TIRANË, 28 korrik /ATSH/ Shqipëria përmendet në mënyrë të veçantë mes 19 vendeve në një publikim të ri të Organizatës së Ushqimit dhe Bujqësisë (FAO), me titullin “Transformimi i Ushqimit dhe Bujqësisë përmes një Qasjeje Sistemike”.

Raporti thekson përpjekjet novatore kombëtare për ndërtimin e sistemeve ushqimore të qëndrueshme dhe rezistente përmes qeverisjes së integruar dhe bashkëpunimit ndërsektorial.

Përmes një njoftimi për shtyp, FAO bën të ditur se, “Raporti paraqet udhëtimin transformues të Shqipërisë, nga iniciativat e fragmentuara të zhvillimit rural drejt një modeli të koordinuar dhe sistemik”.

Që nga viti 2021, Ministria e Bujqësisë dhe Zhvillimit Rural (MBZR), së bashku me partnerët, ka aplikuar në mënyrë strategjike qasjen sistemike për të lidhur sigurinë ushqimore, rritjen ekonomike, turizmin, arsimin dhe sektorin financiar duke adresuar pabarazitë e thella urbane-rurale dhe duke nxitur angazhimin e të rinjve dhe inovacionin.

Sipas FAO-s, një pikë kyçe strategjike e identifikuar në këtë proces është agroturizmi, i cili është shndërruar në një katalizator për ringjalljen rurale duke lidhur bujqësinë, përpunimin e ushqimit, turizmin, kulturën dhe qëndrueshmërinë. Dialogjet kombëtare gjatë Samitit të Sistemeve Ushqimore të OKB-së në vitin 2021 nxitën shkëmbime ndër grupet e interesit, duke përfshirë sipërmarrës agroturizmi, fermerë, autoritete lokale, institucione mikrofinancimi, shkolla kulinarie dhe shërbime të ekstensionit. Këto përpjekje sollën rezultate konkrete, përfshirë ngritjen e kapaciteteve të të rinjve në inovacionin agroushqimor, përmirësimin e aksesit në kujdesin shëndetësor rural dhe përmirësime infrastrukturore.

Ekipi i komunikimit i FAO Shqipëri vë në dukje se ky ndryshim u mundësua përmes zhvillimit të dialogut ndërsektorial që u shndërrua në veprim konkret, duke lejuar bashkë-dizajnimin e zgjidhjeve që adresojnë njëkohësisht prioritetet shoqërore, mjedisore dhe ekonomike. Siç theksojnë ekspertët e FAO-së, rasti i Shqipërisë tregon se si zgjidhjet lokale të trajtuara nëpërmjet një qasjeje sistemike mund të nxisin transformim kombëtar.

Në vitin 2023, MBZR institucionalizoi këtë qasje duke krijuar Njësinë e Veçantë për Agroturizmin dhe Turizmin Rural brenda sektorit të Politikave Tregtare dhe Zhvillimit Rural. Kjo njësi shërben si një mekanizëm qeverisjeje, duke koordinuar ngushtë me Ministrinë e Turizmit dhe Mjedisit për zbatimin e Ligjit të Turizmit 2024 dhe Planit të Veprimit.

FAO nënvizon se, gjithashtu edhe investimet financiare të konsiderueshme po mbështesin këto përparime.

Një Fond Investimi prej 250 milionë eurosh për Zhvillimin Rural dhe iniciativa “Paketa Malore” mbështesin agroturizmin, ruajtjen e biodiversitetit dhe inovacionin e udhëhequr nga komuniteti, veçanërisht në zonat rurale dhe malore.

“Rasti i Shqipërisë demonstron se ndryshimi në mënyrën se si mendojmë, veprojmë dhe organizohemi duke tejkaluar përpjekjet e ndara mund të çojë në ndikim afatgjatë në sistemet agroushqimore, duke kontribuar në progres kombëtar dhe mësime globale.

Ky publikim synon të frymëzojë politikëbërësit dhe praktikantët në mbarë botën duke ndarë shembuj praktikë të qasjeve sistemike që përmirësojnë sigurinë ushqimore, promovojnë zhvillimin e qëndrueshëm rural dhe fuqizojnë angazhimin e të rinjve”, thekson FAO në njoftimin për medie.

The post Shqipëria në Fokus të Raportit Global të FAO-së për sistemet e integruara ushqimore dhe qasjen sistemike appeared first on Agjencia Telegrafike Shqiptare.

TIRANË, 28 korrik /ATSH-Maela Marini/ Kryeministri Edi Rama u shpreh sot se sektori i ndërtimi nuk duhet të bazohet më te parashitja dhe kleringu, pasi mundësitë janë për të pasur akses në forma të tjera financimi.

Rama ishte sot në Qendrën për Inovacion dhe Teknologji “NEST”, një strukturë e Fondit Shqiptar të Zhvillimit që u shërben edhe universiteteve dhe sipërmarrjes ku u prezantua një start up-i të rinjsh shqiptarë për financimin e sektorit të ndërtimit.

Duke folur për zhvillimet në sektorin e ndërtimit, Rama theksoi se e rëndësishme është të fitohet me kohën e realizimit të projekteve.

“Kjo nuk është çështje thjesht masash ligjore, por çështje vetëdijeje nga ana e investitorëve dhe ndërtuesve për të aksesuar këtë treg komplet të ri financiar që mund të bëhet një burim shumë i shpejtë, i thjesht dhe i konsiderueshëm të ardhurash në mënyrë që ndërtimi të mos bazohet te parashitja dhe kleringu. Këto janë dy forma që ishin të kuptueshme dhe pranueshme për një periudhë të caktuar kohe por nuk mund të jenë më as të kuptueshme as të pranueshme sot, kur mundësitë janë për të pasur akses në forma të tjera financimi”, shtoi Kryeministri.

Rama theksoi se bëhet fjalë për një formulë investimesh që është një parashitje e bazuar te garancia e investimit.

“Këtë garanci ta jep fakti se ke menjëherë në dispozicion likuiditete për të ecur pa u angazhuar dhe pa angazhuar njerëz që në gropë, por për të angazhuar financim duke pasur krahët të mbuluar me financim dhe duke arritur që të shtosh vlerën e produktit tënd final që tjetër është kur e shet në gropë dhe kur e shet në fund. Ne kemi parë se si ka ndodhur që apartamente të blera në gropë rishiten nga ata që i kanë blerë në gropë kur ka mbaruar puna dhe rishiten me një çmim shumë më të lartë që e fiton ai që ka blerë në gropë, jo ai që ka ndërtuar”, shtoi Rama.

Në aspektin e interesit publik, Rama tha se kjo ka të bëjë me cilësinë dhe kohën me të cilën realizohen projektet.

“Investitorët duan kohën. Nuk mund t’i japësh një projekt për një godinë në Tiranë dhe pastaj projekti të marri 10 vjet për t’u realizuar. Ata duan të dinë kur fillon, kur mbaron dhe çfarë kapacitetesh ka për ta filluar e mbaruar në kohë”, tha Rama.

