Instituti Hidrometeorologjik i Kosovës ka njoftuar se sot mbi vendin tonë do të mbajë mot me diell dhe pjesërisht i vranët.

IHMK njofton se vranësirat vende – vende mund të sjellin riga lokale shiu.

Temperaturat minimale do të sillen ndërmjet 17 -20°C, ndërsa ato maksimale ndërmjet 29 dhe 33°C.

Gjithashtu, bëhet e ditur se do të fryjë erë nga veriperëndimi, me shpejtësi prej 1 deri në 6m/s. /Telegrafi/

The post Moti sot, temperaturat maksimale deri në 33 gradë Celsius appeared first on Telegrafi.

Situata e zjarreve në Shqipëri mbetet shqetësuese, me 29 vatra të regjistruara në 24 orët e fundit.

Sipas Ministrisë së Mbrojtjes, 13 prej tyre janë ende aktive, ndërsa 6 të tjera janë në monitorim të vazhdueshëm.

Në Delvinë, flakët në zonën e fshatit Kalasë kanë përfshirë disa banesa. Operacionet për shuarjen e zjarrit vijojnë me angazhimin e forcave tokësore dhe helikopterëve, ndërsa situata mbetet kritike për shkak të terrenit të vështirë dhe erës.

Zjarre aktive raportohen edhe në qarqet Vlorë, Selenicë, Gjirokastër, Dibër, Mat, Bulqizë, Elbasan, Lezhë, Korçë, Devoll, Maliq, Pogradec, Berat, Kukës, Tiranë dhe Fier.

Në Parkun Kombëtar të Lurës në Dibër janë djegur mbi 350 hektarë, ndërsa në Mat dhe Selenicë flakët rrezikojnë banesa dhe zona të banuara. Në Gjirokastër, zjarri pranë tunelit të Skërficës vijon të jetë aktiv.

Ndërhyrja në shumë raste bëhet e vështirë për shkak të terreneve malore dhe mungesës së aksesit rrugor./euronewsalbania/

The post 29 vatra zjarri në Shqipëri, 13 ende aktive situata mbetet e vështirë në disa qarqe appeared first on Telegrafi.

Policia e Kosovës ka njoftuar se më 25 korrik 2025, rreth orës 20:55, në rrugën “Dëshmorët e Kombit” në Ferizaj, janë arrestuar dy persona të dyshuar meshkuj kosovarë, të përfshirë në një sulm të rëndë fizik.

Sipas njoftimit, të dyshuarit, së bashku edhe me dy persona tjerë që ndodhen në arrati, kanë sulmuar me mjete të forta dhe me mjet të mprehtë – thikë, një viktimë mashkull kosovar. Viktima ishte duke ushtruar detyrën si sigurim fizik në një kafiteri në momentin e sulmit.

Për shkak të lëndimeve të marra, ai fillimisht ka marrë ndihmë në Qendrën Emergjente në Ferizaj dhe më pas është dërguar në QKUK për trajtim të mëtutjeshëm, pasi gjendja e tij është konsideruar e rëndë.

Pas intervistimit, me vendim të prokurorit, të dyshuarit janë dërguar në mbajtje për 48 orë. Policia po vazhdon hetimet për identifikimin dhe kapjen e dy personave të tjerë të përfshirë në rast.

The post Ferizaj, sulmohet roja i kafiterisë me thikë – policia arreston dy persona appeared first on Telegrafi.

Një qytetar e ka quajtur “hajne” deputeten e VV-së, Fitore Pacollin.

Ai u përball me Pacollin para Kuvendit të Kosovës, derisa po pritet të nisë seanca e 53-të konstituive.

Qytetari kishte me vete disa dokumente, për të cilat i thoshte Pacollit që në këto dokumente, del që ajo është një hajdute.

“Hajninë e ki me dokument, nuk po të kërcënoj, për hajne e ki me dokument”, thotë ai, raporton Klankosova.tv.

Lexo po ashtu Situatë e pazakontë në një lokal në Prishtinë, qytetari i shkon në tavolinë deputetes Fitore Pacolli dhe e quan "hajneshë"

Megjithëse Pacolli i thoshte se nëse do të ballafaqohet me të, le t’i drejtohet organeve kompetente.

“Kur të duash ballafaqohemi me drejtësinë, shko te organet kompetente”, i tha Pacolli qytetarit.

E ky qytetar nuk la pa e përmendur incidentin e djeshëm, ku edhe një qytetar tjetër u ballafaqua me Fitore Pacollin, duke e quajtur “hajne”.

The post Edhe një qytetar tjetër përballet me Fitore Pacollin para Kuvendit: Për hajne, e ki me dokument appeared first on Telegrafi.

Një biznes i pjesëve të veturave është përfshirë nga zjarri në orët e para të mëngjesit të sotëm në Pejë.

Sipas dyshimeve të para, zjarri mund të jetë shkaktuar si pasojë e një mosmarrëveshjeje mes disa familjarëve.

Lajmin e ka konfirmuar për Telegrafin zëdhënësi i Policisë së Kosovës për Rajonin e Pejës, Fadil Gashi.

“Rreth orës 11:00, Policia është njoftuar për një zjarr në rrugën ‘Gani Daci’. Dyshohet se deri te zjarri erdhi si pasojë e një mosmarrëveshje mes dy familjarëve, ku njëri prej tyre ka shkuar në pllacin e tjetrit, ku ia ka vënë zjarrin disa makinave që ishin për pjesë. Sipas viktimës, dëmi është rreth 50 mijë euro”, ka potencuar ai.

