, me vlerë tregu rreth 26 milionë e 500 mijë euro.

Vijon puna për gjurmimin dhe sekuestrimin e pasurive të tjera që dyshohet se kanë burim nga veprimtaritë kriminale të këtij shtetasi.

Materialet procedurale iu referuan Prokurorisë së Tiranës, për veprime të mëtejshme. /Telegrafi/

The post Operacioni “Fortesa”, sekuestrohet pasuri me vlerë mbi 26 milionë euro të një 45-vjeçar në Tiranë appeared first on Telegrafi.

Një vatër zjarri ka shpërthyer këtë pasdite në një sipërfaqe pyjore mbi fshatin Miras, në bashkinë Devoll. Flakët kanë përfshirë një zonë të gjerë, ndërsa forcat e zjarrfikësve janë angazhuar në përpjekje për të shpërndarë flakët.

Aktualisht, në terren ndodhen dy mjete zjarrfikëse, 10 zjarrfikës dhe rreth 20 punonjës nga Drejtoria e Shërbimeve dhe Pyjeve, të cilët po punojnë intensivisht për të izoluar zjarrin dhe për të parandaluar përhapjen e tij në zona të tjera.

Era e fortë dhe bima e dendur po e bëjnë menaxhimin e situatës më të vështirë, ndërsa ndërhyrja po realizohet edhe me mjete rrethanore, për shkak të terrenit të vështirë. Autoritetet janë në gatishmëri të plotë për të parandaluar një përhapje të mëtejshme të flakëve dhe për të mbrojtur zonat e rrezikuara./euronewsalbania/

The post Zjarr në pyllin mbi fshatin Miras të Devollit, forcat e zjarrfikësve në terren appeared first on Telegrafi.

Dogana e Kosovës ka njoftuar se ka parandaluar kontrabandën e duhanit dhe produkteve të falsifikuara në Bërnjak.

Në njoftim thuhet se në pikëkalimin kufitar Bërnjak, Njësitet Antikontrabandë të Doganës së Kosovës, në bashkëpunim me zyrtarët e pikës kufitare, kanë zhvilluar një plan operativ me fokus në kontrolla të detajuara.

“Gjatë këtij operacioni është selektuar për kontroll një automjet, ku pas një verifikimi të hollësishëm janë zbuluar dhe sekuestruar:  27,5 kg duhan i grirë, i dyshuar për kontrabandë;  126 palë trenerka me marka të mbrojtura tregtare, të dyshuara si produkte të falsifikuara”, bëhet e ditur në njoftim.

Dogana e Kosovës thekson se përmes Njësive Antikontrabandë do të vazhdojë me kontrolle të rrepta në të gjitha pikat kufitare dhe brenda territorit të vendit, me qëllim parandalimin e kontrabandës dhe mbrojtjen e tregut dhe konsumatorëve nga mallrat e paligjshme dhe produktet e falsifikuara. /Telegrafi/

The post Dogana parandalon kontrabandën e duhanit dhe produkteve të falsifikuara në Bërnjak appeared first on Telegrafi.

Ministri i Infrastrukturës, Liburn Aliu, ka dhënë sot dorëheqje nga posti i tij. Shkak për dorëheqjen është bërë zgjedhja e Dimal Bashës në krye të Kuvendit të Kosovës.

Pas dorëheqjes së Aliut, ka reaguar edhe kryetari i Prishtinës, Përparim Rama, transmeton Telegrafi.

Rama ka falënderuar Aliun për bashkëpunimin, duke theksuar se raportet me të kanë qenë shumë korrekte.

“Dua ti shpreh mirënjohjen time më të thellë Liburn Aliut, për bashkëpunimin e shkëlqyer dhe korrektësinë që tregoi gjatë gjithë kohës sa ishte Ministër i Infrastrukturës në raport me mua si Kryetar i Kryeqytetit.
Largimi i tij nga institucioni nuk është vetëm një humbje për institucionet, por për të gjithë ne që besojmë tek puna dhe idealet e larta të shërbimit publik”, ka shkruar Aliu.