Këtu, sipas Kryeministrit, përfshihen faktorë të tjerë që kanë të bëjnë me kapacitete ndërtimore të kompanive me krahun e kualifikuar të punës që është bërë shumë i çmuar.

“Për këtë duhen parë mundësitë e kthimit të sinergjive me kompani ndërkombëtare edhe ndërtimi për të fituar përmes kohës atë që faktikisht nuk e humbet në dukje, por e humbet nga kohëzgjatja e paarsyeshme e një projekti”, nënvizoi ai.

/r.e/

The post Rama: Jo më parashitje dhe klering në ndërtim, akses në financime për të garantuar investimin appeared first on Agjencia Telegrafike Shqiptare.

TIRANË, 28 korrik /ATSH/ Kryeministri Edi Rama ishte i pranishëm sot në Qendrën për Inovacion dhe Teknologji “NEST”, një strukturë e Fondit Shqiptar të Zhvillimit që u shërben edhe universiteteve dhe sipërmarrjes, nga ku u prezantua edhe një start up-i të rinjsh shqiptarë për financimin e sektorit të ndërtimit.

Në fjalën e tij Rama theksoi sërish se kantieret e ndërtimit do të kenë kamera dhe do të monitorohen 24 orë në 24.

“Ne do ta vendosim si kusht që kantierët e ndërtimit do të kenë kamera dhe do të monitorohen 24 orë në 24. Kjo gjë padiskutim do t’ju vlejë edhe juve në ndjekjen e punëve dhe në praktikën tuaj, por është shumë e vlefshme për të gjitha aspektet që lidhen me sigurinë dhe garantimin e projektit dhe diku në një nga mjediset këtu do të shikoni që përmes një programi monitorimi me inteligjencën artificiale mund të ndiqet kantieri nga lart dhe mund të shikohet dhe korrektësia e punës në raport me projektin, jo thjesht në perimetër”, tha Rama.

Kreu i qeverisë nënvizoi se gjithashtu po “përfundon edhe Qendra e Monitorimit me dronë të integruar që së bashku me satelitët do të na japë mundësi të ndjekim në kohë reale të gjitha zhvillimet në territor”.

Rama tha se do të vendoset që kompanitë me mbi 100 punonjës të kenë një departament të inovacionit që merret me të gjithë pjesën e teknologjisë. Kjo sipas Ramës do të përgatisë bizneset për integrimin në BE.

“Do ju sugjeroja që të shikoni pak disa gjëra që bëhen në këtë godinë për të pasur një sasi të nevojës që kompanitë tuaja, përgjithësisht këtu janë kompani të mëdha, të angazhojnë edhe një ekip për kërkimin dhe inovacionin. Është i domosdoshëm. Duket sikur është një para e hedhur kot, por është para e hedhur më plot se çdo gjë tjetër dhe ne do ta vendosim për të gjitha kompanitë që kanë mbi 100 punonjës do ta vendosim, që të jetë e detyrueshme që të kenë një departament të inovacionit që të merret me gjithë pjesën e teknologjisë dhe do t’i bëjë shërbimin më të mirë çdo kompanie dhe do të na përgatisë për atë që na pret në aspektin e biznesit privat në momentin që të anëtarësohemi në BE, ku do t’ju sugjeroja të informoheni sa më shumë se çfarë do të ndodhë.

“Do të jetë një sfidë shemë e madhe për kompanitë tona që t’i mbijetojën atij tregu, jo e pamundur, por e vështirë. Sa më shumë të përgatitemi sot, aq më të lehtë do ta kemi kur të bëhemi pjesë e komunitetit evropian dhe në aspektin e biznesit”, tha Rama.

/m.q/

The post Rama: Kompanitë me mbi 100 punonjës do të kenë departament inovacioni appeared first on Agjencia Telegrafike Shqiptare.

TIRANË, 28 korrik/ATSH/ Fundjava solli në Pazarin e Vjetër të Korçës një udhëtim muzikor nga zemra e Arbërisë, aktivitetin ArbNight – Ethno Pulse.

Ky aktivitet u organizuar nga Qendra e Artit, Kulturës dhe Inovacionit, në bashkëpunim me COD-in (Qendra për Hapje dhe Dialog) si dhe me mbështetjen e Bashkisë Korçë.

Mes tingujve të historisë dhe atmosferës magjike të rrugicave korçare, publiku u magjeps nga interpretimet e veçanta të fizarmonicistit arbëresh Pierpaolo Petta nga Piana degli Albanesi (Sicili), i shoqëruar nga këngëtari Bledi Polena dhe kitaristi Nuçiel Doko.

Koncerti pati pjesë të rralla të folklorit arbëresh të Sicilisë, si dhe këngë të dashura të muzikës arbëreshe, duke e bërë këtë mbrëmje të paharrueshme për qytetarët dhe turistët që qëndruan për ta shijuar deri në fund. ArbNight solli në çdo hap, një kujtim ku çdo tingull fliste arbërisht.

1 nga 14

/r.e/

The post Tingujt dhe gjuha e arbëreshëve mbushin Pazarin e Vjetër të Korçës appeared first on Agjencia Telegrafike Shqiptare.

TIRANË, 28 korrik /ATSH/ Gjykata e Posaçme e Apelit për Korrupsionin dhe Krimin e Organizuar la në fuqi sot vendimin për masën e sigurimit detyrim për t’u paraqitur për kreun e Prokurimeve Publike, Jonaid Myzyri.

Ky i fundit kishte ankimuar vendimin e Gjykatës së Shkallës së Parë për Korrupsionin dhe Krimin e Organizuar.

Gjithashtu Gjykata e Apelit të Posaçëm la në fuqi edhe masën e pezullimit të ushtrimit të një detyre a shërbimi publik.

Kujtojmë se SPKA ka marrë të pandehur Myzyrin për shkelje të barazisë në tendera në lidhje me procedurë prokurorimi për mirëmbajtjen e aksit rrugor rruga Rrëshen (Ura e Fanit) – Shpal, Shpal – Q. Bene – Hadroj, Shpal – Ura e Repsit.

/m.q/

The post Apeli i GJKKO-së lë në fuqi masat e sigurisë për kreun e Komisionit të Prokurimeve Publike appeared first on Agjencia Telegrafike Shqiptare.

TIRANË, 28 korrik/ATSH-Maela Marini/ Kryeministri Edi Rama u ndal sot tek ndërtimet të cilat nuk respektojnë lejen e marrë, duke devijuar nga projekti, ndërsa u shpreh se arkitektët do të mbajnë përgjegjësi ligjore për ndërtimet që devijojnë nga projekti.

Rama ishte sot në Qendrën për Inovacion dhe Teknologji NEST, një strukturë e Fondit Shqiptar të Zhvillimit që u shërben edhe universiteteve dhe sipërmarrjes ku u prezantua një start up-i të rinjsh shqiptarë për financimin e sektorit të ndërtimit.