Tutje, ai tha se në vendin e ngjarjes kanë dalë njësitet kompetente të policisë, ku po punojnë për zbardhjen e plotë të rrethanave të rastit. /Telegrafi/

The post Zjarri në Pejë shkakton dëme prej 50 mijë euro , dyshohet se u ndez nga një familjar appeared first on Telegrafi.

Pika kufitare Dheu i Bardhë vazhdon të jetë më e ngarkuara edhe sot, sipas të dhënave të fundit nga Qendra Kombëtare për Menaxhim Kufitar. Në këtë pikë ka kolona si në hyrje, ashtu edhe në dalje të Kosovës.

Pritja për të hyrë në Kosovë arrin deri në një orë, ndërsa për të dalë, qytetarët po presin rreth 30 minuta.

Kolona janë raportuar edhe në pikën kufitare Muçibabë, ku pritja për të hyrë në Kosovë është afërsisht 30 minuta.

Ndërkohë, pikat e tjera kufitare janë më të lira për qarkullim dhe nuk raportohet për kolona.

Qytetarët mund të informohen në kohë reale për gjendjen në kufi duke klikuar këtu./Telegrafi/

The post Dheu i Bardhë vazhdon të mbetet pika kufitare më e ngarkuar, qytetarët po presin deri në një orë appeared first on Telegrafi.

Në kuadër të aktiviteteve në shënim të Ditës Përkujtimore të Policëve të Rënë në Detyrë, kryeministri në detyrë i Republikës së Kosovës, Albin Kurti, ka bërë homazhe te varri i rreshterit policor, Heroit të Kosovës, Afrim Bujnaku, në fshatin Samadrexhë, në Vushtrri.

“Afrim Bunjaku kishte gradën rreshter në Policinë e Kosovës, por sot ai ka gradën Hero i Kosovës. Grada Hero është grada më e lartë që mund ta ketë një qytetar i Republikës dhe një zyrtar i shtetit. Njëkohësisht është e vetmja gradë nga e cila nuk mund të degradohesh. Prandaj, Heroi i Kosovës, Afrim Bunjaku, sot kujtohet nga mbarë populli ynë, nga secili zyrtar i shtetit, në nderim e në kujtim të flijimit të tij për Republikën e Kosovës, integritetin territorial dhe sovranitetin e shtetit”, u shpreh kryeministri Kurti.

Pas homazhe, ai së bashku me anëtarët e kabinetit qeveritar dhe Drejtori i Policisë u mirëpritën nga familja Bunjaku në shtëpinë e tyre.

Afrim Bunjaku ra në krye të detyrës më 24 shtator 2023 në Banjskë të Zveçanit, në ballafaqim me grupet paramilitare dhe terroriste të Serbisë, në mbrojtje të sovranitetit, kushtetutshmërisë, sigurisë dhe paqes. /Telegrafi/

The post Kurti bëri homazhe pranë varrit të heroit të Kosovës, Afrim Bunjaku dhe vizitoi familjen e tij appeared first on Telegrafi.

Kryeministri në detyrë i Republikës së Kosovës, Albin Kurti dhe anëtarë të kabinetit qeveritar sot në mëngjes bënë homazhe dhe vendosen lule të freskëta pranë varrit të veprimtarit të shquar, Adem Demaçit, Bacës Adem, në 7-vjetorin e vdekjes së tij.

Në njoftimin e bërë nga zyra e kryeministrit, thuhet se “gazetar e shkrimtar, veprimtar e intelektual, i përndjekur dhe i burgosur politik, i lauruar për paqe, përfaqësues politik i luftëtarëve të lirisë, mendimtar dhe kritik, Adem Demaçi ishte mishëruar me çështjen kombëtare shqiptare. Ai ishte personalitet unik, në veprimin dhe me gjuhën e tij, në vetëmohimin për të tjerët./Telegrafi/

The post Kurti bëri homazhe pranë varrit të veprimtarit Adem Demaçi appeared first on Telegrafi.

Detaje të reja kanë dalë në dritë në lidhje me ngjarjen e rëndë që tronditi mbrëmjen e së mërkurës fshatin Frashër të Patosit, ku 26-vjeçare Ermalinda Rama dyshohet se mbyti babain e saj, Anesti Rama.

Policia e Fierit njoftoi këtë të shtunë se ka vënë në pranga edhe një tjetër person të përfshirë në këtë krim. Bëhet fjalë për shtetasin Çlirim Dogani, 55 vjeç, i cili dyshohet se ka ndihmuar Ermalindën në ekzekutimin e të atit, duke e mbytur me një tel.

Sipas informacioneve paraprake të hetimit, dyshohet se mes Ermalindës dhe Doganit ka pasur një lidhje intime, e cila nuk miratohej nga babai i saj. Konfliktet e vazhdueshme për këtë marrëdhënie mund të kenë çuar në përshkallëzimin e situatës dhe në kryerjen e krimit.