Lexo po ashtu Liburn Aliu jep dorëheqje nga pozita e ministrit të Mjedisit, shkak zgjedhja e Dimal Bashës për kryetar të Kuvendit

Tutje, ai ka uruar suksese Aliut.

“I uroj suksese në çdo hap të ri dhe e falënderoj nga zemra për kontributin e tij të çmuar në zhvillimin e Kryeqytetit dhe në forcimin e unitetit tonë qytetar dhe kombëtar”, theksoi ai.

Ndryshe, Liburn Aliu sot ka njoftuar për dorëheqjen e tij si ministër i Infrastrukturës.

“Dorëheqja ime vjen pas zgjedhjes së djeshme të kryetarit te Kuvendit të Republikës së Kosovës. Dje, pas votimit të kryetarit të Kuvendit, e kam njoftuar Kryeministrin Kurti për vendimin tim.

Konsideroj që zgjedhja e djeshme e Kryetarit të Kuvendit, institucionit më të lartë, ku vendosen ligjet dhe jep llogari qeveria, nuk është në frymën e në lartësinë e atij ideali për Republikën që ka qenë dhe mbetet arsye angazhimi për mua”, tha Aliu sot. /Telegrafi/

The post Dorëheqja e Liburn Aliut, Rama: Largimi i tij nga institucioni nuk është vetëm një humbje për institucionet, por për të gjithë ne appeared first on Telegrafi.

GIZ Kosova dhe Komuna e Prizrenit, Komuna e Gjakovës dhe Komuna e Gjilanit kanë nënshkruar Marrëveshje Bashkëpunimi për të forcuar bashkëpunimin në zhvillimin e planifikimit urban të qëndrueshëm ndaj ndryshimeve klimatike.

Në njoftim thuhet se marrëveshjet fokusohen në përmirësimin e hapësirave publike, rritjen e qëndrueshmërisë së qyteteve ndaj rreziqeve klimatike, si dhe zbatimin e projekteve demonstruese përmes zgjidhjeve të bazuara në natyrë për të adresuar sfidat klimatike.

“Njëkohësisht, ato promovojnë procese gjithëpërfshirëse të planifikimit që angazhojnë komunitetin, sigurojnë barazi gjinore dhe mbrojnë biodiversitetin”, bëhet e ditur në njoftim.

Gjermania dhe Zvicra, përmes GIZKosovo, po mbështesin Kosovën në këtë angazhim të përbashkët për komuna më të gjelbra, dhe më të mira për jetesë. /Telegrafi/

The post GIZ Kosova: Bashkëpunim për qytete më të gjelbra dhe më të jetueshme appeared first on Telegrafi.

Ministria e Mbrojtjes së Shqipërisë ka njoftuar se pas ndërhyrjeve intensive në disa qarqe të vendit, situata e zjarreve paraqitet më e qëndrueshme dhe nën kontroll.

Në njoftim thuhet se nga 14 vatra të raportuara, 11 janë shuar, ndërsa 2 vatra janë ende aktive, por po menaxhohen nga forcat zjarrfikëse dhe Forcat e Armatosura.

“1 vatër mbetet nën monitorim të vazhdueshëm, pa rrezik për banesa apo komunitetet përreth. Zona më e prekur mbetet Akërnia (Vlorë), ku ndërhyrja nga toka dhe ajri ka stabilizuar ndjeshëm situatën.  Helikopteri i Emirateve të Bashkuara Arabe vijon operacionet nga ajri”, bëhet e ditur në komunikatë.

Gjithashtu, thuhet se në  terren janë angazhuar dhjetëra forca për garantimin e sigurisë dhe mbylljen përfundimtare të vatrave./Telegrafi/

The post Ministria e Mbrojtjes në Shqipëri: Situata e zjarreve nën kontroll, 11 nga 14 vatra janë shuar appeared first on Telegrafi.