“Nevojitet një kapërcim i rëndësishëm nga komuniteti i investitorëve dhe ndërtuesve në Shqipëri, që është besueshmëria e projekteve. Projektet me arkitektët e huaj kanë ngjallur një interesim shumë të madh botërisht, i cili tani ka filluar të shtrihet edhe në fushën e investitorëve. Nuk është më një interesim kulturor ose një interesim thjesht i komunitetit të arkitektëve bashkëkohorë në botë, por është një interesim i investitorëve”, tha Rama.

Por, Rama theksoi se përballë besueshmërisë së arkitektëve kemi besueshmërinë e vetë projektit për t’u realizuar, ashtu si e ka paraparë arkitekti dhe jo për t’u marrë leja me projektin e arkitektit dhe pastaj të përfundojë në fund në një projekt që as arkitekti nuk e njeh më.

“Ky është një problem që e kemi sot të shtruar në tryezë. Si do të arrijmë që projektet t’i realizojmë besnikërisht? Bëhet gjithë ajo punë e madhe nga arkitektët bashkë me investitorët dhe ndërtuesit, bëhet gjithë ajo punë për t’i filtruar dhe kaluar në procesin e aprovimit, jepet leja dhe pastaj gjëja shkon në një drejtim të paditur, në një pjesë shumë të madhe të rasteve”, shtoi Rama.

Kryeministri tha se këtu nuk diskutohen detaje të vogla, por bëhet fjalë për volume që ndryshojnë.

“Natyrisht, që nga njëra anë është detyra jonë ta adresojmë këtë problematikë përmes masave të reja ligjore, që patjetër duhet të përfshijnë arkitektin si personin garant të projektit që mban përgjegjësi morale dhe ligjore për realizimin e projektit”, tha Rama.

1 nga 13

/r.e/

The post Rama: Arkitektët do të mbajnë përgjegjësi ligjore për ndërtimet që devijojnë nga projekti appeared first on Agjencia Telegrafike Shqiptare.

TIRANË, 28 korrik /ATSH/ Kryetari i Partisë Demokratike Sali Berisha tha sot se ndryshimet e paraqitura nga qeveria për Kodin Penal janë bërë pa asnjë konsultim publik.

Në një deklaratë për mediet nga selia blu, kreu i PD-së tha se ndryshimet e shpeshta e zhysin sistemin juridik në një mjedis pasigurie.

Sipas Berishës “stabiliteti i ligjit është kushti madhor i sigurisë juridike, e cila përbën dimensionin më cilësor të shtetit ligjor”.

Berisha tha se “duke përmbysur në mënyrë të vazhdueshme ligjet, ti vetë sistemin e zhyt në një mjedis pasigurie, sistemin juridik”.

“Do t’ju jap një shembull, ky është kodi i tretë në 30 vite. Në vitin 1995, u miratua Kodi i parë Penal. Në vitin 2014, me ndihmën e Euralius, u hartua Kodi Penal që është sot në fuqi. Dhe pa u mbushur 10 vite apo fiks në 10 vite, del nga shpellat e mafies, pa asnjë konsultim, një tekst tjetër i ri i Kodit Penal”, tha Berisha.

Berisha nënvizoi se “kodet plotësohen me veprat penale që krijohen, me praktikat që duhet të zbatohen, por të ndryshosh kod çdo 10 vite do të thotë se interesa tepër të mprehta të detyrojnë të ndërmarrësh një akt të tillë”.

“Dhe këtë kur e ndërmerr në mënyrë pothuaj të fshehtë, pa asnjë konsultim paraprak me faktorët kryesorë, me avokatët, me gjyqtarët, me prokurorët, me shoqërinë civile, me mediet, me deputetët, por del sikur e nxjerr nga shpella dhe e paraqet atë, tregon se nuk ke asgjë të përbashkët aty për interesat e shtetit ligjor, as të qytetarit, mbrojtjes së jetës dhe pronave të qytetarëve, por përkundrazi ke interesat shtetit mafioz, karteleve të drogës që të imponojnë të ndërmarrësh një hap të tillë në sekret të plotë”, tha Berisha.

Berisha u ndal edhe te propozimi për lirimin me kusht të të dënuarve me burgim të përjetshëm.

“Është kodi që vrasësit serialë i nxjerr nga dënimi i përjetshëm dhe u jep një shans të dytë, në një kohë kur në të gjitha ligjet, dhe sot në ligjet e vendeve demokratike të botës, ata marrin dënimin me vdekje. Dhe në qoftë se pyeten qytetarët sot, janë të gatshëm të votojnë për rivendosjen e dënimit me vdekje. Kodi është kryekëput infrastrukturë ligjore e narkoshtetit të instaluar”, u shpreh Berisha.

/m.q/r.e/

The post Berisha: Ndryshimet në Kodin Penal, e zhysin sistemin juridik në mjedis pasigurie appeared first on Agjencia Telegrafike Shqiptare.

TIRANË, 28 korrik /ATSH/ Ministrja e Shtetit për Sipërmarrjen dhe Klimën e Biznesit, Delina Ibrahimaj, tha sot se, “qeveria është duke ndërtuar strategjinë e re mbi Inteligjencën Artificiale për përdorimin e saj në çdo komponet, me qëllim zhvillimin e vendit”.

E pranishme në takimin që u zhvillua në Tiranë, me pjesëmarrjen e kryeministrit Edi Rama, në Qendrën për Inovacion dhe Teknologji NEST, një strukturë e Fondit Shqiptar të Zhvillimit që u shërben edhe universiteteve dhe sipërmarrjes, ajo theksoi se, “takimi i sotëm me ndërtuesit ka në fokus inovacionin, si një mundësi e mirë për të çuar përpara këtë sektor të rëndësishëm të ekonomisë së vendit”.

Ibrahimaj vlerësoi rëndësinë e zbatimit të teknologjive inovative në ofrimin e shërbimeve publike për qytetarët dhe zhvillimin e ekonomisë, ndërsa theksoi se, “tashmë platfomat inovative shërbejnë edhe për rritjen e financimit të sipërmarrjeve dhe veçanërit të sektorit të ndërtimit, që luan një rol të rëndësishëm në ekonominë e vendit”.

“Qeveria ka një vizion të qartë që vetëm përmes inovacionit, digjitalizimit, ekonomia shqiptare do të zhvillohet”, u shpreh Ibrahimaj, teksa tërhoqi vëmendjen se në sektorin privat teknologjitë inovative kanë nivel më të ulët përdorimi, në një kohë kur zbatimi i teknologjive të reja ul kostot dhe po rrit efikasitetin në prodhim.