Ermalinda Rama kishte lëvizur shpesh në zonën e Sukut të Roskovecit, ku punonte sezonalisht në serat bujqësore të fermerëve vendas. Pikërisht në këtë zonë, që përfshin fshatrat Suk 1, Suk 2 dhe Arapaj, dyshohet se ajo është njohur me Çlirim Doganin. Ky i fundit është i martuar dhe baba i disa fëmijëve.

Në dëshminë e tij para hetuesve, Dogani ka mohuar çdo përfshirje në krim, duke pretenduar se në momentin e ngjarjes ndodhej në një tjetër fshat. Megjithatë, policia vijon hetimet mbi dinamikën e plotë të krimit dhe po verifikon alibitë e të dyshuarve.

Ngjarja ka tronditur opinionin publik dhe komunitetin lokal, ndërsa hetimet për zbardhjen e plotë të motivit dhe rrethanave të ngjarjes vijojnë në drejtimin e Prokurorisë së Fierit./euronewsalbania/

The post Kush është 55-vjeçari që ndihmoi vajzën të mbyste babanë, dyshohet për lidhje intime appeared first on Telegrafi.

Një tjetër banor i lënduar nga zjarri në fshatin Kopaçez, bashkia Delvinë, është transportuar drejt spitalit të traumës në Tiranë për trajtim të specializuar.

42-vjeçari Apostol Zhupa, banor i Kopaçezës, ishte pjesë e grupit të banorëve që po përpiqeshin të shuanin flakët që kishin përfshirë zonën. Ai ka pësuar djegie të shumta në pjesën e gjoksit dhe shpatullave.

Fillimisht, Zhupa mori ndihmën e parë në spitalin rajonal të Sarandës, ndërsa më pas u dërgua me ambulancë drejt Tiranës për shkak të gjendjes së rënduar shëndetësore, transmeton Tch.

Autoritetet vendore kanë konfirmuar se ky është personi i dytë që ka pësuar djegie serioze nga zjarret që kanë përfshirë zonën e Delvinës në ditët e fundit.

The post ​Rëndohet gjendja shëndetësore e 42-vjeçarit që u lëndua gjatë tentativës për shuarjen e flakëve në Delvinë appeared first on Telegrafi.

Në prag të mbajtjes së seancës së 53-të për konstituimin e Kuvendit të Kosovës, profesori universitar dhe njohësi i çështjeve kushtetuese, Mazllum Baraliu, shpreh shpresë se kjo seancë mund të sjellë një zhvillim ndryshe nga dështimet e deritanishme.

Baraliu vlerëson se sot mund të arrihet një marrëveshje mes partive politike për konstituimin e Kuvendit, duke e cilësuar këtë si shansin e fundit për t’i dhënë fund bllokadës institucionale dhe për të përmbushur obligimet kushtetuese të deputetëve.

Në një intervistë për KosovaPress, profesori universitar, Mazllum Baraliu tha se pret që sot të ketë një marrëveshje për Kuvendin, dhe ndoshta edhe për Qeverinë, sipas tij.

Nëse kjo nuk ndodhë, sipas Baraliut, vendi rrezikon të futet në një situatë të paqartë dhe të rrezikshme, që cenon jo vetëm sigurinë, por edhe vetë funksionimin dhe ndërtimin e shtetit.

“Pritet është momenti i fundit. Fatkeqësisht ne jemi mësuar që momentet e fundit t’i zgjidhim çështjet dhe jo me kohë. Parashikoj që duhet të ketë një vendim. Duhet të ketë një marrëveshje dhe duhet të ketë mbase një marrëveshje edhe për kuvend edhe për qeveri. Por,të paktën për kuvend është e domosdoshme. Nëse kjo nuk ndodhë, deputetët e kësaj legjislature të nëntë të kuvendit do të duhej të vetëdijesohen dhe t’i kthehen arsyjes dhe detyrave e përgjegjësive që kanë. Dhe detyrave e përgjegjësive edhe morale, jo vetëm politike, e etike që kanë marrë me vetë faktin se kanë marrë besimin e sovranit të popullit, të qytetarit që i ka votuar, pa marrë parasysh nga qëndrimet e subjekteve të tyre politike ta bëjnë shumicën, ta votojnë kryetarin e kuvendit, cili do qoftë ai kandidat. Jemi në rrezik dhe futemi në një hapësirë, në një labirinth ta pa paraparë dhe të paparë të rreziqeve edhe në aspektin e sigurisë edhe të shtetekzistmit dhe shtet ndërtimit”, tha Baraliu.

Baraliu potencoi se sot minimalisht duhet të finalizohet marrëveshja ndërmjet Lëvizjes Vetëvendosje dhe Nismës Socialdemokrate.

Ai theksoi se është absurde që një proces që mund të zgjidhet për pesë minuta të mbetet i bllokuar.

Sipas tij, nëse Kuvendi nuk konstituohet dhe nuk votohen kryetari dhe nënkryetarët, vendi futet në një “zonë gri”, që rrezikon seriozisht ekzistencën e shtetit dhe funksionimin e republikës.