“Takimi që zhvillohet sot në qendrën NEST ka për qëllim të na njohë sesi IA dhe zhvillimet teknologjike arrijnë të monitorojnë projekte në mbarë Shqipërinë dhe të reduktojë gabimet e mundshme. Ndërsa prezantimi i një start-up të ri do të na tregojë për lehtësitë që sjell përdorimi i teknologjisë në rritjen e aksesit në financim”, tha Ibrahimaj.

Sipas ministres, tashmë ka ardhur koha që financimi të mos jetë i fokusuar vetëm në kreditimin e bankave, por dhe në instrumente të reja teknologjike (promovim i biznesit në real estate apo qendra tregtare) ndihmon në zgjerimin e aksesit për financim nga investitorët apo partnerë ndërkombëtarë që kanë interes të investojnë në Shqipëri.

“Për këtë qëllim ne do të prezantojmë sot një platformë që rrit aksesin në financim me përfitim nga sipërmarrësit si në kosto, dhe lehtësi përfitimi”, tha ministrja e Shtetit për Sipërmarrjen dhe Klimën e Biznesit, Delina Ibrahimaj.

/r.e/

The post Qendra për Inovacion NEST, Ibrahimaj: Rrisim aksesin në financimin e sektorit të ndërtimit appeared first on Agjencia Telegrafike Shqiptare.

Më 1996, një zbulim i jashtëzakonshëm tronditi botën shkencore dhe nxiti një debat të ndezur që zgjati për gati një dekadë. Eshtrat e një njeriu të lashtë, tani të njohura si eshtrat e Kennewick Man, u gjetën në afërsi të qytetit Kennewick, në shtetin Washington. Këto mbetje i përkisnin një individi që kishte jetuar rreth 9 mijë vjet më parë, dhe analiza shkencore tregoi se ai kishte karakteristika fizike të dallueshme nga ato të amerikanëve vendas (indianëve të Amerikës), duke krijuar një enigmë të madhe rreth origjinës së tij.

Kennewick Man, që ishte i bardhë dhe shtatlartë, kishte një strukturë të ndryshme kockore, çka bëri që disa shkencëtarë të sugjeronin se ai mund të ishte pasardhës i popujve evropianë që arritën në Amerikë mijëra vjet më parë, shumë përpara mbërritjes së popujve të njohur indigjenë. Kjo sugjerim i çoi shumë në teori më të çuditshme, përfshirë idenë se Kennewick Man mund të ishte një nga mbijetuesit e qytetërimit të humbur të Atlantidës, një teori që ka ngritur dyshime dhe diskutime të shumta.

Por përplasja më e madhe që shkaktoi ky zbulim nuk ishte vetëm shkencore, por edhe ligjore dhe kulturore. Në vitin 1996, kur u gjetën eshtrat, një debat i ngjarë shpërtheu mes shkencëtarëve, qeverisë amerikane dhe fiseve autoktone të Amerikës. Pjesa më e madhe e popujve indigjenë pretendonin se Kennewick Man, ishte një nga paraardhësit e tyre, dhe se eshtrat duhej të trajtoheshin sipas ligjeve që mbrojnë trashëgiminë dhe të drejtat e fiseve autoktone. Në anën tjetër, shkencëtarët kërkonin që eshtrat të studioheshin për të nxjerrë më shumë informacion për historinë e hershme të njerëzve në Amerikën e Veriut.

Nëntë vjet pas gjetjes, në shkurt të vitit 2004, një vendim i Gjykatës së Apelit të shtetit Washington shpalli se nuk kishte asnjë lidhje gjenetike të mundshme midis Kennewick Man dhe ndonjë fisi të njohur të popujve të vjetër indigjenë të Amerikës, duke hapur një tjetër rrugë për kërkime të mëtejshme. Kjo do të thoshte që ky individ mund të kishte një prejardhje të ndryshme nga ajo që ishin supozuar deri më tani, dhe se ai mund të ishte pjesë e një vale të popujve të panjohur që ishin ndaluar në Amerikë mijëra vjet më parë.

Ky zbulim, i cili mbetet më i vjetri i eshtrave të gjetura ndonjëherë në Amerikën e Veriut, vazhdon të shkaktojë polemika dhe të ngjallë debate, jo vetëm për origjinën e Kennewick Man, por edhe për marrëdhëniet midis shkencës dhe kulturës indigjene, duke përshkuar një hapësirë të ngushtë mes të drejtave të popujve autoktonë dhe kërkimit shkencor për të kuptuar më shumë rreth paraardhësve të tyre. A janë Kennewick Man dhe të tjerë si ai dëshmi e një popullsie të humbur që arriti në këtë kontinent mijëra vjet më parë? A mund të ishin paraardhësit e popujve të Atlantidës, siç pretendohet nga disa? Ose është një dëshmi tjetër që na tregon se historia e migrimeve njerëzore është shumë më komplekse dhe shumë më e hershme sesa e kemi menduar?

Sot, eshtrat e Kennewick Man vazhdojnë të mbeten një mister dhe një pikë referimi për të gjithë ata që janë të interesuar të kuptojnë më shumë për historinë e hershme të Amerikës, duke përballuar pyetje që ndoshta mund të mos kenë përgjigje kurrë./KultPlus.com

Muzikë xhaz dhe performanca të shkëlqyera nga vende të ndryshme të botës, do të mbahen nga data 8 deri më 10 gusht 2025, në Festivalin Mitrovica International Jazz Days.

Me moton “MitroLove”, festivali promovon muzikën cilësore dhe fuqizimin e të rinjëve dhe grave në skenën vendore dhe ndërkombëtare të xhazit.

Këtë vit Mitrovica International Jazz Days ka ftuar muzikantë të rinj nga 18-30 vjeç që luajnë jazz, rock, alternative, hip-hop, punk, metal, new wave, fusion, pop dhe zhanre të tjera moderne, që të aplikojnë për performancë si solistë ose si grup deri në pesë muzikantë./KK/

Presidenti Donald Trump gjatë fundjavës bëri thirrje për ndjekjen penale të superyllit të muzikës Beyoncé – bazuar në diçka që nuk ka ndodhur në të vërtetë.

Trump pretendoi në një postim në rrjetet sociale se Beyoncé shkeli ligjin duke u paguar gjoja 11 milionë dollarë për mbështetjen e saj ndaj kandidates presidenciale demokrate Kamala Harris gjatë një eventi në tetor 2024 në Hjuston.

Por thjesht nuk ka asnjë bazë për pretendimin e Trump se Beyoncé mori një pagesë prej 11 milionë dollarësh në lidhje me fushatën e Harris, e lëre më për mbështetjen në veçanti.

Të dhënat e shpenzimeve të fushatës federale tregojnë një pagesë prej 165,000 dollarësh nga fushata e Harris për kompaninë e prodhimit të Beyoncé-s, të cilën fushata e renditi si një shpenzim “prodhimi të ngjarjes së fushatës”. Një zëdhënës i fushatës së Harris i tha Deadline vitin e kaluar se ata nuk i paguanin mbështetësit e famshëm, por ishin të detyruar me ligj të mbulonin kostot e lidhura me paraqitjet e tyre.

Pavarësisht meritave të këtij shpenzimi të veçantë prej 165,000 dollarësh, është larg të qenit një shpenzim prej 11 milionë dollarësh. Askush nuk ka paraqitur ndonjëherë ndonjë provë për pretendimin e një pagese tetëshifrore si mbështetje për Beyoncé-n, që kur pretendimi se ishte “10 milionë dollarë” filloi të përhapej vitin e kaluar midis mbështetësve të Trump në mediat sociale. Faqet e internetit për verifikimin e fakteve FactCheck.org dhe PolitiFact shqyrtuan pretendimin “10 milionë dollarë” gjatë fushatës dhe nuk gjetën asnjë bazë për të.

Shtëpia e Bardhë nuk iu përgjigj menjëherë një kërkese të CNN të shtunën vonë për ndonjë provë të shifrës prej 11 milionë dollarësh të Trump. Kur Trump përmendi më parë shifrën e pabazë, gjatë një interviste në shkurt, ai e përshkroi burimin e tij me termat më të paqarta: “Dikush sapo më tregoi diçka. Ata i dhanë asaj 11 milionë dollarë.”

Një zëdhënës i Harris iu referuar CNN të shtunën një postimi në rrjetet sociale në nëntor nga nëna e Beyoncé-s, Tina Knowles, e cila e quajti pretendimin për një pagesë prej 10 milionë dollarësh një “gënjeshtër” dhe vuri në dukje se u hoq nga Instagram si “Informacion i rremë”.
“Kur në fakt: Beyonce nuk mori asnjë qindarkë në tubimin e kandidates presidenciale, zëvendëspresidentes Kamala Harris, në Hjuston”, shkroi Knowles.

Një zëdhënës i Beyoncé i tha PolitiFact në nëntor se pretendimi për një pagesë prej 10 milionë dollarësh është “tejkalimisht qesharak”.

Çfarë shkroi Trump të dielën
Trump e ringjalli pretendimin e rremë në një postim në mediat sociale të publikuar pas mesnatës herët të dielën në mëngjes në Skoci, ku ai po qëndron për vizitë. Ai shkroi se po shqyrton “faktin” që demokratët “pranojnë se i kanë paguar, ndoshta ilegalisht, njëmbëdhjetë milionë dollarë këngëtares Beyoncé për një MBËSHTETJE”.

Zyrtarët demokratë në fakt e hedhin poshtë pretendimin për një pagesë prej 11 milionë dollarësh. Shtëpia e Bardhë nuk iu përgjigj menjëherë kërkesës së CNN për ndonjë provë të pranimit demokrat të një pagese të tillë.

Trump vazhdoi të kritikonte pagesat e tjera nga fushata e Harris për organizatat e lidhura me mbështetës të shquar. Ai pohoi pa prova se këto pagesa ishin përshkruar në mënyrë të pasaktë në të dhënat e shpenzimeve. Dhe ai pohoi gabimisht se është “PLOTËSISHT E PALIGJSHME” të paguash për mbështetje politike, megjithëse asnjë ligj federal nuk i ndalon pagesat e mbështetjes .

Trump përfundoi: “Kamala dhe të gjithë ata që morën para nga mbështetja, e SHKELËN LIGJIN. Të gjithë duhet të ndiqen penalisht! Faleminderit për vëmendjen tuaj ndaj kësaj çështjeje.”

Trump ka bërë thirrje të përsëritura për ndjekjen penale të kundërshtarëve politikë. Postimi i tij i së shtunës në lidhje me Harris dhe mbështetjen e të famshmëve ishte një përshkallëzim nga një postim në maj, kur ai tha se do të bënte thirrje për një “hetim të madh” mbi këtë temë, por nuk përmendi në mënyrë të qartë ndjekjet penale./ie/

Granit Xhaka është gati të rikthehet në Premierligë pas një periudhe të suksesshme në Bundesligë. Ylli kosovar ka arritur marrëveshje me Sunderlandin, që do të paguajë 20 milionë euro për shërbimet e tij, duke siguruar transferimin e mesfushorit nga Bayer Leverkusen.

Xhaka do të nënshkruajë një kontratë 3-vjeçare me Sunderlandin, skuadër që është rikthyer në elitën e futbollit anglez. Ai pritet të fluturojë sot për në Angli dhe të prezantohet te skuadra e re, ku do të kontribuojë me përvojën e tij të madhe në një kampionat të njohur si Premierliga.

Ky transferim do të jetë një hap i rëndësishëm në karrierën e Xhakës, që vazhdon të shkëlqejë në arenën ndërkombëtare./KultPlus.com

Armend Rexhepagiqi, një nga artistët më të dashur të muzikës shqiptare, do të ngjitet në skenën e Kalasë së Ulqinit për një koncert të jashtëzakonshëm që pritet të mbledhë artdashës nga e gjithë rajoni dhe diaspora. Koncerti do të zhvillohet në mjedisin historik të Kalasë, duke filluar nga ora 21:30, dhe hyrja do të jetë falas për të gjithë ata që duan të shijojnë këtë mbrëmje të paharrueshme.

Ky aktivitet është pjesë e manifestimit tradicional “Ditët e Diasporës”, i organizuar nga Komuna e Ulqinit, me mbështetje nga Ministria e Diasporës, Organizata Turistike dhe Qendra për Kulturë.

Përveç performancës muzikore, mbrëmja do të ofrojë një atmosferë magjike, e përshtatshme për çdo adhurues të muzikës dhe kulturës shqiptare. Mos e humbisni këtë mundësi për të kaluar një natë të veçantë në një nga vendet më historike të qytetit të Ulqinit!/KultPlus.com

Lionel Messi dhe bashkëshortja e tij, Antonela Roccuzzo, janë bërë sërish viral në rrjet pas një paraqitjeje të papritur në koncertin e Coldplay në “Hard Rock Stadium”, Miami.

Teksa turma po shijonte koncertin, një moment i veçantë ndezi atmosferën: Messi u shfaq papritur në ekranin gjigant të stadiumit. Publiku shpërtheu menjëherë me brohorima dhe thirrje “Messi! Messi!”, ndërsa futbollisti legjendar buzëqeshte me modesti.

Antonela dukej në formë të shkëlqyer përkrah tij, duke kërcyer dhe shijuar muzikën, ndërsa Chris Martin ndaloi gjithçka për t’u drejtuar vetë Messit nga skena:
“Lio, vëllai im i bukur. Ti dhe gruaja jote dukeni fantastik. Faleminderit që erdhët sonte. Je sportisti më i madh i të gjitha kohërave,” tha ai, mes duartrokitjeve.