“Ajo që është minimumi i minimumit do të duhej të ishte marrëveshja e finalizuar tashmë. Sepse nuk ka kuptim, është absurde…Diçka që bëhet për pesë minuta, duhet ta bëjnë. Nëse kjo jo, duhet të ketë votim të kujtdo qoftë, çfarëdo qoftë propozimi, modeli, duhet të votohet kandidati apo kandidatja që propozohet nga shumica ose ndonjë kompromis. Nëse jo kompromis, nëse jo marrëveshje politike për kuvend apo qeveri, domosdoshmërisht deputetët, e kanë për detyrë, madje edhe Gjykata Kushtetuese me aktgjykimin e mëhershëm, pjesë e të cilit është edhe vendimi i djeshëm, si sqarim i këtij akgjykimi. Do të duhej ta konstituoni kuvendin, ta votonin kryetarin dhe nën kryetarët e të gjitha partive, gjithë atyre që iu takojnë dhe të hapet rruga më tutje për themelim të qeverisë në bazë të dispozitave të nenit 95 të kushteutes…Nëse jo, ne hymë në një zonë gri e cila është mjegulluar po aq sa ne ta rrezikojmë qenien tonë shtetërore, qenien e republikën dhe ekzistencën e shtetit. Këtë nuk i lejohet asnjë deputeti ta bëjë”, potencoi Baraliu.

Ndërkaq, lidhur me vendimin e 24 korrikut të Gjykatës Kushtetuese, Baraliu tha se është jashtëzakonisht i rëndësishëm, sepse sipas tij vjen në një moment kritik dhe u tregon qartë deputetëve dhe partive politike se çfarë duhet të bëjnë dhe brenda cilave afate.

Ai sqaroi se Gjykata ka dhënë afat deri më 27 korrik për konstituimin e Kuvendit. Nëse kjo nuk ndodhë nga 27 korriku deri më 8 gusht, siç e shpjegoi edhe Baraliu, aktivizohet masa e sigurisë dhe Gjykata do të nisë shqyrtimin e të gjitha kërkesave dhe dokumenteve të paraqitura nga dy partitë politike.

“Vendimi i Gjykatës Kushtetuese është precizim i aktgjykimit të mëhershëm dhe përgjigje në dy parashtresat e dy subjekteve politike që kanë bërë, PDK-ja dhe LDK-ja lidhur me procesin e bllokimit të konstituimit të kuvendit. E shoh si një akt jashtëzakonisht të rëndësishëm në momentin më të rëndësishëm dhe kritik për të vetëdijesuar dhe për trasuar në mënyrë rekomanduese kardinale rrugën e deputetëve dhe të partive politike dhe çfarë duhet të bëjnë dhe deri kur janë afatet e caktuara për të vepruar. Pra, iu ka dhënë mundësinë që fillimisht deri më 27 të bëhet kuvendi, nëse bëht çdo gjë është në rregull. Nëse jo, atëherë nga 27 korrikut deri më 8 gusht fillon dhe zbatohet masa e sigurisë dhe pastaj fillon punën gjykata në përpunimin e të gjitha kërkesave, të dhënave, elementeve të atyre dy parashtresave të dy subjekteve politike”, tregoi Baraliu.

Gjykata Kushtetuese ka kthyer të premten më 24 korrik, përgjigje ndaj kërkesave të PDK-së dhe LDK-së mbi vlerësimin e kushtetutshmërisë së vendimit të Kuvendit për votimin e Komisionit për votim të fshehtë të seancës së mbajtur më 29 qershor 2025.

Kushtetuesja ka caktuar masën e përkohshme përmes të cilës ndalohet çdo vendim dhe veprim i deputetëve të zgjedhur lidhur me seancën konstituive pas përfundimit të afatit 30 ditor, dhe se nuk do të mund të marrin asnjë vendim tjetër nga 27 korriku deri më 8 gusht.

The post ​Seanca e 53-të, Baraliu: Pritet të arrihet marrëveshje, është momenti i fundit appeared first on Telegrafi.

Zjarri që përfshiu fshatrat Kalasë, Tatzat, Senicë, Vergo, Kopaçëz dhe Palavli, në Njësinë Administrative Vergo, bashkia Delvinë, vijon të jetë aktiv. Vatra kryesore ndodhet aktualisht në kodrën përballë fshatit Palavli, si dhe në zonën sipër baxhos në fshatin Kopaçëz, ku dyshohet se flakët mund të jenë përhapur edhe në malin mbi Borsh.

Si masë sigurie, rreth 2.000 banorë nga gjashtë fshatrat e prekur janë evakuuar një ditë më parë, për të shmangur rrezikun ndaj jetës dhe pronës.

Sipas të dhënave paraprake, janë djegur 11 banesa, si dhe kisha e fshatit Senicë, Shën Dhimitri. Dëmet materiale përfshijnë gjithashtu sipërfaqe të konsiderueshme toke bujqësore, pemëtari, ullishte dhe blegtori.

Tre persona kanë pësuar djegie si pasojë e përhapjes së flakëve, ndërsa autoritetet lokale dhe strukturat e emergjencës janë në terren për të vlerësuar situatën dhe për të mbajtur nën kontroll vatrat aktive të zjarrit./euronewsalbania/

The post Zjarri në Delvinë vijon të jetë aktiv, mbi 2 mijë banorë të evakuuar appeared first on Telegrafi.

Sot, deputetët e Kuvendit të Kosovës pritet të mblidhen për herë të 53-të me radhë në përpjekje për ta konstituar Kuvendin.

Seanca për ditën e sotme u thirri pasi Gjykata Kushtetuese e Republikës së Kosovës ka vendosur masë të përkohshme ndaj veprimeve dhe vendimeve të deputetëve të zgjedhur të Kuvendit, duke ndaluar çdo aktivitet parlamentar nga data 26 korrik 2025 deri në një vendim të mëtejmë.