Përshëndetja e thjeshtë e Messit i çmendi tifozët, duke e krahasuar momentin me një spektakël të Kupës së Botës FIFA. Tifozët vlerësuan elegancën e lehtë të çiftit, me disa që bënë shaka se ai “nuk ka asgjë për të fshehur”./KultPlus.com

Coldplay x Leo Messi x Antonela pic.twitter.com/iKQiuMDByQ

— Fan Club | Leo Messi (@WeAreMessi) July 28, 2025

Tom Lehrer, satiristi i njohur amerikan, i cili fitoi famë për këngët e tij satirike që tallnin politikën, racizmin dhe Luftën e Ftohtë, ka ndërruar jetë në moshën 97 vjeçare. Lajmin e bëri të ditur David Herder, miku i tij i hershëm, i cili njoftoi se Lehrer ka ndërruar jetë të shtunën në shtëpinë e tij në Kembrixh, Massachusetts. Ai nuk specifikoi shkakun e vdekjes.

Lehrer ishte i njohur për baladat e tij komike dhe të errëta, të cilat shpesh herë provokonin dhe ngacmonin tema të ndjeshme, siç janë politika dhe feja. Disa nga këngët më të njohura dhe të kontestuara të tij përfshinin “Poisoning Pigeons in the Park”, “The Old Dope Peddler”, dhe “The Vatican Rag”, një këngë që tallte ritet dhe ceremonitë e Kishës Katolike Romake, duke shfaqur qëndrimet ateiste të Lehrer, transmeton KultPlus

Lehrer lindi në 1928 në Manhattan, ishte djali i një stilisti të suksesshëm të kravatave dhe një pianist i trajnuar në muzikën klasike. Ai qëndroi në fakultetin e matematikës në Universitetin e Kalifornisë në Santa Cruz deri në fund të të 70-ave, por më pas u fokusua në karrierën e tij si kompozitor dhe satirist.

Në vitin 2020, Lehrer bëri një hap të pazakontë duke hequr dorë nga të drejtat e tij të autorit, duke i dhënë leje publikut që të përdorte tekstet e këngëve të tij në çdo format, pa asnjë tarifë në këmbim.
Tom Lehrer ishte gjithashtu një person që zgjodhi të mos krijonte familje. Ai nuk u martua kurrë dhe nuk pati fëmijë, por ndikimi i tij në kulturën amerikane dhe botërore mbetet i fuqishëm përmes këngëve të tij të paharrueshme.

Me kalimin e kohës, Tom Lehrer ka lënë një trashëgimi të jashtëzakonshme, duke provokuar mendimin dhe duke bërë publikut të mendojë për temat më të ndjeshme të shoqërisë përmes humorit të tij të ashpër dhe të mençur./KultPlus.com

Si qëndrojnë të informuar sot njerëzit rreth asaj që ndodh në botë? Në shumicën e vendeve, televizioni, gazetat dhe faqet tradicionale të lajmeve po humbasin terren.

Sipas raportit më të fundit të Reuters Institute, interesi për mediat tradicionale është në rënie, me besim të ulët, angazhim të dobët dhe abonime që nuk po rriten më.

Ku po i lexojnë lajmet njerëzit në 2025? Dhe cilat janë pasojat?

Rritja e mediave sociale dhe videove

Në një kohë pasigurie politike dhe ekonomike, krizash klimatike dhe konfliktesh të vazhdueshme, nuk mungojnë temat për t’u raportuar. Por publiku po i drejtohet burimeve të reja për t’u informuar, kryesisht rrjeteve sociale, platformave të videove dhe faqeve përmbledhëse online.

Përdorimi i rrjeteve sociale për të ndjekur lajme po rritet në shumë vende, veçanërisht në SHBA, Amerikën Latine, Afrikë dhe disa vende të Azisë Juglindore. Në SHBA, për herë të parë, përdorimi i rrjeteve sociale dhe videove për të lexuar lajmet ka tejkaluar televizionin dhe faqet tradicionale të lajmeve.

Edhe në Europë, ku mediat tradicionale janë treguar më rezistente, përdorimi i rrjeteve sociale për lajme është në rritje. Në Mbretërinë e Bashkuar dhe Francë, rreth një në pesë persona tashmë informohen kryesisht përmes rrjeteve sociale, një rritje e ndjeshme krahasuar me një dekadë më parë.

Në të gjitha vendet e përfshira në raport, konsumi i videove për lajme është në rritje. Ky trend është më i fortë tek të rinjtë: 44% e personave 18–24 vjeç dhe 38% e grupmoshës 25–34 vjeç thonë se rrjetet sociale dhe videot janë burimet e tyre kryesore të informacionit.

Tendenca të reja: Podcastet dhe inteligjenca artificiale

Raporti thekson dy tendenca të reja. E para është rritja e përdorimit të një “ekosistemi alternativ mediatik”, ku njerëzit ndjekin më shumë podcaste dhe krijues përmbajtjesh në platforma si YouTube dhe TikTok, ky i fundit është rrjeti që po rritet më shpejt.

Në disa vende, personazhe të njohur dhe ndikues online (influencer) po luajnë një rol kyç në formësimin e debateve publike. Në SHBA, për shembull, podkasti i Joe Rogan arrin tek një në pesë qytetarë. Në Francë, 22% e personave nën 35 vjeç ndjekin Hugo Travers, një krijues lajmesh në YouTube dhe TikTok.

Influencerë të rinj po marrin gjithashtu një rol të rëndësishëm në shumë vende të Azisë, sipas raportit.

Tendenca e dytë ka të bëjë me përdorimin e inteligjencës artificiale si burim lajmesh. Ndërsa motorët e kërkimit dhe platformat e tjera po integrojnë lajmet në kohë reale në produktet e tyre, 7% e njerëzve po marrin lajme përmes chatbot-eve çdo javë. Kjo shifër rritet në 15% tek ata nën 25 vjeç.

Rreziqet e dezinformimit

Besimi i përgjithshëm në media qëndron në nivelin 40%, sipas raportit. Por shumë njerëz shprehin shqetësim për mënyrën se si po ndryshon mënyra e konsumimit të lajmeve.

Edhe pse disa janë optimistë për përfitimet e mundshme që sjell inteligjenca artificiale, si përmbledhja apo përkthimi i lajmeve, shumë të tjerë janë skeptikë, duke menduar se ajo mund t’i bëjë lajmet më pak të sakta, transparente apo të besueshme. Gjithashtu, ekziston frika se publiku mund të humbasë lajme të rëndësishme.

Nga ana tjetër, personazhet e famshëm online dhe influencerët shihen gjithashtu si një burim i mundshëm dezinformimi. Kjo përputhet edhe me gjetjet e raportit të fundit të Forumin Ekonomik Botëror për Rreziqet Globale, ku dezinformimi dhe keqinformimi u renditën si rreziqet më shqetësuese për dy vitet e ardhshme.

Më shumë se gjysma e njerëzve të anketuar në raportin e Reuters-it shprehën shqetësim për dallimin midis lajmeve online të vërteta dhe atyre të rreme. Mediat e besueshme të lajmeve mbeten vendi kryesor ku njerëzit shkojnë për të verifikuar vërtetësinë e një informacioni.

Edukimi dixhital dhe përdorimi i përgjegjshëm i IA

Sipas raportit të Forumit Ekonomik Botëror, përdorimi në rritje i platformave dixhitale dhe i përmbajtjes së gjeneruar nga IA po e bën më të zakonshëm përhapjen e lajmeve të rreme dhe përçarëse. Kjo përforcon risqe të tjera globale, që nga konfliktet ushtarake deri te ngjarjet ekstreme klimatike.

Raporti përfundon se po bëhet gjithnjë e më e vështirë për njerëzit të kuptojnë se ku duhet të drejtohen për informacion të besueshëm.

Për këtë arsye, sugjerohet që qeveritë, bizneset dhe organizatat e shoqërisë civile të ndërmarrin programe ndërgjegjësimi dhe edukimi dixhital për të ndihmuar qytetarët të kuptojnë rreziqet e mjedisit online dhe të identifikojnë përmbajtjet e rrezikshme ose të njëanshme.

Përmirësimi i transparencës dhe i mekanizmave të përgjegjshmërisë për përdorimin e IA-së do të jetë gjithashtu një pjesë e rëndësishme e zgjidhjes. / WEF, Shqip.al

The post Si po qëndrojnë të informuar njerëzit në vitin 2025 appeared first on Revista Monitor.

Qeveria do të krijojë një listë të zezë për ndërtuesit që shkelin lejet, ata do të përjashtohen nga marrja e lejeve të reja, deklaroi kryeministri Rama gjatë prezantimit të një start-up-i inovativ nga të rinj shqiptarë, i cili synon të krijojë mundësi të reja financimi për sektorin e ndërtimit.

Kreu i qeverisë u ndal te problematika që lidhet me devijimet nga projektet e miratuara në procesin e ndërtimit.

Të gjitha kantieret do të pajisen me kamera sigurie për monitorim 24 orë.

“Ky është një problem që e kemi sot të shtruar në tryezë: si do të arrijmë që projektet t’i realizojmë besnikërisht. Bëhet ajo punë bashkë me investitorët dhe ndërtuesit, bëhet ajo punë për t’i filtruar dhe për t’i kaluar në procesin e aprovimit, i jepet leja dhe pastaj gjëja shkon në një drejtim të paditur. Ndryshojnë edhe volumet. Këtu është detyra jonë ta adresojmë këtë problematikë përmes masave të reja ligjore, që do përfshijnë arkitektin si personin garant, që mban përgjegjësi morale dhe ligjore për realizimin e projektit. Kjo nuk është çështje masash ligjore, por vetëdije nga ana e investuesve dhe ndërtuesve për të aksesuar këtë treg të ri financiar që mund të bëhet një burim shumë i shpejtë.

Këtë vit do ta çojmë më tutje. Në dy-tre vitet në vijim do ta bëjmë intensive pjesëmarrjen tonë në panaire të mëdha të real estate, të pasurive imobiliare, për të prezantuar projekte, investimet potenciale, për të prezantuar investitorët, palët e tjera të interesuara. Nga ana tjetër, kjo kërkon garanci. Garancia është realizimi i projekteve në mënyrë besnike. Ne do të bëjmë çmos që nga ana jonë të ndërtojmë një plan masash të reja represive, që do duhet të balancojnë pjesën e gjithë mbështetjes dhe të gjithë kanaleve të reja që do përpiqemi të hapim për ju dhe industrinë e ndërtimit — karrota nga njëra anë, shkopi nga ana tjetër. Në të kundërt, e kemi të pamundur; mund të humbasim një shans historik dhe s’do afrohet njeri për të financuar.

Këto projekte të mëdha s’mund t’i realizojmë siç duhet duke u mbështetur te shitja “në gropë”, te kleringu dhe blerësit e rastësishëm brenda vendit. Listë e zezë për ndërtuesit që nuk respektojnë rregullat, pamundësi për të marrë leje. Kantieret e ndërtimit do kenë kamera 24 orë; kjo gjë do t’ju vlejë edhe juve në ndjekjen e punës dhe praktikën tuaj. Është shumë e vlefshme për të gjitha aspektet që lidhen me sigurinë dhe garantimin e projektit.”

Kompanitë që kanë më shumë se 100 punonjës do të kenë të detyrueshme praninën e departamentit të inovacionit, deklaroi Rama.

“Në një program monitorimi përmes AI mund të ndiqet kantieri nga larg dhe të shihet puna në raport me projektin. Po përfundojmë qendrën e monitorimit me dronë të integruar edhe me satelitët, do t’ju sugjeroja të shihnit se çfarë bëhet në këtë godinë për të pasur një sens të kompanive tuaja që të angazhojnë dhe një ekip për inovacionin. Të gjitha kompanitë që kanë mbi 100 punonjës do ta vendosim të detyrueshëm një departament të inovacionit.”

The post Kryeministri Rama: Listë e zezë për ndërtuesit që shkelin lejet, devijojnë projektet appeared first on Revista Monitor.

Kur kanë mbetur edhe katër ditë nga afati i fundit për dorëzimin online të pasqyrave financiare në Qendrën Kombëtare të Biznesit (QKB), subjektet po hasin sërish vështirësi.

Bizneset raportuan pranë Monitor se sërish nuk arrijnë që të ngarkojë pasqyrat online gjatë paradites të së hënën. E njëjta situatë u përsërit edhe në 25 korrik për disa orë dhe më pas situata u normalizua.

Afati i fundit për dorëzimin e pasqyrave financiare është data 31 korrik (të enjten) dhe në rast të mos dorëzimit në kohë, subjektet ngarkohen me një gjobë prej 60 mijë lekësh.

Janë mbi 20 mijë biznese, që kanë detyrim që të dorëzojnë bilancet e vitit 2024.

Reagon Shoqata Aleanca e Profesionistëve të Lirë: Po krijohet presion i panevojshëm për bizneset

Shoqata Aleanca e Profesionistëve të Lirë (APL) ka reaguar lidhur me situatën e krijuar.

Në një prononcim për Monitor, Shoqata tha se “Platforma e depozitimit të pasqyrave financiare, raporteve ligjore dhe auditimit në Shqipëri me afat dorëzimi më 31 korrik, është e integruar me sistemin qendror e‑Albania dhe synon të sjellë lehtësi e transparencë në procesin e raportimit financiar.

Megjithatë, gjatë kësaj periudhe është vënë re se ngarkesa e lartë dhe ndërprerjet e herëpashershme teknike e kanë bërë procesin e depozitimit më të vështirë, duke shkaktuar vonesa dhe pasiguri për shumë përdorues.

Këto pengesa po krijojnë presion të panevojshëm mbi bizneset, kontabilistët dhe audituesit, të cilët përballen me rrezikun e penaliteteve për vonesa që nuk varen nga ta.