Për situatën e krijuar, një reagim e ka bërë edhe analisti politik Shkëlzen Maliqi.

“Në një postim në Facebook, ai ka shkruar se, nëse Kuvendi nuk konstituohet deri më 26 korrik, presidentja duhet të shpallë zgjedhje të reja.

“Nëse Kuvendi nuk konstituohet deri me 26 korrik, presidentja si kujdestare e funksionalitetit të institucioneve të republikës e konstaton gjendjen e vetëshkarkimit të kuvendit dhe i shpall zgjedhjet e reja”, tha ai.

Ndryshe, Kuvendi ka mbetur pa u konstituar pasi Lëvizja Vetëvendosje nuk po heqë dorë nga emri i Albulena Haxhiut për kryetare të Kuvendit, gjersa kryesuesi po ashtu ka vënë si pikë të rendit të ditës formimin e një Komisioni që do të mundësonte votim të fshehtë në Kuvend për zgjedhjen e kryeparlamentarit.

Në anën tjetër, partitë tjera, PDK, LDK e AAK kanë thënë se nuk do ta votojnë Albulena Haxhiun për kryetare të Kuvendit, ndërsa po ashtu çështja e Komisionit zgjedhor nuk po arrihet në mungesë kuorumi.

Që nga zgjedhjet e 9 shkurtit, vendi ka mbetur pa formuar institucione të reja./Telegrafi/

The post Maliqi thotë se nëse Kuvendi nuk konstituohet deri më 26 korrik, presidentja duhet t’i shpall zgjedhjet e reja appeared first on Telegrafi.

Zjarri ka përfshirë sot disa vatra në fshatin Pakashticë të Podujevës.

Kryetari i Podujevës, Shpejtim Bulliqi, ka thënë se janë djegur një sipërfaqe e konsiderueshme me pisha.

“Në orët e pasdites jemi ballafaquar me disa vatra zjarri në fshatin Pakashticë, ku për fat të keq është djegur një sipërfaqe e konsiderueshme me pisha. Brigada e zjarrfikësve së bashku me Policinë e Kosovës janë në terren dhe po angazhohen me kapacitet të plotë për lokalizimin dhe shuarjen e zjarrit”, ka pohuar Bulliqi përmes një postimi në Facebook.

Tutje, ai ka bërë thirrje që qytetarët të tregojnë kujdes të shtuar dhe të mos ndezin zjarre në ambiente të hapura.

“Ndaj personave që shkaktojnë zjarrvënie të qëllimshme do të ndërmerren masa ligjore dhe do të gjobiten konform ligjit”./Telegrafi/

The post Zjarri përfshin disa vatra në fshatin Pakashticë të Podujevës appeared first on Telegrafi.

Një këmbësor është goditur sot për vdekje në rrugën nacionale Prishtinë – Mitrovicë.

I dyshuari për shkaktimin e aksidentit është një zyrtar policor, i cili ishte jashtë detyrës zyrtare dhe me veturën e tij private.

“Hetuesit e IPK-së janë njoftuar sot në orët e mbrëmjes nga Policia e Kosovës për një aksident trafiku. Aksidenti raportohet se ka ndodhur në rrugën Nacionale Prishtinë-Mitrovicë, përkatësisht në fshatin Llazarevë, ku një zyrtar policor jashtë detyrës zyrtare duke qarkulluar me veturën private ka shkaktuar aksident trafiku me fatalitet, ku si pasojë e aksidentit fatkeqësisht ka vdekur qytetari L.S (staf civil në Policinë e Kosovës)”, ka njoftuar Inspektorati Policor.

Në vend të ngjarjes kanë dalë hetuesit e IPK-së, njësitë relevante policore dhe prokurori kujdestar nga Prokuroria Themelore në Prishtinë.

Lidhur me këtë rast është iniciuar rast penal lidhur me veprën penale “Rrezikim i trafikut publik”, kurse i dyshuari (zyrtari policor) është arrestuar dhe i është caktuar masa e ndalimit për 48 orë.

Lexo po ashtu Goditet për vdekje një këmbësor në magjistralen Prishtinë - Mitrovicë

Ndryshe, aksidenti me fatalitet ka ndodhur rreth orës 18:00.

Lajmin e ka konfirmuar për Telegrafin, Agron Borovci, zëdhënës i Policisë së Kosovës për Rajonin e Prishtinës.

“Rreth orës 18:30 policia ka pranuar informatën se në rrugën magjistrale “Prishtinë – Mitrovicë” respektivisht në fshatin Llazarevë, ka ndodhur një aksident trafiku me fatalitet. Mbështetur në informacionet fillestare, në aksident kanë qenë të përfshirë, një këmbësor dhe një automjet dhe si pasojë, këmbësori, mashkull, rreth 53 vjeç, ka humbur jetën”, tha Borovci./Telegrafi/

The post Zyrtari policor dyshohet se shkaktoi aksidentin me fatalitet në rrugë Prishtinë-Mitrovicë, ku humbi jetën një këmbësor appeared first on Telegrafi.

Një i mbijetuar i dhunës seksuale gjatë luftës në Kosovë në Debat Plus me Ermal Pandurin në RTV Dukagjini ka ndarë rrëfimin e tij të dhimbshëm, duke përshkruar vështirësitë fizike dhe shpirtërore që e kanë shoqëruar për më shumë se dy dekada.

Gjatë rrëfimit të tij ai ka treguar se fillimisht për përjetimin e tij kishte folur vetëm me bashkëshorten.

“Historinë e parë me bashkëshorten, se kam qenë në gjendje shumë të rëndë, edhe fëmija, ishte puna që u pake. Se isha i maltretum, isha i “asit” edhe u dijshin, vetëm për punën e testikujve nuk e kanë ditë se këto tjerat e kanë ditë. E shoqja e ka ditë”, rrëfen ai.

Lexo po ashtu Rrëfimi i burrit që u mbajt 21 ditë nën tortura nga serbët

Kur u pyet se si e kishte treguar për këtë pjesë të rëndë, i mbijetuari shpjegoi:

“Nuk kisha se qysh me i tregu se, mjeku që me kqyrke. Ai ardhke te shtëpija edhe ******* që i pijsha, ma ndihmojke edhe ajo. Kur kisha me ly me trup e me… për dhimbje u pake që…”, rrëfen ai.

Sa i përket fëmijëve, ai tha se nuk kishte pasur forcë t’ua tregonte vetë.

“Fëmijëve i ka tregu nana e vet. Unë skam mujt me i kallxu, as sot nuk mundem me i kallxu”, thotë ai.

I mbijetuari shprehu edhe shqetësimin se për shkak të fëmijëve nuk kishte guxuar të fliste publikisht.

“Shumë të vështirë e kam me fol me to se shumë me thirrin napër emisione, nuk kam mujt me shku për shkak të fëmijëve se jam i flaktë me dal publikisht me kallxu”, thotë ai.

Ai kujton se rrëfimin e parë e kishte dhënë në vitin 2000, me dokumente dhe fotografi.

“E rrëfimin e parë që e kam dhanë në të 2000-tën, i kam pas me fotografi, komplet. me krejt i kam pas, me atë letren që ma ka dhanë **********, datën e lëshimit edhe nja e kam pas por janë kanë tre vet, që më kanë marr në pyetje”, ka treguar ai.

Në vazhdim, ai përmend se kishte pasur takime edhe me aktivisten ******, ndërsa theksoi se dokumentet zyrtare që ai kishte dorëzuar ishin zhdukur dhe se institucionet nuk i kishin gjetur.

“Edhe nuk ka shans tha me i gjetë ato dokumente, kanë humb. Se e patëm një mbjedhje frik, që dul ai ******** e patëm e tha duhet me i gjetë. Thash organet e rendit duhet me i gjetë, unë nuk mundem me i gjetë. Qysh mundem me i gjetë unë kur i kam dorëzu”, rrëfen ai.

Në fund të rrëfimit, ai shton se i mban mend emrat e personave që e kishin marrë në pyetje, por sipas tij, dokumentet mund të jenë marrë nga një shtetase e huaj, e përmendur me emrin ******.

“Unë emrat i mbaj por po thojnë që i ka marr *********, i ka marr ajo italianka. Ia ka marr ajo, ne vec jemi kanë”, thotë ai.

Ky rrëfim tronditës hedh dritë mbi plagët ende të hapura të dhunës së pashprehur gjatë luftës dhe nevojën urgjente për drejtësi, dokumentim dhe mbështetje institucionale për viktimat e mbijetuara të dhunës seksuale.

The post I mbijetuari i dhunës seksuale: Kam pas maltretime edhe në zorrë të trashë edhe me bajonetë appeared first on Telegrafi.

Në rrëfimin e ditës së sotme në kuadër të “Heshtja që vret – Klithma e vërtetë e lꭒftës”, rrëfehet një burrë i cili në dorë të serbëve kishte rënë rrugës ku po shkonte të ndihmonte një ushtar të UÇK-së.

Ai në Debat Plus me Ermal Pandurin tregoi se forcat serbe e ndanë nga shoku i tij e pjesa tjetër pastaj ishte histori që i la përjetë shenja emocionale e fizike.

I mbijetuari: E premte ka qenë, jam arrestu me një ushtar, me një kushëri timin.

Panduri: Ai ka qenë ushtar i Ushtrisë Çlirimtare të Kosovës?

I mbijetuari: Unë kam qenë duke e përcjell deri me një fshat tjetër.

Panduri: Duke e përcjell për me ju bashkëngjitë?

I mbijetuari: Ai ka qenë duke e çu postën, ka qenë postier. Unë kam shku me të edhe kemi rënë në pritë. Kishin qenë duke e minu rrugën. Kish qenë edhe ushtarë edhe paramilitarë. Ka qenë ora 08:00 e mëngjesit, aty na kanë gjujtë por fati, neve nuk na kanë rrokë. Kerri u bë shoshë por kryesorja neve dyve jo. Të armatosur kemi qenë.

Panduri: Të armatosur keni qenë?

I mbijetuari: Ushtari po, unë jo. Ai ka pas edhe armë edhe bombë por fati që i ka pas në bagazh të veturës. Armen me veti, automatikun e ka pas në bagazh. Qaty na kanë nxënë, jemi dorëzu. Nuk kemi pas mundësi nga me ikë se ka qenë tenka përpara edhe policia, por fati i mirë që i kam njoftë.

Panduri: I ke njoftë?