Për më tepër, situata ka shkaktuar edhe keqkuptime mes profesionistëve dhe klientëve, të cilët shpesh nuk janë plotësisht të informuar mbi natyrën e problemeve dhe mbi përgjegjësitë përkatëse.

Për të shmangur pasoja të panevojshme dhe për të siguruar një raportim cilësor e në përputhje me ligjin, do të ishte e arsyeshme të merrej në konsideratë një shtyrje e afatit të dorëzimit, derisa platforma të funksionojë në mënyrë të qëndrueshme dhe me kapacitet të plotë.

Nga ana jonë, jemi të gatshëm të ofrojmë mbështetje dhe bashkëpunim të plotë me sistemin e‑Albania dhe institucionet përkatëse. Qasja jonë është konstruktive, ku synojmë të ndihmojmë në gjetjen e një zgjidhjeje praktike, të drejtë dhe afatgjatë, në dobi të të gjithë përdoruesve të platformës dhe të vetë sistemit”.

Detyrimi për dorëzimin e bilanceve

Më herët, QKB u ka rikujtuar të gjitha subjekteve tregtare rëndësinë e depozitimit në kohë të pasqyrave financiare për vitin 2024.

Sipas njoftimit, dorëzimi brenda afatit ligjor është i detyrueshëm dhe shmang masat administrative.

Afati i fundit është data 31 Korrik 2025.

Aplikimi kryhet vetëm në mënyrë elektronike përmes portalit e-Albania.

Dokumentacioni përfshin (kur mbajtja e tyre është i detyrueshëm):
* Pasqyrat financiare vjetore
* Raportin e ecurisë së veprimtarisë
* Raportin e auditimit.

The post Dorëzimi bilanceve ngec sërish; APL: Po krijohet presion i panevojshëm për bizneset appeared first on Revista Monitor.

Numri i abonentëve të internetit nga linjat fikse pësoi një rënie të lehtë në tremujorin e parë të vitit.

Të dhënat e Autoritetit të Komunikimeve Elektronike dhe Postare (AKEP) tregojnë se numri i abonentëve për tremujorin e parë arriti në afërsisht 681 mijë, me një rënie 0.7% krahasuar me fundin e vitit të kaluar. Megjithatë, numri i abonentëve vazhdon rritjen me bazë vjetore, me 7.1% më shumë krahasuar me tremujorin e parë 2024.

Tregu i shërbimit të internetit broadband me linja fikse në përgjithësi paraqitet mjaft konkurrues, veçanërisht në qendrat e mëdha urbane, ku përqendrimi i popullsisë është më i lartë dhe tërheq investime në infrastrukturë rrjeti nga operatorët.

Kjo ka bërë që numri i abonentëve të rritet në mënyrë të vazhdueshme, duke e ngushtuar prapambetjen historike që ka pasur vendi ynë në depërtimin e linjave fikse të komunikimit dhe të shërbimeve që mbështeten te to.

Sipas AKEP, vitin e kaluar sipërmarrësit e rrjeteve fikse kanë kryer rreth 2.89 miliardë lekë investime në rrjetet e tyre duke shënuar një rritje të lehtë krahasuar me vitin 2023 ku kjo shifër ishte rreth 2.75 miliardë lekë.

Sipas raportimeve, edhe në këtë vit investimet janë kanalizuar kryesisht në funksion të përmirësimit të aksesit të shërbimeve broadband rreth 87% e totalit, ku ndër investimet kryesore është fokusimi drejt zhvendosjes së rrjeteve të transmetimit nga teknologjia DSL (me tela bakri) drejt teknologjisë me fibër optike.

Sipas të dhënave nga AKEP, në fund të tremujorit I 2025, tregu kryesohej përsëri nga One Albania, që raportonte më shumë se 150 mijë abonentë në shërbimin e internetit me brez të gjerë, shifër që përbën afërsisht 22% të numrit të përgjithshëm të abonentëve të tregut.

One Albania ka pësuar tkurrje të numrit të abonentëve me 1.3% gjatë tremujorit, por ky numër ngelet në rritje vjetore me 3.8%. Pas bashkimit mes dy operatorëve mes One Telecommunications dhe Albtelecom, kompania e re, One Albania ka përmirësuar ndjeshëm ecurinë e saj në segmentin e shërbimeve fikse.

Vodafone Albania për tremujorin e parë raportonte më shumë se 147 mijë abonentë, në rritje me 2.1% gjatë tremujorit dhe me 15.6% krahasuar me një vit më parë. Vodafone mban vendin e dytë në tregun e internetit, me 21.6% të numrit të përgjithshëm të abonentëve.

Kompanitë e tjera janë ende larg dy aktorëve mbizotërues në treg. E treta pozicionohet ASC (Tring), me 9% të numrit të abonentëve, e ndjekur nga Abissnet, me 6%, Digicom, me 5% dhe Nisatel, me 4%. Në këtë treg veprojnë edhe një numër i konsiderueshëm operatorësh më të vegjël rajonale dhe lokalë, që, të marrë së bashku, sipas vlerësimeve të AKEP, zotërojnë afërsisht 28% të numrit të përgjithshëm të abonentëve.

Sipas të dhënave më të fundit financiare, të vitit 2024, volumi i tregut të shërbimeve nga rrjetet fikse vitin e kaluar ra në 11.6 miliardë lekë, me një rënie prej 2% krahasuar me një vit më parë. / E.Shehu

Burimi: AKEP

The post Numri i abonentëve të internetit me linja fikse pësoi rënie në tremujorin e parë appeared first on Revista Monitor.

Mesfushori i Barit, Mathias Verreth ka humbur djalin e tij 14-muajsh pasi ndërroi jetë. Lajmi tronditi të gjithë komunitetin me klubin që njoftoi, në shenjë zie dhe respekti, se do të largohen nga kampi stërvitor në Roccaraso, duke u rikthyer në qytet. Futbollisti natyrisht, është rikthyer në Belgjikë, ku jeton familja e tij.

NJOFTIMI

Jemi pa fjalë teksa ndajmë lajme që sapo na kanë tronditur thellësisht secilin prej nesh.
Presidenti Luigi De Laurentiis, stafi i trajnerëve, i gjithë ekipi, menaxhmenti dhe bashkëpunëtorët e kuqe e të bardhëve shprehin ngushëllimet e tyre më të thella për Matthias Verreth dhe familjen e tij në një nga momentet më të tmerrshme që një prind dhe një qenie njerëzore mund të përjetojë: vdekjen e papritur dhe të parakohshme të një fëmije.

U kërkojmë të gjithë tifozëve, meshkuj dhe femra, të shprehin ngushëllimet e tyre më të thella për Matthias, gruan e tij, fëmijën e tyre të parë dhe të gjithë të dashurit e tyre në këtë moment pikëllimi të tmerrshëm. Grupi kuqe e të bardhëve do të kthehet në Bari sot në shenjë zie dhe respekti për një tragjedi të tillë./e.t