I mbijetuari: Se kanë qenë të gjithë të komunës time. Policia, ushtrinë nuk i kam njoftë. Ata policë që na kanë nxënë në atë moment i kam njoftë katër”, ka rrëfyer ai.

Fillimisht të mbijetuarin e dhunës seksuale e quan në një vend bashkë me shokun e tij ushtar, aty pati maltretime vetëm fizike, madje edhe paratë që kishte me vete ia morri një udhëheqës serb aty.

“Fizikisht, atij ushtarit ia thyen këmbën, mua ma thyen edhe mua këmben e majtë këtu, aty në vend të ngjarjes, edhe na kanë çu në ******* edhe aty na kanë mbajnë një orë, një ore e gjysmë. Aty zv.komandanti i tyre më tha pse i ke gjithë këto pare. I thash: Këto pare i kam të juajat, thash i kam marr prej juve. Tha, si prej neve, tha ti a je bashkëpunëtor i joni a. Thash jo bashkëpunëtor por thash kam dëshmitarin, thash ******, tha, qysh?. Thash kur ka dal ky aty, më nxuni, tha qato dinarë me mi bë marka se kam punu me deviza, pas viteve të 90-ta kam punuar gjashtë vite. Thash mi ka dhënë ai, ia kam bë edhe i ka thirr ata se kujtoi mos po e gënjejë, e ka thirr atë dhe tha, po e vërtetë është, ia kam dhënë. Ani tha, le këtë deri sa ta bëjmë verifikimin, juve tha nuk guxoj me ju liru. Po halli? Tha duhet me ju çu për ***** tha a po i lenë paratë këtu, qe kur të kthehesh i merr. Unë e dita qëllimin që paratë me u kthy ato jo dhe i thash nuk po kthehem me i marr por po ti lë ty. Thash nëse ke mundësi, të na lirojnë. Tha me ju liru nuk mundem por besën po ta jap që do të ju dërgoj në ***** me një vend ku janë veç gra. Tha nuk keni me pas maltretime. Edhe na kanë dërgu në ***** është para hotelit ****** Na kanë çu aty edhe aty kishin qenë të gjitha femra. Si na kanë dërgu aty, është ardh njëri edhe na ka parë, tha ty jam duke të kërku”, rrëfen ai.

Tek ky vendi ku e dërguan për herë të dytë e ndanë nga shoku i tij, ndodhi ajo që nuk e kishte menduar asnjëherë.

Në bodrume të kafeneve e mbanë për 21 ditë ku përjetoi maltretimet më të ashpra.

The post Rrëfimi i burrit që u mbajt 21 ditë nën tortura nga serbët appeared first on Telegrafi.

Deputetja e Vetëvendosje, Fitore Pacolli, ka reaguar pasi sot derisa ishte duke qëndruar në një lokal, një qytetar i afrohet dhe e ofendon duke e akuzuar se është “hajneshë”.

Deputetja thotë e sulmi nuk ishte spontan, dhe se video e cila po qarkullon në rrjetet sociale është incizuar nga gruaja ose vajza e tij, të cilat sipas saj, ishin në vendngjarje, transmeton Telegrafi.

“Sot, në ambientet e lokalit “Home”, u përballa me një akt të rëndë kërcënimi dhe sulmi verbal nga një person i quajtur Agim Pllashniku. Ky individ njihet në publik dhe nga autoritetet për të kaluarën e tij të dhunshme. Ky sulm nuk ishte aspak spontan, ishte i organizuar dhe i mirëkoordinuar. Videoja që po qarkullon në rrjetet sociale është incizuar nga gruaja ose vajza e tij, të cilat ishin të pranishme në vendngjarje. Gruaja është e punësuar në institucionin e Avokatit të Popullit, ndërsa vajza pritet të jetë kandidate për Asamblenë Komunale nga radhët e PSD-së”, thotë Pacolli.

Deputetja po ashtu ka deklaruar se video nuk është e plotë.

“Kjo video nuk është e plotë. Ajo është prerë dhe manipuluar për të fshehur sulmin e tij ndaj meje si dhe momentin kur agresori e sulmon fizikisht asistentin tim, si dhe çastin kur tenton të fusë dorën në çantën që mbante në krah, një çantë për të cilën dyshohet se mund të ketë pasur armë”, shtoi deputetja.

Lexo po ashtu Situatë e pazakontë në një lokal në Prishtinë, qytetari i shkon në tavolinë deputetes Fitore Pacolli dhe e quan "hajneshë"

Pacolli theksoi se “Agim Pllashniku u afrua me tonë e mënyrë kërcënuese pranë tavolinës ku isha ulur, duke shfaqur qartazi qëllime agresive dhe provokuese.”.

“Dëshmitarë të drejtpërdrejtë të këtij incidenti ishin përfaqësues të institucionit të Avokatit të Popullit, përfshirë edhe vetë Avokatin e Popullit, si dhe zyrtarë policorë në uniformë, të cilët ndodheshin në lokal në momentin e ngjarjes. Disa portale, “gazetarë” dhe “analistë”, të financuar nga oligarkë dhe interesa të tyre të errëta, po e portretizojnë këtë sulm të rrezikshëm si një akt “heroik”, duke mbrojtur agresorin dhe duke tentuar ta paraqesin dhunuesin si viktimë.

Këto portale nuk kanë për qëllim informimin e publikut. Ato janë kthyer në instrumente të dhunës së organizuar dhe sistematike kundër meje, duke përhapur qëllimisht urrejtje, kërcënime, shpifje, thirrje për sulme verbale e fizike, si dhe dhunë politike e psikologjike, me qëllimin e vetëm për të më detyruar të tërhiqem nga angazhimi im politik”,vijon reagimi.

Ajo thotë se këto veprime tashmë përbëjnë përgjegjësi penale.

“Unë nuk do të frikësohem. Nuk do të hesht. Nuk do të tërhiqem. Do të vazhdoj, sypatrembur dhe e palëkundur, rrugën time të drejtë. Dhe nuk do të lejoj që e vërteta të deformohet nga ata që përkrahin dhunën dhe krimin”, deklaroi deputetja.

Ndryshe,dDeputetja e Lëvizjes Vetëvendosje, Fitore Pacolli, është përballur sot me një situatë jo të këndshme ndërsa ishte në një lokal. Ku një qytetar i afrohet në tavolinë dhe e akuzon duke e quajtur “hajneshë”.

Lidhur me rastin, Policia tashmë ka intervistuar personin e dyshuar.

Zëdhënësi i Policisë për rajonin e Prishtinës, ka konfirmuar për Telegrafin, se ndaj tij është iniciuar një hetim në drejtim të veprës penale ‘’Kanosja’’

“Referuar këtij rasti, i dyshuari është ftuar për intervistim nga ana e policisë dhe me rekomandimin e prokurorit të shtetit ndaj tij është iniciuar një hetim në drejtim të veprës penale ‘’Kanosja’’ dhe i njëjti më pas është proceduar i lirë”, tha Borovci.

Ndryshe, Pacolli ishte e shoqëruar nga një person në lokal, gjatë kohës sa qytetari iu afrua duke e akuzuar për hajni./Telegrafi/

The post Reagon deputetja Pacolli: Sulmi nuk ishte spontan, video është incizuar nga gruaja ose vajza e tij appeared first on Telegrafi.

Në një atmosferë plot gjallëri dhe interes të lartë, sot u hap zyrtarisht panairi “Expo Real Kosova 2025”, një ndër ngjarjet më të mëdha të vitit në sektorin e ndërtimit, prodhimit dhe patundshmërisë.

Për tri ditë me radhë, mbi 45 kompani vendore po ekspozojnë qindra projekte, që nga materialet ndërtimore e deri te zgjidhjet për planifikimin urban dhe dizajnin e interierit.

Në ditën e parë të panairit, vizitorët patën rastin të shqyrtojnë një mori zgjidhjesh – që nga materialet bazë të ndërtimit, planifikimi dhe dizajnimi, e deri te ofertat për blerje apo investim në patundshmëri.

Veç prezantimeve dhe ekspozimit, dita e parë u shënua edhe nga panele diskutimi ku u ballafaquan përfaqësues të sektorit privat dhe atij financiar, me theks të veçantë në ndërtimin e qëndrueshëm dhe investimet e gjelbra.

Pjesëmarrësit theksuan përparimin e Kosovës në këtë drejtim dhe nevojën për bashkëpunim më të thellë ndërmjet sektorëve.

Më tutje, organizatorët theksuan se misioni i panairit është krijimi i një kulture të re investimi dhe bashkëpunimi mes bizneseve, si dhe ndërtimi i një tregu të fuqishëm dhe të qëndrueshëm vendor.

Dita e parë u përmbyll me sukses dhe interes të madh, ndërsa ftohen të gjithë qytetarët, profesionistët dhe të interesuarit që të vizitojnë panairin edhe në dy ditët në vijim, më 26 dhe 27 korrik nga ora 12 :00 deri në 20 :00 në Prishtina Mall, për të përfituar nga mundësitë që ofrohen në këtë hapësirë bashkëpunimi dhe zhvillimi. /Telegrafi/

The post Industria e ndërtimit në qendër të vëmendjes, dita e parë e Expo Real Kosova 2025 mbyllet me sukses appeared first on Telegrafi.

Banorët në Prishtinë po ankohen për mungesë të ujit, duke theksuar se ndërprerjet po ndodhin kryesisht gjatë orëve të pasdites.

Sipas tyre, kjo po u shkakton vështirësi të mëdha në përditshmëri, veçanërisht tani kur temperaturat janë të larta dhe nevoja për ujë është edhe më e madhe.

E për këtë, KRU “Prishtina”, sot ka bërë një njoftim, duke thënë se konsumi ka arritur pikën e kuqe.

“Të nderuar konsumatorë! KRU” Prishtina” është duke trajtuar ujë me kapacitete maksimale të mundshme në Batllavë, Badoc dhe Shkabaj. Konsumi i ujit[përfshirë keqpërdorimet alarmante] janë në pikën e kuqe”, thuhet në njoftim.

Nga KRU “Prishtina”, qytetarët janë lutur që ujin ta ujin ta shpenzojnë sa më racionalisht, ngase uji nuk po arrinë në pikat e larta.

“Përndjekja e keqpërdoruesve është në intensitetin më të lartë ndonjëherë”./Telegrafi/

The post Qytetarët ankohen për mungesë të ujit, KRU “Prishtina”, thotë se konsumi ka arritur pikën e kuqe appeared first on Telegrafi.